ຟື້ນຟູຂະແໜງການທ່ອງທ່ຽວໃນສະພາວະການປັບຕົວທີ່ປອດໄພ ຍືດຫຍຸ່ນ
ແລະ ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ
ແລະ ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ
ວກ. - ໂດຍປະຕິບັດການຊີ້ນຳຂອງລັດດຖະບານ ກ່ຽວກັບການປັບຕົວທີ່ປອດໄພ ຍືດຫຍຸ່ນ ແລະ ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ, ຂະແໜງການທ່ອງທ່ຽວສືບຕໍ່ຍູ້ແຮງການເຄື່ອນໄຫວທ່ອງທ່ຽວພາຍໃນປະເທດ ແລະ ສາກົນ ທີ່ຕິດພັນກັບການຮັບປະກັນຄວາມປອດໄພ, ກະກຽມແຕ່ຫົວທີ, ແຕ່ທາງໄກ ບັນດາມາດຕະການຄ່ອຍໆປັບຕົວໃຫ້ເຂົ້າກັບສະຖານະການປົກກະຕິໃໝ່, ປະຕິບັດ “ສອງເປົ້າໝາຍ” ທັງປ້ອງກັນແລະຄວບຄຸມການແຜ່ລະບາດຂອງພະຍາດ, ທັງຟື້ນຟູແລະພັດທະນາເສດຖະກິດ-ສັງຄົມ.
ທ່ານ ຟ້າມ ມິນຈີ໊ງ ກຳມະການກົມການເມືອງ, ນາຍົດລັດຖະມົນຕີ ແລະ ບັນດາຜູ້ແທນທີ່ເຂົ້າຮ່ວມພິທີເປີດປີທ່ອງທ່ຽວແຫ່ງຊາດ 2022 ພາຍໃຕ້ຫົວຂໍ້ “ກວ໋າງນາມ - ແຫຼ່ງທ່ອງທ່ຽວສີຂຽວ”, ຈັດຂຶ້ນທີ່ເກາະຄວາມຊົງ ຈຳໂຮ້ຍອານ (ນະຄອນໂຮ້ຍອານ, ແຂວງກວ໋າງນາມ) _ ພາບ: TTXVN
ຜົນກະທົບຂອງການລະບາດຂອງພະຍາດໂຄວິດ-19 ຕໍ່ຂະແໜງການທ່ອງທ່ຽວ
ກ່ຽວກັບຈຳນວນນັກທ່ອງທ່ຽວ ແລະ ລາຍໄດ້ຈາກການທ່ອງທ່ຽວ: ຈຳນວນນັກທ່ອງທ່ຽວສາກົນໃນປີ 2020 ມີພຽງ 3,7 ລ້ານຄົນ, ຫຼຸດລົງ 80% ເມື່ອທຽບໃສ່ປີ 2019; ນັກທ່ອງທ່ຽວພາຍໃນປະເທດມີ 56 ລ້ານຄົນ, ຫຼຸດລົງ 34% ເມື່ອທຽບກັບໄລຍະດຽວກັນຂອງປີ 2019; ລວມຍອດລາຍໄດ້ຈາກນັກທ່ອງທ່ຽວປີ 2020 ບັນລຸໄດ້ 321.200 ຕື້ດົ່ງ, ຫຼຸດລົງ 57,8% ເມື່ອທຽບໃສ່ປີ 2019. ປີ 2021, ຂະແໜງການທ່ອງທ່ຽວຮັບໃຊ້ນັກທ່ອງທ່ຽວພາຍໃນປະເທດປະມານ 40 ລ້ານຄົນ ແລະ ນັກທ່ອງທ່ຽວຕ່າງປະເທດປະມານ 3.500 ຄົນ, ລວມຍອດລາຍໄດ້ຈາກນັກທ່ອງທ່ຽວບັນລຸປະມານ 180.000 ຕື້ດົ່ງ, ຫຼຸດລົງ 42% ເມື່ອທຽບກັບໄລຍະດຽວກັນຂອງປີ 2020.
ກ່ຽວກັບແຮງງານການທ່ອງທ່ຽວ: ປີ 2020, ບັນດາວິສາຫະກິດຕ້ອງຫຼຸດບຸກຄະລາກອນປະມານ 70% ເຖິງ 80%. ຮອດປີ 2021, ຈຳນວນແຮງງານທີ່ເຮັດວຽກເຕັມເວລາກວມເອົາພຽງ 25% ຂອງຈຳນວນນັ້ນໃນປີ 2020, ແຮງງານລາອອກ ຫຼືບອກເລີກສັນຍາແຮງງານ ກວມປະມານ 30%, ແຮງງານຢຸດງານຊົ່ວຄາວປະມານ 35%, ແຮງງານທີ່ເຮັດວຽກແບບພໍແລ້ວມືກວມ 10%. ການແຜ່ລະບາດຂອງໂຄວິດ-19 ໄດ້ສົ່ງຜົນກະທົບຢ່າງແຮງຕໍ່ແຮງງານ 2,5 ລ້ານຄົນໃນຂະແໜງການທ່ອງທ່ຽວ ໂດຍມີພະນັກງານໂດຍກົງ 800.000 ຄົນ, ໃນນັ້ນກຸ່ມທີ່ເສຍງານ ແລະ ໄດ້ຮັບຜົນກະທົບຫຼາຍກວ່າໝູ່ແມ່ນພະນັກງານນຳທ່ຽວ, ພະນັກງານທີ່ເຮັດວຽກໃນສະຖານທີ່ທີ່ພັກນັກທ່ອງທ່ຽວ, ສະຖານທີ່ທ່ອງທ່ຽວ, ທຸລະກິດນຳທ່ຽວ, ທຸລະກິດຂົນສົ່ງ, ເຮືອທ່ອງທ່ຽວ, ວິສາຫະກິດທ່ອງທ່ຽວອື່ນໆ…
ກ່ຽວກັບວິສາຫະກິດທ່ອງທ່ຽວ: ຈຳນວນວິສາຫະກິດທີ່ຂໍເພີກຖອນໃບອະນຸຍາດປະກອບທຸລະກິດນຳທ່ຽວ ກວມກວ່າ 35% ຂອງຈຳນວນວິສາຫະກິດທີ່ໄດ້ຮັບອະນຸຍາດທັງໝົດ, ຍັງມີວິສາຫະກິດຫຼາຍກວ່າ 2.000 ແຫ່ງທີ່ມີໃບອະນຸຍາດປະກອບທຸລະກິດການທ່ອງທ່ຽວສາກົນທົ່ວປະເທດ, ເຊິ່ງວິສາຫະກິດຈຳນວນຫຼາຍໄດ້ປິດຕົວ ຫຼືຢຸດຕິການເຄື່ອນໄຫວ. ການທຸລະກິດທີ່ພັກນັກທ່ອງທ່ຽວ - ຂົງເຂດທີ່ກວມເອົາ 46% ຂອງໂຄງປະກອບລາຍໄດ້ ຂອງຂະແໜງການທ່ອງທ່ຽວຂອງຫວຽດນາມ ກໍ່ຕ້ອງປິດຕົວລົງປະມານ 90% ແລະ ເກືອບຄືວ່າບໍ່ມີແຂກເລີຍ (ຍົກເວັ້ນບັນດາສະຖານຕ້ອນຮັບແຂກກັກຕົວ).
ອາດຈະເຫັນໄດ້ວ່າ, ຂະແໜງການທ່ອງທ່ຽວໄດ້ຮັບຜົນກະທົບຢ່າງໜັກ ແລະ ຕ້ອງໃຊ້ເວລານາມໃນການຟື້ນຕົວ. ໃນສອງປີທີ່ຜ່ານມາ, ການແຜ່ລະບາດຂອງໂຄວິດ-19 ຄືກັບ “ຄື້ນສຶນາມິ” “ກວາດລ້າງ” ກິດຈະກໍາທ່ອງທ່ຽວທົ່ວໂລກເປັນອໍາມະພາດ. ຕາມລາຍງານຂອງອົງການທ່ອງທ່ຽວໂລກ (UNWTO), ປີ 2020, ການທ່ອງທ່ຽວໂລກປະສົບກັບວິກິດການທີ່ໃຫຍ່ທີ່ສຸດໃນປະຫວັດສາດ ເນື່ອງຈາກຜົນກະທົບຂອງການແຜ່ລະບາດຂອງໂຄວິດ-19, ຈຳນວນນັກທ່ອງທ່ຽວສາກົນຫຼຸດລົງ 73,9% ເມື່ອທຽບກັບປີ 2019, ກັບຄືນໄປເມື່ອ 30 ປີທີ່ແລ້ວ ແລະ ຄາດຄະເນວ່າ ຈະຕ້ອງໃຊ້ເວລາ 2-4 ປີ ຈຶ່ງຟື້ນຟູທ່າເຕີບໂຕສູ່ລະດັບກ່ອນການແຜ່ລະບາດຂອງພະຍາດໃນປີ 2019.
ໃນປະຫວັດສາດ 61 ປີ, ຂະແໜງການທ່ອງທ່ຽວຫວຽດນາມປະສົບກັບວິກິດການຫຼາຍຄັ້ງ ຍ້ອນພະຍາດລະບາດ ໄພທຳມະຊາດ ເສດຖະກິດຖົດຖອຍ, ແຕ່ບໍ່ເຄີຍໄດ້ຮັບຄວາມເສຍຫາຍໜັກໜ່ວງ ຄືວິກິດການລະບາດຂອງພະຍາດໂຄວິດ-19 ໃນຄັ້ງນີ້. ການແຜ່ລະບາດຂອງພະຍາດຜັນປ່ຽນຢ່າງສັບສົນ ເຮັດໃຫ້ຫຼາຍປະເທດຕ້ອງໝູນໃຊ້ບັນດາມາດຕະການຈຳກັດການໄປມາ, ສົ່ງຜົນກະທົບຢ່າງໜັກໜ່ວງຕໍ່ຄວາມສາມາດຟື້ນຕົວຂອງຂະແໜງການທ່ອງທ່ຽວ. ຄຽງຄູ່ກັນນັ້ນ, ການທ່ອງທ່ຽວຫວຽດນາມຍັງບໍ່ທັນສ້າງພວງພະນັງການເຊື່ອມຕໍ່ທີ່ແຂງແຮງຢ່າງພຽງພໍ ເພື່ອແຂ່ງຂັນກັບບັນດາປະເທດໃນພາກພື້ນ. ນອກຈາກນັ້ນ, ມີບຸກຄະລາກອນຂະແໜງການທ່ອງທ່ຽວຈຳນວນຫຼາຍທີ່ເສຍງານໄດ້ຫັນໄປເຮັດວຽກໃນຂະແໜງການ, ອາຊີບອື່ນ ເພື່ອລ້ຽງ. ຄືແນວນັ້ນ, ຫຼັງການແຜ່ລະບາດຂອງພະຍາດແລ້ວ, ເວລາທີ່ການທ່ອງທ່ຽວຟື້ນຟູຄືນໃໝ່, ຂະແໜງການທ່ອງທ່ຽວຈະປະເຊີນໜ້າກັບຄວາມຫຍຸ້ງຍາກອັນໃຫຍ່ຫຼວງ ຍ້ອນຂາດບຸກຄະລາກອນ.
ບັນດາມາດຕະການຟື້ນຟູຂະແໜງການທ່ອງທ່ຽວ
ໃນສະພາບການແຜ່ລະບາດຂອງພະຍາດໂຄວິດ-19 ທີ່ໄດ້ສົ່ງຜົນສະທ້ອນຢ່າງແຮງຕໍ່ຂະແໜງການທ່ອງທ່ຽວນັ້ນ, ກົມການເມືອງສູນກາງພັກໄດ້ຊີ້ນຳລະບົບການເມືອງປະຕິບັດຫຼາຍມາດຕະການເພື່ອຮັບມື.
ລັດຖະບານກໍ່ໄດ້ອອກມະຕິຫຼາຍສະບັບ ເພື່ອຜັນຂະຫຍາຍບັນດານະໂຍບາຍໜູນຊ່ວຍປະຊາຊົນ ແລະ ວິສາຫະກິດ, ໃນນັ້ນມີບັນດາເນື້ອໃນທີ່ກ່ຽວຂ້ອງເຖິງຂະແໜງທ່ອງທ່ຽວໂດຍກົງຄື: ວັນທີ 2 ພະຈິກ 2021, ຫ້ອງວ່າການລັດຖະບານອອກຈົດໝາຍທາງລັດຖະການເລກທີ 8044/VPCP-KGVX “ວ່າດ້ວຍການຊີ້ນຳຊົ່ວຄາວກ່ຽວກັບການທົດລອງຕ້ອນຮັບນັກທ່ອງທ່ຽວສາກົນມາຫວຽດນາມ” ທີ່ 5 ທ້ອງຖິ່ນຕາມ 3 ໄລຍະ; ປະກາດໃຊ້ບັນດານະໂຍບາຍຊ່ວຍເຫຼືອຮ່ວມກັນ (ວິສາຫະກິດມີສິດຂະຫຍາຍເວລາຊໍາລະພາສີ, ຫຼຸດອັດຕາພາສີມູນຄ່າເພີ່ມ, ພາສີລາຍໄດ້ບໍລິສັດ, ພາສີລາຍໄດ້ບຸກຄົນ ແລະ ຄ່າເຊົ່າທີ່ດິນໃນປີ 2021, ຍົກເວັ້ນແລະຫຼຸດດອກເບ້ຍເງິນກູ້, ຮັກສາອັດຕາດອກເບ້ຍເງິນກູ້ ແລະ ກຸ່ມໜີ້ສິນບໍ່ປ່ຽນແປງ, ເລື່ອນເວລາຊໍາລະຄ່າທຳນຽມສະຫະພາບແຮງງານໃຫ້ຜູ້ອອກແຮງງານ…; ຜູ້ອອກແຮງງານໄດ້ຮັບບັນດານະໂຍບາຍຊ່ວຍເຫຼືອເຊັ່ນ: ຊ່ວຍເຫຼືອການສູນເສຍວຽກເຮັດງານທໍາ, ຢຸດຊົ່ວຄາວການປະຕິບັດສັນຍາແຮງງານ, ຢຸດງານໂດຍບໍ່ມີຄ່າຈ້າງໃນອັດຕາ 15 ມື້ຕິດຕໍ່ກັນ ຫຼື 30 ມື້ຕິດຕໍ່ກັນ ຫຼືຫຼາຍກວ່ານັ້ນ); ປະກາດໃຊ້ບັນດານະໂຍບາຍຊ່ວຍເຫຼືອສະເພາະ ໃຫ້ແກ່ຂະແໜງການທ່ອງທ່ຽວ (ຫຼຸດລາຄາຂາຍໄຟຟ້າ ສຳລັບສະຖານທີ່ພັກນັກທ່ອງທ່ຽວ ຈາກລາຄາຂາຍຍ່ອຍກະແສໄຟຟ້າທີ່ນຳໃຊ້ໃນທຸລະກິດ ມາເປັນລາຄາຂາຍຍ່ອຍກະແສໄຟຟ້າທີ່ນຳໃຊ້ກັບອຸດສາຫະກຳການຜະລິດ, ຫຼຸດ 50% ຄ່າທຳນຽມການປະເມີນອອກໃບອະນຸຍາດປະກອບທຸລະກິດນຳທ່ຽວ, ຫຼຸດ 80% ຂອງເງິນຝາກເພື່ອສ້າງຕັ້ງທຸລະກິດການນຳທ່ຽວ… ພະນັກງານທ່ອງທ່ຽວໃນຂະແໜງການທ່ອງທ່ຽວທີ່ເປັນຜູ້ນຳທ່ຽວ ຈະໄດ້ຮັບເງິນສະໜັບສະໜູນ 3.710.000 ດົ່ງຕໍ່ຄົນ ແລະ ຮອດທ້າຍປີ 2021, ຍອດຈຳນວນເງິນໜູນຊ່ວຍພະນັກງານນຳທ່ຽວໄດ້ຮັບການຕົກລົງໜູນຊ່ວຍກ່ວາ 58,5 ຕື້ດົ່ງ ໃຫ້ພະນັກງານນຳທ່ຽວເກືອບ 16.000 ຄົນ).
ຫຼັງຈາກສອງປີຂອງການຈໍາກັດການເດີນທາງ, ຄວາມຕ້ອງການໄປທ່ອງທ່ຽວຂອງປະຊາຊົນມີແນວໂນ້ມທີ່ຈະລະເບີດຂຶ້ນ. ການສຳຫຼວດໂດຍ booking.com ກັບ 28.000 ຄົນຈາກ 28 ປະເທດທົ່ວໂລກໃຫ້ເຫັນວ່າ, ນັກທ່ອງທ່ຽວຫຼາຍຄົນຫວັງວ່າຈະໄດ້ໄປທ່ອງທ່ຽວຄືນໃໝ່ໃນປີ 2021. ຕາມການສຳຫຼວດຂອງສະພາທີ່ປຶກສາການທ່ອງທ່ຽວ ຂຶ້ນກັບກົມໃຫຍ່ການທ່ອງທ່ຽວ, ນັກທ່ອງທ່ຽວພາຍໃນປະເທດພ້ອມທີ່ຈະເດີນທາງທ່ອງທ່ຽວທັນທີ ທີ່ຄວບຄຸມການແຜ່ລະບາດຂອງພະຍາດໄດ້ (ເກືອບ 30% ພ້ອມທີ່ຈະເດີນທາງທັນທີ, ກວ່າ 50% ກຽມຄວາມພ້ອມໄປທ່ອງທ່ຽວໃນລະດູທ່ອງທ່ຽວຕໍ່ໄປ, 70% ຂອງຜູ້ຕອບແບບສອບຖາມຈະເດີນທາງໂດຍຍົນ).
ໃນສະພາບການແຜ່ລະບາດຂອງໂຄວິດ-19 ທີ່ສັບສົນໃນປະຈຸບັນ, ທ່າອ່ຽງ ແລະ ຄວາມຕ້ອງການຂອງນັກທ່ອງທ່ຽວກໍ່ມີການປ່ຽນແປງ, ຂະແໜງການທ່ອງທ່ຽວຮັບຮູ້ໄດ້ ແລະ ກຳລັງພະຍາຍາມຕອງສະໜອງ, ນັ້ນແມ່ນ: ເລືອກເອົາແຫຼ່ງທ່ອງທ່ຽວທີ່ມີຄວາມປອດໄພ, ສະໜິດສະໜົມ; ການທ່ອງທ່ຽວທີ່ຮັບປະກັນດູແລສຸຂະພາບ ແລະການປະກັນໄພ. ນັກທ່ອງທ່ຽວມັກຈະຕ້ອງການຂໍ້ມູນລະອຽດ ກ່ຽວກັບລະບົບການຮັກສາພະຍາບານຂອງປາຍທາງ ແລະ ຊຸດປະກັນໄພການເດີນທາງ; ການທ່ອງທ່ຽວປ່ຽນຈາກຄວາມຕ້ອງການທ່ອງທ່ຽວຕ່າງປະເທດ ເປັນການທ່ອງທ່ຽວພາຍໃນປະເທດ; ໃຊ້ຜະລິດຕະພັນການເດີນທາງ, ແພ໊ກເກດ (ຄຳສັ່ງປະສົມ) ທີ່ອອກແບບມາສໍາລັບການເດີນທາງເປັນກຸ່ມນ້ອຍ ຫຼືຄອບຄົວ; ໝູນໃຊ້ເຕັກໂນໂລຊີຂໍ້ມູນຂ່າວສານ, ປັນຍາປະດິດ, ອິນເຕີເນັດ ເພື່ອຊອກຮູ້ລະອຽດກ່ອນການເດີນທາງ; ນັກທ່ອງທ່ຽວມີຄວາມຍືດຫຍຸ່ນໃນການໃຊ້ບໍລິການ… ດ້ວຍເຫດນັ້ນ, ຂະແໜງການທ່ອງທ່ຽວໄດ້ກຳນົດທິດໃຫ້ບັນດາວິສາຫະກິດ, ຕົວແທນທ່ອງທ່ຽວ ແລະ ຜູ້ໃຫ້ບໍລິການດ້ານການທ່ອງທ່ຽວ ຈຳເປັນຕ້ອງປ່ຽນທິດທາງເພື່ອຕອບສະໜອງຄວາມຕ້ອງການຂອງນັກທ່ອງທ່ຽວຢ່າງທັນທ່ວງທີ, ດູແລນັກທ່ອງທ່ຽວໃຫ້ດີຂຶ້ນ, ໂດຍສະເພາະແມ່ນ ນຳໃຊ້ເຕັກໂນໂລຊີຂໍ້ມູນຂ່າວສານ, ປັນຍາປະດິດ ເຂົ້າໃນການຄຸ້ມຄອງ, ແນະນຳງານ, ສົ່ງເສີມສິນຄ້າ ບໍລິການ ຮູບພາບ ເພື່ອຕອບສະໜອງຄວາມຕ້ອງການ ແລະ ດຶງດູດຄວາມສົນໃຈຂອງນັກທ່ອງທ່ຽວ.
ໃນສະພາບການຜັນປ່ຽນຢ່າງສັບສົນຂອງການແຜ່ລະບາດຂອງໂຄວິດ-19, ຕິດຕາມການຊີ້ນຳຂອງລັດຖະບານຢ່າງໃກ້ຊິດ ກ່ຽວກັບການປະຕິບັດ “ສອງເປົ້າໝາຍ” ທັງປ້ອງກັນແລະຄວບຄຸມການແຜ່ລະບາດຂອງໂຄວິດ-19, ທັງສຸມໃສ່ພັດທະນາເສດຖະກິດ-ສັງຄົມ, ຂະແໜງການທ່ອງທ່ຽວມີມາດຕະການແກ້ໄຂຢ່າງທັນການ, ຫັນປ່ຽນຈາກສະຖານະ “ບໍ່ມີໂຄວິດ” ເປັນ “ການປັບຕົວໄດ້ຢ່າງປອດໄພ, ຍືດຫຍຸ່ນ, ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ”, ລະອຽດຄື:
ທີໜຶ່ງ, ຮັບປະກັນຄວາມປອດໄພໃນການເຄື່ອນໄຫວທ່ອງທ່ຽວ.
ຂະແໜງການທ່ອງທ່ຽວໃຫ້ບຸລິມະສິດອັນດັບໜຶ່ງໃນການຮັບປະກັນຄວາມປອດໄພໃຫ້ແຫຼ່ງທ່ອງທ່ຽວ ແລະ ນັກທ່ອງທ່ຽວ. ຕາມນັ້ນ, ກົມໃຫຍ່ການທ່ອງທ່ຽວ ໄດ້ແນະນຳໃຫ້ກະຊວງວັດທະນະທຳ, ກິລາ ແລະ ການທ່ອງທ່ຽວ ອອກຄຳແນະນຳຊົ່ວຄາວເລກທີ 3862/HD-BVHTTDL, ລົງວັນທີ 18 ຕຸລາ 2021, “ກ່ຽວກັບການປະຕິບັດມະຕິເລກທີ 128/NQ-CP, ລົງວັນທີ 11 ຕຸລາ 2021 ຂອງລັດຖະບານປະກາດໃຊ້ຂໍ້ກຳນົດຊົ່ວຄາວ “ການປັບຕົວໄດ້ຢ່າງປອດໄພ, ຍືດຫຍຸ່ນ, ຄວບຄຸມການແຜ່ງລະບາດຂອງໂຄວິດ-19 ໄດ້ຢ່າງມີປະສິດທິຜົນ ໃນການເຄື່ອນໄຫວວັດທະນະທຳ, ກິລາ ແລະ ການທ່ອງທ່ຽວ” ເພື່ອຜັນຂະຫຍາຍເຖິງບັນດາທ້ອງຖິ່ນ, ທຸລະກິດທ່ອງທ່ຽວ. ຄຽງຄູ່ກັນນັ້ນ, ກົມໃຫຍ່ການທ່ອງທ່ຽວ ກໍ່ສ້າງລະບົບການລົງທະບຽນ ແລະການປະເມີນຄວາມປອດຈາກໂຄວິດ-19 ໃຊ້ກັບສະຖານທີ່ທ່ອງທ່ຽວ, ທຸລະກິດນຳທ່ຽວ, ສະຖານປະກອບການທີ່ພັກ, ພະນັກງານ ນຳທ່ຽວ, ໜ່ວຍທຸລະກິດບໍລິການທ່ອງທ່ຽວ ຕາມທີ່ຢູ່ https://safe.tourism.com.vn. ແນະນຳ ແລະ ຊຸກຍູ້ໃຫ້ນັກທ່ອງທ່ຽວນຳໃຊ້ແອັບພລິເຄຊັ່ນ “ການທ່ອງທ່ຽວຫວຽດນາມທີ່ປອດໄພ” ເພື່ອຊອກຫາຂໍ້ມູນການເດີນທາງທີ່ປອດໄພ, ຄຳປະກາດທາງການແພດ ແລະ ການປະເມີນຈຸດໝາຍປາຍທາງ.
ທີສອງ, ສຸມໃສ່ຍູ້ແຮງການເຄື່ອນໄຫວກະຕູ້ນຄວາມຕ້ອງການ ແລະ ຟື້ນຟູການທ່ອງທ່ຽວພາຍໃນປະເທດທົ່ວປະເທດ.
ກະຊວງວັດທະນະທຳ, ກິລາ ແລະ ການທ່ອງທ່ຽວປະກາດໃຊ້ແຜນການເລກທີ 3228/KH-BVHTTDL, ລົງວັນທີ 7 ກັນຍາ 2021, “ກ່ຽວກັບການຜັນຂະຫຍາຍບັນດານະໂຍບາຍຊຸກຍູ້ຄວາມຕ້ອງການ, ຟື້ນຟູການເຄື່ອນໄຫວທ່ອງທ່ຽວ ແລະ ກິດຈະກຳການເດີນທາງ” ຕາມຈິດໃຈມະຕິເລກທີ 63/NQ-CP, ລົງວັນທີ 29 ມິຖຸນາ 2021, “ກ່ຽວກັບບັນດາໜ້າທີ່, ມາດຕະການຕົ້ນຕໍ່ ເພື່ອການເຕີບໂຕເສດຖະກິດ, ການເບີກຈ່າຍການລົງທຶນພາກລັດ ແລະ ການສົ່ງອອກສິນຄ້າຢ່າງຍືນຍົງ ໃນຊຸມເດືອນທ້າຍຂອງປີ 2021 ແລະ ຕົ້ນປີ 2022”, ໃນນັ້ນ ກຳນົດໜຶ່ງໃນບັນດາທັດສະນະຕົ້ນຕໍ່ແມ່ນ ເຊື່ອມຕໍ່ການຟື້ນຟູ ພັດທະນາການທ່ອງທ່ຽວ ກັບການຍົກສູງຄວາມສາມາດພາຍໃນ ແລະ ຄວາມເປັນເຈົ້າຕົນເອງ ຂອງຂະແໜງການທ່ອງທ່ຽວ, ຊຸກຍູ້ການພັດທະນາການທ່ອງທ່ຽວພາຍໃນປະເທດ, ຖືເອົານີ້ເປັນກຳລັງແຮງພາຍໃນ, ພື້ນຖານຕົ້ນຕໍ ເພື່ອພັດທະນາການທ່ອງທ່ຽວແບບຍືນຍົງ. ຄຽງຄູ່ກັນນັ້ນ, ກະຊວງວັດທະນະທຳ, ກິລາ ແລະ ການທ່ອງທ່ຽວ ສືບຕໍ່ປະກາດໃຊ້ໂຄງການເລກທີ 4698/BVHTTDL-TCDL, ລົງວັນທີ 16 ທັນວາ 2021, “ກ່ຽວກັບໂຄງການເປີດຕົວການທ່ອງທ່ຽວພາຍໃນປະເທດ ທີ່ປັບຕົວໄດ້ຢ່າງປອດໄພ, ຍືດຫຍຸ່ນ ແລະ ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ” ແລະ ຜັນຂະຫຍາຍພ້ອມກັນທົ່ວປະເທດໃນຫົວຂໍ້ “ການເດີນທາງທີ່ປອດໄພ - ປະສົບການທີ່ສົມບູນ” ໂດຍມີ 2 ເປົ້າໝາຍພື້ນຖານຄື: ເພື່ອຟື້ນຟູການທ່ອງທ່ຽວຕາມເສັ້ນທາງ ຈາກຕະຫຼາດພາຍໃນແຂວງ, ໃນເຂດ ເຖິງຕະຫຼາດພາຍໃນປະເທດ, ປະກອບສ່ວນຟື້ນຟູຂະແໜງທ່ອງທ່ຽວເທື່ອລະກ້າວ ໃຫ້ສາມາດປັບຕົວໄດ້ຢ່າງປອດໄພ, ຍືດຫຍຸ່ນ ແລະ ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ, ຕອງສະໜອງຄວາມຕ້ອງການໄປທັດສະນະສຶກສາ, ທ່ອງທ່ຽວ, ພັກຜ່ອນຂອງປະຊາຊົນ; ແນະນຳ ແລະ ໂຄສະນາບັນດາແຫຼ່ງທ່ອງທ່ຽວ, ຜະລິດຕະພັນ ແລະ ປະສົບການທີ່ຫຼາກຫຼາຍແລະດຶງດູດ, ຮັບປະກັນຄວາມປອດໄພໃນການປ້ອງກັນ ແລະ ຄວບຄຸມການແຜ່ງລະບາດຂອງພະຍາດ, ຟື້ນຟູຄວາມເຊື່ອໝັ້ນຂອງຕະຫຼາດໃນການທ່ອງທ່ຽວພາຍໃນປະເທດທີ່ປອດໄພ. ໂຄງການສຸມໃສ່ 2 ການເຄື່ອນໄຫວຕົ້ນຕໍ່: ແນະນຳການຕ້ອນຮັບ ແລະ ຮັບໃຊ້ນັກທ່ອງທ່ຽວຢ່າງປອດໄພ (ສຳລັບສະຖານທີ່ທ່ອງທ່ຽວ, ໜ່ວຍທຸລະກິດການທ່ອງທ່ຽວ ແລະ ນັກທ່ອງທ່ຽວ, ນັກທ່ອງທ່ຽວໃຊ້ບໍລິການທ່ອງທ່ຽວ) ແລະ ຈັດການສື່ສານ ສົ່ງເສີມ ແລະ ເປີດການທ່ອງທ່ຽວພາຍໃນປະເທດອີກຄັ້ງ. ກົມໃຫຍ່ການທ່ອງທ່ຽວຈັດຕັ້ງການເຄື່ອນໄຫວເຊື່ອມຕໍ່ບັນດາສະຖານທີ່ທ່ອງທ່ຽວ, ສະມາຄົມທ່ອງທ່ຽວ, ວິສາຫະກິດ ແລະ ສາຍການບິນ ເພື່ອພັດທະນາໂຄງການທ່ອງທ່ຽວລວມ ທີ່ມີຄຸນນະພາບແລະແຮງຈູງໃຈ ແນໃສ່ກະຕຸກຊຸກຍູ້ການທ່ອງທ່ຽວ. ບັນດາທ້ອງຖິ່ນສ້າງເງື່ອນໄຂສະດວກ ແລະ ມີນະໂຍບາຍຊ່ວຍໜູນວິສາຫະກິດ, ເປັນຕົ້ນແມ່ນ ຍົກເວັ້ນແລະຫຼຸດຄ່າທຳນຽມ ແລະ ຄ່າເຂົ້າຊົມໃນສະຖານທີ່ທ່ອງທ່ຽວທີ່ຄຸ້ມຄອງໂດຍທ້ອງຖິ່ນ.
ທີສາມ, ທົດລອງການເປີດປະຕູຕະຫຼາດສາກົນເທື່ອລະກ້າວ.
ປະຕິບັດການຊີ້ນຳຂອງນາຍົກລັດຖະມົນຕີໃນຈົດໝາຍທາງການ ສະບັບເລກທີ 8044/VPCP-KGVX, ລົງວັນທີ 2 ພະຈິກ 2021, “ກ່ຽວກັບຄໍາແນະນໍາການທົດລອງຊົ່ວຄາວໃນການຕ້ອນຮັບນັກທ່ອງທ່ຽວສາກົນມາຫວຽດນາມ”, ກົມໃຫຍ່ການທ່ອງທ່ຽວກໍ່ໄດ້ແນະນຳໃຫ້ກະຊວງວັດທະນະທຳ, ກິລາ ແລະ ການທ່ອງທ່ຽວ ອອກຄຳແນະນຳເລກທີ 4122/HD-BVHTTDL, ລົງວັນທີ 5 ພະຈິກ 2021, “ຄໍາແນະນໍາການທົດລອງຊົ່ວຄາວໃນການຕ້ອນຮັບນັກທ່ອງທ່ຽວສາກົນມາຫວຽດນາມ”. ເສັ້ນທາງທົດລອງຕ້ອນຮັບນັກທ່ອງທ່ຽວສາກົນມາຫວຽດນາມ ເປັນ 3 ໄລຍະ, ໃນນັ້ນໄລຍະທົດລອງທີ 1 ຈະເປີດໂຄງການຕ້ອນຮັບນັກທ່ອງທ່ຽວຕ່າງຊາດສູ່ເກາະຝູກວັກ (ແຂວງ ກຽນຢາງ), ແຂງຮ່ວາ, ກວ໋າງນາມ, ດາໜັງ, ກວ໋າງນິນ ໂດຍຜ່ານທ່ຽວບິນເຊົ່າເໝົາລຳ ພາຍໃຕ້ໂຄງການທ່ອງທ່ຽວແບບແພ໊ກເກດ ໃນພື້ນທີ່ທີ່ກຳນົດ ແລະ ສະຖານບໍລິການທ່ອງທ່ຽວ. ປີ 2021, ຂະແໜງການທ່ອງທ່ຽວຕ້ອນຮັບນັກທ່ອງທ່ຽວປະມານ 3.500 ຄົນ, ຮອດເດືອນມັງກອນ 2022, ສືບຕໍ່ຕ້ອນຮັບນັກທ່ອງທ່ຽວຈາກ ສ.ເກົາຫຼີ, ລັດເຊຍ, ອູເຊີເບກີສະຖານ, ກາຊັກສະຖານ, ໄທ ແລະ ອີນເດຍ.
ທີສີ່, ເພີ່ມທະວີການເຄື່ອນໄຫວສື່ສານ ສົ່ງເສີມການທ່ອງທ່ຽວ, ນຳໃຊ້ເຕັກໂນໂລຊີຂໍ້ມູນຂ່າວສານໃນການທ່ອງທ່ຽວ.
ຜັນຂະຫຍາຍບັ້ນໂຄສະນາສື່ສານເພື່ອເລີ່ມຕົ້ນການທ່ອງທ່ຽວພາຍໃນປະເທດ “ການທ່ອງທ່ຽວທີ່ປອດໄພແລະໜ້າສົນໃຈ”. ປະສານງານຈັດຕັ້ງການເຄື່ອນໄຫວ, ຊຸກຍູ້ຄວາມຕ້ອງການຂອງຕະຫຼາດ, ງານຕະຫຼາດນັດທ່ອງທ່ຽວ, ການສຳມະນາແນະນຳສະຖານທີ່ທ່ອງທ່ຽວ, ເຊື່ອມຕໍ່ວິສາຫະກິດ ປະສານງານຢ່າງໄຫວພິບລະຫວ່າງຮູບການໂດຍກົງ ແລະອອນໄລນ໌, ໂຄງການສຳຫຼວດປາຍທາງ ແລະ ຜະລິດຕະພັນ. ຜັນຂະຫຍາຍການສື່ສານຕໍ່ແຂກສາກົນ ດ້ວຍຂະບວນການໂຄສະນາ “Live fully in Vietnam” (ດຳລົງຊີວິດຢ່າງຄົບຖ້ວນຢູ່ຫວຽດນາມ) ໃນຊ່ອງທາງສື່ມວນຊົນອອນໄລນ໌໌ຂອງກົມໃຫຍ່ການທ່ອງທ່ຽວ, ເຊັ່ນ ເວັບໄຊທ໌ vietnam.travel, ບັນດາເວັບໄຊທ໌ເຄືອຂ່າຍສັງຄົມ Facebook, Instagram, Pinterest...
ທີຫ້າ, ສ້າງຄວາມຫຼາກຫຼາຍຂອງຜະລິດຕະພັນທ່ອງທ່ຽວ ເພື່ອຕອບສະໜອງທ່າອ່ຽງການຕະຫຼາດໃໝ່.
ວາງແຜນກຳນົດລະບົບການທ່ອງທ່ຽວຫວຽດນາມໄລຍະ 2021-2030, ວິໄສທັດເຖິງປີ 2045. ພັດທະນາບັນດາຜະລິດຕະພັນທ່ອງທ່ຽວໃໝ່, ເຮັດໃໝ່ບັນດາຜະລິດຕະພັນທ່ອງທ່ຽວທີ່ມີຢູ່ເໝາະສົມກັບຄວາມຕ້ອງການທີ່ໄດ້ປ່ຽນແປງຍ້ອນຜົນກະທົບຂອງການແຜ່ລະບາດຂອງໂຄວິດ-19; ພັດທະນາບັນດາຮູບແບບ, ການເຄື່ອນໄຫວເສດຖະກິດກາງຄືນ, ປະກອບສ່ວນເພີ່ມການໃຊ້ຈ່າຍ, ຍົກສູງປະສິດທິຜົນຂອງກິດຈະກຳການທ່ອງທ່ຽວ. ບັນດາທ້ອງຖິ່ນກຳນົດການລົງທຶນ, ພັດທະນາຜະລິດຕະພັນທ່ອງທ່ຽວຕາມຫົວຂໍ້, ບົນພື້ນຖານທ່າແຮງ ແລະ ຄວາມສາມາດບົ່ມຊ້ອນທີ່ມີຢູ່, ມີຄວາມແປກຕ່າງ, ສ້າງເປັນເຄືອຂ່າຍບັນດາຜະລິດຕະພັນແບບຫຼາຍຮູບຫຼາຍສີ, ຊ່ວຍເຫຼືອເຊິ່ງກັນແລະກັນ.
ທີຫົກ, ຍູ້ແຮງຂະບວນການຫັນເປັນດິຈີຕອນໃນຂະແໜງການທ່ອງທ່ຽວ.
ກໍ່ສ້າງແຜນການພັດທະນາການທ່ອງທ່ຽວດິຈີຕອນໄລຍະ 2021-2025. ໝູນໃຊ້ເຕັກໂນໂລຊີຂໍ້ມູນຂ່າວສານ, ປະຕິບັດການຫັນເປັນດິຈິຕອນທາງຂໍ້ມູນ ເພື່ອຮັບໃຊ້ການຄຸ້ມຄອງສະຖານທີ່ພັກ, ອົງການທ່ອງທ່ຽວ, ຄົນນຳທ່ຽວ, ແຫຼ່ງທ່ອງທ່ຽວ, ສະຖານທີ່ບໍລິການທ່ອງທ່ຽວ; ຖານຂໍ້ມູນການຄົ້ນຄວ້າຕະຫຼາດ, ໂຄສະນາ ແລະ ສົ່ງເສີມການທ່ອງທ່ຽວ. ກໍ່ສ້າງພື້ນຖານການເຊື່ອມຕໍ່ເພື່ອໜູນຊ່ວຍທຸລະກິດການທ່ອງທ່ຽວ, ຄ່ອຍໆຕັ້ງເປັນເວທີທຸລະກິດເອເລັກໂຕຣນິກ ເພື່ອບໍລິການການທ່ອງທ່ຽວຂອງປະເທດ.
ທີເຈັດ, ຊ່ວຍເຫຼືອວິສາຫະກິດຍູ້ແຮງຂະບວນວິວັດການຟື້ນຟູ ແລະ ປັບໂຄງສ້າງວິສາຫະກິດການທ່ອງທ່ຽວ.
ຕິດຕາມ, ສັງລວມ, ທົບທວນ, ສະເໜີ, ສະເໜີແນະ ການຜັນຂະຫຍາຍບັນດານະໂຍບາຍທີ່ປະກາດໃຊ້ໂດຍລັດຖະບານ, ບັນດາກະຊວງ ເພື່ອສະໜັບສະໜູນ ຊ່ວຍເຫຼືອການທ່ອງທ່ຽວ. ແນະນຳການປະຕິບັດບັນດານະໂຍບາຍຊ່ວຍເຫຼືອຕໍ່ວິສາຫະກິດ ແລະ ຜູ້ອອກແຮງງານໃນຂະບວນການຟື້ນຟູ ແລະ ກະຕຸກຊຸກຍູ້ການທ່ອງທ່ຽວ. ຊ່ວຍເຫຼືອກຳນົດທິດໃຫ້ຕະຫຼາດ, ກຳນົດທິດຜະລິດຕະພັນ ກໍ່ຄືຊ່ວຍເຫຼືອຊຸກຍູ້ ແລະ ໂຄງສະນາແຫຼ່ງທ່ອງທ່ຽວ.
ທີ່ແປດ, ຊ່ວຍເຫຼືອພັດທະນາແຫຼ່ງບຸກຄະລາກອນຕາມໂຄງປະກອບທີ່ເໝາະສົມ, ຕອບສະໜອງຄວາມຮຽກຮ້ອງຕ້ອງການຟື້ນຟູການທ່ອງທ່ຽວ, ປັບໂຄງສ້າງຊັບພະຍາກອນເພື່ອພັດທະນາການທ່ອງທ່ຽວ.
ການພັດທະນາແຫຼ່ງບຸກຄະລາກອນການທ່ອງທ່ຽວມີບົດບາດສຳຄັນ ໃນການຟື້ນຟູໃນໄລຍະສັ້ນ; ຮັບໃຊ້ການພັດທະນາການທ່ອງທ່ຽວແບບຍືນຍົງ ແລະ ຍົກສູງຄວາມສາມາດແຂ່ງຂັນໃນໄລຍະຍາວ. ກໍ່ສ້າງແຜນການ, ລົງທຶນ, ຕີລາຄາຄືນໃໝ່ ແຫຼ່ງບຸກຄະລາກອນທ່ອງທ່ຽວ. ລົງທຶນໃນການຝຶກອົບຮົມ ແລະ ບຳລຸງສ້າງພະນັກງານອາຊີບການທ່ອງທ່ຽວ ເພື່ອຮັບໃຊ້ທຸລະກິດໂຮງແຮມ, ສະຖານທີ່ທ່ອງທ່ຽວ, ຄົນນຳທ່ຽວ, ສົ່ງເສີມການທ່ອງທ່ຽວ.
ຄໍາແນະນໍາ ຂໍ້ສະເໜີແນະບາງປະການ
ເພື່ອຟື້ນຟູຂະແໜງການທ່ອງທ່ຽວໃນສະຖານະການໃໝ່, ຊ່ວຍເຫຼືອວິສາຫະກິດທ່ອງທ່ຽວ ແລະ ຜູ້ແຮງງານໃນຂະແໜງການທ່ອງທ່ຽວຢ່າງທັນເວລາ ເພື່ອຜ່ານຜ່າຄວາມຫຍຸ້ງຍາກຍ້ອນຜົນກະທົບຂອງການແຜ່ລະບາດຂອງວິດ-19 ແລະ ກະກຽມເງື່ອນໄຂເພື່ອກະຕຸກຊຸກຍູ້ການທ່ອງທ່ຽວໃນເວລາຕໍ່ໄປ; ເພື່ອເປົ້າໝາຍປີ 2022 ຫວຽດນາມຈະຕ້ອນຮັບນັກທ່ອງທ່ຽວໄດ້ 65 ລ້ານຄົນ, ໃນນັ້ນມີນັກທ່ອງທ່ຽວຕ່າງປະເທດປະມານ 5 ລ້ານຄົນ, ມີນັກທ່ອງທ່ຽວພາຍໃນປະເທດປະມານ 60 ລ້ານຄົນ, ຍອດລາຍຮັບຈາກນັກທ່ອງທ່ຽວບັນລຸໄດ້ 400.000 ຕື້ດົ່ງ, ຈຳເປັນຕ້ອງປະຕິບັດນະໂຍບາຍຈຳນວນໜຶ່ງດັ່ງຕໍ່ໄປນີ້:
ທີໜຶ່ງ, ການຟື້ນຟູ, ພັດທະນາການທ່ອງທ່ຽວຕ້ອງໄດ້ກຳນົດວ່າເປັນໜຶ່ງໃນບັນດາເນື້ອໃນຈຸດໜັກໃຈກາງຂອງໂຄງການຟື້ນຟູ ແລະ ພັດທະນາເສດຖະກິດ-ສັງຄົມໃນປີ 2022 ແລະ 2023. ຈັດຕັ້ງຜັນຂະຫຍາຍໂຄງການຟື້ນຟູ ພັດທະນາການທ່ອງທ່ຽວຢ່າງຄົບຊຸດ, ເດັດຂາດ ແລະ ມີປະສິດທິຜົນ, ປະກອບສ່ວນເຂົ້າໃນການປະຕິບັດເປົ້າໝາຍທີ່ລະບຸໃນໂຄງການຟື້ນຟູ ພັດທະນາເສດຖະກິດ-ສັງຄົມ. ເປີດບໍລິການທ່ອງທ່ຽວພາຍໃນ ແລະ ຕ່າງປະເທດຄືນໃໝ່ຢ່າງມີປະສິດທິຜົນ ແລະ ປອດໄພແຕ່ວັນທີ 15 ມີນາ 2022 ໃນສະພາບການປົກກະຕິໃໝ່ ທັງທາງອາກາດ, ທາງບົກ ແລະ ທາງທະເລ ເພື່ອຮັບປະກັນຄວາມປອດໄພ ແລະ ຄົບຊຸດ ກັບການຜັນຂະຫຍາຍໂຄງການຟື້ນຟູ ແລະ ພັດທະນາເສດຖະກິດ-ສັງຄົມຂອງລັດຖະບານ. ອີງໃສ່ສະພາບການ, ຜົນການປ້ອງກັນແລະຄວບຄຸມການແຜ່ລະບາດຂອງໂຄວິດ-19 ແລະ ການປະເມີນຜົນການຕ້ອນຮັບນັກທ່ອງທ່ຽວສາກົນໃນໄລຍະປົກກະຕິແບບໃໝ່ ເພື່ອເປີດການເຄື່ອນໄຫວທ່ອງທ່ຽວພາຍໃນ ແລະ ຕ່າງປະເທດຢ່າງເຕັມສ່ວນ. ຈັດຕັ້ງໂຄງການສົ່ງເສີມການທ່ອງທ່ຽວພາຍໃນປະເທດຢ່າງທົ່ວເຖິງ ເພື່ອປັບຕົວຢ່າງປອດໄພ, ຍືດຫຍຸ່ນ ແລະ ຄວບຄຸມການແຜ່ລະບາດຂອງໂຄວິດ-19 ໄດ້ຢ່າງມີປະສິດທິຜົນ ໃນຈົດໝາຍທາງການເລກທີ 4698/BVHTTDL-TCDL, ລົງວັນທີ 16 ທັນວາ 2021, ຂອງກະຊວງວັດທະນະທຳ, ກິລາ ແລະ ການທ່ອງທ່ຽວ. ຊາຍຊຶມບົດແນະນຳເລກທີ 3862/HD-BVHTTDL ລົງວັນທີ 18 ຕຸລາ 2021, ຂອງກະຊວງວັດທະນະທຳ, ກິລາ ແລະ ການທ່ອງທ່ຽວ ທີ່ປະຕິບັດມະຕິເລກທີ 128/NQ-CP, ລົງວັນທີ 11 ຕຸລາ 2021, ຂອງລັດຖະບານປະກາດໃຊ້ຂໍ້ກຳນົດຊົ່ວຄາວກ່ຽວກັບ “ການປັບຕົວໄດ້ຢ່າງປອດໄພ, ຍືດຫຍຸ່ນ, ຄວບຄຸມການລະບາດຂອງໂຄຍິດ-19 ຢ່າງມີປະສິດທິຜົນ” ໃນການເຄື່ອນໄຫວວັດທະນະທຳ, ກິລາ ແລະ ການທ່ອງທ່ຽວ. ບັນດາທ້ອງຖິ່ນປະກາດການເປີດປະຕູການທ່ອງທ່ຽວ, ຕ້ອບຮັບ ແລະ ຮັບໃຊ້ນັກທ່ອງທ່ຽວ ຕາມແຕ່ລະລະດັບການແຜ່ລະບາດຂອງພະຍາດໃນຂອບເຂດ ເຊິ່ງຕິດກັບບັນດາມາດຕະການຮັບປະກັນຄວາມປອດໄພທີ່ເໝາະກັບການແຜ່ລະບາດຂອງພະຍາດ.
ທີສອງ, ໜ້າທີ່ ມາດຕະການຟື້ນຟູ, ພັດທະນາການທ່ອງທ່ຽວຕ້ອງໄດ້ຮັບການສ້າງພື້ນຖານກົດໝາຍ ແລະ ຈັດສັນແຫຼ່ງພະລັງຢ່າງພຽງພໍ ເພື່ອການຜັນຂະຫຍາຍ. ຕ້ອງປະກາດໃຊ້ບັນດານະໂຍບາຍສ້າງຄວາມສະດວກໃຫ້ແກ່ການທ່ອງທ່ຽວ, ເຊັ່ນ ຕັ້ງຫ້ອງການຜູ້ຕາງໜ້າການທ່ອງທ່ຽວຫວຽດນາມຢູ່ຕ່າງປະເທດ, ດຳເນີນການຫັນປ່ຽນດິຈີຕອນໃນການທ່ອງທ່ຽວ, ຊຸກຍູ້ການໂຄສະນາ ຂຸດຄົ້ນຕະຫຼາດ, ພັດທະນາຜະລິດຕະພັນການທ່ອງທ່ຽວ, ດຶງດູດນັກທ່ອງທ່ຽວສາກົນມາທ່ອງທ່ຽວຫວຽດນາມ, ຍູ້ແຮງການທ່ອງທ່ຽວພາຍໃນປະເທດ, ກະຕຸກຊຸກຍູ້ການໃຊ້ຈ່າຍຂອງນັກທ່ອງທ່ຽວ ເພື່ອປະກອບສ່ວນເພີ່ມອັດຕາສ່ວນຂອງຂະແໜງການທ່ອງທ່ຽວໃນຂົງເຂດບໍລິການ, ຊຸກຍູ້ໃຫ້ການທ່ອງທ່ຽວຫວຽດນາມພັດທະນາການເປັນຂະແໜງການເສດຖະກິດຫົວຫອກ.
ທີສາມ, ບັນດາກະຊວງ, ຂະແໜງການສືບຕໍ່ຄົ້ນຄວ້າ, ສະເໜີ, ປະກາດໃຊ້ຕາມສິດອຳນາດຂອງຕົນ ບັນດານະໂຍບາຍງົບປະມານ, ນະໂຍບາຍເງິນຕາ, ນະໂຍບາຍສະຫວັດດິການສັງຄົມ ແລະນະໂຍບາຍອື່ນໆ ເພື່ອຊ່ວຍເຫຼືອວິສາຫະກິດທ່ອງທ່ຽວ ແລະ ຜູ້ອອກແຮງງານໃນຂະແໜງການທ່ອງທ່ຽວ ທີ່ໄດ້ຮັບຜົນກະທົບຈາກການແຜ່ລະບາດຂອງໂຄວິດ-19. ບາງນະໂຍບາຍທີ່ແນະນຳໃຫ້ສືບຕໍ່ສະໜັບສະໜູນມີດັ່ງນີ້:
- ຂະຫຍາຍໄລຍະເວລານຳໃຊ້ນະໂຍບາຍພາສີ, ຄ່າທຳນຽມ, ເປີດກວ້າງເງື່ອນໄຂທີ່ໄດ້ຮັບການຊ່ວຍເຫຼືອຈາກນະໂຍບາຍສະຫວັດດິການສັງຄົມ: ຂະຫຍາຍນະໂຍບາຍຫຼຸດພາສີມູນຄ່າເພີ່ມ ສຳລັບບັນດາການບໍລິການທີ່ຂຶ້ນກັບຂົງເຂດທ່ອງທ່ຽວ; ນະໂຍບາຍຫຼຸດພາສີລາຍໄດ້ວິສາຫະກິດ; ນະໂຍບາຍຂະຫຼາຍເວລາຊຳລະພາສີມູນຄ່າເພີ່ມ, ພາສີລາຍໄດ້ວິສາຫະກິດ, ພາສີລາຍໄດ້ບຸກຄົນ ແລະ ເງິນເຊົ່າທີ່ດິນ ຈົນຮອດທ້າຍປີ 2023. ເລື່ອນການຊຳລະຄ່າທຳນຽມສະຫະພັນແຮງງານເປັນເວລາ 6 ເດືອນ ສຳລັບວິສາຫະກິດທີ່ມີຈຳນວນແຮງງານທີ່ເຂົ້າຮ່ວມປະກັນໄພສັງຄົມຫຼຸດລົງ 15% ຫຼືຫຼາຍກວ່າເມື່ອທຽບກັບເດືອນມັງກອນ 2020 ໂດຍບໍ່ຖືກເອີ້ນເກັບດອກເບ້ຍ ແລະ ຄ່າປັດ ສຳລັບການຊຳລະຊ້າ ຫຼືຊຳລະເປັນເວລານານ ໄລຍະເວລານຳໃຊ້ເຖິງທ້າຍປີ 2023; ຫຼຸດ 50% ຄ່າທຳນຽມໃບອານຸຍາດປະກອບທຸລະກິດນຳທ່ຽວ ແລະ ການອອກບັດຜູ້ນຳທ່ຽວຈົນເຖິງທ້າຍປີ 2023; ຫຼຸດລາຄາໄຟຟ້າທີ່ໃຊ້ກັບສະຖານປະກອບການທີ່ພັກນັກທ່ອງທ່ຽວ ເທົ່າກັບລາຄາໄຟຟ້າທີ່ຜະລິດໄດ້. ປະຕິບັດຂໍ້ຕົກລົງເລກທີ 33/2021/QĐ-TTg, ລົງວັນທີ 6 ພະຈິກ 2021, ຂອງລັດຖະບານ, “ປົວແປງ, ປັບປຸງບາງມາດຕາຂອງຂໍ້ຕົກລົງເລກທີ 23/2021/QĐ-TTg, ລົງວັນທີ 7 ກໍລະກົດ 2021, ຂອງລັດຖະບານກຳນົດກ່ຽວກັບການປະຕິບັດບາງນະໂຍບາຍຊ່ວຍເຫຼືອຜູ້ອອກແຮງງານ ແລະ ຄົນນຳໃຊ້ແຮງງານ ທີ່ພົບຄວາມຫຍຸ້ງຍາກຍ້ອນການແຜ່ລະບາດຂອງໂຄວິດ-19”.
- ສະເໜີການປະກາດໃຊ້ບັນດານະໂຍບາຍຊ່ວຍເຫຼືອເພີ່ມເຕີມ. 1- ອະນຸຍາດໃຫ້ຫຼຸດພາສີລາຍໄດ້ບຸກຄົນ 50% ໃນປີ 2022 ແລະ 2023 ສໍາລັບຂົງເຂດ: ການບໍລິການຂົນສົ່ງ, ບໍລິການທີ່ພັກນັກທ່ອງທ່ຽວ, ບໍລິການກິນດື່ມ, ບໍລິການຂອງຕົວແທນທ່ອງທ່ຽວ, ທຸລະກິດການທ່ອງທ່ຽວ ແລະ ບໍລິການສະໜັບສະໜູນທີ່ກ່ຽວຂ້ອງກັບການສົ່ງເສີມ ແລະ ຈັດຕັ້ງການທ່ອງທ່ຽວ; 2- ອະນຸຍາດໃຫ້ບັນດາວິສາຫະກິດດຳເນີນທຸລະກິດດ້ານການຂົນສົ່ງ; ການບໍລິການທີ່ພັກນັກທ່ອງທ່ຽວ; ບໍລິການກິນດື່ມ; ບໍລິການຂອງຕົວແທນທ່ອງທ່ຽວ, ທຸລະກິດການທ່ອງທ່ຽວ ແລະ ບໍລິການສະໜັບສະໜູນທີ່ກ່ຽວຂ້ອງກັບການສົ່ງເສີມ ແລະ ຈັດຕັ້ງການທ່ອງທ່ຽວ ຈະໄດ້ກູ້ຢືມເງິນດ້ວຍອັດຕາດອກເບ້ຍຕ່ຳ ແລະ ເງື່ອນໄຂການກູ້ຢືມງ່າຍໆ: ຄ້ຳປະກັນ ຫຼື ຈໍານອງໂດຍກະແສເງິນສົດຈາກທຸລະກິດ, ອັດຕາດອກເບ້ຍເງິນກູ້ 3% ຕໍ່ປີ, ໄລຍະເວລາກູ້ຢືມ 30 ເດືອນ, ໃນນັ້ນ ໄລຍະຜ່ອນຜັນ 3 ເດືອນຕົ້ນຍັງບໍ່ທັນໄດ້ຊຳລະດອກເບ້ຍ ແລະ ເງິນຕົ້ນ; 3- ໃຊ້ຄ່າທຳສະຫະພັນແຮງງານ 1% ຂອງກອງທຶນເງິນເດືອນຂອງວິສາຫະກິດທ່ອງທ່ຽວໃນປີ 2022 ແລະ 2023; 4- ບັນດາທ້ອງຖິ່ນພິຈາລະນາມີນະໂຍບາຍໃຫ້ເຂົ້າຊົມສະຖານທີ່ທ່ອງທ່ຽວໂດຍບໍ່ເສຍຄ່າຈົນເຖິງທ້າຍປີ 2022 ຊ່ວຍໃຫ້ວິສາຫະກິດຫຼຸດຕົ້ນທຶນການທ່ອງທ່ຽວ ແລະ ກະຕຸກຊຸກຍູ້ການທ່ອງທ່ຽວ ແລະ ການເດີນທາງ.
ໃນປີ 2020 ແລະ 2021, ເຖິງວ່າຈະຖືກຜົນກະທົບຢ່າງໜັກໜ່ວງຈາກການແຜ່ລະບາດຂອງໂຄວິດ-19 ກໍ່ຕາມ, ແຕ່ການທ່ອງທ່ຽວຫວຽດນາມ ຍັງໄດ້ຮັບລາງວັນອັນມີກຽດສະຫງ່າລະດັບສາກົນຫຼາຍຢ່າງ, ເຊັ່ນ ຫວຽດນາມແມ່ນຈຸດໝາຍປາຍທາງວັດທະນະທຳ, ຈຸດໝາຍປາຍທາງແຫ່ງມໍລະດົກ, ຈຸດໝາຍປາຍທາງອາຫານຊັ້ນນໍາຂອງອາຊີ, ຈຸດໝາຍ ກອລ໌ຟ ທີ່ດີທີ່ສຸດຂອງອາຊີ. ກົມໃຫຍ່ການທ່ອງທ່ຽວຫວຽດນາມ ໄດ້ຮັບການຄັດເລືອກເປັນອົງການຄຸ້ມຄອງການທ່ອງທ່ຽວຊັ້ນນໍາຂອງອາຊີ (ລາງວັນທີ່ຄັດເລືອກໂດຍ World Travel Award). ຫວຽດນາມຍັງຢູ່ໃນອັນດັບທີ 16 ໂດຍວາລະສານ Travel & Leisure ຂອງສະຫະລັດອາເມຣີກາ ຈັດໃນລາຍຊື່ ຈຸດໝາຍປາຍທາງ 20 ແຫ່ງ ສຳລັບການທ່ອງທ່ຽວສ່ວນຕົວໃນປີ 2021; CNN Travel ໄດ້ເລືອກຫວຽດນາມໃຫ້ຢູ່ໃນອັນດັບທີ 13 ໃນບັນດາຈຸດໝາຍປາຍທາງທີ່ດີທີ່ສຸດ 21 ແຫ່ງໃນປີ 2021 ໂດຍອີງຕາມການປະເມີນການຄວບຄຸມການແຜ່ລະບາດຂອງໂຄວິດ-19 ທີ່ດີ. ດັ່ງນັ້ນ, ພວກເຮົາສາມາດໄວ້ເນື້ອເຊື່ອໃຈຢ່າງເຕັມທີ່ ໃນການຊີ້ນໍາ ນໍາພາຂອງພັກກອມມູນິດຫວຽດນາມ, ລັດຖະບານ, ການປະສານສົມທົບຢ່າງເຂົ້າແກັບເຂົ້າເກຍຂອງບັນດາກະຊວງ, ຂະແໜງການ, ທ້ອງຖິ່ນ, ພິເສດແມ່ນຄວາມມານະພະຍາຍາມຈາກຝ່າຍປະຊາຄົມວິສາຫະກິດການທ່ອງທ່ຽວ, ຂະແໜງການທ່ອງທ່ຽວຫວຽດນາມ ຈະຟື້ນຕົວ ແລະ ໜ້າດຶງດູດໃຈຫຼາຍຂຶ້ນ, ມີຄວາມເປັນມືອາຊີບແລະຍືນຍົງ, ກາຍເປັນຂະແໜງການປເສດຖະກິດຫົວຫອກຢ່າງແທ້ຈິງ, ເພື່ອປະກອບສ່ວນເຂົ້າໃນການຊຸກຍູ້ການຟື້ນຟູ ແລະ ພັດທະນາເສດຖະກິດ-ສັງຄົມຂອງປະເທດ./.
-------------------
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 988 (ເດືອນເມສາ 2022)
