ຮອຍປະທັບຂອງເລຂາທິການໃຫຍ່ ຫງວຽນຝູຈ້ອງ
ກ່ຽວກັບທິດສະດີ ແລະພຶດຕິກຳໃນວຽກງານການຕ່າງປະເທດ
ກ່ຽວກັບທິດສະດີ ແລະພຶດຕິກຳໃນວຽກງານການຕ່າງປະເທດ
ສະຫາຍເລຂາທິການໃຫຍ່ ຫງວຽນຝູຈ້ອງ ພ້ອມກັບບັນດາຜູ້ນຳຂອງພັກແລະລັດ ເຂົ້າຮ່ວມການເປີດກອງປະຊຸມການທູດຄັ້ງທີ 32 ທີ່ຮ່າໂນ້ຍ (ວັນທີ 19 ທັນວາ 2023) _ແຫຼ່ງ: nhandan.vn
ສະຫາຍເລຂາທິການໃຫຍ່ ຫງວຽນຝູຈ້ອງ ມັກຈະເວົ້າເຖິງຄຳເວົ້າຂອງ ວ.ອີ. ເລນິນ: “ພຽງແຕ່ພັກທີ່ນຳພາໂດຍທິດສະດີບຸກເບີກເທົ່ານັ້ນ ຈຶ່ງສາມາດປະຕິບັດບົດບາດຂອງທະຫານບຸກເບີກໄດ້”(1). ການນຳພາ ແລະ ຊີ້ນຳຂອງສະຫາຍຍັງສະແດງໃຫ້ເຫັນເຖິງຄວາມນຶກຄິດຂອງນັກທິດສະດີ ກ.ມາກ ກ່ອນໜ້າ ແລະຂອງປະທານໂຮ່ຈີມິນ ກ່ຽວກັບບົດບາດຂອງທິດສະດີ ແມ່ນສະແດງໃຫ້ເຫັນທິດທາງປະຕິບັດຕົວຈິງ ແລະ ຄວາມສຳຄັນຂອງການປະຕິບັດແມ່ນພື້ນຖານກໍ່ສ້າງທິດສະດີ; ໃນເວລາດຽວກັນ, ທິດສະດີຕ້ອງໄດ້ຮັບການພິສູດໂດຍຜ່ານພຶດຕິກຳ.
1. ຮອຍປະທັບດ້ານທິດສະດີທີ່ໂດດເດັ່ນ, ກວມລວມ ແລະ ສະແດງໃຫ້ເຫັນຄວາມຄິດເຫັນຂອງສະຫາຍເລຂາທິການໃຫຍ່ ຫງວຽນຟູ໋ຈ້ອງ ກ່ຽວກັບວຽກງານການຕ່າງປະເທດ ແມ່ນຝ່າຍການຕ່າງປະເທດ ແລະ ການທູດທີ່ມີເອກະລັກສະເພາະຂອງ “ໄມ້ໄຜ່ຫວຽດນາມ” ເຊິ່ງ “ຮາກໝັ້ນຄົງ, ລຳແຂງແຮງ, ງ່າໄມ້ຍືດຫຍຸ່ນ”, ທີ່ເຕັມໄປດ້ວຍຈິດວິນຍານ, ລັກສະນະ ແລະ ຄວາມສະຫງ່າອົງອາດຂອງຫວຽດນາມ(2). ທັດສະນະດັ່ງກ່າວໄດ້ຮັບການຍົກອອກມາຈາກສະຫາຍເລຂາທິການໃຫຍ່ ຫງວຽນຝູຈ້ອງ ໃນຫຼາຍຄັ້ງ, ແຕ່ໃນກອງປະຊຸມການຕ່າງປະເທດແຫ່ງຊາດເພື່ອປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ ທີ່ດຳເນີນໄປໃນວັນທີ 14 ທັນວາ 2021, ສະຫາຍເລຂາທິການໃຫຍ່ ຫງວຽນຝູຈ້ອງ ສັງລວມບັນດາຄວາມໝາຍສຳຄັນຂອງທິດສະດີຂອງຝ່າຍການຕ່າງປະເທດ ແລະ ການທູດແບບ “ໄມ້ໄຜ່ຫວຽດນາມ” ໃນສະໄໝໂຮ່ຈີມິນ.
ສະຫາຍກ່າວຢ່າງຈະແຈ້ງວ່າ, ເປົ້າໝາຍການຕ່າງປະເທດ ແລະ ການທູດແບບ “ໄມ້ໄຜ່ຫວຽດນາມ” ແມ່ນ “ເພື່ອເອກະລາດແຫ່ງຊາດ, ເພື່ອເສລີພາບ ແລະ ຄວາມຜາສຸກຂອງປະຊາຊົນ” ແລະ “ປົກປັກຮັກສາຜົນປະໂຫຍດຂອງຊາດ-ປະເທດຊາດ””(3). ວິທີການ ແລະ ຄຳຂວັນຕົ້ນຕໍຂອງນະໂຍບາຍການຕ່າງປະເທດ ແລະ ການທູດແບບ “ໄມ້ໄຜ່ຫວຽດນາມ” ແມ່ນ “ອ່ອນໂຍນ, ສະຫລາດ, ແຕ່ແຂງແຮງ ແລະ ເຂັ້ມແຂງ; ມີຄວາມຍືດຫຍຸ່ນ, ມີຫົວຄິດປະດິດສ້າງ ແຕ່ກໍ່ກ້າຫານ ໝັ້ນທ່ຽງຫຼາຍ, ກ້າປະເຊີນໜ້າກັບທຸກສິ່ງທ້າທາຍ ແລະ ຄວາມລຳບາກ... ສາມັກຄີ, ເມດຕາປານີ, ແຕ່ເດັດດ່ຽວໜຽວແໜ້ນ, ອົດທົນ... ຮູ້ອ່ອນໂຍນ, ຮູ້ໜັກແໜ້ນ; ຮູ້ເວລາ, ຮູ້ສະຖານະການ; ຮູ້ຈັກຕົນເອງ, ຮູ້ຈັກຄົນອື່ນ; ຮູ້ວິທີທີ່ຈະບຸກໜ້າ, ຮູ້ວິທີຖອຍ, "ແລ້ວແຕ່ໂອກາດທີ່ຈະກະທຳ", "ເຊືອກອ່ອນມັດແໜ້ນ”(4).
ບັນດາພື້ນຖານ ແລະ ທິດຊີ້ນຳຂອງເນື້ອໃນວຽກງານການຕ່າງປະເທດແບບ “ໄມ້ໄຜ່ຫວຽດນາມ” ໄດ້ຮັບການກໍ່ສ້າງພາຍໃຕ້ການນຳພາຂອງພັກກອມມູນິດຫວຽດນາມ ແລະ ປະທານໂຮ່ຈີມິນ ໃນໄລຍະ 90 ປີຜ່ານມາ, ດ້ວຍການໝູນໃຊ້ຫຼັກການພື້ນຖານຂອງລັດທິມາກ-ເລນິນ ຢ່າງມີຫົວຄິດປະດິດສ້າງ, ສືບທອດ ແລະ ເສີມຂະຫຍາຍບັນດາຮີດຄອງປະເພນີ, ເອກະລັກດ້ານການຕ່າງປະເທດ, ການທູດ ແລະ ວັດທະນະທຳຂອງຊາດ, ເລືອກເອົາເນື້ອໃນວັດທະນະທຳໂລກ ແລະ ແນວຄິດທີ່ກ້າວໜ້າຂອງຍຸກສະໄໝ. ດັ່ງນັ້ນ, ສາມາດເຂົ້າໃຈໄດ້ວ່າ: ຝ່າຍການຕ່າງປະເທດ ແລະ ການທູດແບບ “ໄມ້ໄຜ່ຫວຽດນາມ” ໄດ້ສະແດງອອກໃນແນວຄິດ, ທິດສະດີ, ແນວທາງ, ນະໂຍບາຍ ແລະ ການປະຕິບັດວຽກງານການຕ່າງປະເທດ ແລະ ການທູດຂອງຫວຽດນາມ, ພິເສດແມ່ນໃນສະໄໝໂຮ່ຈີມິນ.
ຮູບພາບໄມ້ໄຜ່ຍັງມີສັນຍາລັກພິເສດ, ຕິດພັນກັບປະເພນີ, ວັດທະນະທຳຂອງຊາວຫວຽດນາມ. ຕົ້ນໄຜ່ສ້າງກຳແພງ ແລະ ເມືອງ, ຊ່ວຍບັນພະບຸລຸດຂອງພວກເຮົາປົກປັກຮັກສາໝູ່ບ້ານຂອງເຂົາເຈົ້າຕໍ່ຕ້ານສິ່ງທ້າທາຍທາງທຳມະຊາດ ແລະ ປົກປັກຮັກສາປະເທດຈາກການຮຸກຮານຂອງຕ່າງປະເທດ. ໄມ້ໄຜ່ມີຄວາມງາມແບບງ່າຍດາຍ, ມີຄຸນສົມບັດອັນລ້ຳຄ່າຫຼາຍດ້ານ, ມີຄວາມໃກ້ຊິດສະໜິດສະໜົມກັບຊາວຫວຽດນາມຫຼາຍລຸ້ນຄົນ, ໃນຊີວິດປະຈຳວັນ, ເຮັດວຽກ ແລະ ຕໍ່ສູ້ປົກປັກຮັກສາປະເທດຊາດ. ໄມ້ໄຜ່ຂອງຫວຽດນາມໄປຈາກຊົນນະບົດສູ່ຕົວເມືອງ, ຈາກເຂດພູດອຍເຖິງເຂດທົ່ງພຽງ, ແຕ່ອະດີດຮອດປະຈຸບັນ, ໃນທົ່ວປະເທດເຮົາ. ດ້ວຍເຫດນັ້ນ, ໄມ້ໄຜ່ຈຶ່ງແມ່ນຮູບພາບທີ່ພິເສດໃນຈິດໃຈຂອງຊາວຫວຽດນາມທຸກຄົນ, ໃນວັນນະຄະດີແລະສິລະປະຫວຽດນາມ.
ຫຼັກການໃນນະໂຍບາຍການຕ່າງປະເທດ ແລະ ການທູດທີ່ເປັນເອກະລັກສະເພາະຂອງ “ໄມ້ໄຜ່ຫວຽດນາມ” ແມ່ນເອກະລາດ, ການປົກຄອງດ້ວຍຕົນເອງ, ເພື່ອສັນຕິພາບ, ມິດຕະພາບ, ການຮ່ວມມື, ການພັດທະນາ, ເຄົາລົບກົດໝາຍສາກົນ. ຍຶດໝັ້ນໃນຫຼັກການ, ແຕ່ມີຫົວຄິດປະດິດສ້າງ ແລະ ເຄື່ອນໄຫວໃນບັນດາວິທີ ແລະ ມາດຕະການປະຕິບັດ, ຕາມທິດນຳຂອງປະທານໂຮ່ຈີມິນ “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”.
ຈາກຜົນງານດີເດັ່ນຂອງປະເທດໃນການພົວພັນຕ່າງປະເທດໃນຕະຫຼອດ 40 ປີຜ່ານມາ, ບັນດາຄະນະ, ກະຊວງ, ຂະແໜງການ, ທ້ອງຖິ່ນ, ອົງການຄົ້ນຄ້ວາ ແລະ ສື່ມວນຊົນໄດ້ເຂົ້າໃຈ, ເອົາໃຈໃສ່, ຮັບຮູ້ ແລະ ຕີລາຄາສູງ ບົດບາດຂອງຝ່າຍການຕ່າງປະເທດ ແລະ ການທູດແບບ "ໄມ້ໄຜ່ຫວຽດນາມ".
2- ດ້ວຍຄວາມໝາຍເລິກເຊິ່ງທີ່ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ຊີ້ແຈ້ງວ່າ, ທິດສະດີການຕ່າງປະເທດ ແລະ ການທູດຂອງຝ່າຍ “ໄມ້ໄຜ່ຫວຽດນາມ” ຕ້ອງສືບຕໍ່ຄົ້ນຄວ້າ, ສ້າງລະບົບ ແລະ ພັດທະນາໃນໄລຍະຈະມາເຖິງ. ຢູ່ທີ່ນີ້, ບົດຂຽນໄດ້ສຸມໃສ່ເພີ່ມບາງແນວຄວາມຄິດກ່ຽວກັບທິດສະດີສຳຄັນນັ້ນ ໂດຍຜ່ານການຄົ້ນຄວ້າເບື້ອງຕົ້ນ ແລະ ປະສົບການຂອງຜູ້ມີກຽດ ແລະ ໂຊກດີທີ່ໄດ້ເຂົ້າຮ່ວມການນຳພາ, ທິດຊີ້ນຳ ແລະ ການເຄື່ອນໄຫວຫຼາຍຢ່າງຂອງ ສະຫາຍເລຂາທິການໃຫຍ່ ຫງວຽນຝູຈ້ອງ ນັບແຕ່ຕົ້ນສະໄໝຂອງກອງປະຊຸມໃຫຍ່ຄັ້ງທີ XIII ຂອງພັກ (ປີ 2021).
ສະຫາຍເລຂາທິການໃຫຍ່ ຫງວຽນຝູຈ້ອງ ຍາມໃດກໍ່ໃຫ້ຄວາມສຳຄັນ ແລະ ເອົາໃຈໃສ່ເປັນພິເສດຕໍ່ວຽກງານການຕ່າງປະເທດ. ກ່າວຄຳເຫັນທີ່ກອງປະຊຸມການຕ່າງປະເທດແຫ່ງຊາດເພື່ອປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ (ວັນທີ 14 ທັນວາ 2021), ສະຫາຍກ່າວວ່າ: “ດັ່ງທີ່ພວກເຮົາຮູ້ແລ້ວ, ປະເທດໃດກໍຕາມ, ໃນຂະບວນການສ້າງຕັ້ງ ແລະ ພັດທະນາ, ຕ້ອງແກ້ໄຂ 2 ບັນຫາພື້ນຖານຄື: ກິດຈະການພາຍໃນ ແລະ ການພົວພັນຕ່າງປະເທດ”(5). ຄຳຖະແຫຼງຂອງສະຫາຍສະແດງໃຫ້ເຫັນຢ່າງຈະແຈ້ງເຖິງການເຄື່ອນໄຫວປະຫວັດສາດຂອງປະຊາຊົນຫວຽດນາມທີ່ມີສັນຕິພາບ, ແຕ່ຍາມໃດກໍ່ຕັ້ງໜ້າຊຸກຍູ້ການທູດປົກປັກຮັກສາເອກະລາດ, ເປັນເຈົ້າຕົນເອງ, ຮັກສາສະພາບແວດລ້ອມສັນຕິພາບ, ສະຖຽນລະພາບເພື່ອກໍ່ສ້າງ ແລະ ພັດທະນາປະເທດຊາດ. ໃນຊຸມປີຕົ້ນສະຕະວັດທີ XX, ຊາຍໜຸ່ມຮັກຊາດ ຫງວຽນເຕິ໊ດແທ່ງ ເຊິ່ງຕໍ່ມາເປັນປະທານ ໂຮ່ຈີມິນ ໄດ້ເດີນທາງໄປຕ່າງປະເທດເພື່ອຊອກຫາວິທີກູ້ຊາດ ແລະ ຍາດເອົາເອກະລາດໃຫ້ປະເທດຊາດ ແລະທ່ານໄດ້ຍົກສູງລະດັບການທູດຫວຽດນາມໃຫ້ກາຍເປັນແນວຮົບໜຶ່ງໃນສົງຄາມຕໍ່ຕ້ານທີ່ເຕັມໄປດ້ວຍຄວາມຫຍຸ້ງຍາກແລະສິ່ງທ້າທາຍ, ການວາງພື້ນຖານການປະຕິບັດສຳລັບບົດຮຽນທີ່ຍິ່ງໃຫຍ່ໜຶ່ງຂອງການປະຕິວັດໃນປະເທດຂອງເຮົາ ຄືການສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝ, ສ້າງຫຼັກຖານສຳລັບນະໂຍບາຍເຊື່ອມໂຍງສາກົນຂອງ ຫວຽດນາມ ໃນໄລຍະການປ່ຽນແປງໃໝ່.
ທີ່ກອງປະຊຸມໃຫຍ່ຄັ້ງທີ XIII ຂອງພັກ, ພາຍໃຕ້ການນຳພາຂອງສະຫາຍເລຂາທິການໃຫຍ່ ຫງວຽນຝູຈ້ອງ, ພັກກອມມູນິດຫວຽດນາມ ໄດ້ກຳນົດບົດບາດບຸກເບີກຂອງວຽກງານການຕ່າງປະເທດໃນການສ້າງ ແລະ ຮັກສາສະພາບແວດລ້ອມສັນຕິພາບ, ສະຖຽນລະພາບ, ລະດົມແຫຼ່ງກຳລັງຈາກພາຍນອກ ເພື່ອພັດທະນາ ແລະ ຍົກສູງທີ່ຕັ້ງ ແລະ ຊື່ສຽງຂອງປະເທດ. ແນວຄິດຂອງສະຫາຍເລຂາທິການໃຫຍ່ ຫງວຽນຝູຈ້ອງ ກ່ຽວກັບບົດບາດຂອງການຕ່າງປະເທດ ກໍ່ສະແດງໃຫ້ເຫັນເຖິງຄວາມມາດປາດຖະໜາຂອງຕົນເພື່ອໃຫ້ປະຊາຊົນຫວຽດນາມ “ຄຽງບ່າຄຽງໄຫຼ່ກັບບັນດາມະຫາອຳນາດທັງ 5 ທະວີບ” ຕາມຄວາມປາດຖະໜາຂອງປະທານ ໂຮ່ຈີມິນ ດ້ວຍວິທີສັດຈະວິພາບ ແລະວິໄສທັດກ້ວາງໄກ, ຍຸດທະສາດໃນສະພາບຂອງໂລກປະຈຸບັນ.
ທ່ານປະທານໂຮ່ຈີມິນ ແນະນຳວ່າ: “ຖ້າພັກເຂົ້າໃຈສະຖານະການຢ່າງຈະແຈ້ງ, ພັກຈະກຳນົດນະໂຍບາຍທີ່ຖືກຕ້ອງ”(6). ການຄົ້ນຄວ້າເອກະສານ ແລະ ແນວທາງການນຳພາຂອງພັກເຫັນວ່າ ຈຸດເດັ່ນຂອງວິທີການນຳພາຂອງພັກກອມມູນິດຫວຽດນາມ ແມ່ນໄດ້ເອົາໃຈໃສ່ຕີລາຄາສະພາບການທັງພາຍໃນປະເທດ ແລະ ຕ່າງປະເທດ ເພື່ອກຳນົດແນວທາງ ແລະ ແຜນນະໂຍບາຍທີ່ເໝາະສົມ. ສືບຕໍ່ບົດຮຽນປະສົບການນັ້ນ, ພາຍໃຕ້ການຊີ້ນຳນຳພາຂອງສະຫາຍເລຂາທິການໃຫຍ່ ຫງວຽນຝູຈ້ອງ, ກອງປະຊຸມໃຫຍ່ຄັ້ງທີ XIII ຂອງພັກໄດ້ກຳນົດບົດຮຽນ ແລະມີທິດນຳທີ່ວ່າ “ກຳສະພາບການ ແລະ ຄາດຄະເນສະພາບການຢ່າງຖືກຕ້ອງ, ບໍ່ໃຫ້ເກີດຄວາມບັງເອີນ ຕົກໃນທ່າຮັບ”(7), “ປົກປັກຮັກສາປະເທດຊາດຕັ້ງແຕ່ຕົ້ນ, ຈາກໄລຍະໄກ, ໃນເວລາທີ່ “ປະເທດຍັງບໍ່ທັນຢູ່ໃນອັນຕະລາຍ”(8). ນີ້ແມ່ນການພັດທະນາອັນສຳຄັນໃນແນວຄິດນຳພາຂອງພັກກອມມູນິດຫວຽດນາມ, ຕອບສະໜອງຄວາມຕ້ອງການຂອງວຽກງານກໍ່ສ້າງ ແລະ ປົກປັກຮັກສາປະເທດຊາດໃນສະພາບການໃໝ່.
ຮອຍປະທັບທາງທິດສະດີຂອງສະຫາຍເລຂາທິການໃຫຍ່ ຫງວຽນຝູຈ້ອງ ຍັງໄດ້ສະແດງໃຫ້ເຫັນໃນນະໂຍບາຍການຕ່າງປະເທດຂອງພັກ ໂດຍຜ່ານກອງປະຊຸມໃຫຍ່ຄັ້ງທີ XI ຂອງພັກ (ປີ 2011), ກອງປະຊຸມໃຫຍ່ຄັ້ງທີ XII ຂອງພັກ (ປີ 2016) ແລະກອງປະຊຸມໃຫຍ່ຄັ້ງທີ XIII ຂອງພັກ (ປີ 2021), ໃນຂະບວນການປະຕິບັດໂຄງການການເມືອງກໍ່ສ້າງປະເທດໃນສະໄໝຂ້າມຜ່ານໄປສູ່ລັດທິສັງຄົມນິຍົມ (ສະບັບເພີ່ມເຕີມ,ພັດທະນາໃນປີ 2011). ພົ້ນເດັ່ນແມ່ນແນວຄິດກ່ຽວກັບການຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ໂດຍອີງໃສ່ຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ, ຄວາມສະເໝີພາບ, ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ; ເປັນເພື່ອນ, ເປັນຄູ່ຮ່ວມມືທີ່ໄວ້ວາງໃຈໄດ້ ແລະເປັນສະມາຊິກທີ່ຫ້າວຫັນ, ມີຄວາມຮັບຜິດຊອບໃນປະຊາຄົມສາກົນ; ຍົກລະດັບການພົວພັນຕ່າງປະເທດຫຼາຍຝ່າຍ; ເປັນເຈົ້າການແລະຕັ້ງໜ້າເຊື່ອມໂຍງສາກົນ, ຊຸກຍູ້ການເຊື່ອມໂຍງເຂົ້າກັບສາກົນຢ່າງຮອບດ້ານ, ກວ້າງຂວາງ, ຄ່ອງແຄ້ວ ແລະ ມີປະສິດທິຜົນ, ພ້ອມກັນນັ້ນ ກໍເປັນການແກ້ໄຂການພົວພັນລະຫວ່າງຄວາມເປັນເອກະລາດ, ຄວານເປັນເຈົ້າຕົນເອງ ແລະ ການເຊື່ອມໂຍງເຂົ້າກັບສາກົນ.
ຕາມແນວທາງການຕ່າງປະເທດທົ່ວໄປ, ພັກ ແລະ ລັດ ຫວຽດນາມ ໄດ້ສ້າງລະບົບທັດສະນະ ແລະ ນະໂຍບາຍກ່ຽວກັບບັນຫາທົ່ວໄປຢ່າງຄົບຖ້ວນນັບມື້ນັບຫຼາຍຂຶ້ນ, ເຊັ່ນ: ຍຸດທະສາດປົກປັກຮັກສາປະເທດຊາດໃນສະພາບການໃໝ່ທີ່ກອງປະຊຸມສູນກາງຄັ້ງທີ 8 ສະໄໝທີ XI, ວັນທີ 25 ຕຸລາ 2013 ແລະ ກອງປະຊຸມສູນກາງຄັ້ງທີ 8 ສະໄໝທີ XIII, ວັນທີ 24 ພະຈິກ 2023; ມະຕິໝາຍເລກ 34-NQ/TW, ລົງວັນທີ 9 ມັງກອນ 2023 ຂອງກົມການເມືອງສູນກາງພັກ “ກ່ຽວກັບບາງທິດທາງ ແລະ ນະໂຍບາຍຕົ້ນຕໍທີ່ປະຕິບັດນະໂຍບາຍການຕ່າງປະເທດຂອງກອງປະຊຸມໃຫຍ່ຄັ້ງທີ XIII”(9). ຄຽງຄູ່ນັ້ນແມ່ນບັນດາມະຕິ, ທິດທາງ, ບົດສະຫຼຸບ, ໂຄງການ ແລະ ແຜນການຂອງຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ, ສະພາແຫ່ງຊາດ ແລະ ລັດຖະບານ ກ່ຽວກັບວຽກງານການຕ່າງປະເທດຂອງພັກ ແລະ ການທູດຂອງລັດ, ການຕ່າງປະເທດປະຊາຊົນ, ການທູດລັດຖະສະພາ, ການທູດປ້ອງກັນປະເທດ, ການທູດປ້ອງກັນຄວາມສະຫງົບປະຊາຊົນ, ການພົວພັນກັບຄູ່ຮ່ວມມືສອງຝ່າຍ ແລະ ຫຼາຍຝ່າຍ, ພິເສດແມ່ນບັນດາປະເທດບ້ານໃກ້ເຮືອນຄຽງ, ປະເທດຄູ່ຮ່ວມມືໃຫຍ່ ແລະ ຮອບດ້ານໃນຂົງເຂດປົກປັກຮັກສາອະທິປະໄຕ ແລະຜືນແຜ່ນດິນ, ເສດຖະກິດການທູດ, ວັດທະນະທຳ, ຂ່າວສານຕ່າງປະເທດ ແລະ ວຽກງານຊາວຫວຽດນາມຢູ່ຕ່າງປະເທດ...
ພາຍໃຕ້ການນຳພາ ແລະ ຊີ້ນຳຂອງສະຫາຍເລຂາທິການໃຫຍ່ ຫງວຽນຝູຈ້ອງ, ທັດສະນະຂອງພັກກອມມູນິດຫວຽດນາມ ມີບັນດາບາດກ້າວພັດທະນາໃໝ່ ແລະ ສຳຄັນ, ຍົກສູງປະສິດທິຜົນການຊີ້ນຳນຳພາຂອງພັກ, ເປັນເອກະພາບຂອງລັດ ແລະ ການສົມທົບກັນຢ່າງແໜ້ນແຟ້ນລະຫວ່າງບັນດາກຳລັງເຮັດວຽກຢູ່ຕ່າງປະເທດ ບັນດາການພົວພັນລະຫວ່າງລັດຖະບານກາງ ແລະທ້ອງຖິ່ນ. ປະທານໂຮ່ຈີມິນ, ບັນດານັກຮົບປະຕິວັດ ແລະ ບັນດານັກຮົບຮັກຊາດຫວຽດນາມ ໄດ້ຕັ້ງໜ້າຊຸກຍູ້ການພົວພັນກັບບັນດາພັກ ແລະ ປະຊາຊົນບັນດາປະເທດ ເພື່ອແນໃສ່ຍາດເອົາການໜູນຊ່ວຍສາກົນຕໍ່ການປະຕິວັດ ຫວຽດນາມ ເຊິ່ງຈຸດພົ້ນເດັ່ນແມ່ນ ການສ້າງຕັ້ງແນວໂຮມປະຊາຊົນໂລກເພື່ອສາມັກຄີແລະສະໜັບສະໜຸນຫວຽດນາມ ໃນການຕໍ່ສູ້ຕ້ານການຮຸກຮານຂອງຈັກກະພັດອາເມລິກາ. ຕາມນັ້ນ, ການຊຸກຍູ້ການພົວພັນກັບບັນດາຝ່າຍ ແລະ ປະຊາຊົນບັນດາປະເທດ ແມ່ນຈຸດພິເສດ ແລະສຳຄັນໃນບັນດານະໂຍບາຍ ແລະ ການເຄື່ອນໄຫວການຕ່າງປະເທດຂອງປະເທດ. ທີ່ກອງປະຊຸມໃຫຍ່ຄັ້ງທີ XIII, ພັກກອມມູນິດຫວຽດນາມ ເປັນຄັ້ງທຳອິດທີ່ໄດ້ກ່າວເຖິງແຜນນະໂຍບາຍກໍ່ສ້າງການທູດຮອບດ້ານ ແລະ ທັນສະໄໝ ບົນພື້ນຖານ 3 ເສົາຄ້ຳຄື: ການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ. ນີ້ແມ່ນແຜນນະໂຍບາຍໃໝ່, ສະແດງໃຫ້ເຫັນເຖິງຄວາມເຕີບໂຕດ້ານການທູດປະຕິວັດຂອງຫວຽດນາມ, ທັງແມ່ນຄວາມຮຽກຮ້ອງຕ້ອງການທີ່ຮີບດ່ວນ, ຍຸດທະສາດ, ຍາວນານສຳລັບວຽກງານການຕ່າງປະເທດເວົ້າລວມ ແລະ ໃນຂົງເຂດການທູດເວົ້າສະເພາະ, ສອດຄ່ອງກັບທ່າອ່ຽງການພັດທະນາຂອງການທູດທົ່ວໂລກ. ມະຕິເລກທີ 34-NQ/TW, ລົງວັນທີ 9 ມັງກອນ 2023, ຂອງກົມການເມືອງສູນກາງ ໄດ້ກຳນົດພາລະບົດບາດ, ໜ້າທີ່ຂອງແຕ່ລະເສົາຄ້ຳ ໃນການທູດທັນສະໄໝແລະຮອບດ້ານ. ສະຫາຍຍາມໃດກໍໃຫ້ຄວາມສຳຄັນກັບການພັດທະນາຂອງລັດທິສັງຄົມນິຍົມໃນໂລກ ແລະ ການພົວພັນຊອງພັກກອມມູນິດຫວຽດນາມ ກັບບັນດາພັກການເມືອງ, ພິເສດແມ່ນພັກກອມມູນິດ ແລະ ພັກແຮງງານ. ທິດສະດີຂອງສະຫາຍກ່ຽວກັບລັດທິສັງຄົມນິຍົມ ແລະ ເສັ້ນທາງໄປສູ່ລັດທິສັງຄົມນິຍົມຫວຽດນາມ ແມ່ນການປະກອບສ່ວນສຳຄັນເຂົ້າໃນການພັດທະນາຂະບວນການຂອງພັກກອມມູນິດ ແລະ ສັງຄົມນິຍົມ.
ສິ່ງຄວນເອົາໃຈໃສ່ຄື, ດ້ວຍຄວາມເອົາໃຈໃສ່ເປັນພິເສດຂອງສະຫາຍເລຂາທິການໃຫຍ່ ຫງວຽນຝູຈ້ອງ, ວຽກງານແນະນຳຍຸດທະສາດນັບມື້ນັບໄດ້ເອົາໃຈໃສ່, ຊຸກຍູ້ ແລະ ຖືເປັນວຽກງານປະຈຳ, ເປັນໜ້າທີ່ແຖວໜ້າ, ປະກອບສ່ວນປະຕິບັດຕົວຈິງ ເພື່ອຍົກສູງປະສິດທິຜົນການນຳພາຂອງພັກຕໍ່ວຽກງານການຕ່າງປະເທດ.
ການຄົ້ນຄວ້າແລະສັງລວມກ່ຽວກັບວິທີວິທະຍາຂອງສະຫາຍເລຂາທິການໃຫຍ່ ຫງວຽນຝູຈ້ອງ ໃນວຽກງານການຕ່າງປະເທດ ຈະມີຄວາມໝາຍອັນໃຫຍ່ຫຼວງຕໍ່ການພັດທະນາທິດສະດີກ່ຽວກັບວຽກງານການຕ່າງປະເທດ ແລະການທູດຢູ່ຫວຽດນາມ. ລະອຽດຄື, ສະຫາຍຍາມໃດກໍ່ສະແຫວງຫາທິດທາງສ້າງແນວທາງ ແລະ ວິທີແກ້ໄຂຢ່າງມີປະສິດທິຜົນທີ່ສຸດ ບົນພື້ນຖານການໝູນໃຊ້ລັດທິມາກ-ເລນິນ, ແນວຄິດຂອງໂຮ່ຈິມິນ, ບົດຮຽນຈາກປະສົບການອັນລ້ຳຄ່າທີ່ຖອດຖອນໄດ້ຈາກປະຫວັດສາດຂອງປະເທດ. ພິເສດ ສະຫາຍໃຫ້ຄວາມສຳຄັນກັບວຽກງານຄົ້ນຄວ້າ ເພື່ອຍຶດໝັ້ນສະຖານະການ ແລະ ເນັ້ນໜັກສະເໝີວ່າ “ພຽງ “ຢ້ານ” ວ່າບໍ່ຮູ້, ຖ້າຮູ້ກໍ່ຈະບໍ່ “ຢ້ານ””. ຈາກນັ້ນ, ປັບປຸງຄຸນນະພາບການແນະນຳຍຸດທະສາດ ເພື່ອກໍ່ສ້າງ ແລະ ປັບປຸງແນວທາງຍຸດທະສາດຂອງພັກໃຫ້ສົມບູນ. ສະຫາຍມັກເຕືອນໃຈພວກເຮົາເຖິງຄວາມໝາຍສຳຄັນຂອງນະໂຍບາຍ, ເພາະວ່າ ຖ້ານະໂຍບາຍບໍ່ຖືກຕ້ອງ ຫຼືບໍ່ປະຕິບັດຕາມນະໂຍບາຍ, ທຸກຢ່າງຈະລົ້ມແຫຼວ. ກ່ຽວກັບບັນດາເນື້ອໃນການເຈລະຈາແລະແລກປ່ຽນກັບບັນດາຄູ່ຮ່ວມມື, ສະຫາຍຮັກສາຫຼັກການປະຕິບັດແຜນນະໂຍບາຍຂອງຄະນະນຳທີ່ມີສິດອຳນາດ ແລະ ຂໍແຜນນະໂຍບາຍກ່ຽວກັບບັນດາບັນຫາໃຫຍ່ ແລະໃໝ່. ສະຫາຍຍາມໃດກໍ່ເຄົາລົບ ແລະ ມີຄວາມຈິງໃຈກັບບັນດາຄູ່ຮ່ວມມື, ຊອກຫາ ແລະເສີມຂະຫຍາຍຈຸດທີ່ເປັນເອກະສັນ; ຊຸກຍູ້ການເຈລະຈາເພື່ອເພີ່ມທະວີຄວາມເຂົ້າໃຈເຊິ່ງກັນແລະກັນ ແລະ ປະກອບສ່ວນແກ້ໄຂຄວາມບໍ່ລົງລອຍກັນ. ການພິຈາລະນາ ແລະ ຕັດສິນນະໂຍບາຍແມ່ນອີງໃສ່ແນວທາງ ແລະ ທັດສະນະຂອງພັກ, ພ້ອມດຽວກັນນັ້ນ ກໍພິຈາລະນາໃນລັກສະນະສ້າງສັນ ແລະມີນໍ້າໃຈດີ ຕໍ່ຄວາມເປັນຫ່ວງຂອງຄູ່ຮ່ວມມື; ຮັກສາຫຼັກການກ່ຽວກັບບັນຫາທີ່ສໍາຄັນ ແລະ ຄວາມສໍາຄັນແລະຄວາມໝາຍ, ແລະໃນເວລາດຽວກັນ ມີຄວາມຍືດຫຍຸ່ນແລະສ້າງສັນ ເພື່ອບັນລຸຜົນໄດ້ຮັບໃນການເຮັດວຽກ; ເອົາບັນຫາທີ່ຕ້ອງແກ້ໄຂໃນມຸມກວ້າງ; ປະຊາທິປະໄຕ, ຮັບຟັງຄວາມຄິດຄວາມເຫັນ, ເຄົາລົບ ແລະ ຊຸກຍູ້ການຮ່ວມມື ແລະ ໃຫ້ຄຳເຫັນປຶກສາ; ຕັດສິນໃຈ ແລະຕົກລົງເພື່ອຜົນປະໂຫຍດຂອງຊາດ-ປະເທດຊາດ. ພ້ອມກັບການຊີ້ນຳ, ທິດທາງ, ທິດສະດີ, ທິດທາງຍຸດທະສາດ, ທ່ານຍັງໄດ້ເຂົ້າຮ່ວມໂດຍກົງ ໃນຫຼາຍວຽກງານການຕ່າງປະເທດທີ່ສຳຄັນຂອງພັກ ແລະ ລັດ. ໃນໄລຍະດຳເນີນກອງປະຊຸມໃຫຍ່ຄັ້ງທີ XIII ຂອງພັກ, ເຖິງວ່າຈະມີຄວາມຂັດແຍ້ງກັນຍ້ອນພະຍາດໂຄວິດ-19, ແຕ່ສະຫາຍໄດ້ເຂົ້າຮ່ວມວຽກງານການຕ່າງປະເທດໂດຍກົງກວ່າ 100 ລາຍການ.
3. ຕະຫຼອດ 13 ປີຜ່ານມາ, ນັບແຕ່ສະຫາຍ ຫງວຽນຝູຈ້ອງ ດຳລົງຕຳແໜ່ງເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ສະພາບການຢູ່ພາກພື້ນ ແລະ ໃນໂລກໄດ້ພັດທະນາຢ່າງວ່ອງໄວ, ນັບມື້ນັບສັບສົນ ແລະຄາດຄະເນຍາກ. ກອງປະຊຸມສູນກາງພັກກາງສະໄໝ (ເດືອນພຶດສະພາ 2023) ໄດ້ຕີລາຄາວ່າ “ຄວາມຫຍຸ້ງຍາກ, ສິ່ງທ້າທາຍໃໝ່ໄດ້ປະກົດຕົວ, ຮ້າຍແຮງກວ່າ ແລະ ໜັກໜ່ວງກວ່າການຄາດຄະເນ, ທຽບກັບໄລຍະດຽວກັນໃນບາງເງື່ອນໄຂທີ່ຜ່ານມາ”. ໃນສະພາບການນັ້ນ, ພາຍໃຕ້ການຊີ້ນຳທີ່ມີສະຕິປັນຍາ ແລະຖືກຕ້ອງ ຂອງຄະນະບໍລິຫານງານສູນກາງ, ກົມການເມືອງສູນກາງ ແລະ ຄະນະເລຂາທິການສູນກາງ, ນຳໂດຍສະຫາຍເລຂາທິການໃຫຍ່ ຫງວຽນຝູຈ້ອງ, ທົ່ວພັກ, ປະຊາຊົນ, ກອງທັບ ໄດ້ມານະພະຍາຍາມປະຕິບັດສຳເລັດໜ້າທີ່ຕາມເປົ້າໝາຍທີ່ລະບຸໄວ້ໃນໂຄງການການເມືອງກໍ່ສ້າງປະເທດໃນສະໄໝຂ້າມຜ່ານໄປສູ່ລັດທິສັງຄົມນິຍົມ (ສະບັບປັບປຸງແລະພັດທະນາໃນປີ 2011) ແລະ ນະໂຍບາຍການຕ່າງປະເທດຂອງກອງປະຊຸມໃຫຍ່ຄັ້ງທີ XI, XII ແລະ XIII ຂອງພັກ. ນັບແຕ່ກອງປະຊຸມໃຫຍ່ຄັ້ງທີ XIII, ພິເສດແມ່ນ ນັບແຕ່ກອງປະຊຸມວຽກງານການຕ່າງປະເທດແຫ່ງຊາດຄັ້ງທຳອິດເປັນຕົ້ນມາ, ວຽກງານການຕ່າງປະເທດບັນລຸໝາກຜົນຫຼາຍຢ່າງທີ່ສຳຄັນທາງປະຫວັດສາດ, ກາຍເປັນຈຸດພົ້ນເດັ່ນທີ່ໜ້າປະທັບໃຈໃນບັນດາຜົນງານ ແລະ ຜົນສຳເລັດລວມຂອງປະເທດໃນຊຸມປີມໍ່ໆມານີ້(10). ສິ່ງເຫຼົ່ານີ້ຍັງເປັນເຄື່ອງໝາຍຂອງສະຫາຍເລຂາທິການໃຫຍ່ ຫງວຽນຝູຈ້ອງ ໃນການປະຕິບັດວຽກງານດ້ານການຕ່າງປະເທດ ແລະ ຝ່າຍການຕ່າງປະເທດ ແລະການທູດທີ່ເຕັມທີ່ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”.
ນັບແຕ່ກອງປະຊຸມໃຫຍ່ຄັ້ງທີ XI ຂອງພັກມາຮອດປະຈຸບັນ, ການພົວພັນລະຫວ່າງຫວຽດນາມແລະບັນດາປະເທດ ໄດ້ຂະຫຍາຍຕົວ ແລະ ເລິກເຊິ່ງກວ່າ. ນັບແຕ່ປີ 2011 ເປັນຕົ້ນມາ, ຫວຽດນາມໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດກັບ ຫຼືຄູ່ຮ່ວມມືຍຸດທະສາດຮອບດ້ານ 26 ຄັ້ງ ລວມທັງ 5 ປະເທດທີ່ເປັນສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ, ຈາກທັງໝົດ 30 ປະເທດ ທີ່ຮ່ວມກັບປະເທດຂອງເຮົາສ້າງການພົວພັນຄູ່ຮ່ວມໃນລະດັບຕ່າງໆ.
ການພົວພັນກັບປະເທດບ້ານໃກ້ເຮືອນຄຽງຄື ຈີນ, ລາວ ແລະ ກໍາປູເຈຍ ໄດ້ຮັບການປັບປຸງ ຢ່າງບໍ່ຢຸດຢັ້ງ. ໃນນັ້ນ, ການພົວພັນຄູ່ຮ່ວມມືຍຸດທະສາດຮອບດ້ານກັບຈີນ ໄດ້ຮັບການຍົກລະດັບ; ສອງຝ່າຍແລະປະເທດໄດ້ເຫັນດີເປັນເອກະສັນກັນສ້າງປະຊາຄົມຮ່ວມມືໃນອະນາຄົດ ທີ່ມີຄວາມໝາຍຍຸດທະສາດ ບົນພື້ນຖານກົດບັດສະຫະປະຊາຊາດ, ກົດໝາຍສາກົນ ແລະ ບັນດາມາດຖານພື້ນຖານຂອງການພົວພັນສາກົນ. ສອງປະເທດກໍ່ເຫັນດີເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເພີ່ມທະວີການຮ່ວມມືດ້ານປ້ອງກັນປະເທດ ປ້ອງກັນຄວາມໝັ້ນຄົງ, ເພີ່ມທະວີການຮ່ວມມືໃນຂົງເຂດອື່ນຢ່າງເລິກເຊິ່ງກ່ວາອີກ, ສ້າງພື້ນຖານສັງຄົມໃຫ້ແໜ້ນແຟ້ນກ່ວາອີກ, ການຮ່ວມມືຫຼາຍຝ່າຍໄດ້ຮັບການຄວບຄຸມ ແລະ ແກ້ໄຂໄດ້ດີກວ່າ. ສາມພັກ ແລະ 3 ປະເທດ ຫວຽດນາມ - ລາວ - ກຳປູເຈຍ ຢືນຢັນວ່າ: ມູນເຊື້ອປະຫວັດສາດແຫ່ງຄວາມສາມັກຄີ ແລະ ການຊ່ວຍເຫຼືອເຊິ່ງກັນແລະກັນລະຫວ່າງ 3 ພັກ ແລະ ປະຊາຊົນ 3 ປະເທດ ແມ່ນຊັບສິນອັນລ້ຳຄ່າ ແລະ ແມ່ນໜຶ່ງໃນບັນດາປັດໄຈສຳຄັນ, ແມ່ນແຫຼ່ງກຳລັງແຮງທີ່ສຸດ ສຳລັບພາລະກິດຂອງແຕ່ລະພັກ ແລະແຕ່ລະປະເທດໃນອະດີດ ແລະ ປະຈຸບັນ. ຄວາມເຂົ້າໃຈແລະຄວາມໄວ້ເນື້ອເຊື່ອໃຈເຊິ່ງກັນແລະກັນ ລະຫວ່າງສາມປະເທດໄດ້ຮັບການປັບປຸງ, ການພົວພັນດ້ານປ້ອງກັນປະເທດ ແລະຄວາມໝັ້ນຄົງສືບຕໍ່ພັດທະນາແລະການເປັນເສົາຄ້ຳ, ການຮ່ວມມືດ້ານເສດຖະກິດຖືກລະບຸວ່າເປັນຂົງເຂດທີ່ຕ້ອງການການບຸກທະລຸ.
ການພົວພັນກັບບັນດາປະເທດໃຫຍ່, ບັນດາປະເທດໃນພາກພື້ນອາຊີຕາເວັນອອກສ່ຽງໃຕ້, ບັນດາຄູ່ຮ່ວມມືທີ່ສຳຄັນ ແລະ ບັນດາເພື່ອນມິດດັ້ງເດີມ ນັບມື້ນັບມີບາດກ້າວພັດທະນາໃໝ່ທີ່ສຳຄັນ. ພັກກອມມູນິດຫວຽດນາມ ໄດ້ພັດທະນາການພົວພັນກັບພັກການເມືອງ ເກືອບ 260 ພັກຢູ່ໃນ 120 ປະເທດທົ່ວໂລກ, ໃນນັ້ນປະມານ 70% ແມ່ນພັກກຳອຳນາດ ຫຼື ເຂົ້າຮ່ວມລັດຖະບານ, ປະກອບສ່ວນສຳຄັນເຂົ້າໃນການກຳນົດທິດທາງດ້ານການເມືອງຂອງການພົວພັນລະຫວ່າງຫວຽດນາມກັບບັນດາປະເທດ. ພັກແລະລັດຫວຽດນາມ ໄດ້ແກ້ໄຂບັນດາບັນຫາການຕ່າງປະເທດທີ່ສັບສົນທີ່ເກີດຂຶ້ນຢ່າງເໝາະສົມ, ຮັບປະກັນຜົນປະໂຫຍດຂອງຊາດ-ປະເທດຊາດ ບົນພື້ນຖານກົດໝາຍສາກົນ, ສະເໝີພາບ ແລະ ມີຜົນປະໂຫຍດຮ່ວມກັນ, ສອດຄ່ອງກັບແນວທາງການຕ່າງປະເທດ ແລະ ນະໂຍບາຍການປ້ອງກັນປະເທດທີ່ “ບໍ່ປະຕິບັດ 4 ປະການ”(11).
ຫວ່າງມໍ່ໆມານີ້, ຫາງສຽງສາກົນຕີລາຄາສູງບັນດາໝາກຜົນນະໂຍບາຍການຕ່າງປະເທດທີ່ເປັນເອກະລັກສະເພາະຂອງຫວຽດນາມ ໂດຍຜ່ານການຢືນຢັນວ່າ ໃນໄລຍະເວລາພຽງ 10 ເດືອນ (ເດືອນກັນຍາ 2023 – ມິຖຸນາ 2024), ປະມຸກລັດສາມທ່ານຈາກ 3 ປະເທດມະຫາອຳນາດຂອງໂລກຄື ອາເມລິກາ, ຈີນ ແລະ ລັດເຊຍ ໄດ້ມາຢ້ຽມຢາມຫວຽດນາມ ຕາມຄຳເຊີນຂອງທ່ານເລຂາທິການໃຫຍ່ ຫງວຽນຝູຈ້ອງ. ກ່ອນນັ້ນ, ໃນປີ 2021 ແລະ 2023, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຝູຈ້ອງ, ປະທານພັກປະຊາຊົນກຳປູເຈຍ ສົມເດັດ ຮຸນເຊນ ແລະ ເລຂາທິການໃຫຍ່ພັກປະຊາຊົນປະຕິວັດລາວ ປະທານປະເທດລາວ ທອງລຸນ ສີສຸລິດ ໄດ້ຈັດຕັ້ງກອງປະຊຸມສຸດຍອດຫວຽດນາມ - ກຳປູເຈຍ - ລາວ, 30 ປີຫຼັງກອງປະຊຸມທີ່ຄ້າຍຄືກັນໄດ້ຈັດຂຶ້ນໃນປີ 2019.
ການພົວພັນຕ່າງປະເທດຫຼາຍຝ່າຍບັນລຸໄດ້ບາດກ້າວທີ່ຕັ້ງໜ້າຫຼາຍປະການ, ປະກອບສ່ວນສ້າງກຳລັງແຮງໃຫ້ແກ່ການທູດສອງປະເທດ, ຊຸກຍູ້ການເຊື່ອມໂຍງເຂົ້າກັບສາກົນ ແລະ ເພີ່ມທະວີກຳລັງແຮງລວມຂອງປະເທດ. ຫວຽດນາມໄດ້ເຂົ້າຮ່ວມໃນອົງການຈັດຕັ້ງຫຼາຍກວ່າ 70 ອົງການ ລວມມີອົງລະຫວ່າງລັດຖະບານລະດັບໂລກ, ລະດັບລະຫວ່າງພາກພື້ນ ຫຼືລະດັບພາກພື້ນ, ກົນໄກການຮ່ວມມືຫຼາຍຝ່າຍທີ່ສຳຄັນໃນດ້ານລັດຖະສະພາ, ການປ້ອງກັນປະເທດແລະຄວາມໝັ້ນຄົງ ແລະ ກົນໄກການຮ່ວມມືສາກົນທີ່ສຳຄັນທີ່ສຸດຂອງພັກ ແລະອົງການປະຊາຊົນ. ໃນກົນໄກເຫຼົ່ານັ້ນ, ການເຂົ້າຮ່ວມຂອງຫວຽດນາມແມ່ນນັບມື້ນັບເປັນເຈົ້າການ ແທດຈິງ ແລະ ເລິກເຊິ່ງ; ຕັ້ງໜ້າຊຸກຍູ້ ແລະ ປົກປັກຮັກສາຜົນປະໂຫຍດຂອງຊາດ-ປະເທດຊາດ, ພ້ອມກັນນັ້ນ. ຕັ້ງໜ້າເຂົ້າຮ່ວມໃນການສ້າງ “ກົດລະບຽບ” ແລະແກ້ໄຂບັນດາສິ່ງທ້າທາຍທົ່ວໄປສຳລັບປະຊາຄົມໂລກ ໃນບັນດາຂົງເຂດຄວາມໝັ້ນຄົງແບບດັ້ງເດີມ ຫຼືຄວາມໝັ້ນຄົງທີ່ບໍ່ເປັນແບບດັ້ງເດີມ. ໃນສະພາບການທີ່ໂລກພວມຢູ່ໃນໄລຍະຫັນປ່ຽນສູ່ສະຖານະການ “ຫຼາຍຂົ້ວ, ຫຼາຍສູນກາງ”, ປະສົບກັບການປ່ຽນແປງຢ່າງສັບສົນ ແລະຄວາມທ້າທາຍຂ້າມຊາຍແດນນັບມື້ນັບຮ້າຍແຮງ, ການເຄື່ອນໄຫວຫຼາຍຝ່າຍແມ່ນໜຶ່ງໃນບັນດາວິທີທີ່ສຳຄັນ ເພື່ອປົກປັກຮັກສາຜົນປະໂຫຍດຂອງຊາດ-ປະເທດຊາດ ແລະສ້າງສະພາບແວດລ້ອມສາກົນທີ່ສະດວກເພື່ອສັນຕິພາບແລະການພັດທະນາຂອງປະເທດ.
ການຮ່ວມມືໃນຂອບເຂດສອງຝ່າຍຫຼືຫຼາຍຝ່າຍລະຫວ່າງຫວຽດນາມ ແລະ ຄູ່ຮ່ວມມືສາກົນໃນຂົງເຂດເສດຖະກິດ, ວິທະຍາສາດ - ເຕັກໂນໂລຊີ, ວັດທະນະທຳ, ການສຶກສາບັນລຸໄດ້ບັນດາໝາກຜົນສຳຄັນ. ໃນໄລຍະ 10 ປີຜ່ານມາ, ຫວຽດນາມ ຍາມໃດກໍ່ແມ່ນໜຶ່ງໃນ 3 ປະເທດທີ່ດຶງດູດການລົງທຶນໂດຍກົງຈາກຕ່າງປະເທດ (FDI) ຫຼາຍກວ່າໝູ່ໃນສະມາຄົມບັນດາປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ແລະ ແມ່ນໜຶ່ງໃນປະເທດກຳລັງພັດທະນາທີ່ໄດ້ນຳໜ້າໃນການດຶງດູດ FDI. ຫວຽດນາມໄດ້ກາຍເປັນໜຶ່ງໃນ 20 ປະເທດທີ່ມີຂະໜາດການຄ້າໃຫຍ່ທີ່ສຸດໃນໂລກ, ມີການພົວພັນດ້ານເສດຖະກິດການຄ້າກັບ 230 ປະເທດໃນທົ່ວໂລກ ແລະ ໄດ້ລົງນາມໃນສັນຍາການຄ້າເສລີ (FTA) ກັບ 60 ກວ່າປະເທດແລະຄູ່ຮ່ວມມື. ເນື້ອໃນດ້ານວິທະຍາສາດແລະເຕັກໂນໂລຊີນັບມື້ນັບເພີ່ມຂຶ້ນໃນການຮ່ວມມືພາກລັດ, ລະຫວ່າງອົງການຄົ້ນຄ້ວາ ແລະ ວິສາຫະກິດ. ຫວຽດນາມໄດ້ລົງນາມໃນສັນຍາຮ່ວມມືດ້ານວັດທະນະທຳກັບຫຼາຍຄູ່ຮ່ວມມື ເພື່ອສ້າງຄວາມສະດວກໃຫ້ແກ່ການພັດທະນາປະເທດໃນດ້ານວັດທະນະທຳ; ບັນດາອົງການວິຊາຊີບທາງສັງຄົມ, ວິສາຫະກິດ ແລະບຸກຄົນຕ່າງໆ ນັບມື້ນັບຕັ້ງໜ້າເຂົ້າຮ່ວມການຮ່ວມມືດ້ານວັດທະນະທຳສາກົນ. ປະຈຸບັນ, ຫວຽດນາມໄດ້ຮັບລາງວັນ 32 ລາຍການ ຈາກອົງການສຶກສາ, ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO).
ການສື່ຂ່າວຕ່າງປະເທດໄດ້ຮັບການເສີມຂະຫຍາຍ ແລະນໍາໃຊ້ຢ່າງຕັ້ງຫນ້າ, ທັນທີ, ແລະອຸດົມສົມບູນ ໃນເນື້ອໃນແລະຮູບແບບ. ພ້ອມກັນນັ້ນ, ຫວຽດນາມໄດ້ສ້າງລະບົບນະໂຍບາຍ ແລະກົດລະບຽບໃນເອກະສານທາງກົດໝາຍຕ່າງໆ ເພື່ອສ້າງເງື່ອນໄຂທີ່ເອື້ອອຳນວຍໃນການປົກປ້ອງສິດທິແລະຜົນປະໂຫຍດອັນຊອບທຳຂອງຊາວຫວຽດນາມຢູ່ຕ່າງປະເທດ ໃນແງ່ຂອງການປົກປັກຮັກສາຄວາມໝັ້ນຄົງຂອງຊາດ ເຊື່ອມໂຍງເຂົ້າກັບຄອບຄົວ, ການຮ່ຳຮຽນ, ການດຳເນີນທຸລະກິດ ແລະ ດຳລົງຊີວິດໃນຫວຽດນາມ. ວຽກງານຊາວຫວຽດນາມຢູ່ຕ່າງປະເທດໄດ້ຮັບການປະຕິບັດໃນຫຼາຍຮູບຫຼາຍແບບ ແລະ ປະກອບສ່ວນອັນຕັ້ງໜ້າໃຫ້ຊາວຫວຽດນາມເຂົ້າໃຈຂໍ້ມູນກ່ຽວກັບປະເທດຊາດ, ຜູກພັນກັບປະເທດ, ພ້ອມກັນນັ້ນ ກໍ່ຕໍ່ສູ້ແລະເປີດເຜີຍແຜນການແລະການກະທຳຂອງບັນດາອິດທິກຳລັງສັດຕູ ທີ່ຫວັງທຳລາຍ ຕອບໂຕ້ຕໍ່ພັກ ແລະປະຊາຊົນຫວຽດນາມ.
ໃນສະພາບການການຜັນປ່ຽນຢ່າງສັບສົນຢູ່ທະເລຕາເວັນອອກ, ຫວຽດນາມຍັງຄົງຮັກສາອຳນາດອະທິປະໄຕ ແລະປົກປັກຮັກສາຜົນປະໂຫຍດຂອງຊາດໃນເຂດທະເລ ຂອງປະເທດຊາດ ຕາມອະນຸສັນຍາສະຫະປະຊາຊາດວ່າດ້ວຍກົດໝາຍທະເລ (UNCLOS) ປີ 1982, ຈັດການແກ້ໄຂກໍລະນີແລະບັນຫາທີ່ສັບສົນຢ່າງຮາບຮື່ນ, ພະຍາຍາມສົ່ງເສີມການຮ່ວມມື ແລະ ແກ້ໄຂຂໍ້ແຕກຕ່າງແລະຂໍ້ພິພາດຢ່າງສັນຕິ. ຫວຽດນາມໄດ້ລົງນາມໃນສັນຍາກຳນົດເຂດເສດຖະກິດຈຳເພາະ ກັບອິນໂດເນເຊຍ ແລະ ຮ່ວມກັນກັບຈີນ ແລະບັນດາປະເທດສະມາຊິກອາຊຽນ ມີຄວາມຄືບໜ້າໃນການເຈລະຈາ ເພື່ອສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກ (COC). ບັນດາເຂດຊາຍແດນທາງບົກລະຫວ່າງຫວຽດນາມ ແລະບັນດາປະເທດເພື່ອນບ້ານ ມີຄວາມສະຫງົບສຸກ, ປອດໄພຫຼາຍຂຶ້ນ ແລະກຳລັງກາຍເປັນເຂດທີ່ພັດທະນາ. ພິເສດ, ຫວຽດນາມແລະລາວໄດ້ເພີ່ມຄວາມໜາ ແລະຕົກແຕ່ງ ລະບົບຫຼັກໝາຍຊາຍແດນສຳເລັດຮຽບຮ້ອຍແລ້ວໃນປີ 2016; ແລະກັບກຳປູເຈຍໄດ້ລົງນາມໃນສົນທິສັນຍາເພີ່ມເຕີມຂອງສົນທິສັນຍາກຳນົດເຂດແດນແຫ່ງຊາດປີ 1995 ແລະ 2005 ແລະ ພິທີສານວ່າດ້ວຍການກຳນົດເຂດແກນ ແລະປັກຫຼັກໝາຍຊາຍປະມານ 84% ຂອງເຂດແດນທາງບົກ ພາຍຫຼັງການເຈລະຈາມານານກວ່າ 36 ປີ.
ສະຫາຍເລຂາທິການໃຫຍ່ ຫງວຽນຝູຈ້ອງ ຍາມໃດກໍ່ເຕືອນວ່າ ຢ່າເປັນອັດຕະວິໄສ, ເພິ່ງພໍໃຈກັບຜົນສຳເລັດແລະຜົນງານທີ່ໄດ້ຮັບ. ພັກເຮົາແລະສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ຊີ້ອອກບັນດາຂໍ້ຈຳກັດ ແລະ ຂໍ້ຂາດຕົກບົກຜ່ອງທີ່ຕ້ອງແກ້ໄຂ; ພ້ອມກັນນັ້ນ, ສະຫາຍຍັງເນັ້ນໜັກວ່າ: ເພື່ອຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍອັນໜັກໜ່ວງໃນຕໍ່ໜ້າ, ຮຽກຮ້ອງໃຫ້ທົ່ວພັກ, ທົ່ວປວງຊົນ, ທົ່ວກອງທັບ, ພິເສດແມ່ນບັນດາກຳລັງເຮັດວຽກງານການຕ່າງປະເທດ ຕ້ອງມີຄວາມຕັດສິນໃຈ ແລະ ຄວາມພະຍາຍາມກ່ວາອີກ. ຢ່າງໃດກໍ່ຕາມ, ໂດຍລວມ, ໝາກຜົນແລະຜົນສຳເລັດຂອງວຽກງານການຕ່າງປະເທດໃນໄລຍະທີ່ຜ່ານມາມໍ່ນີ້ ໄດ້ເປີດໂອກາດຍຸດທະສາດໃຫຍ່ອັນດັບ 2 ໃນວຽກງານການຕ່າງປະເທດນັບແຕ່ປະເທດລິເລີ່ມດຳເນີນການປ່ຽນແປງໃໝ່. ໂອກາດຍຸດທະສາດທໍາອິດແມ່ນ ຜົນສໍາເລັດຂອງປະເທດຂອງເຮົາໃນການສ້າງສະພາບແວດລ້ອມທີ່ສະຫງົບສຸກ; ທັບມ້າງການປິດລ້ອມ ແລະການຂວ້ຳບາດ; ຜູກມິດກັບທຸກປະເທດ; ເຊື່ອມໂຍງເສດຖະກິດກັບສາກົນ; ເຊື່ອມຕໍ່ຄືນໃໝ່ການຊ່ວຍເຫຼືອແລະການພົວພັນທາງການຄ້າ ແລະສ້າວເງື່ອນໄຂເພື່ອດຶງດູດ FDI. ໂອກາດຍຸດທະສາດທີ 2 ແມ່ນພື້ນຖານເພື່ອໃຫ້ສັນຕິພາບຂອງປະເທດນັບມື້ນັບແໜ້ນແຟ້ນກ່ວາອີກ, ຫວຽດນາມແມ່ນເພື່ອນກັບບັນດາປະເທດ, ຄູ່ຮ່ວມມືຍຸດທະສາດ, ຄູ່ຮ່ວມມືຍຸດທະສາດຮອບດ້ານກັບບັນດາປະເທດໃຫຍ່, ມີທີ່ຕັ້ງສຳຄັນໃນໂລກ ແລະ ພາກພື້ນ; ພິເສດ, ຫວຽດນາມພວມເພີ່ມທະວີການເຊື່ອມໂຍງເຂົ້າກັບໂລກຢ່າງຮອບດ້ານ ແລະ ເລິກເຊິ່ງກ່ວາອີກ. ການພົວພັນແລະຄວາມໄວ້ວາງໃຈທາງການເມືອງຂອງຫວຽດນາມ ກັບບັນດາຄູ່ຮ່ວມມື ໄດ້ສ້າງຄວາມໄດ້ປຽບຍຸດທະສາດ ໃຫ້ປະເທດຜັນຂະຫຍາຍແນວທາງການຕ່າງປະເທດຂອງພັກ ແລະ ໃຊ້ໂອກາດໃໝ່ຢ່າງເຕັມທີ່ໃນການຮ່ວມມືສາກົນ ໃນດ້ານການຄ້າ-ການລົງທຶນ, ວິທະຍາສາດ-ເຕັກໂນໂລຢີ, ການສຶກສາ-ຝຶກອົບຮົມ,... ປະກອບສ່ວນອັນຕັ້ງໜ້າເຂົ້າໃນພາລະກິດການຫັນເປັນອຸດສາຫະກຳແລະທັນສະໄໝຂອງປະເທດໃນໄລຍະໃໝ່.
ສະຫາຍເລຂາທິການໃຫຍ່ ຫງວຽນຝູຈ້ອງ ເນັ້ນໜັກວ່າ: ບັນດາຜົນງານອັນໃຫຍ່ຫຼວງທີ່ມີຄວາມໝາຍປະຫວັດສາດຂອງພາລະກິດການປ່ຽນແປງໃໝ່ ທີ່ລິເລີ່ມແລະນຳພາດຳເນີນການໂດຍພັກຂອງເຮົານັ້ນ ແມ່ນຜົນຜະລິດທີ່ຕົກຜະລຶກຂອງຄວາມຄິດປະດິດສ້າງ, ເປັນຜົນຈາກຂະບວນການແຫ່ງຄວາມພະຍາຍາມຢ່າງບໍ່ຢຸດຢັ້ງ ແລະ ຕໍ່ເນື່ອງໃນຫຼາຍດ້ານຂອງທົ່ວພັກ, ທົ່ວປວງຊົນ, ທົ່ວປວງຊົນ ແລະ ທົ່ວກອງທັບ. ພ້ອມກັນນັ້ນ, ສະພາບຕົວຈິງຍັງຢືນຢັນວ່າ ສະຫາຍເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ກົມການເມືອງສູນກາງ, ຄະນະເລຂາທິການ ຕັດສິນໃຈກ່ຽວກັບແນວທາງໃຫຍ່, ນະໂຍບາຍສຳຄັນ, ຊີ້ນຳໂດຍກົງຕໍ່ວຽກງານການຕ່າງປະເທດທີ່ສຳຄັນ ແລະ ຈັດການແກ້ໄຂບັນດາບັນຫາສັບສົນທີ່ສຸດທີ່ເກີດຂຶ້ນ, ສ້າງຮອຍປະທັບປະຫວັດສາດໃນການກໍ່ສ້າງ ແລະ ປະຕິບັດນະໂຍບາຍການຕ່າງປະເທດຂອງຫວຽດນາມ ໃນຊຸມປີຜ່ານມາ. ສະຫາຍເລຂາທິການໃຫຍ່ ຫງວຽນຝູຈ້ອງ ເປັນຜູ້ນຳດີເດັ່ນພິເສດ ແລະເປັນ “ຄູສອນ” ໃນໂຮງຮຽນການຕ່າງປະເທດ ແລະການທູດ ທີ່ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ” ໃນສະໄໝໂຮ່ຈີມິນ.
ໃນຊຸມມື້ຜ່ານມາ, ດ້ວຍຄວາມເສົ້າສະລົດໃຈ ແລະ ຄວາມຮັກແພງອັນເລິກເຊິ່ງ ແລະພິເສດທີ່ມີຕໍ່ສະຫາຍເລຂາທິການໃຫຍ່ ຫງວຽນຝູຈ້ອງ, ບັນດາພະນັກງານ, ສະມາຊິກພັກ ແລະ ປະຊາຊົນ ໄດ້ສະແດງຄວາມຂອບອົກຂອບໃຈຢ່າງແຮງຕໍ່ການອຸທິດຕົນ ແລະ ການປະກອບສ່ວນອັນຍິ່ງໃຫຍ່ຂອງສະຫາຍເລຂາທິການໃຫຍ່ໃນບັນຫາພື້ນຖານສອງປະການ ຂອງປະເທດແລະປະຊນຊົນ ເຊິ່ງສະຫາຍໄດ້ເນັ້ນໜັກຄື ກິດຈະການພາຍໃນປະເທດ ແລະ ການຕ່າງປະເທດ. ບັນດານັກການເມືອງຢູ່ຕ່າງປະເທດກໍ່ສະແດງຄວາມຊົມເຊີຍ ແລະ ຕີລາຄາສູງບັນດາໂຊກລາບ, ທ່າແຮງ, ທີ່ຕັ້ງ ແລະ ຊື່ສຽງສາກົນຂອງຫວຽດນາມ ທີ່ບໍ່ເຄີຍມີມາກ່ອນ, ພາຍໃຕ້ການນຳພາຂອງພັກ ແລະ ສະຫາຍເລຂາທິການໃຫຍ່ ຫງວຽນຝູຈ້ອງ. ສະຫາຍໄດ້ລ່ວງລັບໄປແລ້ວ, ແຕ່ຊື່ແລະພາລະກິດ, ຄຸນງາມຄວາມດີແລະການອຸທິດຕົນ, ຄວາມເກັ່ງກ້າສາມາດ ແລະຄຸນທຳ ຂອງສະຫາຍຈະຮຸ່ງເຮືອງເຫຼືອງເຫຼື້ອມໃນປະຫວັດສາດອັນສະຫງ່າລາສີຂອງພັກກອມມູນິດຫວຽດນາມ ແລະຊາດຫວຽດນາມ ຕະຫລອດການ, ດ້ວຍຄວາມຮູ້ບຸນຄຸນຂອງພະນັກງານ, ສະມາຊິກພັກ ແລະ ປະຊາຊົນຫວຽດນາມ ໃນຄວາມຮັກແພງຂອງເພື່ອນມິດສາກົນ.
ໃນຊ່ວງເວລາອັນສະເທືອນອາລົມທີ່ສຸດ, ຂໍສະແດງຄວາມເສຍໃຈຢ່າງບໍ່ມີສິ້ນສຸດແລະສະແດງຄວາມເຄົາລົບນັບຖືຕໍ່ສະຫາຍເລຂາທິການໃຫຍ່ ຫງວຽນຝູຈ້ອງ - ຜູ້ນຳທີ່ໂດດເດັ່ນເປັນພິເສດ, ແບບຢ່າງທີ່ໃສແຈ້ງໃນການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດສິນທຳ ແລະ ແບບແຜນໂຮ່ຈີມິນ, ສະມາຊິກພັກກອມມູນິດທີ່ຈົງຮັກພັກດີ ດ້ວຍກຽດສັກສີອັນໃຫຍ່ຫຼວງຂອງພັກ, ລັດ ແລະ ປະຊາຊົນຫວຽດນາມ, ໄດ້ສະແດງໃຫ້ເຫັນເຖິງຄຸນນະພາບ, ຄວາມສາມາດ, ຄວາມກ້າຫານ, ສະຕິປັນຍາຂອງລຸ້ນຄົນຫວຽດນາມ. ຜູ້ນໍາໃນກິດຈະການປ່ຽນແປງໃໝ່ - ຍັງຮຸ່ງເຮືອງດ້ວຍຄວາມເຊື່ອໝັ້ນອັນແຮງກ້າແລະໝັ້ນຄົງວ່າ: ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມ, ປະເທດຊາດຫວຽດນາມ ຈະເສີມຂະຫຍາຍບັນດາຜົນງານອັນຍິ່ງໃຫຍ່ທີ່ບັນລຸໄດ້, ຜ່ານຜ່າທຸກຄວາມຫຍຸ້ງຍາກແລະສິ່ງທ້າທາຍ ເພື່ອສືບຕໍ່ສ້າງຄວາມເຂັ້ມແຂງ, ຄວາມສາມາດບົ່ມຊ້ອນ, ຖານະຕຳແໜ່ງ ແລະ ກຽດສັກສີຂອງຊາດຫວຽດນາມ ຕາມຄວາມປາດຖະໜາຂອງປະຊາຊົນຫວຽດນາມ ແລະສະຫາຍເລຂາທິການໃຫຍ່ ຫງວຽນຝູຈ້ອງ./.
---------------------
(1) ວ.ອີ ເລນິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2005, ເຫຼັ້ມ 6, ໜ້າ 32
(2) ຫງວຽນຝູຈ້ອງ: “ກໍ່ສ້າງແລະພັດທະນາພື້ນຖານການຕ່າງປະເທດແລະການທູດຫວຽດນາມທີ່ທັນສະໄໝ ແລະ ອຸດົມໄປດ້ວຍເອກະລັກຂອງຊາດ”, ວາລະສານກອມມູນິດ, ສະບັບທີ 980, ເດືອນທັນວາ 2021, ໜ້າ 18-19
(3), (4), (5) ຫງວຽນຝູຈ້ອງ: “ກໍ່ສ້າງແລະພັດທະນາພື້ນຖານການຕ່າງປະເທດແລະການທູດຫວຽດນາມທີ່ທັນສະໄໝ ແລະ ອຸດົມໄປດ້ວຍເອກະລັກຂອງຊາດ”, ວາລະສານກອມມູນິດ, ສະບັບທີ 980, ເດືອນທັນວາ 2021, ໜ້າ 19 – 27
(6) ໂຮ່ຈີມິນ: ນິພົນຄົຍຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ5, ໜ້າ 307
(7), (8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 98, 101
(9) ນີ້ແມ່ນມະຕິຄັ້ງທຳອິດຂອງກົມການເມືອງສູນກາງພັກກ່ຽວກັບວຽກງານການຕ່າງປະເທດຮອບດ້ານພາຍຫຼັງ 35 ປີນັບແຕ່ວັນທີ 20 ພຶດສະພາ1988, ກົມການເມືອງສູນກາງພັກ ສະໄໝທີ VI ອອກມະຕິເລກທີ 13-NQ/TW, “ກ່ຽວກັບວຽກງານ ແລະ ນະໂຍບາຍການຕ່າງປະເທດໃນສະພາບການໃໝ່”.
(10) ເບິ່ງ: ຫງວຽນຝູຈ້ອງ: “ສືບຕໍ່ປ່ຽນແປງໃໝ່, ກໍ່ສ້າງແລະພັດທະນາພື້ນຖານການຕ່າງປະເທດແລະການທູດຫວຽດນາມທີ່ທັນສະໄໝ, ໝັ້ນຄົງເຂັ້ມແຂງຮອບດ້ານ ແລະ ອຸດົມໄປດ້ວຍເອກະລັກຂອງ “ໄມ້ໄຜ່ຫວຽດນາມ””, ວາລະສານກອມມູນິດ, ສະບັບທີ 1028, ເດືອນທັນວາ 2023, ໜ້າ 9 – 14
(11) 1- ບໍ່ອະນຸຍາດໃຫ້ຕ່າງປະເທດຕັ້ງຖານທັບທະຫານ ຫລື ໃຊ້ດິນແດນເພື່ອຕໍ່ສູ້ກັບປະເທດອື່ນ; 2- ບໍ່ເຂົ້າຮ່ວມພັນທະມິດທາງທະຫານ; 3- ບໍ່ພົວພັນກັບປະເທດໜຶ່ງເພື່ອຕໍ່ສູ້ກັບປະເທດອື່ນ; 4- ຫ້າມໃຊ້ກຳລັງ ຫຼື ນາບຂູ່ວ່າຈະໃຊ້ກຳລັງໃນການພົວພັນສາກົນ.
