ການໃຊ້ປະໂຫຍດຈາກບັນດາສັນຍາການຄ້າເສລີຢ່າງມີປະສິດທິຜົນ,
ເປີດກວ້າງແລະກະຈາຍຄວາມຫຼາກຫຼາຍຂອງຕະຫຼາດສົ່ງອອກຂອງຫວຽດນາມ
ເປີດກວ້າງແລະກະຈາຍຄວາມຫຼາກຫຼາຍຂອງຕະຫຼາດສົ່ງອອກຂອງຫວຽດນາມ
ວກ. - ໃນເວລາທີ່ຜ່ານມາ, ຜົນສຳເລັດຂອງການເຈລະຈາ ແລະ ເຊັນສັນຍາການຄ້າເສລີຫຼາຍສະບັບ ກັບຄູ່ຮ່ວມມືການຄ້າທີ່ສຳຄັນຂອງຫວຽດນາມ ໄດ້ນຳມາເຊິ່ງກາລະໂອກາດຫຼາຍຢ່າງ ໃຫ້ແກ່ການເຕີບໂຕທາງເສດຖະກິດ, ການກະຈາຍຄວາມຫຼາກຫຼາຍຂອງຕະຫຼາດການນຳເຂົ້າແລະສົ່ງອອກ; ພ້ອມກັນນັ້ນ, ສ້າງກຳລັງຜັກດັນການປ່ຽນແປງໃໝ່ໃນປະເທດ, ປະກອບສ່ວນຍົກສູງຄວາມສາມາດແຂ່ງຂັນ ແລະ ຊຸກຍູ້ການພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ
ໃນສະພາບເສດຖະກິດ-ການເມືອງໂລກມີການຜັນປ່ຽນຢ່າງສັບສົນ, ປະເທດສ່ວນໃຫຍ່ຖືກຜົນກະທົບທາງເສດຖະກິດ-ສັງຄົມຈາກການລະບາດຂອງໂຄວິດ-19, ຫວຽດນາມຍັງຍຶດໝັ້ນໃນການປະຕິບັດບັນດາແຜນນະໂຍບາຍໃຫຍ່ ກ່ຽວກັບການເຊື່ອມໂຍງສາກົນ ຕາມມະຕິເລກທີ່ 06-NQ/TW, ລົງວັນທີ 5 ພຶດສະພາ 2016, ຂອງກອງປະຊຸມຄະນະບໍລິຫານງານສູນກາງພັກຄັ້ງທີ 4 ສະໄໝທີ 13, “ກ່ຽວກັບການປະຕິບັດຂະບວນການເຊື່ອມໂຍງເສດຖະກິດສາກົນຢ່າງມີປະສິດທິຜົນ, ຮັກສາສະຖຽນລະພາບທາງເສດຖະກິດ-ສັງຄົມໃນສະພາບທີ່ປະເທດເຮົາເຂົ້າຮ່ວມສັນຍາການຄ້າເສລີຮຸ່ນໃໝ່” ແນໃສ່ “ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ”.
ດ້ວຍຈິດໃຈຮ່ວມມືຢ່າງຕັ້ງໜ້າ ແລະ ເປັນເຈົ້າການ, ຫວຽດນາມພວມຜັນຂະຫຍາຍການພົວພັນເສດຖະກິດສາກົນ ແລະ ການພົວພັນຄູ່ຮ່ວມມືຍຸດທະສາດ ກັບບັນດາປະເທດເສດຖະກິດໃຫຍ່ໃນໂລກ. ເລື່ອງນີ້ບໍ່ພຽງແຕ່ຊ່ວຍເພີ່ມທະວີການພົວພັນຕ່າງປະເທດ, ເປີດກວ້າງການຮ່ວມມືສາກົນ, ຊຸກຍູ້ການແລກປ່ຽນວັດທະນະທຳ ແລະ ມິດຕະພາບເທົ່ານັ້ນ, ຫາກຍັງປະກອບສ່ວນຊຸກຍູ້ການພັດທະນາເສດຖະກິດ-ສັງຄົມ. ເຖິງເດືອນກໍລະກົດ 2021, ຫວຽດນາມໄດ້ເຊັນສັນຍາການຄ້າເສລີ (FTA) 15 ສະບັບ, ສ້າງເງື່ອນໄຂອຳນວຍຄວາມສະດວກໃຫ້ວິສາຫະກິດເປີດກວ້າງຕະຫຼາດ, ເຊື່ອມຕໍ່ແລະເຂົ້າຮ່ວມຢ່າງເລິກເຊິ່ງ ໃນຕ່ອງໂສ້ມູນຄ່າແລະເຄືອຂ່າຍການຜະລິດຂອງໂລກ. ພິເສດ, ຫວຽດນາມແມ່ນໜຶ່ງໃນຈຳນວນບໍ່ເທົ່າໃດປະເທດໃນພາກພື້ນອາຊີ-ປາຊີຟິກ ທີ່ປະຕິບັດ 3 ສັນຍາການຄ້າເສລີຮຸ່ນໃໝ່(1), ໃນນັ້ນ, ສັນຍາຄູ່ຮ່ວມມືຮອບດ້າຍແລະກ້າວໜ້າຂ້າມປາຊີຟິກ (CPTPP) ສິ້ນສຸດການເຈລະຈາເມື່ອຫວຽດນາມເປັນປະທານເວທີປາໄສການຮ່ວມມືເສດຖະກິດອາຊີ-ປາຊີຟິກ (APEC) ແລະ ເມື່ອບໍ່ດົນມານີ້ ໄດ້ລົງນາມໃນສັນຍາຄູ່ຮ່ວມມືຮອບດ້ານໃນພາກພື້ນ (RCEP) ໄດ້ສະແດງໃຫ້ເຫັນເຖິງຄວາມມານະພະຍາຍາມ ແລະ ຄວາມຕັດສິນໃຈ ຂອງພັກແລະລັດຫວຽດນາມ ໃນການປະຕິຮູບ ແລະ ຍົກລະດັບເສດຖະກິດຂອງປະເທດ ເພື່ອເຊື່ອມໂຍງແລະເຂົ້າຮ່ວມຢ່າງເລິກເຊິ່ງ ໃນຕ່ອງໂສ້ຄຸນຄ່າພາກພື້ນ ແລະ ທົ່ວໂລກ.
ບັນດາສັນຍາການຄ້າເສລີທີ່ໄດ້ລົງນາມ ມີບົດບາດສຳຄັນໃນການດຶງດູດການລົງທຶນ ຈາກບັນດາຄູ່ຮ່ວມມືທີ່ໄດ້ເຊັນສັນຍາກັບຫວຽດນາມ (ໃນພາບ: ການຜະລິດສ່ວນປະກອບເອເລັກໂຕຣນິກ ໃນບໍລິສັດ Youngbag ViNa, ເຂດອຸດສາຫະກຳ ບິ່ງຊວຽນ, ແຂວງຫວິງຝຸກ) _ພາບ: TTXVN
ບັນດາຜົນສຳເລັດທີ່ໄດ້ຮັບ
ກ່ຽວກັບການສົ່ງອອກສິນຄ້າ, ການເຂົ້າຮ່ວມໃນບັນດາສັນຍາການຄ້າເສລີ ໄດ້ປະກອບສ່ວນຊຸກຍູ້ການເຕີບໂຕຂອງການສົ່ງອອກ ແລະ ການນຳເຂົ້າ. ຕາມຕົວເລກສະຖິຕິຂອງກົມໃຫຍ່ສຸລະກາກອນ, ມູນຄ່າການສົ່ງອອກແລະນຳເຂົ້າລວມຂອງຫວຽດນາມບັນລຸຫຼາຍກວ່າ 545 ຕື້ໂດລາສະຫະລັດ ໃນປີ 2020. ພຽງແຕ່ໃນ 2 ໄຕມາດທຳອິດຂອງປີ 2021, ມີສິນຄ້າສົ່ງອອກ 5 ລາຍການທີ່ບັນລຸມູນຄ່າກ່ວາ 10 ຕື້ໂດລາສະຫະລັດ/ລາຍການ ແລະ 25 ລາຍການທີ່ມີມູນຄ່າກ່ວາ 1 ຕື້ໂດລາສະຫະລັດ/ລາຍການ.
ການລົງນາມແລະປະຕິບັດບັນດາສັນຍາການຄ້າເສລີກັບບັນດາຄູ່ຮ່ວມມືເຊັ່ນ: ສະມາຄົມປະຊາຊາດອາຊີຕາເວັນອອກສ່ຽງໃຕ້ (ASEAN), ຈີນ, ສ.ເກົາຫຼີ, ຍີ່ປຸ່ນ, ອິນເດຍ, ອົດສະຕຣາລີ ແລະ ນູແວນເຊລັງ,... ຊ່ວຍຊຸກຍູ້ການສົ່ງອອກສິນຄ້າຂອງຫວຽດນາມໄປຍັງຕະຫຼາດເຫຼົ່ານີ້. ເມື່ອທຽບກັບເວລາເຂົ້າຮ່ວມເຂດການຄ້າເສລີອາຊຽນ (AFTA) ປີ 1996, ມູນຄ່າການສົ່ງອອກຂອງຫວຽດນາມໄປຍັງປະເທດອາຊຽນໄດ້ເພີ່ມຂຶ້ນກວ່າ 9 ເທົ່າ (ຈາກ 5,9 ຕື້ໂດລາສະຫະລັດ ປີ 1996 ຂຶ້ນເປັນຫຼາຍກວ່າ 53 ຕື້ໂດລາສະຫະລັດ ໃນປີ 2020). ເຊັ່ນດຽວກັນ, ມູນຄ່າການສົ່ງອອກຂອງຫວຽດນາມໄປຍັງຕະຫຼາດຄູ່ຮ່ວມສັນຍາການຄ້າເສລີຂອງອາຊຽນ ກໍ່ໄດ້ບັນລຸບັນດາບາດກ້າວເຕີບໂຕທີ່ສຳຄັນ ເມື່ອທຽບກັບເວລາກ່ອນການປະຕິບັດສັນຍາການຄ້າເສລີ, ໃນນັ້ນ, ການສົ່ງອອກຂອງຫວຽດນາມໄປຍັງປະເທດຈີນມີການເຕີບໂຕສູງສຸດ (ເພີ່ມຂຶ້ນ 15 ເທົ່າ) ພາຍຫຼັງກວ່າ 15 ປີ; ຖັດມາແມ່ນ ສ.ເກົາຫຼີ (ເພີ່ມຂຶ້ນ 6 ເທົ່າ); ອິນເດຍ (ເພີ່ມຂຶ້ນ 5,2 ເທົ່າ); ຍີ່ປຸ່ນ (ເພີ່ມຂຶ້ນ 3 ເທົ່າ),...
ສໍາລັບສະຫະພາບເອີຣົບ (ອີຢູ), ໃນ 11 ປີແຫ່ງການປະຕິບັດສັນຍາການຄ້າເສລີສະຫະພາບເອີຣົບ-ຫວຽດນາມ (ແຕ່ຕົ້ນເດືອນສິງຫາ 2020 ເຖິງເດືອນມິຖຸນາ 2021), ມູນຄ່າການການສົ່ງອອກຂອງຫວຽດນາມໄປຍັງຕະຫຼາດອີຢູບັນລຸ 35 ຕື້ໂດລາສະຫະລັດ (ເພີ່ມຂຶ້ນ 11,4% ເມື່ອທຽບກັບໄລຍະດຽວກັນຂອງປະກ່ອນ). ໃນ 6 ເດືອນຕົ້ນປີ 2021, ມູນຄ່າການຄ້າສອງສົ້ນ ລະຫວ່າງຫວຽດນາມແລະອີຢູ ບັນລຸ 27,67 ຕື້ໂດລາສະຫະລັດ (ເພີ່ມຂຶ້ນ 18,4% ເມື່ອທຽບກັບໄລຍະດຽວກັນຂອງປີ 2020). ສິ່ງດັ່ງກ່າວໃຫ້ເຫັນວ່າ, ໃນບັນດາປະເທດອາຊຽນ, ຫວຽດນາມກ້າວຂຶ້ນເປັນຜູ້ສົ່ງອອກໃຫຍ່ທີ່ສຸດໄປຍັງສະຫະພາບເອີຣົບ. ພິເສດ, ຜະລິດຕະພັນທາງກະເສດ ປ່າໄມ້ ແລະ ປະມົງ ຕອບສະໜອງນັບມື້ນັບດີກວ່າຕາມລະບຽບການແລະມາດຕະຖານທາງເຕັກນິກທີ່ “ເຂັ້ມງວດ” ຂອງຕະຫຼາດສະຫະພາບເອີຣົບ(2). ຄຽງຄູ່ກັນນັ້ນ, ຫຼາຍກຸ່ມຜະລິດຕະພັນອຸດສາຫະກໍາໄດ້ມີອັດຕາການຂະຫຍາຍຕົວສູງພໍສົມຄວນໃນການສົ່ງອອກໄປຍັງຕະຫຼາດສະຫະພາບເອີຣົບໃນ 11 ເດືອນທີ່ສັນຍາການຄ້າເສລີ ລະຫວ່າງສະຫະພາບເອີຣົບ ແລະ ຫວຽດນາມ ມີຜົນບັງຄັບໃຊ້ (3).
ສໍາລັບບັນດາປະເທດສະມາຊິກຂອງສັນຍາຄູ່ຮ່ວມມືຮອບດ້າຍແລະກ້າວໜ້າຂ້າມປາຊີຟິກ, ພາຍຫຼັງສອງປີທີ່ສັນຍາມີຜົນບັງຄັບໃຊ້, ປີ 2020, ມູນຄ່າການສົ່ງອອກໄປຍັງສອງປະເທດທີໄດ້ໃຫ້ສັດຕະຍາບັນສັນຍາຄູ່ຮ່ວມມືຮອບດ້າຍແລະກ້າວໜ້າຂ້າມປາຊີຟິກໃນທະວີບອາເມລິກາ (ການາດາ ແລະ ເມັກຊິກ) ໄດ້ເຕີບໂຕຢ່າງແຂງແຮງ, ເພີ່ມຂຶ້ນ 45% ແລະ 41% ເມື່ອທຽບກັບໄລຍະດຽວກັນຂອງປີ 2018. ເຖິງວ່າຖືກຜົນກະທົບຂອງການແຜ່ລະບາດໃຫຍ່ຂອງໂຄວິດ-19 ກໍຕາມ, ແຕ່ໃນ 6 ເດືອນຕົ້ນປີ 2021, ມູນຄ່າການສົ່ງອອກໄປຍັງບັນດາຄູ່ຮ່ວມມືຂອງຫວຽດນາມໃນສັນຍານີ້ຢູ່ທະວີບອາເມລິກາ ກໍຍັງເຕີບໂຕໃນແງ່ບວກຫຼາຍ. ລວມຍອດມູນຄ່າການຄ້າສອງສົ້ນບັນລຸ 6,32 ຕື້ໂດລາສະຫະລັດ (ເພີ່ມຂຶ້ນ 35,7% ເມື່ອທຽບກັບໄລຍະດຽວກັນຂອງປີ 2020), ໃນນັ້ນ, ການສົ່ງອອກຂອງຫວຽດນາມໄປຍັງບັນດາປະເທດນີ້ບັນລຸ 5,48 ຕື້ໂດລາສະຫະລັດ (ເພີ່ມຂຶ້ນ 46,8%), ການນຳເຂົ້າບັນລຸ 833,3 ລ້ານໂດລາສະຫະລັດ (ຫຼຸດລົງ 9,2%).
ໃນ 6 ເດືອນຕົ້ນປີ 2021 ນັ້ນ, ຫຼັງຈາກທີ່ສັນຍາການຄ້າເສລີລະຫວ່າງສາທາລະນະລັດສັງຄົມນິຍົມຫວຽດນາມ ກັບສະຫະລາຊະອານາຈັກອັງກິດແລະໄອແລະເໜືອ (UKVFTA) ມີຜົນບັງຄັບໃຊ້, ລວມຍອດການສົ່ງອອກແລະນຳເຂົ້າບັນລຸ 3,29 ຕື້ໂດລາສະຫະລັດ (ເພີ່ມຂຶ້ນ 28% ເມື່ອທຽບກັບໄລຍະດຽວກັນຂອງປີ 2020). ສິນຄ້າຫຼາຍປະເພດທີ່ສົ່ງອອກໄປຍັງອັງກິດມີການເຕີບໂຕສູງສຸດໃນຮອບ 6 ເດືອນທີ່ສັນຍາ UKVFTA ມີຜົນບັງຄັບໃຊ້ (4). ຕໍ່ກັບຄູ່ຮ່ວມມືຈຳນວນໜຶ່ງໃນສະຫະພັນເສດຖະກິດອາຊີ-ເອຣົບ, ການສົ່ງອອກໃນ 6 ເດືອນຕົ້ນປີ 2021 ກໍເພີ່ມຂຶ້ນ 14,9% ເມື່ອທຽບກັບໄລຍະດຽວກັນຂອງປີ 2020, ໃນນັ້ນ ການສົ່ງອອກຂອງຫວຽດນາມບັນລຸປະມານ 1,66 ຕື້ໂດລາສະຫະລັດ (ເພີ່ມຂຶ້ນ 31,3%); ການນຳເຂົ້າຈາກບັນດາປະເທດໃນສະຫະພັນເສດຖະກິດອາຊີ-ເອຣົບ ບັນລຸປະມານກວ່າ 1 ຕື້ນໂດລາສະຫະລັດ (ຫຼຸດລົງ 4,5%) ເມື່ອທຽບກັບໄລຍະດຽວກັນຂອງປີ 2020.
ເປັນອັນວ່າ, ເຖິງວ່າການແຜ່ລະບາດຂອງໂຄວິດ-19 ຈະຜັນແປຢ່າງສັບສົນແລະສົ່ງຜົນກະທົບທາງລົບເຖິງການເຄື່ອນໄຫວການຄ້າໃນຂອບເຂດທົ່ວໂລກ, ການສົ່ງອອກສິນຄ້າຂອງຫວຽດນາມໄປຍັງຕະຫຼາດທີ່ເປັນມູນເຊື້ອຈຳນວນໜຶ່ງປະສົບຄວາມຫຍຸ້ງຍາກຫຼາຍຢ່າງ, ແຕ່ເບິ່ງລວມແລ້ວ, ການສົ່ງອອກຂອງທົ່ວປະເທດກໍ່ມີການເຕີບໂຕໃນທາງບວກ ເນື່ອງຈາກບັນດາວິສາຫະກິດໄດ້ໃຊ້ປະໂຫຍດຈາກໂອກາດການຍູ້ແຮງການສົ່ງອອກໄປຍັງບັນດາຕະຫຼາດທີ່ແທນທີ່, ພິເສດແມ່ນບັນດາຕະຫຼາດທີ່ມີສັນຍາການຄ້າເສລີກັບຫວຽດນາມ. ສິ່ງດັ່ງກ່າວໃຫ້ເຫັນວ່າ, ການຍູ້ແຮງການເຄື່ອນໄຫວເຈລະຈາແລະເຊັນສັນຍາການຄ້າເສລີໄດ້ຊ່ວຍຂະຫຍາຍຄວາມຫຼາກຫຼາຍຂອງຕະຫຼາດການສົ່ງອອກ, ຫຼີກລ້ຽງການເພິ່ງພາຕະຫຼາດດຽວຫຼາຍເກີນໄປ.
ພິເສດ, ສຳລັບບັນດາສັນຍາການຄ້າເສລີຮຸ່ນໃໝ່, ມັນມີຄວາມຮຽກຮ້ອງຕ້ອງການສູງທີ່ສຸດ ແຕ່ຄຽງຄູ່ກັນນັ້ນ, ຜົນປະໂຫຍດທີ່ໄດ້ຮັບກໍສູງກວ່າເມື່ອທຽບກັບສັນຍາການຄ້າເສລີຮຸ່ນເກົ່າທີ່ຫວຽດນາມໄດ້ເຂົ້າຮ່ວມການປະຕິບັດກ່ອນໜ້ານີ້. ການປະຕິບັດສັນຍາການຄ້າເສລີຢ່າງທັນການ, ບວກກັບການຜັນຂະຫຍາຍປະຕິບັດຢ່າງແຂງຂັນຂອງບັນດາກະຊວງ, ຂະແໜງການຕັ້ງແຕ່ຫົວທີ່ ກໍ່ໄດ້ປະກອບສ່ວນບັນເທົາຄວາມຫຍຸ້ງຍາກຂອງພື້ນຖານເສດຖະກິດ ແລະຊຸມຊົນວິສາຫະກິດ ເນື່ອງຈາກຜົນກະທົບຂອງການລະບາດຂອງໂຄວິດ-19.
ກ່ຽວກັບການດຶງດູດການລົງທຶນ, ບັນດາສັນຍາການຄ້າເສລີທີ່ໄດ້ລົງນາມແລ້ວ ມີບົດບາດສຳຄັນໃນການດຶງດູດການລົງທຶນຈາກບັນດາຄູ່ຮ່ວມມືທີ່ໄດ້ເຊັນສັນຍາການຄ້າເສລີກັບຫວຽດນາມ. ໃນຈຳນວນ 139 ປະເທດແລະເຂດແຄ້ວນທີ່ມີໂຄງການລົງທຶນທີ່ມີຜົນບັງຄັບໃຊ້ຢູ່ຫວຽດນາມ, ອັນດັບໜຶ່ງແມ່ນບັນດາພື້ນຖານເສດຖະກິດທີ່ມີການພົວພັນສັນຍາການຄ້າເສລີກັບຫວຽດນາມ, ເຊັ່ນ ສ.ເກົາຫຼີ (ອັນດັບໜຶ່ງ) ດ້ວຍຍອດຈຳນວນທຶນຈົດທະບຽນຫຼາຍກວ່າ 70,6 ຕື້ໂດລາສະຫະລັດ (ກວມເອົາ 18,4% ຂອງເງິນລົງທຶນທັງໝົດ); ຍີ່ປຸ່ນ (ອັນດັບສອງ) ໄດ້ລົງທຶນເກືອບ 60,3 ຕື້ໂດລາສະຫະລັດ (ກວມເອົາ 15,7% ຂອງເງິນລົງທຶນທັງໝົດ); ຖັດມາແມ່ນສິງກະໂປ, ຈີນ...
ກ່ຽວກັບການກະທົບຕາມຂະແໜງການ, ສຳລັບຂົງເຂດອຸດສາຫະກຳ, ບັນດາສັນຍາການຄ້າເສລີໄດ້ປະກອບສ່ວນປັບໂຄງສ້າງການສົ່ງອອກສິນຄ້າຂອງຫວຽດນາມໄປໃນທິດທາງທີ່ດີ, ເພີ່ມອັດຕາສ່ວນການສົ່ງອອກສິນຄ້າປຸງແຕ່ງ, ຫຼຸດອັດຕາສ່ວນສິນຄ້າດິບແລະສິນຄ້າປຸງແຕ່ງເບື້ອງຕົ້ນ; ເພີ່ມອັດຕາສ່ວນສິນຄ້າອຸດສາຫະກຳປຸງແຕ່ງ, ຫຼຸດອັດຕາສ່ວນສິນຄ້າກະສິກຳ, ປ່າໄມ້ ແລະ ສິນໃນ ນ້ຳ; ເພີ່ມອັດຕາສ່ວນສິນຄ້າສົ່ງອອກຂອງຂົງເຂດທີ່ມີການລົງທຶນໂດຍກົງຈາກຕ່າງປະເທດ (FDI) ແລະຂົງເຂດເສດຖະກິດເອກະຊົນ, ຫຼຸດອັດຕາສ່ວນການສົ່ງອອກຂອງຂົງເຂດເສດຖະກິດແຫ່ງລັດ. ໂຄງປະກອບສິນຄ້າສົ່ງອອກໄດ້ຮັບການປັບປຸງຢ່າງຕໍ່ເນື່ອງໃນທິດທາງທີ່ດີຕາມແຜນຍຸດທະສາດການສົ່ງອອກແລະນຳເຂົ້າສິນຄ້າໄລຍະ 2011-2020, ກຳນົດທິດຮອດປີ 2030, ດ້ວຍການເພີ່ມຂຶ້ນຂອງອັດຕາສ່ວນສິນຄ້າປຸງແຕ່ງ ແລະຜະລິດ (ຈາກ 82,9% ຂອງປີ 2018 ຂຶ້ນເປັນ 84,3% ປີ 2019).
ສຳລັບບາງຂົງເຂດອື່ນໆເຊັ່ນ ກະສິກຳ, ການເຂົ້າຮ່ວມໃນສັນຍາການຄ້າເສລີໄດ້ປະກອບສ່ວນຊຸກຍູ້ການເຕີບໂຕທາງດ້ານການຄ້າ, ຂະຫຍາຍຄວາມຫຼາກຫຼາຍຂອງຕະຫຼາດແລະຜະລິດຕະພັນການສົ່ງອອກ, ສ້າງເງື່ອນໄຂເພື່ອພັດທະນາການຜະລິດຢູ່ໃນປະເທດ, ສ້າງວຽກເຮັດງານທຳແລະເພີ່ມລາຍໄດ້ໃຫ້ຊາວກະສິກອນ; ຍູ້ແຮງການປະຍຸກໃຊ້ວິທະຍາສາດ-ເຕັກໂນໂລຊີ, ຍົກສູງສະມັດຕະພາບ ຄຸນນະພາບ ແລະ ຄວາມສາມາດແຂ່ງຂັນຂອງສິນຄ້າກະເສດ ການປ່າໄມ້ ການປະມົງ, ແລະ ເພີ່ມທະວີລະບົບມາດຕະຖານເຕັກນິກ ຄວາມປອດໄພ ແລະ ຮັບປະກັນສຸຂະອະນາໄມຂອງອາຫານ, ປ່ຽນແປງໂຄງສ້າງການຜະລິດ ແລະ ເສີມຂະຫຍາຍທ່າດີປຽບທຽບຂອງຂະແໜງການຜະລິດກະສິກໍາ ປ່າໄມ້ ແລະການປະມົງ.
ກ່ຽວກັບການຄຸ້ມຄອງລັດ, ດ້ວຍການປະຕິບັດຄໍາໝັ້ນສັນຍາໃນສັນຍາການຄ້າເສລີ, ພິເສດແມ່ນ ບັນດາສັນຍາການຄ້າເສລີຮຸ່ນໃໝ່ - ບັນດາສັນຍາການຄ້າເສລີທີ່ມີມາດຕະຖານລະດັບສູງຂອງການຄຸ້ມຄອງທີ່ໂປ່ງໃສ ແລະ ການປະພຶດທີ່ເປັນກາງ,... ຈະປະກອບສ່ວນສ້າງກອບການຜູກມັດທາງດ້ານກົດໝາຍໃນພາກພື້ນ (ກ່ຽວກັບນະໂຍບາຍການຄ້າ ການລົງທຶນ, ກຳມະສິດທາງປັນຍາ, ອີຄອມເມີຣ໌ຊ, ການແກ້ໄຂຂໍ້ຂັດແຍ່ງ,...) ແລະ ສ້າງສະພາບແວດລ້ອມການຄ້າທີ່ຍຸດຕິທໍາ.
ຄວາມຫຍຸ້ງຍາກແລະຂໍ້ຈໍາກັດບາງຢ່າງ
ການໃຊ້ປະໂຫຍດຈາກບັນດາສັນຍາການຄ້າເສລີໃນປະຈຸບັນມີຄວາມຫຍຸ້ງຍາກແລະຂໍ້ຈຳກັດບາງຢ່າງທີ່ຕ້ອງໄດ້ແກ້ໄຂ.
ທີໜຶ່ງ, ສະພາບການເສດຖະກິດ-ການເມືອງຂອງໂລກພວມມີການພັດທະນາທີ່ສັບສົນ ແລະຄາດຄະເນບໍ່ໄດ້. ການແຜ່ລະບາດຂອງໂຄວິດ-19 ໄດ້ແລະພວມສົ່ງຜົນກະທົບທາງລົບເຖິງເສດຖະກິດຂອງໂລກ, ພາກພື້ນ ແລະ ແຕ່ລະປະເທດ, ເຮັດໃຫ້ບັນດາຕ່ອງໂສ້ການສະໜອງ ແລະ ການຜະລິດທົ່ວໂລກ ມີການປ່ຽນແປງ ແລະ ບາງຄັ້ງກໍ່ແຕກຫັກ; ລັດທິປົກປ້ອງທີ່ເພີ່ມຂຶ້ນໃນຫຼາຍປະເທດ, ໃນຂະນະທີ່ສະຖາບັນພະຫຸພາຄີ ໂດຍສະເພາະອົງການການຄ້າໂລກ (WTO) ປະສົບກັບຄວາມຫຍຸ້ງຍາກຫຼາຍຢ່າງ ໃນຂະບວນການປະຕິຮູບແລະດຳເນີນການ;... ນີ້ແມ່ນຄວາມທ້າທາຍທີ່ໃຫຍ່ ຍ້ອນຫວຽດນາມເຊື່ອມໂຍງຢ່າງເລິກເຊິ່ງເຂົ້າກັບໂລກ ແລະພາກພື້ນ, ດັ່ງນັ້ນ, ຕ້ອງມີການຄິດໄລ່ຢ່າງຮອບຄອບໃນລະຫວ່າງການປະຕິບັດບັນດາສັນຍາການຄ້າເສລີ ເພື່ອຮັບປະກັນຜົນປະໂຫຍດຂອງຊາດ-ປະເທດຊາດ.
ທີສອງ, ການເພີ່ມຂຶ້ນຂອງແຮງກົດດັນດ້ານການແຂ່ງຂັນ ຕໍ່ສິນຄ້າແລະວິສາຫະກິດຫວຽດນາມຢູ່ໃນຕະຫຼາດ “ບ້ານ”, ພິເສດແມ່ນໃນບັນດາຂົງເຂດທີ່ຍັງອ່ອນແອຂອງຫວຽດນາມ. ເຖິງວ່າຄວາມສາມາດໃນການແຂ່ງຂັນຂອງເສດຖະກິດ, ວິສາຫະກິດ ແລະ ຜະລິດຕະພັນຂອງຫວຽດນາມໄດ້ຮັບການປັບປຸງ, ແຕ່ຍັງອ່ອນແອເມື່ອທຽບກັບບັນດາປະເທດ, ລວມທັງບັນດາປະເທດໃນພາກພື້ນ. ຂະແໜງການເສດຖະກິດ ວິສາຫະກິດປາຍຫອກ ທີ່ສາມາດອອກໄປຄອບຄອງຕະຫຼາດພາກພື້ນແລະຕະຫຼາດໂລກນັ້ນ ບໍ່ຫຼາຍປານໃດ, ບໍ່ມີຄວາມສາມາດໃນການນຳໜ້າ, ແກ່ດຶງຂະແໜງການແລະວິສາຫະກິດອື່ນໆ ເພື່ອພັດທະນາຮ່ວມກັນ. ບາງຜະລິດຕະພັນເລີ່ມມີຄວາມຫຍຸ້ງຍາກໃນການແຂ່ງຂັນ, ອັດຕາການເຕີບໂຕຂອງມູນຄ່າການສົ່ງອອກມີແນວໂນ້ມທີ່ຈະຫຼຸດລົງ, ໂຄງປະກອບການສົ່ງອອກຍັງບໍ່ດີ, ສຸມໃສ່ຜະລິດຕະພັນກະເສດ, ອາຫານທະເລ, ແຜ່ນແພ, ເກີບໜັງ,... ການຍົກສູງຄວາມສາມາດແຂ່ງຂັນຂອງຜະລິດຕະພັນ, ວິສາຫະກິດ ແລະ ພື້ນຖານເສດຖະກິດນັ້ນ ມັນຂຶ້ນກັບຫຼາຍປັດໄຈທີ່ສຸດເຊັ່ນ: ການປັບປຸງສະຖາບັນທີ່ສົມບູນ, ການປະຕິຮູບການບໍລິຫານ, ນະໂຍບາຍເສດຖະກິດ, ຄຸນນະພາບຂອງບຸກຄະລາກອນ, ລະດັບວິທະຍາສາດ - ເຕັກໂນຊີ, ດັ່ງນັ້ນ, ເມື່ອປັດໄຈເຫຼົ່ານີ້ປ່ຽນແປງໄປໃນທາງບວກ, ຄວາມສາມາດໃນການແຂ່ງຂັນກໍ່ຈະດີຂຶ້ນ. ຄຽງຄູ່ກັນນັ້ນ, ລະດັບຂອງບຸກຄະລາກອນໃນຫຼາຍວິສາຫະກິດຂອງຫວຽດນາມຍັງຖືກຈຳກັດ, ສົ່ງຜົນຕໍ່ຄວາມສາມາດໃນການແຂ່ງຂັນກັບວິສາຫະກິດຕ່າງປະເທດ.
ທີສາມ, ວຽກງານການຄູ້ມຄອງ, ບໍລິຫານຂອງລັດ ແລະ ການຄຸ້ມຄອງບໍລິສັດ ເຖິງວ່າໄດ້ມີການປັບປຸງ, ແຕ່ກໍ່ຍັງບໍ່ຕອບສະໜອງໄດ້ຕາມຄວາມຕ້ອງການຂອງສະພາບການໃໝ່. ໃນສະພາບການໂລກມີການປ່ຽນແປງຢ່າງວ່ອງໄວ ແລະ ແຂງແຮງຄືໃນໄລຍະຜ່ານມາ, ບັນດາອົງການຄຸ້ມຄອງແລະວິສາຫະກິດ ບາງຄັ້ງກໍ່ອາດຈະສັບສົນໃນການຄາດຄະເນສະຖານະການ, ພາໃຫ້ຂາດຄວາມເປັນເຈົ້າການໃນການຈັດການກັບບັນຫາທີ່ເກີດຂຶ້ນໃນຂະບວນການປະຕິບັດໜ້າທີ່ທີ່ພັກແລະລັດວາງໄວ້.
ທີສີ່, ຄວາມຄົບຊຸດແລະການເຊື່ອມຕໍ່ລະຫວ່າງບັນດາຂອງເຂດຍັງບໍ່ທັນສູງ, ການປະສານສົມທົບລະຫວ່າງບັນດາກະຊວງ, ຂະແໜງການ, ລະຫວ່າງສູນກາງ ທ້ອງຖິ່ນ ແລະ ວິສາຫະກິດຍັງບໍ່ດີ. ບັນຫາສະຫະຂະແໜງການຫຼາຍຢ່າງແກ້ໄຂໄດ້ຊ້າ, ພິເສດແມ່ນບັນຫາຍົກສູງປະສິດທິຜົນການລົງທຶນ, ຍົກສູງຄວາມສາມາດໃນການແຂ່ງຂັນ, ການພັດທະນາບັນດາປັດໄຈເສດຖະກິດຕະຫຼາດຢ່າງຄົບຊຸດ. ກະໂຕການເຊື່ອມໂຍງເສດຖະກິດສາກົນແມ່ນບັນຫາສະຫະຂະແໜງການ, ແຕ່ໃນຄວາມເປັນຈິງ, ວຽກງານການເຊື່ອມໂຍງເສດຖະກິດສາກົນ, ປະຕິບັດສັນຍາການຄ້າເສລີຍັງຖືກບັນດາກະຊວງ, ຂະແໜງການ, ທ້ອງຖິ່ນຜັນຂະຫຍາຍ ດຳເນີນການແຍກກັນພາຍໃນຂອບເຂດຂະແໜງການ, ຂົງເຂດ, ທ້ອງຖິ່ນ. ດັ່ງນັ້ນ, ຈຶ່ງມີສະຖານະການ “ບໍ່ລົງລອຍກັນ” ລະຫວ່າງອົງການ ແລະ ທ້ອງຖິ່ນ.
ທີຫ້າ, ບັນດາສັນຍາການຄ້າເສລີທີ່ກຳລັງໄດ້ຮັບການປະຕິບັດກໍມີຫຼາຍບັນຫາທີ່ຕ້ອງໄດ້ຮັບການຈັດການແກ້ໄຂ. ວິສາຫະກິດທີ່ມີການລົງທຶນຈາກຕ່າງປະເທດມີຄວາມສາມາດໃນການໃຊ້ປະໂຫຍດຈາກການບຸລິມະສິດນັ້ນດີກວ່າວິສາຫະກິດພາຍໃນປະເທດ. ວິສາຫະກິດຂະໜາດໃຫຍ່ມັກຈະສວຍໃຊ້ກາລະໂອກາດຈາກສັນຍາການຄ້າເສລີໄດ້ດີກວ່າວິສາຫະກິດຂະໜາດກາງແລະຂະໜາດນ້ອຍ.
ທີຫົກ, ຄວາມສາມາດໃນການສັງເກດການ, ປະເມີນ ແລະ ຄາດຄະເນສະຖານະການຈິງ ເພື່ອເປັນເຈົ້າການຈັດການກັບບັນຫາທີ່ເກີດຂຶ້ນ ໃນຂະບວນການປະຕິບັດສັນຍາການຄ້າເສລີນັ້ນຍັງມີຄວາມຈຳກັດຫຼາຍ. ບັນດາບັນຫາກ່ຽວກັບການສ້າງກົນໄກການຮັບຮູ້ແລະການເຕືອນລ່ວງໜ້າໃນບັນດາຂົງເຂດທີ່ຫວຽດນາມໄດ້ເຊື່ອມໂຍງຢ່າງເລິກເຊິ່ງກັບເສດຖະກິດໂລກນັ້ນເບິ່ງລວມຍັງອ່ອນແອ.
ທີເຈັດ, ພ້ອມໆກັນກັບຂະບວນວິວັດການພັດທະນາ, ບັນດາຈຸດອຸດຕັນໃນສະຖາບັນ,ໂຄງສ້າງພື້ນຖານ, ຊັບພະຍາກອນມະນຸດແລະອື່ນໆ ລ້ວນແຕ່ມີແລະຍັງຄົງມີຢູ່, ນັບມື້ນັບຈະແຈ້ງແລະສົ່ງຜົນກະທົບຫຼາຍຂຶ້ນ, ກີດຂວາງຂະບວນການພັດທະນາ. ຄຳໝັ້ນສັນຍາໃໝ່ຫຼາຍຢ່າງເຊັ່ນ ກ່ຽວກັບແຮງງານ - ສະຫະພັນແຮງງານ, ສິ່ງແວດລ້ອມ, ລັດວິສາຫະກິດ, ການຈັດຊື້ຈັດຈ້າງຂອງລັດຖະບານ, ການລົງທຶນແລະອື່ນໆ ຮຽກຮ້ອງໃຫ້ມີບັນດາອົງການຄຸ້ມຄອງທີ່ເໝາະສົມໃໝ່. ຖ້າບໍ່ມີການກະກຽມພາຍໃນທີ່ດີ, ລວມມີການຈັດຕັ້ງສະຖາບັນການຄຸ້ມຄອງໃໝ່ທີ່ມີຄວາມຄົບຊຸດຈາກສູນກາງເຖິງທ້ອງຖິ່ນ, ເປັນການຍາກທີ່ຈະຮັບປະກັນວ່າ ການປະຕິບັດສັນຍາການຄ້າເສລີຈະເປັນປະໂຫຍດຢ່າງຮອບດ້ານແລະມີປະສິດທິພາບ.
ວິທີແກ້ໄຂຕົ້ນຕໍໃນເວລາຕໍ່ໜ້າ
ບັນດາໝາກຜົນທີ່ບັນລຸໄດ້ໃນຂະບວນການເຊື່ອມໂຍງເຂົ້າກັບສາກົນໃນໄລຍະຜ່ານມາເປັນພຽງບາດກ້າວທຳອິດເທົ່ານັ້ນ. ໂດຍພື້ນຖານແລ້ວ, ຄວາມສາມາດໃນການແຂ່ງຂັນຂອງພື້ນຖານເສດຖະກິດ ແລະຂອງຫຼາຍຂະແໜງສິນຄ້າ ຍັງຕ້ອງໄດ້ຮັບການປັບປຸງຢ່າງແຂງແຮງໃນໄລຍະເວລາຕໍ່ໄປ. ການແຂ່ງຂັນຢູ່ຕະຫຼາດສາກົນ ແລະ ຕະຫຼາດຫວຽດນາມ ຍັງມີຄວາມຫຍຸ້ງຍາກສຳລັບວິສາຫະກິດຈຳນວນຫລາຍ. ດັ່ງນັ້ນ, ເພື່ອໃຊ້ປະໂຫຍດຈາກສັນຍາການຄ້າເສລີຢ່າງມີປະສິດທິຜົນຫຼາຍຂຶ້ນ, ເປີດກວ້າງແລະຂະຫຍາຍຄວາມຫຼາກຫຼາຍຂອງຕະຫຼາດສົ່ງອອກ, ໃນໄລຍະຈະມາເຖິງ, ຕ້ອງສຸມໃສ່ແກ້ໄຂບາງບັນຫາຕໍ່ໄປນີ້:
ທີໜຶ່ງ, ຕ້ອງສ້າງແຜນຍຸດທະສາດໃໝ່ກ່ຽວກັບການເຊື່ອມໂຍງເຂົ້າກັບສາກົນ ຜ່ານບັນດາສັນຍາການຄ້າເສລີ ໃນໄລຍະປະຈຸບັນ; ພ້ອມກັນນັ້ນ, ສຸມໃສ່ຜັນຂະຫຍາຍປະຕິບັດບັນດາສັນຍາການຄ້າເສລີທີ່ຫວຽດນາມໄດ້ລົງນາມຢ່າງມີປະສິດທິຜົນ, ພິເສດແມ່ນຜັນຂະຫຍາຍແຜນການປະຕິບັດບັນດາສັນຍາການຄ້າເສລີຮຸ່ນໃໝ່,... ເພື່ອມຸ່ງໄປເຖິງການນຳເຂົ້າແລະ ສົ່ງອອກທີ່ສົມດຸນກວ່າເກົ່າ, ຮັບປະກັນຕະຫຼາດທີ່ໝັ້ນຄົງ ແລະ ຍືນຍົງ, ຍົກສູງປະສິດທິຜົນຂອງພື້ນຖານເສດຖະກິດທັງໝົດ.
ທີສອງ, ຕໍ່ກັບບັນດາຕະຫຼາດທີ່ຍັງບໍ່ມີສັນຍາການຄ້າເສລີ, ຕ້ອງຄັດເລືອກ, ຈຳກັດການ “ເປີດປະຕູ” ຕະຫຼາດຕື່ມອີກ ກັບບັນດາຄູ່ຮ່ວມມືທີ່ມີໂຄງປະກອບສິນຄ້າແຂ່ງຂັນໂດຍກົງກັບຫວຽດນາມ. ໃນສະພາບການທີ່ການແຜ່ລະບາດຂອງໂຄວິດ-19 ໄດ້ທຳລາຍຕ່ອງໂສ້ການສະໜອງຂອງພາກພື້ນ ແລະ ເສດຖະກິດໂລກມີການຜັນປ່ຽນຢ່າງສັບສົນນັ້ນ, ຈຳເປັນຕ້ອງຊັ່ງຊາ ຄົ້ນຄວ້າ ເພື່ອເປີດກວ້າງຕະຫຼາດການສົ່ງອອກກັບບັນດາຄູ່ຮ່ວມມືທີ່ມີທ່າແຮງ, ຂະໜາດໃຫຍ່ ມີໂຄງສ້າງສິນຄ້າເສີມ, ບໍ່ມີການແຂ່ງຂັນໂດຍກົງກັບສິນຄ້າຂອງຫວຽດນາມ ເພື່ອຂະຫຍາຍຄວາມຫຼາກຫຼາຍຂອງຕະຫຼາດສົ່ງອອກ, ຫຼຸດຜ່ອນການເພິ່ງພາອາໄສບາງຕະຫຼາດ.
ທີສາມ, ຕ້ອງສືບຕໍ່ສ້າງ, ປັບປຸງບູລະຍະລະບົບກົດໝາຍແລະນະໂຍບາຍ ເພື່ອປະຕິບັດບັນດາຄຳໝັ້ນສັນຍາເຊື່ອມໂຍງເສດຖະກິດສາກົນຢ່າງຄົບຖ້ວນຕາມແຜນທີ່ໄດ້ວາງອອກ. ໃນການແກ້ໄຂແລະປັບປຸງເພີ່ມເຕີມເອກະສານທາງກົດໝາຍປະຈຸບັນ, ຕ້ອງຮັບປະກັນຄວາມຄົບຊຸດ, ມີປະສິດທິຜົນ, ຮັກສາສະຖຽນລະພາບຂອງສະພາບແວດລ້ອມການລົງທຶນ ທຸລະກິດ,ໂດຍບໍ່ກໍ່ໃຫ້ເກີດຄວາມວຸ່ນວາຍ ກະທົບຕໍ່ຜົນປະໂຫຍດຂອງວິສາຫະກິດທີ່ມີຢູ່ແລ້ວ ແລະນັກລົງທຶນໃໝ່.
ທີສີ່, ຕ້ອງຍູ້ແຮງວຽກງານໂຄສະນາ, ເຜີຍແຜ່ເນື້ອໃນຂອງບັນດາສັນຍາການຄ້າເສລີທີ່ຫວຽດນາມໄດ້ລົງນາມ ຢ່າງເລິກເຊິ່ງ ຕາມແຕ່ລະຂົງເຂດ, ຂະແໜງສິນຄ້າສະເພາະ ເພື່ອໃຫ້ວິສາຫະກິດກຳແໜ້ນຂໍ້ກຳນົດສະເພາະຂອງບັນດາສັນຍາການຄ້າເສລີທີ່ກ່ຽວຂ້ອງເຖິງຂະແໜງການຜະລິດ ທຸລະກິດຂອງຕົນ ຢູ່ບັນດາຕະຫຼາດຂອງບັນດາປະເທດຄູ່ຮ່ວມສັນຍາການຄ້າເສລີ.
ທີຫ້າ, ຕ້ອງມີການປະສານສົມທົບຢ່າງແໜ້ນແຟ້ນ ຈາກຂັ້ນສູນກາງລົງຮອດທ້ອງຖິ່ນ ໃນການປະຕິຮູບ, ປັບປຸງລະບຽບການບໍລິຫານໃຫ້ງ່າຍຂຶ້ນ ແລະ ປັບປຸງກົນໄກປະຕູດຽວທີ່ສົມບູນແບບ ເພື່ອປະຕິຮູບການອອກໃບອະນຸຍາດທີ່ກ່ຽວຂ້ອງ ໃຫ້ວິສາຫະກິດແລະນັກລົງທຶນໃນປະເທດແລະຕ່າງປະເທດ, ຈາກນັ້ນ, ຫຼຸດຜ່ອນໄລຍະເວລາການອອກໃບອະນຸຍາດ, ຫຼຸດຜ່ອຄ່າໃຊ້ຈ່າຍໃນການບໍລິຫານ, ການນຳເຂົ້າ ສົ່ງອອກ, ພິທີການທາງສຸນລະກາກອນຂອງສິນຄ້າ,... ສ້າງເງື່ອນໄຂອຳນວຍຄວາມສະດວກໃຫ້ແກ່ການລົງທຶນ ທຸລະກິດ ແລະ ການນຳເຂົ້າສົ່ງອອກສິນຄ້າ.
ທີຫົກ, ບັນດາກະຊວງ ຂະແໜງການຕ້ອງຕັ້ງໜ້າປຶກສາສົນທະນາກັບບັນດາສະມາຄົມອາຊີບ, ຫໍການຄ້າແລະອຸດສາຫະກຳຫວຽດນາມ (VCCI) ເພື່ອເກັບກຳສະພາບຄວາມຫຍຸ້ງຍາກ ແລະ ຂໍ້ສະເໜີແນະຂອງວິສາຫະຫິດ. ເປັນເຈົ້າການໃນການສະເໜີທິດທາງແລະມາດຕະການສະເພາະ ເພື່ອຮ່ວມກັນແກ້ໄຂຄວາມຫຍຸ້ງຍາກໃຫ້ວິສາຫະກິດ; ໜູນຊ່ວຍວິສາຫະກິດໃນຂະບວນວິວັດການເຊື່ອມໂຍງ ແລະ ການປະຕິບັດບັນດາຄຳໝັ້ນສັນຍາກ່ຽວກັບການເຊື່ອມໂຍງເສດຖະກິດສາກົນ; ຮັບຟັງຄວາມຄິດເຫັນແລະຂໍ້ສະເໜີແນະຂອງວິສາຫະກິດ ກ່ຽວກັບບັນດາບັນຫານະໂຍບາຍ, ຂໍ້ຄົງຄ້າງໃນການເຊື່ອມໂຍງເສດຖະກິດສາກົນ ແລະ ໃນຂະບວນການເຈລະຈາ ແລະ ການປະຕິບັດບັນດາສັນຍາການຄ້າເສລີ ກໍຄືຄວາມຕັ້ງໜ້າພະຍາຍາມສົ່ງເສີມ ແລະ ຊ່ວຍໜູນວິສາຫະກິດແລະບຸກຄົນ ໃນການປະຕິບັດການຄົ້ນຄວ້າ, ມອບໂອນ, ປ່ຽນແປງໃໝ່ ແລະ ປັບປຸງບູລະນະເຕັກໂນໂລຊີ ເພື່ອຍົກສູງຄວາມສາມາດແຂ່ງຂັນຂອງວິສາຫະກິດແລະຜະລິດຕະພັນ, ຍູ້ແຮງການຮ່ວມມືສາກົນໃນຂົງເຂດການປ່ຽນແປງໃໝ່ປະດິດສ້າງ, ສະໜັບສະໜູນຂະບວນວິວັດການປ່ຽນແປງໃໝ່ເຕັກໂນໂລຊີຂອງຊາດ.
ທີເຈັດ, ຕ້ອງຍົກສູງຄວາມຮັບຮູ້ຂອງຊຸມຊົນວິສາຫະກິດ ກ່ຽວກັບການເຊື່ອມໂຍງເສດຖະກິດສາກົນ. ວິສາຫະກິດຫວຽດນາມຕ້ອງເຂົ້າໃຈແລະໃຊ້ປະໂຫຍດສູງສຸດຈາກການເຊື່ອມໂຍເສດຖະກິດສາກົນໃນການທຸລະກິດ; ປົກປ້ອງຕົນເອງໃນການຂັດແຍ້ງດ້ານການຄ້າລະຫວ່າງປະເທດ ໂດຍຜ່ານການຮຽນຮູ້ຢ່າງຈິງຈັງ ແລະ ເກັບກໍາຂໍ້ມູນກ່ຽວກັບຄວາມຕ້ອງການຂອງຕະຫຼາດ; ສ້າງເຄື່ອງໝາຍການຄ້າ, ປັບປຸງຊື່ສຽງແລະຄຸນນະພາບຂອງພະລິດຕະພັນ ແນໃສ່ຕອບສະໜອງຄວາມຕ້ອງການຂອງບັນດາຕະຫຼາດການສົ່ງອອກ, ໂດຍສະເພາະການປະຕິບັດຕາມກົດລະບຽບກັກກັນ ຂອງຕະຫຼາດຂະໜາດໃຫຍ່ແລະເອົາໃຈຍາກ, ພ້ອມທັງສຸມໃສ່ລົງທຶນກໍ່ສ້າງແຫຼ່ງຊັບພະຍາກອນທີ່ມີຄຸນນະພາບສູງ.
ອາດຈະເວົ້າໄດ້ວ່າ, ການຍູ້ແຮງການປະຕິບັດສັນຍາການຄ້າເສລີຢ່າງມີປະສິດທິຜົນແມ່ນໜຶ່ງໃນບັນດາວິທີແກ້ໄຂ ເພື່ອປະຕິບັດສາມການບຸກທະລຸຍຸດທະສາດທີ່ກອງປະຊຸມໃຫຍ່ຄັ້ງທີ 13 ຂອງພັກໄດ້ວາງອອກມາ. ບັນດາຄຳໝັ້ນສັນຍາທີ່ໄດ້ຍົກອອກມາ, ໂດຍສະເພາະແມ່ນໃນສັນຍາການຄ້າເສລີຮຸ່ນໃໝ່, ລ້ວນແຕ່ສອດຄ່ອງກັບແຜນນະໂຍບາຍຂອງພັກແລະລັດຫວຽດນາມກ່ຽວກັບການປັບປຸງບູລະນະສະຖາບັນ, ຮັບປະກັນຄວາມຄົບຊຸດຂອງລະບົບນະໂຍບາຍ, ກົດໝາຍ, ຈາກນັ້ນ, ສ້າງກົນໄກທີ່ເປີດກວ້າງແລະຍືດຫຍຸ່ນ ເພື່ອສ້າງສະພາບແວດລ້ອມການລົງທຶນແລະທຸລະກິດທີ່ດີ. ການໃຊ້ປະໂຫຍດສູງສຸດຈາກໂອກາດການເປີດຕະຫຼາດຂອງບັນດາຄູ່ຮ່ວມມື ແນ່ນອນວ່າຈະປະກອບສ່ວນສ້າງແຫຼ່ງກຳລັງທີ່ຈໍາເປັນ ໃຫ້ແກ່ການຫັນປະເທດເປັນອຸດສາຫະກຳ ແລະ ທັນສະໄໝ. ເພາະສະນັ້ນ, ບັນດາກະຊວງ, ຂະແໜງການ ແລະທ້ອງຖິ່ນທີ່ເພີ່ມທະວີປະສິດທິຜົນຂອງຂະບວນການປະຕິບັດບັນດາສັນຍາການຄ້າເສລີໃນເວລາຕໍ່ໄປ ກໍແມ່ນມາດຕະການທີ່ແທດຈິງ ເພື່ອປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ./.
-----------------
(1) ນັ້ນແມ່ນ: ສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປາຊີຟິກ (CPTPP), ສັນຍາການຄ້າເສດລີລະຫວ່າງຫວຽດນາມແລະສະຫະພາບເອີຣົບ (EVFTA), ສັນຍາການຄ້າເສດລີລະຫວ່າງ ສະຫະລາຊະອານາຈັກອັງກິດແລະໄອແລນເໜືອ ກັບ ສາທາລະນະລັດສັງຄົມນິຍົມຫວຽດນາມ (UKVFTA).
(2) ລະອຽດຄື: ຜະລິດຕະພັນອາຫານທະເລບັນລຸ 894 ລ້ານໂດລາສະຫະລັດ (ເພີ່ມຂຶ້ນ 14%); ຜັກ, ໝາກໄມ້ບັນລຸ 137 ລ້ານໂດລາສະຫະລັດ (ເພີ່ມຂຶ້ນ 7,4%); ເຂົ້າສານບັນລຸ 13,7 ລ້ານໂດລາສະຫະລັດ (ເພີ່ມຂຶ້ນ 13,9%), ໃນນັ້ນ, ມີລາຍການເຊັ່ນເຂົ້າສານທີ່ມີອັດຕາການໃຊ້ປະໂຫຍດສູງສຸດເປັນ 100% - ໝາຍຄວາມວ່າ ການສົ່ງອອກທັງໝົດເພີ່ມຂຶ້ນອັນເປັນຜົນໂດຍກົງຈາກການປະຕິບັດສັນຍາ EVFTA.
(3) ຕົວຢ່າງເຊັ່ນເຫຼັກ, ເຫຼັກກ້າ ເພີ່ມຂຶ້ນ 346,8% ເມື່ອທຽບກັບໄລຍະເວລາດຽວກັນຂອງປີ 2020; ຖັດລົງມາແມ່ນວັດສະດຸພາດສະຕິກ ເພີ່ມຂຶ້ນ 293,7%; ຜະລິດຕະພັນຈາກຢາງຢືດ ເພີ່ມຂຶ້ນ 67,3%; ເຄື່ອງຄອມພິວເຕີ, ຜະລິດຕະພັນແລະສ່ວນປະກອບເອເລັກໂຕຣນິກ ເພີ່ມຂຶ້ນ 40,7%;...
(4) ເຫຼັກ, ເຫຼັກກ້າ ເພີ່ມຂຶ້ນ 770,4% ເມື່ອທຽບກັບໄລຍະເວລາດຽວກັນຂອງປີ 2020; ຖັດລົງມາແມ່ນຜະລິດຕະພັນຈາກເຫຼັກ, ເຫຼັກກ້າ ເພີ່ມຂຶ້ນ 186%; ໄມ້ໄຜ່, ຫວາຍ, ຜື ແລະພົມ ເພີ່ມຂຶ້ນ 105,6%; ຂອງຫຼິ້ນ, ອຸປະກອນກິລາ ແລະ ພາກສ່ວນ ເພີ່ມຂຶ້ນ 94,4%; ພາຫະນະຂົນສົ່ງ ແລະ ສ່ວນປະກອບ ເພີ່ມຂຶ້ນ 91,6%;...
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 975 (ເດືນອຕຸລາ 2021)
