ທິດທາງ ແລະ ວິທີແກ້ໄຂການກວດກາແລະຄວບຄຸມ
ການເງິນສາທາລະນະ ແລະ ຊັບສິນສາທາລະນະ
ຂອງອົງການກວດສອບບັນຊີແຫ່ງລັດ
ການເງິນສາທາລະນະ ແລະ ຊັບສິນສາທາລະນະ
ຂອງອົງການກວດສອບບັນຊີແຫ່ງລັດ
ກຳມະການສູນກາງພັກ, ຫົວໜ້າອົງການກວດສອບບັນຊີແຫ່ງລັດ ໂງ ວັນ ຕ໋ວນ ເຮັດວຽກທີ່ ສະຫະບໍລິສັດ ເຕິນກ໋າງ ໄຊງ່ອນ _ແຫຼ່ງ: ckt.gov.vn
ບົດບາດຂອງການກວດສອບບັນຊີແຫ່ງລັດໃນການກວດກາແລະຄວບຄຸມ
ການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ
ໃນໂລກນີ້, ການກວດສອບບັນຊີຂອງລັດມີປະວັດສາດແຫ່ງການກໍ່ຕັ້ງແລະການພັດທະນາເປັນເວລາຮ້ອຍປີ ແລະ ນັບມື້ນັບໄດ້ຮັບການຢືນຢັນວ່າເປັນສ່ວນທີ່ຂາດບໍ່ໄດ້ຂອງລະບົບອຳນາດລັດສະໄໝໃໝ່. ບັນຫາການປະຕິຮູບນະໂຍບາຍການຄຸ້ມຄອງຊັບພະຍາກອນສາທາລະນະ ເພື່ອເພີ່ມປະສິດທິພາບການນຳໃຊ້ສູງສຸດ, ຜ່ານນັ້ນ ການປັບປຸງຍົກສູງປະສິດທິພາບເສດຖະກິດ ແມ່ນຄວາມຮຽກຮ້ອງຕ້ອງການກ່ຽວກັບການຄຸ້ມຄອງລະດັບຊາດ ເຊິ່ງຫວຽດນາມກໍ່ບໍ່ມີຂໍ້ຍົກເວັ້ນ. ການຈັດຕັ້ງແລະພັດທະນາການກວດສອບບັນຊີຂອງລັດຖືເປັນຄວາມຕ້ອງການທີ່ຫຼີກລ້ຽງບໍ່ໄດ້ ໂດຍຕອບສະໜອງຄວາມຕ້ອງການໃນການປັບປຸງຍົກສູງຄວາມເປີດເຜີຍ ຄວາມໂປ່ງໃສ ແລະ ເພີ່ມທະວີລະບຽບວິໄນ, ຈາກນັ້ນ ປັບປຸງຍົກສູງປະສິດທິພາບການຄຸ້ມຄອງ ແລະນຳໃຊ້ການເງິນສາທາລະນະ ແລະຊັບສິນສາທາລະນະ; ເພີ່ມທະວີຄວາມຮັບຜິດຊອບໃນການອະທິບາຍລາຍງານຂອງອົງການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ. ບົດບາດຂອງການກວດສອບບັນຊີຂອງລັດ ໃນການກວດກາແລະຄຸ້ມຄອງຊັບພະຍາກອນສາທາລະນະສະແດງອອກໃນບາງຈຸດຕໍ່ໄປນີ້:
ທີ່ໜຶ່ງ, ອົງການກວດສອບບັນຊີຂອງລັດດຳເນີນການກວດສອບບັນຊີ ແລະສະໜອງຂໍ້ມູນໃຫ້ສະພາແຫ່ງຊາດ ແລະອົງການທີ່ໄດ້ຮັບເລືອກຕັ້ງທຸກຂັ້ນ ກ່ຽວກັບສະພາບການຄຸ້ມຄອງງົບປະມານຂອງລັດ, ກອງທຶນການເງິນສາທາລະນະ ກໍ່ຄືການຄຸ້ມຄອງ ແລະ ນຳໃຊ້ຊັບພະຍາກອນ ເຊັ່ນ ທີ່ດິນ, ຊັບພະຍາກອນແຮ່ທາດ... ຈາກນັ້ນ, ຊ່ວຍໃຫ້ອົງການທີ່ໄດ້ຮັບເລືອກຕັ້ງຕັດສິນໃຈຈັດສັນຢ່າງເໝາະສົມ ແລະ ມີນະໂຍບາຍຄຸ້ມຄອງຊັບພະຍາກອນສາທາລະນະຢ່າງເຂັ້ມງວດ ແລະ ມີປະສິດທິຜົນ. ລາຍງານການກວດສອບບັນຊີເປັນພື້ນຖານທີ່ສຳຄັນ ເພື່ອໃຫ້ສະພາແຫ່ງຊາດ ແລະ ບັນດາອົງການທີ່ໄດ້ຮັບເລືອກຕັ້ງປະຕິບັດໜ້າທີ່ຕິດຕາມກວດກາ ແລະ ປະຕິບັດໜ້າທີ່ແລະອຳນາດຂອງຕົນ. ພ້ອມກັນນັ້ນ, ອົງການກວດສອບບັນຊີຂອງລັດກໍ່ໃຫ້ຄວາມເຫັນແກ່ສະພາແຫ່ງຊາດໃນການພິຈາລະນາ ແລະຕັດສິນຕົກລົງແຜນນະໂຍບາຍການລົງທຶນໃນໂຄງການເປົ້າໝາຍແຫ່ງຊາດ ແລະໂຄງການແຫ່ງຊາດທີ່ສຳຄັນ.
ທີສອງ, ອົງການກວດສອບບັນຊີແຫ່ງລັດປະກອບສ່ວນຊ່ວຍໃຫ້ສະພາແຫ່ງຊາດ ລັດຖະບານ ອົງການບໍລະຫານຈັດການແຫ່ງລັດ ແລະ ອົງການໜ່ວຍງານອື່ນໆຂອງລັດ ປັບປຸງກົນໄກຄຸ້ມຄອງຊັບພະຍາກອນສາທາລະນະໃຫ້ສົມບູນແບບ. ຜ່ານກິດຈະກຳກວດສອບບັນຊີ, ອົງການກວດສອບບັນຊີແຫ່ງລັດຈະກວດຈັບແລະຊີ້ໃຫ້ເຫັນຄວາມຜິດພາດ ໃນກົນໄກການຄຸ້ມຄອງທັນທີ (ຄວາມຂັດແຍ້ງ, ການທັບຊ້ອນ, ຂໍ້ຜິດພາດ...); ລະບອບ, ມາດຕະຖານ ແລະບັນທັດຖານທີ່ບໍ່ເໝາະສົມ ຫຼືຂາດຄວາມຄົບຊຸດ, ຈາກນັ້ນ ສະເໜີໃຫ້ເຈົ້າໜ້າທີ່ແກ້ໄຂ ເພີ່ມເຕີມ ແທນທີ່ ຍົກເລີກ ແລະ ມີວິທີແກ້ໄຂເພື່ອຜ່ານຜ່າ “ຊ່ອງຫວ່າງ” ໃນກົນໄກແລະນະໂຍບາຍ, ຫຼີກລ່ຽງຄວາມສູນເສຍ ແລະການສິ້ນເປືອງ, ຮັດແໜ້ນລະບຽບວິໄນດ້ານການເງິນ ເພື່ອເຮັດໃຫ້ແຫຼ່ງຊັບພະຍາກອນສາທາລະນະຖືກນຳໃຊ້ຢ່າງຖືກຕ້ອງຕາມຈຸດປະສົງ ແລະ ມີປະສິດທິພາບ.
ທີສາມ, ອົງການກວດສອບບັນຊີແຫ່ງລັດສະເໜີໃຫ້ບັນດາອົງການແລະໜ່ວຍງານທີ່ຄຸ້ມຄອງ ແລະນຳໃຊ້ແຫຼ່ງຊັບພະຍາກອນສາທາລະນະໂດຍກົງ, ຜ່ານນັ້ນ ເຮັດໃຫ້ການຄຸ້ມຄອງແລະນຳໃຊ້ເປັນໄປຕາມຈຸດປະສົງ ແລະ ມີປະສິດທິຜົນ. ຜ່ານການກວດສອບບັນຊີ, ອົງການກວດສອບບັນຊີແຫ່ງລັດຊີ້ໃຫ້ເຫັນຂໍ້ຈຳກັດ ແລະຄວາມບໍ່ພຽງພໍ ໃນການໃຊ້ຊັບພະຍາກອນສາທາລະນະຂອງອົງການ ແລະໜ່ວຍງານ ທີ່ໄດ້ຮັບການກວດສອບ, ຜ່ານນັ້ນ ສະເໜີແນະໃຫ້ເກັບຄືນການຊຳລະເງິນທີ່ຜິດກົດໝາຍ ແລະແກ້ໄຂຈຸດອ່ອນໃນການຄຸ້ມຄອງ ເພື່ອຮັບປະກັນການນຳໃຊ້ຊັບພະຍາກອນສາທາລະນະຕາມກົດໝາຍ ແລະ ມີປະສິດທິຜົນ; ພ້ອມກັນນັ້ນ, ກໍສະເໜີແນະໃຫ້ຈັດການຄວາມຮັບຜິດຊອບຂອງອົງການ ແລະບຸກຄົນທີ່ກ່ຽວຂ້ອງຢ່າງເຂັ້ມງວດ. ສຳລັບການລະເມີດຢ່າງຮ້າຍແຮງ ມີສັນຍານຂອງການລະເມີດກົດໝາຍ ການສໍ້ລາດບັງຫຼວງ ແລະຄວາມຫຍໍ້ທໍ້, ອົງການກວດສອບບັນຊີແຫ່ງລັດຈະໂອນເອກະສານໃຫ້ອົງການສືບສວນ, ໄອຍະການ ແລະສານ ເພື່ອດຳເນີນການສືບສວນແລະຈັດການຕາມຂໍ້ກໍານົດຂອງກົດໝາຍໂດຍທັນທີ, ຜ່ານນັ້ນ ກ່າວເຕືອນໜ່ວຍງານອື່ນໆໃນການຄຸ້ມຄອງຊັບພະຍາກອນສາທາລະນະຢ່າງເຂັ້ມງວດ, ຖືກຕ້ອງຕາມຂໍ້ກຳນົດຂອງກົດໝາຍ ແລະມີປະສິດທິຜົນ.
ທີສີ່, ການເຄື່ອນໄຫວຂອງອົງການກວດສອບບັນຊີແຫ່ງລັດປະກອບສ່ວນເຂົ້າໃນການຕໍ່ສູ້ຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ການສູນເສຍເງິນທຶນສາທາລະນະ ແລະ ຊັບສິນຂອງຊາດ, ສ້າງລະບຽບວິໄນໃນການຄຸ້ມຄອງເສດຖະກິດແລະການເງິນ, ປັບປຸງຄວາມໄວ້ວາງໃຈຂອງປະຊາຊົນຕໍ່ຄະນະພັກ, ອຳນາດການປົກຄອງ ແລະ ອົງການຄຸ້ມຄອງລັດ. ການເຄື່ອນໄຫວຂອງອົງການກວດສອບບັນຊີຂອງລັດປະກອບສ່ວນສຳຄັນໃນການເພີ່ມຄວາມໂປ່ງໃສ ແລະຄວາມຮັບຜິດຊອບໃນການອະທິບາຍລາຍງານ ຂອງອົງການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ, ສ້າງສະພາບແວດລ້ອມທີ່ດີທີ່ສຸດ ເພື່ອປ້ອງກັນແລະຕໍ່ສູ້ກັບການສໍ້ລາດບັງຫຼວງ ການໃຊ້ຈ່າຍຟຸມເຟືອຍ ແລະຄວາມຫຍໍ້ທໍ້. ລາຍງານການກວດສອບບັນຊີແມ່ນພື້ນຖານທີ່ສຳຄັນເພື່ອໃຫ້ອົງການສືບສວນ ກວດກາ ໃຊ້ໃນການພິຈາລະນາ ແລະຮັບໃຊ້ການສືບສວນ ການກວດກາ ການເຄື່ອນໄຫວດ້ານກົດໝາຍ ແລະຕິດຕາມກວດກາຢ່າງແຂງຂັນ.
ໝາກຜົນສຳຄັນຂອງການກວດສອບບັນຊີຂອງລັດໃນເວລາທີ່ຜ່ານມາ ບໍ່ພຽງແຕ່ປະຢັດເງິນໄດ້ຫຼາຍພັນຕື້ດົ່ງໃຫ້ງົບປະມານຂອງລັດເທົ່ານັ້ນ, ແຕ່ຍັງຊ່ວຍໃຫ້ບັນດາອົງການຂອງລັດມີເຄື່ອງມືໃນການຄຸ້ມຄອງການເງິນ ແລະຊັບສິນສາທາລະນະທີ່ສຳຄັນ ແລະ ສ້າງຈິດສຳນຶກໃໝ່ໃນການຄຸ້ມຄອງ ແລະນຳໃຊ້ຊັບພະຍາກອນສາທາລະນະຢ່າງມີຄວາມຮັບຜິດຊອບ ແລະ ມີປະສິດທິຜົນ. ຜ່ານການເຄື່ອນໄຫວຂອງອົງການກວດສອບບັນຊີແຫ່ງລັດ ພ້ອມກັນກັບບັນດາເຄື່ອງມືກວດກາທາງການເງິນອື່ນໆ, ບັນດາອົງການແລະການຈັດຕັ້ງຂອງລັດ ຈະຕ້ອງແກ້ໄຂການຄຸ້ມຄອງການເງິນ, ປັບປຸງແລະເພີ່ມທະວີລະບົບການຄວບຄຸມພາຍໃນ ແລະ ວຽກງານກວດສອບພາຍໃນ. ຈາກຜົນການກວດສອບບັນຊີ, ອົງການກວດສອບບັນຊີແຫ່ງລັດຍັງໄດ້ຄົ້ນພົບຂໍ້ຈຳກັດ ແລະຄວາມບໍ່ພຽງພໍ ໃນລະບອບການປົກຄອງແລະນະໂຍບາຍຂອງລັດ ແລະ ສະເໜີການແກ້ໄຂແລະເພີ່ມເຕີມ ເພື່ອປະປຸງໃຫ້ສົມບູນແບບ. ຜົນຂອງການເຄື່ອນໄຫວກວດສອບບັນຊີຂອງລັດຢືນຢັນຕຳແໜ່ງທີ່ຕັ້ງຂອງອົງການກວດສອບບັນຊີແຫ່ງລັດໃນລະບົບຈັກຂອງລັດ, ໂດຍຢືນຢັນເຖິງຄວາມຈຳເປັນໃນການປັບປຸງແລະພັດທະນາການກວດສອບບັນຊີຂອງລັດ ໃຫ້ເປັນເຄື່ອງມືກວດກາແລະຄວບຄຸມການເງິນສາທາລະນະທີ່ຂາດບໍ່ໄດ້ຂອງລັດແຫ່ງອຳນາດກົດໝາຍສັງຄົມນິຍົມ.
ທິດທາງເສີມຂະຫຍາຍບົດບາດຂອງອົງກວດສອບບັນຊີແຫ່ງລັດໃນການກວດກາແລະຄວບຄຸມ
ການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ
ເພື່ອເສີມຂະຫຍາຍບົດບາດຂອງຕົນຕາມບົດບັນຍັດຂອງລັດຖະທຳມະນູນ ແລະກົດໝາຍ ແນໃສ່ປະຕິບັດເປົ້າໝາຍຍຸດທະສາດການພັດທະນາການກວດສອບບັນຊີຂອງລັດເຖິງປີ 2030 ທີ່ອອກໂດຍຄະນະກຳມະການປະຈຳສະພາແຫ່ງຊາດ ໃນມະຕິທີ່ 999/2020/UBTVQH14 ວັນທີ 16 ກັນຍາ 2020, ເພື່ອພັດທະນາການກວດສອບບັນຊີຂອງລັດ ໃຫ້ເປັນເຄື່ອງມືສຳຄັນແລະມີປະສິດທິພາບຂອງພັກແລະລັດ ໃນການກວດກາແລະຄວບຄຸມການຄຸ້ມຄອງ ແລະນຳໃຊ້ ການເງິນແລະຊັບສິນສາທາລະນະ; ຍົກສູງຄວາມຮັບຜິດຊອບໃນການອະທິບາຍລາຍງານ ແລະ ຮັບປະກັນຄວາມເປີດເຜີຍແລະໂປ່ງໃສຂອງອົງການໃຊ້ງົບປະມານຂອງລັດ, ຮັບໃຊ້ການເຄື່ອນໄຫວຂອງບັນດາອົງການໃນການປະຕິບັດອຳນາດລັດຢ່າງມີປະສິດທິພາບ; ສະໜັບສະໜູນສະພາປະຊາຊົນ ແລະຄະນະກຳມະການປະຊາຊົນທ້ອງຖິ່ນ ໃນການຄຸ້ມຄອງ, ການກຳກັບດູແລ, ການຕິດຕາມກວດກາ ແລະ ການຕັດສິນຕົກລົງບັນດາບັນຫາສຳຄັນຂອງທ້ອງຖິ່ນ; ປັບປຸງຄວາມສາມາດ ປະສິດທິພາບ ແລະປະສິດທິຜົນ ໃນການເຄື່ອນໄຫວກວດສອບບັນຊີ ໂດຍການປະຍຸກໃຊ້ເຕັກໂນໂລຊີຂໍ້ມູນຂ່າວສານ ແລະຍູ້ແຮງການຮ່ວມມືສາກົນ, ຮັບປະກັນການເຄື່ອນໄຫວທີ່ເປີດເຜີຍ ໂປ່ງໃສ ເປັນມືອາຊີບ ເປັນແບບຫຼວງ ແລະ ທັນສະໄໝເທື່ອລະກ້າວ, ສົມຄວນທີ່ຈະເປັນອົງການກວດສອບບັນຊີການເງິນສາທາລະນະ ແລະຊັບສິນສາທາລະນະ ທີ່ມີຄວາມຮັບຜິດຊອບ ແລະມີຊື່ສຽງ, ຕອບສະໜອງຄວາມຕ້ອງການຂອງພັກ ລັດ ແລະປະຊາຊົນ; ປະກອບສ່ວນສຳຄັນເຂົ້າໃນຍົກສູງຄວາມສາມາດໃນການຄຸ້ມຄອງ ແລະການບໍລິຫານງານການເງິນສາທາລະນະ ແລະຊັບສິນສາທາລະນະຂອງລັດ, ຮັບໃຊ້ການພັດທະນາເສດຖະກິດແລະສັງຄົມຂອງປະເທດໃນໄລຍະປີ 2021-2030, ໃນເວລາທີ່ຈະມາເຖິງນີ້ ຈຳເປັນຕ້ອງສຸມໃສ່ກິດຈະກຳການກວດສອບບັນຊີ ຕາມທິດທາງສຳຄັນດັງຕໍ່ໄປນີ້:
ທີໜຶ່ງ, ການປັບປຸງກົດໝາຍການກວດສອບບັນຊີຂອງລັດໃຫ້ສົມບູນແບບ ໂດຍອີງໃສ່ທັດສະນະ ແຜນນະໂຍບາຍ ແລະ ແນວທາງຂອງພັກແລະລັດ ກ່ຽວກັບການສ້າງແລະປັບປຸງລັດແຫ່ງອຳນາດກົດໝາຍສັງຄົມນິຍົມຫວຽດນາມໃຫ້ສົມບູນແບບ ແລະ ການພັດທະນາການກວດສອບບັນຊີຂອງລັດຖືເປັນເຄື່ອງມືສຳຄັນແລະມີປະສິດທິພາບຂອງພັກແລະລັດ ໃນການກວດກາແລະຄວບຄຸມການຄຸ້ມຄອງການເງິນສາທາລະນະ ແລະຊັບສິນສາທາລະນະ. ໃນການເຄື່ອນໄຫວກວດສອບບັນຊີແຫ່ງລັດ ຈຳເປັນຕ້ອງປະຕິບັດຕາມແນວທາງ ແຜນນະໂຍບາຍ ແລະນະໂຍບາຍຂອງພັກ ກ່ຽວກັບການພັດທະນາການກວດສອບບັນຊີແຫ່ງລັດ ໄດ້ຮັບການຫັນເປັນລະບຽບລະບອບທີ່ສົມບູນ ຖືກຕ້ອງ ແລະທັນທ່ວງທີ ແລະ ເພື່ອສ້າງລະບົບກົດໝາຍການກວດອບບັນຊີຂອງລັດທີ່ຮອບດ້ານ ເປັນເອກະພາບ ແລະຄົບຖ້ວນ ຕັ້ງແຕ່ບົດບັນຍັດຂອງລັດຖະທຳມະນູນ ຈົນເຖິງກົດໝາຍການກວດສອບບັນຊີຂອງລັດ ແລະບັນດາກົດໝາຍທີ່ກ່ຽວຂ້ອງ, ເອກະສານທາງກົດໝາຍແນະນຳການປະຕິບັດ ແລະ ລະບົບມາດຕະຖານ, ຂັ້ນຕອນການກວດສອບບັນຊີ... ບົນຫຼັກການການກວດສອບທີ່ເປັນເອກະລາດ ແລະ ປະຕິບັດຕາມກົດໝາຍເທົ່ານັ້ນ.
ທີສອງ, ເພີ່ມທະວີການກວດສອບການປະຕິບັດງານ, ການກວດສອບສະເພາະທາງ, ການເລືອກການກວດສອບບັນຫາສຳຄັນທີ່ກ່ຽວຂ້ອງກັບການຄຸ້ມຄອງ ແລະການໃຊ້ປະໂຫຍດຈາກຊັບພະຍາກອນສາທາລະນະ; ບັນດາຂົງເຂດທີ່ມີຜົນກະທົບຢ່າງແຮງເຖິງຊີວິດທາງເສດຖະກິດແລະສັງຄົມ, ເຮັດໃຫ້ເກີດການສູນເສຍແລະສິ້ນເປືອງຊັບພະຍາກອນສາທາລະນະໄດ້ງ່າຍ ເຊັ່ນ ຊັບພະຍາກອນແຮ່ທາດ, ທີ່ດິນ, ງົບປະມານຂອງລັດ, ບັນດາໂຄງການລະດັບຊາດທີ່ສຳຄັນ ເຊິ່ງເປັນບັນຫາທີ່ຜູ້ມີສິດເລືອກຕັ້ງ ແລະປະຊາຊົນໃຫ້ຄວາມສົນໃຈເປັນພິເສດ. ໃນຂະບວນການພັດທະນາເສດຖະກິດແລະສັງຄົມຂອງປະເທດ, ການຂຸດຄົ້ນຊັບພະຍາກອນຢ່າງມີຄວາມຮັບຜິດຊອບມີຄວາມສຳຄັນທີ່ສຸດ, ໃນຂະນະທີ່ຊັບພະຍາກອນນັ້ນມີຈຳກັດ. ດັ່ງນັ້ນ, ການກວດສອບບັນຊີຂອງລັດຈຶງສຸມໃສ່ກວດສອບບັນຊີເພື່ອສະເໜີແນະໃຫ້ບັນດາອົງການຂອງລັດ ມີມາດຕະການແກ້ໄຂຢ່າງມີປະສິດທິຜົນທີ່ສຸດ ໃນການຄຸ້ມຄອງຊັບພະຍາກອນທີ່ມີຈຳກັດ ເພື່ອຮັບໃຊ້ການພັດທະນາເສດຖະກິດແລະສັງຄົມຂອງປະເທດ. ອົງການກວດສອບບັນຊີແຫ່ງລັດ ໄດ້ກຳນົດວ່າ ນີ້ແມ່ນພາລະກິດສຳຄັນທີ່ຕ້ອງຜັນຂະຫຍາຍປະຕິບັດຢ່າງເຂັ້ມງວດແລະເຂັ້ມແຂງ.
ທີສາມ, ທົບທວນນະໂຍບາຍກ່ຽວກັບການກວດສອບບັນຊີ ເພື່ອປະເມີນປະສິດທິພາບແລະປະສິດທິຜົນຂອງກົນໄກ ແລະນະໄຍບາຍທີ່ກ່ຽວຂ້ອງກັບການຄຸ້ມຄອງ ແລະນຳໃຊ້ການເງິນສາທາລະນະ, ຊັບສິນສາທາລະນະ. ຜ່ານການກວດສອບປະເມີນນະໂຍບາຍແລະໂຄງການທີ່ໃຊ້ຊັບພະຍາກອນສາທາລະນະ ຈະຄົ້ນເຜີຍຊ່ອງຫວ່າງ, ຄວາມບໍ່ພຽງພໍ, “ຈຸດອຸດຕັນ”, ອຸປະສັກຂອງນະໂຍບາຍ, ຄວາມສ່ຽງຕໍ່ການສູນເສຍຫຼືປະສິດທິພາບການໃຊ້ຊັບພະຍາກອນສາທາລະນະທີ່ຫຼຸດລົງ, ໃຫ້ຄຳແນະນຳທີ່ເໝາະສົມເພື່ອດັດປ່ຽນນະໂຍບາຍໂດຍທັນທີ. ນີ້ແມ່ນການເຄື່ອນໄຫວສະໝ່ຳສະເໝີແລະຕໍ່ເນື່ອງ ເຊິ່ງມີສ່ວນສຳຄັນໃນການປັບປຸງນະໂຍບາຍແລະກົດໝາຍ ກ່ຽວກັບຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ ໃຫ້ສົມບູນແບບ.
ທີສີ່, ສະໜອງຂໍ້ມູນຂ່າວສານຢ່າງທັນການໃຫ້ສະພາແຫ່ງຊາດ, ລັດຖະບານ, ອົງການຄຸ້ມຄອງລັດ ແລະ ບັນດາອົງການແລະໜ່ວຍງານອື່ນໆຂອງລັດ ທັງສູນກາງ ແລະ ທ້ອງຖິ່ນ. ອົງການກວດສອບບັນຊີແຫ່ງລັດມີໜ້າທີ່ກວດສອບ ຢືນຢັນ ແລະ ສະໜອງຂໍ້ມູນຂ່າວສານແກ່ຜູ້ທີ່ກ່ຽວຂ້ອງນຳໄປໃຊ້. ຕາມແນວປະຕິບັດສາກົນ, ແຫຼ່ງຂໍ້ມູນຂ່າວສານທີ່ອົງການກວດສອບບັນຊີແຫ່ງລັດສະໜອງໃຫ້ ແມ່ນແຫຼ່ງຂໍ້ມູນຂ່າວສານທີ່ມີຄວາມເຊື່ອຖືສູງຮັບໃຊ້ການເຄື່ອນໄຫວຂອງອົງການລັດ ໃນການຄຸ້ມຄອງ, ການບໍລິຫານ ແລະ ຕິດຕາມກວດກາການຄຸ້ມຄອງ ແລະນຳໃຊ້ຊັບພະຍາກອນສາທາລະນະ. ດັ່ງນັ້ນ, ນີ້ແມ່ນໜ້າທີ່ສຳຄັນໃນການສະໜອງແຫຼ່ງຂໍ້ມູນທີ່ເຊື່ອຖືໄດ້ໃຫ້ແກ່ວຽກງານປ້ອງກັນ ແລະຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ ການສິ້ນເປືອງເສຍຫາຍ ທີ່ກຳລັງດຳເນີນການຢ່າງເຖິງຖອງ, ດຸເດືອດ ໂດຍບໍ່ມີຂໍ້ຍົກເວັ້ນ ບໍ່ມີເຂດຫວງຫ້າມ.
ທີຫ້າ, ອົງການກວດສອບບັນຊີຂອງລັດສຸມໃສ່ຕອບສະໜອງໜ້າທີ່ຮັບໃຊ້ສະພາແຫ່ງຊາດ ໃນການພິຈາລະນາແລະຕັດສິນຕົກລົງປະມານການງົບປະມານຂອງລັດປະຈໍາປີ ແລະອະນຸມັດການຊໍາລະງົບປະມານຂອງລັດ. ນີ້ແມ່ນໜ້າທີ່ປົກກະຕິ ຕໍ່ເນື່ອງ ແລະເປັນແບບດັ້ງເດີມ ໃນການເຄື່ອນໄຫວຂອງອົງການກວດສອບບັນຊີສູງສຸດໃນໂລກ. ອົງການກວດສອບບັນຊີແຫ່ງລັດສຸມໃສ່ພິຈາລະນາ ແລະເຂົ້າຮ່ວມຢ່າງມີຄວາມຮັບຜິດຊອບ ໃນການຄາດຄະເນງົບປະມານຂອງລັດ ແລະ ແຜນການຈັດສັນງົບປະມານສູນກາງ ກ່ອນທີ່ສະພາແຫ່ງຊາດຕັດສິນ. ພ້ອມກັນນັ້ນ, ສູ້ຊົນໃຫ້ບັນລຸການກວດສອບການຊຳລະງົບປະມານຂອງລັດເປັນປະຈຳທຸກປີ 100% ຂອງກະຊວງ ອົງການສູນກາງ ແລະ ການຊຳລະງົບປະມານທ້ອງຖິ່ນຂອງແຂວງແລະນະຄອນທີ່ຂຶ້ນກັບສູນກາງ ຕາມແຜນງານທີ່ກຳນົດໄວ້ໃນຍຸດທະສາດການພັດທະນາການກວດສອບບັນຊີຂອງລັດເຖິງປີ 2030.
ວິທີແກ້ໄຂໃນການກວດກາ ແລະ ຄວບຄຸມການເງິນສາທາລະນະ
ແລະຊັບສິນສາທາລະນະຂອງອົງການກວດສອບບັນຊີແຫ່ງລັດ ໃນໄລຍະຈະມາເຖິງ
ທີໜຶ່ງ, ປັບປຸງກອບກົດໝາຍສຳລັບການເຄື່ອນໄຫວຂອງອົງການກວດສອບບັນຊີຂອງລັດໃຫ້ຄົບຖ້ວນ, ຄົ້ນຄວ້າສະເໜີສືບຕໍ່ປັບປຸງລັດຖະທຳມະນູນ ແລະ ເອກະສານກົດໝາຍ ເພື່ອຮັບປະກັນໃຫ້ອົງການກວດສອບບັນຊີແຫ່ງລັດ ປະຕິບັດພາລະບົດບາດ ແລະໜ້າທີ່ຂອງຕົນຢ່າງຄົບຖ້ວນ ຕາມຂໍ້ກຳນົດຂອງລັດຖະທຳມະນູນ, ຮັບປະກັນຄວາມເປັນເອກະພາບແລະຄົບຊຸດ ໃນລະບົບເອກະສານກົດໝາຍ ແລະ ເອກະສານບໍລິຫານ, ຢືນຢັນຕຳແໜ່ງແລະບົດບາດ ຂອງອົງການກວດສອບບັນຊີແຫ່ງລັດ ໃນຖານະອົງການກວດສອບສູງສຸດ ສຳລັບການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ ໂດຍສະພາແຫ່ງຊາດຈັດຕັ້ງຂຶ້ນ, ດຳເນີນງານຢ່າງເປັນເອກະລາດ ແລະ ປະຕິບັດຕາມກົດໝາຍ, ສອດຄ່ອງກັບມາດຕະຖານ ແລະແນວປະຕິບັດສາກົນ.
ທີສອງ, ການເຄື່ອນໄຫວກວດສອບບັນຊີມີຄວາມຊ່ຽວຊານທາງວິຊາຊີບສູງ, ປັດໄຈມະນຸດມີຄວາມໝາຍສຳຄັນ ແລະຕັດສິນຊີ້ຂາດເຖິງຄຸນນະພາບ ແລະປະສິດທິພາບຂອງການກວດສອບບັນຊີ. ດັ່ງນັ້ນ, ຂະແໜງການນີ້ຕ້ອງມີແຜນການ ແລະຍຸດທະສາດການຝຶກອົບຮົມແລະບຳລຸງສຶກສາ ເພື່ອປັບປຸງຍົກສູງຄຸນນະພາບຊັບພະຍາກອນມະນຸດຢ່າງຮອບດ້ານ, ຮັບປະກັນຕອບສະໜອງຄວາມຕ້ອງການແລະໜ້າທີ່ໄດ້ເປັນຢ່າງດີ, ຄ່ອຍໆເຂົ້າໃກ້ລະດັບພາກພື້ນແລະສາກົນ; ຕໍ່ສູ້ຢ່າງເດັດດ່ຽວເພື່ອປ້ອງກັນແລະຕ້ານການສໍ້ລາດບັງຫຼວງແລະຄວາມຫຍໍ້ທໍ້ໃນຖັນແຖວຜູ້ກວດສອບບັນຊີ. ເມື່ອນັ້ນຈຶງສາມາດຍົກສູງຖານະຕຳແໜ່ງແລະຊື່ສຽງ ກໍ່ຄືເສີມຂະຫຍາຍເປັນຢ່າງດີ ບົດບາດຂອງອົງການກວດສອບບັນຊີຂອງລັດ ໃນການກວດກາແລະຄວບຄຸມການເງິນສາທາລະນະ ແລະຊັບສິນສາທາລະນະ.
ທີສາມ, ເພີ່ມຄວາມເປີດເຜີຍເຜີຍແຜ່ ແລະ ຄວາມໂປ່ງໃສຂອງຜົນການກວດສອບ, ຜົນການຈັດຕັ້ງປະຕິບັດບົດສະຫຼຸບການກວດສອບ ແລະ ຂໍ້ສະເໜີແນະຂອງອົງການກວດສອບບັນຊີແຫ່ງລັດ ເພື່ອດຶງດູດການເຂົ້າຮ່ວມຂອງປະຊາຊົນຢ່າງກ້ວາງຂວາງ, ປະກອບສ່ວນສະກັດກັ້ນການສູນເສຍ ແລະການສິ້ນເປືອງຊັບພະຍາກອນສາທາລະນະ. ການເຄື່ອນໄຫວຂອງອົງການກວດສອບບັນຊີແຫ່ງລັດ ແມ່ນສະຖາບັນທີ່ໂປ່ງໃສ ແລະການປະຕິບັດຄວາມຮັບຜິດຊອບໃນການອະທິບາຍລາຍງານ ຂອງອົງການຂອງລັດໃນການຄຸ້ມຄອງແລະນຳໃຊ້ແຫຼ່ງການເງິນສາທາລະນະ ແລະຊັບສິນສາທາລະນະ ຕັ້ງແຕ່ການອອກແບບນະໂຍບາຍ, ການຈັດຕັ້ງປະຕິບັດ ຈົນເຖິງການປະເມີນນະໂຍບາຍຄືນໃໝ່. ດັ່ງນັ້ນ, ເມື່ອຜົນການກວດສອບບັນຊີ, ຜົນການປະຕິບັດບົດສະຫຼຸບ ແລະ ຂໍ້ສະເໜີແນະຂອງອົງການກວດສອບບັນຊີແຫ່ງລັດ ໄດ້ຮັບການເປີດເຜີຍສູ່ສາທາລະນະ ຈະມີແຮງກົດດັນຕໍ່ຄວາມຄິດເຫັນຂອງປະຊາຊົນ ແລະສາທາລະນະຊົນ, ບັງຄັບໃຫ້ໜ່ວຍງານຕ້ອງແກ້ໄຂຂໍ້ຈຳກັດໃນການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ ຕະຫຼອດຈົນມີຜົນກະທົບຊຸກຍູ້ອົງການຂອງລັດ ໃນການຄຸ້ມຄອງແລະນຳໃຊ້ການເງິນສາທາລະນະ ແລະຊັບສິນສາທາລະນະ, ຜ່ານນັ້ນ ປະກອບສ່ວນປັບປຸງຍົກສູງປະສິດທິຜົນ ປະສິດທິພາບການຄຸ້ມຄອງແລະນຳໃຊ້ຊັບພະຍາກອນສາທາລະນະ, ຈຳກັດການສູນເສຍຫຼຸດຜ່ອນການສິ້ນເປືອງ. ດ້ວຍຖານະບົດບາດ ຕຳແໜ່ງ ແລະ ໜ້າທີ່ຂອງອົງການກວດສອບບັນຊີແຫ່ງລັດ, ຄວາມຕ້ອງການເປີດເຜີຍເຜີຍແຜ່ ແລະຄວາມໂປ່ງໃສ ຕ້ອງຖືເປັນເຄື່ອງມືໃນການຊຸກຍູ້ການພັດທະນາສັງຄົມ, ສ້າງຄວາມເຊື່ອໝັ້ນ ແລະຄວາມເຫັນດີເຫັນພ້ອມຂອງປະຊາຊົນ ຕໍ່ແຜນນະໂຍບາຍ, ແນວທາງ, ກົນໄກ ແລະນະໂຍບາຍການຄຸ້ມຄອງ ແລະບໍລິຫານຈັດການຂອງພັກ ແລະລັດ.
ທີສີ່, ປ່ຽນແປງໃໝ່ການຈັດຕັ້ງກວດສອບບັນຊີ, ປັບປຸງວິທີການເຕັກນິກວິຊາຊີບ ແລະ ຂະບວນການກວດສອບ, ມາດຕະຖານການກວດສອບບັນຊີ ໃຫ້ສົມບູນແບບ. ເພີ່ມທະວີການເຊື່ອມໂຍງຂໍ້ມູນຂ່າວສານ ກັບໜ່ວຍງານທີ່ໄດ້ຮັບການກວດສອບ ເພື່ອແລກປ່ຽນຂໍ້ມູນດິຈິຕອນລະຫວ່າງອົງການກວດສອບບັນຊີແຫ່ງລັດ ແລະໜ່ວຍງານຕ່າງໆ, ມຸ່ງສູ່ເປົ້າໝາຍການປະຕິບັດການກວດສອບແບບດິຈິຕອນ ເພື່ອໃຫ້ກິດຈະກຳການກວດສອບບັນຊີມີຄວາມໂປ່ງໃສ ແລະ ເພີ່ມທະວີການກວດສອບທາງໄກ, ປະຢັດຄ່າໃຊ້ຈ່າຍໃນການກວດສອບ, ພ້ອມທັງປັບປຸງຍົກສູງປະສິດທິພາບແລະປະສິດທິຜົນ ໃນການເຄື່ອນໄຫວກວດສອບບັນຊີ ກໍ່ຄືການແບ່ງປັນ ແລະ ການສະໜອງຂໍ້ມູນກ່ຽວກັບຜົນການກວດສອບບັນຊີ, ຂໍ້ມູນກ່ຽວກັບການປະຕິບັດບົດສະຫຼຸບຜົນການກວດສອບ ແລະຂໍ້ສະເໜີແນະກັບໜ່ວຍງານ.
ທີຫ້າ, ເພີ່ມທະວີການຄວບຄຸມຄຸນນະພາບການກວດສອບບັນຊີ, ປັບປຸງເອກະສານທາງກົດໝາຍທີ່ສົມບູນ ທີ່ກ່ຽວຂ້ອງກັບການຄຸ້ມຄອງການກວດສອບບັນຊີ ແລະການຄວບຄຸມຄຸນນະພາບການກວດສອບບັນຊີ. ປັບປຸງບູລະນະແລະເພີ່ມທະວີກົນໄກ ແລະມາດຕະການຄຸ້ມຄອງ, ການຄວບຄຸມຢ່າງເຂັ້ມງວດແລະມີປະສິດທິຜົນ ຕໍ່ຄຸນນະພາບການກວດສອບບັນຊີ ແລະຈັນຍາບັນວິຊາຊີບຂອງຜູ້ກວດສອບບັນຊີ, ຮັບປະກັນປະສິດທິຜົນຂອງການກວດສອບບັນຊີ, ປັບປຸງແລະເພີ່ມຄວາມເຊື່ອໝັ້ນຂອງພັກ, ລັດ, ປະຊາຊົນ ແລະ ສັງຄົມ ໃນຜົນການກວດສອບບັນຊີ.
ທີຫົກ, ປະສານງານຢ່າງໃກ້ຊິດກັບອົງການລັດ, ໂດຍສະເພາະ ໜ່ວຍງານປ້ອງກັນແລະຕ້ານການສໍ້ລາດບັງຫຼວງແລະຄວາມຫຍໍ້ທໍ້. ດ້ານໜຶ່ງ, ປະສານງານກັບອົງການຂອງລັດທີ່ຄຸ້ມຄອງການເງິນສາທາລະນະແລະຊັບສິນສາທາລະນະ ເພື່ອເພີ່ມການເຊື່ອມໂຍງແລະແບ່ງປັນຂໍ້ມູນໃນການກວດສອບບັນຊີ, ການຍົກສູງປະສິດທິຜົນແລະປະສິດທິພາບການກວດສອບບັນຊີ: ໃນອີກດ້ານໜຶ່ງ, ເພີ່ມທະວີການປະສານງານກັບໜ່ວຍງານທີ່ມີໜ້າທີ່ປ້ອງກັນແລະຕ້ານການສໍ້ລາດບັງຫຼວງແລະຄວາມຫຍໍ້ທໍ້ ເພື່ອໃຫ້ສັນຍານຂອງການລະເມີດກົດໝາຍທີ່ຄົ້ນພົບຜ່ານການກວດສອບບັນຊີໂດຍທັນທີ ເພື່ອປັບປຸງຍົກສູງປະສິດທິຜົນການປ້ອງກັນແລະຕໍ່ສູ້ກັບການສໍ້ລາດບັງຫຼວງ, ການໃຊ້ຈ່າຍຟຸມເຟືອຍແລະຄວາມຫຍໍ້ທໍ້ ໃນການຄຸ້ມຄອງ ແລະນຳໃຊ້ການເງິນສາທາລະນະ ແລະຊັບສິນສາທາລະນະ./.
-------------------------------------
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1031 (ເດືອນກຸມພາ 2024)
