ປະຕິບັດນະໂຍບາຍເງິນຕາ ແລະ
ການຄຸ້ມຄອງເງິນຕາຕ່າງປະເທດ
ໃນສະພາບທີ່ອັດຕາເງິນເຟີ້ເພີ່ມຂຶ້ນຢ່າງໄວ
ການຄຸ້ມຄອງເງິນຕາຕ່າງປະເທດ
ໃນສະພາບທີ່ອັດຕາເງິນເຟີ້ເພີ່ມຂຶ້ນຢ່າງໄວ
ວກ. - ໃນເວລາທີ່ຜ່ານມາ, ຫວຽດນາມບັນລຸຜົນສຳເລັດອັນໂດດເດັ່ນ ໃນດ້ານການຄຸ້ມຄອງແລະບໍລິຫານເສດຖະກິດມະຫາພາກ. ປະຕິບັດແຜນນະໂຍບາຍທີ່ສອດຄ່ອງ ແລະສະເໝີຕົ້ນສະເໝີປາຍຂອງພັກແລະລັດ ກ່ຽວກັບການປັບໂຄງສ້າງເສດຖະກິດຕາມທິດທັນສະໄໝ, ການພັດທະນາຢ່າງໄວແລະຍືນຍົງ ບົນພື້ນຖານຂອງຄວາມໝັ້ນຄົງທາງເສດຖະກິດມະຫາພາກ, ແຕ່ປີ 2011 ມາຮອດປະຈຸບັນ, ການບໍລິຫານນະໂຍບາຍເງິນຕາຂອງທະນາຄານແຫ່ງລັດ ໄດ້ຮັບຜົນສຳເລັດອັນຕັ້ງໜ້າຫຼາຍຢ່າງ, ເພີ່ມຄວາມຍືດຫຍຸ່ນຂອງລະບົບເສດຖະກິດຕໍ່ການກະແທກຈາກການປ່ຽນແປງທາງເສດຖະກິດແລະການເງິນໃນຕ່າງປະເທດ.
ການບໍລິຫານນະໂຍບາຍເງິນຕາແນໃສ່ຄວບຄຸມອັດຕາເງິນເຟີ້,
ສະໜັບສະໜູນການຟື້ນຟູ ແລະ ຊຸກຍູ້ການເຕີບໂຕເສດຖະກິດຢ່າງຍືນຍົງຢູ່ຫວຽດນາມ
ໃນເວລາທີ່ຜ່ານມາ, ຫວຽດນາມບັນລຸຜົນສຳເລັດອັນໂດດເດັ່ນຈຳນວນຫຼາຍ ໃນການຄຸ້ມຄອງ ແລະ ບໍລິຫານເສດຖະກິດມະຫາພາກ. ເສດຖະກິດມະຫາພາກມີສະຖຽນລະພາບ, ອັດຕາເງິນເຟີ້ຖືກຄວບຄຸມຕາມເປົ້າໝາຍ, ຕະຫຼາດການເງິນແລະເງິນຕາມີສະຖຽນລະພາບ. ອັດຕາການເຕີບໂຕທາງເສດຖະກິດສະເລ່ຍໃນໄລຍະ 2016-2020 ບັນລຸ 6,0% ຕໍ່ປີ, ສູງກວ່າອັດຕາສະເລ່ຍ 5,9% ຕໍ່ປີ ໃນໄລຍະ 2011-2015. ຫວຽດນາມເປັນໜຶ່ງໃນປະເທດທີ່ມີອັດຕາການເຕີບໂຕສູງ ໃນພາກພື້ນແລະທົ່ວໂລກ. ການດຸ່ນດ່ຽງເສດຖະກິດມະຫາພາກ ໄດ້ຮັບການຮັກສາ ບົນພື້ນຖານຂອງການປັບປຸງງົບປະມານແຫ່ງລັດ, ການຄວບຄຸມໜີ້ສາທາລະນະແລະໜີ້ຕ່າງປະເທດ; ທຶນສຳຮອງເງິນຕາຕ່າງປະເທດຂອງລັດ ເພີ່ມຂຶ້ນສູງສຸດເປັນປະຫວັດການ ເຊິ່ງໄດ້ເສີມສ້າງຄວາມຍືດຫຍຸ່ນຂອງເສດຖະກິດຕໍ່ແຮງກະແທກຈາກຕະຫຼາດສາກົນ. ສະພາບແວດລ້ອມທາງທຸລະກິດທີ່ດີຂຶ້ນ ແລະ ຄວາມສາມາດໃນການເຕີບໂຕອັນຕັ້ງໜ້າ ຊ່ວຍໃຫ້ຫວຽດນາມຮັບເອົາທ່າອ່ຽງຍົກຍ້ານຕ່ອງໂສ້ຄຸນຄ່າລະດັບໂລກ ແລະ ໄດ້ຮັບການຈັດອັນດັບຄວາມໜ້າເຊື່ອຖືລະດັບຊາດໂດຍອົງການສາກົນຫຼາຍແຫ່ງ. ການລົງທຶນໂດຍກົງຈາກຕ່າງປະເທດເຂົ້າຫວຽດນາມພວມເພີ່ມຂຶ້ນ, ສຸມໃສ່ຂົງເຂດການຜະລິດ ການປຸງແຕ່ງ ແລະກາຜະລິດ, ນຳມາເຊິ່ງການເກີນດຸນການຄ້າກັບຕ່າງປະເທດ, ຍົກສູງສະມັດຕະພາບແຮງງານ, ຄຸນນະພາບການເຕີບໂຕ ແລະ ຍົກສູງຄວາມສາມາດແຂ່ງຂັນຂອງປະເທດ.
ຜົນສຳເລັດໃນການຕໍ່ສູ້ກັບພາວະເງິນເຟີ້ສະແດງໃຫ້ເຫັນຢ່າງຈະແຈ້ງໃນໄລຍະປີ 2011-2015. ໂດຍໄດ້ຮັບຜົນກະທົບຈາກວິກິດເສດຖະກິດແລະການເງິນໂລກ ພ້ອມກັບຄວາມອ່ອນແອທີ່ສະສົມມາຫຼາຍປີໃນລະບົບເສດຖະກິດພາຍໃນ, ຕັ້ງແຕ່ປີທຳອິດຂອງໄລຍະນີ້, ຫວຽດນາມຕ້ອງປະເຊີນກັບສິ່ງທ້າທາຍຫຼາຍຢ່າງທີ່ກ່ຽວພັນກັນ ເຊັ່ນອັດຕາເງິນເຟີ້ສູງ (ຈາກ 9,2% ໃນປີ 2010 ເພີ່ມຂຶ້ນເປັນ 18,6% ໃນປີ 2011, ໃນນັ້ນ ເດືອນສິງຫາປີ 2011 ສູງເຖິງ 23% ເມື່ອທຽບໃສ່ເວລາດຽວກັນຂອງປີກ່ອນໜ້າ). ຄວາມດຸ່ນດ່ຽງທີ່ສໍາຄັນຂອງເສດຖະກິດຖືກທໍາລາຍ. ການຂາດດຸນການຄ້າຢູ່ໃນລະດັບສູງ ສ້າງແຮງກົດດັນຕໍ່ທຶນສຳຮອງຂອງປະເທດ, ສົ່ງຜົນກະທົບຕໍ່ອັດຕາແລກປ່ຽນໂດລາສະຫະລັດ/ດົ່ງຫວຽດນາມ ແລະ ເພີ່ມຄວາມສ່ຽງຂອງອັດຕາເງິນເຟີ້ຕໍ່ລະບົບເສດຖະກິດ. ຕະຫຼາດສະກຸນເງິນ ອັດຕາແລກປ່ຽນເງິນຕາຕ່າງປະເທດ ແລະ ຕະຫຼາດທອງຄຳ ມີຄວາມຜັນຜວນຢ່າງແຮງ ໂດຍມີອັດຕາດອກເບ້ຍເງິນກູ້ສູງເຖິງ 20-25% ຕໍ່ປີ, ສະພາບຄ່ອງຂອງລະບົບສະຖາບັນສິນເຊື່ອມີຄວາມເຄັ່ງຕຶງ, ທຶນສໍາຮອງເງິນຕາຕ່າງປະເທດຫຼຸດລົງ ແລະ ສະກຸນເງິນໂດລາແລະທອງຄໍາມີທ່າອ່ຽງທີ່ຈະເພີ່ມຂຶ້ນ ໃນສະພາບການທີ່ອັດຕາເງິນເຟີ້ເພີ່ມຂຶ້ນ ແລະ ຄວາມບໍ່ໝັ້ນຄົງຂອງເສດຖະກິດມະຫາພາກ.
ໃນສະພາບການດັງກ່າວ, ລັດຖະບານໄດ້ສະເໜີວິທີແກ້ບັນຫາທີ່ຄົບຊຸດແລະຮອບດ້ານຢ່າງຮີບດ່ວນແລະທັນທ່ວງທີ ເພື່ອຕອບສະໜອງຄວາມຕ້ອງການໃນທາງປະຕິບັັດໂດຍທັນທີ ໂດຍເນັ້ນໜັກເຖິງຄວາມຕ້ອງການໃນການຄວບຄຸມອັດຕາເງິນເຟີ້, ຮັກສາສະຖຽນລະພາບຂອງເສດຖະກິດມະຫາພາກ ພ້ອມກັນນັ້ນ, ຮັບປະກັນຄວາມປອດໄພສັງຄົມ ແລະ ສະຫວັດດີການສັງຄົມ ສຳລັບຜູ້ທຸກຍາກເມື່ອປະເຊີນກັບການດັດປັບເສດຖະກິດຄັ້ງໃຫຍ່ ໃນສະພາບທີ່ລາຄາສິນຄ້າເພີ່ມຂຶ້ນ. ໂດຍສະເພາະ: 1- ກ່ຽວກັບນະໂຍບາຍເງິນຕາ, ໃຫ້ຫຼຸດປະລິມານເງິນແລະຫຼຸດຄວາມໄວຂອງການເຕີບໂຕຂອງສິນເຊື່ອ (ຮັບປະກັນອັດຕາການເຕີບໂຕຂອງວິທີການຊຳລະເງິນລວມຢູ່ທີ່ 15-16% ແລະ ຈຳກັດການເຕີບໂຕຂອງສິນເຊື່ອໃຫ້ຕ່ຳກວ່າ 20%), ຊີ້ນຳການເຕົ້າໂຮມທຶນສິນເຊື່ອໃຫ້ຂະແໜງການຜະລິດແລະພາກທຸລະກິດ, ຄວບຄຸມສິນເຊື່ອອະສັງຫາລິມະຊັບ ແລະ ຫຼັກຊັບ ຢ່າງເຄັ່ງຄັດ; ຄຸ້ມຄອງອັດຕາດອກເບ້ຍ ແລະອັດຕາແລກປ່ຽນຢ່າງຍືດຫຍຸ່ງຕາມການພັດທະນາຂອງຕະຫຼາດ; 2- ກ່ຽວກັບນະໂຍບາຍການຄັງ, ຫຼຸດການຂາດດຸນງົບປະມານໃຫ້ຕ່ຳກວ່າ 5% ຂອງຍອດຜະລິດຕະພັນພາຍໃນປະເທດ (ຈີດີພີ) ບົນພື້ນຖານການສູ້ຊົນເພື່ອເພີ່ມລາຍໄດ້ງົບປະມານ 7-8% ແລະ ຫຼຸດລາຍຈ່າຍປະຈຳລົງ 10% ເມື່ອທຽບກັບການຄາດຄະເນ; ກວດກາ, ຫຼຸດຜ່ອນ, ຈັດຕັ້ງຄືນໃໝ່ ແລະ ປັບປຸງປະສິດທິພາບຂອງການລົງທຶນຂອງພາກລັດ; 3- ຊຸກຍູ້ການຜະລິດແລະທຸລະກິດ, ສົ່ງເສີມການສົ່ງອອກ, ຫຼຸດການຂາດດຸນການຄ້າ, ປະຢັດພະລັງງານ; 4- ປັບລາຄາໄຟຟ້າແລະນ້ຳມັນທີ່ກ່ຽວຂ້ອງກັບຄວາມປອດໄພສົງຄົມ ແລະ ຊ່ວຍເຫຼືອຄອບຄົວທີ່ທຸກຍາກ; 5- ເພີ່ມທະວີຄວາມປອດໄພສັງຄົມ ແລະ ສະຫວັດດີການ; 6- ຍູ້ແຮງວຽກງານຂໍ້ມູນຂ່າວສານ ແລະ ການໂຄສະນາອົບຮົມ.
ມີການທົບທວນແລະແກ້ໄຂເອກະສານທາງກົດໝາຍ ກ່ຽວກັບການບໍລິຫານນະໂຍບາຍເງິນຕາ ເພື່ອຄວບຄຸມອັດຕາເງິນເຟີ້ ແລະ ຮັກສາສະຖຽນລະພາບຂອງເສດຖະກິດມະຫາພາກໂດຍທັນທີ. ໃນປີ 2010 ສະພາແຫ່ງຊາດໄດ້ປະກາດໃຊ້ກົດໝາຍວ່າດ້ວຍທະນາຄານຂອງລັດແຫ່ງຫວຽດນາມ ມີຜົນບັງຄັບໃຊ້ແຕ່ປີ 2011 ແທນທີ່ກົດໝາຍວ່າດ້ວຍທະນາຄານແຫ່ງລັດປີ 1997, ໂດຍກຳນົດຢ່າງຈະແຈ້ງວ່າ ບົດບາດແລະຖານະຕຳແໜ່ງຂອງທະນາຄານແຫ່ງລັດ ແລະ ເປົ້າໝາຍນະໂຍບາຍເງິນຕາຂອງຫວຽດນາມ ແມ່ນຮັກສາສະຖຽນລະພາບຂອງມູນຄ່າເງິນ ທີ່ສະແດງໂດຍເປົ້າໝາຍເງິນເຟີ້. ນີ້ແມ່ນເຂັມທິດທີ່ຊ່ວຍລວມສູນການບໍລິຫານນະໂຍບາຍເງິນຕາຂອງທະນາຄານແຫ່ງລັດ ແລະ ບັນລຸຜົນງານອັນຕັ້ງໜ້າ ໃນການປະຕິບັດເປົ້າໝາຍຄວບຄຸມອັດຕາເງິນເຟີ້, ຮັກສາສະຖຽນລະພາບຂອງເສດຖະກິດມະຫາພາກ, ປະກອບສ່ວນຊຸກຍູ້ການພັດທະນາເສດຖະກິດຕາມທິດສັງຄົມນິຍົມ ຢ່າງວ່ອງໄວ ແລະ ຍືນຍົງ.
ໜ້າທີ່ຕໍ່ສູ້ກັບພາວະເງິນເຟີ້ ແລະ ຮັກສາສະຖຽນລະພາບຂອງເສດຖະກິດມະຫາພາກ ບໍ່ສາມາດດຳເນີນການໄດ້ພຽງລຳພັງຫຼືຊົ່ວຄາວ ແຕ່ຖືກວາງໄວ້ໃນອົງປະກອບລວມທີ່ສະເໝີຕົ້ນສະເໝີປາຍ ກ່ຽວກັບການພັດທະນາເສດຖະກິດແລະສັງຄົມທີ່ໝັ້ນຄົງ ຍືນຍົງ ແລະ ສະໝ່ຳສະເໝີ ຕະຫຼອດຂັ້ນຕອນຕ່າງໆ. ການຊີ້ນຳໂດຍລວມໃນການຄວບຄຸມອັດຕາເງິນເຟີ້ ແລະ ຮັກສາສະຖຽນລະພາບຂອງເສດຖະກິດມະຫາພາກ ຖືກກຳນົດຄວບຄູ່ໄປກັບແຜນນະໂຍບາຍປ່ຽນແປງໃໝ່ຮູບແບບການເຕີບໂຕ ຈາກລວງກວ້າງ ໄປສູ່ການປະສົມປະສານລວງກວ້າງແລະລວງເລິກ, ການປັບໂຄງສ້າງເສດຖະກິດ, ປະຕິບັດບັນດາບາດກ້າວບຸກທະລຸທາງຍຸດທະສາດ ແລະ ເປັນເອກະພາບໃນຄວາມນຶກຄິດແລະການກະທຳໃນທຸກລະດັບ.
ສືບຕໍ່ໄລຍະປີ 2011-2015 ທີ່ດຳເນີນການຫັນນະໂຍບາຍຢ່າງທັນການ ຮອບດ້ານ ແລະ ແທດຈິງ ເພື່ອຟື້ນຟູພື້ນຖານເສດຖະກິດມະຫາພາກທີ່ໝັ້ນຄົງ, ແຕ່ປີ 2016 ແຜນນະໂຍບາຍແລະນະໂຍບາຍຂອງພັກແລະລັດ ໄດ້ສຸມໃສ່ແລະຕັ້ງໝັ້ນ ໃນການປັບປຸງບັນດາຮາກຖານຂອງເສດຖະກິດມະຫາພາກ, ສົ່ງເສີມການພັດທະນາຕົວຂັບເຄື່ອນການເຕີບໂຕທາງເສດຖະກິດໄລຍະຍາວ ໂດຍສະເພາະ ການສົ່ງເສີມການປັບໂຄງສ້າງເສດຖະກິດ; ເພີ່ມທະວີການເຊື່ອມໂຍງສາກົນ ບົນພື້ນຖານຮັບປະກັນຄວາມເປັນເອກະລາດ ແລະຄວາມເປັນເຈົ້າຕົນເອງ ຂອງພື້ນຖານເສດຖະກິດ; ຍູ້ແຮງການປະຕິຮູບການບໍລິຫານ, ສະພາບແວດລ້ອມການທຸລະກິດ, ພັດທະນາເສດຖະກິດເອກະຊົນ, ເພີ່ມສະມັດຕະພາບແລະປະສິດທິຜົນຂອງພື້ນຖານເສດຖະກິດ, ສົ່ງເສີມການພັດທະນາເສດຖະກິດດິຈິຕອນ ແລະ ເສດຖະກິດສີຂຽວ. ຄວາມສຳເລັດໃນການຄວບຄຸມ ແລະ ຮັກສາສະຖຽນລະພາບອັດຕາເລິນເຟີ້ ແລະ ການພັດທະນາເສດຖະກິດແລະສັງຄົມ, ການດຶງດູດການລົງທຶນຈາກຕ່າງປະເທດ ຊ່ວຍຮັກສາຄວາມຄາດຫວັງດ້ານເງິນເຟີ້ ສົ່ງເສີມຄວາມເຊື່ອໝັ້ນຂອງປະຊາຊົນຕໍ່ເງິນດົ່ງຫວຽດນາມ ແລະ ຕໍ່ຕ້ານການຫັນເປັນໂດລາໃນເສດຖະກິດ.
ຄວບຄຸມສະພາບຄ່ອງຂອງລະບົບສະຖາບັນສິນເຊື່ອໄດ້ຢ່າງຍືດຫຍຸ່ນ, ຮັບປະກັນໃຫ້ຕະຫຼາດເງິນຕາມີສະຖຽນລະພາບ, ຄວບຄຸມເງິນຕາຢ່າງຕັ້ງໜ້າເພື່ອຄວບຄຸມອັດຕາເງິນເຟີ້.
ໃນການນຳໃຊ້ເຄື່ອງມືນະໂຍບາຍເງິນຕາ, ທະນາຄານແຫ່ງລັດໄດ້ດຳເນີນການຢ່າງຄົບຊຸດແລະຍືດຫຍຸ່ນ ໂດຍປະສານງານຢ່າງໃກ້ຊິດກັບນະໂຍບາຍການຄັງ ໃນການຄວບຄຸມສະພາບຄ່ອງ, ຮັກສາສະຖຽນລະພາບຂອງຕະຫຼາດເງິນຕາ, ຮັກສາຈຳນວນເງິນທີ່ປ່ອຍອອກເພື່ອຕອບສະໜອງຄວາມຕ້ອງການການຊຳລະເງິນຂອງລະບົບເສດຖະກິດຢ່າງວ່ອງໄວແລະຄົບຖ້ວນ ພ້ອມທັງຮັບປະກັນການປະຕິບັດຕາມເປົ້າໝາຍໃນການຄວບຄຸມອັດຕາເງິນເຟີ້. ຕາມນັ້ນ, ທະນາຄານແຫ່ງລັດສຸມໃສ່: 1- ຊື້ແລະຂາຍເອກະສານທີ່ມີຄ່າແບບຍຶດຫຍຸ່ນໄດ້ສອງທາງ ຜ່ານການດຳເນີນການຂອງຕະຫຼາດເປີດທຸກວັນ ດ້ວຍອັດຕາດອກເບ້ຍແລະເງື່ອນໄຂທີ່ສົມເຫດສົມຜົນ ໂດຍອີງຕາມການພັດທະນາຕະຫຼາດຢ່າງໃກ້ຊິດແລະຄວາມເຄື່ອນໄຫວຂອງເງິນຝາກຄັງຂອງລັດໃນລະບົບການທະນາຄານ ເພື່ອຄວບຄຸມສະກຸນເງິນ, ຮັກສາສະຖຽນລະພາບຂອງຕະຫຼາດລະຫວ່າງທະນາຄານ ແລະຫຼຸດອັດຕາເງິນເຟີ້. ເຄື່ອງມືນີ້ມີບົດບາດສຳຄັນໃນການຊົດເຊີຍປະລິມານການຂາດແຄນເງິນທຶນສະພາບຄ່ອງ, ຮັບປະກັນການຕອບສະໜອງຄວາມຕ້ອງການເງິນທຶນທີ່ມີຢູ່ຂອງຖະສາບັນສິນເຊື່ອຢ່າງທັນທ່ວງທີ, ໂດຍສະເພາະ ໃນເວລາທີ່ຄວາມຕ້ອງການສະພາບຄ່ອງຂອງສະຖາບັນສິນເຊື່ອເພີ່ມຂຶ້ນ; ໃນເວລາດຽວກັນ, ໃຫ້ຖອນເງິນທັນທີເມື່ອເງິນທຶນທີ່ມີຢູ່ຂອງລະບົບສະຖາບັນສິນເຊື່ອມີສ່ວນເກີນໃນການຄວບຄຸມເງິນຕາ; 2- ການຮັກສາອັດຕາສ່ວນສຳຮອງທີ່ຈຳເປັນໃຫ້ຄົງທີ່ ເພື່ອສ້າງເງື່ອນໄຂໃຫ້ສະຖາບັນສິນເຊື່ອຮັກສາສະພາບຄ່ອງ ແລະ ຮັກສາສະຖຽນລະພາບຂອງຕະຫຼາດເງິນຕາ(1); 3- ການສະໜອງທຶນໃໝ່ (Refinance - ຣີໄຟແນນຊ໌) ສຳລັບສະຖາບັນສິນເຊື່ອ ເພື່ອຮອງຮັບສະພາບຄ່ອງຕາມຄຳຂໍຂອງສະຖາບັນສິນເຊື່ອ, ຮັບປະກັນຕະຫຼາດການເງິນທີ່ໝັ້ນຄົງ ແລະ ສະໜັບສະໜູນຂະບວນການແກ້ໄຂໜີ້ເສຍ. ອັດຕາດອກເບ້ຍສະໜອງທຶນໃໝ່ ແລະ ອັດຕາດອກເບ້ຍຮັບຊື້ຄືນໄດ້ຄ່ອຍໆຫຼຸດລົງໃນໄລຍະປີ 2011-2020 ແລະຄົງທີ່ໃນປີ 2021 ເພື່ອໃຫ້ສອດຄ່ອງກັບພັດທະນາການຂອງລະບົບເສດຖະກິດ. ໃນໄລຍະປີ 2020-2022, ເພື່ອສະໜັບສະໜູນເສດຖະກິດ ໃນການຮັບມືກັບຜົນກະທົບຈາກການແຜ່ລະບາດຂອງໂຄວິດ-19, ປະຕິບັດມະຕິຂອງສະພາແຫ່ງຊາດແລະລັດຖະບານ, ທະນາຄານແຫ່ງລັດໄດ້ຜັນຂະຫຍາຍບັນດາໂຄງການສະໜອງທຶນໃໝ່ ໃຫ້ແກ່ທະນາຄານນະໂຍບາຍສັງຄົມ ເພື່ອໃຫ້ເງິນກູ້ເພື່ອຈ່າຍຄ່າຈ້າງຢຸດງານ ແລະ ຈ່າຍເງິນເດືອນເພື່ອຟື້ນຟູການຜະລິດໃຫ້ກັບຄົນງານ (2 ໂຄງການທີ່ມີຂະໜາດ 16.000 ຕື້ດົ່ງ ແລະ 7.500 ຕື້ດົ່ງ ຕາມລະດັບ, ອັດຕາດອກເບ້ຍ 0% ຕໍ່ປີ, ບໍ່ມີຫຼັກປະກັນ); ສະໜອງທຶນໃໝ່ 4.000 ຕື້ດົ່ງ, ອັດຕາດອກເບ້ຍ 0% ໃຫ້ແກ່ສະຖາບັນສິນເຊື່ອ ເພື່ອສະໜັບສະໜູນບໍລິສັດການບິນຫວຽດນາມ. ຍ້ອນແນວນັ້ນ, ຄົນງານຫຼາຍແສນຄົນທີ່ຕ້ອງຢຸດວານໃນໄລຍະການແຜ່ລະບາດຂອງໂຄວິດ-19 ຈຶງຍັງໄດ້ຮັບຄ່າຈ້າງ, ປະກອບສ່ວນເຂົ້າໃນການປະຕິບັດນະໂຍບາຍປະກັນສັງຄົມ, ຊ່ວຍໃຫ້ວິສາຫະກິດຮັກສາແຮງງານ ເພື່ອຟື້ນຟູການຜະລິດແລະທຸລະກິດ ຫຼັງຈາກຄວບຄຸມການແຜ່ລະບາດຂອງໂຄວິດ-19 ໄດ້ແລ້ວ.
ການຈັດການອັດຕາດອກເບ້ຍໃຫ້ສອດຄ່ອງກັບການພັດທະນາເສດຖະກິດມະຫາພາກ, ຕະຫຼາດການເງິນແລະເງິນຕາ ແລະ ເປົ້າໝາຍບໍລິຫານນະໂຍບາຍເງິນຕາ.
ໄລຍະປີ 2011-2015, ເມື່ອອັດຕາເງິນເຟີ້ເພີ່ມຂຶ້ນ (ໃນປີ 2011 ຢູ່ທີ່ 18,6%), ເພື່ອຄວບຄຸມອັດຕາເງິນເຟີ້, ທະນາຄານແຫ່ງລັດໄດ້ຂຶ້ນອັດຕາດອກເບ້ຍການດຳເນີນງານ 5 ຄັ້ງ(2); ໃຊ້ການຄວບຄຸມອັດຕາດອກເບ້ຍໂດຍກົງ (ໃຊ້ກົດລະບຽບກ່ຽວກັບເພດານອັດຕາດອກເບ້ຍເງິນຝາກ ແລະ ໃຫ້ກູ້ຢືມ) ສຳລັບເງິນດົ່ງຫວຽດນາມ ແລະ ໂດລາສະຫະລັດ ເພື່ອຮັກສາສະຖຽນລະພາບຂອງອັດຕາດອກເບ້ຍໃນຕະຫຼາດ ແລະຄ່ອຍໆແກ້ໄຂຄວາມເຄັ່ງຕຶງດ້ານສະພາບຄ່ອງສຳລັບສະຖາບັນສິນເຊື່ອ. ຢ່າງໃດກໍ່ຕາມ, ເນື່ອງຈາກແຮງກົດດັນດ້ານເງິນເຟີ້ ແລະ ແຮງກົດດັນດ້ານສະພາບຄ່ອງ, ສະຖາບັນສິນເຊື່ອສ່ວນໃຫຍ່ໄດ້ໃຊ້ຮູບແບບຕ່າງໆຫຼາຍຢ່າງ (ຄ່າໃຊ້ຈ່າຍສົ່ງເສີມການຂາຍ, ຄ່ານາຍໜ້າ...), ການໃຊ້ອັດຕາດອກເບ້ຍເງິນຝາກສູງກວ່າເພດານອັດຕາດອກເບ້ຍທີ່ທະນາຄານແຫ່ງລັດກຳນົດ(3), ເຮັດໃຫ້ວິສາຫະກິດກູ້ຢືມເງິນທຶນມີບັນຫາໃນການຊຳລະໜີ້, ເຮັດໃຫ້ໜີ້ເສຍຂອງທະນາຄານເພີ່ມຂຶ້ນ ກໍ່ໃຫ້ເກີດຄວາມສ່ຽງແກ່ສະຖາບັນສິນເຊື່ອ. ເພື່ອຟື້ນຟູວິໃນແລະລະບຽບວິໄນທາງການຕະຫຼາດ, ຜູ້ວ່າການທະນາຄານແຫ່ງລັດໄດ້ອອກຄຳສັ່ງໝາຍເລກ 02/CT-NHNN ລົງວັນທີ 7 ກັນຍາ 2011, ກຳນົດໃຫ້ສະຖາບັນສິນເຊື່ອຕ້ອງປະຕິບັດຕາມເພດານອັດຕາດອກເບ້ຍທີ່ກຳນົດໂດຍທະນາຄານແຫ່ງລັດຢ່າງເຄັ່ງຄັດ ແລະ ກຳນົດມາດຕະການຈັດການທີ່ເຂັ້ມງວດຕໍ່ການລະເມີດ. ດ້ວຍເຫດນີ້ ສະຖານະການການລະເມີດຈຶງຖືກຈັດການແກ້ໄຂ ແລະ ຄວາມເຄັ່ງຕຶງໃນຕະຫຼາດເງິນຕາກໍຖືກຍູ້ຖອຍ. ນັບຕັ້ງແຕ່ກາງປີ 2012, ອັດຕາດອກເບ້ຍແລະຕະຫຼາດເງິນຕາມີສະຖຽນລະພາບ, ມາດຕະການບໍລິຫານຄວບຄຸມອັດຕາດອກເບ້ຍໄດ້ຖືກຍຸບເລີກເທື່ອລະກ້າວ, ທະນາຄານແຫ່ງລັດຄ່ອຍໆຜ່ອນຄາຍກົດລະບຽບ, ໃຫ້ສະຖາບັນສິນເຊື່ອເປັນເຈົ້າການໃນການຕັດສິນຕົກລົງອັດຕາດອກເບ້ຍເງິນຝາກທີ່ມີໄລຍະ 12 ເດືອນຂຶ້ນໄປ, ຫຼັງຈາກນັ້ນແມ່ນໄລຍະ 6 ເດືອນຂຶ້ນໄປ.
ໄລຍະປີ 2016-2019, ຕະຫຼາດການເງິນແລະເງິນຕາຂອງໂລກປະເຊີນກັບການຜັນຜວນສັບສົນ ເນື່ອງຈາກທະນາຄານກາງແຫ່ງສະຫະລັດ (FED) ແລະທະນາຄານກາງຫຼາຍແຫ່ງໃນປະເທດແລະພາກພື້ນ ໄດ້ເພີ່ມອັດຕາດອກເບ້ຍ. ໃນສະພາບການດັ່ງກ່າວ, ຕິດຕາມການພັດທະນາຕະຫຼາດໃນປະເທດແລະຕ່າງປະເທດຢ່າງໃກ້ຊິດ, ທະນາຄານແຫ່ງລັດໄດ້ດຳເນີນນະໂຍບາຍເງິນຕາຢ່າງຍືດຫຍຸ່ນ ເພື່ອຮັກສາສະຖຽນລະພາບແລະຫຼຸດອັດຕາດອກເບ້ຍເມື່ອມີເງື່ອນໄຂເອື້ອອຳນວຍຕໍ່ການສະໜັບສະໜູນການຜະລິດແລະທຸລະກິດ. ຕາມນັ້ນ, ຫຼັງຈາກຮັກສາອັດຕາດອກເບ້ຍດຳເນີນການໄວ້ບໍ່ປ່ຽນແປງໃນປີ 2016, ໃນໄລຍະ 2017-2019, ທະນາຄານແຫ່ງລັດໄດ້ປັບອັດຕາດອກເບ້ຍດຳເນີນການລົງ 0,5% ຕໍ່ປີ, ຫຼຸດເພດານອັດຕາດອກເບ້ຍເງິນຝາກ 0,2 - 0,5% ຕໍ່ປີ ໄລຍະເວລາບໍ່ເກີນ 6 ເດືອນ, ຫຼຸດເພດານອັດຕາດອກເບ້ຍເງິນກູ້ໄລຍະສັ້ນ 1,0% ຕໍ່ປີ ສຳລັບບັນດາຂະແໜງການບຸລິມະສິດ; ສົມທົບການດັດປັບແລະຕອບສະໜອງຄວາມຕ້ອງການສະພາບຄ່ອງຂອງສະຖາບັນສິນເຊື່ອທັນທີ, ຮັກສາອັດຕາດອກເບ້ຍໃນຕະຫຼາດລະຫວ່າງທະນາຄາມທີ່ເໝາະສົມ; ຊີ້ນຳສະຖາບັນສິນເຊື່ອໃນການກວດກາ ແລະ ສ້າງສົມດຸນຄວາມສາມາດດ້ານການເງິນ ເພື່ອໃຊ້ອັດຕາດອກເບ້ຍເງິນກູ້ທີ່ເໝາະສົມ ເພື່ອແນໃສ່ເພີ່ມການເຂົ້າເຖິງເງິນທຶນຂອງຜູ້ຄົນແລະວິສາຫະກິດ; ຍູ້ແຮງການແກ້ໄຂໜີ້ເສຍ ໃຫ້ມີຊັບພະຍາກອນເພື່ອສືບຕໍ່ຫຼຸດອັດຕາດອກເບ້ຍເງິນກູ້ລົງ.
ໄລຍະ 2020-2022, ການບໍລິຫານອັດຕາດອກເບ້ຍທັງຕອບສະໜອງທັນທ່ວງທີຕໍ່ສະຖານນະການການແຜ່ລະບາດ ເພື່ອຊ່ວຍແກ້ໄຂຄວາມຫຍຸ້ງຍາກຂອງລະບົບເສດຖະກິດ, ທັງດັດປັບໄດ້ຢ່າງຍືດຫຍຸ່ນຕາມການພັດທະນາອັດຕາເງິນເຟີ້ໃນປະເທດແລະຕ່າງປະເທດ ເພື່ອປະກອບສ່ວນເຂົ້າໃນການຄວບຄຸມອັດຕາເງິນເຟີ້ ແລະ ຮັກສາສະຖຽນລະພາບຂອງເສດຖະກິດມະຫາພາກ. ໃນປີ 2020, ທັນທີທີ່ການແຜ່ລະບາດຂອງໂຄວິດ-19 ເກີດຂຶ້ນ, ທະນາຄານແຫ່ງລັດໄດ້ປັບຫຼຸດອັດຕາດອກເບ້ຍການດຳເນີນງານ 3 ຄັ້ງໃນປີ 2020 ລວມຫຼຸດລົງ 1,5 - 2,0% ຕໍ່ປີ (ແມ່ນໜຶ່ງໃນປະເທດທີ່ມີການຫຼຸດອັດຕາດອກເບ້ຍທີ່ໃຫຍ່ທີ່ສຸດໃນພາກພື້ນ) ແນໃສ່ຫຼຸດຄ່າໃຊ້ຈ່າຍການເຂົ້າເຖິງເງິນທຶນຈາກທະນາຄານແຫ່ງລັດ ສຳລັບສະຖາບັນສິນເຊື່ອ, ສ້າງເງື່ອນໄຂໃຫ້ສະຖາບັນສິນເຊື່ອຫຼຸດອັດຕາດອກເບ້ຍເງິນກູ້ໃຫ້ແກ່ເສດຖະກິດ; ພ້ອມທັງ, ຊີ້ນຳສະຖາບັນສິນເຊື່ອຫຼຸດຄ່າໃຊ້ຈ່າຍການເຄື່ອນໄຫວລົງ ເພື່ອສຸມໃສ່ຫຼຸດອັດຕາດອກເບ້ຍການໃຫ້ກູ້ຢືມ. ໃນປີ 2021 ແລະ 8 ເດືອນຕົ້ນປີ 2022, ເຖິງວ່າອັດຕາດອກເບ້ຍໂລກໄດ້ປັບເພີ່ມຂຶ້ນ ແຕ່ທະນາຄານແຫ່ງລັດກໍຍັງຮັກສາອັດຕາດອກເບ້ຍການດຳເນີນງານໄວ້ໄດ້, ສ້າງເງື່ອນໄຂໃຫ້ສະຖາບັນສິນເຊື່ອເຂົ້າເຖິງແຫຼ່ງເງິນທຶນຈາກທະນາຄານແຫ່ງລັດດ້ວຍຄ່າໃຊ້ຈ່າຍທີ່ຕ່ຳ, ດ້ວຍເຫດນີ້, ມີເງື່ອນໄຂຫຼຸດອັດຕາດອກເບ້ຍເງິນກູ້ເພື່ອໜູນຊ່ວຍລູກຄ້າໃນການຟື້ນຟູການຜະລິດແລະທຸລະກິດ; ຊີ້ນຳສະຖາບັນສິນເຊື່ອຫຼຸດຄ່າໃຊ້ຈ່າຍການດຳເນີນງານເພື່ອຫຼຸດອັດຕາດອກເບ້ຍເງິນກູ້ຕໍ່ໄປ ເພື່ອສະໜັບສະໜູນແລະຕິດຕາມວິສາຫະກິດແລະປະຊາຊົນ ໃນການຜ່ານຜ່າຄວາມຫຍຸ້ງຍາກ. ດ້ວຍເຫດນັ້ນ, ໃນສະພາບທີ່ອັດຕາດອກເບ້ຍໂລກເພີ່ມສູງຂຶ້ນ, ອັດຕາດອກເບ້ຍເງິນກູ້ສະເລ່ຍຂອງລະບົບສະຖາບັນສິນເຊື່ອໃນຫວຽດນາມໄດ້ຫຼຸດລົງ 1% ຕໍ່ປີໃນປີ 2020 ແລະຫຼຸດລົງອີກ 0,8% ຕໍ່ປີໃນປີ 2021.
ຢ່າງໃດກໍ່ຕາມ, ໃນສະພາບການອັດຕາເງິນເຟີ້ທົ່ວໂລກເພີ່ມຂຶ້ນ, FED ໄດ້ປັບອັດຕາດອກເບ້ຍເປົ້າໝາຍ 6 ຄັ້ງຂຶ້ນເປັນ 3,75 - 4% ຕໍ່ປີ ແລະຄາດວ່າຈະເພີ່ມຂຶ້ນຢ່າງຕໍ່ເນື່ອງໃນປີ 2023, ຄ່າເງິນໂດລາສະຫະລັດແຂງຄ່າຂຶ້ນຢ່າງໄວ, ສ້າງແຮງກົດດັນຕໍ່ອັດຕາດອກເບ້ຍໃນປະເທດແລະອັດຕາແລກປ່ຽນ ແລະ ສ້າງແຮງກົດດັນຕໍ່ອັດຕາເງິນເຟີ້. ເພື່ອສືບຕໍ່ຜັນຂະຫຍາຍມາດຕະການຕ່າງໆຢ່າງຄົບຊຸດ, ປະກອບສ່ວນເຂົ້າໃນການຄວບຄຸມອັດຕາເງິນເຟີ້, ຮັກສາສະຖຽນລະພາບຂອງເສດຖະກິດມະຫາພາກ ແລະ ຮັບປະກັນຄວາມປອດໄພຂອງລະບົບທະນາຄານ, ທະນາຄານແຫ່ງລັດໄດ້ປັບອັດຕາດອກເບ້ຍໃຫ້ເພີ່ມຂຶ້ນ ໃນສະພາບທີ່ອັດຕາດອກເບັ້ຍໂລກເພີ່ມຂຶ້ນຢ່າງວ່ອງໄວ ແລະ ແຮງກົດດັນເງິນເຟີ້ໃນປະເທດເພີ່ມຂຶ້ນ.
ບໍລິຫານຈັດການການເຕີບໂຕຂອງສິນເຊື່ອຢ່າງປອດໄພ ແລະມີປະສິດທິຜົນ ຕາມເປົ້າໝາຍໃນການຄວບຄຸມອັດຕາເງິນເຟີ້, ຮັບປະກັນການສະໜອງເງິນທຶນໃຫ້ແກ່ລະບົບເສດຖະກິດຢ່າງພຽງພໍແລະທັນເວລາ
ພາຍຫຼັງໄລຍະທີ່ສິນເຊື່ອເຕີບໂຕສູງກ່ອນປີ 2010, ນັບແຕ່ປີ 2011 ທະນາຄານແຫ່ງລັດໄດ້ກຳນົດສາຍພົວພັນທີ່ສົມເຫດສົມຜົນ ລະຫວ່າງການເຕີບໂຕຂອງສິນເຊື່ອ ແລະການເຕີບໂຕຂອງ ຈີດີພີ ເພື່ອຄິດໄລ່ອັດຕາການເຕີບໂຕຂອງສິນເຊື່ອ ຕາມທິດທາງການຍົກສູງຄຸນນະພາບສິນເຊື່ອ, ຄ່ອຍໆນໍາລະບົບສະຖາບັນສິນເຊື່ອມາປະຕິບັດໜ້າທີ່ຈັດຫາເງິນທຶນໄລຍະສັ້ນ ໃຫ້ກັັບລະບົບເສດຖະກິດ ຢ່າງເໝາະສົມ. ບົນພື້ນຖານດັ່ງກ່າວ, ທະນາຄານແຫ່ງລັດກຳນົດເປົ້າໝາຍການເຕີບໂຕຂອງສິນເຊື່ອປະຈຳປີ ຕັ້ງແຕ່ຕົ້ນປີ ທີ່ແທດເໝາະກັບສະຖານະການຈິງ ແລະ ຄວບຄຸມການເຕີບໂຕຂອງສິນເຊື່ອຂອງລະບົບຢ່າງເຄັ່ງຄັດ ຜ່ານການຈັດສັນເປົ້າໝາຍການເຕີບໂຕຂອງສິນເຊື່ອ ໃຫ້ແກ່ແຕ່ລະສະຖາບັນສິນເຊື່ອໂດຍອີງໃສ່ຄວາມສາມາດໃນການຂະຫຍາຍສິນເຊື່ອ, ຄຸນນະພາບການດຳເນີນງານ ແລະ ຄວາມສາມາດໃນການຄຸ້ມຄອງຄວາມສ່ຽງ. ໃນຂະບວນການປະຕິບັດ, ທະນາຄານແຫ່ງລັດໄດ້ທົບທວນແລະປັບປ່ຽນຢ່າງຍືດຫຍຸ່ນຕາມການພັດທະນາທີ່ເກີດຂຶ້ນຈິງ. ຕາມນັ້ນ, ພ້ອມກັບການຫຼຸດອັດຕາດອກເບ້ຍລົງເຫຼືອປະມານ 40% ຂອງລະດັບໃນທ້າຍປີ 2011, ສິນເຊື່ອກໍ່ໄດ້ຮັບການຄວບຄຸມຢ່າງເໝາະສົມ ແລະ ແກ້ຢ່າງມີປະສິດທິຜົນ, ສຸມໃສ່ບັນດາຂົງເຂດບຸລິມະສິດ, ປະກອບສ່ວນຊຸກຍູ້ການເຕີບໂຕເສດຖະກິດຢ່າງຍືນຍົງ.
ຄຽງຄູ່ກັນນັ້ນ, ທະນາຄານແຫ່ງລັດກໍໄດ້ຕັ້ງໜ້າປະຕິບັດບັນດາມາດຕະການທາງດ້ານສິນເຊື່ອ ແນໃສ່ຍົກສູງຄຸນນະພາບຂອງສິນເຊື່ອ ແລະ ຄວາມສາມາດເຂົ້າເຖິງສິນເຊື່ອ ເຊັ່ນ: ຕິດຕາມສະຖານະການສະໜອງສິນເຊື່ອໃນພື້ນທີ່ທີ່ອາດຈະມີຄວາມສ່ຽງຢ່າງໃກ້ຊິດ ເພື່ອສະເໜີມາດຕະການແກ້ໄຂເພີ່ມທະວີການຄວບຄຸມຄວາມສ່ຽງ ແລະ ຮັບປະກັນຄວາມປອດໄພໃນການດຳເນີນງານຂອງທະນາຄານໂດຍທັນທີ. ຄວບຄຸມຄວາມຕ້ອງການສິນເຊື່ອສະກຸນເງິນຕ່າງປະເທດຢ່າງເຄັ່ງຄັດ ເພື່ອຮັບປະກັນຄວາມສອດຄ່ອງກັບແຜນນນະໂຍບາຍຈຳກັດການຫັນເປັນໂດລາໃນເສດຖະກິດຂອງລັດຖະບານ, ປະກອບສ່ວນເຮັດໃຫ້ຕະຫຼາດເງິນຕາ ແລະ ອັດຕາແລກປ່ຽນມີສະຖຽນລະພາບ; ປະສານງານຢ່າງໃກ້ຊິດກັບອຳນາດການປົກຄອງທ້ອງຖິ່ນ ໃນການຜັນຂະຫຍາຍໂຄງການເຊື່ອມໂຍງທະນາຄານ - ວິສາຫະກິດ ເພື່ອແກ້ໄຂຄວາມຫຍຸ້ງຍາກໂດຍທັນທີ ແລະ ສ້າງເງື່ອນໄຂທີ່ເອື້ອອຳນວຍໃນການເຂົ້າເຖິງສິນເຊື່ອຂອງທະນາຄານ ສຳລັບປະຊາຊົນ ແລະ ວິສາຫະກິດ, ໂດຍສະເພາະ ວິສາຫະກິດຂະໜາດກາງແລະຂະໜາດນ້ອຍ; ເປັນເຈົ້າການປະສານງານກັບກະຊວງແລະຂະແໜງການ ເພື່ອສ້າງແລະປັບປຸງບູລະນະກົນໄກ ນະໂຍບາຍ ແລະ ດຳເນີນໂຄງການສິນເຊື່ອ ຕາມນະໂຍບາຍຂອງລັດຖະບານ ຢ່າງມີປະສິດທິຜົນ.
ໄລຍະ 2020-2022, ຕໍ່ໜ້າຜົນກະທົບດ້ານລົບຈາກການລະບາດໃຫຍ່ຂອງໂຄວິດ-19, ທະນາຄານແຫ່ງລັດໄດ້ປະກາດໃຊ້ນະໂຍບາຍ (ໜັງສືວຽນເລກທີ 01/2020/TT-NHNN, ແກ້ໄຂແລະເພີ່ມເຕີມໂດຍໜັງສືວຽນເລກທີ 03/2021/TT-NHNN ແລະໜັງສືວຽນເລກທີ 14/2021/TT-NHNN) ແລະ ຊີ້ນຳໃຫ້ສະຖາບັນສິນເຊື່ອປັບໂຄງສ້າງເງື່ອນໄຂການຊຳລະໜີ້, ຮັກສາກຸ່ມໜີ້ເດີມ, ຍົກເວັ້ນແລະຫຼຸດອັດຕາດອກເບ້ຍແລະຄ່າທຳນຽມ ເພື່ອແກ້ໄຂຄວາມຫຍຸ້ງຍາກ ສຳລັບວິສາຫະກິດແລະຜູ້ກູ້ຢືມທີ່ໄດ້ຮັບຮັບຜົນກະທົບທາງລົບຈາກການແຜ່ລະບາດໃນຂົງເຂດ, ຂະແໜງການແລະອາຊີບ; ຊ່ວຍຮັກສາກະແສເງິນສົດຂອງຜູ້ກູ້ຢືມ; ສະໜັບສະໜູນການຜະລິດແລະທຸລະກິດ. ນະໂຍບາຍນີ້ໄດ້ຮັບການຕ້ອນຮັບຢ່າງດີຈາກພາກທຸລະກິດແລະປະຊາຊົນ ແລະ ສະພາແຫ່ງຊາດ, ລັດຖະບານ ແລະ ບັນດາອົງການສາກົນ ໄດ້ປະເມີນວ່າມີຄວາມເໝາະສົມແລະທັນການ. ແຕ່ເລີ່ມປະຕິບັດຮອດເດືອນມິຖຸນາ 2022 (ວັນທີ່ສິ້ນສຸດນະໂຍບາຍ) ລະບົບສະຖາບັນສິນເຊື່ອໄດ້ປັບໂຄງສ້າງເງື່ອນໄຂການຊຳລະໜີ້ ໂດຍຮັກສາກຸ່ມໜີ້ເດີມສຳລັບລູກຄ້າເກືອບ 1,1 ລ້ານຄົນ ດ້ວຍມູນຄ່າໜີ້ສະສົມຫຼາຍກວ່າ 722.000 ຕື້ດົ່ງ; ຍົກເວັ້ນແລະຫຼຸດດອກເບ້ຍແລະຄ່າທຳນຽມ, ຮັກສາກຸ່ມໜີ້ເດີມສຳລັບລູກຄ້າເກືອບ 562.000 ຄົນທີ່ມີມູນຄ່າໜີ້ຫຼາຍກວ່າ 92.000 ຕື້ດົ່ງ.
ການບໍລິຫານອັດຕາແລກປ່ຽນຢ່າງເປັນເຈົ້າການແລະໄຫວພິບ ຕາມສະພາບເສດຖະກິດມະຫາພາກແລະຕະຫຼາດ, ຮັບປະກັນສະຖານະຂອງສະກຸນເງິນຫວຽດນາມຈະແຂງແກ່ນຂຶ້ນ, ຍຶດຄວາມຄາດຫວັງ ແລະ ປະກອບສ່ວນຄວບຄຸມອັດຕາເງິນເຟີ້ຢ່າງດີ.
ໄລຍະ 2011-2015, ທະນາຄານແຫ່ງລັດຄວບຄຸມອັດຕາແລກປ່ຽນເພື່ອຮັບປະກັນຄວາມໄຫວພິບເມື່ອຕະຫຼາດເກີດຄວາມເຄັ່ງຕຶງ ແລະ ເພື່ອເພີ່ມຄວາມເຊື່ອໝັ້ນໃນສະກຸນເງິນດົ່ງຂອງຫວຽດນາມເມື່ອແຮງກົດດັນຂອງຕະຫຼາດຜ່ອນຄາຍລົງ. ຕາມນັ້ນ, ຕົ້ນປີ 2011, ເພື່ອຮັກສາສະຖຽນລະພາບຂອງຕະຫຼາດເງິນຕາຕ່າງປະເທດທ່າມກາງສັນຍານຂອງຄວາມເຄັ່ງຕຶງ, ທະນາຄານແຫ່ງລັດໄດ້ປັບອັດຕາແລກປ່ຽນລະຫວ່າງທະນາຄານໂດຍສະເລ່ຍເພີ່ມຂຶ້ນ 9,3% ແລະຫຼຸດຂອບການຊື້ຂາຍຈາກ ±3% ເປັນ ±1%. ແຕ່ປີ 2012, ຕະຫຼາດເງິນຕາຕ່າງປະເທດມີສະຖຽນລະພາບກວ່າເກົ່າ, ທະນາຄານແຫ່ງລັດຄວບຄຸມອັດຕາແລກປ່ຽນດ້ວຍການປະກາດລາຍວັນອັດຕາແລກປ່ຽນລະຫວ່າງທະນາຄານໂດຍສະເລ່ຍລະຫວ່າງດົ່ງຫວຽດນາມ ແລະ ໂດລາສະຫະລັດ; ພ້ອມກັນນັ້ນ, ປະກາດການປັບອັດຕາແລກປ່ຽນສູງສຸດປະຈຳປີ (ປະມານ 1 - 2%) ແລະໃຊ້ມາດຕະການທີ່ຄົບຊຸດແລະຍືດຫຍຸ່ນເພື່ອໃຫ້ບັນລຸເປົ້າໝາຍທີ່ວາງໄວ້ (ຄວບຄຸມສະພາບຄ່ອງຂອງເງິນດົ່ງຫວຽດນາມ, ຮັກສາຄວາມແຕກຕ່າງດ້ານອັດຕາດອກເບ້ຍເງິນດົ່ງຫວຽດນາມ - ໂດລາສະຫະລັດ ຕາມທິດທາງເພີ່ມຄວາມດຶງດູດຂອງເງິນດົ່ງຫວຽດນາມ, ປັບໄຊ້ເພດານອັດຕາດອກເບ້ຍເງິນຝາກສະກຸນເງິນໂດລາສະຫະລັດແຕ່ປີ 2010 ແລະຄ່ອຍໆຫຼຸດເພດານລົງເຫຼືອ 0% ຕໍ່ປີຕັ້ງແຕ່ເຄິ່ງທ້າຍຂອງປີ 2015, ຍູ້ແຮງການສື່ສານເພື່ອສ້າງຄວາມໝັ້ນຄົງທາງຈິດວິທະຍາຕະຫຼາດ, ການແຊກແຊງເງິນຕາຕ່າງປະເທດເມື່ອຈຳເປັນ, ການຈຳກັດສິນເຊື່ອສະກຸນເງິນຕາຕ່າງປະເທດ, ຮັດແໜ້ນການຄຸ້ມຄອງເງິນຕາຕ່າງປະເທດ), ເພີ່ມຂອບການຊື້ຂາຍເປັນ ±3% ໃນຊຸມເດືອນສຸດທ້າຍຂອງປີ 2015 ເມື່ອແຮງກົດດັນຕໍ່ຕະຫຼາດແລກປ່ຽນເງິນຕາຕ່າງປະເທດເພີ່ມຂຶ້ນຈາກການຂຶ້ນອັດຕາດອກເບ້ຍຂອງ FED. ຜົນສຳເລັດໃນໄລຍະນີ້ໃຫ້ເຫັນວ່າ, ໃນສະພາບຄາດຄະເນອັດຕາເງິນເຟີ້ທີ່ສູງຂຶ້ນ, ຕະຫຼາດແລກປ່ຽນເງິນຕາຕ່າງປະເທດທີ່ຜັນຜວນ, ຄວາມເຊື່ອໝັ້ນໃນເງິນດົ່ງຫວຽດນາມຫຼຸດລົງໃນໄລຍະກ່ອນໜ້າ ແລະ ເງິນໂດລາສະຫະລັດກໍອ່ອນຄ່າລົງໃນຕະຫຼາດໂລກ (ຍ້ອນ FED ໃຊ້ມາດຕະການກະຕູ້ນເສດຖະກິດ (QE) ແລະຮັກສາອັດຕາດອກເບ້ຍໄວ້ໃກ້ຄຽງກັບ 0% ໃນສ່ວນຫຼາຍໄລຍະນີ້), ກົນໄກບໍລິຫານອັດຕາແລກປ່ຽນໃນໄລຍະນີ້ສອດຄ່ອງກັບສະພາວະເສດຖະກິດມະຫາພາກແລະຕະຫຼາດ. ຕາມນັ້ນ, ອັດຕາແລກປ່ຽນແລະຕະຫຼາດແລກປ່ຽນເງິນຕາຕ່າງປະເທດມີສະຖຽນລະພາບຢ່າງໄວ ຕັ້ງແຕ່ປີ 2012, ຄວາມເຊື່ອໝັ້ນໃນເງິນດົ່ງຫວຽດນາມໄດ້ຟື້ນຟູ, ທະນາຄານແຫ່ງລັດສາມາດຊື້ສະກຸນເງິນຕ່າງປະເທດ, ເພີ່ມທຶນສຳຮອງເງິນຕາຕ່າງປະເທດຂອງລັດ.
ແຕ່ປີ 2016 ເຖິງປະຈຸບັບ, ຕະຫຼາດການເງິນໂລກມີຄວາມສັບສົນ ແລະຜັນຜວນຫຼາຍ (FED ຂຶ້ນອັດຕາດອກເບ້ຍ, ເງິນໂດລາສະຫະລັດແຂງຄ່າອີກເທື່ອໜຶ່ງ, ເງິນຢວນອ່ອນຄ່າ, ອັງກິດອອກຈາກສະຫະພາບເອີຣົບ (Brexit), ຄວາມຂັດແຍ້ງທາງການຄ້າລະຫວ່າງອາເມລິກາ-ຈີນ, ການແຜ່ລະບາດໃຫຍ່ຂອງໂຄວິດ-19, ການປະທະກັນລະຫວ່າງລັດເຊຍ-ຢູເຄຣນ ແລະອື່ນໆ). ໃນສະພາບການດັ່ງກ່າວ, ຕະຫຼາດແລກປ່ຽນເງິນຕາຕ່າງປະເທດຢູ່ໃນປະເທດປະເຊີນກັບແຮງກົດດັນຫຼາຍ, ເຮັດໃຫ້ວິທີການດຳເນີນງານແບບເດີມບໍ່ເໝາະສົມອີກຕໍ່ໄປ. ດັ່ງນັ້ນ, ທະນາຄານແຫ່ງລັດຈຶງຢຸດໃຫ້ຄຳແນະນຳກ່ຽວກັບຄວາມຜັນຜວນຂອງອັດຕາແລກປ່ຽນປະຈຳປີ ແລະ ປ່ຽນການບໍລິຫານອັດຕາແລກປ່ຽນຕາມທິດທາງທີ່ຍືດຫຍຸ່ນຫຼາຍຂຶ້ນ ເພື່ອເພີ່ມຄວາມສາມາດໃນການປະເຊີນຕໍ່ແຮງກະແທກຈາກພາຍນອກ, ແຕ່ຍັງຄົງຮັກສາສະຖຽນລະພາບ ແລະ ໂປ່ງໃສຂອງຕະຫຼາດເງິນຕາຕ່າງປະເທດ. ຕາມນັ້ນ, ທະນາຄານແຫ່ງລັດຈຶງປະກາດອັດຕະແລກປ່ຽນກາງລາຍວັນທີ່ຜັນຜວນຢ່າງຍືດຫຍຸ່ນຕາມການພັດທະນາຂອງຕະຫຼາດໃນປະເທດແລະຕ່າງປະເທດ, ຄວາມສົມດຸນຂອງເສດຖະກິດມະຫາພາກ, ສະກຸນເງິນຕາ ແລະ ເປົ້າໝາຍນະໂຍບາຍເງິນຕາ; ໃຊ້ສ່ວນຕ່າງຂອງອັດຕາແລກປ່ຽນ ±3% ຕັ້ງແຕ່ໄຕມາດທີສາມຂອງປີ 2015 (ເພີ່ມຂຶ້ນຈາກ ±1% ກ່ອນໜ້າ); ໃຊ້ການແຊກແຊງເພື່ອຊື້ແລະຂາຍສະກຸນເງິນຕ່າງປະເທດ ດ້ວຍອັດຕາແລກປ່ຽນ ແລະ ວິທີການແລກປ່ຽນທີ່ຍືດຫຍຸ່ນ (ທັນທີ ແລະ ຕາມກຳນົດເວລາ) ເພື່ອຮັກສາສະຖຽນລະພາບຂອງຕະຫຼາດ, ເພີ່ມທຶນສຳຮອງເງິນຕາຕ່າງປະເທດຂອງລັດໃນສະພາວະທີ່ເອື້ອອຳນວຍ. ບັນດາມາດຕະການບໍລິຫານອັດຕາແລກປ່ຽນສືບຕໍ່ໄດ້ຮັບການປະສານງານຢ່າງແໜ້ນແຟ້ນກັບການສື່ສານ ແລະເຄື່ອງມືນະໂຍບາຍການເງິນອື່ນໆ ກໍ່ຄືມາດຕະການການຄຸ້ມຄອງອັດຕາແລກປ່ຽນເງິນຕາຕ່າງປະເທດ ເພື່ອຮັບປະກັນໃຫ້ຕະຫຼາດແລກປ່ຽນເງິນຕາຕ່າງປະເທດມີສະຖຽນລະພາບ ແລະ ດຳເນີນໄປຢ່າງຊ່ອງລ່ອງ, ຂະຈັດຜົນກະທົບດ້ານລົບຕໍ່ຈິດວິທະຍາຕະຫຼາດ, ຈຳກັດສະພາບການຫັນເປັນໂດລາສະຫະລັດໃນເສດຖະກິດ, ປັບປຸງຄວາມເຊື່ອໝັ້ນ ແລະຜົນກຳໄລໃນການຖືເງິນດົ່ງຫວຽດນາມ. ດ້ວຍເຫດນັ້ນ, ຕະຫຼາດສະກຸນເງິນຕ່າງປະເທດມີສະຖຽນລະພາບ, ສະພາບຄ່ອງດີ ແລະ ຄວາມຕ້ອງການເງິນຕາຕ່າງປະເທດທີ່ຖືກກົດໝາຍໄດ້ຮັບການຕອບສະໜອງຢ່າງພຽງພໍແລະໄວວາ. ໃນໄລຍະ 2016-2021, ອັດຕາແລກປ່ຽນສະເລ່ຍເພີ່ມຂຶ້ນປະມານ 0,9% ຕໍ່ປີ ແລະ ທຶນສຳຮອງເງິນຕາຕ່າງປະເທດຂອງລັດເພີ່ມຂຶ້ນ.
ໃນ 10 ເດືອນຕົ້ນປີ 2022, ໃນສະພາບທີ່ຢູ່ພາຍໃຕ້ແຮງກົດດັນຫຼາຍຢ່າງຕາມທ່າອ່ຽງທົ່ວໄປຂອງໂລກ, ທະນາຄານແຫ່ງລັດຫວຽດນາມໄດ້ຄຸ້ມຄອງອັດຕາແລກປ່ຽນເງິນຕາຢ່າງຍືດຫຍຸ່ນແລະຕັ້ງໜ້າ, ທັງສ້າງພື້ນທີ່ໃຫ້ອັດຕາແລກປ່ຽນເຄື່ອນໄຫວໄດ້ຢ່າງຍືດຫຍຸ່ນ, ດູດຊັບແຮງກະແທກຈາກພາຍນອກ ແລະ ທັງຂາຍເງິນຕາຕ່າງປະເທດເຂົ້າມາແຊກແຊງເພື່ອເພິ່ມການສະໜອງເງິນຕາຕ່າງປະເທດໃຫ້ຕະຫຼາດ, ຈໍາກັດຄວາມຜັນຜວນຂອງອັດຕາແລກປ່ຽນຫຼາຍເກີນໄປ, ປະກອບສ່ວນຮັກສາສະຖຽນລະພາບຂອງຕະຫຼາດແລກປ່ຽນເງິນຕາຕ່າງປະເທດ, ເສດຖະກິດມະຫາພາກ ແລະ ຊ່ວຍຫຼຸດແຮງກົດດັນດ້ານເງິນເຟີ້. ວັນທີ 17 ຕຸລາ 2022, ທະນາຄານແຫ່ງລັດໄດ້ຕັດສິນຕົກລົງ ປັບຂອບອັດຕາແລກປ່ຽນມອບສົ່ງທັນທີ ລະຫວ່າງໂດລາສະຫະລັດແລະດົ່ງຫວຽດນາມ ຈາກ ±3% ເປັນ ±5% ເພື່ອເປັນເຈົ້າການໃນການປັບໃຫ້ເຂົ້າກັບການພັດທະນາທີ່ບໍ່ສາມາດຄາດເດົາໄດ້ໃນຕະຫຼາດຕ່າງປະເທດ. ດ້ວຍເຫດນັ້ນ, ອັດຕາແລກປ່ຽນໃນຕະຫຼາດຈຶງເຄື່ອນໄຫວໄດ້ຢ່າງຍືດຫຍຸ່ນ, ສະພາບຄ່ອງຂອງຕະຫຼາດຊ່ອງລ່ອງດີ ແລະ ຕອບສະໜອງຄວາມຕ້ອງການດ້ານເງິນຕາຕ່າງປະເທດຕາມກົດໝາຍໄດ້ຢ່າງພຽງພໍ. ໃນສະພາບທີ່ສະກຸນເງິນຂອງບັນດາປະເທດໃນພາກພື້ນທີ່ອ່ອນຄ່າລົງຢ່າງວ່ອງໄວ ເມື່ອທຽບກັບໂດລາສະຫະລັດ, ດ້ວຍຄວາມມານະພະຍາຍາມຂອງທະນາຄານແຫ່ງລັດ ແລະ ວິທີການດຳເນີນງານທີ່ຍືດຫຍຸ່ນແລະເປັນເຈົ້າການ, ເງິນດົ່ງຫວຽດນາມຈຶ່ງອ່ອນຄ່າລົງພຽງປະມານ 9% ເມື່ອທຽບກັບໂດລາສະຫະລັດ.
ເປັນເຈົ້າການໃນການສື່ສານເພື່ອຮັກສາສະຖຽນລະພາບຂອງຕະຫຼາດທີ່ຄາດຫວັງ
ແຕ່ປີ 2011 ມາຮອດປະຈຸບັນ, ວຽກງານສື່ສານຂອງທະນາຄານແຫ່ງລັດໄດ້ຮັບການປ່ຽນແປງໃໝ່ຢ່າງຮອບດ້ານ ທັງໃນດ້ານຄວາມຄິດແລະການກະທຳ ແລະ ເປັນເຄື່ອງມືທີ່ມີປະສິດທິຜົນໃນການຖ່າຍທອດກົນໄກ ນະໂຍບາຍ ມາດຕະການບໍລິຫານເງິນຕາແລະທະນາຄານ. ທະນາຄານແຫ່ງລັດໄດ້ສະໜອງຂໍ້ມູນຢ່າງສະໝ່ຳສະເໝີແລະທັນທ່ວງທີ ກ່ຽວກັບວິທີການດຳເນີນງານ ແລະ ຜົນການດຳເນີນງານຂອງທະນາຄານ ເພື່ອເປັນແນວທາງແລະຊີ້ນຳຄວາມຄິດເຫັນສັງຄົມ. ວິທີແກ້ບັນຫາແລະຜົນສຳເລັດມີດັ່ງນີ້:
ທີໜຶ່ງ, ແຜນນະໂຍບາຍ ນະໂຍບາຍ ແລະ ວິທີການດຳເນີນງານຂອງທະນາຄານແຫ່ງລັດໄດ້ຮັບການຖ່າຍທອດຕໍ່ຫາງສຽງສາທາລະນະຊົນຢ່າງທັນທ່ວງທີ ແລະ ເປັນທາງການ ຜ່ານຮູບແບບການສື່ສານທີ່ອຸດົມສົມບູນ ຫຼາກຫຼາຍ ແລະ ເຂົ້າເຖິງໄດ້ (ປະຊຸມຖະແຫຼງຂ່າວເປັນປະຈຳ, ເວັບໄຊຕ໌ຂອງທະນາຄານແຫ່ງລັດ, ການສຳມະນາ, ການອະພິປາຍ ແລະອື່ນໆ), ຈາກນັ້ນ, ຈຳກັດຂໍ້ມູນທີ່ຂັດແຍ້ງ, ຂ່າວປອມ ແລະ ຂ່າວບໍ່ຖືກຕ້ອງ ເຊິ່ງສົ່ງຜົນຮ້າຍຕໍ່ຈິດວິທະຍາ ແລະ ຄວາມຄິດເຫັນສັງຄົມ.
ທີສອງ, ທິດທາງແລະແຜນການສື່ສານໄດ້ຮັບການພັດທະນາສຳລັບໄລຍະເວລາແລະໃນແຕ່ລະປີ ເຊິ່ງໄດ້ຮັບການຜັນຂະຫຍາຍຢ່າງເປັນເອກະພາບແລະຄົບຊຸດ ໃນທົ່ວລະບົບ ໂດຍມີການປະສານງານຢ່າງໃກ້ຊິດ ແລະ ເປັນເອກະພາບ ລະຫວ່າງບັນດາໜ່ວຍງານຂອງທະນາຄານແຫ່ງລັດ ທັງພາຍໃນແລະພາຍນອກຂະແໜງການ; ເອົາໃຈໃສ່ສະໜອງຂໍ້ມູນຢ່າງທັນທ່ວງທີໃຫ້ແກ່ສະມາຊິກສະພາແຫ່ງຊາດ, ຜູ້ຊ່ຽວຊານດ້ານເສດຖະກິດແລະການເງິນ.
ທີສາມ: ວິທີການສື່ສານໄດ້ຮັບການປ່ຽນແປງຢ່າງຕໍ່ເນື່ອງ ມີຄວາມຫຼາກຫຼາຍ ແລະ ໃກ້ຊິດກັບສາທາລະນະຊົນ. ແຕ່ປີ 2017, ນອກຈາກການຖະແຫຼງຂ່າວ ແລະການສະໜອງຂໍ້ມູນເປັນປະຈຳຫຼຶບໍ່ຄາດຄິດ, ເມື່ອມີຄວາມຕ້ອງການ, ທະນາແຫ່ງລັດຈະປະສານງານກັບສະຖານີໂທລະພາບຫວຽດນາມ ສຳນັກຂ່າວ ສື່ມວນຊົນ ໜັງສືພິມ ແລະກິດຈະການອື່ນໆທີ່ກ່ຽວຂ້ອງ ເພື່ອປະຕິບັດໂຄງການການສືກສາ ແລະ ການສື່ສານທາງການເງິນໃນຊຸມຊົນ ແນໃສ່ປັບປຸງຍົກສູງຄວາມຮູ້ກ່ຽວກັບການເງິນແລະເງິນຕາໃຫ້ແກ່ບັນດາກຸ່ມປະຊາກອນ, ປະກອບສ່ວນໃນການບັນລຸເປົ້າໝາຍກ່ຽວກັບການເງິນທີ່ຮອບດ້ານ, ການຊຳລະເງິນທີ່ບໍ່ໃຊ້ເງິນສົດ, ການປັບປຸງຄວາມສາມາດໃນການເຂົ້າເຖິງບໍລິການທະນາຄານ ໃນລະບົບເສດຖະກິດແລະອື່ນໆ.
ທີສີ່, ຈັດຕັ້ງຊຸດບຳລຸງສ້າງແລະເຝິກອົບຮົມຫຼັກສູດການເຮັດວຽກງານດ້ານການສື່ສານໃຫ້ແກ່ຜູ້ນຳກົມ ພະແນກ ໜ່ວຍງານຢ່າງສະໝ່ຳສະເໝີ; ຝຶກອົບຮົມຍົກລະດັບຄວາມຮູ້ທາງດ້ານການທະນາຄານໃຫ້ແກ່ນັກຂ່າວທັງໃນແລະນອກຂະແໜງການ.
ທີຫ້າ: ເປັນເຈົ້າການໃນການສະໜອງຂໍ້ມູນ ແລະສື່ສານທັງກ່ອນ ລະຫວ່າງ ແລະ ຫຼັງ ການປະກາດໃຊ້ເອກະສານທາງກົດໝາຍ ໂດຍມີວັດຖຸປະສົງເພື່ອໃຫ້ຂໍ້ມູນມີຄວາມໂປ່ງໃສ ແລະສ້າງຄວາມເຫັນດິເຫັນພ້ອມໃນຄວາມຄິດເຫັນຂອງປະຊາຊົນເມື່ອໄດ້ຮັດເອກະສານນະໂຍບາຍໃໝ່ຈາກທະນາຄານແຫ່ງລັດ. ປະສານງານຢ່າງໃກ້ຊິດກັບບັນດາອົງການພາກລັດ ເພື່ອຈັດການແກ້ໄຂເຫດການທີ່ອາດຈະສົ່ງຜົນເສຍຕໍ່ຊື່ສຽງ ຄວາມເຊື່ອໝັ້ນຂອງຜູ້ຝາກເງິນ ຕະຫຼອດຈົນຄວາມໝັ້ນຄົງແລະຄວາມປອດໄພໃນການດຳເນີນງານຂອງທະນາຄານໂດຍທັນທີ.
ທີຫົກ, ປະສານງານກັບບັດາອົງການການເງິນສາກົນ ເພື່ອສົ່ງເສີມການສື່ສານ ໂຄສະນາການພົວພັນຕ່າງປະເທດ, ເສີມສ້າງຊື່ສຽງແລະພາບພົດຂອງຫວຽດນາມ ໃນເວທີສາກົນ ແລະ ໃນຂະບວນການເຊື່ອມໂຍງເຂົ້າກັບປະຊາຄົມການເງິນ ແລະການທະນາຄານໂລກ.
ປະສົບການໃນການຄຸ້ມຄອງເງິນຕາຕ່າງປະເທດ, ການຈໍາກັດສະພາບ
ການຫັນເປັນໂດລາສະຫະລັດ ແລະ ການຫັນເປັນທອງຄໍາໃນເສດຖະກິດ
ໃນຊຸມປີມໍ່ໆມານີ້, ເພື່ອຈຳກັດສະພາບການຫັນເປັນໂດລາສະຫະລັດ, ຫັນເປັນທອງຄຳໃນເສດຖະກິດ, ລັດຖະບານແລະທະນາຄານແຫ່ງລັດ ຍາມໃດກໍ່ຍືດໝັ້ນໃນເປົ້າໝາຍຄວບຄຸມອັດຕາເງິນເຟີ້, ຮັກສາສະຖຽນລະພາບຂອງເສດຖະກິດມະຫາພາກ, ສະໜັບສະໜູນການເຕີບໂຕທາງເສດຖະກິດ, ດຳເນີນນະໂຍບາຍຄ່ອຍໆປັບປ່ຽນສາຍພົວພັນລະຫວ່າງການລະດົມເງິນທຶນ - ການໃຫ້ກູ້ຢືມ ໄປສູ່ສາຍພົວພັນການຊື້-ຂາຍເງິນຕາຕ່າງປະເທດແລະທອງຄຳ ດ້ວຍແນວທາງແກ້ໄຂດັງນີ້:
ຈຳກັດສະພາບການຫັນເປັນໂດລາສະຫະລັດໃນເສດຖະກິດ
ການຄວບຄຸມອັດຕາເງິນເຟີ້ ແລະ ການຮັກສາສະຖຽນລະພາບຂອງເສດຖະກິດມະຫາພາກ ແມ່ນພື້ນຖານທີ່ສຳຄັນທີ່ສຸດ ໃນການສົ່ງເສີມຄວາມເຊື່ອໝັ້ນຂອງຜູ້ຄົນແລະວິສາຫະກິດຕໍ່ມູນຄ່າຂອງສະກຸນເງິນໃນປະເທດ ແລະແມ່ນຮາກຖານໃນການຕໍ່ສູ້ກັບການຫັນເປັນໂດລາສະຫະລັດແລະຫັນເປັນທອງຄຳໃນເສດຖະກິດ. ຄຽງຄູ່ກັນນັ້ນ, ທະນາຄານແຫ່ງລັດຍັງປະສານສົມທົບມາດຕະການແລະເຄື່ອງມືບໍລິຫານນະໂຍບາຍເງິນຕາ ໂດຍສະເພາະ ນະໂຍບາຍອັດຕາດອກເບ້ຍແລະອັດຕາແລກປ່ຽນ ຢ່າງຄົບຊຸດ ເພື່ອຮັກສາຄວາມດຶງດູດໃຈຂອງເງິນດົ່ງຫວຽດນາມເມື່ອທຽບກັບໂດລາສະຫະລັດ; ຄວບຄຸມເພດານອັດຕາດອກເບ້ຍເງິນຝາກສະກຸນເງິນໂດລາສະຫະລັດ ສຳລັບອົງການແລະບຸກຄົນ (ຫຼຸດລົງເປັນ 0% ຕໍ່ປີໃນທ້າຍປີ 2015) ແລະປະກາດໃຊ້ຂໍ້ກຳນົດຈຳກັດຄວາມຕ້ອງການສິນເຊື່ອທີ່ເປັນເງິນຕາຕ່າງປະເທດ; ການສື່ສານແລະການປະສານງານຢ່າງແໝ້ນແຟ້ນກັບກະຊວງ, ຂະແໜງການ ແລະ ທ້ອງຖີ່ນ ເພື່ອເພີ່ມທະວີການກວດກາ ແລະ ຕິດຕາມການປະຕິບັດຕາມກົດລະບຽບກ່ຽວກັບການໃຊ້ເງິນຕາຕ່າງປະເທດພາຍໃນປະເທດ ກໍ່ຄືການນຳເງິນຕາຕ່າງປະເທດເມື່ອເດີນທາງອອກນອກປະເທດ.
ດ້ວຍການຜັນຂະຫຍາຍບັນດາມາດຕະການແກ້ໄຂທີ່ກ່າວມານັ້ນ, ຄວາມເຊື່ອໝັ້ນໃນເງິນດົ່ງຫວຽດນາມນັບມື້ນັບເພີ່ມຂຶ້ນ, ສະພາບການຫັນເປັນໂດລາສະຫະລັດຫຼຸດລົງຢ່າງໄວ, ຜູ້ຄົນປ່ຽນເງິນຕາຕ່າງປະເທດເປັນເງິນດົ່ງຫວຽດນາມເພື່ອຝາກໃນລະບົບທະນາຄານ, ຈາກນັ້ນ, ປ່ຽນແຫຼ່ງເງິນຕາຕ່າງປະເທດເປັນເງິນດົ່ງ ເພື່ອຮັບໃຊ້ການຜະລິດ, ດຳເນີນທຸລະກິດ ແລະ ພັດທະນາເສດຖະກິດ-ສັງຄົມ. ຕາມນັ້ນ, ອັດຕາສ່ວນເງິນຝາກເງິນຕາຕ່າງປະເທດຕໍ່ວິທີການຊຳເງິນລະທັງໝົດຫຼຸດລົງຈາກ 15,84% ໃນທ້າຍປີ 2011 ເປັນ 10,98% ໃນທ້າຍປີ 2015 ແລະ ສືບຕໍ່ຫຼຸດລົງເຫຼືອປະມານ 7% ໃນປະຈຸບັນ. ສະຖາບັນສິນເຊື່ອຫັນປ່ຽນຈາກທ່າອ່ຽງການຂາຍເງິນຕາຕ່າງປະເທດສຸດທິ ເປັນການຊື້ເງິນຕາຕ່າງປະເທດສຸດທິ.
ກ່ຽວກັບການຄຸ້ມຄອງຕະຫຼາດທອງຄຳ ແລະ ການຈຳກັດສະພາບການຫັນເປັນທອງຄຳໃນເສດຖະກິດ
ປະຕິບັດຕາມການຊີ້ນຳຂອງກົມການເມືອງສູນກາງພັກ ແລະ ລັດຖະບານ ກ່ຽວກັບການຄຸ້ມຄອງການດຳເນີນທຸລະກິດທອງຄຳຢ່າງເຂັ້ມງວດ ເພື່ອແກ້ໄຂຜ່ານຜ່າສະພາບການກັກຕຸນຫາກຳໄລ ແລະ ການຄ້າຜິດກົດໝາຍ, ທະນາຄານແຫ່ງລັດໄດ້ໃຫ້ຄຳແນະນຳແລະສົ່ງໃຫ້ລັດຖະບານ ເພື່ອປະກາດໃຊ້ດຳລັດສະບັບເລກທີ 24/2012/NĐ-CP ລົງວັນທີ 3 ເມສາ 2012 (ດຳລັດເລກທີ່ 24) ວ່າດ້ວຍການຄຸ້ມຄອງການເຄື່ອນໄຫວທຸລະກິດທອງຄຳໂດຍມີເປົ້າໝາຍຕົ້ນຕໍ່ສອງປະການຄື: 1- ຈັດຕັ້ງແລະຈັດວາງຕະຫຼາດຄຳແທ່ງຄືນໃໝ່ໂດຍພື້ນຖານ, ປ້ອງກັນຜົນກະທົບຂອງຄວາມຜັນຜວນຂອງລາຄາທອງຄຳ ຕໍ່ອັດຕາແລກປ່ຽນ, ອັດຕາເງິນເຟີ້ ແລະ ສະຖຽນລະພາບຂອງເສດຖະກິດມະຫາພາກ; 2- ຍົກສູງບົດບາດຂອງລັດໃນການຄຸ້ມຄອງຕະຫຼາດທອງຄຳ, ປ້ອງກັນແລະຍູ້ຖອຍສະພາບການຫັນເປັນທອງຄຳໃນພື້ນຖານເສດຖະກິດ, ຄ່ອຍໆລະດົມຊັບພະຍາກອນທອງຄຳເພື່ອຮັບໃຊ້ການພັດທະນາເສດຖະກິດແລະສັງຄົມ.
ຫຼັງຈາກດຳລັດເລກທີ 24 ໄດ້ຖືກປະກາດໃຊ້, ທະນາຄານແຫ່ງລັດໄດ້ອອກເອກະສານແນະນຳການປະຕິບັດ ເຊິ່ງກຳນົດວ່າ ສະຖານະທອງຄຳຂອງສະຖາບັນສິນເຊື່ອໃນທ້າຍວັນ ຕ້ອງບໍ່ເກີນ 2% ຂອງທຶນຂອງສະຖາບັນສິນເຊື່ອ ແລະ ບໍ່ໃຫ້ຮັກສາສະຖານະທອງຄຳຕິດລົບ ເພື່ອປ້ອງກັນຄວາມສ່ຽງຈາກຄວາມຜັນຜວນຂອງລາຄາທອງຄຳ, ກໍ່ຄືຮັບປະກັນຄວາມປອດໄພໃຫ້ກັບສະຖາບັນສິນເຊື່ອໃນທຸລະກິດຊື້ແລະຂາຍຄຳແທ່ງ. ກ້າວເຖິງການຫັນປ່ຽນຈາກການພົວພັນລະດົມແລະໃຫ້ກູ້ຢືມທຶນເປັນທອງຄຳ ໄປເປັນການພົວພັນຊື້ແລະຂາຍທອງຄຳ, ທະນາຄານແຫ່ງລັດສືບຕໍ່ປະກາດໃຊ້ກົດລະບຽບທີ່ກຳນົດໃຫ້ສະຖາບັນສິນເຊື່ອຕ້ອງຢຸດການລະດົມແລະໃຫ້ກູ້ຢືມທຶນເປັນທອງຄຳ (ໜັງສືວຽນໝາຍເລກ 11/2011/TT-NHNN) ແລະ ຫ້າມລະດົມທຶນເປັນທອງຄຳ ຍົກເວັ້ນກໍລະນີການອອກໃບຮັບຮອງທອງຄຳໄລຍະສັ້ນຕາມຄຳຂໍຂອງລູກຄ້າເມື່ອປະລິມານທອງຄຳເພື່ອການຕິດຕາມໜີ້ ແລະ ສິນຄ້າໃນສາງບໍ່ພຽງພໍຕໍ່ການຊຳລະ (ໜັງສືວຽນໝາຍເລກ 12/2012/TT-NHNN). ພ້ອມກັນນັ້ນ, ທະນາຄານແຫ່ງລັດຈະເພີ່ມທະວີການກວດກາ ແລະ ແກ້ໄຂບັນຫາທີ່ເກີດຂຶ້ນ ເພື່ອຊຸກຍູ້ຂະບວນການຢຸດຕິການລະດົມ ແລະໃຫ້ກູ້ຢືມເປັນທອງຄຳ. ບັນດາມາດຕະການແກ້ໄຂດັ່ງກ່າວໄດ້ຊ່ວຍລົບລ້າງຄວາມສ່ຽງໃນການລະດົມ ແລະໃຫ້ຢືມທຶນເປັນທອງຄຳ, ຢຸດຕິສະພາບການຫັນເປັນທອງຄຳໃນການດຳເນີນງານຂອງລະບົບສະຖາບັນສິນເຊື່ອ, ຊ່ວຍປ່ຽນແຫຼ່ງທອງຄຳເປັນເງິນດົ່ງເພື່ອການຜະລິດແລະທຸລະກິດ, ເພີ່ມທະວີການປະຢັດໂດຍການຝາກເງິນໃນສະຖາບັນສິນເຊື່ອ.
ທິດທາງການບໍລິຫານນະໂຍບາຍເງິນຕາໃນເວລາຕໍ່ໄປ
ການດຳເນີນນະໂຍບາຍເງິນຕາຢ່າງເປັນເຈົ້າການແລະຍຶດຫຍຸ່ນ, ປະສານງານຢ່າງແໜ້ນແຟ້ນກັບນະໂຍບາຍການຄັງ ແລະ ນະໂຍບາຍເສດຖະກິດມະຫາພາກອື່ນໆ ໂດຍມີເປົ້າໝາຍບຸລິມະສິດການຄວບຄຸມເງິນເຟີ້, ປະກອບສ່ວນຮັກສາສະຖຽນລະພາບຂອງເສດຖະກິດມະຫາພາກ ແລະ ສະໜັບສະໜູນການເຕີບໂຕເສດຖະກິດຢ່າງຍືນຍົງ. ດັ່ງນັ້ນ, ໃນເວລາຕໍ່ໄປນີ້ຈະຕ້ອງສຸມໃສ່ເຮັດວຽກງານລຸ່ມນີ້ໃຫ້ໄດ້ເປັນຢ່າງດີ:
ທີໜຶ່ງ, ການຄວບຄຸມອັດຕາດອກເບ້ຍໃຫ້ສອດຄ່ອງກັບພັດທະນາການຕະຫຼາດ ແລະ ເປົ້າໝາຍນະໂຍບາຍການເງິນ; ຊຸກຍູ້ໃຫ້ບັນດາສະຖາບັນສິນເຊື່ອຫຼຸດຜ່ອນຕົ້ນທຶນ ແລະ ປັບປຸງປະສິດທິຜົນການດຳເນີນງານໃຫ້ມີເງື່ອນໄຂໃນການຫຼຸດອັດຕາດອກເບ້ຍການໃຫ້ກູ້ຢືມ.
ທີສອງ, ການຄວບຄຸມອັດຕາແລກປ່ຽນຢ່າງຍືດຫຍຸ່ນ, ການປະສານມາດຕະການແລະເຄື່ອງມືນະໂຍບາຍການເງິນໄປພ້ອມໆກັນ ເພື່ອຮັກສາສະຖຽນລະພາບຂອງຕະຫຼາດແລກປ່ຽນເງິນຕາຕ່າງປະເທດ, ປະກອບສ່ວນໃນການຮັກສາສະຖຽນລະພາບຂອງເສດຖະກິດມະຫາພາກ, ການຄວບຄຸມອັດຕາເງິນເຟີ້ ແລະເພີ່ມທຶນສຳຮອງເງິນຕາຕ່າງປະເທດຂອງລັດເມື່ອສະພາວະຕະຫຼາດເອື້ອອຳນວຍ.
ທີສາມ, ການຄຸ້ມຄອງການເຕີບໂຕສິນເຊື່ອຢ່າງປອດໄພ, ການສ້າງເງື່ອນໄຂທີ່ເອື້ອອຳນນວຍຕໍ່ການເຂົ້າເຖິງແຫຼ່ງສິນເຊື່ອສຳລັບເສດຖະກິດ. ຊີ້ນຳສະຖາບັນສິນເຊື່ອເພື່ອໃຫ້ສິນເຊື່ອເຕີບໂຕຢ່າງປອດໄພແລະມີປະສິດທິຜົນ; ສຸມໃສ່ຂົງເຂດການຜະລິດແລະທຸລະກິດ, ໂດຍສະເພາະຂົງເຂດບຸລິມະສິດຕາມແຜນນະໂຍບາຍຂອງລັດຖະບານ; ກຳນົດທິດທາງໂຄງສ້າງສິນເຊື່ອໃຫ້ສອດຄ່ອງກັບການປ່ຽນແປງຂອງໂຄງສ້າງເສດຖະກິດ, ປະກອບສ່ວນເຂົ້າໃນການຊຸກຍູ້ການເຕີບໂຕ ແລະ ການພັດທະນາຢ່າງຍືນຍົງ; ສືບຕໍ່ຄວບຄຸມສິນເຊື່ອໃນພື້ນທີ່ສ່ຽງຢ່າງເຄັ່ງຄັດ, ຄວບຄຸມການໃຫ້ສິນເຊື່ອເງິນຕາຕ່າງປະເທດຕາມແຜນງານເພື່ອຈຳກັດການຫັນເປັນໂດລາສະຫະລັດໃນພື້ນຖານເສດຖະກິດ ຕາມແຜນນະໂຍບາຍຂອງລັດຖະບານ.
ທີ່ສີ່, ປະສານງານຢ່າງໃກ້ຊິດກັບບັນດາກະຊວງແລະຂະແໜງການ ໃນການແລກປ່ຽນຂໍ້ມູນການບໍລິຫານເສດຖະກິດມະຫາພາກ ແລະ ກິດຈະກຳທະນາຄານ ເພື່ອສ້າງຄວາມເປັນເອກະພາບແລະຄົບຊຸດກັນ ໃນການປະຕິບັດນະໂຍບາຍມະຫາພາກຂອງລັດຖະບານ. ສືບຕໍ່ຍູ້ແຮງການສື່ສານນະໂຍບາຍ ແລະ ຄວາມໂປ່ງໃສຂອງຂໍ້ມູນທາງການເງິນ ແລະ ການທະນາຄານ./.
-------------------------
(1) ອັດຕາສ່ວນສຳທີ່ບັງຄັບໃນສະກຸນເງິນດົ່ງຫວຽດນາມແມ່ນ 3% ສຳລັບການຝາກເງິນໄລຍະຕ່ຳກວ່າ 12 ເດືອນ ແລະ 1% ສຳລັບການຝາກເງິນ 12 ເດືອນຂຶ້ນໄປ; ອັດຕາສ່ວນສຳຮອງບັງຄັບໃນສະກຸນເງິນຕາຕ່າງປະເທດແມ່ນ 8% ສຳລັບການຝາກເງິນໄລຍະຕ່ຳກວ່າ 12 ເດືອນ, 6% ສຳລັບການຝາກເງິນ 12 ເດືອນຂຶ້ນໄປ ແລະ 1% ສຳລັບການຝາກເງິນຂອງສະຖາບັນສິນເຊື່ອຕ່າງປະເທດ.
(2) ອັດຕາດອກເບ້ຍສະໜອງທຶນໃໝ່ຈາກ 9% ເປັນ 15% ຕໍ່ປີ; ອັດຕາດອກເບ້ຍສ່ວນຫຼຸດຈາກ 7% ເປັນ 13% ຕໍ່ປີ; ອັດຕາດອກເບ້ຍເງິນກູ້ຂ້າມຄືນໃນການຊຳລະເງິນທາງເອເລັກໂຕຮນິກລະຫວ່າງທະນາຄານຈາກ 9% ເຖິງ 16% ຕໍ່ປີ.
(3) ອັດຕາດອກເບ້ຍເງິນຝາກຫວຽດນາມດົ່ງໃນຫຼາຍທະນາຄານສູງເຖິງ 17% ຕໍ່ປີ; ອັດຕາດອກເບ້ຍເງິນຝາກບໍ່ມີກຳນົດເວລາເງິນດົ່ງຫວຽດນາມສູງເຖິງ 14% ຕໍ່ປີ, ເທົ່າກັບເພດານທີ່ທະນາຄານແຫ່ງລັດກຳນົດ ສົ່ງຜົນໃຫ້ອັດຕາດອກເບ້ຍເງິນກູ້ເພີ່ມຂຶ້ນ, ໃນບາງກໍລະນີສູງເຖິງ 25% ຕໍ່ປີ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1009 (ເດືອນມີນາ 2023)