ເພື່ອໃຫ້ປະກັນສັງຄົມແລະປະກັນສຸຂະພາບກາຍເປັນເສົາຄ້ຳທີ່ແທ້ຈິງ
ຂອງລະບົບຄວາມປອດໄພທາງສັງຄົມ
ຂອງລະບົບຄວາມປອດໄພທາງສັງຄົມ
ວກ. - ຢູ່ປະເທດຫວຽດນາມ, ປະກັນສັງຄົມແລະປະກັນສຸຂະພາບແມ່ນບັນດາເສົາຄ້ຳຂອງລະບົບຄວາມປອດໄພທາງສັງຄົມ. ໃນເວລາທີ່ຜ່ານມາ, ພັກແລະລັດຫວຽດນາມໄດ້ປະກາດໃຊ້ແຜນນະໂຍບາຍແລະນະໂຍບາຍປະກັນສັງຄົມ, ປະກັນສຸຂະພາບຫຼາຍສະບັບ ທີ່ເໝາະສົມກັບແຕ່ລະໄລຍະປະຫວັດສາດຂອງປະເທດ, ປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດຄວາມກ້າວໜ້າ, ຄວາມຍຸດຕິທຳ ທາງສັງຄົມ ແລະ ການພັດທະນາປະເທດແບບຍືນຍົງ.
ພະນັກງານສາທາລະນະສຸກຂອງສຸກສາລາ ຂອງຕາແສງຫ້ວຍລວງ, ເມືອງຟອງໂຖ, ແຂວງລາຍເຈົາ ລົງຮາກຖານເພື່ອເຜີຍແຜ່ໃຫ້ປະຊາຊົນຮູ້ ກ່ຽວກັບນະໂຍບາຍປະກັນສຸຂະພາບ ແລະປະກັນສັງຄົມ _ພາບ: TTXVN)
ບັນດາບາດກ້າວໄປຂ້າງຫນ້າທີ່ໝັ້ນຄົງ
ຮັກສາຄວາມປອດໄພທາງສັງຄົມແມ່ນໜຶ່ງໃນບັນດາໜ້າທີ່ທີ່ສຳຄັນ ເຊິ່ງພັກກອມມູນິດຫວຽດນາມໄດ້ວາງອອກມາຕັ້ງແຕ່ເມື່ອເລີ່ມກໍ່ຕັ້ງ (3-2-1930).
ໃນກອງປະຊຸມຄະນະບໍລິຫານງານສູນກາງເດືອນພະຈິກ 1940, ພັກກອມມູນິດຫວຽດນາມໄດ້ເນັ້ນວ່າ “ຈະອອກກົດໝາຍປະກັນສັງຄົມ” ເມື່ອລັດຖະບານປະຕິວັດຖືກສ້າງຕັ້ງຂຶ້ນ ແລະ ສ້າງກອງທຶນບຳເນັດບຳນານສຳລັບຜູ້ສູງອາຍຸ. ໂດຍຊາບຊຶມຈິດໃຈດັ່ງກ່າວ, ນັບແຕ່ປີ 1941, ໃນ “ສິບນະໂຍບາຍຂອງຫວຽດມິງ” ທີ່ປະທານໂຮ່ຈີມິນຮ່າງ, ບັນດາເປົ້າໝາຍກ່ຽວກັບການຮັບປະກັນຄວາມປອດໄພທາງສັງຄົມໃຫ້ກັບພີ່ນ້ອງຮ່ວມຊາດ ໄດ້ຖືກວາງອອກມາອີກຄັ້ງ. ອາດຈະເວົ້າໄດ້ວ່າ, ນີ້ແມ່ນບັນດາປະຖົມປັດໄຈທີ່ເປັນພື້ນຖານທີ່ສຸດ ເພື່ອສ້າງລະບົບນະໂຍບາຍປະກັນສັງຄົມແລະປະກັນສຸຂະພາບຢູ່ປະເທດຂອງພວກເຮົາຫຼັງຈາກນັ້ນ. ແນວຄິດນັ້ນແມ່ນຄ້າຍຄືກັບເສັ້ນດ້າຍສີແດງທີ່ສອດຫ້ອຍຕະຫຼອດລັດຖະທໍາມະນູນສະບັບຕ່າງໆຂອງລັດຫວຽດນາມໃນຕໍ່ມາ, “ພົນລະເມືອງມີສິດໄດ້ຮັບປະກັນຄວາມປອດໄພທາງສັງຄົມ” (ມາດຕາ 34, ລັດຖະທຳມະນູນປີ 2013).
ໃນຊຸມປີທີ່ຜ່ານມາ, ພັກແລະລັດຫວຽດນາມຍາມໃດກໍເອົາໃຈໃສ່ເຖິງການຊີ້ນຳ ນຳພາ, ສ້າງແລະປະຕິບັດນະໂຍບາຍຄວາມປອດໄພທາງສັງຄົມເວົ້າລວມ, ນະໂຍບາຍປະກັນສັງຄົມແລະປະກັນສຸຂະພາບເວົ້າສະເພາະ ເພື່ອຊຸກຍູ້ຄວາມກ້າວໜ້າ ແລະຍຸດຕິທຳທາງສັງຄົມ, ຖືວ່ານີ້ທັງແມ່ນເປົ້າໝາຍ, ທັງແມ່ນກຳລັງໜູນການພັດທະນາປະເທດຢ່າງຍືນຍົງ, ສະແດງໃຫ້ເຫັນເຖິງທາດແທ້ທີ່ດີງາມຂອງລະບອບການເມືອງຂອງພວກເຮົາ. ລະບົບນະໂຍບາຍປະກັນສັງຄົມແລະປະກັນສຸຂະພາບນັບມື້ນັບສົມບຸນແບບ, ສອດຄ່ອງເໝາະສົມກັບການພັດທະນາເສດຖະກິດ-ສັງຄົມຂອງປະເທດ. ຢູ່ປະເທດຫວຽດນາມ, ການປະກັນສັງຄົມແລະປະກັນສຸຂະພາບໄດ້ຮັບການຢືນຢັນວ່າເປັນສອງນະໂຍບາຍສັງຄົມທີ່ສໍາຄັນ ມີບົດບາດເປັນເສົາຄ້ຳໃນລະບົບຄວາມປອດໄພທາງສັງຄົມ. ສິ່ງນີ້ສະແດງໃຫ້ເຫັນຢູ່ໃນບາງເນື້ອໃນຕໍ່ໄປນີ້:
ລະບົບກົດໝາຍປະກັນສັງຄົມ ແລະປະກັນສຸຂະພາບ ນັບມື້ນັບໄດ້ຮັບການປັບປຸງໃຫ້ສົມບູນແບບ, ສອດຄ່ອງກັບຄວາມຕ້ອງການພາກປະຕິບັດ, ສິດແລະຜົນປະໂຫຍດທີ່ຖືກຕ້ອງຕາມກົດໝາຍຂອງຜູ້ອອກແຮງງານແລະປະຊາຊົນ. ບັນດາດຳລັດ, ກົດລະບຽບຊົ່ວຄາວກ່ຽວກັບການປະກັນສັງຄົມໄດ້ຮັບການຍົກລະດັບຂຶ້ນເປັນພື້ນຖານກົດໝາຍທີ່ສູງກວ່າ ແລະ ນັບມື້ນັບເຂົ້າສູ່ຊີວິດ ດ້ວຍກົດໝາຍວ່າດ້ວຍການປະກັນສຸຂະພາບປີ 2008, ສະບັບປັບປຸງເພີ່ມເຕີມປີ 2014. ກົດໝາຍແມ່ນເອກະສານທີ່ມີຄຸນຄ່ານິຕິທຳສູງ ຈັດຕັ້ງທັດສະນະແລະແນວທາງຂອງພັກແລະລັດ ໃນການປະຕິບັດເປົ້າໝາຍການປະກັນສຸຂະພາບທົ່ວປວງຊົນ, ສ້າງລະບົບສາທາລະນະສຸກຫວຽດນາມຕາມທິດສະເໝີພາບ, ມີປະສິດທິຜົນ ແລະ ການພັດທະນາ. ຕາມນັ້ນ, ການກວດແລະປົວພະຍາດຕາມການປະກັນສຸຂະພາບນັບມື້ນັບມີການປັບປຸງຫຼາຍຢ່າງໃນທິດທາງທີ່ເອື້ອອໍານວຍໃຫ້ກັບຄົນເຈັບຫຼາຍຂຶ້ນ; ສິດຜົນປະໂຫຍດຂອງຜູ້ເຂົ້າຮ່ວມການປະກັນສຸຂະພາບນັບມື້ນັບໄດ້ຮັບການເປີດກວ້າງ. ກອງທຶນປະກັນສຸຂະພາບກາຍເປັນແຫຼ່ງການເງິນທີ່ສຳຄັນ, ກວມເອົາອັດຕາສ່ວນເພີ່ມຂຶ້ນຂອງລາຍຈ່າຍທັງໝົດໃນການກວດສຸຂະພາບ, ການປົວພະຍາດ ແລະ ການເບິ່ງແຍງສຸຂະພາບຂອງປະຊາຊົນ.
ກ່ອນປີ 1995, ຂະແໜງການປະກັນສັງຄົມຫວຽດນາມຄຸ້ມຄອງຜູ້ອອກແຮງງານພຽງ 2,87 ລ້ານຄົນເທົ່ານັ້ນ ແຕ່ຮອດທ້າຍປີ 2020, ເຖິງວ່າສະພາບການລະບາດຂອງໂຄວິດ-19 ມີການຜັນປ່ຽນຢ່າງສັບສົນກໍຕາມ ແຕ່ການປົກຫຸ້ມຂອງປະກັນສັງຄົມຍັງສືບຕໍ່ເພີ່ມຂຶ້ນ ໂດຍມີຜູ້ເຂົ້າຮ່ວມຫຼາຍກວ່າ 16,1 ລ້ານຄົນ, ບັນລຸ 32,6% ຂອງກໍາລັງແຮງງານໃນກຸ່ມອາຍຸ. ໃນນັ້ນ, ຈໍານວນຄົນເຂົ້າຮ່ວມການປະກັນສັງຄົມແບບສະໝັກໃຈແມ່ນເກືອບ 1,1 ລ້ານຄົນ, ເພີ່ມຂຶ້ນ 494 ພັນຄົນ, ເກືອບສອງເທົ່າຂອງປີ 2019; ກຳລັງຄົນງານໃນໄວອາຍຸແມ່ນຊາວນາ ແລະ ຄົນງານໃນຂົງເຂດເສດຖະກິດທີ່ບໍ່ເປັນທາງການ ເຂົ້າຮ່ວມການປະກັນສັງຄົມແບບສະໝັກໃຈ ບັນລຸປະມານ 2,2%, ສູງກວ່າເກືອບ 5 ເທົ່າຂອງປີ 2015. ທົ່ວປະເທດມີຜູ້ເຂົ້າຮ່ວມປະກັນການຫວ່າງງານເກືອບ 13,3 ລ້ານຄົນ, ກວມເອົາປະມານ 27% ຂອງກໍາລັງແຮງງານໃນກຸ່ມອາຍຸ.
ໃນແຕ່ລະປີ, ມີຄົນງານເພີ່ມຂຶ້ນຫຼາຍແສນຄົນ, ຜູ້ຄົນນັບລ້ານໄດ້ຮັບການເບິ່ງແຍງສຸຂະພາບ ແລະປົກປ້ອງສິດຜົນປະໂຫຍດສະຫວັດດີການພື້ນຖານທີ່ສຸດ ຜ່ານການປະຕິບັດລະບອບປະກັນສັງຄົມແລະປະກັນສຸຂະພາບ _ພາບ: ເອກະສານຂໍ້ມູນ
ການປົກຫຸ້ມຂອງການປະກັນສຸຂະພາບ ສືບຕໍ່ມີການຂະຫຍາຍຕົວທີ່ໜ້າປະທັບໃຈ ດ້ວຍຜູ້ເຂົ້າຮ່ວມປະມານ 88 ລ້ານຄົນ, ກວມເອົາ 90,85% ຂອງປະຊາກອນ, ເພີ່ມ 25,6% ທຽບກັບປີ 2015. ດ້ວຍອັດຕາການປົກຫຸ້ມນີ້ ຫວຽດນາມໄດ້ສຳເລັດໂດຍພື້ນຖານເປົ້າໝາຍການປະກັນສຸຂະພາບທົ່ວປວງຊົນ ແລະ ສໍາເລັດກ່ອນກຳນົດເວລາ. ທຽບກັບບັນດາປະເທດທີ່ພັດທະນາແລ້ວໃນໂລກເຊິ່ງໄດ້ເສຍເວລາແຕ່ 40 ເຖິງ 80 ປີຈຶ່ງບັນລຸເປົ້າໝາຍປະກັນສຸຂະພາບທົ່ວປວງຊົນ, ໃນຂະນະນັ້ນ ຫວຽດນາມເສຍເວລາ 17 ປີ. ສິ່ງນີ້ຢືນຢັນວ່າ, ແຕ່ລະປີມີຜູ້ອອກແຮງງານຫຼາຍແສນຄົນ, ຜູ້ຄົນນັບລ້ານຄົນໄດ້ຮັບການດູແລສຸຂະພາບ ແລະປົກປ້ອງສິດຜົນປະໂຫຍດສະຫວັດດີການທີ່ພື້ນຖານທີ່ສຸດ ຜ່ານລະບອບປະກັນສັງຄົມແລະປະກັນສຸຂະພາບ ແລະ ປະກອບສ່ວນຮັບປະກັນຄວາມປອດໄພທາງສັງຄົມ, ກ້າວເຖິງເປົ້າໝາຍຄວາມຍຸດຕິທຳທາງສັງຄົມ.
ກ່ຽວກັບການແກ້ໄຂລະບອບ, ນະໂຍບາຍ: ແຕ່ປີ 1995 ເຖິງປີ 2019, ທົ່ວຂະແໜງການປະກັນສັງຄົມໄດ້ຈັດໃຫ້ຜູ້ອອກແຮງງານຫຼາຍກ່ວາ 120 ລ້ານຄົນໄດ້ຮັບການປິ່ນປົວພະຍາດ, ການເກີດລູກ, ການພັກຜ່ອນ ແລະ ຜົນປະໂຫຍດການຟື້ນຟູສຸຂະພາບ (ຄິດສະເລ່ຍແຕ່ລະປີມີຫຼາຍກວ່າ 4,8 ລ້ານຄົນ)...; ແຕ່ປີ 2010 ເຖິງທ້າຍປີ 2019 ແກ້ໄຂໃຫ້ຜູ້ອອກແຮງງານເກືອບ 6,9 ລ້ານຄົນຮັບຜົນປະໂຫຍດປະກັນການຫວ່າງງານ (ຄິດສະເລ່ຍແຕ່ລະປີມີຫຼາຍກວ່າ 689 ພັນຄົນ). ສະເພາະປີ 2020 ແກ້ໄຂໃຫ້ຜູ້ອອກແຮງງານຫຼາຍກວ່າ 133.300 ຄົນຮັບເງິນບໍານານແລະເງິນອຸດໜູນປະກັນສັງຄົມປະຈໍາເດືອນ; ຫຼາຍກວ່າ 897 ພັນຄົນຮັບເງິນອຸດໜູນຄັ້ງດຽວ; ເກືອບ 9,6 ລ້ານຄົນໄດ້ຮັບການອຸດໜຸນການປົວພະຍາດ, ການເກີດລູກ, ການພັກຜ່ອນ ແລະ ຜົນປະໂຫຍດການຟື້ນຟູສຸຂະພາບ (ເພີ່ມຂຶ້ນ 27,1% ເມື່ອທຽບກັບປີ 2015); ຫຼາຍກວ່າ 1,006 ລ້ານຄົນໄດ້ຮັບເງິນຊ່ວຍເຫຼືອການຫວ່າງງານ, ເພີ່ມຂຶ້ນ 20,4% ເມື່ອທຽບກັບປີ 2019, ເພີ່ມຂຶ້ນ 91,2% ເມື່ອທຽບກັບປີ 2015; ໄດ້ຊຳລະຄ່າກວດສຸຂະພາບແລະປິ່ນປົວພະຍາດຕາມຫຼັກປະກັນສຸຂະພາບກວ່າ 167,2 ລ້ານເທື່ອຄົນຂອງການກວດສຸຂະພາບແລະຮັກສາຜູ້ປ່ວຍໃນໂຮງໝໍແລະນອກໂຮງໝໍ, ເພີ່ມຂຶ້ນ 28,4% ເມື່ອທຽບກັບປີ 2015.
ໂດຍສະເພາະຢ່າງຍິ່ງ, ໃນສະພາບການການລະບາດຂອງໂຄວິດ-19 ສົ່ງຜົນກະທົບເຖິງທຸກດ້ານຂອງຊີວິດເສດຖະກິດແລະສັງຄົມ, ນະໂຍບາຍປະກັນສັງຄົມຍິ່ງສະແດງໃຫ້ເຫັນເຖິງຄວາມດີເດັ່ນ, ມະນຸດສະທຳ, ການແບ່ງປັນແລະຊ່ວຍເຫຼືອປະຊາຊົນ, ຊ່ວຍໃຫ້ຜູ້ອອກແຮງງານເອົາຊະນະຄວາມຫຍຸ້ງຍາກເນື່ອງຈາກລາຍໄດ້ຫຼຸດລົງແລະການສູນເສຍວຽກ. ຂະແໜງການປະກັນສັງຄົມໄດ້ປະຕິບັດບັນດາໜ້າທີ່ຮີບດ່ວນຢ່າງທັນການ, ປະກອບສ່ວນແກ້ໄຂຄວາມຫຍຸ້ງຍາກໃນການຜະລິດ ທຸລະກິດ, ຮັບປະກັນຄວາມປອດໄພທາງສັງຄົມເຊັ່ນ: ການແກ້ໄຂການລະງັບຊົ່ວຄາວ ການປະກອບສ່ວນຂອງວິສາຫະກິດເຂົ້າໃນກອງທຶນບໍານານແລະຜູ້ເສຍຊີວິດ, ເພີ່ມທະວີແລະສະໜັບສະໜູນຫຼາຍສຸດໃຫ້ແກ່ການແກ້ໄຂລະບຽບການບໍລິຫານ ຜ່ານທຸລະກຳເອເລັກໂຕຣນິກ, ການຊຳລະເງິນບຳນານຢູ່ທີ່ເຮືອນສຳລັບຜູ້ສູງອາຍຸ...
ກ່ຽວກັບການປະຕິຮູບການບໍລິຫານ: ການປະຕິຮູບລະບຽບການບໍລິຫານໄດ້ຖືກອົງການປະກັນສັງຄົມຫວຽດນາມສຸມໃສ່ຜັນຂະຫຍາຍຢ່າງຮີບເຮັ່ງ ຄົບຊຸດ, ຖືກຕ້ອງຕາມການຊີ້ນຳຂອງລັດຖະບານ, ນາຍົກລັດຖະມົນຕີ, ສ້າງຄວາມສະດວກສະບາຍສູງສຸດໃຫ້ກັບປະຊາຊົນແລະວິສາຫະກິດ ເມື່ອພົວພັນກັບອົງການປະກັນສັງຄົມ. ຊຸດຂັ້ນຕອນການບໍລິຫານຂອງຂະແໜງການປະກັນສັງຄົມຫວຽດນາມໄດ້ຫຼຸດລົງຈາກ 114 ຂັ້ນຕອນ (ປີ 2015) ເປັນ 27 ຂັ້ນຕອນ (ປີ 2019); ຈຳນວນຊົ່ວໂມງໃນການດຳເນີນການບໍລິຫານງານບຸກຄົນແລະວິສາຫະກິດ ຫຼຸດລົງຈາກ 335 ຊົ່ວໂມງ/ປີ (ປີ 2015) ເປັນ 147 ຊົ່ວໂມງ (ປີ 2019), ປະຈຸບັນໄດ້ສຳເລັດຂັ້ນຕອນການລາຍງານຕໍ່ທະນາຄານໂລກ ເພື່ອຮັບຮູ້ 129 ຊົ່ວໂມງ/ປີ.
ກ່ຽວກັບການປະຍຸກໃຊ້ເຕັກໂນໂລຊີຂໍ້ມູນຂ່າວສານ: ການປະຍຸກໃຊ້ເຕັກໂນໂລຊີຂໍ້ມູນຂ່າວສານໃນການຄຸ້ມຄອງ ໄດ້ບັນລຸຜົນສຳເລັດທີ່ໂດດເດັ່ນ, ປະກອບສ່ວນປ່ຽນແປງໃໝ່ແບບວິທີການເຄື່ອນໄຫວ ແລະ ສ້າງຄວາມທັນສະໄໝໃຫ້ກັບຂະແໜງການປະກັນສັງຄົມຫວຽດນາມ, ຕອບສະໜອງຄວາມຕ້ອງການຂອງການສ້າງລັດຖະບານເອເລັກໂຕຣນິກ ໃນລະຫວ່າງການປະຕິວັດອຸດສາຫະກຳຄັ້ງທີສີ່. ປີ 2020, ຂະແໜງການໄດ້ສໍາເລັດການສະໜອງການບໍລິການສາທາລະນະລະດັບ 4 ສໍາລັບຂັ້ນຕອນການບໍລິຫານທັງໝົດ, ພ້ອມກັນນັ້ນ, ເປັນເຈົ້າການໃນການປະສົມແລະໃຫ້ບໍລິການສາທາລະນະ 15 ລາຍການບໍລິການລະດັບ 4 ຂອງຂະແໜງການ, ບໍລິການສະທາລະນະທີ່ກ່ຽວຂ້ອງກັບກະຊວງແລະຂະແໜງການ ໃນປະຕູການບໍລິການສາທາລະນະແຫ່ງຊາດ.
ເພື່ອສືບຕໍ່ສະໜອງການບໍລິການທີ່ສະດວກສະບາຍຮັບໃຊ້ປະຊາຊົນ, ອົງການປະກັນສັງຄົມຫວຽດນາມໄດ້ຄົ້ນຄວ້າ, ສ້າງ ແລະ ນຳໃຊ້ຢ່າງສໍາເລັດຜົນ ແອບພຼີເຄຊັນ “VssID - ການປະກັນສັງຄົມດິຈິຕອນ” ບົນພື້ນຖານອຸປະກອນມືຖື. ຈາກນັ້ນ ສະໜອງພາລະບົດບາດແລະອັດຖະປະໂຫຍດ ເພື່ອຄົ້ນຫາແລະຊອກຫາຂໍ້ມູນກ່ຽວກັບການເສຍຄ່າປະກັນສັງຄົມແລະການຮັບຜົນປະໂຫຍດປະກັນສັງຄົມ, ປະກັນສຸຂະພາບ; ປະຫວັດການຊົມໃຊ້ລະບອບ ນະໂຍບາຍການປະກັນສັງຄົມແລະປະກັນສຸຂະພາບ; ສະຖານທີ່ກວດສຸຂະພາບແລະປົວພະຍາດຕາມຫຼັກປະກັນສຸຂະພາບ; ບັນດາຈຸດເກັບເບ້ຍປະກັນສຸຂະພາບແລະຕົວແທນເກັບເບ້ຍປະກັນສຸຂະພາບ... ໃນປະຈຸບັນ, ທົດລອງການນຳໃຊ້ຮູບບັດປະກັນໄພສຸຂະພາບຢູ່ໃນແອບພຼີເຄຊັນ VssID ທົດແທນໃຫ້ບັດປະກັນສຸຂະພາບແບບເຈ້ຍ (ເສຍຫາຍ, ສູນຫາຍຍ້ອນພະຍຸ, ນ້ຳຖ້ວມ,...) ເພື່ອກວດສຸຂະພາບແລະປົວພະຍາດປູ່ 10 ແຂວງໃນພາກກາງ - ໄຕງວຽນທີ່ຖືກຜົນກະທົບ ເສຍຫາຍຍ້ອນພາຍຸ, ນ້ຳຖ້ວມ.
ພະນັກງານປະກັນສັງຄົມນະຄອນໂຮ່ຈີມິນໃຫ້ຄຳປຶກສາ ແນະນຳປະຊາຊົນນຳໃຊ້ VssID - ປະກັນສັງຄົມດິຈິຕອນ _ແຫຼ່ງ: baohiemxahoi.gov.vn
ຜົນສຳເລັດເຫຼົ່ານີ້ປະກອບສ່ວນສຳຄັນເຂົ້າໃນການປະຕິບັດເປົ້າໝາຍທີ່ພັກແລະລັດໄດ້ວາງອອກມາຄື ຮັບໃຊ້ ເບິ່ງແຍງດູແລປະຊາຊົນ, ຢືນຢັນທັດສະນະທີ່ຖືກຕ້ອງຂອງພັກ ໃນການສົ່ງເສີມປະຊາຊົນຍົກສູງຄວາມສາມາດຮັບປະກັນຄວາມປອດໄພທາງສັງຄົມດ້ວຍຕົນເອງ.
ນອກຈາກບັນດາຜົນສຳເລັດທີ່ໄດ້ຮັບນັ້ນ, ການປະຕິບັດນະໂຍບາຍປະກັນສັງຄົມແລະປະກັນສຸຂະພາບກໍຍັງປະສົບກັບຄວາມຫຍຸ້ງຍາກ, ສິ່ງທ້າທາຍບໍ່ໜ້ອຍເຊັ່ນ: ລະບົບນະໂຍບາຍ ກົດໝາຍກ່ຽວກັບການປະກັນໄພສັງຄົມບໍ່ທ່ວງທັນກັບສະພາບການພັດທະນາເສດຖະກິດ-ສັງຄົມ, ຍັງບໍ່ທັນປັບໃຫ້ເຂົ້າກັບຂະບວນການປະຊາກອນສູງອາຍຸ ແລະການເກີດຂຶ້ນຂອງການພົວພັນແຮງງານໃໝ່; ການເປີດກວ້າງແລະພັດທະນາເປົ້າໝາຍຜູ້ເຂົ້າຮ່ວມປະກັນສັງຄົມຍັງຕ່ຳກວ່າລະດັບຄວາມສາມາດ; ລະດັບການປົກຫຸ້ມຂອງປະກັນສັງຄົມເພີ່ມຂຶ້ນຢ່າງຊັກຊ້າ; ຈຳນວນຜູ້ມີສິດໄດ້ຮັບປະກັນສັງຄົມຄັ້ງດຽວເພີ່ມຂຶ້ນຢ່າງໄວ; ສະພາບການຫຼົບຫຼີກປະກັນໄພ, ການໜີ້ຄ່າປະກັນ, ການສໍ້ໂກງ, ການສະແຫວງຫາກຳໄລຈາກປະກັນສັງຄົມໄດ້ຮັບການແກ້ໄຂຜ່ານຜ່າຢ່າງຊັກຊ້າ... ໃນຂະນະນັ້ນ, ເປົ້າໝາຍທີ່ວາງໄວ້ແມ່ນ ອັດຕາການປົກຫຸ້ມປະກັນສັງຄົມເຖິງ 35% ຂອງແຮງງານໃນໄວເຮັດວຽກ ທ້າຍປີ 2021; 45% ໃນປີ 2025; ປະກັນການຫວ່າງງານບັນລຸ 28% ໃນປີ 2021 ແລະ 35% ໃນປີ 2025...
ພະຍາຍາມບັນລຸເປົ້າໝາຍການປະກັນສັງຄົມ ແລະການປະກັນສຸຂະພາບທົ່ວປວງຊົນ
ເພື່ອບັນລຸເປົ້າໝາຍທີ່ໄດ້ວາງໄວ້, ໃນເວລາທີ່ຈະມາເຖິງ, ຫວຽດນາມຕັດສິນໃຈທີຈະສຸມໃສ່ຊຸກຍູ້ການປະຕິຮູບຕື່ມອີກ ແລະ ສ້າງປະກັນສັງຄົມໃຫ້ກາຍເປັນເສົາຄ້ຳຫຼັກຂອງລະບົບປະກັນສັງຄົມຢ່າງແທ້ຈິງ, ເປີດກວ້າງການປົກຫຸ້ມຂອງປະກັນສັງຄົມເທື່ອລະກ້າວຢ່າງໜັກແໜ້ນ, ກ້າວເຖິງການປະຕິບັດເປົ້າໝາຍການປະກັນສັງຄົມທົ່ວປວງຊົນ ຕາມທາງເດີນທີ່ສອດຄ່ອງກັບເງື່ອນໄຂການພັດທະນາເສດຖະກິດ-ສັງຄົມຂອງປະເທດ, ປະກອບສ່ວນສຳຄັນເຂົ້າໃນການປະຕິບັດຄວາມກ້າວໜ້າແລະຍຸດຕິທຳທາງສັງຄົມ.
ລະອຽດຄື:
ທີໜຶ່ງ, ຈັດຕັ້ງປະຕິບັດບັນດາລະບອບ ນະໂຍບາຍປະກັນສັງຄົມແລະປະກັນສຸຂະພາບໃຫ້ໄດ້ເປັນຢ່າງດີ; ເປັນເຈົ້າການ, ຮ່ວມມືຢ່າງຈິງຈັງກັບບັນດາອົງການທີ່ເຂົ້າຮ່ວມ ເພື່ອສະເໜີ ແກ້ໄຂ ແລະ ປັບປຸງລະບົບນະໂຍບາຍແລະກົດໝາຍ ກ່ຽວກັບການປະກັນສັງຄົມແລະປະກັນສຸຂະພາບ ໃຫ້ສອດຄ່ອງກັບສະພາບຕົວຈິງ, ພັດທະນາຂະແໜງການປະກັນສັງຄົມຫວຽດນາມເປັນມືອາຊີບ ທັນສະໄໝ ເພື່ອຄວາມພຶງພໍໃຈຂອງອົງການຈັດຕັ້ງແລະບຸກຄົນທີ່ເຂົ້າຮ່ວມ ແລະ ຮັບຜົນປະໂຫຍດຈາກນະໂຍບາຍປະກັນສັງຄົມແລະປະກັນສຸຂະພາບ.
ທີສອງ, ປ່ຽນແປງໃໝ່, ຍົກສູງຄຸນນະພາບແລະປະສິດທິຜົນຂອງວຽກງານ ສື່ສານກ່ຽວກັບການປະກັນສັງຄົມແລະປະກັນສຸຂະພາບ ໃນສະພາບການໃໝ່ຕາມ ທິດທາງວິຊາຊີບ, ຖືກກັບຈຸດໜັກໃຈກາງ, ເໝາະສົມກັບແຕ່ລະກຸ່ມເປົ້າໝາຍ, ໃນນັ້ນສຸມໃສ່ກຸ່ມເປົ້າໝາຍທີ່ເຂົ້າຮ່ວມປະກັນສັງຄົມແບບສະໝັກໃຈ, ປະກັນສຸຂະພາບຕາມຄົວເຮືອນ.
ທີສາມ, ດ້ວຍທິດນຳຖືເອົາປະຊາຊົນເປັນສູນກາງຂອງການບໍລິການ, ຍູ້ແຮງກວ່າອີກວຽກງານການປະຕິຮູບລະບຽບການບໍລິຫານໃນການປະຕິບັດນະໂຍບາຍປະກັນສັງຄົມ, ປະກັນສຸຂະພາບ ບົນຫຼັກການຄວາມລຽບງ່າຍ, ງ່າຍດາຍ ແລະສະດວກສະບາຍສໍາລັບອົງການຈັດຕັ້ງແລະບຸກຄົນ ເມື່ອດຳເນີນທຸລະກຳກັບອົງການປະກັນສັງຄົມ; ປະຕິບັດເປັນຢ່າງດີການບໍລິການສາທາລະນະອອນໄລ, ກົນໄກປະຕູດຽວໃນການແກ້ໄຂລະບອບແລະນະໂຍບາຍ.
ທີສີ່, ເພີ່ມທະວີການປະຍຸກໃຊ້ເຕັກໂນໂລຊີຂໍ້ມູນຂ່າວສານ, ສຳເລັດການປ່ຽນເປັນດິຈິຕອນໃນທຸກກິດຈະກໍາວິຊາຊີບຂອງຂະແໜງການປະກັນສັງຄົມ; ດຳເນີນການເຊື່ອມຕໍ່ຂໍ້ມູນກັບບັນດາກະຊວງ, ຂະແໜງການ; ປັບປຸງຖານຂໍ້ມູນປະກັນໄພແຫ່ງຊາດໃຫ້ສົມບູນ; ສົ່ງເສີມການທຸລະກຳທາງເອເລັກໂຕຣນິກ; ຄຸ້ມຄອງ, ນຳໃຊ້ເອກະສານເອເລັກໂຕຣນິກໃນລະບົບອົງການປະກັນສັງຄົມ ແລະ ໃນແກນເຊື່ອມຕໍ່ຂອງລັດຖະບານ.
ທີຫ້າ, ຊຸກຍູ້ວຽກງານການກວດກາ, ຕິດຕາມກວດກາ, ກວດສອບພາຍໃນ ກ່ຽວກັບການປະຕິບັດກົດໝາຍວ່າດ້ວຍປະກັນສັງຄົມແລະປະກັນສຸຂະພາບ, ໂດຍສະເພາະແມ່ນວຽກງານການຕິດຕາມກວດກາສະເພາະຂະແໜງການ ກ່ຽວກັບການປະກອບຄ່າປະກັນສັງຄົມແລະປະກັນສຸຂະພາບ; ຄົ້ນເຜີຍແລະຈັດການຢ່າງທັນການຕໍ່ການກະທຳລະເມີດ, ສໍ້ໂກງ ແລະ ການສະແຫວງຫາກຳໄລຈາກກອງທຶນປະກັນສັງຄົມ ແລະກອງທຶນປະກັນສຸຂະພາບ.
ທີຫົກ, ເພີ່ມທະວີວຽກງານການຕ່າງປະເທດ, ການຮ່ວມມືສອງຝ່່າຍ, ຫຼາຍຝ່າຍໃນພາກພື້ນແລະໃນໂລກ ໃນຂົງເຂດຄວາມປອດໄພທາງສັງຄົມ; ສືບຕໍ່ປະສານສົມທົບກັບບັນດາອົງການທີ່ກ່ຽວຂ້ອງ ເພື່ອດຳເນີນການເຈລະຈາໃຫ້ສຳເລັດເສັດສິ້ນ ແລະ ຍື່ນຕໍ່ອົງການທີ່ມີສິດອຳນາດລົງນາມໃນສັນຍາກ່ຽວກັບການປະກັນໄພສັງຄົມກັບບາງປະເທດ./.
----------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 961 (ເດືອນມີນາ 2021)
