ຄວາມກ້າວໜ້າທີ່ສຳຄັນໃນສາມເສົາຄໍ້າຍຸດທະສາດຂອງຂະແໜງການກໍ່ສ້າງ

- ສ້າງຄວາມກ້າວໜ້າທາງດ້ານສະຖາບັນ. ການປະຕິຮູບດ້ານສະຖາບັນ, ການບູລະນະກອບກົດໝາຍ ແລະ ການກຳຈັດອຸປະສັກພື້ນຖານຢ່າງທັນການ. ກົດໝາຍສຳຄັນຫຼາຍສະບັບທີ່ກ່ຽວຂ້ອງກັບຂະແໜງການກໍ່ສ້າງ ໄດ້ຖືກສະເໜີຕໍ່ສະພາແຫ່ງຊາດແລະຮັບຮອງແລ້ວ, ເຊັ່ນ: ກົດໝາຍວ່າດ້ວຍການກໍ່ສ້າງ (2020); ກົດໝາຍວ່າດ້ວຍທີ່ຢູ່ອາໄສ (2023); ກົດໝາຍທຸລະກິດອະສັງຫາລິມະຊັບ (2023); ກົດໝາຍວ່າດ້ວຍຖະໜົນ (2024); ກົດໝາຍການວາງຜັງເມືອງແລະຊົນນະບົດ (2024); ກົດໝາຍທາງລົດໄຟ (2025). ພ້ອມກັນນັ້ນ, ກະຊວງການກໍ່ສ້າງໄດ້ສະຫຼຸບສັງລວມ ແລະ ສະເໜີການພັດທະນາກົດໝາຍສຳຄັນອື່ນໆ ອີກຫຼາຍສະບັບ, ເຊັ່ນ: ກົດໝາຍການບິນພົນລະເຮືອນຫວຽດນາມ, ປະມວນກົດໝາຍທາງທະເລຫວຽດນາມ, ກົດໝາຍການຈະລາຈອນທາງນ້ຳພາຍໃນຫວຽດນາມ,... ສ້າງຮາກຖານທາງກົດໝາຍທີ່ຄົບຊຸດແລະເຊື່ອມໂຍງລະຫວ່າງການກໍ່ສ້າງ, ການຄົມມະນາຄົມ, ການພັດທະນາຕົວເມືອງ ແລະ ໂລຈິສະຕິກ.        

ນອກຈາກນັ້ນ, ກະຊວງການກໍ່ສ້າງໄດ້ອອກເອກະສານທາງກົດໝາຍຈຳນວນ 440 ສະບັບ ເຊິ່ງລວມທັງກົນໄກທີ່ສ້າງສັນແລະບຸກທະລຸຫຼາຍຢ່າງ ທີ່ສົ່ງຜົນກະທົບຢ່າງແຂງແຮງ ຕໍ່ການພັດທະນາໂຄງສ້າງພື້ນຖານຂອງປະເທດ, ເພີ່ມທະວີການແບ່ງຂັ້ນຄຸ້ມຄອງ, ການກະຈາຍອໍານາດ, ການປະຕິຮູບຂະບວນການບໍລິຫານ, ການປັບປຸງສະພາບແວດລ້ອມການລົງທຶນແລະທຸລະກິດ, ສົ່ງເສີມການພັດທະນາວິສາຫະກິດ, ຮັບປະກັນນະໂຍບາຍສະຫວັດດີການສັງຄົມ, ແກ້ໄຂຂໍ້ບົກຜ່ອງໃນທາງປະຕິບັດ, ສ້າງຮາກຖານທາງກົດໝາຍທີ່ຄົບຊຸດສໍາລັບການພັດທະນາຢ່າງຍືນຍົງ ຂອງຂະແໜງການກໍ່ສ້າງ ແລະການຂົນສົ່ງ. ໂດຍສະເພາະ, ໃນການຈັດຕັ້ງປະຕິບັດຮູບແບບການປົກຄອງທ້ອງຖິ່ນສອງຊັ້ນ, ກະຊວງໄດ້ແບ່ງຂັ້ນຄຸ້ມຄອງ ແລະມອບອຳນາດໜ້າທີ່ 118 ເລື່ອງໃຫ້ແກ່ອໍານາດການປົກຄອງທ້ອງຖິ່ນ.    

ກ່ຽວກັບການວາງແຜນແລະຍຸດທະສາດ, ກະຊວງການກໍ່ສ້າງໄດ້ຍື່ນສະເໜີຕໍ່ນາຍົກລັດຖະມົນຕີເພື່ອຂໍອະນຸມັດເອກະສານແຜນການຂົນສົ່ງລະດັບຊາດ 5 ສະບັບ, ເຊິ່ງເປັນຄັ້ງທຳອິດໃນປະຫວັດສາດທີ່ເອກະສານເຫຼົ່ານີ້ໄດ້ຮັບການພັດທະນາຢ່າງຮອບດ້ານ. ພ້ອມກັບຍຸດທະສາດການພັດທະນາຂະແໜງການຂົນສົ່ງເຖິງປີ 2030, ວິໄສທັດເຖິງປີ 2050, ແລະ ໂຄງການພັດທະນາທ່າເຮືອພາຍໃນປະເທດ, ສູນໂລຈິສະຕິກ, ເຄືອຂ່າຍສະຖານີລົດໄຟ, ສູນຂົນສົ່ງຕໍ່ສິນຄ້າ ແລະອື່ນໆ ປະກອບສ່ວນເຂົ້າໃນການພັດທະນາໂຄງສ້າງພື້ນຖານຍຸດທະສາດ ທີ່ຄົບຊຸດ ແລະ ເຊື່ອມໂຍງຫຼາຍຮູບແບບ.      

- ການບຸກທະລຸໃນການພັດທະນາໂຄງສ້າງພື້ນຖານ. ກະຊວງການກໍ່ສ້າງໄດ້ເລີ່ມຕົ້ນໂຄງການຈຳນວນ 93 ໂຄງການ ແລະ ສຳເລັດ 83 ໂຄງການດ້ານຄົມມະນາຄົມ ແລະການກໍ່ສ້າງ ໂດຍໄດ້ສ້າງທາງດ່ວນສຳເລັດແລ້ວກວ່າ 3.000 ກິໂລແມັດ, ລວມທັງທາງດ່ວນສາຍຕາເວັນອອກ ຈາກລ້າງເຊີນເຖິງກ່າເມົາ ທີ່ສ້າງສຳເລັດເກືອບສົມບູນແລ້ວ. ໂຄງການສະໜາມບິນສາກົນ ລອງແທ່ງ ເຊິ່ງເປັນໂຄງການສຳຄັນລະດັບຊາດ ໄດ້ດຳເນີນການກໍ່ສ້າງຖານຮາກ, ອາຄານຜູ້ໂດຍສານ ແລະອຸປະກອນທາງເຕັກນິກທີ່ສຳຄັນສຳເລັດສົມບູນແລ້ວ ໂດຍພະຍາຍາມສຳເລັດໄລຍະທີ 1 ໃນທ້າຍປີ 2025. ກະຊວງການກໍ່ສ້າງໄດ້ຍື່ນໂຄງການລົດໄຟຄວາມໄວສູງສາຍເໜືອ-ໃຕ້ ຕໍ່ອົງການທີ່ກ່ຽວຂ້ອງເພື່ອຂໍການອະນຸມັດ ຫຼັງຈາກການຄົ້ນຄວ້າເກືອບ 20 ປີ ແລະ ໂຄງການລົດໄຟສາຍລາວກາຍ - ຮ່າໂນ້ຍ - ຫາຍຟ່ອງ ເພື່ອເພີ່ມການເຊື່ອມຕໍ່ການຂົນສົ່ງສິນຄ້າສາກົນ ໂດຍຕັ້ງເປົ້າທີ່ຈະເລີ່ມກໍ່ສ້າງໃນທ້າຍປີ 2025. ກະຊວງການກໍ່ສ້າງໄດ້ສະເໜີແຜນແມ່ບົດການພັດທະນາລະບົບທ່າເຮືອຂອງຫວຽດນາມ ສຳລັບໄລຍະປີ 2021-2030 ຕໍ່ລັດຖະບານ ເພື່ອຂໍອະນຸມັດ ໂດຍມີເປົ້າໝາຍເພື່ອສົ່ງເສີມການລົງທຶນ ແລະການຍົກລະດັບທ່າເຮືອ ກ໊າຍແມັບ-ທິຫວາຍ, ທ່າເຮືອ ແລັກຮ້ວຽນ, ທ່າເຮືອ ເວິນຟອງ,... ໃນເວລາດຽວກັນ, ກະຊວງການກໍ່ສ້າງກໍາລັງສຸມໃສ່ການຫຼຸດຜ່ອນຂັ້ນຕອນການບໍລິຫານ, ການພັດທະນາໂຄງສ້າງພື້ນຖານດ້ານໂລຈິສະຕິກ ແລະ ການເຊື່ອມຕໍ່ເສັ້ນທາງທາງທະເລ ແລະທາງນໍ້າພາຍໃນປະເທດເຂົ້າກັບທາງລົດໄຟ, ຖະໜົນ ແລະ ການຂົນສົ່ງທາງອາກາດ. 

ໃນຂົງເຂດການຄຸ້ມຄອງການດຳເນີນງານດ້ານການຂົນສົ່ງ, ຂະແໜງການຂົນສົ່ງໄດ້ຮັບການປັບໂຄງສ້າງໃໝ່, ເພີ່ມການເຊື່ອມຕໍ່ແບບຫຼາຍຮູບແບບ ແລະ ປັບປຸງຍົກສູງຄວາມສາມາດໃນການໃຫ້ບໍລິການ. ແຕ່ປີ 2020 ຫາ 2024: ປະລິມານການຂົນສົ່ງສິນຄ້າ ແລະຜູ້ໂດຍສານໃນທົ່ວຂະແໜງການເພີ່ມຂຶ້ນຈາກ 1,46 ເທົ່າເຖິງ 1,9 ເທົ່າ. ການເຕີບໂຕສະເລ່ຍແມ່ນ 13%-16% ຕໍ່ປີ. ໃນໄລຍະການແຜ່ລະບາດຂອງໂຄວິດ-19, ຂະແໜງການດັ່ງກ່າວຍັງຮັກສາການຂົນສົ່ງໄດ້ຢ່າງລຸລ່ວງ, ປ້ອງກັນບໍ່ໃຫ້ເກີດການຢຸດຊະງັກໃນຕ່ອງໂສ້ການສະໜອງ. ຜົນໄດ້ຮັບນີ້ສະແດງໃຫ້ເຫັນເຖິງຄວາມສາມາດໃນການນຳພາ, ການຄຸ້ມຄອງ ແລະ ການຕອບສະໜອງຢ່າງວ່ອງໄວຕໍ່ສະຖານະການທີ່ຜິດປົກກະຕິ.

ກະຊວງການກໍ່ສ້າງໄດ້ສະເໜີແນະໃຫ້ລັດຖະບານດຳເນີນການຕາມຊຸດມາດຕະການທີ່ຄົບຊຸດ ເພື່ອແກ້ໄຂຄວາມຫຍຸ້ງຍາກໃນຕະຫຼາດອະສັງຫາລິມະຊັບ, ໂດຍສອດຄ່ອງກັບຍຸດທະສາດການເຄຫະແຫ່ງຊາດ, ໂດຍສະເພາະ, ການພັດທະນາທີ່ຢູ່ອາໄສເພື່ອສັງຄົມໄດ້ຮັບຜົນທີ່ດີ ຊ່ວຍໃຫ້ຕະຫຼາດອະສັງຫາລິມະຊັບມີການປ່ຽນແປງ ແລະຜ່ານພົ້ນໄລຍະເວລາທີ່ຍາກລຳບາກທີ່ສຸດໄປໄດ້; ພ້ອມກັນນັ້ນ, ໂຄງການນີ້ຍັງຊ່ວຍໃຫ້ຜູ້ທຸກຍາກແລະຜູ້ມີລາຍໄດ້ນ້ອຍຫຼາຍແສນຄົນ ສາມາດປັບປຸງສະພາບທີ່ຢູ່ອາໄສຂອງຕົນໄດ້ໄວຂຶ້ນ. ມາຮອດປະຈຸບັນ, ທົ່ວປະເທດມີໂຄງການທີ່ຢູ່ອາໄສສັງຄົມທີ່ກຳລັງຈັດຕັ້ງປະຕິບັດ 692 ໂຄງການ ໂດຍມີຈຳນວນໜ່ວຍທີ່ຢູ່ອາໄສ 633.559 ໜ່ວຍ; ມີເຮືອນເກືອບ 124.000 ຫຼັງ ໄດ້ຖືກຈັດສັນໃຫ້ແກ່ຜູ້ທີ່ມີຄຸນງາມຄວາມດີຕໍ່ການປະຕິວັດ, ຍາດພີ່ນ້ອງຂອງຜູ້ເສຍສະຫຼະຊີວິດເພື່ອຊາດ, ຄອບຄົວທຸກຍາກ ແລະ ຄອບຄົວທີ່ເກືອບທຸກຍາກ. ກະຊວງການກໍ່ສ້າງໄດ້ທົບທວນ ແລະແກ້ໄຂຄວາມຫຍຸ້ງຍາກ ແລະອຸປະສັກສຳລັບ 136 ໂຄງການຈາກ 788 ໂຄງການອະສັງຫາລິມະຊັບ.

ການຄຸ້ມຄອງລັດກ່ຽວກັບການວາງແຜນ ແລະສະຖາປັດຕະຍະກຳ ຍັງສືບຕໍ່ໄດ້ຮັບການປັບປຸງໃຫ້ດີຂຶ້ນ ເພື່ອຕອບສະໜອງຄວາມຕ້ອງການຕົວຈິງ. ກະຊວງການກໍ່ສ້າງໄດ້ສະເໜີແຜນລະບົບຕົວເມືອງແລະຊົນນະບົດ ສຳລັບໄລຍະປີ 2021-2030 ຕໍ່ນາຍົກລັດຖະມົນຕີ ເພື່ອຂໍອະນຸມັດ, ພ້ອມທັງອອກແຜນການຈັດຕັ້ງປະຕິບັດແຜນການດັງກ່າວ; ນອກຈາກນີ້ຍັງໄດ້ປະເມີນແລະສະເໜີການປັບປຸງຜັງເມືອງໂດຍລວມ ຂອງນະຄອນຫຼວງຮ່າໂນ້ຍ, ນະຄອນໂຮ່ຈີມິນ, ຫາຍຟ່ອງ, ດານັງ, ເຫວ້ ແລະ ເຂດເສດຖະກິດສຳຄັນທີ່ຂັບເຄື່ອນການພັດທະນາ ຕໍ່ນາຍົກລັດຖະມົນຕີ ເພື່ອຂໍອະນຸມັດ.  ຮອດເດືອນມິຖຸນາປີ 2025, ມີເຂດຕົວເມືອງໃນທົ່ວປະເທດຈຳນວນ 900 ແຫ່ງ. ອັດຕາການຂະຫຍາຍຕົວເມືອງທົ່ວປະເທດບັນລຸປະມານ 44,9%.

- ການບຸກທະລຸໃນການພັດທະນາຊັບພະຍາກອນບຸກຄົນ, ວິທະຍາສາດ ແລະ ເຕັກໂນໂລຊີ. ກະຊວງການກໍ່ສ້າງໄດ້ຍູ້ແຮງການຝຶກອົບຮົມແລະພັດທະນາພະນັກງານ ແລະ ການນຳໃຊ້ເຕັກໂນໂລຊີໃໝ່ ໃນການຝຶກອົບຮົມອອນໄລນ໌. ມີການດຳເນີນໂຄງການດ້ານວິທະຍາສາດ ແລະເຕັກໂນໂລຊີຫຼາຍກວ່າ 1.200 ໂຄງການ ໂດຍສຸມໃສ່ຂົງເຂດຕ່າງໆເຊັ່ນ: ອາຄານອັດສະລິຍະ, ວັດສະດຸທີ່ເປັນມິດຕໍ່ສິ່ງແວດລ້ອມ, ມາດຕະຖານດ້ານເຕັກນິກ ແລະ ການຫັນປ່ຽນດິຈິຕອນ.

ຍົກສູງຄວາມສາມາດໃນການນຳພາ - ສ້າງແຮງຜັກດັນສູ່ຄວາມກ້າວໜ້າ

ຫຼັກການຊີ້ນຳທີ່ໄດ້ຮັບການປະຕິບັດຢ່າງທົວເຖິງຄື: “ສາມັກຄີ - ປະຊາທິປະໄຕ - ລະບຽບວິໄນ - ການບຸກທະລຸ - ການພັດທະນາ”.

ກ່ຽວກັບໜ້າທີ່ການເມືອງທີ່ສຳຄັນ: ການບັນລຸເປົ້າໝາຍສຳຄັນຫຼາຍຢ່າງ ເຊັ່ນ: ການປັບປຸງສະຖາບັນໃຫ້ສົມບູນແບບ, ການປະກາດໃຊ້ເອກະສານທາງກົດໝາຍທີ່ຄົບຊຸດ ແລະ ການຍົກສູງປະສິດທິພາບຂອງການຄຸ້ມຄອງລັດ. ສືບຕໍ່ທົບທວນແລະແກ້ໄຂຂໍ້ຈຳກັດໃນຂະແໜງການເພື່ອປະກອບສ່ວນເຂົ້າໃນເປົ້າໝາຍການເຕີບໂຕສອງຫຼັກ, ພະຍາຍາມປະກອບສ່ວນຫຼາຍກວ່າ 20% ໃນ GDP ຂອງປະເທດ. ໂດຍສະເພາະ, ການຈັດຕັ້ງປະຕິບັດໂຄງການໃຫຍ່ທີ່ມີຜົນກະທົບຢ່າງເລິກເຊິ່ງຕໍ່ການພັດທະນາເສດຖະກິດ-ສັງຄົມ: ຮອດປີ 2030, ຈະມີທາງດ່ວນຢ່າງໜ້ອຍ 5.000 ກິໂລແມັດ; ເລີ່ມກໍ່ສ້າງທາງລົດໄຟຄວາມໄວສູງສາຍເໜືອ-ໃຕ້, ທາງລົດໄຟໃນຕົວເມືອງ ແລະ ທາງລົດໄຟເຊື່ອມຕໍ່ກັບປະເທດຈີນ. ການເປີດນຳໃຊ້ສະໜາມບິນສາກົນ ລອງແທ່ງ ຢ່າງມີປະສິດທິພາບ; ການເລັ່ງດຳເນີນການກໍ່ສ້າງລະບົບເສັ້ນທາງແຄມຝັ່ງທະເລ ແລະທ່າເຮືອຂົນສົ່ງສິນຄ້າສາກົນຢູ່ ແລັກຮ້ວຽນ, ກ໊າຍແມັບ-ທິຫວາຍ, ເກິ່ນເຢີ່, ລຽນຈ້ຽວ, ນາມໂດ່ເຊີນ... ໃຫ້ສຳເລັດເສັດສິ້ນ. ຊຸກຍູ້ການສຳເລັດເປົ້າໝາຍການກໍ່ສ້າງທີ່ຢູ່ອາໄສສັງຄົມຈຳນວນ 1 ລ້ານໜ່ວຍພາຍໃນປີ 2030 ຕາມແຜນງານຂອງລັດຖະບານ "ການລົງທຶນໃນການກໍ່ສ້າງທີ່ຢູ່ອາໄສສັງຄົມຢ່າງໜ້ອຍ 1 ລ້ານໜ່ວຍໃນໄລຍະປີ 2021-2030"...

ເປົ້າໝາຍໂດຍລວມສຳລັບໄລຍະປິ 2025-2030 ແມ່ນ: ເພີ່ມທະວີການສ້າງແລະປັບປຸງພັກໃຫ້ສະອາດແລະໝັ້ນຄົງເຂັ້ມແຂງຮອບດ້ານ; ປ່ຽນແປງໃໝ່ແບບວິທີແລະປັບປຸງຄວາມສາມາດໃນການນຳພາຂອງຄະນະພັກແລະການຈັດຕັ້ງພັກ; ກຳນົດຈຸດປະສົງແລະໜ້າທີ່ສຳຄັນແລະການບຸກທະລຸຢ່າງຊັດເຈນ ໂດຍອີງໃສ່ການສືບຕໍ່ແລະການພັດທະນາ, ຄວາມຕັດສິນໃຈໃນການນຳພາ, ຊີ້ນຳ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIV ຂອງພັກ ແລະ ມະຕິກອງປະຊຸມໃຫຍ່ອົງຄະນະພັກທຸກຂັ້ນໃຫ້ປະສົບຜົນສຳເລັດ; ເສີມຂະຫຍາຍກຳລັງແຮງແຫ່ງຄວາມເປັນເອກະພາບ ແລະຄວາມສາມັກຄີພາຍໃນອົງຄະນະພັກ; ຮ່ວມແຮງຮ່ວມໃຈກັນ, ປ່ຽນແປງໃໝ່ປະດິດສ້າງ ແລະ ສ້າງກະຊວງການກໍ່ສ້າງທີ່ເຂັ້ມແຂງ ແລະຮອບດ້ານ, ຮັບປະກັນການປະຕິບັດໜ້າທີ່ທາງການເມືອງແລະວຽກງານກໍ່ສ້າງພັກໃຫ້ປະສົບຜົນສຳເລັດເປັນຢ່າງດີ.   

ເພື່ອບັນລຸເປົ້າໝາຍທີ່ວາງໄວ້ຢ່າງສຳເລັດຜົນ, ໃນຍຸດທະສາດທົ່ວໄປຂອງຂະແໜງການ, ກະຊວງການກໍ່ສ້າງໄດ້ກຳນົດທີຕັ້ງແລະບົດບາດຂອງມະຕິສະບັບເລກທີ 57, 59, 66, 68⁽¹⁾ - “ຍຸດທະສາດສີ່ປະການ”, ເປັນພື້ນຖານແລະທິດທາງທີ່ສອດຫ້ອຍຕະຫຼອດຂະບວນການພັດທະນາຂະແໜງການໃນໄລຍະປີ 2025-2030, ໂດຍມີວິໄສທັດເຖິງປີ 2045. 

ໂດຍສະເພາະ, ມະຕິໝາຍເລກ 57-NQ/TW, ລົງວັນທີ 22 ທັນວາ 2024, ຂອງກົມການເມືອງສູນກາງພັກ "ກ່ຽວກັບຄວາມກ້າວໜ້າໃນການພັດທະນາວິທະຍາສາດ, ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະ ການຫັນເປັນດິຈິຕອນ" ຖືເປັນທິດທາງທີ່ສໍາຄັນສໍາລັບຂະບວນການປັບປຸງຂະແໜງການກໍ່ສ້າງ ໃຫ້ທັນສະໄໝຢ່າງຮອບດ້ານ. ລັດຖະມົນຕີເຊິ່ງເປັນຫົວໜ້າໂດຍກົງຂອງຄະນະຊີ້ນໍາການພັດທະນາວິທະຍາສາດ, ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະ ການຫັນເປັນດິຈິຕອນ ໄດ້ອອກແຜນງານການຫັນປ່ຽນດິຈິຕອນສໍາລັບຂະແໜງການນີ້ຈົນເຖິງປີ 2025, ໂດຍມີວິໄສທັດເຖິງປີ 2030. ກະຊວງການກໍ່ສ້າງໄດ້ກໍານົດທິດທາງຄວາມສຳຄັນຂອງການລົງທຶນຫຼັກສຳລັບລະບົບນິເວດນະວັດຕະກໍາ; ຍູ້ແຮງການນໍາໃຊ້ຜົນສໍາເລັດທາງວິທະຍາສາດແລະເຕັກໂນໂລຊີໃໝ່ເຊັ່ນ: BIM (Building Information Modeling-ຮູບແບບຂໍ້ມູນການກໍ່ສ້າງ); GIS (Geographic Information System - ລະບົບຂໍ້ມູນຂ່າວສານພູມສາດ); AI (Artificial intelligence - ປັນຍາປະດິດ), IoT (Internet of Things - ອິນເຕີເນັດຂອງສິ່ງຕ່າງໆ), ການສ້າງລະບົບການຄຸ້ມຄອງອັດສະລິຍະໃນການວາງແຜນ, ການພັດທະນາຕົວເມືອງ, ການຂົນສົ່ງ, ການຈົດທະບຽນຍານພາຫະນະ, ທ່າເຮືອ ແລະ ໂຄງສ້າງພື້ນຖານທີ່ສາມາດປັບຕົວໃຫ້ເຂົ້າກັບການປ່ຽນແປງສະພາບອາກາດ...

ມະຕິໝາຍເລກ 59-NQ/TW, ລົງວັນທີ 24 ມັງກອນ 2025, ຂອງກົມການເມືອງສູນກາງພັກກ່ຽວກັບ "ການເຊື່ອມໂຍງສາກົນໃນສະຖານະການໃໝ່" ໄດ້ກຳນົດທິດທາງທີ່ເຂັ້ມແຂງຍິ່ງຂຶ້ນສຳລັບການເປີດສະຖາບັນ, ເຕັກໂນໂລຊີ ແລະຕະຫຼາດ, ໂດຍສະເພາະໃນດ້ານການພັດທະນາໂຄງສ້າງພື້ນຖານ, ຕົວເມືອງອັດສະລິຍະ, ວັດສະດຸກໍ່ສ້າງທີ່ເປັນມິດຕໍ່ສິ່ງແວດລ້ອມ ແລະໂລຈິສະຕິກ. ກະຊວງການກໍ່ສ້າງກຳລັງສົ່ງເສີມກົນໄກການຮ່ວມມືສອງຝ່າຍແລະຫຼາຍຝ່າຍ ກັບບັນດາປະເທດ ແລະອົງການຈັດຕັ້ງສາກົນເຊັ່ນ: ຈີນ, ເກົາຫຼີໃຕ້, ຍີ່ປຸ່ນ, ລາວ, ກຳປູເຈຍ, ສະຫະພາບເອີຣົບ (EU), ສະຫະລັດອາເມລິກາ, ອົດສະຕຣາລີ... ນອກຈາກນີ້ຍັງກຳລັງເສີມຂະຫຍາຍບົດບາດຂອງຕົນໃນຂອບການຮ່ວມມືພາກພື້ນແລະທົ່ວໂລກ ເຊັ່ນ: ອົງການການຄ້າໂລກ (WTO), ເວທີການຮ່ວມມືເສດຖະກິດອາຊີປາຊີຟິກ (APEC), ສະມາຄົມປະຊາຊາດອາຊີຕາເວັນອອກສຽງໃຕ້ (ASEAN), ASEAN+, ສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປາຊີຟິກ (CPTPP), ສັນຍາການຄ້າເສລີຫວຽດນາມ-ສະຫະພາບເອີຣົບ (EVFTA), ຄະນະກຳມະການເສດຖະກິດ ແລະ ສັງຄົມແຫ່ງສະຫະປະຊາຊາດ ສຳລັບອາຊີແລະປາຊີຟິກ (UNESCAP), ອົງການການຮ່ວມມືດ້ານລົດໄຟ (OSJD)... ຄວາມພະຍາຍາມເຫຼົ່ານີ້ໄດ້ຊ່ວຍລະດົມຊັບພະຍາກອນຢ່າງມີປະສິດທິພາບຈາກການຊ່ວຍເຫຼືອເພື່ອການພັດທະນາຢ່າງເປັນທາງການ (ODA), ການລົງທຶນໂດຍກົງຈາກຕ່າງປະເທດ (FDI), ເງິນກູ້ດອກເບ້ຍຕ່ຳ ແລະອື່ນໆ. 

ມະຕິໝາຍເລກ 66-NQ/TW, ລົງວັນທີ 30 ເມສາ 2025, ຂອງກົມການເມືອງສູນກາງພັກ "ວ່າດ້ວຍການປ່ຽນແປງໃໝ່ວຽກງານການສ້າງແລະການບັງຄັບໃຊ້ກົດໝາຍ" ເພື່ອຕອບສະໜອງຄວາມຕ້ອງການຂອງການພັດທະນາປະເທດຊາດໃນຍຸກໃໝ່, ເປັນພື້ນຖານໃຫ້ກະຊວງການກໍ່ສ້າງໃນການສ້າງໂຄງການສ້າງກົດໝາຍທີ່ສ້າງສັນ, ຮອບດ້ານ ແລະ ປະຕິບັດໄດ້ຈິງ. ການປະຕິຮູບສະຖາບັນ, ການຫຼຸດຜ່ອນຄວາມຊ້ຳຊ້ອນ, ສ້າງສະພາບແວດລ້ອມທາງກົດໝາຍທີ່ໂປ່ງໃສ ແມ່ນເງື່ອນໄຂເບື້ອງຕົ້ນສຳລັບການຈັດຕັ້ງປະຕິບັດຈຸດປະສົງຂອງມະຕິທີ່ເຫຼືອຢູ່ຢ່າງມີປະສິດທິພາບ. ເອກະສານທີ່ອອກມານັ້ນລ້ວນມີການປ່ຽນແປງໃໝ່, ເປັນປະໂຫຍດ ແລະມີສ່ວນຊ່ວຍໃນການແກ້ໄຂອຸປະສັກດ້ານສະຖາບັນ, ປັບປຸງສະພາບແວດລ້ອມດ້ານການລົງທຶນແລະທຸລະກິດ ແລະສົ່ງເສີມການພັດທະນາທີ່ຢູ່ອາໄສສັງຄົມ, ທີ່ຢູ່ອາໄສພານິດ, ວັດສະດຸກໍ່ສ້າງ, ຕົວເມືອງອັດສະລິຍະ ແລະ ໂຄງສ້າງພື້ນຖານ.

ເພື່ອຈັດຕັ້ງປະຕິບັດມະຕິໝາຍເລກ 68-NQ/TW, ລົງວັນທີ 4 ພຶດສະພາ 2025, ຂອງກົມການເມືອງສູນກາງພັກ "ວ່າດ້ວຍການພັດທະນາເສດຖະກິດເອກະຊົນ", ກະຊວງການກໍ່ສ້າງໄດ້ກຳນົດຢ່າງຈະແຈ້ງວ່າ ການພັດທະນາເສດຖະກິດເອກະຊົນເປັນແຮງຂັບເຄື່ອນສຳຄັນ ບໍ່ພຽງແຕ່ເປັນຄວາມຕ້ອງການທາງດ້ານການເມືອງ ແຕ່ຍັງເປັນທາງເລືອກທີ່ຫຼີກລ່ຽງບໍ່ໄດ້ ໃນການເລັ່ງການພັດທະນາຂະແໜງການກໍ່ສ້າງໃຫ້ທັນສະໄໝ ແລະບັນລຸການພັດທະນາຢ່າງຍືນຍົງ. ໃນຄວາມເປັນຈິງ, ບໍລິສັດເອກະຊົນຂະໜາດໃຫຍ່ໃນປະເທດຫຼາຍແຫ່ງໄດ້ລົງທຶນໃນໂຄງການທີ່ຢູ່ອາໄສສັງຄົມ, ເມືອງອັດສະລິຍະ, ໂຄງສ້າງພື້ນຖານດ້ານການຂົນສົ່ງ ແລະອື່ນໆ. ນີ້ແມ່ນສັນຍານທີ່ດີ ແລະກະຊວງການກໍ່ສ້າງຈະສືບຕໍ່ໃຫ້ການສະໜັບສະໜູນ, ແກ້ໄຂຄວາມຫຍຸ້ງຍາກ ແລະເຜີຍແຜ່ແບບຢ່າງທີ່ດີຂອງໂຄງການລົງທຶນພາກເອກະຊົນ ແລະໂຄງການຮ່ວມມືລະຫວ່າງພາກລັດແລະເອກະຊົນ (PPP).

ຂະແໜງການກໍ່ສ້າງຕ້ອງນຳໜ້າໃນການປະກອບສ່ວນເຂົ້າໃນຜະລິດຕະພັນລວມຍອດພາຍໃນປະເທດ (GDP) ປະມານ 18% ພາຍໃນປີ 2025 ແລະຫຼາຍກວ່າ 20% ໃນປີຕໍ່ໆໄປ. ນອກຈາກນີ້ ຂະແໜງການກໍ່ສ້າງຍັງພະຍາຍາມປະກອບສ່ວນທາງອ້ອມໃນ GDP ປະມານ 4-5% ຜ່ານຜົນກະທົບທາງບວກຕໍ່ຂະແໜງການອື່ນໆ ເຊັ່ນ: ການຜະລິດເຄື່ອງຈັກ, ສິນຄ້າອຸປະໂພກບໍລິໂພກ...; ເພື່ອບັນລຸພາລະກິດໃນການກໍ່ສ້າງໂຄງສ້າງພື້ນຖານ - ການເຊື່ອມໂຍງລະບົບຄົມມະນາຄົມຂົນສົ່ງ - ການຂະຫຍາຍພື້ນທີ່ການພັດທະນາໃນຍຸກແຫ່ງການບືນຕົວຂຶ້ນຂອງຊາດ./.

------------------------

(1) ມະຕິໝາຍເລກ 57-NQ/TW, ລົງວັນທີ 22 ທັນວາ 2024, ຂອງກົມການເມືອງສູນກາງພັກ "ກ່ຽວກັບຄວາມກ້າວໜ້າໃນການພັດທະນາວິທະຍາສາດ, ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະ ການຫັນເປັນດິຈິຕອນ"; ມະຕິໝາຍເລກ 59-NQ/TW, ລົງວັນທີ 24 ມັງກອນ 2025, ຂອງກົມການເມືອງສູນກາງພັກກ່ຽວກັບ "ການເຊື່ອມໂຍງສາກົນໃນສະພາບການໃໝ່"; ມະຕິໝາຍເລກ 66-NQ/TW, ລົງວັນທີ 30 ເມສາ 2025, ຂອງກົມການເມືອງສູນກາງພັກ "ວ່າດ້ວຍການປ່ຽນແປງໃໝ່ວຽກງານການສ້າງແລະການບັງຄັບໃຊ້ກົດໝາຍ ເພື່ອຕອບສະໜອງວາມຕ້ອງການຂອງການພັດທະນາປະເທດໃນຍຸກໃໝ່”; ມະຕິໝາຍເລກ 68-NQ/TW, ລົງວັນທີ 4 ພຶດສະພາ 2025, ຂອງກົມການເມືອງສູນກາງພັກ "ວ່າດ້ວຍການພັດທະນາເສດຖະກິດເອກະຊົນ".