ເສີມຂະຫຍາຍປະຊາທິປະໄຕ, ຮັດແໜ້ນລະບຽບວິໄນ ໄປຄຽງຄູ່ກັບ
ການສ້າງສະພາບແວດລ້ອມສໍາລັບການປ່ຽນແປງໃໝ່ປະດິດສ້າງ
ໃນວຽກງານພະນັກງານ ແລະ ການສ້າງຖັນແຖວພະນັກງານ
ຕາມຈິດໃຈກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ
ການສ້າງສະພາບແວດລ້ອມສໍາລັບການປ່ຽນແປງໃໝ່ປະດິດສ້າງ
ໃນວຽກງານພະນັກງານ ແລະ ການສ້າງຖັນແຖວພະນັກງານ
ຕາມຈິດໃຈກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ
ວກ. - ໜຶ່ງໃນສາມວິທີການບຸກທະລຸຂອງວຽກງານກໍ່ສ້າງພັກຕາມຈິດໃຈກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມແມ່ນ “ເສີມຂະຫຍາຍປະຊາທິປະໄຕ, ຮັດແໜ້ນລະບຽບວິໄນ ໄປຄຽງຄູ່ກັບການສ້າງສະພາບແວດລ້ອມສໍາລັບການປ່ຽນແປງໃໝ່ປະດິດສ້າງ ໃນວຽກງານພະນັກງານ ແລະ ການສ້າງຖັນແຖວພະນັກງານ”(1). ດັ່ງນັ້ນ, ຄວາມຮຽກຮ້ອງຕ້ອງການທີ່ວາງອອກມາໃນປະຈຸບັນແມ່ນ ສືບຕໍ່ການປ່ຽນແປງໃໝ່ຈິນຕະນາການ ແລະ ການກະທຳໃນວຽກງານພະນັກງານ ແລະ ການກໍ່ສ້າງຖັນແຖວພະນັກງານທີ່ສອດຄ່ອງກັບພຶດຕິກຳຕົວຈິງ.
ພະນັກງານແມ່ນປັດໄຈຕັດສິນຊີ້ຂາດຄວາມສຳເລັດຫຼືຄວາມລົ້ມເຫຼວຂອງພາລະກິດການປະຕິວັດ; “ວຽກງານພະນັກງານແມ່ນໜ້າທີ່ທີ່ “ສຳຄັນ” ຂອງວຽກງານກໍ່ສ້າງພັກ”(2) ແລະ ກໍ່ສ້າງລະບົບການເມືອງ. ໃນເວລາ 35 ປີແຫ່ງການປະຕິບັດແນວທາງປ່ຽນແປງໃໝ່ປະເທດຢ່າງຮອບດ້ານ, ວຽກງານພະນັກງານ ແລະ ການສ້າງຖັນແຖວພະນັກງານ ໄດ້ບັນລຸຜົນສຳເລັດທີ່ສຳຄັນ, ປະກອບສ່ວນເຮັດໃຫ້ວຽກງານກໍ່ສ້າງພັກ ແລະ ບັນດາໜ້າທີ່ການເມືອງຂອງປະເທດປະສົບຄວາມສຳເລັດ. ເພື່ອປະຕິບັດແນວທາງການປ່ຽນແປງໃໝ່ ແລະ ມະຕິກອງປະຊຸມໃຫຍ່ຄັ້ງທີ 13 ຂອງພັກຢ່າງສຳເລັດຜົນ, ບັນຫາທີ່ຕ້ອງເອົາໃຈໃສ່ເປັນພິເສດແມ່ນ ກໍ່ສ້າງຖັນແຖວພະນັກງານນຳພາ, ຄຸ້ມຄອງທີ່ມີຄຸນສົມບັດ ຄວາມສາມາດ ແລະ ຊື່ສຽງຢ່າງພຽງພໍ, ມີຄວາມກ້າຫານທາງການເມືອງ ມີສະຕິປັນຍາ, ເປັນແບບຢ່າງ, ກ້າຄິດ ກ້າເຮັດ ກ້າຮັບຜິດຊອບ, ກ້າປ່ຽນແປງໃໝ່ປະດິດສ້າງ, ກ້າປະເຊີນໜ້າກັບຄວາມຫຍຸ້ງຍາກ ສິ່ງທ້າທາຍ ແລະ ປະຕິບັດງານຢ່າງເດັດຂາດ ເພື່ອຜົນປະໂຫຍດສ່ວນລວມ.
ຂະບວນການປ່ຽນແປງໃໝ່ ແຕ່ຄວາມຮັບຮູ້ເຖິງການກະທຳ ຂອງພັກກອມມູນິດຫວຽດນາມ
ໃນວຽກງານພະນັກງານ ແລະ ການສ້າງຖັນແຖວພະນັກງານ
ໃນກອງປະຊຸມໃຫຍ່ແຕ່ລະຄັ້ງ, ບັນດາທັດສະນະ ແຜນນະໂຍບາຍຂອງພັກກອມມູນິດຫວຽດນາມ ກ່ຽວກັບວຽກງານພະນັກງານ ແລະ ການສ້າງຖັນແຖວພະນັກງານ ນັບມື້ນັບໄດ້ສະແດງອອກຢ່າງຈະແຈ້ງ, ສອດຄ່ອງກັບຄວາມຮຽກຮ້ອງຕ້ອງການ, ໜ້າທີ່ທີ່ກຳນົດໄວ້ໂດຍການປະຕິວັດ ແລະ ມິລັກສະນະສະເໝີຕົ້ນສະເໝີປາຍ. ໃນນັ້ນ, ທັດສະນະກ່ຽວກັບການ ທັງຮັບປະກັນການເສີມຂະຫຍາຍປະຊາທິປະໄຕ, ຮັດແໜ້ນລະບຽບວິໄນ, ທັງສ້າງສະພາບແວດລ້ອມສໍາລັບການການປ່ຽນແປງໃໝ່ປະດິດສ້າງ ໃນວຽກງານພະນັກງານ ແລະ ການສ້າງຖັນແຖວພະນັກງານ ໄດ້ມີບາດກ້າວພັດທະນາໃໝ່ທາງດ້ານຄວາມຮັບຮູ້ ແລະ ການປະຕິບັດຕົວຈິງ.
ການເສີມຂະຫຍາຍປະຊາທິປະໄຕໃນວຽກງານພະນັກງານ ແລະ ການສ້າງຖັນແຖວພະນັກງານ ແມ່ນປະຖົມປັດໄຈທີ່ສຳຄັນເພື່ອຮັບປະກັນຫຼັກການ ພັກນຳພາວຽກງານພະນັກງານ ແລະ ຄຸ້ມຄອງຖັນແຖວພະນັກງານເປັນເອກະພາບ, ໄປຄຽງຄູ່ກັບການເສີມຂະຫຍາຍຄວາມຮັບຜິດຊອບ ຂອງບັນດາຄະນະພັກແລະຫົວໜ້າ ໃນວຽກງານພະນັກງານ. ເນື້ອໃນຂອງການເສີມຂະຫຍາຍປະຊາທິປະໄຕໃນວຽກງານພະນັກງານ ແລະ ການສ້າງຖັນແຖວພະນັກງານ ໄດ້ຮັບການເນັ້ນໜັກໃນບັນດາເອກະສານຂອງພັກ ແລະ ໄດ້ຮັບການເພີ່ມເຕີມ, ປັບປຸງບູລະນະໂດຍບັນດາກອງປະຊຸມໃຫຍ່ຂອງພັກໃນສະໄໝແຫ່ງການປ່ຽນແປງໃໝ່: “ເປີດປະຊາທິປະໄຕໃນວຽກງານພະນັກງານດ້ວຍກົດລະບຽບທີ່ຈະແຈ້ງ”(3), “ຮັບປະກັນລັກສະນະປະຊາທິປະໄຕ ແລະ ລວມສູນໃນວຽກງານພະນັກງານ”(4), “ຮັບປະກັນຫຼັກການລວມສູນແລະປະຊາທິປະໄຕ ໄປຄຽງຄູ່ກັບການເສີມຂະຫຍາຍຄວາມຮັບຜິດຊອບສ່ວນບຸກຄົນ ໃນວຽກງານພະນັກງານ”(5), “ເສີມຂະຫຍາຍປະຊາທິປະໄຕ, ອີງໃສ່ໝູ່ຄະນະແລະປະຊາຊົນ ເພື່ອຄັດເລືອກເອົາພະນັກງານ”(6).
ຈາກການສະຫຼຸບສັງລວມພຶດຕິກຳການຊີ້ນຳນຳພາຂອງພັກໃນສະໄໝກອງປະຊຸມໃຫຍ່ຄັ້ງທີ 10 (ປີ 2006 - 2010), ມະຕິກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມຊີ້ແຈ້ງວ່າ, ການປ່ຽນແປງໃໝ່ວຽກງານພະນັກງານຍັງຊ້າ; ຂາດກົນໄກ ນະໂຍບາຍສະເພາະ ເພື່ອເສີມຂະຫຍາຍປະຊາທິປະໄຕຢ່າງແທ້ຈິງ ໃນວຽກງານພະນັກງານ, ໃນການຄົ້ນພົບແລະນຳໃຊ້ຜູ້ມີຄວາມເກັ່ງກ້າສາມາດ. ຈາກນັ້ນ, ທັດສະນະເສີມຂະຫຍາຍປະຊາທິປະໄຕໃນວຽກງານພະນັກງານໄດ້ຮັບການເພີ່ມເຕີມ, ບູລະນະເປັນ “ການເປີດກວ້າງແລະເສີມຂະຫຍາຍປະຊາທິປະໄຕ ຕ້ອງຕິດກັບການເພີ່ມທະວີລະບຽບວິໄນ” ແລະ ກາຍເປັນບົດຮຽນ “ຮັບປະກັນການປະຕິບັດຫຼັກການລວມສູນປະຊາທິປະໄຕ, ໝູ່ຄະນະນຳພາ, ບຸກຄົນຮັບຜິດຊອບ, ໄປຄຽງຄູ່ກັບການເສີມຂະຫຍາຍບົດບາດ ຄວາມຮັບຜິດຊອບ ຄວາມເປັນເຈົ້າການຂອງຫົວໜ້າ”(7). ພ້ອມກັນນັ້ນ, ຄວາມຮຽກຮ້ອງຕ້ອງການແມ່ນຕ້ອງເພີ່ມທະວີຄວາມສາມາດບົ່ມຊ້ອນ ແລະ ຄວາມປະດິດສ້າງຂອງຖັນແຖວພະນັກງານ ໃຫ້ແກ່ການພັດທະນາປະເທດ, ຕາມການຊີ້ນຳຂອງສະຫາຍເລຂາທິການໃຫຍ່ ຫງວຽນຝູຈ້ອງ ໃນກອງປະຊຸມທົ່ວປະເທດເພື່ອສະຫຼຸບວຽກງານຈັດຕັ້ງກໍ່ສ້າງພັກໃນປີ 2017 ແລະ ຜັນຂະຫຍາຍໜ້າທີ່ປີ 2018: “ຫັນເປັນມາດຕະຖານ ແລະ ຮັດແໜ້ນລະບຽບວິໄນ, ປ່ຽນແປງໃໝ່ວຽກງານພະນັກງານຢ່າງແຂງແຮງ ແນໃສ່ຕອບສະໜອງຄວາມຕ້ອງການ, ໜ້າທີ່ການເມືອງ ແລະ ສະພາບການໃໝ່, ປົດປ່ອຍແຫຼ່ງພະລັງໄດ້, ເສີມຂະຫຍາຍຄວາມສາມາດບົ່ມຊ້ອນ ສະຕິປັນຍາ ແລະ ຄວາມປະດິດສ້າງຂອງຖັນແຖວພະນັກງານໃນທຸກຂະແໜງການ ທຸກຂັ້ນ ທຸກຂົງເຂດ”(8).
ມະຕິເລກທີ 26-NQ/TW, ລົງວັນທີ 19 ພຶກສະພາ 2018, ຂອງຄະນະບໍລິຫານສູນກາງພັກກອມມູນິດຫວຽດນາມສະໄໝທີ 12, “ກ່ຽວກັບການສຸມໃສ່ກໍ່ສ້າງຖັນແຖວພະນັກງານທຸກຂັ້ນ, ໂດຍສະເພາະຂັ້ນຍຸດທະສາດ, ໃຫ້ມີຄຸນສົມບັດ ຄວາມສາມາດ ແລະຊື່ສຽງຢ່າງພຽງພໍ, ທຽບເທົ່າກັບລະດັບໜ້າທີ່”, ກໍໄດ້ກຳນົດສອງຈຸດສຸມຄື: 1- ສືບຕໍ່ປ່ຽນແປງໃໝ່ວຽກງານພະນັກງານຢ່າງແຂງແຮງ ຮອບດ້ານ ຄົບຊຸດ ແລະ ມີປະສິດທິຜົນ; ຫັນເປັນມາດຕະຖານ, ຮັດແໜ້ນລະບຽບວິໄນ ໄປຄຽງຄູ່ກັບການສ້າງສະພາບແວດລ້ອມ ເງື່ອນໄຂເພື່ອຊຸກຍູ້ການປ່ຽນແປງໃໝ່ ປະດິດສ້າງຮັບໃຊ້ການພັດທະນາ; 2- ມີກົນໄກປົກປ້ອງພະນັກງານທີ່ກ້າຄິດ ກ້າເຮັດ ກ້າບຸກທະລຸ ກ້າຮັບຜິດຊອບ ເພື່ອຜົນປະໂຫຍດລວມ; ສຸມໃສ່ການກໍ່ສ້າງຖັນແຖວພະນັກງານຂັ້ນຍຸດທະສາດ, ເລຂາຄະນະພັກ ແລະ ຫົວໜ້າອົງການຂັ້ນຕ່າງໆ ໄປຄຽງຄູ່ກັບການແບ່ງງານ, ແບ່ງສິດຂອບເຂດ ແນໃສ່ເສີມຂະຫຍາຍລັກສະນະເປັນເຈົ້າການ ປະດິດສ້າງ; ພ້ອມກັນນັ້ນ, ເພີ່ມທະວີການກວດກາ ຕິດຕາມກວດກາ ຄວບຄຸມອຳນາດຢ່າງແໜ້ນແຟ້ນ. ເຖິງກອງປະຊຸມໃຫຍ່ຄັ້ງທີ 13, ພັກໄດ້ເນັ້ນໜັກ “ເສີມຂະຫຍາຍປະຊາທິປະໄຕ, ຮັດແໜ້ນລະບຽບວິໄນ ໄປຄຽງຄູ່ກັບການສ້າງສະພາບແວດລ້ອມແລະພື້ນທີ່ສຳລັບການປ່ຽນແປງໃໝ່ປະດິດສ້າງ ໃນວຽກງານພະນັກງານ ແລະ ການກໍ່ສ້າງຖັນແຖວພະນັກງານ” ແລະ ຖືວ່ານີ້ເປັນໜຶ່ງໃນບັນດາວິທີການບຸກທະລຸຂອງວຽກງານກໍ່ສ້າງພັກ.
ໃນບັນດາທັດສະນະແລະແຜນນະໄຍບາຍທີ່ຖືກຕ້ອງຂອງພັກນັ້ນ, ວຽກງານພະນັກງານໄດ້ມີການຫັນປ່ຽນຢ່າງຈະແຈ້ງ, ນັບມື້ນັບມີການປ່ຽນແປງ, ມີລະບຽບ, ຕິດແໜ້ນກັບບັນດາທັດສະນະ, ຫຼັກການຂອງພັກ ແລະ ບັນລຸຜົນສຳເລັດທີ່ສຳຄັນຫຼາຍຢ່າງ, ຕອບສະໜອງຢ່າງທັນການກັບຄວາມຕ້ອງການກໍ່ສ້າງຖັນແຖວພະນັກງານ ໃນຍຸກສະໄໝເລັ່ງລັດການຫັນປະເທດເປັນອຸດສາຫະກຳ ທັນສະໄໝ ແລະ ການເຊື່ອມໂຍງເຂົ້າກັບສາກົນຢ່າງກວ້າງຂວາງ ເລິກເຊິ່ງ. ລະບຽບລະບອບກ່ຽວກັບວຽກງານພະນັກງານໄດ້ຮັບການປັບປຸງໃຫ້ສົມບຸນຂຶ້ນເລື້ອຍໆ; ບັນດາຂອດ, ບັນດາຂັ້ນຕອນໃນຂະບວນວິວັດຂອງວຽກງານພະນັກງານໄດ້ຮັບການກໍານົດຢ່າງລະອຽດກວ່າອີກ. ກົມການເມືອງສູນກາງ, ຄະນະເລຂາທິການສູນກາງໄດ້ປະກາດໃຊ້ບັນດາຂໍ້ກຳນົດ ແລະ ກົດລະບຽບທີ່ຮັບປະກັນຄວາມຄົບຊຸດ ຄວາມເຊື່ອມໂຍງລະຫວ່າງຂັ້ນ ຂະແໜງການ ຂອດຕ່າງໆຂອງວຽກງານພະນັກງານ.
ພິເສດ, ໃນວາລະກອງປະຊຸມໃຫຍ່ຄັ້ງທີ 12 ຂອງພັກ ໄດ້ມີຄວາມຕັ້ງໜ້າໃນການແກ້ໄຂເພີ່ມເຕີມ ແລະ ປະກາດໃຊ້ແຜນນະໂຍບາຍ ກົດລະບຽບ ຂໍ້ກຳນົດ ບົດສະຫຼຸບຫຼາຍສະບັບ ເພື່ອຕອບບັນຫາພາກປະຕິບັດທີ່ກໍາລັງຖືກຍົກຂຶ້ນມາ, ແກ້ໄຂຂໍ້ຈຳກັດ ແລະ ຈຸດອ່ອນໃນວຽກງານພະນັກງານຢ່າງຖືກຕ້ອງ ແລະ ທັນການ; ພ້ອມກັນນັ້ນ, ຊີ້ນຳສືບຕໍ່ປະຕິບັດທົດລອງນະໂຍບາຍໃໝ່ຈຳນວນໜຶ່ງ ກ່ຽວກັບວຽກງານພະນັກງານ; ກໍ່ສ້າງ ແກ້ໄຂ ເພີ່ມເຕີມ ແລະ ປະກາດໃຊ້ຂໍ້ກຳນົດ, ກົດລະບຽບໃໝ່ຫຼາຍສະບັບ ກ່ຽວກັບການຕີລາຄາ ການວາງແຜນກຳນົດ ການຝຶກອົບຮົມ ການຍົກຍ້າຍຜັດປ່ຽນ ການແຕ່ງຕັ້ງພະນັກງານ, ການແນະນຳພະນັກງານສະໝັກຮັບເລືອກຕັ້ງ ແລະ ການຄວບຄຸມອຳນາດ. ກົມການເມືອງສູນກາງພັກໄດ້ສະຫຼຸບໂດຍອອກກົດລະບຽບສະເພາະຫຼາຍສະບັບ(9). ບົນພື້ນຖານນັ້ນ, ບັນດາຄະນະພັກ ອົງການຈັດຕັ້ງພັກໄດ້ຫັນເປັນອັນລະອຽດ ແລະ ຊີ້ນຳ ນຳພາ ຈັດຕັ້ງປະຕິບັດບັນດາມະຕິ ຂໍ້ສະຫຼຸບ ຂໍ້ກຳນົດຂອງສູນກາງຢ່າງເຂັ້ມງວດ. ສາມາດຢືນຢັນວ່າ, ວຽກງານການຕີລາຄາ ການວາງແຜນກຳນົດ ການຝຶກອົບຮົມ ການເລືອກຕັ້ງ ການແຕ່ງຕັ້ງ ການຍົກຍ້າຍຜັດປ່ຽນພະນັກງານ ໄດ້ມີການຫັນປ່ຽນຢ່າງຕັ້ງໜ້າຕາມທິດເປີດກວ້າງປະຊາທິປະໄຕ ພາວະວິໄສ ເປີດເຜີຍ ໂປ່ງໃສ ຖືກຕ້ອງຊັດເຈນ, ປະກອບສ່ວນຍົກສູງຄຸນນະພາບຂອງພະນັກງານນຳພາ, ຄຸ້ມຄອງທຸກຂັ້ນ. ພະນັກງານສ່ວນໃຫຍ່ໄດ້ສະແດງໃຫ້ເຫັນຄວາມຫ້າວຫັນຂະຫຍັນຂັນເຄື່ອນ, ມີຫົວຄິດປະດິດສ້າງ, ກ້າຄິດ ກ້າເຮັດ ກ້າຮັບຜິດຊອບເພື່ອຜົນປະໂຫຍດສ່ວນລວມ ແລະ ສຳເລັດໜ້າທີ່ທີ່ໄດ້ຮັບມອບໝາຍເປັນຢ່າງດີ. ພະນັກງານຫຼາຍທ່ານມີຄວາມສາມາດຊີ້ນຳ ແລະ ປະສານສົມທົບວຽກງານ, ມີຄວາມສາມາດວິເຄາະ ສັງລວມ ແລະ ອ່ອນໄຫວຕໍ່ວຽກງານການເມືອງ, ມີຈິນຕະນາການສັດຈະວິພາກ, ກ້າສະເໜີ ກ້າຮັບຜິດຊອບ, ມີຄວາມເປັນເຈົ້າການ ມີຫົວຄິດປະດິດສ້າງໃນການເຮັດວຽກ, ບໍ່ຕົກໃນທ່າຮັບ, ລໍຖ້າ, ເພິ່ງພາເອື່ອຍອີງ.
ວຽກງານກວດກາ ຕິດຕາມຫວກການັບມື້ນັບໄດ້ຮັບຄວາມເອົາໃຈໃສ່, ໄດ້ຈັດຕັ້ງປະຕິບັດຢ່າງເດັດດ່ຽວ ຮອບດ້ານ ຄົບຊຸດ, ມີການປ່ຽນແປງໃໝ່ຫຼາຍຢ່າງ, ຮັບປະກັນຫຼັກການບໍ່ມີ “ເຂດຕ້ອງຫ້າມ”, ບໍ່ມີການຍົກເວັ້ນ. ຜ່ານການກວດກາ, ກຳມະການຄະນະພັກທຸກຂັ້ນຈຳນວນໜຶ່ງ, ຫົວໜ້າຄະນະພັກ ຫົວໜ້າອຳນາດການປົກຄອງຈຳນວນໜຶ່ງ, ນັບທັງພະນັກງານທີ່ເຄີຍດຳລົງຕຳແໜ່ງຂັ້ນສູງໃນບັນດາອົງການນຳຂອງພັກ, ອົງການຄຸ້ມຄອງຂອງລັດ, ພະນັກງານຫຼາຍຄົນເປັນນາຍພົນໃນກໍາລັງປະກອບອາວຸດ, ໄດ້ຖືກລົງໂທດທາງວິໄນຢ່າງຖືກຕ້ອງແລະເຂັ້ມງວດ. ໃນວາລະກອງປະຊຸມໃຫຍ່ຄັ້ງທີ 12 ຂອງພັກ, ຄະນະພັກ, ຄະນະກຳມະການກວດກາທຸກຂັ້ນ ໄດ້ປະຕິບັດວິໄນຕໍ່ພະນັກງານ ສະມາຊິກພັກ 2.209 ຄົນທີ່ກ່ຽວຂ້ອງກັບໂທດສໍ້ລາດບັງຫຼວງ; ໃນນັ້ນ, ມີພະນັກງານພາຍໃຕ້ການຄຸ້ມຄອງຂອງສູນກາງພັກ 113 ຄົນທັງຜູ້ດຳລົງຕຳແໜ່ງ ແລະ ບຳນານ(10). ຫຼາຍກໍລະນີ ຄະດີສໍ້ຫຼາດບັງຫຼວງທີ່ຮ້າຍແຮງ ສັບສົນ, ໄດ້ຮັບຄວາມສົນໃຈຂອງປະຊາຊົນ, ໄດ້ຖືກຈັດການແກ້ໄຂຢ່າງເຂັ້ມງວດ ຖືກກົດໝາຍ, ມີຜົນກະທົບໃນການກ່າວເຕືອນ ສັ່ງສອນ, ຮັດແໜ້ນລະບຽບວິໄນໃນພັກ ແລະ ໃນກົງຈັດແຫ່ງລັດ, ປະກອບສ່ວນປັບປຸງແລະຍົກສູງຄວາມເຊື່ອຖືຂອງປະຊາຊົນຕໍ່ພັກ, ລັດ ແລະ ລະບອບສັງຄົມນິຍົມ.
ຄຽງຄູ່ກັບບັນດາຜົນສໍາເລັດສໍາຄັນທີ່ບັນລຸໄດ້, ວຽກງານພະນັກງານຍັງມີຂໍ້ຈຳກັດທີ່ແນ່ນອນ, ໃນນັ້ນມີຂໍ້ຈຳກັດຈຳນວນໜຶ່ງທີກ່ຽວຂ້ອງກັບການປະຕິບັດບັນດາທັດສະນະຂອງພັກກ່ຽວກັບວຽກງານພະນັກງານ ແລະ ການສ້າງຖັນແຖວພະນັກງານ. ກົນໄກຄວບຄຸມອຳນາດໃນວຽກງານພະນັກງານ ແລະ ການສ້າງຖັນແຖວພະນັກງານ ຍັງບໍ່ທັນສົມບູນ, ຂາດຄວາມຄົບຊຸດ, ພາໃຫ້ປະສິດທິພາບໃນການປະຕິບັດບໍ່ສູງ. ບົດບາດຕິດຕາມກວດກາຂອງປະຊາຊົນຍັງບໍ່ທັນໄດ້ຮັບການເສີມຂະຫຍາຍຢ່າງແຂງແຮງ, ໃນຫຼາຍແຫ່ງມີສະພາບການປະຊາທິປະໄຕຕາມແບບຮູບການ, ຂະບວນການຂັ້ນຕອນຂອງວຽກງານພະນັກງານບໍ່ໄດ້ຖືກຄວບຄຸມຢ່າງເຂັ້ມງວດ. ການຕີລາຄາພະນັກງານຢູ່ບາງແຫ່ງຍັງບໍ່ຖືກຕ້ອງແທ້; ວຽກງານການຕິຊົມຕົນເອງແລະຕິຊົມຍັງອ່ອນແອ. ນອກຈາກນັ້ນ, ການຫັນເປັນນິຕິກຳຕໍ່ແຜນນະໂຍບາຍ ແນວທາງຂອງພັກກ່ຽວກັບບາງເນື້ອໃນໃນວຽກງານພະນັກງານ ແລະ ການສ້າງຖັນແຖວພະນັກງານນັ້ນ ຍັງບໍ່ທັນຄົບຊຸດ, ບໍ່ທັນການ; ນະໂຍບາຍພະນັກງານບໍ່ໄດ້ຮັບການປັບປຸງໃຫ້ສົມບູນ ແນໃສ່ສ້າງແຮງຈູງໃຈໃຫ້ພະນັກງານມີຄວາມຕັ້ງໃຈ ແລະ ສຸດອົກສຸດໃຈໃນການເຮັດວຽກ. ພະນັກງານຈຳນວນໜຶ່ງມີປະກົດການຂອງຄວາມເສື່ອມໂຊມດ້ານແນວຄິດການເມືອງ ສິນທຳ ວິຖີຊີວິດ, ລະເມີດກົດໝາຍ, ແຕ່ຍັງບໍ່ຖືກກວດພົບແລະຈັດການໄດ້ທັນທ່ວງທີ, ກະທົບຕໍ່ຄວາມໄວ້ວາງໃຈຂອງປະຊາຊົນ. ການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ຄວາມຫຍໍ້ທໍ້ເລວຊາມໃນບາງຂົງເຂດ, ບາງພື້ນທີ່ຍັງຮ້າຍແຮງ ສັບສົນ, ດ້ວຍປະກົດການທີ່ນັບມື້ນັບແຍບຍົນ, ເຮັດໃຫ້ເກີດຄວາມຮ້ອນເຄືອງໃນສັງຄົມ.
ບັນດາຂໍ້ຈໍາກັດຂ້າງເທິງນີ້ເກີດຈາກສາເຫດຫຼາຍປະການດັງນີ້: 1- ຄວາມຮັບຮູ້ກ່ຽວກັບບາງແຜນນະໂຍບາຍ, ນະໂຍບາຍຂອງພັກແລະລັດກ່ຽວກັບວຽກງານພະນັກງານ ແລະ ການສ້າງຖັນແຖວພະນັກງານ ຍັງບໍ່ທັນເລິກເຊິ່ງ ບໍ່ຄົບຖ້ວນ, ເຮັດໃຫ້ເກີດຄວາມສັບສົນແລະຂາດຄວາມເດັດຂາດໃນການຜັນຂະຫຍາຍປະຕິບັດ ແລະ ປະສິດທິຜົນຕໍ່າ; 2- ການແບ່ງຂັ້ນຄຸ້ມຄອງພະນັກງານບໍ່ເໝາະສົມກັບສະພາບຕົວຈິງ, ຍັງບໍ່ທັນສົມທົບກັບການກວດກາ ຕິດຕາມກວດກາ ແລະ ຄວບຄຸມການປະຕິບັດ; ບໍ່ມີກົນໄກໃນການຄວບຄຸມອຳນາດຢ່າງແໜ້ນແຟ້ນ, ຄັດເລືອກພະນັກງານຢ່າງຮອບຄອບ, ການທົດແທນພະນັກງານທີ່ອ່ອນແອ ຊື່ສຽງຕໍ່າ ບໍ່ໄດ້ເຮັດຢ່າງທັນການ; 3- ກົນໄກ ນະໂຍບາຍ ວິທີແກ້ໄຂທີ່ມີລັກສານະບຸກທະລຸແລະຄົບຊຸດນັ້ນ ຍັງບໍ່ທັນໄດ້ຮັບການສ້າງຕັ້ງຂຶ້ນ ເພື່ອເສີມຂະຫຍາຍລັກສະນະເປັນເຈົ້າການ ປະດິດສ້າງຂອງຖັນແຖວພະນັກງານ; 4- ບົດບາດຕິດຕາມກວດກາຂອງບັນດາອົງການທີ່ມາຈາກການເລືອກຕັ້ງ, ບົດບາດຕິດຕາມກວດກາ ແລະ ວິຈານສັງຄົມຂອງແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ ຍັງບໍ່ທັນໄດ້ຮັບການເສີມຂະຫຍາຍຢ່າງເຕັມທີ່.
ທິດທາງໜ້າທີ່ທີ່ສໍາຄັນກ່ຽວກັບວຽກງານພະນັກງານ ແລະ ການສ້າງຖັນແຖວພະນັກງານ
ຕາມຈິດໃຈກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ
ຕໍ່ໜ້າຄວາມຮຽກຮ້ອງຕ້ອງການອັນຮີບດ່ວນຂອງວຽກງານກໍ່ສ້າງພັກ, ພັກກອມມູນິດຫວຽດນາມໄດ້ກຳນົດ: “ການເສີມຂະຫຍາຍປະຊາທິປະໄຕ, ຮັດແໜ້ນລະບຽບວິໄນ ໄປຄຽງຄູ່ກັບການສ້າງສະພາບແວດລ້ອມແຫ່ງການປ່ຽນແປງໃໝ່ປະດິດສ້າງໃນວຽກງານພະນັກງານ ແລະ ການສ້າງຖັນແຖວພະນັກງານ” ແມ່ນໜຶ່ງໃນສາມວິທີການບຸກທະລຸເພື່ອກໍ່ສ້າງຖັນແຖວພະນັກງານທີ່ມີຄຸນສົມບັດ ຄວາມສາມາດ ແລະ ຊື່ສຽງຢ່າງພຽງພໍ, ທຽບເທົ່າກັບລະດັບຂອງໜ້າໃນສະພາບການໃໝ່, ປະກອບສ່ວນກໍ່ສ້າງພັກ ແລະ ລະບົບການເມືອງໃຫ້ມີຄວາມສະອາດປອດໃສ ແລະ ເຂັ້ມແຂງ. ດ້ວຍທັດສະນະ “ວຽກງານການຈັດຕັ້ງ ພະນັກງານ ຕ້ອງໄດ້ຖືເປັນຈຸດບຸກທະລຸ, ເປັນ “ກຸນແຈ” ຂອງໜ້າທີ່ “ກຸນແຈ”, ມີຄວາມກ່ຽວຂ້ອງກັບການຢູ່ລອດຂອງພັກ ແລະ ຊະຕາກຳຂອງລະບອບການປົກຄອງ; ກັບການພັດທະນາຢ່າງໄວແລະຍືນຍົງຂອງປະເທດ”(11), ກອງປະຊຸມໃຫຍ່ຄັ້ງທີ 13 ຂອງພັກໄດ້ຊີ້ໃຫ້ເຫັນບັນດາເນື້ອໃນທິດທາງທີ່ມີຄຸນຄ່າທິດສະດີ ແລະ ພຶດຕິກຳຕົວຈິງທີ່ເລິກເຊິ່ງ ກ່ຽວກັບວຽກງານພະນັກງານ ແລະ ການສ້າງຖັນແຖວພະນັກງານ ໃນໄລຍະຕໍ່ໄປ; ລະອຽດຄື:
ທີໜຶ່ງ, ສຸມໃສ່ກໍ່ສ້າງຖັນແຖວພະນັກງານ ລັດຖະກອນທີ່ມີຄຸນສົມບັດ ຄວາມສາມາດ ແລະ ຊື່ສຽງຢ່າງພຽງພໍ ເພື່ອຮັບໃຊ້ປະຊາຊົນ ແລະ ຊຸກຍູ້ການພັດທະນາຂອງປະເທດ. ການເພີ່ມທະວີລະບຽບວິໄນໄປຄຽງຄູ່ກັບການປະຕິຮູບເງິນເດືອນ ລະບອບ ນະໂຍບາຍຄ່າຕອບແທນ, ສ້າງສະພາບແວດລ້ອມແລະເງື່ອນໄຂເຮັດວຽກ ເພື່ອຊຸກຍູ້ການປ່ຽນແປງໃໝ່ປະດິດສ້າງ, ຮັບໃຊ້ການພັດທະນາ, ສ້າງແຮງຈູງໃຈໃຫ້ພະນັກງານສູ້ຊົນ ຝຶກຝົນຫຼໍ່ຫຼອມ ສຸດອົກສຸດໃຈກັບວຽກງາມ. ກວດຄືນ ແກ້ໄຂ ເພີ່ມເຕີມນະໂຍບາຍຕໍ່ພະນັກງານ ລັດຖະກອນ ຕາມທິດສົ່ງເສີມພະນັກງານ ລັດຖະກອນຍົກສູງລະດັບວິຊາຊີບ ວິຊາສະເພາະ, ຈັນຍາບັນການບໍລິການສາທາລະນະ, ເຮັດສໍາເລັດວຽກງານເປັນຢ່າງດີ; ອີງໃສ່ຄວາມກ້າຫານທາງການເມືອງ ຄຸນສົມບັດຄຸນທຳ ປະສິດທິຜົນໃນການປະຕິບັດໜ້າທີ່ ເພື່ອຕີລາຄາ, ເລື່ອນຊັ້ນຕຳແໜ່ງ, ແຕ່ງຕັ້ງພະນັກງານ. ໃນນັ້ນ, ຕ້ອງຍົກສູງປະສິດທິຜົນຕົວຈິງຂອງການຕີລາຄາພະນັກງານຕາມທິດສອດຮ້ອຍໄປຕະຫຼອດ, ຫຼາຍມິຕິ, ມີມາດຖານ ແລະ ຜ່ານຜະລິດຕະພັນສະເພາະ ຄຸນນະພາບ ແລະ ປະສິດທິຜົນການປະຕິບັດຄວາມຮັບຜິດຊອບ, ໜ້າທີ່ທີ່ໄດ້ຮັບມອບໝາຍ. ເອົາໃຈໃສ່ການກໍ່ສ້າງພັດທະນາແຫຼ່ງບຸກຄະລາກອນ; ມີກົນໄກບຳລຸງສ້າງ ແລະ ເຊື່ອຖືນຳໃຊ້ຜູ້ທີ່ມີຄວາມເກັ່ງກ້າສາມາດ, ພະນັກງານທີ່ມີຄວາມສາມາດໂດດເດັ່ນ; ຍູ້ແຮງການດຶງດູດແລະສ້າງພະນັກງານ ຈາກຜູ້ສຳເລັດການສຶກສາມະຫາວິທະຍາໄລທີ່ດີເລີດ ແລະ ນັກວິທະຍາສາດໜຸ່ມ. ພ້ອມກັນນັ້ນ, “ມີກົນໄກໃນການກັ່ນກອງແລະປ່ຽນແທນພະນັກງານໂດຍໄວ ຕໍ່ຜູ້ທີ່ບໍ່ປະຕິບັດໜ້າທີ່, ຝ່າຝືນກົດໝາຍ, ລະເມີດຈັນຍາບັນການບໍລິການສາທາລະນະ ແລະ ຈັນຍາບັນແຫ່ງວິຊາຊີບ, ຖືກວິໄນ, ບໍ່ໄດ້ຮັບຄວາມເຊື່ອຖືຈາກປະຊາຊົນອີກຕໍ່ໄປ”(12). ວຽກງານພະນັກງານ ແລະ ການຄຸ້ມຄອງຖັນແຖວພະນັກງານ ຕ້ອງໄດ້ຮັບການປະຕິບັດຢ່າງວ່ອງໄວ ເຂັ້ມງວດ ພາວະວິໄສ, ຜ່ານບັນດາກົນໄກ ນະໂຍບາຍທີ່ສອດຄ່ອງ ເພື່ອກັ່ນກອງແລະປ່ຽນແທນພະນັກງານນຳພາຄຸ້ມຄອງທີ່ບໍ່ສຳເລັດໜ້າທີ່, ບໍ່ສົມຄວນ, ບໍ່ຮັບປະກັນມາດຕະຖານ ເງື່ອນໄຂ, ແຕ່ກໍ່ບໍ່ປະຂ້າມພະນັກງານທີ່ມີຄຸນສົມບັດສິນທຳດີ ມີຄວາມສາມາດແທ້ໆ. ມີກົນໄກ ຂໍ້ກຳນົດສະເພາະກ່ຽວກັບການໃຫ້ເລີກງານ, ການລາອອກ ສຳລັບພະນັກງານທີ່ມີຂີດຄວາມສາມາດຈຳກັດ ມີຊື່ສຽງຕ່ຳ, ຜູ້ທີ່ເຮັດຜິດ ໂດຍບໍ່ຕ້ອງລໍຖ້າໃຫ້ໝົດອາຍຸການ, ໝົດໄລຍະການແຕ່ງຕັ້ງ ຫຼື ອາຍຸເຮັດວຽກ.
ທີສອງ, ການສ້າງສະພາບແວດລ້ອມວັດທະນະທໍາສຳນັກງານ ແນໃສ່ເສີມຂະຫຍາຍປະຊາທິປະໄຕ, ສົ່ງເສີມການປ່ຽນແປງໃໝ່ປະດິດສ້າງ, ຕິດພັນກັບການຮັດແໜ້ນລະບຽບວິໄນ. ກອງປະຊຸມໃຫຍ່ຄັ້ງທີ 13 ຂອງພັກໄດ້ຊີ້ແຈ້ງ: “ເອົາໃຈໃສ່ການສ້າງສະພາບແວດລ້ອມວັດທະນະທໍາສຳນັກງານທີ່ສົດໃສ ປະຊາທິປະໄຕ ສາມັກຄີ ແລະ ມະນຸດອາລະຍະທຳ; ຂະຈັດພະຍາດອາດຍາສິດ, ດຶງພັກດຶງພວກ, ເສຍຄວາມສາມັກຄີ, ລັດທິສວຍໂອກາດ ແລະອັດຖະປະໂຫຍດ”(13). ການສ້າງສະພາບແວດລ້ອມວັດທະນະທໍາສຳນັກງານທີ່ສົດໃສ ປະຊາທິປະໄຕ ສາມັກຄີ ແລະ ມະນຸດອາລະຍະທຳ ແມ່ນເນື້ອໃນສຳຄັນທີ່ຂາດບໍ່ໄດ້ ເພື່ອສ້າງແຮງຈູງໃນໃຫ້ພະນັກງານເຮັດວຽກ ແລະ ອຸທິດຕົນ. ໃນສະພາບແວດລ້ອມການເຮັດວຽກ, ການນຳຂອງສຳນັກງານອົງການ, ໂດຍສະເພາະແມ່ນຫົວໜ້າ, ຕ້ອງເອົາໃຈໃສ່ເຖິງການປະຕິບັດປະຊາທິປະໄຕ, ນັບຖືຄວາມຄິດເຫັນຂອງພະນັກງານ ສະມາຊິກພັກ; ບັນດາສະມາຊິກໃນສຳນັກງານອົງການຍາມໃດກໍສາມັກຄີ, ຊ່ວຍເຫຼືອເຊິ່ງກັນແລະກັນ ໃນວຽກງານ. ເພື່ອສ້າງສະພາບແວດລ້ອມໃນສຳນັກງານທີ່ກະຕຸ້ນໃຫ້ພະນັກງານປ່ຽນແປງໃໝ່ປະດິດສ້າງຢ່າງແທ້ຈິງ, ກ່ອນອື່ນໝັດ, ພະນັກງານນຳພາ ຄຸ້ມຄອງທຸກຂັ້ນ ຕ້ອງນຳໜ້າຢ່າງແທ້ຈິງໃນການປະຕິບັດບັນດາຫຼັກການແລະກົດລະບຽບການເຮັດວຽກ ບົນພື້ນຖານ “ລວມສູນປະຊາທິປະໄຕ, ໝູ່ຄະນະນຳພາ, ບຸກຄົນຮັບຜິດຊອບ”(14). ເພີ່ມທະວີຄວາມສາມັກຄີພາຍໃນ ແລະ ລະບຽບວິໄນ; ບໍ່ຕົກໃສ່ຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ບັນດາປະກົດການ “ຫັນປ່ຽນຕົນເອງ”, “ປ່ຽນແປງຕົນເອງ”; ປະຕິບັດມະຕິ ຄຳສັ່ງ ຂໍ້ກຳນົດ ຂໍ້ສະຫຼຸບ ກົດລະບຽບ ແລະ ເນື້ອໃນຂອງອົງການ, ການຈັດຕັ້ງ, ໜ່ວຍງານ; ຮັບຜິດຊອບໃນການລາຍງານ ອະທິບາຍ ແລະ ຍອມຮັບຄວາມຮັບຜິດຊອບເມື່ອຈຳເປັນ. ບັນດາອົງການ, ໜ່ວຍງານທີ່ໃຊ້ພະນັກງານໂດຍກົງ ມີຄວາມຮັບຜິດຊອບໃນການເພີ່ມເຕີມ ປັບປຸງບູລະນະ ແລະ ປະຕິບັດຫຼັກຈັນຍາບັນການບໍລິການສາທາລະນະ ລະບຽບພາຍໃນ ກົດລະບຽບຢ່າງເຂັ້ມງວດ, ປະຕິບັດຂໍ້ບັງຄັບກ່ຽວກັບການຄຸ້ມຄອງພະນັກງານທັງໃນເວລາແລະຫຼັງເວລາເຮັດວຽກ ເພື່ອຮັດແໜ້ນລະບຽບວິໄນໃນການຄຸ້ມຄອງພະນັກງານ; ກວດກາ ແລະ ຕິດຕາມກວດກາການປະຕິບັດຢ່າງເປັນປະຈຳ; ກຳແໜ້ນສະພາບການເຄື່ອນໄຫວ ຈິດວິທະຍາ ແລະ ຊີວິດການເປັນຢູ່ຂອງພະນັກງານ ແລະ ຂໍ້ມູນສະທ້ອນກ່ຽວກັບພະນັກງານ ເພື່ອຈະໃຊ້ມາດຕະການແກ້ໄຂຢ່າງທັນການ.
ທີສາມ, ສ້າງກົນໄກຄວບຄຸມອຳນາດທີ່ເຂັ້ມງວດ, ປ່ຽນແປງໃໝ່ວຽກງານກວດສອບ ກວດກາ ຕິດຕາມກວດກາ, ເປັນເຈົ້າການໃນການກວດພົບແຕ່ໄກ ໂດຍໄວ ເພື່ອປ້ອງກັນ, ກີດກັ້ນຄວາມຜິດພາດ, ການລະເມີດໃນວຽກງານພະນັກງານ ແລະ ການສ້າງຖັນແຖວພະນັກງານ. ປັບປຸງບູລະນະກົນໄກຄວບຄຸມອຳນາດ, ກ່ອນອື່ນໝົດແມ່ນສຸມໃສ່ບັນດາຂົງເຂດທີ່ມັກເກີດການສໍ້ຫຼາດບັງຫຼວງ, ເກີດຄວາມຫຍໍ້ທໍ້ເລວຊາມງ່າຍ. ວຽກງານປ້ອງກັນແລະຕ້ານຄວາມຫຍໍ້ທໍ້ເລວຊາມ ຈະສຸມໃສ່ການປ້ອງກັນແລະຕ້ານຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ ແລະ ວິຖີຊີວິດຂອງພະນັກງານ. ການເຄື່ອນໄຫວກວດສອບ ກວດກາ ຕິດຕາມກວດກາຕ້ອງໄດ້ “ຮັບປະກັນລັກສະນະພາວະວິໄສ ປະຊາທິປະໄຕ ວິທະຍາສາດ ຄົບຊຸດ ເປັນເອກະພາບ ຮອບຄອບ ແໜ້ນແຟ້ນ ແລະ ເປັນໄປໄດ້”(15) ແນໃສ່ເປັນເຈົ້າການໃນການກວດພົບໄວ ເພື່ອປ້ອງກັນ, ກີດກັ້ນແຕ່ໄກ ແລະ ແກ້ໄຂໂດຍໄວ, ບໍ່ປ່ອຍໃຫ້ຄວາມຜິດເລັກໆ ນ້ອຍໆ ກໍ່ຕົວຂຶ້ນເປັນເລື່ອງໃຫຍ່; ພ້ອມກັນນັ້ນ, ບໍ່ຂັດຂວາງວຽກງານວິຊາສະເພາະ ແລະ ເຮັດໃຫ້ເກີດຄວາມຕົກໃຈໃນຖັນແຖວພະນັກງານ. ກວດຄືນ ເພີ່ມເຕີມ ແລະ ປັບປຸງຂໍ້ກຳນົດກ່ຽວກັບສິດຂອບເຂດ ແລະ ຄວາມຮັບຜິດຊອບຂອງໝູ່ຄະນະ ແລະ ຂອງບຸກຄົນ; ກ່ຽວກັບບົດບາດກວດກາ ຕິດຕາມກວດກາຂອງບັນດາອົງການທີ່ມີໜ້າທີ່, ອົງການທີ່ມາຈາກການເລືອກຕັ້ງ, ສື່ມວນຊົນ ແລະ ຂອງປະຊາຊົນ ໃນວຽກງານພະນັກງານ; ການກໍ່ສ້າງແລະຄຸ້ມຄອງຖັນແຖວພະນັກງານຕາມຫຼັກການ ສິດຂອບເຂດໄປຄຽງຄູ່ກັບຄວາມຮັບຜິດຊອບ, ອຳນາດທັງໝົດຕ້ອງຖືກຄວບຄຸມ.
ສືບຕໍ່ສ້າງກົນໄກ ແລະ ນະໂຍບາຍທີ່ເໝາະສົມ ເພື່ອແນໃສ່ເສີມຂະຫຍາຍບົດບາດ ແລະ ຄວາມຮັບຜິດຊອບຂອງບັນດາອົງການທີ່ມາຈາກການເລືອກຕັ້ງ ແລະ ປະຊາຊົນໃນວຽກງານກໍ່ສ້າງພັກ, ໂດຍສະເພາະແມ່ນການເປັນເຈົ້າການກວດພົບ, ການກີດກັ້ນຄວາມຜິດພາດຂອງພະນັກງານ ແລະ ສະມາຊິກພັກໂດຍໄວ. ຍູ້ແຮງການສ້າງກົນໄກການປະສານງານທີ່ໃກ້ຊິດ ລະຫວ່າງບັນດາອົງການການກວດກາ ກວດສອບ ຕິດຕາມກວດກາ ໃນການແລກປ່ຽນຂໍ້ມູນຂ່າວສານ ແລະ ການຈັດຕັ້ງຄະນະກວດກາລະຫວ່າງບັນດາອົງການກວດກາ ເພື່ອຮັບປະກັນການປະຕິບັດຢ່າງຄົບຊຸດ ແລະ ຮອບດ້ານ, “ຫຼີກລ້ຽງການທັບຊ້ອນ, ການຊ້ຳກັນ, ການສູນເສຍຊັບພະຍາກອນ, ບໍ່ມີປະສິດທິພາບ”(16) ແລະ ຫຼີກລ້ຽງການສົ່ງຜົນກະທົບຕໍ່ການດໍາເນີນງານປົກກະຕິຂອງອົງການ ຫຼືການຈັດຕັ້ງ.
ທີສີ່, ບັນດາຄະນະພັກ ອົງການຈັດຕັ້ງພັກ, ບັນດາອົງການ ການຈັດຕັ້ງໃນລະບົບການເມືອງ ຕ້ອງຍົກສູງຈິດໃຈຮັບຜິດຊອບ, ຈັດຕັ້ງປະຕິບັດຂັ້ນຕອນຕ່າງໆໃນວຽກງານພະນັກງານຢ່າງຄົບຊຸດ ແໜ້ນແຟ້ນ ແລະ ມີປະສິດທິຜົນ; ກວດຄືນ ສ້າງ ແລະ ປັບປຸງບູລະນະບັນດາກອບມາຕະຖານຍົດຕໍາແໜ່ງ ແລະ ຕໍາແໜ່ງງານທີ່ເໝາະສົມ; ຈັດຫາຄົນທີ່ຖືກຕ້ອງ, ຈັດວຽກທີ່ຖືກຕ້ອງ, ສ້າງສະພາບແວດລ້ອມ ໂອກາດ ແລະ ເງື່ອນໄຂທີ່ສະດວກໃຫ້ພະນັກງານເສີມຂະຫຍາຍຄວາມສາມາດ, ອຸ່ນໃຈໃນການເຮັດວຽກ ການອຸທິດຕົນ ແລະ ການເຕີບໃຫຍ່. ຄະນະພັກ, ຫົວໜ້າອົງການທຸກຂັ້ນ ຕ້ອງຊາບຊຶມ ແລະ ປະຕິບັດຢ່າງເຕັມສ່ວນ ບັນດາເນື້ອໃນໃນບົດສະຫຼຸບເລກທີ 14-KL/TW, ລົງວັນທີ 22 ກັນຍາ 2021, ຂອງກົມການເມືອງສູນກາງ, “ກ່ຽວກັບແຜນນະໂຍບາຍສົ່ງເສີມ ແລະ ປົກປ້ອງພະນັກງານທີ່ຫ້າວຫັນຂະຫຍັນຂັນແຂງ ແລະ ມີຫົວຄິດປະດິດສ້າງ ເພື່ອຜົນປະໂຫຍດສ່ວນລວມ” ແລະ ສືບຕໍ່ຄົ້ນຄວ້າ, ສ້າງບັນດານະໂຍບາຍປຸກກະຕຸ້ນຄວາມຮັບຜິດຊອບ, ຄວາມປາດຖະໜາຢາກປະກອບສ່ວນ, ຈິດໃຈປ່ຽນແປງໃໝ່, ສຸດອົກສຸດໃນການຮັບໃຊ້ປະເທດຊາດ, ຮັບໃຊ້ປະຊາຊົນ ຂອງຖັນແຖວພະນັກງານ. ນິຍົມນັບຖື, ຮັບຟັງຄວາຄິດລິເລິ່ມສ້າງສັນທັງໝົດຂອງພະນັກງານ, ສົ່ງເສີມໃຫ້ກຳລັງໃຈຢ່າງເປັນປະຈຳ, ສ້າງກົນໄກ ສະພາບແວດລ້ອມ ເງື່ອນໄຂທີ່ສະດວກດີ ໃຫ້ພະນັກງານກ້າສະເໜີ ແລະ ຜັນຂະຫຍາຍຄວາມຄິດປ່ຽນແປງໃໝ່ປະດິດສ້າງ ເພື່ອຜົນປະໂຫຍດສ່ວນລວມ. ຍ້ອງຍໍຊົມເຊີຍ ແລະ ໃຫ້ລາງວັນທີ່ສົມຄວນກັບການປະກອບສ່ວນຂອງພະນັກງານ; ມີກົນໄກພິເສດ, ບຸລິມະສິດການຈັດວາງ ແລະ ນຳໃຊ້ພະນັງານທີ່ມີຈິນຕະນາການປ່ຽນແປງໃໝ່, ມີວິທີປະຕິບັດງານແບບບຸກທະລຸ ປະດິດສ້າງ ມີປະສິດທິຜົນສູງ. ຄຽງຄູ່ກັບການຂະຫຍາຍພື້ນທີ່ ເພື່ອໃຫ້ພະນັກງານເສີມຂະຫຍາຍສຸດຂີດ ຄວາມສາມາດປ່ຽນແປງໃໝ່ ປະດິດສ້າງ, ຄະນະພັກແລະອົງການຈັດຕັ້ງພັກຕ້ອງເອົາໃຈໃສ່ເຖິງວຽກງານກວດກາ ຕິດຕາມກວດກາ, ກວດພົບ ດັດແກ້ ແລະ ແກ້ໄຂຄວາມຜິດພາດ ໃນຂະບວນການຂອງການປະຕິບັດແຜນການຢ່າງທັນການ. ກີດກັ້ນຢ່າງທັນການ ແລະ ຈັດການຢ່າງເຂັ້ມງວດ ກັບການກະທຳສວຍໃຊ້ການສົ່ງເສີມແລະປົກປ້ອງພະນັກງານທີ່ມີຈິນຕະນາການປ່ຽນແປງໃໝ່ປະດິດສ້າ ເພື່ອສ້າງຜົນປະໂຫຍດສ່ວນຕົວ, ຮັບໃຊ້ “ຜົນປະໂຫຍດໝູ່ພວກ”, ປົກປິດ ປ່ອຍມືໃຫ້ການກະທຳຜິດ.
ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ກຳນົດວິໄສທັດ ແລະ ທິດທາງສູ້ຊົນຂອງຫວຽດນາມເຖິງກາງສະຕະວັດທີ 21 ຈະກາຍເປັນປະເທດພັດທະນາແລ້ວ ແລະມີລາຍໄດ້ສູງ ຕາມທິດສັງຄົມນິຍົມ ດ້ວຍແຜນທີ່ເສັ້ນທາງທີ່ສະທ້ອນໂດຍຜ່ານສາມຫຼັກໝາຍສໍາຄັນ: ເຖິງປີ 2025 ຈະເປັນປະເທດກຳລັງພັດທະນາ, ມີອຸດສາຫະກຳຕາມທິດທັນສະໄໝ, ມີລາຍໄດ້ລື່ນກາຍລະດັບປານກາງຕ່ຳ; ໃນປີ 2030 ຈະເປັນປະເທດກຳລັງພັດທະນາ, ມີອຸດສາຫະກຳທັນສະໄໝ, ມີລາຍໄດ້ປານກາງສູງ; ແລະເຖິງປີ 2045 ກາຍເປັນປະເທດທີ່ພັດທະນາແລ້ວ, ມີລາຍໄດ້ສູງ. ເປົ້າໝາຍນັ້ນຮຽກຮ້ອງໃຫ້ມີເສັ້ນທາງພັດທະນາທີ່ມີວິໄສທັດ, ດ້ວຍຈິນຕະນາການບຸກທະລຸ ແຕ່ໄຫວພິບ, ເພື່ອເສີມຂະຫຍາຍສຸດຂີດຊັບພະຍາກອນທັງໝົດ ຂອງທັງລະບົບການເມືອງ ແລະ ທົ່ວສັງຄົມ, ໂດຍສະເພາະແມ່ນຄວາມສາມາດບົ່ມຊ້ອນ ແລະ ຄວາມຄິດປະດິດສ້າງຂອງຖັນແຖວພະນັກງານທີ່ມີຫຼັກໝັ້ນການເມືອງທີ່ໜັກແໜ້ນ, ຄຸນສົມບັດສິນທຳທີ່ຜ່ອງໃສ, ຄວາມສາມາດທີ່ໂດດເດັ່ນ ຂະຫຍັນຂັນເຄື່ອນ ແລະ ປະດິດສ້າງ ເພື່ອຜົນປະໂຫຍດສ່ວນລວມ./.
---------------------
(1), (2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ II, ໜ້າ 257, 226.
(3) “ລາຍງານການເມືອງຂອງຄະນະບໍລິຫານງານສູນກາງພັກກອມມູນິດຫວຽດນາມທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 6 ຂອງພັກ”, ໃນປຶ້ມ: ກ່ຽວກັບພະນັກງານ ແລະ ວຽກງານພະນັກງານ ໃນສະໄໝແຫ່ງການປ່ຽນແປງໃໝ່ (ຄັດຈາກເອກະສານຂອງພັກ), ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2018, ໜ້າ 10.
(4) “ລາຍງານການເມືອງຂອງຄະນະບໍລິຫານງານສູນກາງພັກສະໄໝທີ 6 ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 7 ຂອງພັກ”, ໃນປຶ້ມ: ກ່ຽວກັບພະນັກງານ ແລະ ວຽກງານພະນັກງານ ໃນສະໄໝແຫ່ງການປ່ຽນແປງໃໝ່ (ຄັດຈາກເອກະສານຂອງພັກ), ປຶ້ມທີ່ໄດ້ແນະນຳ, ໜ້າ 71.
(5) “ລາຍງານການເມືອງຂອງຄະນະບໍລິຫານງານສູນກາງພັກສະໄໝທີ 7 ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 8 ຂອງພັກ”, ໃນປຶ້ມ: ກ່ຽວກັບພະນັກງານ ແລະ ວຽກງານພະນັກງານ ໃນສະໄໝແຫ່ງການປ່ຽນແປງໃໝ່ (ຄັດຈາກເອກະສານຂອງພັກ), ປຶ້ມທີ່ໄດ້ແນະນຳ, ໜ້າ 105.
(6) “ລາຍງານການເມືອງຂອງຄະນະບໍລິຫານງານສູນກາງພັກສະໄໝທີ 8 ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 9 ຂອງພັກ”, ໃນປຶ້ມ: ກ່ຽວກັບພະນັກງານ ແລະ ວຽກງານພະນັກງານ ໃນສະໄໝແຫ່ງການປ່ຽນແປງໃໝ່ (ຄັດຈາກເອກະສານຂອງພັກ), ປຶ້ມທີ່ໄດ້ແນະນຳ, ໜ້າ 229.
(7) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12, ຫ້ອງການສູນກາງພັກ, ຮ່າໂນ້ຍ, 2016, ໜ້າ 215.
(8) https://nhandan.vn/tin-tuc-su-kien/doi-moi-manh-me-cong-tac-can-bo-dap-ung-yeu-cau-nhiem-vu-chinh-tri-va-tinh-hinh-moi-314967/, ວັນທີ 19 ມັງກອນ 2018.
(9) ກົດລະບຽບສະບັບເລກທີ 89-QD/TW, ລົງວັນທີ 4 ສິງຫາ 2017, “ກ່ຽວກັບກອບມາດຕະຖານຕຳແໜ່ງ, ທິດທາງກອບມາດຕະຖານການປະເມີນພະນັກງານ ນຳພາ, ຄຸ້ມຄອງທຸກຂັ້ນ”; ກົດລະບຽບສະບັບເລກທີ 90-QD/TW, ລົງວັນທີ 4 ສິງຫາ 2017, “ກ່ຽວກັບກອບມາດຕະຖານຕຳແໜ່ງ, ມາດຕະຖານການປະເມີນພະນັກງານ ພາຍໃຕ້ການຄຸ້ມຄອງຂອງຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ” (ປະຈຸບັນແມ່ນກົດລະບຽບສະບັບເລກທີ 214-QĐ/TW, ລົງວັນທີ 2 ມັງກອນ 2020); ກົດລະບຽບສະບັບເລກທີ 105-QĐ/TW, ລົງວັນທີ 19 ທັນວາ 2017, “ກ່ຽວກັບການແບ່ງຂັ້ນຄຸ້ມຄອງພະນັກງານ ແລະ ແຕ່ງຕັ້ງ, ແນະນຳຜູ້ສະໝັກຮັບເລືອກຕັ້ງ”; ກົດລະບຽບສະບັບເລກທີ 132-QĐ/TW, ລົງວັນທີ 8 ມີນາ 2018, “ກ່ຽວກັບການທົບທວນ ການປະເມີນ ແລະ ການຈັດອັນດັບຄຸນນະພາບປະຈໍາປີ ສໍາລັບໝູ່ຄະນະ ແລະ ບຸກຄົນໃນລະບົບການເມືອງ”.
(10) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ II, ໜ້າ 208 – 209.
(11) ຫງວຽນຝູຈ້ອງ: “ກະກຽມ ແລະ ດຳເນີນກອງປະຊຸມໃຫຍ່ຄັ້ງທີ 13 ຂອງພັກເປັນຢ່າງດີ, ນຳປະເທດເຂົ້າສູ່ໄລຍະການພັດທະນາໃໝ່”, ເບິ່ງ: https://nhandan.vn, ວັນທີ 31 ສິງຫາ 2020.
(12) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 179.
(13), (14), (15) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 144, 198, 188.
(16) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 190.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 977 (ເດືອນພຶດສະພາ 2021)