ເສດຖະກິດຫວຽດນາມ ປີ 2021 ແລະ ຄວາມມຸ່ງຫວັງໃນປີ 2022
ວກ - ປີ 2021, ສະພາບການລະບາດຂອງພະຍາດໂຄວິດ-19 ໄດ້ຜັນແປໄປຢ່າງສັບສົນໃນທົ່ວໂລກດ້ວຍບັນດາສາຍພັນໃໝ່, ອັນເປັນອຸປະສັກກີດຂວາງການຟື້ນຕົວຂອງເສດຖະກິດໂລກ. ຫວຽດນາມກໍເປັນໜຶ່ງໃນບັນດາປະເທດທີ່ໄດ້ຮັບຜົນກະທົບຢ່າງໜັກໜ່ວງຈາກໂລກລະບາດດັ່ງກ່າວ, ການເຕີບໂຕດ້ານເສດຖະກິດຂອງຫວຽດນາມໃນປີ 2021 ບັນລຸພຽງ 2,58% ເທົ່ານັ້ນ, ຕໍ່າສຸດໃນຮອບ 30 ປີຜ່ານມາ. ສະນັ້ນ, ເພື່ອໃຫ້ສາມາດກັບຄືນສູ່ເສັ້ນໂຄຈອນແຫ່ງການເຕີບໂຕ, ຫວຽດນາມຕ້ອງປະຕິບັດແຜນງານຕ່າງໆ ເພື່ອຟື້ນຟູເສດຖະກິດແບບຍືນຍົງ ທີ່ຮັບປະກັນທັງດ້ານປະລິມານ, ທັງຮັບປະກັນເປົ້າໝາຍ ແລະ ລະບຽບການຕ່າງໆ ຢ່າງມີປະສິດທິຜົນ.
ສະຖານະພາບເສດຖະກິດໂລກໃນປີ 2021:
ບົນເສັ້ນທາງກັບຄືນສູ່ເສັ້ນໂຄຈອນແຫ່ງການເຕີບໂຕ
ເສດຖະກິດໂລກພວມຢູ່ໃນທ່າອ່ຽງຟື້ນຕົວ, ແຕ່ເປັນການເຕີບໂຕທີ່ບໍ່ສະໝໍ່າສະເໝີ ລະຫວ່າງພາກພື້ນຕ່າງໆ.
ການແຜ່ລະບາດຂອງພະຍາດໂຄວິດ-19 ທີ່ຍືດເຍື້ອຍາວນານ ໄດ້ຜັກດັນໃຫ້ເສດ ຖະກິດໂລກຕົກເຂົ້າສູ່ວິກິດການຢ່າງຮ້າຍແຮງທີ່ສຸດນັບແຕ່ປີ 1930 ເປັນຕົ້ນມາ, ເຊິ່ງເຮັດໃຫ້ການເຕີບໂຕຫຼຸດລົງເຖິງລະດັບຕິດລົບ 3,1% ໃນປີ 2020 ຍ້ອນການຂາດຕິດຂາດຕອນໃນລະບົບຕ່ອງໂສ້ການສະໜອງ, ບັນດາມາດຕະການປ້ອງກັນ, ຕ້ານການ ລະບາດ ແລະ ຜົນກະທົບຂອງມັນ ຕໍ່ການເຄື່ອນໄຫວເສດຖະກິດ ໃນຂອບເຂດທົ່ວໂລກ.
ໂດຍປະເຊີນໜ້າກັບສະພາບການດັ່ງກ່າວ, ບັນດາປະເທດໄດ້ມີຄວາມພະຍາຍາມຟື້ນຟູພື້ນຖານເສດຖະກິດ ແລະ ຮັບປະກັນສຸຂະພາບ, ຄວາມປອດໄພສັງຄົມຂອງປະຊາຊົນ. ປະສິດທິຜົນຂອງຄວາມພະຍາຍາມເຫຼົ່ານີ້ສະແດງໃຫ້ເຫັນເມື່ອຄາດຄະເນວ່າເສດຖະກິດໂລກຈະເຕີບໂຕອີກຄັ້ງໃນປີ 2021. ຢ່າງໃດກໍຕາມ, ການຟຶ້ນຟູກໍບໍ່ສະໝໍ່າສະເໝີກັນໃນທຸກພາກພື້ນຂອງໂລກ. ຄາດຄະເນວ່າ ບັນດາປະເທດທີ່ພັດທະນາແລ້ວໃນໂລກ ຈະມີອັດຕາການເຕີບໂຕສູງເຊັ່ນ: ສະຫະລັດອາເມລິກ 5,9%, ຈີນ 8,0%. ພາກພື້ນສະຫະພາບເອີຣົບ (EU) ກໍຄາດວ່າຈະເຕີບໂຕອີກເທື່ອໜຶ່ງ. ໃນຂະນະນັ້ນ, ບັນດາປະເທດໃນພາກພື້ນອາຊີຕາເວັນອອກສຽງໃຕ້ ຄາດວ່າຈະເຕີບໂຕພຽງ 3,0%. ການເຕີບໂຕກັບຄືນມາອີກເທື່ອຍ້ອນມາດຕະການແຊກແຊງທີ່ແຕກຕ່າງກັນໃນລະບົບເສດຖະກິດຂອງແຕ່ລະພາກພື້ນ.
ມາຮອດທ້າຍເດືອນຕຸລາ 2021, ບັນດາບ້ວງເງິນໜູນຊ່ວຍດ້ານການເງິນ ແລະ ເງິນຕາທົ່ວໂລກມີມູນຄ່າ 18.272 ຕື້ໂດລາສະຫະລັດ, ເທົ່າກັບ 16,4% ຂອງລວມ ຍອດຜະລິດຕະພັນພາຍໃນ (ຈີດີພີ) ທົ່ວໂລກ, ໃນນັ້ນ ບັນດາປະເທດພັດທະນາມີຂະ ໜາດການສະໜັບສະໜູນສະເລ່ຍເຖິງ 19,4% ຂອງຈີດີພີ; ບັນດາປະເທດທີ່ກໍາລັງພັດທະນາ ແລະ ປະເທດທີ່ພົ້ນເດັ່ນຂຶ້ນໃໝ່ແມ່ນ 7,51% ຂອງຈີດີພີ; ໃນຂະນະທີ່ປະເທດທີ່ມີລາຍໄດ້ຕໍ່າ, ຂະໜາດຂອງບ້ວງເງິນໜູນຊ່ວຍພຽງແຕ່ 4,3% ຂອງຈີດີພີໂດຍສະເລ່ຍ.
ການແຊກແຊງດ້ວຍຂະໜາດທີ່ແຕກຕ່າງກັນ ຂຶ້ນຢູ່ກັບສະພາບການຂອງແຕ່ລະປະເທດ ແມ່ນສາເຫດຂອງການເຕີບໂຕທີ່ບໍ່ສະໝ່ຳສະເໝີກັນໃນພາກພື້ນຕ່າງໆ ແລະ ສິ່ງດັ່ງກ່າວໄດ້ສ້າງຄວາມກັງວົນໃຫ້ແກ່ບັນດາປະເທດທີ່ມີລາຍໄດ້ຕໍ່າ ເຊິ່ງອາດຈະ “ພາດໂອກາດ” ເມື່ອທຽບກັບການຟື້ນຕົວຂອງໂລກ.
ພາວະເງິນເຟີ້ໃນທົ່ວໂລກສືບຕໍ່ກໍ່ໃຫ້ເກີດຄວາມສ່ຽງບົ່ມຊ້ອນຫຼາຍຢ່າງ.
ພະຍາດໂຄວິດ-19 ໄດ້ພາໃຫ້ເກີດຄວາມກັງວົນຫຼາຍຢ່າງຕໍ່ກັບອັດຕາເງິນເຟີ້ທີ່ເພີ່ມຂຶ້ນສູງ ຍ້ອນຫຼາຍສາເຫດຕົ້ນຕໍດັ່ງນີ້: 1) ມາດຕະການແຊກແຊງຂອງລັດຖະບານປະເທດຕ່າງໆ ໃນນະໂຍບາຍການເງິນແລະເງິນຕາ ໄດ້ເພີ່ມທະວີການເຄື່ອນໄຫວທາງດ້ານເສດຖະກິດ ຫຼື ຫຼຸດຜ່ອນຊ່ອງຫວ່າງໃນຜົນຜະລິດ ແນໃສ່ປົດປ່ອຍຄວາມຕ້ອງການທີ່ຖືກກົດໜີບ ແລະ ເງິນຝາກປະຢັດທີ່ສະສົມໃນເວລາທີ່ຖືກຢຸດຊະງັກຍ້ອນການລະບາດຂອງພະຍາດ; 2) ລາຄາສິນຄ້າໂລກເພີ່ມຂຶ້ນຢ່າງໄວວາ ສໍາລັບສິນຄ້າວັດຖຸດິບທີ່ຈໍາເປັນບາງຢ່າງ, ນໍ້າມັນເຊື້ອໄຟແລະວັດສະດຸທີ່ໃຊ້ໃນການຜະລິດ ເນື່ອງຈາກການຢຸດຊະງັກຂອງຕ່ອງໂສ້ການສະໜອງ ຫຼື ຄ່າໃຊ້ຈ່າຍການຂົນສົ່ງເພີ່ມຂຶ້ນ; 3) ບັນຫາການຂາດແຄນທັງວັດສະດຸປ້ອນແລະຜົນຜະລິດໃນລະບົບຕ່ອງໂສ້ການສະໜອງ ເມື່ອບັນດາປະເທດປະຕິບັດມາດຕະການເວັ້ນໄລຍະຫ່າງ, ຈຳກັດການເຄື່ອນໄຫວເສດຖະກິດ. ດ້ວຍເຫດນັ້ນ, ອົງການຮ່ວມມືແລະພັດທະນາເສດຖະກິດແຫ່ງສະຫະປະຊາຊາດ (OECD) ຈຶ່ງໄດ້ບອກເຕືອນວ່າ ພື້ນຖານເສດຖະກິດໂລກໃນປີ 2021 ມີຄວາມສ່ຽງຫຼາຍທີ່ສຸດທີ່ຈະປະສົບກັບອັດຕາເງິນເຟີ້ໃນລະດັບ 3,5% (ສູງກວ່າອັດຕາເງິນເຟີ້ 2% ໃນປີ 2020).
ບາງບັນຫາທີ່ພົ້ນເດັ່ນຂອງເສດຖະກິດຫວຽດນາມ ໃນປີ 2021
ການເຕີບໂຕຂອງ ຈີດີພີ: ອຸດສາຫະກໍາປຸງແຕ່ງແລະການຜະລິດ ສືບຕໍ່ເປັນແຮງຂັບເຄື່ອນຕົ້ນຕໍ.
ຄາດຄະເນວ່າ ໃນປີ 2021 ຈີດີພີຈະເພີ່ມຂຶ້ນ 2,58%. ໃນອັດຕາການເຕີບໂຕທົ່ວໄປຂອງພື້ນຖານເສດຖະກິດທັງໝົດ, ທັງໃນຂົງເຂດກະສິກໍາ, ປ່າໄມ້ ແລະ ການປະມົງເພີ່ມຂຶ້ນ 2,9%, ປະກອບສ່ວນ 13,97% ເຂົ້າໃນອັດຕາການເພີ່ມຂຶ້ນຂອງລວມຍອດມູນຄ່າທີ່ເພີ່ມຂຶ້ນຂອງພື້ນຖານເສດຖະກິດ; ຂົງເຂດອຸດສາຫະກໍາແລະການກໍ່ສ້າງ ເພີ່ມຂຶ້ນ 4,05%, ປະກອບສ່ວນ 63,80%; ຂົງເຂດການບໍລິການເພີ່ມຂຶ້ນ 1,22%, ປະກອບສ່ວນ 22,23%. ຂົງເຂດອຸດສາຫະກໍາແລະການກໍ່ສ້າງ, ອຸດສາຫະກໍາປຸງແຕ່ງ ແລະການຜະລິດ ສືບຕໍ່ເປັນແຮງຂັບເຄື່ອນຕົ້ນຕໍ ໃຫ້ແກ່ການເຕີບໂຕຂອງພື້ນຖານເສດ ຖະກິດທັງໝົດ ດ້ວຍອັດຕາການເຕີບໂຕ 6,73%, ປະກອບສ່ວນ 1,61% ເຂົ້າໃນອັດ ຕາການເພີ່ມຂຶ້ນຂອງລວມຍອດມູນຄ່າທີ່ເພີ່ມຂຶ້ນ ຂອງພື້ນຖານເສດຖະກິດທັງໝົດ.
ການຮັກສາສະຖຽນລະພາບຂອງເສດຖະກິດມະຫາພາກ ແລະ ຄວບຄຸມອັດຕາເງິນເຟີ້
ປີ 2021, ໃນສະພາບແວດລ້ອມທີ່ພື້ນຖານເສດຖະກິດປະສົບກັບຄວາມຫຍຸ້ງຍາກ ຫຼາຍຢ່າງ ຍ້ອນຜົນກະທົບຈາກການແຜ່ລະບາດຂອງພະຍາດໂຄວິດ-19, ທະນາຄານແຫ່ງລັດຫວຽດນາມ ໄດ້ດັດປັບອັດຕາດອກເບ້ຍໃຫ້ເໝາະສົມ, ສ້າງເງື່ອນໄຂໃຫ້ບັນດາສະຖາບັນສິນເຊື່ອສືບຕໍ່ຫຼຸດອັດຕາດອກເບ້ຍເງິນກູ້, ໜູນຊ່ວຍການຟື້ນຕົວຂອງພື້ນຖານເສດຖະກິດ. ການເຄື່ອນໄຫວທຸລະກິດທີ່ຮັບປະກັນຄວາມໝັ້ນຄົງ; ຕະຫຼາດຫຼັກຊັບໄດ້ພັດທະນາຢ່າງແຂງແຮງ ດ້ວຍມູນຄ່າຕະຫຼາດຫຼັກຊັບໃນປີ 2021 ທີ່ເພີ່ມຂຶ້ນເຖິງ 45,5% ເມື່ອທຽບໃສ່ທ້າຍປີ 2020. ມາຮອດວັນທີ 24 ທັນວາ 2021, ລວມຍອດມູນຄ່າການຊໍາລະທັງໝົດເພີ່ມຂຶ້ນ 8,93% ເມື່ອທຽບໃສ່ທ້າຍປີ 2020; ການລະດົມທຶນຂອງບັນດາສະຖາບັນສິນເຊື່ອເພີ່ມຂຶ້ນ 8,44%; ການເຕີບໂຕຂອງສິນເຊື່ອໃນພື້ນຖານເສດຖະກິດ ບັນລຸ 12,97%(1).
ຕາມຂໍ້ມູນຂອງກົມໃຫຍ່ສະຖິຕິໃຫ້ຮູ້ວ່າ ດັດຊະນີລາຄາຜູ້ບໍລິໂພກ (CPI) ໃນເດືອນທັນວາ 2021 ໄດ້ຫຼຸດລົງ 0,18% ເມື່ອທຽບໃສ່ເດືອນພະຈິກ 2021 ແລະ ເພີ່ມຂຶ້ນ 1,81% ເມື່ອທຽບໃສ່ເດືອນທັນວາ 2020. ໂດຍສະເລ່ຍແລ້ວ, ໃນປີ 2021, CPI ເພີ່ມຂຶ້ນ 1,84% ເມື່ອທຽບກັບປີ 2020, ເພີ່ມຂຶ້ນຕໍ່າສຸດນັບຕັ້ງແຕ່ປີ 2016. ອັດຕາເງິນເຟີ້ພື້ນຖານໃນ 12 ເດືອນເພີ່ມຂຶ້ນ 0,81%.
ລາຄາຄໍາພາຍໃນປະເທດມີການເໜັງຕີງທີ່ສວນທາງກັບລາຄາຄໍາໂລກ. ລາຄາຄໍາໂລກສະເລ່ຍໃນວັນທີ 25 ທັນວາ 2021 ຫຼຸດລົງ 1,8% ເມື່ອທຽບກັບເດືອນພະຈິກ 2021 ເນື່ອງຈາກເງິນໂດລາສະຫະລັດ ແລະ ອັດຕາຜົນກຳໄລພັນທະບັດສະຫະລັດເພີ່ມຂຶ້ນ ຕາມການຄາດຄະເນວ່າອັດຕາດອອກເບ້ຍຂອງສະຫະລັດຈະເພີ່ມຂຶ້ນໃນປີໜ້າ. ພາຍໃນປະເທດ, ດັດຊະນີລາຄາຄໍາໃນເດືອນທັນວາ 2021 ເພີ່ມຂຶ້ນ 0,25% ເມື່ອທຽບກັບເດືອນພະຈິກ 2020; ເພີ່ມຂຶ້ນ 1% ເມື່ອທຽບກັບເດືອນທັນວາ 2020 ແລະ ເພີ່ມຂຶ້ນສະເລ່ຍ 8,67% ໃນປີ 2021 ເມື່ອທຽບກັບປີຜ່ານມາ. ສ່ວນເງິນໂດລະສະຫະລັດໃນຕະຫຼາດໂລກກໍເພີ່ມຂຶ້ນທ່າມກາງພາວະອັດຕາເງິນເຟີ້ຂອງສະຫະລັດທີ່ເພີ່ມຂຶ້ນສູງ ຍ້ອນບັນດານັກລົງທຶນໄດ້ມີທ່າທີຖອນຕົວອອກຈາກປະເພດສະກຸນເງິນທີ່ມີຄວາມສ່ຽງພາຍຫຼັງທີ່ທະນາຄານກາງ ໄດ້ຕັດສິນໃຈເພີ່ມອັດຕາດອກເບ້ຍ ກໍຄືຄວາມກັງວົນຕໍ່ການລະບາດຂອງພະຍາດໂຄວິດ-19 ສາຍພັນໂອໄມຄຣອນ. ພາຍໃນປະເທດ, ເນື່ອງຈາກຄວາມຕ້ອງການຊື້ເງິນຕາຕ່າງປະເທດຂອງບັນດາວິສາຫະກິດນໍາເຂົ້າທີ່ເພີ່ມຂຶ້ນ ໄດ້ເຮັດໃຫ້ດັດຊະນີມູນຄ່າເງິນໂດລາສະຫະລັດ ໃນເດືອນທັນວາ 2021 ເພີ່ມຂຶ້ນ 0,84% ເມື່ອທຽບກັບເດືອນພະຈິກ 2021; ຫຼຸດລົງ 0,58% ເມື່ອທຽບກັບເດືອນທັນວາ 2020 ແລະ ໂດຍສະເລ່ຍແລ້ວ ໃນປີ 2021 ໄດ້ຫຼຸດລົງ 0,97% ເມື່ອທຽບກັບປີທີ່ຜ່ານມາ.
ຂົງເຂດວິສາຫະກິດ ໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະ ຍາດໂຄວິດ-19
ການລະບາດຮອບທີ 4 ຂອງພະຍາດໂຄວິດ-19 ໄດ້ສົ່ງຜົນກະທົບຢ່າງຮ້າຍແຮງຕໍ່ການຜະລິດ, ການເຄື່ອນໄຫວທຸລະກິດ ແລະ ຈິດໃຈສ້າງຕັ້ງທຸລະກິດໃໝ່ ຂອງປະຊາຊົນ. ອີງຕາມການລາຍງານຂອງກົມທະບຽນວິສາຫະກິດ, ໃນປີ 2021, ມີວິສາຫະກິດຈົດທະບຽນໃໝ່ທັງໝົດ 116.839 ຫົວໜ່ວຍ, ຫຼຸດລົງ 13,4% ເມື່ອທຽບກັບປີ 2020, ເຊິ່ງເປັນລະດັບຕໍ່າສຸດນັບແຕ່ປີ 2017 ມາຮອດປັດຈຸບັນ. ຈໍານວນທຶນຈົດທະບຽນສ້າງຕັ້ງໃນປີ 2021 ບັນລຸພຽງ 1.611.109 ພັນຕື້ດົ່ງ, ຫຼຸດລົງ 27,9% ເມື່ອທຽບກັບປີ 2020. ຄຽງຄູ່ກັນນັ້ນ, ຈໍານວນວິສາຫະກິດທີ່ກັບມາດໍາເນີນທຸລະກິດໃນປີ 2021 ກໍມີພຽງແຕ່ 43.116 ຫົວໜ່ວຍເທົ່ານັ້ນ, ຫຼຸດລົງ 2,2% ເມື່ອທຽບກັບປີ 2020.
ອີກດ້ານໜຶ່ງ, ຈາກການແຜ່ລະບາດຂອງພະຍາດທີ່ແກ່ຍາວເປັນເວລາດົນນານ ມັນໄດ້ “ບັ່ນທອນ” ຄວາມເຂັ້ມແຂງຂອງວິສາຫະກິດພາຍໃນປະເທດຫຼາຍແຫ່ງ, ໃນນັ້ນ ສ່ວນຫຼາຍແມ່ນວິສາຫະກິດທີ່ມີອາຍຸການສ້າງຕັ້ງຕໍ່າກວ່າ 5 ປີ ແລະ ມີຂະໜາດນ້ອຍ. ວິສາຫະກິດທີ່ຢຸດຕິການເຄື່ອນໄຫວຊົ່ວຄາວ, ຍຸບຕົວໃນປີ 2021 ມີເຖິງ 119.828 ຫົວ ໜ່ວຍ, ເພີ່ມຂຶ້ນ 17,8% ເມື່ອທຽບກັບປີ 2020. ໃນຈໍານວນວິສາຫະກິດທີ່ຖອນຕົວອອກຈາກຕະຫຼາດ, ມີວິສາຫະກິດທີ່ຢຸດຕິການເຄື່ອນໄຫວຊົ່ວຄາວຫຼາຍເຖິງ 54.960 ຫົວໜ່ວຍ (ກວມເອົາ 45,9%), ໝາຍວ່າ ຍັງບໍ່ທັນຖອນຕົວອອກຈາກຕະຫຼາດ ແຕ່ຫາກສືບຕໍ່ “ແຊ່ແຂງ”, ລໍຖ້າເວລາທີ່ເໝາະສົມເພື່ອຈະຊອກຫາໂອກາດທາງທຸລະກິດໃໝ່, ເພີ່ມຂຶ້ນ 18% ເມື່ອທຽບກັບປີ 2020.
ຖ້າທຽບໃສ່ໄລຍະປີ 2016–2020 (ແຕ່ລະປີມີວິສາຫະກິດທີ່ຢຸດການທຸລະກິດຊົ່ວຄາວກວມເອົາ 25,9% ຂອງຈຳນວນຫມົດ) ເຫັນວ່າໃນປີ 2021, ອັດຕາດັ່ງກ່າວບໍ່ມີປ່ຽນແປງໂດຍພື້ນຖານ. ຈໍານວນວິສາຫະກິດທີ່ລໍຖ້າຂັ້ນຕອນການຍຸບເລີກ ມີເຖິງ 48.127 ຫົວໜ່ວຍ, ເພີ່ມຂຶ້ນ 27,8% ເມື່ອທຽບກັບປີ 2020. ຈໍານວນວິສາຫະກິດໄດ້ຖືກຍຸບ ຫຼື ຢຸດເຊົາຢ່າງຖາວອນໃນປີ 2021 ມີເຖິງ 16.741 ຫົວໜ່ວຍ, ຫຼຸດລົງ 4,1% ເມື່ອທຽບກັບປີ 2020.
ການເຕີບໂຕຂອງການນໍາເຂົ້າແລະການສົ່ງອອກ ເປັນສີທີ່ສົດໃສທີ່ສຸດໃນພາບເສດຖະກິດມະຫາພາກ ໃນປີ 2021.
ປີ 2021 ເປັນປີທີ່ເຕັມໄປດ້ວຍການຜັນແປໃນທຸກຂົງເຂດຂອງພື້ນຖານເສດ ຖະກິດ. ແຕ່ຍ້ອນມີການຊີ້ນໍາຢ່າງໃກ້ຊິດຂອງລັດຖະບານ, ການເຂົ້າຮ່ວມຢ່າງຕັ້ງໜ້າຂອງບັນດາກະຊວງ, ຂະແໜງການ ແລະ ອໍານາດການປົກຄອງທ້ອງຖິ່ນ, ການເຄື່ອນໄຫວຢ່າງຕັ້ງໜ້າເພື່ອຜ່ານຜ່າຄວາມຫຍຸ້ງຍາກຂອງວົງຄະນາຍາດວິສາຫະກິດ, ບັນດາອົງການສົ່ງເສີມການຄ້າ ໄດ້ຊ່ວຍຮັກສາການຜະລິດແລະການສົ່ງອອກ ດ້ວຍຍອດມູນຄ່າທີ່ສູງເຖິງ 668,5 ຕື້ໂດລາສະຫະລັດ ອັນເປັນປະຫວັດການໃໝ່, ເພີ່ມຂຶ້ນ 22,6% ເມື່ອທຽບກັບປີ 2020. ໃນນັ້ນ, ມູນຄ່າການສົ່ງອອກສິນຄ້າ ຄາດຄະເນຈະບັນລຸ 336,25 ຕື້ໂດລາສະຫະລັດ, ເພີ່ມຂຶ້ນ 19% ເມື່ອທຽບກັບປີ 2020. ສະເພາະໃນຂົງເຂດເສດຖະກິດພາຍໃນປະເທດ ກໍບັນລຸ 88,71 ຕື້ໂດລາສະຫະລັດ, ເພີ່ມຂຶ້ນ 21,1%, ກວມເອົາ 73,6%. ໃນໂຄງປະກອບສິນຄ້າສົ່ງອອກ, ມີ 35 ລາຍການທີ່ມີຍອດມູນຄ່າການສົ່ງອອກຫຼາຍກວ່າ 1 ຕື້ໂດລາສະຫະລັດຕໍ່ລາຍການ, ກວມເອົາ 93,8% ຂອງລວມຍອດມູນຄ່າການສົ່ງອອກທັງໝົດ (ມີ 8 ລາຍການສິນຄ້າສົ່ງອອກທີ່ມີຍອດມູນຄ່າການສົ່ງອອກຫຼາຍກວ່າ 10 ຕື້ໂດລາສະຫະລັດຕໍ່ລາຍການ, ກວມເອົາ 69,7%). ໃນນັ້ນ, ຂົງເຂດທີ່ມີການລົງທຶນຈາກຕ່າງປະເທດ ກວມເອົາອັດຕາສ່ວນໃຫຍ່ຂອງມູນຄ່າການສົ່ງອອກຜະລິດຕະພັນຫຼັກໃນປີ 2021, ໃນນັ້ນມີ: ໂທລະສັບມືຖືທຸກປະເພດ ແລະ ສິ້ນສ່ວນປະກອບ ກວມເອົາ 99,3%; ເອເລັກໂຕນິກ, ຄອມພິວເຕີ ແລະ ສິ້ນສ່ວນອາໄຫຼ່ ກວມເອົາ 98,1%; ເຄື່ອງຈັກ, ອຸປະກອນ, ເຄື່ອງມື ແລະ ເຄື່ອງອາໄຫຼ່ຕ່າງໆ ກວມເອົາ 93%; ແຜ່ນແພ ກວມເອົາ 61,7%; ເກີບທຸກປະເພດ ກວມເອົາ 79,3%.
ສໍາລັບການນໍາເຂົ້າໃນປີ 2021, ມູນຄ່າການນໍາເຂົ້າສິນຄ້າຄາດວ່າຈະບັນລຸ 332,25 ຕື້ໂດລາສະຫະລັດ, ເພີ່ມຂຶ້ນ 26,5% ເມື່ອທຽບກັບປີຜ່ານມາ, ໃນນັ້ນ ຂົງເຂດເສດຖະກິດພາຍໃນປະເທດໄດ້ນໍາເຂົ້າ 114,07 ຕື້ໂດລາສະຫະລັດ, ເພີ່ມຂຶ້ນ 21,8%; ຂົງເຂດທີ່ມີການລົງທຶນຈາກຕ່າງປະເທດໄດ້ນໍາເຂົ້າ 218,18 ຕື້ໂດລາສະຫະລັດ, ເພີ່ມຂຶ້ນ 29,1%. ໃນນັ້ນ ມີ 47 ລາຍການສິນຄ້ານໍາເຂົ້າດ້ວຍມູນຄ່າຫຼາຍກວ່າ 1 ຕື້ໂດລາສະຫະລັດຕໍ່ລາຍການ, ກວມເອົາ 94,1% ຂອງມູນຄ່າການນໍາເຂົ້າທັງໝົດ.
ສໍາລັບຕະຫຼາດສົ່ງອອກ ແລະ ນໍາເຂົ້າສິນຄ້າໃນປີ 2021, ອາເມລິກາເປັນຕະຫຼາດ ສົ່ງອອກໃຫຍ່ທີ່ສຸດຂອງຫວຽດນາມ ດ້ວຍຍອດມູນຄ່າການຄ້າ ຄາດວ່າຈະບັນລຸ 95,6 ຕື້ໂດລາສະຫະລັດ. ຈີນ ເປັນຕະຫຼາດນໍາເຂົ້າໃຫຍ່ທີ່ສຸດຂອງຫວຽດນາມ ດ້ວຍຍອດມູນຄ່າການຄ້າຄາດຄະເນບັນລຸ 109,9 ຕື້ໂດລາສະຫະລັດ. ໃນປີ 2021, ການເກີນດຸນການຄ້າໄປທີ່ສະຫະພາບເອີຣົບແມ່ນປະມານ 23 ຕື້ໂດລາສະຫະລັດ, ເພີ່ມຂຶ້ນ 12,1% ເມື່ອທຽບກັບປີຜ່ານມາ; ການຂາດດຸນການຄ້າຈາກ ຈີນ 54 ຕື້ໂດລາສະຫະລັດ, ເພີ່ມຂຶ້ນ 53%; ການຂາດດຸນການຄ້າຈາກ ສ.ເກົາຫຼີ 34,2 ຕື້ໂດລາສະຫະລັດ, ເພີ່ມຂຶ້ນ 22,9%; ການຂາດດຸນການຄ້າຈາກບັນດາປະເທດອາຊຽນ 12 ຕື້ໂດລາສະຫະລັດ, ເພີ່ມຂຶ້ນ 63,1%; ການຂາດດຸນການຄ້າຈາກຍີ່ປຸ່ນ 2,4 ຕື້ໂດລາສະຫະລັດ, ເພີ່ມຂຶ້ນ 127,8%.
ດຸນການຄ້າສິນຄ້າໃນປີ 2021 ຄາດວ່າຈະເກີນດຸນການຄ້າ 4 ຕື້ໂດລາສະຫະລັດ (ປີ 2020 ການສົ່ງອອກເກີນດຸນ 19,94 ຕື້ໂດລາສະຫະລັດ). ໃນນັ້ນ, ຂົງເຂດເສດຖະກິດພາຍໃນປະເທດມີການຂາດດຸນການຄ້າ 25,36 ຕື້ໂດລາສະຫະລັດ; ຂົງເຂດທີ່ມີການລົງທຶນຈາກຕ່າງປະເທດ (ນັບທັງນໍ້າມັນດິບ) ເກີນດຸນການຄ້າ 29,36 ຕື້ໂດລາສະຫະລັດ(2).
ບັນດາໝາກຜົນດັ່ງກ່າວບັນລຸໄດ້ ຍ້ອນຫວຽດນາມຂຸດຄົ້ນຕະຫຼາດຕ່າງປະເທດໄດ້ເປັນຢ່າງດີ. ຄຽງຄູ່ກັບການຮັກສາຕະຫຼາດສົ່ງອອກແບບດັ້ງເດີມ, ບັນດາວິສາຫະກິດ ຫວຽດນາມໄດ້ໃຊ້ປະໂຫຍດຈາກໂອກາດທີ່ດີຈາກສັນຍາການຄ້າເສລີ, ໂດຍສະເພາະແມ່ນສັນຍາການຄ້າເສລີຮຸ່ນໃໝ່.
ການລົງທຶນເພື່ອການພັດທະນາຍັງມີຊ່ອງຫວ່າງຫຼາຍສໍາລັບການເຕີບໂຕໄລຍະກາງ.
ຕາມລາຍງານຂອງກະຊວງແຜນການແລະການລົງທຶນ, ມູນຄ່າການລົງທຶນຂອງທົ່ວສັງຄົມໃນລາຄາປະຈຸບັນໃນປີ 2021 ເພີ່ມຂຶ້ນ 3,2% ເມື່ອທຽບໃສ່ປີ 2020. ເຖິງວ່ານີ້ເປັນການເພີ່ມຂຶ້ນຕ່ຳທີ່ສຸດໃນຮອບຫຼາຍປີ, ແຕ່ກໍເປັນຜົນດີໃນສະພາບການຜັນແປທີ່ສັບສົນຂອງພະຍາດໂຄວິດ-19 ໃນທົ່ວປະເທດ ແລະ ໃນໂລກ. ການດຶງດູດການລົງທຶນໂດຍກົງຈາກຕ່າງປະເທດມີການຟື້ນຕົວຄືນໃໝ່, ທຶນຈົດທະບຽນໃໝ່ ແລະ ທຶນຈົດທະບຽນເພີ່ມເຕີມເພີ່ມຂຶ້ນອີກ, ສະແດງໃຫ້ເຫັນວ່າ ບັນດານັກລົງທຶນຕ່າງປະເທດສືບຕໍ່ເຊື່ອໝັ້ນໃນສະພາບແວດລ້ອມແຫ່ງການລົງທຶນຂອງຫວຽດນາມ.
ຄາດຄະເນວ່າ, ປີ 2021, ມູນຄ່າການລົງທຶນຂອງທົ່ວສັງຄົມໃນລາຄາປະຈຸບັນຈະສູງເຖິງ 2.891,9 ພັນຕື້ດົ່ງ, ເພີ່ມຂຶ້ນ 3,2% ເມື່ອທຽບກັບປີຜ່ານມາ, ໃນນັ້ນປະກອບມີ: ທຶນຂອງລັດບັນລຸ 713,6 ພັນຕື້ດົ່ງ, ກວມເອົາ 24,7% ຂອງຈໍານວນທຶນທັງໝົດ ແລະ ຫຼຸດລົງ 2,9% ເມື່ອທຽບກັບປີຜ່ານມາ; ການລົງທຶນຂອງຂົງເຂດນອກພາກລັດບັນລຸ 1.720,200 ພັນຕື້ດົ່ງ, ເທົ່າກັບ 59,5% ແລະ ເພີ່ມຂຶ້ນ 7,2%; ຂົງເຂດທີ່ມີການລົງທຶນຈາກຕ່າງປະເທດ ຈະບັນລຸ 458,1 ພັນຕື້ດົ່ງ, ເທົ່າກັບ 15,8% ແລະ ຫຼຸດລົງ 1,1%(3).
ຕາມລາຍງານຂອງກົມການລົງທຶນຕ່າງປະເທດ, ການລົງທຶນໂດຍກົງຈາກຕ່າງປະເທດຢູ່ຫວຽດນາມໃນປີ 2021 ມີມູນຄ່າ 19,74 ຕື້ໂດລາສະຫະລັດ, ຫຼຸດລົງ 1,2% ເມື່ອທຽບກັບປີ 2020. ໃນນັ້ນ, ອຸດສາຫະກໍາປຸງແຕ່ງແລະການຜະລິດ ບັນລຸ 14,30 ຕື້ໂດລາສະຫະລັດ, ກວມເອົາ 72,5% ຂອງຈໍານວນເງິນລົງທຶນໂດຍກົງຈາກຕ່າງປະເທດທີ່ໄດ້ຈັດຕັ້ງປະຕິບັດທັງໝົດ; ການເຄື່ອນໄຫວທຸລະກິດອະສັງຫາລິມະຊັບ ບັນລຸ 2,63 ຕື້ໂດລາສະຫະລັດ, ກວມເອົາ 13,3%; ການຜະລິດແລະຈໍາໜ່າຍໄຟຟ້າ, ອາຍແກັສ, ນໍ້າຮ້ອນ, ອາຍນໍ້າ ແລະ ເຄື່ອງປັບອາກາດ ບັນລຸ 1,54 ຕື້ໂດລາສະຫະລັດ, ກວມເອົາ 7,8%(4).
ຄວາມມຸ່ງຫວັງຂອງເສດຖະກິດໂລກ ແລະ ຫວຽດນາມ ໃນປີ 2022
ຄວາມສາມາດຂອງປະເທດຕ່າງໆໃນການຟື້ນຟູການເຕີບໂຕທາງເສດຖະກິດ ຂຶ້ນກັບນະໂຍບາຍການຄວບຄຸມການແຜ່ລະບາດຂອງພະຍາດ ແລະ ຂະໜາດວົງເງິນຟື້ນຟູເສດຖະກິດ. ຕາມການຄາດຄະເນທີ່ເຜີຍແຜ່ໃນເດືອນທັນວາປີ 2021 ຂອງກອງທຶນການເງິນສາກົນ (IMF), ເສດຖະກິດອາເມລິກາຈະເຕີບໂຕ 5,6% ໃນປີ 2021. ແນວໃດກໍຕາມ, ການເຕີບໂຕທາງເສດຖະກິດຂອງອາເມລິກາໄດ້ຖືກເຕືອນວ່າ ຈະປີ້ນກັບກັນຕັ້ງແຕ່ໄຕມາດທໍາອິດຂອງປີ 2022 ແລະ ມີແນວໂນ້ມຈະບັນລຸພຽງ 3,5% ໃນປີ 2022 ແລະ 2,9% ໃນປີ 2023. ໃນຂະນະທີ່ຄາດວ່າ ພາກພື້ນສະຫະພາບເອີຣົບຈະຟື້ນຕົວຢ່າງແຂງແຮງ ດ້ວຍອັດຕາການເຕີບໂຕ 5,2% ໃນປີ 2021, ຫຼັງຈາກນັ້ນ ຈະຫຼຸດລົງ 4,3% ໃນປີ 2022 ແລະ 2,3% ໃນປີ 2023. ສໍາລັບຈີນ ມີແນວໂນ້ມຈະບັນລຸອັດຕາການເຕີບໂຕສູງເຖິງ 8,1% ໃນປີ 2021 ກ່ອນທີ່ຈະຫຼຸດລົງເປັນ 5,1% ໃນປີ 2022 ແລະ 2023. ເຖິງວ່າເສດຖະກິດຍີ່ປຸ່ນຈະຟື້ນຕົວຊ້າກວ່າ (ຄາດຄະເນການເຕີບໂຕຈະບັນລຸ 1,8% ໃນປີ 2021) ເມື່ອທຽບກັບພື້ນຖານເສດຖະກິດໃຫຍ່ໆຂອງໂລກ, ແຕ່ເສດຖະກິດຍີ່ປຸ່ນຖືກຄາດຄະເນວ່າ ຈະເຕີບໂຕຢ່າງໜ້າປະທັບໃຈໃນລະດັບ 3,4% ໃນປີ 2022, ແລະຫຼັງຈາກນັ້ນ, ຈະຊ້າລົງເປັນ 1,1% ໃນປີ 2023(5).
ໃນຫວຽດນາມ, ການຄາດຄະເນຂອງບັນດາອົງການຈັດຕັ້ງສາກົນທີ່ມີຊື່ສຽງໄດ້ປະເມີນວ່າ ຫວຽດນາມມີຄວາມສາມາດໃນການຟື້ນຟູສູງເຖິງ 6% ຫາ 6,5% ໃນປີ 2022 ໃນສະພາບທີ່ການແຜ່ລະບາດຂອງພະຍາດຢູ່ພາຍໃຕ້ການຄວບຄຸມ, ອັດຕາການສັກວັກຊີນຈະແຜ່ຫຼາຍ ແລະ ສາຍພັນໃໝ່ ໂອໄມຄຣອນ ບໍ່ໄດ້ກໍ່ໃຫ້ເກີດຄວາມເສຍຫາຍຕໍ່ເສດຖະກິດຫຼາຍເກີນໄປ. ການຄາດຄະເນຂ້າງເທິງແມ່ນອີງໃສ່ຈຸດຕ່າງໆດັ່ງຕໍ່ໄປນີ້:
ກ່ອນອື່ນໝົດ, ພື້ນທີ່ນະໂຍບາຍການເງິນຂອງຫວຽດນາມຍັງຄົງມີຢູ່ນັ້ນ ສ້າງເງື່ອນໄຂໃຫ້ການດຳເນີນງານຂອງລັດຖະບານໃນການຟື້ນຟູເສດຖະກິດ. ລາຍໄດ້ງົບປະມານທີ່ຄາດຫວັງທັງປີຍັງຄົງເພີ່ມຂຶ້ນເມື່ອທຽບກັບແຜນການ; ການຂາດດຸນງົບປະມານ ແລະ ເພດານໜີ້ສາທາລະນະ ຍັງຢູ່ໃນລະດັບທີ່ອະນຸຍາດ. ໜີ້ສາທາລະນະຍັງຢູ່ໃນລະດັບຕໍ່າເມື່ອທຽບກັບເກນຄວາມປອດໄພ ແລະ ເພດານທີ່ສະພາແຫ່ງຊາດອະນຸມັດ; ຄວາມສາມາດໃນການລະດົມເງິນທຶນໃນປະເທດຍັງມີຢູ່ຫຼາຍພໍຄວນ ເມື່ອອັດຕາດອກເບ້ຍພັນທະບັດລັດຖະບານຢູ່ທີ່ 2,09% ຕໍ່ປີ ສໍາລັບກໍານົດເວລາ 10 ປີ. ໃນຂະນະທີ່ອັດຕາດອກເບ້ຍພັນທະບັດລັດຖະບານອາເມລິກາ ໃນໄລຍະດຽວກັນສູງກວ່າ 1,6% ຕໍ່ປີ; ທະນາຄານກາງໃຊ້ປະລິມານເງິນ ຫຼືເງິນຝາກຈາກສະຖາບັນສິນເຊື່ອ, ລວມທັງເງິນສຳລອງທີ່ຈຳເປັນ ຫຼືເງິນຝາກຊໍາລະ ເພື່ອຊື້ພັນທະບັດລັດຖະບານ.
ສອງ, ເສດຖະກິດຫວຽດນາມຈະຟື້ນຕົວແລະເຕີບໂຕ ເມື່ອລັດຖະບານສະເໜີໃຫ້ສະພາແຫ່ງຊາດຮັບຮອງເອົາມະຕິວ່າດ້ວຍນະໂຍບາຍການເງິນແລະເງິນຕາ ເພື່ອໜູນຊ່ວຍການຈັດຕັ້ງປະຕິບັດໂຄງການຟື້ນຟູເສດຖະກິດແລະສັງຄົມໃນໄລຍະປີ 2022 ແລະ ປີ 2023 ດ້ວຍໜ້າທີ່ແລະວິທີແກ້ໄຂແຕ່ລະກຸ່ມເຊັ່ນ: ການເປີດປະຕູເສດຖະກິດປະເທດ ຕິດພັນກັບການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19, ການລົງທຶນຍົກສູງຄວາມສາມາດດ້ານສາທາລະນະສຸກ (60.000 ຕື້ດົ່ງ); ຮັບປະກັນຄວາມປອດໄພທາງສັງຄົມ ແລະ ສະໜັບສະໜູນວຽກເຮັດງານທໍາ (53.150 ຕື້ດົ່ງ); ຊ່ວຍເຫຼືອຟື້ນຟູວິສາຫະກິດ, ສະຫະກອນ ແລະ ໜ່ວຍທຸລະກິດ (110.000 ຕື້ດົ່ງ); ພັດທະນາໂຄງສ້າງພື້ນຖານ, ປົດປ່ອຍຊັບພະຍາກອນສັງຄົມສໍາລັບການລົງທຶນເພື່ອການພັດທະນາ (113.850 ຕື້ດົ່ງ); ການປະຕິຮູບລະບຽບລະບອບການ, ການປະຕິຮູບການບໍລິຫານ, ການປັບປຸງສະພາບແວດລ້ອມແຫ່ງການລົງທຶນແລະທຸລະກິດ, ນອກຈາກນັ້ນ, ລະດົມຈາກແຫຼ່ງທຶນການເງິນນອກງົບປະມານແຫ່ງລັດປະມານ 10.000 ຕື້ດົ່ງ. ຂະໜາດຂອງນະໂຍບາຍງົບປະມານທັງໝົດແມ່ນປະມານ 291.000 ຕື້ດົ່ງ, ປະກອບດ້ວຍຂະໜາດການໃຊ້ຈ່າຍເກີນດຸນ ເພື່ອສະໜັບສະໜູນໂດຍກົງຈາກງົບປະມານຂອງລັດແມ່ນ 240.000 ຕື້ດົ່ງ.
ຂໍ້ສະເໜີແນະນະໂຍບາຍຈໍານວນໜຶ່ງ ເພື່ອການຟື້ນຟູແລະການເຕີບໂຕແບບຍືນຍົງ
ທີໜຶ່ງ, ຕ້ອງບຸລິມະສິດແຫຼ່ງຊັບພະຍາກອນ ເພື່ອປັບປຸງລະບົບສາທາລະນະສຸກ ແລະ ແຜ່ຂະຫຍາຍການສັກວັກຊີນທົ່ວປະເທດ ແລະ ການຊື້ຢາປົວພະຍາດ. ຄື້ນການລະບາດຂອງພະຍາດຫຼາຍຄັ້ງຕໍ່ເນື່ອງກັນ ໄດ້ເຮັດໃຫ້ລະບົບສາທາລະນະສຸກໃນຫຼາຍແຂວງ, ນະຄອນ ປະສົບປັນຫາທັງດ້ານຊັບພະຍາກອນມະນຸດ ແລະ ວັດຖຸ. ການແຜ່ລະບາດຂອງພະຍາດໃນໂລກສືບຕໍ່ເກີດຂຶ້ນຢ່າງສັບສົນ, ລະບົບສາທາລະນະສຸກເປັນແນວປ້ອງກັນທໍາອິດແລະສໍາຄັນທີ່ສຸດ ບໍ່ພຽງແຕ່ຕໍ່ກັບເສດຖະກິດເທົ່ານັ້ນ, ຫາກລວມທັງປະເທດຊາດນໍາອີກ. ສະນັ້ນ, ການປັບປຸງລະບົບສາທາລະນະສຸກ, ໂດຍສະເພາະແມ່ນສາທາລະນະສຸກຂັ້ນຮາກຖານ, ສາທາລະນະສຸກປ້ອງກັນ ຕ້ອງຖືເປັນບຸລິມະສິດອັນດັບໜຶ່ງຂອງບ້ວງເງິນໜູນຊ່ວຍ. ທັງນີ້, ຕ້ອງຮັບປະກັນການສະໜອງວັກຊີນໃຫ້ກວ້າງຂວາງ, ທົ່ວເຖິງໃນຂອບເຂດທົ່ວປະເທດ, ບໍ່ພຽງແຕ່ການສັກວັກຊີນເຂັມທີ 2, 3 ແລະ 4 ເທົ່ານັ້ນ. ພ້ອມດຽວກັນນັ້ນ, ຕ້ອງມີແຜນການສັ່ງຊື້ຢາປິ່ນປົວພະຍາຍາດ ແລະ ສະກັດກັ້ນການລະບາດຂອງພະຍາດຢູ່ໃນຊຸມຊົນ.
ທີສອງ, ຕ້ອງປັບປຸງລະບົບຄວາມປອດໄພທາງສັງຄົມ. ເປົ້າໝາຍຕົ້ນຕໍແມ່ນ ເພື່ອສະໜັບສະໜູນກຸ່ມປະຊາກອນ ແລະ ຊາວຜູ້ອອກແຮງງານທີ່ໄດ້ຮັບຜົນກະທົບຫຼາຍທີ່ສຸດຈາກການລະບາດຂອງພະຍາດ. ບັນດາມາດຕະການສະເພາະລວມເຖິງການສະໜັບສະໜູນເພື່ອແກ້ໄຂການຂາດແຄນແຮງງານ. ໃນສະຖານທີ່ທີ່ມີການປິດລ້ອມ, ຮັບປະກັນໃຫ້ແຮງງານເຄື່ອນຍ້າຍທີ່ມາເຮັດວຽກໃນຂະແໜງການບໍ່ເປັນທາງການໂດຍບໍ່ມີສັນຍາ ໄດ້ຮັບການສະໜັບສະໜູນຢ່າງເຕັມທີ່ ເພື່ອຢູ່ກັບເຮືອນດ້ວຍຄວາມສະຫງົບ, ຈ່າຍເງິນຊ່ວຍເຫຼືອຢ່າງໄວໃຫ້ຜູ້ທີ່ຢູ່ໃນບັນຊີລາຍຊື່ຄອບຄົວທຸກຍາກ ແລະ ຜູ້ທີ່ເຂົ້າຮ່ວມປະກັນສັງຄົມຢ່າງເປັນທາງການ ເພື່ອຮັບປະກັນວ່າ ເຂົາເຈົ້າໄດ້ຮັບການສະໜັບສະໜຸນຢ່າງທັນການ ບົນພື້ນຖານການຄວບຄຸມໂດຍລະບົບປະກັນສັງຄົມຢ່າງເປັນທາງການ.
ທີສາມ, ຕ້ອງຊ່ວຍເຫຼືອວິສາຫະກິດໃຫ້ແທດຈິງກວ່າເກົ່າ. ຄວາມເປັນຈິງຂອງການປະຕິບັດນະໂຍບາຍໜູນຊ່ວຍວິສາຫະກິດໃນເວລາຜ່ານມາ ໃຫ້ເຫັນວ່າ ປະສິດທິພາບບໍ່ທັນສູງ, ຍັງບໍ່ຖືກກັບເປົ້າໝາຍ ຫຼື ຂັ້ນຕອນການສະໜັບສະໜູນຍັງສັບສົນ. ວິສາຫະ ກິດຈໍານວນໜຶ່ງມີຜົນກໍາໄລຕິດລົບ ຍ້ອນການເພີ່ມຂຶ້ນຂອງລາຄາວັດຖຸດິບ, ນໍ້າມັນເຊື້ອໄຟ, ວັດສະດຸ, ຄ່າໃຊ້ຈ່າຍໃນການຂົນສົ່ງ ແລະ ຄ່າໃຊ້ຈ່າຍໃນການຮັບປະກັນການຜະລິດແລະການຕ້ານການລະບາດຂອງພະຍາດ… ຫຼືບໍ່ໄດ້ຢູ່ໃນກຸ່ມຜູ້ທີ່ໄດ້ຮັບການໜູນຊ່ວຍ. ໃນຂະນະທີ່ມີວິສາຫະກິດຈໍານວນໜຶ່ງ, ເຖິງວ່າປະລິມານການຜະລິດຈະຫຼຸດລົງ ແຕ່ລາຍຮັບຍັງສູງຢູ່, ພັດໄດ້ຮັບການໜູນຊ່ວຍ. ໂດຍສະເພາະ, ສຳລັບບັນດາວິສາຫະກິດທີ່ດຳເນີນທຸລະກິດໃນຂົງເຂດຈໍານວນໜຶ່ງທີ່ “ຖືກແຊ່ແຂງ” ເນື່ອງຈາກການແຜ່ລະບສດຂອງພະຍາດ ເຊັ່ນ: ການທ່ອງທ່ຽວ, ໂຮງແຮມ, ຮ້ານອາຫານແລະອື່ນໆ, ການຍົກເວັ້ນແລະຫຼຸດຜ່ອນພາສີລາຍໄດ້ ບໍ່ມີຄວາມໝາຍຫຼາຍສຳລັບພວກເຂົາ. ນອກຈາກນັ້ນ, ກໍຈໍາເປັນຕ້ອງໃຊ້ເຄື່ອງມືນະໂຍບາຍການເງິນເພື່ອໜູນຊ່ວຍວິສາຫະກິດເຫຼົ່ານັ້ນ. ການປັບຫຼຸດອັດຕາດອກເບ້ຍແມ່ນເລື່ອງຮີບດ່ວນ. ເຖິງວ່າອັດຕາດອກເບ້ຍຂອງຫວຽດນາມໄດ້ຫຼຸດລົງເມື່ອທຽບໃສ່ປີ 2020, ແຕ່ຍັງສູງເມື່ອທຽບໃສ່ບັນດາປະເທດໃນພາກພື້ນ ແລະ ໃນໂລກ. ຖ້າບໍ່ຫຼຸດອັດຕາດອກເບ້ຍລົງ, ພຽງແຕ່ຂະແໜງການເງິນ ແລະ ການທະນາຄານຈະໄດ້ຮັບຜົນປະໂຫຍດ, ໃນຂະນະທີ່ບັນດາອົງການ ແລະ ວິສາຫະກິດໃນຂະແໜງການຜະລິດ ແລະ ທຸລະກິດອື່ນໆ ຈະຖືກເສຍຫາຍ, ການຟື້ນຕົວຂອງການເຕີບໂຕຈະຖືກຜົນກະທົບຢ່າງແນ່ນອນ.
ທີສີ່, ສືບຕໍ່ປະຕິຮູບລະບຽບລະບອບການ, ແກ້ໄຂບັນຫາອຸດຕັນໃນການເບີກຈ່າຍເງິນລົງທຶນພາກລັດ. ການລົງທຶນພາກລັດເປັນກໍາລັງຜັກດັນເພື່ອຊຸກຍູ້ສົ່ງເສີມການລົງທຶນຂອງສັງຄົມ, ໂດຍສະເພາະການລົງທຶນໃນໂຄງສ້າງພື້ນຖານ, ພິເສດແມ່ນ ໂຄງສ້າງພື້ນຖານດ້ານສາທາລະນະສຸກຈໍາເປັນຕ້ອງມີຫຼາຍໂຄງການ. ດັ່ງນັ້ນການເບີກຈ່າຍເງິນລົງທຶນພາກລັດ ຈຶ່ງເປັນຊ່ອງທາງສໍາຄັນໃນການຊຸກຍູ້ເສດຖະກິດໃນໄລຍະປະຈຸ ເຊິ່ງການລົງທຶນຂອງພາກເອກະຊົນພົບຄວາມຫຍຸ້ງຍາກຫຼາຍຢ່າງ. ຕ້ອງສືບຕໍ່ຖືເອົາການເບີກຈ່າຍເງິນລົງທຶນພາກລັດເປັນວຽກງານສຳຄັນໃນປີ 2022 ແລະ 2023 ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ຄົມມະນາຄົມ, ພະລັງງານ, ໂທລະຄົມ, ນໍ້າປະປາ…); ລົງທຶນກໍ່ສ້າງໂຄງສ້າງພື້ນຖານເພື່ອໜູນຊ່ວຍການສົ່ງອອກ; ໂຄງສ້າງພື້ນຖານດິຈີຕອນ; ໂຄງສ້າງພື້ນຖານສີຂຽວ ເພື່ອປັບຕົວກັບການປ່ຽນແປງຂອງດິນຟ້າອາກາດ. ຄຽງຄູ່ກັບການໃຫ້ບຸລິມະສິດຊຸກຍູ້ການເບີກຈ່າຍເງິນຂອງບັນດາໂຄງການໃຫຍ່, ໂຄງການຈຸດສຸມລະດັບຊາດ ທີ່ມີການກະຈາຍຂະໜາດໃຫຍ່ ຢູ່ໃນຂັ້ນຕອນການຈັດຕັ້ງປະຕິບັດນັ້ນ ກໍ່ອາດຈະຊຸກຍູ້ການຈັດຕັ້ງປະຕິບັດບັນດາໂຄງການໃນທ້ອງຖິ່ນ, ດຳເນີນການສ້ອມແປງແລະການບໍາລຸງຮັກສາໂຄງສ້າງພື້ນທີ່ມີຢູ່ ຄືກັນກັບປະສົບການຂອງປະເທດອື່ນໆໃນພາກພື້ນ.
ທີຫ້າ, ເພື່ອຮັບປະກັນໃຫ້ບັນດາມາດຕະການດັ່ງກ່າວໄດ້ຮັບການປະຕິບັດຢ່າງສຳເລັດຜົນ, ຕ້ອງມີການປະສານສົມທົບລະຫວ່າງບັນດາກະຊວງ, ຂະແໜງການ, ລະຫວ່າງລັດຖະບານແລະສະພາແຫ່ງຊາດ ໃນການສ້າງແລະຈັດຕັ້ງປະຕິບັດນະໂຍບາຍຕ່າງໆ,ໂດຍສະເພາະ ນະໂຍບາຍການເງິນແລະເງິນຕາ ຕ້ອງມີປະລິມານທີ່ເໝາະສົມ, ຖືກເວລາ ແລະ ກຸ່ມເປົ້າໝາຍທີ່ເໝາະສົມ. ມີຄວາມກັງວົນກ່ຽວກັບຄວາມກົດດັນຂອງອັດຕາເງິເຟີ້ ໃນເວລາພັດທະນາ ແລະ ປະຕິບັດຊຸດສະໜັບສະໜູນ, ໃນຂະນະນັ້ນ ກໍ່ມີຄວາມຄິດເຫັນອື່ນທີ່ຢາກໃຫ້ຊຸດສະໜັບສະໜູນເສດຖະກິດມີຂະໜາດໃຫຍ່ພຽງພໍ, ດັ່ງນັ້ນ ຄວາມສ່ຽງຈາກພາວະເງິນເຟີ້ຈຶງເປັນສິ່ງທີ່ຫຼີກລ້ຽງບໍ່ໄດ້. ສະນັ້ນ, ບັນດາອົງການຈັດຕັ້ງຂອງລັດຖະບານ, ສະພາແຫ່ງຊາດ ແລະ ບັນດາອົງການທີ່ເປັນເສນາທິການ ຕ້ອງມີການປະສານສົມທົບຢ່າງແໜ້ນແຟ້ນ ໃນການຄິດໄລ່ຄໍານວນ ເພື່ອຮັບປະກັນໃຫ້ກະແສເງິນໜູນຊ່ວຍຖືກນຳໄປໃຊ້ຈິງ ໃນກິດຈະກຳການຜະລິດຂອງວິສາຫະກິດ ແລະ ຄົວເຮືອນ, ແທນທີ່ຈະຫັນໄປຫາຊ່ອງທາງການກັກຕຸນຫາກຳຂອງຊັບສິນທາງການເງິນທີ່ມີຄວາມສ່ຽງ ເຊິ່ງບໍ່ສົ່ງຜົນໃຫ້ການຟື້ນຟູ ການເຕີບໂຕ.
ທີຫົກ, ໃນໄລຍະຍາວ, ການຄົ້ນຄວ້າກ່ຽວກັບການພັດທະນາ ແລະ ການປ່ຽນແປງໃໝ່ປະດິດສ້າງ ໃນສະພາບການຂອງຍຸກອຸດສາຫະກໍາ 4.0 ໄດ້, ພວມແລະຈະເປັນກໍາລັງຜັກດັນການພັດທະນາໄລຍະຍາວ ສຳລັບເສດຖະກິດ. ເສດຖະກິດດິຈີຕອນພວມໄດ້ຮັບຄວາມເອົາໃຈໃສ່ ແລະ ເປັນທ່າອ່ຽງພັດທະນາຂອງຫຼາຍໆ ປະເທດທີ່ພັດທະນາໃນໂລກ, ໄປພ້ອມກັບທ່າອ່ຽງການເຕີບໂຕສີຂຽວ ແລະ ເສດຖະກິດໝູນວຽນ. ເສດຖະກິດດິຈີຕອນ ແລະ ການເຕີບໂຕສີຂຽວ ພວມສະແດງໃຫ້ເຫັນເຖິງຜົນປະໂຫຍດ ກໍຄືຖານະບົດບາດ ຕໍ່ກັບການເຕີບໂຕຂອງເສດຖະກິດ ກໍຄືການປົວແປງຊີວິດການເປັນຢູ່ຂອງປະຊາຊົນໃນຫຼາຍໆປະເທດ. ຍ້ອນແນວນັ້ນ, ຕ້ອງໄດ້ມີການຄົ້ນຄວ້າ, ພັດທະນາ ແລະ ສ້າງສະພາບແວດລ້ອມທີ່ເໝາະສົມ ໃຫ້ແກ່ການພັດທະນາເສດຖະກິດດິຈີຕອນ ແລະ ການເຕີບໂຕສີຂຽວ ເພື່ອເປັນກໍາລັງຜັກດັນການພັດທະນາເສດຖະກິດຢ່າງຍາວນານ.
------------------------
(1) ທະນາຄານແຫ່ງລັດ: ບົດລາຍງານກ່ຽວກັບນະໂຍບາຍສິນເຊື່ອ - ເງິນຕາ ປະຈໍາເດືອນທັນວາ ແລະ ເຕັມປີ 2021.
(2), (3) ກົມໃຫຍ່ສະຖິຕິ: ສະພາບເສດຖະກິດ - ສັງຄົມ ປະຈໍາໄຕມາດ 4 ແລະ ປີ 2021.
(4) ກົມລົງທຶນຕ່າງປະເທດ: ສະພາບການລົງທຶນໂດຍກົງຈາກຕ່າງປະເທດ ໃນເດືອນທັນວາ ແລະ ປີ 2021.
(5) ສະພາບັນດິດວິທະຍາສາດສັງຄົມຫວຽດນາມ: ບົດລາຍງານກ່ຽວກັບບາງບັນຫາພົ້ນເດັ່ນຂອງເສດຖະກິດໂລກ ແລະ ເສດຖະກິດຫວຽດນາມ ໃນເດືອນທັນວາ ແລະ ປີ 2021.
- ບົດນີ້ໄດ້ລົງພິມໃນວາລະສານກອມມູນິດ ສະບັບເລກທີ 983 (ເດືອນກຸມພາ 2022).