ແນວໂຮມປະເທດຊາດຫວຽດນາມ ສືບຕໍ່ປ່ຽນແປງໃໝ່,
ເປັນເຈົ້າການ, ປະດິດສ້າງ ແລະ ເສີມຂະຫຍາຍກຳລັງແຮງ
ຂອງກ້ອນມະຫາສາມັກຄີປວງຊົນທັງຊາດ, ມູນເຊື້ອຮັກຊາດ,
ຄວາມກ້າຫານ, ຄວາມເຂັ້ມແຂງຂອງຫວຽດນາມ, ຄວາມເປັນເຈົ້າຕົນເອງ,
ຄວາມພາກພູມໃຈ, ກ້າວເຂົ້າສູ່ຍຸກໃໝ່ດ້ວຍຄວາມໝັ້ນໃຈ*
ເປັນເຈົ້າການ, ປະດິດສ້າງ ແລະ ເສີມຂະຫຍາຍກຳລັງແຮງ
ຂອງກ້ອນມະຫາສາມັກຄີປວງຊົນທັງຊາດ, ມູນເຊື້ອຮັກຊາດ,
ຄວາມກ້າຫານ, ຄວາມເຂັ້ມແຂງຂອງຫວຽດນາມ, ຄວາມເປັນເຈົ້າຕົນເອງ,
ຄວາມພາກພູມໃຈ, ກ້າວເຂົ້າສູ່ຍຸກໃໝ່ດ້ວຍຄວາມໝັ້ນໃຈ*
ພິທີໄຂກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງແນວໂຮມປະເທດຊາດຫວຽດນາມ _ພາບ: TTXVN
ໃນ 94 ປີທີ່ຜ່ານມາ, ພາຍໃຕ້ການນຳພາຂອງພັກກອມມູນິດຫວຽດນາມ, ເຮືອປະຕິວັດຫວຽດນາມໄດ້ສ້າງສິ່ງມະຫັດສະຈັນຫຼາຍຢ່າງ ແລະ ຍາດໄດ້ໄຊຊະນະຄັ້ງແລ້ວຄັ້ງຕໍ່ໄປ. ຈາກປະເທດທີ່ຖືກສົງຄາມທຳລາຍຢ່າງໜັກໜ່ວງ, ຫວຽດນາມໄດ້ບືນຕົວຂຶ້ນກາຍເປັນສັນຍະລັກແຫ່ງສັນຕິພາບ, ສະຖຽນລະພາບ, ເປັນມິດໄມຕີ ແລະ ເປັນຈຸດໝາຍປາຍທາງຂອງນັກລົງທຶນ ແລະ ນັກທ່ອງທ່ຽວສາກົນ.
ຈາກພື້ນຖານເສດຖະກິດທີ່ຫຼ້າຫຼັງ, ຫວຽດນາມໄດ້ບືນຕົວຂຶ້ນມາຢູ່ອັນດັບ 40 ຂອງປະເທດເສດຖະກິດແຖວໜ້າ, ດ້ວຍຂະໜາດການຄ້າຢູ່ໃນ 20 ປະເທດໃຫຍ່ໃນໂລກ. ຈາກປະເທດທີ່ຖືກປິດລ້ອມແລະໂດດດ່ຽວ, ຫວຽດນາມໄດ້ສ້າງການພົວພັນທາງການທູດກັບ 193 ປະເທດສະມາຊິກຂອງອົງການສະຫະປະຊາຊາດ, ມີການພົວພັນຄູ່ຮ່ວມຍຸດທະສາດ ແລະ ການພົວພັນຄູ່ຮ່ວມຮອບດ້ານກັບ 30 ປະເທດ, ໃນນັ້ນມີບັນດາປະເທດສຳຄັນທັງໝົດ ແລະເປັນສະມາຊິກທີ່ຕັ້ງໜ້າ ຂອງອົງການລະດັບພາກພື້ນແລະສາກົນຫຼາຍກວ່າ 70 ອົງການ. ໂດຍຍຶດຖືຄວາມຜາສຸກແລະຄວາມຈະເລີນຮຸ່ງເຮືອງຂອງປະຊາຊົນເປັນເປົ້າໝາຍໃນການສູ້ຊົນ, ຫວຽດນາມບັນລຸເປົ້າໝາຍການພັດທະນາສະຫັດສະວັດໄດ້ໄວ ແລະ ໄດ້ຮັບການຍົກຍ່ອງຈາກສະຫະປະຊາຊາດ ແລະມິດປະເທດທົ່ວໂລກວ່າ ເປັນເລື່ອງລາວຄວາມສຳເລັດ ແລະ ຈຸດສະຫວ່າງໃນການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ພັດທະນາຊີວິດທາງວັດຖຸ ແລະຈິດໃຈຂອງປະຊາຊົນຢ່າງຕໍ່ເນື່ອງ.
ບັນດາຜົນງານອັນໃຫຍ່ຫຼວງທີ່ກ່າວມາຂ້າງເທິງນີ້ ບັນລຸໄດ້ຍ້ອນການນຳພາທີ່ສະຫຼາດສ່ອງໃສ ແລະຄວາມສາມາດຂອງພັກກອມມູນິດຫວຽດນາມ; ຄວາມສາມັກຄີເປັນເອກະພາບ ແລະ ການຮ່ວມແຮງຮ່ວມໃຈຂອງທົ່ວພັກ, ທົ່ວປວງຊົນ ແລະ ທົ່ວກອງທັບຂອງພວກເຮົາ, ໃນນັ້ນມີບົດບາດສຳຄັນຂອງກຸ່ມກ້ອນມະຫາສາມັກຄີປວງຊົນທັງຊາດ, ການປະກອບສ່ວນຂອງແນວໂຮມປະເທດຊາດຫວຽດນາມ (1) ແລະ ບັນດາອົງການສະມາຊິກຂອງແນວໂຮມ.
ໃນ 94 ປີທີ່ຜ່ານມາ, ແນວໂຮມປະເທດຊາດຫວຽດນາມໄດ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ຢືນຢັນບົດບາດແລະພາລະກຳຂອງຕົນ ໃນການເສີມຂະຫຍາຍມູນເຊື້ອ ແລະກຳລັງແຮງແຫ່ງມະຫາສາມັກຄີປວງຊົນທັງຊາດ, ສົ່ງເສີມ ປຸກລະດົມ ແລະກະຕູ້ນໃຫ້ປະຊາຊົນເຂົ້າຮ່ວມຢ່າງກະຕືລືລົ້ນ ໃນຂະບວນການແຂ່ງຂັນກັນຮັກຊາດ, ປຸກລະດົມແລະເສີມຂະຫຍາຍບັນດາແຫຼ່ງກຳລັງ, ຄວາມຄິດສ້າງສັນ, ປະກອບສ່ວນເຂົ້າໃນການປະຕິບັດໜ້າທີ່ຍຸດທະສາດຂອງປະເທດ ໃນແຕ່ລະໄລຍະປະຫວັດສາດ ໃຫ້ປະສົບຜົນສຳເລັດ.
ເສີມຂະຫຍາຍມູນເຊື້ອອັນສະຫງ່າງາມ ແລະບັນດາບົດຮຽນອັນລ້ຳຄ່າ, ໃນວາລະທີ່ຜ່ານມາ, ແນວໂຮມປະເທດຊາດໄດ້ມີຄວາມພະຍາຍາມຫຼາຍຢ່າງ ໃນການປ່ຽນແປງໃໝ່ເນື້ອໃນ ແລະ ວິທີການດຳເນີນງານ. ບົດບາດຫຼັກແຫຼ່ງທາງການເມືອງຂອງແນວໂຮມປະເທດຊາດ ແລະ ບັນດາອົງການການເມືອງ-ສັງຄົມ ນັບມື້ນັບໄດ້ຮັບການຢັ້ງຢືນ, ປະກອບສ່ວນເສີມຂະຫຍາຍກຳລັງແຮງລວມ ຂອງທົ່ວລະບົບການເມືອງ ແລະ ທົ່ວປວງຊົນ ໃນພາລະກິດການສ້າງສາ ແລະ ປົກປັກຮັກສາປະເທດຊາດ. ວິທີການສາມັກຄີແລະເຕົ້າໂຮມປະຊາຊົນທຸກຊັ້ນຄົນ ໂດຍຜ່ານການຈັດຕັ້ງວັນສາມັກຄີແຫ່ງຊາດ ໃນເຂດທີ່ຢູ່ອາໄສ ຖືເປັນວິທີການທີ່ສ້າງສັນ ແລະ ມີປະສິດທິຜົນ ເຊິ່ງນັບມື້ນັບຂະຫຍາຍກວ້າງ.
ແນວໂຮມປະເທດຊາດໄດ້ປຸກລະດົມຂະບວນການ, ການແຂ່ງຂັນກັນຮັກຊາດຫຼາຍຂະບວນການ ແລະ ສ້າງຮູບແບບຕ່າງໆຫຼາຍຢ່າງ ເພື່ອດຶງດູດແລະເຕົ້າໂຮມຜູ້ຄົນຈຳນວນຫຼາຍຈາກທຸກຊັ້ນວັນນະ ແລະ ບຸກຄົນທີ່ໂດດເດັ່ນຈາກທຸກຊົນຊັ້ນ, ທຸກຊົນເຜົ່າ, ທຸກສາສະໜາ ແລະ ຊຸມຊົນຊາວຫວຽດນາມທີ່ອາໄສຢູ່ຕ່າງປະເທດ ເຫັນດີ, ເຂົ້າຮ່ວມ ແລະ ຕອບສະໜອງ. ການຈັດຕັ້ງປະຕິບັດໂຄງການປຸກລະດົມການກໍ່ສ້າງເຮືອນສາມັກຄີໃຫ້ບັນດາຄອບຄົວທຸກຍາກຢູ່ແຂວງ ດ້ຽນບຽນ, ໂດຍສະເພາະແມ່ນ ການສົມທົບກັນຈັດຕັ້ງປະຕິບັດໂຄງການລົບລ້າງເຮືອນຊົ່ວຄາວ ແລະເຮືອນຮົ່ວເພພັງ ໃນທົ່ວປະເທດ ໃຫ້ສຳເລັດໃນປີ 2025 ແມ່ນການເຄື່ອນໄຫວທີ່ພົ້ນເດັ່ນ ໃນການປ່ຽນແປງໃໝ່ວິທີການຈັດຕັ້ງປະຕິບັດວຽກງານປະກັນຄວາມປອດໄພທາງສັງຄົມ.
ເມື່ອປະເຊີນກັບສະຖານະການການລະບາດຂອງພະຍາດໂຄວິດ-19 ແລະພາຍຸລູກທີ 3 ທີ່ບໍ່ເຄີຍເກີດຂຶ້ນມາກ່ອນແລະສັບສົນ, ດ້ວຍຄວາມຮັບຜິດຊອບສູງ, ຄວາມເປັນເຈົ້າການ ແລະປະດິດສ້າງ, ແນວໂຮມປະເທດຊາດຫວຽດນາມໄດ້ປະສານສົມທົບຢ່າງແໜ້ນແຟ້ນກັບຄະນະ, ກະຊວງ, ຂະແໜງການ, ທ້ອງຖິ່ນ ແລະ ບັນດາອົງການສະມາຊິກ ໃນການປຸກລະດົມ, ຮຽກຮ້ອງ, ຂົນຂວາຍຜູ້ຄົນໃນປະເທດແລະຕ່າງປະເທດ ລວມເຖິງມິດສະຫາຍສາກົນ ເພື່ອຮ່ວມແຮງຮ່ວມໃຈກັນເຂົ້າຮ່ວມໃນການປ້ອງກັນ, ຕໍ່ສູ້ຕ້ານ, ຄວບຄຸມ ແລະ ເອົາຊະນະຜົນທີ່ຕາມມາຂອງພະຍາດລະບາດ ພາຍຸ ແລະ ນ້ຳຖ້ວມຢ່າງວ່ອງໄວ, ການຟື້ນຟູແລະພັດທະນາເສດຖະກິດ-ສັງຄົມໂດຍໄວ.
ວຽກງານຕິດຕາມກວດກາ, ວິພາກວິຈານສັງຄົມ, ເຂົ້າຮ່ວມການປະກອບຄຳຄິດຄຳເຫັນໃສ່ວຽກງານກໍ່ສ້າງພັກ, ກໍ່ສ້າງອຳນາດການປົກຄອງໃຫ້ສະອາດແລະເຂັ້ມແຂງ ສືບຕໍ່ບັນລຸໄດ້ໝາກຜົນສຳຄັນຫຼາຍຢ່າງ; ການເຄື່ອນໄຫວຊີ້ນຳ-ນຳພາຂອງຄະນະພັກ, ສະມາຊິກພັກ, ພິເສດແມ່ນບັນດາການນຳ, ບຳລຸງສ້າງຈັນຍາບັນ, ວິຖີຊີວິດ, ການປະຕິບັດໜ້າທີ່ຂອງລັດ ໄດ້ຮັບຄວາມສົນໃຈ ແລະ ບັນລຸໝາກຜົນດີ; ການເຄື່ອນໄຫວຕິດຕາມກວດກາພະນັກງານ ສະມາຊິດພັກ, ໂດຍສະເພາະຫົວໜ້າ ໃນການຝຶກຝົນຫຼໍ່ຫຼອມຄຸນສົມບັດສິນທຳ, ວິຖີຊີວິດ ແລະ ການດຳເນີນງານບໍລິການສາທາລະນະ ໄດ້ຮັບຄວາມເອົາໃຈໃສ່ ແລະປະສົບຜົນສຳເລັດໃນທາງບວກ. ການເຄື່ອນໄຫວການຕ່າງປະເທດປະຊາຊົນໄດ້ປະກອບສ່ວນຢ່າງຕັ້ງໜ້າ ເຂົ້າໃນວຽກງານການຕ່າງປະເທດຂອງພັກ ແລະ ການທູດຂອງລັດ, ໄດ້ຮັບການສະໜັບສະໜູນ, ການຮ່ວມມື ແລະ ການຊ່ວຍເຫຼືອຈາກປະຊາຄົມໂລກ, ເປີດກວ້າງການພົວພັນມິດຕະພາບ ແລະ ການຮ່ວມມືລະຫວ່າງປະຊາຊົນຫວຽດນາມ ກັບປະຊາຊົນບັນດາປະເທດໃນໂລກ, ເພີ່ມທະວີທີ່ຕັ້ງແລະກຽດສັກສີຂອງຫວຽດນາມ ແລະ ເປີດກາລະໂອກາດການພັດທະນາຂອງປະເທດ.
ດ້ວຍບັນດາຜົນງານທີ່ບັນລຸໄດ້ໃນໄລຍະທີ່ຜ່ານມາມໍ່ນີ້, ແນວໂຮມປະເທດຊາດຫວຽດນາມ ສົມຄວນໄດ້ຮັບບົດບາດໃນຖານະພັນທະມິດທາງການເມືອງ, ພັນທະພາບອາສາສະໝັກໃຈ, ເປັນຮາກຖານການເມືອງຂອງອຳນາດການປົກຄອງປະຊາຊົນ; ອົງການຈັດຕັ້ງຫຼັກແຫຼ່ງໃນການເສີມຂະຫຍາຍມູນເຊື້ອ ແລະກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ; ເປັນຂົວຕໍ່ທີ່ສຳຄັນລະຫວ່າງພັກ, ອຳນາດການປົກຄອງ ກັບປະຊາຊົນ; ເສີມຂະຫຍາຍບົດບາດເຈົ້າຂອງຂອງປະຊາຊົນໃນຊີວິດສັງຄົມ; ຕາງໜ້າ ແລະ ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກສະຫະພັນ, ສະມາຊິກສະມາຄົມ ແລະ ປະຊາຊົນ; ເປັນຕົວແທນໃນການປົກປ້ອງສິດແລະຜົນປະໂຫຍດທີ່ຊອບທຳ ຖືກກົດໝາຍຂອງສະມາຊິກສະຫະພາບແຮງງານ ສະມາຊິກສະມາຄົມ ແລະປະຊາຊົນ.
ຕາງໜ້າໃຫ້ຄະນະບໍລິຫານງານສູນກາງພັກ, ການນຳພັກແລະລັດ, ຂ້າພະເຈົ້າຂໍຮັບຮູ້, ຊົມເຊີຍຢ່າງອົບອຸ່ນ ແລະ ຍ້ອງຍໍຜົນງານທີ່ແນວໂຮມປະເທດຊາດຫວຽດນາມທຸກຂັ້ນບັນລຸໄດ້; ຂໍຂອບໃຈ ແລະ ຍ້ອງຍໍບຸກຄົນທຸກລະດັບຊັ້ນທີ່ໄດ້ສົ່ງເສີມນ້ຳໃຈຮັກຊາດ, ສາມັກຄີ, ຕອບສະໜອງ, ສະໜັບສະໜູນ ແລະ ເອົາໃຈໃສ່ ໃນການປະຕິບັດແນວທາງ ແລະແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ, ປະກອບສ່ວນເຮັດໃຫ້ເກີດຄວາມສຳເລັດທີ່ສຳຄັນ ແລະເປັນບາດກ້າວທີ່ພົ້ນເດັ່ນ ຂອງປະເທດເຮົາ ໃນຊຸມປີທີ່ຜ່ານມາ.
ຄຽງຂ້າງບັນດາຜົນງານ ແລະໝາກຜົນທີ່ບັນລຸໄດ້, ວຽກງານແນວໂຮມຍັງມີຂໍ້ຂາດຕົກບົກຜ່ອງ ແລະ ຂໍ້ຈຳກັດທີ່ໄດ້ຊີ້ອອກຢ່າງກົງໄປກົງມາ ໃນຮ່າງບົດລາຍງານການເມືອງຄື: ເນື້ອໃນ, ວິທີການຂົນຂວາຍແລະເຕົ້າໂຮມ ເພື່ອກໍ່ສ້າງແລະປັບປຸງກຸ່ມກ້ອນມະຫາສາມັກຄີປວງຊົນທັງຊາດ ເຖິງຈະມີການປ່ຽນແປງໃໝ່ຫຼາຍຢ່າງກໍ່ຕາມ, ແຕ່ຍັງບໍ່ທັນບັນລຸໄດ້ຕາມຄວາມຕ້ອງການແລະໜ້າທີ່, ໂດຍສະເພາະ ເມື່ອປະເຊີນກັບການປ່ຽນແປງຢ່າງວ່ອງໄວຂອງການປະຕິບັດ; ຊັບພະຍາກອນຫຼາຍຢ່າງຂອງປະຊາຊົນຍັງບໍ່ທັນໄດ້ຮັບການນຳໃຊ້ຢ່າງມີປະສິດທິຜົນ.
ການຜັນຂະຫຍາຍຂະບວນການຂົນຂວາຍ, ຂະບວນການແຂ່ງຂັນກັນຮັກຊາດໃນບາງບ່ອນ ບໍ່ມີປະສິດທິພາບ. ການເຄື່ອນໄຫວຕິດຕາມກວດກາ ແລະວິພາກວິຈານສັງຄົມ ຍັງບໍ່ບັນລຸຕາມທີ່ຕ້ອງການ. ກິດຈະກຳການຕ່າງປະເທດປະຊາຊົນ ບໍ່ສົມດຸນກັບທ່າແຮງ ແລະທີ່ຕັ້ງຂອງແນວໂຮມປະເທດຊາດຫວຽດນາມ ແລະ ຄວາມຕ້ອງການໃນການເຊື່ອມໂຍງເຂົ້າກັບສາກົນ.
ດ້ວຍສະຖານະແລະກຳລັງແຮງທີ່ໄດ້ສະສົມພາຍຫຼັງເກືອບ 40 ປີແຫ່ງການປ່ຽນແປງໃໝ່ປະເທດຊາດ, ດ້ວຍໂອກາດແລະໂຊກຊະຕາໃໝ່, ຫວຽດນາມພວມປະເຊີນໜ້າກັບກາລະໂອກາດປະຫວັດສາດ ເພື່ອນຳປະເທດຊາດກ້າວເຂົ້າສູ່ສັກກະລາດໃໝ່, ສັກກະລາດແຫ່ງການຂະຫຍາຍຕົວຂອງປະເທດຊາດ. ນັ້ນແມ່ນສັກກະລາດພາຍໃຕ້ການນຳພາຂອງພັກກອມມູນິດຫວຽດນາມ ທີ່ປະສົບຄວາມສຳເລັດໃນການສ້າງປະເທດຫວຽດນາມທີ່ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸດຕິທຳ ແລະ ອາລະຍະທຳ, ຮອດກາງສະຕະວັດທີ XXI ຈະກາຍເປັນປະເທດທີ່ພັດທະນາແລ້ວ ແລະ ມີລາຍໄດ້ສູງ ຕາມທິດສັງຄົມນິຍົມ, ບັນລຸໄດ້ຄວາມປາຖະໜາຂອງປະທານໂຮ່ຈີມິນ ແລະຄວາມມຸ່ງມາດປາດຖະໜາຂອງທົ່ວປວງຊົນທັງຊາດ, ເຮັດໃຫ້ປະເທດທຽບເທົ່າມະຫາອຳນາດໃນໂລກ.
ເພື່ອບັນລຸເປົ້າໝາຍດັ່ງກ່າວ, ຕ້ອງປຸກລະດົມນ້ຳໃຈຮັກຊາດ, ຄວາມປາຖະໜາອຸທິດຕົນ, ເຈດຈຳນົງເປັນເຈົ້າຕົນເອງ, ຄວາມໝັ້ນໃຈໃນການສ້າງຕົນເອງໃຫ້ເຂັ້ມແຂງ, ຄວາມເອກອ້າງທະນົງໃຈຂອງຊາດ, ການເສີມຂະຫຍາຍກຳລັງແຮງອັນຍິ່ງໃຫຍ່ຂອງກຸ່ມກ້ອມມະຫາສາມັກຄີປວງຊົນທັງຊາດ, ການສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝມີຄວາມໝາຍຫຼັກ - ນີ້ແມ່ນຄວາມຮັບຜິດຊອບຂອງທົ່ວພັກ, ທົ່ວປວງຊົນ ແລະທົ່ວກອງທັບຂອງເຮົາ ເຊິ່ງໃນນັ້ນ ແນວໂຮມປະເທດຊາດຫວຽດນາມ ແລະ ບັນດາອົງການສະມາຊິກມີບົດບາດສຳຄັນ, ມີຄວາມຮັບຜິດຊອບທີ່ສູງສົ່ງແລະສະຫງ່າລາສີ.
ບົນຈິດໃຈນັ້ນ, ໂດຍພື້ນຖານແລ້ວ ຂ້າພະເຈົ້າເຫັນດີເຫັນພ້ອມກັບທິດທາງ, ເປົ້າໝາຍ ແລະ ໂຄງການດຳເນີນງານໃນວາລະຕໍ່ໄປ ທີ່ບົດລາຍງານການເມືອງໄດ້ຍົກອອກມາ, ຂ້າພະເຈົ້າຢາກເນັ້ນໜັກເຖິງບາງບັນຫາ ເພື່ອໃຫ້ກອງປະຊຸມໃຫຍ່ປຶກສາຫາລື, ພິຈາລະນາ ແລະ ຕັດສິນຕົກລົງ:
ທີໜຶ່ງ, ຕ້ອງເປັນເອກະພາບໃນຄວາມຮັບຮູ້ກ່ຽວກັບທີ່ຕັ້ງ ແລະ ຄວາມສຳຄັນພິເສດຂອງກຸ່ມກ້ອນມະຫາສາມັກຄີປວງຊົນທັງຊາດ ແລະ ຄວາມຮຽກຮ້ອງຕ້ອງການອັນຮີບດ່ວນ, ກ່ວາເວລາໃດໝົດ, ໃຫ້ບຸລິມະສິດສູງສຸດກັບການປັບປຸງ ແລະ ເສີມຂະຫຍາຍກຸ່ມກ້ອນມະຫາສາມັກຄີປວງຊົນທັງຊາດ ພາຍໃຕ້ການນຳພາຂອງພັກ. ນີ້ແມ່ນໜຶ່ງໃນບັນດາມາດຕະການແກ້ໄຂທີ່ສຳຄັນ ເພື່ອນຳປະເທດຊາດກ້າວເຂົ້າສູ່ຍຸກໃໝ່.
ຄວາມເປັນຈິງປະຫວັດສາດສະແດງໃຫ້ເຫັນວ່າ, ກຸ່ມກ້ອນມະຫາສາມັກຄີປວງຊົນທັງຊາດສ້າງກຳລັງແຮງອັນໃຫຍ່ຫຼວງ ແລະ ເປັນແຫຼ່ງທີ່ມາຂອງຄວາມສຳເລັດທັງໝົດຂອງການປະຕິວັດຫວຽດນາມ; ສະພາບການຍິ່ງຫຍຸ້ງຍາກແລະທ້າທາຍຫຼາຍເທົ່າໃດ, ຄວາມຕ້ອງການແລະໜ້າທີ່ປະຕິວັດກໍຍິ່ງຫຼາຍຂຶ້ນເທົ່ານັ້ນ, ເຮົາກໍ່ຍິ່ງຕ້ອງສາມັກຄີກັນຢ່າງແໜ້ນແຟ້ນ, ກ້ວາງຂວາງ ແລະໝັ້ນຄົງຫຼາຍຂຶ້ນເທົ່ານັ້ນ; ຄວາມສາມັກຄີເທົ່ານັ້ນທີ່ຈະນຳມາເຊິ່ງໄຊຊະນະໄດ້. ກຸ່ມກ້ອນມະຫາສາມັກຄີປວງຊົນທັງຊາດສາມາດສ້າງກຳລັງແຮງອັນໃຫຍ່ຫຼວງ ແລະກາຍເປັນພະລັງທີ່ບໍ່ຊະນະເລີດໄດ້ ກໍ່ຕໍ່ເມື່ອມີການຈັດຕັ້ງຢ່າງແໜ້ນແຟ້ນ, ມີຄວາມເຂົ້າໃຈຢ່າງເຊິ່ງ ກ່ຽວກັບຈຸດໝາຍແລະອຸດົມຄະຕິ ທີ່ໄດ້ຮັບການນຳທາງໂດຍແນວທາງທີ່ຖືກຕ້ອງ; ພັດທະນາໄດ້ດີທີ່ສຸດເມື່ອເຕົ້າໂຮມກັນໃນແນວໂຮມປະເທດຊາດ ພາຍໃຕ້ການນຳພາຂອງພັກ.
ພັກກອມມູນິດແມ່ນສະມາຊິກຂອງແນວໂຮມປະເທດຊາດ ແລະ ໃນຂະນະດຽວກັນເປັນຜູ້ນຳຂອງກຸ່ມກ້ອນມະຫາສາມັກຄີປວງຊົນທັງຊາດ; ໜ້າທີ່ຕົ້ນຕໍຂອງພັກ, ໂດຍກົງຂອງຄະນະພັກສູນກາງແນວໂຮມປະເທດຊາດແມ່ນໂຄສະນາ, ສຶກສາອົບຮົມມະຫາຊົນໃຫ້ມີຄວາມຕື່ນຕົວເຖິງຄວາມຈຳເປັນຕ້ອງສາມັກຄີກັນເຂົ້າ; ການເລືອກຮູບແບບແລະວິທີການຈັດຕັ້ງທີ່ເໝາະສົມ ເພື່ອດຶງດູດການເຂົ້າຮ່ວມຂອງມະຫາຊົນຢ່າງກວ້າງຂວາງແລະໜາແໜ້ນ; ຊີ້ນຳກຸ່ມກ້ອນມະຫາສາມັກຄີປວງຊົນ ເຮັດວຽກແລະປະດິດສ້າງ ຕາມເປົ້າໝາຍແລະໜ້າທີ່ທີ່ສອດຄ່ອງກັບຜົນປະໂຫຍດຂອງຊາດ-ປະເທດຊາດ ແລະ ຄວາມມຸ່ງມາດປາດຖະໜາອັນຊອບທຳຂອງປະຊາຊົນ.
ການປະຕິບັດຕາມເປົ້າໝາຍຍຸດທະສາດ 100 ປີ ພາຍໃຕ້ການນຳພາຂອງພັກ, ການສະເຫຼີມສະຫຼອງຄົບຮອບ 100 ປີແຫ່ງການສະຖາປະນາປະເທດສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນ ສາທາລະນະລັດສັງຄົມນິຍົມຫວຽດນາມ ແມ່ນວຽກງານທີ່ສຳຄັນ, ຍິ່ງໃຫຍ່ ແຕ່ມີຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງ; ພາລະກິດນີ້ຈະປະສົບຜົນສຳເລັດໄດ້ກໍ່ຕໍ່ເມື່ອພວກເຮົາສາມາດເຕົ້າໂຮມກຳລັງແຮງຂອງຄວາມສາມັກຄີປວງຊົນທັງຊາດໄດ້.
ໃນໄລຍະປະຈຸບັນ, ແນວໂຮມປະເທດຊາດຕ້ອງມີບົດບາດຫຼັກແຫຼ່ງ, ເປັນຜູ້ນຳໃນການປະສານງານກັບບັນດາອົງການສະມາຊິກ ເພື່ອເຕົ້າໂຮມທຸກຊັ້ນຄົນແລະບຸກຄົນທີ່ດີເດັ່ນທັງໝົດ, ເສີມຂະຫຍາຍບົດບາດນຳໜ້າຂອງຊົນຊັ້ນກຳມະກອນ ແລະ ປຸກລະດົມຄວາມສາມາດບົ່ມຊ້ອນອັນຍິ່ງໃຫຍ່ຂອງຊາວກະສິກອນ, ປັນຍາຊົນ ແລະ ຜູ້ອອກແຮງງານ, ຮັບປະກັນຄວາມເປັນເອກະພາບສູງທາງດ້ານຄວາມຮັບຮູ້, ແນວຄິດ ແລະ ການກະທຳ, ຍຶດໝັ້ນເປົ້າໝາຍ ແລະ ອຸດົມຄະຕິສັງຄົມນິຍົມ; ເປັນເຈົ້າການໃນການເຄື່ອນໄຫວວຽກງານການຕ່າງປະເທດຂອງປະຊາຊົນ; ເດັດດ່ຽວປົກປັກຮັກສາເອກະລາດ, ອະທິປະໄຕຂອງຊາດ, ສະຖຽນລະພາບດ້ານການເມືອງ-ສັງຄົມ, ສ້າງສາປະເທດໃຫ້ນັບມື້ນັບຈະເລີນຮຸ່ງເຮືອງ ແລະມີຄວາມຜາສຸກ.
ແນວໂຮມປະເທດຊາດ ແລະ ບັນດາອົງການສະມາຊິກຄວນເຮັດວຽກງານໂຄສະນາອົບຮົມສຶກສາ ແລະ ຂົນຂວາຍປະຊາຊົນໃຫ້ດີທີ່ສຸດ ເພື່ອໃຫ້ປະຊາຊົນມີຄວາມເຂົ້າໃຈ, ເປັນເອກະພາບ ແລະ ສຸດອົກສຸດໃຈ ໃນການປະຕິບັດແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ; ຮັບຮູ້ໄດ້ຈະແຈ້ງເຖິງແຜນການແລະກົນອຸບາຍຂອງບັນດາອິດທິກຳລັງສັດຕູແລະປະຕິກິລິຍາ ທີ່ບິດເບືອນ, ກໍ່ໃຫ້ເກີດການແບ່ງແຍກ ແລະ ທຳລາຍກຸ່ມກ້ອນມະຫາສາມັກຄີປວງຊົນທັງຊາດ. ແນວໂຮມປະເທດຊາດຕ້ອງເປັນແກນກາງໃນການປົກປັກຮັກສາຮາກຖານອຸດົມການຂອງພັກ ແລະ ຕໍ່ສູ້ປະຕິເສດບັນດາທັດສະນະທີ່ຜິດພາດແລະເປັນສັດຕູ.
ທີສອງ, ເບິ່ງແຍງ ແລະ ປົກປັກຮັກສາຜົນປະໂຫຍດທີ່ແທດຈິງ, ຖືກຕ້ອງຕາມກົດໝາຍຂອງປະຊາຊົນ; ເປົ້າໝາຍສູງສຸດແມ່ນຮັບໃຊ້ປະຊາຊົນ ແລະ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ. ພັກເຮົາບໍ່ມີຜົນປະໂຫຍດອື່ນໃດນອກເໜືອຈາກຜົນປະໂຫຍດຂອງປະຊາຊົນ; ປະຊາຊົນແມ່ນໃຈກາງ ແລະ ເປັນເຈົ້າຂອງໃນທຸກແຜນນະໂຍບາຍ ແລະແນວທາງຂອງພັກກອມມູນິດຫວຽດນາມ; ຄວາມມານະພະຍາຍາມທັງໝົດຂອງພັກກອມມູນິດຫວຽດນາມ, ລັດຫວຽດນາມ ແລະ ລະບົບການເມືອງທັງໝົດ ຈະມີຄວາມໝາຍກໍ່ຕໍ່ເມື່ອປະຊາຊົນມີຊີວິດທີ່ຈະເລີນຮຸ່ງເຮືອງແລະມີຄວາມຜາສຸກເທົ່ານັ້ນ.
ແນວໂຮມປະເທດຊາດ ແລະ ບັນດາອົງການສະມາຊິກຕ້ອງເປັນເຈົ້າການ ແລະຕັ້ງໜ້າຜັນຂະຫຍາຍບັນດາມາດຕະການເບິ່ງແຍງດູແລ ແລະ ປັບປຸງຍົກສູງຊີວິດການເປັນຢູ່ຂອງປະຊາຊົນ, ພິເສດແມ່ນ ບັນດາຊົນເຜົ່າສ່ວນໜ້ອຍ ທີ່ຢູ່ເຂດຫ່າງໄກສອກຫຼີກ, ເຂດຊາຍແດນ ໝູ່ເກາະ, ເຂດຕໍ່ຕ້ານເກົ່າ, ເຂດຍຸດທະສາດ, ເຂດທີ່ມີຜູ້ຄົນນັບຖືສາສະໜາຈໍານວນຫຼາຍ. ກວດສອບ ແນະນຳຄະນະພັກ, ອຳນາດການປົກຄອງ ແລະ ລະດົມຜູ້ໃຈບຸນໃຫ້ຄວາມຊ່ວຍເຫຼືອແກ່ຜູ້ຄົນທີ່ປະສົບກັບຄວາມຫຍຸ້ງຍາກ, ຜູ້ດ້ອຍໂອກາດ ໂດຍບໍ່ປະຜູ້ໃດໄວ້ຂ້າງຫຼັງ.
ເປັນເຈົ້າການໃນການສົມທົບກັບອຳນາດການປົກຄອງທຸກຂັ້ນ ເພື່ອແກ້ໄຂບັນດາບັນຫາສັງຄົມທີ່ຮ້ອນເຄືອງຢູ່ຮາກຖານຢ່າງມີປະສິດທິຜົນ. ຕັ້ງໜ້າເຕົ້າໂຮມ ແລະ ຮັບຟັງຄວາມຄິດເຫັນຂອງປະຊາຊົນ, ກາຍເປັນບ່ອງອີງທີ່ໜ້າເຊື່ອຖືຂອງປະຊາຊົນ ເພື່ອສະທ້ອນໃຫ້ບັນດາຄະນະພັກ, ອຳນາດການປົກຄອງທຸກຂັ້ນ. ມີບົດບາດທີ່ດີໃນການເປັນປະທານການເຈລະຈາ, ການປະສານງານລະຫວ່າງບັນດາອົງການຈັດຕັ້ງສະມາຊິກ ໃນການດຳເນີນການຕິດຕາມກວດກາ ແລະວິພາກວິຈານສັງຄົມ, ໂດຍສະເພາະກ່ຽວກັບບັນຫາຊີວິດຂອງຊາດແລະຂອງປະຊາຊົນ. ເຂົ້າຮ່ວມຢ່າງມີປະສິດທິຜົນ ແລະຊຸກຍູ້ໃຫ້ປະຊາຊົນເຂົ້າຮ່ວມຢ່າງຕັ້ງໜ້າ ໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍແລະຄວາມຫຍໍ້ທໍ້. ໃນຕໍ່ໜ້າ, ຕັ້ງໜ້າເຂົ້າຮ່ວມວຽກງານການຈັດຕັ້ງ ແລະ ຂົນຂວາຍປະຊາຊົນດຳເນີນການເລືອກຕັ້ງສະມາຊິກສະພາແຫ່ງຊາດຊຸດທີ XVI ແລະການເລືອກຕັ້ງສະພາປະຊາຊົນທຸກຂັ້ນໄລຍະ 2026-2031 ຢ່າງສຳເລັດຜົນ.
ທີສາມ, ສືບຕໍ່ປ່ຽນແປງໃໝ່ເນື້ອໃນ ແລະ ວິທີການເຄື່ອນໄຫວຂອງແນວໂຮມປະເທດຊາດຕາມທິດທາງທີ່ແທດຈິງ, ໃກ້ຊິດກັບປະຊາຊົນ ແລະ ໄປຄຽງຄູ່ກັບປະຊາຊົນ, “ເມື່ອປະຊາຊົນຕ້ອງການ ແນວໂຮມຈະຕອບສະໜອງ, ເມື່ອປະຊາຊົນປະສົບກັບຄວາມຫຍຸ້ງຍາກ ແນວໂຮມກໍ່ພ້ອມທີ່ຈະມີສ່ວນຮ່ວມ”.
ເສີມຂະຫຍາຍບົດບາດຫຼັກແຫຼ່ງຂອງແນວໂຮມປະເທດຊາດໃນການຜັນຂະຫຍາຍຂະບວນການແຂ່ງຂັນກັນຮັກຊາດທີ່ມີຄຸນນະພາບສູງແລະແທດຈິງ ເພື່ອຕອບສະໜອງຄວາມເພິ່ງພໍໃຈຂອງປະຊາຊົນ; ແຂ່ງຂັນກັນປະຕິບັດໜ້າທີ່ພັດທະນາເສດຖະກິດ-ສັງຄົມຂອງປະເທດໃນໄລຍະໃໝ່ໃຫ້ປະສົບຜົນສຳເລັດ.
ວິທີການປຸກລະດົມ ແລະ ເຕົ້າໂຮມຂອງອົງການຈັດຕັ້ງແນວໂຮມປະເທດຊາດຕ້ອງມີຄວາມຫຼາກຫຼາຍ, ອຸດົມສົມບູນດ້ວຍປະເພດ ແລະເນື້ອໃນທີ່ມີຊີວິດຊີວາ, ກາຍເປັນເວທີປາໄສຂອງມະຫາຊົນ ເຊິ່ງເປັນສະຖານທີ່ທີ່ຜູ້ຄົນທຸກຊົນຊັ້ນ, ທຸກຊົນເຜົ່າ, ທຸກສາສະໜາ, ຊາວຫວຽດນາມຢູ່ຕ່າງປະເທດ... ພົບປະ ແລກປ່ຽນຂໍ້ມູນ, ສະແດງຄວາມຄິດຄວາມເຫັນ, ຄວາມມຸ່ງມາດປາດຖະໜາ, ສົນທະນາປະຊາທິປະໄຕ ແລະ ເປີດກ້ວາງ. ເຕົ້າໂຮມ ແລະ ເສີມຂະຫຍາຍສຸດຂີດ ບົດບາດ ແລະ ການປະກອບສ່ວນຂອງນັກວິທະຍາສາດ, ຜູ້ຊ່ຽວຊານ, ບຸກຄົນທີ່ເປັນຕົວແທນຈາກທຸກຊົນຊັ້ນ, ທຸກຊົນເຜົ່າ, ທຸກສາສະໜາ ແລະ ຊາວຫວຽດນາມຢູ່ຕ່າງປະເທດ ເພື່ອພັດທະນາປະເທດຊາດ.
ກໍ່ສ້າງຖັນແຖວພະນັກງານແນວໂຮມປະເທດຊາດທີ່ມີຄວາມກະຕືລືລົ້ນ, ມີຄວາມຮັບຜິດຊອບ ແລະ ສຸດອົກສຸດໃຈໃນການຮັບໃຊ້ປະຊາຊົນ, ເພື່ອຊີວິດທີ່ຈະເລີນຮຸ່ງເຮືອງແລະຄວາມສຸກຂອງປະຊາຊົນ, ໃກ້ຊິດສະໜິດສະໜົມກັບປະຊາຊົນຢ່າງແທ້ຈິງ, ຮັບຟັງຄວາມຄິດເຫັນຂອງປະຊາຊົນ, ຮັກປະຊາຊົນ, ເປັນແບບຢ່າງອັນໂດດເດັ່ນໃຫ້ປະຊາຊົນທີ່ຮັກ, ເຄົາລົບ, ໄວ້ວາງໃຈແລະແບ່ງປັນ.
ໃນໄລຍະປະຕິວັດໃໝ່, ຄະນະພັກແລະອຳນາດການປົກຄອງທຸກຂັ້ນ, ພະນັກງານແລະສະມາຊິກພັກທຸກຄົນ ຕ້ອງສືບຕໍ່ເຂົ້າໃຈຢ່າງເລິກເຊິ່ງກ່ຽວກັບທີ່ຕັ້ງ, ຄວາມໝາຍ ແລະ ຄວາມສຳຄັນຂອງຄວາມສາມັກຄີປວງຊົນທັງຊາດທີ່ຍິ່ງໃຫຍ່ ແລະ ວຽກງານຂອງແນວໂຮມປະເທດຊາດ; ສົ່ງເສີມຄວາມຮັບຜິດຊອບຕໍ່ການເຄື່ອນໄຫວຂອງແນວໂຮມປະເທດຊາດແລະ ບັນດາອົງການການເມືອງ-ສັງຄົມ ໃນກົນໄກ “ພັກນຳພາ, ລັດຄຸ້ມຄອງ, ແນວໂຮມປະເທດຊາດ ແລະ ບັນດາອົງການການເມືອງ-ສັງຄົມ ເປັນແກນກາງ ເພື່ອໃຫ້ປະຊາຊົນເປັນເຈົ້າຂອງ” ເຊິ່ງຕິດພັນກັບທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້”.
ຂ້າພະເຈົ້າສະເໜີໃຫ້ບັນດາຄະນະພັກ ແລະ ອຳນາດການປົກຄອງທຸກຂັ້ນ ສືບຕໍ່ເອົາໃຈໃສ່ຊີ້ນຳ ນຳພາ ແລະ ສົມທົບກັນຢ່າງແໜ້ນແຟ້ນ, ເອົາໃຈໃສ່ຢ່າງເປັນປະຈຳກັບແນວໂຮມປະເທດຊາດ ດ້ວຍຄວາມຈິງໃຈ, ເປີດກວ້າງ, ຮັບຟັງ, ທຸ່ມເທ ແລະພະຍາຍາມແກ້ໄຂບັນຫາຂອງປະຊາຊົນ. ສືບຕໍ່ເພີ່ມເຕີມ ແລະ ປັບປຸງແຜນນະໂຍບາຍ, ນະໂຍບາຍ ກົດໝາຍໃຫ້ສົມບູນແບບ ເພື່ອລະດົມບັນດາແຫຼ່ງກຳລັງ, ເສີມຂະຫຍາຍນ້ຳໃຈຮັກຊາດ, ຄວາມເອກອ້າງທະນົງໃຈຂອງຊາດ ແລະຄວາມປະດິດສ້າງຂອງບັນດາຊົນຊັ້ນສັງຄົມ, ອົງການ ແລະບຸກຄົນ ໃນພາລະກິດການສ້າງສາ ແລະປົກປັກຮັກສາປະເທດຊາດສັງຄົມນິຍົມ. ດ້ວຍຈິດໃຈສາມັກຄີ ແລະ ຄວາມຕັດສິນໃຈສູງຂອງກອງປະຊຸມໃຫຍ່, ພວກເຮົາເຊື່ອໝັ້ນຢ່າງເລິກເຊິ່ງວ່າ ແນວໂຮມປະເທດຊາດຫວຽດນາມ ທຸກຂັ້ນຈະສືບຕໍ່ມີການປ່ຽນແປງໃໝ່, ເປັນເຈົ້າການ, ມີຫົວຄິດປະດິດສ້າງ, ເຕົ້າໂຮມປະຊາຊົນຈຳນວນຫຼາຍຈາກທຸກສາຂາອາຊີບໃຫ້ສາມັກຄີກັນເປັນໜຶ່ງ, ເສີມຂະຫຍາຍມູນເຊື້ອຮັກຊາດ, ຄວາມກ້າຫານ ແລະ ກຳລັງແຮງຂອງຊາວຫວຽດນາມທີ່ຈະຕັດສິນໃຈຜ່ານຜ່າຄວາມຫຍຸ້ງຍາກ ແລະສິ່ງທ້າທາຍທັງໝົດ, ຍາດແຍ່ງກາລະໂອກາດ, ໂຊກລາບໃໝ່, ເປັນເຈົ້າຕົນເອງ, ຄວາມພູມໃຈ, ຄວາມໝັ້ນໃຈທີ່ຈະກ້າວເຂົ້າສູ່ຍຸກໃໝ່ - ຍຸກແຫ່ງການບືນຕົວຂຶ້ນຢ່າງແຂງແຮງຂອງຊາດຫວຽດນາມ; ທຸກສິ່ງທຸກຢ່າງເພື່ອເປົ້າໝາຍ "ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸດຕິທຳ ແລະ ອາລະຍະທຳ”.
ສາມັກຄີ, ສາມັກຄີ ແລະ ມະຫາສາມັກຄີ.
ຄວາມສໍາເລັດ, ຄວາມສໍາເລັດ, ຄວາມສໍາເລັດອັນຍິ່ງໃຫຍ່.
ຂໍອວຍພອນໃຫ້ບັນດາຜູ້ແທນທຸກຄົນມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດ.
ຂໍອວຍພອນໃຫ້ກອງປະຊຸມໃຫຍ່ປະສົບຜົນສຳເລັດອັນດີງາມ.
ຂອບໃຈຫຼາຍໆ!
---------------------
* ຫົວຂໍ້ໂດຍວາລະສານກອມມູນິດ
(1) ລັດຖະທຳມະນູນປີ 2013 ກຳນົດ: “ແນວໂຮມປະເທດຊາດຫວຽດນາມແມ່ນອົງການພັນທະມິດທາງການເມືອງ ເຊິ່ງເປັນພັນທະພາບອາສາສະໝັກຂອງບັນດາອົງການທາງການເມືອງ, ອົງການທາງການເມືອງ-ສັງຄົມ, ອົງການຈັດຕັ້ງສັງຄົມ ແລະ ບຸກຄົນທີ່ຕາງໜ້າໃຫ້ບັນດາຊົນຊັ້ນສັງຄົມ, ຊັ້ນຄົນ, ຊົນເຜົ່າ, ສາສະໜາ ແລະ ຊາວຫວຽດນາມທີ່ອາໄສຢູ່ຕ່າງປະເທດ. ແນວໂຮມປະເທດຊາດຫວຽດນາມແມ່ນພື້ນຖານທາງການເມືອງຂອງອຳນາດການປົກຄອງປະຊາຊົນ; ເປັນຕົວແທນ, ຜູ້ປົກປ້ອງສິດແລະຜົນປະໂຫຍດທີ່ຊອບທຳ ຖືກກົດໝາຍຂອງປະຊາຊົນ; ເຕົ້າໂຮມແລະເສີມຂະຫຍາຍກຳລັງແຮງແຫ່ງຄວາມສາມັກຄີປວງຊົນທັງຊາດທີ່ຍິ່ງໃຫຍ່, ປະຕິບັດປະຊາທິປະໄຕ ແລະເພີ່ມທະວີຄວາມເຫັນດີເຫັນພ້ອມທາງສັງຄົມ; ຕິດຕາມກວດກາ ແລະວິພາກວິຈານສັງຄົມ; ເຂົ້າຮ່ວມການກໍ່ສ້າງພັກ ແລະ ລັດ, ເຂົ້າຮ່ວມກິດຈະກຳການຕ່າງປະເທດປະຊາຊົນ ເພື່ອປະກອບສ່ວນການສ້າງສາແລະປົກປັກຮັກສາປະເທດຊາດ.
