ວກ. - ພາຍໃນສິ້ນປີ 2023, ເສດຖະກິດໂລກສືບຕໍ່ປະເຊີນກັບຄວາມຫຍຸ້ງຍາກແລະຄວາມທ້າທາຍ, ມີການພັດທະນາທີ່ຄາດເດົາບໍ່ໄດ້ ແລະ ຄວາມບໍ່ແນ່ນອນຫຼາຍ. ເຖິງວ່າອັດຕາເງິນເຟີ້ຈະເຢັນລົງ ແຕ່ກໍ່ຍັງຢູ່ໃນລະດັບສູງ, ປະເທດເສດຖະກິດຂະໜາດໃຫຍ່ຫຼາຍແຫ່ງຍັງຄົງດຳເນີນນະໂຍບາຍການເງິນທີ່ເຂັ້ມງວດ ແລະອັດຕາດອກເບ້ຍທີ່ສູງ; ການຄ້າ ການບໍລິໂພກ ແລະການລົງທຶນທົ່ວໂລກ ຍັງຄົງຫຼຸດລົງຢ່າງຕໍ່ເນື່ອງ; ອຸປະສັກໃນການຄຸ້ມຄອງແລະການປ້ອງກັນການຄ້າເພີ່ມຂຶ້ນ... ສົ່ງຜົນຕໍ່ກິດຈະກຳການສົ່ງອອກແລະນຳເຂົ້າ. ສຳລັບຫວຽດນາມ, ເຖິງຈະມີຄວາມຫຍຸ້ງຍາກຫຼາຍຢ່າງ ແຕ່ເສດຖະກິດໃນປີ 2023 ກໍ່ໄດ້ບັນລຸຜົນສຳເລັດທີ່ຕັ້ງໜ້າຫຼາຍຢ່າງ ທີ່ໜ້າຊົມເຊີຍ ແລະ ໄດ້ຮັບການຕີລາຄາສູງຈາກບັນດາອົງການສາກົນ. ຢ່າງໃດກໍຕາມ, ຄວາມທ້າທາຍຈາກສະຖານະການສາກົນ ແລະຂໍ້ຈຳກັດພາຍໃນກຳລັງການເປັນອຸປະສັກຕໍ່ເປົ້າໝາຍການພັດທະນາເສດຖະກິດ-ສັງຄົມຂອງຫວຽດນາມໃນປີ 2024.

ປີ 2023, ເສດຖະກິດໂລກປະເຊີນກັບຄວາມຫຍຸ້ງຍາກແລະຄວາມທ້າທາຍຫຼາຍຢ່າງ. ການປະທະກັນລະຫວ່າງລັດເຊຍແລະຢູເຄຣນຍັງເກີດຂຶ້ນຕໍ່ໄປ, ໃນຂະນະທີ່ການ​ປະ​ທະ​ກັນ​ໃໝ່​ໄດ້​ເກີດ​ຂຶ້ນ​ຢູ່​ຕາ​ເວັນ​ອອກ​ກາງ ​ແລະ​ທະ​ເລ​ແດງ ​ໃນ​ຊຸມ​ເດືອນ​ສຸດທ້າຍຂອງ​ປີ. ສະພາບອາກາດສຸດຂົ້ວເກີດຂຶ້ນໃນຫຼາຍແຫ່ງ, ຄວາມແຫ້ງແລ້ງເປັນເວລານານໃນວົງກວ້າງ, ພາຍຸ ນ້ຳຖ້ວມ ແລະໄພທຳມະຊາດໃນຫຼາຍປະເທດ ເຮັດໃຫ້ເກີຄວາມບໍ່ສົມດຸນໃນການຜະລິດ ແລະການບໍລິໂພກອາຫານ. ຕະຫຼາດສິນຄ້າໂລກມີຄວາມຜັນຜວນຫຼາຍ. ອັດຕາເງິນເຟີ້ຍັງຢູ່ໃນລະດັບສູງ, ການເຕີບໂຕຂອງການຄ້າອ່ອນແອ ແລະຄວາມເຊື່ອໝັ້ນຂອງຜູ້ບໍລິໂພກຟື້ນຕົວຊ້າ. ໃນສະພາບການດັ່ງກ່າວ, ຫຼາຍປະເທດໄດ້ຮັກສານະໂຍບາຍການເງິນທີ່ເຂັ້ມງວດ ເພື່ອບຸລິມະສິດການຄວບຄຸມອັດຕາເງິນເຟີ້. ຄວາມ​ຕ້ອງ​ການໂດຍ​ລວມ​ອ່ອນ​ແອ​ລົງ, ການ​ເຕີບ​ໂຕ​ທາງ​ເສດ​ຖະ​ກິດ​ຊ້າ​ລົງ​ໃນ​ຫຼາຍ​ປະ​ເທດ, ລວມທັງປະເທດເສດຖະກິດສຳຄັນ ໃນຂະນະທີ່ຕະຫຼາດເງິນຕາ ການເງິນ ແລະອະສັງຫາລິມະຊັບ ໃນບາງປະເທດມີຄວາມສ່ຽງທີ່ອາດຈະເກີດຂຶ້ນ. ຄຽງຄູ່ກັບການເພີ່ມກົດລະບຽບກ່ຽວກັບການພັດທະນາແບບຍືນຍົງທີ່ສົ່ງຜົນຕໍ່ການນຳເຂົ້າ, ຫຼາຍປະເທດຍັງເພີ່ມການປົກປ້ອງການຄ້າອີກ.

ພາບລວມເສດຖະກິດຫວຽດນາມປີ 2023

ຫວຽດນາມເຂົ້າສູ່ການປະຕິບັດແຜນການປີ 2023 ທີ່ມີທັງໂອກາດ ຄວາມຫຍຸ້ງຍາກ ແລະ ຄວາມທ້າທາຍ. ນອກຈາກການຈັດການຜົນກະທົບ ແລະຄວາມທ້າທາຍຈາກສະພາບການສາກົນແລ້ວ ຫວຽດນາມຍັງຕ້ອງພະຍາຍາມຈັດການ ແລະຂະຈັດບັນຫາທີ່ຄົງຄ້າງ ຄວາມສັບສົນທີ່ສະສົມມານາມຫຼາຍປີໃນລະບົບເສດຖະກິດ..., ພ້ອມກັນນັ້ນຕ້ອງຮັກສາສະຖຽນລະພາບຂອງເສດຖະກິດມະຫາພາກ, ຊຸກຍູ້ການເຕີບໂຕທາງເສດຖະກິດ, ຮັບປະກັນບັນດາການສົມດຸນໃຫຍ່ ແລະແກ້ໄຂຄວາມຫຍຸ້ງຍາກໃນການຜະລິດແລະກິດຈະກຳທາງທຸລະກິດ.

ອັດຕາການເຕີບໂຕຂອງ GDP ບໍ່ບັນລຸເປົ້າໝາຍທີ່ຕັ້ງໄວ້

ການເຕີບໂຕຂອງ GDP ທັງປີ 2023 ຄາດວ່າຢູ່ທີ່ປະມານ 5,05% ໂດຍມີທ່າອຽງການເຕີບໂຕເພີ່ມຂຶ້ນທີລະໜ້ອຍໃນແຕ່ລະໄຕມາດ (ໄຕມາດ 1 ເພີ່ມຂຶ້ນ 3,41%, ໄຕມາດ 2 ເພີ່ມຂຶ້ນ 4,25%, ໄຕມາດ 3 ເພີ່ມຂຶ້ນ 5,47%).   

ໃນການເພີ່ມຍອດມູນຄ່າຂອງເສດຖະກິດທັງໝົດນັ້ນ, ພາກກະສິກຳ ປ່າໄມ້ ແລະການປະມົງເພີ່ມຂຶ້ນ 3,83%, ກວມເອົາ 8,84% ຂອງການເຕີບໂຕໂດຍລວມ, ສືບຕໍ່ເປັນຮາກຖານຂອງເສດຖະກິດ; ພາກອຸດສາຫະກຳແລະການກໍ່ສ້າງເພີ່ມຂຶ້ນ 3,74%, ກວມເອົາ 28,87%; ພາກບໍລິການເພີ່ມຂຶ້ນ 6,82%, ກວມເອົາ 62,29%. ໃນນັ້ນ, ມູນຄ່າເພີ່ມຂອງອຸດສາຫະກຳທັງໝົດໃນປີ 2023 ເພີ່ມຂຶ້ນພຽງ 3,02% ເມື່ອທຽບກັບປີກ່ອນໜ້າ ເຊິ່ງເປັນການເພີ່ມຂຶ້ນຕ່ຳສຸດໃນຮອບໄລຍະ 2011-2023 ໂດຍປະກອບສ່ວນພຽງ 1,0% ຂອງອັດຕາການເຕີບໂຕມູນຄ່າເສດຖະກິດທັງໝົດ. ມູນຄ່າເພີ່ມຂອງພາກບໍລິການປີ 2023 ແມ່ນ 6,82% ເມື່ອທຽບກັບປີທີ່ແລ້ວ, ສູງກວ່າການເພີ່ມຂຶ້ນ 2,01% ແລະ 1,75% ໃນປີ 2020 ແລະ 2021... ຂະໜາດຂອງ GDP ໃນປີ 2023 ໃນລາຄາປະຈຸບັນ ຄາດວ່າຈະບັນລຸ 10.221,8 ພັນຕື້ດົ່ງ, ທຽບເທົ່າກັບ 430 ຕື້ໂດລາສະຫະລັດ, GDP ຕໍ່ຫົວຄົນໃນປີ 2023 ໃນລາຄາປະຈຸບັນ ຄາດວ່າຈະບັນລຸ 101,9 ລ້ານດົ່ງ/ຄົນ, ທຽບເທົ່າກັບ 4.284 ໂດລາສະຫະລັດ, ເພີ່ມຂຶ້ນ 160 ໂດລາສະຫະລັດ ເມື່ອທຽບກັບປີ 2022. ດັ່ງນັ້ນ, ອັດຕາການເຕີມໂຕຂອງ GDP ໃນປີ 2023 ຫຼຸດລົງກວ່າເປົ້າໝາຍທີ່ສະພາແຫ່ງຊາດກຳນົດໄວ້ເມື່ອຕົ້ນປີ (ກຳນົດການເຕີບໂຕຂອງ GDP ໃນປີ 2023 ປະມານ 6,5%) ເນື່ອງຈາກສາເຫດຫຼັກຄື: 1- ຄວາມຕ້ອງການຈາກພາຍນອກທີ່ອ່ອນແອລົງ ເນື່ອງຈາກອັດຕາເງີນເຟີ້ເພີ່ມຂຶ້ນຢ່າງວ່ອງໄວໃນທົ່ວໂລກ ເຮັດໃຫ້ບັນດາປະເທດເສດຖະກິດໃຫຍ່ ປັບຂຶ້ນອັດຕາດອກເບ້ຍຢ່າງຕໍ່ເນື່ອງ ເພື່ອຮັດ​ແໜ້ນ​ນະ​ໂຍບາຍ​ການ​ເງິນ, ດັ່ງນັ້ນ ຄວາມ​ຕ້ອງການ​ຂອງ​ຜູ້​ບໍລິ​ໂພ​ກ ​ແລະ ການ​ລົງທຶນ​ກໍ່ຫຼຸດ​ລົງຕາມນຳ; 2- ຄວາມຕ້ອງການໃນປະເທດຟື້ນຕົວຊ້າທັງພາກການບໍລິໂພກແລະການລົງທຶນ ເຊິ່ງສະແດງອອກຜ່ານດັດຊະນີຍອດຂາຍຍ່ອຍຂອງສິນຄ້າ, ລາຍຮັບຈາກການບໍລິການຜູ້ບໍລິໂພກ ແລະການເຕີບໂຕຂອງສິນເຊື່ອ ລ້ວນມີອັດຕາການເຕີບໂຕຕໍ່າ ເມື່ອທຽບກັບອັດຕາການເຕີບໂຕໃນໄລຍະດຽວກັນຂອງປີທີ່ແລ້ວ.

ການລົງທຶນພາກລັດມີຫຼາຍຈຸດທີ່ສົດໃສ

ເງິນ​ລົງທຶນທີ່ເກີດຂຶ້ນຈິງສຳລັບສັງຄົມທັງໝົດ​ໃນ​ປີ 2023 ໃນ​ລາຄາ​ປະຈຸ​ບັນ ​ຄາດວ່າ​ຈະ​ບັນລຸ 3.423.500 ຕື້​ດົ່ງ, ເພີ່ມຂຶ້ນ 6,2% ເມື່ອທຽບກັບປີ 2022. ໃນນັ້ນ, ເງິນລົງທຶນພາກລັດບັນລຸ 953.600 ຕື້​ດົ່ງ, ກວມເອົາ 27,8% ຂອງເງິນລົງທຶນທັງໝົດ ແລະເພີ່ມຂຶ້ນ 14,6%; ເງິນລົງທຶນນອກພາກລັດມີມູນຄ່າ 1.919.700 ຕື້​ດົ່ງ, ກວມເອົາ 56,1% ແລະເພີ່ມຂຶ້ນ 2,7%; ພາກການລົງທຶນໂດຍກົງຈາກຕ່າງປະເທດ (FDI) ມີມູນຄ່າ 550.200 ຕື້​ດົ່ງ, ກວມເອົາ 16,1% ແລະເພີ່ມຂຶ້ນ 5,4%. ເງິນທຶນທີ່ດຳເນີນການຈາກງົບປະມານຂອງລັດໃນປີ 2023 ຄາດວ່າຈະບັນລຸ 625.300 ຕື້ດົ່ງ ເທົ່າກັບ 85,3% ຂອງແຜນການປີ ແລະເພີ່ມຂຶ້ນ 21,2% ເມື່ອທຽບກັບປີທີ່ແລ້ວ. ໃນສະພາບການດັ່ງກ່າວ ຄວາມພະຍາຍາມໃນການ​ຈ່າຍເງິນ​ລົງ​ທຶນ​ພາກລັດ​ໃນ​ປີ 2023 ໄດ້​ຊ່ວຍ​ຮັກ​ສາ​ການ​ເຕີບ​ໂຕ​ຂອງ​ການ​ລົງ​ທຶນ​ຈາກ​ທຶນຂອງ​ລັດ ຈຶງຊ່ວຍໃຫ້​ການ​ລົງ​ທຶນພາກລັດ​ກາຍ​ເປັນພະລັງຂັບເຄື່ອນທີ່ສຳຄັນ ໃນການ​ຊຸກ​ຍູ້​ເສດ​ຖະ​ກິດ. ຄວາມພະຍາຍາມແລະວິທີການແກ້ໄຂຫຼາຍຢ່າງ ໃນການສົ່ງເສີມການເບີກຈ່າຍເງິນລົງທຶນພາກລັດ, ໂດຍສະເພາະແມ່ນ ​ເພື່ອ​ເລັ່ງຄວາມຄືບໜ້າໃນການ​ປະຕິບັດແຜນງານແລະ​ໂຄງການ​ລົງທຶນ​ພາກ​ລັດ​ທີ່​ສຳຄັນ ລະຫວ່າງ​ພາກ​ພື້ນ ​ແລະ ບັນດາ​ໂຄງການ ແຜນງານ​ທີ່​ມີ​ຜົນ​ກະທົບແຜ່ກະຈາຍໃນວົງກວ້າງ​ ໃນ​ເຄິ່ງຫຼັງຂອງປີ 2023 ​ທີ່​ລັດຖະບານ ບັນດາ​ກະຊວງ ຂະ​ແໜງ​ການ ແລະ ​ທ້ອງ​ຖິ່ນ​ໄດ້ຜັນຂະຫຍາຍຢ່າງຕັ້ງໜ້າ. ໃນປີ 2023, ວຽກງານຊີ້ນຳແລະການຈັດຕັ້ງປະຕິບັດແຜນການລົງທຶນພາກລັດໄດ້ຜັນຂະຫຍາຍຢ່າງຕັ້ງໜ້າ, ໂດຍມີວິທີແກ້ໄຂສະເພາະຕ່າງໆຫຼາຍຢ່າງທີ່ທັນການແລະມີປະສິດທິຜົນ. ລະບຽບວິໄນໃນການເບີກຈ່າຍເງິນລົງທຶນພາກລັດໄດ້ຮັບການເພີ່ມທະວີ, ໂດຍຮັດແໜ້ນຄວາມຮັບຜິດຊອບຂອງຜູ້ນຳ ແລະຄວາມຮັບຜິດຊອບຂອງສ່ວນລວມ ແລະບຸກຄົນທີ່ກ່ຽວຂ້ອງ ໃນການຮັບປະກັນຄວາມຄືບໜ້າຂອງການຈັດຕັ້ງປະຕິບັດ ແລະການເບີກຈ່າຍແຜນການລົງທຶນພາກລັດ.

ການດຶງດູດການລົງທຶນໂດຍກົງຈາກຕ່າງປະເທດ (FDI) ຍັງມີສະຖຽນລະພາບທ່າມກາງຄວາມບໍ່ໝັ້ນຄົງທົ່ວໂລກ

ໃນສະພາບຄວາມຫຍຸ້ງຍາກລວມຂອງເສດຖະກິດ, ການລົງທຶນໂດຍກົງຈາກຕ່າງປະເທດຍັງເປັນຈຸດສະຫວ່າງທີ່ເຫັນໄດ້ຊັດ. ເຖິງວັນທີ 20 ທັນວາ 2023, ເງິນທຶນ FDI ທີ່ຈົດທະບຽນທັງໝົດໃນຫວຽດນາມ, ລວມທັງທຶນຈົດທະບຽນໃໝ່ ມີມູນຄ່າເກືອບ 20,2 ຕື້ໂດລາສະຫະລັດ ເພີ່ມຂຶ້ນ 62,2%, ທຶນຈົດທະບຽນທີ່ປັບປຸງແລ້ວເພີ່ມຂຶ້ນ 14%; ມູນຄ່າເງິນລົງທຶນ ແລະການຊື້ຫຸ້ນຂອງນັກລົງທຶນຕ່າງຊາດ ມີມູນຄ່າຫຼາຍກວ່າ 8,5 ຕື້ໂດລາສະຫະລັດ ເພີ່ມຂຶ້ນ 65,7%. ດັ່ງນັ້ນ, ເຖິງແມ່ນວ່າຈໍານວນການປະກອບສ່ວນເງິນທຶນແລະທຸລະກໍາການຊື້ຮຸ້ນ ຫຼຸດລົງໃນໄລຍະເວລາດຽວກັນ, ແຕ່ຂະໜາດຂອງການປະກອບສ່ວນເງິນທຶນເພີ່ມຂຶ້ນ. ດ້ວຍ​ເຫດ​ນັ້ນ, ເງິນທຶນ FDI ໃນ​ຫວຽດນາມຈຶງມີມູນຄ່າຫຼາຍກວ່າ 36,61 ຕື້​ໂດ​ລາ​ສະຫະລັດ, ​ເພີ່ມ​ຂຶ້ນຫຼາຍ​ກວ່າ 32% ​ເມື່ອ​ທຽບກັບ​ໄລຍະ​ດຽວ​ກັນ​ຂອງ​ປີ 2022. ເງິນທຶນ FDI ທີ່ໄດ້ລົງໃນຫວຽດນາມເຖິງວັນທີ 20 ທັນວາ 2023 ຄາດວ່າຈະມີມູນຄ່າເຖິງ 23,2 ຕື້ໂດລາສະຫະລັດ ເພີ່ມຂຶ້ນ 3,5% ​ເມື່ອ​ທຽບກັບ​ໄລຍະ​ດຽວ​ກັນ​ຂອງ​ປີທີ່ແລ້ວ. ນີ້​ແມ່ນ​​ຈຳນວນ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ທີ່​ບັນລຸ​ໄດ້​ສູງສຸດທີ່ເຄີຍມີມາ.

ການເຄື່ອນໄຫວສົ່ງອອກແລະນຳເຂົ້າ

ຕະຫຼອດທັງປີ 2023, ຍອດ​ມູນ​ຄ່າ​ການ​ສົ່ງ​ອອກ ​ແລະ ນຳ​ເຂົ້າ​ສິນຄ້າ​ບັນລຸ 683 ຕື້ໂດລາສະຫະລັດ, ຫຼຸດ​ລົງ 6,6% ​ເມື່ອ​ທຽບກັບ​ປີ​ທີ່ແລ້ວ. ໂດຍລວມແລ້ວ, ນີ້ແມ່ນການຫຼຸດລົງຢ່າງຫຼາຍເມື່ອທຽບກັບໄລຍະດຽວກັນຂອງປີທີ່ແລ້ວ. ໃນນັ້ນ, ມູນຄ່າການສົ່ງອອກສິນຄ້າໃນປີ 2023 ຄາດວ່າບັນລຸ 355,5 ຕື້ໂດລາສະຫະລັດ, ຫຼຸດລົງ 4,4% ເມື່ອທຽບກັບປີທີ່ຜ່ານມາ, ໂດຍສະເພາະ ພາກເສດຖະກິດໃນປະເທດມີມູນຄ່າ 95,55 ຕື້ໂດລາສະຫະລັດ, ຫຼຸດລົງ 0,3%, ກວມເອົາ 26,9% ຂອງຍອດມູນຄ່າການສົ່ງອອກ; ພາກການລົງທຶນຈາກຕ່າງປະເທດ (ລວມທັງນ້ຳມັນດິບ) ມີມູນຄ່າ 259,95 ຕື້ໂດລາສະຫະລັດ, ຫຼຸດລົງ 5,8%, ກວມເອົາ 73,1%. ກຸ່ມສິນຄ້າອຸດສາຫະກຳປຸງແຕ່ງມີມູນຄ່າປະມານ 313,73 ຕື້ໂດລາສະຫະລັດ, ກວມເອົາ 88,3% ຂອງໂຄງສ້າງສິນຄ້າສົ່ງອອກ. ມູນຄ່າການນຳເຂົ້າສິນຄ້າປະມານ 327,5 ຕື້ໂດລາສະຫະລັດ, ຫຼຸດລົງ 8,9% ເມື່ອທຽບກັບປີກ່ອນໜ້າ, ເຊິ່ງພາກເສດຖະກິດພາຍໃນປະເທດບັນລຸ 117,29 ຕື້ໂດລາສະຫະລັດ, ຫຼຸດລົງ 7,2%; ພາກການລົງທຶນໂດຍກົງຈາກຕ່າງປະເທດມີມູນຄ່າ 210,21 ຕື້ໂດລາສະຫະລັດ, ຫຼຸດລົງ 9,8%. ກຸ່ມສິນຄ້າອຸປະກອນພາຫະນະການຜະລິດ ບັນລຸປະມານ 307 ຕື້ໂດລາສະຫະລັດ, ກວມເອົາເກືອບ 94% ຂອງມູນຄ່າທັງໝົດ. ດຸນການຄ້າສິນຄ້າໃນປີ 2023 ຄາດວ່າຈະເກີນດຸນການຄ້າ 28 ຕື້ໂດລາສະຫະລັດ (ເກີນດຸນການຄ້າປີ 2022 ແມ່ນ 12,1 ຕື້ໂດລາສະຫະລັດ)⁽⁶⁾.

ການເຄື່ອນໄຫວຂອງພາກທຸລະກິດ

ໃນປີ 2023, ທົ່ວ​ປະ​ເທດ​ມີ​ວິ​ສາ​ຫະກິດ​ຂຶ້ນ​ທະບຽນ​ໃໝ່​ເກືອບ 160.000 ​ແຫ່ງ ໂດຍມີ​ທຶນ​ຈົດ​ທະບຽນລວມ​ກວ່າ 1.521.000 ຕື້​ດົ່ງ ​ແລະ ຈຳນວນ​ຄົນງານ​ຂຶ້ນ​ທະບຽນ​ທັງ​ໝົດ 1.052.600 ​ຄົນ, ​ເພີ່ມ​ຂຶ້ນ 7,2% ທາງດ້ານຈຳນວນວິສາຫະກິດ - 1,2 ​ເທົ່າຂອງລະດັບສະເລ່ຍໃນ​ໄລຍະປີ 2017-2022 ​ແລະ ​ເພີ່ມ​ຂຶ້ນ 4,6% ​ເມື່ອ​ທຽບ​ກັບ​ການປະຕິບັດໃນປີ 2022. ທຶນຈົດທະບຽນໃໝ່ທັງຫມົດຂອງທຸລະກິດທີ່ເຂົ້າມາໃນຕະຫຼາດມີແນວໂນ້ມທີ່ຈະເພີ່ມຂຶ້ນເທື່ອລະກ້າວໃນໄຕມາດ. ຍອດ​ຈຳນວນ​ທຶນ​ຈົດ​ທະບຽນ​ເພີ່ມ​ເຂົ້າ​ໃນ​ພື້ນຖານ​ເສດຖະກິດ​ໃນ​ປີ 2023 ​ແມ່ນ 3.557,900 ຕື້​ດົ່ງ, ຫຼຸດ​ລົງ 25,3% ​ເມື່ອ​ທຽບ​ໃສ່​ປີ​ກາຍ, ​ໃນ​ນັ້ນ, ທຶນ​ຈົດ​ທະ​ບຽນ​ເພີ່ມ​ເຕີມ​ແມ່ນ 46 ພັນ​ກວ່າ​ວິ​ສາ​ຫະກິດ​ຈົດ​ທະບຽນ​ເຄື່ອນ​ໄຫວ​ເພີ່ມ​ຂຶ້ນ​ເປັນ 2.036,600 ຕື້​ດົ່ງ, ຫຼຸດ​ລົງ 35,8%. ທຶນຈົດທະບຽນໃໝ່ທັງໝົດຂອງວິສາຫະກິດທີ່ເຂົ້າສູ່ຕະຫຼາດມີທ່າອ່ຽງເພີ່ມຂຶ້ນເທື່ອລະກ້າວຕະຫຼອດໄຕມາດ. ທຶນ​ຈົດ​ທະບຽນໃໝ່ທີ່ເພີ່ມ​ເຂົ້າສູ່ລະບົບ​ເສດຖະກິດ​ໃນ​ປີ 2023 ​ແມ່ນ 3.557.900 ຕື້​ດົ່ງ, ຫຼຸດ​ລົງ 25,3% ​ເມື່ອ​ທຽບກັບ​ປີທີ່ແລ້ວ, ​ໃນ​ນັ້ນ, ທຶນ​ຈົດ​ທະ​ບຽນ​ເພີ່ມ​ເຕີມ​ຂອງ​ວິ​ສາ​ຫະກິດ​ 46.000 ​ແຫ່ງ ​ທີ່ກຳລັງເຄື່ອນໄຫວແມ່ນ 2.036.600 ຕື້​ດົ່ງ, ຫຼຸດ​ລົງ 35,8%.

ຈໍານວນວິສາຫະກິດທັງໝົດທີ່ຖອນຕົວອອກຈາກຕະຫຼາດ ແມ່ນ 172.578 ແຫ່ງ, ເພີ່ມຂຶ້ນ 20,5% ເມື່ອທຽບກັບໄລຍະດຽວກັນໃນປີ 2022 ເຊິ່ງສູງທີ່ສຸດນັບຕັ້ງຕັ້ງແຕ່ປີ 2017. ໃນນັ້ນ, ສ່ວນໃຫຍ່ເລືອກທີ່ຈະຢຸດທຸລະກິດຊົ່ວຄາວໃນໄລຍະສັ້ນ (ປະມານກວ່າ 51%). ໂດຍສະເລ່ຍ, ໃນແຕ່ລະເດືອນ ມີວິສາຫະກິດ 14.400 ແຫ່ງຖອນຕົວອອກຈາກຕະຫຼາດ⁽⁷⁾.

ອັດຕາເງິນເຟີ້, ດັດຊະນີລາຄາຜູ້ບໍລິໂພກ ແລະ ອັດຕາເງິນເຟີ້ພື້ນຖານຕ່ຳກວ່າເປົ້າໝາຍນະໂຍບາຍຫຼາຍ

ດັດຊະນີລາຄາຜູ້ບໍລິໂພກ (CPI) ສະເລ່ຍ ປີ 2023 ຄາດວ່າຈະເພີ່ມຂຶ້ນປະມານ 3,3% ທຽບກັບປີ 2022, ເທົ່າກັບອັດຕາການເຕີບໂຕຂອງດັດຊະນີລາຄາຜູ້ບໍລິໂພກສະເລ່ຍປີ 2022 ທຽບກັບປີ 2021. ຢ່າງໃດກໍ່ຕາມ, ແຕກຕ່າງຈາກປີກ່ອນ, ໃນຂະນະທີ່ດັດຊະນີລາຄານໍ້າມັນ ແລະ ອາຍແກັສໃນປະເທດເປັນປັດໃຈສຳຄັນທີ່ເຮັດໃຫ້ CPI ເພີ່ມຂຶ້ນໃນປີ 2022, ກຸ່ມຜະລິດຕະພັນນີ້ໄດ້ຫຼຸດລົງຢ່າງຫຼວງຫຼາຍໃນປີ 2023, ປະກອບສ່ວນເຮັດໃຫ້ CPI ໂດຍລວມຫຼຸດລົງປະມານ 0,6 ຈຸດເປີເຊັນໃນປີ 2023. ໃນທາງກົງກັນຂ້າມ, ດັດຊະນີລາຄາ 2 ລາຍການຄື ກຸ່ມທີ່ຢູ່ອາໄສ ວັດສະດຸກໍ່ສ້າງ ແລະ ດັດຊະນີລາຄາກຸ່ມການສຶກສາ ພາໃຫ້ເກີດ 2 ປັດໄຈຫຼັກທີ່ເຮັດໃຫ້ CPI ໂດຍລວມເພີ່ມຂຶ້ນ ເຊິ່ງຄາດວ່າສົ່ງຜົນໃຫ້ CPI ເພີ່ມຂຶ້ນປະມານ 1,7% ໃນປີ 2023. ນອກຈາກນີ້, ດັດຊະນີລາຄາກຸ່ມໄຟຟ້າທີ່ໃຊ້ໃຄຄົວເຮືອນເພີ່ມຂຶ້ນ 4,55% ກໍ່ສົ່ງຜົນໃຫ້ດັດຊະນີ CPI ໂດຍລວມເພີ່ມຂຶ້ນປະມານ 0,15 ຈຸດເປີເຊັນ; ດັດຊະນີລາຄາກຸ່ມສະບຽງອາຫານເພີ່ມຂຶ້ນປະມານ 6,2% ເຮັດໃຫ້ CPI ໂດຍລວມເພີ່ມຂຶ້ນ 0,23 ຈຸດເປີເຊັນ.

ອັດຕາເລີນເຟີ້ພື້ນຖານສະເລ່ຍໃນປີ 2023 ເພີ່ມຂຶ້ນປະມານ 4,2% ເມື່ອທຽບກັບປີ 2022 ໂດຍມີທ່າອ່ຽງຫຼຸດລົງຢ່າງຕໍ່ເນື່ອງຕັ້ງແຕ່ຕົ້ນປີ. ສາເຫດຕົ້ນຕໍທີ່ເຮັດໃຫ້ອັດຕາເງິນເຟີ້ພື້ນຖານສູງກວ່າອັດຕາເງິນເຟີ້ໂດຍລວມທີ່ເພີ່ມຂຶ້ນໂດຍສະເລ່ຍກໍ່ຄື ລາຄານໍ້າມັນແອັດຊັງສະເລ່ຍພາຍໃນ 11 ເດືອນຂອງປີ 2023 ຫຼຸດລົງປະມານ 12% ເມື່ອທຽບກັບໄລຍະດຽວກັນຂອງປີກາຍ, ລາຄາອາຍແກັດຫຼຸດລົງ 7,5%, ເຊິ່ງເປັນປັດໄຈຍັບຍັ້ງອັດຕາການເຕີບໂຕຂອງ CPI, ແຕ່ເປັນຂອງກຸ່ມສິນຄ້າທີ່ບໍ່ລວມຢູ່ໃນລາຍການການຄຳນວນເງິນເຟີ້ພື້ນຖານ. ເບິ່ງລວມແລ້ວ ດັດຊະນີລາຄາຜູ້ບໍລິໂພກໃນປີ 2023 ຕ່ຳກວ່າເປົ້າໝາຍທີ່ຕັ້ງໄວ້ (ຕ່ຳກວ່າ 4,5%) ຕົ້ນຕໍແມ່ນຍ້ອນຄວາມຕ້ອງການຟື້ນຕົວຊ້າ.

ການເຕີບໂຕຂອງສິນເຊື່ອຍັງຊ້າ

ໃນປີ 2023, ທະນາຄານແຫ່ງລັດຫວຽດນາມໄດ້ປັບອັດຕາດອກເບ້ຍການດຳເນີນງານ 4 ຄັ້ງ ໂດຍຫຼຸດລົງລວມ 0,5% - 2% ຕໍ່ປີ, ພ້ອມກັນນັ້ນ ກໍ່ຊີ້ນຳໃຫ້ສະຖາບັນສິນເຊື່ອຫຼຸດຕົ້ນທຶນ ເພື່ອຫຼຸດອັດຕາດອກເບ້ຍເງິນກູ້ ເພື່ອສະໜັບສະໜູນວິສາຫະກິດ ປະຊາຊົນ ແລະ ລະບົບເສດຖະກິດ ເພື່ອຟື້ນຟູການຜະລິດແລະທຸລະກິດ. ຫຼັງຈາກການດັດປັບຄັ້ງສຸດທ້າຍ, ອັດຕາດອກເບ້ຍເງິນກູ້ຂ້າມຄືນໃນການຊຳລະເງິນທາງເອເລັກໂຕຣນິກລະຫວ່າງທະນາຄານ ແລະການກູ້ຢືມ ເພື່ອຊົດເຊີຍການຂາດແຄນທຶນໃນການຫັກລ້າງການຊໍາລະເງິນຂອງທະນາຄານແຫ່ງລັດ ສຳລັບສະຖາບັນສິນເຊື່ອ ຫຼຸດລົງຈາກ 5,5%/ປີ ຫຼຸດລົງເຫຼືອ 5%/ປີ; ອັດຕາດອກເບ້ຍ Refinancing ຫຼຸດລົງຈາກ 5%/ປີ ເປັນ 4,5%/ປີ; ອັດຕາດອກເບ້ຍຮັບຊື້ຄືນຫຼຸດລົງຈາກ 3,5%/ປີ ເປັນ 3%/ປີ. ອັດຕາດອກເບ້ຍສູງ​ສຸດ​ສຳລັບ​ເງິນຝາກບໍ່ກຳນົດເວລາ​ແລະ​ມີໄລຍະເວລາໜ້ອຍກວ່າ​ໜຶ່ງ​ເດືອນ ​ຍັງ​ຄົງ​ຢູ່​ທີ່ 0,5%/ປີ; ອັດຕາ​ດອກ​ເບ້ຍ​ສູງ​ສຸດ​ສຳລັບ​ເງິນ​ຝາກ​ທີ່​ມີ​ເງື່ອນ​ໄຂ​ຕັ້ງແຕ່ 1 ເດືອນເຖິງ​ຕ່ຳ​ກວ່າ 6 ເດືອນ ຫຼຸດ​ລົງ​ຈາກ 5% ຕໍ່ປີເຫຼືອ 4,75% ຕໍ່ປີ. ໃນເວລາດຽວກັນ, ອັດຕາດອກເບ້ຍເງິນກູ້ໄລຍະສັ້ນສູງສຸດໃນສະກຸນເງິນ VNĐ ຂອງສະຖາບັນສິນເຊື່ອສຳລັບຜູ້ກູ້ ເພື່ອຕອບສະໜອງຄວາມຕ້ອງການເງິນທຶນເພື່ອຮັບໃຊ້ພາກເສດຖະກິດແລະອຸດສາຫະກຳຈຳນວນໜຶ່ງ ຫຼຸດລົງຈາກ 4,5% ຕໍ່ປີ ເຫຼືອພຽງ 4% ຕໍ່ປີ. ດ້ວຍການເຄື່ອນໄຫວເພື່ອຫຼຸດອັດຕາດອກເບ້ຍໃນການດຳເນີນງານ, ການພັດທະນາອັດຕາດອກເບ້ຍໃນປີ 2023 ຈຶ່ງຫຼຸດລົງຢ່າງວ່ອງໄວ. ການຫຼຸດອັດຕາດອກເບ້ຍດຳເນີນການໄດ້ສ້າງເງື່ອນໄຂໃຫ້ທະນາຄານການຄ້າຫຼຸດອັດຕາດອກເບ້ຍເງິນຝາກ ເຊິ່ງຈະເຮັດໃຫ້ອັດຕາດອກເບ້ຍເງິນກູ້ຫຼຸດລົງ. ມາ​ຮອດ​ທ້າຍ​ເດືອນ​ທັນວາ 2023, ອັດຕາ​ດອກ​ເບ້ຍ​ເງິນ​ກູ້​ໃນ​ທົ່ວ​ລະບົບ​ໄດ້​ຫຼຸດ​ລົງ 1 - 2% ​ເມື່ອ​ທຽບ​ກັບ​ຕົ້ນ​ປີ. ຍ້ອນແນວນັ້ນ, ວິສາຫະກິດຕ່າງໆຈຶງສາມາດເຂົ້າເຖິງແຫຼ່ງເງິນທຶນດ້ວຍຕົ້ນທຶນດອກເບ້ຍຕໍ່າກວ່າ ເພື່ອຂະຫຍາຍການຜະລິດ ແລະ ທຸລະກິດ. ຢ່າງໃດກໍ່ຕາມ, ການເຕີບໂຕຂອງສິນເຊື່ອຍັງຕ່ຳ, ຕາມຂໍ້ມູນຂອງທະນາຄານແຫ່ງລັດ, ເຖິງວັນທີ 13 ທັນວາ 2023, ການເຕີບໂຕຂອງສິນເຊື່ອທັງລະບົບເພີ່ມຂຶ້ນພຽງປະມານ 9,87% ເມື່ອທຽບກັບຕົ້ນປີ ເຊິ່ງຕ່ຳກວ່າເປົ້າໝາຍທີ່ຕັ້ງໄວ້ປະມານ 14 - 15% ໃນປີ 2023. ມີສາເຫດຫຼາຍປະການທີ່ເຮັດໃຫ້ການເຕີບໂຕຂອງສິນເຊື່ອບໍ່ເປັນໄປຕາມຄວາມຄາດຫວັງ, ເຊັ່ນການລົງທຶນ ການຜະລິດ ການທຸລະກິດ ແລະການບໍລິໂພກທີ່ຫຼຸດລົງ ສົ່ງຜົນໃຫ້ຄວາມຕ້ອງການສິນເຊື່ອຂອງບຸກຄົນແລະວິສາຫະກິດຫຼຸດລົງຕາມນຳ; ລູກຄ້າມີຄວາມຕ້ອງການກູ້ຢືມ, ແຕ່ບໍ່ກົງຕາມເງື່ອນໄຂສິນເຊື່ອ; ຕະຫຼາດອະສັງຫາລິມະຊັບທີ່ຫຍຸ້ງຍາກ ສົ່ງຜົນໃຫ້ຄວາມສາມາດໃນການດູດຊືມສິນເຊື່ອຂອງຂະແໜງການນີ້ຫຼຸດລົງ...

ທ່າອ່ຽງເສດຖະກິດຫວຽດນາມໃນປີ 2024

ຄາດວ່າເສດຖະກິດຫວຽດນາມໃນປີ 2024 ຈະຍັງຄົງປະເຊີນກັບທັງຂໍ້ດີແລະຄວາມຍາກລຳບາກ. ອຸປະສັກທີ່ໃຫຍ່ທີ່ສຸດແມ່ນຜົນກະທົບດ້ານລົບຈາກພາຍນອກ (ໂດຍ​ສະ​ເພາະ​ແມ່ນ​ ຈັງຫວະ​ການ​ເຕີບ​ໂຕທີ່​ຊ້າລົງ​ຂອງ​ອາ​ເມ​ລິ​ກາ, ຈີນ ​ແລະ ຍີ່​ປຸ່ນ) ​ແລະ ການ​ປະຕິບັດ​ໜ້າ​ທີ່​ສາທາລະນະ​ທີ່​ຊັກ​ຊ້າ ​ອາດຈະ​ຍັງ​ເກີດ​ຂຶ້ນ​ຍ້ອນສາ​ເຫດຫຼາຍປະການ. ໃນສະຖານະການດັ່ງກ່າວ, ຄາດວ່າເສດຖະກິດຫວຽດນາມໃນປີ 2024 ຈະມີ 2 ສະຖານະການ.

ສະຖານະການທີ 1, ເສດຖະກິດໂລກຍັງຄົງຟື້ນຕົວຊ້າ, ອັດຕາເງັນເຟີ້ຍັງຢູ່ໃນລະດັບສູງ, ປະເທດຕ່າງໆຍັງບໍ່ໄດ້ຫຼຸດອັດຕາດອກເບ້ຍລົງຢ່າງຫຼາຍ ແລະ ຕ່ອງໂສ້ການສະໜອງສິນຄ້າຍັງປະເຊີນກັບການຢຸດຊະງັກຢ່າງຮຸນແຮງໃນເສັ້ນທາງການຂົນສົ່ງບາງເສັ້ນທາງ.

ສະຖານະການທີ 2, ຮັກສາ​ສົມ​ມຸດ​ຕິ​ຖານ​ສ່ວນ​ໃຫຍ່​ຄື​ໃນ​ສະ​ຖາ​ນະ​ການ 1, ພຽງ​ແຕ່​ດັດ​ປັບ GDP ຂອງ​ໂລກ​ໃຫ້​ເພີ່ມ​ຂຶ້ນ 3,2% ເທົ່ານັ້ນ; ວິທີການຊໍາລະເງິນທັງໝົດເພີ່ມຂຶ້ນ 10%; ສິນເຊື່ອເພີ່ມຂຶ້ນ 16%; ລາຄາສິນຄ້ານໍາເຂົ້າຫຼຸດລົງ 5%; ອັດ​ຕາ​ແລກ​ປ່ຽນ VND/USD ຂອງ​ທະ​ນາ​ຄານ​ການ​ຄ້າ​ເພີ່ມ​ຂຶ້ນ 2%; ຍູ້ແຮງການປະຕິຮູບສະພາບແວດລ້ອມທາງທຸລະກິດ, ສ້າງເງື່ອນໄຂອຳນວຍຄວາມສະດວກໃຫ້ກັບບັນດາຮູບແບບເສດຖະກິດໃໝ່ (ເສດຖະກິດດິຈິຕອນ, ເສດຖະກິດໝູນວຽນ, ເສດຖະກິດສ້າງສັນ,...) ແລະການປະຕິຮູບສະຖາບັນຢ່າງແຂງແຮງ ເພື່ອຊ່ວຍປັບປຸງຍົກສູງຄຸນນະພາບຂອງການເຕີບໂຕ ລວມທັງສະມັດຕະພາບຂອງແຮງງານ.

ຄຳແນະນຳນະໂຍບາຍບາງປະການ

ປ່ຽນແປງໃໝ່ ແລະ ປະຕິຮູບຮາກຖານເສດຖະກິດຈຸນລະພາກ

ທີໜຶ່ງ, ທົບທວນແລະປະເມີນຜົນການດຳເນີນງານ, ສະເໜີແນວທາງແກ້ໄຂສະເພາະໃໝ່ ເພື່ອຜັນຂະຫຍາຍບັນດາມະຕິຂອງຄະນະບໍລິຫານງານສູນກາງ ແລະກົມການເມືອງສູນກາງ ກ່ຽວກັບການປ່ຽນແປງໃໝ່ຮູບແບບການເຕີບໂຕ, ປະຕິບັດຢ່າງມີປະສິດທິຜົນ ຂະບວນການເຊື່ອມໂຍງເສດຖະກິດສາກົນ, ພັດທະນາເສດຖະກິດເອກະຊົນ, ກຳນົດທິດທາງດຶງດູດການລົງທຶນຈາກຕ່າງປະເທດ, ເປັນເຈົ້າການໃນການເຂົ້າຮ່ວມການປະຕິວັດອຸດສາຫະກຳຄັ້ງທີສີ່, ການພັດທະນາພາກພື້ນ ແລະການຫັນເປັນອຸດສາຫະກຳ ແລະທັນສະໄໝ.

ທີສອງ, ສືບຕໍ່ໃຫ້ຄຳແນະນຳແລະຈັດຕັ້ງຜັນຂະຫຍາຍບັນດາກົດໝາຍພື້ນຖານຂອງລະບົບເສດຖະກິດຕະຫຼາດຢ່າງມີປະສິດທິຜົນ ເຊັ່ນກົດໝາຍທີ່ດິນ; ກົດໝາຍທຸລະກິດອະສັງຫາລິມະຊັບ; ກົດໝາຍທີ່ຢູ່ອາໄສ; ກົດໝາຍວິສາຫະກິດ; ກົດໝາຍການລົງທຶນ, ກົດໝາຍການປະມູນ; ກົດໝາຍວ່າດ້ວຍການຈັດການໜີ້ສາທາລະນະ; ກົດໝາຍວ່າດ້ວຍການລົງທຶນສາທາລະນະ; ກົດໝາຍການແຂ່ງຂັນ; ກົດໝາຍວ່າດ້ວຍຄວາມໝັ້ນຄົງທາງໄຊເບີຣ໌; ກົດໝາຍວ່າດ້ວຍທຸລະກຳທາງເອເລັກໂຕຣນິກ; ກົດໝາຍວ່າດ້ວຍການປົກປ້ອງສິດທິຜູ້ບໍລິໂພກ,...

ສະຖຽນລະພາບຂອງເສດຖະກິດມະຫາພາກ

ທີໜຶ່ງ, ຄົ້ນຄວ້າແລະພັດທະນາໂຄງການໂດຍລວມກ່ຽວກັບການຊຸກຍູ້ການເຕີບໂຕທາງເສດຖະກິດໃນໄລຍະປີ 2024-2025.

ທີສອງ, ຕ້ອງ​ເອົາ​ໃຈ​ໃສ່ຢ່າງເໝາະສົມ​ເຖິງ​ການປັບປຸງ​ ແລະຮັກສາສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ, ຮັກສາພື້ນທີ່ສຳລັບດຳເນີນ​ນະ​ໂຍບາຍ​ເສດຖະກິດ​ມະຫາ​ພາກ ແລະນຳ​ໃຊ້​ບັນດາ​ນະ​ໂຍບາຍ​ເສດຖະກິດ​ມະຫາ​ພາກ​ທີ່ຍືດຫຍຸ່ນ​ຕາມສະຖານະການ ​ເພື່ອຮັບມືກັບການພັດທະນາທີ່​ບໍ່ພຶງປະສົງໃນ​ໂລກ ​ແລະ ພາກ​ພື້ນ.

ທີສາມ, ຍູ້ແຮງການປັບໂຄງສ້າງເສດຖະກິດ, ການປັບໂຄງສ້າງບັນດາຂົງເຂດຕາມທິດທາງຄວາມຫຼາກຫຼາຍ, ເພີ່ມທະວີຄວາມສາມາດພາຍໃນ ແລະ ຄວາມຍືດຫຍຸ່ນຂອງເສດຖະກິດເມື່ອປະເຊີນກັບຄວາມຜັນຜວນທາງເສດຖະກິດ ແລະການຄ້າໂລກທີ່ຄາດເດົາມໍ່ໄດ້.

ນະໂຍບາຍການເງິນ

ທີໜຶ່ງ, ສືບຕໍ່ດຳເນີນນະໂຍບາຍການເງິນຢ່າງເປັນເຈົ້າການ ຍືດຫຍຸ່ນ ລະມັດລະວັງ ແລະພ້ອມພຽງກັນ ເພື່ອຊຸກຍູ້ການເຕີບໂຕທາງເສດຖະກິດ ຕິດພັນກັບການຮັກສາສະຖຽນລະພາບເສດຖະກິດມະຫາພາກ, ການຄວບຄຸມອັດຕາເງິນເຟີ້ ແລະການສ້າງຄວາມສົມດຸນທີ່ສຳຄັນ.

ທີສອງ, ຄຸ້ມ​ຄອງ​ອັດ​ຕາ​ແລກ​ປ່ຽນ​ຢ່າງຍືດຫຍຸ່ນ, ສອດ​ຄ່ອງ​ກັບ​ການ​ພັດ​ທະ​ນາຂອງຕະ​ຫຼາດ, ຄວາມສົມດຸນຂອງ​ເສດ​ຖະ​ກິດ​ມະ​ຫາ​ພາກ ​ແລະ​ເປົ້າ​ໝາຍ​ນະ​ໂຍ​ບາຍ​ການ​ເງິນ. ຕິດ​ພັນ​ກັບ​ທິດ​ທາງ​ບຸ​ລິ​ມະ​ສິດ​ປົກ​ປັກ​ຮັກ​ສາ​ມູນ​ຄ່າ​ເງິນ​ຫວຽດນາມດົ່ງ, ບໍ່​ຕີ​ລາ​ຄາ​ເງິນ​ດົງ​ເພື່ອ​ໜູນ​ຊ່ວຍ​ການ​ສົ່ງ​ອອກ. ສື່ສານກ່ຽວກັບທິດທາງບຸລິມະສິດໃນການປົກປ້ອງຄຸນຄ່າຂອງສະກຸນເງິນ VNĐ, ບໍ່ແມ່ນການຫຼຸດມູນຄ່າຂອງ VNĐ ເພື່ອສະໜັບສະໜູນການສົ່ງອອກ. ຕິດຕາມພັດທະນາການຂອງອັດຕາແລກປ່ຽນ USD, CNY, Euro, Yen ຍີ່ປຸ່ນ ຢ່າງໃກ້ຊິດ ລວມເຖິງລາຄາສິນຄ້າໂພກກະພັນທີ່ສຳຄັນບາງຢ່າງໃນຕະຫຼາດໂລກ ເພື່ອບໍລິຫານຈັດການອັດຕາແລກປ່ຽນຮ່ວມກັບເຄື່ອງມືນະໂຍບາຍອື່ນໆ ຢ່າງຍືດຫຍຸ່ນແລະເຂັ້ມງວດ ເພື່ອຈຳກັດຜົນກະທົບ ອັດຕາເງິນເຟີ້ ແລະສະພາບແວດລ້ອມທາງເສຖະກິດມະຫາພາກຂອງຫວຽດນາມ.

ທີສາມ, ການຄົ້ນຄວ້າແລະປຶກສາກັບທະນາຄານການຄ້າ ກ່ຽວກັບຄວາມສາມາດໃນການຫຼຸດອັດຕາເງິນກູ້ສຳລັບຂົງເຂດບຸລິມະສິດ. ກວດຄືນແລະປະເມີນສິນເຊື່ອສຳລັບຂົງເຂດການຜະລິດ ເພື່ອສະເໜີແນວທາງການຈັດການສິນເຊື່ອທີ່ເໝາະສົມ.

ທີສີ່, ບໍລິຫານຈັດການສະພາບຄ່ອງຂອງລະບົບທະນາຄານການຄ້າຢ່າງຍືດຫຍຸ່ນ ເພື່ອສະໜັບສະໜູນການເຄື່ອນໄຫວສິນເຊື່ອ, ອອກພັນທະບັດລັດຖະບານ, ປ້ອງກັນແລະຕອບສະໜອງຕໍ່ຄວາມຜັນຜວນຂອງກະແສການເງິນລົງທຶນທາງອ້ອມ ແລະການໂອນເງິນໃຫ້ພີ່ນ້ອງໃນປະເທດ.

ທີຫ້າ, ຫຼຸດຄວາມສັບສົນຂອງຂະບວນການ, ຂັ້ນຕອນ ແລະເງື່ອນໄຂທີ່ເອື້ອອຳນວຍຕໍ່ການເຂົ້າເຖິງສິນເຊື່ອສຳລັບເສດຖະກິດ, ໂດຍສະເພາະບັນດາຂົງເຂດບຸລິມະສິດ.

ນະໂຍບາຍການລົງທຶນ

ທີໜຶ່ງ, ສືບຕໍ່ປະຕິບັດບັນດາວຽກງານຜັນຂະຫຍາຍມະຕິເລກທີ 50-NQ/TW ລົງວັນທີ 20 ສິງຫາ 2019 ຂອງກົມການເມືອງສູນກາງ “ກ່ຽວກັບທິດທາງເພື່ອປັບປຸງສະຖາບັນແລະນະໂຍບາຍໃຫ້ສົມບູນແບບ ແລະ ຍົກສູງຄຸນນະພາບແລະປະສິດທິຜົນຂອງການຮ່ວມມືດ້ານການລົງທຶນຈາກຕ່າງປະເທດເຖິງປີ 2030” ແລະ ການສື່ສານກ່ຽວກັບທິດທາງດຶງດູດການລົງທຶນໂດຍກົງຈາກຕ່າງປະເທດໃນສະພາບການໃໝ່.

ທີສອງ, ຄົ້ນຄ້ວາແລະປະກາດໃຊ້ຍຸດທະສາດ ແລະມາດຕະການເພື່ອສົ່ງເສີມການຖ່າຍທອດເຕັກໂນໂລຊີຈາກວິສາຫະກິດຕ່າງປະເທດ, ບົນພື້ນຖານຂອງການບໍ່ຂັດຕໍ່ຄຳໝັ້ນສັນຍາ ແລະແນວປະຕິບັດສາກົນ ແລະ ດ້ວຍຄວາມເຫັດດີເຫັນພ້ອມຂອງນັກລົງທຶນ./.

--------------

(1) ເບິ່ງ: EC: “Autumn 2023 Economic Forecast: A modest recovery ahead after a challenging year” (ແປໂດຍຫຍໍ້: ຄະນະກຳມະການເອີຮົບ: “ຄາດຄະເນເສດຖະກິດໃນລະດູໃບໄມ້ຫຼົ່ນ 2023: ການຟື້ນຕົວເລັກນ້ອຍຫຼັງຈາກປີທີ່ມີຄວາມທ້າທາຍ”), https://ec.europa.eu/commission/presscorner/detail/en/ip_23_5743, ເຂົ້າເຖິງວັນທີ 21 ທັນວາ 2023

(2) ເບິ່ງ: IMF: “ລາຍງານທ່າອ່ຽງເສດຖະກິດໂລກ: ການ​ຊີ້​ນໍາ​ຄວາມ​ແຕກ​ຕ່າງທົ່ວໂລກ​”, https://www.imf.org/en/Publications/WEO/Issues/2023/10/10/world-economic-outlook-october-2023, ເຂົ້າເຖິງວັນທີ 21 ທັນວາ 2023

(3) ເບິ່ງ: OECD: “ລາຍງານທ່າອ່ຽງເສດຖະກິດ OECD: ການຟື້ນຟູການເຕີບໂຕ”, https://www.oecd.org/economic-outlook/september-2023, ເຂົ້າເຖິງວັນທີ 21 ທັນວາ 2023

(4) ເບິ່ງ: Fitch Ratings: “ລາຍງານທ່າອ່ຽງເສດຖະກິດໂລກ: ອັດຕາດອກເບ້ຍຢູ່ໃກ້ຈຸດສູງສຸດ, ແຕ່ການຫຼຸດລົງຈະຕໍ່າ”, https://www.fitchratings.com/research/sovereigns/global-economic-outlook-datasheet-december-2023-08-12-2023, ເຂົ້າເຖິງວັນທີ 21 ທັນວາ 2023

(5) ເບິ່ງ: WB: “ການອັບເດດເສດຖະກິດອາຊີຕາເວັນອອກ ແລະປາຊີຟິກ: ບໍລິການເພື່ອການພັດທະນາ”, https://openknowledge.worldbank.org/entities/publication/c3357c51-fda8-4b5e-a320-ee2db085d976, ເຂົ້າເຖິງວັນທີ 21 ທັນວາ 2023

(6) ເບິ່ງ: ກົມໃຫຍ່ສະຖິຕິ: ລາຍງານສະພາບການເສດຖະກິດ - ສັງຄົມໃນໄຕມາດທີ 4 ແລະປີ 2023

(7) ເບິ່ງ: ກົມໃຫຍ່ສະຖິຕິ: ພາບສະຖານະການການລົງທະບຽນທຸລະກິດໃນປີ 2024, https://www.gso.gov.vn/du-lieu-va-so-lieu-thong-ke/2024/01/buc-tranh-ve-tinh-hinh-dang-ky-doanh-nghiep-nam-2023-va-du-bao-xu-huong-doanh-nghiep-trong-nam-2024/, ວັນທີ 5 ມັງກອນ 2024

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1030 (ເດືອນມັງກອນ 2024)