ປຶກສາຫາລືເພີ່ມເຕີມກ່ຽວກັບບົດບາດຂອງວັດທະນະທໍາ
ຈາກທັດສະນະຂອງລະບົບແຮງຜັກດັນພາຍໃນ ແລະ
ລະບົບການດັດປັບການພັດທະນາທີ່ກົມກຽວ
ຈາກທັດສະນະຂອງລະບົບແຮງຜັກດັນພາຍໃນ ແລະ
ລະບົບການດັດປັບການພັດທະນາທີ່ກົມກຽວ
1- ບັນດາເນື້ອໃນທີ່ສຳຄັນກ່ຽວກັບວັດທະນະທຳບໍ່ພຽງແຕ່ມີຢູ່ໃນພາກທີ 7 ຂອງລາຍງານການເມືອງທີ່ສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມເທົ່ານັ້ນ, ແຕ່ຍັງໄດ້ນໍາສະເໜີເປັນອົງປະກອບທີ່ສໍາຄັນ ໃນພາກສ່ວນອື່ນໆ ຂອງເອກະສານກອງປະຊຸມໃຫຍ່ຄັ້ງທີ 13, ຕັ້ງແຕ່ເສດຖະກິດ ຈົນເຖິງການກໍ່ສ້າງແລະ ປັບປຸງພັກ; ຕັ້ງແຕ່ແຜນຍຸດທະສາຮອດປີ 2030, ວິໄສທັດຮອດປີ 2045 ຈົນເຖິງໜ້າທີ່ຂອງແຜນການ 5 ປີ (2021-2025). ສິ່ງດັ່ງກ່າວ ບໍ່ພຽງແຕ່ສະແດງອອກໃນ 5 ປີທີ່ຈະມາເຖິງ ໃນໂຄງປະກອບຮູບການຂອງເອກະສານ, ແຕ່ຍັງສະແດງໃຫ້ເຫັນເຖິງຄວາມສອດຄ່ອງຂອງທັດສະນະຂອງພັກກອມມູນິດຫວຽດນາມ ດ້ວຍຈິນຕະນາການທີ່ເລິກເຊິ່ງກ່ຽວກັບວັດທະນະທຳ: “ເຮັດໃຫ້ວັດທະນະທຳຊຶມເລິກເຂົ້າໄປໃນຊີວິດ ແລະ ການເຄື່ອນໄຫວສັງຄົມທັງໝົດ, ໃນແຕ່ລະຄົນ, ແຕ່ລະຄອບຄົວ, ແຕ່ລະກຸ່ມແລະຊຸມຊົນ, ແຕ່ລະພື້ນທີ່ທີ່ຢູ່ອາໄສ, ເຂົ້າໃນທຸກຂົງເຂດການດຳລົງຊີວິດ ແລະ ການພົວພັນຂອງມະນຸດ”(1)... ໝາຍຄວາມວ່າ, ວັດທະນະທຳເປັນຕົວມັນເອງດ້ວຍຜະລິດຕະພັນທີ່ອຸດົມສົມບູນ ຫຼາກຫຼາຍ ແລະ ມີສີສັນ, ທັງເປັນປັດໄຈຢູ່ໃນທຸກດ້ານຂອງຊີວິດມະນຸດ, ກຳນົດລະດັບການພັດທະນາ ແລະ ຄຸນນະພາບ, ຄຸນຄ່າ ຂອງມະນຸດ ແລະ ຂອງຊີວິດສັງຄົມທັງໝົດ. ຈາກນັ້ນ, ຕ້ອງເຮັດໃຫ້ຄວາມຕ້ອງການ ແລະ ມາດຕະຖານວັດທະນະທຳ ເປັນປັດໄຈພາຍໃນ, ມີບົດບາດສຳຄັນເປັນພິເສດຂອງການພັດທະນາ. ຄວາມແປກໃໝ່ຂອງເອກະສານກອງປະຊຸມໃຫຍ່ຄັ້ງທີ 13 ຂອງພັກແມ່ນ ມີການກ່າວເຖິງວັດທະນະທຳທັງທາງກົງ ແລະ ທາງອ້ອມ ໃນເກືອບທັງໝົດ 12 ທິດທາງການພັດທະນາຂອງປະເທດໃນໄລຍະປີ 2021-2030, ໃນນັ້ນ, ທິດທາງທີສີ່ໄດ້ເນັ້ນໜັກບົດບາດຂອງວັດທະນະທຳ, ຜູ້ຄົນຫວຽດນາມແມ່ນກຳລັງແຮງພາຍໃນ, ແຮງຜັກດັນການພັດທະນາທີ່ສຳຄັນທີ່ສຸດ ຂອງປະເທດ: “ພັດທະນາຜູ້ຄົນຢ່າງຮອບດ້ານ ແລະ ກໍ່ສ້າງວັດທະນະທຳຫວຽດນາມທີ່ກ້າວໜ້າ, ເຂັ້ມຂົ້ນໄປດ້ວຍເອກະລັກຂອງຊາດ ເພື່ອໃຫ້ວັດທະນະທຳ, ຜູ້ຄົນຫວຽດນາມກາຍເປັນ ກຳລັງແຮງພາຍໃນ, ແຮງຜັກດັນການພັດທະນາປະເທດຢ່າງແທ້ຈິງ ແລະ ປົກປັກຮັກສາປະເທດຊາດ... ຄວາມເກັ່ງກ້າສາມາດ, ສະຕິປັນຍາ ແລະ ຄຸນນະພາບຂອງຊາວຫວຽດນາມແມ່ນຈຸດໃຈກາງ, ເປົ້າໝາຍ ແລະ ແຮງຜັກດັນການພັດທະນາທີສຳຄັນທີ່ສຸດ ຂອງປະເທດຊາດ”(2).
ຈັ່ງຊັ້ນ, ເນື້ອໃນຂອງແຮງຜັກດັນນີ້ແມ່ນຫຍັງ? ສັງເກດຈາກພຶດຕິກຳຕົວຈິງ,ແຮງຜັກດັນນີ້ແມ່ນກຳລັງແຮງ (ຕົ້ນຕໍແມ່ນກຳລັງແຮງທາງຈິດໃຈ), ແຕ່, ແຮງຜັກດັນນີ້ຍັງຢູ່ໃນຮູບແບບທີ່ແຝງ, ຕ້ອງ “ກະຕຸ້ນ” ຈຶ່ງຈະສາມາດປ່ຽນເປັນພະລັງງານທາງວັດຖຸໄດ້. ປະສົບການປະຕິບັດຕົວຈິງທີ່ລ້ຳຄ່າທີ່ສຸດຂອງການປະຕິວັດເດືອນສິງຫາປີ 1945, ຂອງຊຸມປີແຫ່ງການຕໍ່ສູ້ຕ້ານລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາ, ແລະໄລຍະການປ່ຽນໃໝ່ຂອງປະເທດ ໄດ້ມອບບົດຮຽນໃຫ້ຫວຽດນາມກ່ຽວກັບພອນສະຫວັນ ແລະ ຄວາມສາມາດໃນການ “ກະຕູ້ນ” ແຮງຜັກດັນທາງວັດທະນະທຳຂອງລຸງໂຮ່ ແລະ ພັກ. ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມຊີ້ແຈງວ່າ: “ແຮງຜັກດັນ ແລະ ແຫຼ່ງພະລັງການພັດທະນາສຳຄັນທີ່ສຸດຂອງປະເທດແມ່ນ ປຸກລະດົມຢ່າງແຂງແຮງນ້ຳໃຈຮັກຊາດ, ເຈດຈຳນົງເປັນເຈົ້າຕົນເອງຂອງຊາດ, ກຳລັງແຮງແຫ່ງມະຫາສາມັກຄີປວງຊົນທັງຊາດ ແລະ ຄວາມປາດຖະໜາອັນແຮງກ້າໃນການພັດທະນາປະເທດໃຫ້ຈະເລີນຮຸ່ງເຮືອງ ແລະ ມີຄວາມຜາສຸກ”(3). ສີ່ປັດໄຈຄື: ນ້ຳໃຈຮັກຊາດ, ເຈດຈຳນົງເປັນເຈົ້າຕົນເອງຂອງຊາດ, ກຳລັງແຮງແຫ່ງມະຫາສາມັກຄີປວງຊົນທັງຊາດ ແລະ ຄວາມປາດຖະໜາອັນແຮງກ້າໃນການພັດທະນາປະເທດ ລ້ວນແຕ່ແມ່ນຄຸນຄ່າວັດທະນະທຳມູນເຊື້ອອັນລ້ຳຄ່າ, ຍາວນານຂອງຊາດ ແລະ ກໍ່ແມ່ນບັນດາຄຸນຄ່າວັດທະນະທຳຫຼັກໃນລະບົບຄຸນຄ່າວັດທະນະທຳ, ລະບົບແຮງຜັກດັນທີ່ສ້າງໂດຍວັດທະນະທຳຫວຽດນາມ. ນີ້ແມ່ນຈຸດເນັ້ນຢ້ຳ ແລະ ແນວຄິດທີ່ສໍາຄັນທີ່ສຸດ ຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ, ກາຍເປັນແຮງບັນດານໃຈໃໝ່ອັນແຮງກ້າ ແລະ ເປັນຄວາມຫວັງອັນຍິ່ງໃຫຍ່ ຂອງພັກແລະທົ່ວປວງຊົນ. ຖ້າປັດໄຈເຫຼົ່ານີ້ບໍ່ສາມາດກະຕູ້ນໄດ້ ແລະ ຄວາມປາດຖະໜາຂອງປະຊາຊົນໃນການພັດທະນາປະເທດບໍ່ສາມາດສົ່ງເສີມໄດ້ ເປົ້າໝາຍ “ເຖິງປີ 2045 ປະເທດຂອງພວກເຮົາຈະກາຍເປັນປະເທດທີ່ພັດທະນາແລ້ວແລະມີລາຍໄດ້ສູງ” ຈະປະສົບບັນຫາຫຍຸ້ງຍາກຫຼາຍຢ່າງ. ກໍາລັງຕົ້ນຕໍເພື່ອປະຕິບັດເປົ້າໝາຍນັ້ນແມ່ນທົ່ວພັກ, ທົ່ວປວງຊົນ, ທົ່ວກອງທັບ; ແຕ່, ຄົນຮຸ່ນທີ່ມີຄວາມຮັບຜິດຊອບນີ້ ແລະ ຈະຜ່ານ 25 ປີຂ້າງໜ້າ (2021-2045) ແມ່ນຄົນທີ່ມີອາຍຸລະຫວ່າງ 15 ເຖິງ 45 ປີໃນປະຈຸບັນ! ໝາຍຄວາມວ່າ ຕັ້ງແຕ່ເວລານີ້, ໃນເດືອນທໍາອິດຂອງການປະຕິບັດເປົ້າໝາຍຂ້າງເທິງ, ພັກກອມມູນິດຫວຽດນາມ ແລະ ລະບົບການເມືອງຕ້ອງມີບັນດາບາດກ້າວບຸກທະລຸ, “ການໝູນໃຊ້”, ວິທີແກ້ໄຂທີ່ປະດິດສ້າງ, ໄຫວພິບ, ຄົບຊຸດ ແລະ ມີປະສິດທິຜົນໃນໄລຍະຍາວ ເພື່ອປົດລັອກ ແລະ ປຸກລະດົມບັນດາອັດຕະພາບທີ່ສຳຄັນຂອງບັນດາແຮງຜັກດັນດັ່ງກ່າວ, ໂດຍສະເພາະຮຸ່ນໜຸ່ມ.
ວັດທະນະທຳແມ່ນແຮງຜັກດັນທີ່ສຳຄັນຂອງການພັດທະນາແບບຍືນຍົງ, ການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີຕ້ອງກາຍເປັນບັນດາປັດໄຈທີ່ສ້າງເນື້ອໃນຂອງແຮງຜັກດັນນັ້ນໂດຍກົງ, ເພາະວ່າ, ອີງຕາມຄໍານິຍາມຂອງວັດທະນະທໍາທີ່ຍອມຮັບກັນຫຼາຍທີ່ສຸດໃນລະດັບທີ່ກວ້າງຂວາງທີ່ສຸດນັ້ນ, ການສຶກສາແລະຝຶກອົບຮົມ, ວິທະຍາສາດແອລະເຕັກໂນໂລຊີເປັນຂອງວັດທະນະທຳ, ແມ່ນວັດທະນະທຳ. ມະຕິກອງປະຊຸມສູນກາງຄັ້ງທີ 5 ສະໄໝທີ 8 ຂອງພັກ “ກ່ຽວກັບການກໍ່ສ້າງແລະພັດທະນາພື້ນຖານວັດທະນະທຳຫວຽດນາມທີ່ກ້າວໜ້າ ແລະ ເຂັ້ມຂົ້ນໄປດ້ວຍເອກະລັກຂອງຊາດ” ໄດ້ກຳນົດເລື່ອງນີ້. ຕໍ່ມາ, ຍ້ອນຄວາມສຳຄັນຂອງມັນ, ມັນໄດ້ຮັບການຢືນຢັນວ່າແມ່ນ “ນະໂຍບາຍລະດັບຊາດອັນດັບໜຶ່ງ”, ການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີຈຶ່ງໄດ້ແຍກອອກເພື່ອປຶກສາຫາລືຢ່າງເລິກເຊິ່ງ, ກ້ວາງຂວາງ ແລະ ຮອບດ້ານ. ຮັບຮູ້ເນື້ອໃນຂອງວັດທະນະທໍາໃນຄວາມໝາຍທົ່ວໄປ ແລະ ກວ້າງຂວາງທີ່ສຸດ, ເອກະສານກອງປະຊຸມໃຫຍ່ຄັ້ງທີ 13 ຂອງພັກໄດ້ເນັ້ນໜັກໄປພ້ອມກັນ ແລະ ເຊື່ອມໂຍງບັນດາເນື້ອໃນເປັນວະລີທີ່ກຳນົດຄວາມກ້າວໜ້າຍຸດທະສາດໃນຍຸກໃໝ່: “ສືບຕໍ່ພັດທະນາຢ່າງຮອບດ້ານຊັບພະຍາກອນມະນຸດ, ວິທະຍາສາດ, ເຕັກໂນໂລຊີ, ການປ່ຽນແປງໃໝ່ປະດິດສ້າງ ຕິດພັນກັບການປຸກຕື່ນຄວາມປາດຖະໜາພັດທະນາປະເທດ, ຄວາມທະນົງໃຈຂອງຊາດ, ເຈດຈຳນົງເປັນເຈົ້າຕົນເອງຂອງຊາດ ແລະ ເສີມຂະຫຍາຍຄຸນຄ່າວັດທະນະທຳ ແລະ ຜູ້ຄົນຫວຽດນາມ”(4).
ຖ້າເບິ່ງຈາກຄວາມສຳພັນລະຫວ່າງການສືບທອດ ແລະ ການພັດທະນາ, ໃນກອງປະຊຸມໃຫຍ່ຄັ້ງທີ 13 ຂອງພັກ, ເນື້ອໃນການພັດທະນາທິດສະດີ ແລະ ສະຫຼຸບສັງລວມພາກປະຕິບັດການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີ ໄດ້ສະແດງໃຫ້ເຫັນເຖິງການກ້າວກະໂດດທີ່ສຸດ. ພຶດຕິກຳຕົວຈິງໃນຫຼາຍປີທີ່ຜ່ານມາໃຫ້ເຫັນວ່າ, ສອງຂົງເຂດ ການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີ ຍັງບໍ່ທັນກາຍເປັນcແຮງຜັກດັນຫຼັກທີ່ຊຸກຍູ້ການພັດທະນາເສດຖະກິດ - ສັງຄົມ. ສະຖານະການນັ້ນຕ້ອງໄດ້ຮັບການແກ້ໄຂ, ດັ່ງນັ້ນ, ໃນກອງປະຊຸມໃຫຍ່ຄັ້ງທີ 13, ພັກໄດ້ຢືນຢັນວ່າ “ຕ້ອງສ້າງສະຖາບັນແລະນະໂຍບາຍຢ່າງຄົບຊຸດ ເພື່ອປະຕິບັດນະໂຍບາຍການສຶກສາແລະຝຶກອົບຮົມຢ່າງມີປະສິດທິຜົນ ດ້ວຍວິທະຍາສາດແລະເຕັກໂນໂລຢີ ເປັນນະໂຍບາຍລະດັບຊາດອັນດັບໜຶ່ງ, ເປັນແຮງຜັກດັນຫຼັກ ເພື່ອພັດທະນາປະເທດ”(5). ມີຄວາມຕ້ອງການສອງປະການທີ່ໄດ້ວາງອອກມາ ແລະ ໄດ້ເນັ້ນໜັກຫຼາຍເທື່ອຄື ຊັບພະຍາກອນບຸກຄົນຄຸນນະພາບສູງ ແລະ ການຝຶກອົບຮົມແລະນຳໃຊ້ຜູ້ທີ່ມີຄວາມເກັ່ງກ້າສາມາດ. ເມື່ອປະເມີນຢ່າງພາວະວິໄສແລ້ວ, ນັ້ນກໍແມ່ນສອງບັນຫາໃຫຍ່ທີ່ຍັງບໍ່ທັນບັນລຸໄດ້ຕາມຂໍ້ກໍານົດທີ່ວາງອອງມາໃນເວລາທີ່ຜ່ານມາ. ຕໍ່ໜ້າຄວາມຮຽກຮ້ອງຕ້ອງການຂອງສະພາບການໃໝ່, ເພື່ອປະຕິບັດບັນດາເປົ້າໝາຍການພັດທະນາປະເທດ, ການສຶກສາແລະຝຶກອົບຮົມ ພ້ອມກັບວິທະຍາສາດແລະເຕັກໂນໂລຊີ ຕ້ອງເປັນແຮງຜັກດັນ ແລະ ແຫຼ່ງກຳລັງພັດທະນາທີ່ສຳຄັນຂອງປະເທດ, ໃນນັ້ນ “ຊັບພະຍາກອນມະນຸດແມ່ນສໍາຄັນທີ່ສຸດ”. ເອກະສານກອງປະຊຸມໃຫຍ່ຄັ້ງທີ 13 ຂອງພັກບໍ່ພຽງແຕ່ສືບຕໍ່ເນັ້ນໜັກເຖິງໜ້າທີ່ການບຳລຸງສ້າງບຸກຄະລາກອນຄຸນນະພາບສູງເທົ່ານັ້ນ, ແຕ່ຍັງໄດ້ກໍານົດຄວາມຕ້ອງການໃໝ່: “ມີນະໂຍບາຍທີ່ໂດດເດັນ ເພື່ອດຶງດູດແລະທຳໃຊ້ຄົນທີ່ມີຄວາມເກັ່ງກ້າສາມາດ ແລະ ຜູ້ຊ່ຽວຊານທັງໃນແລະຕ່າງປະເທດ”(6). ເລີ່ມຈາກຈິນຕະນາການປ່ຽນແປງໃໝ່ເທິງນີ້ ເອກະສານກອງປະຊຸມໃຫຍ່ຄັ້ງທີ 13 ໄດ້ເນັ້ນໜັກຫຼາຍເທື່ອກ່ຽວກັບຄວາມຄິດລວມທີ່ວ່າ “ການພັດທະນາຢ່າງວ່ອງໄວແລະຍືນຍົງໂດຍອີງໃສ່ວິທະຍາສາດ ເຕັກໂນໂລຊີ, ນະວັດຕະກໍາ ແລະ ການປ່ຽນແປງດິຈີຕອນເປັນຫຼັກ”(7) ແລະຖືວ່າ ນັ້ນແມ່ນແຮງຜັກດັນຕົ້ນຕໍຂອງການເຕີບໂຕເສດຖະກິດ, ເພື່ອສ້າງການກ້າວກະໂດດໃນການຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແຮງແຂ່ງຂັນ ຂອງພື້ນຖານເສດຖະກິດ. ນີ້ແມ່ນແຜນນະໂຍບາຍສຳຄັນທີ່ໄດ້ຮັບການຮັບຮອງເອົາຈາກກອງປະຊຸມໃຫຍ່ຄັ້ງທີ 13 ຂອງພັກ. ເວົ້າວ່າ ວັດທະນະທຳແມ່ນກຳລັງຂັບເຄື່ອນຂອງການພັດທະນາ ແມ່ນການຢືນຢັນຢ່າງເດັດດ່ຽວ ແລະ ເຂັ້ມແຂງກ່ຽວກັບແນວຄິດຊີ້ນຳໃໝ່ນີ້ຂອງພັກ. ສຳລັບຫວຽດນາມ, ນັ້ນແມ່ນຄວາມຮຽກຮ້ອງຕ້ອງການທີ່ຮີບດ່ວນຂອງພຶດຕິກຳຕົວຈິງ.
ດັ່ງນັ້ນ, ຕ້ອງເຮັດແນວໃດເພື່ອໃຫ້ວັດທະນະທຳເປັນແຮງຜັກດັນພາຍໃນຂອງການພັດທະນາປະເທດ? ມະຕິເລກທີ 33/NQ/TW, ລົງວັນທີ 9 ມິຖຸນາ 2014, ຂອງກອງປະຊຸມສູນກາງຄັ້ງທີ 9 ສະໄໝທີ 11 ຂອງພັກ, “ກ່ຽວກັບການກໍ່ສ້າງ, ພັດທະນາວັດທະນະທຳ ແລະ ຜູ້ຄົນຫວຽດນາມ ເພື່ອຕອບສະໜອງຄວາມຕ້ອງການພັດທະນາປະເທດຢ່າງຍືນຍົງ” ໄດ້ຢືນຢັນອີກຄັ້ງ ແນວຄິດທີ່ສຳຄັນທີ່ສຸດຂອງປະທານໂຮ່ຈີມິນແມ່ນ ໃຫ້ຄວາມສຳຄັນເທົ່າທຽມກັນກັບ 4 ປັດໄຈຄື: ເສດຖະກິດ, ການເມືອງ ວັດທະນະທຳ ແລະ ສັງຄົມ ໃນການກໍ່ສ້າງປະເທດ (ສິ່ງທີ່ກ່ອນໜ້ານີ້ພວກເຮົາບໍ່ໄດ້ຊາບຊຶມຢ່າງຖືກຕ້ອງໃນການຊີ້ນໍາພາກປະຕິບັດ). ຄຽງຂ້າງນັ້ນ, ເອກະສານກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດໜຶ່ງໃນສາມການບຸກທະລຸຍຸດທະສາດ ການພັດທະນາປະເທດໃນໄລຍະຕໍ່ໄປແມ່ນ ສຸມໃສ່ວັດທະນະທຳ (ການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີ, ການຝຶກອົບຮົມບຸກຄະລາກອນ, ການພັດທະນາວັດທະນະທຳ ແລະ ກຳລັງແຮງຂອງຜູ້ຄົນຫວຽດນາມ...). ນັ້ນແມ່ນແນວຄິດຊີ້ນຳທີ່ສຳຄັນ ເພື່ອຫັນປ່ຽນທ່າແຮງດ້ານວັດທະນະທຳເປັນກຳລັງຂັບເຄື່ອນ ແລະ ເປັນກຳລັງແຮງພັດທະນາປະເທດຊາດ.
ສຳລັບບັນຫາຜູ້ຄົນຫວຽດນາມ, ແນວຄິດທໍາອິດທີ່ຕ້ອງໄດ້ຮັບການຊາບຊຶມແມ່ນ “ສຸມໃສ່ຄົ້ນຄວ້າ, ກຳນົດ ແລະ ຜັນຂະຫຍາຍການກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານມະນຸດ ຕິດພັນກັບການປົກປັກຮັກສາ ແລະການພັດທະນາລະບົບມູນຄ່າຄອບຄົວຫວຽດນາມໃນໄລຍະໃໝ່”(8). ເວລານີ້ຍິ່ງກວ່າເວລາໃດໝົດ, ຈໍາເປັນຕ້ອງເຮັດທັງສາມຂັ້ນຕອນນັ້ນພ້ອມກັນ ເພື່ອເສີມຂະຫຍາຍຊັບພະຍາກອນມະນຸດ ແລະ ກຳລັງຂັບເຄື່ອນຂອງວັດທະນະທຳໃນພຶດຕິກຳຕົວຈິງ. ການພັດທະນາທຸກຂົງເຂດສະເພາະຂອງວັດທະນະທໍາຢ່າງຄົບຊຸດ, ປະສາສົມທົບຢ່າງສັດຈະວິພາກແລະເປັນປະຈຳ ລະຫວ່າງ “ກໍ່ສ້າງ” ແລະ “ຕ້ານ”, ເຕົ້າໂຮມລັກສະນະດີເດັ່ນ ແລະ ພະລັງຂອງວັດທະນະທຳປະເພດຕ່າງໆ ໃນການປະຕິບັດໜ້າທີ່ກໍ່ສ້າງຜູ້ຄົນ ແມ່ນແນວທາງແກ້ໄຂທີ່ສຳຄັນ ໃນການສົ່ງເສີມບົດບາດຂັບເຄື່ອນຂອງວັດທະນະທຳ ເພື່ອການພັດທະນາປະເທດໄດ້ດີທີ່ສຸດ.
2- ເມື່ອເວົ້າວ່າ ວັດທະນະທຳຊຶມເລິກເຂົ້າໃນຊີວິດສັງຄົມທັງໝົດ, ເຂົ້າໃນແຕ່ລະຄົນ, ແຕ່ລະຄອບຄົວ, ແຕ່ລະຊຸມຊົນ ແມ່ນໝາຍຄວາມວ່າ ບັນດາຄຸນຄ່າ, ບັນດາມາດຕະຖານໄດ້ກາຍເປັນຄວາມຕ້ອງການໃນຕົວເອງ ພາຍໃນ, ເປັນ “ສັນຊາດຍານທີສອງ” ຂອງຜູ້ຄົນ. ດ້ວຍວິທີນັ້ນ, ວັດທະນະທຳຄອບຄອງໂດຍກົງແລະເລິກເຊິ່ງຕໍ່ຄວາມຄິດ, ຄວາມຮູ້ສຶກ, ພຶດຕິກໍາຂອງຄົນ, ຕໍ່ການພົວພັນຂອງຄົນກັບໂລກອ້ອມຂ້າງເຂົາ, ກັບທຳມະຊາດ ສັງຄົມ, ກັບຊຸມຊົນແລະກັບຕົວເຂົາເອງ. ທັງໝົດໄດ້ “ອ້າງອີງ” ຈາກມາດຕະຖານວັດທໍາ ເພື່ອຊ່ວຍໃຫ້ຜູ້ຄົນດໍາລົງຊີວິດຕາມຄຸນຄ່າຂອງຄວາມຈິງ-ຄວາມດີ-ຄວາມງາມ. ດ້ວຍຄວາມໝາຍດັ່ງກ່າວ, ພາລະໜ້າທີ່ດັດປັບ ຂອງວັດທະນະທຳ ມີບົດບາດທີ່ຕັ້ງສຳຄັນທີ່ສຸດ, ຊ່ວຍໃຫ້ການກໍ່ສ້າງ, ຫຼໍ່ລ້ຽງຄວາມດີຄວາມງາມ, ຄວາມຈິງ, ຄວາມຖືກຕ້ອງ, ສູງສົ່ງ,... ແລະ ປະກອບສ່ວນ “ເຜີຍແບ” ຄວາມຊົ່ວຮ້າຍ, ຄວາມໂຫດຫ້ຽມ, ຄວາມປອມແປງ, ຄວາມຕ່ຳຊ້າ... ເອກະສານກອງປະຊຸມໃຫຍ່ຄັ້ງທີ 13 ຂອງພັກບໍ່ໄດ້ເວົ້າເຖິງພາລະໜ້າທີ່ນີ້ໂດຍກົງ, ແຕ່ແນວຄິດທີ່ຄອບງຳໃນເວລາສົນທະນາກ່ຽວກັບວັດທະນະທໍາແມ່ນ ການໝູນໃຊ້ລັກສະນະດີເດັ່ນ ແລະ ກຳລັງແຮງດັດປັບຂອງ ວັດທະນະທໍາໃນລະດັບສູງສຸດ. ການດັດປັບນັ້ນຈະສ້າງຄວາມກົມກຽວ ໃນບັນດາຄວາມສຳພັນຕັ້ງແຕ່ລະດັບຈຸນລະພາກ ໄປຈົນເຖິງມະຫາພາກ ໃນທຸກຂົງເຂດຂອງຊີວິດ, ຂອງແຕ່ລະປະເທດແລະປະເທດຊາດ. ຄໍາຖາມໜຶ່ງແມ່ນ ເປັນຫຍັງວັດທະນະທໍາຈຶ່ງມີອໍານາດໃນການດັດປັບ, ໜ້າທີ່ໃນການຄວບຄຸມການພັດທະນາ? ເຫດຜົນທາງວິທະຍາສາດ, ປະຫວັດສາດ ແລະ ພຶດຕິກຳຕົວຈິງຂອງມັນຢູ່ໃສ?
ອາດຈະເຫັນໄດ້ວ່າ, ຜົນສຳເລັດຂອງການພັດທະນາວັດທະນະທຳສະແດງອອກໃນສອງຮູບແບບຜະລິດຕະພັນຕົ້ນຕໍ. ທີໜຶ່ງ, ຜະລິດຕະພັນສະເພາະທີ່ພວກເຮົາເຫັນ, ໄດ້ຍິນ, ໄດ້ຮັບໂດຍກົງ, ມີຄວາມສຸກ, ປ່ຽນແປງຢ່າງຕໍ່ເນື່ອງເຊັ່ນ: ງານບຸນ, ດົນຕີ, ຮູບພາບ, ຮູບເງົາ, ວິທີການປະພຶດ... ໃນປະຫວັດສາດ, ມະນຸດຊາດເວົ້າລວມ ແລະ ແຕ່ລະຊົນເຜົ່າເວົ້າສະເພາະ, ໄດ້ສ້າງຜະລິດຕະພັນວັດທະນະທໍາສະເພາະຈຳນວນນັບບໍ່ຖ້ວນ. ທີສອງ, ບັນດາຄຸນຄ່າວັດທະນະທຳຈາກຜະລິດຕະພັນເຫຼົ່ານັ້ນເມື່ອຊຶມເລິກເຂົ້າໄປໃນຊີວິດຂອງຜູ້ຄົນສ້າງປັດໄຈທີ່ມີຮູບຮ່າງແລະບໍ່ປ່ຽນແປງ ເພື່ອສ້າງເອກະລັກຂອງຕົນເອງ ເຊິ່ງເປັນແກ່ນແທ້ຂອງຊຸມຊົນ, ຂອງຊົນຊາດ. ຫາກໂຄງສ້າງພື້ນຜິວທີ່ເຫັນໄດ້ແມ່ນ ຜະລິດຕະພັນວັດທະນະທໍາສະເພາະ, ໂຄງສ້າງທີ່ເລິກລ້ຳຂອງວັດທະນະທຳກໍແມ່ນລະບົບຄຸນຄ່າທີ່ສ້າງຂຶ້ນໃນສັງຄົມແລະຜູ້ຄົນ. ຫາກອັນສະເພາະມີການປ່ຽນແປງ, ເກີດຂຶ້ນ ແລະ ເຕີບໃຫຍ່ຢູ່ສະເໝີ, ລະບົບຄຸນຄ່າວັດທະນະທຳຈະເປັນຮາກຖານທີ່ຄວບຄຸມບັນດາການເຄື່ອນໄຫວຂອງສັງຄົມ, ຮັກສາການສືບຕໍ່, ສ້າງທີ່ຕັ້ງທີ່ໝັ້ນທ່ຽງ ແລະ ກຳນົດທິດທາງການພັດທະນາ. ອາດຈະຖືໄດ້ວ່າ ນັ້ນແມ່ນສອງດ້ານເຄື່ອນທີ່ - ຄົງທີ່ ຂອງການພັດທະນາວັດທະນະທຳ, ໃນນັ້ນ “ອັນຄົງທີ່” (ລະບົບຄຸນຄ່າ, ລະບົບມາດຕະຖານວັດທະນະທຳ) ເປັນໝາກຜົນຂອງ “ອັນເຄື່ອນທີ່” ທັງມີບົດບາດກຳນົດທິດ ແລະ ຄວບຄຸມ “ອັນເຄື່ອນທີ່”, ການປ່ຽນແປງບົນພື້ນຜິວຂອງວັດທະນະທຳ. ຕາມຂະບວນການທາງປະຫວັດສາດ, ຄ່າຄົງທີ່ເຫຼົ່ານີ້ຖືກສະຫຼຸບ, ເພີ່ມເຕີມ ແລະ ຫຼໍ່ຫຼອມໃນຊຸມຊົນແລະບຸກຄະລິກກະພາບຂອງມະນຸດ (ຫຼືເວົ້າຢ່າງອື່ນ, ກາຍເປັນ “ສັນຊາດຍານທີສອງ” ຂອງຄົນ), ເຊິ່ງບັນດາຄຸນຄ່າ, ຄ່າຄົງທີ່ເຫຼົ່ານັ້ນຈະມີຄວາມສາມາດແລະອໍານາດໃນການດັດປັບ ແລະ ຄວບຄຸມກິດຈະກໍາຊີວິດມະນຸດທັງໝົດ. ດັ່ງນັ້ນ, ເພື່ອໃຫ້ມີຄວາມສາມາດແລະອຳນາດດັດປັບ, ພ້ອມກັບການຜະລິດສິນຄ້າສະເພາະ, ຫຼາກຫຼາຍ ແລະ ອຸດົມສົມບູນ, ວັດທະນະທຳຈະຕ້ອງຊຶມເລິກເຂົ້າໄປໃນຊີວິດຂອງຜູ້ຄົນ ເພື່ອສ້າງຄຸນຄ່າແລະມາດຕະຖານ. ນັ້ນແມ່ນເສັ້ນທາງແລະຈຸດຫມາຍປາຍທາງຂອງວັດທະນະທຳ, ທັງເຮັດໃຫ້ຊີວິດປະຈຳວັນຂອງປະຊາຊົນອຸດັມສັມບູນຂຶ້ນ, ທັງສ້າງຄຸນຄ່າໃນບຸກຄະລິກກະພາບຂອງມະນຸດ, ກາຍເປັນຮາກຖານຈິດໃຈ, ມີອຳນາດໃນການກຳນົດທິດທາງ ແລະ ຄຸ້ມຄອງສັງຄົມໃຫ້ມີການພັດທະນາແບບຍືນຍົງ.
ເມື່ອເວົ້າເຖິງຄຸນຄ່າຈິດໃຈ - ວັດທະນະທຳ, ຜູ້ຄົນມັກຈະຊີ້ໃຫ້ເຫັນປັດໄຈທີ່ສໍາຄັນໃນລະບົບຄຸນຄ່ານັ້ນໄປພ້ອມໆກັນ: ຄຸນຄ່າການເມືອງ, ຄຸນຄ່າວິທະຍາສາດ, ຄຸນຄ່າສິນທຳ, ຄຸນຄ່າກົດໝາຍ, ຄຸນຄ່າດ້ານຄວາມງາມ. ຈາກຄຸນຄ່າເຫຼົ່ານີ້, ຈຳເປັນຕ້ອງສ້າງບັນດາມາດຕະຖານສະເພາະ ເພື່ອກຳນົດທິດ ແລະ ດັດປັບຄວບຄຸມທຸກການເຄື່ອນໄຫວຂອງສັງຄົມແລະຂອງຜູ້ຄົນ. ມາດຕະຖານເຫຼົ່ານີ້ເອງທີ່ກາຍເປັນຕົວຊີ້ວັດເພື່ອດັດປັບການພັດທະນາ. ສິ່ງສຳຄັນອັນດັບໜຶ່ງແມ່ນ ຕ້ອງເຮັດໃຫ້ແຕ່ລະຊຸມຊົນ, ແຕ່ລະຄົນມີສະຕິຮັບຮູ້ຄຸນຄ່າແລະບັນທັດຖານທາງວັດທະນະທໍາທີ່ດີ ເພື່ອຊີ້ນໍາຕົນເອງ ແລະ ຄວບຄຸມຄວາມຄິດແລະພຶດຕິກໍາທັງໝົດດ້ວຍຕົນເອງ. ນັ້ນແມ່ນຜົນຈາກການດັດປັບຜ່ານວັດທະນະທໍາ, ໂດຍຄຸນຄ່າແລະມາດຕະຖານວັດທະນະທໍາ, ການຮັບຮູ້ເຖິງສິ່ງທີ່ “ຖືກມາດຕະຖານ” ແລະສິ່ງທີ່ “ຜິດມາດຕະຖານ”. ການຈັດການແກ້ໄຂຄວາມສໍາພັນນີ້ບໍ່ຖືກຕ້ອງເໝາະສົມຈະນໍາໄປສູ່ອັນຕະລາຍທີ່ບໍ່ສາມາດຄາດເດົາໄດ້, ບໍ່ຕ້ອງເວົ້າເຖິງການປາກົດຕົວຂອງ “ຄວາມຜິດປົກກະຕິມາດຕະຖານ” ໃນສັງຄົມ ເມື່ອມາດຕະຖານແລະຄຸນຄ່າທາງວັດທະນະທໍາຕົກຕ່ຳຖືກປະຕິເສດ ຫຼືສ້າງຄວາມສັບສົນໃນການເລືອກຄຸນຄ່າທີ່ຖືກຕ້ອງຂອງຊຸມຊົນແລະບຸກຄົນ. ປະຈຸບັນ, ພວກເຮົາກຳລັງກ້າວເຂົ້າສູ່ໄລຍະໃໝ່ທີ່ມີການປ່ຽນແປງ, ຜັນຜວນຢ່າງສັບສົນ, ຄາດເດົາໄດ້ຍາກ, ໂດຍສະເພາະແມ່ນຜົນກະທົບທາງລົບຈາກດ້ານມືດຂອງເສດຖະກິດຕະຫຼາດ ແລະ ການຫັນປ່ຽນສັງຄົມ. ໃນເວລານີ້, ພາລະບົດບາດດັດປັບຂອງວັດທະນະທໍາກາຍເປັນຄວາມສໍາຄັນຫຼາຍ. ມາດຕະຖານວັດທະນະທຳ ຈະຊ່ວຍໃຫ້ແຕ່ລະຄົນເລືອກຢ່າງມີສະຕິ, ປັບຄວາມຄິດ, ຄວາມຮູ້ສຶກ, ການປະພຶດ ແລະ ຄວາມສຳພັນທາງສັງຄົມ. ຄົນຈະຕົກຢູ່ໃນຄວາມຊົ່ວ, ຄວາມອ່ວຍຮ້າຍ, ຄວາມຕໍ່າຕ້ອຍ, ຄວາມໂລບ, ຄວາມເຫັນແກ່ຕົວ... ຖ້າຫາກເຂົາຂາດຄວາມສາມາດ, ຫຼືບໍ່ມີຄວາມສາມາດໃນການຄວບຄຸມພຶດຕິກໍາ, ການດຳລົງຊີວິດຂອງຕົນ. ນິໄສບໍ່ດີ, ຄວາມໂລບມາກ, ຄວາມຊົ່ວຮ້າຍ; ການເສື່ອມເສີຍ ແລະ ການເສື່ອມຄຸນປ່ຽນທາດ ຂອງພະນັກງານທີ່ມີສິດອຳນາດຫຼາຍຄົນ ທີ່ປະກົດຕົວໃນເວລາທີ່ຜ່ານມາ ໄດ້ສະແດງໃຫ້ເຫັນຢ່າງຈະແຈ້ງເຖິງຜົນສະທ້ອນອັນຮ້າຍແຮງ ເມື່ອຢູ່ບາງບ່ອນ, ໃນບາງເວລາ, ວັດທະນະທຳຍັງບໍ່ທັນໄດ້ສົ່ງເສີມບົດບາດດັດປັບຄວບຄຸມຂອງຕົນ.
ພະລັງດັດປັບຂອງວັດທະນະທຳບໍ່ໄດ້ຢຸດຢູ່ໃນຂອບເຂດຈັນຍາບັນ, ການປະພຶດໃນການພົວພັນຊຸມຊົນ, ການພົວພັນລະຫວ່າງມະນຸດກັບມະນຸດ, ຫຼືໃນແຕ່ລະຄົນເອງ, ຫຼືຢຸດທີ່ການສ້າງຄວາມກົມກຽວສະເພາະ ຈຸນລະພາກເທົ່ານັ້ນ ແຕ່ຍັງສູງກວ່ານັ້ນ, ມັນຍັງໄດ້ເສີມຂະຫຍາຍຄຸນປະໂຫຍດໃນການດັດສົມບັນດາການພົວພັນໃຫຍ່, ສ້າງການພັດທະນາທີ່ສົມສ່ວນ, ກົມກຽວ, ຄົບຊຸດ ລະຫວ່າງບັນດາຂົງເຂດທີ່ສຳຄັນຂອງຊີວິດ, ຂອງແຕ່ລະຊາດ, ປະເທດຊາດ. ເອກະສານກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດ 10 ສາຍພົວພັນໃຫຍ່, ສະທ້ອນເຖິງບັນດາກົດເກນທີ່ມີລັກສະນະສັດຈະວິພາກ, ບັນດາບັນຫາຫຼັກກ່ຽວກັບແນວທາງການປ່ຽນແປງໃໝ່ທີ່ພັກຈະຕ້ອງສືບຕໍ່ “ກຳແໜ້ນແລະຈັດການແກ້ໄຂເປັນຢ່າງດີ”... “ຈະບໍ່ຈັດໂພດ, ບໍ່ດ້ານດຽວຢ່າງເດັດຂາດ”(9). ຢູ່ນີ້, ບົດບາດຂອງວັດທະນະທຳການເມືອງມີຕຳແໜ່ງສຳຄັນທີ່ສຸດ. ເມື່ອຮຽກຮ້ອງໃຫ້ຈັດການແກ້ໄຂເປັນຢ່າງດີ, ບໍ່ຈັດໂພດ, ບໍ່ດ້ານດຽວ ແມ່ນໄດ້ເວົ້າເຖິງພາລະໜ້າທີ່ ແລະ ຄວາມສາມາດດັດປັບຄວບຄຸມຂອງອົງການນຳພາແລະຜູ້ນຳ ເມື່ອຊີ້ນຳແກ້ໄຂສາຍພົວພັນເຫຼົ່ານັ້ນ; ມັນບໍ່ພຽງແຕ່ຮຽກຮ້ອງໃຫ້ມີວິທີການ ຫຼືສິລະປະ ໃນການແກ້ໄຂບັນຫາເທົ່ານັ້ນ, ແຕ່ຍັງຮຽກຮ້ອງໃຫ້ມີຄວາມກ້າຫານທາງການເມືອງ, ຄວາມຊໍານານ, ຄວາມເປັນມືອາຊີບ, ລະດັບວັດທະນະທໍາ, ຄວາມອ່ອນໄຫວ ແລະ ສະຕິສ່ອງໃສທຸ່ນທ່ຽງ ຂອງຜູ້ຈັດການແກ້ໄຂອີກດ້ວຍ.
ເພື່ອໃຫ້ເຫັນແຈ້ງກວ່າອີກກ່ຽວກັບບົດບາດດັດປັບຄວບຄຸມການພັດທະນາຂອງວັດທະນທຳ, ສາມາດພິຈາລະນາຢ່າງລະອຽດຄວາມສໍາພັນໜຶ່ງ ໃນ 10 ສາຍພົວພັນທີ່ໄດ້ກຳນົດໂດຍກອງປະຊຸມໃຫຍ່ຄັ້ງທີ 13 ຂອງພັກ. ນັ້ນແມ່ນສາຍພົວພັນທີ່ຫາກໍໄດ້ເພີ່ມເຕີມໃນກອງປະຊຸມໃຫຍ່ຄັ້ງທີ 13 ຂອງພັກ, ນັ້ນຄື ສາຍພົວພັນລະຫວ່າງການປະຕິບັດຕາມລະບອບປະຊາທິປະໄຕ ກັບການເສີມຂະຫຍາຍຫຼັກນິຕິທຳ, ຮັບປະກັນລະບຽບວິໄນສັງຄົມ. ຈັດການແກ້ໄຂຢ່າງສັດຈະວິພາກ ສາຍພົວພັນນີ້ຈະສ້າງຄວາມສະຫງົບໝັ້ນຄົງ ແລະ ການພັດທະນາ; ໃນທາງກົງກັນຂ້າມ, ເມື່ອບໍ່ໄດ້ຮັບການຈັດການແກ້ໄຂຢ່າງມີປະສິດທິພາບ, ຈະນໍາໄປສູ່ຜະເດັດການ, ການສູນເສຍປະຊາທິປະໄຕ ຫຼື ຄວາມວຸ່ນວາຍທາງສັງຄົມອັນເນື່ອງຈາກລະບຽບວິໄນແລະກົດໝາຍຖືກ “ເບິ່ງເບົາ”. ບົດບາດດັດປັບຄວບຄຸມຂອງວັດທະນະທຳກາຍເປັນປັດໄຈຊີ້ຂາດທີ່ນໍາໄປສູ່ໜຶ່ງໃນສອງທ່າອ່ຽງຂ້າງເທິງ. ດັ່ງນັ້ນ, ນີ້ບໍ່ພຽງແຕ່ແມ່ນບັນຫາພຶດຕິກຳທຳມະດາ, ແຕ່ແມ່ນບັນຫາຮີບດ່ວນທັງດ້ານການເມືອງ ແລະ ວັດທະນະທຳ; ໝາຍຄວາມວ່າ ຕ້ອງຈັດການແລະແກ້ໄຂໄປພ້ອມໆກັນ ທັງໃນດ້ານການເມືອງ ແລະ ວັດທະນະທຳ, ໃນນັ້ນ ມາດຕະຖານວັດທະນະທຳຕ້ອງກາຍເປັນປັດໄຈດັດປັບທີ່ກົມກຽວລະຫວ່າງປະຊາທິປະໄຕແລະເພີ່ມທະວີກົດໝາຍ, ຮັບປະກັນລະບຽບວິໄນໃນຊີວິດສັງຄົມຂອງຊຸມຊົນແລະແຕ່ລະຄົນ, ຂອງລັດແລະພົນລະເມືອງ. ສ້າງຄວາມກົມກຽວໃຫ້ຈົນໄດ້ ຈະຊ່ວຍໃຫ້ຜູ້ຄົນຮູ້ວ່າ ຕ້ອງເຮັດແນວໃດເພື່ອໃຫ້ຕົນເອງມີວັດທະນະທຳຫຼາຍຂຶ້ນ, ເປັນມະນຸດຫຼາຍຂຶ້ນ, ກຳຈັດສິ່ງທີ່ຂາດວັດທະນະທຳ, ບໍ່ທຳລາຍລະບຽບວິໄນແລະກົດໝາຍ; ພ້ອມກັນນັ້ນ, ຮຽກຮ້ອງໃຫ້ພັກ, ອຳນາດການປົກຄອງ ຕ້ອງປະຕິບັດປະຊາທິປະໄຕຢ່າງແທ້ຈິງ, ເສີມຂະຫຍາຍບົດບາດ ແລະ ສິດເປັນເຈົ້າຂອງຂອງປະຊາຊົນ.
ຈາດນັ້ນສາມາດເຫັນໄດ້ວ່າ, ສອງດ້ານ ການສ້າງ ແລະ ການຕ້ານ ແມ່ນວິທີແກ້ໄຂທີ່ສຳຄັນ ຊ່ວຍໃຫ້ພາລະໜ້າທີ່ດັດປັບຄວບຄຸມຂອງວັດທະນະທຳໄດ້ເສີມຂະຫຍາຍປະສິດທິຜົນ. ສິ່ງນີ້ສະແດງອອກໃນສອງເນື້ອໃນ, ໜ້າທີ່ການກໍ່ສ້າງແລະການພັດທະນາວັດທຳ ທີ່ໄດ້ສະເໜີໃນເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ. ດ້ານໜຶ່ງ, ເອກະສານຢືນຢັນວ່າ ຕ້ອງເພີ່ມທະວີການສຶກສາອົບຮົມນ້ຳໃຈຮັກຊາດ, ຄວາມເອກອ້າງທະນົງໃຈຂອງຊາດ, ມູນເຊື້ອແລະປະຫວັດສາດຂອງຊາດ, ປົກປັກຮັກສາ ແລະ ເສີມຂະຫຍາຍບັນດາຄຸນຄ່າທີ່ດີງາມ ຍືນຍົງໃນມູນເຊື້ອວັດທະນະທຳຫວຽດນາມ...; ດ້ານອື່ນ, ເນັ້ນໜັກຄວາມຕ້ອງການປະຕິບັດບັນດາວິທີບຸກທະລຸ ເພື່ອກີດກັ້ນການເສື່ອມໂຊມທາງດ້ານຄຸນສົມບັດ ແລະ ວິຖິຊີວິດໄດ້ຢ່າງມີປະສິດທິຜົນ, ຂະຈັດຄວາມຫຍໍ້ທໍ້ທາງສັງຄົມ ແລະ ຄວາມຊົ່ວຮ້າຍທາງສັງຄົມ; ກ້າວໄປເຖິງການຜ່ານຜ່າຂໍ້ຈຳກັດຂອງຊາວຫວຽດນາມ ໃຫ້ບັນລຸໄດ້ຈຸດໝາຍ “ກໍ່ສ້າງຜູ້ຄົນຫວຽດນາມໃນຍຸກໃໝ່, ເຊື່ອມໂຍງຄຸນຄ່າດັ້ງເດີມກັບຄຸນຄ່າສະໄໝໃໝ່ຢ່າງແໜ້ນແຟ້ນ ແລະ ກົມກຽວ”(10); ຈາກນັ້ນ ຊ່ວຍເສີມຂະຫຍາຍບົດບາດກຳລັງຜັກດັນ ແລະ ດັດປັບຂອງວັດທະນະທຳເປັນຢ່າງດີ, ປະກອບສ່ວນຊຸກຍູ້ການພັດທະນາປະເທດຢ່າງວ່ອງໄວ ແລະ ຍືນຍົງ./.
--------------
(1) ເອກະສານກອງປະຊຸມຄັ້ງທີ 5 ຂອງຄະນະບໍລິຫານງານສູນກາງພັກສະໄໝທີ 8, ສພຈ ການເມືອງແຫ່ງຊາດ, ຮ່າໂນ້ຍ, 1998, ໜ້າ 54.
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິດ, ຮ່າໂນ້ຍ, 2021, ເຫຼັ້ມ I, ໜ້າ 115-116.
(3), (4), (5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 34, 220, 136.
(6), (7), (8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 221, 214, 143.
(9), (10) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 39, 143.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 975 (ເດືອນຕຸລາ 2021)