ການຄຸ້ມຄອງນະໂຍບາຍເງິນຕາ ແລະ ກິດຈະກໍາການທະນາຄານ
ເພື່ອຊ່ວຍຄວບຄຸມອັດຕາເງິນເຟີ້, ຮັກສາສະຖຽນລະພາບເສດຖະກິດມະຫາພາກ
ແລະ ປະກອບສ່ວນຊ່ວຍເຫຼືອປະເທດຜ່ານຜ່າຄວາມຫຍຸ້ງຍາກ
ເນື່ອງຈາກການແຜ່ລະບາດຂອງໂຄວິດ-19
ເພື່ອຊ່ວຍຄວບຄຸມອັດຕາເງິນເຟີ້, ຮັກສາສະຖຽນລະພາບເສດຖະກິດມະຫາພາກ
ແລະ ປະກອບສ່ວນຊ່ວຍເຫຼືອປະເທດຜ່ານຜ່າຄວາມຫຍຸ້ງຍາກ
ເນື່ອງຈາກການແຜ່ລະບາດຂອງໂຄວິດ-19
ສະຫາຍເລຂາທິການໃຫຍ່ ຫງວຽນ ຝູ ຈ້ອງ ພ້ອມກັບບັນດາຜູ້ແທນທີ່ມາຮ່ວມ ພິທີສະເຫຼີມສະຫຼອງ ວັນສ້າງຕັ້ງທະນາຄານແຫ່ງລັດຫວຽດນາມ ຄົບຮອບ 70 ປີ (6 ພຶດສະພາ 1951 – 6 ພຶດສະພາ 2021) _ພາບ: TTXVN
ນະໂຍບາຍເງິນຕາແລະການເຄື່ອນໄຫວທະນາຄານ ໄປພ້ອມກັນກັບວິສາຫະກິດແລະປະຊາຊົນ
ເພື່ອຜ່ານຜ່າຄວາມຫຍຸ້ງຍາກໃນໄລຍະການແຜ່ລະບາດຂອງພະຍາດ
ປີທີສອງນັບຕັ້ງແຕ່ເກີດການລະບາດແລະການແຜ່ກະຈາຍຂະໜາດໃຫຍ່ຂອງພະຍາດໂຄວິດ-19, ເສດຖະກິດໂລກຍັງສັບສົນ ແລະ ມີການຜັນແຍກຢ່າງແຂງແຮງ. ປະເທດທີ່ພັດທະນາແລ້ວທີ່ມີອັດຕາການສັກວັກຊີນສູງ ສາມາດເປີດປະຕູປະເທດແລະ ຟື້ນຕົວໄດ້ໃນໄວໆນີ້, ໃນຂະນະທີ່ປະເທດທີ່ຫາກໍພົ້ນເດັ່ນແລະກໍາລັງພັດທະນາ ມີອັດຕາການສັກວັກຊີນຕ່ຳກວ່າ, ໂລກລະບາດຍັງສັບສົນ ແລະ ການເຕີບໂຕເສດຖະກິດຍັງມີຄວາມຫຍຸ້ງຍາກຫຼາຍຢ່າງ. ການຄ້າໂລກຟື້ນຕົວຍ້ອນຄວາມຕ້ອງການທີ່ເພີ່ມຂຶ້ນຈາກບັນດາປະເທດໃຫຍ່, ແຕ່ລະບົບການສະໜອງຍັງຖືກຕັດຂາດ, ການໄຫຼວຽນການຂົນສົ່ງສິນຄ້າຍັງມີຄວາມຫຍຸ້ງຍາກ ເຊິ່ງໄດ້ຊຸກຍູ້ອັດຕາເງິນເຟີ້ ແລະ ຄ່າໃຊ້ຈ່າຍໃນການຜະລິດເພີ່ມຂຶ້ນໃນທົ່ວໂລກ, ເພີ່ມລາຄາສິນຄ້າແລະວັດຖຸດິບຂອງໂລກເຊັ່ນ: ນ້ຳມັນ, ອາຫານ, ອາຫານສັດ, ເຫຼັກແລະເຫຼັກກ້າ, ຄ່າຂົນສົ່ງເພີ່ມຂຶ້ນສູງທີ່ສຸດໃນຮອບຫຼາຍປີ. ນະໂຍບາຍເງິນຕາມີແນວໂນ້ມທີ່ຈະຄ່ອຍໆຫຼຸດຜ່ອນຂະໜາດການຜ່ອນຄາຍ ຫຼືເພີ່ມອັດຕາດອກເບ້ຍນະໂຍບາຍ ເພື່ອຮັບມືກັບແຮງກົດດັນດ້ານເງິນເຟີ້. ໃນປີ 2021, ທະນາຄານກາງໃນປະເທດຕ່າງໆເຊັ່ນ: ອັງກິດ, ການາດາ, ສະຫະລັດອາເມລິກາ, ພາກພື້ນເອີຣົບ ໄດ້ຫຼຸດຜ່ອນຂະໜາດຂອງມາດຕະການຜ່ອນຄາຍດ້ານປະລິມານ; ໂລກມີການປັບຂຶ້ນອັດຕາດອກເບ້ຍນະໂຍບາຍທັງໝົດ 74 ລາຍການ.
ສຳລັບຫວຽດນາມ, ປີ 2021 ແມ່ນປີທີ່ເຕັມໄປດ້ວຍຄວາມຫຍຸ້ງຍາກ ແລະ ສິ່ງທ້າທາຍອັນເນື່ອງຈາກຜົນກະທົບຂອງໄວຣັດກາຍພັນເດນຕ້າ ເຊິ່ງຖືວ່າອັນຕະລາຍທີ່ສຸດນັບຕັ້ງແຕ່ເກີດການລະບາດໃຫຍ່ຂອງໂຄວິດ-19. ອາດຈະເວົ້າໄດ້ວ່າ, ໃນສະພາບການປະເທດພວມປະສົບກັບຄວາມຫຍຸ້ງຍາກຢ່າງໃຫຍ່ຫຼວງ, ຄວາມສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກ ໄດ້ສ້າງປະຖົມປັດໄຈອັນໜັກແໜ້ນ, ນຳພາທົ່ວລະບົບການເມືອງເປັນເອກະພາບ, ເດັດດ່ຽວ ຕັ້ງໜ້າຮ່ວມມືກັນຕ້ານໂລກລະບາດ, ຍຶດໝັ້ນຮີດຄອງປະເພນີອັນດີງາມຂອງປະເທດຊາດ ສາມັກຄີ, ຮັກແພງເຊິ່ງກັນແລະກັນໃນສະພາບຫຍຸ້ງຍາກ, ໂລກລະບາດ. ເປົ້າໝາຍປົກປັກຮັກສາສຸຂະພາບຂອງປະຊາຊົນແມ່ນບຸລິມະສິດອັນດັບໜຶ່ງຂອງພັກ ແລະ ລັດ, ຮຽກຮ້ອງໃຫ້ການຜະລິດປອດໄພ, ຍູ້ແຮງການຜັນຂະຫຍາຍບັນດາມາດຕະການຮັບປະກັນຄວາມປອດໄພທາງສັງຄົມ, ໜູນຊ່ວຍວິສາຫະກິດ ແລະ ປະຊາຊົນ ຮັບມືກັບຜົນກະທົບທາງລົບຈາກໂລກລະບາດ. ພາຍໃຕ້ເງື່ອນໄຂທີ່ຫຍຸ້ງຍາກນັ້ນ, ເມື່ອທຽບໃສ່ໄລຍະດຽວກັນຂອງປີ 2020, ລວມຍອດຜະລິດຕະພັນພາຍໃນ (ຈີດີພີ) ໃນ 9 ເດືອນຕົ້ນປີ 2021 ໄດ້ເພີ່ມຂຶ້ນພຽງ 1,42% ເທົ່ານັ້ນ, ແຕ່ເສດຖະກິດມະຫາພາກມີສະຖຽນລະພາບ, ອັດຕາເງິນເຟີ້ຕ່ຳ ໂດຍສະເລ່ຍ 10 ເດືອນແມ່ນ 1,81%; ຕະຫຼາດເງິນຕາແລະອັດຕາແລກປ່ຽນເງິນຕາຕ່າງປະເທດສືບຕໍ່ດຳເນີນໄປຢ່າງສະດວກ ແລະ ມີສະຖຽນລະພາບ.
ກຳແໜ້ນການຊີ້ນຳຂອງພັກ, ສະພາແຫ່ງຊາດ, ລັດຖະບານ, ນາຍົກລັດຖະມົນຕີ, ຕັ້ງແຕ່ຕົ້ນປີ ທະນາຄານແຫ່ງລັດໄດ້ເປັນເຈົ້າການແລະຕັ້ງໜ້າ ຊີ້ນຳລະບົບບັນດາອົງການສິນເຊື່ອ ໃນການຜັນຂະຫຍາຍບັນດາມາດຕະການບໍລິຫານນະໂຍບາຍເງິນຕາຢ່າງຄົບຊຸດແລະມີປະສິດທິຜົນ, ສົມທົບຢ່າງແໜ້ນແຟ້ນກັບນະໂຍບາຍງົບປະມານແລະນະໂຍບາຍມະຫາພາກອື່ນໆ ເພື່ອຮັບປະກັນການຄວບຄຸມອັດຕາເງິນເຟີ້, ປະກອບສ່ວນຮັກສາສະຖຽນລະພາບຂອງເສດຖະກິດ, ພ້ອມກັນນັ້ນກໍຜັນຂະຫຍາຍບັນດາມາດຕະການແກ້ໄຂ ເພື່ອໜູນຊ່ວຍການຜະລິດ ແລະ ຂະຈັດຄວາມຫຍຸ້ງຍາກ, ໄປຄຽງຄູ່ກັບບັນດາວິສາຫະກິດ ແລະ ປະຊາຊົນ. ການບໍລິຫານນະໂຍບາຍເງິນຕາຂອງທະນາຄານແຫ່ງລັດຫວຽດນາມ ສອດຄ່ອງກັບທ່າອຽງຂອງທະນາຄານກາງຫຼາຍແຫ່ງໃນໂລກ, ໃນອີກດ້ານໜຶ່ງ ມີຈຸດພິເສດສະເພາະຂອງຕົນເອງ ທີ່ເໝາະສົມກັບລັກສະນະສະເພາະ ແລະ ລັກສະນະຮີບດ່ວນ ຂອງສະຖານະການໃນປະເທດ ລວມທັງກຸ່ມວິທີແກ້ໄຂດັ່ງຕໍ່ໄປນີ້:
ທີໜຶ່ງ, ຮັບປະກັນສະພາບຄ່ອງໃນຕະຫຼາດເງິນຕາ, ສ້າງເງື່ອນໄຂໃຫ້ບັນດາອົງການສິນເຊື່ອສືບຕໍ່ຫຼຸດອັດຕາດອກເບ້ຍເງິນກູ້ ແລະ ກຽມເງິນທຶນສະໜັບສະໜູນບັນດາອົງການສິນເຊື່ອ ເພື່ອຊຸກຍູ້ການປ່ອຍສິນເຊື່ອ. ການແຜ່ລະບາດໃຫຍ່ຂອງໂຄວິດ-19 ໄດ້ເຮັດໃຫ້ກິດຈະກຳຕ່າງໆຫຼາຍຢ່າງຕ້ອງຢຸດຊະງັກ, ການຈະລາຈອນຂອງປະຊາຊົນຖືກ ຈຳກັດ, ການຜະລິດແລະການໝູນວຽນສິນຄ້າຖືກຂາດຕອນ, ກະແສເງິນສົດຖືກຂັດຂວາງ. ທະນາຄານກາງສ່ວນໃຫຍ່ໄດ້ນຳໃຊ້ວິທີການແກ້ໄຂການຊຳລະເງິນ ແນໃສ່ສະໜັບສະໜູນໃຫ້ຕະຫຼາດດຳເນີນງານຢ່າງສະດວກ, ຮັກສາກະແສເງິນສົດ, ສະໜັບສະໜູນທະນາຄານແລະວິສາຫະກິດຕ່າງໆໃນການຊຳລະເງິນ. ໃນຂະນະດຽວກັນ, ຄວາມສາມາດຊຳລະໄດ້ຖືກຮັກສາໄວ້ຢ່າງລົ້ນເຫຼືອໃນລະບົບສະຖາບັນສິນເຊື່ອ ບົນພື້ນຖານທີ່ທະນາຄານແຫ່ງລັດຊື້ສະກຸນເງິນຕ່າງປະເທດຈຳນວນຫຼາຍ ແລະ ນຳເງິນດົ່ງເຂົ້າສູ່ຕະຫຼາດ, ພ້ອມກັນນັ້ນ ກໍໄດ້ສະເໜີຊື້ເອກະສານທີ່ມີຄ່າໃນຕະຫຼາດເປີດປະຈໍາວັນ ເພື່ອສົ່ງສັນຍາຄວາມພ້ອມໃນການສະໜັບສະໜູນສະພາບຄ່ອງ ແລະ ເຮັດໃຫ້ຕະຫຼາດເງິນຕາມີສະຖຽນລະພາບ. ສິ່ງນີ້ສະທ້ອນໃຫ້ເຫັນເຖິງຄວາມຈິງທີ່ວ່າ ອັດຕາດອກເບ້ຍລະຫວ່າງທະນາຄານ ເຊິ່ງເປັນອັດຕາດອກເບ້ຍເງິນກູ້ໄລຍະສັ້ນຮ່ວມກັນລະຫວ່າງສະຖາບັນສິນເຊື່ອ ຫຼຸດລົງສູ່ລະດັບທີ່ຕໍ່າຫຼາຍໃນປະຫວັດສາດ, ປະມານ 0,5% ຕໍ່ປີ ເຖິງ 0,9% ຕໍ່ປີ ໃນທ້າຍເດືອນກັນຍາ, ຫຼຸດຜ່ອນຄ່າໃຊ້ຈ່າຍການຈັດຫາເງິນທຶນສໍາລັບສະຖາບັນສິນເຊື່ອ, ດັ່ງນັ້ນ, ສ້າງເງື່ອນໄຂທີ່ເອື້ອອຳນວຍໃຫ້ສະຖາບັນສິນເຊື່ອຫຼຸດຜ່ອນອັດຕາດອກເບ້ຍເງິນກູ້.
ທີສອງ, ຮັກສາສະຖຽນລະພາບຂອງອັດຕາດອກເບ້ຍປະຕິບັດການໃນລະດັບຕ່ຳ, ສ້າງເງື່ອນໄຂທີ່ເອື້ອອຳນວຍຕໍ່ການຫຼຸດຜ່ອນອັດຕາດອກເບ້ຍເງິນກູ້ ແລະ ອັດຕາດອກເບ້ຍເງິນຝາກ ຂອງບັນດາອົງການສິນເຊື່ອ. ດ້ວຍຈຸດພິເສດຂອງພື້ນຖານເສດຖະກິດທີ່ ກຳລັງພັດທະນາ, ຄວາມຕ້ອງການເງິນທຶນຫຼາຍແຕ່ຕ້ອງຂຶ້ນກັບລະບົບທະນາຄານ ດັ່ງນັ້ນຈຶງບໍ່ແມ່ນເລື່ອງງ່າຍທີ່ຈະຫຼຸດຜ່ອນອັດຕາດອກເບ້ຍເງິນກູ້ຢູ່ຫວຽດນາມ. ເພື່ອລົບລ້າງຄວາມຫຍຸ້ງຍາກຂອງວິສາຫະກິດແລະປະຊາຊົນໂດຍໄວ, ໃນປີ 2020 ເມື່ອໂລກລະບາດຫາກໍເກີດຂຶ້ນ, ທະນາຄານແຫ່ງລັດໄດ້ຫຼຸດອັດຕາດອກເບ້ຍປະຕິບັດການ 3 ຄັ້ງ ໂດຍຫຼຸດຈາກ 1,5% ຕໍ່ປີ ເປັນ 2% ຕໍ່ປີ ແລະ ເປັນໜຶ່ງໃນບັນດາທະນາຄານກາງທີ່ຫຼຸດຜ່ອນອັດຕາດອກເບ້ຍຫຼາຍທີ່ສຸດໃນພາກພື້ນ; ໃນປີ 2021, ທະນາຄາງແຫ່ງລັດຫວຽດນາມຮັກສາອັດຕາດອກເບ້ຍຕໍ່າເຫຼົ່ານີ້ໄວ້ບໍ່ປ່ຽນແປງ, ສົມທົບກັບການຮັກສາສະພາບຄ່ອງຢ່າງພຽງພໍໃນຕະຫຼາດເງິນຕາ. ຜົນໄດ້ຮັບແມ່ນ, ມາຮອດທ້າຍເດືອນກັນຍາປີ 2021, ອັດຕາດອກເບ້ຍເງິນຝາກແລະເງິນກູ້ ໂດຍສະເລ່ຍເປັນເງິນດົ່ງຂອງບັນດາສະຖາບັນສິນເຊື່ອ ຫຼຸດລົງປະມານ 0,46% ຕໍ່ປີ ແລະ 0,72% ຕໍ່ປີ ຕາມລຳດັບ ທຽບກັບທ້າຍປີ 2020 ພາຍຫຼັງທີ່ໄດ້ຫຼຸດລົງປະມານ 1% ຕໍ່ປີ ໃນປີ 2020. ອັດຕາດອກເບ້ຍເງິນກູ້ສະເລ່ຍສຳລັບບັນດາຂະແໜງການບຸລິມະສິດຕາມນະໂຍບາຍຂອງລັດຖະບານ (ລວມທັງກະສິກຳ, ຊົນນະບົດ; ອຸດສາຫະກຳສະໜັບສະໜູນ; ວິສາຫະກິດຂະໜາດກາງ ແລະຂະໜາດນ້ອຍ; ການສົ່ງອອກ; ເຕັກໂນໂລຊີສູງ) ແມ່ນ 4,4% ຕໍ່ປີ.
ທີສາມ, ຮັບປະກັນການສະໜອງທຶນສິນເຊື່ອຢ່າງພຽງພໍ ແລະ ທັນເວລາ ໃຫ້ແກ່ຄວາມຕ້ອງການດ້ານການຜະລິດ ແລະ ທຸລະກິດໃນລະບົບເສດຖະກິດ, ດັດປັບເປົ້າໝາຍການເຕີບໂຕສິນເຊື່ອຢ່າງຍືດຫຍຸ່ນ ໃຫ້ສອດຄ່ອງກັບບັນດາສະຖາບັນສິນເຊື່ອ ຕາມທິດຂອງການເຕີບໂຕດ້ານສິນເຊື່ອຄວບຄູ່ໄປກັບຄຸນນະພາບ. ເນື່ອງຈາກຕະຫຼາດເງິນຕາຕ້ອງເພິ່ງພາລະບົບທະນາຄານເປັນຢ່າງຫຼາຍ, ການຄຸ້ມຄອງສິນເຊື່ອຕ້ອງມີຄວາມກົມກຽວ ແລະ ສົມເຫດສົມຜົນສະເໝີ. ການເຕີບໂຕຂອງສິນເຊື່ອສູງເກີນໄປ ເຮັດໃຫ້ເກີດຄວາມສ່ຽງໄພເງິນເຟີ້, ແຕ່ການເຕີບໂຕຂອງສິນເຊື່ອທີ່ຕໍ່າເກີນໄປ ອາດຈະສົ່ງຜົນກະທົບຕໍ່ແຫຼ່ງເງິນທຶນສໍາລັບການເຕີບໂຕທາງເສດຖະກິດ. ບົນພື້ນຖານເປົ້າໝາຍການເຕີບໂຕເສດຖະກິດ 6,5% ແລະ ອັດຕາເງິນເຟີ້ປະມານ 4% ທີ່ສະພາແຫ່ງຊາດແລະລັດຖະບານກຳນົດໄວ້, ທະນາຄານແຫ່ງລັດໄດ້ວາງເປົ້າໝາຍການເຕີບໂຕດ້ານສິນເຊື່ອ12% ໃນປີ 2021 ໂດຍມີການດັດປັບໃຫ້ສອດຄ່ອງກັບສະພາບການຕົວຈິງ.
ຄຽງຄູ່ກັນນັ້ນ, ທະນາຄານແຫ່ງລັດໄດ້ສືບຕໍ່ຊີ້ນຳບັນດາສະຖາບັນສິນເຊື່ອໃຫ້ເຕີບໂຕສິນເຊື່ອຢ່າງປອດໄພ ແລະ ມີປະສິດທິຜົນ, ລວມສຸນສິນເຊື່ອເຂົ້າໃນຂະແໜງການຜະລິດ ແລະ ບຸລິມະສິດ; ຄວບຄຸມສິນເຊື່ອຢ່າງເຂັ້ມງວດໃນຂົງເຂດທີ່ອາດຈະມີຄວາມສ່ຽງເຊັ່ນ: ອະສັງຫາລິມະສັບ, ຫຼັກຊັບ, ບັນດາໂຄງການ ກໍ່ສ້າງ - ໂອນ - ດໍາເນີນງານ (BOT), ໂຄງການກໍ່ສ້າງ - ດໍາເນີນງານ (BT) ໃນຂົງເຂດຄົມມະນາຄົມ; ເພີ່ມທະວີການຄຸ້ມຄອງຄວາມສ່ຽງດ້ານສິນເຊື່ອຜູ້ບໍລິໂພກ; ອຳນວຍຄວາມສະດວກໃຫ້ວິສາຫະກິດແລະປະຊາຊົນເຂົ້າເຖິງເງິນສິນເຊື່ອຂອງທະນາຄານ, ປະກອບສ່ວນຈຳກັດສິນເຊື່ອດຳ. ບົນພື້ນຖານນັ້ນ, ສິນເຊື່ອມີການເຕີບໂຕຕັ້ງແຕ່ຕົ້ນປີ ແລະ ສູງກວ່າໄລຍະດຽວກັນຂອງປີ 2020, ຕອບສະໜອງຄວາມຕ້ອງການຂອງພື້ນຖານເສດຖະກິດຢ່າງທັນການ. ຮອດທ້າຍເດືອນຕຸລາປີ 2021, ສິນເຊື່ອເຕີບໂຕ 8,72% ທຽບກັບທ້າຍປີ 2020, ເພີ່ມຂຶ້ນ 14,29% ທຽບກັບໄລຍະດຽວກັນຂອງປີ 2020 (ໄລຍະດຽວກັນຂອງປີ 2020 ເພີ່ມຂຶ້ນ 6,71% ທຽບກັບທ້າຍປີ 2019 ແລະເພີ່ມຂຶ້ນ 10,24% ທຽບກັບໄລຍະດຽວກັນຂອງປີ 2019). ໂຄງສ້າງສິນເຊື່ອໄດ້ຫັນປ່ຽນໄປໃນທາງບວກ ຕາມທິດສຸມເງິນທຶນໃສ່ການຜະລິດແລະທຸລະກິດ, ທັງ 5 ຂົງເຂດບຸລິມະສິດທີ່ມີລະດັບການເຕີບໂຕສິນເຊື່ອສູງກວ່າລະດັບການເຕີບໂຕໃນໄລຍະດຽວກັນຂອງປີ 2020, ສະໜັບສະໜູນຢ່າງຕັ້ງໜ້າໃຫ້ແກ່ຂະບວນວິວັດການປັບໂຄງສ້າງຂອງຂະແໜງກະສິກຳ, ພັດທະນາການປະມົງ ການລ້ຽງສັດນ້ຳ, ອຸດສາຫະກຳສະໜັບສະໜູນ, ວິສາຫະກິດຂະໜາດກາງແລະຂະໜາດນ້ອຍ, ວິສາຫະກິດສົ່ງອອກ, ວິສາຫະກິດທີ່ນຳໃຊ້ເຕັກໂນໂລຊີສູງ. ການເຕີບໂຕສິນເຊື່ອໃນບັນດາຂົງເຂດທີ່ອາດຈະມີຄວາມສ່ຽງເຊັ່ນ: ອະສັງຫາລິມະຊັບ, ຫຼັກຊັບ, ການບໍລິໂພກ ຍັງຢູ່ພາຍໃຕ້ການຄວບຄຸມຂອງທະນາຄານແຫ່ງລັດ.
ທີສີ່, ການຮັກສາສະຖຽນລະພາບຂອງຕະຫຼາດເງິນຕາຕ່າງປະເທດ. ລະບົບເສດຖະກິດຫວຽດນາມເປີດກວ້າງກັບຕ່າງປະເທດ (ລວມຍອດມູນຄ່າການນຳເຂົ້າ-ສົ່ງອອກໃນທ້າຍປີ 2020 ແມ່ນປະມານ 200% ຂອງ ຈີດີພີ), ການຄຸ້ມຄອງອັດຕາແລກປ່ຽນຂອງຫວຽດນາມ ຍາມໃດກໍປະເຊີນໜ້າກັບບັນດາສິ່ງທ້າທາຍຈາກພາຍນອກຄື: ບັນດາປະເທດໃຫຍ່ພວມຄ່ອຍໆຮັດແຄບບັນດາມາດຕະການຜ່ອນຄາຍເງິນຕາ, ເງິນໂດລາແຂງຄ່າ... ໃນຕະຫຼາດພາຍໃນປະເທດ, ປັດໄຈທາງຈິດວິທະຍາມັກປາກົດຢູ່ສະເໝີ ເມື່ອຕະຫຼາດເງິນຕາໂລກຜັນຜວນ. ຕໍ່ໜ້າສະຖານະການດັ່ງກ່າວ, ການຄຸ້ມຄອງອັດຕາແລກປ່ຽນຍັງສືບຕໍ່ຮັບປະກັນຄວາມຄ່ອງຕົວ, ຕິດຕາມການສະໜອງ ແລະ ຄວາມຕ້ອງການຂອງຕະຫຼາດ, ຍອດດຸນເສດຖະກິດມະຫາພາກ, ເງິນຕາ ແລະ ເປົ້າໝາຍນະໂຍບາຍການເງິນຢ່າງໃກ້ຊິດ. ໃນຂະນະທີ່ທ່າອ່ຽງການຖອນເງິນທຶນຈາກບັນດາປະເທດຫາກໍພົ້ນເດັ່ນແລະປະເທດກຳລັງພັດທະນາ ເຮັດໃຫ້ຄ່າເງິນຂອງຫຼາຍປະເທດໃນພາກພື້ນຫຼຸດລົງຢ່າງຫຼວງຫຼາຍ ເມື່ອທຽບກັບໂດລາສະຫະລັດ (ເງິນໂດລາສະຫະລັດເພີ່ມຂຶ້ນ 4,65%, ເງິນບາດໄທຫຼຸດລົງ 11,2%, ເງິນຣິງກິດມາເລເຊຍຫຼຸດລົງ 2,68%, ເງິນໂດລາສິງກະໂປຫຼຸດລົງ 1.95%) ແຕ່ອັດຕາແລກປ່ຽນເງິນດົ່ງ/ໂດລາສະຫະລັດສືບຕໍ່ຄົງຕົວ, ຮອດທ້າຍເດືອນຕຸລາ, ອັດຕາແລກປ່ຽນກາງທຽບເທົ່າກັບທ້າຍປີທີ່ແລ້ວ. ສະພາບການຊຳລະຂອງຕະຫຼາດແມ່ນຄ່ອງຕົວ, ຄວາມຕ້ອງການເງິນຕາຕ່າງປະເທດຕາມກົດໝາຍໄດ້ຮັບການຕອບສະໜອງຢ່າງຄົບຖ້ວນ ແລະ ທັນການ.
ທີຫ້າ, ຜັນຂະຫຍາຍຫຼາຍວິທີການແກ້ໄຂຄວາມຫຍຸ້ງຍາກ, ຊ່ວຍເຫຼືອລູກຄ້າທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19. ທະນາຄານແຫ່ງລັດໄດ້ຊີ້ນຳບັນດາສະຖາບັນສິນເຊື່ອໄປຄຽງຄູ່ ຮ່ວມມືກັບວິສາຫະກິດ ແລະ ປະຊາຊົນ ໂດຍຜ່ານການຜັນຂະຫຍາຍຫຼາຍວິທີການຊ່ວຍເຫຼືອລູກຄ້າທີ່ຖືກຜົນກະທົບຈາກການແຜ່ລະບາດຂອງໂຄວິດ, ໄດ້ທົບທວນແລະແກ້ໄຂຢ່າງຕໍ່ເນື່ອງ ເພື່ອເຮັດໃຫ້ມາດຕະການສະໜັບສະໜູນມີປະສິດທິຜົນຫຼາຍຂຶ້ນ, ປະກອບດ້ວຍ:
ໜຶ່ງ, ປະກາດໃຊ້ໜັງສືວຽນອະນຸຍາດໃຫ້ບັນດາສະຖາບັນສິນເຊື່ອປັບໂຄງສ້າງການຊຳລະໜີ້, ຍົກເວັ້ນ ແລະ ຫຼຸດຜ່ອນດອກເບ້ຍແລະຄ່າທຳນຽມ, ຮັກສາໜີ້ສິນໃຫ້ແກ່ບັນດາລູກຄ້າທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19. ດ້ວຍການແກ້ໄຂແລະເພີ່ມເຕີມ 2 ຄັ້ງ, ຂະໜາດແລະຂອບເຂດຂອງຜູ້ຮັບຜົນປະໂຫຍດຈາກມາດຕະການສະໜັບສະໜູນ ໄດ້ຮັບການຂະຫຍາຍຢ່າງຫຼາຍ ແລະ ໄລຍະເວລາການສະໜັບສະໜູນກໍໄດ້ຂະຫຍາຍໄປຈົນເຖິງເດືອນມິຖຸນາປີ 2022. ຮອດທ້າຍເດືອນຕຸລາ, ໄດ້ປັບໂຄງສ້າງເງື່ອນໄຂການຊຳລະໜີ້, ຮັກສາກຸ່ມໜີ້ເດີມໄວ້ໃຫ້ກັບລູກຄ້າ 330.000 ຄົນ ດ້ວຍຍອດເງິນກູ້ທີ່ຍັງຄ້າງຄາ 540.000 ຕື້ດົ່ງ; ຍົກເວັ້ນ, ຫຼຸດຜ່ອນອັດຕາດອກເບ້ຍໃຫ້ແກ່ລູກຄ້າ 1,8 ລ້ານຄົນ ດ້ວຍຍອດເງິນກູ້ທີ່ຍັງຄ້າງຄາ 3,5 ລ້ານຕື້ດົ່ງ; ປ່ອຍເງິນກູ້ໃໝ່ທີ່ມີອັດຕາດອກເບ້ຍຕ່ຳກວ່າກ່ອນການເກີດໂລກລະບາດ ໂດຍມີຍອດຂາຍສະສົມຕັ້ງແຕ່ວັນທີ 23 ມັງກອນ 2020 ບັນລຸກວ່າ 7 ລ້ານຕື້ດົ່ງ ໃຫ້ແກ່ລູກຄ້າຫຼາຍກວ່າ 1 ລ້ານຄົນ.
ສອງ, ສະໜັບສະໜູນໃຫ້ນາຍຈ້າງຈ່າຍຄ່າແຮງຢຸດງານໃຫ້ແກ່ຜູ້ອອກແຮງງານ. ທະນາຄານແຫ່ງລັດໄດ້ຈັດຕັ້ງການສະໜອງເງິນທຶນຄືນໃໝ່ດ້ວຍອັດຕາດອກເບ້ຍ 0% ແລະ ບໍ່ຈໍາເປັນຕ້ອງມີຫຼັກຊັບຄໍ້າປະກັນສໍາລັບທະນາຄານນະໂຍບາຍສັງຄົມ ແນໃສ່ໃຫ້ຜູ້ຈ້າງງານກູ້ຢືມເງິນເພື່ອຈ່າຍຄ່າແຮງຢຸດງານໃຫ້ແກ່ຜູ້ອອກແຮງງານ, ຟື້ນຟູການຜະລິດແລະທຸລະກິດ. ຜູ້ອອກແຮງງານຫຼາຍພັນຄົນ ໄດ້ຮັບການຊ່ວຍເຫຼືອໃຫ້ຮັບຄ່າແຮງໃນລະຫວ່າງການຢຸດງານ ຈາກຊຸດເງິນກູ້ເຫຼົ່ານີ້, ຕາມໄລຍະການສະໜັບສະໜູນທຳອິດ (ສິ້ນສຸດໃນວັນທີ 31 ມັງກອນປີ 2021) ມີວິສາຫະກິດ 245 ແຫ່ງທີ່ກູ້ຢືມເພື່ອຈ່າຍຄ່າແຮງໃຫ້ຜູ້ອອກແຮງງານ 11.276 ຄົນ; ໄລຍະການສະໜັບສະໜູນໄດ້ຮັບການຈັດຕັ້ງຢ່າງດີ ຕັ້ງແຕ່ເດືອນກໍລະກົດປີ 2021 ຮອດວັນທີ 25 ຕຸລາປີ 2021, ມີວິສາຫະກິດ 1.244 ແຫ່ງທີ່ກູ້ຢືມເງິນເພື່ອຈ່າຍຄ່າແຮງໃຫ້ຜູ້ອອກແຮງງານ 177.845 ຄົນ (ເວລາສິ້ນສຸດຂອງໄລຍະໜູນຊ່ວຍນີ້ແມ່ນຮອດວັນທີ 31 ມີນາປີ 2022 ຫຼື ເມື່ອຍອດຈຳນວນເງິນເບີກຈ່າຍບັນລຸ 7.500 ຕື້ດົ່ງ).
ສາມ, ແກ້ໄຂຄວາມຫຍຸ້ງຍາກໃຫ້ບໍລິສັດການບິນຫວຽດນາມ Vietnam Airlines (VNA) ຜ່ານການສະໜອງເງິນທຶນຄືນໃໝ່ຂອງທະນາຄານແຫ່ງລັດ ຈຳນວນ 4.000 ຕື້ດົ່ງ ເພື່ອໃຫ້ບັນດາອົງການສິນເຊື່ອປ່ອຍເງິນກູ້ໃຫ້ບໍລິສັດການບິນຫວຽດນາມ ຜ່ານຜ່າໄລຍະຫຍຸ້ງຍາກ.
ສີ່, ສືບຕໍ່ປະຕິບັດບັນດາໂຄງການຍົກເວັ້ນ ແລະ ຫຼຸດຜ່ອນຄ່າບໍລິການການຊຳລະໃຫ້ແກ່ປະຊາຊົນ ແລະ ວິສາຫະກິດ ໂດຍມີຄ່າທຳນຽມບໍລິການຊຳລະເງິນທັງໝົດຂອງທະນາຄານແຫ່ງລັດ ແລະ ບໍລິສັດຫຸ້ນສ່ວນຊຳລະແຫ່ງຊາດຫວຽດນາມ (Napas) ຄາດວ່າຈະຫຼຸດລົງປະມານ 1.557 ຕື້ດົ່ງ ເພື່ອຂະຈັດຄວາມຫຍຸ້ງຍາກທີ່ເກີດຈາກການລະບາດໃຫຍ່ຂອງໂຄວິດ-19 ໃນປີ 2021. ອາໃສສິ່ງດັ່ງກ່າວ, ບັນດາສະຖາບັນສິນເຊື່ອສືບຕໍ່ປະຕິບັດການຍົກເວັ້ນ, ຫຼຸດຜ່ອນຄ່າທຳນຽມບໍລິການຊຳລະເງິນ ສໍາລັບລູກຄ້າຄ້າ; ເພີ່ມທະວີການນຳໃຊ້ເຕັກໂນໂລຊີການຊຳລະເງິນທີ່ບໍ່ໃຊ້ເງິນສົດ, ດັ່ງນັ້ນ ຄຽງຄູ່ກັບການຊໍາລະເງິນໂດຍຜ່ານ POS, ຕູ້ ATM, ການໂອນເງິນ, ອິນເຕີເນັດ, ລະຫັດ QR, ແຕ່ປີ 2021, ທະນາຄານແຫ່ງລັດຫວຽດນາມສືບຕໍ່ອະນຸຍາດໃຫ້ບັນດາທະນາຄານເປີດບັນຊີອອນໄລນ໌ ດ້ວຍເຕັກໂນໂລຊີ eKYC, ແລະ ຍື່ນສະເໜີຕໍ່ນາຍົກລັດຖະມົນຕີ ເພື່ອຂໍອະນຸຍາດໃຫ້ທົດລອງການຊຳລະເງິນຜ່ານບັນຊີໂທລະຄົມມະນາຄົມ (Mobile Money)...
ຕົວເລກຂ້າງເທິງໄດ້ສະແດງໃຫ້ເຫັນຄວາມພະຍາຍາມອັນໃຫຍ່ຫຼວງຂອງຂະແໜງການທະນາຄານໃນການຮ່ວມແຮງຮ່ວມໃຈແລະແບ່ງປັນກັບລະບົບເສດຖະກິດ ເພື່ອແກ້ໄຂຜ່ານຜ່າໂລກລະບາດ, ໂດຍສະເພາະໃນເມື່ອທີ່ຂະແໜງທະນາຄານເອງກໍຕ້ອງປະເຊີນໜ້າກັບຄວາມສ່ຽງທີ່ເກີດຈາກການແຜ່ລະບາດຂອງພະຍາດໂຄວິດ-19. ຄວາມສາມາດໃນການຊຳລະໜີ້ຂອງວິສາຫະກິດ ບຸກຄົນ ແລະ ຄົວເຮືອນຫຼຸດລົງ ພາໃຫ້ເພີ່ມຄວາມສ່ຽງຂອງໜີ້ເສຍ ແລະ ເຮັດໃຫ້ຄ່າໃຊ້ຈ່າຍໃນການສຳຮອງຄວາມສ່ຽງເພີ່ມຂຶ້ນ. ດ້ວຍບົດບາດເປັນສາຍເລືອດຂອງລະບົບເສດຖະກິດ, ການຮັບປະກັນຄວາມປອດໄພໃນການດຳເນີນງານຂອງທະນາຄານໃນລະຫວ່າງ ແລະ ຫຼັງການແຜ່ລະບາດຂອງພະຍາດໂຄວິດ-19 ແມ່ນສຳຄັນທີ່ສຸດ ເພື່ອຮັບປະກັນການສະໜອງ ແລະ ການໝູນວຽນເງິນທຶນເພື່ອຮັບໃຊ້ຄວາມຕ້ອງການຂອງການຟື້ນຟູເສດຖະກິດ.
ທະນາຄານແຫ່ງລັດຫວຽດນາມຮຽກຮ້ອງໃຫ້ທະນາຄານການຄ້າຕ່າງໆສືບຕໍ່ຫຼຸດອັດຕາດອກເບ້ຍລົງ ເພື່ອຊ່ວຍເຫຼືອວິສາຫະກິດ ແລະ ລູກຄ້າທີ່ປະສົບຄວາມຫຍຸ້ງຍາກ ຍ້ອນການກະທົບຈາກການແຜ່ລະບາດຂອງພະຍາດໂຄວິດ-19 _ພາບ: TTXVN
ການປະສານງານນະໂຍບາຍໃນປີ 2022 ເພື່ອຮັບປະກັນການຄວບຄຸມໄພເງິນເຟີ້,
ຮັກສາສະຖຽນລະພາບຂອງເສດຖະກິດມະຫາພາກ ທັງສະໜັບສະໜູນຂະບວນການຟື້ນຟູເສດຖະກິດ
ຖ້າຫາກການສັກວັກຊີນໄດ້ຮັບການຍູ້ແຮງແລະມີປະສິດທິຜົນຢູ່ປະເທດຕ່າງໆໃນໂລກ, ສາມາດຫວັງວ່າ ເສດຖະກິດໂລກຈະຟື້ນຕົວໃນປີ 2022. ໃນເດືອນຕຸລາປີ 2021, ກອງທຶນການເງິນສາກົນ (IMF) ຄາດຄະເນວ່າ, ເສດຖະກິດໂລກຈະເຕີບໂຕ 4,9% ໃນປີ 2022. ແຕ່, ຄຽງຄູ່ກັບການຟື້ນຕົວຂອງເສດຖະກິດ ຈະມີຄວາມສ່ຽງດ້ານເງິນເຟີ້, ການເພີ່ມຂຶ້ນຂອງລາຄາສິນຄ້າພື້ນຖານໃນໂລກ, ມີທ່າອ່ຽງຫຼຸດການຜ່ອນຜັນ, ການຂຶ້ນອັດຕາດອກເບ້ຍ, ຮັດແໜ້ນເງິນຕາ ແລະ ການຜັນຜວນທີ່ສັບສົນຂອງຕະຫຼາດເງິນຕາ ແລະ ການເງິນທົ່ວໂລກ.
ການຟື້ນຕົວຂອງເສດຖະກິດໂລກສ້າງເງື່ອນໄຂສະດວກໃຫ້ແກ່ການຟື້ນຟູເສດຖະກິດພາຍໃນປະເທດ. ຢ່າງໃດກໍ່ຕາມ, ຈໍາເປັນຕ້ອງເອົາໃຈໃສ່ເຖິງຄວາມສ່ຽງຂອງອັດຕາເງິນເຟີ້ ຍ້ອນການສະທ້ອນຂອງແຮງກົດດັນດ້ານການສະຫນອງ ແລະ ຄວາມຕ້ອງການ. ລາຄາສິນຄ້າໂລກຜັນປ່ຽນບໍ່ແນ່ນອນ ມີທ່າອ່ຽງເພີ່ມຂຶ້ນ, ຄຽງຄູ່ກັບຂະບວນການເປີດເສດຖະກິດ ສົ່ງເສີມການບໍລິໂພກ ແລະ ຄວາມຕ້ອງການລົງທຶນ, ສ້າງແຮງກົດດັນຕໍ່ລາຄາ; ໃນຂະນະນັ້ນ, ແຜນການການປັບລາຄາບໍລິການທີ່ລັດຈັດການດຳເນີນການຕໍ່ໄປ... ກອງທຶນການເງິນສາກົນໄດ້ກ່າວເຕືອນວ່າ ພາຍຫຼັງການແຜ່ລະບາດຂອງພະຍາດໂຄວິດ-19 ສິ້ນສຸດລົງ, ຫຼາຍປະເທດອາດຈະຕ້ອງຂຶ້ນພາສີເພື່ອຊົດເຊີຍການຂາດດຸນງົບປະມານຂອງລັດ ພ້ອມກັບການດັດປັບໂຄງສ້າງ (ຈັດຕອງໂສ້ການສະໜອງແລະການຜະລິດທົ່ວໂລກ, ການປ່ຽນແປງທາງດ້ານປະຊາກອນສາດ, ການພັດທະນາເສດຖະກິດດິຈີຕອນ,...) ເຊິ່ງອາດຈະເຮັດໃຫ້ມີໄລຍະທີ່ອັດຕາເງິນເຟີ້ສູງຂຶ້ນ. ໃນຖານະທີ່ເປັນເສດຖະກິດແບບເປີດຂະໜາດໃຫຍ່, ຫວຽດນາມອາດຈະຖືກຜົນກະທົບຢ່າງແຮງຈາກທ່າອ່ຽງທົ່ວໄປ. ດັ່ງນັ້ນ, ການຮັກສາມາດຕະການແກ້ໄຂນະໂຍບາຍເພື່ອສະໜັບສະໜູນຂະບວນການຟື້ນຟູເສດຖະກິດແມ່ນຈຳເປັນ ແຕ່ບໍ່ສາມາດເບິ່ງເບົາອັດຕະວິໄສກັບແຮງກົດດັນຂອງເງິນເຟີ້, ຕ້ອງມີການປະສານງານນະໂຍບາຍຢ່າງໃກ້ຊິດ, ມີຈັງຫວະດ້ານປະລິມານ, ວິທີການດຳເນິນງານ, ໂດຍສະເພາະ ນະໂຍບາຍການເງິນແລະ ນະໂຍບາຍງົບປະມານ.
ຕາມການປະເມີນຂອງກອງທຶນການເງິນສາກົນ ແລະ ທະນາຄານໂລກ, ປະຈຸບັນ, ການບໍລິຫານນະໂຍບາຍເງິນຕາຂອງຫວຽດນາມມີຄວາມເໝາະສົມ ແລະ ຢູ່ໃນທ່າອຽງທົ່ວໄປຂອງໂລກ, ຕ້ອງລະມັດລະວັງຕໍ່ຄວາມສ່ຽງດ້ານເງິນຕາ, ຮັບປະກັນຄວາມປອດໄພໃນການເຄື່ອນໄຫວຂອງສະຖາບັນສິນເຊື່ອ. ການໃຊ້ເງິນສະໜັບສະໜູນຫຼາຍເກີນໄປຈະເພີ່ມຄວາມສ່ຽງຕໍ່ໜີ້ເສຍ. ໃນໄລຍະເວລາທີ່ຈະມາເຖິງ, ຂະແໜງການທະນາຄານຈະສືບຕໍ່ຮ່ວມເດີນທາງກັບວິສາຫະກິດ ແລະ ປະຊາຊົນ ຜ່ານຜ່າຄວາມຫຍຸ້ງຍາກ; ບໍລິຫານນະໂຍບາຍຢ່າງເປັນເຈົ້າການ, ຍືດຫຍຸ່ນ, ລະມັດລະວັງ, ສົມທົບຢ່າງແໜ້ນແຟ້ນກັບນະໂຍບາຍງົບປະມານ ແລະ ບັນດານະໂຍບາຍມະຫາພາກອື່ນ ເພື່ອຄວບຄຸມໄພເງິນເຟີ້, ປະກອບສ່ວນຮັກສາສະຖຽນລະພາບຂອງເສດຖະກິດມະຫາພາກ, ສະໜັບສະໜູນການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດ-19. ລະອຽດຄື:
ທີໜຶ່ງ, ທະນາຄານແຫ່ງລັດຄຸ້ມຄອງນະໂຍບາຍເງິນຕາ ແລະ ກິດຈະກຳທະນາຄານ ເພື່ອຮັບປະກັນຄວາມຄ່ອງໃນການຊຳລະເງິນ, ໜູນຊ່ວຍບັນດາສະຖາບັນສິນເຊື່ອໃນການກຽມພ້ອມສະໜອງເງິນທຶນຢ່າງພຽງພໍ ແລະ ທັນການ ໃຫ້ແກ່ຂະບວນການຟື້ນຟູເສດຖະກິດ; ຄຸ້ມຄອງອັດຕາດອກເບ້ຍໃຫ້ສອດຄ່ອງກັບສົມດຸນມະຫາພາກ, ອັດຕາເງິນເຟີ້, ການເຄື່ອນໄຫວຂອງຕະຫຼາດ ແລະ ເປົ້າໝາຍນະໂຍບາຍເງິນຕາ, ສ້າງເງື່ອນໄຂເພື່ອຫຼຸດຜ່ອນຕົ້ນທຶນຂອງປະຊາຊົນ, ວິສາຫະກິດ ແລະ ພື້ນຖານເສດຖະກິດ; ຊີ້ນຳໃຫ້ບັນດາອົງການສິນເຊື່ອສືບຕໍ່ຜັນຂະຫຍາຍບັນດາມາດຕະການແກ້ໄຂບັນຫາການປັບໂຄງສ້າງໜີ້, ຍົກເວັ້ນ ຫຼຸດຜ່ອນອັດຕາດອກເບ້ຍ ແລະ ແກ້ໄຂຄວາມຫຍູ້ງຍາກຂອງລູກຄ້າທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19; ສ້າງຄວາມສົມດຸນກົມກຽວລະຫວ່າງການໜູນຊ່ວຍເສດຖະກິດ ແລະ ເປົ້າໝາຍຄວບຄຸມໄພເງິນເຟີ້, ຮັບປະກັນຄວາມປອດໄພຂອງລະບົບທະນາຄານ, ປະສານງານຢ່າງແໜ້ນແຟ້ນກັບບັນດາກະຊວງ, ຂະແໜງການ ເພື່ອພັດທະນາວິທີການແກ້ໄຂນະໂຍບາຍສໍາລັບການຟື້ນຟູ ແລະ ການພັດທະນາເສດຖະກິດ ພາຍຫຼັງການແຜ່ລະບາດຂອງພະຍາດໂຄວິດ-19.
ທີສອງ, ການແຜ່ລະບາດຂອງພະຍາດອາດຈະແກ່ຍາວ, ຮຽກຮ້ອງໃຫ້ມີການປັບຕົວຢ່າງຕັ້ງໜ້າໂດຍຜ່ານການຫັນປ່ຽນດີຈີຕອນ, ການໝູນໃຊ້ວິທະຍາສາດ - ເຕັກໂນໂລຊີ, ເຊິ່ງເປັນກຸນແຈສຳຄັນໃນການພັດທະນາເສດຖະກິດໃນ “ວິຖີປົກກະຕິໃໝ່”. ຂະແໜງການທະນາຄານໄດ້ມີຫຼາຍມາດຕະການແກ້ໄຂໃນການຊຸກຍູ້ການຫັນປ່ຽນດິຈີຕອນ, ປັບປຸງລະບົບການຊຳລະເງິນ ແລະ ການເຄື່ອນໄຫວທະນາຄານໃຫ້ທັນສະໄໝ, ສົ່ງເສີມການນໍາໃຊ້ທຸລະກໍາ “ບໍ່ສຳຜັດ”. ນີ້ກໍແມ່ນທິດທາງທີ່ຂະແໜງການທະນາຄານສືບຕໍ່ຍູ້ແຮງໃນປີ 2022 ແລະ ໃນຊຸມປີຕໍ່ໄປ.
ທີສາມ, ກ່ຽວກັບການຮັບປະກັນຄວາມປອດໄພໃນການເຄື່ອນໄຫວທະນາຄານ ແລະ ຈັດການແກ້ໄຂໜີ້ເສຍ, ໃນເວລາທີ່ຈະມາເຖິງ, ທະນາຄານແຫ່ງລັດສືບຕໍ່ຍູ້ແຮງບັນດາມາດຕະການແກ້ໄຂການປັບໂຄງສ້າງໜີ້ ແລະ ການຈັດການແກ້ໄຂໜີ້ເສຍ,ໂດຍສະເພາະຢ່າງຍິ່ງ ພາຍຫຼັງໂຄງການປັບປຸງລະບົບສະຖາບັນສິນເຊື່ອ ແລະ ຈັດການແກ້ໄຂໜີ້ເສຍ ໄລຍະ 2021 - 2025 ໄດ້ຮັບການອະນຸມັດຈາກອົງການມີອຳນາດເຕັມ, ເຊິ່ງຈຸດໜັກແມ່ນສືບຕໍ່ປັບປຸງ, ປັບໂຄງສ້າງບັນດາສະຖາບັນສິນເຊື່ອທີ່ອ່ອນແອ ເພື່ອໃຫ້ມີຄວາມເຂັ້ມແຂງ, ຍົກສູງຄວາມສາມາດດ້ານເງິນຕາ ທັງດ້ານຂະໜາດ ຄຸນນະພາບ ແລະ ປະສິດທິຜົນ, ຮັບປະກັນຄວາມປອດໄພຂອງທົ່ວທັງລະບົບ, ຍູ້ແຮງການຈັດການແກ້ໄຂໜີ້ເສຍ ເພື່ອສ້າງເງື່ອນໄຂໃຫ້ບັນດາສະຖາບັນສິນເຊື່ອສາມາດດຳເນີນງານໄດ້ດີ, ຍົກສູງຄຸນນະພາບສິນເຊື່ອ, ຄວາມສາມາດການເງິນ ແລະ ຮັບປະກັນຄວາມປອດໄພຂອງລະບົບບັນດາສະຖາບັນສິນເຊື່ອ./.
-------------------------------------
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 979 (ເດືອນທັນວາ 2021)
