ປະທານໂຮ່ຈີມິນຜູ້ຍິ່ງໃຫຍ່ ມີຊີວິດຕະຫຼອດໄປໃນພາລະກິດຂອງພວກເຮົາ
ວກ.- ປະທານໂຮ່ຈີມິນ - ຜູ້ນຳທີ່ປີຊາສາມາດຂອງພັກແລະປະຊາຊົນຫວຽດນາມ, ອາຈານຜູ້ຍິ່ງໃຫຍ່ຂອງການປະຕິວັດຫວຽດນາມ, ວິລະຊົນແຫ່ງການປົດປ່ອຍຊາດ, ນັກວັດທະນະທຳຜູ້ຍິ່ງໃຫຍ່ທີ່ມີກຽດໃນໂລກ. ທຸກໄຊຊະນະແລະທຸກບາດກ້າວຂອງການປະຕິວັດຫວຽດນາມ ລ້ວນແຕ່ຕິດແໜ້ນກັບຄຸນງາມຄວາມດີອັນໃຫຍ່ຫຼວງຂອງປະທານໂຮ່ຈີມິນ ແລະກັບການຊີ້ທິດ, ເຍືອງທາງຂອງແນວຄິດໂຮ່ຈີມິນ. ຈົດຈຳແລະຈາລຶກບຸນຄຸນຂອງປະທານໂຮ່ຈີມິນ, ທົ່ວພັກ ທົ່ວປວງຊົນແລະທົ່ວກອງທັບເຮົາ ສືບຕໍ່ເຊີດຊູຄັນທຸງເອກະລາດແຫ່ງຊາດຕິດແໜ້ນກັບລັດທິສັງຄົມນິຍົມ, ປະຕິຍານທີ່ຈະສືບຕໍ່ພາລະກິດທີ່ຍິ່ງໃຫຍ່ຂອງເພິ່ນຢ່າງຊື່ສັດແລະດີເລີດ, ສ້າງສາປະເທດຫວຽດນາມໃຫ້ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸດຕິທຳ ແລະ ສີວິໄລ”, ກ້າວຂຶ້ນສູ່ສັງຄົມນິຍົມຢ່າງໜັກແໜ້ນ. ປະທານໂຮ່ຈີມິນຜູ້ຍິ່ງໃຫຍ່ມີຊີວິດຕະຫຼອດໄປໃນພາລະກິດຂອງພວກເຮົາ!
ຈາກທ່າເຮືອ ຍ່າຣົ່ງ ເຖິງສະໜາມຫຼວງ ບາດິ່ງ ອັນເປັນປະຫວັດສາດ
ວັນທີ 5 ມິຖຸນາ 1911, ໃນກຳປັ່ນ Admiral Latouche-Tréville, ຈາກທ່າເຮືອ ໄຊງ່ອນ, ທ່ານຫງວຽນເຕິດແທັ່ງ ໄດ້ອອກຈາກປະເທດ, ເລີ່ມຕົ້ນການເດີນທາງໄປຊອກຫາເສັ້ນທາງ ເພື່ອປົດປ່ອຍປະຊາຊົນ, ປົດປ່ອຍປະເທດຊາດ. ໃນການເດີນທາງທີ່ຫຍຸ້ງຍາກລຳບາກນັ້ນ, ຊາຍໜຸ່ມຫວຽດນາມຜູ້ຮັກຊາດ ຫງວຽນເຕິດແທັ່ງ, ນັກເຄື່ອນໄຫວສາກົນທີ່ດີເລີດ ຫງວຽນອ໋າຍກວັກ ໄດ້ພົບກັບລັດທິ ມາກ-ເລນິນ ແລະ ຊອກເຫັນເສັ້ນທາງປົດປ່ອຍປະເທດຊາດ. ຫງວຽນອ໋າຍກວັກ ໄດ້ຖອດຖອນຄຳສະຫຼຸບວ່າ: “ຢາກກູ້ຊາດ ແລະ ປົດປ່ອຍປະເທດບໍ່ມີທາງອື່ນ ນອກຈາກການປະຕິວັດກຳມາຊີບ”. ໂດຍຮັບເອົາແລະໝູນໃຊ້ລັດທິມາກ-ເລນິນຢ່າງປະດິດສ້າງ, ເພິ່ນຄ່ອຍໆສ້າງລະບົບທິດສະດີ ກ່ຽວກັບການປະຕິວັດປົດປ່ອຍຊາດ ທີ່ສອດຄ່ອງກັບສະພາບຕົວຈິງຂອງຫວຽດນາມ ແລະ ໄດ້ຕັ້ງໜ້າພະຍາຍາມກະກຽມໃນທຸກດ້ານ ເພື່ອສ້າງຕັ້ງພັກການເມືອງປະຕິວັດຢູ່ຫວຽດນາມ
ກຳປັ່ນ ນາຍພົນເຮືອເອກ Latouche-Tréville (ຊ້າຍ); ຊາຍໜຸ່ມ ຫງວຽນເຕິດແທັ່ງ ເຮັດວຽກເປັນຜູ້ຊ່ວຍຄົວໃນໂຮງແຮມ Carlton ປະເທດອັງກິດ, ປີ 1913 (ຂວາ)
ປີ 1920, ຊາຍໜຸ່ມຮັກຊາດ ຫງວຽນອ໋າຍກວັກ (ຊື່ຂອງປະທານໂຮ່ຈີມິນໃນເວລາເຄື່ອນໄຫວປະຕິວັດຢູ່ປະເທດຝຣັ່ງ) ເຂົ້າຮ່ວມກອງປະຊຸມໃຫຍ່ຄັ້ງທີ 18 ຂອງພັກສັງຄົມຝຣັ່ງ ທີ່ນະຄອນ Tours ໃນຖານະຜູ້ຕາງໜ້າອິນດູຈີນ. ຫງວຽນອ໋າຍກວັກ ກາຍເປັນໜຶ່ງໃນບັນດາຜູ້ກໍ່ຕັ້ງພັກກອມມູນິດຝຣັ່ງ ແລະ ກໍ່ແມ່ນນັກກອມມູນິດທຳອິດຂອງຊາດຫວຽດນາມ
ແຕວັນທີ 6 ມັງກອນເຖິງວັນທີ 7 ກຸມພາ 1930, ພາຍໃຕ້ການເປັນປະທານຂອງສະຫາຍຫງວຽນອ໋າຍກວັກ ໃນນາມຕາງໜ້າສາກົນກອມມູນິດ, ກອງປະຊຸມຄັ້ງທີໜຶ່ງບັນດາອົງການຈັດຕັ້ງກອມມູນິດ ເພື່ອສ້າງຕັ້ງພັກກອມມູນິດຫວຽດນາມ ປະຊຸມຢູ່ທີ່ແຫຼມ ເກົາລູນ, ໃນຮ່ອງກົງ (ຈີນ)
ພາຍຫຼັງ 30 ທີ່ເຄື່ອນໄຫວຢູ່ຕ່າງປະເທດ, ວັນທີ 28 ມັງກອນ 1941, ຫງວຽນອ໋າຍກວັກ - ປະທານໂຮ່ຈີມິນ ໄດ້ກັບມາປະເທດເພື່ອນຳພາການຕໍ່ສູ້ປະຕິວັດໂດຍກົງ, ເຮັດການປະຕິວັດເດືອນສິງຫາ, ໂຄ່ນລົ້ມພວກຈັກກະພັດລ່າເມືອງຂຶ້ນ, ຍາດເອົາເອກະລາດແຫ່ງຊາດ, ສ້າງຕັ້ງປະເທດ ສາທາລະນະລັດປະຊາທິປະໄຕຫວຽດນາມ.
ການຊຸມນຸມປຸກລະດົມການລຸກຮືຂຶ້ນເພື່ອຍຶດອຳນາດການປົກຄອງ ຖືກຈັດຂຶ້ນໂດຍແນວໂຮມຫວຽດມິງ ຢູ່ໂຮງລະຄອນໃຫຍ່ຮ່າໂນ້ຍ ໃນວັນທີ 19 ສິງຫາ 1945 (ຊ້າຍ); ວັນທີ 2 ກັນຍາ 1945, ຢູ່ທີ່ສະໜາມຫຼວງ ບາດິ່ງ ອັນເປັນປະຫວັດສາດ, ປະທານໂຮ່ຈີມິນອ່ານຖະແຫຼງການຄວາມເປັນເອກະລາດ, ໃຫ້ກຳເນີດສາທາລະນະລັດປະຊາທີປະໄຕຫວຽດນາມ (ຂວາ)
ຜູ້ຈັດຕັ້ງນຳພາການຕໍ່ສູ້ຮັກສາອຳນາດການປົກຄອງປະຕິວັດໄວ້ຢ່າງໝັ້ນຄົງ
ແລະການຕໍ່ສູ້ຕ້ານພວກລ່າເມືອງຂຶ້ນຝຣັ່ງ (1946 - 1954)
ຄວາມເປັນຈິງແຫ່ງການປະຕິວັດໃນໄລຍະ 1946 - 1954 ໄດ້ຢືນຢັນວ່າ ການນຳພາຂອງພັກກອມມູນິດຫວຽດນາມ, ນຳໜ້າໂດຍປະທານໂຮ່ຈີມິນ ແມ່ນປັດໄຈຕັດສິນຊີ້ຂາດໄຊຊະນະ ຂອງການຕໍ່ສູ້ຮັກສາອຳນາດການປົກຄອງປະຕິວັດ ແລະ ການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ຂອງປະຊາຊົນຫວຽດນາມ.
ວັນທີ 6 ມັງກອນ 1946, ສະພາແຫ່ງຊາດຊຸດທຳອິດຂອງປະເທດສາທາລະນະລັດປະຊາທິປະໄຕຫວຽດນາມໄດ້ຮັບການກໍ່ຕັ້ງຂຶ້ນ ຫຼັງຈາກການເລືອກຕັ້ງຄັ້ງທຳອິດໃນທົ່ວປະເທດ (ຊ້າຍ); ປະທານໂຮ່ຈີມິນ ແລະ ບັນດາສະມາຊິກຂອງສະພາລັດຖະບານຊົ່ວຄາວ ແຫ່ງປະເທດສາທາລະນະລັດປະຊາທິປະໄຕຫວຽດນາມ ເປີດຕົວຫຼັງຈາກການປະຊຸມຄັ້ງທຳອິດ, ວັນທີ 3 ກັນຍາ 1945 (ຂວາ)
ປະທານໂຮ່ຈີມິນ ແລະ ບັນດາສະມາຊິກຂອງສະພາລັດຖະບານຊົ່ວຄາວ ແຫ່ງປະເທດສາທາລະນະລັດປະຊາທິປະໄຕ ເປີດຕົວຫຼັງຈາກການປະຊຸທຄັ້ງທຳອິດ, ຕອນເຊົ້າວັນທີ 3 ກັນຍາ 1945. ກອງປະຊຸມໄດ້ພິຈາລະນາບັນດາບັນຫາທີ່ຮີບດ່ວນ, ໃນນັ້ນມີຄວາມຕັດສິນໃຈຕໍ່ສູ້ກັບ "ສັດຕູຄວາມຫິວ", “ສັດຕູຄວາມໂງ່ຈ້າ", ດຳເນີນການເລືອກຕັ້ງທົ່ວໄປດ້ວຍລະບອບປ່ອນບັດໂດຍກົງໂດຍໄວ ເພື່ອຈາກນັ້ນສ້າງລັດຖະທຳມະນູນສຳລັບປະເທດສາທາລະນະລັດປະຊາທິປະໄຕຫວຽດນາມທີ່ເກີດໃໝ່.
ປະທານໂຮ່ຈີມິນປະຊຸມກັບຄະນະປະຈຳສູນກາງພັກ ເພື່ອຕັດສິນໃຈເປີດບັ້ນຮົບຊາຍແດນປີ 1950 (ຊ້າຍ); ທ້າຍປີ 1953, ຢູ່ເຂດຫວຽດບັກ, ປະທານໂຮ່ຈີມິນ ແລະ ບັນດາສະຫາຍຜູ້ນຳຂອງພັກ ໄດ້ຕັດສິນໃຈເປີດບັ້ນຮົບດຽນບຽນຟູ (ຂວາ)
ລຸງໂຮ່ກັບພາລະກິດການຕໍ່ສູ້ຕ້ານອາເມລິກາເພື່ອກູ້ຊາດ
ແລະການກໍ່ສ້າງສັງຄົມນິຍົມຢູ່ພາກເໜືອ
ໃນເວລາ 15 ປີແຫ່ງການນຳພາ ພາລະກິດການຕໍ່ສູ້ຕ້ານອາເມລິກາເພື່ອກູ້ຊາດ ແລະການກໍ່ສ້າງສັງຄົມນິຍົມຢູ່ພາກເໜືອ (1954 - ເດືອນກັນຍາ 1969), ປະທານໂຮ່ຈີມິນໄດ້ພ້ອມກັນກັບສູນກາງພັກ ວາງກຳນົດເສັ້ນທາງທີ່ຖືກຕ້ອງສຳລັບການປະຕິວັດຫວຽດນາມ ຢ່າງສະຫຼາດສ່ອງໃສ, ປະຕິບັດສອງໜ້າທີ່ປະຕິວັດໃນເວລາດຽວກັນຄື: ນຳພາກເໜືອເຂົ້າສູ່ລັດທິສັງຄົມນິຍົມ ແລະ ປະຕິບັດການປະຕິວັດປົດປ່ອຍຊາດຢູ່ພາກໃຕ້, ກ້າວເຖິງການໂຮມປະເທດຊາດເປັນເອກະພາບ.
ວັນທີ 5 ກັນຍາ 1960, ພັກແຮງງານຫວຽດນາມເປີດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 3. ໃນສຸນທອນພົດເປີດກອງປະຊຸມ, ປະທານໂຮ່ຈີມິນໄດ້ກ່າວວ່າ: "ກອງປະຊຸມໃຫຍ່ຄັ້ງທີສອງແມ່ນກອງປະຊຸມໃຫຍ່ຕໍ່ຕ້ານ. ກອງປະຊຸມໃຫຍ່ຄັ້ງນີ້ແມ່ນກອງປະຊຸມໃຫຍ່ຂອງການກໍ່ສ້າງລັດທິສັງຄົມນິຍົມຢູ່ພາກເໜືອ ແລະ ການຕໍ່ສູ້ສັນຕິພາບເພື່ອໂຮມປະເທດຊາດເປັນເອກະພາບ"
ປະທານໂຮ່ຈີມິນຢ້ຽມຢາມໂຮງງານຜະລິດກົນຈັກ ໃນເຂດອຸດສາຫະກຳເຫຼັກກ້າ ຖາຍງວຽນ (ຊ້າຍ); ແລະມາຢ້ຽມຢາມໂຮງງານຜະລິດລົດໄຟ ຢາເລິມ, ວັນທີ 19 ພຶດສະພາ 1955, ປະທານໂຮ່ຈີມິນ ຕັກເຕືອນກຳມະກອນ, ພະນັກງານ ໃຫ້ເສີມຂະຫຍາຍມູນເຊື້ອປະຕິວັດຂອງໂຮງງານ (ຂວາ)
ປະທານໂຮ່ຈີມິນກ່າວປາໄສໃນກອງປະຊຸມໃຫຍ່ວິລະຊົນ, ນັກຮົບແຂ່ງຂັນຕ້ານອາເມລິກາ, ກູ້ຊາດ (ກອງປະຊຸມໃຫຍ່ວິລະຊົນ, ນັກຮົບແຂ່ງຂັນຄັ້ງທີ IV), ເດືອນທັນວາ 1966, ທີ່ນະຄອນຮ່າໂນ້ຍ
ປະທານໂຮ່ຈີມິນ ພ້ອມກັບຄະນະຜູ້ແທນວິລະຊົນ ຂອງກຳລັງປະກອບອາວຸດປະຊາຊົນເພື່ອປົດປ່ອຍພາກໃຕ້ຫວຽດນາມ
ປະທານໂຮ່ຈີມິນຜູ້ຍິ່ງໃຫຍ່, ມີຊີວິດຕະຫຼອດໄປໃນພາລະກິດຂອງພວກເຮົາ
ສືບຕໍ່ໄປຕາມເສັ້ນທາງປະຕິວັດອັນສະຫງ່າລາສີທີ່ປະທານໂຮ່ຈີມິນ, ພັກ ແລະ ປະຊາຊົນເຮົາໄດ້ເລືອກເອົາ, ທົ່ວພັກ ທົ່ວປວງຊົນແລະທົ່ວກອງທັບເຮົາ ປະຕິຍານທີ່ຈະສືບຕໍ່ພາລະກິດອັນຍິ່ງໃຫຍ່ຂອງເພິ່ນຢ່າງຊື່ສັດແລະດີເລີດ; ຕໍ່ສູ້ຢ່າງເດັດດ່ຽວໝັ້ນໜຽວ ເພື່ອປົກປັກຮັກສາເອກະລາດ, ອຳນາດອະທິປະໄຕ, ເອກະພາບແລະຜືນແຜ່ນດິນອັນຄົບຖ້ວນຂອງປະເທດຊາດໄວ້ຢ່າງໝັ້ນຄົງ; ກໍ່ສ້າງປະເທດຫວຽດນາມທີ່ "ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸດຕິທຳແລະສີວິໄລ”, ກ້າວຂຶ້ນສູ່ລັດທະສັງຄົມນິຍົມຢ່າງໜັກແໜ້ນ; ເພື່ອໃຫ້ປະເທດເຮົາ “ໃຫຍ່ໂຕໂອ້ຖົງກວ່າ, ສວຍງານກວ່າເກົ່າ” ຄືທີ່ລຸງໂຮ່ທີ່ເຄົາລົບຮັກຂອງພວກເຮົາປາດຖະໜາສະເໝີ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ VII ຂອງພັກໄດ້ຢືນຢັນວ່າ: ພັກຖືເອົາລັດທິມາກ-ເລນິນ ແລະ ແນວຄິດໂຮ່ຈີມິນ ເປັນພື້ນຖານແນວຄິດ, ເຂັມທິດຊີ້ທາງໃຫ້ແກ່ການປະຕິບັດ.
ສະເຫຼີມສະຫຼອງວັນຄ້າຍວັນເກີດປະທານໂຮ່ຈີມິນຜູ້ຍິ່ງໃຫຍ່ຄົບຮອບ 130 ປີ ກໍ່ແມ່ນໂອກາດທີ່ພວກເຮົາກຳລັງຈັດກອງປະຊຸມໃຫຍ່ຂອງອົງຄະນະພັກທຸກຂັ້ນ ແລະກ້າວໄປສູ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກ. ຜົນສຳເລັດຂອງ 35 ປີແຫ່ງການປ່ຽນແປງໃໝ່ໄດ້ຢືນຢັນວ່າ ແນວທາງການປ່ຽນແປງໃໝ່ຂອງພັກທີ່ອີງໃສ່ລັດທິມາກ-ເລນິນ ແລະແນວຄິດໂຮ່ຈີມິນ ແມ່ນຖືກຕ້ອງ, ປະດິດສ້າງ, ສອດຄ່ອງກັບສະພາບຄວາມເປັນຈິງຂອງຫວຽດນາມ ແລະທ່າອຽງການພັດທະນາຂອງຍຸກສະໄໝ. ອາໄສສິ່ງດັ່ງກ່າວນັ້ນ, ປະເທດເຮົາໄດ້ປະສົບຜົນສຳເລັດອັນໃຫຍ່ຫຼວງ, ມີຄວາມໝາຍປະຫວັດສາດ. ສະເຫຼີມສະຫຼອງວັນຄ້າຍວັນເກີດປະທານໂຮ່ຈີມິນຄົບຮອບ 130 ປີ, ໃນຈິດໃຈແລະໝາກຫົວໃຈຂອງປະຊາຊົນຫວຽດນາມທຸກຄົນ ໄດ້ຄິດຮອດຄິດເຖິງເພິ່ນດ້ວຍຄວາມເຄົາລົບຮັກ ແລະ ຄວາມຮູ້ບຸນຄຸນທີ່ບໍ່ມີຂອບເຂດ, ທຸກຄົນໝັ້ນໝາຍວ່າຈະຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດ ແລະແບບແຜນໂຮ່ຈີມິນຢ່າງບໍ່ຢຸດຢັ້ງ.
ລາຍການສະແດງສິລະປະເພື່ອສະເຫຼີມສະຫຼອງວັນຄ້າຍວັນເກີດປະທານໂຮ່ຈີມິນ ຄົບຮອບ 130 ປີ
ແຈໜຶ່ງຂອງນະຄອນໂຮ່ຈີມິນໃນມື້ນີ້
ພາບ: TTXVN / ເອກະສານ
