ເຈັດສິບຫ້າປີຂອງສະຫະປະຊາຊາດ ແລະ ການເຂົ້າຮ່ວມ,
ການປະກອບສ່ວນຂອງຫວຽດນາມ
ການປະກອບສ່ວນຂອງຫວຽດນາມ
ວກ. - ປີ 2020 ສະເຫຼີມສະຫຼອງການສ້າງຕັ້ງສະຫະປະຊາຊາດຄົບຮອບ 75 ປີ (24 ຕຸລາ 1945 – 24 ຕຸລາ 2020), ພ້ອມກັນນັ້ນ, ກໍ່ແມ່ນໂອກາດທີ່ຫວຽດນາມສະເຫຼີມສະຫຼອງ 75 ປີແຫ່ງວັນຊາດ (2 ກັນຍາ 1945 – 2 ກັນຍາ 2020). ໃນໄລຍະເວລາສາມສ່ວນສີ່ຂອງສະຕະວັດທີ່ຜ່ານມາ, ຍາມໃດຫວຽດນາມກໍ່ພ້ອມກັບສະຫະປະຊາຊາດຊຸກຍູ້ບັນດາເປົ້າໝາຍລວມ ເພື່ອສັນຕິພາບ, ການຮ່ວມມື, ຄວາມຈະເລີນຮຸ່ງເຮືອງ, ຄວາມກ້າວໜ້າທາງສັງຄົມ ແລະ ສອງຝ່າຍພວມພ້ອມກັນມຸ່ງໄປສູ່ອະນາຄົດຂອງຄູ່ຮ່ວມມື ເພື່ອສັນຕິພາບ ແລະ ການພັດທະນາແບບຍືນຍົງ.
ສະຫະປະຊາຊາດ: 75 ປີແຫ່ງການປະກອບສ່ວນເພື່ອສັນຕິພາບ ແລະການພັດທະນາ
ກ່ອນໜ້ານີ້ 75 ປີ, ສົງຄາມໂລກຄັ້ງທີສອງສິ້ນສຸດລົງ ແຕ່ໄດ້ເຮັດໃຫ້ມີຜູ້ເສຍຊີວິດບາດເຈັບແລະສູນເສຍເປັນຈຳນວນຫຼາຍທີ່ບໍ່ເຄີຍມີມາກ່ອນ ໃນປະຫວັດສາດຂອງມະນຸດ. ຈາກກອງຂີ້ເຖົ່າຂອງສົງຄາມໂລກຄັ້ງທີສອງ, ວັນທີ ຕຸລາ 1945, ອົງການສະຫະປະຊາຊາດກຳເນີດຂຶ້ນ ດ້ວຍຄວາມຕັດສິນໃຈ “ປ້ອງກັນໄພພິບັດຂອງສົງຄາມ ສຳລັບຄົນລຸ້ນຕໍ່ໄປ”. ຖອດຖອນບົດຮຽນຈາກຄວາມລົ້ມເຫຼວຂອງສະຫະພັນບັນດາປະເທດ(1) ຍ້ອນຂາດການມີສ່ວນຮ່ວມຢ່າງເຕັມທີຂອງປະເທດຕ່າງໆ, ໂດຍສະເພາະບັນດາປະເທດໃຫຍ່ ແລະຍັງຄົງຍອມຮັບວ່າ ສົງຄາມແມ່ນເຄື່ອງມືໃນການແກ້ໄຂຂໍ້ຂັດແຍ່ງລະຫວ່າງປະເທດ, ອົງການສະຫະປະຊາຊາດໄດ້ຮັບການສ້າງຕັ້ງຂຶ້ນ ເພື່ອຮັກສາສັນຕິພາບ ແລະຄວາມໝັ້ນຄົງສາກົນ ຜ່ານການປ້ອງກັນແລະກຳຈັດໄພຂົ່ມຂູ່ຕໍ່ສັນຕິພາບແລະຄວາມໝັ້ນຄົງສາກົນ, ການກະທຳທີ່ເປັນການຮຸກຮານ; ສົ່ງເສີມການພົວພັນຮ່ວມມື ມິດຕະພາບລະຫວ່າງປະເທດ ເພື່ອແກ້ໄຂບັນດາບັນຫາສາກົນກ່ຽວກັບເສດຖະກິດ, ສັງຄົມ, ວັດທະນະທຳ ຫຼືມະນຸດສະທຳ. ສະຫະປະຊາຊາດຄາດວ່າ ຈະເປັນສູນກາງໃນການປະສານງານການກະທຳສາກົນ ເພື່ອບັນລຸເປົ້າໝາຍລວມເຫຼົ່ານີ້.
ກົດບັດສະຫະປະຊາຊາດກຳນົດຫຼັກການພື້ນຖານ ໃນການພົວພັນລະຫວ່າງບັນດາປະເທດສະມາຊິກຂອງສະຫະປະຊາຊາດ, ນັ້ນແມ່ນບັນດາຫຼັກການກ່ຽວກັບຄວາມສະເໝີພາບອະທິປະໄຕຂອງປະເທດຕ່າງໆ, ມີເຈດຕະນາດີໃນການປະຕິບັດບັນດາຄຳໝັ້ນສັນຍາສາກົນ, ແກ້ໄຂຂໍ້ຂັດແຍ່ງສາກົນດ້ວຍມາດຕະການສັນຕິພາບ, ການຮ່ວມມື, ສະໜັບສະໜູນເຊິ່ງກັນແລະກັນ ແລະ ກັບສະຫະປະຊາຊາດ ສອດຄ່ອງກັບກົດບັດສະຫະປະຊາຊາດ, ແລະສຳຄັນກວ່ານັ້ນແມ່ນ, ເປັນຄັ້ງທຳອິດທີ່ການຂົ່ມຂູ່ຫຼືການໃຊ້ກຳລັງທະຫານຕໍ່ຕ້ານຄວາມໝັ້ນຄົງທາງເຂດແດນ, ຄວາມເປັນເອກະລາດທາງການເມືອງຂອງປະຊາຊາດຕ່າງໆ, ການຂົ່ມຂູ່ຕໍ່ສັນຕິພາບແລະຄວາມໝັ້ນຄົງສາກົນ ແມ່ນຖືກຫ້າມໃນການພົວພັນສາກົນ. ຫຼັກການເຫຼົ່ານີ້ເປັນພື້ນຖານຂອງກົດໝາຍສາກົນທີ່ທັນສະໄໝ, ແມ່ນຂອບການຄຸ້ມຄອງພຶດຕິກຳຂອງລັດ ໃນທຸກດ້ານຂອງການພົວພັນສາກົນໃນຕະຫຼອດ 75 ປີທີ່ຜ່ານມາ.
ອົງການສະຫະປະຊາຊາດດຳເນີນການພາຍໃຕ້ກົນໄກ "ໜຶ່ງປະເທດ, ໜຶ່ງຄະແນນສຽງ”, ໝາຍຄວາມວ່າ ແຕ່ລະປະເທດມີສຽງເທົ່າທຽມກັນ ແລະມີສາລະສຳຄັນໃນການຕັດສິນຕົກລົງ ແລະນະໂຍບາຍຂອງສະຫະປະຊາຊາດ, ໂດຍບໍ່ສົນເລື່ອງສະຖານທີ່ທາງພູມສາດ, ສະຖາບັນທາງການເມືອງ, ລະດັບການພັດທະນາ. ສະຫະປະຊາຊາດມີ 6 ອົງການໃຫຍ່ ທີ່ມີພາລະບົດບາດແລະໜ້າທີ່ທີ່ແຕກຕ່າງກັນ ເພື່ອສົ່ງເສີມຈຸດປະສົງສະເພາະ. ໃນນັ້ນ, ສະມັດຊາໃຫຍ່ແຫ່ງສະຫະປະຊາຊາດ ແມ່ນອົງການທີ່ມີການເຂົ້າຮ່ວມຂອງບັນດາປະເທດສະມາຊິກທັງໝົດຂອງສະຫະປະຊາຊາດ, ມີອຳນາດໃນການຕັດສິນຕົກລົງກ່ຽວກັບໂຄງສ້າງແລະການຈັດຕັ້ງ ຂອງອົງການສະຫະປະຊາຊາດ ແລະ ໃຫ້ຄຳແນະນຳໃນທຸກໆບັນຫາທີ່ໄດ້ກຳນົດໄວ້ໃນກົດບັດ. ສະພາຄວາມໝັ້ນຄົງແຫ່ງສະຫະປະຊາຊາດ ແມ່ນອົງການນຳທີ່ຮັບຜິດຊອບໃນການຮັກສາສັນຕິພາບ ແລະຄວາມໝັ້ນຄົງສາກົນ, ມີສິດອຳນາດໃນການຕັດສິນຂໍ້ບັງຄັບສຳລັບປະເທດສະມາຊິກ ເພື່ອຈັດການກັບໄພຂົ່ມຂູ່ຈາກການຮຸກຮານ, ການທຳລາຍສັນຕິພາບ. ສະພາເສດຖະກິດແລະສັງຄົມແຫ່ງສະຫະປະຊາຊາດ ແມ່ນອົງການຫຼັກໃນການສ້າງນະໂຍບາຍ, ປະສານສົມທົບຄວາມພະຍາຍາມຂອງສາກົນ ເພື່ອສົ່ງເສີມການຈັດຕັ້ງປະຕິບັດຄຳໝັ້ນສັນຍາສາກົນກ່ຽວກັບການພັດທະນາ, ແກ້ໄຂບັນດາບັນຫາສາກົນກ່ຽວກັບເສດຖະກິດ, ສັງຄົມ, ວັດທະນະທຳ, ການສຶກສາ, ສາທາລະນະສຸດ, ມະນຸດສະທຳ. ສານຍຸດຕິທຳສາກົນແມ່ນອົງການຍຸດຕິທຳຫຼັກຂອງສະຫະປະຊາຊາດ, ມີພາລະບົດບາດແກ້ໄຂຂໍ້ຂັດແຍ່ງລະຫວ່າງປະເທດໂດຍສັນຕິວິທີ, ພ້ອມກັນນັ້ນ ສາມາດໃຫ້ຄຳແນະນຳກ່ຽວກັບເລື່ອງກົດໝາຍຕາມການຮ້ອງຂໍຂອງອົງການອື່ນໆຂອງສະຫະປະຊາຊາດ. ສະພາຄວບຄຸມເຂດມອບໝາຍແຫ່ງສະຫະປະຊາຊາດ (United Nations Trusteeship Council) ມີໜ້າທີ່ຄວບຄຸມເຂດແດນທີ່ໄດ້ຮັບມອບໝາຍ(2) ແລະອົງການນີ້ໄດ້ຢຸດເຊົາການເຮັດວຽກ ໃນປີ 1994 ເມື່ອອານາເຂດແຫ່ງການມອບໝາຍໄດ້ກາຍເປັນປະເທດເອກະລາດໃນທີ່ສຸດ (Palau). ສຳນັກເລຂາທິການແຫ່ງສະຫະປະຊາຊາດ ນຳໂດຍເລຂາທິການສະຫະປະຊາຊາດ ແມ່ນໜ່ວຍງານທີ່ສະໜັບສະໜູນກິດຈະກຳຂອງໜ່ວຍງານອື່ນໆຂອງສະຫະປະຊາຊາດ, ໃນຄວາມເປັນຈິງ, ມັນດຳເນີນການຄົ້ນຄວ້າແລະໃຫ້ຄຳແນະນຳດ້ານນະໂຍບາຍແກ່ອົງການສະຫະປະຊາຊາດ ເພື່ອແກ້ໄຂບັນຫາຕ່າງໆພາຍໃນພາລະບົດບາດແລະໜ້າທີ່ຂອງຕົນ. ນອກຈາກນັ້ນ, ສະຫະປະຊາຊາດຍັງມີລະບົບກອງທຶນ, ໂຄງການພັດທະນາອີກ 20 ໜ່ວຍງານພິເສດ, 5 ຄະນະກຳມະການເສດຖະກິດ - ສັງຄົມ ທີ່ຕັ້ງຢູ່ພາກພື້ນຕ່າງໆຂອງໂລກ ພ້ອມກັບໜ່ວຍງານຊ່ວຍເຫຼືອອື່ນໆ.
ຄວາມເປັນຈິງທາງປະຫວັດສາດສະແດງໃຫ້ເຫັນວ່າ ເພື່ອໃຫ້ສະຫະປະຊາຊາດປະຕິບັດພາລະກິດຂອງຕົນຢ່າງສຳເລັດຜົນ, ປັດໄຈຕັດສິນຊີ້ຂາດແມ່ນເຈດຈຳນົງ, ນະໂຍບາຍຂອງແຕ່ລະປະເທດສະມາຊິກ, ໂດຍບໍ່ຄຳນຶງເຖິງລະດັບການພັດທະນາ ແລະຄວາມພະຍາຍາມຢ່າງບໍ່ອິດເມື່ອຍຂອງບັນດາປະຊາຊາດ, ຄວາມປາດຖະໜາອັນແຮງກ້າຂອງປະຊາຊົນທີ່ໄດ້ມີຊີວິດໃນສັນຕິພາບ, ການພັດທະນຢ່າງຍືນຍົງ ແລະສົ່ງເສີມການພົວພັນສາກົນທີ່ມີຄວາມສະເໝີພາບຫຼາຍຂຶ້ນ. ດ້ວຍຄວາມກວມລວມແລະຄວາມເປັນສາກົນສູງ ແລະເຈດຈຳນົງ, ຄວາມຕັດສິນໃຈຂອງບັນດາປະເທດສະມາຊິກ ໃນການຈັດຕັ້ງປະຕິບັດອຸດົມຄະຕິແລະຈຸດປະສົງທີ່ກຳນົດໄວ້ໃນກົດບັດຂອງສະຫະປະຊາຊາດ, ອົງການສະຫະປະຊາຊາດໄດ້ປະສົບຜົນສຳເລັດຫຼາຍຢ່າງ ໃນການຮັກສາສັນຕິພາບ, ສະຖຽນລະພາບ, ຊຸກຍູ້ການພັດທະນາແລະຄວາມກ້າວໜ້າທົ່ວໂລກໃນຕະຫຼອດ 75 ປະທີ່ຜ່ານມາ.
ກ່ຽວກັບສັນຕິພາບແລະຄວາມໝັ້ນຄົງ, ອົງການສະຫະປະຊາຊາດໄດ້ປະກອບສ່ວນທີ່ມີປະສິດທິຜົນ ເຂົ້າໃນການປ້ອງກັນສົງຄາມໂລກຄັ້ງໃໝ່ ຫຼືປ້ອງກັນບໍ່ໃຫ້ເກີດສົງຄາມທີ່ທຳລາຍລ້າງມະນຸດຊາດ; ກໍ່ສ້າງຫຼາຍຂອບ, ກົນໄກສາກົນທີ່ສຳຄັນ ກ່ຽວກັບການຫຼຸດອາວຸດ, ການຕ້ານການແຜ່ຂະຫຍາຍອາວຸດທີ່ມີອານຸພາບທຳລາຍລ້າງສູງ, ຈັດການກັບສິ່ງທ້າທາຍດ້ານຄວາມປອດໄພທີ່ບໍ່ເປັນແບບດັ້ງເດີມເຊັ່ນ ການກໍ່ການຮ້າຍ, ຄວາມປອດໄພເຄືອຂ່າຍ...; ຖືບົດບາດເປັນມືກາງ, ຜູ້ໄກ່ເກ່ຍ, ບັນເທົາຄວາມເຄັ່ງຕຶງ, ສະໜັບສະໜູນການແກ້ໄຂຂໍ້ຂັດແຍ່ງ ແລະສ້າງສາຄືນໃໝ່ຫຼັງຄວາມຂັດແຍ່ງ,ໂດຍສະເພາະຢ່າງຍິ່ງການຜັນຂະຫຍາຍກຳລັງຮັກສາສັນຕິພາບ (PKO)(3); ສົ່ງເສີມຂະບວນການປົດປ່ອຍອານານິຄົມ, ປົກປ້ອງບັນດາຫຼັກການເອກະລາດແຫ່ງຊາດ, ການຕັດສິນຕົກລົງດ້ວຍຕົນເອງ ແລະການຕໍ່ຕ້ານການລ່າເມືອງຂຶ້ນ. ການເຄື່ອນໄຫວຮັກສາສັນຕິພາບຂອງສະຫະປະຊາຊາດມີບົດບາດສຳຄັນ ໃນການຟື້ນຟູສັນຕິພາບ, ຢຸດຕິຄວາມຂັດແຍ່ງ ແລະສະໜັບສະໜູນການສ້າງໃໝ່ ໃນຫຼາຍພາກພື້ນແລະປະເທດທົ່ວໂລກ. ເພື່ອຮັບຮູ້ການປະກອບສ່ວນອັນໃຫຍ່ຫຼວງຂອງສະຫະປະຊາຊາດ ຕໍ່ສັນຕິພາບສາກົນ, ຄະນະກຳມະການໂນແບນມອບລາງວັນໂນແບນສາຂາສັນຕິພາບ ໃຫ້ກຳລັງຮັກສາສັນຕິພາບແຫ່ງສະຫະປະຊາຊາດ (ປີ 1988) ແລະເລຂາທິການສະຫະປະຊາຊາດ ໂກຟີ ອານັນ (ປີ 2001).
ໃນຂົງເຂດການພັດທະນາ, ແຕ່ປີ 1960, ສະມັດຊາໃຫຍ່ສະຫະປະຊາຊາດ ໄດ້ສະເໜີຍຸດທະສາດການພັດທະນາຢ່າງຕໍ່ເນື່ອງໃນແຕ່ລະທົດສະວັດເພື່ອລະດົມຄວາມຮ່ວມມືສາກົນ ເພື່ອເປົ້າໝາຍການພັດທາຮ່ວມກັນ, ໂດຍສະເພາະຢ່າງຍິ່ງໃນປະເທດກຳລັງພັດທະນາ. ເສີມຂະຫຍາຍຂໍ້ໄດ້ປຽບກ່ຽວກັບບົດຮຽນດ້ານວິຊາສະເພາະ ແລະການມີໜ້າຢູ່ໃນທົ່ວໂລກ, ບັນດາອົງການຈັດຕັ້ງໃນລະບົບການພັດທະນາຂອງສະຫະປະຊາຊາດເຊັ່ນ ໂຄງການພັດທະນາຂອງສະຫະປະຊາຊາດ (UNDP), ກອງທຶນເພື່ອເດັກແຫ່ງສະຫະປະຊາຊາດ (UNICEF), ອົງການອະນາໄມໂລກ (WHO)...ໄດ້ສະໜັບສະໜູນໂດຍກົງທາງດ້ານທຶນ, ການລົງທຶນ ແລະ ບົດຮຽນແຫ່ງການປ່ຽນແປງໃໝ່ປະດິດສ້າງ ໃຫ້ແກ່ຄວາມພະຍາຍາມໃນການພັດທະນາເສດຖະກິດ, ສັງຄົມ, ວັດທະນະທຳ, ການສຶກສາ ແລະສາທາລະນະສຸກໃນທົ່ວໂລກ. ອົງການສະຫະປະຊາຊາດຍັງແມ່ນເວທີແລກປ່ຽນຄວາມເຫັນ ກ່ຽວກັບບັນດາບັນຫາທີ່ສຳຄັນທາງດ້ານເສດຖະກິດ, ການພັດທະນາ ແລະຄວາມສະເໝີພາບ ໃນຊີວິດສາກົນ, ຜ່ານນັ້ນສ້າງເປັນຄຸນຄ່າທົ່ວໄປທາງດ້ານແນວຄິດ ແລະການຮ່ວມມືພັດທະນາເສດຖະກິດ-ສັງຄົມ, ກຳນົດບັນດາເປົ້າໝາຍລວມ ເພື່ອຜົນປະໂຫຍດຂອງປະຊາຊົນໂລກ, ໃນນັ້ນພົ້ນເດັ່ນແມ່ນ ບັນດາເປົ້າໝາຍການພັດທະນາສະຫັດສະວັດ (MDGs) ແລະບັນດາເປົ້າໝາຍການພັດທະນາແບບຍືນຍົງ (SDGs) ພ້ອມດ້ວຍຫຼາຍກອບນະໂຍບາຍທີ່ແທດຈິງອື່ນໆ.
ອົງການສະຫະປະຊາຊາດກໍ່ແມ່ນສະຖານທີ່ເຈລະຈາແລະພັດທະນາ ບັນດາເອກະສານແລະສົນທິສັນຍາສາກົນທີ່ສຳຄັນ ກ່ຽວກັບສິດທິມະນຸດເຊັ່ນ ຖະແຫຼງການສາກົນວ່າດ້ວຍສິດທິມະນຸດ (ປີ 1948), ສົນທິສັນຍາສາກົນວ່າດ້ວຍສິດທິທາງເສດຖະກິດ, ສັງຄົມ ແລະວັດທະນະທຳ (ປີ 1966) ແລະສົນທິສັນຍາສາກົນວ່າດ້ວຍສິດທິພົນລະເມືອງແລະການເມືອງ (ປີ 1966), ເປັນພື້ນຖານໃຫ້ແກ່ສົນທິສັນຍາ, ຖະແຫຼງການສາກົນຫຼາຍກວ່າ 80 ສະບັບ ທີ່ໄດ້ຮັບການຮັບຮອງໃນຕໍ່ມາ ເພື່ອເພີ່ມທະວີການຮ່ວມມືກັບສາກົນ ໃນການປົກປ້ອງແລະສົ່ງເສີມສິດທິມະນຸດ. ອົງການສະຫະປະຊາຊາດໃຫ້ຄວາມສຳຄັນກັບການຮັບປະກັນການປະຕິບັດສິດທິມະນຸດ ໂດຍຜ່ານບັນດາກົນໄກ, ອົງການເຊັ່ນ ສະພາສິດທິມະນຸດແຫ່ງສະຫະປະຊາຊາດ, ຂ້າຫຼວງໃຫຍ່ສິດທິມະນຸດແຫ່ງສະຫະປະຊາຊາດ.
ສະຫຼຸບແລ້ງອາດຈະເວົ້າວ່າ, ປະຫວັດສາດໄດ້ທ້າທາຍແລະຢືນຢັນບົດບາດສຳຄັນຂອງສະຫະປະຊາຊາດ ໃນຖານະເປັນພື້ນຖານທີ່ຂາດບໍ່ໄດ້ ສຳລັບໂລກທີ່ສະຫງົບສຸກ, ຈະເລີນຮຸ່ງເຮືອງ, ມີຄວາມຍຸດຕິທຳ ແລະ ຍືນຍົງ. ຈາກຈຳນວນ 51 ປະເທດສະມາຊິກເມື່ອກໍ່ຕັ້ງໃນປີ 1945, ປະຈຸບັນສະຫະປະຊາຊາດມີ 193 ປະເທດສະມາຊິກ, ກາຍເປັນກົນໄກພະຫຸພາຄີທີ່ໃຫຍ່ທີ່ສຸດ, ຮອບດ້ານທີ່ສຸດ ແລະມີການເຄື່ອນໄຫວກວ້າງທີ່ສຸດ; ກົງຈັກການເຄື່ອນໄຫວຂອງສະຫະປະຊາຊາດໄດ້ຮັບການປັບປຸງເທື່ອລະກ້າວ ເພື່ອຕອບສະໜອງຄວາມຕ້ອງການຂອງວຽກງານທີ່ມີຄວາມຫຼາກຫຼາຍ ແລະນັບມື້ນັບສັບສົນ.
ຫວຽດນາມ - ສະມາຊິກທີ່ຕັ້ງໜ້າແລະມີຄວາມຮັບຜິດຊອບ ຂອງສະຫະປະຊາຊາດ
ໂດຍຮູ້ແຈ້ງເຖິງຄວາມສຳຄັນຂອງອົງການສະຫະປະຊາຊາດ, ບໍ່ດົນຫຼັງຈາກການກຳເນີດຂອງສາທາລະນະລັດປະຊາທິປະໄຕຫວຽດນາມ ແລະການສ້າງຕັ້ງສະຫະປະຊາຊາດ, ຕົ້ນປີ 1946, ປະທານໂຮ່ຈີມິນໄດ້ສົ່ງຈົດໝາຍເຖິງປະທານສະມັດຊາໃຫຍ່ແຫ່ງສະຫະປະຊາຊາດ ແລະຫຼາຍປະເທດສະມາຊິກ ເພື່ອຂໍໃຫ້ຫວຽດນາມເຂົ້າເປັນສະມາຊິກຂອງສະຫະປະຊາຊາດ. ຜ່ານຫຼາຍເຫດການປະຫວັດສາດ, ວັນທີ 20 ກັນຍາ 1977, ຫວຽດນາມເຂົ້າເປັນສະມາຊິກສະຫະປະຊາຊາດຢ່າງເປັນທາງການ. ການຕໍ່ສູ້ຢ່າງບໍ່ຢຸດຢັ້ງຂອງຫວຽດນາມ ໃນການປົກປ້ອງເອກະລາດແຫ່ງຊາດ, ເສລີພາບ ແລະການທ້ອນໂຮມປະເທດຊາດເຂົ້າເປັນອັນໜຶ່ງອັນດຽວ ໄດ້ປະກອບສ່ວນຢ່າງຕັ້ງໜ້າ ແລະສຳຄັນ ເຂົ້າໃນການປະຕິບັດບັນດາເປົ້າໝາຍອັນສູງສົ່ງຂອງສະຫະປະຊາຊາດຄື ສັນຕິພາບ, ເອກະລາດ, ຄວາມສະເໝີພາບລະຫວ່າງປະເທດຕ່າງໆ ແລະສິດແຫ່ງຊາດໃນການຕັດສິນດ້ວຍຕົນເອງ, ເຊິ່ງໄດ້ປະກອບສ່ວນເຮັດໃຫ້ລັດທິລ່າເມືອງຂຶ້ນສິ້ນສຸດລົງໃນທົດສະວັດທີ 60 ຂອງສະຕະວັດທີ 20.
ໃນໄລຍະເວລາ 40 ປີແຫ່ງການເປັນສະມາຊິກຂອງອົງການສະຫະປະຊາຊາດ, ຫວຽດນາມຍາມໃດກໍ່ຖືເປັນສຳຄັນເຖິງ ການພົວພັນຮ່ວມມືຮອບດ້ານ ແລະມີປະສິດທິຜົນ ລະຫວ່າງຫວຽດນາມແລະສະຫະປະຊາຊາດ. ການສະໜັບສະໜູນຂອງສະຫະປະຊາຊາດຕໍ່ຫວຽດນາມ ມີຄວາມໝາຍແທດຈິງຫຼາຍຢ່າງ. ທັນທີຫຼັງຈາກທີ່ຫວຽດນາມເຂົ້າຮ່ວມສະຫະປະຊາຊາດ ແລະໃນສະພາບການຂອງປະເທດທີ່ຖືກເສຍຫາຍຢ່າງໜັກໜ່ວງຈາກສົງຄາມ ລວມທັງຖືກປິດລ້ອມເສດຖະກິດແລະຫ້າມສົ່ງສິນຄ້າ, ບົນພື້ນຖານມະຕິເລກທີ 32/3 (ປີ 1977) ຂອງສະມັດຊາໃຫຍ່ແຫ່ງສະຫະປະຊາຊາດ ທີ່ສົ່ງເສີມໂດຍຫວຽດນາມ, ບັນດາອົງການສະເພາະກິດພາຍໃຕ້ລະບົບການພັດທະນາຂອງອົງການສະຫະປະຊາຊາດ ໄດ້ສະໜັບສະໜູນຫວຽດນາມ ດ້ວຍເຄື່ອງຂອງຈຳເປັນໃນຊີວິດປະຈຳວັນ, ແກ້ໄຂຜົນຮ້າຍສົງຄາມແລະສິ່ງທ້າທາຍດ້ານເສດຖະກິດ - ສັງຄົມ ແລະສ້າງສາປະເທດຊາດຄືນໃໝ່. ໃນໄລຍະຕໍ່ມາ ແລະໂດຍສະເພາະໃນຂະບວນການປ່ຽນແປງໃໝ່ຂອງຫວຽດນາມ, ບັນດາອົງການຈັດຕັ້ງເຫຼົ່ານີ້ ໄດ້ສືບຕໍ່ສະໜັບສະໜູນຫວຽດນາມ ໃນການຍົກສູງລະດັບເຕັກໂນໂລຢີການຜະລິດ, ພັດທະນາບຸກຄະລາກອນວິທະຍາສາດ - ເຕັກນິກ, ພັດທະນາໂຄງສ້າງພື້ນຖານ; ເຊື່ອມຕໍ່ຫວຽດນາມກັບບັນດາເວທີປາໄສພາກພື້ນ, ສາກົນ ແລະກັບປະເທດອື່ນໆ ເພື່ອແລກປ່ຽນບົດຮຽນປະສົບການ, ຖ່າຍທອດເຕັກໂນໂລຊີໃນດ້ານຕ່າງໆ, ຍົກສູງຄວາມສາມາດ; ປະກອບສ່ວນປັບປຸງບູລະນະຂອບກົດໝາຍແລະນະໂຍບາຍ; ຍູ້ແຮງການຫັນເປັນອຸດສະຫະກຳ ທັນສະໄໝ ແລະເຊື່ອມໂຍງສາກົນ, ປະຕິບັດບັນດາເປົ້າໝາຍການພັດທະນາທົ່ວໂລກ. ສຳລັບຫວຽດນາມ, ຫວຽດນາມໄດ້ເຂົ້າຮ່ວມໃນກິດຈະກຳຂອງສະຫະປະຊາຊາດຫຼາຍຂຶ້ນເລື່ອຍໆ ແລະມີການປະກອບສ່ວນທີ່ສຳຄັນເຂົ້າໃນ 3 ເສົາຫຼັກ ຂອງອົງການສະຫະປະຊາຊາດຄື ສັນຕິພາບ-ຄວາມໝັ້ນຄົງ, ການຮ່ວມມື, ການພັດທະນາ ແລະສິດທິມະນຸດ.
ໃນຂົງເຂດສັນຕິພາບແລະຄວາມໝັ້ນຄົງ, ຫວຽດນາມໄດ້ປະກອບສ່ວນຢ່າງຕັ້ງ ໜ້າໃນການຍົກສູງບົດບາດຂອງສະຫະປະຊາຊາດ ແລະທ່າອ່ຽງຂອງລັດທິພະຫຸພາຄີ, ສົ່ງເສີມການເຄົາລົບກົດບັດສະຫະປະຊາຊາດ, ກົດໝາຍສາກົນ, ຄວາມສະເໝີພາບແລະການຮ່ວມມືດ້ານການພັດທະນາລະຫວ່າງບັນດາປະເທດ ແລະ ສິດຕັດສິນດ້ວຍຕົນເອງຂອງຊາດ, ການເຂົ້າຮ່ວມໃນການແກ້ໄຂຂໍ້ຂັດແຍ້ງໂດຍສັນຕິວິທີ, ຄັດຄ້ານການກົດຂີ່ ການຮຸກຮານ ການຫ້າມສົ່ງສິນຄ້າຝ່າຍດຽວໃນການພົວພັນສາກົນ; ປະຕິບັດພັນທະຂອງຕົນຢ່າງຈິງຈັງ ຕາມສົນທິສັນຍາສາກົນວ່າດ້ວຍການຫຼຸດອາວຸດ, ການບໍ່ແຜ່ຂະຫຍາຍອາວຸດທີ່ມີອານຸພາບທຳລາຍລ້າງສູງ ແລະບັນດາມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ. ແຕ່ປີ 2014, ຫວຽດນາມເລີ່ມເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ ແລະ ສົ່ງນາຍທະຫານໄປປະຕິບັດພາລະກິດໃນພື້ນທີ່ຫ່າງໄກເຊັ່ນ ພາລະກິກຮັກສາສັນຕິພາບແຫ່ງສະຫະປະຊາຊາດໃນຊູດານໃຕ້ ແລະສາທາລະນະລັດອາຟຣິກກາກາງ.
ຄັ້ງທີສອງດຳລົງຕຳແໜ່ງສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດສຳລັບວາລະປີ 2020 - 2021(4) ດ້ວຍຄວາມເຊື່ອໝັ້ນທີ່ເກືອບຈະສົມບູນຂອງສະມາຊິກສ່ວນໃຫຍ່ຂອງສະຫະປະຊາຊາດ (192/193 ສຽງສະໜັບສະໜູນ), ປີ 2020, ຫວຽດນາມໄດ້ສຳເລັດໜ້າທີ່ເປັນຢ່າງດີ. ຫວຽດນາມໄດ້ຊຸກຍູ້ຄວາມຄິດລິເລີ່ມກ່ຽວກັບການປະຕິບັດຕາມ ແລະສົ່ງເສີມກົດບັດສະຫະປະຊາຊາດ, ເພີ່ມທະວີການຮ່ວມມືລະຫວ່າງອົງການສະຫະປະຊາຊາດ ກັບສະມາຄົມບັນດາປະເທດອາຊີຕາເວັນອອກສຽງໃຕ້ (ອາຊຽນ) ໃນຖານະປະທານສະພາຄວາມໝັ້ນຄົງໃນເດືອນມັງກອນ 2020 ແລະໄດ້ຮັບການສະໜັບສະໜູນຢ່າງກວ້າງຂວາງຈາກບັນດາປະເທດສະມາຊິກຂອງອົງການສະຫະປະຊາຊາດ; ເປັນເຈົ້າການແລະຕັ້ງໜ້າເຂົ້າຮ່ວມໃນວຽກງານລວມຂອງສະພາຄວາມໝັ້ນຄົງ, ຊຸກຍູ້ການສົນທະນາ, ບັນເທົາຄວາມເຄັ່ງຕຶງແລະຫຼຸດຜ່ອນການປະເຊີນໜ້າກັນ, ຊອກຫາວິທີແກ້ໄຂທີ່ຍຸດຕິທຳແລະສົມເຫດສົມຜົນເພື່ອແກ້ໄຂບັນຫາສັນຕິພາບແລະຄວາມໝັ້ນຄົງລະດັບພາກພື້ນແລະສາກົນ; ສົ່ງເສີມຄວາມພະຍາຍາມແລະບົດຮຽນຂອງຫວຽດນາມໃນຂະບວນການຟື້ນຟູແລະພັດທະນາປະເທດ, ເຊື່ອມໂຍງສາກົນແລະພາກພື້ນ, ຜ່ານນັ້ນປະກອບສ່ວນສ້າງສະພາບແວດລ້ອມສາກົນ ທີ່ອຳນວຍຄວາມສະດວກ ໃຫ້ແກ່ພາລະກິດການປ່ຽນແປງໃໝ່ ແລະພັດທະນາປະເທດຫວຽດນາມ.
ໃນດ້ານການຮ່ວມມືພັດທະນາ, ຫວຽດນາມຍາມໃດກໍ່ສະໜັບສະໜູນຄວາມພະຍາຍາມແລະຄວາມຄິດລິເລີ່ມຢ່າງແຂງແຮງ ເພື່ອສ້າງລະບຽບເສດຖະກິດການຄ້າແລະການເງິນທີ່ຍືນຍົງ, ເພີ່ມທະວີການຮ່ວມມືສາກົນເພື່ອການພັດທະນາແບບຍືນຍົງ ທີ່ມຸ່ງສູ່ປະຊາຊົນ, ເອົາໃຈໃສ່ສະໜັບສະໜູນບັນດາປະເທດທີ່ກຳລັງພັດທະນາ ແລະດ້ອຍພັດທະນາ. ເຖິງວ່າລະດັບການພັດທະນາຂອງຫວຽດນາມຍັງຕ່ຳກວ່າພາກພື້ນແລະໂລກກໍ່ຕາມ, ແຕ່ຫວຽດນາມແມ່ນໜຶ່ງໃນບັນດາປະເທດທີ່ປະຕິບັດເປົ້າໝາຍການພັດທະນາສະຫັດສະວັດທີ່ປະສົບຄວາມສຳເລັດຫຼາຍທີ່ສຸດ, ເຊິ່ງໄດ້ຮັບການຕີລາຄາສູງ ຈາກປະຊາຄົມສາກົນ, ສະເໜີໃຫ້ແບ່ງປັນບົດຮຽນປະສົບການ; ພ້ອມກັນນັ້ນຫວຽດນາມກໍ່ຕັ້ງໜ້າ ເປັນເຈົ້າການໃນການເຊື່ອມສານເປົ້າໝາຍການພັດທະນາແບບຍືນຍົງຂອງສະຫະປະຊາຊາດເຂົ້າໃນບັນດານະໂຍບາຍ, ຍຸດທະສາດ, ແຜນການພັດທະນາເສດຖະກິດ-ສັງຄົມແຫ່ງຊາດ, ສະແດງຄວາມຕັດສິນໃຈຢ່າງແຮງ ເພື່ອບັນລຸເປົ້າໝາຍເຫຼົ່ານີ້ເປັນຢ່າງດີ. ຫວຽດນາມແມ່ນໜຶ່ງໃນບັນດາປະເທດທີ່ທົດລອງປະຕິບັດຄວາມຄິດລິເລີ່ມການກະທຳທີ່ເປັນເອກະພາບ (Delivering as One) ເພື່ອປະຕິຮູບອົງການສະຫະປະຊາຊາດໃນລະດັບຊາດ, ດ້ວຍຈຸດເດັ່ນແມ່ນ ການເປີດອາຄານຂຽວແຫ່ງສະຫະປະຊາຊາດ ແຫ່ງທຳອິດຂອງໂລກ ໃນເດືອນພຶດສະພາ 2015. ໃນໄລຍະທີ່ໄວຣັດໂຄວິດ-19 ແຜ່ລະບາດ, ຫວຽດນາມໄດ້ພິສູດໃຫ້ເຫັນເຖິງການເປັນຕົ້ນແບບທີ່ປະສົບຄວາມສຳເລັດໃນການຄວບຄຸມພະຍາດໄດ້ດີ, ແລະໄດ້ຮັບການຕີລາຄາສູງຈາກປະຊາຄົມສາກົນ ກ່ຽວກັບການໃຫ້ຂໍ້ມູນ, ພັດທະນາການຂອງການລະບາດຢ່າງໄວ, ໂປ່ງໃສແລະທັນເວລາ; ພ້ອມທັງສະເໜີໃຫ້້ຫວຽດນາມສືບຕໍ່ໃຫ້ຂໍ້ມູນກ່ຽວກັບການກາຍພັນຂອງໄວຣັດ SARS-CoV-2, ແບ່ງປັນບົດຮຽນປະສົບການ ໃນການປ້ອງກັນແລະປາບພະຍາດໂຄວິດ-19. ນອກຈາກນັ້ນ, ຫວຽດນາມຍັງບໍລິຈາກເງິນ 50.000 ໂດລາສະຫະລັດໃຫ້ກອງທຶນຮັບມືກັບໂຄວິດ-19 ຂອງອົງການອະນາໄມໂລກ (WHO). ຄວາມພະຍາຍາມຂອງຫວຽດນາມໄດ້ຮັບການຍອມຮັບແລະສະໜັບສະໜູນຈາກປະເທດຕ່າງໆ ໃຫ້ດຳລົງຕຳແໜ່ງສຳຄັນໃນໜ່ວຍງານຕ່າງໆຂອງອົງການສະຫະປະຊາຊາດເຊັ່ນ ສະມາຊິກສະພາບໍລິຫານໂຄງການພັດທະນາແຫ່ງສະຫະປະຊາຊາດ (UNDP), ສຳນັກງານບໍລິການແຫ່ງສະຫະປະຊາຊາດ (UNOPS) ແລະກອງທຶນປະຊາກອນແຫ່ງສະຫະປະຊາຊາດ (UNFPA) ໄລຍະປີ 2000 - 2002, ສະມາຊິກສະພາເສດຖະກິດແລະສັງຄົມແຫ່ງສະຫະປະຊາຊາດໄລຍະປີ 1998 - 2000 ແລະໄລຍະປີ 2016 - 2018...
ໃນຂົງເຂດສິດທິມະນຸດ, ຫວຽດນາມເນັ້ນໜັກໃນນະໂຍບາຍຂອງພັກກອມມູນິດ ແລະລັດຫວຽດນາມ ກ່ຽວກັບການຮັບປະກັນແລະສົ່ງເສີມສິດທິມະນຸດຕາມມາດຕະຖານສາກົນ; ຕັ້ງໜ້າເຂົ້າຮ່ວມໃນການຕໍ່ສູ້ຕ້ານການຫັນສິດທິມະນຸດເປັນການເມືອງ, ສະໜັບສະໜູນວິທີການເຂົ້າເຖິງບົນພື້ນຖານການສົນທະນາ, ການຮ່ວມມື ແລະຄວາມເຂົ້າໃຈເຊິ່ງກັນແລະກັນ; ເຊີດຊູແລະສົ່ງເສີມການຈັດຕັ້ງປະຕິບັດສິດທິທາງດ້ານເສດຖະກິດ, ວັດທະນະທຳ, ສັງຄົມ ແລະ ສິດໃນການພັດທະນາ ໂດຍສອດຄ່ອງກັບຜົນປະໂຫຍດລວມຂອງບັນດາປະເທດທີ່ກຳລັງພັດທະນາ.
ດ້ວຍກຽດຕິຍົດແລະຖານະຕຳແໜ່ງຂອງຕົນ, ຫວຽດາມໄດ້ຮັບຄວາມໄວ້ວາງໄຈຈາກປະເທດອື່ນໆໃຫ້ໄດ້ຮັບເລືອກເປັນສະມາຊິກຂອງຄະນະກຳມະການສິດທິມະນຸດ (ອົງການຕົ້ນກຳເນີດຂອງສະພາສິດທິມະນຸດ) ໄລຍະປີ 2001 - 2003 ແລະສະພາສິດທິມະນຸດໄລຍະປີ 2014 - 2016. ຫວຽດນາມເຂົ້າຮ່ວມຕັ້ງແຕ່ຕົ້ນ ແລະເປັນສະມາຊິດຂອງ 7 ໃນ 9 ສົນທິສັນຍາສາກົນທີ່ສຳຄັນກ່ຽວກັບສິດທິມະນຸດ, ໄດ້ປະຕິບັດພັນທະຂອງການເປັນສະມາຊິກພາຍໃຕ້ສົນທິສັນຍາເຫຼົ່ານີ້ຢ່າງເຕັມສ່ວນ ແລະມີການເຈລະຈາຫຼາຍຄັ້ງກັບ 5 ອົງການແຫ່ງສົນທິສັນຍາວ່າດ້ວຍສິດທິມະນຸດ. ແນວປະຕິບັດທີ່ດີທີ່ສຸດຂອງຫວຽດນາມ, ໂດຍສະເພາະຢ່າງຍິ່ງໃນການດຳເນີນການຕາມຂໍ້ສະເໜີແນະພາຍໃຕ້ກົນໄກການທົບທວນເປັນໄລຍະທົ່ວໄປຂອງສະພາສິດທິມະນຸດ (UPR), ໄດ້ຮັບການຍອມຮັບແລະແບ່ງປັນຈາກອົງການສະຫະແຊາຊາດແລະຫຼາຍປະເທດໃນພາກພື້ນ.
ຫວຽດນາມ - ສະຫະປະຊາຊາດ: ຄູ່ຮ່ວມມືເພື່ອໄປສູ່ອະນາຄົນ
ກ້າວເຂົ້າສູ່ທົດສະວັດທີສາມຂອງສະຕະວັດທີ 21, ບັນດາສິ່ງທ້າທາຍລະດັບໂລກທະວີຄວາມຮຸນແຮງຂຶ້ນ, ມີຫຼາຍມິຕິແລະເຊື່ອມໂຍງເຖິງກັນ. ໃນຊຸມປີທີ່ຜ່ານມາມໍ່ນີ້, ບັນດາເຫດການທີ່ສັບສົນທາງດ້ານການເມືອງ-ຄວາມໝັ້ນຄົງ, ເສດຖະກິດ-ສັງຄົມ, ສິ່ງແວດລ້ອມ ແລະຄວາມເຊື່ອໝັ້ນໃນກົດໝາຍສາກົນທີ່ຫຼຸດລົງ ອັນເນື່ອງຈາກການກະທຳຝ່າຍ, ການເມືອງແບບອຳນາດບາດໃຫຍ່, ການແຂ່ງຂັນມະຫາອຳນາດແລະການຟື້ນຄືນຂອງກະແສປະຊານິຍົມ, ຊາດນິຍົມ, ລັດທິກີດກັນ ໄດ້ແລະພວມວາງທ່າອຽງພະຫຸພາຄີເວົ້າລວມ ແລະສະຫະປະຊາຊາດເວົ້າສະເພາະ ຕໍ່ໜ້າສິ່ງທ້າທາຍທີ່ຮ້າຍແຮງ. ການແຜ່ລະບາດຂອງພະຍາດໂຄວິດ-19 ແມ່ນສຽງລະຄັງເຕືອນ, ໃຫ້ປະຊາຄົມໂລກເຫັນແຈ້ງຄວາມໝາຍແລະຄວາມມີຊີວິດຊີວາ ຂອງທ່າອຽງພະຫຸພາຄີແລະສະຫະປະຊາຊາດ ໃນໂລກທີ່ມີການເຊື່ອມໂຍງແລະເພິ່ງພາເຊິ່ງກັນແລະກັນຢ່າງແໜ້ນແຟ້ນ, ເມື່ອປະເທດຫຼືອົງການຈັດຕັ້ງດຽວ ບໍ່ສາມາດແກ້ໄຂບັນຫາທົ່ວໂລກຢ່າງໜ້າພໍໃຈ ແລະມີປະສິດທິຜົນດ້ວຍຕົວຕົນເອງ. ດ້ານອື່ນ, ອົງການສະຫະປະຊາຊາດກໍ່ຄວນໄດ້ຮັບການປະຕິຮູບຕາມທິດມີປະສິດທິພາບ, ປະຊາທິປະໄຕ, ໂປ່ງໃສກວ່າເກົ່າ, ຜ່ານນັ້ນ ຕອບສະໜອງຄວາມຕ້ອງການຂອງປະເທດກຳລັງພັດທະນາສ່ວຍໃຫຍ່ໄດ້ດີຂຶ້ນ ເພື່ອຕອບສະໜອງຕໍ່ຄວາມທ້າທາຍລະດັບໂລກທີ່ນັບມື້ນັບສັບສົນ.
ພາຍຫຼັງເກືອບ 35 ປີທີ່ດຳເນີນການປ່ຽນແປງໃໝ່ ແລະ 10 ປີທີ່ປະຕິບັດໂຄງການການເມືອງກໍ່ສ້າງປະເທດໃນສະໄໝຂ້ານຜ່ານຂຶ້ນສູ່ລັດທິສັງຄົມນິຍົມ (ສະບັບປັບປຸງ, ພັດທະນາປີ 2011) ຂອງພັກກອມມູນິດຫວຽດນາມ, ປະເທດຫວຽດນາມກ້າວເຂົ້າສູ່ຍຸກຍຸດທະສາດໃໝ່, ປ່ຽນແປງໃໝ່ຢ່າງຄົບຊຸດ ຮອບດ້ານ ແລະເຊື່ອມໂຍງສາກົນຢ່າງກວ້າງຂວາງເລິກເຊິ່ງ ໂດຍມີພາລະກິດ ກຳລັງຄວາມສາມາດ ຕຳແໜ່ງ ແລະສັກສີໃນລະດັບໃໝ່. ຫວຽດນາມກໍ່ພວມພະຍາຍາມສ້າງແນວທາງການພັດທະນາເສດຖະກິດ-ສັງຄົມຂອງປະເທດໃນໄລຍະໃໝ່, ມຸ່ງສູ່ເປົ້າໝາຍເຖິງປີ 2030 ຈະສຳເລັດໂດຍພື້ນຖານ ບັນດາຄຳໝັ້ນສັນຍາເຊື່ອມໂຍງເສດຖະກິດ ແລະບັນດາສັນຍາການຄ້າເສລີທີ່ສຳຄັນ, ພ້ອມທັງເປົ້າໝາຍການພັດທະນາທີ່ຍືນຍົງຂອງວາລະການປະຊຸມສະຫະປະຊາຊາດ 2030; ເຖິງປີ 2045 ເມື່ອສະເຫຼີມສະຫຼອງການສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ ປະຈຸບັນແມ່ນປະເທດສາທາລະນະລັດສັງຄົມນິຍົມຫຍຽດນາມຄົບຮອບ 100 ປິ, ຫວຽດນາມຈະກາຍເປັນປະເທດອຸດສາຫະກຳທີ່ມີລາຍໄດ້ສູງ.
ໃນຄວາມພະຍາຍາມລວມນັ້ນ, ວຽກງານການຕ່າງປະເທດຫຼາຍຝ່າຍຖືກພັກກອມມູນິດແລະລັດຫວຽດນາມກຳນົດວ່າເປັນທິດທາງຍຸດທະສາດການຕ່າງປະເທດທີ່ສຳຄັນອັນດັບໜຶ່ງ, ຄືທີ່ກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມວາງແຜນນະໂຍບາຍ: “ເປັນເຈົ້າການແລະຕັ້ງໜ້າເຊື່ອມໂຍງສາກົນ”, “ຍົກສູງຄຸນນະພາບ, ປະສິດທິຜົນຂອງວຽກງານການຕ່າງປະເທດຫຼາຍຝ່າຍ”, “ເປັນເຈົ້າການເຂົ້າຮ່ວມ ແລະເສີມຂະຫຍາຍບົດບາດໃນບັນດາກົນໄກຫຼາຍຝ່າຍ, ພິເສດແມ່ນ ອາຊຽນ ແລະອົງການສະຫະປະຊາຊາດ”; ຄຳສົ່ງເລກທີ 25-CT/TW, ວັນທີ 8 ສິງຫາ 2018, ຂອງຄະນະເລຂາທິການສູນກາງພັກກອມມູນິດຫວຽດນາມ “ກ່ຽວກັບການຍູ້ແຮງແລະຍົກລະດັບການຕ່າງປະເທດຫຼາຍຝ່າຍເຖິງປີ 2030”, ວາງທິດທາງ “ບືນຕົວຂຶ້ນເພື່ອມີບົດບາດຫຼັກ, ນຳພາ, ໄກ່ເກ່ຍໃນເວທີປາໄສ ອົງການຈັດຕັ້ງຫຼາຍຝ່າຍທີ່ມີຄວາມໝາຍສຳຄັນຍຸດທະສາດຕໍ່ປະເທດ, ສອດຄ່ອງກັບຄວາມສາມາດ ແລະເງື່ອນໄຂສະເພາະ”.
ໃນໄລຍະທີ່ຈະມາເຖິງ, ຫວຽດນາມຈະສຳເລັດວາລະການເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໄລຍະປີ 2020 - 2021, ສືບຕໍ່ຊຸກຊູ້ຂໍ້ບຸລິມະສິດຂອງຫວຽດນາມເຊັ່ນ ແກ້ໄຂຜົນຮ້າຍຈາກລູກລະເບີດທີ່ຍັງບໍ່ທັນແຕກຫຼັງສົງຄາມ, ຟື້ນຟູຫຼັງສົງຄາມ, ປົກປ້ອງພົນລະເຮືອນໃນການສູ້ຮົບ, ຍູ້ແຮງການຮັກສາສັນຕິພາບຂອງສະຫະປະຊາຊາດ ແລະເພີ່ມທະວີການຮ່ວມມືລະຫວ່າງສະຫະປະຊາຊາດກັບບັນດາອົງການຈັດຕັ້ງພາກພື້ນ, ພິເສດແມ່ນອາຊຽນ; ສະໝັກຮັບເລືອກຕັ້ງເຂົ້າໃນກົນໄກຈຳນວນໜຶ່ງຂອງສະຫະປະຊາຊາດເຊັ່ນ ສະພາສິດທິມະນຸດ (ວາລະປີ 2023 - 2025), ສະພາເສດຖະກິດແລະສັງຄົມ, ປະທານສະມັດຊາໃຫຍ່ແຫ່ງສະຫະປະຊາຊາດ; ຄ່ອຍໆສະເໜີຊື່ຄົນເຂົ້າໃນອົງການຕ່າງໆຂອງສະຫະປະຊາຊາດ; ເປັນເຈົ້າການຜັນຂະຫຍາຍແຜນປະຕິບັດການແຫ່ງຊາດຢ່າງຕັ້ງໜ້າ ເພື່ອດຳເນີນການຕາມວາລະ 2030, ສ້າງຍຸດທະສາດແລະຂອບການຮ່ວມມືລະຫວ່າງຫວຽດນາມແລະສະຫະປະຊາຊາດຫຼັງປີ 2021.
ບົນພື້ນຖານຂອງພື້ນຖານທີ່ສຳຄັນແລະເອື້ອອຳນວຍດັ່ງກ່າວ, ດ້ວຍຄວາມສາມັກຄີ ເຫັນດີເຫັນພ້ອມ ແລະຄວາມຕັດສິນໃຈຂອງທົ່ວພັກກອມມູນິດ ແລະປະຊາຊົນຫວຽດນາມທັງໝົດ ດ້ວຍຜົນສຳເລັດອັນໃຫຍ່ຫຼວງໃນຂະບວນການປ່ຽນແປງໃໝ່, ຫວຽດນາມຈະສືບຕໍ່ພັດທະນາການພົວພັນຮ່ວມມືສະຫະປະຊາຊາດ, ສົ່ງເສີມລັດທິພະຫຸພາຄີ, ເຄົາລົບກົໝາຍສາກົນ ແລະກົດບັດສະຫະປະຊາຊາດ; ປະກອບສ່ວນຢ່າງຫຼວງຫຼາຍເຂົ້າໃນການຮັກສາສັນຕິພາບ ສະຖຽນລະພາບ ການຮ່ວມມື ແລະການພັດທະນາທີ່ຍືນຍົງໃນພາກພື້ນແລະໃນໂລກ; ຈາກນັ້ນ, ປະກອບສ່ວນເຂົ້າໃນການຍົກສູງຊື່ສຽງແລະຖານະຂອງປະເທດ, ກໍ່ສ້າງແລະແນະນຳພາບພົດຂອງປະເທດຫວຽດນາມທີ່ປ່ຽນແປງໃໝ່, ຂະຫຍັນຂັນເຄື່ອນ ແລະ ເຊື່ອມໂຍງໃນການເດີນທາງໄປສູ່ອະນາຄົດຂອງມະນຸດຊາດ./.
--------------------------
(1) ສະຫະພັນປະຊາຊາດໄດ້ຖືກສ້າງຕັ້ງຂຶ້ນຫຼັງສົງຄາມໂລກຄັ້ງທີ 1 ເພື່ອປ້ອງກັນບໍ່ໃຫ້ເກີດສົງຄາມໂລກ.
(2) ແມ່ນບັນດາດິນແດນທີ່ຢູ່ພາຍໃຕ້ການບໍລິຫານຂອງສະຫະພັນປະຊາຊາດຫຼັງສົງຄາມໂລຄັ້ງທີໜຶ່ງ, ຫຼືແຍກອອກຈາກບັນດາປະເທດທີ່ຖືກພ່າຍແພ້ໃນສົງຄາມໂລຫຄັ້ງທີສອງ.
(3) ຮອດເດືອນກັນຍາປີ 2020 ສະຫະປະຊາຊາດໄດ້ຜັນຂະຫຍາຍກອງກຳລັງຮັກສາສັນຕິພາບ 74 ກອງ, ປະຈຸບັນມີ 13 ກອງທີ່ກຳລັງເຄື່ອນໄຫວຢູ່ ໂດຍມີຜູ້ເຂົ້າຮ່ວມປະມານ 115.000 ຄົນຈາກ 122 ປະເທດສະມາຊິກສະຫະປະຊາຊາດ ແລະງົບປະມານປະມານ 6,7 ຕື້ໂດລາດສະຫະລັດຕໍ່ປີ.
(4) ຄັ້ງທຳອິດແມ່ນໄລຍະປີ 2008 – 2009.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 952 (ເພືອນຕຸລາ 2020)