ໄຊຊະນະອັນຍິ່ງໃຫຍ່ໃນລະດູບານໃໝ່ປີ 1975 - ບົດຮຽນກ່ຽວກັບ
ການເສີມຂະຫຍາຍຈິດໃຈແຫ່ງຄວາມຕັດສິນໃຈຕໍ່ສູ້ ແລະ ໄຊຊະນະ
ໃນການສ້າງສາແລະປົກປັກຮັກສາປະເທດຊາດ
ການເສີມຂະຫຍາຍຈິດໃຈແຫ່ງຄວາມຕັດສິນໃຈຕໍ່ສູ້ ແລະ ໄຊຊະນະ
ໃນການສ້າງສາແລະປົກປັກຮັກສາປະເທດຊາດ
ລົດຖັງຂອງກອງທັບປົດປ່ອຍພາກໃຕ້ຫວຽດນາມ ເຂົ້າຍຶດຄອງທຳນຽບປະທານາທິບໍດີ ຂອງລັດຖະບານຫຸ່ນ ໃນໄຊ່ງ່ອນ ຕອນທ່ຽງວັນທີ 30 ເມສາ 1975 _ພາບ:TTXVN
ທີໜຶ່ງ, ຍຶດໝັ້ນໃນເປົ້າເອກະລາດແຫ່ງຊາດ ແລະ ສັງຄົມນິຍົມ, ຮັກສາການນຳພາຂອງພັກ; ສ້າງຄວາມເປັນເອກະພາບສູງທາງດ້ານເຈດຈຳນົງແລະການກະທຳໃນທົ່ວພັກ, ທົ່ວປວງຊົນ ແລະ ທົ່ວກອງທັບ.
ໃນການຕໍ່ສູ້ຕ້ານຈັກກະພັດອາເມລິກາ, ແນວທາງຍຸດທະສາດການເຊີດຊູຄັນທຸງເອກະລາດແຫ່ງຊາດແລະສັງຄົມນິຍົມ, ດຳເນີນພ້ອມກັນແລະສົມທົບກັນຢ່າງແໜ້ນແຟ້ນຍຸດທະສາດການປະຕິວັດສອງຢ່າງຄື: ການປະຕິວັດຊາດປະຊາທິປະໄຕປະຊາຊົນຢູ່ພາກໃຕ້ ແລະ ການປະຕິວັດສັງຄົມນິຍົມຢູ່ພາກເໜືອ ເຊິ່ງໄດ້ຕອບສະໜອງຄວາມປາດຖະໜາ, ກາຍເປັນອາລົມຈິດອັນສັກສິດ ແລະ ຄວາມຕັດສິນໃຈຂອງປະຊາຊົນ, ສອດຄ່ອງກັບຄວາມເປັນຈິງຂອງການປະຕິວັດຫວຽດນາມ ແລະ ທ່າອ່ຽງທົ່ວໄປຂອງການປະຕິວັດໂລກ. ເປົ້າໝາຍນັ້ນໄດ້ກາຍເປັນທຸງທີ່ເຕົ້າໂຮມ ບັນດາກຳລັງສັງຄົມ, ຊົນຊັ້ນ, ສາສະໜາ, ບັນດາເຜົ່າໃນທົ່ວປະເທດ ໃຫ້ກາຍເປັນກຳລັງແຮງຂອງຊາດ, ສົມທົບກັບກຳລັງແຮງຂອງພີ່ນ້ອງຊາວຫວຽດນາມຢູ່ຕ່າງປະເທດ, ກຳລັງແຮງຈາກຄວາມເຫັນດີເຫັນພ້ອມແລະສະໜັບສະໜູນຂອງປະຊາຊົນ ແລະ ບັນດາກຳລັງປະຕິວັດທີ່ຕໍ່ສູ້ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມໃນໂລກ, ສ້າງເປັນກຳລັງແຮງສັງລວມ ເພື່ອຕໍ່ສູ້ຕ້ານຈັກກະພັດອາເມລິກາຜູ້ຮຸກຮານ.
ໂດຍຊາບຊຶມແນວທາງການເມືອງ, ການທະຫານຂອງພັກຢ່າງເລິກເຊິ່ງ, ກອງທັບ ແລະ ປະຊາຊົນພາກໃຕ້ໄດ້ຍອມຮັບຄວາມທຸກຍາກ, ຄວາມເສຍຫາຍ ແລະການເສຍສະຫຼະ, ຍູ້ແຮງການກໍ່ສ້າງ ແລະ ປັບປຸງກຳລັງ, ດຳເນີນການຕໍ່ສູ້ດ້ວຍອາວຸດ ສົມທົບກັບການຕໍ່ສູ້ທາງການເມືອງ, ເອົາຊະນະຍຸດທະສາດສົງຄາມຂອງຈັກກະພັດອາເມລິກາ. ເຂົ້າໃຈຢ່າງເລິກເຊິ່ງເຖິງຄວາມຕັດສິນໃຈຍຸດທະສາດຂອງພັກ, ກອງທັບ ແລະປະຊາຊົນພາກເໜືອໄດ້ເອົາຊະນະສົງຄາມທຳລາຍຂອງຈັກກະພັດອາເມລິກາ, ປົກປັກຮັກສາພາກເໜືອສັງຄົມນິຍົມ ເຊິ່ງເປັນຖານການປະຕິວັດຂອງທົ່ວປະເທດ. ໂດຍກຳແໜ້ນກາລະໂອກາດ, ກອງທັບ ແລະ ປະຊາຊົນສອງພາກໃຕ້ ແລະ ພາກເໜືອ ໄດ້ສຸມທຸກຄວາມມານະພະຍາຍາມ ເພື່ອດຳເນີນການບຸກໂຈມຕີແລະລຸກຮື້ຂຶ້ນຂະໜາດໃຫຍ່ ໃນລະດູບານໃໝ່ປີ 1975, ປົດປ່ອຍພາກໃຕ້ ແລະ ໂຮມປະເທດເປັນເອກະພາບ.
ປະຈຸບັນ, ໃນສະພາບການໂລກາພິວັດ ແລະ ການເຊື່ອມໂຍງເຂົ້າກັບສາກົນທີ່ນັບມື້ນັບເລິກເຊິ່ງ, ສະຖານະການໂລກແລະພາກພື້ນພວມປ່ຽນແປງຢ່າງສັບສົນ, ມີຄວາມສ່ຽງຕໍ່ຄວາມບໍ່ແນ່ນອນແລະຄວາມບໍ່ໝັ້ນຄົງ; ກາລະໂອກາດ ແລະ ສິ່ງທ້າທາຍ, ເປົ້າໝາຍແລະຄູ່ຮ່ວມມື ມີຄວາມຕິດພັນກັນ. ໃນຂະນະນັ້ນ, ບັນດາອິດທິກຳລັງສັດຕູ, ປະຕິກິລິຍາ ແລະ ສວຍໂອກາດທາງການເມືອງ ຍັງຄົງຊຸກຍູ້ການເຄື່ອນໄຫວຕ້ານຢັນທຳລາຍການປະຕິວັດຫວຽດນາມ ດ້ວຍຍຸດທະສາດ “ການຫັນປ່ຽນໂດຍສັນຕິ” ແລະ ກົນອຸບາຍອັນເລິກແລບແນບນຽນແລະຊົ່ວຮ້າຍຫຼາຍ. ສະພາບການດັ່ງກ່າວຮຽກຮ້ອງໃຫ້ພວກເຮົາຕ້ອງຍຶດໝັ້ນໃນຈຸດໝາຍເອກະລາດແຫ່ງຊາດ ແລະ ລັດທິສັງຄົມນິຍົມ, ຕັ້ງໝັ້ນໃນລັດທິມາກ-ເລນິນ ແລະ ແນວຄິດໂຮ່ຈີມິນ, ເຊື່ອໝັ້ນຢ່າງແທ້ຈິງໃນການນຳພາຂອງພັກ, “ຮັກສາ ແລະ ເພີ່ມທະວີການນຳພາໂດຍກົງ ແລະເດັດຂາດໃນທຸກດ້ານຂອງພັກ, ການຄຸ້ມຄອງລວມສູນແລະເປັນເອກະພາບຂອງລັດ ຕໍ່ກອງທັບປະຊາຊົນ”(1).
ສືບຕໍ່ຊາບຊຶມແນວທາງການປ່ຽນແປງໃໝ່ຂອງພັກຢ່າງເລິກເຊິ່ງ ແລະ ປະຕິບັດແນວທາງດັງກ່າວຢ່າງເຂັ້ມງວດແລະມີປະສິດທິຜົນ; ຖືເອົາການພັດທະນາເສດຖະກິດເປັນໜ້າທີ່ໃຈກາງ, ການກໍ່ສ້າງພັກເປັນກຸນແຈ, ການພັດທະນາວັດທະນະທໍາເປັນພື້ນຖານທາງວິນຍານຂອງສັງຄົມ; ການເພີ່ມທະວີການປ້ອງກັນປະເທດແລະຄວາມໝັ້ນຄົງເປັນໜ້າທີ່ສຳຄັນແລະເປັນປະຈຳ; ສົມທົບຢ່າງແໜ້ນແຟ້ນລະຫວ່າງການພັດທະນາເສດຖະກິດ-ສັງຄົມ ກັບການເພີ່ມທະວີການປ້ອງກັນປະເທດ, ຄວາມໝັ້ນຄົງ ແລະ ການຕ່າງປະເທດ. ໃນຂະບວນການປະຕິບັດ, ຕ້ອງຕັ້ງໝັ້ນໃນເປົ້າໝາຍແລະຫຼັກການຍຸດທະສາດ; ມີຄວາມໄຫວພິບ ຍືດຫຍຸ່ນທາງດ້ານຍຸດໂທບາຍ; ທັງຮ່ວມມື ແລະຕໍ່ສູ້; ເດັດດ່ຽວໜຽວແໜ້ໃນການຕໍ່ສູ້, ຖືເອົາການປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ, ການປົກປັກຮັກສາຜົນປະໂຫຍດຂອງຊາດ-ປະເທດຊາດໄວ້ຢ່າງໝັ້ນຄົງ ເປັນເປົ້າໝາຍສູງສຸດ; ຮັກສາສະພາບແວດລ້ອມສັນຕິພາບ ແລະ ສະຖຽນລະພາບ ເພື່ອສ້າງສາແລະພັດທະນາປະເທດໃຫ້ມີຄວາມຮັ່ງມີ, ປະຊາທິປະໄຕ, ຍຸດຕິທຳ ແລະ ອາລະຍະທຳ. ເປັນເຈົ້າການໃນການຕໍ່ສູ້ເອົາຊະນະທຸກກົນອຸບາຍ ແລະ ການເຄື່ອນໄຫວທຳລາຍມ້າງເພຂອງບັນດາອິດທິກຳລັງສັດຕູ, ປະຕິກິລິຍາ ແລະ ສວຍໂອກາດທາງການເມືອງ. ເດັດດ່ຽວປົກປັກຮັກສາແນວທາງ, ທັດສະນະ ແລະ ພື້ນຖານແນວຄິດຂອງພັກ, ຮັກສາການນຳພາຂອງພັກທີ່ມີຕໍ່ລັດ, ທົ່ວສັງຄົມແລະພາລະກິດການສ້າງສາ ແລະ ປົກປັກຮັກສາປະເທດຊາດຂອງປະຊາຊົນເຮົາ.
ທີສອງ, ຕິດຕາມແລະກຳແໜ້ນສະພາບຕົວຈິງ, ຕີລາຄາ ແລະ ຄາດຄະເນສະພາບການຢ່າງຖືກຕ້ອງ, ເປັນເຈົ້າການໃນການຈັດການສະຖານະການຢ່າງທັນການແລະມີປະສິດທິຜົນ, ບໍ່ໃຫ້ຕົກໃນທ່າຮັບແລະຄວາມບັງເອີນ.
ການກຳແໜ້ນສະພາບການແມ່ນໜຶ່ງໃນບັນດາພື້ນຖານສຳຄັນທີ່ສຸດ ເພື່ອສ້າງເຈດຈຳນົງແຫ່ງການຕໍ່ສູ້ແລະເອົາຊະນະ. ໃນສົງຄາມຕໍ່ຕ້ານຈັກກະພັດອາເມລິກາ, ພັກກອມມູນິດຫວຽດນາມ ແລະ ປະທານໂຮ່ຈີມິນ ຍາມໃດກໍ່ເປັນເຈົ້າການໃນການຕີລາຄາສະຖານະການ ແລະສະພາບການໃນສະໜາມຮົບຢ່າງຊັດເຈນ ແລະ ສະເໜີແນວທາງການຕັດສິນໃຈຍຸດທະສາດທີ່ເໝາະສົມ, ຖືກຕ້ອງ ແລະ ປະດິດສ້າງ. ບົນພື້ນຄວາມເຂົ້າໃຈແລະກຳແໜ້ນກົດເກນປະຕິວັດ, ກົດເກນສົງຄາມປະຕິວັດ, ທັດສະນະປະຕິບັດ, ກົມການເມືອງສູນການແລະຄະນະພັກການທະຫານສູນກາງ ໄດ້ວິເຄາະ ແລະ ຕີລາຄາຈຸດແຂງຂອງສັດຕູຢ່າງຖືກຕ້ອງ ເພື່ອຊອກຫາວິທີຈຳກັດແລະແກ້ໄຂຜ່ານຜ່າມັນ; ຄົ້ນພົບຈຸດອ່ອນຮ້າຍແຮງຂອງສັດຕູໄດ້ຢ່າງຖືກຕ້ອງ ເພື່ອໃຊ້ປະໂຫຍດແລະເຮັດໃຫ້ຈຸດອ່ອນເຫຼົ່ານັ້ນເລິກເຊິ່ງຍິ່ງຂຶ້ນ, ໃນຂະນະດຽວກັນ ກໍສຸມຄວາມພະຍາຍາມທັງໝົດ ເພື່ອໂຈມຕີຢ່າງເດັດຂາດໃນການປ່ຽນສະຖານະການຂອງສົງຄາມ, ຍາດເອົາໄຊຊະນະເທື່ອລະກ້າວ ແລະ ກ້າວໄປສູ່ໄຊຊະນະຄັ້ງສຸດທ້າຍ. ລະຫວ່າງການບຸກໂຈມຕີແລະລຸກຮື້ຂຶ້ນຂະໜາດໃຫຍ່ ໃນລະດູບານໃໝ່ປີ 1975 ດ້ວຍຄວາມຍືດຫຍຸ່ນໃນການຄວ້າໂອກາດ, ຄວາມເປັນເຈົ້າການໃນການສ້າງໂອກາດ ແລະການຊຸກຍູ້ໂອກາດ, ກົມການເມືອງສູນກາງແລະຄະນະພັກການທະຫານສູນກາງ ໄດ້ເພີ່ມຄວາມຕັດສິນໃຈທາງຍຸດທະສາດຢ່າງຕໍ່ເນື່ອງ ເພື່ອໃຫ້ທັນຕໍ່ການປ່ຽນແປງຢ່າງວ່ອງໄວໃນສະໜາມຮົບ ແລະ ສ້າງປັດໂຈທີ່ບໍ່ຄາດຄິດ. ເມື່ອປະເຊີນກັບການປ່ຽນແປງຢ່າງວ່ອງໄວ, ແຜນການໃນການປົດປ່ອຍພາກໃຕ້ຈຶງຖືກປັບປ່ຽນຢ່າງຕໍ່ເນື່ອງເພື່ອໃຫ້ສອດຄ່ອງກັບຄວາມເປັນຈິງ. ທ້າຍເດືອນມີນາ 1975, ກົມການເມືອງສູນກາງໄດ້ຕີລາຄາວ່າ: “ສົງຄາມປະຕິວັດຢູ່ພາກໃຕ້ບໍ່ພຽງແຕ່ກ້າວເຂົ້າສູ່ໄລຍະແຫ່ງການພັດທະນາແບບກ້າວກະໂດດເທົ່ານັ້ນ, ຫາກໂອກາດເພື່ອເປີດສາກການບຸກໂຈມຕີແລະລຸກຮື້ຂຶ້ນຂະໜາດໃຫຍ່ໃນໄຊ່ງ່ອນ-ຢາດິ້ງ ກໍໄດ້ສຸກງອມແລ້ວ. ນັບແຕ່ນີ້ເປັນຕົ້ນໄປ, ການສູ້ຮົບຍຸດທະສາດຄັ້ງສຸດທ້າຍຂອງກອງທັບ ແລະປະຊາຊົນຂອງພວກເຮົາໄດ້ເລີ່ມຕົ້ນຂຶ້ນແລ້ວ”(2).
ບົດຮຽນກ່ຽວກັບການເປັນເຈົ້າການ, ຄວາມປະດິດສ້າງ ແລະ ຄວາມສາມາດວິເຄາະສະພາບການຕົວຈິງ, ຄົ້ນພົບກົດເກນ ແລະປະຕິບັດຕາມກົດເກນນັ້ນ ຍັງຄົງມີຄຸນຄ່າໃນແນວທາງປະຕິບັດປະຕິວັດປະຈຸບັນ. ຫຼັງຈາກເກືອບ 40 ປີແຫ່ງການປະຕິບັດກິດຈະການປ່ຽນແປງໃໝ່, ປະເທດໄດ້ບັນລຸຜົນສໍາເລັດຍິ່ງໃຫຍ່ທີ່ມີຄວາມສໍາຄັນທາງປະຫວັດສາດ. ຢ່າງໃດກໍຕາມ, ສະພາບການໂລກ ແລະ ພາກພື້ນພວມຜັນປ່ຽນຢ່າງວ່ອງໄວ ແລະສັບສົນ, ບັນດາອິດທິກຳລັງສັດຕູ, ປະຕິກິລິຍາ ແລະ ສວຍໂອກາດທາງການເມືອງ ຍັງສືບຕໍ່ຊຸກຍູ້ຍຸດທະສາດ “ການຫັນປ່ຽນໂດຍສັນຕິ”, ຊຸກຍູ້ “ການປ່ຽນແປງຕົນເອງ”, “ການຫັນປ່ຽນຕົວເອງ” ຢູ່ພາຍໃນ, “ປົດການເມືອງ” ຂອງກອງທັບ ແລະ ຫັນການທະຫານ “ເປັນພົນລະເຮືອນ”. ດັງນັ້ນ, ວຽກງານພະຍາກອນຍຸດທະສາດ, ການຄົ້ນຄວ້າ ແລະ ຕີລາຄາສະພາບການຢ່າງຖືກຕ້ອງ, ມີຄວາມເຂົ້າໃຈຢ່າງຈະແຈ້ງກ່ຽວກັບຄູ່ຮ່ວມມື ແລະ ເປົ້າໝາຍ ແມ່ນມີຄວາມສຳຄັນເປັນພິເສດ ໃນການໃຫ້ຄຳປຶກສາຢ່າງຖືກຕ້ອງ ແມ່ນຢຳ ວ່ອງໄວ ແລະມີປະສິດທິພາບ ເພື່ອແກ້ໄຂການພົວພັນພາຍໃນປະເທດແລະສາກົນໄດ້ດີ, ຮັບປະກັນຜົນປະໂຫຍດຂອງຊາດ-ປະເທດຊາດ, ປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງ.
ໝູນໃຊ້ບົດຮຽນຈາກປະຫວັດສາດເຂົ້າໃນພາລະກິດການສ້າງສາ ແລະ ປົກປັກຮັກສາປະເທດຊາດ “ຕັ້ງແຕ່ຕົ້ນ, ຈາກໄລຍະໄກ, ຕັ້ງແຕ່ເວລາທີ່ປະເທດຍັງບໍ່ທັນຕົກຢູ່ໃນອັນຕະລາຍ”, ສົມທົບກັບທຸກຂັ້ນແລະຂະແໜງການ, ກອງທັບປະຊາຊົນຫວຽດນາມ ຕ້ອງ “ຍົກສູງຄວາມສາມາດໃນການຄາດຄະເນຍຸດທະສາດ, ຮັກສາທ່າເປັນເຈົ້າການທາງຍຸດທະສາດ; ບໍ່ໃຫ້ຕົກໃນທ່າຮັບ ຫຼືຕົກຕະລຶງໃນທຸກສະຖານະການ”(3).
ທີສາມ, ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ ສົມທົບກັບກຳລັງແຮງຂອງຍຸກສະໄໝ; ປຸກລະດົມຄວາມປາດຖະໜາທີ່ຈະບືນຕົວຂຶ້ນຂອງຊາດຫວຽດນາມ.
ໃນສົງຄາມຕໍ່ຕ້ານຈັກກະພັດອາເມລິກາ, ການບຸກໂຈມຕີແລະລຸກຮື້ຂຶ້ນຂະໜາດໃຫຍ່ໃນລະດູບານໃໝ່ປີ 1975, ດ້ວຍການເສີມຂະຫຍາຍກຳລັງແຮງພາຍໃນເປັນກຳລັງຕົ້ນຕໍ, ສົມທົບກຳລັງແຮງຂອງຊາດເຂົ້າກັບກຳລັງແຮງຂອງຍຸກສະໄໝ, ຫວຽດນາມໄດ້ຮັບໄຊຊະນະຄັ້ງຍິ່ງໃຫຍ່ທີ່ມີຄວາມສຳຄັນທາງປະຫວັດສາດ. ບົນພື້ນຖານການວິເຄາະແລະປະເມີນສະພາບການພາຍໃນປະເທດແລະຕ່າງປະເທດ; ທ່າແຮງແລະກຳລັງຂອງປະເທດແລະຂ້າເສິກ, ໂດຍສະເພາະສະຖານະການຈິງໃນສະໜາມຮົບ, ເດືອນຕຸລາປີ 1974, ກົມການເມືອງສູນກາງໄດ້ຕົກລົງປຸກລະດົມທົ່ວພັກ, ທົ່ວປວງຊົນ ແລະ ທົ່ວກອງທັບທັງພາກໃຕ້ ແລະພາກເໜືອ ເປີດບັ້ນບຸກໂຈມຕີແລະລຸກຮື້ຂຶ້ນຂະໜາດໃຫຍ່ ເພື່ອປົດປ່ອຍພາກໃຕ້ຢ່າງສົມບູນ, ເຕົ້າໂຮມປະເທດເປັນເອກະພາບ ແລະ ເຮັດການປະຕິວັດຊາດປະຊາທິປະໄຕປະຊາຊົນຢ່າງສຳເລັດ. ໜ້າທີ່ຮີບດ່ວນແມ່ນ “ນັບແຕ່ນີ້ໄປ, ເຮົາຕ້ອງດຳເນີນການກຽມການທັງໝົດຢ່າງຮີບດ່ວນ, ສ້າງເງື່ອນໄຂແລະສິ່ງອຳນວຍຄວາມສະດວກທີ່ຄົບຖ້ວນທີ່ສຸດ ເພື່ອໂຈມຕີຢ່າງໜັກ, ໂຈມຕີຢ່າງວ່ອງໄວ, ຊະນະຢ່າງສະອາດ ແລະ ຊະນະຢ່າງສົມບູນ”(4). ກຳລັງແຮງຂອງແນວຫຼັງຍຸດທະສາດໄດ້ຮັບການລະດົມສູງສຸດ ແລະເສີມຂະຫຍາຍປະສິດທິຜົນສູງສຸດ. ດ້ວຍຈິດໃຈ “ທັງໝົດເພື່ອແນວໜ້າ”, “ທັງໝົດເພື່ອໄຊຊະນະ”, ທັງປະເທດໄດ້ທຸ່ມເທຄວາມພະຍາຍາມທັງໝົດໃຫ້ການຮົບຍຸດທະສາດ. ຄະນະກຳມະການກາງສະໜັບສະໜູນພາກໃຕ້ໄດ້ຮັບການຈັດຕັ້ງຂຶ້ນ ໂດຍມີນາຍົກລັດຖະມົນຕີ ຟ້າມວັນດົ່ງ ເປັນປະທານ ດ້ວຍໜ້າທີ່ “ຄິດໄລ່ ແລະ ຕັດສິນໃຈກ່ຽວກັບແຜນນະໂຍບາຍ, ແຜນການ ແລະ ມາດຕະການທີ່ຕັ້ງໜ້າແລະມີປະສິດທິຜົນທີ່ສຸດ ໃນການຊີ້ນຳແລະກວດກາຊຸກຍູ້ຄະນະພັກ, ອຳນາດການປົກຄອງທຸກຂັ້ນ ເພື່ອລະດົມຊັບພະຍາກອນບຸກຄົນ ແລະວັດສະດຸຢ່າງທັນການ ແລະເໝາະສົມ ເພື່ອຕອບສະໜອງຄວາມຕ້ອງການທຸກຢ່າງຂອງພາກໃຕ້ໃນສະພາບການໃໝ່”(5).
ດ້ວຍທັດສະນະທີ່ວ່າ ການປະຕິວັດຫວຽດນາມເປັນສ່ວນໜຶ່ງຂອງການປະຕິວັດໂລກ ແລະ ຍາມໃດກໍເດັດດ່ຽວປະຕິບັດແນວທາງສາມັກຄີສາກົນທີ່ຜ່ອງໃສ, ຍາດແຍ່ງເອົາຄວາມເຫັນອົກເຫັນໃຈ ແລະ ການສະໜັບສະໜູນຂອງປະຊາຊົນທົ່ວໂລກ, ຫວຽດນາມຈຶງໄດ້ຮັບການສະໜັບສະໜູນຢ່າງໃຫຍ່ຫຼວງຈາກກອງກຳລັງປະຊາທິປະໄຕ ແລະ ກ້າວໜ້າໃນໂລກ, ປະຊາຊົນກ້າວໜ້າໃນອາເມລິກາ, ພິເສດແມ່ນຈາກບັນດາປະເທດສັງຄົມນິຍົມອ້າຍນ້ອງ, ປະກອບສ່ວນນຳການບຸກໂຈມຕີແລະລຸກຮື້ຂຶ້ນຂະໜາດໃຫຍ່ ໃນລະດູບານໃໝ່ປີ 1975 ໄປສູ່ໄຊຊະນະຢ່າງສົມບູນ.
ໃນສະພາບການເຊື່ອມໂຍງເຂົ້າກັບສາກົນນັບທີ່ມື້ນັບເລິກເຊິ່ງປະຈຸບັນ, ກຳລັງແຮງຂອງຊາດຕ້ອງຕິດພັນກັບກຳລັງແຮງຂອງຍຸກສະໄໝຢູ່ສະເໝີ, ວຽກງານການເຊື່ອມໂຍງເຂົ້າກັບສາກົນ ແລະ ການທູດດ້ານການປ້ອງກັນປະເທດ ຕ້ອງໄດ້ຮັບການຜັນຂະຫຍາຍຢ່າງຕັ້ງໜ້າ, ເປັນເຈົ້າການ, ສະຫຼາດຄ່ອງແຄ້ວ, ໄຫວພິບ, ແທດຈິງ, ມີປະສິດທິຜົນ, ສ້າງແລວທາງນິລະໄພເພື່ອປົກປັກຮັກສາປະເທດຊາດຕັ້ງແຕ່ຕົ້ນ ແລະຈາກໄລຍະໄກ.
ບັນດາອົງການ, ກົມກອງໃນທົ່ວກອງທັບຕ້ອງສຸມໃສ່ຊາບຊຶມ ແລະ ປະຕິບັດແນວທາງການຕ່າງປະເທດຂອງພັກຢ່າງສະເໝີຕົ້ນສະເໝີປາຍ ດ້ວຍຄຳຂວັນທີ່ວ່າ: ເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ ແລະ ຄວາມຫຼາກຫຼາຍ; ເປັນເຈົ້າການແລະຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງ ແລະ ມີປະສິດທິຜົນ; ຮັກສາສະພາບແວດລ້ອມສັນຕິພາບ, ສະຖຽນລະພາບ, ປັບປຸງທີ່ຕັ້ງ ແລະກຽດສັກສີສາກົນຂອງຫວຽດນາມຢ່າງບໍ່ຢຸດຢັ້ງ(6). ສົ່ງເສີມການທູດສອງຝ່າຍ ແລະ ຍົກສູງລະດັບການທູດຫຼາຍຝ່າຍ; ເປັນເຈົ້າການແລະຕັ້ງໜ້າປະກອບສ່ວນເຂົ້າໃນສັນຕິພາບ, ມິດຕະພາບ, ການຮ່ວມມື ແລະ ການພັດທະນາແບບຍືນຍົງ. ຫວຽດນາມເປັນເພື່ອນ, ເປັນຄູ່ຮ່ວມມືທີ່ໄວ້ໃຈໄດ້, ເປັນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບຂອງປະຊາຄົມສາກົນ; ໃຊ້ປະໂຫຍດຈາກຊັບພະຍາກອນ, ຄວາມເຫັນດີເຫັນພ້ອມ ແລະ ການສະໜັບສະໜູນຂອງປະຊາຄົມໂລກ, ສ້າງສະພາບແວດລ້ອມທີ່ສັນຕິ ແລະເງື່ອນໄຂທີ່ເອື້ອອຳນວຍ ເພື່ອສ້າງສາ ແລະ ປົກປັກຮັກສາປະເທດຊາດ.
ເຂົ້າໃຈຢ່າງເລິກເຊິ່ງທິດທາງຍຸດທະສາດ ແລະ ແຜນນະໂຍບາຍປົກປັກຮັກສາປະເທດຊາດຕັ້ງແຕ່ຕົ້ນ, ຈາກໄລຍະໄກ, “ປົກປ້ອງປະເທດຊາດກ່ອນທີ່ຈະຕົກຢູ່ໃນອັນຕະລາຍ” ດ້ວຍສັນຕິວິທີ. ໃນຂະບວນການຜັນຂະຫຍາຍປະຕິບັດ ຕ້ອງສືບຕໍ່ປະຕິບັດຄຳຂວັນ “ຕັ້ງໜ້າ, ເປັນເຈົ້າການ, ແນ່ນອນ, ໄຫວພິບ, ມີປະສິດທິຜົນ”, ຕາມປັດຊະຍາການທູດແບບ “ໄມ້ໄຜ່ຫວຽດນາມ”; ພ້ອມກັນນັ້ນ, ຕ້ອງມີຄວາມສ້ຽມແຫຼມໃນການກວດຈັບ, ປ້ອງກັນ ແລະ ຂະຈັດຄວາມສ່ຽງຂອງການປະເຊີນໜ້າ, ການປະທະກັນ ແລະ ສົງຄາມຢ່າງທັນທ່ວງທີ. ປະຕິບັດຄຳຂວັນວ່າດ້ວຍການທັງຮ່ວມມື ແລະ ການຕໍ່ສູ້ຢ່າງສະເໝີຕົ້ນສະເໝີປາຍ; ຍຶດໝັ້ນແລະຕັ້ງໝັ້ນໃນຫຼັກການຍຸດທະສາດ; ໄຫວພິບແລະຍືດຫຍຸ່ນໃນຍຸດໂທບາຍ, ເຮັດໃຫ້ການທູດດ້ານການປ້ອງກັນປະເທດເປັນເຄື່ອງມືທີ່ມີປະສິດທິຜົນ ແລະເປັນຊ່ອງທາງການທູດທີ່ສຳຄັນ ຂອງການຕ່າງປະເທດຂອງພັກ ແລະ ການທູດຂອງລັດ.ພັດທະນາການພົວພັນຮ່ວມມືດ້ານການປ້ອງກັນຊາດກັບທຸກປະເທດ, ໂດຍສະເພາະແມ່ນປະເທດເພື່ອນບ້ານ, ບັນດາປະເທດໃນອາຊຽນ, ບັນດາປະເທດໃຫຍ່, ບັນດານປະເທດຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ປະເທດເພື່ອນມິດດັ້ງເດີມ, ສ້າງຄວາມໄວ້ວາງໃຈ, ສ້າງການສະໜັບສະໜູນ ແລະຊ່ວຍເຫຼືອສາກົນ ເພື່ອປ້ອງກັນຄວາມສ່ຽງຈາກສົງຄາມ; ບົນພື້ນຖານຂອງການຍຶດໝັ້ນແຜນນະໂຍບາຍການປ້ອງກັນປະເທດແບບ “ສີ່ບໍ່” ຢ່າງໝັ້ນຄົງ, ສ້າງສົມດຸນຍຸດທະສາດໃນການພົວພັນກັບຄູ່ຮ່ວມມື, ຕອບສະໜອງເປົ້າໝາຍຍຸດທະສາດ ແລະ ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ໂດຍອີງໃສ່ບັນດາຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ. ພ້ອມກັນນັ້ນ, ໃຊ້ປະໂຫຍດສູງສຸດຈາກຊັບພະຍາກອນພາຍນອກ ເພື່ອເພີ່ມທະວີທ່າແຮງດ້ານການປ້ອງກັນປະເທດ; ຂະຫຍາຍຄູ່ຮ່ວມມືທີ່ຫຼາກຫຼາາຍເພື່ອຊຸກຍູ້ການຮ່ວມມືໃນການພັດທະນາອຸດສາຫະກຳປ້ອງກັນປະເທດ ແລະເຕັກໂລຊີທາງການທະຫານ, ຄວບຄູ່ໄປກັບການປະກອບອາວຸດແລະອຸປະກອນໃໝ່ແລະທັນສະໄໝ ແລະ ເຊື່ອມໂຍງກັບການຖ່າຍທອດເຕັກໂນໂລຊີ ໂດຍສະເພາະເຕັກໂນໂລບີໃໝ່ແລະທັນສະໄໝ. ເປັນເຈົ້າການໃນການເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ; ເພີ່ມທະວີການແລກປ່ຽນຄະນະຜູ້ແທນການທະຫານທຸກຂັ້ນ; ການສົນທະນາກ່ຽວກັບນະໂຍບາຍການປ້ອງກັນປະເທດລະດັບສູງ; ເຂົ້າຮ່ວມບັນດາເວທີປາໄສສາກົນ ແລະພາກພື້ນ..., ເພື່ອເພີ່ມທະວີມິດຕະພາບ, ຄວາມເຂົ້າໃຈເຊິ່ງກັນແລະກັນ, ສ້າງຄວາມໄວ້ວາງໃຈຍຸດທະສາດ ແລະ ປ້ອງກັນຄວາມຂັດແຍ່ງ, ປະກອບສ່ວນປັບປຸງຍົກສູງທີ່ຕັ້ງ ແລະກຽດສັກສີຂອງຊາດ ແລະ ກອງທັບໃນເວທີສາກົນ.
ທີສີ່, ສຸມໃສ່ກໍ່ສ້າງກອງທັບປະຊາຊົນຫວຽດນາມທີ່ຍອດຍ້ຽມ, ກະທັດລັດ, ແຂງແຮງ, ໝັ້ນຄົງເຂັ້ມແຂງທາງການເມືອງ, ແນວຄິດ ແລະການຈັດຕັ້ງ; ມີຄຸນນະພາບສັງລວມແລະກຳລັງແຮງສູ້ຮົບສູງ.
ໃນປະຫວັດສາດການປ້ອງກັນປະເທດຂອງປະຊາຊົນຫວຽດນາມ, ບໍ່ມີການເຕົ້າໂຮມທາງທະຫານຄັ້ງໃດທີ່ມີຄວາມສຳຄັນຍິ່ງໃຫຍ່ເທົ່າກັບບັ້ນຮົບໂຮ່ຈີມິນ. ໂດຍປະຕິບັດຕາມເຈດຈຳນົງແລະຄວາມຕັດສິນໃຈຂອງທົ່ວພັກ, ທົ່ວປວງຊົນ ແລະ ທົ່ວກອງທັບ, ໃນໄລຍະເວລາສັ້ນໆ, ກອງກຳລັງທະຫານຂະໜາດໃຫຍ່ທີ່ບໍ່ເຄີຍມີມາກ່ອນໄດ້ເຕົ້າໂຮມກັນ ແລະ ກໍ່ຕົວເປັນກ້ອນກຳລັງທີ່ເໜືອກວ່າ, ພ້ອມທີ່ຈະທຳລາຍແລະສະຫຼາຍກຸ່ມປ້ອງທີ່ໃຫຍ່ທີ່ສຸດຂອງສັດຕູທີ່ສຳນັກງານໃຫຍ່ຂອງພວກເຂົາ.
ພາຍຫຼັງຈາກການກໍ່ສ້າງ, ສູ້ຮົບ ແລະ ເຕີບໃຫຍ່ມານານກວ່າ 80, ກອງທັບປະຊາຊົນຫວຽດນາມໄດ້ສະແດງໃຫ້ເຫັນຢ່າງຈະແຈ້ງເຖິງທາດແທ້ແລະມູນເຊື້ອ ຂອງກອງທັບປະຕິວັດທີ່ເກີດຈາກປະຊາຊົນ ແລະ ຕໍ່ສູ້ເພື່ອປະຊາຊົນ; ເປັນກຳລັງການເມືອງ, ກຳລັງການຕໍ່ສູ້ທີ່ຈົງຮັກພັກດີ ແລະເຊື່ອຖືໄດ້ຢ່າງແທ້ຈິງຕໍ່ພັກ, ລັດ ແລະ ປະຊາຊົນ. ໃນທຸກເງື່ອນໄຂແລະສະຖານະການ, ກອງທັບຂອງພວກເຮົາ ຍາມໃດກໍ່ສາມັກຄີ ແລະໃກ້ຊິດຕິດແທດກັບປະຊາຊົນ, ເຊີດຊູຈິດໃຈສະຕິປັນຍາ, ຄວາມກ້າຫານ, ເດັດດ່ຽວຕໍ່ສູ້ ແລະເອົາຊະນະ, ເຮັດສຳເລັດເປັນຢ່າງດີທຸກໜ້າທີ່ທີ່ພັກ, ລັດ ແລະ ປະຊາຊົນມອບໝາຍໃຫ້, ສົມກັບນາມມະຍົດອັນສູງສົ່ງ “ທະຫານລຸງໂຮ່”, ເຊິ່ງເປັນກອງທັບວິລະກຳຂອງຊາດຫວຽດນາມວິລະຊົນ.
ຕໍ່ໜ້າຄວາມຕ້ອງການແລະໜ້າທີ່ກໍ່ສ້າງ ແລະ ປົກປັກຮັກສາປະເທດຊາດໃນສະພາບການໃໝ່, ພັກ, ລັດ ແລະ ປະຊາຊົນ ຍາມໃດກໍ່ເອົາໃຈໃສ່, ເບິ່ງແຍງດູແລການກໍ່ສ້າງກອງກຳລັງປະກອບອາວຸດເວົ້າລວມ, ກອງທັບປະຊາຊົນຫວຽດນາມເວົ້າສະເພາະ ໃຫ້ມີຄວາມໝັ້ນຄົງເຂັ້ມແຂງໃນທຸກດ້ານ, ມີຄຸນນະພາບສັງລວມ ແລະ ມີກຳລັງແຮງສູ້ຮົບສູງ, ພ້ອມແລ້ວທີ່ຈະຮັບແລະປະຕິບັດສຳເລັດທຸກໜ້າທີ່ທີ່ໄດ້ຮັບມອບໝາຍ. ກອງທັບບໍ່ພຽງແຕ່ປະຕິບັດສຳເລັດພາລະບົດບາດ ແລະໜ້າທີ່ ຂອງກອງທັບສູ້ຮົບເທົ່ານັ້ນ, ຫາກຍັງປະຕິບັດໜ້າທີ່ຂອງກອງທັບເຮັດວຽກ, ກອງທັບອອກແຮງງານເພີ່ມພູນຜະລິດຜົນ ໄດ້ເປັນຢ່າງດີ, ປະກອບສ່ວນສ້າງສາປະເທດ, ຍົກສູງພາບພົດ, ບົດບາດທີ່ຕັ້ງ ແລະ ກຽດສັກສີຂອງຫວຽດນາມໃນເວທີສາກົນ.
ໃນພາລະກິດສ້າງສາ ແລະ ປົກປັກຮັກສາປະເທດຊາດ, ຕ້ອງເອົາໃຈໃສ່ເປັນພິເສດເຖິງວຽກງານກໍ່ສ້າງກຳລັງປະກອບອາວຸດ 3 ປະເທດທີ່ສົມດູນ ແລະຄົບຊຸດ; ກໍ່ສ້າງກອງທັບປະຊາຊົນຫວຽດນາມທີ່ປະຕິວັດ, ເປັນລະບຽບຫຼວງ, ຊຳນານການຮົບ, ກ້າວສູ່ທັນສະໄໝ ໂດຍມີຄຸນນະພາບສັງລວມ ແລະ ກຳລັງແຮງສູ້ຮົບສູງ, ກ່ອນອື່ນໝົດແມ່ນຕ້ອງມີຄວາມໝັ້ນຄົງເຂັ້ມແຂງທາງການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ, ຮັບປະກັນໃຫ້ກອງທັບເປັນກຳລັງທາງການເມືອງທີ່ແທ້ຈິງ, ເປັນກຳລັງຮົບທີ່ຈົງຮັກພັກດີແລະໄວ້ວາງໃຈໄດ້ຢ່າງແທ້ຈິງຕໍ່ພັກ, ລັດ ແລະ ປະຊາຊົນ ແລະ ເປັນກຳລັງຫຼັກໃນພາລະກິດປົກປັກຮັກສາປະເທດຊາດສັງຄົມນິຍົມຫວຽດນາມ.
ທີຫ້າ, ການກໍ່ສ້າງແລະເສີມຂະຫຍາຍປັດໄຈດ້ານການເມືອງແລະຈິດໃຈ ແມ່ນແຫຼ່ງກຳເນີດຂອງຈິດໃຈແຫ່ງຄວາມຕັດສິນໃຈຕໍ່ສູ້ ແລະເອົາຊະນະ.
ໄຊຊະນະອັນຍິ່ງໃຫຍ່ໃນລະດູບານໃໝ່ປີ 1975 ແມ່ນໄຊຊະນະແຫ່ງຄວາມກ້າຫານ, ກຳລັງແຮງ ແລະສະຕິປັນຍາຂອງຫວຽດນາມ, ໄຊຊະນະຂອງສົງຄາມປະຊາຊົນຫວຽດນາມ, ໃນນັ້ນກຳລັງແຮງທາງດ້ານການເມືອງ ແລະຈິດໃຈແມ່ນປັດໄຈພື້ນຖານທີ່ສຳຄັນແລະຊີ້ຂາດ. ພາຍໃຕ້ການນຳພາຂອງພັກ, ຄະນະພັກ, ອົງການຈັດຕັ້ງພັກ, ພະນັກງານການເມືອງ, ຜູ້ບັນຊາການທຸກຂັ້ນ ໄດ້ມີມາດຕະການສຶກສາອົບຮົມ, ລະດົມຈິດໃຈ ແລະແນວຄິດ, ສົມທົບກັບການແກ້ໄຂຄວາມຫຍຸ້ງຍາກໃຫ້ແກ່ທະຫານ. ຜ່ານການຊາບຊຶມແລະຮຽນຮູ້ຢ່າງເລິກເຊິ່ງ, ພະນັກງານ, ນັກຮົບ ແລະ ປະຊາຊົນໄດ້ຍຶດໝັ້ນໃນຈຸດໝາຍເອກະລາດແຫ່ງຊາດ, ເຂົ້າໃຈຢ່າງຈະແຈ້ງເຖິງຈຸດດີ, ຄວາມຫຍຸ້ງຍາກ; ດ້ວຍເຫດນີ້, ສ້າງເຈດຈຳນົງກ້າຕໍ່ສູ້, ຕັດສິນໃຈຕໍ່ສູ້ແລະເອົາຊະນະ, ດ້ວຍບັນດາມາດຕະການ ແລະ ວິທີການສ້າງສັນ ແລະແທດຈິງ. ຈິດສຳນຶກປະຕິບັດຕາມລະບຽບວິໄນ, ຄວາມຕັດສິນໃຈຕໍ່ສູ້ແລະເອົາຊະນະໄດ້ຮັບການເພີ່ມທະວີຢ່າງຕໍ່ເນື່ອງ ເຮັດໃຫ້ເກີດຄວາມໄດ້ປຽບຢ່າງແທ້ຈິງໃນດ້ານກຳລັງແຮງທາງການເມືອງ ແລະຈິດວິນຍານຕະຫຼອດສົງຄາມຕໍ່ຕ້ານ ໂດຍສະເພາະ ໃນຈຸດປ່ຽນທີ່ມີຄວາມໝາຍຍຸດທະສາດ, ໃນນັ້ນມີການບຸກໂຈມຕີແລະລຸກຮື້ຂຶ້ນຂະໜາດໃຫຍ່ໃນລະດູບານໃໝ່ປີ 1975 ເຊິ່ງສາມາດປົດປ່ອຍພາກໃຕ້ໄດ້ຢ່າງສົມບູນ ແລະ ທ້ອນໂຮມປະເທດຊາດເປັນເອກະພາບ.
ຈາກບົດຮຽນຂອງໄຊຊະນະອັນຍິ່ງໃຫຍ່ໃນລະດູບານໃໝ່ປີ 1975 ສາມາດເຫັນໄດ້ຊັດເຈນວ່າ ຕ້ອງສືບຕໍ່ຜັນຂະຫຍາຍການລະດົມ ແລະ ເສີມຂະຫຍາຍປັດໄຈທາງການເມືອງແລະຈິດໃຈ ໃນສະຖານະການໃໝ່ ຢ່າງມີປະສິດທິຜົນ. ໃນນັ້ນ, ເອົາໃຈໃສ່ເປັນພິເສດເຖິງການຊີ້ນຳ ນຳພາການຍົກສູງຄຸນນະພາບການສຶກສາດ້ານການເມືອງ, ແນວຄິດ ເພື່ອຮັບປະກັນໃຫ້ກອງທັບຍາມໃດກໍ່ຮັກສາທາດແທ້ຊົນຊັ້ນກຳມະກອນ, ຕັ້ງໝັ້ນໃນເປົ້າໝາຍເອກະລາດແຫ່ງຊາດ ແລະ ລັດທິສັງຄົມນິຍົມ, ຈົງຮັກພັກດີຢ່າງສົມບູນຕໍ່ປະເທດຊາດ, ຕໍ່ພັກ, ລັດ ແລະ ປະຊາຊົນ. ກ່ອນອື່ນໝົດ, ຕ້ອງຊີ້ນຳນຳພາປະຕິບັດຄຳສັ່ງເລກທີ 2423-CT/QUTW, ລົງວັນທີ 9 ພະຈິກ 2023 ຂອງຄະນະປະຈຳຄະນະພັກການທະຫານສູນກາງ “ກ່ຽວກັບການປ່ຽນແປງໃໝ່, ຍົກສູງຄຸນນະພາບວຽກງານອົບຮົມສຶກສາການເມືອງໃນໄລຍະໃໝ່” ໂດຍສຸມໃສ່ກໍ່ສ້າງຄວາມກ້າຫານທາງການເມືອງ, ຄຸນສົມບັດສິນທຳ ແລະ ວິຖີຊີວິດໃຫ້ພະນັກງານ ແລະ ນັກຮົບ, ເພື່ອເປັນພື້ນຖານໃນການສ້າງກອງທັບທີ່ໝັ້ນຄົງເຂັ້ມແຂງ ແລະ ຊ່ຽວຊານດ້ານການເມືອງ, ຍົກສູງຄຸນນະພາບສັງລວມ ແລະ ກຳລັງແຮງສູ້ຮົບຂອງກອງທັບ.
ຕ້ອງເປັນເຈົ້າການໃນການຕໍ່ສູ້, ຫັກລ້າງທັດສະນະທີ່ຜິດພາດແລະເປັນສັດຕູ; ປ້ອງກັນແລະຕ້ານປະກົດການຂອງຄວາມເສື່ອມຖອຍທາງການເມືອງແນວຄິດ, “ການປ່ຽນແປງຕົນເອງ” ແລະ “ການຫັນປ່ຽນຕົນເອງ” ຢ່າງມີປະສິດທິຜົນ; ຕໍ່ສູ້ເພື່ອຜາບແພ້ແຜນການ ແລະ ກົນອຸບາຍຂອງສັດຕູ ທີ່ຈະດຳເນີນການ “ຫັນປ່ຽນໂດຍສັນຕິ”, “ປົດການເມືອງ” ຂອງກອງທັບ, ຫັນການທະຫານ “ເປັນພົນລະເຮືອນ”, ຮັກສາສະໜາມຮົບທາງດ້ານແນວຄິດຂອງພັກໃນກອງທັບ; ປະກອບສ່ວນປົກປັກຮັກສາ ແລະ ພັດທະນາລັດທິມາກ-ເລນິນ, ແນວຄິດໂຮ່ຈີມິນ, ແນວທາງ ແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດຢ່າງປະດິດສ້າງ; ຜາບແພ້ທຸກແຜນການແລະກົນອຸບາຍຂອງອິດທິກຳລັງສັດຕູ, ປະຕິກິລິຍາ, ສວຍໂອກາດທາງການເມືອງ ທີ່ແບ່ງແຍກພັກ, ລັດ, ກອງທັບ ແລະ ປະຊາຊົນ.
----------------------------------------
(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 160
(2) ເອກະສານຄົບຊຸດຂອງພັກ, ສພຈ. ການເມືອງແຫ່ງຊາດ, ຮ່າໂນ້ຍ, 2004, ເຫຼັ້ມ 36, ໜ້າ 95
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 159
(4) ເອກະສານຄົບຊຸດຂອງພັກ, ປຶ້ມທີ່ໄດ້ແນະນຳ, ເຫຼັ້ມ 35, ໜ້າ 185
(5) ເອກະສານຄົບຊຸດຂອງພັກ, ປຶ້ມທີ່ໄດ້ແນະນຳ, ເຫຼັ້ມ 36, ໜ້າ 82-83
(6) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 331–332
