ລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມ -
ຜົນສຳເລັດລວມຂອງການຕໍ່ສູ້ເພື່ອຄວາມກ້າວໜ້າທາງສັງຄົມ,
ຕອບສະໜອງຄວາມປາດຖະໜາຂອງມະນຸດຊາດທີ່ກ້າວໜ້າ
ຜົນສຳເລັດລວມຂອງການຕໍ່ສູ້ເພື່ອຄວາມກ້າວໜ້າທາງສັງຄົມ,
ຕອບສະໜອງຄວາມປາດຖະໜາຂອງມະນຸດຊາດທີ່ກ້າວໜ້າ
1- ການລະບຸທັດສະນະທີ່ບິດເບືອນແລະປະຕິເສດລັກສະນະດີເດັ່ນ
ຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ
ປະຊາທິປະໄຕແມ່ນອົງປະກອບໜຶ່ງຂອງຮູບຖານຈິດສຳນຶກສັງຄົມ. ການເກີດຂຶ້ນຂອງຊາທິປະໄຕທຶນນິຍົມຕິດພັນກັບການປະຕິເສດແບບວິພາກວິທີຕໍ່ລະບອບຜະເດັດການສັກດິນາ ຖືເປັນກ້າວສຳຄັນໃນປະຫວັດສາດຂອງສັງຄົມມະນຸດ. ລະບອບທຶນນິຍົມປະສົບຄວາມສຳເລັດບາງປະການໃນການຄວບຄຸມສິດທິມະນຸດ ແລະສິດທິພົນລະເຮືອນ, ປະກອບສ່ວນເຂົ້າໃນການປະຕິບັດຄວາມປາດຖະໜາບາງຢ່າງກ່ຽວກັບເສລີພາບ ແລະປະຊາທິປະໄຕຂັ້ນພື້ນຖານຂອງມະນຸດຊາດ. ຢ່າງໃດກໍຕາມ, ລະບອບປະຊາທິປະໄຕທຶນນິຍົມຍັງເປີດເຜີຍຂໍ້ບົກຜ່ອງຫຼາຍຢ່າງ. ລັດທິທຶນນິຍົມຍັງບໍ່ສາມາດເອົາຊະນະຂໍ້ຂັດແຍ່ງພື້ນຖານຂອງຕົນໄດ້...
ປະຊາທິປະໄຕສັງຄົມນິຍົມແມ່ນລະບອບປະຊາທິປະໄຕທີ່ອຳນາດທັງໝົດເປັນຂອງປະຊາຊົນຢ່າງແທ້ຈິງ. ນີ້ແມ່ນປະຊາທິປະໄຕທີ່ກວ້າງຂວາງທີ່ສຸດໃນປະຫວັດສາດ - ປະຊາທິປະໄຕທີ່ຮັບປະກັນອຳນາດທີ່ແທ້ຈິງຂອງປະຊາຊົນໄດ້ດີທີ່ສຸດ. ວ.ອີ. ເລນິນ ເຄີຍຢືນຢັນວ່າ: “ລະບອບປະຊາທິປະໄຕຂອງຊົນຊັ້ນກຳມາຊີບມີຄວາມເປັນປະຊາທິປະໄຕຫຼາຍກວ່າປະຊາທິປະໄຕຂອງຊົນຊັ້ນນາຍທຶນເຖິງລ້ານເທົ່າ: ອຳນາດການປົກຄອງໂຊວຽດເປັນປະຊາທິປະໄຕຫຼາຍກວ່າສາທາລະນະລັດທຶນນິຍົມທີ່ເປັນປະຊາທິປະໄຕທີ່ສຸດເຖິງລ້ານເທົ່າ”(1). ການເກີດຂຶ້ນຂອງປະຊາທິປະໄຕສັງຄົມນິຍົມເປັນໄປຕາມກົດເກນແຫ່ງການພັດທະນາຂອງສັງຄົມມະນຸດ, ຕອບສະໜອງຕໍ່ຄວາມປາດຖະໜາອັນຍາວນານນັບພັນປີຂອງມະນຸດຊາດທີ່ກ້າວໜ້າ.
ແຕ່ລະປະເທດ, ແຕ່ລະຊາດ, ບົນພື້ນຖານລັກສະນະເສດຖະກິດ, ການເມືອງ, ພູມສາດ, ວັດທະນະທຳ, ປະຫວັດສາດ...ຂອງປະເທດ ຊາດຕົນເອງ, ມີສິດເລືອກເອົາລະບົບການເມືອງຂອງຕົນ ແລະ ພັດທະນາເສດຖະກິດ ສັງຄົມ ແລະ ວັດທະນະທຳຢ່າງເສລີ.
ປະຊາທິປະໄຕແມ່ນທາດແທ້ຂອງລະບອບສັງຄົມນິຍົມຢູ່ຫວຽດນາມ, ປະຊາທິປະໄຕຮັບປະກັນໃຫ້ປະຊາຊົນມີອຳນາດສູງສຸດຢ່າງແທ້ຈິງ ໂດຍຕັ້ງຢູ່ບົນພື້ນຖານລະບອບກຳມະສິດສາທາລະນະໃນປັດໄຈການຜະລິດຕົ້ນຕໍຂອງສັງຄົມ ເຊິ່ງຜົນປະໂຫຍດສ່ວນບຸກຄົນ, ຜົນປະໂຫຍດສ່ວນລວມ ແລະ ຜົນປະໂຫຍດຂອງສັງຄົມໂດຍລວມ ເປັນເອກະພາບກັນ ແລະ ຫຼອມລວມກັນຢ່າງກົມກຽວ. ຢ່າງໃດກໍຕາມ, ບັນດາກຳລັງສັດຕູໄດ້ໃຊ້ທຸກກົນອຸບາຍ, ພະຍາຍາມປະຕິເສດ ແລະ ບິດເບືອນລັກສະນະດີເດັ່ນຂອງປະຊາທິປະໄຕສັງຄົມນິຍົມຢູ່ຫວຽດນາມຢ່າງຕໍ່ເນື່ອງ. ສາມາດລະບຸທັດສະນະທີ່ປະຕິເສດແລະບິດເບືອນລັກສະນະດີເດັ່ນຂອງປະຊາທິປະໄຕສັງຄົມນິຍົມຢູ່ຫວຽດນາມໄດ້ ໃນບັນດາປະເດັນຕົ້ນຕໍດັງຕໍ່ໄປນີ້:
ກ່ຽວກັບເປົ້າໝາຍ: ທຳລາຍຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ການນຳພາຂອງພັກກອມມູນິດຫວຽດນາມ ແລະ ສາທາລະນະລັດສັງຄົມນິຍົມຫວຽດນາມ; ເພື່ອກ້າວໄປສູ່ການລົບລ້າງຮາກຖານແນວຄິດການເມືອງ ແລະ ປ່ຽນແປງລະບອບການປົກຄອງທາງການເມືອງຢູ່ຫວຽດນາມ.
ກ່ຽວກັບອັດຕະພາບ: ສ່ວນໃຫຍ່ຜ່ານອົງການ, ສະມາຄົມ ແລະກຸ່ມທີ່ບໍ່ແມ່ນພາກລັດ ພາຍໃຕ້ໜ້າກາກຂອງຊາທິປະໄຕແລະສິດທິມະນຸດ; ກຸ່ມປະຕິກິລິຍາຊາວຫວຽດນາມບາງກຸ່ມຢູ່ຕ່າງປະເທດ; ກອງກຳລັງຂວາຈັດ, ສະມາຊິກລັດຖະສະພາຫົວຮຸນແຮງຈຳນວນໜຶ່ງຢູ່ປະເທດຕາເວັນຕົກ; ຜູ້ສວຍໂອກາດແລະຕໍ່ຕ້ານການເມືອງຈຳນວນໜຶ່ງໃນປະເທດທີ່ຖືກຊື້ຈ້າງຈອບອອຍ ແລະ ຖືກຊີ້ນຳໂດຍກອງກຳລັງທີ່ເປັນສັດຕູ.
ກ່ຽວກັບເນື້ອໃນ: ພະຍາຍາມເຮັດໃຫ້ລະບອບປະຊາທິປະໄຕທຶນນິຍົມຕາເວັນຕົກສົມບູນແບບແລະສົ່ງເສີມມັນ; ສຸມໃສ່ເສກສັນປັ້ນແຕ່ງ ແລະບິດເບືອນຜົນງານຂອງພັກກອມມູນິດຫວຽດນາມ ແລະລັດຫວຽດນາມ ໃນການປະຕິບັດປະຊາທິປະໄຕ, ກ່າວຫາຫວຽດນາມວ່າ “ສູນເສຍປະຊາທິປະໄຕ”, “ບໍ່ມີປະຊາທິປະໄຕ”, “ລະເມີດປະຊາທິປະໄຕ”; ຖືປະຊາທິປະໄຕເປັນສິ່ງກົງກັນຂ້າມກັບລະບຽບວິໄນ ແລະການຄຸ້ມຄອງລັດ; ສະຫຼຸບວ່າສາເຫດຂອງ “ການສູນເສຍປະຊາທິປະໄຕ” ເກີດຈາກ “ການນໍາພາຂອງພັກດຽວ”, ດັງນັ້ນ ຫວຽດນາມຕ້ອງໃຊ້ລະບອບພະຫຸນິຍົມແລະລະບົບຫຼາຍພັກ, ລົບລ້າງການນຳພາຂອງພັກກອມມູນິດຫວຽດນາມຕໍ່ລັດ ຈຶ່ງສາມາດມີປະຊາທິປະໄຕໄດ້.
ໃນດ້ານຮູບແບບແລະວິທີການ: ຮູບແບບແລະມາດຕະການໃນການດຳເນີນການມີຄວາມຫຼາກຫຼາຍ, ຊັບຊ້ອນ ແລະ ເລິກແລບແຍບຍົນທີ່ສຸດ: ສົມທົບການຄັດຄ້ານຕ້ານຢັນທາງທິດສະດີ ກັບຈິນຕະນາການ “ເກີນຈິງ” ກ່ຽວກັບບັນຫາສັງຄົມ; ສົມທົບການກໍ່ການຮ້າຍຈາກພາຍນອກເຂົ້າກັບການຊຸກຍູ້ການກໍ່ຕັ້ງສະມາຄົມ, ກຸ່ມ ແລະ ອົງການຝ່າຍຄ້ານພາຍໃນປະເທດ. ໂດຍສະເພາະຢ່າງຍິ່ງ ພວກເຂົາພະຍາຍາມໃຊ້ປະໂຫຍດຈາກຂໍ້ບົກຜ່ອງແລະຈຸດອ່ອນໃນການປະຕິບັດວຽກງານຄຸ້ມຄອງ ບໍລິຫານປະເທດ ແລະ ປະຕິບັດນະໂຍບາຍສັງຄົມ ເພື່ອຂະຫຍາຍຄວາມ ແລະ ມ້າງເພທຳລາຍ. ຮ້າຍແຮງກວ່ານັ້ນ, ພວກເຂົາໃຊ້ປະຊາທິປະໄຕ ແລະ ສິດທິມະນຸດເປັນເງື່ອນໄຂເພື່ອກົດດັນ ແລະ ແຊກແຊງກິດຈະການພາຍໃນຂອງປະເທດ, ເຊື່ອມໂຍງການຮ່ວມມື, ການຊ່ວຍເຫຼືອທາງດ້ານເສດຖະກິດແລະການທູດ ເຂົ້າກັບການຮຽກຮ້ອງປະຊາທິປະໄຕ ແລະ ສິດທິມະນຸດ. ບັນດາຖ້ອຍທຳນອງທີ່ກອງກໍາລັງເຫຼົ່ານີ້ສະເໜີອອກມານັ້ນ ເບິ່ງຄືວ່າພາວະວິໄສ, ເປັນວິທະຍາສາດ, ເປັນຫ່ວງ ແລະ ອຸທິດຕົນເພື່ອຊາຕາກໍາຂອງປະເທດຊາດແລະປະຊາຊົນ, ເຖິງແມ່ນວ່າຈະໃສ່ເສື້ອຄຸມ “ນັກປະຊາທິປະໄຕ”, “ຜູ້ຮັກຊາດ”, ແຕ່ໃນຄວາມເປັນຈິງແລ້ວ ມັນແມ່ນການຕ້ານທານທໍາລາຍແລະບິດເບືອນ. ບັນດາອິດທິກຳລັງສັດຕູໄດ້ໃຊ້ປະໂຫຍດຈາກເຄືອຂ່າຍສັງຄົມ ແລະ ສື່ມວນຊົນຢ່າງເຖິງຖອງ ເພື່ອເຜີຍແຜ່ແລະໂຄສະນາຖ້ອຍທຳນອງບິດເບືອນ, ໃສ່ຮ້າຍປ້າຍສີ, ປະຕິເສດລັກສະນະດີເດັ່ນຂອງປະຊາທິປະໄຕສັງຄົມນິຍົມຢູ່ປະເທດເຮົາ.
ກ່ຽວກັບຜົນຕາມມາແລະຜົນຮ້າຍ: ບັນດາຖ້ອຍທຳນອງບິດເບືອນ, ປະຕິເສດລະບອບປະຊາທິປະໄຕສັງຄົມນິຍົມຢູ່ຫວຽດນາມຂອງອິດທິກຳລັງສັດຕູ ໄດ້ກໍ່ໃຫ້ເກີດຄວາມສົງໄສ, ຄວາມສັບສົນ ແລະ ຄວາມລັງເລໃນໝູ່ພະນັກງານ, ສະມາຊິກພັກ ແລະ ປະຊາຊົນຈຳນວນໜຶ່ງ ກ່ຽວກັບທາດແທ້ແລະລັກສະນະດີເດັ່ນຂອງລະບອບປະຊາທິປະໄຕສັງຄົມນິຍົມຢູ່ຫວຽດນາມ ແລະ ຄວາມສາມາດໃນການປະຕິບັດປະຊາທິປະໄຕຂອງລັດແຫ່ງອຳນາດກົດໝາຍສັງຄົມນິຍົມ ພາຍໃຕ້ການນຳພາຂອງພັກກອມມູນິດຫວຽດນາມ. ຈາກນັ້ນ, ຊຸກຍູ້ “ການປ່ຽນແປງຕົນເອງ”, “ການຫັນປ່ຽນຕົນເອງ” ຢູ່ພາຍໃນ, ຍຸຍົງປຸກປັ່ນການປະທ້ວງ ແລະ ການຈະລາຈົນຕ້ານພັກແລະລັດ ເພື່ອປ່ຽນແປງລະບອບການເມືອງຂອງຫວຽດນາມ.
2- ລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມູ່ຫວຽດນາມ
ລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມແມ່ນບໍ່ອາດປະຕິເສດໄດ້. ຄວາມເປັນຈິງໄດ້ສະແດງໃຫ້ເຫັນວ່າ, ພາຍໃຕ້ການນຳພາທີ່ສະຫຼາດສ່ອງໃສ ແລະ ເກັ່ງກ້າສາມາດຂອງພັກກອມມູນິດຫວຽດນາມ, ປະຊາຊົນຫວຽດນາມຈາກການເປັນທາດກາຍມາເປັນເຈົ້າຂອງຂອງປະເທດ. ປະຊາຊົນເປັນເຈົ້າຂອງທີ່ແທ້ຈິງ ແລະ ເປັນເຈົ້າການໃນການຈັດຕັ້ງແລະສ້າງສັງຄົມໃໝ່, ຊີວິດທາງດ້ານວັດຖຸ ແລະ ຈິດໃຈທີ່ນັບມື້ນັບດີຂຶ້ນ. ທາດແທ້ທີ່ດີງາມ ແລະ ລັກສະນະດີເດັ່ນຂອງລະບົບປະຊາທິປະໄຕຢູ່ຫວຽດນາມໄດ້ຮັບການສະແດງອອກຢ່າງມີຊີວິດຊີວາ ແລະເປັນຮູບປະທຳ ໃນທຸກຂົງເຂດຂອງຊີວິດສັງຄົມ. ສິດທິມະນຸດ ແລະສິດທິພົນລະເມືອງ ໄດ້ຮັບການຮັບຮອງ ແລະ ປະຕິບັດຕາມຄຳຂວັນ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້”(2). ປະຊາຊົນເປັນເຈົ້າຂອງຂອງອຳນາດລັດຢ່າງແທ້ຈິງ, ໃນທຸກຂົງເຂດເສດຖະກິດ, ການເມືອງ, ວັດທະນະທຳ, ສັງຄົມ ໂດຍຜ່ານການເປັນເຈົ້າຂອງທັງທາງກົງ ແລະທາງອ້ອມ. ບັນດາຜົນງານແຫ່ງການປ່ຽນແປງໃໝ່ປະເທດແມ່ນຜົນຈາກຂະບວນການແຫ່ງຄວາມພະຍາຍາມ ແລະ ການຕໍ່ສູ້ຢ່າງບໍ່ຢຸດຢັ້ງຂອງພັກ, ລັດ ແລະ ປະຊາຊົນ ໃນການປະຕິບັດປະຊາທິປະໄຕສັງຄົມນິຍົມ ໃຫ້ປະກົດເປັນຈິງ. ສິ່ງດັງກ່າວສະແດງໃຫ້ເຫັນວ່າ ລະບອບປະຊາທິປະໄຕຢູ່ຫວຽດນາມແມ່ນລະບອບທີ່ “ອຳນາດລັດທັງໝົດເປັນຂອງປະຊາຊົນ” ສ້າງຂຶ້ນບົນຮາກຖານຂອງ “ພັນທະພາບລະຫວ່າງຊົນຊັ້ນກຳມະກອນ, ຊົນຊັ້ນຊາວນາ ແລະ ຖັນແຖວປັນຍາຊົນ”(3); ແມ່ນລະບອບທີ່ເສີມຂະຫຍາຍຄວາມຕັ້ງໜ້າ ແລະ ຄວາມຄິດປະດິດສ້າງຂອງປະຊາຊົນ ໃນການສ້າງສາແລະປົກປັກຮັກສາປະເທດຊາດໃຫ້ສູງທີ່ສຸດ, ຮັບປະກັນວ່າ ປະຊາຊົນມີອຳນາດການປົກຄອງຢ່າງແທ້ຈິງ.
ພະນັກງານຄຸ້ມ ເກື໋ອນາມ, ນະຄອນຮ່າໂນ້ຍ ໃຫ້ບໍລິການປະຊາຊົນ, ວັນທີ 1 ກໍລະກົດ 2025 _ພາບ: TTXVN
ຢືນຢັນການປະຕິບັດປະຊາທິປະໄຕບໍ່ສາມາດແຍກອອກຈາກລະບຽບວິໄນ, ຄວາມເປັນລະບຽບຮຽບຮ້ອຍ, ການນຳພາຂອງພັກ ແລະ ການຄຸ້ມຄອງຂອງລັດໄດ້. ການສ້າງລັດແບບໃໝ່ຂອງຊົນຊັ້ນກຳມະກອນ ແລະ ປະຊາຊົນຜູ້ອອກແຮງງານພາຍໃຕ້ການນຳພາຂອງພັກກອມມູນິດ ແມ່ນເງື່ອນໄຂຕັດສິນເບື້ອງຕົ້ນ ແລະພື້ນຖານ ສຳລັບການປະຕິບັດປະຊາທິປະໄຕສັງຄົມນິຍົມ. ດັ່ງນັ້ນ, ບໍ່ມີ "ປະຊາທິປະໄຕແບບໄຮ້ຊົນຊັ້ນ" ຫຼື "ປະຊາທິປະໄຕທົ່ວໄປ". ລະບອບປະຊາທິປະໄຕທຸກລະບອບລ້ວນເຊື່ອມໂຍງກັບລັດປະເພດໜຶ່ງ ແລະ ມີທາດແທ້ຊົນຊັ້ນຂອງຊົນຊັ້ນປົກຄອງ.
ແຕກຕ່າງຈາກລັດປະເພດອື່ນໆໃນປະຫວັດສາດ, ລັດສັງຄົມນິຍົມແມ່ນລັດປະເພດພິເສດ, ແມ່ນ “ລັດທີ່ບໍ່ມີຄວາມໝາຍເດີມອີກຕໍ່ໄປ”, ລັດ “ເຄິ່ງລັດ”. ຕາມນັ້ນ, ລັດມີພາລະໜ້າທີ່ຕົ້ນຕໍໃນການຈັດຕັ້ງກໍ່ສ້າງ, ແນໃສ່ປະຕິບັດສິດອຳນາດຂອງຊົນຊັ້ນກຳມະກອນ ແລະປະຊາຊົນຜູ້ອອກແຮງງານ. ຜະເດັດການເປັນເລື່ອງຮອງ ແຕ່ມີຄວາມຈຳເປັນທີ່ສຸດ,ເພື່ອປ້ອງກັນການກະທຳທີ່ເປັນການຕ້ານຢັນ ທຳລາຍພາລະກິດການປະຕິວັດ, ຝ່າຝືນຄຸນຄ່າປະຊາທິປະໄຕ, ລະເມີດຜົນປະໂຫຍດອັນຊອບທຳຂອງຊົນຊັ້ນກຳມະກອນ ແລະປະຊາຊົນຜູ້ອອກແຮງງານ ແລະ ຂັດຂວາງການພັດທະນາປະຊາທິປະໄຕສັງຄົມນິຍົມ. ດ້ວຍເຫດນີ້, ພັກກອມມູນິດຫວຽດນາມມີຄວາມສະເໝີຕົ້ນສະເໝີປາຍໃນການຍຶດໝັ້ນ ແລະ ແກ້ໄຂການພົວພັນ “ລະຫວ່າງການປະຕິບັດຕາມລະບອບປະຊາທິປະໄຕ ແລະ ການເພີ່ມທະວີຫຼັກນິຕິທຳ, ຮັບປະກັນວິໄນທາງສັງຄົມ”(4) ຢ່າງເໝາະສົມ. ປະຊາທິປະໄຕທີ່ຕິດພັນກັບລະບຽບວິໄນແມ່ນເງື່ອນໄຂເບື້ອງຕົ້ນ ເພື່ອໃຫ້ສິດທິຂອງແຕ່ລະຄົນໄປຄຽງຄູ່ກັບການປະຕິບັດພັນທະ, ຫຼີກລ້ຽງປະຊາທິປະໄຕທີ່ຫຼາຍເກີນໄປ, ປະຊາທິປະໄຕຕາມລຳພັງໃຈ, ອະນາທິປະໄຕ ແລະ ການຂາດຫຼັກການ. ການປະຕິບັດປະຊາທິປະໄຕທີ່ບໍ່ຈໍາແນກ ແລະໄຮ້ຫຼັກການ ເປັນສິ່ງທີ່ຂັດຕໍ່ທາດແທ້ຂອງປະຊາທິປະໄຕສັງຄົມນິຍົມ, ເປັນສາເຫດໂດຍກົງຂອງການສູນເສຍປະຊາທິປະໄຕ ແລະ ເປັນໂອກາດໃຫ້ເກີດພະຍາດອາດຍາສິດ, ອຳນາດນິຍົມ, ສໍ້ລາດບັງຫຼວງ ແລະ ປະກົດການຫຍໍ້ທໍ້.
ຢືນຢັນວ່າການນຳໃຊ້ລະບົບພະຫຸນິຍົມແລະລະບົບຫຼາຍພັກບໍ່ແມ່ນເງື່ອນໄຂທີ່ພາໃຫ້ເກີດມີປະຊາທິປະໄຕ. ການບັງຄັບໃຊ້ລະບອບປະຊາທິປະໄຕນັ້ນ ຂຶ້ນຢູ່ກັບວ່າ ພັກກຳອຳນາດຈະມີທາດແທ້ປະຕິວັດແລະນຳໜ້າຫຼືບໍ່ ແລະ ພັກລັດຖະບານສາມາດປົກປ້ອງ ແລະ ຮັບປະກັນສິດເປັນເຈົ້າຂອງຕົວຈິງ ຂອງປະຊາຊົນຜູ້ອອກແຮງງານໄດ້ດີທີ່ສຸດ ຫຼືສະເພາະຄົນສ່ວນນ້ອຍໃນສັງຄົມເທົ່ານັ້ນ. ຢູ່ຫວຽດນາມ, ການປະຖິ້ມການນຳພາແລະການກຳອຳນາດຂອງພັກກອມມູນິດຫວຽດນາມ, ການນຳໃຊ້ລະບົບພະຫຸນິຍົມແລະລະບົບຫຼາຍພັກ ບໍ່ພຽງແຕ່ຈະບໍ່ເປັນປະຊາທິປະໄຕຫຼາຍຂຶ້ນເທົ່ານັ້ນ ຫາກຍັງຈະນຳໄປສູ່ຄວາມວຸ່ນວາຍທາງສັງຄົມ, ຄວາມບໍ່ໝັ້ນຄົງຂອງຊາດ ແລະ ຄວາມຫຍຸ້ງຍາກໃນຊີວິດຂອງປະຊາຊົນອີກດ້ວຍ, ເຖິງຂັ້ນສູນເສຍຜົນງານການປະຕິວັດ ທີ່ຄົນລຸ້ນກ່ອນບໍ່ລັງເລທີ່ຈະອົດທົນຕໍ່ຄວາມລຳບາກແລະການເສຍສະຫຼະ ເພື່ອຕໍ່ສູ້ແລະຮັກສາໄວ້ ນັ້ນຄືເອກະລາດຂອງຊາດ ເສລີພາບ ແລະ ຄວາມສຸກຂອງປະຊາຊົນ. ດັງນັ້ນ, ຖ້ອຍທຳນອງທີ່ວ່າ “ຄວາມຫຼາກຫຼາຍທາງການເມືອງ” ແລະ “ຝ່າຍຄ້ານຫຼາຍພັກ” ທີ່ບັນດາອິດທິກຳລັງສັດຕູສົ່ງເສີມນັ້ນ ແທ້ຈິງແລ້ວເປັນແຜນການແລະກົນອຸບາຍເພື່ອປົດລັກສະນະສັງຄົມນິຍົມຂອງປະຊາທິປະໄຕຢູ່ຫວຽດນາມ. ນີ້ເປັນສິ່ງທີ່ຍອມຮັບບໍ່ໄດ້ ເພາະມັນຂັດຕໍ່ຄວາມປາດຖະໜາອັນຊອບທຳຂອງປະຊາຊົນຫວຽດນາມ.
ໃນສັງຄົມທຶນນິຍົມ, “ການປະກາດຄວາມສະເໝີພາບດ້ານສິດທິໂດຍປາສະຈາກຄວາມສະເໝີພາບດ້ານເງື່ອນໄຂໃນການໃຊ້ສິດເຫຼົ່ານັ້ນ ສົ່ງຜົນໃຫ້ປະຊາທິປະໄຕເຫຼືອພຽງຮູບແບບທີ່ຫວ່າງເປົ່າ ແລະ ບໍ່ມີເນື້ອໃນ”(5). ສຳລັບຫວຽດນາມ, ປະຊາທິປະໄຕສັງຄົມນິຍົມແມ່ນທາດແທ້ຂອງລະບອບສັງຄົມນິຍົມ, ທັງແມ່ນເປົ້າໝາຍ ແລະ ພະລັງຂັບເຄື່ອນຂອງການພັດທະນາປະເທດຊາດ. ມາດຕາ 6 ຂອງລັດຖະທຳມະນູນປີ 2013 ໄດ້ກຳນົດຢ່າງຈະແຈ້ງວ່າ: ປະຊາຊົນໃຊ້ອຳນາດລັດດ້ວຍປະຊາທິປະໄຕໂດຍກົງ ແລະ ປະຊາທິປະໄຕຕົວແທນຜ່ານສະພາແຫ່ງຊາດ, ສະພາປະຊາຊົນ ແລະ ບັນດາອົງການອື່ນໆຂອງລັດ. ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກ ຢັ້ງຢືນວ່າ: “ພັກນຳພາ, ລັດຄຸ້ມຄອງ, ແນວໂຮມປະເທດຊາດ ແລະ ບັນດາອົງການຈັດຕັ້ງການເມືອງ-ສັງຄົມ ເປັນແກນນຳໃຫ້ປະຊາຊົນເປັນເຈົ້າຂອງ… ເຊີດຊູບົດບາດຂອງເຈົ້າພາບ ແລະ ທີ່ຕັ້ງໃຈກາງຂອງປະຊາຊົນ ໃນຍຸດທະສາດການພັດທະນາປະເທດຊາດ, ໃນຂະບວນການກໍ່ສ້າງ ແລະ ປົກປັກຮັກສາປະເທດຊາດທັງໝົດ”(6). ໃນຄວາມເປັນຈິງ, ການສ້າງຕັ້ງລະບົບການເມືອງສັງຄົມນິຍົມຢູ່ປະເທດເຮົາ ແມ່ນການຮັບປະກັນທີ່ໝັ້ນຄົງທີ່ສຸດ ເພື່ອປະຕິບັດສິດປະຊາທິປະໄຕຂອງປະຊາຊົນຢ່າງດີທີ່ສຸດ; ເຮັດໃຫ້ປະຊາທິປະໄຕຂະຫຍາຍຕົວແລະມີເນື້ອໃນຫຼາຍຂຶ້ນ, ສະແດງໃຫ້ເຫັນເຖິງທາດແທ້ທີ່ດີຂອງລະບອບສັງຄົມນິຍົມຢ່າງແທ້ຈິງ.
3- ວິທີແກ້ໄຂບາງປະການເພື່ອຫັກລ້າງທັດສະນະທີ່ບິດເບືອນ ແລະ
ປະຕິເສດລັກສະນະດີເດັ່ນ ຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ ໃນໄລຍະຈະມາເຖິງ.
ໃນຊຸມປີຕໍ່ໜ້າ, ຄາດຄະເນວ່າ ສະຖານະການຂອງໂລກແລະພາກພື້ນຈະສືບຕໍ່ພັດທະນາຢ່າງວ່ອງໄວ, ສັບສົນ ແລະ ຄາດການບໍ່ໄດ້. ສັນຕິພາບ, ການຮ່ວມມື ແລະ ການພັດທະນາຍັງຄົງແມ່ນທ່າອ່ຽງທີ່ສຳຄັນ, ແຕ່ຍັງປະສົບກັບອຸປະສັກ, ຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ. ບັນດາຄັນຕາລະບັດໃນການປະຕິເສດລັກສະນະດີເດັ່ນຂອງປະຊາທິປະໄຕສັງຄົມນິຍົມຢູ່ຫວຽດນາມ ຍັງຄົງແມ່ນຈຸດສຸມຂອງຍຸດທະສາດ “ການຫັນປ່ຽນໂດຍສັນຕິ” ຂອງບັນດາອິດທິກຳລັງສັດຕູ. ໃນສະພາບການນັ້ນ, ເພື່ອເປີດໂປງແລະຫັກລ້າງ ບັນດາທັດສະນະທີ່ບິດເບືອນ ແລະປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ, ຈຳເປັນຕ້ອງຜັນຂະຫຍາຍປະຕິບັດມາດຕະການຕົ້ນຕໍລຸ່ມນີ້:
ທີ່ໜຶ່ງ, ຮັກສາແລະເພີ່ມທະວີການນຳພາຂອງພັກ, ການຄຸ້ມຄອງ ບໍລິຫານຂອງລັດ ຕໍ່ວຽກງານປົກປັກຮັກສາຮາກຖານແນວຄິດຂອງພັກໂດຍທົ່ວໄປ, ຕໍ່ສູ້ຫັກລ້າງບັນດາທັດສະນະທີ່ບິດເບືອນແລະປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ ເວົ້າສະເພາະ. ການແກ້ໄຂນີ້ແມ່ນພື້ນຖານເພື່ອເສີມຂະຫຍາຍກຳລັງແຮງສັງລວມຂອງທົ່ວພັກ, ທົ່ວປວງຊົນ ແລະ ຂອງລະບົບການເມືອງທັງໝົດ, ໃນນັ້ນ ສຸມໃສ່ຕໍ່ສູ້ເພື່ອເອົາຊະນະແຜນການແລະກົນອຸບາຍຂອງບັນດາອິດທິກຳລັງສັດຕູ.
ທີສອງ, ຊຸກຍູ້ການໂຄສະນາເຜີຍແຜ່, ອົບຮົມສຶກສາກ່ຽວກັບລັດທິມາກ-ເລນິນ ແລະ ແນວຄິດໂຮ່ຈີມິນ, ຍົກສູງຄວາມຮັບຮູ້ຂອງພະນັກງານ, ສະມາຊິກພັກ ແລະ ປະຊາຊົນ ກ່ຽວກັບປະຊາທິປະໄຕສັງຄົມນິຍົມ. ນີ້ແມ່ນວິທີແກ້ໄຂທີ່ສຳຄັນ ເພື່ອປະກອບສ່ວນໃນການສ້າງຄວາມຮັບຮູ້ທີ່ເປັນເອກະພາບໃນທົ່ວພັກ, ທົ່ວປວງຊົນ ແລະກອງທັບ ກ່ຽວກັບທາດແທ້ປະຕິວັດ ແລະ ວິທະຍາສາດຂອງລະບົບປະຊາທິປະໄຕສັງຄົມນິຍົມ. ຕາມນັ້ນແລ້ວ, ຕ້ອງໂຄສະນາເຜີຍແຜ່ ແລະ ສຶກສາອົບຮົມ ໃຫ້ພະນັກງານ, ສະມາຊິກພັກ ແລະ ປະຊາຊົນ ມີຄວາມເຂົ້າໃຈຢ່າງຈະແຈ້ງວ່າ ປະຊາທິປະໄຕສັງຄົມນິຍົມແມ່ນປະຊາທິປະໄຕທີ່ຮັບປະກັນອຳນາດທີ່ແທ້ຈິງຂອງປະຊາຊົນໄດ້ດີທີ່ສຸດ. “ປະຊາທິປະໄຕແມ່ນທາດແທ້ຂອງລະບອບສັງຄົມນິຍົມ, ທັງເປັນເປົ້າໝາຍ ແລະພະລັງຂັບເຄື່ອນຂອງກິດຈະການກໍ່ສ້າງສັງຄົມນິຍົມ, ການສ້າງປະຊາທິປະໄຕສັງຄົມນິຍົມ, ຮັບປະກັນອຳນາດທີ່ແທ້ຈິງເປັນຂອງປະຊາຊົນ ແມ່ນໜ້າທີ່ສຳຄັນ ແລະ ຍາວນານ ຂອງການປະຕິວັດຫວຽດນາມ. ພວກເຮົາສະໜັບສະໜູນການເສີມຂະຫຍາຍປະຊາທິປະໄຕຢ່າງບໍ່ຢຸດຢັ້ງ ແລະ ການສ້າງລັດແຫ່ງອຳນາດກົດໝາຍສັງຄົມນິຍົມ ທີ່ເປັນຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ, ບົນພື້ນຖານພັນທະພາບລະຫວ່າງກຳມະກອນ, ຊາວກະສິກອນ ແລະ ປັນຍາຊົນ ນຳໂດຍພັກກອມມູນິດຫວຽດນາມ”(7).
ທີສາມ, ເສີມຂະຫຍາຍບົດບາດຂອງກອງກຳລັງສະເພາະກິດ ແລະ ຜູ້ຮ່ວມມື ໃນການຕໍ່ສູ້ກັບທັດສະນະທີ່ບິດເບືອນແລະການປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ. ເພື່ອຕໍ່ສູ້ກັບທັດສະນະທີ່ບິດເບືອນແລະການປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມໂດຍກອງກຳລັງສັດຕູ, ຈຳເປັນຕ້ອງມີການໂຕ້ຖຽງທີ່ຊັດເຈນ ແລະເປັນວິທະຍາສາດ ໂດຍຊີ້ໃຫ້ເຫັນຂໍ້ຜິດພາດ, ຄວາມອະສັດຈະວິພາກ ແລະ ຄວາມບໍ່ສົມເຫດຜົນ ໃນຖ້ອຍທຳນອງທຳລາຍລ້າງຂອງບັນດາອິດທິກຳລັງສັດຕູ; ພ້ອມກັນນັ້ນ, ເນັ້ນຢ້ຳແລະຢືນຢັນລັກສະນະວິທະຍາສາດ ແລະ ການປະຕິວັດ ຂອງລັດທິມາກ-ເລນິນ, ແນວຄິດໂຮ່ຈີມິນ ແລະ ລະບົບປະຊາທິປະໄຕສັງຄົມນິຍົມ. ດັງນັ້ນ, ບັນດາກຳລັງສະເພາະກິດທີ່ເຮັດວຽກງານນີ້ຕ້ອງໄດ້ຮັບການຝຶກອົບຮົມແລະສົ່ງເສີມ ໃຫ້ເຂົ້າໃຈແລະຍຶດໝັ້ນໃນລັດທິມາກ-ເລນິນ, ແນວຄິດໂຮ່ຈີມິນ, ແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ; ມີຄວາມຮູ້ເລິກເຊິ່ງ ແລະ ກວ້າງຂວາງໃນຫຼາຍຂົງເຂດ; ມີຄວາມຮັບຜິດຊອບສູງ, ຄວາມສາມາດ, ລະດັບທິດສະດີ, ປະສົບການ ແລະ ຄວາມກ້າຫານທີ່ຈະຕໍ່ສູ້ຫັກລ້າງທັດສະນະທີ່ຜິດພາດແລະເປັນສັດຕູ ໃນທຸກສະຖານະການແລະສະພາບແວດລ້ອມ. ເສີມຂະຫຍາຍບົດບາດ ແລະ ຄວາມສາມາດຂອງນັກວິທະຍາສາດ, ນັກຄົ້ນຄວ້າທິດສະດີ, ນັກຂຽນ, ນັກສິລະປິນ, ປັນຍາຊົນ, ຜູ້ທີ່ມີຊື່ສຽງ ແລະ ຜູ້ທີ່ມີອິດທິພົນໃນໂລກໄຊເບີຣ໌ ທີ່ຈະມາຕໍ່ສູ້; ເອົາໃຈໃສ່ປະຕິບັດກົນໄກ ແລະ ນະໂຍບາຍສະເພາະສຳລັບກອງກຳລັງດັ່ງກ່າວ ເພື່ອສ້າງກຳລັງຂັບເຄື່ອນ ແລະ ເງື່ອນໄຂທີ່ດີທີ່ສຸດ ສຳລັບພວກເຂົາໃນການຕໍ່ສູ້.
ທີສີ່, ປ່ຽນແປງໃໝ່ເນື້ອໃນ, ຮູບການ ແລະ ວິທີການຕໍ່ສູ້ເພື່ອຫັກລ້າງທັດສະນະທີ່ບິດເບືອນ ແລະ ປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ. ປະຈຸບັນ, ບັນດາອິດທິກຳລັງສັດຕູພວມໃຊ້ກົນອຸບາຍ, ວິທະຍາສາດທຽມ, ເລ່ຫຼ່ຽມອັນຊັບຊ້ອນ ແລະ ຕັກກະແບບຮູບການ ເພື່ອບິດເບືອນເນື້ອໃນ, ທາດແທ້ ແລະ ລັກສະນະດີເດັ່ນ ຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ. ຄວາມເປັນຈິງນີ້ຮຽກຮ້ອງໃຫ້ມີການປ່ຽນແປງໃໝ່ເນື້ອໃນ, ຮູບການ ແລະວິທີການຕໍ່ສູ້. ການປະຕິບັດຄຳຂວັນ “ການກໍ່ສ້າງ” ຕິດພັນກັບ “ການຕໍ່ສູ້”, ໃນນັ້ນ “ການກໍ່ສ້າງ” ແມ່ນພື້ນຖານ, “ການຕໍ່ສູ້” ຕ້ອງເດັດດ່ຽວ, ມີປະສິດທິຜົນ, ດ້ວຍບັນດາມາດຕະການທີ່ເໝາະສົມ. ເສີມຂະຫຍາຍບົດບາດຂອງສື່ມວນຊົນໃນວຽກງານການຕໍ່ສູ້ຢ່າງແຂງແຮງ. ປະສົມປະສານຮູບແບບການຕໍ່ສູ້ດ້ານທິດສະດີທີ່ແຫຼມຄົມ ເຂົ້າກັບຮູບແບບການລະຄອນ, ວັນນະກຳ, ບົດກະວີ, ລະຄອນເພງ ແລະອື່ນໆ ຢ່າງໃກຊິດ. ໃຊ້ປະໂຍດຈາກຜົນສຳເລັດຂອງການປະຕິວັດອຸດສາຫະກຳຄັ້ງທີສີ່, ໂດຍສະເພາະແມ່ນ ໂລກໄຊເບີຣ໌, ເພີ່ມທະວີການໂພດບົດຄວາມໃນເວັບໄຊ, ບລັອກ, ແຟນເພຈ, ເຄືອຂ່າຍສັງຄົມ, youtube, ເວທີປາໄສຕ່າງໆ ເພື່ອຕໍ່ສູ້, ແນໃສ່ຮັບປະກັນຄວາມທັນເວລາ, ເພີ່ມຂອບເຂດການໂຄສະນາ ຕໍ່ສູ້ ແລະ ເຂົ້າເຖິງມວນຊົນ.
ທີຫ້າ, ສະແດງໃຫ້ເຫັນ ແລະ ຢືນຢັນທາດແທ້ທີ່ດີງາມ ແລະ ບັນດາຜົນງານໃນການປະຕິບັດປະຊາທິປະໄຕສັງຄົມນິຍົມຢູ່ຫວຽດນາມ. ເພີ່ມທະວີວຽກງານໂຄສະນາເຜີຍແຜ່ກ່ຽວກັບບັນດາຜົນງານໃນການກໍ່ສ້າງປະເທດຊາດ ແລະ ປະຕິບັດປະຊາທິປະໄຕຢູ່ຫວຽດນາມ. ສົມທົບກັນຢ່າງແໜ້ນແຟ້ນບັນດາຊ່ອງທາງຂໍ້ມູນຂ່າວສານ ແລະ ການໂຄສະນາ; ຍາດແຍ່ງເອົາກຳລັງແຮງທາງການທູດ ແລະ ການຮ່ວມມືກັບສາກົນ ເພື່ອໂຄສະນາ, ເຮັດໃຫ້ປະຊາຄົມໂລກ ແລະ ພີ່ນ້ອງຮ່ວມຊາດຢູ່ຕ່າງປະເທດ ເຫັນໄດ້ຢ່າງຈະແຈ້ງເຖິງຜົນສຳເລັດຂອງລະບົບປະຊາທິປະໄຕຢູ່ຫວຽດນາມ, ຜ່ານນັ້ນທັບມ້າງ ຫັກລ້າງບັນດາຖ້ອຍທຳນອງທີ່ບິດເບືອນ ແລະ ປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ.
ທີຫົກ, ເປັນເຈົ້າການໃນການກຳສະພາບການ, ຄາດຄະເນຢ່າງທັນການ ບັນດາກົນອຸບາຍ ແລະ ການເຄື່ອນໄຫວຂອງອິດທິກຳລັງສັດຕູທີ່ບິດເບືອນ ແລະ ປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ. ປັບປຸງຍົກສູງປະສິດທິຜົນວຽກງານຄົ້ນຄ້ວາແລະຄາດຄະເນ, ເອົາໃຈໃສ່ຢ່າງເປັນປະຈຳເຖິງການເກັບກຳແຜນການແລະກົນໄກຂອງອິດທິກຳລັງສັດຕູ; ຮັບຮູ້ຢ່າງຈະແຈ້ງເຖິງເລ່ຫຼ່ຽມແລະຄວາມຮ້າຍກາດຂອງບັນດາອິດທິກຳລັງສັດຕູ ເມື່ອພາກເຂົາສະແດງທັດສະນະທີ່ບິດເບືອນ ແລະ ປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ. ລະບຸເປົ້າໝາຍຂອງການຕໍ່ສູ້ ແລະວິທີການທີ່ພວກເຂົາໃຊ້ໄດ້ຢ່າງຖືກຕ້ອງ; ເພີ່ມຄວາມລະມັດລະວັງ, ຄາດຄະເນຢ່າງຖືກຕ້ອງກ່ຽວກັບຈຸດສຳຄັນຂອງການກໍ່ການຮ້າຍ ແລະ ສະຖານທີ່ທີ່ອາດຈະກາຍເປັນ “ຈຸດຮ້ອນ” ທີ່ກອງກຳລັງສັດຕູເລັ່ງເປົ້າໝາຍ, ໂດຍສະເພາະໃນພື້ນທີ່ສຳຄັນ, ເຂດຫ່າງໄກສອກຫຼີກ, ເຂດຊົນເຜົ່າສ່ວນໜ້ອຍ, ພື້ນທີ່ທີ່ມີສະພາບເສດຖະກິດ-ສັງຄົມທີ່ຫຍຸ້ງຍາກ ແລະ ມີການຮ້ອງທຸກທີ່ຍືດເຍື້ອ. ສົມທົບຢ່າງແໜ້ານແຟ້ນ ການປ້ອງກັນແລະການຄວບຄຸມ ເຂົ້າກັບການເປັນເຈົ້າການໃນການບຸກໂຈມຕີ, ທັບມ້າງ ຫັກລ້າງຖ້ອຍທຳນອງທີ່ບິດເບືອນແລະທຳລາຍຂອງສັດຕູ, ບໍ່ໃຫ້ຕົກໃນທ່າຮັບແລະຄວາມບັງເອີນ; ເປັນເຈົ້າການໃນການໂຄສະນາເຜີຍແຜ່ ແລະ ຕໍ່ສູ້ຕ້ານທັດສະນະທີ່ຜິດພາດ ແລະ ເປັນສັດຕູ ກ່ອນກອງປະຊຸມໃຫຍ່ຂອງພັກ, ກອງປະຊຸມສະພາແຫ່ງຊາດແຕ່ລະຄັ້ງ ຫຼືໃນໂອກາດສະຫຼອງວັນບຸນປະຈຳຊາດທີ່ສຳຄັນ. ເພີ່ມທະວີການນຳໃຊ້ເຕັກໂນໂລຊີ ແລະວິທີການດິຈິຕອນ ເພື່ອກວດຈັບແລະຫັກລ້າງທັດສະນະທີ່ຜິດພາດແລະເປັນປະຕິປັກໄດ້ຢ່າງທັນທ່ວງທີ. ຈັດຕັ້ງການສະຫຼຸບເບື້ອງຕົ້ນ, ສະຫຼຸບສັງລວມ ແລະຖອດຖອນບົດຮຽນ ເພື່ອປັບປຸງຍົກສູງປະສິດທິຜົນຂອງການຕໍ່ສູ້ຕ້ານທັດສະນະທີ່ບິດເບືອນ ແລະ ປະຕິເສດລັກສະນະດີເດັ່ນຂອງລະບົບປະຊາທິປະໄຕສັງຄົມນິຍົມຢູ່ຫວຽດນາມ.
-----------------------------------------------
(1) ວ.ອີ. ເລນິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2005, ເຫຼັ້ມ 37, ໜ້າ 312–313
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 173
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ໜ້າ 85
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 119
(5) ຫງວຽນຝູຈ້ອງ: ບາງບັນຫາທິດສະດີ ແລະ ພຶດຕິກຳກ່ຽວກັບລັດທິສັງຄົມນິຍົມ ແລະເສັ້ມທາງໄປສູ່ສັງຄົມນິຍົມຢູ່ຫວຽດນາມ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2022, ໜ້າ 21
(6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 173
(7) ຫງວຽນຝູຈ້ອງ: ບາງບັນຫາທິດສະດີ ແລະ ພຶດຕິກຳກ່ຽວກັບລັດທິສັງຄົມນິຍົມ ແລະເສັ້ມທາງໄປສູ່ສັງຄົມນິຍົມຢູ່ຫວຽດນາມ, ປຶ້ມທີ່ໄດ້ແນະນຳ, ໜ້າ 28.
