ພັກກອມມູນິດຫວຽດນາມ - ພາກພູມໃຈໃນ 95 ປີແຫ່ງ
“ໜັງສືປະຫວັດສາດອັນລ້ຳຄ່າ” ທີ່ສ່ອງປະກາຍ,
ກະກຽມກ້າວຢ່າງໝັ້ນຄົງສູ່ຍຸກໃໝ່ ຍຸກແຫ່ງການບືນຕົວຂຶ້ນຂອງປະເທດຊາດ*
“ໜັງສືປະຫວັດສາດອັນລ້ຳຄ່າ” ທີ່ສ່ອງປະກາຍ,
ກະກຽມກ້າວຢ່າງໝັ້ນຄົງສູ່ຍຸກໃໝ່ ຍຸກແຫ່ງການບືນຕົວຂຶ້ນຂອງປະເທດຊາດ*
ຄຳນຳຂອງກອງບັນນາທິການວາລະສານກອມມູນິດ: ວັນທີ 22 ມັງກອນ 2025, ທີ່ນະຄອນຫຼວງຮ່າໂນ້ຍ, ສະຖາບັນການເມືອງແຫ່ງຊາດໂຮ່ຈີມິນ ສົມທົບກັບຄະນະໂຄສະນາອົບຮົມສູນກາງ ແລະ ສະພາທິດສະດີສູນກາງ ຈັດຕັ້ງກອງປະຊຸມວິທະຍາສາດແຫ່ງຊາດ ຫົວຂໍ້ “ພັກກອມມູນິດຫວຽດນາມ - 95 ປີແຫ່ງຄວາມຍຶດໝັ້ນໃນເປົ້າໝາຍເອກະລາດແຫ່ງຊາດ ແລະ ລັດທິສັງຄົມນິຍົມ, ສ້າງສາປະເທດທີ່ຈະເລີນຮຸ່ງເຮືອງ ແລະ ມີຄວາມສຸກ”. ສະຫາຍ ຫງວຽນຊວນຖັງ, ກຳມະການກົມການເມືອງ, ຜູ້ອຳນວຍການສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງ ເປັນປະທານ ແລະ ກ່າວຄຳເຫັນເປີດກອງປະຊຸມ. ວາລະສານກອມມູນິດຂໍແນະນຳເນື້ອໃນຄຳປາໄສສຳຄັນຂອງສະຫາຍ ຫງວຽນຊວນຖັງ.
ກອງປະຊຸມສ້າງຕັ້ງ ພັກກອມມູນິດຫວຽດນາມ ວັນທີ 3 ກຸມພາ 1930 (ຮູບແຕ້ມໂດຍຈິດຕະກອນ ຟານ ເກ໋ ອານ) _ແຫຼ່ງ: ຫໍພິພິດທະພັນໂຮ່ຈີມິນ
ກ່ອນໜ້ານີ້ 95 ປີ, ໃນລະດູບານໃໝ່ປີ 1930, ພາຍໃຕ້ການເປັນປະທານຂອງທ່ານ ຫງວຽນອ໋າຍກ໊ວກ, ກອງປະຊຸມເພື່ອຮ່ວມບັນດາອົງການກອມມູນິດຫວຽດນາມ ໄດ້ໄຂຂຶ້ນ ແລະ ບັນລຸຂໍ້ຕົກລົງໃນການຈັດຕັ້ງພັກການເມືອງໜຶ່ງດຽວຄື ພັກກອມມູນິດຫວຽດນາມ.
ການກຳເນີດຂອງພັກກອມມູນິດຫວຽດນາມ ໄດ້ເປັນຂີດໝາຍບາດລ້ຽວໃນຂະບວນການປະຕິວັດຫວຽດນາມ ແລະ ເປີດອະນາຄົດທີ່ສົດໃສໃຫ້ກັບປະເທດຊາດ. ນັ້ນແມ່ນໝາກຜົນຂອງວິໄສທັດອັນກວ້າງໄກ ແລະ ສະຕິປັນຍາອັນສະຫຼາດສ່ອງໃສຂອງຜູ້ນຳ ຫງວຽນອ໋າຍກ໊ວກ - ໂຮ່ຈີມິນ, ການກະກຽມຢ່າງລະອຽດຖີ່ຖ້ວນທາງດ້ານການຈັດຕັ້ງແລະບຸກຄະລາກອນ, ການສົມທົບຢ່າງແໜ້ນແຟ້ນລະຫວ່າງລັດທິມາກ-ເລນິນ ກັບຂະບວນການເຄື່ອນໄຫວຂອງກຳມະກອນ ແລະ ຂະບວນການຮັກຊາດຫວຽດນາມ. ນັບແຕ່ນັ້ນເປັນຕົ້ນໄປ, ຊົນຊັ້ນກຳມະກອນຫວຽດນາມໄດ້ເຕີບໂຕ ແລະ ກ້າວຂຶ້ນສູ່ເວທີການເມືອງຢ່າງເປັນທາງການ, ປະຕິບັດພາລະກິດນຳພາການປະຕິວັດຫວຽດນາມ. ນັບແຕ່ເມື່ອສ້າງຕັ້ງ, ພັກກອມມູນິດຫວຽດນາມໄດ້ຢັ້ງຢືນບົດບາດການນຳພາຂອງຕົນດ້ວຍການຈັດຕັ້ງອັນແໜ້ນແຟ້ນ, ເຈດຈຳນົງແລະການກະທຳເປັນເອກະພາບ; ພ້ອມກັບບັນດາພະນັກງານ ສະມາຊິກພັກທີ່ຈົງຮັກພັກດີຢ່າງແຮງກ້າ ພ້ອມເສຍສະຫຼະຊີວິດຢ່າງກ້າຫານເພື່ອການປົດປ່ອຍຊາດ ເພື່ອຊີວິດທີ່ຮຸ່ງເຮືອງແລະມີຄວາມສຸກຂອງປະຊາຊົນ. ດ້ວຍຄວາມໄວ້ວາງໃຈຢ່າງເຕັມທີ່ຈາກປະຊາຊົນທັງປະເທດ, ພັກໄດ້ກາຍເປັນກຳລັງນຳພາພຽງໜຶ່ງດຽວ ໃນການປະຕິວັດຂອງຫວຽດນາມ ແລະ ເປີດໜ້າປະຫວັດສາດອັນສະຫງ່າລາສີໃຫ້ກັບຊາດ.
ພາຍຫຼັງການນຳພາການປະຕິວັດພຽງ 15 ປີ, ພັກກອມມູນິດຫວຽດນາມໄດ້ນຳພາປະຊາຊົນທັງໝົດໄປສູ່ໄຊຊະນະໃນການປະຕິວັດເດືອນສິງຫາ ປີ 1945 ແລະ ສ້າງຕັ້ງສາທາລະນະລັດປະຊາທິປະໄຕຫວຽດນາມ ເຊິ່ງປະຈຸບັນແມ່ນສາທາລະນະລັດສັງຄົມນິຍົມຫວຽດນາມ - ຂີດໝາຍອັນຮຸ່ງເຮືອງເຫຼືອງເຫຼື້ອມໃນຍຸກແຫ່ງເອກະລາດ, ເສລີພາບ ແລະ ຍຸກໂຮ່ຈິມິນ - ຍຸກທີ່ສະຫງ່າລາສີທີ່ສຸດໃນປະຫວັດສາດຂອງຊາດ. ໄຊຊະນະນີ້ໄດ້ຢັ້ງຢືນແນວທາງອັນຖືກຕ້ອງ ແລະ ຄວາມສາມາດນຳພາຂອງພັກການເມືອງທີ່ຍັງໜຸ່ມນ້ອຍ, ວາງຮາກຖານສຳລັບເປົ້າໝາຍເອກະລາດແຫ່ງຊາດ ຕິດພັນກັບລັດທິສັງຄົມນິຍົມ.
ຜ່ານສົງຄາມຕໍ່ຕ້ານພວກລ່າເມືອງຂຶ້ນຝຣັ່ງທີ່ຍາວນານເຖິງ 9 ປີ, ດ້ວຍຈິດໃຈ “ຍອມເສຍສະລະທຸກສິ່ງທຸກຢ່າງ ແຕ່ບໍ່ຍອມເສຍປະເທດ ແລະ ບໍ່ຍອມຕົກເປັນທາດຢ່າງເດັດຂາດ”ແລະ ຍຸດທະສາດ “ທົ່ວປວງຊົນ, ຮອບດ້ານ, ຍາວນານ, ອີງໃສ່ຕົນເອງ”, ພັກກອມມູນິດຫວຽດນາມໄດ້ນຳພາປະຊາຊົນຍາດໄດ້ໄຊຊະນະອັນຍິ່ງໃຫຍ່ ເຊິ່ງຈຸດສູງສຸດແມ່ນໄຊຊະນະດ້ຽນບຽນຝູທີ່ “ດັງກ້ອງໄປທົ່ວຫ້າທະວີບ ແລະ ສັ່ນສະເທືອນໂລກ”, ນຳໄປສູ່ການລົງນາມໃນສັນຍາເຊີແນວກ່ຽວກັບການຢຸດຕິສົງຄາມ ແລະ ການຟື້ນຟູສັນຕິພາບໃນອິນດູຈີນ.
ດ້ວຍຄວາມກ້າຫານ, ສະຕິປັນຍາ ແລະ ແນວທາງທີ່ຖືກຕ້ອງ, ພັກກອມມູນິດຫວຽດນາມໄດ້ນຳພາການປະຕິບັດ 2 ໜ້າທີ່ຍຸດທະສາດພ້ອມກັນ: ການປະຕິວັດສັງຄົມນິຍົມຢູ່ພາກເໜືອ ແລະ ການປະຕິວັດປົດປ່ອຍຢູ່ພາກໃຕ້ ເຊິ່ງໄດ້ລະດົມກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ, ປະສົມປະສານກຳລັງແຮງຂອງຊາດເຂົ້າກັບກຳລັງແຮງຂອງຍຸກສະໄໝ, ທັບມ້າງທຸກແຜນການຮຸກຮານຂອງຈັກກະພັດອາເມລິກາ ແລະ ໄດ້ຮັບໄຊຊະນະອັນຍິ່ງໃຫຍ່ໃນລະດູບານໃໝ່ປີ 1975, ປົດປ່ອຍພາກໃຕ້ໂດຍສົມບູນ, ໂຮມປະເທດເປັນເອກະພາບ, ເປີດເສັ້ນທາງໃໝ່ໃຫ້ປະເທດທັງໝົດກ້າວສູ່ສັງຄົມສັງຄົມນິຍົມ.
ໃນຊຸມປີທີ່ປະເທດປະສົບກັບຄວາມຫຍຸ້ງຍາກຫຼາຍຢ່າງ, ຖືກປິດລ້ອມ ຂວ້ຳບາດ ໂດດດ່ຽວ, ພັກໄດ້ນຳພາກອງທັບ ແລະ ປະຊາຊົນທົ່ວປະເທດ ຮັດແໜ້ນຖັນແຖວ, ສາມັກຄີ ແລະ ຕໍ່ສູ້ປົກປັກຮັກສາອະທິປະໄຕຜືນແຜ່ນດິນຢູ່ເຂດຊາຍແດນພາກຕາເວັນຕົກສຽງໃຕ້ ແລະ ພາກເໜືອຂອງປະເທດຊາດໄວ້ຢ່າງໝັ້ນຄົງ. ໄຊຊະນະອັນຍິ່ງໃຫຍ່ຂອງພາລະກິດການຕໍ່ສູ້ຕ້ານຜູ້ຮຸກຮານຕ່າງປະເທດ, ຮັກສາເອກະລາດ, ເສລີພາບ ແລະ ປົກປັກຮັກສາປະເທດຊາດ ແມ່ນສິ່ງມະຫັດສະຈັນຂອງຊາດຫວຽດນາມ ໃນສະໄໝໂຮ່ຈີມິນ. ສິ່ງດັງກ່າວເປັນການພິສູດຢ່າງຈະແຈ້ງເຖິງບົດບາດ, ຄວາມສາມາດ ແລະ ກຽດສັກສີການນຳພາຂອງພັກກອມມູນິດຫວຽດນາມ; ສ້າງພື້ນຖານທີ່ໝັ້ນຄົງໃຫ້ກັບພັກໃນການນຳປະເທດຊາດເຂົ້າສູ່ຍຸກແຫ່ງສັນຕິພາບ, ເອກະພາບ, ການປ່ຽນແປງໃໝ່, ການເຊື່ອມໂຍງ ແລະ ການພັດທະນາ.
ດ້ວຍຈິດໃຈ “ເບິ່ງຄວາມຈິງຕໍ່ຫນ້າ, ປະເມີນຄວາມຈິງຢ່າງຖືກຕ້ອງ, ເວົ້າຄວາມຈິງຢ່າງຈະແຈ້ງ”, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ VI ຂອງພັກ (ເດືອນທັນວາ 1986) ໄດ້ວາງແນວທາງການປ່ຽນແປງໃໝ່ຢ່າງຮອບດ້ານ; ຫັນປ່ຽນຈາກພື້ນຖານເສດຖະກິດຕາມແຜນການລວມສູນ, ແບບອາດຍາສິດ ເກື້ອກູນ ເປັນເສດຖະກິດຕະຫຼາດຕາມທິດສັງຄົມນິຍົມ;ເປັນເຈົ້າການແລະຕັ້ງໜ້າໃນການເຊື່ອມໂຍງເຂົ້າກັບສາກົນ; ຍູ້ແຮງການຫັນເປັນອຸດສາຫະກຳແລະທັນສະໄໝ. ການປ່ຽນແປງໃໝ່ແມ່ນພາລະກິດປະດິດສ້າງແທ້ຈິງ ທີ່ມີຄວາມສຳຄັນລະດັບປະຫວັດສາດ ແລະ ມີຄຄວາມໝາຍອັນຍິ່ງໃຫຍ່ ໃນເສັ້ນທາງກໍ່ສ້າງສັງຄົມນິຍົມຢູ່ຫວຽດນາມ, ໂດຍປະຊາຊົນຫວຽດນາມເປັນຜູ້ດຳເນີນການ.
ໃນຂະບວນການປ່ຽນແປງໃໝ່, ພັກກອມມູນິດຫວຽດນາມໄດ້ປະດິດສ້າງຢ່າງບໍ່ຢຸດຢັ້ງ ແລະ ລົງເລິກໃນບັນດາກົດເກນການເຄື່ອນໄຫວ, ຄຸນລັກສະນະພິເສດ, ທິດທາງໃນການກໍ່ສ້າງ ແລະ ປັບປຸງຮູບແບບລັດທິສັງຄົມນິຍົມຂອງຫວຽດນາມໃຫ້ສົມບູນແບບ ດ້ວຍ 3 ເສົາຄ້ຳຄື:ເສດຖະກິດຕະຫຼາດຕາມທິດສັງຄົມນິຍົມ, ລັດແຫ່ງອຳນາດກົດໝາຍສັງຄົມນິຍົມ ແລະ ລະບອບປະຊາທິປະໄຕສັງຄົມນິຍົມ; ສືບຕໍ່ປັບປຸງຮູບແບບການພັດທະນາຂອງຫວຽດນາມຢ່າງບໍ່ຢຸດຢັ້ງ ດ້ວຍຄຸນລັກສະນະທີ່ສຳຄັນຄື ການພັດທະນາຢ່າງວ່ອງໄວ, ຮອບດ້ານ ແລະ ຍືນຍົງ, ຮັບປະກັນຄວາມໝັ້ນຄົງເພື່ອການພັດທະນາ, ການພັດທະນາເພື່ອຄວາມໝັ້ນຄົງ, ຖືປະຊາຊົນເປັນໃຈກາງ, ບໍ່ປະຜູ້ໃດໄວ້ຂ້າງຫຼັງໃນຂະບວນການພັດທະນາ. ຈາກພຶດຕິກຳຕົວຈິງຂອງກິດຈະການປ່ຽນແປງໃໝ່, ພັກກອມມູນິດຫວຽດນາມໄດ້ຄ່ອຍໆສ້າງທິດສະດີກ່ຽວກັບເສັ້ນທາງການປ່ຽນແປງໃໝ່ໃນຫວຽດນາມ ທີ່ສອດຄ່ອງກັບບັນດາກົດເກນພາວະວິໄສ, ເງື່ອນໄຂການພັດທະນາຂອງປະເທດ ແລະ ທ່າອ່ຽງການພັດທະນາຂອງຍຸກສະໄໝ.
ດ້ວຍຄວາມສາມາດ ແລະ ກຽດສັກສີຂອງພັກມາກຊິດທີ່ແທ້ຈິງ, ໄດ້ຮັບການຝຶກຝົນຫຼໍ່ຫຼອນຜ່ານຄວາມຫຍຸ້ງຍາກ ແລະ ສິ່ງທ້າທາຍທີ່ນັບບໍ່ຖ້ວນ, ພັກກອມມູນິດຫວຽດນາມຍາມໃດກໍ່ຍຶດໝັ້ນ, ໝູນໃຊ້ ແລະ ພັດທະນາລັດທິມາກ-ເລນິນ, ແນວຄິດໂຮ່ຈີມິນ ແລະ ທິດສະດີກ່ຽວກັບແນວທາງການປ່ຽນແປງໃໝ່; ຍຶດໝັ້ນໃນເປົ້າໝາຍເອກະລາດແຫ່ງຊາດ ແລະລັດທິສັງຄົມນິຍົມ, ຍຶດໝັ້ນໃນກິດຈະການປ່ຽນແປງໃໝ່ຢ່າງຮອບດ້ານແລະຄົບຊຸດ, ຍຶດໝັ້ນໃນບັນດາຫຼັກການກໍ່ສ້າງພັກ; ຜ່ານນັ້ນ, ຢືນຢັນເຖິງບົດບາດ “ການກຳອຳນາດ, ນຳພາລັດ ແລະ ສັງຄົມ”, ນຳພາປະຊາຊົນຫວຽດນາມໃຫ້ບັນລຸຜົນງານອັນຍິ່ງໃຫຍ່ທີ່ມີຄວາມໝາຍປະຫວັດສາດ, ສ້າງພື້ນຖານ, ທ່າແຮງ, ຖານະທີ່ຕັ້ງ ແລະ ກຽດສັກສີສາກົນຂອງປະເທດຄືທີ່ເປັນຢູ່ປະຈຸບັນ.
ປີ 2024, ຂະໜາດເສດຖະກິດຂອງຫວຽດນາມບັນລຸປະມານ 470 ຕື້ໂດລາສະຫະລັດ, ຢູ່ໃນອັນດັບທີ 32, ມູນຄ່າເຄື່ອງໝາຍການຄ້າແຫ່ງຊາດບັນລຸ 507 ຕື້ໂດລາສະຫະລັດ, ຢູ່ໃນອັນດັບທີ 32 ຈາກ 193 ປະເທດ; ການສົ່ງອອກບັນລຸປະມານ 405 ຕື້ໂດລາສະຫະລັດ; ດຶງດູດການລົງທຶນໂດຍກົງຈາກຕ່າງປະເທດໄດ້ 38,23 ຕື້ໂດລາສະຫະລັດ. ດັດຊະນີນະວັດຕະກຳໂລກຢູ່ໃນອັນດັບທີ່ 44 ຈາກ 132 ປະເທດແລະເຂດແຄວ້ນ. ອັດຕາຄວາມທຸກຍາກຫຼາຍດ້ານຫຼຸດລົງເຫຼືອປະມານ 1,9%. ດັດຊະນີຄວາມສຸກເພີ່ມຂຶ້ນ 11 ອັນດັບເມື່ອທຽບກັບປີ 2023, ຢູ່ໃນອັນດັບທີ 54 ຈາກ 143 ປະເທດແລະເຂດແຄວ້ນ. ດັດຊະນີການພັດທະນາແບບຍືນຍົງ (SDGs) ຢູ່ໃນອັນດັບທີ 54 ຈາກ 166 ປະເທດແລະເຂດແຄວ້ນ. ເອກະລາດ, ອະທິປະໄຕຂອງຊາດ, ຄວາມໝັ້ນຄົງທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມປອດໄພທາງສັງຄົມ ໄດ້ຮັບການຮັກສາໄວ້ຢ່າງດີ. ການຕ່າງປະເທດ ແລະ ການເຊື່ອມໂຍງເຂົ້າກັບສາກົນສືບຕໍ່ໄດ້ຮັບການຊຸກຍູ້. ບົດບາດທີ່ຕັ້ງ ແລະ ກຽດສັກສີຂອງຫວຽດນາມ ໃນເວທີສາກົນໄດ້ຮັບການປັບປຸງຢ່າງບໍ່ຢຸດຢັ້ງ. ຫວຽດນາມສືບຕໍ່ເປັນຈຸດໝາຍປາຍທາງທີ່ປອດໄພ ແລະ ໜ້າດຶງດູດສຳລັບວິສາຫະກິດ, ຄູ່ຮ່ວມມື, ນັກລົງທຶນ, ນັກທ່ອງທ່ຽວ ແລະ ເພື່ອນມິດສາກົນ.
ສິ່ງນີ້ສືບຕໍ່ສະແດງໃຫ້ເຫັນຢ່າງມີຊີວິດຊີວາເຖິງບົດບາດການນຳພາຂອງພັກ, ດັ່ງທີ່ທ່ານເລຂາທິການໃຫຍ່ ຫງວຽນຝູຈ້ອງ ຢືນຢັນວ່າ: “ຢູ່ຫວຽດນາມມີພຽງພັກກອມມູນິດຫວຽດນາມເທົ່ານັ້ນ ທີ່ມີຄວາມສາມາດນຳພາປະຊາຊົນກໍ່ສ້າງຊີວິດການເປັນຢູ່ທີ່ອິ່ມໜຳສຳລານ, ປອດໃສ ແລະ ມີຄວາມສຸກ; ຜົນປະໂຫຍດຂອງປະຊາຊົນຕິດພັນກັບພາລະກິດຂອງພັກ; ວັດຖຸປະສົງແລະອຸດົມຄະຕິຂອງພັກກໍເປັນຄວາມຝັນແລະຄວາມປາຖະໜາຂອງປະຊາຊົນ. ຜົນສຳເລັດອັນຍິ່ງໃຫຍ່ ແລະ ມີຄວາມໝາຍປະຫວັດສາດທີ່ປະເທດເຮົາບັນລຸໄດ້ ຫຼັງຈາກດຳເນີນການປ່ຽນແປງໃໝ່ປະເທດມາເປັນເວລາ 40 ປີ ໄດ້ສ້າງຄວາມພາກພູມໃຈ, ຄວາມເຊື່ອໝັ້ນ, ຄວາມເປັນເຈົ້າຕົນເອງ, ການອີງໃສ່ຕົນເອງສ້າງຄວາມເຂັ້ມແຂງດ້ວຍຕົນເອງ ເພື່ອໃຫ້ພັກກອມມູນິດຫວຽດນາມສາມາດນຳພາປະຊາຊົນກ້າວຢ່າງໝັ້ນຄົງສູ່ຍຸກແຫ່ງການພັດທະນາໃໝ່ - ຍຸກແຫ່ງການບືນຕົວຂຶ້ນຂອງຊາດຫວຽດນາມ.
ໃນຊຸມປີທີ່ຈະມາເຖິງ, ສະຖານະການໂລກຈະສືບຕໍ່ປ່ຽນແປງຢ່າງວ່ອງໄວ, ສັບສົນ ແລະ ບໍ່ສາມາດຄາດເດົາໄດ້. ການແຂ່ງຂັນຍຸດທະສາດລະຫວ່າງບັນດາປະເທດໃຫຍ່, ສົງຄາມພາກສ່ວນ, ຄວາມຂັດແຍ້ງທາງຊົນເຜົ່າ, ຂໍ້ພິພາດເລື່ອງອະທິປະໄຕເໜືອທະເລແລະເກາະ ພ້ອມກັບບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ ແລະ ບັນດາບັນຫາທົ່ວໂລກເຊັ່ນ: ການປ່ຽນແປງສະພາບດິນຟ້າອາກາດ, ປະຊາກອນສູງອາຍຸ, ຄວາມປອດໄພທາງໄຊເບີຣ໌, ໂລກລະບາດ ແລະອື່ນໆ ຍັງຄົງເປັນຄວາມທ້າທາຍຄັ້ງໃຫຍ່ສໍາລັບທຸກປະເທດ. ຢ່າງໃດກໍ່ຕາມ, ການປະຕິວັດອຸດສາຫະກຳຄັ້ງທີ 4, ໂດຍສະເພາະ ການລະເບີດຂອງປັນຍາປະດິດ ແລະ ເຕັກໂນໂລຊີດິຈິຕອນ ເປັນໂອກາດອັນດີສຳລັບປະເທດພວມພັດທະນາ, ໃນນັ້ນມີ ຫວຽດນາມ.
ປະເທດເຮົາພວມປະເຊີນກັບກາລະໂອກາດ ແລະ ໂຊກດີໃໝ່ຫຼາຍຢ່າງ, ແຕ່ຍັງຕ້ອງປະສົບກັບຄວາມຫຍຸ້ງຍາກ ແລະ ສິ່ງທ້າທາຍທີ່ເຊື່ອມໂຍງກັນອີກຫຼວງຫຼາຍ. ການພັດທະນາຂອງເສດຖະກິດຕາມວົງກວ້າງໄດ້ເຖິງຂີດຈຳກັດແລ້ວ; ສະມັດຕະພາບ, ຄຸນນະພາບ, ປະສິດທິພາບ ແລະ ຄວາມສາມາດແຂ່ງຂັນຍັງຕໍ່າ; ການເຕີບໂຕທາງເສດຖະກິດບໍ່ສົມກັບທ່າແຮງຂອງຕົນເອງ. ຄວາມສ່ຽງ 4 ປະການທີ່ພັກຊີ້ໃຫ້ເຫັນໃນກອງປະຊຸມກາງສະໄໝຂອງຄະນະບໍລິຫານງານສູນກາງພັກຊຸດທີ 7 ຍັງຄົງມີຢູ່ ແລະບາງດ້ານຍັງຮ້າຍແຮງແລະສັບສົນກວ່າ. ສະຖານະການການສໍ້ລາດບັງຫຼວງ, ການໃຊ້ຈ່າຍສິ້ນເປືອງ, ຄວາມຫຍໍ້ທໍ້, ຄວາມເສື່ອມໂຊມດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, “ການປ່ຽນແປງຕົນເອງ”, “ການຫັນປ່ຽນຕົນເອງ” ຂອງພະນັກງານແລະສະມາຊິກພັກຈຳນວນໜຶ່ງ, ໃນນັ້ນມີພະນັກງານຂັ້ນສູງຂອງພັກ ແມ່ນຄວາມສ່ຽງໃຫຍ່ທີ່ບໍ່ອາດຈະເບິ່ງເບົາໄດ້. ກົນອຸບາຍຂອງອິດທິກຳລັງສັດຕູໃນການ “ປ່ຽນແປງຕົນເອງ”, “ຫັນປ່ຽນຕົນເອງ” ນັບມື້ນັບສັບສົນ ແລະ ເລິກແລບແນບນຽນກວ່າເກົ່າ... ນາບຂູ່ບົດບາດນຳພາຂອງພັກກອມມູນິດຫວຽດນາມ ແລະ ການຢູ່ລອດຂອງລະບອບການປົກຄອງ.
ເພື່ອບັນລຸເປົ້າໝາຍຍຸດທະສາດຢ່າງປະສົບຄວາມສຳເລັດພາຍໃນປີ 2030 ໂດຍປ່ຽນຫວຽດນາມໃຫ້ເປັນປະເທດກຳລັງພັດທະນາທີ່ມີອຸດສາຫະກຳທັນສະໄໝ ແລະ ມີລາຍຮັບປານກາງສູງ; ຮອດປີ 2045, ກາຍເປັນປະເທດພັດທະນາແລ້ວ ແລະ ມີລາຍຮັບສູງ, ຕາມທິດສັງຄົມນິຍົມ, ບຸກທະລຸໃນການຕັດສິນໃຈຍຸດທະສາດ, ເສີມຂະຫຍາຍຈິດໃຈປະດິດສ້າງ, ພັດທະນາຄວາມສາມາດທາງສະຕິປັນຍາ, ຄວາມກ້າຫານທາງການເມືອງ ແລະ ວິໄສທັດຍຸດທະສາດຢ່າງຕໍ່ເນື່ອງ ແລະ ມີຄວາມສ້ຽມແຫຼມໃນການວາງແຜນນະໂຍບາຍ ແລະແນວທາງຍຸດທະສາດ.
ທີໜຶ່ງ, ຈໍາເປັນຕ້ອງເຂົ້າໃຈຢ່າງເລິກເຊິ່ງກ່ຽວກັບທັດສະນະຍຸດທະສາດ: ການພັດທະນາເສດຖະກິດ, ສັງຄົມ ແລະ ການປົກປັກຮັກສາສິ່ງແວດລ້ອມ ເປັນສູນກາງ; ການກໍ່ສ້າງພັກແມ່ນກຸນແຈສຳຄັນ; ການພັດທະນາວັດທະນະທຳ ແລະ ມະນຸດ ເປັນພື້ນຖານ; ການເພີ່ມທະວີການປ້ອງກັນປະເທດ, ປ້ອງກັນຄວາມໝັ້ນຄົງ ແລະ ຊຸກຍູ້ວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນ ແມ່ນສິ່ງສຳຄັນແລະສະໝ່ຳສະເໝີ.
ທີສອງ, ຍູ້ແຮງການກໍ່ສ້າງ ແລະ ປັບປຸງສະຖາບັນການພັດທະນາໃຫ້ສົມບູນແບບ, ໃນນັ້ນ ຈຸດສຸມແມ່ນກຳຈັດທຸກອຸປະສັກ ແລະສິ່ງກີດຂວາງ ເພື່ອປົດປ່ອຍຊັບພະຍາກອນການພັດທະນາ, ໂດຍສະເພາະຊັບພະຍາກອນມະນຸດ; ສ້າງບາດກ້າວບຸກທະລຸໃນການເຕີບໂຕເສດຖະກິດ. ຕັດສິນໃຈ ແລະ ເດັດດ່ຽວຊຸກຍູ້ ແລະ ສ້າງບັນຍາກາດໃໝ່ໃນທົ່ວສັງຄົມກ່ຽວກັບການພັດທະນາວິທະຍາສາດ, ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະ ການຫັນປ່ຽນດິຈິຕອນແຫ່ງຊາດ - ປັດໃຈຕັດສິນ, ແຮງຂັບເຄື່ອນໃຫ້ປະເທດພັດທະນາຢ່າງວ່ອງໄວ ແລະ ຮັ່ງມີເຂັ້ມແຂງ ໃນຍຸກໃໝ່. ຕ້ອງມີການບຸກທະລຸແຂງແຮງກວ່າອີກໃນການສ້າງລະບົບພື້ນຖານໂຄງລ່າງເຕັກນິກທີ່ສອດຄ່ອງກັນ ແລະທັນສະໄໝ, ສ້າງເງື່ອນໄຂໃຫ້ແກ່ຂະບວນການຫັນເປັນດິຈິຕອນ, ການຫັນເປັນສີຂຽວ ແລະ ການຫັນເປັນພະລັງງານ.
ທີສາມ, ເອົາໃຈໃສ່ເຊື່ອມຕໍ່ການເຕີບໂຕທາງເສດຖະກິດ ກັບການພັດທະນາວັດທະນະທຳ, ສັງຄົມ, ມະນຸດ, ປົກປັກຮັກສາສິ່ງແວດລ້ອມນິເວດ, ເບິ່ງແຍງດູແລຄວາມຜາສຸກຂອງປະຊາຊົນທຸກຄົນ. ເສີມຂະຫຍາຍຄຸນຄ່າວັດທະນະທຳ, ກຳລັງແຮງຂອງຊາວຫວຽດນາມ, ກຸ່ມກອ້ນມະຫາສາມັກຄີປວງຊົນທັງຊາດ, ນ້ຳໃຈຮັກຊາດ, ຄວາມປາດຖະໜາພັດທະນາໃນຍຸກໃໝ່. ສືບຕໍ່ປັບປຸງ ແລະ ເພີ່ມທະວີການປ້ອງກັນປະເທດ, ປ້ອງກັນຄວາມໝັ້ນຄົງ; ຮັບປະກັນເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດ. ປັບປຸງຍົກສູງປະສິດທິຜົນວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນ ເພື່ອຮັກສາສະພາບແວດລ້ອມສັນຕິພາບ ແລະ ສະຖຽນລະພາບໃຫ້ປະເທດພັດທະນາຢ່າງວ່ອງໄວ ແລະ ຍືນຍົງ.
ທີສີ່, ເພີ່ມທະວີວຽກງານກໍ່ສ້າງພັກ ແລະ ລະບົບການເມືອງທີ່ປອດໃສ, ໝັ້ນຄົງເຂັ້ມແຂງ ແລະ ຮອບດ້ານ. ກໍ່ສ້າງຖັນແຖວພະນັກງານ ແລະ ສະມາຊິກພັກທີ່ມີຄຸນສົມບັດ, ຄວາມສາມາດ ແລະ ກຽດສັກສີ, ເທົ່າທຽມກັບໜ້າທີ່; ເພີ່ມທະວີການປ່ຽນແປງໃໝ່ໃນແບບວິທີການນຳພາ ແລະ ການກຳອຳນາດຂອງພັກ. ດຳເນີນການປະຕິວັດໃນການປັບປຸງ ແລະ ຈັດຕັ້ງກົງຈັກຂອງລະບົບການເມືອງໃຫ້ສົມບູນແບບຕາມທິດທາງ “ກະທັດລັດ-ຮັດກຸມດີ-ເຂັ້ມແຂງ-ມີຄວາມສັກສິດ-ປະສິດທິພາບ-ປະສິດທິຜົນ” ຕິດພັນກັບການຍົກສູງຄຸນນະພາບຂອງຖັນແຖວພະນັກງານ, ລັດຖະກອນ ຕາມມະຕິຕົກລົງສະບັບທີ 18-NQ/TW, ລົງວັນທີ 25 ຕຸລາ 2017 ຂອງກອງປະຊຸມສູນກາງພັກຄັ້ງທີ 6 ສະໄໝທີ XII “ບາງບັນຫາກ່ຽວກັບການສືບຕໍ່ປ່ຽນແປງໃໝ່ ແລະ ສັບຊ້ອນການຈັດຕັ້ງກົງຈັກຂອງລະບົບການເມືອງໃຫ້ກະທັດລັດຮັດກຸມ, ເຄື່ອນໄຫວມີປະສິດທິພາບ ແລະ ປະສິດທິຜົນ”; ສົ່ງເສີມໃຫ້ພະນັກງານ, ລັດຖະກອນກ້າຄິດ, ກ້າເຮັດ, ກ້າປ່ຽນແປງໃໝ່ປະດິດສ້າງ ແລະ ກ້າຮັບຜິດຊອບ ເພື່ອຜົນປະໂຫຍດສ່ວນລວມ. ຍູ້ແຮງການແບ່ງຂັ້ນຄຸ້ມຄອງ ແລະ ມອບອຳນາດຕາມຈິດໃຈ “ທ້ອງຖິ່ນຕັດສິນ, ທ້ອງຖິ່ນເຮັດ, ທ້ອງຖິ່ນຮັບຜິດຊອບ”, ປົດປ່ອຍທ່າແຮງພັດທະນາຂອງທ້ອງຖິ່ນ, ຂະແໜງການ, ຂັ້ນ ແລະ ຂົງເຂດ, ສູ້ຊົນບັນລຸອົດຕາດການເຕີບໂຕທາງເສດຖະກິດສອງຕົວເລກໃນຊຸມປີຕໍ່ໜ້າ.
ກອງປະຊຸມວິທະຍາສາດແຫ່ງຊາດ: “ພັກກອມມູນິດຫວຽດນາມ - 95 ປີແຫ່ງການຍຶດໝັ້ນໃນເປົ້າໝາຍເອກະລາດແຫ່ງຊາດ ແລະ ລັດທິສັງຄົມນິຍົມ, ກໍ່ສ້າງປະເທດໃຫ້ຈະເລີນຮຸ່ງເຮືອງ ແລະ ມີຄວາມຜາສຸກ”, ສືບຕໍ່ຢືນຢັນ ແລະ ຂະຫຍາຍຄວາມໝາຍ ແລະ ຄຸນຄ່າຂອງໜັງສືປະຫວັດສາດອັນລ້ຳຄ່າຂອງພັກ ແລະ ບັນດາຜົນງານອັນຍິ່ງໃຫຍ່ຂອງປະເທດຊາດ ພາຍໃຕ້ການນຳພາຂອງພັກໃນ 95 ປີທີ່ຜ່ານມາ; ການໂຄສະນາເຜີຍແຜ່ ແລະ ສຶກສາມູນເຊື້ອອັນສະຫງ່າລາສີຂອງພັກ; ຕໍ່ສູ້ກັບທັດສະນະທີ່ຜິດພາດຂອງອິດທິກຳລັງສັດຕູ, ປະຕິກິຣິຍາ; ປຸກຕື່ນນ້ຳໃຈຮັກຊາດ, ຄວາມປາຖະໜາທີ່ຈະມີສ່ວນຮ່ວມຂອງພະນັກງານ, ສະມາຊິກພັກ ແລະ ປະຊາຊົນທຸກຄົນ ໃນພາລະກິດການສ້າງສາ, ພັດທະນາ ແລະ ປົກປັກຮັກສາປະເທດຊາດ.
ດ້ວຍຄວາມໝາຍນັ້ນ, ກອງປະຊຸມສຳມະນາ ຫົວຂໍ້ “ພັກກອມມູນິດຫວຽດນາມ - 95 ປີແຫ່ງການຍຶດໝັ້ນໃນເປົ້າໝາຍເອກະລາດແຫ່ງຊາດ ແລະ ລັດທິສັງຄົມນິຍົມ, ກໍ່ສ້າງປະເທດທີ່ຈະເລີນຮຸ່ງເຮືອນ ແລະ ມີຄວາມຜາສຸກ” ໄດ້ສຸມໃສ່ປຶກສາຫາລື ແລະ ຊີ້ແຈງບັນດາບັນຫາສຳຄັນຕໍ່ໄປນີ້:
ທີໜຶ່ງ, ຊີ້ແຈງສະຖານະ, ຄຸນຄ່າ ແລະ ຄວາມໝາຍຍິ່ງໃຫຍ່ຂອງການກໍ່ຕັ້ງພັກກອມມູນິດຫວຽດນາມ ເຊິ່ງເປັນເຫດການທີ່ເປີດຈຸດປ່ຽນໃໝ່ໃນປະຫວັດສາດການປະຕິວັດຫວຽດນາມ ແລະ ໃນການຕໍ່ສູ້ເພື່ອເອກະລາດ ແລະ ການປົດປ່ອຍຊາດ.
ທີສອງ, ສະຫຼຸບ, ຕີລາຄາ ແລະ ຖອດຖອນບົດຮຽນປະສົບການ, ຈາກນັ້ນ ຢັ້ງຢືນບົດບາດ, ຄວາມກ້າຫານ, ສະຕິປັນຍາ ແລະ ແນວທາງທີ່ຖືກຕ້ອງ, ປະດິດສ້າງຂອງພັກກອມມູນິດຫວຽດນາມ ໃນ 95 ປີແຫ່ງການນຳພາການປະຕິວັດຫວຽດນາມ.
ທີສາມ, ສະເໜີ ແລະ ແນະນຳທັດສະນະ, ທິດທາງ, ມາດຕະການແກ້ໄຂ ໂດຍສະເພາະວິທີການບຸກທະລຸການພັດທະນາ ເພື່ອໃຫ້ພັກສາມາດນຳພາປະເທດບັນລຸໄດ້ສິ່ງມະຫັດສະຈັນໃນຍຸກແຫ່ງການພັດທະນາໃໝ່ - ຍຸກແຫ່ງການບືນຕົວຂຶ້ນຂອງປະເທດຊາດຫວຽດນາມ.
-------------------------
* ຫົວຂໍ້ໂດຍວາລະສານຄອມມູນິດ
