ເປັນເວລາທີ່ເໝາະສົມ
ເພື່ອໃຫ້ຫວຽດນາມອອກພັນທະບັດລັດຖະບານໃນຕະຫຼາດທຶນສາກົນ
ເພື່ອໃຫ້ຫວຽດນາມອອກພັນທະບັດລັດຖະບານໃນຕະຫຼາດທຶນສາກົນ
ຕະຫຼາດຫຼັກຊັບຮ່າໂນ້ຍ (HNX) ເພີ່ມທະວີການປະມູນຂາຍພັນທະບັດລັດຖະບານ _ພາບ: TTXVN
ຄວາມຮຽກຮ້ອງຕ້ອງການທີ່ວາງອອກມາ ສຳລັບວຽກງານການລະດົມທຶນເພື່ອການພັດທະນາ
ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມໄດ້ກຳນົດເປົ້າໝາຍຍຸດທະສາດຄື ສູ້ຊົນເຖິງປີ 2030, ຫວຽດນາມເປັນປະເທດ ກຳລັງພັດທະນາທີ່ມີອຸດສາຫະກຳທັນສະໄໝ, ມີລາຍໄດ້ປານກາງສູງ ແລະ ຮອດປີ 2045 ກາຍເປັນປະເທດພັດທະນາແລ້ວ ແລະ ມີລາຍໄດ້ສູງ. ເພື່ອບັນລຸເປົ້າໝາຍເຫຼົ່ານີ້, ຫວຽດນາມໄດ້ວາງການບຸກທະລຸຍຸດທະສາດສາມດ້ານ: ການປັບປຸງບູລະນະ ແລະ ຍົກສູງຄຸນນະພາບຂອງລະບອບລະບຽບ; ການພັດທະນາຊັບພະຍາກອນມະນຸດຢ່າງຮອບດ້ານ; ການປັບປຸງໂຄງສ້າງພື້ນຖານດ້ານເສດຖະກິດແລະສັງຄົມ ທີ່ຄົບຊຸດແລະທັນສະໄໝ ແລະ ກຳນົດສິບໜ້າທີ່, ວິທີແກ້ໄຂຈຸດສູມ. ດ້ວຍຂະໜາດຂອງພື້ນຖານເສດຖະກິດທ້າຍປີ 2020 ທີ່ບັນລຸ 343,6 ຕື້ໂດລາສະຫະລັດ ແລະ ຄາດໝາຍການເຕີບໂຕລວມຍອດຜະລິດຕະພັນພາຍໃນ (ຈີດີພີ) ສະເລ່ຍປະມານ 7% ຕໍ່ປີ, ການລົງທຶນສັງຄົມທັງໝົດໂດຍສະເລ່ຍແມ່ນແຕ່ 33% ຫາ 35%, ດັ່ງນັ້ນ ຄວາມຕ້ອງການເງິນທຶນເພື່ອການພັດທະນາເສດຖະກິດ-ສັງຄົມແມ່ນຫຼາຍທີ່ສຸດ (ຄາດວ່າຈະຕ້ອງໃຊ້ເງິນປະມານ 1.676 ຕື້ໂດລາສະຫະລັດ ເຖິງ 1.778 ຕື້ໂດລາສະຫະລັດໃນໄລຍະ 2021-2030). ການພັດທະນາໂຄງສ້າງພື້ນຖານທີ່ສຳຄັນທາງດ້ານຄົມມະນາຄົມ, ສ້າງຕາໜ່າງເສັ້ນທາງແຫ່ງຊາດໄລຍະ 2021-2030 ຄາດວ່າຈະຕ້ອງໃຊ້ເງິນປະມານ 900 ຕື້ດົ່ງ(1). ກ່ຽວກັບການພັດທະນາໂຄງສ້າງພື້ນຖານດ້ານພະລັງງານ, ແຜນການໄຟຟ້າແຫ່ງຊາດໄລຍະ 2021-2030 ຄາດວ່າຈະຕ້ອງໃຊ້ເງິນປະມານ 13 ຕື້ໂດລາສະຫະລັດຕໍ່ປີ. ຫວຽດນາມຍັງຕ້ອງລົງທຶນປະມານ 3,5 ຕື້ໂດລາສະຫະລັດຕໍ່ປີ ເຂົ້າໃນໂຄງສ້າງພື້ນຖານ ເພື່ອຕອບສະໜອງການປ່ຽນແປງຂອງດິນຟ້າອາກາດ. ຄຽງຂ້າງນັ້ນ, ບາງຂະແໜງການອຸດສາຫະກຳປາຍຫອກ, ເຕັກໂນໂລຊີໃໝ່, ເຕັກໂນໂລຊີສູງທີ່ໄດ້ຮັບບຸລິມະສິດໃຫ້ພັດທະນາ ລ້ວນແຕ່ແມ່ນຂະແໜງການທີ່ໃຊ້ເງິນທຶນຈຳນວນຫຼາຍ.
ຖ້າຫາກພຽງແຕ່ອີງໃສ່ຕະຫຼາດການເງິນພາຍໃນປະເທດ ແລະ ແຫຼ່ງເງິນທຶນຈາກຕ່າງປະເທດເຊັ່ນ: ເງິນກູ້ພິເສດ, ເງິນທຶນຈາກການຊ່ວຍເຫຼືອເພື່ອການພັດທະນາຢ່າງເປັນທາງການ (ODA), ການລົງທຶນໂດຍກົງຈາກຕ່າງປະເທດ (FDI),... ເທົ່ານັ້ນ, ຄວາມສາມາດລະດົມເງິນທຶນໃນປະລິມານທີ່ພຽງພໍ ແລະ ຮັບປະກັນການພັດທະນາຢ່າງກົມກຽວ, ສະໝ່ຳສະເໝີ, ເປັນເຈົ້າການ ແລະ ພິເສດແມ່ນການຮັກສາສະຖຽນລະພາບດ້ານການເງິນຂອງປະເທດ ແມ່ນຍາກທີ່ຈະບັນລຸໄດ້. ທ້າຍປີ 2020, ຍອດສິນເຊື່ອຕໍ່ ຈີດີພີ ຂອງຫວຽດນາມ ບັນລຸກວ່າ 140%, ມູນຄ່າຫຼັກຊັບຕາມລາຄາຕະຫຼາດຕໍ່ ຈີດີພີ ຫຼາຍກວ່າ 84%, ສູງກວ່າປະເທດສ່ວນໃຫຍ່ທີ່ມີລາຍໄດ້ຄ້າຍຄືຫວຽດນາມ. ໃນຂະນະນັ້ນ, ເຖິງວ່າຕະຫຼາດພັນທະບັດມີການເຕີບໂຕຢ່າງບໍ່ຢຸດຢັ້ງເມື່ອທຽບໃສ່ເປົ້າໝາຍທີ່ຕັ້ງໄວ້, ແຕ່ເມື່ອທຽບໃສ່ບັນດາປະເທດທີ່ມີລະດັບລາຍໄດ້ເທົ່າກັບ, ພັນທະບັດລັດຖະບານຂອງຫວຽດນາມກວມອັດຕາສ່ວນຫຼາຍ (ປະມານ 80% ຂອງປະລິມານພັນທະບັດໃນທົ່ວປະເທດ). ດ້ວຍໂຄງສ້າງຕະຫຼາດການເງິນໃນປະຈຸບັນ, ຕະຫຼາດພັນທະບັດພາຍໃນປະເທດຈຳເປັນຕ້ອງເພີ່ມຊ່ອງຫວ່າງໃຫ້ແກ່ການເຕີບໂຕຂອງບັນດາວິສາຫະກິດທີ່ບໍ່ສາມາດລະດົມທຶນໃນຕະຫຼາດສາກົນໄດ້. ນອກຈາກນັ້ນ, ບັນດາວິສາຫະກິດທີ່ມີຊັບສິນຂະໜາດໃຫຍ່, ມີທ່າແຮງດ້ານການເງິນ ແລະ ກຽດສັກສີ ຈຳເປັນຕ້ອງເຂົ້າເຖິງແຫຼ່ງເງິນທຶນພາຍນອກ ເພື່ອບັນລຸເປົ້າໝາຍພັດທະນາເປັນກຸ່ມເສດຖະກິດ, ວິສາຫະກິດລະດັບສາກົນ. ການລະດົມເງິນທຶນຂອງລັດຖະບານຈາກການອອກພັນທະບັດໃນຕະຫຼາດຕ່າງປະເທດໄດ້ຫຼຸດຜ່ອນແຮງກົດດັນຕໍ່ຕະຫຼາດການເງິນໃນປະເທດ, ທັງສ້າງເກນມາດຕະຖານໃຫ້ວິສາຫະກິດໃນປະເທດອອກພັນທະບັດຢູ່ຕະຫຼາດສາກົນ.
ປະສົບການໃນການອອກພັນທະບັດລັດຖະບານໃນຕະຫຼາດທຶນສາກົນຂອງຫວຽດນາມ
ໂດຍໄດ້ຮັບອະນຸຍາດຈາກລັດຖະບານ, ກະຊວງການເງິນໄດ້ອອກພັນທະບັດສາກົນຂອງລັດຖະບານຫວຽດນາມ ໃນຕະຫຼາດພັນທະບັດໂລກຕາມວິທີ 144A/ມາດຕາ S ໃນປີ 2005, 2010 ແລະ 2014. ປະລິມານການອອກພັນທະບັດຂອງສາມງວດນັ້ນແມ່ນ 750 ລ້ານໂດລາສະຫະລັດ, 1.000 ລ້ານໂດລາສະຫະລັດ ແລະ 1.000 ລ້ານໂດລາສະຫະລັດ ຕາມລຳດັບ ໂດຍມີກຳນົດເວລາ 10 ປີຄືກັນ. ນອກຈາກຈຸດປະສົງລະດົມເງິນທຶນໃຫ້ແກ່ບັນດາໂຄງການລົງທຶນຂະໜາດໃຫຍ່ຂອງປະເທດແລ້ວ, ການອອກພັນທະບັດໃນປີ 2014 ຍັງມີໜ້າທີ່ແລກປ່ຽນພັນທະບັດທີ່ອອກໃນສອງງວດກ່ອນທີ່ກຳລັງຈະຄົບກຳນົດ. ອັດຕາດອກເບ້ຍທີ່ກຳນົດ ແລະ ດອກເບ້ຍການອອກພັນທະບັດແຕ່ລະຄັ້ງໄດ້ຫຼຸດລົງຈາກ 7,125% ເປັນ 6,75% ແລະ 4,8% ຕໍ່ປີ. ຜ່ານການອອກພັນທະບັດລັດຖະບານໃນຕະຫຼາດທຶນສາກົນສາມຄັ້ງ ທີ່ປະສົບຄວາມສຳເລັດ ຂອງລັດຖະບານຫວຽດນາມ, ສາມາດຖອດຖອນບາງຈຸດຕໍ່ໄປນີ້:
ທີໜຶ່ງ, ວຽກງານການອອກພັນທະບັດໄດ້ຢືນຢັນຄວາມຖືກຕ້ອງຂອງແຜນນະໂຍບາຍເຊື່ອມໂຍງເຂົ້າກັບສາກົນຂອງພັກ, ຄວາມສຳເລັດ ແລະ ສັກສີສາກົນຂອງລັດຖະບານ ໃນການປະຕິບັດນະໂຍບາຍເສດຖະກິດມະຫາພາກ.
ທີສອງ, ການອອກພັນທະບັດລັດຖະບານໃນຕະຫຼາດທຶນສາກົນ ໄດ້ລະດົມເງິນທຶນເພື່ອລົງທຶນພັດທະນາເສດຖະກິດພາຍໃນປະເທດ, ປະກອບສ່ວນຫຼຸດຜ່ອນແຮງກົດດັນຕໍ່ການລະດົມເງິນທຶນຢູ້ຕະຫຼາດພາຍໃນປະເທດ.
ທີສາມ, ວຽກງານການອອກພັນທະບັດລັດຖະບານໃນຕະຫຼາດທຶນສາກົນສ້າງເກນມາດຕະຖານ ເພື່ອໃຊ້ເປັນພື້ນຖານໃນການກຳນົດລາຄາພັນທະບັດສຳລັບການອອກພັນທະບັດຄັ້ງຕໍ່ໄປ ພ້ອມທັງເປີດໂອກາດໃຫ້ວິສາຫະກິດຂະໜາດໃຫຍ່ຂອງປະເທດສາມາດລະດົມທຶນໂດຍກົງເປັນເງິນຕາຕ່າງປະເທດຢູ່ຕະຫຼາດສາກົນໄດ້.
ທີສີ່, ບັນດານັກລົງທຶນສາກົນຕີລາຄາສູງຄວາມເປີດເຜີຍ ແລະ ການປະຕິບັດຕາມມາດຕະຖານສາກົນ ເມື່ອຫວຽດນາມໃຫ້ຂໍ້ມູນຂ່າວສານໃນຂະບວນການອອກພັນທະບັດສາກົນ. ລັດຖະບານໄດ້ສ້າງຊື່ສຽງແລະຄວາມໄວ້ວາງໃຈໃນບັນດານັກລົງທຶນສາກົນ ແລະ ສ້າງເງື່ອນໄຂກະກຽມໃຫ້ແກ່ການລະດົມແຫຼ່ງທຶນຂະໜາດໃຫຍ່ໃນຊຸມປີຕໍ່ໜ້າ.
ທີຫ້າ, ລະດັບຄວາມໜ້າເຊື່ອຖືຂອງປະເທດມີອິດທະພົນໂດຍກົງຕໍ່ອັດຕາດອກເບ້ຍຂອງພັນທະບັດໃນຕະຫຼາດທຶນສາກົນ. ອີງຕາມລິດັບຄວາມໜ້າເຊື່ອຖືຂອງປະເທດ, ນັກລົງທຶນຈະກໍານົດຂອບຄວາມແຕກຕ່າງເມື່ອທຽບກັບອັດຕາດອກເບ້ຍຂອງຊັບສິນການລົງທຶນທີ່ປອດໄພສູງ. ໃນການອອກພັນທະບັບລັດຖະບານທັງສາມຄັ້ງນັ້ນ, ອົງການຈັດອັນດັບຄວາມໜ້າເຊື່ອຖືທີ່ມີຊື່ສຽງໃນໂລກ ໄດ້ມີການປ່ຽນແປງໃນການຈັດອັນດັບຄວາມໜ້າເຊື່ອຖື ແລະ/ຫຼື ປະເມີນແງ່ຫວັງຂອງຫວຽດນາມ.
ເງື່ອນໄຂໃນຕະຫຼາດທຶນສາກົນ ແລະ ຕະຫຼາດທຶນພາຍໃນປະເທດ
ໃນໄລຍະ 2016-2021, ຫຼາຍປັດໄຈໃນຕະຫຼາດທຶນສາກົນຖືວ່າເປັນຄວາມສະດວກ ສຳລັບການລະດົມເງິນທຶນ. ອັດຕາດອກເບ້ຍໃນຕະຫຼາດທຶນຍັງຕໍ່າກວ່າໄລຍະ 2011-2016 ເມື່ອລັດຖະບານຫຼາຍປະເທດເລືອກທີ່ຈະຮັກສານະໂຍບາຍການເງິນຜ່ອນຄາຍທີ່ເໝາະສົມ ເພື່ອຮັບປະກັນການຟື້ນຟູເສດຖະກິດຢ່າງໜັກແໜ້ນ. ໃນສະພາບແວດລ້ອມຂອງອັດຕາດອກເບ້ຍຕ່ຳ ແລະ ຄວາມສາມາດຊຳລະທີ່ອຸດົມສົມວູນ, ບັນດາປະເທດກຳລັງພັດທະນາ, ໃນນັ້ນມີບັນດາປະເທດໃນພາກພື້ນອາຊີ-ປາຊີຟິກ ໄດ້ຍູ້ແຮງການອອກພັນທະບັດເພື່ອລະດົມເງິນທຶນໃຫ້ແກ່ການລົງທຶນພັດທະນາເສດຖະກິດໃນປະເທດ ກໍ່ຄືເພື່ອປະຕິບັດການຊໍາລະຄືນພັນທະບັດທີ່ເຖິງກຳນົດການຊຳລະ.
ການລະບາດຂອງໄວຣັສໂຄວິດ-19 ໄດ້ແຜ່ລະບາດແລະແຜ່ກະຈາຍໄປທົ່ວໂລກຢ່າງໄວວາ, ສົ່ງຜົນກະທົບຕໍ່ຊີວິດປະຈຳວັນຂອງປະຊາຊົນ ແລະ ການເຄື່ອນໄຫວທຸລະກິດ. ເພື່ອຮັບມືຄວບຄຸມຜົນກະທົບຂອງການລະບາດ, ລັດຖະບານຂອງປະເທດຕ່າງໆ ໄດ້ນຳໃຊ້ເຄື່ອງມືດ້ານເສດຖະກິດເກືອບທັງໝົດ ເພື່ອກອບກູ້ເສດຖະກິດ, ຫຼີກລ້ຽງວິກິດການທີ່ຮ້າຍແຮງ ແລະ ຟື້ນຄືນແຮງຂັບເຄື່ອນເສດຖະກິດ. ໂດຍຜ່ານໂຄງການຈັດຊື້ຊັບສິນ ແລະ ຊຸດງົບປະມານຂະໜາດໃຫຍ່ຂອງລັດຖະບານປະເທດຕ່າງໆ, ອັດຕາດອກເບ້ຍພັນທະບັດລັດຖະບານໄດ້ຫຼຸດລົງຫຼາຍເມື່ອທຽບໃສ່ໄລຍະກ່ອນ.
ປະກົດການຂອງ “ເງິນລາຄາຖືກ” ບວກກັບຄວາມຄາດຫວັງໃນການເປີດເສດຖະກິດຄືນໃໝ່ ເມື່ອການສັກຢາວັກຊີນໄດ້ປະຕິບັດຢ່າງກວ້າງຂວາງ ເຮັດໃຫ້ຄື້ນການລົງທຶນ ແລະ ການປັບໂຄງສ້າງລາຍຊື່ການລົງທຶນທີ່ເຂັ້ມແຂງຂຶ້ນ. ນັກລົງທຶນຫັນໜີຈາກຕະຫຼາດທີ່ພັດທະນາແລ້ວ ແລະ ຊອກຫາໂອກາດການລົງທຶນທີ່ມີຜົນຕອບແທນສູງ ໃນຕະຫຼາດໃກ້ຄຽງ ແລະຕະຫຼາດທີ່ຫາກໍພົ້ນເດັ່ນຂຶ້ນ, ເຊິ່ງສະແດງໃຫ້ເຫັນໃນການຟື້ນຕົວຢ່າງແຂງແຮງຂອງຕະຫຼາດຫຼັກຊັບ ແລະ ການລົງທຶນຈາກຕ່າງປະເທດຢ່າງຫຼວງຫຼາຍເຂົ້າມາໃນປະເທດເຫຼົ່ານີ້.
ກ່ຽວກັບສະພາບການພາຍໃນປະເທດ, ການຄວບຄຸມການລະບາດຂອງພະຍາດໄດ້ດີ ແລະ ບັນລຸການເຕີບໂຕໃນທາງບວກໃນປີ 2020 ໃຫ້ເຫັນຄວາມຖືກຕ້ອງໃນການຊີ້ນຳແລະການບໍລິຫານເສດຖະກິດຂອງພັກແລະລັດ ຄຽງຄູ່ກັບຄວາມຕັດສິນໃຈ ແລະ ຄວາມເຫັນດີເຫັນພ້ອມຂອງລະບົບການເມືອງທັງໝົດ. ບັນດາດຸນລະຍາມະຫາພາກເຊັ່ນ: ອັດຕາເງິນເຟີ້, ຄັງສໍາຮອງເງິນຕາຕ່າງປະເທດ, ອັດຕາແລກປ່ຽນ, ດຸນການຊຳລະເງິນ, ການຂາດດຸນງົບປະມານ, ໜີ້ສາທາລະນະ... ລ້ວນແຕ່ຖືກຄວບຄຸມເປັນຢ່າງດີ. ໃນໄລຍະ 2016-2020 ໄດ້ເຫັນຄວາມສຳເລັດຂອງລັດຖະບານ ໃນການຄວບຄຸມບັນດາເປົ້າໝາຍເຊັ່ນ: ການຂາດດຸນງົບປະມານ, ໜີ້ສາທາລະນະ, ໜີ້ຂອງລັດຖະບານ ແລະ ໜີ້ຕ່າງປະເທດ. ໃນໄລຍະນີ້, ການຂາດດຸນງົບປະມານສະເລ່ຍແມ່ນ 3,45% ຂອງຈີດີພີ, ບໍ່ກາຍເປົ້າໝາຍທີ່ວາງໄວ້ ຄື 3,9% ຂອງຈີດີພີ. ອັດຕາໜີ້ສາທາລະນະໃນທ້າຍປີ 2020 ຢູ່ໃນລະດັບ 55,3% ຂອງຈີດີພີ, ໜີ້ຂອງລັດຖະບານຢູ່ໃນລະດັບ 49,1% ແລະ ໜີ້ຕ່າງປະເທດຢູ່ໃນລະດັບ 47,3% ຂອງຈີດີພີ, ລ້ວນແຕ່ຕ່ຳກວ່າລະດັບແຜນການການເງິນ 5 ປີທີ່ຮັບຮອງໂດຍສະພາແຫ່ງຊາດ.
ໃນໄລຍະ 2016-2021, ຄວາມໜ້າເຊື່ອຖືຂອງຫວຽດນາມໄດ້ຮັບການປັບປຸງຢ່າງບໍ່ຢຸດຢັ້ງ, ສະແດງໃຫ້ເຫັນເຖິງການຕີລາຄາທາງບວກ ຂອງບັນດາອົງການຈັດອັນດັບຄວາມໜ້າເຊື່ອຖືສາກົນ ກ່ຽວກັບໝາກຜົນຂອງການຮັກສາສະຖຽນລະພາບຂອງເສດຖະກິດມະຫາພາກ ແລະ ຊຸກຍູ້ການເຕີບໂຕເສດຖະກິດແບບຍືນຍົງໃນຊຸມປີທີ່ຜ່ານມາ. ອົງການຈັດອັນດັບຄວາມໜ້າເຊື່ອຖືສາກົນ Moody’s ໄດ້ຍົກລະດັບຄວາມໜ້າເຊື່ອຖືແຫ່ງຊາດຂອງຫວຽດນາມຂຶ້ນຈາກ B1 ເປັນ Ba3 (ເດືອນສິງຫາປີ 2018) ແລະ ຍົກແງ່ຫວັງຂຶ້ນຈາກຫຍໍ້ທໍ້ ເປັນຕັ້ງໜ້າ (ເດືອນມີນາປີ 2021). ອົງການຈັດອັນດັບສິນເຊື່ອສາກົນ Fitch Ratings ໄດ້ຍົກລະດັບຄວາມໜ້າເຊື່ອຖືຂອງຫວຽດນາມຂຶ້ນຈາກ BB- ເປັນ BB (ເດືອນພຶດສະພາປີ 2018) ແລະຢືນຢັນຈະຮັກສາອັນດັບ BB ໄວ້ ແລະ ສືບຕໍ່ຍົກແງ່ຫວັງຂຶ້ນ ຈາກມີສະຖຽນລະພາບ ເປັນຕັ້ງໜ້າ (ເດືອນເມສາປີ 2021). ອົງການຈັດອັນດັບສິນເຊື່ອສາກົນ Standard & Poor’s ໄດ້ປັບອັນດັບຄວາມໜ້າເຊື່ອຖືຂອງຫວຽດນາມເປັນຄັ້ງທຳອິດໃນຮອບ 9 ປີຈາກ BB- ເປັນ BB (ເດືອນເມສາປີ 2019).
ນອກຈາກນັ້ນ, ອັດຕາແລກປ່ຽນລະຫວ່າງ ໂດລະສະຫະລັດ ກັບ ດົ່ງຫວຽດນາມ ໃນຊຸມປີມໍ່ໆມານີ້ ມີຄວາມໝັ້ນຄົງພໍສົມຄວນ, ຍ້ອນການຄຸ້ມຄອງຂອງທະນາຄານແຫ່ງລັດ ແລະ ການສະໜອງເງິນຕາຕ່າງປະເທດທີ່ອຸດົມສົມບູນ. ປັດໄຈເຫຼົ່ານີ້ຊ່ວຍຫຼຸດຜ່ອນຄວາມສ່ຽງຈາກອັດຕາແລກປ່ຽນ ເມື່ອລະດົມເງິນທຶນໃນຕະຫຼາດການເງິນສາກົນ, ຫຼີກລ້ຽງມູນຄ່າໜີ້ທີ່ສູງ ແລະ ຮັບປະກັນແຜນການຊໍາລະຄືນຢ່າງທັນເວລາ.
ສະຫຼຸບລວມແລ້ວ, ຄວາມສຳເລັດທາງເສດຖະກິດມະຫາພາກໃນໄລຍະທີ່ຜ່ານມາ ພ້ອມທັງເງື່ອນໄຂທີ່ເອື້ອອຳນວຍໃນຕະຫຼາດການເງິນສາກົນ, ອະນຸຍາດໃຫ້ລັດຖະບານພິຈາລະນາການອອກພັນທະບັດໃນຕະຫຼາດທຶນຕ່າງປະເທດ ເພື່ອລະດົມເງິນທຶນສຳລັບເປົ້າໝາຍການພັດທະນາເສດຖະກິດ-ສັງຄົມໄລຍະ 2021-2030.
ຂໍ້ສະເໜີແນະບາງປະການໃນການອອກພັນທະບັດລັດຖະບານ
ໃນຕະຫຼາດທຶນສາກົນໄລຍະ 2021-2030
ອີງຕາມການວິເຄາະຂ້າງເທິງ, ເປົ້າໝາຍຕົ້ນຕໍຂອງການອອກພັນທະບັດລັດຖະບານໃນຕະຫຼາດທຶນສາກົນໃນເວລາຕໍ່ໜ້າ ແມ່ນເພື່ອເປັນເຈົ້າການ ໃນການຕອບສະໜອງຄວາມຕ້ອງການເງິນທຶນ ເພື່ອການພັດທະນາ ແລະ ການປັບໂຄງສ້າງໜີ້ຂອງລັດຖະບານ, ດ້ວຍຄ່າໃຊ້ຈ່າຍແລະຄວາມສ່ຽງທີ່ສອດຄ່ອງກັບສະພາວະຕະຫຼາດສາກົນ ແລະ ຄວາມສາມາດໃນການຊໍາລະໜີ້ພາຍໃນປະເທດ, ປະກອບສ່ວນຮັບປະກັນຄວາມສາມາດຊຳລະໜີ້ຂອງລັດຖະບານ, ຄວາມປອດໄພຂອງໜີ້ສາທາລະນະ ແລະ ຄວາມໝັ້ນຄົງຂອງການເງິນແຫ່ງຊາດໃນໄລຍະ 2021-2030. ບົນພື້ນຖານນັ້ນ, ລັດຖະບານຈະພິຈາລະນາການອອກພັນທະບັດລັດຖະບານໃນຕະຫຼາດທຶນສາກົນຕະຫຼອດໄລຍະເວລາປີ 2021-2030 ຕາມແຕ່ລະພາກສ່ວນເປົ້າໝາຍດັ່ງນີ້: 1- ຄວາມຕ້ອງການກູ້ຢືມເພື່ອການປັບໂຄງສ້າງໜີ້ຂອງລັດຖະບານ ດ້ວຍເປົ້າໝາຍຫຼຸດຜ່ອນຄວາມສ່ຽງໃນການສະໜອງເງິນທຶນຄືນໃໝ່, ເພີ່ມອັດຕາສ່ວນໜີ້ໄລຍະຍາວ ແລະ ຫຼຸດຜ່ອນແຮງກົດດັນຈາກການປ່ຽນປີ້ນໜີ້ໄລຍະສັ້ນ; 2- ຄວາມຕ້ອງການໃນການອອກພັນທະບັດເພີ່ມເຕີມເພື່ອປ່ອຍເງິນກູ້ສຳລັບບາງໂຄງການລົງທຶນຮັບໃຊ້ໂຄງສ້າງພື້ນຖານທີ່ສໍາຄັນ ແລະ ບັນດາຂະແໜງອຸດສາຫະກໍາປາຍຫອກ; 3- ການກະຈາຍໂຄງສ້າງນັກລົງທຶນທີ່ຫຼາກຫຼາຍ ດ້ວຍການອອກພັນທະບັດທີ່ມີເງື່ອນໄຂການກູ້ຢືມທີ່ຍາວກວ່າ, ຄ່າໃຊ້ຈ່າຍທີ່ຕ່ຳກວ່າ ແລະ ຂໍ້ຈໍາກັດດ້ານການເງິນໜ້ອຍລົງ; 4-ຫັນປ່ຽນຈາກຂໍ້ຜູກພັນການຄ້ຳປະກັນເງິນກູ້ຂອງລັດຖະບານ ມາໃຊ້ກົນໄກການໃຫ້ກູ້ຢືມຈາກແຫຼ່ງການອອກພັນທະບັດສາກົນ; 5- ພັດທະນາເສັ້ນອັດຕາດອກເບ້ຍມາດຕະຖານຂອງພັນທະບັດຫວຽດນາມໃນຕະຫຼາດທຶນສາກົນ.
ເພື່ອເຮັດໃຫ້ການອອກພັນທະບັດປະສົບຜົນສຳເລັດ, ບັນລຸປະສິດທິຜົນໃນການນຳໃຊ້ເງິນທຶນ, ພ້ອມດຽວກັນນັ້ນ ກໍ່ຮັບປະກັນຄວາມປອດໄພຂອງໜີ້ສາທາລະນະ ແລະ ຄວາມໝັ້ນຄົງຂອງການເງິນແຫ່ງຊາດ, ຈຳເປັນຕ້ອງສຸມໃສ່ແກ້ໄຂບັນດາບັນຫາດັ່ງນີ້:
ທີໜຶ່ງ, ໃນໄລຍະສະເພາະໜ້າ, ຕ້ອງອີງໃສ່ກອບດຸນງົບປະມານແຫ່ງລັດໄລຍະ 2021-2025, ອີງຕາມມາດຖານກ່ຽວກັບອັດຕາການລະດົມແຫຼ່ງທຶນເຂົ້າງົບປະມານ, ອັດຕາການໃຊ້ຈ່າຍເກີນປະຈໍາປີ, ເງິນກູ້ຈາກການຊ່ວຍເຫຼືອການພັດທະນາຢ່າງເປັນທາງການ ແລະ ເງິນກູ້ພິເສດ, ຄວາມສາມາດໃນການອອກພັນທະບັດລັດຖະບານໃນປະເທດ, ລະດົມທຶນຈາກກອງທຶນການເງິນຂອງລັດ ເພື່ອກໍານົດຄວາມຕ້ອງການທີ່ຈະອອກພັນທະບັດລັດຖະບານໃນຕະຫຼາດສາກົນ. ການສ້າງແຜນການຄວນອີງໃສ່ສະພາບການທີ່ຄວາມສາມາດລະດົມທຶນການຊ່ວຍເຫຼືອຢ່າງເປັນທາງການ (ODA) ແລະ ເງິນກູ້ພິເສດ ທີ່ມີແນວໂນ້ມຫຼຸດລົງຢ່າງຕໍ່ເນື່ອງ. ກໍ່ຕ້ອງເອົາໃຈໃສ່ເຖິງເວລາການອອກພັນທະບັດລັດຖະບານໃນຕະຫຼາດທຶນສາກົນ ຢູ່ໃນການອອກພັນທະບັດລັດຖະບານໂດຍລວມ ເມື່ອພັນທະການຊຳລະໜີ້ຂອງລັດຖະບານໂດຍກົງທຽບກັບລາຍໄດ້ງົບປະມານຂອງລັດມີແນວໂນ້ມເພີ່ນຂຶ້ນຢ່າງໄວວາ ແລະ ອາດຈະເພີ່ມຂຶ້ນລື່ນກາຍລະດັບ 25% ໃນຊຸມປີທີ່ຈະມາເຖິງ.
ທີສອງ, ລັດຖະບານຕ້ອງຄາດຄະເນຜົນກະທົບທາງເສດຖະກິດ (ໂດຍສະເພາະແມ່ນງົບປະມານແລະການເງິນ) ທີ່ອາດເກີດຂຶ້ນຈາກການອອກພັນທະບັດແຕ່ລະຄັ້ງໃນຕະຫຼາດທຶນສາກົນ. ບັນດາບັນຫາກ່ຽວກັບການໄຈ້ແຍກຜົນກະທົບນະໂຍບາຍເຊັ່ນ: ຜົນກະທົບຕໍ່ໜີ້ຂອງປະທເດ, ຄວາມສາມາດເຕີບໂຕຢ່າງຍືນຍົງ, ການບໍລິຫານນະໂຍບາຍເງິນຕາ, ນະໂຍບາຍອັດຕາແລກປ່ຽນ, ການສຳຮອງເງິນຕາຕ່າງປະເທດ ແລະ ສະພາບຄ່ອງຂອງເສດຖະກິດ ທັງໝົດຕ້ອງໄດ້ຮັບການພິຈາລະນາຢ່າງຮອບຄອບ. ພິເສດແມ່ນ, ທະນາຄານແຫ່ງລັດ ແລະ ກະຊວງການເງິນ ຕ້ອງປະສານສົມທົບໃນການຄິດໄລ່ ແລະ ຄາດຄະເນຜົນກະທົບຈາກການຜັນຜວນຂອງອັດຕາແລກປ່ຽນທີ່ມີຕໍ່ຄ່າໃຊ້ຈ່າຍດອກເບ້ຍເງິນກູ້ ແລະ ຄວາມສາມາດຊໍາລະໜີ້ໃນໄລຍະເວລາຂອງພັນທະບັດ. ເບິ່ງລວມແລ້ວ, ການອອກພັນທະບັດທຸກຄັ້ງຈະສະດວກດີ ຖ້າມັນໄດ້ຮັບການສ້າງຕັ້ງບົນກອບງົບປະມານແລະເງິນຕາທີ່ໝັ້ນຄົງ. ນອກຈາກນັ້ນ, ລັດຕ້ອງແຍກການຄຸ້ມຄອງໜີ້ຕ່າງປະເທດຂອງພາກລັດ ແລະ ພາກເອກະຊົນ. ຕາມນັ້ນ, ຄວນກຳນົດພຽງເພດານໜີ້ສາທາລະນະຕ່າງປະເທດ ໃນຈຳນວນໜີ້ສາທາລະນະທັງໝົດ ແລະ ຕັ້ງເປົ້າໝາຍເຕືອນໄພ (ແທນທີ່ຈະເປັນເພດານແຂງ) ສຳລັບເປົ້າໝາຍການຊຳລະໜີ້ຕ່າງປະເທດຂອງພາກລັດ ແລະ ພາກເອກະຊົນ ເພື່ອໃຊ້ມາດຕະການດັດປັບຢ່າງທັນການ.
ທີສາມ, ລັດຖະບານຄວນພິຈາລະນາເລືອກເອົາແຜນການອອກພັນທະນາບັດທີ່ເໝາະສົມໃນບັນດາທາງເລືອກການອອກພັນທະນາບັດສາກົນທີ່ນິຍົມໃນປັດຈຸບັນ. ຫຼາຍປະເທດໃນພາກພື້ນອາຊີມັກຈະເລືອກເອົາແຜນການອອກພັນທະບັດໃນຮູບແບບຕ່າງໆເຊັ່ນ: ພັນທະບັດທົ່ວໂລກທີ່ອອກພາຍໃຕ້ຮູບແບບ 144A/Regulation S, ພັນທະບັດ Eurobond, ພັນທະບັດ Samurai ແລະ ພັນທະບັດ Sukuk. ໃນໄລຍະຕົ້ນ, ຫວຽດນາມຄວນເລືອກເອົາແຜນການອອກພັນທະບັດໃນຮູບແບບ 144A/Regulation S ດ້ວຍເງິນໂດລາສະຫະລັດ ເນື່ອງຈາກຕະຫຼາດທຶນສະກຸນເງິນໂດລາມີການພັດທະນາຢ່າງກວ້າງຂວາງ ແລະ ມີສະພາບຄ່ອງສູງ, ຊ່ວຍລະດົມເງິນທຶນໄດ້ຢ່າງຫຼວງຫຼາຍແລະໄລຍະຍາວ. ອັດຕາດອກເບ້ຍຂອງກະຊວງການຄັງສະຫະລັດອາເມລິກາກຳລັງຢູ່ໃນລະດັບຕ່ຳ ເນື່ອງຈາກນະໂຍບາຍເງິນຕາທີ່ຜ່ອນຄາຍຂອງລັດຖະບານອາເມລິກາ. ນອກຈາກນັ້ນ, ຫວຽດນາມໄດ້ມີບົດຮຽນປະສົບການໃນການອອກພັນທະບັດສາກົນດ້ວຍສະກຸນເງິນໂດລາສະຫະລັດກ່ອນໜ້ານີ້.
ທີສີ່, ລັດຖະບານຄວນພິຈາລະນາສ້າງໂຄງການອອກພັນທະບັດໄລຍະກາງທົ່ວໂລກ. ນີ້ແມ່ນຂອບມາດຕະຖານການອອກພັນທະບັດສາກົນ ທີ່ໄດ້ຮັບການຍອມຮັບຢ່າງກວ້າງຂວາງ ຈາກນັກລົງທຶນທົ່ວໂລກ ແລະ ມັກຈະຖືກນຳໃຊ້ໂດຍຜູ້ອອກພັນທະບັດສາກົນເປັນປະຈຳ. ໂຄງການອອກພັນທະບັດໄລຍະກາງຊ່ວຍໃຫ້ລັດຖະບານສາມາດອອກພັນທະບັດສາກົນໄດ້ຢ່າງຍືດຫຍຸ່ນໃນສະກຸນເງິນຕ່າງໆ ໂດຍມີປະລິມານຕ່າງກັນໃນເວລາຕ່າງກັນ ໃນຂະນະທີ່ໃຊ້ກອບກົດໝາຍດຽວກັນ. ຂໍ້ໄດ້ປຽບຂອງໂຄງການນີ້ຢູ່ທີ່ຄວາມສາມາດໃນການຫາເວລາທີ່ເໝາະສົມ ໃນການດໍາເນີນທຸລະກໍາໂດຍຜ່ານການຫຼຸດຜ່ອນເວລາກະກຽມຂັ້ນຕອນ, ເອກະສານທາງດ້ານກົດໝາຍ ແລະ ຄ່າໃຊ້ຈ່າຍສໍາລັບການອອກພັນທະບັດແຕ່ລະຄັ້ງ.
ທີຫ້າ, ລັດຖະບານຕ້ອງການກຳນົດກົນໄກລະດົມ, ນຳໃຊ້ ແລະ ຄຸ້ມຄອງຈຳນວນເງິນທີ່ໄດ້ຮັບພາຍຫຼັງການອອກພັນທະບັດໃຫ້ມີປະສິດທິຜົນ. ຈຳນວນເງິນທີ່ໄດ້ຮັບຈາກການອອກພັນທະບັດສາກົນ ຕ້ອງຕິດພັນກັບການເບີກຈ່າຍໃຫ້ບັນດາໂຄງການລົງທຶນ ເພື່ອຈຳກັດສະພາວະການເງິນທຶນຄົງຄ້າງ ທີ່ພາໃຫ້ເກີດການສິ້ນເປືອງຊັບພະຍາກອນ, ຫຼຸດຜ່ອນຄວາມສ່ຽງທີ່ເກີດຂຶ້ນລະຫວ່າງປະລິມານການອອກພັນທະບັດ ແລະ ຄວາມຕ້ອງການເງິນທຶນຕາມກຳນົດການຈັດຕັ້ງປະຕິບັດ ແລະ ຮັບປະກັນຄວາມສາມາດໃນການສ້າງແຫຼ່ງຊໍາລະໜີ້ເມື່ອຄົບກໍານົດ. ດັ່ງນັ້ນ, ອີງໃສ່ບັນຊີລາຍຊື່ຂອງໂຄງການບຸລິມະສິດສໍາລັບການກູ້ຢືມຄືນຈາກພັນທະບັດສາກົນທີ່ໄດ້ຮັບອະນຸມັດ, ບັນດາເຈົ້າຂອງໂຄງການລົງທຶນຕ້ອງມີແຜນການເບີກຈ່າຍສະເພາະ ເພື່ອໃຫ້ລັດຖະບານເປັນເຈົ້າການໃນການສ້າງແລະຈັດຕັ້ງປະຕິບັດແຜນການອອກພັນທະບັດທີ່ສອດຄ່ອງ, ໃນສະພາບການທີ່ຕະຫຼາດທຶນສາກົນມີການຜັນຜວນ. ກະຊວງແຜນການແລະການລົງທຶນ, ກະຊວງການເງິນ ແລະ ທະນາຄານແຫ່ງລັດ ຕ້ອງປະສານສົມທົບກັນ ເພື່ອກຳນົດຄວາມຕ້ອງການເງິນທຶນ, ຄວາມສາມາດລະດົມເງິນທຶນຂອງພື້ນຖານເສດຖະກິດໃນປະເທດ, ຂອງລັດຖະບານ (ການປັບໂຄງສ້າງໜີ້ສິນ, ເງິນທຶນເພີ່ມເຕີມໃຫ້ບັນດາໂຄງການຈຸດສຸມ, ເງິນກູ້ຕ່າງປະເທດທີ່ລັດຖະບານຮັບປະກັນຈະຖືກປ່ຽນເປັນເງິນໃຫ້ກູ້ຢືມ) ເພື່ອສະເໜີແຜນການອອກພັນທະບັດໃນຕະຫຼາດທຶນສາກົນ ຕໍ່ລັດຖະບານ.
ທີຫົກ, ລັດຖະບານອາດຈະພິຈາລະນາການຫັນປ່ຽນເງິນກູ້ຕ່າງປະເທດທີ່ມີຕົ້ນທຶນສູງທີ່ລັດຖະບານຮັບປະກັນ ມາໃຊ້ກົນໄກການໃຫ້ກູ້ຢືມຈາກແຫຼ່ງການອອກພັນທະບັດສາກົນທີ່ມີຄ່າໃຊ້ຈ່າຍຕ່ຳກວ່າ ເມື່ອລວມຄ່າທໍານຽມພາວະຜູກພັນແລະຄ່າປະກັນໄພຄວາມສ່ຽງ.
ທີເຈັດ, ການອອກພັນທະບັດລັດຖະບານຈໍານວນຫຼາຍຈະສະແດງໃຫ້ເຫັນເຖິງຄວາມທ້າທາຍທີ່ສໍາຄັນໃນອະນາຄົດຕໍ່ລັດຖະບານ ເມື່ອພັນທະບັດດັງກ່າວເຖິງກຳນົດເວລາຊໍາລະ. ນອກເໜືອຈາກການດຳເນີນການປ່ຽນປີ້ນໜີ້ສິນຜ່ານການອອກໃໝ່ພັນທະບັດເຊິ່ງເປັນການປະຕິບັດທົ່ວໄປ, ລັດຖະບານສາມາດພິຈາລະນາທາງເລືອກໃນການຊຳລະຄືນເງິນຕົ້ນເປັນງວດ, ເລືອກຊື້ຄືນກ່ອນວັນຄົບກຳນົດ ຫຼື ຈັດຕັ້ງກອງທຶນເພື່ອສະສົມເງິນສໍາລັບການຊໍາລະໜີ້ໃນການອອກພັນທະບັດແຕ່ລະຄັ້ງ./.
----------------
* ປອ ຈູແຂ໊ງເລິນ, ປທ ດ່າວມິງຖັງ, ພາກສ່ວນຊ່ວຍວຽກຂອງກຸ່ມທີ່ປຶກສາຂອງນາຍົກລັດຖະມົນຕີ.
(1) ເບິ່ງ: ຄຳຕັດສິນເລກທີ 1454/QĐ-TTg, ລົງວັນທີ 1 ກັນຍາ 2021, ຂອງນາຍົກລັດຖະມົນຕີ, “ອະນຸມັດແຜນການສ້າງຕາໜ່າງຖະໜົນໄລຍະ 2021-2030, ວິໄສທັດຮອດປີ 2050”
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 979 (ເດືອນທັນວາປີ 2021)
