ສະຫາຍເລຂາທິການໃຫຍ່ ຫງວຽນຝູຈ້ອງ -
ເປັນນັກຮົບກອມມູນິດທີ່ຈົງຮັກພັກດີ, ຜູ້ນຳທີ່ດີເດັ່ນ,
ໄດ້ອຸທິດຊີວິດໃຫ້ແກ່ພັກ, ປະເທດຊາດ ແລະປະຊາຊົນ
ເປັນນັກຮົບກອມມູນິດທີ່ຈົງຮັກພັກດີ, ຜູ້ນຳທີ່ດີເດັ່ນ,
ໄດ້ອຸທິດຊີວິດໃຫ້ແກ່ພັກ, ປະເທດຊາດ ແລະປະຊາຊົນ
ວກ. - ໃນໄລຍະເຮັດວຽກ, ໂດຍດຳລົງຕຳແໜ່ງຕ່າງໆຫຼາຍຕຳແໜ່ງ ແລະຄວາມຮັບຜິດຊອບອັນຍິ່ງໃຫຍ່ ທີ່ໄດ້ຮັບມອບໝາຍຈາກພັກ, ລັດ ແລະປະຊາຊົນ, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ປະກອບສ່ວນສຳຄັນເຂົ້າໃນພາລະກິດການປະຕິວັດຂອງຫວຽດນາມ. ສະຫາຍເປັນຕົວຢ່າງທີ່ສົດໃສຂອງທະຫານກອມມູນິດຜູ້ກ້າແກ່ນ, ຜູ້ນຳທີ່ດີເດັ່ນເປັນພິເສດ, ອຸທິດຊີວິດທັງຊີວິດໃຫ້ກັບພັກ, ປະເທດຊາດ ແລະ ປະຊາຊົນ, “ສູນລວມແຫ່ງຄຸນສົມບັດ, ຄວາມສາມາດ, ຄວາມກ້າຫານ ແລະ ສະຕິປັນຍາຂອງຜູ້ນຳຫວຽດນາມຢ່າງຄົບຖ້ວນ ໃນໄລຍະການປ່ຽນແປງໃໝ່”(1). ບັນດາມໍລະດົກທີ່ສະຫາຍສ້າງໄວ້ຈະສືບຕໍ່ໄດ້ຮັບການສືບທອດ ແລະ ເສີມຂະຫຍາຍໂດຍທົ່ວພັກ, ທົ່ວປວງຊົນ ແລະກອງທັບ, ປະກອບສ່ວນຢ່າງຕັ້ງໜ້າເຂົ້າໃນການປະຕິບັດບັນດາຈຸດໝາຍແຫ່ງການປ່ຽນແປງໃໝ່, ນຳປະເທດຊາດຫວຽດນາມໄປສູ່ສັງຄົມນິຍົມຢ່າງໝັ້ນຄົງ.
ສະຫາຍເລຂາທິການໃຫຍ່, ປະທານປະເທດ ຫງວຽນຝູຈ້ອງ ໄປຢ້ຽມຢາມ ແລະອວຍພອນປີໃໝ່ກອງຕຳຫຼວດຈະລາຈອນ-ຮັກສາຄວາມສະຫງົບ- ເຄື່ອນທີ່ (ຕຳຫຼວດເມືອງ ບາດິ່ງ), ເດືອນກຸມພາ 2018 _ແຫຼ່ງ: hanoimoi.vn
ສະຫາຍເລຂາທິການໃຫຍ່ ຫງວຽນຝູຈ້ອງ ມີສະຕິປັນຍາ, ຄວາມສາມາດ ແລະ ບຸກຄະລິກກະພາບອັນຍິ່ງໃຫຍ່ຂອງການປະຕິວັດຫວຽດນາມ, ນັກຄິດ, ນັກວັດທະນະທຳ, ທິດສະດີຂອງພັກ, ນັກຮຽນເກັ່ງທີ່ຮ່ຳຮຽນຕະຫຼອດມາ ແລະ ປະຕິບັດຕາມແນວຄິດ, ຄຸນສົມບັດສິນທຳ, ແບບແຜນຂອງປະທານໂຮ່ຈິມິນຜູ້ຍິ່ງໃຫຍ່, ໄດ້ອຸທິດຕະຫຼອດຊີວິດຂອງຕົນເພື່ອພາລະກິດປະຕິວັດຂອງພັກແລະຊາດຂອງເຮົາ, ໃຊ້ຊີວິດທັງຊີວິດເພື່ອປະເທດຊາດ ແລະປະຊາຊົນ.
ເກືອບ 60 ປີແຫ່ງການເຄື່ອນໄຫວປະຕິວັດທີ່ອຸດົມສົມບູນແລະໝັ້ນໜຽວ, ໄດ້ຮັບການຝຶກຝົນຫຼໍ່ຫຼອມໃນການເຄື່ອນໄຫວປະຕິວັດ, ດ້ວຍເຈດຈຳນົງທາງການເມືອງທີ່ເຂັ້ມແຂງແລະແນ່ວແນ່, ວິໄສທັດຍຸດທະສາດ, ແນວຄິດທິດສະດີແຫຼມຄົມແລະຄວາມສະຫຼາດທາງວິຊາການ, ດ້ວຍຮູບແບບການເຮັດວຽກທີ່ຂະຫຍັນໝັ່ນພຽນແລະທົນທານໜຽວແໜ້ນ, ສະຫາຍ ຫງວຽນຝູຈ້ອງ ພ້ອມກັບຄະນະບໍລິຫານງານສູນກາງ, ກົມການເມືອງ ແລະ ຄະນະເລຂາທິການ ໄດ້ນຳໃຊ້ຢ່າງມີຫົວຄິດປະດິດສ້າງ ແລະ ພັດທະນາລັດທິ ມາກ-ເລນິນ ແລະແນວຄິດໂຮ່ຈີມິນ, ຈາກນັ້ນ ເພີ່ມເຕີມ ປັບປຸງບູລະນະ ແລະ ນຳພາການປະຕິບັດແນວທາງປ່ຽນແປງໃໝ່ຢ່າງສຳເລັດຜົນ, ປະກອບສ່ວນຊີ້ແຈ້ງທິດສະດີກ່ຽວກັບລັດທິສັງຄົມນິຍົມ ແລະ ເສັ້ນທາງໄປສູ່ລັດທິສັງຄົມນິຍົມຂອງຫວຽດນາມ, ກໍ່ສ້າງປະເທດຂອງພວກເຮົາໃຫ້ຈະເລີນພັດທະນາຢ່າງ “ບໍ່ເຄີຍມີໂຊກມີໄຊ, ທ່າແຮງ, ກຽດສັກສີ ແລະຕໍາແໜ່ງສາກົນຄືປະຈຸບັນ”.
ຕະຫຼອດຊີວິດການເຄື່ອນໄຫວປະຕິວັດຂອງຕົນ, ວຽກງານທິດສະດີຂອງພັກ ຍາມໃດກໍ່ໄດ້ຮັບຄວາມເອົາໃຈໃສ່ເປັນພິເສດ ຈາກສະຫາຍ ຫງວຽນຝູຈ້ອງ, ເພາະວ່າ “ບໍ່ມີທິດສະດີປະຕິວັດ ຈະບໍ່ມີການເຄື່ອນໄຫວປະຕິວັດ”(2). ສະຫາຍເນັ້ນໜັກວ່າ: “ແນວທາງຂອງພັກທີ່ບໍ່ສະທ້ອນເຖິງຜົນປະໂຫຍດຂອງປະຊາຊົນ, ປະເທດຊາດ, ບໍ່ສອດຄ່ອງກັບກົດເກນຂອງວິວັດການປະຫວັດສາດ, ແມ່ນແນວທາງທີ່ຜິດພາດ”(3). ດັ່ງນັ້ນ, ທິດສະດີຕ້ອງແບກຫາບພາລະກິດໃນ “ການບືນຕົວຂຶ້ນເພື່ອນຳທາງແລະໄປພ້ອມກັບການປະຕິບັດ”(4). ດ້ວຍຄວາມຮັບຜິດຊອບຂອງການເປັນຜູ້ນຳສູງສຸດຂອງພັກ, ຜູ້ຮັບຜິດຊອບວຽກງານທິດສະດີຂອງພັກເປັນເວລາຫຼາຍປີ, ສະຫາຍ ຫງວຽນຝູຈ້ອງ ໄດ້ມີການປະກອບສ່ວນອັນໃຫຍ່ຫຼວງໃນການຊີ້ນຳ, ນຳພາການສະຫຼຸບສັງລວມພຶດຕິກຳ, ຄົ້ນຄວາມທິດສະດີ, ພັດທະນາຄວາມຮັບຮູ້ທິດສະດີຂອງພັກເຮົາກ່ຽວກັບແນວທາງປ່ຽນແປງໃໝ່, ກ່ຽວກັບຮູບແບບລັດທິສັງຄົມນິຍົມສະເພາະຂອງຫວຽດນາມທີ່ນັບມື້ນັບຈະແຈ້ງແລະສົມບູນ.
ສະຫາຍກ່າວຢ່າງຈະແຈ້ງເຖິງຄວາມຮັບຮູ້ທົ່ວໄປ ກ່ຽວກັບຮູບແບບລັດທິສັງຄົມນິຍົມຂອງຫວຽດນາມວ່າ: “ສັງຄົມສັງຄົມນິຍົມທີ່ປະຊາຊົນຫວຽດນາມພະຍາຍາມກໍ່ສ້າງນັ້ນ ແມ່ນສັງຄົມທີ່ປະຊາຊົນຮັ່ງມີ, ປະເທດເຂັ້ມແຂງ, ມີປະຊາທິປະໄຕ, ຍຸຕິທຳ ແລະອາລະຍະທຳ; ໂດຍປະຊາຊົນເປັນເຈົ້າຂອງ; ມີເສດຖະກິດພັດທະນາສູງ, ອີງໃສ່ກຳລັງການຜະລິດທີ່ທັນສະໄໝ ແລະ ການພົວພັນການຜະລິດທີ່ເໝາະສົມ; ມີວັດທະນະທຳທີ່ກ້າວໜ້າ, ອຸດົມສົມບູນໄປດ້ວຍເອກະລັກຂອງຊາດ; ປະຊາຊົນມີຊີວິດທີ່ຈະເລີນຮຸ່ງເຮືອງ, ເສລີ, ມີຄວາມຜາສຸກ ແລະ ມີເງື່ອນໄຂພັດທະນາຢ່າງຮອບດ້ານ; ບັນດາຊົນເຜົ່າໃນວົງຄະນາຊາດຫວຽດນາມ ລ້ວນແຕ່ສະເໝີພາບ, ສາມັກຄີ, ເຄົາລົບນັບຖື ແລະ ຊ່ວຍເຫຼືອເຊິ່ງກັນແລະກັນ ພ້ອມກັນພັດທະນາ; ມີລັດແຫ່ງອຳນາດກົດໝາຍສັງຄົມນິຍົມທີ່ເປັນຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ພາໃຕ້ການນຳພາຂອງພັກກອມມູນິດ; ມີການພົວພັນມິດຕະພາບ ແລະ ການຮ່ວມມືກັບບັນດາປະເທດໃນທົ່ວໂລກ”(5).
ເພື່ອບັນລຸເປົ້າໝາຍທົ່ວໄປ ແລະຄຸນລັກສະນະຂອງສັງຄົມສັງຄົມນິຍົມ, ພັກກອມມູນິດຫວຽດນາມ ສະໜັບສະໜູນການປະຕິບັດ 8 ທິດທາງກໍ່ສ້າງສັງຄົມນິຍົມ ຕິດພັນກັບ 8 ຂົງເຂດຕົ້ນຕໍຂອງຊີວິດການເມືອງ, ເສດຖະກິດ-ສັງຄົມ ເຊິ່ງມີຄວາມໝາຍຄືກັບເສັ້ນທາງ, ວິທີການໄປສູ່ຈຸດໝາຍປາຍທາງ, ນັ້ນຄື: ຍູ້ແຮງການຫັນເປັນອຸດສາຫະກຳ ແລະ ທັນສະໄໝຂອງປະເທດ ຕິດພັນກັບການພັດທະນາເສດຖະກິດພູມປັນຍາ ແລະ ປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ; ພັດທະນາເສດຖະກິດຕະຫຼາດຕາມທິດສັງຄົມນິຍົມ; ສ້າງວັດທະນະທໍາທີ່ກ້າວໜ້າ ແລະ ອຸດົມໄປດ້ວຍເອກະລັກຂອງຊາດ; ສ້າງຄົນແລະປັບປຸງຊີວິດການເປັນຢູ່ຂອງປະຊາຊົນ, ປະຕິບັດຄວາມກ້າວໜ້າ ແລະ ຄວາມຍຸຕິທຳທາງສັງຄົມ; ຮັບປະກັນການປ້ອງກັນປະເທດ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍທາງສັງຄົມ; ປະຕິບັດນະໂຍບາຍການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ; ເປັນເຈົ້າການແລະຕັ້ງໜ້າເຊື່ອມໂຍງເຂົ້າກັບສາກົນ; ສ້າງພື້ນຖານປະຊາທິປະໄຕສັງຄົມນິຍົມ, ປະຕິບັດມະຫາສາມັກຄີປວງຊົນທັງຊາດ, ເພີ່ມທະວີແລະຂະຫຍາຍແນວໂຮມປະເທດຊາດເອກະພາບ; ກໍ່ສ້າງລັດແຫ່ງອຳນາດກົດໝາຍສັງຄົມນິຍົມທີ່ເປັນຂອງປະຊາຊົນ, ໂດຍປະຊາຊົນ, ເພື່ອປະຊາຊົນ; ກໍ່ສ້າງພັກທີ່ສະອາດປອດໃສ, ໝັ້ນຄົງເຂັ້ມແຂງ.
ໃນຂະບວນການປະຕິບັດບັນດາທິດທາງພື້ນຖານນັ້ນ, ຕ້ອງເອົາໃຈໃສ່ເປັນພິເສດເຖິງການເປັນເຈົ້າການ ແລະ ແກ້ໄຂເປັນຢ່າງດີ 10 ສາຍພົວພັນໃຫຍ່ຄື: ລະຫວ່າງສະຖຽນລະພາບ, ການປ່ຽນແປງໃໝ່ ແລະ ການພັດທະນາ; ລະຫວ່າງການປ່ຽນແປງໃໝ່ທາງດ້ານເສດຖະກິດ ແລະ ການປ່ຽນແປງໃໝ່ທາງດ້ານການເມືອງ; ລະຫວ່າງການປະຕິບັດຕາມກົດເກນຕະຫຼາດ ແລະການຮັບປະກັນທິດທາງສັງຄົມນິຍົມ; ລະຫວ່າງການພັດທະນາກໍາລັງການຜະລິດ ແລະ ການກໍ່ສ້າງ, ປັບປຸງການພົວພັນການຜະລິດສັງຄົມນິຍົມໃຫ້ສົມບູນເທື່ອລະກ້າວ; ລະຫວ່າງລັດ, ຕະຫຼາດ ແລະ ສັງຄົມ; ລະຫວ່າງການເຕີບໂຕດ້ານເສດຖະກິດ ແລະ ການພັດທະນາວັດທະນະທຳ, ປະຕິບັດຄວາມກ້າວໜ້າ, ຄວາມຍຸຕິທຳທາງສັງຄົມ, ການປົກປັກຮັກສາສິ່ງແວດລ້ອມ; ລະຫວ່າງການກໍ່ສ້າງ ແລະ ການປົກປັກຮັກສາປະເທດຊາດສັງຄົມນິຍົມ; ລະຫວ່າງເອກະລາດ, ຄວາມເປັນເຈົ້າຕົນເອງ ແລະ ການເຊື່ອມໂຍງສາກົນ; ລະຫວ່າງການນຳພາຂອງພັກ, ການຄຸ້ມຄອງລັດ ແລະ ການເປັນເຈົ້າຂອງປະຊາຊົນ; ລະຫວ່າງການປະຕິບັດປະຊາທິປະໄຕ ແລະ ເສີມຂະຫຍາຍການປົກປັກຮັກສາລະບຽບກົດໝາຍ, ການຮັບປະກັນລະບຽບວິໄນໃນສັງຄົມ...
ກິດຈະການປ່ຽນແປງໃໝ່ ແລະ ກໍ່ສ້າງສັງຄົມນິຍົມຫວຽດນາມ ແມ່ນການດັດປ່ຽນປະຕິວັດທີ່ຍິ່ງໃຫຍ່, ຮອບດ້ານ, ເລິກເຊິ່ງ, ແມ່ນການຕໍ່ສູ້ຍາວນານ ທີ່ເຕັມໄປດ້ວຍຄວາມຫຍຸ້ງຍາກ, ລຳບາກ, ສັບສົນ, ຍາວນານ ເຊິ່ງທັງຕ້ອງດຳເນີນການ, ທັງຖອດຖອນບົດຮຽນ. ສະນັ້ນ, ຕ້ອງເອົາໃຈໃສ່ເປັນຢ່າງສູງຕໍ່ວຽກງານສະຫຼຸບສັງລວມ ແລະ ການຄົ້ນຄວ້າທິດສະດີ. ບັນດາບັນຫາທິດສະດີກ່ຽວກັບແນວທາງການປ່ຽນແປງໃໝ່ຢູ່ຫວຽດນາມ ນັບມື້ນັບໄດ້ຮັບການເພີ່ມເຕີມແລະປັບປຸງໃຫ້ສົມບູນແບບ, ໃນນັ້ນມີສ່ວນຮ່ວມອັນໃຫຍ່ຫຼວງຂອງສະຫາຍເລຂາທິຫານໃຫຍ່ ຫງວຽນຝູຈ້ອງ ເຊິ່ງມີບົດບາດສຳຄັນພິເສດໃນການຊີ້ນຳ ແລະ ຄ່ອຍໆກ້າວເຂົ້າສູ່ການຜັນຂະຫຍາຍລັດທິສັງຄົມນິຍົມທີ່ມີລັກສະນະສະເພທະຫວຽດນາມ.
ບັນດາມໍລະດົກທາງທິດສະດີຂອງສະຫາຍຍັງໄດ້ປະກອບສ່ວນເພີ່ມທະວີຄວາມເຊື່ອໝັ້ນຢ່າງແຂງແຮງໃນເສັ້ນທາງກ້າວໄປສູ່ສັງຄົມນິຍົມຄື: “ການກ້າວໄປສູ່ລັດທິສັງຄົມນິຍົມແມ່ນຄວາມປາດຖະໜາຂອງປະຊາຊົນຂອງເຮົາ, ເປັນການເລືອກທີ່ຖືກຕ້ອງຂອງພັກກອມມູນິດຫວຽດນາມ ແລະ ປະທານໂຮ່ຈີມິນ, ເໝາະສົມກັບທ່າອ່ຽງການພັດທະນາຂອງປະຫວັດສາດ”(6) ແລະ "ມີພຽງລັດທິສັງຄົມນິຍົມ ແລະລັດທິກອມມູນິດເທົ່ານັ້ນ ທີ່ສາມາດແກ້ໄຂບັນຫາຄວາມເປັນເອກະລາດຂອງຊາດໄດ້ຢ່າງສົມບູນ ແລະ ນຳມາເຊິ່ງຊີວິດທີ່ເປັນເອກະລາດ, ຈະເລີນຮຸ່ງເຮືອງ ແລະມີຄວາມສຸກຢ່າງແທ້ຈິງ ໃຫ້ກັບທຸກຄົນແລະທັງຊາດ”(7), ພ້ອມກັນນັ້ນ ກໍ່ປະກອບສ່ວນທີ່ສໍາຄັນເຂົ້າໃນການພັດທະນາຂອງຂະບວນການກອມມູນິດໃນໂລກ, ເພີ່ມເຕີມແລະພັດທະນາລັດທິມາກ-ເລນິນ ແລະ ແນວຄິດໂຮ່ຈີມິນ ໃນຍຸກປະຈຸບັນ.
ຕະຫຼອດໄລຍະການເຄື່ອນໄຫວປະຕິວັດຂອງຕົນ, ສະຫາຍ ຫງວຽນຝູຈ້ອງ ເອົາໃຈໃສ່ເປັນພິເສດເຖິງວຽກງານກໍ່ສ້າງແລະປັບປຸງພັກ. ສະຫາຍຮຽກຮ້ອງໃຫ້ “ຖືວ່ານີ້ເປັນວຽກງານສຳຄັນ, ມີຄວາມໝາຍສຳຄັນຕໍ່ພັກ ແລະ ລະບອບສັງຄົມນິຍົມ”(8), ເພາະວ່າ “ການນຳພາຂອງພັກກອມມູນິດແມ່ນປັດໄຈຕັດສິນໄຊຊະນະຂອງຂະບວນການປ່ຽນແປງໃໝ່ ແລະ ຮັບປະກັນໃຫ້ປະເທດພັດທະນາ” ສອດຄ່ອງກັບແນວທາງສັງຄົມນິຍົມ”(9). ວຽກງານກໍ່ສ້າງ ແລະປັບປຸງພັກ ແມ່ນໄດ້ກວມເອົາບັນດາບັນຫາທີ່ກ່ຽວຂ້ອງຢ່າງກ້ວາງຂວາງ ແລະ ຮອບດ້ານ, ຕັ້ງແຕ່ທາດແທ້, ເປົ້າໝາຍ, ຄຸນລັກສະນະ, ຫຼັກການເຄື່ອນໄຫວ ແບບວິທີການນຳພາ-ການກຳອຳນາດຂອງພັກ ໄປຈົນເຖິງຂົງເຂດສະເພາະ ເຊັ່ນ: ວຽກງານແນວຄິດ, ທິດສະດີ, ການຈັດຕັ້ງ, ພະນັກງານ, ການກວດກາ, ລະບຽບວິໄນ, ການກໍ່ສ້າງພັກທາງດ້ານຄຸນສົມບັດມິນທຳ, ວັດທະນະທຳພາຍໃນພັກ...
ສະຫາຍໄດ້ກຳນົດວ່າ ຈຸດໝາຍສຳຄັນ ແລະ ຍຸດທະສາດຂອງວຽກງານກໍ່ສ້າງແລະປັບປຸງພັກ ແມ່ນສ້າງພັກກອມມູນິດຫວຽດນາມໃຫ້ກາຍເປັນ “ພັກປະຕິວັດທີ່ແທ້ຈິງ ມີແນວທາງທີ່ຖືກຕ້ອງ, ມີການຈັດຕັ້ງທີ່ແໜ້ນແຟ້ນ, ມີຖັນແຖວພະນັກງານ ສະມາຊິກພັກທີ່ສະອາດປອດໃສ, ເປັນແບບຢ່າງທີ່ດີ, ອຸທິດຕົນ, ມີສາຍພົວພັນສະໜິດສະໜົມກັບປະຊາຊົນ, ໄດ້ຮັບການສະໜັບສະໜູນຈາກປະຊາຊົນ, ແລ້ວພັກນັ້ນຈະມີອຳນາດຊະນະເລີດ, ບໍ່ມີກຳລັງໃດສາມາດກີດຂວາງເສັ້ນທາງນຳພາຊາດກ້າວໄປຂ້າງໜ້າໄດ້”(10). ໂດຍເລີ່ມຈາກທັດສະນະທີ່ວ່າ “ພະນັກງານແມ່ນຮາກຖານຂອງວຽກງານທັງໝົດ”, ສະຫາຍ ຫງວຽນຝູຈ້ອງ ໃຫ້ຮູ້ວ່າ: “ວຽກງານພະນັກງານຕ້ອງແມ່ນຈຸດບຸກທະລຸ, ແມ່ນ “ກຸນແຈ” ຂອງວຽກງານ “ກຸນແຈ”, ຕິດພັນກັບການຢູ່ລອດຂອງພັກ ແລະ ຊະຕາກຳຂອງລະບອບ; ການພັດທະນາຢ່າງວ່ອງໄວແລະຍືນຍົງຂອງປະເທດ”, ດັ່ງນັ້ນ “ຕ້ອງເອົາໃຈໃສ່ເຖິງການກໍ່ສ້າງ ແລະ ບຳລຸງສ້າງຖັນແຖວພະນັກງານ, ໂດຍສະເພາະແມ່ນ ກໍ່ສ້າງຖັນແຖວພະນັກງານຂັ້ນຍຸດທະສາດ ໃຫ້ມີຄຸນນະພາບ, ຄວາມສາມາດ ແລະ ກຽດສັກສີຢ່າງພຽງພໍ; ເຊີດຊູຄວາມຮັບຜິດຊອບໃນການເປັນແບບຢ່າງຂອງພະນັກງານ ແລະ ສະມາຊິກພັກ; ດຳລົງຕຳແໜ່ງທີ່ສູງກວ່າ ຈະຕ້ອງເປັນຕົວຢ່າງຫຼາຍກວ່າ”(11).
ສະຫາຍ ຫງວຽນຝູຈ້ອງ ແລະ ຄະນະບໍລິຫານງານສູນກາງພັກ ໄດ້ວາງແຜນແລະຊີ້ນຳໂດຍກົງ ໃນການປະຕິບັດແຜນນະໂຍບາຍຍຸດທະສາດກ່ຽວກັບການກໍ່ສ້າງແລະປັບປຸງພັກໃຫ້ປະສົບຜົນສຳເລັດ; ເດັດດ່ຽວຕໍ່ສູ້ຕ້ານລັດທິເອກະຊົນ, ຕ້ານການເສື່ອມໂຊມ ເສຍທາດຂາດຄຸນໃນພັກ, ຕ້ານການສໍ້ລາດບັງຫຼວງ ແລະ ປະກົດການຫຍໍ້ທໍ້, ຄຽງຄູ່ກັບການຝຶກຝົນຫຼໍ່ຫຼອມຄຸນສົມບັດສິນທຳ, ຄວາມກ້າຫານ, ສະຕິປັນຍາ, ການບຸກທະລຸ, ເສີມຂະຫຍາຍມູນເຊື້ອອັນດີງາມ, ສາຍພົວພັນໃກ້ຊິດສະໜິດສະໜົມກັບປະຊາຊົນ. ພາຍໃຕ້ການຊີ້ນຳນຳພາຂອງພັກ, ໃນນັ້ນມີສະຫາຍ ຫງວຽນຝູຈ້ອງ, ວຽກງານປ້ອງກັນແລະຕ້ານການສໍ້ລາດບັງຫຼວງ ໄດ້ຮັບການປະຕິບັດຢ່າງເດັດດ່ຽວ ແລະ ໝັ້ນຄົງ, ດ້ວຍທິດນຳທີ່ວ່າ “ບໍ່ມີເຂດຕ້ອງຫ້າມ, ບໍ່ມີຂໍ້ຍົກເວັ້ນ, ບໍ່ຖືກຜົນກະທົບທີ່ບໍ່ດີໂດຍອົງການຈັດຕັ້ງຫຼືບຸກຄົນໃດໆ"; ສົມທົບຢ່າງແໜ້ນແຟ້ນລະຫວ່າງການປ້ອງກັນຢ່າງຕັ້ງໜ້າ ກັບການເປັນເຈົ້າການໃນການຄົ້ນພົບ, ການຈັດການກັບການສໍ້ລາດບັງຫຼວງ ແລະຄວາມຫຍໍ້ທໍ້ ຢ່າງເຂັ້ມງວດແລະທັນການ; ປະຕິບັດວິໄນຂອງພັກ ໄປພ້ອມໆກັນກັບ ວິໄນການບໍລິຫານ ແລະດຳເນີນການຕາມກົດໝາຍອາຍາ. ດັ່ງນັ້ນ, ຈຶ່ງມີຄວາມກ້າວໜ້າຢ່າງເຂັ້ມແຂງ, ບັນລຸໝາກຜົນທີ່ຮອບດ້ານ, ຕັ້ງໜ້າ, ແທດຈິງ, ຊັດເຈນຫຼາຍປະການ, ປະກອບສ່ວນກໍ່ສ້າງພັກ, ລັດເຮົາໃຫ້ນັບມື້ນັບສະອາດ, ເຂັ້ມແຂງ, ເພີ່ມທະວີຄວາມໄວ້ວາງໃຈທາງການເມືອງຂອງປະຊາຊົນ ຕໍ່ການນຳພາຂອງພັກ, ສ້າງຄວາມປະທັບໃຈຢ່າງເລິກເຊິ່ງ. ໝາກຜົນທີ່ບັນລຸໄດ້ໃນວຽກງານກໍ່ສ້າງແລະປັບປຸງພັກ, ປ້ອງກັນແລະຕ້ານການສໍ້ລາດບັງຫຼວງ, ປະກົດການຫຍໍ້ທໍ້ ແມ່ນບັນດາຫຼັກຖານຢັ້ງຢືນໃຫ້ເຫັນຢ່າງຈະແຈ້ງວ່າ ພັກກອມມູນິດຫວຽດນາມ ໄດ້ສະແດງໃຫ້ເຫັນຄວາມກ້າຫານ, ສະຕິປັນຍາ, ການນຳພາທົ່ວພັກ, ທົ່ວປວງຊົນ, ທົ່ວກອງທັບ ຍາດໄດ້ບັນດາຜົນງານອັນໃຫຍ່ຫຼວງໃນກິດຈະການປ່ຽນແປງໃໝ່ປະເທດ, ເອົາຊະນະກົນອຸບາຍມ້າງເພທຳລາຍຂອງອິດທິກຳລັງສັດຕູທັງໝົດ, ກໍ່ສ້າງສັງຄົມແລະພັກກອມມູນິດຫວຽດນາມມີ “ຄຸນທຳແລະອາລະຍະທຳ” ຢ່າງແທ້ຈິງ.
ເສດຖະກິດຕະຫຼາດຕາມທິດສັງຄົມນິຍົມ ແມ່ນບາດກ້າວບຸກທະລຸທາງທິດສະດີທີ່ມີຫົວຄິດປະດິດສ້າງຂອງພັກກອມມູນິດຫວຽດນາມ, ໃນນັ້ນມີການປະກອບສ່ວນສຳຄັນຂອງສະຫາຍເລຂາທິການໃຫຍ່ ຫງວຽນຝູຈ້ອງ ທັງໃນຖານະນັກທິດສະດີ ແລະ ຜູ້ນຳໃນການຈັດຕັ້ງປະຕິບັດຢ່າງສຳເລັດຜົນ ຮູບແບບເສດຖະກິດທົ່ວໄປຂອງປະເທດເຮົາໃນສະໄໝຂ້າມຜ່ານໄປສູ່ລັດທິສັງຄົມນິຍົມ. ນີ້ແມ່ນພື້ນຖານເສດຖະກິດຕະຫຼາດທີ່ທັນສະໄໝ, ເຊື່ອມໂຍງເຂົ້າກັບສາກົນ, ດຳເນີນການຢ່າງຄົບຖ້ວນ ແລະ ສອດຄ່ອງກັບກົດເກນຂອງເສດຖະກິດຕະຫຼາດ ເຊິ່ງມີການຄຸ້ມຄອງຂອງລັດແຫ່ງອຳນາດກົດໝາຍສັງຄົມນິຍົມ ໂດຍພັກກອມມູນິດຫວຽດນາມນຳໜ້າ. ເປັນພື້ນຖານເສດຖະກິດຕະຫຼາດແບບໃໝ່ໃນປະຫວັດສາດແຫ່ງການພັດທະນາເສດຖະກິດຕະຫຼາດ; ອົງການເສດຖະກິດປະເພດໜຶ່ງທີ່ປະຕິບັດຕາມກົດເກນຂອງເສດຖະກິດຕະຫຼາດ ແລະອີງໃສ່ແລະນໍາພາແລະປົກຄອງໂດຍຫຼັກການແລະທາດແທ້ຂອງລັດທິສັງຄົມນິຍົມ. ນີ້ບໍ່ແມ່ນເສດຖະກິດຕະຫຼາດທຶນນິຍົມ ແລະ ບໍ່ແມ່ນພື້ນຖານເສດຖະກິດຕະຫຼາດສັງຄົມນິຍົມຢ່າງຄົບຖ້ວນ (ຍ້ອນວ່າ ຫວຽດນາມຍັງຢູ່ໃນສະໄໝຂ້າມຜ່ານ)(12). ການກຳນົດທິດສັງຄົມນິຍົມຂອງລະບົບເສດຖະກິດແມ່ນສະແດງອອກທັງ 3 ດ້ານຄື: ທາງດ້ານກຳມະສິດ, ການຈັດຕັ້ງຄຸ້ມຄອງ ແລະ ການແຈກຢາຍຜະລິດຕະພັນ ຕ້ອງໄດ້ຮັບປະກັນ ເຊິ່ງລັກສະນະໜຶ່ງ, ຄຸນສົມບັດພື້ນຖານໜຶ່ງ ແມ່ນການເຊື່ອມໂຍງເສດຖະກິດກັບສັງຄົມ, ການລວມນະໂຍບາຍເສດຖະກິດກັບນະໂຍບາຍສັງຄົມ, ການເຕີບໂຕເສດຖະກິດ ຄຽງຄູ່ກັບການປະຕິບັດຄວາມກ້າວໜ້າ ແລະຄວາມຍຸດຕິທຳທາງສັງຄົມໃນແຕ່ລະບາດກ້າວ, ແຕ່ລະນະໂຍບາຍ ແລະ ຕະຫຼອດຂະບວນການພັດທະນາ. ການເນັ້ນໜັກແລະການປະຕິບັດຄຸນລັກສະນະນີ້ຢ່າງມີປະສິດທິຜົນ ຖືເປັນຫຼັກການແລະພື້ນຖານສຳລັບການພັດທະນາທີ່ຍືນຍົງຂອງປະເທດ, ຮັບປະກັນລັກສະນະດີເດັ່ນຂອງລະບອບສັງຄົມນິຍົມ ທີ່ປະຊາຊົນຫວຽດນາມພວມສ້າງຂຶ້ນ.
ສະຫາຍ ຫງວຽນຝູຈ້ອງ ຍາມໃດກໍ່ເອົາໃຈໃສ່ເຖິງບັນຫາກໍ່ສ້າງລັດແຫ່ງອຳນາດກົດໝາຍສັງຄົມທີ່ເປັນຂອງປະຊາຊົນ, ໂດຍປະຊາຊົນ, ເພື່ອປະຊາຊົນ. ສະຫາຍ ຫງວຽນຝູຈ້ອງ ໄດ້ສະຫຼຸບວ່າ: “ລັດແຫ່ງອຳນາດກົດໝາຍສັງຄົມນິຍົມແມ່ນມີຄວາມແຕກຕ່າງທາງດ້ານມາດແມ້ຈາກລັດແຫ່ງອຳນາດກົດໝາຍທຶນນິຍົມຢູ່ທີ່: ອຳນາດກົດໝາຍພາຍໃຕ້ລະບອບທຶນນິຍົມແມ່ນເປັນເຄື່ອງມືເພື່ອປົກປ້ອງ ແລະ ຮັບໃຊ້ຜົນປະໂຫຍດຂອງຊົນຊັ້ນນາຍທຶນ, ໃນຂະນະທີ່ລັດແຫ່ງອຳນາດກົດໝາຍສັງຄົມນິຍົມ ແມ່ນເຄື່ອງມືທີ່ສະແດງອອກ ແລະ ປະຕິບັດສິດອຳນາດຂອງປະຊາຊົນ, ຮັບປະກັນ ແລະ ປົກປັກຮັກສາຜົນປະໂຫຍດຂອງປະຊາຊົນສ່ວນຫຼາຍ”(13). ຈາກການສະຫຼຸບດັ່ງກ່າວ, ສະຫາຍ ຫງວຽນຝູຈ້ອງ ໄດ້ວາງຂໍ້ກຳນົດໃນການກໍ່ສ້າງລັດແຫ່ງອຳນາດກົດໝາຍສັງຄົມນິຍົມທີ່ເປັນຂອງປະຊາຊົນ, ໂດຍປະຊາຊົນ, ເພື່ອປະຊາຊົນ: “ພວກເຮົາສ້າງລັດແຫ່ງອຳນາດກົດໝາຍສັງຄົມນິຍົມ - ລັດທີ່ສ້າງຂອບສະຖາບັນແລະກົດໝາຍເພື່ອການພັດທະນາປະເທດແລະປະເທດຊາດຢ່າງແທ້ຈິງ... ແຕ່ເຮົາຕ້ອງຈື່ໄວ້ສະເໝີວ່າ ລັດແຫ່ງອຳນາດກົດໝາຍທີ່ພວກເຮົາກຳລັງກໍ່ສ້າງແມ່ນລັດແຫ່ງອຳນາດກົດໝາຍສັງຄົມນິຍົມຫວຽດນາມ ຂອງປະຊາຊົນ ໂດຍປະຊາຊົນ ແລະເພື່ອປະຊາຊົນ ພາຍໃຕ້ການນຳພາຂອງພັກ... ນີ້ແມ່ນບັນຫາຫຼັກການ, ສຳຄັນທີ່ສຸດ”(14).
ພາຍໃຕ້ການນຳພາຂອງສະຫາຍ ຫງວຽນຝູຈ້ອງ, ເປັນຄັ້ງທຳອິດ, ພັກກອມມູນິດຫວຽດນາມ ໄດ້ອອກມະຕິກ່ຽວກັບການສືບຕໍ່ກໍ່ສ້າງ ແລະ ປັບປຸງລັດແຫ່ງອຳນາດກົດໝາຍສັງຄົມນິຍົມຫວຽດນາມຂອງປະຊາຊົນ, ໂດຍປະຊາຊົນ, ເພື່ອປະຊາຊົນໃນໄລຍະໃໝ່ໃຫ້ສົມບູນແບບ, ກຳນົດຈຸດໝາຍ “ປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມຫວຽດນາມຂອງປະຊາຊົນ, ໂດຍປະຊາຊົນ, ເພື່ອປະຊາຊົນ, ນຳພາໂດຍພັກກອມມູນິດຫວຽດນາມ; ມີລະບົບກົດໝາຍທີ່ສົມບູນ ເຊິ່ງໄດ້ປະຕິບັດຢ່າງເຂັ້ມງວດແລະສອດຄ່ອງ; ຍຶດໝັ້ນລັດຖະທຳມະນູນ ແລະ ກົດໝາຍ, ເຄົາລົບ, ຮັບປະກັນ ແລະ ປົກປ້ອງສິດທິມະນຸດ ແລະ ສິດທິພົນລະເມືອງຢ່າງມີປະສິດທິຜົນ; ອຳນາດລັດເປັນເອກະພາບ, ໄດ້ຮັບການແບ່ງງານຢ່າງຈະແຈ້ງ, ມີການປະສານງານຢ່າງໃກ້ຊິດ ແລະ ຄວບຄຸມຢ່າງມີປະສິດທິຜົນ; ການບໍລິຫານແລະຕຸລາການມືອາຊີບ, ນິຕິທຳທັນສະໄໝ, ກົງຈັກຂອງລັດມີຄວາມກະທັດລັດຮັດກຸມ ສະອາດປອດໃສ ແລະ ດຳເນີນງານຢ່າງມີປະສິດທິພາບແລະປະສິດທິຜົນ; ຖັນແຖວພະນັກງານ ລັດຖະກອນ ພາລະກອນມີຄຸນສົມບັດ, ຄວາມສາມາດ, ວິຊາສະເພາະ ແລະ ມີຄວາມຊື່ສັດ; ການປົກຄອງແຫ່ງຊາດທີ່ທັນສະໄໝ ແລະ ມີປະສິດທິຜົນ; ຕອບສະໜອງຄວາມຕ້ອງການຂອງການພັດທະນາປະເທດຊາດຢ່າງວ່ອງໄວ ແລະ ຍືນຍົງ”(15).
ສະຫາຍເລຂາທິການໃຫຍ່ ຫງວຽນຝູຈ້ອງ ພ້ອມກັບປະຊາຊົນແຂວງ ເງ້ອານ (2017) _ແຫຼ່ງຂ່າວ: baonghean.vn
ໂດຍເຊີດຊູບົດບາດຂອງວັດທະນະທຳໃນການພັດທະນາປະເທດຊາດ, ຍຶດໝັ້ນແນວຄິດໂຮ່ຈີມິນ, ຊາບຊຶມເລິກເຊິ່ງເຖິງທີ່ຕັ້ງ ແລະ ບົດບາດສຳຄັນຂອງວັດທະນະທຳຄື: “ວັດທະນະທຳແມ່ນຈິດວິນຍານຂອງຊາດ”, “ຖ້າວັດທະນະທຳຢູ່, ປະເທດຊາດຈະຢູ່ລອດ”. , “ວັດທະນະທຳຕ້ອງສ່ອງແສງທາງໃຫ້ປະເທດຊາດ”, ນັກວິທະຍາສາດວັດທະນະທຳທີ່ຍິ່ງໃຫຍ່ ຫງວຽນຝູຈ້ອງ, ຜູ້ນຳທີ່ດີເດັ່ນດ້ານວັດທະນະທຳຂອງພັກ, ໄດ້ມານະພະຍາຍາມເພື່ອສ້າງວັດທະນະທຳຫວຽດນາມທີ່ກ້າວໜ້າ, ອຸດົມສົມບູນໄປດ້ວຍເອກະລັກຂອງຊາດ, ແມ່ນພື້ນຖານດ້ານຈິດໃຈຂອງພັກຢ່າງແທ້ຈິງ, ເປັນກຳລັງແຮງພາຍໃນ ແຮງຂັບເຄື່ອນທີ່ສຳຄັນໃນການພັດທະນາປະເທດຊາດ. ສະຫາຍ ຫງວຽນຝູຈ້ອງ ຢືນຢັນວ່າ: “ຄວາມຮັບຮູ້ຂອງພັກໃນດ້ານວັດທະນະທໍານັບມື້ນັບຮອບດ້ານ ຄົບຖ້ວນ ແລະເລິກເຊິ່ງ. ພັກເຮົາກຳນົດວ່າ: ວັດທະນະທຳແມ່ນພື້ນຖານທາງດ້ານຈິດໃຈຂອງສັງຄົມ, ທັງເປັນເປົ້າໝາຍ ແລະ ເປັນກຳລັງແຮງພາຍໃນ, ເປັນກຳລັງຊຸກຍູ້ການພັດທະນາປະເທດຊາດ; ການກຳນົດການພັດທະນາວັດທະນະທຳທີ່ສອດຄ່ອງກັບການເຕີບໂຕດ້ານເສດຖະກິດ, ຄວາມກ້າວໜ້າ, ຄວາມຍຸຕິທຳທາງສັງຄົມ ແມ່ນທິດທາງພື້ນຖານຂອງຂະບວນການກໍ່ສ້າງສັງຄົມນິຍົມຫວຽດນາມ, ສະແດງໃຫ້ເຫັນເຖິງຄວາມເໜືອກວ່າຂອງລະບອບຂອງພວກເຮົາ”(16). ພາຍໃຕ້ການນຳພາຂອງ ສະຫາຍ ຫງວຽນຝູຈ້ອງ, ກອງປະຊຸມໃຫຍ່ຄັ້ງທີ XIII ຂອງພັກ ໄດ້ກ່າວເຖິງ ແລະວິເຄາະຢ່າງເລິກເຊິ່ງແລະກວ້າງຂວາງ ກ່ຽວກັບບົດບາດຂອງວັດທະນະທຳ ໃນການພັດທະນາເສດຖະກິດ-ສັງຄົມ; ກອງປະຊຸມທົ່ວປະເທດກ່ຽວກັບວັດທະນະທຳຂອງພັກພາຍຫຼັງ 70 ກວ່າປີແມ່ນຂີດໝາຍທີ່ເຊື່ອມໂຍງແນວຄິດ ແລະ ການກະທຳຂອງທົ່ວພັກ, ທົ່ວກອງທັບ, ທົ່ວປວງຊົນ ເພື່ອເສີມຂະຫຍາຍບົດບາດຂອງວັດທະນະທຳຢ່ງແຂງແຮງ ໃນການສ້າງສາ ແລະ ປົກປັກຮັກສາປະເທດຊາດ. ພ້ອມກັນນັ້ນກໍເປີດກວ້າງວຽກງານຄົ້ນຄ້ວາ, ກຳນົດທິດ ແລະ ປະຕິບັດການກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານມະນຸດ ໂດຍຕິດພັນກັບການປົກປັກຮັກສາ ແລະ ພັດທະນາລະບົບຄຸນຄ່າຄອບຄົວຫວຽດນາມ ໃນໄລຍະໃໝ່; ກໍ່ສ້າງໂຄງການຈຸດໝາຍແຫ່ງຊາດກ່ຽວກັບການຟື້ນຟູ ແລະ ພັດທະນາວັດທະນະທຳ ແລະ ກໍ່ສ້າງຄົນຫວຽດນາມ...
ໃນການພົວພັນຕ່າງປະເທດ ແລະ ການຮ່ວມມືສາກົນ, ດ້ວຍວິໄສທັດຍຸດທະສາດກ່ຽວກັບບັນດາບັນຫາສຳຄັນຂອງໂລກປະຈຸບັນ, ພ້ອມກັນນັ້ນ ບົນຈິດໃຈຮັກສາສັນຕິພາບ ແລະ ຄວາມມານະພະຍາຍາມທີ່ບໍ່ອິດເມື່ອຍຂອງປະຊາຊົນຫວຽດນາມ ໃນການປະກອບສ່ວນປົກປ້ອງແລະຮັກສາສະພາບແວດລ້ອມສັນຕິພາບ ແລະ ສະຖຽນລະພາບໃນພາກພື້ນກໍຄືໃນທົ່ວໂລກ, ສະຫາຍ ຫງວຽນຝູຈ້ອງ ໄດ້ກາຍເປັນນັກຮົບນຳໜ້າບຸກເບີກ ແລະສ້າງໜ້າໃໝ່ ໃນການພົວພັນລະຫວ່າງຫວຽດນາມກັບຄູ່ຮ່ວມມືທີ່ສຳຄັນ, ສ້າງເງື່ອນໄຂເພື່ອຊຸກຍູ້ການພົວພັນມິດຕະພາບ ແລະການຮ່ວມມື ພ້ອມກັນພັດທະນາ ລະຫວ່າງຫວຽດນາມ ແລະ ບັນດາປະເທດໃນໂລກ; ເພີ່ມທະວີການປະກອບສ່ວນຂອງຫວຽດນາມ ຜ່ານຫຼາຍຄໍາໝັ້ນສັນຍາ ແລະການປະຕິບັດຕົວຈິງ; ສົມທົບຢ່າງແໜ້ນແຟ້ນກຳລັງແຮງຂອງຊາດກັບກຳລັງແຮງຂອງຍຸກສະໄໝ, ນຳປະເທດເຮົາກ້າວໄປຂ້າງໜ້າຢ່າງແຂງແຮງໃນສະພາບການໂລກາພິວັດ ແລະ ການເຊື່ອມໂຍງເຂົ້າກັບສາກົນ. ໃນຖານະເປັນເລຂາທິການໃຫຍ່, ສະຫາຍ ຫງວຽນຝູຈ້ອງ ໄດ້ເຂົ້າຮ່ວມໂດຍກົງໃນການເຄື່ອນໄຫວການຕ່າງປະເທດທີ່ສຳຄັນຫຼາຍປະການຂອງພັກແລະປະເທດ ໂດຍມີຄວາມໝາຍສຳຄັນໃນການສ້າງ ແລະ ຮັດແໜ້ນສະພາບການນະໂຍບາຍການຕ່າງປະເທດທີ່ເປີດກ້ວາງ, ມີຄວາມຫຼາກຫຼາຍ ແລະພະຫຸພາຄີທີ່ນັບມື້ນັບພັດທະນາ - ຄວາມສຳຄັນທາງຍຸດທະສາດຂອງປະເທດ.
ສະຫາຍ ຫງວຽນຝູຈ້ອງ ແລະ ຄະນະບໍລິຫານງານສູນກາງ ໄດ້ຜັນຂະຫຍາຍແນວຄິດນະໂຍບາຍການຕ່າງປະເທດຂອງຫວຽດນາມຢ່າງສົມບູນແບບ, ສະຫຼຸບສະພາບຕົວຈິງ, ກໍ່ສ້າງແລະພັດທະນາວຽກງານການຕ່າງປະເທດ ແລະ ການທູດຫວຽດນາມ ທີ່ອຸດົມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, “ຮາກໝັ້ນຄົງ, ລຳແຂງ, ງ່າຍືດຫຍຸ່ນ”. ຝ່າຍການຕ່າງປະເທດແລະການທູດ “ໄມ້ໄຜ່ຫວຽດນາມ” ໄດ້ຝັງເລິກດ້ວຍຈິດວິນຍານ, ລັກສະນະ ແລະ ຄວາມກ້າຫານຂອງຊາວຫວຽດນາມ: “ອ່ອນໂຍນ, ສະຫລາດ, ແຕ່ຍືດຫຍຸ່ນ ແລະ ເດັດດ່ຽວ; ມີຄວາມຄ່ອງແຄ້ວ, ມີຫົວຄິດປະດິດສ້າງ, ແຕ່ມີຄວາມກ້າຫານ, ເດັດດ່ຽວໜຽວແໜ້ນ, ກ້າແກ່ນໃນການປະເຊີນໜ້າກັບທຸກສິ່ງທ້າທາຍ ແລະ ຄວາມຫຍຸ້ງຍາກ ເພື່ອເອກະລາດແຫ່ງຊາດ, ເພື່ອເສລີພາບ ແລະ ຄວາມສຸກຂອງປະຊາຊົນ. ຄວາມສາມັກຄີ ແລະ ຄວາມເຫັນອົກເຫັນໃຈ, ເດັດດ່ຽວໜຽວແໜ້ນໃນການປົກປັກຮັກສາຜົນປະໂຫຍດຂອງຊາດ-ປະເທດຊາດ. ຮູ້ຈັກອ່ອນໂຍນ, ຮູ້ຈັກຍຶດໝັ້ນ, ຮູ້ເວລາ, ຮູ້ສະຖານະການ; ຮູ້ຈັກຕົນເອງ, ຮູ້ຈັກຜູ້ອື່ນ; ຮູ້ຈັກກ້າວຫນ້າ, ຮູ້ຈັກຖອຍ, “ຮູ້ປະພຶດແລ້ວແຕ່ໂອກາດ", "ການພົວພັນທີ່ນຸ່ມນວນແລະແໜ້ນແຟ້ນ!”(17). ນີ້ກໍ່ແມ່ນພື້ນຖານຫຼັກຂອງແນວຄິດ ແລະ ວິໄສທັດຍຸດທະສາດໃນການປົກປັກຮັກສາປະເທດຊາດຕັ້ງແຕ່ຕົ້ນ, ຈາກໄລຍະໄກ, ປົກປັກຮັກສາປະເທດເມື່ອບໍ່ທັນຕົກຢູ່ໃນອັນຕະລາຍ; ພ້ອມກັນນັ້ນ, ປະກອບສ່ວນຊຸກຍູ້ບົດບາດບຸກເບີກດ້ານການທູດຮອບດ້ານ, ສ້າງຕັ້ງ ແລະ ນຳພາການປະຕິບັດຢ່າງມີປະສິດທິຜົນຂອງສິລະປະການທູດຍຸກໃໝ່ທີ່ມີເອກະລັກສະເພາະຂອງ “ໄມ້ໄຜ່ຫວຽດນາມ” ບົນພື້ນຖານລັກສະນະມະນຸດສະທຳຂອງຊາວຫວຽດນາມ “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, ນັບຖື “ຄວາມສັນທະວະໄມຕີ”, “ໃຊ້ຄວາມເມດຕາແທນການໃຊ້ຄວາມຮຸນແຮງ” ມຸ່ງສູ່ບັນດາຄຸນຄ່າທີ່ກ້າວໜ້າ ແລະ ສັນຕິພາບແບບຍືນຍົງ.
ພາຍໃຕ້ການນຳພາຂອງພັກກອມມູນິດຫວຽດນາມ, ໂດຍກົງຈາກສະຫາຍເລຂາທິການໃຫຍ່ ຫງວຽນຝູຈ້ອງ, ເອກະລັກຂອງ “ວຽກງານການຕ່າງປະເທດ ແລະ ການທູດຂອງຫວຽດນາມ” ໄດ້ຮັບການເຊີດຊູຢ່າງແຮງ, ສ້າງຈຸດຫັນປ່ຽນປະຫວັດສາດ, ຄຸນນະພາບໃນການພົວພັນລະຫວ່າງຫວຽດນາມ ແລະບັນດາຄູ່ຮ່ວມມືສຳຄັນ. “ປະຕິບັດແນວທາງການປ່ຽນແປງໃໝ່ຂອງພັກກ່ຽວກັບການຕ່າງປະເທດ ແລະ ການທູດ, ໃນ 40 ປີທີ່ຜ່ານມາ, ຫວຽດນາມບັນລຸໄດ້ບັນດາໝາກຜົນສຳຄັນທີ່ສຸດຄື: ທຳລາຍການປິດລ້ອມແລະຂວ້ຳບາດ, ສ້າງແລະປັບປຸງການພົວພັນຕ່າງປະເທດຢ່າງແໜ້ນແຟ້ນໃນສະພາບການເປີດກວ້າງ, ພົວພັນຫຼາຍກ້ຳຫຼາຍຝ່າຍ ຫຼາຍຮູບແບບ ທີ່ເອື້ອອຳນວຍໃຫ້ແກ່ປານປ່ຽນແປງໃໝ່; ສ້າງສະພາບແວດລ້ອມສາກົນທີ່ສະດວກ ແລະ ລະດົມແຫຼ່ງກຳລັງຈາກພາຍນອກເພື່ອຊຸກຍູ້ການຫັນເປັນອຸດສາຫະກຳ ທັນສະໄໝ, ກໍ່ສ້າງ ແລະ ພັດທະນາເສດຖະກິດ-ສັງຄົມ. ການຕ່າງປະເທດແລະການທູດມີບົດບາດບຸກເບີກໃນການຮັກສາສະພາບແວດລ້ອມສັນຕິພາບ, ສະຖຽນລະພາບ, ປະກອບສ່ວນສຳຄັນເຂົ້າໃນການປົກປັກຮັກສາເອກະລາດ, ອະທິປະໄຕ, ສິດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດ. ຖານະບົດບາດແລະ ຊື່ສຽງສາກົນຂອງປະເທດເຮົາຢູ່ພາກພື້ນ ແລະ ໂລກນັບ ມື້ນັບໄດ້ຮັບການປັບປຸງ, ປະກອບສ່ວນຢ່າງຕັ້ງໜ້າ ແລະ ມີຄວາມຮັບຜິດຊອບ ເຂົ້າໃນການຮັກສາສັນຕິພາບ, ການຮ່ວມມືພັດທະນາ ແລະ ຄວາມກ້າວໜ້າໃນໂລກ”(18). ບໍ່ເຄີຍມີມາກ່ອນທີ່ຖານະບົດບາດ ຊື່ສຽງ ແລະພາບພົດຂອງຫວຽດນາມ ໃນຖານະຄູ່ຮ່ວມມືທີ່ເຊື່ອຖືໄດ້, ສະມາຊິກທີ່ຕັ້ງໜ້າ ແລະມີຄວາມຮັບຜິດຊອບ ຈະໂດດເດັ່ນໃນເວທີສາກົນຄືທຸກວັນນີ້, ແລະ ຫວຽດນາມບໍ່ເຄີຍເຊື່ອມໂຍງເຂົ້າກັບການເມືອງສາກົນ ເສດຖະກິດແລະອາລະຍະທໍາຂອງມະນຸດ ຢ່າງເລິກເຊິ່ງຄືໃນປະຈຸບັນນີ້. ກຽດສັກສີ ແລະ ຖານະບົດບາດຂອງປະເທດ ຊ່ວຍໃຫ້ວຽກງານການຕ່າງປະເທດ ແລະ ການທູດຫວຽດນາມ “ບັນລຸຜົນແລະວາມສຳເລັດອັນໃຫຍ່ຫຼວງແລະມີຄວາມສຳຄັນທາງປະຫວັດສາດຫຼາຍຢ່າງ, ກາຍເປັນຈຸດສະຫວ່າງທີ່ໜ້າປະທັບໃຈໃນບັນດາໝາກຜົນ, ຜົນສຳເລັດລວມຂອງປະເທດຊາດ…”(19).
ໂດຍໄດ້ດຳລົງຕຳແໜ່ງປະທານປະເທດ, ປະທານສະພາປ້ອງກັນປະເທດ ແລະຄວາມໝັ້ນຄົງແຫ່ງຊາດ, ຜູ້ບັງຄົບບັນຊາການກອງທັບປະຊາຊົນ, ເລຂາທິການຄະນະພັກການທະຫານສູນກາງ, ສະຫາຍ ຫງວຽນຝູຈ້ອງ ຍາມໃດກໍ່ເອົາໃຈໃສ່ ແລະ ເພີ່ມທະວີກຳລັງແຮງຂອງຫວຽດນາມ ຂອງກອງທັບປະຊາຊົນ ແລະຕຳຫຼວດປະຊາຊົນຫວຽດນາມ. ສະຫາຍເຄີຍແນະນຳສັ່ງສອນໃຫ້ບັນດາກຳລັງປະກອບອາວຸດຊາບຊຶມ, ຮ່ຳຮຽນ, ປະຕິບັດຕາມແນວຄິດ, ຄຸນສົມບັດສິນທຳ ແລະແບບແຜນ ຂອງໂຮ່ຈີມິນ, ຖື “ກຽດສັກສີແມ່ນສິ່ງສັກສິດທີ່ສຸດ”, ຮັບໃຊ້ປະເທດຊາດ, ຮັບໃຊ້ປະຊາຊົນຢ່າງສຸດອົກສຸດໃຈ. “ເພິ່ງພາປະຊາຊົນໃນການເຮັດວຽກ”, “ຕ້ອງມີຄວາມສັດຊື່, ເຄົາລົບນັບຖື, ຮັກປະຊາຊົນ”, ຕິດພັນກັບປະຊາຊົນ, ປົກປັກຮັກສາຜົນປະໂຫຍດຂອງປະຊາຊົນ, ຕ້ອງເຮັດໃຫ້ປະຊາຊົນມີຄວາມເຊື່ອໝັ້ນ ແລະ ຊ່ວຍເຫຼືອຫຼາຍກວ່າເກົ່າ. ພາຍໃຕ້ການຊີ້ນຳນຳພາຂອງພັກ, ໂດຍກົງຈາກສະຫາຍເລຂາທິການໃຫຍ່ ຫງວຽນຝູຈ້ອງ, ວຽກງານກໍ່ສ້າງກຳລັງປະກອບອາວຸດມຫ້ກະລັດຮັດກຸມ, ສະອາດປອດໃສແລະໝັ້ນຄົງເຂັ້ມແຂງຢ່າງແທ້ຈິງ, ຕອບສະໜອງຄວາມຕ້ອງການແລະໜ້າທີ່ໃນສະຖານະການໃໝ່ ແລະບັນລຸຜົນງານທີ່ສຳຄັນຫຼາຍຢ່າງ; ກຳລັງຕຳຫຼວດແລະກຳລັງທະຫານສາມັກຄີແລະປະສານກັນຢ່າງແໜ້ນແຟ້ນ, ເໝືອນດັ່ງ “ດາບ” ແລະ “ໂລ້” ເຊິ່ງແມ່ນ “ສອງປີກ” ຂອງນົກຢ່າງແທ້ຈິງ, ປົກປ້ອງແລະຮັກສາສັນຕິພາບແລະຄວາມໝັ້ນຄົງເພື່ອການພັດທະນາປະເທດ.
ແນວຄິດ ແລະ ການກະທຳທັງໝົດຂອງສະຫາຍ ຫງວຽນຝູຈ້ອງ ລ້ວນແຕ່ມຸ່ງໄປເຖິງຜົນປະໂຫຍດຂອງປະຊາຊົນ, ເພື່ອປະຊາຊົນຢ່າງສຸດຈິດສຸດໃຈ ແລະ ຮັບໃຊ້ປະຊາຊົນດ້ວຍກຳລັງວັງຊາທັງໝົດຂອງຕົນ, ກໍ່ສ້າງຜູ້ຄົນສັງຄົມນິຍົມ, ປັບປຸງຄວາມມະຫາສາມັກຄີເປັນເອກະພາບຢ່າງບໍ່ຢຸດຢັ້ງ, ກ່ອນອື່ນໝົດແມ່ນຄວາມສາມັກເປັນເອກະພາບພາຍໃນພັກ, ມະຫາສາມັກຄີປວງຊົນທັງຊາດ ແລະ ຄວາມສາມັກຄີສາກົນອັນບໍລິສຸດຜຸດຜ່ອງ. ສະຫາຍຍາມໃດກໍ່ຕັດສິນໃຈວາງແຜນແລະຈັດຕັ້ງປະຕິບັດແຜນນະໂຍບາຍແລະນະໂຍບາຍທີ່ຖືກໃຈປະຊາຊົນໃຫ້ສຳເລັດຜົນ; ຍຶດໝັ້ນໃນຫຼັກໝັ້ນ ທັດສະນະ ແລະ ການປະຕິບັດ “ປະຊາຊົນແມ່ນກົກຮາກ”, “ປະຊາຊົນເປັນເຈົ້າຂອງ, ໃຈກາງຂອງກິດຈະການປ່ຽນແປງໃໝ່”. ນັກກອມມູນິດທີ່ແທ້ຈິງ, ຈິງໃຈ ແລະຊອບທຳ ຍາມໃດກໍຈົດຈຳ ແລະ ຮຽກຮ້ອງທົ່ວພັກ ແລະລະບົບການເມືອງທັງໝົດ “ຕ້ອງມີຄວາມຮັບຜິດຊອບສູງສຸດຕໍ່ປະຊາຊົນ, ເບິ່ງແຍງດູແລຊີວິດທາງດ້ານວັດຖຸ ແລະ ຈິດໃຈຂອງປະຊາຊົນ”(20), “ຕິດຕໍ່ພົວພັນຢ່າງແໜ້ນແຟ້ນກັບປະຊາຊົນແມ່ນກົດເກນແຫ່ງການເປັນຢູ່, ພັດທະນາ ແລະ ການເຄື່ອນໄຫວຂອງພັກ, ເປັນປັດໄຈຕັດສິນຊີ້ຂາດການສ້າງກຳລັງແຮງຂອງພັກ”(21).
ສະຫາຍ ຫງວຽນຝູຈ້ອງ ຍາມໃດກໍ່ເຊີດຊູການປະຕິບັດປະຊາທິປະໄຕສັງຄົມນິຍົມຢ່າງແທດຈິງ ແລະ ກວ້າງຂວາງ, ເພາະວ່າ ທາດແທ້ຂອງລະບອບການເມືອງນຳພາໂດຍພັກກອມມູນິດ ແມ່ນລະບອບປະຊາທິປະໄຕສັງຄົມນິຍົມ. ໃນນັ້ນ, ປະຊາທິປະໄຕແມ່ນທັງເປົ້າໝາຍ ແລະ ແຮງຂັບເຄື່ອນຂອງການພັດທະນາ, ທີ່ສຳຄັນທີ່ສຸດແມ່ນ ອຳນາດຂອງລັດທັງໝົດເປັນຂອງປະຊາຊົນ; ປະຊາຊົນເປັນເຈົ້າຂອງ ແລະເປັນຜູ້ປະຕິບັດອໍານາດຮ່ວມຂອງສັງຄົມ. ປະຊາທິປະໄຕສັງຄົມນິຍົມແມ່ນປະຊາທິປະໄຕສູງສຸດ - ປະຊາທິປະໄຕໃນຄວາມຮູ້ສຶກເຕັມທີ່ຂອງປະເພດນີ້. ສະນັ້ນ, ຕ້ອງ “ຜັນຂະຫຍາຍການປະຕິບັດປະຊາທິປະໄຕ ໃນທຸກຂົງເຂດຂອງຊີວິດສັງຄົມ, ທຸກລະດັບ, ໂດຍສະເພາະແມ່ນ ປະຊາທິປະໄຕຢູ່ຮາກຖານ ແລະ ໃນຊຸມຊົນທີ່ຢູ່ອາໃສ, ປະຊາທິປະໄຕໂດຍກົງ, ປະຊາທິປະໄຕແບບຕົວແທນ ແລະ ປະຊາຊົນຄຸ້ມຄອງຕົນເອງ”. ເສີມຂະຫຍາຍບົດບາດຄຸ້ມຄອງຕົນເອງຂອງປະຊາຄົມທີ່ຢູ່ອາໄສ, ບ້ານ, ໝູ່ບ້ານ ແລະ ຄຸ້ມໃນຕົວເມືອງ. ກໍ່ສ້າງ ແລະ ປັບປຸງກົນໄກ ແລະ ຮູບແບບທີ່ເໝາະສົມ ໃຫ້ປະຊາຊົນປະກອບຄຳເຫັນຕໍ່ບັນຫາໃຫຍ່ ແລະ ສຳຄັນຂອງປະເທດ; ຮັບປະກັນການເຂົ້າຮ່ວມຂອງປະຊາຊົນ ໃນທຸກຂັ້ນຂອງຂະບວນການຕັດສິນໃຈທີ່ກ່ຽວຂ້ອງເຖິງຜົນປະໂຫຍດ ແລະ ຊີວິດຂອງປະຊາຊົນ”(22). ການເສີມຂະຫຍາຍສິດເປັນເຈົ້າຂອງທີ່ແທ້ຈິງຂອງປະຊາຊົນ ຍັງເປັນການປຸກລະດົມ, ເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ, ລະດົມກຳລັງໃຈປະຊາຊົນທຸກຊັ້ນຄົນ, ລະດົມທຸກແຫຼ່ງກຳລັງ, ຍາດແຍ່ງກາລະໂອກາດເພື່ອປະຕິບັດໜ້າທີ່ກໍ່ສ້າງ ແລະ ປົກປັກຮັກສາປະເທດຊາດໃຫ້ປະສົບຜົນສຳເລັດ. ຢ່າງໃດກໍຕາມ, ສະຫາຍເລຂາທິການໃຫຍ່ ຫງວຽນຝູຈ້ອງ ຍັງເນັ້ນໜັກວ່າ: “ປະຊາທິປະໄຕຕ້ອງຕິດພັນກັບຫຼັກການ ແລະ ລະບຽບວິໄນ... ສຳລັບການກະທຳທີ່ລະເມີດ, ບໍ່ມີປະຊາທິປະໄຕ, ສວຍໃຊ້ປະຊາທິປະໄຕເພື່ອທຳລາຍກຸ່ມກ້ອນມະຫາສາມັກຄີປວງຊົນທັງຊາດ, ທຳລາຍພັກ, ລັດ, ປະຊາຊົນ ແລະ ກິດຈະການປ່ຽນແປງໃໝ່, ການກໍ່ສ້າງປະເທດຊາດ ຈະຕ້ອງໄດ້ຈັດການລົງໂທດຢ່າງເຂັ້ມງວດຕາມກົດໝາຍ”(23).
ສະຫາຍເລຂາທິການໃຫຍ່ ຫງວຽນຝູຈ້ອງ ແມ່ນຜູ້ນຳທີ່ສຸດຈິດສຸດໃຈຮັກແພງສາມັກຄີທົ່ວປວງຊົນທັງຊາດ, ເປັນຕົວແບບທີ່ໃສແຈ້ງຂອງນ້ຳໃຈສາມັກຄີ, ເປັນແກນນຳອັນແທ້ຈິງຂອງກຸ່ມກ້ອນມະຫາສາມັກຄີ ທົ່ວພັກ, ທົ່ວປວງຊົນ, ທົ່ວກອງທັບເຮົາ. ສະຫາຍຢືນຢັນວ່າ, ຄວາມສາມັກຄີແມ່ນມູນເຊື້ອອັນລ້ຳຄ່າຂອງຊາດເຮົາຕະຫຼອດໄລຍະປະຫວັດສາດອັນຍາວນານຂອງການຕໍ່ສູ້ກໍ່ສ້າງ, ປົກປັກຮັກສາປະເທດຊາດ ແລະ ຍຸກສະໄໝໂຮ່ຈີມິນ ແມ່ນຍຸກທີ່ສະຫງ່າລາສີທີ່ສຸດ ໃນການເສີມຂະຫຍາຍກຳລັງແຮງມະຫາສາມັກຄີປວງຊົນທັງຊາດ. ຄວາມສາມັກຄີກໍແມ່ນບັນຫາຍຸດທະສາດທີ່ມີຄວາມໝາຍສຳຄັນ, ຮັບປະກັນບັນດານະໂຍບາຍປະຕິວັດຂອງຫວຽດນາມ. ປະຫວັດສາດຂອງຊາດຫວຽດນາມໄດ້ພິສູດໃຫ້ເຫັນວ່າ, ໃນຕໍ່ໜ້າບັນດາບາດກ້າວຫັນປ່ຽນອັນໃຫຍ່ຫຼວງໃນປະຫວັດສາດ, ເປົ້າໝາຍອັນໃຫຍ່ຫຼວງຂອງປະເທດ, ຖ້າຫາກເຮົາຮູ້ວິທີປຸກລະດົມຈິດໃຈຮັກຊາດ, ຄວາມເອກອ້າງທະນົງໃຈຂອງຊາດ ແລະ ເຄົາລົບນັບຖືຕົນເອງ, ເສີມຂະຫຍາຍກຳລັງແຮງອັນຍິ່ງໃຫຍ່ຂອງກຸ່ມກ້ອນມະຫາສາມັກຄີທົ່ວປວງຊົນເປັນນ້ຳໜຶ່ງໃຈດຽວ, ສົມທົບກັບກຳລັງແຮງຂອງຍຸກສະໄໝ, ບໍ່ມີຄວາມຫຍຸ້ງຍາກໃດສາມາດຢຸດຕິຄວາມກ້າວໜ້າຂອງປະເທດ ແລະ ອະນາຄົດທີ່ສົດໃສຂອງປະເທດຊາດໄດ້. ສະຫາຍເອົາໃຈໃສ່ເປັນພິເສດເຖິງການກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ ຕາມຫຼັກໝັ້ນຂອງຊົນຊັ້ນກຳມະກອນ ໂດຍເອົາພັນທະພາບກຳມະກອນ - ຊາວກະສິກອນ - ປັນຍາຊົນເປັນພື້ນຖານ, ນຳພາໂດຍພັກກອມມູນິດຫວຽດນາມ; ບົນພື້ນຖານຂອງພັນທະພາບນັ້ນ, ພັກຂອງພວກເຮົາໄດ້ຂະຫຍາຍຄວາມສາມັກຄີຢ່າງບໍ່ຢຸດຢັ້ງໄປສູ່ທຸກຊັ້ນວັນນະ ແລະ ສັງຄົມ. ເພີ່ມທະວີບົດບາດ, ຄວາມຮັບຜິດຊອບທາງດ້ານການເມືອງຫຼັກແຫຼ່ງ ຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ໃນການກໍ່ສ້າງຄວາມສາມັກຄີປະເທດຊາດອັນໃຫຍ່ຫຼວງ. ພ້ອມກັນນັ້ນ, ສະຫາຍຍັງໄດ້ຢືນຢັນວ່າ: “ຄວາມສາມັກຄີ, ຄວາມເປັນເອກະພາບພາຍໃນພັກ ໄດ້ຮັບການຮັກສາແລະເພີ່ມທະວີ, ເປັນແກນຫຼັກຂອງການນຳພາ ແລະ ເປັນແກນກາງ, ພື້ນຖານອັນໜັກແໜ້ນ ເພື່ອສ້າງຄວາມສາມັກຄີໃນລະບົບການເມືອງ ແລະ ກ້ອນມະຫາສາມັກຄີປວງຊົນທັງຊາດ”(24)...
ສະຫາຍເລຂາທິການໃຫຍ່ ຫງວຽນຝູຈ້ອງ ເປັນແບບຢ່າງທີ່ໃສແຈ້ງກ່ຽວກັບຄຸນສົມບັດສິນທຳປະຕິວັດ, ກ່ຽວກັບສະຕິປັນຍາທີ່ສຸຂຸມ ແລະ ຄວາມອຸທິດຕົນຕໍ່ປະເທດຊາດແລະປະຊາຊົນ ເພື່ອໃຫ້ທົ່ວພັກ, ທົ່ວປວງຊົນແລະກອງທັບ ສຶກສາຮຽນຮູ້ ແລະ ປະຕິບັດຕາມ. ມໍລະດົກຂອງສະຫາຍຈະສືບຕໍ່ໄດ້ຮັບການສືບທອດ ແລະເສີມຂະຫຍາຍໃນຂະບວນການປ່ຽນແປງໃໝ່; ປະຕິບັດບັນລຸເປົ້າໝາຍໃນການສ້າງຫວຽດນາມທີ່ສະຫງົບສຸກ, ເປັນເອກະລາດ, ເປັນເອກະພາບ, ປະຊາທິປະໄຕ, ຈະເລີນຮຸ່ງເຮືອງ, ມີອາລະຍະທຳ ແລະ ມີຄວາມສຸກ ເຊິ່ງສະຫາຍຮັກແລະສູ້ຊົນຕະຫຼອດຊີວິດ(25). ຊີວິດ, ພາລະກິດ, ບຸກຄະລິກກະພາບ ແລະການປະກອບສ່ວນອັນຍິ່ງໃຫຍ່ຂອງສະຫາຍ ຈະໄດ້ຮັບການຈາລຶກໄວ້ໃນດວງໃຈຂອງປະຊາຊົນຕະຫຼອດໄປ ແລະ ເປັນອະມະຕະໃນປະຫວັດສາດວິລະຊົນຂອງຊາດຫວຽດນາມ ທີ່ມີອາລະຍະທຳແລະວິລະກຳຍາວນານນັບພັນປີ./.
----------------------------
(1) ຄຳໄຫວ້ອາໄລໃນພິທີສົ່ງສະການສະຫາຍ ຫງວຽນຝູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ
(2) ນີ້ແມ່ນຂໍ້ຄິດວິທະຍາຂອງ ວ.ອີ.ເລນິນ, ໂດຍສະຫາຍ ຫງວຽນອາຍກວັກ ໄດ້ຄັດສະເໜີໃນໜ້າປົກຂອງປຶ້ມ “ເສັ້ນທາງປະຕິວັດ”.
(3) ຫງວຽນຝູຈ້ອງ: ການກໍ່ສ້າງແລະປັບປຸງພັກ - ບາງບັນຫາທິດສະດີແລະພຶດຕິກຳ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2005, ໜ້າ 66
(4) ຫງວຽນຝູຈ້ອງ: “ທິດສະດີຕ້ອງບືນຕົວຂຶ້ນນຳພາ ແລະ ໄປພ້ອມກັນກັບພາກປະຕິບັດ, ຕ້ອງມີການເບິ່ງລ່ວງໜ້າ, ສ້າງການບຸກທະລຸໃນທິດສະດີການພັດທະນາ, ແກ້ໄຂຂໍ້ອຸດຕັນທາງດ້ານຈິນຕະນາການ ແລະຄວາມຮັບຮູ້, ຮັບໃຊ້ການປັບປຸງສະຖາບັນ ແນວທາງ ນະໂຍບາຍການພັດທະນາໃຫ້ສົມບູນແບບ”, ວາລະສານກອມມູນິດ, ສະບັບທີ 965, ເດືອນພຶດສະພາ 2021, ໜ້າ 6
(5) ຫງວຽນຝູຈ້ອງ: ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມແລະເສັ້ນທາງຂຶ້ນສູ່ງລັດທິສັງຄົມນິຍົມຢູ່ຫວຽດນາມ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2022, ໜ້າ 16 – 17
(6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, tr. 24
(7) ຫງວຽນຝູຈ້ອງ: ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມແລະເສັ້ນທາງຂຶ້ນສູ່ງລັດທິສັງຄົມນິຍົມຢູ່ຫວຽດນາມ, ປຶ້ມທີ່ໄດ້ແນະນຳ, ໜ້າ 22
(8), (9), (10), (11) ເບິ່ງ: ຫງວຽນຝູຈ້ອງ: ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມແລະເສັ້ນທາງຂຶ້ນສູ່ງລັດທິສັງຄົມນິຍົມຢູ່ຫວຽດນາມ, ປຶ້ມທີ່ໄດ້ແນະນຳ, ໜ້າ 29, 29, 226, 261
(12), (13) ຫງວຽນຝູຈ້ອງ: ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມແລະເສັ້ນທາງຂຶ້ນສູ່ງລັດທິສັງຄົມນິຍົມຢູ່ຫວຽດນາມ, ປຶ້ມທີ່ໄດ້ແນະນຳ, ໜ້າ 26, 29
(14) ຫງວຽນຝູຈ້ອງ: ມີຄວາມເຊື່ອໝັ້ນໃນການນຳພາຂອງພັກຈະສາມາດຜ່ານຜ່າຄວາມຫຍຸ້ງຍາກທຸກຢ່າງໄດ້ດີ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ໜ້າ 435 – 436
(15) ມະຕິກອງປະຊຸມສູນກາງພັກຄັ້ງທີ 6 ສະໄໝທີ XIII, ລົງວັນທີ 9 ພະຈິກ 2022, ວ່າດ້ວຍ “ສືບຕໍ່ສ້າງແລະປັບປງລັດແຫ່ງອຳນາດກົດໝາຍສັງຄົມນິຍົມຫວຽດນາມໃນໄລຍະໃໝ່ໃຫ້ສົມບູນແບບ”
(16) ຫງວຽນຝູຈ້ອງ: ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມແລະເສັ້ນທາງຂຶ້ນສູ່ງລັດທິສັງຄົມນິຍົມຢູ່ຫວຽດນາມ, ປຶ້ມທີ່ໄດ້ແນະນຳ, ໜ້າ 164
(17) ຫງວຽນຝູຈ້ອງ: ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມແລະເສັ້ນທາງຂຶ້ນສູ່ງລັດທິສັງຄົມນິຍົມຢູ່ຫວຽດນາມ, ປຶ້ມທີ່ໄດ້ແນະນຳ, ໜ້າ 184
(18) ຫງວຽນຝູຈ້ອງ: ກໍ່ສ້າງແລະພັດທະນາພື້ນຖານການຕ່າງປະເທດແລະການທູດຫວຽດນາມຢ່າງຮອບດ້ານ, ທັນສະໄໝ, ອຸດົມໄປດ້ວຍເອກະລັກຂອງ “ໄມ້ໄຜ່ຫວຽດນາມ”, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2023, ໜ້າ 19 – 20
(19) ຫງວຽນຝູຈ້ອງ: “ສືບຕໍ່ປ່ຽນແປງໃໝ່, ສ້າງແລະພັດທະນາພື້ນຖານການຕ່າງປະເທດແລະການທູດຫວຽດນາມທີ່ທັນສະໄໝ, ເຂັ້ມແຂງຮອບດ້ານ, ອຸດົມໄປດ້ວຍເອກະລັກຂອງ “ໄມ້ໄຜ່ຫວຽດນາມ””, ວາລະສານກອມມູນິດ, ສະບັບທີ 1028, ເດືອນທັນວາ 2023, ໜ້າ 10
(20), (21) ຫງວຽນຝູຈ້ອງ: ກໍ່ສ້າງແລະປັບປຸງພັກ - ບາງບັນຫາທິດສະດີແລະພຶດຕິກຳ, ປຶ້ມທີ່ໄດ້ແນະນຳ, ໜ້າ 65, 86
(22), (23), (24) ຫງວຽນຝູຈ້ອງ: ເສີມຂະຫຍາຍມູນເຊື້ອແຫ່ງມະຫາສາມັກຄີປວງຊົນທັງຊາດ, ກໍ່ສ້າງປະເທດເຮົາໃຫ້ນັບມື້ນັບຮັ່ງມີເຂັ້ມແຂງ, ມີອາລະຍະທຳ ແລະມີຄວາມສຸກ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2023, tr. 47, 47, 29
(25) ຄຳໄຫວ້ອາໄລໃນພິທີສົ່ງສະການສະຫາຍ ຫງວຽນຝູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ
