ຍົກສູງຄຸນນະພາບການວາງແຜນກຳນົດ ແລະ
ການຫັນນະຄອນຮ່າໂນ້ຍເປັນທັນສະໄໝ ໂດຍຕິດພັນກັບ
ການພັດທະນາເສດຖະກິດຕົວເມືອງຕາມທິດຍືນຍົງ
ການຫັນນະຄອນຮ່າໂນ້ຍເປັນທັນສະໄໝ ໂດຍຕິດພັນກັບ
ການພັດທະນາເສດຖະກິດຕົວເມືອງຕາມທິດຍືນຍົງ
ພາບລວມຂອງວຽກງານວາງແຜນກຳນົດ ຂອງນະຄອນຫຼວງຮ່າໂນ້ຍ
ຜ່ານປະຫວັດສາດກວ່າ 1.000 ປີແຫ່ງການກໍ່ສ້າງແລະພັດທະນາ, ເມືອງທັງລອງ-ຮ່າໂນ້ຍ ເປັນສູນກາງທາງວັດທະນະທຳຂອງປະເທດ ທີ່ມີປະຫວັດສາດອາລະຍະທຳອັນຍາວນານ ແລະ ຊັບສົມບັດມໍລະດົກອັນລ້ຳຄ່າ ອຸດົມສົມບູນ ແລະ ຫຼາຍຮູບຫຼາຍແບບທີ່ສຸດ. ວັດທະນະທຳ ອາລະຍະທຳ ປະຫວັດສາດ ບໍ່ພຽງແຕ່ແມ່ນຄຸນຄ່າຫຼັກແຫຼ່ງຂອງຮ່າໂນ້ຍເທົ່ານັ້ນ ແຕ່ຍັງແມ່ນແຫຼ່ງຊັບພະຍາກອນພາຍໃນ ທ່າແຮງທີ່ຍິ່ງໃຫຍ່ ສໍາລັບການພັດທະນາ.
ການປຸກຕື່ນເຈດຈຳນົງ, ເສີມຂະຫຍາຍຮີດຄອງປະເພນີແຫ່ງອາລະຍະທຳ ແລະຄວາມກ້າຫານນັບພັນປີ ແລະ ສົ່ງເສີມກຳລັງແຮງແຫ່ງມະຫາສາມັກຄີປວງຊົນທັງຊາດ ເພື່ອນຳຮ່າໂນ້ຍໄປສູ່ການພັດທະນາທີ່ວ່ອງໄວ ແລະ ຍືນຍົງ ນັ້ນກໍແມ່ນເປົ້າໝາຍ ຄວາມຮຽກຮ້ອງຕ້ອງການ ແລະ ໜ້າທີ່ ທີ່ກອງປະຊຸມໃຫຍ່ຜູ້ແທນອົງຄະນະພັກນະຄອນຮ່າໂນ້ຍ ຄັ້ງທີ 17 ວາງອອກມາ.
ວັນທີ 5 ພຶດສະພາ 2022, ສະຫາຍເລຂາທິການໃຫຍ່ ຫງວຽນ ຝູ ຈ້ອງ ໄດ້ລົງນາມປະກາດໃຊ້ມະຕິຂອງກົມການເມືອງສູນກາງພັກສະບັບເລກທີ 15-NQ/TW, “ວ່າດ້ວຍທິດທາງ, ໜ້າທີ່ພັດທະນານະຄອນຫຼວງຮ້າໂນ້ຍ ຮອດປີ 2030, ວິໄສທັດຮອດປີ 2045”. ມະຕິແນໃສ່ສ້າງການຫັນປ່ຽນທີ່ມີລັກສະນະບຸກທະລຸ ໃນການລະດົມກຳລັງແຮງສັງລວມ, ຂຸດຄົ້ນທ່າແຮງ ແລະ ຄວາມໄດ້ປຽບ ຂອງນະຄອນຫຼວງ ຢ່າງມີປະສິດທິຜົນ, ສົມທົບຊັບພະຍາກອນຂອງປະເທດແລະສາກົນ, ກໍ່ສ້າງແລະພັດທະນານະຄອນຫຼວງ ໃຫ້ສົມກັບການເປັນສູນກາງການເມືອງ - ການບໍລິຫານປະເທດ, ສູນລວມໃຈປະຊາຊົນທົ່ວປະເທດຢ່າງແທ້ຈິງ; ສູນກາງເສດຖະກິດ, ວັດທະນະທໍາ, ການສຶກສາ ແລະ ການຝຶກອົບຮົມ, ວິທະຍາສາດ, ເຕັກໂນໂລຊີ ແລະ ການເຊື່ອມໂຍງສາກົນ; ກໍ່ສ້າງນະຄອນຫຼວງຮ່າໂນ້ຍ ໃຫ້ກາຍເປັນນະຄອນສະຫຼາດ, ທັນສະໄໝ, ສີຂຽວ, ສະອາດ, ສວຍງາມ, ໝັ້ນຄົງ ແລະ ປອດໄພ; ພັດທະນາຢ່າງວ່ອງໄວແລະຍືນຍົງ, ມີແຮງແຜ່ກະຈາຍ ເພື່ອຊຸກຍູ້ເຂດທົ່ງພຽງແມ່ນ້ຳແດງ, ເຂດເສດຖະກິດສຳຄັນທາງພາກເໜືອ ແລະ ທົ່ວປະເທດ ໃຫ້ພັດທະນາຮ່ວມກັນ.
ມະຕິລະບຸວ່າ: “ການພັດທະນານະຄອນຫຼວງຮ້າໂນ້ຍໃຫ້ເປັນ “ນະຄອນທີ່ສີວິໄລ - ອາລະຍະທຳ - ທັນສະໄໝ” ແມ່ນໜ້າທີ່ການເມືອງທີ່ສຳຄັນເປັນພິເສດ ໃນຍຸດທະສາດການກໍ່ສ້າງແລະປົກປັກຮັກສາປະເທດຊາດ ດ້ວຍຈິດໃຈ “ທົ່ວປະເທດເພື່ອຮ່າໂນ້ຍ, ຮ່າໂນ້ຍເພື່ອທົ່ວປະເທດ”; ແມ່ນຄວາມຮັບຜິດຊອບ ແລະ ພັນທະ ຂອງທົ່ວພັກ, ທົ່ວປວງຊົນ, ທົ່ວປອງທັບ, ຂອງລະບົບການເມືອງທັງໝົດ; ແນ່ມໜ້າທີ່ອັນດັບໜຶ່ງ ຂອງຄະນະພັກ, ອຳນາດການປົກຄອງ ແລະ ປະຊາຊົນນະຄອນຫຼວງຮ້າໂນ້ຍ”.
ນີ້ແມ່ນບັນດາພື້ນຖານຕົ້ນຕໍແລະສຳຄັນ ເພື່ອຜັນຂະຫຍາຍປະຕິບັດໜ້າທີ່ວຽກງານການວາງແຜນກຳນົດ, ການຄຸ້ມຄອງແຜນກຳນົດ ແລະ ການພັດທະນາຕົວເມືອງຮ່າໂນ້ຍໃຫ້ທັນສະໄໝ ບົນຫຼັກການຮັບປະກັນຄວາມກົມກຽວ ລະຫວ່າງການອະນຸລັກ ແລະ ການພັດທະນາ, ເສີມຂະຫຍາຍຄວາມສາມາດບົ່ມຊ້ອນ, ທ່າແຮງ, ຄຸນຄ່າດ້ານວັດທະນະທຳ ແລະ ປະຫວັດສາດທີ່ເປັນເອກະລັກ ຂອງນະຄອນຫຼວງ ຢ່າງເຕັມທີ່; ຮັກສາ ແລະ ພັດທະນາເຄື່ອງໝາຍນະຄອນຫຼວງແຫ່ງອາລະຍະທໍານັບພັນປີ, “ນະຄອນເພື່ອສັນຕິພາບ”, “ນະຄອນສ້າງສັນ”...
ວັນທີ 26 ກໍລະກົດ 2011, ນາຍົກລັດຖະມົນຕີໄດ້ອອກຂໍ້ຕົກລົງເລກທີ 1259/QD-TTg, “ວ່າດ້ວຍການອະນຸມັດແຜນແມ່ບົດການກໍ່ສ້າງນະຄອນຫຼວງຮ່າໂນ້ຍ ຮອດປີ 2030 ແລະ ວິໄສທັດຮອດປີ 2050” ໂດຍມີທິດທາງນະຄອນຫຼວງຮ່າໂນ້ຍ ພັດທະນາຕາມຮູບແບບກຸ່ມຕົວເມືອງ, ໃນນັ້ນມີເຂດຕົວເມືອງສູນກາງ (ຕົວເມືອງຂັ້ນໃນທາງປະຫວັດສາດ, ຕົວເມືອງຂັ້ນໃນທີ່ຂະຫຍາຍຕົວ, ຕ່ອງໂສ້ຕົວເມືອງທາງເໜືອຂອງແມ່ນ້ຳແດງ, ຕ່ອງໂສ້ຕົວເມືອງທາງຕາເວັນອອກຂອງຖະໜົນວົງແຫວນທີ 4, ແລວທາງຕາມແມ່ນໍ້າແດງ, ສາຍແອວສີຂຽວຂອງນ້ຳ ເຍວ້ ແລະ ບັນດາບໍລິເວນສີຂຽວ), 5 ຕົວເມືອງດາວທຽມ, ບັນດາຕົວເມືອງນ້ອຍເຊື່ອມຕໍ່ກັນ ດ້ວຍລະບົບການຈະລາຈອນບົນຖະໜົນວົງແຫວນທີ່ຕິດກັບຖະໜົນສູ່ໃຈກາງນະຄອນ, ມີການເຊື່ອມຕໍ່ກັບເຄືອຂ່າຍການຄົມມະນາຄົມໃນລະດັບພາກພື້ນ ແລະ ລະດັບຊາດ. ຕົວເມືອງສູນກາງແຍກຈາກບັນດາຕົວເມືອງດາວທຽມ ແລະ ຕົວເມືອງອື່ນ ດ້ວຍແລວທາງສີຂຽວ (ກວມເອົາ 70% ຂອງເນື້ອທີ່ດິນທໍາມະຊາດຂອງເມືອງ). ນີ້ແມ່ນເຄື່ອງມືສຳຄັນທີ່ສຸດເພື່ອກໍ່ສ້າງ ແລະ ພັດທະນານະຄອນຮ່າໂນ້ຍຢ່າງຍືນຍົງ, ມີລະບົບໂຄງສ້າງພື້ນຖານແລະເຕັກນິກທີ່ຄົບຊຸດ ທັນສະໄໝ, ມີການພັດທະນາຢ່າງກົມກຽວ ລະຫວ່າງວັດທະນະທຳ, ການອະນຸລັກມໍລະດົກ, ບູຮານສະຖານ ກັບການພັດທະນາເສດຖະກິດ, ການຮັກສາສິ່ງແວດລ້ອມ, ການຮັບປະກັນການປ້ອງກັນປະເທດ - ຄວາມໝັ້ນຄົງ ຕາມທິດເຊື່ອມໂຍງເຂດພາກ, ປະເທດ ແລະ ສາກົນ; ກາຍເປັນຕົວເມືອງທີ່ພັດທະນາຢ່າງຂະຫຍັນຂັນເຄື່ອນ, ມີປະສິດທິຜົນ, ມີການແຂ່ງຂັນສູງໃນປະເທດ, ພາກພື້ນ ແລະ ສາກົນ; ມີສະພາບແວດລ້ອມການຢູ່ອາໄສແລະເຮັດວຽກທີ່ດີ, ຄຸນນະພາບຊີວິດ ແລະ ການບັນເທີງຄຸນນະພາບສູງ ແລະ ໂອກາດໃນການລົງທຶນທີ່ເອື້ອອໍານວຍ.
ເພື່ອປະຕິບັດແຜນກຳນົດທົ່ວໄປກ່ຽວກັບການກໍ່ສ້າງນະຄອນຫຼວງເຖິງປີ 2030 ແລະ ວິໄສທັດເຖິງປີ 2050 ແລະ ດັດປັບແຜນກຳນົດການກໍ່ສ້າງເຂດນະຄອນຫຼວງຮ່າໂນ້ຍເຖິງປີ 2030 ແລະ ວິໄສທັດເຖິງປີ 2050 ເຊິ່ງໄດ້ຮັບອະນຸມັດຈາກນາຍົກລັດຖະມົນຕີ ໃນຂໍ້ຕົກລົງເລກທີ 768/QD-TTg, ລົງວັນທີ 6 ພຶດສະພາ 2016, ຄະນະພັກນະຄອນ ແລະ ຄະນະກຳມະການປະຊາຊົນນະຄອນ ໄດ້ສຸມໃສ່ຊີ້ນຳ ແລະ ຜັນຂະຫຍາຍວຽກງານຕ່າງໆ ກ່ຽກັບການວາງແຜນກຳນົດ. ມາຮອດປະຈຸບັນ, ບັນດາແຜນກຳນົດໄດ້ຮັບການອະນຸມັດແລ້ວ, ແຜນການໄດ້ອອກຄົບຖ້ວນໂດຍພື້ນຖານ; ອັດຕາການປົກຫຸ້ມຂອງແຜນກຳນົດທົ່ວໄປບັນລຸ 97,73%, ຂອງແຜນກຳນົດເຂດບັນລຸ 100%, ສຳເລັດໂຄງການວາງແຜນຜັງເຂດໃນ 35/35 ໂຄງການ, ໃຊ້ເປັນພື້ນຖານໃນການດຳເນີນການວາງແຜນລາຍລະອຽດ ແລະ ໂຄງການລົງທຶນກໍ່ສ້າງ, ຜັນຂະຫຍາຍວຽກງານການຄຸ້ມຄອງຕົວເມືອງ, ທີ່ດິນ, ການລົງທຶນ, ການກໍ່ສ້າງ, ການພັດທະນາເສດຖະກິດ-ສັງຄົມ.
ເພື່ອກໍ່ສ້າງແລະພັດທະນານະຄອນຫຼວງຮ່າໂນ້ຍຕາມເປົ້າໝາຍທີ່ວາງໄວ້, ໃນໄລຍະນີ້, ຄະນະພັກນະຄອນຮ່າໂນ້ຍ ໄດ້ອອກແຜນງານເຕັມວາລະ 10 ໂຄງການ ເພື່ອຜັນຂະຫຍາຍປະຕິບັດ ມະຕິກອງປະຊຸມໃຫຍ່ຜູ້ແທນອົງຄະນະພັກນະຄອນຮ່າໂນ້ຍ ຄັ້ງທີ 17 ວາລະປີ 2020 - 2025 (ໃນນັ້ນ, ຂົງເຂດການວາງແຜນກຳນົດ ແລະ ການພັດທະນາຕົວເມືອງມີ: ໂຄງການໝາຍເລກ 03-CTr/TU, ລົງວັນທີ 17 ມີນາ 2021, “ວ່າດ້ວຍການຕົບແຕ່ງຕົວເມືອງ, ການພັດທະນາຕົວເມືອງ ແລະ ເສດຖະກິດຕົວເມືອງຂອງນະຄອນຮ່າໂນ້ຍ ໄລຍະ 2021 - 2025”; ໂຄງການໝາຍເລກ 05-CTr/TU, ລົງວັນທີ 17 ມີນາ 2021, “ວ່າດ້ວຍການຍູ້ແຮງວຽກງານການວາງແຜນກຳນົດ ແລະ ການຄຸ້ມຄອງແຜນການ; ການຍົກສູງປະສິດທິພາບ ແລະ ປະສິດທິຜົນ ຂອງການຄຸ້ມຄອງ, ການໃຊ້ຊັບພະຍາກອນ ແລະ ການຮັກສາສິ່ງແວດລ້ອມ; ເປັນເຈົ້າການໃນການປ້ອງກັນແລະຮັບມືກັບໄພທຳມະຊາດ, ຊ່ວຍເຫຼືອກູ້ໄພ ກູ້ຊີບ, ຮັບມືກັບການປ່ຽນແປງສະພາບອາກາດໃນພື້ນທີ່ຂອງນະຄອນຮ່າໂນ້ຍ ໃນໄລຍະ 2021 - 2025”); ພ້ອມກັນນັ້ນ, ວັນທີ 2 ມີນາ 2022, ຄະນະປະຈຳຄະນະພັກນະຄອນຮ່າໂນ້ຍໄດ້ອອກຄຳສັ່ງເລກທີ 14-CT/TU, “ວ່າດ້ວຍການເພີ່ມທະວີການນຳພາ ຊີ້ນຳ ຕໍ່ວຽກງານການວາງແຜນກຳນົດ, ການຄຸ້ມຄອງແຜນກຳນົດ, ການຄຸ້ມຄອງຕົວເມືອງ ແລະ ລະບຽບການກໍ່ສ້າງ ຢູ່ນະຄອນຮ່າໂນ້ຍ”.
ດ້ວຍຄວາມເອົາໃຈໃສ່, ການນຳພາ ແລະ ຊີ້ນຳຂອງກົມການເມືອງສູນກາງ, ລັດຖະບານ ແລະ ຄວາມສົນໃຈຂອງທົ່ວປະເທດ, ພາຍຫຼັງກວ່າ 10 ປີແຫ່ງການປະຕິບັດແຜນກຳນົດທົ່ວໄປ ກ່ຽວກັບການກໍ່ສ້າງນະຄອນຫຼວງຮອດປີ 2030 ແລະວິໄສທັດຮອດປີ 2050, ການຍູ້ແຮງການລົງທຶນກໍ່ສ້າງຕົວເມືອງ ແລະ ການລະດົມບັນດາແຫຼ່ງກຳລັງສັງຄົມໃຫ້ເຂົ້າຮ່ວມການລົງທຶນພັດທະນາຕົວເມືອງ ໄດ້ສ້າງໂສມໜ້າໃໝ່ໃຫ້ກັບຕົວເມືອງຮ່າໂນ້ຍຢ່າງໄວວາ. ວຽກງານວາງແຜນການ, ການພັດທະນາພື້ນທີ່ ແລະ ການກໍ່ສ້າງໂຄງສ້າງພື້ນຖານດ້ານເຕັກນິກ ໄດ້ຮັບຄວາມເອົາໃຈໃສ່ເປັນພິເສດ, ໂດຍສະເພາະລະບົບຖະໜົນວົງແຫວນ, ຖະໜົນລັດສະໝີສູ່ໃຈກາງ ແລະ ສະພານຖະໜົນ, ຕິດກັບການຍົກສູງຄວາມສາມາດຂອງການຂົນສົ່ງຜູ້ໂດຍສານສາທາລະນະ ແລະ ໂຄງສ້າງພື້ນຖານສັງຄົມ. ການຄຸ້ມຄອງຕົວເມືອງ ແລະ ການປົກປ້ອງສິ່ງແວດລ້ອມ ໄດ້ຮັບການເພີ່ມທະວີ, ໂຄງສ້າງພື້ນຖານ ໄດ້ຮັບການປັບປຸງ ແລະ ຫັນເປັນທັນສະໄໝເທື່ອລະກ້າວ, ບັນຫາທີ່ຢູ່ອາໄສຂອງປະຊາຊົນ ໄດ້ຮັບການປັບປຸງໃຫ້ດີຂຶ້ນ.
ຄຽງຂ້າງບັນດາຜົນສຳເລັດທິ່ໄດ້ຮັບ, ນະຄອນຮ່າໂນ້ຍຮັບຮູ້ຢ່າງຈະແຈ້ງວ່າ ວຽກງານວາງແຜນການ, ການກໍ່ສ້າງ, ການຄຸ້ມຄອງ ແລະ ພັດທະນາຕົວເມືອງ ຂອງນະຄອນຫຼວງ ຍັງມີຂໍ້ຈຳກັດແລະສິ່ງທ້າທາຍຈຳນວນໜຶ່ງ. ນັ້ນແມ່ນ, ຍັງບໍ່ມີການກຳນົດກົນໄກຄຸ້ມຄອງ, ການດຳເນີນງານ ແລະ ການປະສານງານຢ່າງຈະແຈ້ງ ເພື່ອສະແດງໃຫ້ເຫັນຢ່າງຈະແຈ້ງ ເຖິງບົດບາດເປັນສູນກາງ ແລະ ກຳລັງຊຸກຍູ້ການເຕີບໂຕ ແລະ ການພັດທະນາເຂດທົ່ງພຽງແມ່ນ້ຳແດງ, ເຂດເສດຖະກິດຫຼັກທາງພາກເໜືອ ແລະ ທົ່ວປະເທດ; ອັດຕາການຂະຫຍາຍຕົວຂອງຕົວເມືອງບໍ່ບັນລຸເຖິງເປົ້າໝາຍທີ່ໄດ້ວາງໄວ້ (ປະຈຸບັນບັນລຸພຽງ 49,3% ທຽບກັບເປົ້າໝາຍແມ່ນ 58% - 60%), ຂະໜາດຂອງປະຊາກອນໄດ້ລື່ນກາຍຄາດໝາຍທີ່ວາງໄວ້, ເຮັດໃຫ້ການຄຸ້ມຄອງ ແລະ ຄວບຄຸມປະຊາກອນ ໃນເຂດຕົວເມືອງສູນກາງ ແລະ ການຢືດຍ້າຍປະຊາກອນໃນຕົວເມືອງ ມີຄວາມຫຍຸ້ງຍາກ. ວຽກງານການວາງແຜນ, ການຄຸ້ມຄອງແຜນກຳນົດ, ການຄຸ້ມຄອງທີ່ດິນ, ການກໍ່ສ້າງ, ການຄຸ້ມຄອງຕົວເມືອງ, ລະບຽບຈະລາຈອນ ແລະ ຄວາມປອດໄພການຈະລາຈອນ, ການປົກປັກຮັກສາສິ່ງແວດລ້ອມ ຍັງມີຂໍ້ຈຳກັດ; ໂຄງສ້າງພື້ນຖານການຄົມມະນາຄົມຂົນສົ່ງ ຍັງບໍ່ສອດຄ່ອງກັບຄວາມໄວໃນການຂະຫຍາຍຕົວເມືອງ; ລະບົບໂຄງສ້າງພື້ນຖານຕົວເມືອງ ຍັງບໍ່ທັນສົມບູນຄົບຊຸດ; ການພັດທະນາຕົວເມືອງບໍ່ມີຄວາມຮອບດ້ານ. ບັນດາຂໍ້ຈຳກັດນີ້ກໍໄດ້ຖືກຊີ້ໃຫ້ເຫັນ ໂດຍກົມການເມືອງສູນກາງ ໃນມະຕິສະບັບເລກທີ 15-NQ/TW, ລົງວັນທີ 5 ພຶດສະພາ 2022, “ວ່າດ້ວຍທິດທາງ, ໜ້າທີ່ການພັດທະນານະຄອນຫຼວງຮ່າໂນ້ຍຮອດປີ 2030, ວິໄສທັດຮອດປີ 2045” ເຊິ່ງຕ້ອງມີມາດຕະການແກ້ໄຂ ເພື່ອນຳນະຄອນຫຼວງຮ່າໂນ້ຍໄປສູ່ການພັດທະນາແບບຍືນຍົງ ຕາມທິດຊີ້ນຳໃນມະຕິຂອງກົມການເມືອງສູນກາງພັກ.
ວິທີການແກ້ໄຂສຳລັບການວາງແຜນກຳນົດ ແລະການຫັນຕົວເມືອງຮ່າໂນ້ຍເປັນທັນສະໄໝ
ໂດຍຕິດກັບການພັດທະນາເສດຖະກິດຕົວເມືອງຕາມທິດທາງຍືນຍົງ
ເພື່ອກໍ່ສ້າງແລະພັດທະນານະຄອນຫຼວງຮ່າໂນ້ຍໃຫ້ເປັນ “ນະຄອນທີ່ສີວິໄລ - ອາລະຍະທຳ - ທັນສະໄໝ” ຖືກຕ້ອງຕາມທັດສະນະຊີ້ນຳ, ເປົ້າໝາຍ ແລະ ທິດທາງທີ່ໄດ້ລະບຸໄວ້ ໃນມະຕິສະບັບເລກທີ 15-NQ/TW, ຮ່າໂນ້ຍຕ້ອງສືບຕໍ່ປະຕິບັດ 10 ໂຄງການວຽກງານຢ່າງມີປະສິດທິຜົນ ຕາມມະຕິກອງປະຊຸມໃຫຍ່ຄັ້ງທີ 17 ຂອງອົງຄະນະພັກນະຄອນຮ່າໂນ້ຍ ລວມທັງບັນດາໂຄງການ, ຄຳສັ່ງຂອງສູນກາງ ແລະ ຂອງນະຄອນ. ພິເສດແມ່ນ ມະຕິຂອງກົມການເມືອງສູນກາງ ສະບັບເລກທີ 06-NQ/TW, ລົງວັນທີ 24 ມັງກອນ 2022, “ວ່າດ້ວຍການວາງແຜນກຳນົດ, ການກໍ່ສ້າງ, ການຄຸ້ມຄອງ ແລະ ການພັດທະນາຕົວເມືອງຫວຽດນາມຮອດປີ 2030, ວິໄສທັດຮອດປີ 2045”; ໂຄງການໝາຍເລກ 03-CTr/TU, ລົງວັນທີ 17 ມີນາ 2021, ຂອງຄະນະພັກນະຄອນຮ່າໂນ້ຍ “ວ່າດ້ວຍການຕົບແຕ່ງຕົວເມືອງ, ການພັດທະນາຕົວເມືອງ ແລະ ເສດຖະກິດຕົວເມືອງ ຂອງນະຄອນຮ່າໂນ້ຍໄລຍະ 2021 - 2025”; ໂຄງການໝາຍເລກ 05-CTr/TU, ລົງວັນທີ 17 ມີນາ 2021, ຂອງຄະນະພັກນະຄອນຮ່າໂນ້ຍ “ວ່າດ້ວຍການຍູ້ແຮງວຽກງານການວາງແຜນກຳນົດ ແລະ ການຄຸ້ມຄອງແຜນການ; ການຍົກສູງປະສິດທິພາບ ແລະ ປະສິດທິຜົນ ຂອງການຄຸ້ມຄອງ, ການໃຊ້ຊັບພະຍາກອນ ແລະ ການຮັກສາສິ່ງແວດລ້ອມ; ເປັນເຈົ້າການໃນການປ້ອງກັນແລະຮັບມືກັບໄພທຳມະຊາດ, ຊ່ວຍເຫຼືອກູ້ໄພ ກູ້ຊີບ, ຮັບມືກັບການປ່ຽນແປງສະພາບອາກາດ ໃນພື້ນທີ່ນະຄອນຮ່າໂນ້ຍ ໃນໄລຍະ 2021 - 2025”; ຄຳສັ່ງເລກທີ 14-CT/TU, ລົງວັນທີ 2 ມີນາ 2022, ຂອງຄະນະປະຈຳຄະນະພັກນະຄອນຮ່າໂນ້ຍ “ວ່າດ້ວຍການເພີ່ມທະວີການນຳພາ ຊີ້ນຳ ຕໍ່ວຽກງານການວາງແຜນກຳນົດ, ການຄຸ້ມຄອງແຜນກຳນົດ, ການຄຸ້ມຄອງຕົວເມືອງ ແລະ ລະບຽບການກໍ່ສ້າງຢູ່ນະຄອນຮ່າໂນ້ຍ” ເພື່ອສືບທອດ, ເສີມຂະຫຍາຍ ບັນດາຜົນສຳເລັດທີ່ໄດ້ຮັບ, ແກ້ໄຂຜ່ານຜ່າຂໍ້ຈຳກັດ, ຈຸດອ່ອນ ແລະ ສຸມໃສ່ຊຸກຍູ້ວຽກງານວາງແຜນກຳນົດ ໂດຍຕິດກັບການພັດທະນາຕົວເມືອງ ໃນສາຍພົວພັນຢ່ານແໜ້ນແຟ້ນ ກັບການພັດທະນາລະບົບຕົວເມືອງ ໃນເຂດນະຄອນຫຼວງ ແລະ ທົ່ວປະເທດ.
ກ່ຽວກັບວຽກງານວາງແຜນກຳນົດ ແລະ ການຄຸ້ມຄອງແຜນກຳນົດ
ທີໜຶ່ງ, ສືບຕໍ່ສະເໜີປັບປຸງລະບຽບລະບອບ, ນະໂຍບາຍໃຫ້ສົມບູນ ເພື່ອອຳນວຍຄວາມສະດວກ ໃຫ້ແກ່ຂະບວນການຫັນເປັນຕົວເມືອງ, ວຽກງານວາງແຜນກຳນົດ, ການກໍ່ສ້າງ, ການຄຸ້ມຄອງ ແລະ ການພັດທະນາຕົວເມືອງຢ່າງຍືນຍົງ, ໂດຍສະເພາະແມ່ນ ສະເໜີໃຫ້ດັດແກ້ ແລະ ເພີ່ມເຕີມກົດໝາຍວ່າດ້ວຍນະຄອນຫຼວງ ຢ່າງເປັນພື້ນຖານ ແລະ ຮອບດ້ານ ເພື່ອເພີ່ມທະວີການແບ່ງຂັ້ນ ແລະ ການກະຈາຍອຳນາດ, ໃຫ້ນະຄອນຮ່າໂນ້ຍມີຄວາມເປັນເຈົ້າການໃນການຈັດການບັນຫາລະຫວ່າງຂະແໜງການ, ລະຫວ່າງພາກພື້ນ, ມີນະໂຍບາຍບຸກທະລຸ ແລະ ແບ່ງຂັ້ນຢ່າງຈິງຈັງ ເພື່ອແກ້ໄຂບັນດາບັນຫາທີ່ກ່ຽວຂ້ອງກັບເສດຖະກິດ, ສັງຄົມ, ແຜນກຳນົດ, ການພັດທະນາຕົວເມືອງ,... ຊຸກຍູ້ການປະຕິບັດແຜນກຳນົດ, ແຜນການທີ່ກ່ຽວຂ້ອງກັບການພັດທະນາເສດຖະກິດ-ສັງຄົມໃນພື້ນທີ່.
ທີສອງ, ສືບຕໍ່ຍູ້ແຮງແລະຍົກສູງຄຸນນະພາບ ຂອງວຽກງານວາງແຜນກຳນົດ, ການລົງທຶນກໍ່ສ້າງ, ສ້າງແຮງຊຸກຍູ້ການພັດທະນານະຄອນຫຼວງ, ປະກອບສ່ວນຊຸກຍູ້ການພັດທະນາຂອງບັນດາທ້ອງຖື່ນອື່ນໆ ໃນເຂດເມືອງຫຼວງ, ເຂດທົ່ງພຽງແມ່ນ້ຳແດງ ແລະ ທົ່ວປະເທດ, ເພີ່ມທະວີການຄຸ້ມຄອງປະຊາກອນໃນພື້ນທີ່; ຜັນຂະຫຍາຍບັນດາວຽກງານ, ໂຄງການຈຸດສຸມຢ່າງມີແຜນການ; ຈຸດສຸມແມ່ນວາງແຜນກຳນົດນະຄອນຮ່າໂນ້ຍ ໄລຍະ 2021 - 2030, ໂດຍມີວິໄສທັດຮອດປີ 2050; ດັດປັບແຜນກຳນົດໂດຍລວມການກໍ່ສ້າງນະຄອນຫຼວງຮ່າໂນ້ຍຮອດປີ 2030, ວິໄສທັກຮອດປີ 2050 ໂດຍຕິດກັບໂຄງການພັດທະນາຕົວເມືອງນະຄອນຮ່າໂນ້ຍຮອດປີ 2030, ວິໄສທັດຮອດປີ 2050.
ທີສາມ, ລວມສູນຊັບພະຍາກອນ ເພື່ອພັດທະນາ ແລະ ຍົກລະດັບລະບົບໂຄງສ້າງພື້ນຖານເສດຖະກິດ - ສັງຄົມ ຂອງນະຄອນຫຼວງ ໃຫ້ຄົບຖ້ວນ, ທັນສະໄໝ ແລະ ມີປະສິດທິຜົນ. ບຸລິມະສິດການຫັນເປັນທັນສະໄໝ ແລະ ພັດທະນາລະບົບໂຄງສ້າງພື້ນຖານເສດຖະກິດສັງຄົມຢ່າງໄວແລະຄົບຊຸດ, ສ້າງບັນດາໂຄງສ້າງກໍ່ສ້າງທີ່ໂດດເດັ່ນ, ພື້ນທີ່ສະຖາປັດຕະຍະກຳ, ພູມສັນຖານທີ່ເປັນເອກະລັກ ມີລັກສະນະສະເພາະ ຂອງນະຄອນຫຼວງ. ພັດທະນາເສັ້ນທາງເຊື່ອມຕໍ່ກັບຕົວເມືອງດາວທຽມ, ເຊື່ອມຕໍ່ພາຍໃນ ແລະ ລະຫວ່າງພາກພື້ນ (ເຊັ່ນ ການກໍ່ສ້າງ, ດັດແປງ, ຍົກລະດັບ, ປັບປຸງບູລະນະຖະໜົນສູ່ໃຈກາງ ແລະ ຖະໜົນວົງແຫວນໃຫ້ສົມບູນ ຄື: ທາງຫຼວງແຫ່ງຊາດເລກ 1A, ທາງຫຼວງແຫ່ງຊາດເລກ 6, ຖະໜົນວົງແຫວນ 1, ຖະໜົນວົງແຫວນ 2, ຖະໜົນວົງແຫວນ 2,5, ຖະໜົນວົງແຫວນ 3, ຖະໜົນວົງແຫວນ 3,5, ຖະໜົນວົງແຫວນ 4, ຖະໜົນວົງແຫວນ 5,...; ກໍ່ສ້າງເສັ້ນທາງລົດໄຟໃນຕົວເມືອງ, ຂົວຂ້າມແມ່ນ້ຳແດງ,...). ພິເສກແມ່ນ, ຮ່າໂນ້ຍຈະສຸມໃສ່ລົງທຶນກໍ່ສ້າງຖະໜົນວົງແຫວນທີ 4 - ເຂດນະຄອນຫຼວງ, ຖືວ່ານີ້ແມ່ນໜ້າທີບຸລິມະສິດ, ຈຸດໜັກໃຈກາງ ເພື່ອຈະສຸມໃສ່ນຳພາແກ້ໄຂບັນຫາພື້ນຖານຂອງນະຄອນຫຼວງຮ່າໂນ້ຍ ໃນປະຈຸບັນ, ສ້າງແຮງຜັກດັນໃໝ່ ເພື່ອພັດທະນາຕົວເມືອງສູນກາງ, ບັນດາຕົວເມືອງດາວທຽມ; ຂະຫຍາຍພື້ນທີ່ການພັດທະນາໃຫ້ຮ່າໂນ້ຍ, ສ້າງແຮງດຶງດູດເພື່ອຂະຫຍາຍຄວາມໜາແໜ້ນຂອງປະຊາກອນອອກນອກພື້ນທີ່ສ່ວນກາງ, ຈາກນັ້ນ ກຳກັບແລະຊີ້ນຳການຈະລາຈອນຈາກທາງໄກ, ຫຼຸດຜ່ອນແຮງກົດດັນຂອງການຈະລາຈອນໃນລະບົບຖະໜົນທີ່ມີຢູ່, ຊຸກຍູ້ການເຊື່ອມໂຍງເຂດພາກ, ສ້າງຄວາມສະດວກແຜ່ກະຈາຍ, ເຊື່ອມຕໍ່, ພັດທະນາເສດຖະກິດ-ສັງຄົມຢ່າງຄົບຊຸດໃນເຂດພາກ.
ທີສີ່, ສຸມໃສ່ການສ້າງຂົ້ວການເຕີບໂຕໃໝ່ຈຳນວນໜຶ່ງ, ປັບປຸງຮູບແບບຂອງໂຄງສ້າງການພັດທະນານະຄອນຫຼວງໃຫ້ສົມບູນເທື່ອລະກ້າວ, ສ້າງກຸ່ມຕົວເມືອງທີ່ມີບັນດານະຄອນ, ຕົວເມືອງໃນນະຄອນຫຼວງ, ບັນດາຕົວເມືອງດາວທຽມ, ເຂດຕົວເມືອງທີ່ເກີດຂຶ້ນຕາມຖະໜົນວົງແຫວນ, ເສັ້ນທາງເຊື່ອມຕໍ່ພາຍໃນພາກພື້ນ, ລະຫວ່າງພາກພື້ນ, ທາງລົດໄຟໃນຕົວເມືອງທີ່ເປັນການຖ່ວງດຸນ, ຜ່ອນຄາຍ ແລະ ຫຼຸດຜ່ອນພາລະຂອງໃຈກາງເມືອງ ແລະ ຢືດຍ້າຍຈຳນວນປະຊາກອນໄປຍັງເມືອງອ້ອມຂ້າງ; ຄົ້ນຄວ້າແລະສ້າງຮູບແບບການພັດທະນາ “ນະຄອນຂຶ້ນກັບນະຄອນຫຼວງ” ຢູ່ພາກເໜືອ (ໃນນັ້ນມີເມືອງ ສ້ອກເຊີນ, ເມລິງ, ດົງແອັງ) ຮັບປະກັນການເຊື່ອມຕໍ່ກັບ 2 ນະຄອນທີ່ໃກ້ຄຽງໃນພາກເໜືອ (ຂຶ້ນກັບແຂວງຫວິງຝຸກ ແລະ ແຂວງບັກນິງ) ເພື່ອສ້າງເປັນ “ສູນກາງຂອງ 3 ສູນກາງ” - 3 ກຸ່ມກຳລັງຊຸກຍູ້ການພັດທະນາເສດຖະກິດພາກພື້ນ ຕາມທິດວາງແຜນກຳນົດເຂດນະຄອນຫຼວງ (ຮ່າໂນ້ຍ - ຫວິງຝຸກ - ບັກນິງ); ພັດທະນາເສດຖະກິດພາດພື້ນຕາມທິດທາງວາງແຜນກຳນົດເຂດນະຄອນຫຼວງ (ຮ່າໂນ້ຍ - ຫວິງຝຸກ - ບັກນິງ); ນະຄອນຢູ່ທາງຕາເວັນຕົກ (ຕົວເມືອງ ຮວ່າລາກ ເຊື່ອມໂຍງກັບຕົວເມືອງ ຊວັນມາຍ) ສ້າງເປັນແນວຕົວເມືອງທີ່ມີໜ້າທີ່ໃນການພັດທະນາ ວິທະຍາສາດແລະເຕັກໂນໂລຊີ, ການສຶກສາແລະການຝຶຶກອົບຮົມ ແລະ ບໍລິການຊັ້ນສູງອື່ນໆ ເຊິ່ງໄດ້ເຊື່ອມໂຍງກັບບັນດາແຂວງທາງຕາເວັນຕົກສຽງເໜືອຂອງປະເທດ.
ທີຫ້າ, ສຸມໃສ່ການພັດທະນາເມືອງເປັນເມືອງນະຄອນ (ເມືອງໃນຕົວເມືອງໃຫຍ່); ສູ້ຊົນເຖິງປີ 2025 ມີ 3 ເຖິງ 5 ເມືອງໄດ້ພັດທະນາຂຶ້ນເປັນເມືອງນະຄອນ; ເຖິງປີ 2030 ມີອີກ 1 ເຖິງ 2 ເມືອງໄດ້ພັດທະນາຂຶ້ນເປັນເມືອງນະຄອນ. ຄົ້ນຄວ້າເປີດກວ້າງ, ຍົກລະດັບສະໜາມບິນສາກົນ ໂນ້ຍບ່າຍ ແລະ ສ້າງສະໜາມບິນສາກົນຕື່ມອີກ 1 ແຫ່ງ (ຄາດວ່າຈະຢູ່ໃນພື້ນທີ່ທາງຕອນໃຕ້ຂອງນະຄອນຫຼວງ) ເພື່ອຕອບສະໜອງຄວາມຕ້ອງການຂອງການຈະລາຈອນທາງອອກ ແລະ ການພັດທະນາເຂດນະຄອນຫຼວງ ແລະພາກເໜືອ.
ກ່ຽວກັບການພັດທະນາເສດຖະກິດຕົວເມືອງ ຕາມທິດທາງຍືນຍົງ
ອີງໃສ່ທ່າອ່ຽງການພັດທະນາເສດຖະກິດຂອງບັນດາປະເທດ ແລະ ດິນແດນ ໃນສະພາບການປະຕິວັດອຸດສາຫະກໍາຄັ້ງທີ 4 ແລະ ສະຖານະການການເມືອງ - ເສດຖະກິດ - ສັງຄົມ ໃນໂລກໃນປັດຈຸບັນ; ແຜນນະໂຍບາຍ ແລະ ທິດທາງການພັດທະນາເສດຖະກິດຂອງປະເທດ ໃນຍຸດທະສາດການພັດທະນາເສດຖະກິດ 10 ປີໄລຍະ 2021 - 2030; ລັກສະນະແລະຈຸດພິເສດຂອງເຂດຕົວເມືອງຮ່າໂນ້ຍ ແລະ ທິດທາງການພັດທະນາເສດຖະກິດໂດຍລວມ ຂອງນະຄອນຫຼວງ, ເສດຖະກິດເຂດຕົວເມືອງຮ່າໂນ້ຍຈະໄດ້ພັດທະນາຕາມທິດ “ໄວ, ມີປະສິດທິຜົນ ແລະ ຍືນຍົງ”, ນັ້ນແມ່ນທິດທາງຫຼັກທີ່ສອດຫ້ອຍຕະຫຼອດຂະບວນການຄຸ້ມຄອງ ແລະ ດຳເນີນການເສດຖະກິດເຂດຕົວເມືອງນະຄອນຮ່າໂນ້ຍ. ເພື່ອປະຕິບັດທິດທາງການພັດທະນາຫຼັກຂ້າງເທິງ, ການເຕີບໂຕເສດຖະກິດຂອງຮ່າໂນ່ຍຈະຕ້ອງອີງໃສ່ການປະສານສົມທົບບັນດາທິດທາງສະເພາະດັງຕໍ່ໄປນີ້:
- ການເຕີບໂຕສີຂຽວແລະສະອາດທີ່ອີີງໃສ່ການຍູ້ແຮງການຫັນປ່ຽນໂຄງປະກອບເສດຖະກິດຕົວເມືອງ ຕາມທິດພັດທະນາຂະແໜງການຜະລິດທີ່ສະອາດ, ປອດໄພ ແລະ ເປັນມິດກັບສິ່ງແວດລ້ອມ; ຍົກສູງຄຸນນະພາບການບໍລິການ, ພັດທະນາເສດຖະກິດດິຈິຕອນ, ເສດຖະກິດໝູນວຽນ, ການກິລາ, ການທ່ອງທ່ຽວ ແລະ ບັນດາຂະແໜງການບໍລິການທີ່ມີແຮງແຂ່ງຂັນສູງ ຢ່າງແຂງແຮງ.
- ການເຕີບໂຕເສດຖະກິດອີງໃສ່ເສດຖະກິດພູມປັນຍາ, ໃຊ້ປະໂຫຍດສູງສຸດຈາກບັນດາຜົນສຳເລັດທາງວິທະຍາສາດແລະເຕັກໂນໂລຊີ ແລະ ຍົກສູງຄວາມສາມາດປ່ຽນແປງໃໝ່ປະດິດສ້າງ.
- ການເຕີບໂຕເສດຖະກິດອີງໃສ່ລະບົບຕົວເມືອງສະຫຼາດທີ່ໄດ້ເຊື່ອມໂຍງຕາມຕ່ອງໂສ້ຕົວເມືອງ ແລະ ການເຊື່ອມໂຍງລະຫວ່າງເສດຖະກິດຕົວເມືອງ ກັບເສດຖະກິດຊົນນະບົດໃນເຂດໃກ້ຄຽງ.
- ສົມທົບລະຫວ່າງການເຕີບໂຕຕາມລວງກວ້າງ (ຕິດກັບຂະບວນການຫັນເປັນຕົວເມືອງ, ການຂະຫຍາຍເນື້ອທີ່ດິນ ແລະ ຂະໜາດປະຊາກອນໃນຕົວເມືອງ) ກັບການເຕີບໂຕຕາມລວງເລິກ (ອີງໃສ່ການຍົກສູງຄຸນນະພາບຕົວເມືອງ ແລະ ຄວາມສາມາດໃນການຂຸດຄົ້ນ, ນຳໃຊ້ຊັບພະຍາກອນນຳເຂົ້າ ຢ່າງສົມເຫດສົມຜົນ ປະຢັດ ແລະ ມີປະສິດທິຜົນ ໃນການຜະລິດ ທຸລະກິດ ແລະ ກິດຈະກຳການບໍລິການໃນຕົວເມືອງ).
- ບັນດາຂະແໜງການ, ຂົງເຂດຈຸດໜັກໃຈກາງໃນການພັດທະນາເສດຖະກິດຕົວເມືອງນະຄອນຮ່າໂນ້ຍໃນໄລຍະປີ 2021 – 2030 ເຊັ່ນ: ເຕັກໂນໂລຊີຂໍ້ມູນຂ່າວສານ, ການຄ້າເອເລັກໂຕຮນິກ, ການທ່ອງທ່ຽວ, ທຸລະກິດອະສັງຫາລິມະຊັບ, ການກໍ່ສ້າງທີ່ຢູ່ອາໄສ ແລະ ໂຄງສ້າງພື້ນຖານ, ບໍລິການຂົນສົ່ງ, ບໍລະການການເງິນ - ທະນາຄານ, ຫຼັກຊັບ, ໄປຊະນີ - ໂທລະຄົມມະນາຄົມ, ໃຫ້ຄຳແນະນຳທາງກົດໝາຍ, ການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີ, ທາງການແພດ, ການພັດທະນາໂຄງສ້າງພື້ນຖານ ແລະ ບໍລິການສະໜັບສະໜູນລະບົບນິເວດ ການລິເລີ່ມທຸລະກິດປະດິດສ້າງ,...
ເພື່ອໃຫ້ນະຄອນຮ່າໂນ້ຍພັດທະນາຢ່າງຍືນຍົງຕາມຈິດໃຈຂອງມະຕິເລກທີ 15-NQ/TW ແລະ ເສີມຂະຫຍາຍບົດບາດ, ຖານະທີ່ຕັ້ງ ຂອງນະຄອນຫຼວງ, ຕ້ອງສຸມໃສ່ປະຕິບັດບັນຫາຕໍ່ໄປນີ້ໃຫ້ໄດ້ເປັນຢ່າງດີ:
ທີໜຶ່ງ, ເລັ່ງລັດການຈັດເຮັດແຜນກຳນົດລະດັບຊາດແລະລະດັບພາກ ໃຫ້ສຳເລັດ... ຕາມກົດໝາຍວ່າດ້ວຍການວາງແຜນກຳນົດປີ 2017, ເພື່ອເປັນພື້ນຖານໃຫ້ນະຄອນຮ່າໂນ້ຍ ຈັດຕັ້ງການສ້າງ, ການປັບແຜນຜັງຕົວເມືອງ-ຊົນນະບົດ ຕາມຂໍ້ກຳນົດຂອງກົດໝາຍວ່າດ້ວຍການວາງແຜນກຳນົດຕົວເມືອງ, ກົດໝາຍວ່າດ້ວຍການກໍ່ສ້າງ. ພ້ອມກັນນັ້ນ, ຄົ້ນຄວ້າວິທີແກ້ໄຂ ເພື່ອລາຍງານຕໍ່ສະພາແຫ່ງຊາດ ເພື່ອອະນຸຍາດໃຫ້ບັນດານະຄອນພາຍໃຕ້ສັງກັດສູນກາງ ສ້າງແຜນແມ່ບົດຂອງແຂວງພຽງສະບັບດຽວ ເພື່ອຫຼີກເວັ້ນການຊ້ຳຊ້ອນ ໄຂວ່ຂ້າມກັນ ແລະ ສິ້ນເປືອງຊັບພະຍາກອນ (ປະຈຸບັນ, ນະຄອນຮ່າໂນ້ຍກຳລັງຕ້ອງສ້າງແຜນກຳນົດ 2 ແຜນໃນລະດັບນະຄອນຫຼວງຄື: ແຜນກຳນົດນະຄອນຫຼວງໄລຍະ 2021 - 2030, ວິໄສທັດຮອດປີ 2050 ຕາມຂໍ້ກຳນົດຂອງກົດໝາຍວ່າດ້ວຍການວາງແຜນກຳນົດປີ 2017 ແລະ ການດັດປັບໂດຍລວມແຜນກຳນົດທົ່ວໄປກ່ຽວກັບການກໍ່ສ້າງນະຄອນຫຼວງຮອດປີ 2030, ວິໄສທັດຮອດປີ 2050 ຕາມຂໍ້ກຳນົດຂອງກົດໝາຍວ່າດ້ວຍການວາງແຜນກຳນົດຕົວເມືອງປີ 2009 ແລະ ກົດໝາຍວ່າດ້ວຍການກໍ່ສ້າງປີ 2014, ສະບັບປັບປຸງ ເພີ່ມເຕີມປີ 2020; ຄ້າຍຄືກັນກັບບາງນະຄອນພາຍໃຕ້ສັງກັດສູນກາງກຳລັງຜັນຂະຫຍາຍ).
ທີສອງ, ກົດໝາຍວ່າດ້ວຍການກໍ່ສ້າງປີ 2014, ສະບັບປັບປຸງເພີ່ມເຕີມປີ 2020 ມີຂໍ້ກຳນົດກ່ຽວກັບແຜນກຳນົດການກໍ່ສ້າງພື້ນທີ່ສະເພາະ ແລະ ເຂດຊົນນະບົດ, ພ້ອມກັນນັ້ນ ກົດໝາຍວ່າດ້ວຍການວາງແຜນກຳນົດຕົວເມືອງປີ 2009 ກຳນົດກ່ຽວກັບການວາງແຜນກຳນົດຕົວເມືອງທີ່ມີຫຼາຍເນື້ອໃນທີ່ທັບຊ້ອນກັນ, ບໍ່ເປັນເອກະພາບ, ດັງນັ້ນ ຈິ່ງສະເໜີໃຫ້ຊີ້ນຳ ການສຶກສາລວບລວມເນື້ອໃນທັງສອງນີ້ໄວ້ໃນກົດໝາຍສະບັບດຽວຄື: ກົດໝາຍວ່າດ້ວຍການວາງແຜນຜັງເມືອງແລະຊົນນະບົດ ໃຫ້ເປັນເອກະພາບແລະຄົບຊຸດ; ພິຈາລະນາການລວບລວມແຜນທີ່ການວາງແຜນໃຊ້ທີ່ດິນ ຂອງຂະແໜງການຊັບພະຍາກອນແລະສິ່ງແວດລ້ອມ ເຂົ້າໃນລະບົບການວາງແຜນກຳນົດຕົວເມືອງແລະຊົນນະບົດ. ພ້ອມກັນນັ້ນ, ໃນຂະບວນການປັບປຸງ, ເພີ່ມເຕີມກົດໝາຍວ່າດ້ວຍການວາງແຜນກຳນົດປີ 2017 ນັ້ນ ຕ້ອງຮັບປະກັນຄວາມເປັນເອກະພາບແລະຄົບຊຸດ (ອາດຈະພິຈາລະນາທາງເລືອກໃນການລວມບັນດາກົດໝາຍຂ້າງເທິງເຂົ້າເປັນ ກົດໝາຍວ່າດ້ວຍການວາງແຜນກຳນົດສະບັບດຽວ). ຄົ້ນຄວ້າການສ້າງກົດໝາຍວ່າດ້ວຍການຄຸ້ມຄອງແລະພັດທະນາຕົວເມືອງ ເພື່ອສ້າງກົນໄກແລະແລວທາງດ້ານກົດໝາຍທີ່ສຳຄັນ ໃນການຄຸ້ມຄອງ ແລະ ຊຸກຍູ້ການພັດທະນາ, ສອດຄ່ອງກັບທິດທາງຂອງມະຕິເລກທີ 06-NQ/TW, ລົງວັນທີ 24 ມັງກອນ 2022, ຂອງກົມການເມືອງສູນກາງພັກ ແລະ ພຶດຕິກຳຕົວຈິງ, ຄ່ອຍໆແກ້ໄຂຜ່ານຜ່າຈຸດອ່ອນ ແລະ ຫຼຸດຜ່ອນຂໍ້ຈໍາກັດ ໃນປັດຈຸບັນ ເທື່ອລະກ້າວ.
ທີສາມ, ຄົ້ນຄວ້າພັດທະນາລະບຽບກົດໝາຍ, ກົນໄກ ແລະ ນະໂຍບາຍໃໝ່ກ່ຽວກັບການລົງທຶນ (ນັບທັງການຄົ້ນຄວ້າປັບປຸງ ເພີ່ມເຕີມກົນໄກ, ນະໂຍບາຍທີ່ຖອດຖອນຈາກຂໍ້ກຳນົດກ່ອນໜ້າທີ້ ກ່ຽວກັບໂຄງການລົງທຶນ ຕາມຮູບການສັນຍາກໍ່ສ້າງ - ມອບໂອນ (BT) ແລະ ຂໍ້ກຳນົດຕ່າງໆທີ່ກ່ຽວຂ້ອງ) ຕິດກັບການປັບປຸງ, ເພີ່ມເຕີມ ແລະ ການປະສານຂໍ້ກໍານົດທາງດ້ານກົດໝາຍກ່ຽວກັບການວາງແຜນ, ການລົງທຶນ, ທີ່ດິນ, ທີ່ຢູ່ອາໄສ, ການຄຸ້ມຄອງການພັດທະນາຕົວເມືອງ, ການກໍ່ສ້າງ, ການປະມູນ,... ເພື່ອສ້າງພື້ນຖານ, ແລວທາງດ້ານກົດໝາຍທີ່ບຸກທະລຸ, ເໝາະສົມກັບການຜັນຂະຫຍາຍຢ່າງສະດວກ ບັນດາໂຄງການຂອບໂຄງສ້າງພື້ນຖານດ້ານເຕັກນິກ, ໂຄງສ້າງພື້ນຖານດ້ານສັງຄົມ ແລະ ໂຄງສ້າງພື້ນຖານເສດຖະກິດ, ຊຸກຍູ້ການພັດທະນາຕົວເມືອງ ແລະ ເສດຖະກິດຕົວເມືອງ.
ທີສີ່, ບັນດາແຂວງ, ນະຄອນໃນເຂດນະຄອນຫຼວງຮ່າໂນ້ຍສ້າງໂຄງການ, ແຜນການ, ແຜນງານລົງທຶນບຸລິມະສິດທີ່ມີປະໂຫຍດຕໍ່ການເຊື່ອມໂຍງພາກພື້ນ; ຍູ້ແຮງການປະຕິບັດບັນດາໂຄງການສຳຄັນ ເພື່ອພັດທະນາເສດຖະກິດ - ສັງຄົມ, ບັນດາໂຄງການພັດທະນາໂຄງສ້າງພື້ນຖານກອບ, ຮັບປະກັນການເຊື່ອມຕໍ່ທີ່ຄົບຊຸດ (ຖະໜົນວົງແຫວນທີ 4, ຖະໜົນວົງແຫວນທີ 5...) ຕາມທິດທາງການວາງແຜນກຳນົດເຂດນະຄອນຫຼວງຮ່າໂນ້ຍ ທີ່ໄດ້ຮັບການອະນຸມັດໂດຍນາຍົກລັດຖະມົນຕີ./.
----------------------------------
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 999 (ເດືອນຕຸລາ 2022)