ຄວາມຄິດເບື້ອງຕົ້ນບາງປະການກ່ຽວກັບ
ການບຸກທະລຸທາງຍຸດທະສາດ ໃນຍຸກໃໝ່

ໂດຍ ຫງວຽນ ເຖ ຈູງ
ທີ່ປຶກສາຜູ້ຊ່ຽວຊານສະພາທິດສະດີສູນກາງ
02:06, 20-06-2024

ວກ. - ການບຸກທະລຸທາງຍຸດທະສາດຂອງປະເທດໃນຍຸກໃໝ່ ແມ່ນປັດໄຈສຳຄັນທີ່ເຮັດໃຫ້ເກີດການປ່ຽນແປງທີ່ເຂັ້ມແຂງ ແລະ ຄວາມກ້າວໜ້າໄປໃນທິດທາງຕັ້ງໜ້າ ເຊິ່ງປະກອບສ່ວນສຳຄັນ ໃນການປະຕິບັດເປົ້າໝາຍທີ່ຕັ້ງໄວ້ໃຫ້ສຳເລັດ. ດ້ວຍຄວາມໝາຍດັ່ງກ່າວ, ບົນພື້ນຖານການໄຈ້ແຍກ ແລະປະເມີນຄວາມສາມາດບົ່ມຊ້ອນ, ຂໍ້ໄດ້ປຽບ, ໂອກາດ ແລະ ສິ່ງທ້າທາຍ, ຄວາມຕ້ອງການທີ່ວາງອອກມາແມ່ນ ຕ້ອງເລືອກການບຸກທະລຸທາງຍຸດທະສາດທີ່ເໝາະສົມ ແລະຖືກຕ້ອງ ເພື່ອລວມສູນຊັບພະຍາກອນທັງໝົດ​ເຂົ້າ​ໃນ​ການ​ປະຕິບັດ​ຢ່າງ​ມີ​ປະສິດທິ​ຜົນ, ປະກອບສ່ວນ​ເຂົ້າ​ໃນ​ການ​ພັດທະນາ​ປະ​ເທດ​ຊາດ​ຢ່າງ​ວ່ອງ​ໄວ ​ແລະ ຍືນ​ຍົງ, ກ້າວ​ໄປ​ເຖິງ​ການ​ປະຕິບັດ​ສຳ​ເລັດ​ຕາມ​ຄາດໝາຍ​ ແລະເປົ້າໝາຍທີ່​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ​ໄດ້​ວາງ​ໄວ້.

ທ່ານ ຟ້າມ ມິງ ຈິ໊ງ ກຳມະການກົມການເມືອງສູນກາງ, ນາຍົກລັດຖະມົນຕີ ຢ້ຽມຊົມງານວາງສະແດງນະວັດຕະກຳສາກົນຫວຽດນາມ ປີ 2023 (VIIE 2023) _ພາບ: TTXVN

ກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມກຳນົດການບຸກທະລຸທາງຍຸດທະສາດສາມປະການຄື: 1- ລະບຽບລະບອບການພັດທະນາ, ຕາມນັ້ນລະບຽບລະບອບເສດຖະກິດຕະຫຼາດຕາມທິດສັງຄົມນະຍົມ ກຳລັງຄ່ອຍໆສຳເລັດສົມບູນໃນທິດທາງຂອງຄວາມທັນສະໄໝ ຄົບຊຸດ ແລະ ເຊື່ອມໂຍງເຂົ້າກັບສາກົນ; 2- ຊັບພະຍາກອນມະນຸດ, ຕາມ​ນັ້ນ, ຂະ​ໜາດ​ຊັບ​ພະ​ຍາ​ກອນ​ມະ​ນຸດ​ເພີ່ມ​ຂຶ້ນ, ໂດຍສະເພາະ ​​ຊັບ​ພະ​ຍາ​ກອນ​ມະ​ນຸດຄຸນ​ນະ​ພາບ​ສູງ ​ໃນ​ບັນ​ດາ​ຂະ​ແໜງການ ແລະ ຂົງ​ເຂດທີ່ກ້າວໜ້າ; ຜົນສຳເລັດວິທະຍາສາດ ແລະ ເຕັກໂນໂລຊີທັນສະໄໝ ທີ່ໄດ້ນຳໃຊ້ຢ່າງວ່ອງໄວ ແລະ ກວ້າງຂວາງໃນຫຼາຍຂົງເຂດ, ລະບົບນິເວດການເລີ່ມຕົ້ນປະດິດສ້າງແຫ່ງຊາດ ເລີ່ມກໍ່ຕົວຂຶ້ນ; 3- ສຸມໃສ່ການສ້າງໂຄງສ້າງພື້ນຖານທີ່ຄົບຊຸດ ດ້ວຍໂຄງການທີ່ທັນສະໄໝຈຳນວນໜຶ່ງ ໂດຍສະເພາະ ລະບົບຄົມມະນາຄົມ ແລະໂຄງສ່າງພື້ນຖານໃນເມືອງຂະໜາດໃຫຍ່.

ການບຸກທະລຸທາງຍຸດທະສາດທັງສາມປະການດັ່ງກ່າວ ໄດ້ຮັບການຈັດຕັ້ງແລະເປັນຮູບປະທຳໂດຍລັດ ໃຫ້ເປັນເອກະສານທາງກົດໝາຍຫຼາຍສະບັບ, ເປັນແຜນການ ໂຄງການ ແລະແຜນງານທີ່ສຳຄັນໆ ຫຼາຍຢ່າງ. ​​ຢ່າງ​ໃດ​ກໍ​ຕາມ, ການຈັດ​ຕັ້ງ​ປະຕິບັດການບຸກທະລຸທາງຍຸດ​ທະ​ສາດສາມປະການນັ້ນ ຍັງ​ບໍ່​ທັນ​ເປັນໄປຕາມຄວາມ​​ຕ້ອງການ ​ແລະ ຈຳເປັນຕ້ອງ​ປະຕິບັດ​ຢ່າງ​ຄົບຊຸດ ດ້ວຍ​ຄວາມ​ຕັດສິນ​ໃຈທາງ​ການ​ເມືອງ​ສູງ ​ເພື່ອ​ສ້າງ​ບາດກ້າວ​ບຸກທະລຸ ​ແລະ ການພັດທະນາ​ໄວ​ກ່ວາ​ອີກ​ ໃນ​ໄລຍະ​ຈະ​ມາ​ເຖິງ.

ໃນປະຈຸບັນ, ໂລກກຳລັງປະເຊີນກັບການຜັນຜວນທີ່ສັບສົນ, ຄາດເດົາບໍ່ໄດ້ ເຊັ່ນ ຄວາມຂັດແຍ້ງລັດ​ເຊຍ​ແລະ​ອູ​ແກຣນ​, ອິດສຮາແອນແລະຮາມັດ... ເຊິ່ງສົ່ງຜົນກະທົບຢ່າງຮຸນແຮງຕໍ່ສະຖານະການໃນຫຼາຍປະເທດ ແລະພາກພື້ນ ລວມເຖິງຫວຽດນາມ. ພາຍໃນປະເທດ, ຫຼັງຈາກດຳເນີນການປ່ຽນແປງໃໝ່ມາເກືອບ 40 ປີ, ໂດຍສະເພາະແມ່ນ ຫຼັງຈາກກອງປະຊຸມໃຫຍ່ຄັ້ງທີ XIII ຂອງພັກ, ທ່າແລະພະລັງ, ກຳລັງແຮງສັງລວມຂອງຊາດ, ກຽດສັກສີລະດັບສາກົນ ແລະ ຄວາມໄວ້ວາງໃຈຂອງປະຊາຊົນນັບ​ມື້​ນັບ​ສູງ​ຂຶ້ນ, ສ້າງປະຖົມປັດໄຈ​ສຳ​ຄັນ​ເພື່ອ​ສ້າງ​ສາ ແລະ ປົກ​ປັກ​ຮັກ​ສາ​ປະ​ເທດ​ຊາດ.

ການບຸກທະລຸທາງຍຸດທະສາດສາມປະການທີ່ລະບຸໂດຍກອງປະຊຸມໃຫຍ່ຂອງພັກ ​ຍັງ​ຖືກຕ້ອງ ແລະ ມີ​ຄວາມ​ໝາຍ​ຍາວ​ນານ ເຊິ່ງຕ້ອງ​ສືບ​ຕໍ່​ຫັນເປັນຮູບປະທຳ​ໃນ​ແຕ່ລະ​ໄລຍະການ​ພັດທະນາ​ຂອງ​ປະ​ເທດ.

ການຄັດ​ເລືອກ ​ແລະ ​ຈັດ​ຕັ້ງຖັນແຖວພະນັກງານ​ທີ່​ມີ​ຄຸນ​ສົມບັດ ​ແລະ
ຄວາມສາມາດພໍທີ່ຈະເປັນຫົວໜ້າໃນ​ທຸກ​ຂັ້ນ ​ແລະ ຂະ​ແໜງ​ການ ​ໃນ​ລະບົບ​ການ​ເມືອງ

ພັກກອມມູນິດຫວຽດນາມເລືອກເນື້ອໃນບຸກທະລຸເຫຼົ່ານີ້ ເພາະວ່າປະທານໂຮ່ຈີມິນເຄີຍສັ່ງສອນແລະຊີ້ໃຫ້ເຫັນວ່າ: “ພະນັກງານແມ່ນຮາກຖານຂອງວຽກງານທັງໝົດ”(1), “ຄວາມສຳເລັດຫຼືຄວາມລົ້ມເຫຼວຂອງວຽກງານ ຂຶ້ນຢູ່ກັບພະນັກງານທີ່ດີ ຫຼືບໍ່ດີ”(2); ດັ່ງນັ້ນ, ການເລືອກ ແລະ ​ຈັດ​ຕັ້ງຖັນແຖວພະນັກງານ​ທີ່​ມີ​ຄຸນ​ສົມບັດ ​ແລະ ຄວາມສາມາດພໍທີ່ຈະເປັນຫົວໜ້າໃນ​ທຸກ​ຂັ້ນ, ທຸກຂະ​ແໜງ​ການ - ຊັບພະຍາກອນບຸກຄົນຄຸນນະພາບສູງໃນລະບົບການເມືອງ - ແມ່ນມີຄວາມສຳຄັນທີ່ສຸດ, ເພາະສິ່ງເຫຼົ່ານີ້ແມ່ນປັດໄຈທີ່ຈະກຳນົດຄວາມສຳເລັດຂອງພາລະກິດການສ້າງສາ ແລະປົກປັກຮັກສາປະເທດຊາດ.

ວັນທີ 19 ພຶດສະພາ 2018, ຄະນະບໍລິຫານງານສູນກາງພັກສະໄໝທີ XII ໄດ້ອອກມະຕິເລກທີ 26-NQ/TW, ວ່າດ້ວຍ “ການສຸມໃສ່ກໍ່ສ້າງຖັນແຖວພະນັກງານທຸກຂັ້ນ, ໂດຍສະເພາະ ຂັ້ນຍຸດທະສາດທີ່ມີຄຸນນະພາບ ຄວາມສາມາດ ແລະ ກຽດສັກສີພຽງພໍ, ເທົ່າທຽມກັບໜ້າທີ່ການງານ”, ການກຳນົດເປົ້າໝາຍທີ່ຊັດເຈນໃນການສ້າງຖັນແຖວພະນັກງານ, ໂດຍສະເພາະ ພະນັກງານຂັ້ນຍຸດທະສາດ, ແມ່ນໜ້າທີ່ສຳຄັນອັນດັບໜຶ່ງ, ແມ່ນວຽກງານທີ່ສຳຄັນຂອງພັກ ເຊິ່ງຈະຕ້ອງດຳເນີນການຢ່າງເປັນປະຈຳ, ຮອບຄອບ, ວິທະຍາສາດ, ເຄັ່ງຄັດ ແລະ ມີປະສິດທິຜົນ. ດັ່ງນັ້ນ, ບັນຫາການສ້າງຖັນແຖວພະນັກງານ ໂດຍສະເພາະ ພະນັກງານຂັ້ນຍຸດທະສາດ ແລະ ພະນັກງານນໍາພາທຸກຂັ້ນ ແລະ ຂະແໜງການ ມີບົດບາດສໍາຄັນ ແລະ ຮີບດ່ວນທີ່ສຸດ, ມີຄວາມໝາຍຕັດສິນຊີ້ຂາດຕໍ່ການພັດທະນາຂອງປະທດ.

ການພັດທະນາຊັບພະຍາກອນຂອງພັກ, ໂດຍສະເພາະຊັບພະຍາກອນມະນຸດຄຸນນະພາບສູງ, ຮຽກຮ້ອງໃຫ້ມີການປະຕິບັດຢ່າງຕໍ່ເນື່ອງ ແລະສະໝ່ຳສະເໝີໃນຫຼາຍປີ, ຫຼາຍສະໄໝ ເຊິ່ງມີຄວາມກ່ຽວຂ້ອງກັບນະໂຍບາຍ, ການຕັດສິນໃຈ, ແຫຼ່ງພະລັງ... ເອກະສານກອງປະຊຸມໃຫຍ່ຄັ້ງທີ X ຂອງພັກໄດ້ເນັ້ນວ່າ: “ຫັນຫຼັກການນຳພາຂອງພັກເປັນນິຕິກຳແລະເປັນຮູບປະທຳ ໃນການ​ນຳ​ພາ​​ວຽກ​ງານ​ພະນັກງານ ​ແລະ ການ​ຄຸ້ມ​ຄອງຖັນແຖວ​ພະນັກງານຢ່າງ​ເປັນ​ເອກະ​ພາບ, ຄຽງຄູ່ກັບການເສີມຂະຫຍາຍຄວາມຮັບຜິດຊອບກ່ຽວກັບວຽກງານພະນັກງານ ຂອງອົງການ ແລະ ຫົວໜ້າ​ຂອງອົງການຈັດຕັ້ງ​ໃນ​ລະບົບ​ການ​ເມືອງ”(3). ສືບທອດຈິດໃຈດັ່ງກ່າວ, ເອກະສານກອງປະຊຸມໃຫຍ່ຄັ້ງທີ XII ຂອງພັກໄດ້ຊີ້ໃຫ້ເຫັນແຈ້ງເຖິງສິດທິ ແລະຄວາມຮັບຜິດຊອບຂອງຫົວໜ້າ ກ່ຽວກັບວຽກງານພະນັກງານ: “ຊາບຊຶມ ແລະ ປະຕິບັດທັດສະນະຂອງພັກຢ່າງເຂັ້ມງວດ ໃນການ​ນຳ​ພາ​​ວຽກ​ງານ​ພະນັກງານ ​ແລະ ການ​ຄຸ້ມ​ຄອງຖັນແຖວ​ພະນັກງານຢ່າງ​ເປັນ​ເອກະ​ພາບ, ຄຽງຄູ່ກັບການເສີມຂະຫຍາຍຄວາມຮັບຜິດຊອບ ກ່ຽວກັບວຽກງານພະນັກງານ ຂອງອົງການ ແລະ ຫົວໜ້າ​ຂອງອົງການຈັດຕັ້ງ​ໃນ​ລະບົບ​ການ​ເມືອງ”(4). ເອກະສານກອງປະຊຸມໃຫຍ່ຄັ້ງທີ XIII ຂອງພັກສືບຕໍ່ຢືນຢັນຢ່າງຈະແຈ້ງເຖິງທີ່ຕັ້ງ, ບົດບາດ ແລະ ມາດຕະຖານ ຂອງຫົວໜ້າທຸກຂັ້ນ ໃນວຽກງານພະນັກງານ: “ການກໍ່ສ້າງຖັນແຖວພະນັກງານ, ກ່ອນອື່ນໝົດແມ່ນຜູ້ເປັນຫົວໜ້າ ທີ່ມີຄວາມກ້າຫານທາງການເມືອງທີ່ໝັ້ນຄົງ, ມີຄຸນສົມບັດສິນທຳທີ່ຜ່ອງໃສ, ມີຄວາມສາມາດໂດດເດັ່ນ, ກ້າຄິດ, ກ້າເວົ້າ, ກ້າເຮັດ, ກ້າຮັບຜິດຊອບ, ກ້າປ່ຽນແປງໃໝ່ປະດິດສ້າງ, ກ້າຮັບມືກັບຄວາມຫຍຸ້ງຍາກລຳບາກ ແລະສິ່ງທ້າທາຍ, ກ້າກະທຳເພື່ອຜົນປະໂຫຍດສ່ວນລວມ, ມີຊື່ສຽງສູງ ແລະເປັນຜູ້ບຸກເບີກຢ່າງແທ້ຈິງ, ເປັນແບບຢ່າງແລະແກນກາງ ຂອງຄວາມສາມັກຄີ. ສ້າງລະບຽບການກ່ຽວກັບອໍານາດໜ້າທີ່ ແລະຄວາມຮັບຜິດຊອບ ຂອງຜູ້ນໍາໃນວຽກງານພະນັກງານ ແລະການຄຸ້ມຄອງພະນັກງານ”(5). ພິເສດ, ເອກະສານກອງປະຊຸມໃຫຍ່ຄັ້ງທີ XIII ຂອງພັກໄດ້ເນັ້ນວ່າ: “ກຳນົດຄວາມຮັບຜິດຊອບຂອງຫົວໜ້າຢ່າງຊັດເຈນ ໃນການກວດກາ, ການຄົ້ນເຜີຍ ແລະ ການຈັດການກັບການສໍ້ລາດບັງຫຼວງ ແລະການໃຊ້ຈ່າຍຟຸມເຟືອຍ, ແລະ ການປົກປ້ອງຜູ້ທີ່ຕໍ່ສູ້ຢ່າງແຂງຂັນ​ຕ້ານ​ການ​ສໍ້​ລາດ​ບັງ​ຫຼວງ ​ແລະການໃຊ້ຈ່າຍຟຸມເຟືອຍ”(6).

ການຕີລາຄາພະນັກງານແມ່ນຂັ້ນຕອນທີ່ສຳຄັນ ເຊິ່ງຄະນະພັກທຸກຂັ້ນໄດ້ເອົາໃຈໃສ່ປະຕິບັດ ຜ່ານການທົບທວນກວດກາປະຈຳປີ, ສົມທົບກັບການລົງຄະແນນສຽງໄວ້ວາງໃຈຕໍ່ຕຳແໜ່ງຕ່າງໆ. ຢ່າງໃດກໍ່ຕາມ, ບາງແຫ່ງເຮັດບໍ່ດີ, ບໍ່ຖືກຕ້ອງຕັ້ງແຕ່ຕົ້ນ ທີ່ມີການຈັດກຽມແລະແຕ່ງຕັ້ງຜູ້ນຳທີ່ບໍ່ຄູ່ຄວນ, ແລະໃນບໍ່ດົນ ບາງຄົນກໍ່ເຜີຍໃຫ້ເຫັນເຖິງຄຸນສົມບັດທີ່ບໍ່ດີ ແລະຄວາມສາມາດທີ່ຕ່ຳຂອງຕົນ. ​ເຖິງ​ວ່າ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ​ໄດ້​ກຳນົດ​ຢ່າງ​ຈະ​ແຈ້ງ​ວ່າ: “ການຕີ​ລາຄາ ​ແລະ ນຳ​ໃຊ້​ພະນັກງານ​ຢ່າງ​ຖືກຕ້ອງ​ຕາມ​ມາດຕະຖານ ​ແລະ ຂະ​ບວນການ​ທີ່​ໄດ້​ກຳນົດ, ຖື​ປະສິດທິ​ຜົນ​ວຽກ​ງານ ​ແລະ ຄວາມ​ໄວ້​ເນື້ອ​ເຊື່ອ​ໃຈ​ຂອງ​ປະຊາຊົນ​ເປັນ​ຕົ້ນຕໍ”(7), ເອກະສານກອງປະຊຸມຄັ້ງທີ XIII ຂອງພັກສືບຕໍ່ຢືນຢັນວ່າ: “ເອົາ​ໝາກຜົນ​ການ​ເຮັດ​ວຽກ, ຄວາມ​ເພິ່ງ​ພໍ​ໃຈ ​ແລະ ຄວາມ​ໄວ້​ເນື້ອ​ເຊື່ອ​ໃຈ​ຂອງ​ປະຊາຊົນ ​ເປັນ​ມາດຖານ​ສຳຄັນ ​ເພື່ອ​ຕີ​ລາຄາ​ຄຸນ​ນະພາ​ບຂອງ​ການຈັດ​ຕັ້ງກົງຈັກ ​ແລະ ຄຸນ​ນະພາ​ບຂອງ​ພະນັກງານ, ສະມາຊິກ​ພັກ”(8); ຢ່າງໃດກໍ່ຕາມ, ໃນແຕ່ລະວາລະແລະໃນແຕ່ລະປີ, ​ມີຄະນະ​ພັກ​ແລະອຳນາດ​ການ​ປົກຄອງ​ພຽງບາງແຫ່ງເທົ່ານັ້ນ ທີ່​ຕີ​ລາຄາ​ຜູ້​ນຳແຕ່ລະຄົນ​ຢ່າງ​ເປີດ​ເຜີຍ​ແລະ​ໂປ່​ງ​ໃສ ​ແລະ ປະກາດ​ຜົນໃຫ້​ປະຊາຊົນຮູ້ຢ່າງກວ້າງຂວາງ. ການປະກາດໃຊ້ກົນໄກ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້” ໃນວຽກງານພະນັກງານ ແລະການຄຸ້ມຄອງຖັນແຖວພະນັກງານ ບໍ່ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ.

ຈາກພື້ນຖານທິດສະດີແລະພຶດຕິກຳທີ່ກ່າວມາຂ້າງເທິງ, ການເລືອກຂອດບຸກທະລຸເພື່ອຄັດເລືອກ ແລະ ຈັດຖັນແຖວພະນັກງານທີ່ມີຄຸນທຳ ແລະມີຄວາມສາມາດຢ່າງແທ້ຈິງໃນທຸກຂັ້ນ ແລະ ທຸກຂະແໜງການໃນລະບົບການເມືອງ ແມ່ນວຽກງານທີ່ຈຳເປັນ ແລະ ມີຄວາມສຳຄັນເປັນພິເສດ. ດ້ວຍຜູ້ນໍາຈໍານວນໜ້ອຍ, ດັ່ງນັ້ນ ການກວດກາ, ຕິດຕາມກວດກາ, ຕີລາຄາຖັນແຖວພະນັກງານນີ້ສາມາດດໍາເນີນຢ່າງເຂັ້ມງວດ, ຄົບຖ້ວນ ແລະທັນເວລາໃນແຕ່ລະໄລຍະ; ຄຽງ​ຄູ່​ກັນ​ນັ້ນ, ​ເພື່ອ​ໃຫ້ຫົວໜ້າເສີມຂະຫຍາຍບົດບາດ ​ແລະ ຄວາມ​ຮັບຜິດຊອບ​ໃນ​ວຽກ​ງານ​ພະນັກງານ, ນຳພາ​ແລະຊີ້ນຳການປະຕິບັດໜ້າທີ່​ການ​ເມືອງ​ທີ່​ໄດ້​ຮັບ​ການ​ມອບ​ໝາຍ, ຈຳເປັນຕ້ອງມີນະໂຍບາຍເງິນເດືອນທີ່ຮັບປະກັນ ເພື່ອໃຫ້ພວກເຂົາຮູ້ສຶກ​ໝັ້ນຄົງ​ໃນ​ການ​ງານ ແລະ​ ເຮັດ​ວຽກ​ຢ່າງຕັ້ງໜ້າ, ມີຄວາມ​ຮັບ​ຜິດ​ຊອບ, ​ເອົາ​ໃຈ​ໃສ່​ປົກ​ປ້ອງ​ຜູ້​ທີ່​ກ້າ​ຄິດ, ກ້າ​ເຮັດ ແລະ ກ້າ​ຕັດ​ສິນ​ໃຈໃຫ້​ຖືກ​ຕ້ອງ ​ເພື່ອ​ຜົນ​ປະ​ໂຫຍດສ່ວນ​ລວມ​ຂອງ​ປະ​ເທດ. ຖ້າພະນັກງານການ​ນຳ​ທຸກ​ຂັ້ນ, ທຸກຂະ​ແໜງ​ການ​​ມີ​ຄຸນທຳ ແລະ ມີ​ຄວາມ​ສາມາດ​​ຢ່າງ​ແທ້​ຈິງ, ພວກເຂົາຈະປະກອບສ່ວນ​ຢ່າງຄຸ້ມຄ່າ, ສ້າງສັນ​ການ​ປ່ຽນ​ແປງໃໝ່ ແລະ ປະກອບສ່ວນ​ສ້າງສາ​ປະ​ເທດ​ໃຫ້​ນັບ​ມື້​ນັບຈະເລີນຮຸ່ງເຮືອງ ພັດທະນາ​ຢ່າງໄວແລະຍືນຍົງ.

ສຸມໃສ່ພັດທະນາວິທະຍາສາດແລະເຕັກໂນໂລຊີທີ່ທັນສະໄໝ,
ສ້າງພະລັງຂັບເຄື່ອນການພັດທະນາປະເທດຢ່າງໄວວາແລະຍືນຍົງ

ການພັດທະນາວິທະຍາສາດແລະເຕັກໂນໂລຊີ ແມ່ນຍຸດທະສາດທີ່ຍິ່ງໃຫຍ່ແລະສຳຄັນຂອງແຕ່ລະຊາດ-ປະເທດຊາດ. ບົດຮຽນປະສົບການຈາກປະເທດຕ່າງໆ ທີ່ມີການເຕີບໂຕທາງເສດຖະກິດແລະສັງຄົມຢ່າງໄວວາແລະຍືນຍົງໃນໂລກ ສະແດງໃຫ້ເຫັນວ່າ ປະເທດເຫຼົ່ານີ້ລ້ວນແຕ່ສຸມໃສ່ການລົງທຶນໃນດ້ານວິທະຍາສາດ ແລະເຕັກໂນໂລຊີ. ສຳລັບຫວຽດນາມ, ການປະຕິບັດໜ້າທີ່ນີ້ໃຫ້ດີ ຈະປະກອບສ່ວນພັດທະນາຊັບພະຍາກອນມະນຸດຄຸນນະພາບສູງ, ທັງປັບປຸງຍົກສູງຄຸນນະພາບຂອງໂຄງສ້າງພື້ນຖານ... ເອກະສານກອງປະຊຸມໃຫຍ່ຂອງພັກໃນໄລຍະທີ່ຜ່ານມາ ລ້ວນແຕ່ເນັ້ນໜັກເຖິງຂົງເຂດນີ້: “ເພີ່ມທະວີ​ທ່າ​ແຮງ ​ແລະ ປ່ຽນແປງໃໝ່​ກົນ​ໄກ​ຄຸ້ມ​ຄອງ ​ເພື່ອ​ໃຫ້​ວິທະຍາສາດ ​ແລະ ​ເຕັກ​ໂນ​ໂລ​ຊີ​ກາຍ​ເປັນ​ກຳລັງ​ຊຸກຍູ້​ການ​ພັດທະນາ​ປະ​ເທດ​ຊາດ​ຢ່າງ​ແທ້​ຈິງ”(9); “ການປັບປຸງຍົກສູງຄວາມສາມາດ ແລະປະສິດທິຜົນການເຄື່ອນໄຫວ ຂອງວິທະຍາສາດແລະເຕັກໂນໂລຊີ”(10); “ການພັດທະນາວິທະຍາສາດ ແລະເຕັກໂນໂລຊີ ຢ່າງແຂງແຮງ ເປັນກຳລັງຊຸກຍູ້ຂະບວນການຫັນເປັນອຸດສາຫະກຳ ຫັນເປັນທັນສະໄໝ ແລະ ການພັດທະນາເສດຖະກິດພູມປັນຍາ”(11); “ປັບປຸງຍົກສູງປະສິດທິພາບແລະປະສິດທິຜົນ ຂອງການຄຸ້ມຄອງວິທະຍາສາດແລະເຕັກໂນໂລຊີຂອງລັດ. ເພີ່ມທະວີ​ຄວາມ​ສາ​ມາດ​ດ້ານ​ວິ​ທະ​ຍາ​ສາດ​ແລະເຕັກ​ໂນ​ໂລ​ຊີ ແລະສ້າງ​ລະ​ບົບການປ່ຽນແປງໃໝ່ປະດິດສ້າງ​ແຫ່ງ​ຊາດ, ເສີມ​ຂະ​ຫຍາຍ​ຄວາມ​ສາ​ມາດ​ສ້າງ​ສັນ​ຂອງ​ບຸກ​ຄົນ, ວິ​ສາ​ຫະ​ກິດ ​ແລະ​ອົງ​ການ​ຈັດ​ຕັ້ງ”(12)ຊຸກຍູ້ການພັດທະນາວິທະຍາສາດ, ເຕັກໂນໂລຊີ ແລະ ການປ່ຽນແປງໃໝ່ປະດິດສ້າງຢ່າງແຂງແຮງ ເພື່ອສ້າງການບຸກທະລຸທາງດ້ານສະມັດຕະພາບ, ຄຸນນະພາບ, ປະສິດທິຜົນ ແລະ ຄວາມສາມາດໃນການແຂ່ງຂັນ ໃນສະພາບແວດລ້ອມຂອງການປະຕິວັດອຸດສາຫະກຳຄັ້ງທີສີ່(13).   

ໂດຍສະເພາະ, ມະຕິໝາຍເລກ 20-NQ/TW ລົງວັນທີ 1 ພະຈິກ 2012 ຂອງຄະນະບໍລິຫານງານສູນກາງພັກຊຸດທີ XI “ວ່າດ້ວຍການພັດທະນາວິທະຍາສາດ ແລະເຕັກໂນໂລຊີ ເພື່ອຮັບໃຊ້ພາລະກິດການຫັນເປັນອຸດສາຫະກຳ ແລະທັນສະໄໝ ໃນເງື່ອນໄຂຂອງເສດຖະກິດຕະຫຼາດຕາມທິດສັງຄົມນິຍົມ ແລະການເຊື່ອມໂຍງເຂົ້າກັບສາກົນ” ຢືນຢັນທັດສະນະທີ່ວ່າ: ການພັດທະນາ ແລະ ການປະຍຸກໃຊ້ວິທະຍາສາດແລະເຕັກໂນໂລຊີ ແມ່ນນະໂຍບາຍແຫ່ງຊາດທີ່ສຳຄັນ ເຊິ່ງເປັນໜຶ່ງໃນພະລັງຂັບເຄື່ອນທີ່ສຳຄັນທີ່ສຸດ ເພື່ອພັດທະນາເສດຖະກິດ-ສັງຄົມ ແລະ ການປົກປັກຮັກສາປະເທດຊາດ, ແລະ ເປັນເນື້ອໃນທີ່​ຕ້ອງ​ໄດ້​ຮັບ​ການ​ບຸ​ລິ​ມະ​ສິດ​ໃນ​ການ​ລົງ​ທຶນລ່ວງໜ້າ​ໜຶ່ງກ້າວ ​ໃນ​ການ​ເຄື່ອນ​ໄຫວ​ຂອງ​ທຸກ​ຂະ​ແໜງ​ການ ແລະ ທຸກ​ຂັ້ນ. ການນຳພາຂອງພັກ, ຄວາມສາມາດໃນການຄຸ້ມຄອງຂອງລັດ ແລະ ຄວາມສາມາດແລະຄວາມກະຕືລືລົ້ນ ຂອງຖັນແຖວພະນັກງານວິທະຍາສາດແລະເຕັກໂນໂລຊີ ມີບົດບາດສຳຄັນໃນຄວາມສຳເລັດຂອງການພັດທະນາວິທະຍາສາດ ແລະເຕັກໂນໂລຊີ. ມະຕິດັ່ງກ່າວໄດ້ກຳນົດເປົ້າມາຍທົ່ວໄປ, ເປົ້າໝາຍສະເພາະ ແລະ ກຸ່ມໜ້າທີ່ແລະວິທີແກ້ໄຂ 6 ກຸ່ມສຳລັບການດຳເນີນການ.

ພາຍຫຼັງການຜັນຂະຫຍາຍປະຕິບັດຕາມມະຕິໝາຍເລກ 20-NQ/TW ເປັນເວລາ 5 ປີ, ຄະນະເລຂາທິການສູນກາງໄດ້ສັ່ງການສະຫຼຸບເບື້ອງຕົ້ນ ແລະ ອອກຂໍ້ສະຫຼຸບໝາຍເລກ 50-KL/TW ລົງວັນທີ 30 ພຶດສະພາ 2019 ວ່າດ້ວຍ “ການສືບຕໍ່ປະຕິບັດມະຕິກອງປະຊຸມສູນກາງພັກຄັ້ງທີ 6 ສະໄໝທີ XI ກ່ຽວກັບການພັດທະນາວິທະຍາສາດ ແລະເຕັກໂນໂລຊີ ເພື່ອຮັບໃຊ້ພາລະກິດການຫັນເປັນອຸດສາຫະກຳ ແລະທັນສະໄໝ ໃນເງື່ອນໄຂຂອງເສດຖະກິດຕະຫຼາດຕາມທິດສັງຄົມນິຍົມ ແລະການເຊື່ອມໂຍງເຂົ້າກັບສາກົນ”; ໃນນັ້ນ, ການຕີລາຄາຄວາມສາມາດບົ່ມຊ້ອນດ້ານວິທະຍາສາດແຫ່ງຊາດ ໄດ້ຮັບການເພີ່ມທະວີ, ການປ່ຽນແປງໃໝ່ປະດິດສ້າງ ແລະ ການເລີ່ມຕົ້ນທີ່ປະດິດສ້າງ ໄດ້ຮັບການຊຸກຍູ້ແລະແຜ່ຂະຫຍາຍໃນສັງຄົມ, ຕະຫຼາດວິທະຍາສາດ ແລະ ເຕັກໂນໂລຊີກໍ່ເລີ່ມພັດທະນາຂຶ້ນ. ການຮ່ວມມືສາກົນມີການປ່ຽນແປງທາງບວກຫຼາຍຢ່າງ, ປະກອບສ່ວນປັບປຸງຍົກສູງຄຸນນະພາບຂອງການຄົ້ນຄວ້າວິທະຍາສາດ, ການຖ່າຍທອດເຕັກໂນໂລຊີ ແລະ ການຝຶກອົບຮົມຊັບພະຍາກອນມະນຸດຄຸນນະພາບສູງ. ວິທະຍາສາດແລະເຕັກໂນໂລຊີໄດ້ປະກອບສ່ວນສຳຄັນ ຕໍ່ການເຕີບໂຕເສດຖະກິດ ແລະ ຄວາມສາມາດໃນການແຂ່ງຂັນຂອງເສດຖະກິດ, ການປ້ອງກັນປະເທດແລະຄວາມໝັ້ນຄົງ, ປະກອບສ່ວນປ້ອງກັນແລະຕໍ່ສູ້ກັບໄພພິບັດທາງທຳມະຊາດ, ການປົກປ້ອງສິ່ງແວດລ້ອມ, ການຮັບມືກັບການປ່ຽນແປງສະພາບອາກາດ ແລະ ການພັດທະນາແບບຍືນຍົງ. ຢ່າງໃດກໍ່ຕາມ, ເມື່ອທຽບກັບເປົ້າໝາຍທີ່ກຳນົດໄວ້ໃນມະຕິແລ້ວ, ​ໝາກຜົນ​ທີ່​ບັນລຸ​ໄດ້​ຍັງ​ມີ​ຄວາມ​ຈຳກັດ; ​ເນື້ອ​ໃນ​ຂອງ​ມະຕິ​ຫຼາຍປະການຍັງ​ບໍ່​ທັນ​ໄດ້​ຮັບ​ຄວາມ​ເຂົ້າ​ໃຈ ​ແລະ ປະຕິບັດ​ຢ່າງ​ຄົບ​ຖ້ວນ; ເຖິງວ່າລະບົບກົດໝາຍ ແລະກົນໄກຄຸ້ມຄອງທາງການເງິນ ສຳລັບວິທະຍາສາດ ແລະເຕັກໂນໂລຊີ ຈະໄດ້ຮັບການປ່ຽນແປງໃໝ່ ແຕ່ກໍ່ຍັງບໍ່ທັນພຽງພໍ ບໍ່ທັນຄົບຊຸດ, ການຈັດສັນງົບປະມານບໍ່ເໝາະສົມ; ປະສິດທິຜົນຂອງການຄົ້ນຄວ້າວິທະຍາສາດ-ເຕັກໂນໂລຊີ ແລະ ການປະຍຸກໃຊ້ງານວິໄຈກໍ່ບໍ່ສູງ. ຂໍ້ຈຳກັດແລະຈຸດອ່ອນປະການໜຶ່ງຄື ການຫັນເປັນນິຕິກຳ ແລະ ການຈັດຕັ້ງປະຕິບັດແນວທາງ ແລະແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ ຍັງຊັກຊ້າ, ບໍ່ເດັດດ່ຽວ ແລະບໍ່ໄດ້ສ້າງສະພາບແວດລ້ອມທີ່ໂປ່ງໃສ ໃນກິດຈະກຳວິທະຍາສາດ ແລະເຕັກໂນໂລຊີ, ຊັບພະຍາກອນການລົງທຶນຍັງຖືກຈຳກັດ,... 

ມະຕິຕົກລົງໝາຍເລກ 569/QĐ-TTg ລົງວັນທີ 11 ພຶດສະພາ 2022 ຂອງນະຍົກລັດຖະມົນຕີກ່ຽວກັບ “ການປະກາດໃຊ້ຍຸດທະສາດການພັດທະນາວິທະຍາສາດ ເຕັກໂນໂລຊີ ແລະ ການປ່ຽນແປງໃໝ່ປະດິດສ້າງ ເຖິງປີ 2030” ສະແດງໃຫ້ເຫັນຄວາມເອົາໃຈໃສ່ເປັນພິເສດເຖິງຂົງເຂດນີ້. ໃນປະຈຸບັນ, ວິທະຍາສາດ ເຕັກໂນໂລຊີ ແລະການປ່ຽນແປງໃໝ່ປະດິດສ້າງ ມີບົດບາດນັບມື້ນັບສຳຄັນ ໃນການຊຸກຍູ້ການພັດທະນາເສດຖະກິດ ແລະປັບປຸງຄຸນນະພາບຊີວິດ; ພ້ອມກັນນັ້ນ, ແກ້ໄຂບັນດາບັນຫາຮີບດ່ວນທີ່ເກີດຂຶ້ນໃນຊີວິດສັງຄົມ. ເຕັກໂນໂລຊີສຳຄັນບາງຢ່າງມີສ່ວນຊ່ວຍໃຫ້ການປະຕິວັດອຸດສາຫະກຳຄັ້ງທຄ 4 ປະສົບຄວາມສຳເລັດ ເຊັ່ນ ປັນຍາປະດິດ, ຫຸ່ນຍົນ, ການປະມວນຜົນແບບຄລາວ, ເຄືອຂ່າຍ 5G, ແອັບພລິເຄຊັນບລ໊ອກເຊນ (blockchain),... ​ໃນ​ສະພາບ​ການ​ໃໝ່, ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ​ໄດ້​ກຳນົດ​ວ່າ: ການປັບປຸງຍົກສູງຄຸນນະພາບຊັບພະຍາກອນມະນຸດທີ່ກ່ຽວຂ້ອງກັບການສົ່ງເສີມການປ່ຽນແປງໃໝ່ປະດິດສ້າງ, ການປະຍຸກ ແລະການພັດທະນາວິທະຍາສາດ ແລະເຕັກໂນໂລຊີ ຢ່າງແຂງແຮງ”(14) ແມ່ນໜຶ່ງໃນບັນດາໜ້າທີ່ ແລະວິທີແກ້ຕົ້ນຕໍ ທີ່ປະກອບສ່ວນສຳຄັນໃນການວາງທິດທາງຍຸດທະສາດ ເພື່ອພັດທະນາປະເທດຢ່າງໄວວາແລະຍືນຍົງ.

ເພື່ອໃຫ້ວິທະຍາສາດແລະເຕັກໂນໂລຊີພັດທະນາຢ່າງແຂງແຮງກວ່າອີກ, ຈຳເປັນຕ້ອງປ່ຽນແປງການຮັບຮູ້ຂອງພະນັກງານ ສະມາຊິກພັກ ແລະປະຊາຊົນກ່ຽວກັບບັນຫານີ້ຕໍ່ໄປ; ເພີ່ມເຕີມແລະປັບປຸງນະໂຍບາຍແລະກົດໝາຍດ້ານການລົງທຶນ, ການເງິນວິສາຫະກິດ, ນະໂຍບາຍທີ່ເອື້ອປະໂຫຍດ ໃຫ້ຄ່າຕອບແທນ ແລະ ຍ້ອງຍໍຊົມເຊີຍປັນຍາຊົນ, ລົງທຶນຢ່າງຖືກຕ້ອງໃນການຄົ້ນຄວ້າວິທະຍາສາດ ແລະສ້າງ​ຄວາມ​ສາ​ມາດ​ດ້ານ​ວິ​ທະ​ຍາ​ສາດ ​ເພື່ອ​ຕອບ​ສະ​ໜອງ​ຄວາມ​ຕ້ອງ​ການ​ຂອງພາລະກິດການປ່ຽນແປງໃໝ່​ປະ​ເທດ; ຊຸກຍູ້ການພັດທະນາຕະຫຼາດວິທະຍາສາດ ແລະເຕັກໂນໂລຊີ ຢ່າງແຂງແຮງ; ກະຈາຍຂະຫຍາຍຄູ່ຮ່ວມມື ແລະຍູ້ແຮງການຮ່ວມມືສາກົນ ໃນດ້ານວິທະຍາສາດ ແລະເຕັກໂນໂລຊີ ຢ່າງມີຈຸດໜັກ ໃຈກາງ.

ປັບປຸງສະພາບແວດລ້ອມການລົງທຶນແລະທຸລະກິດ

ສະພາບແວດລ້ອມການລົງທຶນແລະທຸລະກິດແມ່ນຊຸດຂອງປັດໄຈທີ່ສົ່ງຜົນຕໍ່ການລົງທຶນ ແລະກິດຈະກຳທຸລະກິດ ຂອງວິສາຫະກິດ ແລະອົງການທາງເສດຖະກິດໃນປະເທດແລະຕ່າງປະເທດ. ສະພາບແວດລ້ອມການລົງທຶນປະກອບດ້ວຍປັດໄຈເສດຖະກິດ, ການເມືອງ, ສັງຄົມ, ວັດທະນະທຳ, ທຳມະຊາດ, ເຕັກໂນໂລຊີ,... ໃນນັ້ນ, ນະໂຍບາຍຂອງລັດ, ເງື່ອນໄຂ ລັກສະນະທາງພູມສາດ ແລະ ຂະໜາດຕະຫຼາດ ມີຄວາມສຳຄັນທີ່ສຸດ. ສະພາບແວດລ້ອມການລົງທຶນແລະທຸລະກິດທີ່ດີ ຈະສົ່ງເສີມໃຫ້ວິສາຫະກິດໃນປະເທດແລະຕ່າງປະເທດລົງທຶນ, ສົ່ງເສີມໃຫ້ພາກເສດຖະກິດໃນປະເທດເພີ່ມການຜະລິດ ແລະທຸລະກິດ, ຫຼຸດຕົ້ນທຶນ ແລະຄວາມສ່ຽງ. ສະພາບແວດລ້ອມການລົງທຶນແລະທຸລະກິດທີ່ດີ ບໍ່ພຽງແຕ່ສ້າງຜົນກຳໄລສູງໃຫ້ກັບວິສາຫະກິດ, ສະຫະກອນ, ໜ່ວຍຮ່ວມມືການຜະລິດ..., ແຕ່ຍັງປະກອບສ່ວນປັບປຸງຍົກສູງປະສິດທິຜົນການເຄື່ອນໄຫວ ຂອງອົງການເຫຼົ່ານີ້ ໃນທົ່ວປະເທດ. ຄວາມເປັນຈິງໃນປະຈຸບັນສະແດງໃຫ້ເຫັນວ່າ, ປະເທດຫຼືທ້ອງຖິ່ນໃດໆ ທີ່ມີສະພາບແວດລ້ອມການລົງທຶນແລະທຸລະກິດທີ່ດີ ຈະມີປະສິດທິພາບສູງ ໃນການດຶງດູດການລົງທຶນແລະທຸລະກິດ ນຳໄປສູ່ການເຕີບໂຕທາງເສດຖະກິດຢ່າງໄວວາ, ລາຍໄດ້ງົບປະມານມີຈຳນວນຫຼາຍ, ແກ້​ໄຂ​ວຽກ​ເຮັດ​ງານ​ທໍາຈຳນວນ​ຫຼາຍ ໃຫ້​ຄົນ​ງານ​... ຖ້າ​ຫາກ​ມີ​ກົນ​ໄກແລະນະ​ໂຍບາຍ​ດຶງ​ດູດ​ວິ​ສາ​ຫະກິດໃຫ້​ລົງທຶນ​ໃນ​ເຂດ​ກະສິກຳ ​ແລະ ຊົນນະບົດ, ໂດຍສະເພາະ ໃນເຂດຫ່າງໄກ ສອກຫຼີກ ຈະຊ່ວຍຂະຈັດຄວາມອຶດຫິວ ແລະຫຼຸດຜ່ອນຄວາມທຸກຍາກໄດ້ຢ່າງໄວວາ ແລະຍືນຍົງກວ່າອີກ; ການຈັດແບ່ງແຮງງານຢ່າງສົມເຫດສົມຜົນ, ຈະແກ້ໄຂຜ່ານຜ່າໄດ້ສະຖານະການແຍກຕົວອອກຈາກກະສິກຳ ແລະບ້ານເກີດເມືອງນອນ ທີ່ສ້າງ​ຄວາມ​ກົດ​ດັນ​ໃຫ້​ແກ່​ການ​ເຕີບ​ໂຕ​ຂອງ​ປະຊາກອນ​ຢ່າງໄວໃນ​ຕົວ​ເມືອງ.

ຫວ່າງ​ມໍ່ໆ​ມາ​ນີ້, ມະຕິ​ໝາຍເລກ 41-NQ/TW ລົງວັນທີ 10 ຕຸລາ 2023 ຂອງກົມການເມືອງສູນກາງພັກ “ກ່ຽວກັບການສ້າງ ແລະເສີມຂະຫຍາຍບົດບາດຂອງນັກທຸລະກິດຫວຽດນາມໃນຍຸກໃໝ່” ໄດ້ຢືນຢັນທັດສະນະທີ່ສະເໝີຕົ້ນສະເໝີປາຍຂອງພັກວ່າ ຖັນແຖວນັກທຸລະກິດມີທີ່ຕັ້ງ ແລະ ບົດບາດສຳຄັນ, ເປັນໜຶ່ງໃນກຳລັງຫຼັກແຫຼ່ງ, ປະກອບສ່ວນຢ່າງຕັ້ງໜ້າເຂົ້າໃນພາລະກິດການຫັນເປັນອຸດສາຫະກຳ ແລະທັນສະໄໝຂອງປະເທດ ແລະ ການເຊື່ອມໂຍງເຂົ້າກັບສາກົນຢ່າງເລິກເຊິ່ງ. ມະຕິດັ່ງກ່າວໄດ້ກະຕຸ້ນຫົວໃຈຂອງນັກທຸະກິດຫວຽດນາ, ປຸກຕື່ນຄວາມປາດຖະໜາໃນການພັດທະນາທີ່ຈະເລີນຮຸ່ງເຮືອງ, ສົ່ງເສີມການພັດທະນາວິສາຫະກິດ, ປະກອບສ່ວນເຂົ້າໃນການສ້າງສາແລະປົກປັກຮັກສາປະເທດຊາດຫວຽດນາມສັງຄົມນິຍົມ. ກ່ອນ​ໜ້າ​ນີ້, ຄືວັນ​ທີ 17 ມິຖຸນາ 2020, ສະພາ​ແຫ່ງ​ຊາດ​ຊຸດ​ທີ XIV ​ໄດ້​ຜ່ານ​ກົດໝາຍ​​ການ​ລົງທຶນ​​ເລກທີ 61/2020/QH14, ເພື່ອສືບຕໍ່ການສ້າງສະພາບແວດລ້ອມການລົງທຶນແລະທຸລະກິດ ທີ່ເອື້ອອຳນວຍ, ໂປ່ງໃສ, ສະເໝີພາບ, ປອດໄພ ແລະເປັນມິດຕໍ່ປະຊາຊົນແລະວິສາຫະກິດ; ພ້ອມກັນນັ້ນ, ປັບປຸງຍົກສູງປະສິດທິພາບແລະປະສິດທິຜົນ ຂອງການຄຸ້ມຄອງລັດຕໍ່ການລົງທຶນ ແລະການທຸລະກິດ.

ເພື່ອໃຫ້​ມີ​ສະພາບ​ແວດ​ລ້ອມ​ການ​ລົງທຶນ ​ແລະ​ທຸລະ​ກິດທີ່​​ດີ ແລະໜ້າ​ດຶງ​ດູດຢ່າງແທ້ຈິງ, ແລະສາມາດແຂ່ງຂັນກັບປະເທດອື່ນໆ ໄດ້, ພວກ​ເຮົາ​ບໍ່​ພຽງ​ແຕ່​ຕ້ອງ​ຮັກສາ​ສະຖຽນ​ລະ​ພາບ​ທາງການ​ເມືອງ, ຄວບຄຸມອັດຕາເງິນເຟີ້, ຮັກສາຄວາມສະຫງົບຮຽບຮ້ອຍ ແລະຄວາມປອດໄພທາງສັງຄົມເທົ່ານັ້ນ, ແຕ່ຍັງຕ້ອງປັບປຸງຍົກສູງຄຸນນະພາບຂອງຊັບພະຍາກອນມະນຸດ ແລະເສີມສ້າງໂຄງສ້າງພື້ນຖານ, ຂະຈັດອຸປະສັກຕໍ່ການລົງທຶນແລະທຸລະກິດ, ໂດຍສະເພາະ ການປະຕິຮູບຂະບວນການບໍລິຫານ; ພິເສດແມ່ນຕ້ອງສືບຕໍ່ປັບປຸງລະບົບນະໂຍບາຍການລົງທຶນແລະທຸລະກິດ ໃຫ້ມີຄວາມໂປ່ງໃສ, ສະໝ່ຳສະເໝີ ແລະສົມບຸນແບບ. ຄວາມເປັນຈິງໃນຊຸມປີທີ່ຜ່ານມາສະແດງໃຫ້ເຫັນວ່າ ອຳນາດການປົກຄອງ​ທ້ອງ​ຖິ່ນ​ໃດ​ທີ່​ສາ​ມາດ​ແກ້​ໄຂ​ຄວາມ​ຫຍຸ້ງ​ຍາກ​ໃຫຍ່​ໃຫ້​ນັກ​ລົງ​ທຶນ, ນັກ​ທຸ​ລະ​ກິດ​ ໃນ​ດ້ານ​ການ​ເຂົ້າ​ເຖິງ​ທີ່​ດິນ, ການ​ເງິນ,... ທ້ອງຖິ່ນນັ້ນ​ຈະ​ສາ​ມາດ​ດຶງ​ດູດ​ການ​ລົງ​ທຶນ​ແລະ​ທຸ​ລະ​ກິດ​ໄດ້​ດີກ​ວ່າ.

ໃນປະຈຸບັນ, ໃນຕົວເມືອງແລະເຂດອຸດສາຫະກຳບາງແຫ່ງ, ມົນ​ລະ​ພິດ​ສິ່ງ​ແວດ​ລ້ອມ​ທີ່​ຮ້າຍ​ແຮງ (ການ​ປ່ອຍ​ອາຍ​ພິດ, ຂີ້​ເຫຍື້ອ, ນ້ຳ​ເສຍ...) ໄດ້​ສົ່ງ​ຜົນ​ກະ​ທົບ​ໂດຍ​ກົງ​ເຖິງ​ສະ​ພາບ​ແວດ​ລ້ອມ​ການ​ເປັນ​ຢູ່ ແລະ ສຸ​ຂະ​ພາບ​ຂອງ​ປະ​ຊາ​ຊົນ; ພ້ອມ​ກັນ​ນັ້ນ, ກໍ​ຍັງ​ເປັນ “ສິ່ງ​ກີດຂວາງ” ​ໂດຍ​ກົງ​ຕໍ່ນັກ​ລົງທຶນ ​ແລະ ນັກ​ທຸລະ​ກິດ, ສະ​ນັ້ນ ສະພາບ​ການ​ນີ້​ຕ້ອງ​ໄດ້​ຮັບ​ການ​ແກ້​ໄຂ​ເທື່ອ​ລະ​ກ້າວ ​ແລະ ເອົາຊະນະຢ່າງສົມບູນ. ​ໃນ​ສະພາບ​ທີ່​ທ່າ​ແຮງ​ດ້ານ​ການ​ເງິນ​ຂອງ​ປະ​ເທດ​ຍັງ​ປະສົບ​ກັບ​ຄວາມ​ຫຍຸ້ງຍາກນັ້ນ, ຈຳເປັນຕ້ອງ​ເລືອກ​ເອົາ​ນັກ​ລົງທຶນ​ໂດຍ​ມີ​ຈຸດໜັກ ໃຈກາງ, ກ່ອນ​ອື່ນ​ໝົດ, ຕ້ອງ​ມີ​ນະ​ໂຍບາຍ​ບຸລິມະສິດ​ສະ​ເພາະ​ໃຫ້​ແກ່​ບັນດາ​ໂຄງການ​ມີ​ຄຸນ​ນະພາ​ບ, ຜະລິດ​ຕະພັນ​ມີ​ມູນ​ຄ່າ​ເພີ່ມ ​ແລະ ມີ​ຄວາມ​ສາມາດ​ແຂ່ງຂັນສູງ. ຫວຽດນາມ​ແມ່ນ​ປະ​ເທດ​ທີ່​ມີ​ທ່າ​ແຮງ ​ແລະ ມີ​ທ່າ​ໄດ້​ປຽບ​ໃນ​ດ້ານ​ກະສິກຳ ​ແລະ ການທ່ອງທ່ຽວ ​ເມື່ອ​ທຽບ​ໃສ່​ກັບ​ຫຼາຍ​ປະ​ເທດ​ໃນ​ພາກ​ພື້ນ ​ແລະ ​ໃນ​ໂລກ; ດັ່ງນັ້ນ, ຈຶ່ງມີຄວາມສະດວກຫຼາຍສໍາລັບນັກລົງທຶນທີ່ຈະເຂົ້າມາລົງທຶນແລະເຮັດທຸລະກິດ. ປະເທດທີ່ໄດ້ຮັບພອນຈາກທໍາມະຊາດ ສາມາດປູກພືດໄດ້ຫຼາຍຊະນິດເຊັ່ນ ສະບຽງອາຫານ, ພືດອຸດສາຫະກໍາ, ຕົ້ນໄມ້ກິນໝາກ, ພືດຢາ, ຕົ້ນໄມ້ເປັນປ່າ ແລະ ມີເງື່ອນໄຂສໍາລັບການລ້ຽງປາ, ລ້ຽງສັດ ແລະ ສັດປີກ. ຫວຽດນາມເປັນປະເທດທີ່ມີທິວທັດ ແລະ ທັດສະນີຍະພາບທີ່ສວຍງາມຫຼາຍແຫ່ງ, ມີ​ຝັ່ງ​ທະ​ເລ​ຍາວ​ຢຽດທີ່ເຕັມໄປດ້ວຍແສງ​ແດດ​ຕະຫຼອດ​ປີ, ແຕ່​ການ​ພັດ​ທະ​ນາ​ການ​ທ່ອງ​ທ່ຽວ​ຂອງ​ຫວຽດ​ນາມນັ້ນ ຍັງ​ບໍ່​ທັນ​ສົມ​ກັບ​ຄວາມ​ສາ​ມາດ​ບົ່ມ​ຊ້ອນ ແລະ ຄວາມ​ໄດ້​ປຽບ​ຂອງ​ຕົນ. ຖ້າ​ຫາກສອງ​ຂົງ​ເຂດ​ນີ້​ໄດ້​ຮັບ​ບຸລິມະສິດ​ໃນ​ການ​ພັດທະນາ, ຈະ​ປະກອບສ່ວນ​ຊຸກຍູ້​ການ​ພັດທະນາ​ເສດຖະກິດ​ຢ່າງ​ວ່ອງ​ໄວ, ປັບປຸງ​ນະ​ໂຍບາຍ​ປະກັນ​ສັງຄົມ, ປັບປຸງຊີວິດ​ການ​ເປັນ​ຢູ່​ຂອງ​ປະຊາຊົນ​ໃນ​ເຂດ​ຊົນນະບົດ​ໃຫ້​ດີ​ຂຶ້ນ, ຫຼຸດຜ່ອນ​ຄວາມ​ຫຍຸ້ງຍາກ​ໃນ​ຕົວ​ເມືອງ, ພິ​ເສດ​ແມ່ນ ​ການ​ເຕີບ​ໂຕ​ຂອງ​ປະຊາກອນ​ແບບກົນຈັກທີ່​ວ່ອງ​ໄວໃນປະຈຸບັນ.

ບັນດາວິສາຫະກິດໃນປະເທດແລະຕ່າງປະເທດ ແລະປະຊາຊົນ ລ້ວນຕ້ອງການໃຫ້ແນວທາງແລະແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ ມີຜົນບັງຄັບໃຊ້ໄວໆນີ້ ແລະ ມີປະສິດທິພາບແລະປະສິດທິຜົນ. ການພັດທະນາໂຄງສ້າງພື້ນຖານ, ຄຸນນະພາບການວາງແຜນ, ການປະຕິຮູບຂະບວນການບໍລິຫານ, ບຸລິມະສິດ​ດ້ານ​ພາ​ສີ, ການ​ຫັນ​ເປັນ​ດິ​ຈິ​ຕອນ, ການແກ້​ໄຂ​ມົນ​ລະ​ພິດ​ສິ່ງ​ແວດ​ລ້ອມ, ການຄວບ​ຄຸມ​ໄພ​ເງິນ​ເຟີ້, ການສ້າງສົມດຸນ​ແຫຼ່ງຊັບພະຍາກອນການ​ເງິນ​, ​ການ​ຍົກ​ລະດັບ​ຕົວ​ຊີ້​ວັດສະພາບ​ແວດ​ລ້ອມ​ການ​ລົງທຶນ​ແລະ​ທຸລະ​ກິດ, ພ້ອມ​ກັບ​ການ​ປັບປຸງ​ຍົກສູງຄຸນ​ນະພາ​ບພະນັກງານ, ລັດຖະກອນ ​ແລະ ພາລະກອນ ​ໃນ​ລະບົບ​ການ​ເມືອງ - ເຊິ່ງໜ້າທີ່​ທັງ​ໝົດ​ນີ້​ຮຽກຮ້ອງ​ໃຫ້​ເອົາ​ໃຈ​ໃສ່​ເຖິງ​ປັດ​ໄຈ​ມະນຸດ.  

ດັ່ງ​ທີ່​ໄດ້​ວິ​ເຄາະ​, ການ​ຄັດ​ເລືອກ ​ແລະ ການຈັດ​ຕັ້ງ​ພະນັກງານ​ທີ່​ມີ​ຄຸນສົມບັດສິນທຳ ແລະມີຄວາມສາມາດ ໃຫ້ດຳລົງຕຳແໜ່ງຫົວໜ້າ​ທຸກ​ຂັ້ນ ​ແລະ ຂະ​ແໜງ​ການ ​ໃນ​ລະບົບ​ການ​ເມືອງ; ການພັດທະນາວິທະຍາສາດ ແລະເຕັກໂນໂລຊີທີ່ທັນສະໄໝ ແລະການປັບປຸງສະພາບແວດລ້ອມການລົງທຶນແລະທຸລະກິດ ມີການພົວພັນສັດຈະວິພາບ, ຕິດພັນກັນຢ່າງສະໜິດແໜ້ນ ແລະ ກະທົບເຊິ່ງກັນແລະກັນ. ເພາະສະນັ້ນ, ການຄັດເລືອກ ແລະກຳນົດການບຸກທະລຸໃດຈະມີຄວາມເປັນໄປສູງ, ມີຜົນກະທົບຢ່າງແຂງແຮງ, ສ້າງຄວາມກ້າວໜ້າ ແລະປະກອບສ່ວນສຳຄັນ ໃນການປະຕິບັດບັນດາເປົ້າໝາຍຍຸດທະສາດ ແມ່ນໜ້າທີ່ທີ່ຈຳເປັນແລະຮີບດ່ວນໃນປະຈຸບັນ; ໃນນັ້ນ, ການປັບປຸງສະພາບແວດລ້ອມການລົງທຶນແລະທຸລະກິດ ຍັງໄດ້ຖືເປັນການບຸກທະລຸທາງຍຸດທະສາດໃນໄລຍະການພັດທະນາໃໝ່./.

----------------------------

(1), (2) ໂຮ່ຈີມິນ: ນິພົນຄົບຊຸດສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 5, ໜ້າ 309, 313

(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X, ສພຈ. ການເມືອງແຫ່ງຊາດ, ຮ່າໂນ້ຍ, 2006, ໜ້າ 137

(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII, ຫ້ອງການສູນກາງພັກ, ຮ່າໂນ້ຍ, 2016, ໜ້າ 206

(5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII , ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 187

(6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 252

(7) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI , ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ໜ້າ 59

(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 192

(9) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ IX, ສພຈ. ການເມືອງແຫ່ງຊາດ, ຮ່າໂນ້ຍ, 2001, ໜ້າ 205

(10) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X, ປຶ້ມທີ່ໄດ້ແນະນຳ, ໜ້າ 98

(11) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI, ປຶ້ມທີ່ໄດ້ແນະນຳ, ໜ້າ 218

(12) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII, ປຶ້ມທີ່ໄດ້ແນະນຳ, ໜ້າ 297

(13) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 130

(14) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 127

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1029 (ເດືອນມັງກອນ 2024)