ວກ.- ກ່ອນ​ໜ້າ​ນີ້ 70 ປີ, ວັນ​ທີ 30 ຕຸລາ 1949, ກອງ​​ທະຫານ​ອາສາ​ສະໝັກ​ຫວຽດນາມ​ໄດ້​ຮັບ​ການ​ສ້າງ​ຕັ້ງ​ຢ່າງ​ເປັນ​ທາງ​ການ. ພະນັກງານ ນັກຮົບ​ທະຫານ​ອາສາ​ສະໝັກ​ ແລະ​​ຊ່ຽວຊານ​ຫວຽດນາມ​ຫຼາຍ​ຮຸ້ນຄົນ ບໍ່​ຢ້ານ​ຄວາມ​ຫຍຸ້ງຍາກ​ແລະ​ລຳບາກ, ຍອມ​ເສຍ​ສະລະ​ທຸກ​ສິ່ງ​ທຸກ​ຢ່າງ, ຄຽງ​ບ່າຄຽງ​ໄຫຼ່​ກັບ​ພະນັກງານ ນັກຮົບກອງທັບ​ປົດ​ປ່ອຍປະ​ຊາ​ຊົນ​ລາວ ​ແລະ​ປະຊາຊົນ​ລາວ​ບັນດາ​ເຜົ່າ ​ເພື່ອ​ດຳ​ເນີນ​ການ​ຕໍ່ຕ້ານ​ອັນ​ພິລະ​ອາດ​ຫານ, ປະກອບສ່ວນ​ອັນ​ສົມ​ກຽດ ​ເຂົ້າ​ໃນ​ໄຊຊະນະ​ອັນ​ສະຫງ່າ​ງານ ​ຂອງ​ການ​ປະຕິວັດ​ລາວ ​ໃນ​ສອງ​ການ​ຕໍ່ຕ້ານ ຕ້ານ​ພວກ​ລ່າ​ເມືອງ​ຂຶ້ນ​ຝຣັ່ງ ​ແລະ​ ຈັກກະພັດ​ອາ​ເມ​ລິ​ກາ, ​ເຊິ່ງ​ໄດ້​ເພີ່ມ​ທະວີ​ມິດຕະພາບ​ແລະ​ຄວາມ​ສາມັກຄີ​​ແບບພິ​ເສດ​ ລະຫວ່າງລາວ-ຫວຽດນາມ, ຫວຽດນາມ-ລາວ ຍິ່ງ​ຂຶ້ນ.

ປະຊາຊົນລາວຍິນດີຕ້ອນຮັບ ທະຫານອາສາສະໝັກຫວຽດນາມ (ຊ້າຍ); ທະຫານອາສາສະໝັກຫວຽດນາມກົມກອງໜຶ່ງ ພົບກັບໜ່ວຍກອງທັບປົດປ່ອຍປະຊາຊົນລາວ, ປິ 1950 (ຂວາ)

ທະຫານອາສາສະໝັກຫວຽດນາມ ອຳລາປະຊາຊົນລາວ ກ່ອນຈະເດີນທາງກັບຄືນປະເທດ

ສະ​ເຫຼິມສະຫຼອງຄົບຮອບ 70 ປີ​ແຫ່ງວັນ​ທະຫານອາສາສະໝັ​ກ ແລະ ຊ່ຽວຊານຫວຽດນາມ​ຢູ່​ລາວ ​ແມ່ນ​ໂອກາດ​ທີ່​ມີຄ່າ​ ເພື່ອ​ໃຫ້​ສອງ​ຝ່າຍ​ທົບ​ທວນຄືນ ມູນ​ເຊື້ອ​ແຫ່ງ​ສາຍ​ພົວພັນ​ແບບ​ພິ​ເສດຫວຽດນາມ-ລາວ, ລະນຶກ​ແລະ​ສະ​ແດງ​ຄວາມ​ຮູ້​ບຸນຄຸນ​ ຕໍ່​ການ​ປະກອບສ່ວນ​ອັນ​ໃຫຍ່​ຫຼວງ ຂອງທະຫານອາສາສະໝັກ ແລະຊ່ຽວຊານຫວຽດນາມຮຸ້ນ​ຕ່າງໆ ​ເພື່ອ​ພາລະກິດ​ປະຕິວັດ​ຂອງ​ສອງ​ພັກ, ​ເພື່ອ​ເອກະລາດ ອິດສະຫຼະພາບ​ຂອງ​ສອງ​ຊາດ​ຫວຽດນາມ ​ແລະ ລາວ; ພ້ອມ​ກັນ​ນັ້ນ​ ກໍ່​ເປັນ​ໂອກາດ​ເພື່ອ​ສຶກສາ​ອົບຮົມ​ປະຊາຊົນ, ​ໂດຍ​ສະ​ເພາະ​ແມ່ນ​ຊາວ​ໜຸ່ມ​ ຂອງ​ສອງ​ປະ​ເທດ, ກ່ຽວ​ກັບ​ມູນ​ເຊື້ອ​ອັນ​ລ້ຳ​ຄ່າ ຫາ​ຍາກ ຂອງ​ສາຍ​ພົວພັນ​ມິ​ຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ແບບ​ພິ​ເສດ ​ແລະ​ ການ​ຮ່ວມມື​ຮອບດ້ານ ລະຫວ່າງ​ລາວ-ຫວຽດນາມ, ຫວຽດນາມ-ລາວ.

ວັນ​ທີ 28 ຕຸລາ 2019, ທີ່​ສຳນັກງານ​ໃຫຍ່​ສູນ​ກາງ​ພັກ​ກອມ​ມູນິດ​ຫວຽດນາມ, ສະຫາຍ​ເລຂາ​ທິການ​ໃຫຍ່, ປະທານ​ປະ​ເທດຫວຽດນາມ ຫງວຽນ​ຝູຈ້ອງ ຕ້ອນຮັບ​ສະຫາຍເລຂາ​ທິການ​ໃຫຍ່, ປະທານ​ປະ​ເທດລາວ ບຸນ​ຍັງ ວໍລະ​ຈິດ ​ແລະ​ ຄະນະ​ຜູ້​ແທນ​ຂັ້ນ​ສູງ​ຂອງ​ພັກ​ແລະ​ລັດ​ລາວ​ ​ເນື່ອງ​ໃນ​ໂອກາດ​ທີ່ຄະນະ​ຜູ້​ແທນ​ມາ​ຮ່ວມ​ພິທີ​ສະ​ເຫຼີ​ມສະຫຼອງຄົບຮອບ 70 ປີ​ແຫ່ງ​ວັນທະຫານອາສາສະໝັ​ກແລະຊ່ຽວຊານຫວຽດນາມ.

ສະຫາຍເລຂາທິການໃຫຍ່, ປະທານປະເທດຫວຽດນາມ ຫງວຽນຝູຈ້ອງ ພົບປະສະຫາຍເລຂາທິການໃຫຍ່, ປະທານປະເທດລາວ ບຸນຍັງ ວໍລິຈິດ

ທ່ານ​ນາງ ຫງວຽນ​ທິກິມ​ເງິນ ກຳ​ມະການ​ກົມ​ການ​ເມືອງ, ປະທານ​ສະພາ​ແຫ່ງ​ຊາດ​ຫວຽດນາມ ພົບ​ປະ​ແລະ​ຈັດ​ງານ​ລ້ຽງຕ້ອນຮັບ ​ທ່ານເລຂາທິການ​ໃຫຍ່, ປະທານ​ປະ​ເທດລາວ ບຸນ​ຍັງ ວໍ​ລິ​ຈິດ

ທ່ານນາງ ຫງວຽນທິກິມເງິນ ກຳມະການກົມການເມືອງ, ປະທານສະພາແຫ່ງຊາດຫວຽດນາມ ພົບປະທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລິຈິດ

ຕອນ​ເຊົ້າ​ວັນ​ທີ 29 ຕຸລາ 2019, ທີ່​ນະຄອນ​ຮ່າ​ໂນ້ຍ, ຄະນະ​ພັກ​ທະຫານ​ສູນ​ກາງ​ແລະກະຊວງ​ປ້ອງ​ກັນ​ປະ​ເທດຫວຽດນາມ ຈັດ​ຕັ້ງ​ພິທີ​ສະ​ເຫຼືອມ​ສະຫຼອງ​ຄົບຮອບ 70 ປີ​ແຫ່ງ​ວັນທະຫານອາສາສະໝັກ​ແລະ​ຊ່ຽວຊານ​ຫວຽດນາມ (30 ຕຸລາ 1949 – 30 ຕຸລາ 2019) ​ແລະ ປະດັບຫຼຽນນາມມະຍົດ​ວິລະ​ຊົນ​ຂອງ​ກຳລັງ​ປະກອບ​ອາວຸດ​ປະຊາຊົນ. ກຳມະການ​ກົມ​ການ​ເມືອງ, ປະທານ​ສະພາ​ແຫ່ງ​ຊາດ​ຫວຽດນາມ ຫງວຽນ​ທິກິມ​ເງິນ ​ແລະ ​ເລຂາທິການ​ໃຫຍ່, ປະທານ​ປະ​ເທດ​ລາວ ບຸນ​ຍັງ ວໍລະ​ຈິດ, ພ້ອມ​ດ້ວຍ​ບັນດາ​ການ​ນຳ, ອະດີດ​ການ​ນຳ​ຂອງ​ພັກ​ແລະ​ລັດ ​ແລະ​ ບັນດາ​ຜູ້​ແທນ​ທີ່​ມີ​ກຽດ​ໄດ້​ເຂົ້າ​ຮ່ວມຢ່າງສົມ​ກຽດ.

ທີ່​ພິທີ​ສະ​ເຫຼີ​ມສະຫຼອງ, ບັນດາ​ຜູ້​ແທນ​ໄດ້​ຊົມ​ແລະ​ມ່ວນ​ຊື່ນ​ກັບ​ລາຍການ​ສິລະ​ປະ “ສະ​ຫາຍ​ຮັກ​ແພງ” ທີ່​ສະ​ແດງ​ໂດຍ​ນັກ​ສິລະ​ປິນຂອງ​ໂຮງລະຄອນ​ດົນຕີ​ທະຫານ

ກຳມະການກົມການເມືອງ, ປະທານສະພາແຫ່ງຊາດຫວຽດນາມ ຫງວຽນທິກິມເງິນ ຕິດຫຼຽນນາມມະຍົດວິລະຊົນກຳລັງປະກອບອາວຸດປະຊາຊົນ ໃສ່ທຸງທີ່ເປັນມູນເຊື້ອຂອງຄະນະກຳມະການປະສານງານ ທະຫານອາສາສະໝັກ ແລະຊ່ຽວຊານຫວຽດນາມຢູ່ລາວ (ຊ້າຍ); ເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ມອບຮູບພາບ “ທະຫານອາສາສະໝັກຫວຽດນາມ ອຳລາເພື່ອນລາວ ກ່ອນຈະເດີນທາງກັບຄືນປະເທດ” ໃຫ້ຄະນະກຳມະການປະສານງານທະຫານອາສາສະໝັກ ແລະຊ່ຽວຊານຫວຽດນາມຢູ່ລາວ (ຂວາ)

ເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ; ອະດີດເລຂາທິການໃຫຍ່ ນົງດຶດແມັ້ງ; ກຳມະການກົມການເມືອງ, ປະທານສະພາແຫ່ງຊາດ ຫງວຽນທິກິມເງິນ ແລະ ບັນດາຜູ້ແທນທີ່ເຂົ້າຮ່ວມພິທີ

ຕອນ​ແລງ​ວັນ​ທີ 29 ຕຸລາ 2019, ເລຂາທິການ​ໃຫຍ່, ປະທານ​ປະ​ເທດ​ລາວ ບຸນ​ຍັງ​ ວໍລະ​ຈິດ ​ໄດ້ຕ້ອນຮັບ​ການ​ເຂົ້າ​ຄຳນັບ​ ຂອງ​ຄະນະ​ຜູ້​ແທນ​ທະຫານ​ອາສາ​ສະ​ໝັກ​ແລະ​ຊ່ຽວຊານ​ຫວຽດນາມ​ຢູ່​ລາວ. ທີ່​ການ​ຕ້ອນຮັບ, ທ່ານ​ເລຂາທິການ​ໃຫຍ່, ປະທານ​ປະ​ເທດ​ລາວ ​ໄດ້​ຕີ​ລາຄາ​ສູງ​ຕໍ່​ບົດບາດ​ຂອງທະຫານອາສາສະໝັ​ກ ແລະ ຊ່ຽວຊານຫວຽດນາມ, ທີ່​ໄດ້​ມີ​ຄຸນ​ງານ​ຄວາມ​ດີ ​ແລະ​ໄດ້​ປະກອບສ່ວນ​ອັນ​​ໃຫຍ່​ຫຼວງ ​ເຂົ້າ​ໃນການ​ຕໍ່ສູ້​ຍາດ​ເອົາ​ເອກະ​ລາດກ່ອນ​ໜ້າ​ນີ້, ກໍ່​ຄື​ໃນ​ການ​ສ້າງສາ​ແລະ​ພັດທະນາ​ປະ​ເທດ​ລາວ​ໃນ​ປະຈຸ​ບັນ.

ເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ແລະ ບັນດາຜູ້ແທນທະຫານອາສາສະໝັກ ແລະ ຊ່ຽວຊານຫວຽດນາມ