ການດຶງດູດ, ຝຶກອົບຮົມ ແລະ ນຳໃຊ້ຜູ້ເກັ່ງກ້າສາມາດດ້ານການທະຫານ
ໃນເງື່ອນໄຂການປະຕິວັດອຸດສາຫະກຳຄັ້ງທີສີ່
ໃນເງື່ອນໄຂການປະຕິວັດອຸດສາຫະກຳຄັ້ງທີສີ່
ວກ. - ຄົນເກັ່ງໂດຍທົ່ວໄປ, ຄົນເກັ່ງໃນຂົງເຂດການທະຫານໂດຍສະເພາະ ແມ່ນ “ຊັບພະຍາກອນອັນລ້ຳຄ່າ” ຂອງປະເທດ. ໃນເງື່ອນໄຂການປະຕິວັດອຸດສາຫະກຳຄັ້ງທີສີ່, ການດຶງດູດ, ຝຶກອົບຮົມ ແລະ ເຄົາລົບໃຊ້ຄົນເກັ່ງໃນຂົງເຂດການທະຫານ ແມ່ນຄວາມຮຽກຮ້ອງຕ້ອງການພາວະວິໄສ ແລະ ແມ່ນບັນຫາທີ່ມີຄວາມໝາຍຍຸດທະສາດ ຮີບດ່ວນ, ແນໃສ່ກໍ່ສ້າງແລະນຳໃຊ້ຊັບພະຍາກອນບຸກຄົນຄຸນນະພາບສູງໃນກອງທັບຢ່າງມີປະສິດທິຜົນ ເພື່ອຕອງສະໜອງຄວາມຕ້ອງການ, ໜ້າທີ່ການທະຫານ, ການປ້ອງກັນປະເທດໃນສະພາການໃໝ່.
ໃນປະຫວັດສາດແຫ່ງການກໍ່ຕັ້ງປະເທດ ແລະ ປົກປັກຮັກສາປະເທດ, ຫວຽດນາມມີບົດຮຽນປະສົບການຫຼາຍຢ່າງກ່ຽວກັບການຄົ້ນພົບ, ຄັດເລືອກ ແລະ ນຳໃຊ້ຄົນເກັ່ງ, ຖືວ່າຄົນເກັ່ງມີສິນທຳແມ່ນ “ປັດໄຈກຳລັງແຮງຂອງຊາດ”. ເມື່ອຍັງມີຊີວິດຢູ່, ປະທານໂຮ່ຈີມິນໄດ້ເອົາໃຈໃສ່ທີ່ສຸດເຖິງວຽກງານຝຶກອົບຮົມພະນັກງານ, ເຄົາລົບໃຊ້ຄົນເກັ່ງ. ເພິ່ນຊີ້ແຈງວ່າ: “ພັກຕ້ອງລ້ຽງສອນພະນັກງານ, ຄືກັບຊາວສວນປູກຕົ້ນໄມ້ທີ່ລ້ຳຄ່າ. ຕ້ອງເຄົາລົບຕົນເກັ່ງ, ເຄົາລົບພະນັກງານ, ເຄົາລົບແຕ່ລະຄົນທີ່ເປັນປະໂຫຍດສຳລັບວຽກງານລວມຂອງພາກເຮົາ”(1). ໃນພາລະກິດການປະຕິວັດຂອງຊາດ, ພັກກອມມູນິດຫວຽດນາມ, ລັດຫວຽດນາມ, ກອງທັບປະຊາຊົນຫວຽດນາມ ໄດ້ສືບທອດແລະເສີມຂະຫຍາຍບົດຮຽນຂອງບັນພະບຸລຸດສະເໝີ, ເອົາໃຈໃສ່ເປັນປະຈຳເຖິງການເບິ່ງແຍງດູແລ, ກໍ່ສ້າງ ແລະ ປະຕິບັດເປັນຢ່າງດີ ການດຶງດູດ, ຝຶກອົບຮົມ ແລະ ເຄົາລົບໃຊ້ຄົນເກັ່ງ, ຖືວ່ານີ້ແມ່ນໜຶ່ງໃນບັນດາປັດໄຈທີ່ຕັດສິນຊີ້ຂາດຜົນສຳເລັດຂອງການປະຕິວັດ ກໍຄືຜົນສຳເລັດຂອງພາລະກິດການສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ.
ໃນຊຸມປີທີ່ຜ່ານມາ, ຊາດຊຶມບັນດາມະຕິ, ຄຳສັ່ງ, ຂໍ້ສະຫຼຸບຂອງພັກ ແລະ ລັດກ່ຽວກັບການດຶງດູດ, ຝຶກອົບຮົມ ແລະ ເຄົາລົບໃຊ້ຄົນເກັ່ງ, ເຊັ່ນ: ບົດສະຫຼຸບເລກທີ 86-KL/TW, ລົງວັນທີ 24 ມັງກອນ 2014, ຂອງກົມການເມືອງສູນກາງ, “ກ່ຽວກັບນະໂຍບາຍດຶງດູດ, ສ້າງແຫຼ່ງພະນັກງານ ຈາກນັກສຶກສາທີ່ຈົບມະຫາວິທະຍາໄລຢ່າງດີເລີດ ແລະຈາກນັກວິທະຍາສາດໜຸ່ມ”; ມະຕິເລກທີ 52-NQ/TW, ລົງວັນທີ່ 27 ກັນຍາ 2019, ຂອງກົມການເມືອງສູນກາງ, “ວ່າດ້ວຍບາງແຜນນະໂຍບາຍ, ນະໂຍບາຍເຂົ້າຮ່ວການປະຕິວັດອຸດສາຫະກຳຄັ້ງທີ່ສີ່ຢ່າງເປັນເຈົ້າການ”,... ຄະນະພັກການທະຫານສູນກາງ, ກະຊວງການປ້ອງກັນປະເທດໄດ້ປະກາດໃຊ້ຫຼາຍມະຕິ, ຄຳສັ່ງ, ຍຸດທະສາດ, ວາງອອກບັນດາແຜນນະໂຍບາຍແລະວິທີແກ້ ເພື່ອດຶງດູດ, ຄັດເລືອກ, ຝຶກອົບຮົມ, ນຳໃຊ້ຄົນເກັ່ງ ແລະ ໄດ້ບັນລຸຜົນສຳເລັດທີ່ສຳຄັນຫຼາຍຢ່າງ. ບັນດາພະນັກງານທີ່ຖືກເລືອກ, ຝຶກອົບຮົມ ຫຼື ບຳລຸງສ້າງຍົກສູງຄວາມຮູ້ດ້ານການທະຫານ, ການປ້ອງກັນປະເທດ ໃນບັນດາໂຮງຮຽນການທະຫານ ລ້ວນແຕ່ມີເຈດຈຳນົງ ຄວາມຕັດສິນໃຈສູງ, ບັນລຸຜົນງານທີ່ດີໃນການຮ່ຳຮຽນ ແລະ ຫຼັງຈາກຈົບການສຶກສາຈາກໂຮງຮຽນ, ໄດ້ຖືກຈັດ ແລະ ນຳໃຊ້ຕາມຄວາມສາມາດຂອງຕົນ, ຫຼາຍສະຫາຍໄດ້ປະກອບສ່ວນສຳຄັນເຂົ້າໃນຫຼາຍຂົງເຂດ, ພິເສດແມ່ນດ້ານການທະຫານ, ການປ້ອງກັນປະເທດ. ຜ່ານພຶດຕິກຳຕົວຈິງ, ພວກເຂົາສ່ວນຫຼາຍມີຫຼັກໝັ້ນຄວາມກ້າຫານທາງການເມືອງທີ່ເຂັ້ມແຂງ, ມີຄຸນທຳຄຸນສົມບັດປະຕິວັດທີ່ດີ; ມີລະດັບການສຶກສາ, ຈິນຕະນາການວິທະຍາສາດທີ່ຄົມຄາຍ ສ້ຽມແຫຼມ ແລະ ມີຄວາມສາມາດໃນການນຳພາ ຈັດຕັ້ງ ຄຸ້ມຄອງ, ສາມາດສຳເລັດໜ້າທີ່ເປັນຢ່າງດີ, ຕັ້ງໜ້າປະກອບສ່ວນກຳລັງແຮງ, ຄວາມສາມາດ ແລະ ສະຕິປັນຍາ ເຂົ້າໃນພາລະກິດສ້າງສາກອງທັບ, ປັບປຸງການປ້ອງກັນປະເທດ ແລະ ປົກປັກຮັກສານປະເທດຊາດຫວຽດນາມສັງຄົມນິຍົມ. ຄຽງຄູ່ກັນກັບບັນດາຜົນງານທີ່ໄດ້ຮັບນັ້ນ, ການດຶງດູດແລະນຳໃຈ້ຄົນເກັ່ງໃນສັງຄົມ ເພື່ອຮັບໃຊ້ກອງທັບ ກໍ່ຍັງມີຂໍ້ບົກພ່ອງໃນດ້ານຕ່າງໆ ກ່ຽວກັບເນື້ອໃນ, ມາດຕະການ, ຮູບການ, ກົນໄກ, ນະໂຍບາຍຄັດເລືອກ, ຝຶກອົບຮົມ, ນຳໃຊ້, ໃຫ້ຄ່າຕອບແທນແກ່ຄົນເກັ່ງທີ່ຮັບໃຊ້ໃນບາງຂົງເຂດ...
ການປະຕິວັດອຸດສາຫະກຳຄັ້ງທີ່ສີ່ ພັດທະນາຢ່າງແຂງແຮງໃນທົ່ວໂລກ ກະທົບໂດຍກົງແລະຮອບດ້ານເຖິງທຸກດ້ານຂອງຊີວິດສັງຄົມ, ໃນນັ້ນມີການທະຫານ ການປ້ອງກັນປະເທດ. ພິເສດ, ການພັດທະນາທິດສະດີກ່ຽວກັບການທະຫານ ການປ້ອງກັນປະເທດ; ສິລະປະການທະຫານ; ວິທະຍາສາດ ແລະ ເຕັກໂນໂລຊີການທະຫານ; ວິທະຍາສາດສັງຄົມແລະມະນຸດການທະຫານ; ການປະຍຸກ, ມອບໂອນ, ປ່ຽນແປງໃໝ່ເຕັກໂນໂລຊີ,... ເຊິ່ງຮຽກຮ້ອງຕ້ອງການມີການປ່ຽນແປງໃໝ່ທາງດ້ນຈິນຕະນາການ, ລະດັບການຄຸ້ມຄອງ, ບັນຊາ ແລະ ຂັບເຕື່ອນໃຫ້ສອດຄ່ອງກັບສົງຄາມຮູບແບບໃໝ່, ສິລະປະການສູ້ຮົບ ແລະວິທີການຕໍ່ສູ້ ດ້ວຍອາວຸດແລະອຸປະກອນທີ່ທັນສະໄໝ ໃນສະພາບສົງຄາມເຕັກໂນໂລຊີສູງ. ສິ່ງນີ້ມີຄວາມຮຽກຮ້ອງຕ້ອງການທີ່ສູງຂຶ້ນ, ຮຽກຮ້ອງໃຫ້ມີການກະກຽມຊັບພະຍາກອນມະນຸດຄຸນນະພາບສູງ ເພື່ອຕອບສະໜອງຄວາມຕ້ອງການຂອງສົງຄາມໄຊເບີຣ໌ ແລະ ການປະຕິວັດອຸດສາຫະກຳຄັ້ງທີ່ສີ່.
ເພື່ອໃຫ້ຄ່ອງຕົວກັບຄວາມຕ້ອງການຂອງການປະຕິວັດອຸດສາຫະກຳຄັ້ງທີ່ສີ່, ພັກກອມມູນິດຫວຽດນາມຕັ້ງແຜນ:“ພັດທະນາຊັບພະຍາກອນມະນຸດ, ໂດຍສະເພາະຊັບພະຍາກອນມະນຸດຄຸນນະພາບສູງ, ໃຫ້ບຸລິມະສິດຊັບພະຍາກອນມະນຸດໃຫ້ແກ່ການນຳພາ, ຄຸ້ມຄອງ ແລະ ບັນດາຂົງເຂດສຳຄັນ ບົນພື້ນຖານການຍົກສູງ, ສ້າງການປ່ຽນແປງໂດຍພື້ນຖານ, ແຂງແຮງ ແລະ ຮອບດ້ານ ໃນຄຸນນະພາບການສຶກສາ ຝຶກອົບຮົມ ຕິດພັນກັບກົນໄກການເລືອກເອົາຄົນງານ, ການນໍາໃຊ້ ແລະ ການໃຫ້ຄ່າຕອບແທນຄົນເກັ່ງ”(2). ສຳລັບໜ້າທີ່ກໍ່ສ້າງກອງທັບ, ພັກກອມມູນິດຫວຽດນາມກຳນົດ: ການກໍ່ສ້າງກອງທັບປະຊາຊົນທີ່ປະຕິວັດ, ເປັນແບບຫຼວງ, ຊຳນານໃນການຮົບ, ກ້າວຂຶ້ນທັນສະໄໝເທື່ອລະກ້າວ, ບາງເຫຼົ່າທັບ, ເຫຼົ່າພົນ, ກອງກຳລັງຈະກ້າວໂດຍກົງຂຶ້ນສູ່ທັນສະໄໝ. ຮອດປີ 2025, ສ້າງກອງທັບໃຫ້ກະທັດລັດ ແໜ້ນແຟ້ນ ເຂັ້ມແຂງໂດຍພື້ນຖານ, ສ້າງປະຖົມປັດໃຈອັນໜັກແໜ້ນ, ຮອດປີ 2030 ກໍ່ສ້າງກອງທັບທີ່ປະຕິວັດ, ເປັນແບບຫຼວງ, ຊຳນາມໃນການຮົບ, ທັນສະໄໝ.
ຊາບຊຶມແລະປະຕິບັດແຜນນະໂຍບາຍຂອງພັກ, ກ່ອນອື່ນໝົດ, ຕ້ອງປະຕິບັດເປັນຢ່າງດີທັດສະນະ “ຄົນກ່ອນ, ປືນຕາມຫຼັງ”; ໃຫ້ບຸລິມະສິດການກໍ່ສ້າງແລະພັດທະນາຊັບພະຍາກອນມະນຸດຄຸນນະພາບສູງ ແລະ ຖືວ່ານີ້ເປັນວຽກງານທີ່ມີຄວາມໝາຍຕັດສິນຊີຂາດ. ການດຶງດູດ, ຝຶກອົບຮົມ ແລະ ເຄົາລົບໃຊ້ຄົນເກັ່ງໃນຂົງເຂດການທະຫານປະຈຸບັນນີ້ ແມ່ນຄວາມຈຳເປັນພາວະວິໄສ, ມີລັກສະນະຍຸດທະສາດແລະຮີບດ່ວນ ເພື່ອຕອບສະໜອງຄວາມຕ້ອງການຂອງການກໍ່ສ້າງກອງທັບ ໃນສະພາວະການການປະຕິວັດອຸດສາຫະກຳຄັ້ງທີ່ສີ່. ຕາມນັ້ນ, ຕ້ອງສຸມໃສ່ປະຕິບັດບັນດາວິທີແກ້ໄຂທີ່ສຳຄັນດັ່ງຕໍ່ໄປນີ້:
ທີໜຶ່ງ, ເພີ່ມທະວີການຊີ້ນຳ ນຳພາຂອງຄະນະພັກ, ອົງການຈັດຕັ້ງພັກ, ຜູ້ບັນຊາການທຸກຂັ້ນ; ຍົກສູງຄວາມຮັບຮູ້ກ່ຽວກັບການດຶງດູດ, ຝຶກອົບຮົມ ແລະ ເຄົາລົບໃຊ້ຄົນເກັ່ງໃນຂົງເຂດການທະຫານ ໃນສະພາບການກະທົບຂອງການປະຕິວັດອຸດສາຫະກຳຄັ້ງທີ່ສີ່.
ການຮັກສາແລະເພີ່ມທະວີການຳພາເດັດຂາດ, ໂດຍກົງໃນທຸກດ້ານຂອງພັກຕໍ່ກອງທັບ ແມ່ນຫຼັກການທີ່ບໍ່ປ່ຽນແປງໃນຂະບວນການສ້າງຕັ້ງ, ເຕີບໃຫຍ່ ແລະ ສູ້ຮົບມີໄຊຂອງກອງທັບຂອງພວກເຮົາ; ພ້ອມກັນນັ້ນ, ເປັນມາດຕະການສຳຄັນອັນດັບໜຶ່ງທີ່ນຳມາເຊິ່ງຄວາມສຳເລັດໃນການດຶງດູດ, ຝຶກອົບຮົມ ແລະ ເຄົາລົບໃຊ້ຄົນເກັ່ງໃນຂົງເຂດການທະຫານ. ຫຼັກການນີ້ຕ້ອງໄດ້ຮັບຮູ້ຢ່າງຖືກຕ້ອງ ແລະ ປະຕິບັດຕາມຢ່າງເຄັ່ງຄັດ. ບັນດາຄະນະພັກທຸກຂັ້ນ, ອົງການຈັດຕັ້ງພັກ, ຜູ້ບັນຊາການ, ຫົວໜ້າການເມືອງ, ນາຍທະຫານການເມືອງ ຂອງບັນດາອົງການ, ກົມກອງ, ສະຖານບັນການສຶກສາ, ໂຮງຮຽນໃນກອງທັບ ຕ້ງຊີ້ນຳນຳພາຢ່າງແໜ້ນແຟ້ນ, ສຸມໃສ່ເຮັດການສຶກສາເປັນຢ່າງດີ ເພື່ອໃຫ້ພະນັກງານ ນັກຮົບມີຄວາມຮັບຮູ້ຢ່າງເລິກເຊິ່ງ ກ່ຽວກັບໜ້າທີ່ການທະຫານ, ການປ້ອງກັນປະເທດ ໃນສະພາບການກະທົບຢ່າງແຂງແຮງຂອງການປະຕິວັດອຸດສາຫະກຳຄັ້ງທີ່ສີ່, ເຫັນແຈ້ງໂອກາດແລະສິ່ງທ້າທາຍ; ເຫັນແຈ້ງບັນດາຄວາມຕ້ອງການກ່ຽວກັບການປ່ຽນແປງໃໝ່ ຍົກສູງຄຸນນະພາບການສຶກສາ ແລະ ຝຶກອົບຮົມຕາມຮູບແບບ “ໂຮງຮຽນອັດສະລິຍະ”, ທິດນຳ “ຄຸນນະພາບຂອງການຝຶກອົບຮົມຂອງໂຮງຮຽນ ແມ່ນຄວາມພ້ອມໃນການສູ້ຮົບຂອງກົມກອງທະຫານ” ແລະ ຄວາມຮັບຜິດຊອບໃນການດຶງດູດ ແລະຍົກສະງຄຸນນະພາບຂອງການເລືອກແຫຼ່ງຝຶກອົບຮົມ, ການນຳໃຊ້ຄົນເກັ່ງໃນຂົງເຂດການທະຫານ.
ຜັນຂະຫຍາຍປະຕິບັດຢ່າງເຂັ້ມງວດບັນດາມະຕິ, ຄຳສັ່ງຂອງພັກ, ລັດ, ຄະນະພັກການທະຫານສູນກາງ, ກະຊວງການປ້ອງກັນປະເທດ ກ່ຽວກັບການສຶກສາແລະຝຶກອົບຮົມ(3) ເພື່ອສ້າງແລະຜັນຂະຫຍາຍການປະຕິບັດຍຸດທະສາດພັດທະນາການສຶກສາ ຝຶກອົບຮົມໃນກອງທັບໃນໄລຍະ 2021-2030, ວິໄສທັດຮອດປີ 2045; ໂຄງການປັບປຸງຂະບວນການ ແລະ ໂຄງການຝຶກອົບຮົມພະນັກງານທຸກຂັ້ນໃນກອງທັບ ເພື່ອຕອບສະໜອງຄວາມຕ້ອງການ, ໜ້າທີ່ໃນສະພາບການໃໝ່; ໂຄງການສ້າງຖັນແຖວຄູອາຈານ, ພະນັກງານຄຸ້ມຄອງການສຶກສາ ເພື່ອຕອບສະໜອງຄວາມຕ້ອງການໃນການປ່ຽນແປງໃໝ່ການສຶກສາແລະຝຶກອົບຮົມໃນກອງທັບ ຢ່າງເປັນພື້ນຖານແລະຮອບດ້ານ ໃນໄລຍະ 2021-2030. ເບິ່ງແຍງດູແລການກໍ່ສ້າງຖັນແຖວຄູອາຈານ ແລະພະນັກງານຄຸ້ມຄອງການສຶກສາ ໃຫ້ບັນລຸມາດຕະຖານຕາມກຳນົດ. ປະຕິບັດເປັນຢ່າງດີ ການຝຶກອົບຮົມແລະ ບຳລຸງສ້າງຖັນແຖວນັກວິທະຍາສາດໂດຍຜ່ານການປະຕິບັດ. ມີນະໂຍບາຍດຶງດູດ, ເຄົາລົບໃຊ້ຄົນເກັ່ງເຂົ້າໄປເຮັດວຽກໃນກອງທັບໃຫ້ໄດ້ຕາມຄວາມຕ້ອງການແລະໜ້າທີ່.
ທີ່ສອງ, ປະຕິບັດເປັນຢ່າງດີ ວຽກງານການເລືອກນັກຮຽນການທະຫານ, ການຝຶກອົບຮົມ, ການບຳລຸງສ້າງພະນັກງານ ຕອບສະໜອງຄວາມຕ້ອງການຂອງການປະຕິວັດອຸດສາຫະກຳຄັ້ງທີ່ສີ່.
ວຽກງານການເລືອກນັກຮຽນການທະຫານ ຕ້ອງດຶງດູດອາສາສະໝັກຈຳນວນຫຼວງຫຼາຍ ທັງໃນແລະນອກກອງທັບ ທີ່ມີເງື່ອນໄຂແລະມາດຖານຄົບທຸກປະການ, ໂດຍສະເພາະແມ່ນນັກຮຽນທີ່ມີຜົນການຮຽນດີເດັ່ນ ແລະ ນັກຮຽນທີ່ໄດ້ຮັບລາງວັນສູງ ໃນການແຂ່ງຂັນປະກວດນັກຮຽນດີເດັ່ນລະດັບແຂວງ, ລະດັບປະເທດ ແລະ ສາກົນ; ນັກຮຽນທີ່ມີພອນສະຫວັນ ແລະ ມີຄວາມສາມາດ. ບັນດາອົງການແລະໜ່ວຍງານຕ້ອງຄົ້ນຄວ້າແລະກຳແໜ້ນຄຳສັ່ງ, ໜັງສືວຽນ ແລະ ຄຳແນະນຳ ກ່ຽວກັບວຽກງານການເລືອກນັກຮຽນການທະຫານ ຂອງກະຊວງການປ້ອງກັນປະເທດ; ປະຕິບັດບັນດາຂັ້ນຕອນ, ບັນດາບາດກ້າວຄັດເລືອກນັກຮຽນການທະຫານ ຢ່າງເປັນເອກະພາບແລະຄົບຊຸດ; ເປັນເຈົ້າການໃນການວາງແຜນການ, ຈັດຕັ້ງການສ້າງແຫຼ່ງ, ພິຈາລະນາອະນຸມັດລາຍຊື່ຜູ້ເຂົ້າຮຽນການທະຫານຕາມຂະບວນການ, ເງື່ອນໄຂ ແລະ ຫຼັກເກນ. ເສີມນະຫຍາຍກຳລັງແຮງສັງລວມຂອງທຸກຂັ້ນ, ທຸກຂະແໜງການ ແລະ ທຸກທ້ອງຖິ່ນ ໃນການໂຄສະນາຊວນເຊື່ອ ເພື່ອໃຫ້ນັກຮຽນ ນັກສຶກສາ, ຊາວໜຸ່ມ, ນາຍທະຫານຊັ້ນລຸ່ມ ແລະ ທະຫານເຂົ້າໃຈກ່ຽວກັບວິຊາ ອາຊີບ ແລະ ຊີວິດໃນອະນາຄົດ ເມື່ອສະໝັກເຂົ້າຮຽນການທະຫານ, ດຶງດູດຜູ້ສະໝັກເຂົ້າໂຮງຮຽນການທະຫານຈຳນວນຫຼວງຫຼາຍ. ຢາກໄດ້ຄືແນວນັ້ນ, ທຸກຂັ້ນ, ທຸກຂະແໜງການ, ທຸກທ້ອງຖິ່ນຕ້ອງເອົາໃຈໃສ່ຢ່າງແທ້ຈິງ ເຖິງວຽກງານການເລືອກນັກຮຽນການທະຫານ; ສ້າງສິ່ງແວດລ້ອມ, ເງື່ອນໄຂການລົງທະບຽນ ແລະ ການຈັດສອບຄັດເລືອກທີ່ສະດວກແລະແໜ້ນແຟ້ນ; ຮັບປະກັນສິ່ງອໍານວນຄວາມສະດວກທີ່ດີ ແລະ ສະພາບແວດລ້ອມການສອນການທະຫານ ທີ່ວິທະຍາສາດແລະສົດໃສ ເພື່ອໃຫ້ຜູ້ຮຽນຈົບມີຄຸນສົມບັດທີ່ສອດຄ່ອງກັບຈຸດປະສົງ ແລະ ຂໍ້ກຳນົດການຝຶກອົບຮົມ. ຜ່ານນັ້ນ, ສ້າງແລະປັບປຸງຄວາມເຊື່ອໝັ້ນຂອງເຂົາກ່ຽວກັບອະນາຄົດມີວິວັດທະນາການ ເມື່ອເລືອກເຂົ້າຮຽນການທະຫານ ແລະ ຮັບໃຊ້ໃນກອງທັບຍາວນານ.
ອົງການທີ່ປຶກສາຍຸດທະສາດຂອງກະຊວງການປ້ອງກັນປະເທດ ຕ້ອງຕິດແທດຕົວຈິງເປັນປະຈຳ, ຕັ້ງໜ້າຄົ້ນຄວ້າ, ແນະນຳ ແລະ ສະເໜີໃຫ້ຄະນະພັກການທະຫານສູນກາງ, ກະຊວງການປ້ອງກັນປະເທດ ກ່ຽວກັບແຜນນະໂຍບາຍ ທິດທາງການຮັບສະໝັກຄັດເລືອກ, ຝຶກອົບຮົມຄົນເກັ່ງໃຫ້ກອງທັບ; ສ້າງມາດຕະຖານການຮັບເຂົ້າ ແລະ ມາດຕະຖານການຮຽນຈົບ ສຳລັບຜູ້ຮັບການຝຶກອົບຮົມ; ເຮັດວຽກງານການວາງແຜນແມ່ບົດ, ແຜນການສ້າງແຫຼ່ງຝຶກອົບຮົມໃຫ້ແກ່ພະນັກງານວິຊາຊີບ ແລະ ວິຊາການຢູ່ພາຍໃນ ແລະ ຕ່າງປະເທດ. ຮັບປະກັນຈໍານວນ, ບັນທັດຖານ ແລະ ມາດຕະຖານພຽງພໍ, ໂດຍສະເພາະມາດຕະຖານພາສາຕ່າງປະເທດ ແລະ ການຄົ້ນຄວ້າວິທະຍາສາດ ໃນການສອບເຂົ້າບັນດິດ. ສຳລັບພະນັກງານທີ່ໄດ້ຮັບຄັດເລືອກເພື່ອສົ່ງໄປຝຶກອົບຮົມຕາມຕໍາແໜ່ງ ຫຼືວຸດທິການສຶກສາ, ບັນດາໜ່ວຍງານຕ້ອງປະຕິບັດຕາມຄຳສັ່ງ, ຊີ້ນຳຂອງຄະນະພັກການທະຫານສູນກາງ ແລະ ກະຊວງການປ້ອງກັນປະເທດ ຢ່າງເຂັ້ມງວດ ກ່ຽວກັບເປົ້າໝາຍ, ຈຸດປະສົງ, ຂໍ້ກຳນົດການຝຶກອົບຮົມ, ແນໃສ່ສ້າງແລະຍົກສູງຄຸນນະພາບຂອງຖັນແຖວພະນັກງານ, ໂດຍສະເພາະພະນັກງານຮັບຜິດຊອບທຸກຂັ້ນໃນກອງທັບ. ສຳລັບການຝຶກອົບຮົມພະນັກງານຢູ່ຕ່າງປະເທດ, ຕ້ອງສຸມໃສ່ການຝຶກອົບຮົມຕາມກຳນົດທິດຂອງມະຕິເລກທີ 618-NQ/ĐU, ລົງວັນທີ 28 ຕຸລາ 2010, ຂອງຄະນະພັກການທະຫານສູນກາງ, “ກ່ຽວກັບການຝຶກອົບຮົມພະນັກງານກອງທັບຢູ່ຕ່າງປະເທດຮອດປີ 2020 ແລະ ປີຕໍ່ໆໄປ”; ໃຫ້ເອົາໃຈໃສ່ການຝຶກອົບຮົມພື້ນຖານ, ໄລຍະຍາວ, ການຝຶກອົບຮົມສະເພາະເລິກເຊິ່ງ, ສອດຄ່ອງກັບອາວຸດ ແລະ ອຸປະກອນຂອງກອງທັບ; ບຸລິມະສິດການຝຶກອົບຮົມພະນັກງານທີ່ເຮັດການຄົ້ນຄວ້າ, ການອອກແບບ, ການຜະລິດ, ການຄຸ້ມຄອງ, ການຂຸດຄົ້ນ ເປັນເຈົ້າຂອງອາວຸດຍຸດໂທປະກອນລຸ້ນໃໝ່ ແລະ ກ້າວໜ້າ ເພື່ອຕອບສະໜອງຄວາມຮຽກຮ້ອງຕ້ອງການຂອງການກໍ່ສ້າງກອງທັບທັນສະໄໝ. ອົງການຕ້ອງໃຫ້ຄວາມສຳຄັນກັບຂັ້ນຕອນການຄັດເລືອກຮັບເຂົ້າ ເພື່ອຮັບປະກັນທັງດ້ານປະລິດມານແລະຄຸນນະພາບ ແລະ ສອດຄ່ອງກັບການວາງແຜນນຳໃຊ້ພະນັກງານ. ສຳລັບຊາວໜຸ່ມທີ່ມີຄວາມເກັ່ງກ້າສາມາດ, ຈໍາເປັນຕ້ອງໄດ້ພັດທະນາຂະບວນການສ້າງແຫຼ່ງທີ່ສົມເຫດສົມຜົນ ເພື່ອສົ່ງໄປຝຶກອົບຮົມໂດຍໄວ; ເຊື່ອມຕໍ່ການຝຶກອົບຮົມກັບການນຳໃຊ້, ຕອບສະໜອງການວາງແຜນພັດທະນາພະນັກງານນຳໜ້າທຸກຂັ້ນໃນກອງທັບ.
ທີສາມ, ມີກົນໄກ, ນະໂຍບາຍຄ່າຕອບແທນ ແລະ ສະພາບແວດລ້ອມການເຮັດວຽກທີ່ດີ ເພື່ອດຶງດູດ, ເຄົາລົບໃຊ້ຄົນເກັ່ງໃນຂົງເຂດການທະຫານ ຕອບສະໜອງຄວາມຕ້ອງການຂອງການປະຕິວັດອຸດສາຫະກຳຄັ້ງທີ່ສີ່.
ແຮງງານຂອງກອງທັບແມ່ນແຮງງານພິເສດ, ການເຄື່ອນໄຫວຂອງກອງທັບມັກເກີດຂຶ້ນໃນສະພາບແວດລ້ອມທີ່ຫຍຸ້ງຍາກ, ລຳບາກ ແລະ ອັນຕະລາຍ, ແມ່ນແຕ່ການເສຍສະຫຼະຊີວິດໃນເວລາປະຕິບັດໜ້າທີ່. ການປະຕິວັດອຸດສາຫະກຳຄັ້ງທີ່ສີ່ໄດ້ກຳນົດ ຄວາມຮຽກຮ້ອງຕ້ອງການໃໝ່ແລະສູງກວ່າ ສຳລັບການຝຶກອົບຮົມ, ຝຶກຊ້ອມ, ການໃຊ້ອາວຸດ ແລະອຸປະກອນທາງເຕັກນິກໃໝ່ແລະທັນສະໄໝ. ການສູ້ຮົບດ້ວຍເຕັກໂນໂລຊີສູງຕ້ອງການໃຊ້ຄຸນສົມບັດ, ຄວາມສາມາດ ແລະ ສຸຂະພາບຂອງກອງທັບທີ່ສູງກວ່າ, ດັງນັ້ນ ຖ້າສະພາບແວດລ້ອມການເຮັດວຽກ ແລະ ນະໂຍບາຍຄ່າຕອບແທນບໍ່ດີ, ກໍ່ຈະບໍ່ສາມາດດຶງດູດຜູ້ມີຄວາມສາມາດມາຮ່ຳຮຽນ, ເຮັດວຽກ ແລະ ອຸທິດຕົນໃນກອງທັບໄດ້. ຍ້ອນແນວນັ້ນ, ຕ້ອງສ້າງສະພາບແວດລ້ອມການເຮັດວຽກທີ່ສະດວກດີ, ຈັດວາງນຳໃຊ້ຖືກກັບຄົນ, ຖືກກັບວຽກງານ ແລະ ມີລະບອບ ນະໂຍບາຍຄ່າຕອບແທນທີ່ສົມເຫດສົມຜົນ ແລະ ໜ້າພໍໃຈ ເພື່ອດຶງດູດຄົນເກັ່ງເຂົ້າຮັບໃຊ້ກອງທັບໃນໄລຍະຍາວ. ບັນດາອົງການທີ່ມີໜ້າທີ່ຕ້ອງຄົ້ນຄວ້າ, ໃຫ້ຄຳປຶກສາ ແລະ ລາຍງານຕໍ່ກະຊວງການປ້ອງກັນປະເທດ, ສະເໜີໃຫ້ພັກ ແລະ ລັດ ປະກາດໃຊ້ກົນໄກແລະນະໂຍບາຍທີ່ຄົບຊຸດ ກ່ຽວກັບການຄັດເລືອກ, ຝຶກອົບຮົມ, ບຳລຸງສ້າງ, ນຳໃຊ້, ໃຫ້ຄ່າຕອບແທນ ແລະ ມີກົນໄກພິເສດ ສໍາລັບຄົນເກັ່ງທີ່ມີຄວາມສາມາດ. ພັດທະນາເງື່ອນໄຂແລະເກນກຳນົດສະເພາະ ແລະ ຕິດຕາມ, ຄຸ້ມຄອງຄົນເກັ່ງໃນຂົງເຂດການທະຫານ ຢ່າງມີວິທະຍາສາດ, ສົມຄວນແກ່ການອຸທິດຕົນຂອງເຂົາ ແລະ ສອດຄ່ອງກັບການພັດທະນາພາລະກິດການສ້າງສາ ແລະ ປົກປັກຮັກສາປະເທດຊາດໃນໄລຍະປະຕິວັດໃໝ່.
ທີສີ່, ຍົກສູງຄຸນນະພາບການສຶກສາແລະຝຶກອົບຮົມ, ສົມທົບຢ່າງແໜ້ນແຟ້ນການຝຶກອົບຮົມກັບການເຄົາລົບໃຊ້ຄົນເກັ່ງ ຕອບສະໜອງຄວາມຕ້ອງການຂອງການປະຕິວັດອຸດສາຫະກຳຄັ້ງທີ່ສີ່.
ການຍົກສູງຄຸນນະພາບການສຶກສາແລະຝຶກອົບຮົມ, ສົມທົບຢ່າງແໜ້ນແຟ້ນການຝຶກອົບຮົມກັບການເຄົາລົບໃຊ້ຄົນເກັ່ງ ມີຄວາມໝາຍສຳຄັນ, ໃນນັ້ນ, ຈຳເປັນຕ້ອງມີກົນໄກ ແລະ ປະຕິບັດຢ່າງດີການຈັດວາງສັບຊ້ອນ ແລະ ນຳໃຊ້ຄົນເກັ່ງພາຍຫຼັງການຝຶກອົບຮົມ ແລະ ຖືວ່ານີ້ແມ່ນຕ່ອງໂສ້ສໍາຄັນແລະຂາດບໍ່ໄດ້ ໃນການດຶງດູດ, ການຝຶກອົບຮົມ ແລະ ການເຄົາລົບໃຊ້ຄົນເກັ່ງໃນຂົງເຂດການທະຫານ. ເພື່ອຈະເຮັດວຽກງານນີ້ໄດ້ ຈຳເປັນຕ້ອງສຸມໃສ່ລົງທຶນກໍ່ສ້າງສະຖາບັນການສຶກສາແລະໂຮງຮຽນຈຳນວນໜຶ່ງ ທີ່ມີເງື່ອນໄຂພຽງພໍທີ່ຈະກາຍເປັນໂຮງຮຽນຈຸດສຸມລະດັບຊາດ ແລະ ກອງທັບ ຕາມຮູບແບບ “ໂຮງຮຽນອັດສະລິຍະທີ່ເຂົ້າໃກ້ການປະຕິວັດອຸດສາຫະກຳຄັ້ງທີ່ສີ່”. ປັບປຸງອັບເດດໂຄງການຝຶກອົບຮົມລະດັບຊາດ ແລະ ພາກພື້ນຢ່າງເປັນປະຈຳ ແລະ ຜັນຂະຫຍາຍການຝຶກອົບຮົມໃນບັນດາວິຊາສະເພາະທີ່ມີຄຸນນະພາບສູງ, ສຳຄັນ ແລະ ພິເສດ; ເພີ່ມທະວີການຮ່ວມມືສາກົນທາງດ້ານການສຶກສາແລະຝຶກອົບຮົມ. ການຍົກສູງຄຸນນະພາບຂອງການຝຶກອົບຮົມຄົນເກັ່ງໃນຂົງເຂດການທະຫານ ຂຶ້ນຢູ່ກັບຫຼາຍປັດໄຈ, ໃນນັ້ນ, ການອົບຮົມສຶກສາສິນທຳ, ການສ້າງຄວາມກ້າຫານ ແລະ ການໃຫ້ຄວາມຮູ້ ແລະປະສົບການ, ການສ້າງຂີດຄວາມສາມາດ ແລະ ການຝຶກທັກສະໃນໂຮງຮຽນທະຫານ, ການຍົກສູງຄຸນນະພາບການຄົ້ນຄວ້າວິທະຍາສາດແລະອື່ນໆ ແມ່ນມີຄວາມໝາຍຕັດສິນຊີ້ຂາດ. ຕາມນັ້ນ, ນອກຈາກການລົງທຶນ ຍົກລະດັບພື້ນຖານວັດຖຸ ອຸປະກອນການຮຽນການສອນແລະສິ່ງອໍານວຍແລ້ວ, ບັນດາໂຮງຮຽນທະຫານຕ້ອງສຸມໃສ່ກໍ່ສ້າງ ແລະ ສ້າງມາດຕະຖານຄູອາຈານ, ສຸມໃສ່ເພີ່ມອັດຕາສ່ວນອາຈານທີ່ມີຄຸນວຸດທິສູງກວ່າປະລິຍາຕີ, ສູ້ຊົນທີ່ຈະບັນລຸມາດຕະຖານຂອງລັດ. ພ້ອມກັນນັ້ນ, ສືບຕໍ່ການກໍ່ສ້າງແລະປັບປຸງກົນໄກໃຫ້ສົມບູນ ເພື່ອປະຕິບັດການຈັດຕັ້ງ ແລະ ນຳໃຊ້ພະນັກງານຫຼັງການຝຶກອົບຮົມຢ່າງມີປະສິດທິຜົນ; ຕິດແໜ້ນການຝຶກອົບຮົມກັບການຈັດວາງສັບຊ້ອນ ແລະນຳໃຊ້ພະນັກງານ, ອຳນວນຄວາມສະດວກດີສຸດ ໃຫ້ພະນັກງານສຸດອົກສຸດໃຈກັບໜ້າທີ່ ແລະ ພັດທະນາໄປໃນທິດທາງທີ່ຖືກຕ້ອງ; ເລື່ອນຊັ້ນ, ແຕ່ງຕັ້ງພະນັກງານທີ່ມີຄວາມສາມາດຢ່າງແທ້ຈິງ,ໂດຍສະເພາະຊາວໜຸ່ມທີ່ມີຄວາມສາມາດ, ມີຄຸນນະພາບດີ. ປະຕິບັດເປັນຢ່າງດີ ການຜັດປ່ຽນ, ຍົກຍ້າຍພະນັກງານຕາມແຜນການ, ສົມທົບລະຫວ່າງທິດສະດີກັບການປະຕິບັດ, ລະຫວ່າງຄວາມຮູ້ທີ່ມີຢູ່ໃນໂຮງຮຽນ ແລະ ຄວາມຮູ້, ທັກສະທີ່ໄດ້ຮັບການຝຶກອົບຮົມແລະບຳລຸງສ້າງຜ່ານການເຄື່ອນໄຫວພາກປະຕິບັດຕົວຈິງ; ສ້າງເງື່ອນໄຂໃຫ້ພະນັກງານໄດ້ຮັບການທົດສອບ ແລະ ເຕີບໃຫຍ່ຢ່າງໜັກແໜ້ນ.
ທີຫ້າ, ສົມທົບຢ່າງແໜ້ນແຟ້ນລະຫວ່າງການຝຶກອົບຮົມ, ບຳລຸງສ້າງ ກັບການຄົ້ນຄວ້າ, ປະຍຸກໃຊ້ວິທະຍາສາດການທະຫານເຂົ້າໃນພຶດຕິກຳຕົວຈິງ.
ການປະຕິວັດອຸດສາຫະກຳຄັ້ງທີ່ສີ່ກຳນົດຄວາມຕ້ອງການ ຕ້ອງສົມທົບການຝຶກອົບຮົມ, ບຳລຸງສ້າງ ກັບການຄົ້ນຄວ້າວິທະຍາສາດການທະຫານ ຢ່າງແໜ້ນແຟ້ນ ເພື່ອແນໃສ່ກໍ່ສ້າງຖັນແຖວພະນັກງານກອງທັບທີ່ມີລະດັບສູງ, ຕອບສະໜອງຄວາມຕ້ອງການແລະໜ້າທີ່ໃນເງື່ອນໄຂໃໝ່. ຄຸນລັກສະນະພິເສດຂອງການປະຕິວັດອຸດສາຫະກຳຄັ້ງທີ່ສີ່ແມ່ນການຫຼຸດຊ່ອງຫວ່າງເວລາລະຫວ່າງການຄົ້ນຄວ້າ ແລະ ການປະຍຸກໃຊ້, ດັ່ງນັ້ນ, ການສົມທົບນີ້ຈະຊ່ວຍເສີມຂະຫຍາຍຄວາມສາມາດຂອງຖັນແຖວພະນັກງານ ໃນການປະຕິບັດໜ້າທີ່ສ້າງສາແລະປົກປ້ອງປະເທດຊາດ. ເນື້ອໃນການຄົ້ນຄວ້າທິດສະດີກ່ຽວກັບສິລະປະການທະຫານ, ວິທະຍາສາດສັງຄົມແລະມະນຸດການທະຫານ ຄວນສຸມໃສ່ລັກສະນະສົງຄາມເຕັກໂນໂລຢີສູງ; ວິທີການດຳເນີນສົງຄາມປະຊາຊົນເພື່ອຮັບມືກັບສົງຄາມຮຸກຮານຮູບແບບໃໝ່; ຮູບແບບ, ວິທີການນໍາພາ, ບັນຊາ, ຂັບເຄື່ອນການສູ້ຮົບ; ກ່ຽວກັບການກໍ່ສ້າງກອງທັບ, ປັບປຸງການປ້ອງກັນປະເທດ, ປົກປັກຮັກສາປະເທດຊາດໃນສະພາບການໃໝ່,... ຍູ້ແຮງການສະຫຼຸບສັງລວມພຶດຕິກຳຕົວຈິງ, ຄົ້ນຄວ້າວິທະຍາສາດ, ເພີ່ມເຕີມ, ພັດທະນາ ແລະ ປັບປຸງບູລະນະແນວຄວາມຄິດທິດສະດີກ່ຽວກັບການທະຫານ, ການປ້ອງກັນປະເທດ, ການສ້າງກອງທັບ ໃນເງື່ອນໄຂຂອງການໂລກາພິວັດ, ການເຊື່ອມໂຍງເຂົ້າກັບສາກົນ ແລະ ການປະຕິວັດອຸດສາຫະກຳຄັ້ງທີ່ສີ່. ຄົ້ນຄວ້າ, ສະເໜີໃຫ້ປະກາດໃຊ້ ແລະ ປະຕິບັດໂຄງການກໍ່ສ້າງກອງທັບປະຊາຊົນທີ່ທັນສະໄໝໃນໄລຍະໃໝ່ຢ່າງມີປະສິດທິຜົນ. ສຸມໃສ່ຄົ້ນຄວ້າທິດສະດີການຈັດຕັ້ງ, ກໍ່ສ້າງກອງກຳລັງສູ້ຮົບ, ໂດຍສະເພາະກ່ຽວກັບໂຄງປະກອບແລະການຈັດຕັ້ງບັນດາກົມກອງທີ່ຄ່ອງຕົວກັບສະພາບການຂອງປະເທດ ແລະ ການປະກອບອາວຸດຍຸດໂທປະກອນໃໝ່ໃຫ້ກັບກົມກອງໃນກອງກຳລັງຕ່າງໆ. ຄົ້ນຄວ້າເພື່ອເປັນເຈົ້າວິທະຍາສາດແລະເຕັກໂນໂລຊີສະໄໝໃໝ່, ເຂົ້າເຖິງກັບວິທະຍາສາດແລະເຕັກໂນໂລຊີຂັ້ນສູງ ຂອງປະເທດໃນພາກພື້ນ ແລະໃນໂລກ. ປ່ຽນແປງໃໝ່ ແລະ ຍົກສູງຄຸນນະພາບການສຶກສາ, ການຝຶກຊ້ອມ, ການຝຶກອົບຮົມ ໂດຍວິທີນຳຜະລິດຕະພັນທາງວິທະຍາສາດໄປໃຊ້ໃນການຝຶກປະຕິບັດທັນທີ ແລະ ກຽມພ້ອມສູ້ຮົບ./.
-----------------------
(1) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 5, ໜ້າ 313.
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2021, ເຫຼັ້ມ 1, ໜ້າ 54.
(3) ຈຸກໜັກແມ່ນ: ຂໍ້ສະຫຼຸບເລກທີ 51-KL/TW, ລົງວັນທີ 30 ພຶດສະພາ 2019, ຂອງຄະນະເລຂາທິການ, “ກ່ຽວກັບການສືບຕໍ່ປະຕິບັດມະຕິກອງປະຊຸມສູນກາງພັກຄັ້ງທີ 8 ສະໄໝທີ 11 ກ່ຽວກັບປ່ຽນແປງໃໝ່ການສຶກສາແລະຝຶກອົບຮົມຢ່າງເປັນພື້ນຖານແລະຮອບດ້ານ ເພື່ອຕອບສະໜອງຄວາມຕ້ອງການຂອງການຫັນເປັນອຸດສາຫະກຳ ແລະທັນສະໄໝ ໃນເງື່ອນໄຂເສດຖະກິດຕະຫຼາດກຳນົດທິດສັງຄົມນິຍົມ ແລະ ເຊື່ອມໂຍງເຂົ້າກັບສາກົນ”; ມະຕິເລກທີ 26-NQ/TW, ລົງວັນທີ 19 ພຶດສະພາ 2018, ຂອງກອງປະຊຸມສູນກາງພັກຄັ້ງທີ 7 ສະໄໝທີ 13, “ກ່ຽວກັບການສຸມໃສ່ກໍ່ສ້າງຖັນແຖວພະນັກງານຂັ້ນສູງ, ໂດຍສະເພາະແມ່ນຂັ້ນຍຸດທະສາດທີ່ມີຄຸນສົມບັດ ຄວາມສາມາດ ແລະ ຊື່ສຽງຢ່າງພຽງພໍ, ທຽບເທົ່າກັບລະດັບຂອງໜ້າທີ່”; ຂໍ້ສະຫຼຸບເລກທີ 86-KL/TW, ລົງວັນທີ 24 ມັງກອນ 2014, ຂອງກົມການເມືອງສູນກາງ, “ກ່ຽວກັບນະໂຍບາຍດຶງດູດ ແລະ ສ້າງແຫຼ່ງພະນັກງານ ຈາກນັກສຶກສາທີ່ຈົບມະຫາວິທະຍາໄລຢ່າງດີເດັ່ນ ແລະນັກວິທະຍາສາດໜຸ່ມ”; ມະຕິເລກທີ 109-NQ/QUTW, ລົງວັນທີ 11-2-2019, ຂອງຄະນະພັກການທະຫານສູນກາງ, “ກ່ຽວກັບການກໍ່ສ້າງພະນັກງານກອງທັບ, ໂດຍສະເພາະໃນລະດັບຍຸດທະການແລະຍຸດທະສາດ ເພື່ອຕອບສະໜອງຄວາມຕ້ອງການຂອງໜ້າທີ່ໃນສະພາບການໃໝ່”; ມະຕິເລກທີ 52-NQ/TW, ລົງວັນທີ 27 ກັນຍາ 2019, ຂອງກົມການເມືອງສູນກາງ, “ກ່ຽວກັບບາງແຜນນະໂຍບາຍ, ນະໂຍບາຍເຂົ້າຮ່ວມການປະຕິວັດອຸດສາຫະກຳຄັ້ງທີ່ສີ່ຢ່າງເປັນເຈົ້າການ”; ຄຳສັ່ງເລກທີ 16/CT-TTg, ລົງວັນທີ 4 ພຶດສະພາ 2017, ຂອງນາຍົກລັດຖະມົນຕີ, “ກ່ຽວກັບການເພີ່ມທະວີຄວາມສາມາດເຂົ້າເຖິງການປະຕິວັດອຸດສາຫະກຳຄັ້ງທີ່ສີ່”; ຂໍ້ຕົກລົງເລກທີ 2289/QĐ-TTg, ລົງວັນທີ 31-12-2020, ຂອງນາຍົກລັດຖະມົນຕີ, “ປະກາດໃຊ້ຍຸດທະສາດແຫ່ງຊາດກ່ຽວກັບການປະຕິວັດອຸດສາຫະກຳຄັ້ງທີ່ສີ່ເຖິງປີ 2030”...
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 981 (ເດືອນມັງກອນ 2022)