ເປັນເອກະພາບໃນການຮັບຮູ້ ແລະ ການຈັດຕັ້ງປະຕິບັດນະໂຍບາຍການຄັງ
ຢ່າງມີປະສິດທິຜົນ ເພື່ອຮັບປະກັນການຟື້ນຟູ ແລະ ພັດທະນາເສດຖະກິດ-ສັງຄົມ
ຢ່າງມີປະສິດທິຜົນ ເພື່ອຮັບປະກັນການຟື້ນຟູ ແລະ ພັດທະນາເສດຖະກິດ-ສັງຄົມ
ສະຫາຍ ຟ້າມ ມິງຈີ໊ງ ກຳມະການກົມການເມືອງສູນກາງ, ນາຍົກລັດຖະມົນຕີ ເຂົ້າຮ່ວມແລະຊີ້ນຳ ກອງປະຊຸມອອນໄລນ໌ສະຫຼຸບສັງລວມ ວຽກງານການເງິນ-ງົບປະມານແຫ່ງລັດປີ 2021 ແລະ ຜັນຂະຫຍາຍໜ້າທີ່ປີ 2022 _ພາບ: TTXVN
ພື້ນຖານອັນສຳຄັນສຳລັບຂະບວນການຟື້ນຟູ ແລະ
ການພັດທະນາເສດຖະກິດ-ສັງຄົມ ຕິດພັນກັບການຄວບຄຸມພະຍາດ
ເມື່ອສິ້ນສຸດແຜນການ 5 ປີ (2016-2020), ເຖິງວ່າຈະໄດ້ຮັບຜົນກະທົບຢ່າງໜັກຈາກການແຜ່ລະບາດຂອງພະຍາດໂຄວິດ-19 ໃນປີສຸດທ້າຍຂອງໄລຍະແຜນການກໍ່ຕາມແຕ່ເສດຖະກິດຂອງປະເທດເຮົາຍັງຄົງຮັກສາອັດຕາການເຕີບໂຕສະເລ່ຍທີ່ຂ້ອນຂ້າງສູງ (ປະມານ 5,9%); ຂະໜາດແລະລະດັບຂອງພື້ນຖານເສດຖະກິດໄດ້ຮັບການຍົກຂຶ້ນ, ຄຸນນະພາບການຂອງການເຕີບໂຕດີຂຶ້ນ, ການດຸ່ນດ່ຽງທີ່ສໍາຄັນຂອງເສດຖະກິດໄດ້ຮັບປະກັນ, ອັດຕາເງິນເຟີ້ຖືກຄວບຄຸມຢູ່ໃນລະດັບຕໍ່າ; ຊີວິດການເປັນຢູ່ຂອງປະຊາຊົນທາງດ້ານວັດຖຸແລະຈິດໃຈໄດ້ຮັບການປົວແປງດີຂຶ້ນ; ຖານະບົດບາດຂອງປະເທດໃນພາກພື້ນແລະໃນເວທີສາກົນໄດ້ຮັບການຍົກສູງ.
ໃນຂົງເຂດການເງິນ-ທະນາຄານແຫ່ງລັດ, ຂະໜາດແລະຄວາມຍືນຍົງຂອງງົບປະມານແຫ່ງລັດສືບຕໍ່ໄດ້ຮັບການປັບປຸງ. ລາຍຮັບງົບປະມານຂອງລັດສະເລ່ຍບັນລຸ 25,2% ຂອງ ຈີດີພີ, ເພີ່ມຂຶ້ນ 1,6 ເທົ່າເມື່ອທຽບໃສ່ໄລຍະປີ 2011-2015; ອັດຕາລາຍຮັບຈາກພາສີແລະຄ່າທຳນຽມປະມານ 21% ຂອງ ຈີດີພີ; ອັດຕາສ່ວນລາຍຮັບພາຍໃນປະເທດໃນລາຍຮັບງົບປະມານແຫ່ງລັດທັງໝົດໃນປີ 2020 ບັນລຸ 85,6%, ເພີ່ມຂຶ້ນເກືອບ 26% ເມື່ອທຽບກັບສິບປີກ່ອນ. ລາຍຈ່າຍງົບປະມານຂອງລັດສະເລ່ຍປະມານ 28% ຂອງ ຈີດີພີ; ໂຄງປະກອບການໃຊ້ຈ່າຍຂະຫຍັບໄປໃນທາງບວກ, ອັດຕາສ່ວນລາຍຈ່າຍການລົງທຶນພັດທະນາບັນລຸປະມານ 28%, ລາຍຈ່າຍປະຈຳຫຼຸດລົງເຫຼືອຕ່ຳກ່ວາ 64% ຂອງລາຍຈ່າຍງົບປະມານແຫ່ງລັດທັງໝົດ. ພື້ນທີ່ທາງການຄັງມີຄວາມເຂັ້ມແຂງ, ຄວາມຍືດຫຍຸ່ນຂອງງົບປະມານຂອງລັດໄດ້ຮັບການປັບປຸງ; ການຂາດດຸນງົບປະມານຂອງລັດໂດຍສະເລ່ຍຕະຫຼອດໄລຍະເວລາແມ່ນ 3,45% ຂອງ ຈີດີພີ, ຕໍ່າກວ່າຄາດໝາຍ (ບໍ່ເກີນ 3,9% ຂອງ ຈີດີພີ); ໜີ້ສິນສາທາລະນະຫຼຸດລົງຢ່າງໄວ ຈາກ 63,7% ຂອງຈີດີພີ ໃນທ້າປີ 2016 ເປັນ 55,2% ຂອງ ຈີດີພີ ໃນທ້າຍປີ 2020 ແລະ ໄດ້ຮັບການປັບໂຄງສ້າງໃໝ່ໄປສູ່ທິດທາງທີ່ຍືນຍົງກວ່າ (ຕົ້ນຕໍແມ່ນການລະດົມເງິນໃນປະເທດ, ການຍືດອາຍຸໜີ້ສິນ, ການຫຼຸດອັດຕາດອກເບ້ຍເງິນຝາກ,...). ດ້ວຍເຫດນັ້ນ, ງົບປະມານຂອງລັດໄດ້ຮັບປະກັນແຫຼ່ງຊັບພະຍາກອນ ເພື່ອຕອບສະໜອງຄວາມຕ້ອງການຮີບດ່ວນທີ່ເກີດຂຶ້ນໃນພາກປະຕິບັດ, ໂດຍສະເພາະ ໃນການຮັບມືກັບການແຜ່ລະບາດຂອງໂຄວິດ-19.
ຢ່າງໃດກໍຕາມ, ການແຜ່ລະບາດຂອງໂຄວິດ-19 ໄດ້ສົ່ງຜົນກະທົບຢ່າງຮ້າຍແຮງຕໍ່ເສດຖະກິດໂລກແລະຫວຽດນາມ. ໃນສອງປີ 2020-2021, ການເຕີບໂຕເສດຖະກິດຂອງຫວຽດນາມສືບຕໍ່ຫຼຸດລົງໃນລະດັບຕ່ຳ(1); ພື້ນທີ່ຊັບພະຍາກອນຂອງທັງພາກລັດ, ພາກວິສາຫະກິດ ແລະ ປະຊາຊົນຫຼຸດລົງ, ເຮັດໃຫ້ເກີດຄວາມທ້າທາຍຫຼາຍຢ່າງກ່ຽວກັບສະຖຽນລະພາບ, ໄພເງິນເຟີ້... ສົ່ງຜົນສະທ້ອນເຖິງຄວາມສາມາດໃນການປະຕິບັດບັນດາເປົ້າໝາຍ, ຄາດໝາຍ, ໜ້າທີ່ ການພັດທະນາເສດຖະກິດ-ສັງຄົມປະຈຳປີ ແລະ ຕະຫຼອດໄລຍະປີ 2021-2025.
ມະຕິກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດ “ການຟື້ນຟູ, ພັດທະນາເສດຖະກິດ-ສັງຄົມ” ເປັນໜຶ່ງໃນບັນດາໜ້າທີ່ຈຸດໜັກໃຈກາງໃນວາລະກອງປະຊຸມໃຫຍ່ຄັ້ງທີ 13, ໃນນັ້ນ, ຄາດໝາຍສູ້ຊົນຂອງແຜນການ 5 ປີ (2021-2025) ມີດັ່ງນີ້: ຟື້ນຟູເສດຖະກິດຢ່າງໄວໃນຊຸມປີຕົ້ນ (2021-2022), ໃຊ້ໂອກາດໃໝ່ຢ່າງມີປະສິດທິຜົນເພື່ອຄວາມກ້າວໜ້າແລະການພັດທະນາປະເທດ ໃນຊຸມປີທ້າຍຂອງແຜນການ (2023-2025), ສູ້ຊົນໃຫ້ການເຕີບໂຕເສດຖະກິດໂດຍສະເລ່ຍ (ຈີດີພີ) ໃນຕະຫຼອດໄລຍະແຜນການແມ່ນປະມານ 6,5% - 7% ຕໍ່ປີ.
ເພື່ອສະໜັບສະໜູນປະຊາຊົນ ແລະ ວິສາຫະກິດໃຫ້ຜ່ານຜ່າຄວາມຫຍຸ້ງຍາກ ແລະ ຮັບມືກັບການແຜ່ລະບາດຂອງໂຄວິດ-19, ລັດຖະບານໄດ້ຈັດຕັ້ງປະຕິບັດຫຼາຍມາດຕະການ, ນະໂຍບາຍກ່ຽວກັບເສດຖະກິດ ການເງິນ ແລະ ເງິນຕາ, ເຊັ່ນ: ບັນດານະໂຍບາຍສະໜັບສະໜູນປະຊາຊົນ, ຜູ້ອອກແຮງງານ ຕາມມະຕິເລກທີ 42/NQ-CP ແລະ ມະຕິເລກທີ 68/NQ-CP, ຂອງລັດຖະບານ; ການຍົກເວັ້ນ, ຫຼຸດຜ່ອນ, ຕໍ່ກຳນົດເວລາຊຳລະພາສີ, ຄ່າທໍານຽມ ແລະຄ່າບໍລິການ ຕາມມະຕິເລກທີ 406/NQ-UBTVQH15, ຂອງຄະນະກຳມະການປະຈຳສະພາແຫ່ງຊາດ, ດຳລັດເລກທີ 52/2021/NĐ-CP, ຂອງລັດຖະບານ...; ນະໂຍບາຍລວມກ່ຽວກັບການຊຸກຍູ້ການເຕີບໂຕເສດຖະກິດ, ສະໜັບສະໜູນວິສາຫະກິດ ສະຫະກອນ ແລະ ຄົວເຮືອນທຸລະກິດ ຕາມມະຕິເລກທີ 105/NQ-CP ແລະ ມະຕິເລກທີ 63/NQ-CP, ຂອງລັດຖະບານ... ເຊິ່ງໄດ້ປະກາດໃຊ້ຢ່າງທັນການ ຄົບຊຸດ ແລະ ໄດ້ຮັບການຈັດຕັ້ງປະຕິບັດຢ່າງແຂງຂັນ ໂດຍລວມສູນໃສ່ບັນດາຂະແໜງການ, ຂົງເຂດ, ຜູ້ຄົນ ທີ່ຖືກຜົນກະທົບຢ່າງໜັກໜ່ວງ, ໂດຍກົງຈາກການແຜ່ລະບາດຂອງພະຍາດ, ເຊິ່ງມີການສົມທົບ ແຊກຊ້ອນ ຊຸກຍູ້ຂະແໜງການ, ຂົງເຂດບຸລິມະສິດຈຳນວນໜຶ່ງ... ປະກອບສ່ວນສຳຄັນເຂົ້າໃນການຮັກສາສະຖຽນລະພາບຂອງເສດຖະກິດມະຫາພາກ, ຮັບປະກັນຄວາມປອດໄພທາງສັງຄົມ, ຫຼຸດຜ່ອນຜົນກະທົບຂອງໂລກລະບາດ, ຮັກສາຄວາມປອດໄພຂອງປະຊາຊົນ ແລະຄວາມໝັ້ນຄົງທາງສັງຄົມ. ນີ້ແມ່ນພື້ນຖານທີ່ສຳຄັນສຳລັບຂະບວນການຟື້ນຟູແລະພັດທະນາເສດຖະກິດ-ສັງຄົມ ຕິດພັນກັບການຄວບຄຸມການແຜ່ລະບາດຂອງພະຍາດ.
ຢ່າງໃດກໍຕາມ, ໃນຕໍ່ໜ້າຄວາມຫຍຸ້ງຍາກ ແລະ ຜົນກະທົບອັນກວ້າງຂວາງຂອງໂລກລະບາດ, ຈຳເປັນຕ້ອງມີມາດຕະການແກ້ໄຂແລະນະໂຍບາຍລວມ ເພື່ອໜູນຊ່ວຍການຟື້ນຟູແລະພັດທະນາເສດຖະກິດໂດຍໄວ, ບໍ່ໃຫ້ພາດຈັງຫວະການຟື້ນຕົວເສດຖະກິດຂອງພາກພື້ນ ແລະ ໂລກ. ດັ່ງນັ້ນ, ການສ້າງໂຄງການຟື້ນຟູແລະພັດທະນາເສດຖະກິດ-ສັງຄົມ, ພ້ອມກັບຊຸດວິທີແກ້ໄຂດ້ານການຄັງແລະເງິນຕາ ເພື່ອສະໜັບສະໜູນໂຄງການ ແມ່ນເໝາະສົມແລະຮີບດ່ວນທີ່ສຸດ.
ເພື່ອປະຕິບັດບົດສະຫຼຸບຂອງສູນກາງພັກແລະກົມການເມືອງ (2) ແລະປະຕິບັດບັນດາມະຕິຂອງສະພາແຫ່ງຊາດ (3), ລັດຖະບານໄດ້ຊີ້ນຳການສ້າງໂຄງການຟື້ນຟູແລະພັດທະນາເສດຖະກິດ-ສັງຄົມ ແລະ ສະເໜີໃຫ້ກົມການເມືອງສູນກາງພັກພິຈາລະນາ ແລ ອະນຸມັດໃຫ້ປະຕິບັດໂຄງການ(4); ສະເໜີໃຫ້ສະພາແຫ່ງຊາດຮັບຮອງຜ່ານມະຕິເລກທີ 43/2022/QH15, ລົງວັນທີ 11 ມັງກອນ 2022, “ກ່ຽວກັບນະໂຍບາຍການຄັງ ແລະ ເງິນຕາ ເພື່ອສະໜັບສະໜູນໂຄງການຟື້ນຟູແລະພັດທະນາເສດຖະກິດ-ສັງຄົມ” ເພື່ອປະກອບສ່ວນຊ່ວຍໃຫ້ເສດຖະກິດຜ່ານຜ່າຄວາມຫຍຸ້ງຍາກໂດຍໄວ, ບໍ່ໃຫ້ພາດຈັງຫວະການຟື້ນຟູເສດຖະກິດທົ່ວໂລກ, ພ້ອມກັນນັ້ນ ສ້າງຮາກຖານແລະເງື່ອນໄຂອັນສະດວກໃຫ້ແກ່ການພັດທະນາເສດຖະກິດ-ສັງຄົມ ໃນໄລຍະປີ 2021-2025 ແລະ ຊຸມປີຕໍ່ໄປ, ຍົກສູງປະສິດທິຜົນ, ສະມັດຕະພາບແຮງງານ, ແຮງແຂ່ງຂັນ, ກຳລັງແຮງພາຍໃນແລະຄວາມເປັນເຈົ້າການຂອງພື້ນຖານເສດຖະກິດໃນອະນາຄົດ. ບົນພື້ນຖານນັ້ນ, ລັດຖະບານໄດ້ອອກມະຕິເລກທີ 11/NQ-CP, ລົງວັນທີ 30 ມັງກອນ 2022, “ວ່າດ້ວຍໂຄງການຟື້ນຟູແລະພັດທະນາເສດຖະກິດ-ສັງຄົມ ແລະ ການຜັນຂະຫຍາຍມະຕິເລກທີ 43/2022/QH15 ຂອງສະພາແຫ່ງຊາດ ກ່ຽວກັບນະໂຍບາຍການຄັງແລະເງິນຕາເພື່ອສະໜັບສະໜູນໂຄງການ”, ໃນນັ້ນ, ຂະໜາດຂອງນະໂຍບາຍການຄັງກວມເຖິງ 83% ຂອງຍອດມູນຄ່າຂອງຊຸດສະໜັບສະໜູນ ແລະ ຖືກຖືວ່າເປັນ “ກຸນແຈ” ໃນການຈັດຕັ້ງປະຕິບັດໂຄງການໃຫ້ປະສົບຜົນສໍາເລັດ.
ໂຄງການຟື້ນຟູແລະພັດທະນາເສດຖະກິດ-ສັງຄົມໄດ້ຮັບການສ້າງຂຶ້ນໂດຍມີທັດສະນະຊີ້ນຳຫຼັກດັງນີ້: 1- ຊາບຊຶມແຜນນະໂຍບາຍ, ທິດທາງຂອງພັກ, ມະຕິຂອງສະພາແຫ່ງຊາດ, ຕັ້ງໝັ້ນໃນການຮັກສາສະຖຽນລະພາບຂອງເສດຖະກິດມະຫາພາກ, ຍົກສູງສະມັດຕະພາບ, ຄຸນນະພາບ, ປະສິດທິຜົນ, ຄວາມສາມາດແຂ່ງຂັນ, ຄວາມເປັນເຈົ້າຕົນເອງ, ຄວາມສາມາດທົນທານຍືດຫຍຸ່ນ ແລະ ຄວາມສາມາດປັບຕົວຂອງເສດຖະກິດ, ຕອບສະໜອງຢ່າງທັນການ ກັບຄວາມຕ້ອງການພັດທະນາເສດຖະກິດ-ສັງຄົມສະເພາະໜ້າແລະຍາວນານ, ເຊື່ອມໂຍງຢ່າງແໜ້ນແຟ້ນກັບບັນດາໂຄງການ, ແຜນການ 5 ປີ ແລະ ປະຈຳປີ (5); 2- ບໍລິຫານຢ່າງໄຫວພິບ, ສົມທົບຢ່າງແໜ້ນແຟ້ນ, ກົມກຽວ, ມີປະສິດທິຜົນ ລະຫວ່າງບັນດານະໂຍບາຍການຄັງ, ເງິນຕາ ແລະ ບັນດານະໂຍບາຍມະຫາພາກອື່ນ; ຄວບຄຸມອັດຕາເງິນເຟີ້ຢ່າງເຂັ້ມງວດ, ຮັບປະກັນຄວາມສົມດຸນທີ່ສຳຄັນຂອງເສດຖະກິດ; ພຽງແຕ່ເພີ່ມການຂາດດຸນງົບປະມານເພື່ອເພີ່ມລາຍຈ່າຍລົງທຶນພັດທະນາ ແລະ ຮັບປະກັນຄວາມສົມດຸນຂອງງົບປະມາຍຂອງລັດ ເມື່ອປະຕິບັດບັນດາມາດຕະການຍົກເວັ້ນພາສີ ແລະ ຫຼຸດຜ່ອນພາສີ; 3- ຂະໜາດແລະແຫຼ່ງພະລັງຂອງໂຄງການມີຂະໜາດໃຫຍ່ພຽງພໍ; ມີເປົ້າໝາຍຈຸດໜັກ ໃຈກາງສຸມໃສ່ບຸກທະລຸໃນການກໍ່ສ້າງພື້ນຖານໂຄງລ່າງພິເສດ, ທາງຄົມມະນາຄົມ ແລະ ຄວາມປອດໄພທາງສັງຄົມ, ຖືກເປົ້າໝາຍຜູ້ທີ່ຕ້ອງການການສະໜັບສະໜູນ ເພື່ອແກ້ໄຂບັນດາບັນຫາຮີບດ່ວນ, ບໍ່ເຮັດແບບກະແຈກກະຈາຍ, ສິ້ນເປືອງແຫຼ່ງພະລັງ; 4- ນະໂຍບາຍ, ມາດຕະການສະໜັບສະໜູນຕ້ອງເປັນໄປໄດ້, ປະຕິບັດທັນທີ, ທັນເວລາ, ມີປະສິດທິຜົນ, ຕົ້ນຕໍແມ່ນປະຕິບັດໃນ 2 ປີ (2022-2023); ບາງນະໂຍບາຍອາດຈະໄດ້ແກ່ຍາວ, ເພີ່ມແຫຼ່ງພະລັງເພື່ອປະຕິບັດ ຂຶ້ນຢູ່ກັບວິວັດທະນາການຂອງພະຍາດ; 5- ລະດົມ, ຈັດແບ່ງ, ຄຸ້ມຄອງ ແລະ ນຳໃຊ້ແຫຼ່ງພະລັງຢ່າງມີປະສິດທິຜົນ; ຈັດຄວາມສົມດຸນທີ່ສົມເຫດສົມຜົນລະຫວ່າງເຂດ, ພາກພື້ນ, ທ້ອງຖິ່ນ, ຂົງເຂດ, ເປົ້າໝາຍບຸລິມະສິດ; ປະຕິບັດງ່າຍ, ກວດກາ ຕິດຕາມງ່າຍ, ປະເມີນຜົນງ່າຍ; ຕ້ານຄວາມຫຍໍ້ທໍ້, ການສໍ້ລາດບັງຫຼວງ, ຜົນປະໂຫຍດໝູ່ພວກ, ການຫາກຳໄລຈາກນະໂຍບາຍ; ຮັບປະກັນປະສິດທິຜົນ, ຄວາມຍຸຕິທຳ, ເປີດເຜີຍ, ໂປ່ງໃສ.
ຈຸດໝາຍຂອງໂຄງການແມ່ນເພື່ອຟື້ນຟູແລະພັດທະນາການຜະລິດ-ທຸລະກິດຢ່າງວ່ອງໄວ, ສູ້ຊົນເພື່ອບັນລຸເປົ້າໝາຍຂອງໄລຍະປີ 2021-2025: ຈີດີພີ ຈະເຕີບໂຕສະເລ່ຍ 6,5 - 7% ຕໍ່ປີ, ເປົ້າໝາຍໜີ້ສິນສາທາລະນະຕ່ຳກວ່າລະດັບເຕືອນໄພ ທີ່ສະພາແຫ່ງຊາດອະນຸຍາດໃນມະຕິເລກທີ 23/2021/QH15, ຮັກສາສະຖຽນລະພາບຂອງເສດຖະກິດມະຫາພາກ, ຮັບປະກັນບັນດາການດຸ່ນດ່ຽງໃຫຍ່ໃນໄລຍະກາງແລະໄລຍະຍາວ... ການປະຢັດຄ່າໃຊ້ຈ່າຍ, ຮອງຮັບກະແສເງິນສົດ, ຮັບປະກັນຄວາມເປັນເຈົ້າການ ແລະຄວາມສະດວກໃຫ້ແກ່ວິສາຫະກິດ, ອົງການຈັດຕັ້ງເສດຖະກິດ ແລະ ປະຊາຊົນ. ປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢ່າງມີປະສິດທິຜົນ; ຮັບປະກັນຄວາມປອດໄພທາງສັງຄົມ ແລະ ຊີວິດຂອງປະຊາຊົນ, ໂດຍສະເພາະແມ່ນປະຊາຊົນຜູ້ອອກແຮງງານ, ຜູ້ທຸກຍາກ, ຜູ້ດ້ອຍໂອກາດ, ຜູ້ຖືກຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດ; ຮັບປະກັນການປ້ອງກັນປະເທດ, ການປ້ອງກັນຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ.
ໂຄງການໄດ້ລະບຸ 5 ກຸ່ມໜ້າທີ່ແລະວິທີແກ້ໄຂສຳຄັນເພື່ອປະຕິບັດ ຄື: 1- ເປີດກວ້າງເສດຖະກິດ ຕິດພັນກັບການລົງທຶນ ເພື່ອຍົກສູງຄວາມສາມາດດ້ານສາທາລະນະສຸກ, ການປ້ອງກັນແລະຕ້ານພະບາດ; 2- ຮັບປະກັນຄວາມປອດໄພທາງສັງຄົມ ແລະ ສະໜັບສະໜູນດ້ານວຽກເຮັດງານທຳ ເຊັ່ນ: ຊ່ວຍເຫຼືອຄ່າເຊົ່າທີ່ຢູ່ອາໄສ 3 ເດືອນສໍາລັບຄົນງານ, ປະຕິບັດນະໂຍບາຍການກູ້ຢືມບຸລິມະສິດຜ່ານທະນາຄານເພື່ອນະໂຍບາຍສັງຄົມ...; 3- ໜູນຊ່ວຍການຟື້ນຟູວິສາຫະກິດ, ສະຫະກອນ ແລະ ຄົວເຮືອນທຸລະກິດ ໂດຍຜ່ານການຍົກເວັ້ນ ແລະ ຫຼຸດຜ່ອນພາສີ, ຄ່າທຳນຽມ, ຄ່າບໍລິການ, ຂະຫຍາຍກຳນົດເວລາຊຳລະພາສີ ແລະ ຄ່າເຊົ່າທີ່ດິນ; ຄິດໄລ່ໃນຄ່າໃຊ້ຈ່າຍທີ່ຫັກອອກໄດ້ ເມື່ອກຳນົດລາຍຮັບບໍລິສັດທີ່ຕ້ອງເສຍພາສີ ສຳລັບຄ່າໃຊ້ຈ່າຍເພື່ອສະໜັບສະໜູນ, ອຸປະຖຳກິດຈະກຳປ້ອງການແລະຄວບຄຸມການແຜ່ລະບາດຂອງພະຍາດໂຄວິດ-19 ປະຈຳປີພາສີ 2022; ສະໜັບສະໜູນອັດຕາດອກເບ້ຍເງິນກູ້ 2% ຕໍ່ປີ ໂດຍສຸມໃສ່ຂະແໜງການແລະຂົງເຂດທີ່ສໍາຄັນຈໍານວນໜຶ່ງ...; 4- ລົງທຶນພັດທະນາໂຄງສ້າງພື້ນຖານ, ສຸມເງິນລົງທຶນໃສ່ໂຄງການທີ່ສໍາຄັນແລະຮີບດ່ວນ, ທີ່ມີຜົນກະທົບຂະໜາດໃຫຍ່, ສາມາດເບິກຈ່າຍໄດ້ຢ່າງໄວ ແລະ ຊຶມເຂົ້າສູ່ພື້ນຖານເສດຖະກິດທັນທີ; 5- ປະຕິຮູບລະບຽບລະບອບ, ປະຕິຮູບການບໍລິຫານ, ປັບປຸງສະພາບແວດລ້ອມການລົງທຶນ ທຸລະກິດ.
ບັນດາວິທີແກ້ໄຂນະໂຍບາຍການຄັງທີ່ສໍາຄັນ
ໃນໂຄງການຟື້ນຟູແລະພັດທະນາເສດຖະກິດ-ສັງຄົມ
ທີໜຶ່ງ, ໃນໂຄງການລວມ, ມູນຄ່າຂອງການແກ້ໄຂນະໂຍບາຍການຄັງຄາດວ່າຈະບັນລຸ 291 ຕື້ດົ່ງ (ເທົ່າກັບປະມານ 83% ຂອງຊຸດສະໜັບສະໜູນທັງໝົດ) ແລະຂ້ອນຂ້າງກວມລວມ, ຈາກນະໂຍບາຍລາຍຮັບ ເຊັ່ນ: ຫຼຸດພາສີ ຄ່າທຳນຽມ ຄ່າບໍລິການເປັນມູນຄ່າຫຼາຍສຸດປະມານ 64.000 ຕື້ດົ່ງ, ສືບຕໍ່ຂະຫຍາຍກຳນົດເວລາຊໍາລະພາສີແລະຄ່າເຊົ່າທີ່ດິນ ດ້ວຍລະດັບໜູນຊ່ວຍປະມານ 6.000 ຕື້ດົ່ງ; ຈົນເຖິງນະໂຍບາຍການໃຊ້ຈ່າຍ, ເຊັ່ນ: ລົງທຶນພັດທະນາໂຄງສ້າງພື້ນຖານ, ສ້າງຄວາມທັນສະໄໝໃຫ້ກັບລະບົບສາທາລະນະສຸກ, ໃຫ້ການຊົດເຊີຍອັດຕາດອກເບ້ຍ ແລະ ສະໜັບສະໜູນອັດຕາດອກເບ້ຍສູງສຸດປະມານ 176.000 ຕື້ດົ່ງ, ສະໜັບສະໜູນຄ່າເຊົ່າທີ່ຢູ່ອາໄສໃຫ້ກັບຜູ້ອອກແຮງງານປະມານ 6.600 ຕື້ດົ່ງ; ພ້ອມກັນນັ້ນ, ເພີ່ມວົງເງິນຄ້ຳປະກັນຂອງລັດຖະບານ ສຳລັບພັນທະບັດທີ່ອອກໃນປະເທດໃຫ້ກັບ ທະນາຄານເພື່ອນະໂຍບາຍສັງຄົມ ສູງສຸດ 38.400 ຕື້ດົງ.
ຄວາມຕ້ອງການແຫຼ່ງກຳລັງທັງໝັດເພື່ອປະຕິບັດໂຄງການແມ່ນບໍ່ເກີນ 240.000 ຕື້ດົ່ງ, ເຊິ່ງສອດຄ່ອງກັບການເພີ່ມຂຶ້ນຂອງການຂາດດຸນງົບປະມານຂອງລັດຈາກ 1 ຫາ 1,2% ຂອງຈີດີພີຕໍ່ປີ ເມື່ອທຽບກັບລະດັບປະຈຸບັນ (ປະມານ 3,7 - 3,8% ຂອງຈີດີພີ); ບົນພື້ນຖານຂອງການໃຊ້ບັນດາແຫຼ່ງພະລັງທີ່ມີຢູ່ໃຫ້ເກີດປະໂຫຍດສູງສຸດ ເຊັ່ນ: ແຫຼ່ງລາຍຮັບເຕີບໂຕ ແລະ ການປະຢັດລາຍຈ່າຍຂອງງົບປະມານສູນກາງ; ການໃຊ້ແຫຼ່ງພະລັງຢ່າງມີປະສິດທິພາບໃນແຜນການໄລຍະກາງ (ການເງິນ, ການລົງທຶນພາກລັດ) ໃນໄລຍະປີ 2021-2025; ການປະຢັດ, ການຫຼຸດຄ່າໃຊ້ຈ່າຍ, ປັບປ່ຽນລະຫວ່າງວຽກງານ ແລະ ລາຍການໃຊ້ຈ່າຍພາຍໃນຂອບເຂດຄວາມສາມາດໄດ້ຢ່າງຍືດຫຍຸ່ນ; ລະດົມພັນທະບັດລັດຖະບານໃນປະເທດ, ກູ້ຢືມ ODA ແລະ ເງິນກູ້ບຸລິມະສິດຈາກຕ່າງປະເທດໃນຮູບແບບຂອງການສະໜັບສະໜູນການດຸ່ນດ່ຽງງົບປະມານ; ລະດົມແຫຼ່ງການເງິນທີ່ຖືກຕ້ອງຕາມກົດໝາຍອື່ນໆ.
ລະດັບການໃຊ້ຈ່າຍເກີນກາຍທີ່ຄິດໄລ່ຂ້າງເທິງ ໄດ້ຖືກກໍານົດພາຍໃຕ້ສົມມຸດຕິຖານວ່າ ບັນດາປັດໄຈມະຫາພາກອື່ນໆ ມີສະຖຽນລະພາບ. ຕາມນັ້ນ, ໜີ້ສິນສາທາລະນະຮອດທ້າຍປີ 2025 ຄາດວ່າຈະປະມານ 49 - 50% ຂອງຈີດີພີ, ໜີ້ສິນລັດຖະບານກວມ 45 - 46% ຂອງຈີດີພີ, ຕ່ຳກວ່າລະດັບເຕືອນໄພ ແລະ ຕ່ຳກວ່າເພດານທີ່ສະພາແຫ່ງຊາດອະນຸຍາດໃນມະຕິເລກທີ 23/2021/QH15(6). ໃນຕົວຈິງ, ໂຄງການຈະສົ່ງຜົນສະທ້ອນເຖິງການເຕີບໂຕທາງເສດຖະກິດ, ຜ່ານນັ້ນ ສົ່ງຜົນສະທ້ອນທີ່ດີຕໍ່ລາຍຮັບງົບປະມານຂອງລັດ, ພ້ອມກັບການຄຸ້ມຄອງລາຍຈ່າຍງົບປະມານຢ່າງແໜ້ນແຟ້ນ, ປະຢັດລາຍຈ່າຍປະຈຳ,… ຫຼຸດແຮງກົດດັນຕໍ່ການເພີ່ມການຂາດດຸນງົບປະມານຂອງລັດ.
ທີສອງ, ການປະຕິບັດວິທີແກ້ໄຂນະໂຍບາຍການຄັງ ຄາດວ່າຈະສົ່ງຜົນກະທົບທີ່ຕັ້ງໜ້າຕໍ່ການເຕີບໂຕເສດຖະກິດ, ປັບປຸງສະພາບແວດລ້ອມການລົງທຶນ ທຸລະກິດ ແລະ ຍົກສູງຄວາມສາມາດພາຍໃນ ແລະ ຄວາມສາມາດແຂ່ງຂັນໂດຍລວມ ຂອງພື້ນຖານເສດຖະກິດ, ລະອຽດຄື:
ຕາມການຄິດໄລ່, ໃນກໍລະນີບໍ່ປະຕິບັດບັນດາມາດຕະການແກ້ໄຂນະໂຍບາຍການຄັງແລະເງິນຕາ, ການເຕີບໂຕເສດຖະກິດສະເລ່ຍໃນໄລຍະ 2021-2025 ຈະບັນລຸລະດັບສູງສຸດພຽງ 5,4% ຕໍ່ປີ, ບໍ່ບັນລຸຕາມຄາດໝາຍທີ່ກອງປະຊຸມໃຫຍ່ຄັ້ງທີ 13 ຂອງພັກວາງໄວ້. ເມື່ອປະຕິບັດບັນດາມາດຕະການແກ້ໄຂນະໂຍບາຍການຄັງແລະນະໂຍບາຍເງິນຕາ, ຈະປະກອບສ່ວນສະໜັບສະໜູນ, ຊຸກຍູ້ການຟື້ນຟູແລະພັດທະນາການຜະລິດ ທຸລະກິດ, ໂດຍສະເພາະແມ່ນ ບັນດາະແໜງການ ຂົງເຂດສຳຄັນ ທີ່ຖືກຜົນກະທົບຮ້າຍແຮງຈາກການແຜ່ລະບາດຂອງພະຍາດ. ຜ່ານນັ້ນ, ສູ້ຊົນປະຕິບັດເປົ້າໝາຍການເຕີບໂຕ 5 ປີ (2021-2025) ແຕ່ 6,5% ເຖິງ 7% ຕໍ່ປີ.
ບັນດານະໂຍບາຍການຄັງຊ່ວຍໜູນໃຫ້ວິສາຫະກິດ, ສະຫະກອນ, ຄົວເຮືອນທຸລະກິດ ປັບປຸງກະແສເງິນທຸລະກິດ ເພື່ອຜ່ານຜ່າຄວາມຫຍຸ້ງຍາກ, ຟື້ນຟູການຜະລິດແລະທຸລະກິດ, ຫຼີກລ້ຽງການສູນເສຍໃບສັ່ງຊື້ ລູກຄ້າ ຕະຫຼາດຜູ້ບໍລິໂພກ, ສົ່ງຜົນກະທົບເຖິງການພັດທະນາໃນໄລຍະກາງ ແລະໄລຍະຍາວຂອງວິສາຫະກິດ. ພ້ອມກັນນັ້ນ, ຊ່ວຍສ້າງວຽກເຮັດງານທຳ, ຊ່ວຍໜູນຜູ້ອອກແຮງງານຫາງານ, ຝຶກອົບຮົມ, ຝຶກອົບຮົມຄືນໃໝ່, ຈາກນັ້ນສ້າງລາຍໄດ້ ແລະ ປ່ຽນອາຊີບທີ່ຍືນຍົງໃຫ້ຜູ້ອອກແຮງງານ, ຮັບປະກັນຄວາມປອດໄພທາງສັງຄົມ.
ບັນດາໂຄງການລົງທຶນສາທາລະນະໄດ້ຮັບການຜັນຂະຫຍາຍຢ່າງແຂງແຮງ, ລວມສູນ ແລະ ປະສົບຄວາມສຳເລັດໄວ ຈະປະກອບສ່ວນສ້າງການກ້າວກະໂດດທາງດ້ານໂຄງສ້າງພື້ນຖານ, ຫຼຸດເວລາແລະຄ່າໃຊ້ຈ່າຍການຂົນສົ່ງຂອງວິສາຫະກິດ. ການປະຕິບັດວິທີແກ້ໄຂນະໂຍບາຍການຄັງ ຈະປະກອບສ່ວນຊຸກຍູ້ການປັບປຸງສະພາບແວດລ້ອມການລົງທຶນແລະທຸລະກິດ, ຍົກສູງສະມັດຕະພາບຂອງງານ, ຄວາມສາມາດແຂ່ງຂັນ, ກຳລັງຄວາມສາມາດພາຍໃນ ແລະ ຄວາມເປັນເຈົ້າການຂອງພື້ນຖານເສດຖະກິດ.
ບັນດາມາດຕະການແກ້ໄຂນະໂຍບາຍການຄັງ ເຖິງຈະສ້າງແຮງກົດດັນຕໍ່ຄວາມສົມດຸນຂອງງົບປະມານແລະໜີ້ສິນສາທາລະນະ ໃນໄລຍະສັ້ນກໍຕາມ ແຕ່ໃນໄລຍະຍາວ, ມັນຈະປະກອບສ່ວນສ້າງແຫຼ່ງລາຍຮັບໃໝ່ທີ່ຍືນຍົງໃຫ້ງົບປະມານຂອງລັດ, ສ້າງຄວາມໝັ້ນຄົງທາງດ້ານການເງິນຂອງຊາດ. ພ້ອມກັນນັ້ນ, ການປະສານງານຢ່າງແໜ້ນແຟ້ນໃນການປະຕິບັດນະໂຍບາຍການຄັງ ກັບນະໂຍບາຍເງິນຕາ ເພື່ອຮັບປະກັນສະຖຽນລະພາບເສດຖະກິດມະຫາພາກ, ຕ້ານໄພເງິນເຟີ້, ຄວບຄຸມການໃຊ້ຈ່າຍເກີນດຸນ. ກະຊວງການເງິນສຸມໃສ່ຄຸ້ມຄອງຕະຫຼາດປະກັນໄພ ແລະ ຕະຫຼາດຫຼັກຊັບ, ໂດຍສະເພາະແມ່ນພັນທະບັດຂອງບໍລິສັດ ເພື່ອຮັບປະກັນການພັດທະນາເສດຖະກິດຂອງປະເທດຢ່າງຍືນຍົງ.
ເປັນເຈົ້າການ ຂຸ້ນຂ້ຽວ ແລະ ມີປະສິດທິຜົນ
ໃນການຈັດຕັ້ງປະຕິບັດນະໂຍບາຍການຄັງ
ກຳນົດຄວາມສຳຄັນແລະຄວາມຮຽກຮ້ອງຕ້ອງການໃນການປະຕິບັດມາດຕະການແກ້ໄຂນະໂຍບາຍການຄັງແລະເງິນຕາ ເພື່ອສະໜັບສະໜູນໂຄງການໃຫ້ປະກົດຜົນເປັນຈິງໃນເວລາໄວແລະໄວທີ່ສຸດ, ມະຕິເລກທີ 11/NQ-CP ຊອງລັດຖະບານໄດ້ຮຽກຮ້ອງໃຫ້ບັນດາກະຊວງ, ອົງການສູນກາງແລະທ້ອງຖິ່ນ ສຸມໃສ່ຜັນຂະຫຍາຍ, ມີໂຄງການ,ແຜນປະຕິບັດງານສະເພາະໂດຍໄວ ເພື່ອປະຕິບັດໜ້າທີ່ແລະວິທະແກ້ໄຂທີ່ໄດ້ຮັບມອບໝາຍ; ເຊີດຊູຄວາມຮັບຜິດຊອບ, ໂດຍສະເພາະແມ່ນຄວາມຮັບຜິດຊອບຂອງຫົວໜ້າ ໃນການນຳພາ, ຊີ້ນຳການຈັດຕັ້ງປະຕິບັດບັນດາເນື້ອໃນ ນະໂຍບາຍ; ປ້ອງກັນບໍ່ໃຫ້ເກີດສະພາບການ “ຂໍ - ໃຫ້” ທີ່ສ້າງຄວາມຫຍຸ້ງຍາກ, ຄວາມຫຍຸ້ງເຫຍິງລຳຄານໃຈ, ຄວາມຫຍໍ້ທໍ້ ໃຫ້ກັບປະຊາຊົນ ວິສາຫະກິດ, ແລະ ເປັນເຈົ້າການໃນການແກ້ໄຂບັນຫາທີ່ເກີດຂຶ້ນ.
ອີງໃສ່ມະຕິຂອງສະພາແຫ່ງຊາດ ແລະ ກຳແໜ້ນໜ້າທີ່ທີ່ໄດ້ຮັບມອບໝາຍຈາກລັດຖະບານ, ກະຊວງການຄັງໄດ້ແບ່ງງານແລະມອບໝາຍໜ້າທີ່ທີ່ມີກຳນົດເວລາປະຕິບັດສຳເລັດສະເພາະ ໃຫ້ບັນດາຫົວໜ່ວຍໃນກະຊວງ, ໂດຍມີໜ້າທີ່ຄວບຄຸມ 18 ໜ້າວຽກ ແລະ ໜ້າທີ່ປະສານງານ 13 ໜ້າວຽກກັບກະຊວງແລະອົງການອື່ນໆ, ໃນນັ້ນມີຫຼາຍວຽກງານທີ່ຈະຕ້ອງສຳເລັດ ແລະຍື່ນສະເໜີໃຫ້ອົງການທີ່ມີອຳນາດ ເພື່ອປະກາດໃຊ້ໃນໄຕມາດທີ 1 ປີ 2022 ເຊັ່ນ: 1- ເອກະສານລາຍລະອຽດນະໂຍບາຍການຫຼຸດພາສີມູນຄ່າເພີ່ມ; 2- ລະບຽບການຫຼຸດຜ່ອນຄ່າເຊົ່າທີ່ດິນ, ການຕໍ່ກຳນົດເວລາຊຳລະພາສີ ແລະຄ່າເຊົ່າທີ່ດິນ; 3- ຕັດສິນຕົກລົງແຜນປະກັນການອອກພັນທະບັດຂອງທະນາຄານເພື່ອນະໂຍບາຍສັງຄົມ ເພື່ອໃຫ້ກູ້ຢືມແກ່ຜູ້ໄດ້ຮັບນະໂຍບາຍປະກັນໄພ; 4- ໃຫ້ການແນະນຳການສະໜັບສະໜູນອັດຕາດອກເບ້ຍຂອງທະນາຄານເພື່ອນະໂຍບາຍສັງຄົມ; 5- ແນະນໍານະໂຍບາຍການໃຫ້ກູ້ຢືມແກ່ນັກຮຽນນັກສຶກສາ ເພື່ອຊື້ຄອມພິວເຕີທີ່ໃຊ້ໃນການຮຽນຮູ້ອອນໄລນ໌; 6- ແກ້ໄຂລົບລ້າງຄວາມຫຍຸ້ງຍາກ, ອຸປະສັກໃນການນໍາໃຊ້ກອງທຶນພັດທະນາວິທະຍາສາດແລະເຕັກໂນໂລຊີຂອງວິສາຫະກິດ; 7- ສົມທົບແນະນຳການຈັດຕັ້ງປະຕິບັດການໜູນຊ່ວຍອັດຕາດອກເບ້ຍເງິນກູ້ຈາກງົບປະມານຂອງລັດ ໃຫ້ວິສາຫະກິດ ສະຫະກອນ ແລະ ຄອບຄົວທຸລະກິດ.
ໃນຄວາມເປັນຈິງ, ມາເຖິງຈຸດເວລານີ້, ກະຊວງການເງິນໄດ້ຍື່ນສະເໜີໃຫ້ລັດຖະບານປະກາດໃຊ້ ດຳລັດແນະນຳກ່ຽວກັບນະໂຍບາຍຍົກເວັ້ນແລະຫຼຸດຜ່ອນພາສີ (ດຳລັດເລກທີ 15/2022/NĐ-CP, ລົງວັນທີ 28 ມັງກອນ 2022, ມີຜົນບັງຄັບໃຊ້ແຕ່ວັນທີ 1 ກຸມພາ 2022); ດຳລັດວ່າດ້ວຍຄ່າທຳນຽມການລົງທະບຽນ (ດຳລັດເລກທີ 10/2022/NĐ-CP, ລົງວັນທີ 15 ມັງກອນ 2022, ມີຜົນບັງຄັບໃຊ້ແຕ່ວັນທີ 1 ມີນາ 2022); ພວມເລັ່ງປັບປຸງບັນດາຮ່າງເອກະສານນິຕິກຳ ເພື່ອແນະນຳການຈັດຕັ້ງປະຕິບັດ, ເຊັ່ນ: 1- ຮ່າງດຳລັດວ່າດ້ວຍການຕໍ່ກຳນົດເວລາຊຳລະພາສີລາຍໄດ້ວິສາຫະກິດ, ພາສີລາຍໄດ້ສ່ວນບຸກຄົນ, ພາສີມູນຄາເພີ່ມ, ພາສີບໍລິໂພກພິເສດ ແລະ ຄ່າເຊົ່າທີ່ດິນປີ 2022. 2- ຮ່າງໜັງສືວຽນກ່ຽວກັບການນໍາໃຊ້ກອງທຶນພັດທະນາວິທະຍາສາດແລະເຕັກໂນໂລຊີວິສາຫະກິດ. 3- ຄຳແນະນຳການປະຕິບັດການສະໜັບສະໜູນອັດຕາດອກເບ້ຍສຳລັບທະນາຄານເພື່ອນະໂຍບາຍສັງຄົມ. 4- ຄຳແນະນຳການໃຫ້ກູ້ຢືມເງິນສໍາລັບນັກຮຽນນັກສຶກສາເພື່ອຊື້ຄອມພິວເຕີທີ່ໃຊ້ໃນການຮຽນຮູ້ອອນໄລນ໌ ເນື່ອງຈາກຜົນກະທົບຂອງການແຜ່ລະບາດຂອງໂຄວິດ-19. ພ້ອມກັນນັ້ນ, ຕັ້ງໜ້າພະຍາຍາມປະສານງານກັບທະນາຄານແຫ່ງຊາດ, ກະຊວງແຜນການແລະການລົງທຶນ, ກະຊວງການກໍ່ສ້າງ, ກະຊວງສຶກສາທິການແລະການຝຶກອົບຮົມ, ບັນດາກະຊວງ, ອົງການສູນກາງ ແລະ ທ້ອງຖິ່ນ ເພື່ອຈັດຕັ້ງປະຕິບັດໂຄງການ.
ຄຽງຂ້າງນັ້ນ, ເພື່ອປະຕິບັດຕາມການຊີ້ນຳຂອງລັດຖະບານແລະນາຍົກລັດຖະມົນຕີ, ກະຊວງການຄັງໄດ້ເພີ່ມທະວີວຽກງານການຄຸ້ມຄອງ, ຕິດຕາມກວດກາແຫຼ່ງລາຍຮັບຢ່າງໃກ້ຊິດ, ສູ້ຊົນເພີ່ມລາຍຮັບ, ຫຼຸດຜ່ອນການໃຊ້ຈ່າຍເກີນກາຍ, ປະຢັດການໃຊ້ຈ່າຍງົບປະມານຂອງລັດຢ່າງເຖິງຖອງ, ໂດຍສະເພາະການໃຊ້ຈ່າຍໃນອາຊີບທີ່ມີລັກສະນະການລົງທຶນ; ຍູ້ແຮງແຜນການປະຕິຮູບພາສີ, ຫຼຸດອັດຕາພາສີຄ້າງຊຳລະ; ນຳໃຊ້ໃບເກັບເງິນເອເລັກໂຕຣນິກ,... ໃຊ້ປະໂຫຍດຈາກໂອກາດເພີ່ມລາຍຮັບງົບປະມານຂອງລັດ, ໂດຍສະເພາະໂອກາດເພີ່ມລາຍຮັບສໍາລັບທຸລະກໍາດິຈີຕອນຂ້າມຊາຍແດນ ແລະ ການບໍລິການທີ່ອີງໃສ່ດິຈີຕອນ; ເກັບຄືນເງິນທຶນໃຊ້ຈ່າຍປະຈຳທີ່ຈັດສັນຊ້າ, ນຳໃຊ້ຊ້າ... ເພື່ອເພີ່ມເຕີມແຫຼ່ງພະລັງປະຕິບັດໂຄງການ./.
--------------------
(1) ການເຕີບໂຕຂອງ ຈີດີພີ ປີ 2020 ບັນລຸ 2,91% ທຽບກັບແຜນການແມ່ນ 6,8%; ປີ 2021 ບັນລຸ 2,58% ທຽບກັບແຜນການແມ່ນ 6%.
(2) ປະກອບມີ: 1- ບົດສະຫຼຸບເລກທີ 77-KL/TW, ລົງວັນທີ 5 ມິຖຸນາ 2020, ຂອງກົມການເມືອງສູນກາງພັກ, ໃນນັ້ນ ກຳນົດໃຫ້ ແກ້ໄຂຜ່ານຜ່າຄວາມຫຍຸ້ງຍາກທາງດ້ານການຜະລິດ ທຸລະກິດ, ກະກຽມແຫຼ່ງພະລັງ, ສ້າງບັນດານະໂຍບາຍພິເສດ, ໃຊ້ປະໂຫຍດຈາກໂອກາດ, ຍົກສູງຄວາມສາມາດພາຍໃນ ແລະ ຄວາມສາມາດແຂ່ງຂັນ, ຄວາມສາມາດອົດທົນຕ້ານທານ ແລະ ຄວາມເປັນເຈົ້າຂອງພື້ນຖານເສດຖະກິດ; 2- ບົດສະຫຼຸບເລກທີ 16-KL/TW, ລົງວັນທີ 8 ຕຸລາ 2021, ຂອງກົມການເມືອງສູນກາງພັກຮຽກຮ້ອງໃຫ້ ກະກຽມແຜນການທີ່ເປັນໄປໄດ້ ເພື່ອຟື້ນຟູເສດຖະກິດ-ສັງຄົມໃນເວລາທີ່ຈະມາເຖິງ; 3- ບົດສະຫຼຸບເລກທີ 20-KL/TW, ລົງວັນທີ 16 ຕຸລາ 2021, ຂອງກອງປະຊຸມສູນກາງພັກຄັ້ງທີສີ່ສະໄໝທິ 13 “ວ່າດ້ວຍການກະກຽມແຜນການທີ່ເປັນໄປໄດ້ ເພື່ອຟື້ນຟູແລະພັດທະນາເສດຖະກິດ-ສັງຄົມໃນເວລາທີ່ຈະມາເຖິງ ແລະ ສ້າງໂຄງເລື່ອງການເຕີບໂຕໃນສະພາບການໃໝ່, ບໍ່ປະໃຫ້ຫວຽດນາມຕົກຢູ່ໃນພາວະເສດຖະກິດຖົດຖອຍ ແລະ ຫຼຸດແຮງຂັບເຄື່ອນການເຕີບໂຕໃນໄລຍະຍາວ”.
(3) ປະກອບມີ: 1- ມະຕິເລກທີ 16/2021/QH15, ngày 27-7-2021, “ວ່າດ້ວຍແຜນການພັດທະນາເສດຖະກິດ-ສັງຄົມ 5 ປີ 2021 - 2025”, ໃນນັ້ນ ຮຽກຮ້ອງໃຫ້ ດຳເນີນການຄົ້ນຄວ້າ, ສ້າງ ແລະ ຜັນຂະຫຍາຍປະຕິບັດ ໂຄງການຟື້ນຟູແລະພັດທະນາເສດຖະກິດທີ່ເປັນໄປໄດ້ ແລະມີປະສິດທິຜົນ; 2- ມະຕິເລກທີ 32/2021/QH15, ລົງວັນທີ 12 ພະຈິກ 2021, “ວ່າດ້ວຍແຜນການພັດທະນາເສດຖະກິດ-ສັງຄົມປີ 2022”; 3- ມະຕິເລກທີ 41/2021/QH15, ລົງວັນທີ 13 ພະຈິກ 2021, “ວ່າດ້ວຍການເຄື່ອນໄຫວຊັກຖາມທີ່ກອງປະຊຸມຄັ້ງທີ 2, ສະພາແຫ່ງຊາດຊຸດທີ 15”, ແລະ ມະຕິເລກທີ 42/2021/QH15, ລົງວັນທີ 13 ພະຈິກ 2021, ຂອງສະພາແຫ່ງຊາດ, “ວ່າດ້ວຍກອງປະຊຸມຄັ້ງທີ 2, ສະພາແຫ່ງຊາດຊຸດທີ 15” ກຳນົດເປົ້າໝາຍໃນປີ 2021 ເລັ່ງລັດການສ້າງ, ສະເໜີໃຫ້ອົງການທີ່ມີອຳນາດ ອະນຸມັດ ແລະ ຈັດຕັ້ງປະຕິບັດ ໂຄງການຟື້ນຟູແລະພັດທະນາເສດຖະກິດ-ສັງຄົມ.
(4) ບົດສະຫຼຸບເລກທີ 24-KL/TW, ລົງວັນທີ 30 ທັນວາ 2021, ຂອງກົມການເມືອງສູນກາງພັກ.
(5) ແຜນການພັດທະນາເສດຖະກິດ-ສັງຄົມ 5 ປີ 2021-2025, ແຜນການປັບໂຄງສ້າງເສດຖະກິດຄືນໃໝ່ໄລຍະປີ 2021-2025, ແຜນການການເງິນແຫ່ງຊາດ ແລະ ການກູ້ຢືມເງິນ, ຊຳລະໜີ້ສິນພາກລັດ 5 ປີໄລຍະ 2021-2025, ແຜນການລົງທຶນພາກລັດໄລຍະກາງໄລຍະປີ 2021-2025, ໂຄງການປ້ອງກັນແລະຕ້ານການແຜ່ລະບາດຂອງພະຍາດໂຄວິດ-19 (2022-2023).
(6) ມະຕິເລກທີ 23/2021/QH15 ກຳນົດເປົ້າໝາຍໜີ້ສິນສາທາລະນະດ້ວຍລະດັບເຕືອນໄພ 55% ຂອງຈີດີພີ, ເພດານໜີ້ສິນສາທາລະນະ 60% ຂອງຈີດີພີ; ໜີ້ສິນຂອງລັດຖະບານມີລະດັບເຕືອນໄພ 45% ຂອງຈີດີພີ, ເພດານທີ່ສະພາແຫ່ງຊາດອະນຸຍາດແມ່ນ 50% ຂອງຈີດີພີ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 991 (ເດືອນມິຖຸນາ 2022)
