ກຳມະບານຫວຽດນາມສືບຕໍ່ປະກອບສ່ວນເຂົ້າໃນພາລະກິດ
ການສ້າງສາແລະປົກປັກຮັກສາປະເທດຊາດໃນໄລຍະປະຈຸບັນ
ການສ້າງສາແລະປົກປັກຮັກສາປະເທດຊາດໃນໄລຍະປະຈຸບັນ
ເລຂາທິການໃຫຍ່, ປະທານປະເທດ ໂຕເລິມ ພົບປະກັບຄະນະຜູ້ແທນໄດ້ຮັບກຽດໃນຂະບວນການແຂ່ງຂັນ “ຄຳແນະນຳດີ, ຮັບໃຊ້ດີ” ໄລຍະປີ 2019-2024 _ແຫຼ່ງ: nhandan.vn
ສູນກາງຄວາມສາມັກຄີຂອງກຳມະກອນແລະຜູ້ອອກແຮງງານ
ພາຍໃຕ້ການນຳພາຂອງພັກ
ໃນຂະບວນການກະກຽມໃຫ້ແກ່ການກຳເນີດຂອງພັກ, ສະມາຄົມກຳມະກອນແດງ - ບັນພະບຸລຸດຂອງກຳມະບານຫວຽດນາມ - ເປັນໜຶ່ງໃນບັນດາອົງການຈັດຕັ້ງມະຫາຊົນທີ່ສັດຊື່ ແລະເຂັ້ມແຂງ ທີ່ເຕົ້າໂຮມຊົນຊັ້ນກຳມະກອນແລະຄົນງານຢ່າງກວ້າງຂວາງ. ພາຍໃຕ້ການນຳພາຂອງພັກ, ກຳມະບານຫວຽດນາມ (ກຳມະບານ) ເປັນສູນກາງຄວາມສາມັກຄີທີ່ແທ້ຈິງຂອງກຳມະກອນແລະຜູ້ອອກແຮງງານຫວຽດນາມ. ບັນດາສະມາຊິກກຳມະບານກາຍເປັນກຳລັງຫຼັກແຫຼ່ງ ປະກອບສ່ວນເຂົ້າໃນຜົນສຳເລັດຂອງການປະຕິວັດເດືອນສິງຫາປີ 1945, ໃຫ້ກຳເນີດປະເທດສາທາລະນະລັດ ປະຊາທິປະໄຕ ຫວຽດນາມ, ປະຈຸບັນແມ່ນປະເທດສາທາລະນະລັດ ສັງຄົມນິຍົມ ຫວຽດນາມ - ເຊິ່ງເປັນລັດກຳມະກອນ-ຊາວນາແຫ່ງທຳອິດ ໃນອາຊີຕາເວັນອອກສຽງໃຕ້. ຈາກນີ້ໄປ, ຊົນຊັ້ນກຳມະກອນແລະປະຊາຊົນຫວຽດນາມໄດ້ກາຍເປັນເຈົ້າຂອງປະເທດ ແລະ ກຳມະບານຢືນຢັນບົດບາດຂອງຕົນ ໃນຖານະອົງການການເມືອງ-ສັງຄົມທີ່ສຳຄັນ ໃນພາລະກິດປະຕິວັດຂອງປະເທດຊາດ ພາຍໃຕ້ການນຳພາຂອງພັກ.
ໃນຊຸມປີຕົ້ນແຫ່ງການເປັນເອກະລາດຂອງປະເທດ, ປະຕິບັດໜ້າທີ່ທັງຕໍ່ຕ້ານ ແລະ ກໍ່ສ້າງປະເທດຊາດ, ກຳມະບານໄດ້ຈັດຕັ້ງ, ລະດົມກຳມະກອນແລະຜູ້ອອກແຮງງານສຸມໃສ່ກໍ່ສ້າງໂຮງຈັກ ໂຮງງານ, ສະຖານທີ່ເຮັດວຽກ, ຜະລິດອາວຸດຍຸດໂທປະກອນ; ຜ່ານຜ່າຄວາມຫຍຸ້ງຍາກ, ຫ້າວຫັນແຂ່ງຂັນກັນອອກແຮງງານ ເພື່ອຮັບໃຊ້ສົງຄາມຕໍ່ຕ້ານ, ປະກອບສ່ວນພ້ອມກັບກອງທັບ ແລະ ປະຊາຊົນທົ່ວປະເທດ ສ້າງໄຊຊະນະດຽນບຽນຝູ ປີ 1954 ທີ່ “ມີຊື່ສຽງໂດ່ງດັງໃນຫ້າທະວີບ, ສັ່ນສະເທືອນໂລກ”, ສຳເລັດສິ້ນສຸດການຕໍ່ຕ້ານພວກລ່າເມືອງຂຶ້ນຝຣັ່ງ ຕະຫຼອດ 9 ປີອັນສະຫງ່າລາສີ.
ໂດຍກຳນົດທີ່ຕັ້ງສຳຄັນຂອງອົງການຈັດຕັ້ງກຳມະບານໃນລະບົບການເມືອງຂອງປະເທດ, ປີ 1957, ກົດໝາຍວ່າດ້ວຍກຳມະບານໄດ້ຮັບການປະກາດໃຊ້, ສ້າງພື້ນຖານທາງດ້ານກົດໝາຍ, “ເພື່ອກຳນົດແຈ້ງ ບົດບາດ, ໜ້າທີ່ ແລະ ສິດຂອບເຂດ ຂອງອົງການກຳມະບານ ໃນລະບອບປະຊາທິປະໄຕປະຊາຊົນ ນຳໂດຍຊົນຊັ້ນກຳມະກອນ, ສ້າງເງື່ອນໄຂອຳນວຍຄວາມສະດວກໃຫ້ຊົນຊັ້ນກຳມະກອນພັດທະນາ ແລະປັບປຸງການຈັດຕັ້ງ, ເສີມຂະຫຍາຍຄຸນປະໂຫຍດອັນຕັ້ງໜ້າຂອງກຳມະບານ ໃນກິດຈະການກໍ່ສ້າງອຳນາດການປົກຄອງ, ສ້າງເສດຖະກິດ, ພັດທະນາວັດທະນະທຳ...”(1). ປີ 1959, ກຳມະບານແມ່ນອົງການຈັດຕັ້ງມະຫາຊົນທຳອິດທີ່ໄດ້ຮັບການກຳນົດໄວ້ໃນລັດຖະທຳມະນູນ (2), ເປັນບ່ອນອີງທີ່ໝັ້ນຄົງ ເພື່ອໃຫ້ລັດສ້າງແລະປະຕິບັດແຜນການພັດທະນາເສດຖະກິດ-ສັງຄົມ.
ໃນໄລຍະກໍ່ສ້າງລັດທິສັງຄົມນິຍົມຢູ່ພາກເໜືອ ແລະ ຕໍ່ສູ້ທ້ອນໂຮມປະເທດຊາດເປັນເອກະພາບ, ເຖິງວ່າປະສົບກັບຄວາມຫຍຸ້ງຍາກລຳບາກນັບບໍ່ຖ້ວນ, ແຕ່ດ້ວຍຄວາມຮັບຜິດຊອບຂອງຜູ້ເປັນເຈົ້າຂອງຂອງປະເທດ, ຖັນແຖວກຳມະກອນ, ລັດຖະກອນ ແລະ ຜູ້ອອກແຮງງານ ໄດ້ເຄື່ອນໄຫວຊຸກຍູ້ການຜະລິດ, ປະຕິບັດການປະຢັດມັດທະຍັດ, ຕ້ານຄວາມຟຸມເຟືອຍ ສິ້ນເປືອງ, ປະກອບສ່ວນສຳຄັນເຂົ້າໃນໄຊຊະນະຂອງການຟື້ນຟູເສດຖະກິດ ແລະ ການດັດສ້າງສັງຄົມນິຍົມຢູ່ພາກເໜືອ; ພ້ອມກັນນັ້ນ, ຕໍ່ສູ້ເພື່ອໂຮມປະເທດເປັນເອກະພາບ, ປະກອບສ່ວນເຂົ້າໃນໄຊຊະນະອັນຍິ່ງໃຫຍ່ໃນລະດູບານໃໝ່ແຫ່ງປະຫວັດສາດປີ 1975, ປົດປ່ອຍພາກໃຕ້ຢ່າງສົມບູນ ແລະ ໂຮມປະເທດເປັນເອກະພາບ.
ເມື່ອທົ່ວປະເທດກ້າວສູ່ການກໍ່ສ້າງລັດທິສັງຄົມນິຍົມ, ກຳມະບານໄດ້ຮ່ວມເປັນເອກະພາບໃນຂອບເຂດທົ່ວປະເທດ ແລະ ໄດ້ສຸມໃສ່ໂຄສະນາ ຂົນຂວາຍກຳມະກອນ ລັດຖະກອນ ແລະຜູ້ອອກແຮງງານ ໃຫ້ຫ້າວຫັນແຂ່ງຂັນກັນອອກແຮງງານ, ທຳການຜະລິດ, ພັດທະນາເສດຖະກິດ, ຊຸກຍູ້ການຫັນເປັນອຸດສາຫະກຳ, ນຳໜ້າໃນການປະຕິບັດສາມໂຄງການເສດຖະກິດທີ່ສຳຄັນຂອງພັກ ແລະ ເຂົ້າຮ່ວມການປົກປັກຮັກສາປະເທດຊາດ. ທີ່ຕັ້ງ ແລະ ບົດບາດຂອງອົງການກຳມະບານໃນລະບົບການເມືອງໄດ້ຮັບການກຳນົດຢ່າງຈະແຈ້ງ ໃນລັດຖະທຳມະນູນປີ 1980, ເມື່ອເປັນຄັ້ງທຳອິດທີ່ມີມາດຕາສະເພາະຂອງລັດຖະທຳມະນູນທີ່ລະບຸກ່ຽວກັບອົງການກຳມະບານ.
ປະຕິບັດແນວທາງການປ່ຽນແປງໃໝ່ຂອງພັກກອມມູນິດຫວຽດນາມ, ກຳມະບານໄດ້ປ່ຽນແປງໃໝ່ການຈັດຕັ້ງ, ເນື້ອໃນ ແລະແບບວິທີການເຄື່ອນໄຫວເທື່ອລະກ້າວ ໃຫ້ເໝາະສົມກັບສະພາບການຕົວຈິງ. ການເຄື່ອນໄຫວຂອງກຳມະບານໄດ້ຫັນລົງສູ່ຮາກຖານຢ່າງແຂງແຮງ, ສຸມໃສ່ປະຕິບັດໜ້າທີ່ເປັນຢ່າງດີ ໃນການເປັນອົງການຕາງໜ້າ, ປົກປັກຮັກສາສິດແລະຜົນປະໂຫຍດອັນຊອບທຳ ຖືກກົດໝາຍ, ເບິ່ງແຍງດູແລຜົນປະໂຫຍດອັນແທດຈິງຂອງສະມາຊິກກຳມະບານ ແລະຜູ້ອອກແຮງງານ. ກຳມະບານສືບຕໍ່ເສີມຂະຫຍາຍບົດບາດເປັນອົງການຜູ້ຕາງໜ້າທີ່ໄວ້ວາງໃຈຂອງຜູ້ອອກແຮງງານ, ເປັນພື້ນຖານການເມືອງ-ສັງຄົມອັນໝັ້ນຄົງຂອງພັກແລະລັດ, ເປັນ “ຂົວຕໍ່” ລະຫວ່າງພັກ ລັດ ແລະ ຜູ້ອອກແຮງງານ. ອົງການກຳມະບານມີຄວາມພາກພູມໃຈ ໃນການມີສ່ວນຮ່ວມໂດຍກົງ ໃນການເຮັດໃຫ້ບັນດາໜ້າທີ່ຂອງກິດຈະການປ່ຽນແປງໃໝ່ເປັນຮູບປະທຳ, ຄ່ອຍໆກໍ່ສ້າງປະເທດໃຫ້ຮັ່ງມີ ເຂັ້ມແຂງຕາມທິດສັງຄົມນິຍົມ, ປະກອບສ່ວນເຂົ້າໃນບັນດາຜົນງານອັນຍິ່ງໃຫຍ່ແລະມີຄວາມໝາຍທາງປະຫວັດສາດ ຂອງພັກ ແລະ ປະເທດຊາດໃນເກືອບ 40 ປີທີ່ຜ່ານມາ.
ເສີມຂະຫຍາຍມູນເຊື້ອອັນສະຫງ່າລາສີ, ສົມຄວນເປັນອົງການທີ່ເປັນຕົວແທນ,
ເບິ່ງແຍງດູແລ, ປົກປ້ອງສິດແລະຜົນປະໂຫຍດຂອງຜູ້ອອກແຮງງານ
ປະເທດສືບຕໍ່ມີການປ່ຽນແປງໃໝ່ຢ່າງຮອບດ້ານແລະຄົບຊຸດ. ຜົນສຳເລັດຂອງການປະຕິວັດອຸດສາປະກຳຄັ້ງທີສີ່, ໂດຍສະເພາະ ເຕັກໂນໂລຊີດິຈິຕອນ ແລະປັນຍາປະດິດມີການພັດທະນາຢ່າງວ່ອງໄວ, ບຸກທະລຸ, ສົ່ງຜົນກະທົບຫຼາຍດ້ານຢ່າງກວ້າງຂວາງ, ສ້າງການປ່ຽນແປງອັນໃຫຍ່ຫຼວງໃນດ້ານແຮງງານ, ວຽກເຮັດງານທຳ ແລະ ການພົວພັນດ້ານແຮງງານ ເຊິ່ງສົ່ງຜົນກະທົບໂດຍກົງຕໍ່ຊີວິດ, ວຽກເຮັດງານທຳ ແລະ ລາຍໄດ້ຂອງຜູ້ອອກແຮງງານ; ເຮັດໃຫ້ມີການປ່ຽນແປງສະພາບແວດລ້ອມແຫ່ງການເຄື່ອນໄຫວ, ເປົ້າໝາຍການເຕົ້າໂຮມ ແລະ ວິທີການດຳເນີນງານຂອງກຳມະບານ. ກວ່າເວລາໃດໝົດ, ອົງການກຳມະບານມີຄວາມຮັບຮູ້ຢ່າງເລິກເຊິ່ງເຖິງບົດບາດ ແລະ ຄວາມສຳຄັນຂອງການປະຕິບັດໜ້າທີ່ການເປັນຕົວແທນ ແລະ ປົກປ້ອງສິດແລະຜົນປະໂຫຍດຕາມກົດໝາຍແລະຊອບທຳຂອງສະມາຊິກກຳມະບານແລະຜູ້ອອກແຮງງານຢ່າງມີປະສິດທິຜົນ.
ເພື່ອປົກປ້ອງຜູ້ອອກແຮງງານຕັ້ງແຕ່ຕົ້ນ, ຈາກໄລຍະໄກ ແລະ ໃນວົງກວ້າງ, ອົງການກຳມະບານທຸກຂັ້ນ, ໂດຍສະເພາະ ສະຫະພັນແຮງງານຫວຽດນາມ ໄດ້ເປັນເຈົ້າການແລະຕັ້ງໜ້າປ່ຽນແປງໃໝ່ ແລະປັບປຸງຍົກສູງຄຸນນະພາບການເຂົ້າຮ່ວມການພັດທະນານະໂຍບາຍ ແລະກົດໝາຍ. ອົງການກຳມະບານມີສຽງນັບມື້ນັບເຂັ້ມແຂງ ແລະມີປະສິດທິພາບ ໃນສະພາ, ຄະນະກຳມະການ, ຄະນະຊີ້ນຳ ແລະ ອົງການທີ່ໄດ້ຮັບການເລືອກຕັ້ງ ເພື່ອປົກປ້ອງສິດປະໂຫຍດຂອງຜູ້ອອກແຮງງານ. ໃນສະພາຄ່າແຮງແຫ່ງຊາດ, ກຳມະບານໄດ້ສະແດງບົດບາດເປັນຕົວແທນຂອງຜູ້ອອກແຮງງານຢ່າງຈະແຈ້ງ ແລະມີປະສິດທິຜົນ. ໃນໄລຍະຫ້າປີທີ່ຜ່ານມາ, ດ້ວຍຂໍ້ສະເໜີຂອງສະຫະພັນແຮງງານຫວຽດນາມ, ຄ່າແຮງຂັ້ນຕ່ຳເພີ່ມຂຶ້ນ 25,34% ເຊິ່ງປະກອບສ່ວນປັບປຸງຊີວິດການເປັນຢູ່ຂອງສະມາຊິກກຳມະບານແລະຜູ້ອອກແຮງງານດີຂຶ້ນ, ຮັດແຄບຊ່ອງຫວ່າງລະຫວ່າງຄ່າແຮງຂັ້ນຕ່ຳ ແລະມາດຕະຖານການດຳລົງຊີວິດຂັ້ນຕ່ຳ. ກຳມະບານໄດ້ຕັ້ງໜ້າໃນການຄົ້ນຄວ້າ ແລະ ສະເໜີໃຫ້ມີການປະກາດໃຊ້ກົນໄກ, ນະໂຍບາຍ ເພື່ອແກ້ໄຂຄວາມຫຍຸ້ງຍາກດ້ານທີ່ຢູ່ອາໄສ, ການກວດສຸຂະພາບແລະປິ່ນປົວພະຍາດ ແລະ ສະຫວັດດີການສັງຄົມ ສຳລັບກຳມະກອນ, ລັດຖະກອນ ແລະຜູ້ອອກແຮງງານ.
ການເຄື່ອນໄຫວຂໍ້ມູນຂ່າວສານ, ການໂຄສະນາເຜີຍແຜ່, ການຕິດຕໍ່ພົວພັນ ແລະ ການສົນທະນາໃນການພັດທະນານະໂຍບາຍ ແລະ ກົດໝາຍວ່າດ້ວຍແຮງງານ ແລະ ວຽກເຮັດງານທຳ ໄດ້ຮັບຄວາມເອົາໃຈໃສ່ຈາກທຸກຂັ້ນ ແລະ ຂະແໜງການ. ໂຄງການສົນທະນາຂອງທ່ານນາຍົກລັດຖະມົນຕີ ກັບຜູ້ອອກແຮງງານ, ເວທີປາໄສຜູ້ອອກແຮງງານໂດຍທ່ານປະທານສະພາແຫ່ງຊາດເປັນປະທານ, ຜູ້ແທນສະພາແຫ່ງຊາດພົບປະກັບຜູ້ມີສິດເລືອກຕັ້ງໃນຫົວຂໍ້ສະເພາະ ກັບກຳມະກອນ, ລັດຖະກອນ ແລະຜູ້ອອກແຮງງານ; ບັນດາຫົວໜ້າຄະນະພັກ, ອຳນາດການປົກຄອງ ແລະ ນາຍຈ້າງ ປຶກສາຫາລືກັບສະມາຊິກກຳມະບານແລະຜູ້ອອກແຮງງານ... ໄດ້ປະກອບສ່ວນແກ້ໄຂຂໍ້ກັງວົນ ແລະບັນຫາຮີບດ່ວນຂອງກຳມະກອນ ແລະຜູ້ອອກແຮງງານ. ກິດຈະກໍາເຫຼົ່ານີ້ແມ່ນຊ່ອງທາງທີ່ສໍາຄັນໃນການປັບປຸງນະໂຍບາຍ ແລະກົດໝາຍ ໃຫ້ສົມບູນແບບ.
ກຳມະບານຂັ້ນຮາກຖານສະແດງໃຫ້ເຫັນແຈ້ງເຖິງບົດບາດໃນການເຂົ້າຮ່ວມການສ້າງ ແລະປະຕິບັດກົດລະບຽບປະຊາທິປະໄຕຢູ່ຮາກຖານ. ການເຈລະຈາ ແລະການລົງນາມສັນຍາແຮງງານຮ່ວມໃນບັນດາວິສາຫະກິດ ໂດຍສະເພາະ ວິສາຫະກິດນອກພາກລັດ ໄດ້ຮັບຄວາມເອົາໃຈໃສ່ ແລະມີການປ່ຽນແປງໃໝ່ຫຼາຍຢ່າງ; ໄດ້ຄ່ອຍໆຂະຫຍາຍສັນຍາແຮງງານຮ່ວມ ໃນກຸ່ມວິສາຫະກິດ, ຂະແໜງການ ແລະ ອາຊີບ.
ນອກຈາກນັ້ນ, ອົງການກຳມະບານທຸກຂັ້ນທີ່ເປັນຕົວແທນຂອງກຸ່ມຄົນງານຈະມີສ່ວນຮ່ວມຢ່າງຕັ້ງໜ້າໃນການດຳເນີນການ ເພື່ອປົກປ້ອງສິດແລະຜົນປະໂຫຍດທີ່ຖືກກົດໝາຍ ຊອບທຳຂອງກຸ່ມຄົນງານ ແລະຜູ້ອອກແຮງງານ; ສົມທົບກັນເຂົ້າຮ່ວມການກວດກາ, ຕິດຕາມກວດກາ, ສະເໜີແນະວິທີແກ້ໄຂບັນຫາ ເພື່ອຫຼຸດຜ່ອນການລະເມີດກົດໝາຍແຮງງານຢູ່ວິສາຫະກິດ. ກຳມະບານສືບຕໍ່ເສີມຂະຫຍາຍບົດບາດໃນການເຂົ້າຮ່ວມການການສ້າງການພົວພັນດ້ານແຮງງານທີ່ກົມກຽວ, ໝັ້ນຄົງ ແລະ ກ້າວໜ້າ; ພະນັກງານກຳມະບານຕິດຕາມຮາກຖານຢ່າງໃກ້ຊິດ, ເພີ່ມທະວີການເຄື່ອນໄຫວເຈລະຈາໃນຫຼາຍຂັ້ນ, ຄົ້ນພົບໄວ ແລະ ແກ້ໄຂຂໍ້ຂັດແຍ່ງ ຫຼືຄວາມສ່ຽງຂອງຂໍ້ຂັດແຍ່ງດ້ານແຮງງານຢ່າງທັນການ, ປະກອບສ່ວນຫຼຸດຈຳນວນການຢຸດງານລວມໝູ່ໃນຊຸມປີທີ່ຜ່ານ.
ບັນດາຮູບແບບການເບິ່ງແຍງດູແລຊີວິດຂອງສະມາຊິກກຳມະບານ ແລະຜູ້ອອກແຮງງານ ໄດ້ຮັບການປັບປຸງແລະເປີດກວ້າງຢ່າງຕໍ່ເນື່ອງ, ພ້ອມກັນນັ້ນ ຫຼາຍຮູບແບບໃໝ່ກໍ່ໄດ້ຮັບການຜັນຂະຫຍາຍທີ່ສັນຍາລັກຂອງອົງການກຳມະບານ. ບັນດາລາຍການ “ບຸນປີໃໝ່ໂຮມຢູ່ດ້ວຍກັນ”, “ເດືອນກຳມະກອນ”, "ທີ່ພັກອາໄສກຳມະບານ", "ສະຫວັດດີການສະມາຊິກກຳມະບານ"... ແຜ່ກະຈາຍຢ່າງແຮງ ແລະ ເລິກເຊິ່ງເຂົ້າສູ່ຮາກຖານ. ໃນແຕ່ລະປີ, ຄົນງານຫຼາຍສິບລ້ານຄົນທີ່ປະສົບກັບຄວາມຫຍຸ້ງຍາກແມ່ນໄດ້ຮັບຜົນປະໂຫຍດຈາກໂຄງການ ແລະ ກິດຈະກໍາການດູແລຂອງກຳມະບານ.
ພິເສດ, ໃນ 3 ປີແຫ່ງການຮ່ວມແຮງຮ່ວມໃຈຮ່ວມມືກັບສະມາຊິກກຳມະການ ແລະ ຜູ້ອອກແຮງງານທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ພະນັກງານກຳມະບານຫຼາຍໝື່ນຄົນບໍ່ຢ້ານກົວຄວາມຫຍຸ້ງຍາກ, ຮີບເຮັ່ງເຂົ້າສູ່ໃຈກາງຂອງການແຜ່ລະບາດຂອງພະຍາດ, ແບ່ງປັນ, ສະໜັບສະໜູນ ແລະ ເບິ່ງແຍງດູແລສະມາຊິກກຳມະບານ, ຜູ້ອອກແຮງງານ. ໄດ້ຜັນຂະຫຍາຍຊຸດຊ່ວຍເຫຼືອຂະໜາດໃຫຍ່ 5 ຊຸດ ສຳລັບສະມາຊິກກຳມະບານ, ຜູ້ອອກແຮງງານ ແລະລູກຫຼານຂອງຜູ້ອອກແຮງງານ ທີ່ໄດ້ຮັບຜົນກະທົບຈາກການແຜ່ລະບາດຂອງໂຄວິດ-19, ມີມູນຄ່າລວມເກືອບ 6.000 ຕື້ດົ່ງໃຫ້ຄົນງານ 10 ລ້ານຄົນ. ຊຸດສະໜັບສະໜູນຂອງສະຫະພັນແຮງງານຫວຽດນາມ ໃຫ້ບັນດາສະມາຊິກກຳມະບານ ແລະຜູ້ອອກແຮງງານ ທີ່ມີຊົ່ວໂມງເຮັດວຽກຫຼຸດລົງ, ສັນຍາຈ້າງແຮງງານຖືກຍົກເລີກ ແລະການຈັດສັນແຮງງານຄືນໃໝ່ ເນື່ອງຈາກວິສາຫະກິດໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ໄດ້ຊ່ວຍເຫຼືອກຳມະກອນຫຼາຍກວ່າ 82.000 ຄົນ, ຊ່ວຍໃຫ້ຜູ້ອອກແຮງງານມີແຮງຈູງໃຈເພື່ອເອົາຊະນະຄວາມຫຍຸ້ງຍາກ.
ກຳມະບານໄດ້ຍູ້ແຮງການໂຄສະນາ ຂົນຂວາຍສະມາຊິກກຳມະບານ ແລະຜູ້ອອກແຮງງານ ໃຫ້ສຶກສາຮ່ຳຮຽນເພື່ອພັດທະນາຄຸນວຸດທິ, ທັກສະທາງວິຊາຊີບ, ຈິດສຳນຶດທາງການເມືອງ, ຄວາມຕື່ນຕົວທາງຊົນຊັ້ນ, ແບບແຜນອຸດສາຫະກຳ ແລະ ວິໄນແຮງງານ. ເອົາໃຈໃສ່ເຖິງການສ້າງຊີວິດທາງວັດທະນະທຳຈິດວິນຍານໃຫ້ກັບກຳມະກອນ ຜູ້ອອກແຮງງານ, ການຈັດຕັ້ງສະໜາມຫຼິ້ນທີ່ດີຫຼາຍແຫ່ງ ເພື່ອຮັບໃຊ້ຜູ້ອອກແຮງງານ ເຊັ່ນ: ລາຍການໂທລະທັດເກມ ໂມງທີ 9+, ການແຂ່ງຂັນບານເຕະກຳມະກອນແລະຜູ້ອອກແຮງງານແຫ່ງຊາດ... ບັນດາຂະບວນການແຂ່ງຂັນກັນຮັກຊາດຈັດຕັ້ງໂດຍກຳມະບານ ເຊິ່ງຈຸດສຸມແມ່ນຂະບວນການເຄື່ອນໄຫວ “ຄົນງານທີ່ດີ, ແຮງງານສ້າງສັນ”, “ຄຳແນະນຳທີ່ດີ, ການບໍລິການທີ່ດີ” ນັບມື້ນັບແຜ່ຂະຫຍາຍ ໂດຍດຶງດູດພະນັກງານ, ສະມາຊິກກຳມະບານ ແລະຜູ້ອອກແຮງງານຈຳນວນຫຼາຍໃຫ້ເຂົ້າຮ່ວມ, ປະກອບສ່ວນເຂົ້າໃນການປະຕິບັດເປົ້າໝາຍແລະໜ້າທີ່ການພັດທະນາເສດຖະກິດ-ສັງຄົມຂອງປະເທດໃຫ້ປະສົບຜົນສຳເລັດ.
ຜ່ານແຕ່ລະໄລຍະ, ຈຳນວນກຳມະກອນ, ລັດຖະກອນ ແລະຜູ້ອອກແຮງງານທີ່ເຂົ້າຮ່ວມອົງການຈັດຕັ້ງກຳມະບານໃນບັນດາຂະແໜງເສດຖະກິດ ນັບມື້ນັບເພີ່ມຂຶ້ນ, ຄຸນນະພາບໄດ້ຮັບການປັບປຸງຍົກສູງ, ປະກອບສ່ວນໂດຍກົງແລະສຳຄັນເຂົ້າໃນການພັດທະນາຂອງປະເທດຊາດ. ໃນ 5 ປີທີ່ຜ່ານມາ, ກຳມະບານໄດ້ຮັບສະມາຊິກກຳມະບານກວ່າ 4,4 ລ້ານຄົນ, ສ້າງຕັ້ງກຳມະບານຂັ້ນຮາກຖານກວ່າ 24.000ແຫ່ງ (3). ການຈັດຕັ້ງ, ການປັບປຸງອົງການຈັດຕັ້ງ ແລະ ການບັນຈຸບຸກຄະລາກອນຂອງໜ່ວຍງານກຳມະບານສະເພາະທາງທຸກຂັ້ນ ໄດ້ສຸມໃສ່ປະຕິບັດຕາມຂໍາກຳນົດກົດລະບຽບຂອງພັກ. ວຽກງານການອົບຮົມສຶກສາ, ຝືກອົບຮົມ ແລະ ປັບປຸງຍົກສູງຄຸນນະພາບຂອງຖັນແຖວພະນັກງານກຳມະບານທຸກຂັ້ນ ໄດ້ຮັບການຜັນຂະຫຍາຍຢ່າງຄົບຊຸດ ແລະສະໝ່ຳສະເໝີ.
ປ່ຽນແປງໃໝ່ເນື້ອໃນແລະແບບວິທີການເຄື່ອນໄຫວ, ປະກອບສ່ວນເຮັດໃຫ້ບັນລຸ
ຄວາມປາດຖະໜາໃນການພັດທະນາປະເທດຊາດໃຫ້ຈະເລີນຮຸ່ງເຮືອງແລະມີຄວາມສຸກ.
ກອງປະຊຸມໃຫຍ່ກຳມະບານຫວຽດນາມຄັ້ງທີ XIII, ວາລະປີ 2023-2028, ກຳນົດເປົ້າໝາຍໂດຍລວມ: ປ່ຽນແປງໃໝ່ການຈັດຕັ້ງ ແລະການເຄື່ອນໄຫວຂອງກຳມະບານ, ກໍ່ສ້າງກຳມະບານຫວຽດນາມໃຫ້ມີຄວາມເຂັ້ມແຂງຮອບດ້ານ, ສຸມໃສ່ປະຕິບັດພາລະບົດບາດແລະໜ້າທີ່ຢ່າງດີ, ຕອບສະໜອງຄວາມຮຽກຮ້ອງຕ້ອງການຂອງສະພາບການໃໝ່ ເຊິ່ງຈຸດສຸມແມ່ນການເປັນຕົວແທນ, ການເບິ່ງແຍງດູແລ, ການປົກປ້ອງສິດແລະຜົນປະໂຫຍດທີ່ຖືກກົດໝາຍ ຊອບທຳ ຂອງສະມາຊິກກຳມະບານ ແລະຜູ້ອອກແຮງງານ; ຕັ້ງໜ້າແລະເປັນເຈົ້າການໃນການເຂົ້າຮ່ວມການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ. ປັບປຸງຮູບແບບການຈັດຕັ້ງທີ່ສົມບູນເພື່ອດຶງດູດ, ເຕົ້າໂຮມຜູ້ອອກແຮງງານຈຳນວນຫຼວງຫຼາຍ ເຂົ້າຮ່ວມກຳມະບານ; ກໍ່ສ້າງຖັນແຖວພະນັກງານກຳທະບານທີ່ມີສະຕິປັນຍາ, ຄວາມກ້າຫານ, ມີຄວາມສຸດອົກສຸດໃຈ, ມີຄວາມຮັບຜິດຊອບ, ມີຊື່ສຽງ ແລະວິທີການເຮັດວຽກທີ່ດີ. ປ່ຽນແປງໃໝ່ແລະເພີ່ມທະວີວຽກງານໂຄສະນາຊວນເຊື່ອ, ປຸກລະດົມຂົນຂວາຍ, ປັບປຸງຍົກສູງຄວາມກ້າຫານທາງການເມືອງ, ລະດັບການສຶກສາ, ທັກສະວິຊາຊີບ, ແບບແຜນອຸດສາຫະກຳ, ລະບຽບວິໄນແຮງງານ ແລະ ຄວາມຮັບຮູ້ທາງດ້ານກົດໝາຍ ຂອງສະມາຊິກກຳມະບານ ແລະຜູ້ອອກແຮງງານ; ກໍ່ສ້າງຊົນຊັ້ນກຳມະກອນທີ່ທັນສະໄໝ ແລະເຂັ້ມແຂງ, ປະກອບສ່ວນເຮັດໃຫ້ບັນລຸຄວາມປາດຖະໜາໃນການພັດທະນາປະເທດໃຫ້ຈະເລີນຮຸ່ງເຮືອງ ແລະມີຄວາມຜາສຸກ. ເຖິງທ້າຍວາລະນີ້, ເພື່ອສະເຫຼີມສະຫຼອງຄົບຮອບ 100 ປີແຫ່ງການສ້າງຕັ້ງອົງການກຳມະບານ, ຈະພະຍາຍາມກໍ່ສ້າງກຳມະບານຫວຽດນາມໃຫ້ເຂັ້ມແຂງຮອບດ້ານ, ເປັນບ່ອນອີງທີ່ໜ້າເຊື່ອຖືຂອງຜູ້ອອກແຮງງານ, ເປັນພື້ນຖານທາງການເມືອງ-ສັງຄົມຂອງພັກແລະລັດ.
ເພື່ອໃຫ້ບັນລຸເປົ້າໝາຍດັ່ງກ່າວ, ກຳມະບານກຳນົດກຸ່ມໜ້າທີ່ ແລະວິທີແກ້ບັນຫາຕົ້ນຕໍດັ່ງລຸ່ມນີ້:
ທີໜຶ່ງ, ສຸມໃສ່ປະຕິບັດໜ້າທີ່ໃຫ້ດີຂຶ້ນ ໃນການເປັນຕົວແທນ, ເບິ່ງແຍງດູແລ, ປົກປັກຮັກສາສິດແລະຜົນປະໂຫຍດທີ່ຖືກກົດໝາຍແລະຊອບທຳ; ປະກອບສ່ວນປັບປຸງຍົກສູງຊີວິດດ້ານວັດຖຸແລະຈິດໃຈຂອງສະມາຊິກກຳມະບານແລະຜູ້ອອກແຮງງານ. ລົງທຶນແຫຼ່ງກຳລັງ, ຍົກສູງຄຸນນະພາບການເຄື່ອນໄຫວເຂົ້າຮ່ວມການສ້າງນະໂຍບາຍ ແລະ ກົດໝາຍຂອງອົງການກຳມະບານ. ປະສານສົມທົບການປະຕິບັດ ແລະຕິດຕາມກວດກາການປະຕິບັດກົດໝາຍວ່າດ້ວຍການປະຕິບັດປະຊາທິປະໄຕຢູ່ຮາກຖານ, ເສີມຂະຫຍາຍບົດບາດເປັນເຈົ້າຂອງຂອງຜູ້ອອກແຮງງານ. ເອົາໃຈໃສ່ການຈັດຕັ້ງສົນທະນາ, ການເຈລະຈາລວມໝູ່. ຂະຫຍາຍການໃຊ້ສັນຍາແຮງງານ ຕິດພັນກັບການປັບປຸງຄຸນນະພາບຂອງສັນຍາແຮງງານລວມໝູ່. ກຳແໜ້ນສະພາບການກຳມະກອນ, ການພົວພັນແຮງງານ, ຜັນຂະຫຍາຍມາດຕະການປ້ອງກັນ ແລະ ເຂົ້າຮ່ວມການແກ້ໄຂຂໍ້ຂັດແຍ້ງດ້ານແຮງງານ ແລະການຢຸດງານລວມໝູ່ ຢ່າງມີປະສິດທິພາບ, ປະກອບສ່ວນສ້າງການພົວພັນດ້ານແຮງງານທີ່ກົມກຽວ, ໝັ້ນຄົງ ແລະກ້າວໜ້າ. ຍົກສູງຄຸນນະພາບການໃຫ້ຄຳປຶກສາດ້ານກົດໝາຍ ແລະ ໜູນຊ່ວຍດ້ານກົດໝາຍໃຫ້ແກ່ສະມາຊິກກຳມະບານແລະຜູ້ອອກແຮງງານ, ສ້າງບາດກ້າວບຸກທະລຸໃນການເຕົ້າໂຮມແຫຼ່ງກຳລັງເຂົ້າໃນໜ້າທີ່ຕາງໜ້າ, ປົກປ້ອງສິດປະໂຫຍດຂອງຜູ້ອອກແຮງງານ. ຕັ້ງໜ້າຄົ້ນຄວ້າ ແລະດຳເນີນການຮູບແບບເບິ່ງແຍງດູແລ ແລະ ໂຄງການສະຫວັດດີການໄລຍະຍາວ ສຳລັບສະມາຊິກກຳມະບານແລະຜູ້ອອກແຮງງານ, ໂດຍສະເພາະແມ່ນ ທີ່ຢູ່ອາໄສ, ການສຶກສາ, ສາທາລະນະສຸກ... ເລັ່ງລັດລົງທຶນກໍ່ສ້າງສະຖາບັນກຳມະບານຢູ່ເຂດອຸດສາຫະກຳ ແລະ ເຂດປຸງແຕ່ງສົ່ງອອກ. ປັບປຸງຍົກສູງປະສິດທິຜົນການເຄື່ອນໄຫວຂອງອົງການ, ໂຄງການ, ແຜນການການເງິນຈຸລະພາກ, ຊ່ວຍໃຫ້ສະມາຊິກກຳມະບານແລະຜູ້ອອກແຮງງານມີໂອກາດເຮັດວຽກເພີ່ມຂຶ້ນ, ເພີ່ມລາຍຮັບໃຫ້ກຳມະກອນ ແລະຜູ້ອອກແຮງງານ. ເຂົ້າຮ່ວມການສົ່ງເສີມຄວາມສະເໝີພາບທາງເພດ; ປົກປ້ອງສິດປະໂຫຍດຂອງແຮງງານຍິງແລະເດັກນ້ອຍ; ກໍ່ສ້າງຄອບຄົວກຳມະກອນ, ລັດຖະກອນ, ຜູ້ອອກແຮງງານທີ່ມີຄວາມອີ່ມໜຳອົບອຸ່ນ ກ້າວໜ້າ ຜາສຸກ ແລະ ມີອາລະຍະທຳ.
ທີສອງ, ປັບປຸງຍົກສູງຄຸນນະພາບວຽກງານໂຄສະນາ ແລະ ເຜີຍແຜ່ໃຫ້ກຳມະກອນແລະຜູ້ອອກແຮງງານຮູ້ກ່ຽວກັບແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດ; ປະກອບສ່ວນປັບປຸງແລະຍົກສູງຄວາມຮັບຮູ້ ກ່ຽວກັບຊົນຊັ້ນກຳມະກອນ, ກ່ຽວກັບພັກ, ກ່ຽວກັບກຳມະບານ, ຍົກສູງລະດັບທັກສະທາງວິຊາຊີບ, ຄວາມສາມາດໃນການປົກປ້ອງສິດປະໂຫຍດທາງກົດໝາຍຂອງຜູ້ອອກແຮງງານ. ຈັດຕັ້ງການຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດສິນທຳ ແລະ ແບບແຜນຂອງໂຮ່ຈິີມິນ ຢ່າງມີປະສິດທິພາບ. ເຕົ້າໂຮມແຫຼ່ງກຳລັງເພື່ອປັບປຸງຊີວິດທາງດ້ານວັດທະນະທຳ ແລະຈິດໃຈຂອງສະມາຊິກກຳມະບານ ແລະຜູ້ອອກແຮງງານ. ຜັນຂະຫຍາຍບັນດາມາດຕະການຢ່າງມີປະສິດທິຜົນ ເພື່ອປົກປັກຮັກສາຮາກຖານແນວຄິດຂອງພັກ, ຕໍ່ສູ້ປະຕິເສດບັນດາທັດສະນະທີ່ຜິດພາດ ແລະ ເປັນສັດຕູໃນສະພາບການໃໝ່.
ປ່ຽນແປງໃໝ່ການຈັດຕັ້ງຂະບວນການແຂ່ງຂັນກັນຮັກຊາດ, ເອົາໃນໃສ່ເຖິງຄວາມແທດຈິງ, ມີປະສິດທິພາບ, ເໝາະສົມກັບແຕ່ລະເປົ້າໝາຍ, ສ້າງແຮງຂັບເຄື່ອນຊຸກຍູ້ການປ່ຽນແປງໃໝ່ປະດິດສ້າງ, ຍົກສູງສະມັດຕະພາບແຮງງານ ແລະປະສິດທິພາບຂອງວຽກງານ. ສືບຕໍ່ພັດທະນາ ແລະຍົກສູງປະສິດທິພາບຂອງຂະບວນການ “ຄົນງານທີ່ດີ, ແຮງງານປະດິດສ້າງ”, ກໍານົດເນື້ອໃນລະອຽດຂອງບັນດາບັ້ນແຂ່ງຂັນທີ່ກ່ຽວຂ້ອງກັບການຊຸກຍູ້ການປັບປຸງຍົກສູງສະມັດຕະພາບແຮງງານແຫ່ງຊາດ.
ທີສາມ, ສຸມໃສ່ປະຕິບັດເປັນຢ່າງດີ ວຽກງານພັດທະນາສະມາຊິກກຳມະບານ ແລະ ການສ້າງຕັ້ງອົງການກຳມະບານຂັ້ນຮາກຖານ; ສ້າງບາດກ້າວບຸກທະລຸໃນການພັດທະນາສະມາຊິກກຳມະບານ, ໂດຍສະເພາະແມ່ນ ໃນວິສາຫະກິດນອກພາກລັດ ແລະ ຜູ້ອອກແຮງງານນອກລະບົບ. ການຍົກສູງຄຸນນະພາບສະມາຊິກກຳມະບານໄປຄຽງຄູ່ກັບການເພີ່ມທະວີການຄຸ້ມຄອງສະມາຊິກກຳມະບານ. ສ້າງໂຄງປະກອບການຈັດຕັ້ງກຳມະບານທຸກຂັ້ນ ຕາມທິດທາງຄ່ອງຕົວ ແລະ ມີປະສິດທິຜົນ. ຜັນຂະຫຍາຍມາດຕະການດຶງດູດອົງການຂອງຜູ້ອອກແຮງງານໃນວິສາຫະກິດໃຫ້ເຂົ້າຮ່ວມກຳມະບານ, ສົມທົບກັບກຳມະບານເພື່ອຈັດຕັ້ງການເຄື່ອນໄຫວຕາມຂໍ້ກຳນົດຂອງກົດໝາຍ. ເອົາໃຈໃສ່ເຖິງການຍົກສູງຄຸນນະພາບຂອງຖັນແຖວພະນັກງານກຳມະບານ. ຜັນຂະຫຍາຍບັນດາມາດຕະການເພື່ອກໍ່ສ້າງຖັນແຖວພະນັກງານກຳມະການມືອາຊີບ, ປະທານກຳມະບານຂັ້ນຮາກຖານທີ່ມີສະຕິປັນຍາ, ມີຄວາມກ້າຫານ, ກະຕືລືລົ້ນ, ມີຄວາມຮັບຜິດຊອບ, ມີກຽດສັກສີ ແລະ ມີວິທີການເຮັດວຽກທີ່ດີ.
ທີສີ່, ເສີມຂະຫຍາຍບົດບາດຂອງອົງການຈັດຕັ້ງກຳມະບານໃນການເຕົ້າໂຮມ, ສາມັກຄີ, ກໍ່ສ້າງຊົນຊັ້ນກຳມະກອນຫວຽດນາມທີ່ທັນສະໄໝແລະເຂັ້ມແຂງ. ຍູ້ແຮງການເຄື່ອນໄຫວກຳມະບານໃນການເຂົ້າຮ່ວມການກໍ່ສ້າງພັກ ແລະ ພັດທະນາຖັນແຖວສະມາຊິກພັກ, ໂດຍສະເພາະສະມາຊິກພັກໃນຊົນຊັ້ນກຳມະກອນ. ເຂົ້າຮ່ວມການສ້າງ ແລະ ຕັ້ງໜ້າສະເໜີບັນດາເນື້ອໃນ ແລະ ມາດຕະການຍົກສູງຄຸນນະພາບຂອງອົງການຈັດຕັ້ງພັກຮາກຖານຢູ່ວິສາຫະກິດນອກພາກລັດ.
ທີຫ້າ, ເພີ່ມທະວີຄວາມເປັນເຈົ້າການຂອງອົງການຈັດຕັ້ງກຳມະບານ ໃນການເຂົ້າຮ່ວມການຕິດຕາມກວດກາພະນັກງານ ສະມາຊິກພັກ, ຕັ້ງໜ້າເຂົ້າຮ່ວມການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ຄວາມຫຍໍ້ທໍ້, ການໃຊ້ຈ່າຍສິ້ນເປືອງ. ເສິມຂະຫຍາຍບົດບາດຂອງກຳມະບານຢ່າງແຂງແຮງ ແລະ ຢືນຢັນບົດບາດຫຼັກແຫຼ່ງຂອງກຳມະບານໃນການປັບປຸງແລະພັດທະນາພັນທະພາບລະຫວ່າງຊົນຊັ້ນກຳມະກອນ ກັບຊົນຊັ້ນຊາວນາ ແລະຖັນແຖວປັນຍາຊົນ./.
------------------------------------------------
(1) ກົດໝາຍວ່າດ້ວຍກຳມະບານປີ 1957, ປະຕູຂໍ້ມູນເອເລັກໂຕຣນິກຂອງກະຊວງຍຸຕິທຳ, https://moj.gov.vn/vbpq/lists/vn%20bn%20php%20lut/view_detail.aspx?itemid=1006
(2) ລັດຖະທຳມະນູນປີ 1959, ປະຕູຂໍ້ມູນເອເລັກໂຕຣນິກຂອງກະຊວງຍຸຕິທຳ, https://www.moj.gov.vn/vbpq/lists/vn%20bn%20php%20lut/view_detail.aspx?itemid=890
ມາດຕາ 10: “ລັດນຳພາການເຄື່ອນໄຫວເສດຖະກິດຕາມແຜນການທີ່ເປັນເອກະະພາບໜຶ່ງ. ລັດອີງໃສ່ບັນດາອົງການຂອງລັດ, ອົງການຈັດຕັ້ງກຳມະບານ, ສະຫະກອນ ແລະ ບັນດາອົງການຈັດຕັ້ງອື່ນໆຂອງປະຊາຊົນຜູ້ອອກແຮງງານ ເພື່ອສ້າງ ແລະປະຕິບັດແຜນການເສດຖະກິດ”.
(3) ຂໍ້ມູນສະມາຊິກກຳມະບານຕາມບົດລາຍງານການເມືອງທີ່ກອງປະຊຸມໃຫຍ່ກຳມະບານຫວຽດນາມຄັ້ງທີ XIII: “ຮອດເດືອນມິຖຸນາ 2023, ທົ່ວປະເທດມີສະມາຊິກກຳມະບານ 11.072.214 ຄົນ ແລະ ກຳມະບານຮາກຖານ 123.129 ແຫ່ງ...”.
