ຫວຽດນາມພ້ອມແລ້ວທີ່ຈະປະກອບສ່ວນຢ່າງຕັ້ງໜ້າແລະມີ
ຄວາມຮັບຜິດຊອບໃນຄວາມພະຍາຍາມຮ່ວມກັນຂອງປະຊາຄົມສາກົນ
ເພື່ອບັນລຸເປົ້າໝາຍການຟື້ນຟູສີຂຽວ ແລະການພັດທະນາແບບຍືນຍົງ*
ຄວາມຮັບຜິດຊອບໃນຄວາມພະຍາຍາມຮ່ວມກັນຂອງປະຊາຄົມສາກົນ
ເພື່ອບັນລຸເປົ້າໝາຍການຟື້ນຟູສີຂຽວ ແລະການພັດທະນາແບບຍືນຍົງ*
ຮຽນທ່ານ ມູນເຈອິນ, ປະທານນາທິບໍດີແຫ່ງ ສາທາລະນະລັດເກົາຫຼີ ທີ່ເຄົາລົບນັບຖືຢ່າງສູງ,
ຮຽນບັນດາທ່ານການນຳທີ່ນັບຖື,
ຮຽນບັນດາທ່ານແຂກຜູ້ມີກຽດທີ່ນັບຖື ແລະ ຮັກແພງ,
ກ່ອນອື່ນໝົດ, ຂ້າພະເຈົ້າຂໍສະແດງຄວາມຂອບອົກຂອບໃຈ ແລະ ຕີລາຄາສູງຕໍ່ລັດຖະບານ ສ.ເກົາຫຼີ ແລະທ່ານ ມູນເຈອິນ ປະທານນາທິບໍດີແຫ່ງ ສາທາລະນະລັດເກົາຫຼີ ໄດ້ເປັນເຈົ້າພາບຈັດກອງປະຊຸມບົນພື້ນຖານຫົວຂໍ້ສຸດທີ່ມີຄວາມໝາຍໃນຄັ້ງນີ້. ຂໍຕາງໜ້າລັດຖະບານຫວຽດນາມ ແລະ ໃນນາມສ່ວນຕົວ, ຂ້າພະເຈົ້າຂໍຝາກຄວາມຢ້ຽມຢາມຖາມຂ່າວ ແລະ ຄຳອວຍພອນອັນປະເສີດມາຍັງບັນດາທ່ານການນຳ, ບັນດາທ່ານແຂກຜູ້ມີກຽດ!
ບັນດາທ່ານຜູ້ແທນທີ່ຮັກແພງ,
ໂລກກຳລັງຜ່ານຜ່າບັນດາຜົນກະທົບຮ່ວມໃນລະດັບ ແລະ ຂະໜາດທີ່ບໍ່ເຄີຍມີມາກ່ອນຂອງສາມໄພພິບັດ ນັ້ນແມ່ນການລະບາດຂອງພະຍາດໂຄວິດ-19, ການປ່ຽນແປງສະພາບອາກາດ ແລະ ການບົກແຫ້ງຂອງຊັບພະຍາກອນທຳມະຊາດ, ຍັງບໍ່ທັນນັບເຖິງຫຼາຍປະເທດທີ່ມີປະຊາກອນສູງອາຍຸ; ເຮັດໃຫ້ມີຜົນຕາມມາອັນໜັກໜ່ວງ, ໃນຫຼາຍດ້ານ, ບໍ່ພຽງແຕ່ໃນປະຈຸບັນເທົ່ານັ້ນ ແຕ່ຍັງສົ່ງຜົນກະທົບຕໍ່ບັນດາຮຸ່ນຄົນໃນອະນາຄົດອີກດ້ວຍ.
ແຕ່ວ່າ ການລະບາດຂອງພະຍາດໂຄວິດ-19 ແລະ ບັນດາຄວາມຫຍຸ້ງຍາກ, ສິ່ງທ້າທາຍເອງກໍໄດ້ຊ່ວຍໃຫ້ພວກເຮົາເຫັນແຈ້ງກ່ວາເກົ່າ ເຖິງຄວາມສຳຄັນຂອງການປົກປັກຮັກສາສະພາບແວດລ້ອມການດຳລົງຊີວິດ, ຮັບປະກັນຢ່າງກົມກຽວ ລະຫວ່າງມະນຸດ ແລະ ທຳມະຊາດ; ແລະ ເປັນກຳລັງຊຸກດັນ ເພື່ອກະຕຸກຊຸກຍູ້ໃຫ້ພວກເຮົາຜ່ານຜ່າ, ຢັ້ງຢືນຕົນເອງໄດ້ເຕີບໃຫຍ່ກ່ວາເກົ່າ. ກ່ວາເວລາໃດໝົດ, ພວກເຮົາຕ້ອງຮ່ວມແຮງຮ່ວມໃຈກັນ ເພື່ອແກ້ໄຂຢ່າງກົມກຽວ ລະຫວ່າງຄວາມຕ້ອງການອັນຮີບດ່ວນຂອງການຟື້ນຟູເສດຖະກິດກັບຄວາມຮຽກຮ້ອງຕ້ອງການພັດທະນາສີຂຽວ, ພັດທະນາແບບຍືນຍົງກ່ວາເກົ່າໃນໄລຍະຫຼັງການລະບາດຂອງໂຄວິດ-19. ນີ້ທັງແມ່ນຈຸດໝາຍ ແລະ ທັງແມ່ນຄວາມຮຽກຮ້ອງຕ້ອງການທີ່ຈຳເປັນ ຕໍ່ການພັດທະນາຂອງແຕ່ລະປະເທດ. ບົນພື້ນຖານດັ່ງກ່າວ, ຂ້າພະເຈົ້າຂໍຍົກຂໍ້ສະເໜີຈຳນວນໜຶ່ງ ຄືດັ່ງນີ້:
ທີໜຶ່ງ, ການຟື້ນຟູສີຂຽວ, ເສດຖະກິດສີຂຽວ, ເສດຖະກິດໝູນວຽນ ຕ້ອງໄດ້ຜັນຂະຫຍາຍໃນລະດັບຊາດ, ພາກພື້ນ ແລະ ທົ່ວໂລກຢ່າງດຸເດືອດ, ໃນນັ້ນ, ຂອບເຂດລວມແມ່ນ ບັນດາເປົ້າໝາຍການພັດທະນາແບບຍືນຍົງເຖິງປີ 2030 ຂອງສະຫະປະຊາຊາດ ແລະ ຂໍ້ຕົກລົງປາຣີກ່ຽວກັບການປ່ຽນແປງສະພາບອາກາດ. ທິດນຳແມ່ນຫັນປ່ຽນຈິນຕະນາການ, ວິທີວິພາກ ແລະ ວິທີເຂົ້າເຖິງຕົວຈິງ ຈາກການຕ້ອງຮັບມືກັບສິ່ງທ້າທາຍໄປສູ່ການປະສົມກົມກຽວ, ສົມເຫດສົມຜົນ, ມີປະສິດທິຜົນ ລະຫວ່າງການຮັບມືກັບການຫັນປ່ຽນພັດທະນາເສດຖະກິດສີຂຽວ ເພື່ອບໍ່ມີການພິກປິ້ນທີ່ສ້າງການ “ກະທົບກະເທື່ອນ”.
ທີສອງ, ການຫັນປ່ຽນສີຂຽວຕ້ອງມີລຳດັບຂັ້ນຕອນຢ່າງສອດຄ່ອງ, ຄໍານຶງເຖິງເງື່ອນໄຂ ແລະ ຄວາມສາມາດທີ່ແຕກຕ່າງກັນຂອງບັນດາປະເທດ. ບັນດາປະເທດທີ່ພັດທະນາແລ້ວຄວນສືບຕໍ່ນຳໜ້າໃນການປະຕິບັດຄຳໝັ້ນສັນຍາກ່ຽວກັບການຫຼຸດຜ່ອນສິ່ງເສດເຫຼືອທີ່ເກີດຂຶ້ນ, ພ້ອມດຽວກັນນັ້ນ, ມີການຊ່ວຍເຫຼືອທາງດ້ານການເງິນ, ເຕັກໂນໂລຊີ ແລະ ລະບອບລະບຽບໃຫ້ແກ່ບັນດາປະເທດທີ່ກຳລັງພັດທະນາ ແລະ ບັນດາປະເທດທີ່ຖືກຮັບຜົນສະທ້ອນຂອງການປ່ຽນແປງພູມີອາກາດຢ່າງໜັກໜ່ວງ.
ທີສາມ, ມີຄວາມເອົາໃຈໃສ່ຕໍ່ການສ້າງລະບອບລະບຽບ ເພື່ອສົ່ງເສີມການຕອບສະໜອງ ແລະ ການເຂົ້າຮ່ວມຂອງທັງໝົດບັນດາເຈົ້າພາບໃນສັງຄົມ, ພິເສດແມ່ນວິສາຫະກິດ ແລະ ປະຊາຊົນ, ສົ່ງເສີມບັນດາໂຄງການພາກລັດ-ເອກະຊົນໃນການເຕີບໂຕສີຂຽວຢ່າງແຂງແຮງກ່ວາເກົ່າ; ສ້າງບັນດາລະບົບຄຸນຄ່າ ແລະ ວິຊາຊີບໃໝ່ໂດຍຜ່ານການຫັນການຜະລິດອຸດສາຫະກຳ, ກະສິກໍາ ແລະ ບໍລິຫານເປັນສີຂຽວ.
ທີສີ່, ຍົກສູງຄວາມສາມາດໃນການເປັນເຈົ້າການຢ່າງເໝາະສົມຂອງບັນດາສະ ຖານທີ່ຖືກຮັບຜົນສະທ້ອນຂອງການປ່ຽນແປງສະພາບພູມີອາກາດຢ່າງໜັກໜ່ວງ, ໃນນັ້ນ, ມີອະນຸພາກພື້ນແມ່ນ້ຳຂອງ ແລະ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ. ບັນດາສິ່ງທ້າທາຍທີ່ຮ້າຍແຮງຢູ່ບັນດາສະຖານທີ່ດັ່ງກ່າວ ພວມຕ້ອງການມີການຮ່ວມມືຢ່າງແໜ້ນແຟ້ນ, ມີຄວາມຮັບຜິດຊອບທີ່ສຸດ ຂອງປະຊາຄົມສາກົນ, ພິເສດແມ່່ນໃນການຄຸ້ມຄອງ, ນຳໃຊ້ແຫຼ່ງນ້ຳຂ້າມຊາດແບບຍືນຍົງ, ປະກອບສ່ວນເຂົ້າໃນການຮັບປະກັນຄວາມໝັ້ນຄົງທາງດ້ານສະບຽງອາຫານ, ຄວາມໝັ້ນຄົງຂອງແຫຼ່ງນ້ຳໃນພາກພື້ນ ແລະ ໃນໂລກ.
ທີຫ້າ, ເພື່ອຟື້ນຕົວ ເພື່ອກັບຄືນສູ່ການເຕີບໂຕ, ບັນຫາອັນຮີບດ່ວນທີ່ສຸດໃນປະຈຸບັນແມ່ນການສະກັດກັ້ນ, ຕີຖອຍ ແລະ ແກ້ໄຂການລະບາດຂອງໂຄວິດ-19 ໂດຍພື້ນຖານ. ຄວາມພະຍາຍາມຂອງແຕ່ລະປະເທດແມ່ນປັດໄຈສຳຄັນຕົ້ນຕໍ ແຕ່ການຮ່ວມມືສາກົນທີ່ມີປະສິດທິຜົນແມ່ນສິ່ງທີ່ຂາດບໍ່ໄດ້ ເຊັ່ນ: ການແບ່ງປັນຄວາມເສຍຫາຍທາງດ້ານວັດຖຸ ແລະ ຈິດໃຈ; ການແບ່ງປັນທາງດ້ານເຕັກໂນໂລຊີ, ການເງິນ, ສາທາລະນະສຸກ, ພິເສດແມ່ນວັກຊິນ; ສ້າງເງື່ອນໄຂໃຫ້ແກ່ການລົງທຶນ, ການຄ້າສາກົນ, ການຮ່ວມມືພົບປະແລກປ່ຽນ, ຂົນສົ່ງໂດຍສານ ແລະ ສິນຄ້າລະຫວ່າງບັນດາປະເທດ, ໂດຍສະເພາະແມ່ນ ບໍ່ໃຫ້ມີການຢຸດສະຫງັກຂອງຕ່ອງໂສ້ສະໜອງທົ່ວໂລກ.
ທີຫົກ, ໃນສະພາບການປະຈຸບັນນີ້, ບັນດາປະເທດຕ້ອງຍົກສູງຈິດໃຈສາມັກຄີ, ມີຄວາມຮັບຜິດຊອບ, ເຄົາລົບນັບຖືເຊິ່ງກັນແລະກັນ ເພື່ອຜົນປະໂຫຍດລວມຂອງມວນມະນຸດ, ຮັບປະກັນສະພາບແວດລ້ອມສາກົນ, ຊຸກຍູ້ສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ, ມີປະໂຫຍດໃຫ້ແກ່ການຟື້ນຟູເສດຖະກິດ ແລະ ການຮ່ວມມືສາກົນ.ບັນດາທ່ານຜູ້ແທນທີ່ຮັກແພງ,
ສຳລັບຫວຽດນາມ, ເຖິງແມ່ນວ່າຕ້ອງປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍຢ່າງຫຼວງຫຼາຍກໍຕາມ ແຕ່ພວກຂ້າພະເຈົ້າໄດ້ຕັດສິນໃຈປະຕິບັດ “ຈຸດໝາຍຄູ່”ແມ່ນທັງປ້ອງກັນແລະຕ້ານພະຍາດຢ່າງມີປະສິດທິຜົນ, ທັງຟື້ນຟູແລະພັດທະນາເສດຖະ ກິດ - ສັງຄົມຢ່າງວ່ອງໄວ, ຍືນຍົງ; ຮັບປະກັນການພັດທະນາຢ່າງກົມກຽວ, ສົມເຫດສົມຜົນ, ມີປະສິດທິຜົນລະຫວ່າງເສດຖະກິດກັບວັດທະນະທຳ, ສັງຄົມ, ປົກປັກຮັກສາສິ່ງແວດລ້ອມ ແລະ ເໝາະສົມກັບການປ່ຽນແປງພູມີອາກາດ, ໂດຍອີງໃສ່ບາງທັດສະ ນະດັ່ງນີ້: (1) ຖືເອົາການປ່ຽນແປງໃໝ່ຮູບຕົວແບບການເຕີບໂຕ, ປັບໂຄງປະກອບເສດຖະກິດຄືນໃໝ່, ພັດທະນາເສດຖະກິດສີຂຽວ, ຄວາມຕ້ອງການຂອງຕະຫຼາດ, ບັນ ດາຂະແໜງການທີ່ຫາກໍພົ້ນຂຶ້ນໃໝ່ ແລະ ເພີ່ມສະມັດຕະພາບການອອກແຮງງານເປັນການກຳນົດທິດ. (2) ຖືເອົາຄົນເປັນໃຈກາງ, ເປັນເຈົ້າຂອງ, ທັງແມ່ນແຫຼ່ງກຳລັງ ແລະ ທັງແມ່ນກຳລັງຊຸກດັນສຳຄັນທີ່ສຸດ ແລະ ແມ່ນຈຸດໝາຍສູງສຸດຂອງການພັດທະນາ, ໃນນັ້ນ, ມີການພັດທະນາສີຂຽວ. (3) ພວກຂ້າພະເຈົ້າບໍ່ຍອມຮັບຮູບຕົວແບບ “ຖືສຳຄັນການເຕີບໂຕກ່ອນຢ່າງດຽວ ແລ້ວຈຶ່ງແກ້ໄຂຜົນຕາມມາຕາມທີ່ຫຼັງ”; ບໍ່ຍອມຮັບແບບວິທີເຕີບໂຕດ້ວຍທຸກວິທີ, ຂາດຄວາມໝັ້ນຄົງ ແລະ ແຮງບໍ່ແລ່ນຕາມການເຕີບໂຕຢ່າງດຽວ ເຊິ່ງຕ້ອງເສຍສະຫຼະຄວາມກ້າວໜ້າ, ຄວາມຍຸຕິທຳທາງສັງຄົມ ແລະ ສະພາບແວດລ້ອມການດຳລົງຊີວິດຂອງປະຊາຊົນຢ່າງເດັດຂາດ.
ໃນຂະບວນວິວັດການປະຕິບັດຈຸດໝາຍພັດທະນາ, ພວກຂ້າພະເຈົ້າຂໍສະແດງຄວາມສະເທືອນໃຈ ແລະ ຄວາມຂອບໃຈຢ່າງຈິງໃຈ ຕໍ່ການຊ່ວຍເຫຼືອຂອງບັນດາຄູ່ຮ່ວມມືສາກົນ, ໃນນັ້ນ, ມີປະເທດ ສ.ເກົາຫຼີ ໃນເວລາທີ່ຜ່ານມາ. ໃນຕໍ່ໜ້າ, ພວກຂ້າພະເຈົ້າຫວັງຢ່າງຍິ່ງວ່າ ຈະສືບຕໍ່ໄດ້ຮັບການຊ່ວຍເຫຼືອ, ການຮ່ວມມືຂອງບັນດາປະເທດ, ບັນດາອົງການຈັດຕັ້ງສາກົນ ແລະ ວິສາຫະກິດຕ່າງໆ ຢ່າງມີປະສິດທິຜົນສູງກ່ວາເກົ່າ; ພິເສດແມ່ນໃນບັນດາໂຄງການຮ່ວມມືພັດທະນາພື້ນຖານໂຄງລ່າງຍຸດທະສາດທີ່ມີຄຸນນະພາບສູງ, ເສດຖະກິດສີຂຽວ, ເສດຖະກິດດິຈິຕອນ, ເສດຖະກິດໝູນວຽນ, ເສດຖະກິດທີ່ເໝາະສົມກັບການປ່ຽນແປງພູມີອາກາດ, ການພັດທະນາຕົວເມືອງອັດສະລິຍະ…ຊ່ວຍເຫຼືອບັນດາຈຸດໝາຍພັດທະນາແບບຍືນຍົງຂອງຫວຽດນາມ.
ໃນນາມເປັນສະມາຊິກຂອງຂໍ້ຕົກລົງສາກົນທີ່ສຳຄັນທັງໝົດກ່ຽວກັບສິ່ງແວດລ້ອມ ແລະ ການປ່ຽນແປງສະພາບພູມີອາກາດ, ເປັນໜຶ່ງໃນບັນດາສະມາຊິກສ້າງຕັ້ງຂອງກອງປະຊຸມສຸດຍອດຄູ່ຮ່ວມມືເພື່ອການເຕີບໂຕສີຂຽວແລະເປົ້າໝາຍລະດັບໂລກ, ຫວຽດນາມກຽມພ້ອມປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບເຂົ້າໃນຄວາມພະຍາຍາມຮ່ວມກັນຂອງປະຊາຄົມສາກົນ ເພື່ອປະຕິບັດຈຸດໝາຍການຟື້ນຟູສີຂຽວ ແລະ ການພັດທະນາແບບຍືນຍົງ. ບົນຈິດໃຈດັ່ງກ່າວ, ພວກຂ້າພະເຈົ້າມີຄວາມເຫັນດີເຫັນພ້ອມ, ສະໜັບສະໜູນ ແລະ ຕີລາຄາສູງຕໍ່ບົດຖະແຫຼງການຮ່ວມ ເຊອຸນ ທີ່ລັດຖະບານແຫ່ງ ສ.ເກົາຫຼີ ໄດ້ສະເໜີໃນກອງປະຊຸມຄັ້ງນີ້.
ບັນດາທ່ານຜູ້ແທນທີ່ຮັກແພງ,
ຂ້າພະເຈົ້າມີຄວາມເຊື່ອໝັ້ນວ່າ ບົນພື້ນຖານບັນດາໝາກຜົນຂອງກອງປະຊຸມສຸດຍອດການປ່ຽນແປງພູມີອາກາດໃນວັນທີ 22 ເມສາ 2021 ຜ່ານມາ ແລະ ກອງປະຊຸມສະພາບພູມີອາກາດທົ່ວໂລກ COP26 ໃນເດືອນ 11 ຕໍ່ມາ, ກອງປະຊຸມສຸດຍອດຄູ່ຮ່ວມມືເພື່ອການເຕີບໂຕສີຂຽວແລະເປົ້າໝາຍລະດັບໂລກໃນຄັ້ງນີ້ ຈະປະກອບສ່ວນກ້າວເຂົ້າໃນປະຫວັດສາດກ່ຽວກັບຄວາມເປັນເອກະພາບທາງການຮັບຮູ້, ແບ່ງປັນຄວາມຮັບຜິດຊອບ ແລະ ການຕັດສິນໃຈໃນການເຄື່ອນໄຫວ; ຮ່ວມຈິດຮ່ວມໃຈກັນ, ພະຍາຍາມຊຸກຍູ້ການຮ່ວມມືສາກົນ ເພື່ອຜ່ານຜ່າທຸກສິ່ງທ້າທາຍ, ຮັບມືກັບການປ່ຽນແປງສະພາບພູມີອາກາດຢ່າງມີປະສິດທິຜົນ ແລະ ປະຕິບັດຈຸດໝາຍການເຕີບໂຕສີຂຽວໃນທົ່ວໂລກ.
ຂໍຂອບໃຈບັນດາທ່ານຜູ້ແທນທີ່ມີກຽດທີ່ໄດ້ສະຫຼະເວລາຮັບຟັງ ແລະ ຂໍອວຍພອນໃຫ້ກອງປະຊຸມຈົ່ງປະສົບຜົນສຳເລັດຢ່າງຈົບງາມ./.
------------------------------
* ຫົວຂໍ້ຕັ້ງໂດຍວາລະສານກອມມູນິດ
- ບົດນີ້ໄດ້ລົງພິມໃນວາລະສານກອມມູນິດອອນໄລ ວັນທີ 1 ມິຖຸນາ 2021