ບາງວິທີແກ້ໄຂເພື່ອຍົກສູງປະສິດທິຜົນການເຄື່ອນໄຫວ
ຂອງສະມາພັນຊາວຫວຽດນາມຢູ່ຕ່າງປະເທດ ໃນສະພາບການໃໝ່
ຂອງສະມາພັນຊາວຫວຽດນາມຢູ່ຕ່າງປະເທດ ໃນສະພາບການໃໝ່
ວກ. - ປະຊາຄົມຊາວຫວຽດນາມຢູ່ຕ່າງປະເທດ ແມ່ນພາກສ່ວນສຳຄັນຂອງປະຊາຄົມຊາດພັນຫວຽດນາມ. ສະມາພັນຊາວຫວຽດນາມຢູ່ຕ່າງປະເທດມີບົດບາດສຳຄັນໃນການໂຄສະນາເຜີຍແຜ່ແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດຫວຽດນາມ; ຜ່ານນັ້ນ, ປັບປຸງກຳລັງແຮງຂອງກ້ອນມະຫາສາມັກຄີປວງຊົນທັງຊາດ, ປະກອບສ່ວນເພີ່ມທະວີວຽກງານການຕ່າງປະເທດຂອງພັກ ໃນພາລະກິດການປ່ຽນແປງໃໝ່ຍິ່ງຂຶ້ນ, ແມ່ນຂົວຕໍ່ທີ່ສຳຄັນ ເພື່ອຊຸກຍູ້ການພົວພັນມິດຕະພາບທີ່ເປັນມູນເຊື້ອ ລະຫວ່າງຫວຽດນາມ ແລະ ບັນດາປະເທດໃນໂລກ.
ບົດບາດຂອງປະຊາຄົມ ແລະ ສະມາພັນຊາວຫວຽດນາມຢູ່ຕ່າງປະເທດ
ໃນຊຸມປີທີ່ຜ່ານມາ, ໂດຍໄດ້ຮັບຄວາມເອົາໃຈໃສ່ແລະການຊີ້ນຳນຳພາຂອງພັກ-ລັດ, ການປະສານສົມທົບຢ່າງແໜ້ນແຟ້ນແລະມີປະສິດທິພາບ ລະຫວ່າງຄະນະຂົນຂວາຍປະຊາຊົນສູນກາງ ແລະ ຄະນະກຳມະການພັກກະຊວງການຕ່າງປະເທດ, ແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ-ສັງຄົມ ໃນການຊີ້ນໍາ ແນະນໍາ, ດັ່ງນັ້ນ ບັນດາສະມາພັນຊາວຫວຽດນາມຢູ່ຕ່າງປະເທດ ຈຶ່ງໄດ້ມີການປ່ຽນແປງຢ່າງແຂງຂັນ. ບັນດາສະມາພັນໄດ້ພັດທະນາຢ່າງແຂງແຮງ, ມີການເຄື່ອນໄຫວທີ່ກວ້າງຂວາງ; ໄດ້ຜັນຂະຫຍາຍກິດຈະກຳຕ່າງໆ ໃນການຂົນຂວາຍ, ເຕົ້າໂຮມ, ສະໜັບສະໜູນຊາວຫວຽດນາມຢູ່ຕ່າງປະເທດ ແລະ ບັນລຸຜົນງານທີ່ສຳຄັນຫຼາຍຢ່າງ, ປະກອບສ່ວນອັນຕັ້ງໜ້າ ເຂົ້າໃນການເພີ່ມທະວີແລະເສີມຂະຫຍາຍ ກຳລັງແຮງຂອງກ້ອນມະຫາສາມັກຄີປວງຊົນທັງຊາດ; ລະດົມກຳລັງໃຈ ແລະຍົກສູງຄວາມພາກພູມໃຈຂອງຊາດ, ຄວາມທະນົງໃຈແຫ່ງຊາດ ແລະ ຄວາມຮັກແພງບ້ານເກີດເມືອງນອນ; ພ້ອມທີ່ຈະຊ່ວຍເຫຼືອເຊິ່ງກັນແລະກັນລຸກຂຶ້ນໃນການສ້າງຊີວິດໃໝ່, ເຊື່ອມໂຍງເຂົ້າກັບສັງຄົມປະເທດເຈົ້າພາບ.
ປະຈຸບັນ, ປະຊາຄົມຊາວຫວຽດນາມຢູ່ຕ່າງປະເທດມີປະມານ 5,3 ລ້ານຄົນທີ່ອາໃສແລະເຮັດວຽກໃນກ່ວາ 130 ປະເທດແລະດິນແດນ; ໃນນັ້ນ, ກວ່າ 80% ແມ່ນຢູ່ໃນບັນດາປະເທດທີ່ພັດທະນາແລ້ວ, ຊາວຫວຽດນາມສ່ວນໃຫຍ່ມີສະຖານະທາງກົດໝາຍແລະຊີວິດທີ່ໝັ້ນຄົງ, ເຊື່ອມໂຍງເຂົ້າກັບສັງຄົມປະເທດເຈົ້າພາບຢ່າງເລິກເຊິ່ງ. ໃນ 5 ປີທີ່ຜ່ານມາ, ຍອດຈຳນວນເງິນທີ່ຊາວຫວຽດນາມໂອນມາຫວຽດນາມບັນລຸກວ່າ 71 ຕື້ໂດລາສະຫະລັດ (ເພີ່ມຂຶ້ນສະເລ່ຍ 6% ຕໍ່ປີ), ປະກອບສ່ວນເຮັດໃຫ້ດຸນການຊຳລະເງິນດີຂຶ້ນ, ເພີ່ມທຶນສຳຮອງເງິນຕາຕ່າງປະເທດຂອງລັດ. ການສ້າງສະມາພັນ ແລະ ວຽກງານພະນັກງານຂອງສະມາພັນ ໄດ້ມີການປ່ຽນແປງທີ່ຕັ້ງໜ້າຫຼາຍຢ່າງ, ຮັບປະກັນຄຸນນະພາບການເຄື່ອນໄຫວ; ໃນນັ້ນ, ໃຫ້ຄວາມສຳຄັນກັບການຄັດເລືອກ, ຝຶກອົບຮົມພະນັກງານ ແລະ ດໍາເນີນການຄັດກອງຕັ້ງແຕ່ຂັ້ນຮາກຖານ; ເສີມຂະຫຍາຍບົດບາດເປັນແບບຢ່າງຂອງຖັນແຖວພະນັກງານສະມາພັນ ໃນການຂົນຂວາຍຊາວຫວຽດນາມຢູ່ຕ່າງປະເທດ. ວຽກງານການປະສານສົມທົບ, ແນະນຳ, ກວດກາ, ຕິດຕາມຂອງສະມາພັນ ໄດ້ຮັບການເພີ່ມທະວີຢ່າງຕໍ່ເນື່ອງ, ຄຸນນະພາບຂອງວຽກງານສະມາພັນໄດ້ຮັບການປັບປຸງໃຫ້ດີຂຶ້ນ, ປະກອບສ່ວນສຳຄັນເຂົ້າໃນວຽກງານກໍ່ສ້າງພັກຢູ່ຕ່າງປະເທດ.
ຢ່າງໃດກໍຕາມ, ວຽກງານຂົນຂວາຍມະຫາຊົນຍັງມີຂໍ້ຈຳກັດທີ່ແນ່ນອນ, ເນື່ອງຈາກພື້ນທີ່ດໍາເນີນງານຂະໜາດໃຫຍ່ໃນບາງປະເທດ ແລະ ລັກສະນະຊຸມຊົນທີ່ແຕກຕ່າງກັນ; ໄດ້ຮັບຜົນກະທົບຈາກສະພາບແວດລ້ອມດ້ານການເມືອງ ແລະ ການພົວພັນທາງການທູດລະຫວ່າງຫວຽດນາມ ແລະ ປະເທດເຈົ້າພາບ; ພ້ອມກັນນັ້ນ, ຄວາມສາມາຊ້ອນແຝງຂອງປະຊາຄົມຊາວຫວຽດນາມຢູ່ຕ່າງປະເທດໃນບາງແຫ່ງ ບໍ່ໄດ້ຮັບການສົ່ງເສີມຢ່າງເໝາະສົມ. ວຽກງານສ້າງສະມາພັນຢູ່ຫຼາຍແຫ່ງ ຍັງບໍ່ທັນແໜ້ນແຟ້ນ, ການເຄື່ອນໄຫວຍັງຫຼົມແຫຼວ, ເນື້ອໃນຂອງການເຄື່ອນໄຫວຍັງບໍ່ດີ. ການປະສານງານ, ການແນະນຳ, ການກວດກາ, ການຕິດຕາມ ກໍບໍ່ແໜ້ນແຟ້ນ; ຍັງມີການເຮັດແບບຜີວເຜີນ, ຫຼົບຫຼີກ, ຂາດຄວາມລະອຽດສະເພາະ, ບໍ່ທັນຄົບຖ້ວນ.
ກິດຈະກຳສາມັກຄີ ແລະ ເຕົ້າໂຮມຊາວຫວຽດນາມຢູ່ຕ່າງປະເທດໃນບາງແຫ່ງ ບາງຄັ້ງມີປະສິດທະຜົນຕ່ຳ. ການປະສານງານໃນການສ້າງສະມາພັນ ແລະ ລະຫວ່າງອົງການຈັດຕັ້ງສະມາພັນຢູ່ຕ່າງປະເທດ ກັບອົງການແລະການຈັດຕັ້ງຕ່າງໆພາຍໃນປະເທດຍັງຈໍາກັດ. ການປະກາດໃຊ້ນະໂຍບາຍ, ກົດລະບຽບ ແລະຄໍາແນະນໍາຈຳນວນໜຶ່ງ ຍັງຊັກຊ້າ; ການຜັນຂະຫຍາຍນະໂຍບາຍ, ມາດຕະການຈຳນວນໜຶ່ງ ຍັງບໍ່ທັນຄົບຊຸດແລະທັນເວລາ; ຜົນຂອງການລະດົມແລະດຶງດູດແຫຼ່ງພະລັງຈາກຊາວຫວຽດນາມຢູ່ຕ່າງປະເທດ ບໍ່ສົມກັບທ່າແຮງ, ພິເສດແມ່ນ ໃນບັນດາຂົງເຂດເຊັ່ນ: ການຖ່າຍໂອນເຕັກໂນໂລຊີ, ການລົງທຶນ, ການຄ້າ,... ດັ່ງນັ້ນ, ຍັງບໍ່ທັນບັນລຸໄດ້ຄວາມຕ້ອງການຂອງປະເທດໃນການພັດທະນາເສດຖະກິດ-ສັງຄົມ ແລະ ການເຊື່ອມໂຍງເຂົ້າກັບສາກົນຢ່າງເລິກເຊິ່ງ. ບົດບາດຂອງຊາວຫວຽດນາມຢູ່ຕ່າງປະເທດ ໃນການເສີມຂະຫຍາຍພາບພົດຂອງຫວຽດນາມໃນປະເທດເຈົ້າພາບ ແລະ ຊຸກຍູ້ການພົວພັນລະຫວ່າງຫວຽດນາມ ແລະ ປະເທດຕ່າງໆ ຍັງມີຄວາມຈຳກັດ; ການປະສານສົມທົບລະຫວ່າງບັນດາຄະນະ, ກະຊວງ, ຂະແໜງການ, ທ້ອງຖິ່ນ ໃນວຽກງານກ່ຽວກັບຊາວຫວຽດນາມຢູ່ຕ່າງປະເທດ ຍັງບໍ່ທັນແໜ້ນແຟ້ນແທ້, ມີປະສິດທິຜົນຕ່ຳ.
ທ່ານ ເວືອງ ດິ່ງເຫວ້ ກຳມະການກົມການເມືອງສູນການ, ປະທານສະພາແຫ່ງຊາດ ພົບປະກັບຜູ້ຕາງໜ້າປະຊາຄົມຊາວຫວຽດນາມຢູ່ ແບນຊິກ _ພາບ: TTXVN
ບາງວິທີແກ້ໄຂເພື່ອປ່ຽນແປງໃໝ່ຮູບແບບການດໍາເນີນງານ
ແລະ ຍົກສູງປະສິດທິຜົນການເຄື່ອນໄຫວຂອງສະມາພັນຊາວຫວຽດນາມຢູ່ຕ່າງປະເທດ
ໃນຊຸມປີຕໍ່ໜ້າ, ສະພາບການໂລກຈະສືບຕໍ່ຜັນປ່ຽນຢ່າງສັບສົນ ແລະ ສົ່ງຜົນກະທົບເຖິງຄວາມໝັ້ນຄົງ ແລະ ສະພາບແວດລ້ອມແຫ່ງການພັດທະນາຂອງປະເທດໃນຫຼາຍດ້ານ, ສ້າງທັງທ່າໄດ້ປຽບແລະສິ່ງທ້າທາຍທີ່ແຊກຊ້ອນກັນ. ປະຊາຄົມຊາວຫວຽດນາມຢູ່ຕ່າງປະເທດນັບມື້ນັບເຕີບໃຫຍ່ທາງດ້ານປະລິມານ ແລະຂະຫຍາຍຕົວໃນພື້ນທີ່. ບົດບາດ ຕໍາແໜ່ງ ແລະ ຊື່ສຽງຂອງປະຊາຄົມຊາວຫວຽດນາມຢູ່ຕ່າງປະເທດ ໄດ້ຮັບການຍົກສູງຂຶ້ນເລື້ອຍໆ. ຫວຽດນາມກ້າວເຂົ້າສູ່ໄລຍະການພັດທະນາໃໝ່ (ໄລຍະ 2021-2030), ຄືທີ່ມະຕິກອງປະຊຸມໃຫຍ່ຄັ້ງທີ 13 ຂອງພັກໄດ້ລະບຸຢ່າງຈະແຈ້ງ, ດ້ວຍຄວາມຕ້ອງການທີ່ສູງກວ່າ ໃນການພັດທະນາ ແລະ ການເຊື່ອມໂຍງເຂົ້າກັບສາກົນຢ່າງກວ້າງຂວາງ. ໃນເງື່ອນໄຂນັ້ນ, ວຽກງານກ່ຽວກັບຊາວຫວຽດນາມຢູ່ຕ່າງປະເທດ ແລະ ການຂົນຂວາຍຊາວຫວຽດນາມຢູ່ຕ່າງປະເທດ ມີການຫັນປ່ຽນຢ່າງແຂງແຮງ, ຮອບດ້ານ ແລະ ເລິກເຊິ່ງຍິ່ງຂຶ້ນ. ບົນພື້ນຖານການເສີມຂະຫຍາຍບັນດາໝາກຜົນທີ່ບັນລຸໄດ້ ໃນໄລຍະຜ່ານມາ, ສະມາພັນຊາວຫວຽດນາມຢູ່ຕ່າງປະເທດ ຕ້ອງການສືບຕໍ່ການປ່ຽນແປງໃໝ່ແບບວິທີ ແລະ ຍົກສູງຄຸນນະພາບການເຄື່ອນໄຫວ, ໃນນັ້ນ, ສຸມໃສ່ປະຕິບັດບັນດາມາດຕະການແກ້ໄຂຕໍ່ໄປນີ້ໃຫ້ດີ:
ທີໜຶ່ງ, ປ່ຽນແປງໃໝ່ວຽກງານໂຄສະນາຊວນເຊື່ອ, ອົບຮົມສຶກສາ, ຂົນຂວາຍຊາວຫວຽດນາມຢູ່ຕ່າງປະເທດ.
ສືບຕໍ່ຊາບຊືມຢ່າງເລິກເຊິ່ງ ແລະ ປະຕິບັດຢ່າງເຂັ້ມງວດ ແຜນນະໂຍບາຍຂອງພັກກ່ຽວກັບການປັບປຸງກ້ອນມະຫາສາມັກຄີປວງຊົນທັງຊາດ ໃນສະພາບການໃໝ່. ຕ້ອງຖືວ່າ ປະຊາຄົມຊາວຫວຽດນາມຢູ່ຕ່າງປະເທດ ແມ່ນພາກສ່ວນທີ່ບໍ່ອາດຈະແຍກອອກຈາກປະຊາຄົມຊາດພັນຫວຽດນາມ ແລະ ແມ່ນແຫຼ່ງກຳລັງສຳຄັນ ຂອງປະຊາຄົມຊາດພັນຫວຽດນາມ ໃນການສ້າງແລະປະຕິບັດບັນດານະໂຍບາຍທີ່ກ່ຽວຂ້ອງ; ນຳການພົວພັນກັບບັນດາປະເທດເຂົ້າສູ່ລວງເລິກ ໝັ້ນຄົງ ຍືນຍົງ, ສ້າງເງື່ອນໄຂອຳນວຍຄວາມສະດວກ ໃຫ້ພີ່ນ້ອງຮ່ວມຊາດຂອງເຮົາຢູ່ຕ່າງປະເທດ ປັບປຸງສະຖານະທາງກົດໝາຍ, ຮູ້ສຶກປອດໄພໃນການເຮັດວຽກ, ສຶກສາ, ດຳເນີນທຸລະກິດ, ດຳລົງຊີວິດ ແລະ ເຊື່ອມໂຍງເຂົ້າກັບປະເທດເຈົ້າພາບໃຫ້ດີຂຶ້ນ.
ສຸມໃສ່ການໂຄສະນາ ອົບຮົມສຶກສາ ຍົກສູງຄວາມຮັບຮູ້ທາງດ້ານການເມືອງ, ແນວຄິດ, ຄຸນສົມບັດສິນທຳ, ແບບແຜນດຳລົງຊີວິດ ຂອງພະນັກງານສະມາຄົມ, ສະມາຊິກສະມາຄົມ ແລະ ຂອງຊາວຫວຽດນາມຢູ່ຕ່າງປະເທດ, ໂດຍສະເພາະຢ່າງຍິ່ງ ຕ້ອງເອົາໃຈໃສ່ເຖິງການຊາບຊຶມບັນດາແຜນນະໂຍບາຍ ທັດສະນະ ແນວທາງຂອງພັກ, ນະໂຍບາຍ ກົດໝາຍຂອງລັດ; ໃນນັ້ນ ມີບັນດາແຜນນະໂຍບາຍ ທັດສະນະກ່ຽວກັບການພັດທະນາເສດຖະກິດ-ສັງຄົມ, ການປ້ອງກັນປະເທດ-ປ້ອງກັນຄວາມສະຫງົບ ຕິດກັບການກໍ່ສ້າງສະມາພັນ; ພ້ອມກັນນັ້ນ, ເພີ່ມທະວີການໂຄສະນາ ອົບຮົມສຶກສາ ກ່ຽວກັບປະຫວັດສາດ, ວັດທະນະທຳ ແລະ ມູນເຊື້ອ ຂອງຊາດຫວຽດນາມ ໃຫ້ຊາວຫວຽດນາມຢູ່ຕ່າງປະເທດ, ໂດຍຕິດກັບການສຸມໃສ່ປ່ຽນແປງໃໝ່ ແລະ ຍົກສູງຄວາມຮັບຮູ້ ຂອງສຳນັກງານ ອົງການໃນລະບົບການເມືອງ ແລະ ປະຊາຊົນທຸກຊັ້ນວັນນະ.
ເປັນເຈົ້າການດຳເນີນຢ່າງເປັນປະຈຳ ໃນການເຜີຍແຜ່ຂໍ້ມູນສະເພາະ, ຂໍ້ມູນກ່ຽວກັບບັນຫາທິດສະດີທີ່ກ່ຽວຂ້ອງ ແລະ ຜົນງານຂອງການປະຕິວັດຫວຽດນາມ, ປະກອບສ່ວນຕໍ່ສູ້ເພື່ອປະຕິເສດບັນດາຖ້ອຍທຳນອງທີ່ຜິດພາດ, ປະຕິການ ຂອງບັນດາອິດທິກຳລັງສັດຕູ, ພວກປະຕິການ ແລະ ພວກສວຍໂອກາດທາງການເມືອງ; ພ້ອມກັນນັ້ນ, ຍູ້ແຮງການເຄື່ອນໄຫວໂຄສະນາຖະແຫຼງຂ່າວ, ເພື່ອຖ່າຍທອດຂໍ້ມູນຂ່າວສານທີ່ຖືກຕ້ອງທີ່ສຸດ ກ່ຽວກັບແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ເຖິງພີ່ນ້ອງຊາວຫວຽດນາມຢູ່ຕ່າງປະເທດ ບົນພື້ນຖານຄວາມຫຼາກຫຼາຍຂອງເນື້ອໃນ, ຮູບການ, ພາຫະນະສື່ສານ, ນຳໃຊ້ເຄື່ອງມືຕ່າງໆບົນອີນເຕີເນັດ, ເຊັ່ນ ໜັງສືພິມອອນໄລນ໌, ເວັບໄຊຕ໌ເຄືອຂ່າຍສັງຄົມ; ສຸມໃສ່ນຳເອົາປຶ້ມ, ໜັງສືພິມ ແລະ ວາລະສານພາຍໃນປະເທດ ໄປສູ່ຊຸມຊົນ, ຈັດຕັ້ງການເຄື່ອນໄຫວ ແລກປ່ຽນວັດທະນະທຳ ຮັບໃຊ້ຊາວຫວຽດນາມຢູ່ຕ່າງປະເທດ,...
ໃຫ້ຄວາມສຳຄັນແລະເອົາໃຈໃສ່ຫຼາຍກວ່າອີກ ເຖິງຄົນລຸ້ນໃໝ່ຊາວຫວຽດນາມຢູ່ຕ່າງປະເທດ ດ້ວຍການເຄື່ອນໄຫວເປັນປະຈຳມຸ່ງສູ່ຕົ້ນກໍາເນີດ ເພື່ອຫຼໍ່ລ້ຽງຄວາມທະນົງໃຈແຫ່ງຊາດ ແລະ ສາຍໃຈ ຄວາມຮັກຕໍ່ບ້ານເກີດ ປິຕຸພູມ. ເພື່ອທີ່ຈະອະນຸລັກພາສາຫວຽດນາມໃຫ້ແກ່ຄົນລຸ້ນໃໝ່ ແລະ ທົ່ວປະຊາຄົມ, ການຮຽນການສອນພາສາຫວຽດນາມຈຳເປັນຕ້ອງສືບຕໍ່ໄດ້ຮັບການຊຸກຍູ້ ໂດຍຜ່ານບັນດາການເຄື່ອນໄຫວທີ່ອຸດົມສົມບູນແລະແທດຈິງ, ເຊັ່ນ ເພີ່ມທະວີຖັນແຖວຄູອາຈານ, ສະໜອງອຸປະກອນ ແລະ ປຶ້ມແບບຮຽນ, ຊ່ວຍກໍ່ສ້າງຫ້ອງຮຽນ, ຈັດຕັ້ງຊຸດຝຶກອົບຮົມການສອນພາສາຫວຽດນາມ,... ສະຫະພັນທຸກຂັ້ນຕ້ອງຈັດຕັ້ງການເຄື່ອນໄຫວທີ່ເໝາະສົມກັບຈິດໃຈ ແລະ ຄວາມຕ້ອງການຂອງຊາວໜຸ່ມຫວຽດນາມຢູ່ຕ່າງປະເທດ, ຊ່ວຍໃຫ້ຊາວໜຸ່ມເຫັນແຈ້ງຄວາມຮັບຜິດຊອບຂອງຕົນໃນການຝຶກຝົນ, ຮ່ຳຮຽນ ແລະ ຫັນສູ່ປິຕຸພູມ.
ທີສອງ, ຍົກສູງປະສິດທິຜົນຂອງຂະບວນການ, ການຂົນຂວາຍກໍ່ສ້າງປະຊາຄົມ, ຫັນສູ່ບ້ານເກີດແລະປະເທດຊາດ; ເບິ່ງແຍງດູແລແລະປົກປ້ອງສິດຜົນປະໂຫຍດທີ່ຊອບທຳ ຖືກກົດໝາຍ ຂອງສະມາຊິດສະມາຄົມ ແລະ ຂອງຊາວຫວຽດນາມຢູ່ຕ່າງປະເທດ.
ບັນດາຂະບວນການ, ບັນດາການເຄື່ອນໄຫວຕ້ອງມີຄວາມເປັນເອກະພາບໃນການຊີ້ນຳນຳພາຂອງຄະນະພັກ, ການຈັດຕັ້ງພັກຢູ່ໃນປະເທດເຈົ້າພາບ; ການປະສານງານຢ່າງແໜ້ນແຟ້ນຂອງສະມາພັນ ກັບອົງການຕົວແທນຫວຽດນາມໃນປະເທດເຈົ້າພາບ. ໃນນັ້ນ, ຄະນະພັກເປັນຜູ້ນຳພາທາງດ້ານແຜນນະໂຍບາຍ, ທິດທາງການປະຕິບັດ; ອົງການຕົວແທນຫວຽດນາມມີນະໂຍບາຍແລະວິທີແກ້ໄຂທີ່ເໝາະສົມ ໃນການຊ່ວຍໜູນຂະບງນການ, ການຂົນຂວາຍ ແລະ ໃນວຽກງານຍ້ອງຍໍໃຫ້ລາງວັນ; ພ້ອມກັນນັ້ນ, ສະມາພັນກໍ່ຕ້ອງມີຫຼາຍຮູບການທີ່ອຸດົມສົມບູນ ຫຼາກຫຼາຍ ເພື່ອປຸກລະດົມ ຊຸກຍູ້ປະຊາຊົນທຸກຊັ້ນຄົນ ໃຫ້ມີສ່ວນຮ່ວມຢ່າງຫ້າວຫັນ ໃນການເຄື່ອນໄຫວ ແລະ ຂະບວນການໂຄສະນາຂົນຂວາຍ. ແຕ່ລະຂະບວນການ, ການຂົນຂວາຍ ຕ້ອງກຳນົດແຈ້ງເນື້ອໃນ, ເປົ້າໝາຍ ແລະ ມີຄວາມໝາຍແທດຈິງແທ້, ຕອບສະໜອງຄວາມຕ້ອງການ ແລະ ໜ້າທີ່ຂອງແຕ່ລະໄລຍະ; ຕອບສະໜອງສິດຜົນປະໂຫຍດ ແລະຄວາມປາດຖະໜາຂອງປະຊາຄົມຊາວຫວຽດນາມຢູ່ຕ່າງປະເທດ ທີ່ຕ້ອງການສຳພັດຊີວິດຈິງ; ພ້ອມກັນນັ້ນ, ການຜັນຂະຫຍາຍຂະບວນການ ຕ້ອງມີຄວາມຫຼາກຫຼາຍ, ໃນເວລາທີ່ເໝາະສົມ ແລະ ກັບຜູ້ຮ່ວມທີ່ເໝາະສົມ, ຮັບປະກັນປະສິດທິຜົນການສົ່ງເສີມບົດບາດທີ່ຍິ່ງໃຫຍ່ ຂອງຊາວຫວຽດນາມຢູ່ຕ່າງປະເທດ.
ຄະນະພັກ, ອົງການຈັດຕັ້ງພັກ, ອົງການຕົວແທນຫວຽດນາມຢູ່ຕ່າງປະເທດ ຍາມໃດກໍ່ປະຕິບັດຕາມທິດທາງ, ຊີ້ນຳ ແລະ ໜູນຊ່ວຍສະມາຄົມທຸກຂັ້ນ ໃນການກໍ່ສ້າງບັນດາຕົວແບບ ແລະ ແບບຢ່າງທີ່ກ້າວໜ້າ; ມີວິທີແກ້ໄຂເພື່ອຂະຫຍາຍຕົວແບບ, ແບບຢ່າງທີ່ກ້າວໜ້າ, ວິທີການທີ່ດີແລະມີປະສິດທິຜົນ. ບັນດາຕົວແບບຕ້ອງນຳມາເຊິ່ງປະສິດທິຜົນທີ່ແທ້ຈິງ, ປະກອບສ່ວນປະຕິບັດບັນດາໜ້າທີ່ ແລະ ເນື້ອໃນທີ່ຂະບວນການ ການຂົນຂວາຍວາງອອກມາ. ສ້າງການກະຈາຍຈາກຕົວແບບທີ່ໂດດເດັ່ນ, ດ້ວຍຄຸນຄ່າມະນຸດອາລະຍະ ທຳຫຼັກ, ເຊັ່ນ ແບບຢ່າງຂອງກຸ່ມແລະບຸກຄົນທີ່ໂດດເດັ່ນແລະດີເດັ່ນ; ມີລະບອບຄ່າຕອບແທນ ເພື່ອຊຸກຍູ້ໃຫ້ບຸກຄົນທີ່ໂດດເດັ່ນເຫຼົ່ານັ້ນ ສືບຕໍ່ປະກອບສ່ວນໃຫ້ຊຸມຊົນ ແລະ ບ້ານເກີດເມືອງນອນແລະປະເທດຕົນຕໍ່ໄປ. ສັບຊ້ອນເນື້ອໃນຂອງຂະບວນການ ເຂົ້າໃນການເຄື່ອນໄຫວອື່ນໆຂອງຄະນະ, ຂະແໜງການ, ອົງຄະນະມະຫາຊົນພາຍໃນປະເທດ; ເຊື່ອມໂຍງຢ່າງແໜ້ນແຟ້ນ ລະຫວ່າງການກໍ່ສ້າງຂະບວນການ ແລະ ການກໍ່ສ້າງປະຊາຄົມຊາວຫວຽດນາມຢູ່ຕ່າງປະເທດ ໃຫ້ມີການພັດທະນາຢ່າງກົມກຽວ ແລະ ກ້າວໜ້າ.
ດຳເນີນການກວດກາ, ທົບທວນ, ສະຫຼຸບເບື້ອງຕົ້ນ ສະຫຼຸບສັງລວມ ຂະບວນການແຂ່ງຂັນ, ການຂົນຂວາຍ ຢ່າງເປັນປະຈຳ; ໃນນັ້ນ, ຕ້ອງເປັນເຈົ້າການໃນການປະເມີນຜົນການພັດທະນາຂອງຂະບວນການ ເພື່ອຈະສາມາດກຳນົດບັນດາວິທີແກ້ໄຂທີ່ເໝາະສົມ, ສົ່ງເສີມປະສິດທິພາບສູງສຸດຂອງຂະບວນການເຄື່ອນໄຫວ; ພິເສດແມ່ນ, ກໍານົດຈຸດສູງສຸດຂອງຂະບວນການເຄື່ອນໄຫວ ເພື່ອຈັດຫາວິມີແກ້ໄຂແລະສົ່ງເສີມໃນເວລາທີ່ເໝາະສົມ, ນໍາເອົາປະສິດທິຜົນສູງມາໃຫ້ຂະບວນການ, ຫຼືຕັດສິນຕົກລົງເວລາສິ້ນສຸດ ເມື່ອຂະບວນການເຄື່ອນໄຫວໄດ້ບັນລຸບັນດາຄວາມຕ້ອງການແລະໜ້າທີ່ ຂອງບັ້ນຂົນຂວາຍ, ຂອງໄລຍະການເປີດຕົວຂະບວນການ. ການຈັດຕັ້ງໃຫ້ພີ່ນ້ອງຮ່ວມຊາດປະຕິບັດຂະບວນການແຂ່ງຂັນ ຕ້ອງມີການປະສານງານຢ່າງດີ ດ້ວຍຄວາມຮັບຜິດຊອບຂອງບັນດາອົງການ, ການຈັດຕັ້ງ, ຫົວໜ່ວຍທຸກຂັ້ນ; ຍິ່ງມີການປະສາມງານຢ່າງຄົບຊຸດແລະທັນທ່ວງທີຫຼາຍເທົ່າໃດ, ຜົນກະທົບທາງບວກຕໍ່ປະຊາຊົນກໍ່ຈະຍິ່ງສູງແລະມີປະສິດທິຜົນຫຼາຍຂຶ້ນເທົ່ານັ້ນ.
ສະມາຄົມຕ້ອງເບິ່ງແຍງດູແລແລະຊ່ວຍເຫຼືອຢ່າງດີ ໃນການປົກປ້ອງຜົນປະໂຫຍດອັນຊອບທຳແລະຖືກຕ້ອງຕາມກົດໝາຍ ຂອງສະມາຊິກ ແລະ ຊາວຫວຽດນາມຢູ່ຕ່າງປະເທດ, ໂດຍສະເພາະໃນຊ່ວງເວລາທີ່ຫຍຸ້ງຍາກ; ເອົາໃຈໃສ່ເປັນພິເສດເຖິງພື້ນທີ່ທີ່ຊາວຫວຽດນາມຍັງບໍ່ທັນມີຊີວິດທີ່ໝັ້ນຄົງ. ຄຽງຄູ່ກັນນັ້ນ, ຕ້ອງຍູ້ແຮງການຊີ້ນຳ ແລະ ໜູນຊ່ວຍບັນດາສະມາຄົມທີ່ໄດ້ຮັບການສ້າງຕັ້ງຂຶ້ນໃໝ່, ເພື່ອກໍ່ສ້າງປະຊາຄົມສາມັກຄີ, ເຂັ້ມແຂງ, ມີຄວາມຮັກແພງສາມັກຄີ, ສະໜັບສະໜູນເຊິ່ງກັນແລະກັນໃນຊີວິດ ແລະ ມຸ່ງມາຫາບ້ານເກີດເມືອງນອນ; ຈັດຕັ້ງການເຄື່ອນໄຫວສິລະປະ ວັດທະນະທຳ ເປັນປົກກະຕິກວ່າ, ເພື່ອຕອບສະໜອງຊີວິດທາງດ້ານຈິດໃຈຂອງພີ່ນ້ອງຮ່ວມຊາດ, ພ້ອມກັບການໜູນຊ່ວຍບັນດາສູນວັດທະນະທຳຂອງຊຸມຊົນຢ່າງມີປະສິດທິຜົນ, ໃນນັ້ນມີຄວາມຕ້ອງການດ້ານຈິດວິນຍານ, ຄວາມເຊື່ອຖືຂອງປະຊາຄົມຊາວຫວຽດນາມຢູ່ໃນປະເທດເຈົ້າພາບ.
ທີສາມ, ກະຈາຍຮູບແບບຂອງຄວາມສາມັກຄີແລະການເຕົ້າໂຮມຊາວຫວຽດນາມຢູ່ຕ່າງປະເທດ; ເສີມຂະຫຍາຍຄວາມເປັນເຈົ້າການແລະປະດິດສ້າງຂອງສະມາຄົມທຸກຂັ້ນ ໃນວຽກງານຂົນຂວາຍຊາວຫວຽດນາມຢູ່ຕ່າງປະເທດ ສອດຄ່ອງກັບຈຸດພິເສດຂອງປະເທດເຈົ້າພາບ.
ກະຈາຍຮູບແບບແລະເນື້ອໃນການຈັດຕັ້ງ, ສ້າງເງື່ອນໄຂໃຫ້ພີ່ນ້ອງຮ່ວມຊາດເຂົ້າຮ່ວມໃນກິດຈະກໍາການເມືອງ ແລະສັງຄົມທີ່ສໍາຄັນຂອງປະເທດ ຫຼາຍກວ່າອີກ, ສະໜິດຕິດພັນກັບຕົ້ນກຳເນີດ, ປຸກຕື່ນມູນເຊື້ອຮັກຊາດ ແລະ ຄວາມເອກອ້າງທະນົງໃຈຂອງຊາດ, ດຶງດູດພີ່ນ້ອງຮ່ວມຊາດຫຼາຍລຸ້ນຄົນຈາກທົ່ວໂລກຕອບສະໜອງ. ຊາວຫວຽດນາມຢູ່ຕ່າງປະເທດເຂົ້າຮ່ວມປະກອບຄຳເຫັນໃສ່ ຮ່າງເອກະສານຂອງກອງປະຊຸມໃຫຍ່ຂອງພັກ; ປະກອບຄຳເຫັນໃສ່ບັນດາບັນຫາທີ່ສຳຄັນທາງດ້ານເສດຖະກິດ-ສັງຄົມ, ອຳນາດອະທິປະໄຕໃນແຜ່ນດິນ ແລະ “ບັນຫາຄວາມເປັນຢູ່ຂອງຊາດ ແລະຊີວິດປະຊາຊົນ”, ຄວາມຄິດເຫັນດັ່ງກ່າວ ຕ້ອງໄດ້ນຳສະເໜີຕໍ່ຜູ້ບໍລິຫານຂັ້ນສູງ ແລະ ໜ່ວຍງານທີ່ມີອຳນາດ. ບັນດາຜູ້ແທນທີ່ດີເດັ່ນຂອງຊາວຫວຽດນາມຢູ່ຕ່າງປະເທດ ໄດ້ຮັບອະນຸຍາດເຂົ້າຮ່ວມຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ແນວໂຮມປະເທດຊາດຫວຽດນາມໃນທ້ອງຖິ່ນ. ບັນດາການເຄື່ອນໄຫວເສີມຂະຫຍາຍຊັບພະຍາກອນທາງປັນຍາ ແລະເສດຖະກິດ ຂອງພີ່ນ້ອງຮ່ວມຊາດ ຄວນໄດ້ຮັບການຜັນຂະຫຍາຍເປັນປະຈຳກ່ວາອີກ, ເຊັ່ນ: ໜູນຊ່ວຍບັນດານັກວິທະຍາສາດ, ປັນຍາຊົນຫວຽດນາມ ກັບເມືອປະເທດເຮັດວຽກ, ຈັດຕັ້ງບັນດາໂຄງການພົບປະ ແລະ ແລກປ່ຽນທຸລະກິດ ທັງຢູ່ພາຍໃນ ແລະ ຕ່າງປະເທດ...
ຄຽງຄູ່ກັບວິທີການປະຕິບັດງານແບບດັ້ງເດີມ, ສະມາຄົມທຸກຂັ້ນ ຄວນສືບຕໍ່ເສີມຂະຫຍາຍ ແລະ ຊຸກຍູ້ການປະຕິບັດບັນດາມາດຕະການແກ້ໄຂຢ່າງມີປະສິດທິຜົນ ເພື່ອເຕົ້າໂຮມ, ສາມັກຄີ ແລະ ຊີ້ນຳການເຄື່ອນໄຫວຂອງສະຫະພັນຊາວຫວຽດນາມຢູ່ຕ່າງປະເທດ ໃນໂລກໄຊເບີຣ໌. ການຈັດຕັ້ງຂະບວນການ, ການແຂ່ງຂັນ ແລະ ການໃຫ້ຄວາມສຳຄັນຢ່າງຍິ່ງ ຕໍ່ການເຜີຍແຜ່ຂ່າວບົນເວັບໄຊຕ໌ເຄືອຂ່າຍສັງຄົມ ຢ່າງກວ້າງຂວາງ ໃນຮູບແບບສຳຜັດໂດຍກົງ, ເຂົ້າໃຈງ່າຍ, ໃກ້ຊິດ ແລະ ທັນສະໄໝ. ບັນດາສະມາຄົມທຸກຂັ້ນສົມທົບກັນຈັດຕັ້ງ ເພື່ອໃຫ້ບັນດາຜູ້ມີຊື່ສຽງ, ມີອິດທິພົນໃນວົງການຊາວໜຸ່ມ ແລະ ປະຊາຄົມຊາວຫວຽດນາມຢູ່ຕ່າງປະເທດ ໄດ້ແລກປ່ຽນ ແລະ ປຶກສາຫາລືກ່ຽວກັບບັນດາເນື້ອໃນ ແລະ ຂົງເຂດທີ່ຊຸມຊົນສົນໃຈ. ບັນດາການເຄື່ອນໄຫວໃນໂລກໄຊເບີຣ໌ແມ່ນສະພາບແວດລ້ອມທີ່ເອື້ອອຳນວຍ ເພື່ອສາມັກຄີແລະເຕົ້າໂຮມຊາວໜຸ່ມ, ນັກທຸລະກິດ, ປັນຍາຊົນ ແລະ ຊຸມຊົນທັງໝົດມຸ່ງສູ່; ຕາມນັ້ນ, ມຸ່ງໝັ້ນທີ່ຈະນໍາໃຊ້ຈຳນວນເງິນທີ່ຊາວຫວຽດນາມໂອນມາໃນປະເທດຢ່າງມີປະສິດທິຜົນ, ຄົ້ນຄວ້າສ້າງຕັ້ງກອງທຶນການເງິນຂອງຊາວຫວຽດນາມຢູ່ຕ່າງປະເທດ, ໃຫ້ຄຳໝັ້ນສັນຍາປະຕິບັດບັນດານະໂຍບາຍທີ່ສະດວກສະບາຍ ເພື່ອດຶງດູດການໂອນເງິນຂອງຊາວຫວຽດນາມຢູ່ຕ່າງປະເທດ ເຂົ້າບັນດາໂຄງການລົງທຶນ ກິດຈະການກໍ່ສ້າງບຸລິມະສິດ ຈຸດສຸມຂອງປະເທດ.
ເພີ່ມທະວີຄວາມສາມັກຄີ ຄວາມໃກ້ຊິດຕິດພັນ ລະຫວ່າງບັນດາອົງການຈັດຕັ້ງສະມາຄົມໃນຊຸມຊົນ, ຊ່ວຍປະຊາຄົມເຊື່ອມໂຍງເຂົ້າກັບປະເທດເຈົ້າພາບຢ່າງເລິກເຊິ່ງ ແລະ ມຸ່ງມາຫາບ້ານເກີດເມືອງນອນ. ນັກຮຽນ, ນັກສຶກສາຫວຽດນາມຢູ່ຕ່າງປະເທດແມ່ນຂົວຕໍ່ ລະຫວ່າງລຸ້ນຄົນຫວຽດນາມຢູ່ຕ່າງປະເທດທີ່ບໍ່ສາມາດເວົ້າພາສາຫວຽດໄດ້ ກັບໃນປະເທດ. ສະມາຄົມຊາວໜຸ່ມ, ສະມາຄົມນັກສຶກສາຫວຽດນາມຢູ່ຕ່າງປະເທດ ຕ້ອງມີການເຄື່ອນໄຫວຢ່າງຕັ້ງໜ້າ ໃນບັນດາຂະບວນການແລະການເຄື່ອນໄຫວວັດທະນະທຳຂອງຊຸມຊົນ, ເຊັ່ນ ຈັດຕັ້ງງານບຸນປະເພນີ, ສອບຂໍ້ຂຽນຮຽນຮູ້ກ່ຽວກັບຫວຽດນາມ..., ຊ່ວຍຄົນລຸ້ນໃໝ່ຊາວຫວຽດນາມຢູ່ຕ່າງປະເທດຕິດພັນ ແລະ ມຸ່ງມາຫາຫວຽດນາມ. ສະມາຄົມປະກອບສ່ວນອັນຕັ້ງໜ້າ ເຂົ້າໃນການກໍ່ສ້າງ ແລະ ປັບປຸງກ້ອນກຳລັງມະຫາສາມັກຄີປວງຊົນທັງຊາດ; ປະສານສົມທົບກັບບັນດາກະຊວງ, ຂະແໜງການແລະອົງການ ໃນການກຳສະພາບການ, ຂະຫຍາຍຂອບເຂດການຕິດຕໍ່, ຍູ້ແຮງການຂົນຂວາຍ, ຕໍ່ສູ້ກັບບັນດາກຸ່ມແລະບຸກຄົນທີ່ມີຄວາມຄິດເປັນສັດຕູ ບໍ່ເພື່ອຜົນປະໂຫຍດລວມຂອງປະເທດຊາດ, ຊຸກຍູ້ທ່າອ່ຽງທຸກຄົນຫັນສູ່ປິຕຸພູມ, ເປັນເຈົ້າການໃນການຕິດຕໍ່ແລະສົນທະນາໂດຍກົງ ກັບບາງອົງການຈັດຕັ້ງແລະບຸກຄົນທີ່ມີຊື່ສຽງໃນຊຸມຊົນ. ປະຕິບັດເປັນຢ່າງດີ ນະໂຍບາຍຄ່າຕອບແທນ ແລະ ຊົມເຊີຍໃຫ້ລາງວັນ ແກ່ຜູ້ມີຄຸນງາມຄວາມດີ, ມີຜົນງານດີເດັ່ນໃນການກໍ່ສ້າງຊຸມຊົນ ແລະ ການປະກອບສ່ວນຫຼາຍຢ່າງໃຫ້ປະເທດຊາດ, ເພື່ອປຸກລະດົມກຳລັງໃຈຢ່າງທັນການ ແລະ ສ້າງຄວາມຜູກພັນສະໜິດແໜ້ນ ລະຫວ່າງຊາວຫວຽດນາມຢູ່ຕ່າງປະເທດກັບປິຕຸພູມ; ພ້ອມກັນນັ້ນ, ຕໍ່ສູ້ຢ່າງເດັດດ່ຽວກັບການກະທຳທີ່ຂັດກັບຜົນປະໂຫຍດຂອງປະຊາຄົມ ແລະ ປະເທດຊາດ.
ທີສີ່, ປ່ຽນແປງໃໝ່ແລະເພີ່ມທະວີວຽກງານການກໍ່ສ້າງສະມາພັນ, ວຽກງານພະນັກງານຂອງສະມາພັນ ແລະ ເບິ່ງແຍງດູແລການກໍ່ສ້າງກຳລັງຫຼັກແຫຼ່ງ ຜູ້ມີຊື່ສຽງໃນຊຸມຊົນຊາວຫວຽດນາມຢູ່ຕ່າງປະເທດ.
ສືບຕໍ່ປັບປຸງໂຄງສ້າງການຈັດຕັ້ງ, ກົງຈັກ ແລະ ຍົກສູງຄວາມສາມາດຂອງພະນັກງານທີ່ເຮັດວຽກງານກ່ຽວກັບຊາວຫວຽດນາມຢູ່ຕ່າງປະເທດ ເພື່ອປະຕິບັດໜ້າທີ່ວຽກງານໃນສະພາບການໃໝ່ໃຫ້ໄດ້ເປັນຢ່າງດີ. ສຸມໃສ່ເບິ່ງແຍງການກໍ່ສ້າງແລະປັບປຸງສະມາພັນໃຫ້ເຂັ້ມແຂງ; ສ້າງມາດຕະຖານພະນັກງານສະມາພັນທີ່ມີຄຸນນະພາບ ແລະ ເຕີບໃຫຍ່ຈາກຂະບວນການມະຫາຊົນ; ໃຫ້ຄວາມສຳຄັນກັບການອົບຮົມສຶກສາ ຍົກສູງລະດັບ ຄວາມຮູ້ ແລະ ທັກສະ ໃນການຈັດຕັ້ງການເຄື່ອນໄຫວເຕົ້າໂຮມ ສາມັກຄີຊາວຫວຽດນາມຢູ່ຕ່າງປະເທດ; ເສີມຂະຫຍາຍບົດບາດທີ່ກະຕືລືລົ້ນ ແລະ ເປັນແບບຢ່າງຂອງພະນັກງານສະມາພັນ.
ແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ-ສັງຄົມປະສານງານຢ່າງແໜ້ນແຟ້ນ ກັບກະຊວງການຕ່າງປະເທດ ເພື່ອສຸມໃສ່ປັບປຸງບັນດາສະມາຄົມດັ້ງເດີມ ແລະ ສົ່ງເສີມການລວມຕົວໃນຮູບແບບໃໝ່. ສະຫຼຸບປະເມີນຜົນການທົດລອງຮັບຮູ້ ແລະ ສ້າງເງື່ອນໄຂໃຫ້ບັນດາສາຂາສະມາຄົມຊາວຫວຽດນາມຢູ່ຕ່າງປະເທດກາຍເປັນສະມາຊິກຂອງແນວໂຮມປະເທດຊາດຫວຽດນາມ, ສະຫະພັນບັນດາອົງການມິດຕະພາບຫວຽດນາມ, ສະຫະພັນແມ່ຍິງຫວຽດນາມ, ສະຫະພັນຊາວໜຸ່ມຫວຽດນາມ,... ສ້າງກົນໄກທີ່ເໝາະສົມແລະສະເພາະ ເພື່ອນຳໄປປະຕິບັດໃນໄລຍະຈະມາເຖິງ.
ເອົາໃຈໃສ່ເຖິງການຝຶກອົບຮົມພະນັກງານໜຸ່ມ; ເສີມຂະຫຍາຍບົດບາດຂອງຄະນະຊາວໜຸ່ມກອມມູນິດໂຮ່ຈີມິນ ໃນການໄປຮ່ວມກັນແລະກຳນົດທິດທາງການເຄື່ອນໄຫວຂອງບັນດາສະມາຄົມນັກສຶກສາ, ສະມາຄົມນັກຮຽນຫວຽດນາມຢູ່ຕ່າງປະເທດ. ຊາວຫວຽດນາມທີ່ໄປຮຽນຢູ່ຕ່າງປະເທດ ຫຼືໄປເຮັດວຽກຕາມຮູບແບບແຮງງານເຕັກໂນໂລຊີສູງ ຕ້ອງໄດ້ຮັບຄວາມເອົາໃຈໃສ່, ເພາະວ່າ ນີ້ແມ່ນກໍາລັງຫຼັກໃນການດຶງດູດ ແລະເຊື່ອມໂຍງຊາວຫວຽດນາມຢູ່ຕ່າງປະເທດ. ຈັດຕັ້ງການອົບຮົມສຶກສາ, ຝຶກຝົນຫຼໍ່ຫຼອມ, ຂົນຂວາຍ ເພື່ອດຶງດູດເຍົາວະຊົນຊາວຫວຽດນາມຢູ່ຕ່າງປະເທດ ໃຫ້ເຂົ້າຮ່ວມສະມາຄົມໃນຊຸມຊົນ. ປະຈຸປັນ, ສະມາຄົມຫຼາຍແຫ່ງໄດ້ຮັບການສ້າງຕັ້ງຂຶ້ນແລ້ວ, ແຕ່ຍ້ອນຂໍ້ຈຳກັດດ້ານງົບປະມານ, ສະມາຄົມໃນຫຼາຍແຫ່ງຈຶງພົບຄວາມຫຍຸ້ງຍາກໃນການເຄື່ອນໄຫວ. ດັ່ງນັ້ນ, ລັດຈຳເປັນຕ້ອງໃຊ້ງົບປະມານຈຳນວນໜຶ່ງ ເຂົ້າໃນການຝຶກອົບຮົມພະນັກງານ ແລະ ໜູນຊ່ວຍດ້ານການເງິນ ໃຫ້ບັນດາສະມາຄົມຊາວຫວຽດນາມຢູ່ຕ່າງປະເທດດຳເນີນກິດຈະກຳຕ່າງໆ; ປັບປຸງການຈັດຕັ້ງ ແລະ ໜູນຊ່ວຍສະມາຄົມເຄື່ອນໄຫວຢ່າງຕັ້ງໜ້າ ແລະ ມີປະສິດທິຜົນ, ສົມຄວນເປັນ “ແຂນເສີມ” ຂອງພັກແລະລັດ ໃນການເຕົ້າໂຮມຊາວຫວຽດນາມຢູ່ຕ່າງປະເທດ ມຸ່ງສູ່ບ້ານເກີດເມືອງນອນ ປິຕຸພູມຂອງຕົນ.
ວຽກງານການຂົນຂວາມແລະເສີມຂະຫຍາຍບົດບາດຂອງຜູ້ມີຊື່ສຽງໃນຊຸມຊົນຊາວຫວຽດນາມຢູ່ຕ່າງປະເທດ ຕ້ອງໄດ້ຕັ້ງຢູ່ພາຍໃຕ້ການຊີ້ນຳເປັນເອກະພາບຂອງຄະນະພັກ, ອົງກາຈັດຕັ້ງພັກ, ສຳນັກງານຜູ້ຕາງໜ້າຫວຽດນາມໃນປະເທດເຈົ້າພາບ; ມີການປະສານສົມທົບຢ່າງແໜ້ນແຟ້ນລະຫວ່າງບັນດາຄະນະ, ຂະແໜງການ, ອົງການຈັດຕັ້ງທີ່ກ່ຽວຂ້ອງ. ຮັບປະກັນວ່າ ຊາວຫວຽດນາມຢູ່ຕ່າງປະເທດເປັນເອກະພາບກ່ຽວກັບມາດຖານຂອງຜູ້ມີຊື່ສຽງໃນຊຸມຊົນ; ກຳນົດຂອບເຂດ ບາລະມີ ແລະ ອິດທິພົນຂອງຊາວຫວຽດນາມຢູ່ຕ່າງປະເທດທີ່ມີຊື່ສຽງໃນປະຊາຄົມຢ່າງຈະແຈ້ງ. ຮູບການຂົນຂວາຍຕ້ອງຍືດຫຍຸ່ນ, ສອດຄ່ອງກັບຈຸດພິເສດ, ຄວາມຕ້ອງການ ແລະ ໜ້າທີ່ຂອງຊຸມຊົນໃນແຕ່ລະແຫ່ງ; ເປີດກວ້າງຂອບເຂດການຂົນຂວາຍ, ການພົວພັນຕິດຕໍ່ກັບຜູ້ມີຊື່ສຽງ, ມີອິດທິພົນໃນຊຸມຊົນ. ຄົ້ນຄວ້າສ້າງນະໂຍບາຍ, ຊ່ວນໜູນບັນດາສະມາຄົມ ແລະ ກຳລັງຫຼັກແຫຼ່ງໃນຊຸມຊົນ.
ເສີມຂະຫຍາຍບົດບາດຂອງບັນດາສະມາຊິກຄະນະກຳມະການສູນກາງແນວໂຮມປະເທດຊາດຫວຽດນາມ ທີ່ເປັນຊາວຫວຽດນາມຢູ່ຕ່າງປະເທດ, ບັນດາບຸກຄົນຜູ້ມີຊື່ສຽງ ມີອິດທິພົນໃນຊຸມຊົນ, ບັນດານັກທຸລະກິດ ຜູ້ຊ່ຽວຊານ ປັນຍາຊົນທີ່ໂດດເດັ່ນ ໃນການເຕົ້າໂຮມແລະສາມັກຄີຊຸມຊົນຊາວຫວຽດນາມໃນປະເທດເຈົ້າພາບ. ເສີມຂະຫຍາຍບົດບາດຂອງສະມາພັນ, ຜູ້ມີຊື່ສຽງ ແລະ ຊາວຫວຽດນາມຢູ່ຕ່າງປະເທດ ໃນການໃຫ້ຄຳແນະນຳ ຊ່ວຍໃຫ້ຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ບັນດາອົງການຈັດຕັ້ງການເມືອງ-ສັງຄົມ ດຳເນີນການຕິດຕາມກວດກາ, ວິພາກວິຈານຕໍ່ແຜນນະໂຍບາຍ, ນະໂຍບາຍ ແລະ ບັນດາເນື້ອໃນທີ່ກ່ຽວຂ້ອງກັບຊາວຫວຽດນາມຢູ່ຕ່າງປະເທດ, ເຮັດດີໃນການຍ້ອງຍໍໃຫ້ລາງວັນ ແກ່ຊາວຫວຽດນາມຢູ່ຕ່າງປະເທດທີ່ໄດ້ມີການປະກອບສ່ວນອັນໃຫຍ່ຫຼວງ ແລະ ພົ້ນເດັ່ນໃຫ້ແກ່ປະເທດຊາດ ແລະ ວຽກງານຊຸມຊົນ.
ທີຫ້າ, ປ່ຽນແປງໃໝ່ ແລະ ຍົກສູງປະສິດທິຜົນຂອງວຽກງານການປະສານງານ, ແນະນຳ ແລະ ກວດກາ, ຕິດຕາມກວດກາຂອງສະມາພັນທຸກຂັ້ນ.
ສືບຕໍ່ປ່ຽນແປງໃໝ່ ແລະ ຍົກສູງປະສິດທິຜົນຂອງວຽກງານການປະສານງານ,ແນະນຳ ເພື່ອປະຕິບັດບັນດາຂໍ້ຕົກລົງ, ໂຄງການປະສານງານລະຫວ່າງຂະແໜງ ໃນໄລຍະຈະມາເຖິງ ໃຫ້ດີກວ່າອີກ. ໂຄງການປະສານງານຕ້ອງມີຈຸດໜັກໃຈກາງ ເພື່ອຈະຍົກສູງຄຸນນະພາບແລະປະສິດທິຜົນຂອງວຽກງານການຂົນຂວາຍ ເຕົ້າໂຮມ ແລະສາມັກຄີຊາວຫວຽດນາມຢູ່ຕ່າງປະເທດ ໃນສະພາບການໃໝ່. ການປະສານງານຕ້ອງຮັບປະກັນຄວາມເປັນເອກະພາບໃນການກະທຳຢ່າງແໜ້ນແຟ້ນ ເປັນປະຈຳ ແລະ ຕໍ່ເນື່ອງ; ພ້ອມກັນນັ້ນ, ເພີ່ມທະວີການສ້າງກົດລະບຽບ, ກົນໄກການປະສານງານ, ທຳຄວາມກະແຈ່ງແຈ້ງກວ່າອີກ ກ່ຽວກັບພາລະບົດບາດ ໜ້າທີ່ ລະຫວ່າງແນວໂຮມປະເທດຊາດຫວຽດນາມໃນທຸກຂັ້ນ, ບັນດາອົງການຈົດຕັ້ງການເມືອງ-ສັງຄົມ ກັບບັນດາອົງການຄຸ້ມຄອງລັດ, ອົງການ ແລະ ການຈັດຕັ້ງທີ່ກ່ຽວຂ້ອງ, ເພື່ອສ້າງຈິດໃຈສາມັກຄີ ແລະ ກຳລັງແຮງສັງລວມ ເປັນເອກະພາບ ໃນວຽກງານການຂົນຂວາຍ ເຕົ້າໂຮມ ແລະ ສາມັກຄີຊາວຫວຽດນາມຢູ່ຕ່າງປະເທດ.
ໃນສະພາບການປະຈຸບັນ, ຈຳເປັນຕ້ອງປ່ຽນແປງໃໝ່ແລະເພີ່ມທະວີວຽກງານການກວດກາ, ຕິດຕາມກວດກາຂອງພັກ ຕໍ່ວຽກງານການກໍ່ສ້າງແລະປັບປຸງພັກເວົ້າລວມ ແລະວຽກງານສະມາຄົມ, ຂົນຂວາຍຊາວຫວຽດນາມຢູ່ຕ່າງປະເທດ ເວົ້າສະເພາະ. ຫັນເນື້ອໃນກວດກາ ຕິດຕາມກວດກາ ເຂົ້າສູ່ການປະຕິບັດແນວທາງ ແຜນນະໂຍບາຍຂອງພັກກ່ຽວກັບວຽກງານການຕ່າງປະເທດ ແລະ ວຽກງານຕໍ່ຊາວຫວຽດນາມຢູ່ຕ່າງປະເທດ. ກວດກາ, ຕິດຕາມກວດກາການປະຕິບັດມະຕິ, ຄຳສັ່ງ(1); ພ້ອມກັນນັ້ນ, ວຽກງານກວດກາ, ຕິດຕາມກວດກາຕ້ອງໄດ້ຜັນຂະຫຍາຍຢ່າງຄົບຊຸດ ແໜ້ນແຟ້ນ ເຂັ້ມງວດ ແລະ ເສີມຂະຫຍາຍໄດ້ບົດບາດຕິດຕາມກວດກາຂອງຖັນແຖວພະນັກງານ ສະມາຊິດພັກ ແລະ ມະຫາຊົນ. ສະມາຊິກພັກທີ່ມີສັນຍານຂອງການລະເມີດກົດລະບຽບຂອງພັກຫຼືກົດໝາຍ ແມ່ນຕ້ອງດຳເນີນການສຳຫຼວດກວດກາຢ່າງເປີດເຜີຍແລະປະຊາທິປະໄຕ ເພື່ອເປັນການສຶກສາ ແລະ ສັ່ງເຕືອນ; ບໍ່ “ເອົາແຕ່ຄວາມປອງດອງ”, ບໍ່ຈົ່ງຈຽມ ຫຼີກລ້ຽງ. ເຊີນຊູຄວາມຮັບຜິດຊອບຂອງຜູ້ເປັນຫົວໜ້າ ໃນການຄຸ້ມຄອງສະມາຊິດພັກ; ຈາກນັ້ນ, ມີການປັບປຸງທັນເວລາແລະເໝາະສົມ ເພື່ອແກ້ໄຂບັນດາບັນຫາໃຫ້ຊາວຫວຽດນາມຢູ່ຕ່າງປະເທດ ໃນຂະບວນການລົງທຶນ ທຸລະກິດ ແລະ ການຮ່ວມມືໃນປະເທດ.
ທີຫົກ, ເພີ່ມທະວີການນຳພາຂອງຄະນະພັກຕໍ່ວຽກງານສະມາພັນ ແລະ ວຽກງານຂົນຂວາຍຊາວຫວຽດນາມຢູ່ຕ່າງປະເທດ.
ວຽກງານພັກຢູ່ຕ່າງປະເທດແມ່ນສ່ວນໜຶ່ງຂອງວຽກງານກໍ່ສ້າງພັກ ເພື່ອປະຕິບັດແນວທາງ ນະໂຍບາຍການຕ່າງປະເທດຂອງພັກແລະລັດ. ໃນໄລຍະປະຕິວັດປະຈຸບັນ, ຈຳເປັນຕ້ອງເສີມຂະຫຍາຍກຳລັງແຮງສັງລວມຂອງລະບົບການເມືອງທັງໝົດ ໃນການຊີ້ນຳນຳພາບັນດາອົງການຈັດຕັ້ງພັກ ສະມາຊິກພັກ ແລະ ມະຫາຊົນຢູ່ຕ່າງປະເທດ ປະຕິບັດໜ້າທີ່ການເມືອງທີ່ໄດ້ຮັບມອບໝາຍ.
ໃນສະພາບການໃໝ່, ຈຳເປັນຕ້ອງມີຖັນແຖວພະນັກງານທີ່ມີຈິນຕະນາການໃໝ່ ແລະ ທັກສະການນໍາພາໃໝ່, ເຊີດຊູຄວາມຮັບຜິດຊອບຂອງສະມາຊິກພັກ, ລັດຖະກອນ ທີ່ມີຄວາມສາມາດຕອບສະໜອງຄວາມຕ້ອງການຂອງຕໍາແໜ່ງງານໄດ້ດີ ເພື່ອປະຕິບັດແຜນນະໂຍບາຍ ແລະແນວທາງຂອງພັກເປັນຢ່າງດີ. ເພາະສະນັ້ນ, ໃນໄລຍະຕໍ່ໄປ ຕ້ອງຍົກສູງຄຸນນະພາບ, ເສີມຂະຫຍາຍບົດບາດນຳໜ້າ ແລະ ເປັນແບບຢ່າງຂອງສະມາຊິກພັກ; ພິເສດແມ່ນ ຍົກສູງບົດບາດນໍາພາຂອງຄະນະພັກແລະອົງການຈັດຕັ້ງພັກທຸກຂັ້ນ, ໂດຍສະເພາະ ຄະນະພັກ ອົງການຈັດຕັ້ງພັກ ໃນອົງການຕາງໜ້າຫວຽດນາມສຳລັບການຂົນຂວາຍຊາວຫວຽດນາມຢູ່ຕ່າງປະເທດ; ໃຫ້ຄວາມສຳຄັນກັບການເສີມຂະຫຍາຍລັກສະນະນຳໜ້າ ເປັນແບບຢ່າງຂອງພະນັກງານ ສະມາຊິກພັກຢູ່ຕ່າງປະເທດ; ໃນນັ້ນ, ແຕ່ລະອົງການຈັດຕັ້ງພັກ ພະນັກງານ ສະມາຊິກພັກໃຫ້ຄຳໝັ້ນສັນຍາວ່າ ຈະບໍ່ລະເມີດລະບຽບວິໄນ, ເດັດດ່ຽວຮັກສາແນວຄິດການເມືອງ, ຄຸນສົມບັດສິນທຳ ແລະ ວິຖີຊີວິດຕາມຈິດໃຈມະຕິກອງປະຊຸມສູນກາງພັກຄັ້ງທີ 4 ສະໄໝທີ 12 ແລະ 13 ຂອງພັກ.
ມຸ່ງສູ່ການສ້າງກົງຈັກການບໍລິຫານທີ່ເປັນມືອາຊີບ, ມີວິໄນ, ຂັ້ນຕອນການບໍລິຫານງ່າຍດາຍ ສະດວກ ໂປ່ງໃສ, ຍົກສູງບົດບາດການຄຸ້ມຄອງລັດຢ່າງເປັນເອກະພາບແລະເຕັມເວລາ ກ່ຽວກັບວຽກງານຕໍ່ຊາວຫວຽດນາມຢູ່ຕ່າງປະເທດ. ຄວາມເປັນຈິງໃຫ້ເຫັນວ່າ, ຢູ່ອົງການຜູ້ຕາງໜ້າຫວຽດນາມໃດ ທີ່ມີການຈັດຕັ້ງພະນັກງານຊຸມຊົນ ຫຼືຄະນະປະຕິບັດງານຊຸມຊົນ, ວຽກງານຊາວຫວຽດນາມຢູ່ຕ່າງປະເທດ ຈະໄດ້ຮັບການຜັນຂະຫຍາຍຢ່າງຕັ້ງໜ້າ, ເປັນເຈົ້າການ ແລະ ປະດິດສ້າງ. ດັ່ງນັ້ນ, ຮູບແບບຄະນະເຮັດວຽກຊຸມຊົນຢູ່ບັນດາອົງການຜູ້ຕາງໜ້າຫວຽດນາມ ຄວນໄດ້ຮັບການຜັນຂະຫຍາຍຢູ່ໃນຫຼາຍພື້ນທີ່, ໂດຍສະເພາະໃນພື້ນທີ່ທີ່ມີຄົນຫວຽດນາມອາໄສຢູ່ເປັນຈຳນວນຫຼວງຫຼາຍ. ເມື່ອມີໜ່ວຍງານສະເພາະ, ພ້ອມກັບການຝຶກອົບຮົມວິຊາຊີບດ້ານການຂົນຂວາຍຊາວຫວຽດນາມຢູ່ຕ່າງປະເທດໃຫ້ແກ່ບັນດາອົງການຜູ້ຕາງໜ້າ, ການບຳລຸງສ້າງພະນັກງານສະມາພັນຊາວຫວຽດນາມຢູ່ຕ່າງປະເທດ, ວຽກງານການຂົນຂວາຍຊາວຫວຽດນາມຢູ່ຕ່າງປະເທດ ຈະບັນລຸຜົນທີ່ຊັດເຈນ ແລະ ມີປະສິດທິຜົນຫຼາຍຂຶ້ນຢ່າງແນ່ນອນ./.
---------------------
(1) ມະຕິເລກທີ 04/NQ-TW, ລົງວັນທີ 30 ຕຸລາ 2016, ຂອງກອງປະຊຸມສູນກາງພັກຄັ້ງທີ 4 ສະໄໝທີ 12 “ກ່ຽວກັບການເພີ່ມທະວີກາກໍ່ສ້າງແລະປັບປຸງພັກ; ກີດກັ້ນແລະ ຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ, ບັນດາປະກົດການ “ປ່ຽນແປງຕົນເອງ”, “ຜັນປ່ຽນຕົນເອງ” ຢູ່ພາຍໃນ”; ຄຳສັ່ງເລກທີ 05-CT/TW, ລົງວັນທີ 15 ພຶດສະພາ 2016, ຂອງກົມການເມືອງສູນກາງພັກຊຸດທີ 12, “ກ່ຽວກັບການຍູ້ແຮງການຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດສິນທຳ ແລະ ແບບແຜນໂຮ່ຈີມິນ”; ບົດສະຫຼຸບເລດທີ 01-KL/TW, ລົງວັນທີ 18 ພຶດສະພາ 2021, ຂອງກົມການເມືອງສູນກາງພັກຊຸດທີ 13, “ກ່ຽວກັບການສືບຕໍ່ປະຕິບັດ ຄຳສັ່ງເລກທີ 05-CT/TW, ຂອງກົມການເມືອງສູນກາງພັກຊຸດທີ 12 ກ່ຽວກັບການຍູ້ແຮງການຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດສິນທຳ ແລະ ແບບແຜນໂຮ່ຈີມິນ”.
(2) ມະຕິເລກທີ 36-NQ/TW, ລົງວັນທີ 26 ມີນາ 2004, ຂອງກົມການເມືອງສູນກາງພັກຊຸດທີ 9, “ກ່ຽວກັບວຽກງານກັບຊາວຫວຽດນາມຢູ່ຕ່າງປະເທດ”; ຄຳສັ່ງເລກທີ 45-CT/TW, ລົງວັນທີ 19 ພຶດສະພາ 2015, ຂອງກົມການເມືອງສູນກາງພັກ, “ວ່າດ້ວຍການສືບຕໍ່ຍູ້ແຮງການປະຕິບັດມະຕິເລກທີ 36-NQ/TW ຂອງກົມການເມືອງສູນກາງພັກຊຸດທີ 9 ກ່ຽວກັບວຽກງານກັບຊາວຫວຽດນາມຢູ່ຕ່າງປະເທດໃນສະພາບການໃໝ່”.
(3) ບົດສະຫຼຸບເລກທີ 12-KL/TW, ລົງວັນທີ 12 ສິງຫາ 2021, ຂອງກົມການເມືອງສູນກາງພັກ, “ກ່ຽວກັບວຽກງານກັບຊາວຫວຽດນາມຢູ່ຕ່າງປະເທດ ໃນສະພາບການໃໝ່”.
(4) ຄຳຕັດສິນເລກທີ 209-QĐ/TW, ລົງວັນທີ 26 ພະຈິກ 2019, ຂອງກົມການເມືອງສູນກາງພັກ, “ກ່ຽວກັບການລວມຕົວຄະນະພັກຢູ່ຕ່າງປະເທດ ກັບຄະນະພັກກະຊວງການຕ່າງປະເທດ”; ມະຕິເລກທີ 18-NQ/TW, ລົງວັນທີ 25 ຕຸລາ 2017, ຂອງກອງປະຊຸມສູນກາງພັກຄັ້ງທີ 6 ສະໄໝທີ 12, “ວ່າດ້ວຍບາງບັນຫາກ່ຽວກັບການສືບຕໍ່ປ່ຽນແປງໃໝ່ ແລະ ຈັດວາງສັບຊ້ອນກົງຈັດຂອງລະບົບການເມືອງໃຫ້ຮັດກຸມ ແລະ ເຄື່ອນໄຫວຢ່າງມີປະສິດທິພາບແລະປະສິດທິຜົນ”.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 989 (ເດືອນພຶດສະພາ 2022)
