ຍົກສູງລັກສະນສູ້ຮົບ, ລັກສະນະຊັກຈູງ ແລະ ປະສິດທິຜົນ
ຂອງວຽກງານແນວຄິດຂອງພັກ ເພື່ອຕອບສະໜອງຄວາມຕ້ອງການ
ແລະ ໜ້າທີ່ການປະຕິວັດ ໃນໄລຍະໃໝ່
ຂອງວຽກງານແນວຄິດຂອງພັກ ເພື່ອຕອບສະໜອງຄວາມຕ້ອງການ
ແລະ ໜ້າທີ່ການປະຕິວັດ ໃນໄລຍະໃໝ່
ວກ. - ວຽກງານແນວຄິດແມ່ນພາກສ່ວນທີ່ສຳຄັນໃນວຽກງານກໍ່ສ້າງພັກ, ແມ່ນປັດໄຈສຳຄັນອັນດັບໜຶ່ງ ທີ່ຮັບປະກັນຄວາມສຳເລັດຂອງບັນດາໜ້າທີ່ການປະຕິວັດ. ໃນປະຈຸບັນ, ສະພາບການໃໝ່ພວມຮຽກຮ້ອງໃຫ້ຍົກສູງຄວາມສາມາດຕໍ່ສູ້, ຊັກຈູງ ແລະ ປະສິດທິຜົນຂອງວຽກງານແນວຄິດ ແນໃສ່ສ້າງຄວາມເປັນເອກະພາບສູງທາງດ້ານເຈດຈຳນົງ ແລະ ການກະທຳ ຂອງທົ່ວພັກ, ທົ່ວປວງຊົນ, ທົ່ວກອງທັບ ເພື່ອຈັດຕັ້ງປະຕິບັດບັນດາເປົ້າໝາຍ ໜ້າທີ່ ທີ່ກອງປະຊຸມໃຫຍ່ຄັ້ງທີ 13 ຂອງພັກວາງອອກມາ ໃຫ້ສຳເລັດມີໄຊ.
ສະຫາຍ ຫວໍ ວັນເຖືອງ, ກຳມະການກົມການເມືອງ, ຜູ້ປະຈຳຄະນະເລຂາທິການສູນກາງ ພ້ອມກັບບັນດາຜູ້ແທນທີ່ເຂົ້າຮ່ວມກອງປະຊຸມລະດັບຊາດເພື່ອສະຫຼຸບສັງລວມວຽກງານໂຄສະນາອົບຮົມປີ 2021, ຜັນຂະຫຍາຍໜ້າທີ່ປີ 2022 - ພາບ: ຂໍ້ມູນຂ່າວສານ
ພັກກອມມູນິດຫວຽດນາມຊາບຊຶມຢ່າງເລິກເຊິ່ງເຖິງແນວຄິດໂຮ່ຈີມິນ
ທີ່ຍາມໃດກໍ່ເຊີດຊູບົດບາດຂອງວຽກງານແນວຄິດ ໂດຍຖືວ່າ
ນີ້ແມ່ນ “ວຽກງານສຳຄັນທີ່ສຸດ” ໃນຂະບວນການນຳພາການປະຕິວັດ
ປະທານໂຮ່ຈີມິນຍາມໃດກໍ່ໃຫ້ຄວາມສຳຄັນກັບບົດບາດຂອງວຽກງານແນວຄິດໃນພາລະກິດປະຕິວັດຂອງພັກແລະຊາດ. ເພິ່ນເນັ້ນໜັກວ່າ: “ວຽກງານນຳພາດ້ານແນວຄິດແມ່ນສໍາຄັນທີ່ສຸດ. ໃນພັກແລະນອກພັກມີຄວາມຮັບຮູ້ສະພາບການໃໝ່ຢ່າງຈະແຈ້ງ, ເຂົ້າໃຈແຈ້ງໜ້າທີ່ໃໝ່, ຄວາມຄິດຈຶ່ງເປັນເອກະພາບກັນ, ຄວາມຄິດເປັນເອກະພາບຈຶ່ງເປັນເອກະພາບໃນການກະທຳ. ຖ້າພາຍໃນພັກແລະນອກພັກ ຈາກຂັ້ນເທິງລົງລຸ່ມ, ຈາກພາຍໃນສູ່ພາຍນອກ, ແນວຄິດທັງໝົດເປັນເອກະພາບກັນ ແລະ ການກະທຳເປັນເອກະພາບກັນ, ວຽກງານເຖິງວ່າຈະໜັກໜ່ວງ ຫຍຸ້ງຍາກ ແລະ ສັບສົນປານໃດ ເຮົາກໍຈະໄດ້ຮັບໄຊຊະນະຢ່າງແນ່ນອນ”(1). ພ້ອມກັນນັ້ນ, ໃນເມື່ອເນັ້ນຄວາມສຳຄັນຂອງວຽກງານອົບຮົມສຶກສາແນວຄິດ ແລະ ນຳພາແນວຄິດ, ເພິ່ນກໍ່ໄດ້ຕໍ່ສູ້ຢ່າງເດັດດ່ຽວກັບ “ພະຍາດ” ເບິ່ງເບົາແນວຄິດ ທິດສະດີ: ການອົບຮົມສຶກສາແນວຄິດ ແລະ ນຳພາແນວຄິດ ແມ່ນວຽກງານສຳຄັນທີ່ສຸດຂອງພັກ, ຕ້ອງຕ້ານນິໄສເບິ່ງເບົາແນວຄິດຢ່າງເດັດດ່ຽວ.
ການໂຄສະນາ, ລະດົມຂົນຂວາຍ ແມ່ນບັນດາຂັ້ນຕອນທີ່ສຳຄັນໃນວຽກງານແນວຄິດຂອງພັກ, ເພື່ອໂຄສະນາເຜີຍແຜ່ແຜນນະໂຍບາຍ, ແນວທາງ, ທັດສະນະ, ແນວຄິດ ແລະ ອຸດົມການຂອງພັກສູ່ມວນຊົນ. ດັ່ງນັ້ນ, ປະທານໂຮ່ຈີມິນເອົາໃຈໃສ່ເປັນພິເສດເຖິງເປົ້າໝາຍ, ຈຸດພິເສດ ແລະ ວິທີການໂຄສະນາ ໃຫ້ມັນ “ລະອຽດ ແທດຈິງ” ແທ້ໆ, ເຮັດຄືແນວໃດໃຫ້ຜູ້ຟັງ “ເຂົ້າໃຈງ່າຍ, ເວົ້າໃຫ້ຜູ້ຟັງເຂົ້າໃຈໄດ້, ເຂົ້າໃຈເພື່ອຈະເຮັດໄດ້”(2); ຢູ່ນີ້, ກໍ່ຕ້ອງເອົາໃຈໃສ່ເຖິງ ວິທີການໂນ້ມນ້າວໃຈແບບ “ມີເຫດຜົນ, ດ້ວຍຄວາມຮັກ", ສົມທົບກັບວິທີການເປັນແບບຢ່າງ, ເພາະວ່າ “ແບບຢ່າງທີ່ມີຊີວິດມີຄ່າຫຼາຍກວ່າຄຳປາໄສໂຄສະນາຊວນເຊື່ອໜຶ່ງຮ້ອຍຄຳ”(3).
ໂດຍເຂົ້າໃຈແລະຊາບຊຶມແນວຄິດໂຮ່ຈິມິນຢ່າງເລິກເຊິ່ງ, ໃນບັນດາໄລຍະການປະຕິວັດ, ພັກກອມມູນິດຫວຽດນາມ ຍາມໃດກໍໃຫ້ຄວາມສຳຄັນເປັນພິເສດ ກັບບົດບາດຂອງວຽກງານແນວຄິດ, ເນັ້ນໜັກວ່າ ວຽກງານແນວຄິດເປັນ “ຈິດວິນຍານ” ຂອງທຸກວຽກງານ, ເພື່ອບໍ່ພຽງແຕ່ປະຕິບັດວຽກງານສະເພາະ ແລະ ຮີບດ່ວນເທົ່ານັ້ນ, ແຕ້ຍັງລວມເຖິງວຽກງານໄລຍະຍາວອີກດ້ວຍ. ພັກຍາມໃດກໍ່ກຳນົດວ່າ ວຽກງານແນວຄິດແມ່ນສ່ວນປະກອບທີ່ມີຄວາມສຳຄັນອັນດັບໜຶ່ງ ໃນການເຄື່ອນໄຫວນຳພາການປະຕິວັດທັງໝົດຂອງພັກ; ແມ່ນຂົງເຂດສຳຄັນຍິ່ງ ເພື່ອສ້າງແລະເພີ່ມພູນຄວາມເຊື່ອໝັ້ນໃນອຸດົມຄະຕິປະຕິວັດ, ໂຄສະນາ, ອົບຮົມສຶກສາ, ລະດົມຂົນຂວາຍ ແລະ ຈັດຕັ້ງ ໃຫ້ປະຊາຊົນເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ, ປະຕິບັດບັນດາເປົ້າໝາຍ ແລະ ວຽກງານປະຕິວັດໃນແຕ່ລະໄລຍະຢ່າງສຳເລັດຜົນ.
ໃນໄລຍະສົງຄາມຕໍ່ຕ້ານການຮຸກຮານຢ່າງກ້າຫານ, ວຽກງານແນວຄິດໄດ້ “ແຜ່ແຮງບັນດານໃຈ” ໃຫ້ກັບຮຸ່ນຕໍ່ຮຸ່ນຂອງ “ພໍ່ໄປກ່ອນ ລູກຫຼານຕາມຫຼັງ / ກາຍເປັນສະຫາຍໃນການເດີນທັບ”, ສ້າງໄຊຊະນະອັນຍິ່ງໃຫຍ່ໃນການຕໍ່ສູ້ກັບພວກລ່າເມືອງຂຶ້ນຝຣັ່ງ, ຕ້ານຈັກກະພັດອາເມລິກາ ແລະ ຈິດໃຈຕໍ່ສູ້ຢ່າງເດັດດ່ຽວເພື່ອປົກປ້ອງທຸກໆຕາລາງນິ້ວຂອງດິນແດນແລະສາຍນ້ຳທີ່ສັກສິດ ໃນເຂດຊາຍແດນແລະເກາະຂອງປະເທດຊາດ. ພິເສດ, ໃນພາລະກິດການປ່ຽນແປງໃໝ່ປະເທດ, ພັກໄດ້ວາງອອກເປັນປະຈຳກ່ຽວກັບແຜນນະໂຍບາຍ, ໜ້າທີ່ ແລະ ວິທີແກ້ໄຂ ເພື່ອເພີ່ມທະວີ ແລະ ປ່ຽນແປງໃໝ່ວຽກງານແນວຄິດ(4), ເພື່ອສ້າງຄວາມເປັນເອກະພາບສູງ ທາງດ້ານເຈດຈຳນົງ ແລະ ການກະທຳ ຂອງປະຊາຊົນທັງປະເທດ, ສ້າງກຳລັງແຮງສັງລວມ ໃນການປະຕິບັດໜ້າທີ່ການເມືອງໃຫ້ສຳເລັດຜົນ; ຜ່ານນັ້ນ, ກໍ່ສະແດງແລະຢືນຢັນທີ່ຕັ້ງ ແລະ ບົດບາດນຳພາຂອງພັກ ໃນພາລະກິດສ້າງສາ ແລະ ປົກປັກຮັກສາປະເທດຊາດສັງຄົມນິຍົມ.
ສືບທອດທັດສະນະຂອງບັນດາກອງປະຊຸມໃຫຍ່ທີ່ຜ່ານມາ, ຕິດຕາມສະຖານະການໃໝ່ຢ່າງໃກ້ຊິດ, ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ຊີ້ແຈງບົດບາດສຳຄັນຢ່າງຍິ່ງຂອງວຽກງານແນວຄິດໃນດ້ານພື້ນຖານດັ່ງນີ້: 1- ຊາບຊຶມ “ແນວຄິດຊີ້ນຳຕະຫຼອດ ຂອງທົ່ວພັກ, ທົ່ວປວງຊົນ ແລະ ທົ່ວກອງທັບເຮົາແມ່ນ ຕ້ອງຢຶດໝັ້ນ, ໝູນໃຊ້ ແລະ ພັດທະນາ ລັດທິມາກ-ເລນິນ, ແນວຄິດໂຮ່ຈີມິນ ຢ່າງປະດິດສ້າງ; ຢຶດໝັ້ນໃນເປົ້າໝາຍເອກະລາດແຫ່ງຊາດ ແລະ ສັງຄົມນິຍົມ; ຢຶດໝັ້ນໃນແນວທາງປ່ຽນແປງໃໝ່ຂອງພັກ; ຢຶດໝັ້ນບັນດາຫຼັກການກໍ່ສ້າງພັກ; ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານຫຼັກການພື້ນຖານຂອງກົດໝາຍສາກົນ, ຄວາມສະເໝີພາບ, ການຮ່ວມມື ແລະ ມີຜົນປະໂຫຍດຮ່ວມກັນ ເພື່ອກໍ່ສ້າງແລະປົກປັກຮັກສາປະເທດຊາດຫວຽດນາມສັງຄົມນິຍົມ. ນີ້ແມ່ນບັນຫາ ທີ່ມີລັກສະນະຫຼັກການ, ມີຄວາມໝາຍຂອງການຢູ່ລອດຕໍ່ລະບອບຂອງພວກເຮົາ, ເປັນຮາກຖານທີ່ໝັ້ນຄົງຂອງພັກເຮົາ, ບໍ່ໃຫ້ຜູ້ໃດເອນອຽງ ຫຼື ລັ່ງເລໃຈ”(5); 2- ກຳນົດວຽກງານແນວຄິດແມ່ນຂົງເຂດທີ່ສຳຄັນ ເພື່ອເພີ່ມທະວີຄວາມສາມັກຄີ, ຄວາມເປັນເອກະສັນ, ຄວາມເປັນເອກະພາບທາງດ້ານແນວຄິດ, ການເມືອງໃນພັກ, ຄວາມເຫັນດີເຫັນພ້ອມໃນສັງຄົມ; ເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ, ລະບອບປະຊາທິປະໄຕສັງຄົມນິຍົມ, ການກໍ່ສ້າງແລະເພີ່ມພູນຄູນສ້າງຮາກຖານການເມືອງແລະຈິດໃຈ ຂອງລະບອບສັງຄົມນິຍົມໃນປະເທດເຮົາ, ປະກອບສ່ວນເຂົ້າໃນຜົນສຳເລັດຂອງການປະຕິບັດໜ້າທີ່ການເມືອງທີ່ຫຍຸ້ງຍາກ ແລະສັບສົນຫຼາຍຂຶ້ນ.
ພ້ອມກັນນັ້ນ, ກອງປະຊຸມໃຫຍ່ຄັ້ງທີ 13 ຂອງພັກຍັງໄດ້ຍົກໃຫ້ເຫັນແຈ້ງເຖິງທັດສະນະຊີ້ນຳທີ່ວ່າ: “ສືບຕໍ່ປ່ຽນແປງໃໝ່ເນື້ອໃນແລະແບບວິທີວຽກງານແນວຄິດຢ່າງແຂງແຮງ ຕາມທິດເປັນເຈົ້າການ, ແທດຈິງ, ທັນການ ແລະ ມີປະສິດທິຜົນ; ຍົກສູງລັກສະນະສູ້ຮົບ, ລັກສະນະອົບຮົມ ແລະ ລັກສະນະຊັກຈູງຊວນເຊື່ອ ໃນການໂຄສະນາເຜີຍແຜ່, ການສຶກສາຮ່ຳຮຽນລັກທິມາກ-ເລນິນ, ແນວຄິດໂຮ່ຈີມິນ, ທັດສະນະ ແນວທາງຂອງພັກ, ນະໂຍບາຍ ກົດໝາຍຂອງລັດ. ກຳແໜ້ນ, ຄາດຄະເນຖືກຕ້ອງ, ກຳນົດທິດທາງຊັດເຈນ, ຈັດການແກ້ໄຂບັນດາບັນຫາແນວຄິດໃນພັກ, ໃນສັງຄົມຢ່າງຖືກຕ້ອງ ທັນການ”(6) ເພື່ອສ້າງຄວາມເປັນເອກະພາບທາງດ້ານແນວຄິດ ແລະ ການກະທຳໃນທົ່ວພັກ, ທົ່ວກອງທັບ ແລະ ທົ່ວປວງຊົນ.
ເສີມຂະຫຍາຍບັນດາຜົນງານທີ່ບັນລຸໄດ້, ຕັດສິນໃຈແກ້ໄຂຜ່ານຜ່າ
ຄວາມຫຍຸ້ງຍາກ ຂໍ້ຈຳກັດ; ສືບຕໍ່ຍົກສູງລັກສະນະສູ້ຮົບ, ລັກສະນະຊັກຈູງ
ແລະ ປະສິດທິຜົນ ຂອງວຽກງານແນວຄິດ ເພື່ອຕອບສະໜອງ
ຄວາມຕ້ອງການ ແລະ ໜ້າທີ່ການປະຕິວັດໃນໄລຍະໃໝ່
ວຽກງານແນວຄິດໃນເວລາທີ່ຜ່ານມາໄດ້ມີສ່ວນປະກອບທີ່ສົມກຽດໃນບັນດາຜົນງານທີ່ຍິ່ງໃຫຍ່ ແລະ ມີຄວາມໝາຍປະຫວັດສາດຂອງປະເທດ. ລະອຽດຄື:
ວຽກການສຶກສາດ້ານການເມືອງ ແນວຄິດ, ສຶກສາຮ່ຳຮຽນລັດທິມາກ-ເລນິນ, ແນວຄິດໂຮ່ຈີມິນ ໄດ້ຮັບການຍູ້ແຮງຢ່າງຕໍ່ເນື່ອງ, ດ້ວຍເນື້ອໃນ ຮູບການທີ່ຫຼາກຫຼາຍ ແລະ ອຸດົມສົມບູນກວ່າເກົ່າ. ວຽກງານອົບຮົມສຶກສາ, ບຳລຸງສ້າງ ທາງດ້ານທິດສະດີການເມືອງໄດ້ຮັບການປ່ຽນແປງໃໝ່ ທັງດ້ານເນື້ອໃນແລະວິທີການ; ຄຸນນະພາບຂອງການອົບຮົມສຶກສາ, ບຳລຸງສ້າງ ໄດ້ຮັບການຍົກສູງຂຶ້ນ; ໄດ້ແກ້ໄຂເທື່ອລະກ້າວ ສະພາບການບໍ່ຢາກຮຽນ, ຂີ້ຄ້ານຮຽນທິດສະດີການເມືອງ ໃນຖັນແຖວພະນັກງານ ສະມາຊິກພັກ. ການຄົ້ນຄວ້າ, ການຮ່ຳຮຽນ, ການຊາບຊຶມ, ການຜັນຂະຫຍາຍມະຕິຂອງພັກ ມີການປ່ຽນແປງໃໝ່ຫຼາຍຢ່າງ, ສ້າງຄວາມເປັນເອກະພາບໃນຄວາມຮັບຮູ້ ແລະ ການກະທຳ ໃນທົ່ວພັກ, ໄດ້ນຳມະຕິເຂົ້າໄປໃນຊີວິດຈິງຢ່າງໄວວາ; ຄຸນນະພາບຂອງການຮ່ຳຮຽນ ຊາບຊຶມ ໄດ້ຮັບການຍົກສູງຂຶ້ນ, ປະຢັດເວລາແລະຄ່າໃຊ້ຈ່າຍ.
ວຽກງານຄົ້ນຄວ້າທິດສະດີ, ສະຫຼຸບສັງລວມພຶດຕິກຳຕົວຈິງ ໄດ້ຮັບການຍູ້ແຮງ. ພິເສດ, ລະບົບທິດສະດີກ່ຽວກັບແນວທາງປ່ຽນແປງໃໝ່, ກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມຢູ່ຫວຽດນາມ ສືບຕໍ່ໄດ້ຮັບການເພີ່ມເຕີມແລະພັດທະນາ; ປະກອບສ່ວນເຂົ້າໃນການປ່ຽນແປງໃໝ່ ເພີ່ມເຕີມ ພັດທະນາຈິນຕະນາການທິດສະດີ, ເປັນເອກະພາບໃນຄວາມຮັບຮູ້ກ່ຽວກັບບັນດາບັນຫາທິດສະດີຮາກຖານ; ຢືນຢັນບັນດາຄຸນຄ່າທີ່ຍືນຍົງ ຂອງລັດທິມາກ-ເລນິນ, ແນວຄິດໂຮ່ຈີມີນ ກໍ່ຄືຂະບວນການໝູນໃຊ້ເຂົ້າໃນພຶດຕິກຳຕົວຈິງ ຢ່າງປະດິດສ້າງ; ສະໜອງຫຼັກຖານວິທີວິທະຍາເພື່ອຕໍ່ສູ້, ຕຳໜິວິພາກ ແລະ ບອກປັດທັດສະນະທີ່ຜິດພາດແລະເປັນປະຕິປັກ, ປະກອບສ່ວນຍົກສູງລັກສະນະສູ້ຮົບ ແລະ ລັກສະນະຊັກຈູງ, ປົກປັກຮັກສາພື້ນຖານແນວຄິດຂອງພັກ.
ການໂຄສະນາ ເຜີຍແຜ່ແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ໄດ້ປະກອບສ່ວນທີ່ຕັ້ງໜ້າ ເຂົ້າໃນການຍົກສູງຄວາມຮັບຮູ້, ຄວາມເປັນເອກະພາບທາງດ້ານເຈດຈຳນົງແລະການກະທຳ ຢູ່ໃນຖັນແຖວພະນັກງານ ສະມາຊິກພັກ, ໂດຍສະເພາະແມ່ນ ໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ ຄວາມຫຍໍ້ທໍ້, ສະກັດກັ້ນແລະຍູ້ຖອຍ ຄວາມເສື່ອມໂຊມທາງດ້ານແນວຄິດການເມືອງ, ຄູນສົມບັດ, ວິຖີຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ຢູ່ພາຍໃນ. ວຽກງານປົກປ້ອງພື້ນຖານແນວຄິດຂອງພັກ, ການຕໍ່ສູ້ບອກປັດທັດສະນະທີ່ຜິດພາດແລະເປັນປະຕິປັກ, ໂດຍສະເພາະຢ່າງຍິ່ງ ໃນໂລກໄຊເບີຣ໌ນັ້ນ ໄດ້ຮັບການເອົາໃຈໃສ່ຊີ້ນຳ ນຳພາລວມສູນໂດຍພັກ ແລະ ໄດ້ຮັບຜົນທີ່ຈະແຈ້ງ. ພ້ອມກັນນັ້ນ, ການຊີ້ນຳ ນຳພາຕໍ່ອົງການຂ່າວ, ສຳນັກພິມຈຳໜ່າຍ ກໍ່ມີການປ່ຽນແປງຢ່າງຕັ້ງໜ້າ.
ເຫັນແຈ້ງບັນດາຂໍ້ຈຳກັດ, ຂໍ້ບົກພ່ອງ, ຈຸດອ່ອນ ເພື່ອໃຊ້ມາດຕະການແກ້ໄຂຢ່າງວ່ອງໄວ ເໝາະສົມ ແລະ ມີປະສິດທິຜົນ. ລະອຽດຄື: ວຽກງານແນວຄິດໃນບາງບ່ອນ, ບາງເວລາ ບໍ່ໄດ້ທັນການ, ບໍ່ສ້ຽມແຫຼມ, ລັກສະນະຊັກຈູງຊວນເຊື່ອບໍ່ສູງ; ການອົບຮົມສຶກສາການເມືອງແນວຄິດໃຫ້ພະນັກງານ ສະມາຊິກພັກ ບໍ່ເປັນປົກກະຕິ; ສະມາຊິກພັກສ່ວນໜຶ່ງຍັງບໍ່ທັນເຂົ້າໃຈແຜນນະໂຍບາຍແລະແນວທາງຂອງພັກ. ການອົບຮົມສຶກສາທິດສະດີການເມືອງ ເຖິງຈະມີຄວາມພະຍາຍາມຫຼາຍກໍ່ຕາມ ແຕ່ກໍ່ຍັງບໍ່ໄດ້ຮັບຜົນຕາມຄວາມຕ້ອງການ. ການໂຄສະນາເຜີຍແຜ່ ບາງແນວທາງ ແຜນນະໂຍບາຍຂອງພັກ, ບາງນະໂຍບາຍ ກົດໝາຍຂອງລັດ ຍັງບໍ່ທັນເວລາ, ຮູບການກໍ່ບໍ່ອຸດົມສົມບູນ. ການຕໍ່ສູ້ບອກປັດບັນດາທັດສະນະທີ່ຜິດພາດ ເປັນປະຕິປັກ ໃນບາງບ່ອນ, ບາງຄັ້ງ ບໍ່ເດັດດ່ຽວ, ລັກສະນະສູ້ຮົບບໍ່ສູງ, ຍັງຖືກຕົກໃນທ່າຮັບ, ງົງງວຍ. ການຄາດຄະເນ, ການກຳສະພາບການແນວຄິດຂອງພະນັກງານ ສະມາຊິກພັກ, ຄວາມຄິດຈິດໃຈ ຄວາມປາຖະໜາຂອງປະຊາຊົນ ແລະ ການແນະນຳຄວາມຄິດເຫັນສັງຄົມ ໃນບາງຄັ້ງບໍ່ທັນການ. ຜົນການປະຕິບັດບາງແຜນນະໂຍບາຍຂອງພັກ ກ່ຽວກັບການຄຸ້ມຄອງການສື່ສານ, ສື່ມວນຊົນ, ການພິມຈຳໜ່າບ, ອິນເຕີເນັດ ແລະ ເຄືອຂ່າຍສັງຄົມ ຍັງຕ່ຳ, ບໍ່ເປັນໄປຕາມຂໍ້ກຳນົດ. ບົດບາດຂອງສິລະປະ ວັນນະຄະດີໃນວຽກງານແນວຄິດ ບໍ່ໄດ້ເສີມຂະຫຍາຍຢ່າງເຕັມສ່ວນ. ວຽກງານສະຫຼຸບສັງລວມພຶດຕິກຳ, ການຄົ້ນຄວ້າທິດສະດີ ບໍ່ໄດ້ຮັບຄວາມເອົາໃຈໃສ່ຢ່າງຖືກຕ້ອງ, ບໍ່ເປັນໄປຕາມຄວາມຕ້ອງການ; ບັນຫາພາກປະຕິບັດໃໝ່ ທີ່ຍາກ ແລະ ສັບສົນຈຳນວນໜຶ່ງ ຍັງບໍ່ທັນໄດ້ຮັບການຊີ້ແຈງ(7).
ໄລຍະໃໝ່ມີເງື່ອນໄຂທີ່ສະດວກຫຼາຍຢ່າງ, ພ້ອມກັນນັ້ນ ກໍ່ມີຄວາມຕ້ອງການໃໝ່ ທີ່ນັບມື້ນັບສູງ ສຳລັບວຽກງານແນວຄິດ. ກອງປະຊຸມໃຫຍ່ຄັ້ງທີ 13 ຂອງພັກໄດ້ຊີ້ແຈ້ງວ່າ, ໃນຊຸມປີສະເພາະໜ້າ, ສະພາບການໂລກ ແລະ ພາກພື້ນ ຈະມີການປ່ຽນແປງຢ່າງໄວວາ, ສັບສົນ, ຄາດເດົາໄດ້ຍາກ, ສົ່ງຜົນກະທົບໂດຍກົງ ຕໍ່ປະເທດຂອງພວກເຮົາ, ສ້າງທັງໂອກາດ ແລະ ສິ່ງທ້າທາຍ ທີ່ແຊກຊ້ອນກັນ. ໂລກາພິວັດ ແລະ ການເຊື່ອມໂຍງສາກົນຍັງຄົງດຳເນີນຕໍ່ໄປ, ການປະຕິວັດອຸດສາຫະກຳຄັ້ງທີສີ່ ມີການພັດທະນາຢ່າງແຂງແຮງ, ສ້າງບາດກ້າວບຸກທະລຸໃນຫຼາຍຂົງເຂດ, ນຳທັງກາລະໂອກາດ ແລະ ສິ່ງທ້າທາຍ ມາໃຫ້ທຸກປະເທດ. ພາກພື້ນອາຊີ-ປາຊີຟິກ ສືບຕໍ່ມີຕຳແໜ່ງຍຸດທະສາດທີ່ສຳຄັນຍິ່ງຂຶ້ນ. ໃນອາຊີຕາເວັນອອກສ່ຽງໃຕ້, ສະພາບແວດລ້ອມດ້ານຄວາມໝັ້ນຄົງ ແລະ ການພິພາດດ້ານອະທິປະໄຕໃນທະເລຕາເວັນອອກ ຍັງສັບສົນ.
ອັນຕະລາຍສີ່ປະການທີ່ພັກຊີ້ໃຫ້ເຫັນນັ້ນ ຍັງມີຢູ່, ມີຄວາມສ່ຽງທີ່ຮຸນແຮງກວ່າເກົ່າ, ໂດຍສະເພາະ ຄວາມສ່ຽງທີ່ຈະຕົກຢູ່ເບື້ອງຫຼັງ, ຕົກຢູ່ໃນ “ກັບດັກລາຍໄດ້ປານກາງ” ຍັງອາດຈະເກີດຂຶ້ນແທ້; ສະພາບການເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ຢູ່ໃນພະນັກງານ ສະມາຊິກພັກ ລັດຖະກອນ ພາລະກອນພາກສ່ວນໜຶ່ງ ຍັງເກີດຂຶ້ນຢ່າງສັບສົນ; ສະພາບອາດຍາສິດ, ການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ຄວາມຫຍໍ້ທໍ້... ຍັງບໍ່ໄດ້ຮັບການແກ້ໄຂຂັບໄລ່ຢ່າງມີປະສິດທິຜົນ. ບັນດາອິດທິກຳລັງສັດຕູແລະປະຕິການ ທີ່ຕໍ່ຕ້ານພາລະກິດການປະຕິວັດຂອງພວກເຮົາ ນັບມື້ນັບຮຸນແຮງຂຶ້ນ, ໂດຍສະເພາະ ໃນໂລກໄຊເບີຣ໌. ໂລກາພິວັດ, ການເຊື່ອມໂຍງສາກົນຢ່າງກວ້າງຂວາງ, ການປະຕິວັດອຸດສາຫະກຳຄັ້ງທີສີ່ ບໍ່ພຽງແຕ່ນຳກາລະໂອກາດມາໃຫ້ເທົ່ານັ້ນ ແຕ່ມີທັງສິ່ງທ້າທາຍອີກດ້ວຍ, ໂດຍສະເພາະ ໃນການກໍ່ສ້າງລະບົບເສດຖະກິດທີ່ເປັນເອກະລາດ ເປັນເຈົ້າຕົນເອງ, ການປົກປ້ອງຕະຫຼາດພາຍໃນປະເທດ, ການຮັກສາຄວາມເປັນເອກະລາດທາງການເມືອງ, ການຮັກສາເອກະລັກທາງວັດທະນະທຳຂອງຊາດ, ການຕໍ່ຕ້ານຢ່າງມີປະສິດທິຜົນ ກັບບັນດາການເຄື່ອນໄຫວທີ່ສວຍໃຊ້ຜົນງານດ້ານເຕັກໂນໂລຢີ ເພື່ອທຳລາຍພັກແລະລັດຂອງພວກເຮົາ, ໂດຍສະເພາະແມ່ນ ການເຄື່ອນໄຫວທຳລາຍລະບົບແນວຄິດແລະອຸດົມການ. ຄຽງຄູ່ກັນນັ້ນ, ການແຜ່ລະບາດຂອງພະຍາດໂຄວິດ-19 ຍັງຜັນແປໄປຢ່າງສັບສົນ, ສ້າງຄວາມຫຍຸ້ງຍາກ ແລະ ເປັນອຸປະສັກ ໃຫ້ແກ່ການພັດທະນາເສດຖະກິດ-ສັງຄົມ, ກໍ່ໃຫ້ເກີດຄວາມບໍ່ໝັ້ນຄົງ ແລະ ຄາດເດົາບໍ່ໄດ້ໃນສັງຄົມ.
ສະຖານະການທີ່ກ່າວມາຂ້າງເທິງ ຈະສົ່ງຜົນກະທົບຢ່າງແຮງ, ຫຼາຍດ້ານເຖິງຈິດຕະສາດ ແລະ ແນວຄິດ ຂອງພະນັກງານ ສະມາຊິກພັກ ແລະ ປະຊາຊົນ, ມັນຮຽກຮ້ອງໃຫ້ວຽກງານແນວຄິດຂອງພັກ ຕ້ອງຍົກສູງລັກສະນະສູ້ຮົບ, ລັກສະນະຊັກຈູງ ແລະ ປະສິດທິຜົນກວ່າອີກ. ພ້ອມກັນນັ້ນ, ສະພາບການໃໝ່ກໍ່ມີຄວາມຮຽກຮ້ອງຕ້ອງການອັນຮີບດ່ວນ ໃຫ້ຜັນຂະຫຍາຍບັນດາໜ້າທີ່ ແລະ ວິທີແກ້ໄຂຈຸດສຸມຢ່າງຄົບຊຸດ ເພື່ອເຮັດໃຫ້ວຽກງານແນວຄິດເຂົ້າໄປໃນລວງເລິກ, ດັ່ງຕໍ່ໄປນີ້:
ທີໜຶ່ງ, ເພີ່ມທະວີການນຳພາຂອງພັກຕໍ່ວຽກງານແນວຄິດ; ປະສານສົມທົບບັນດາ “ເຫຼົ່າທັບ” ຢ່າງແໜ້ນແຟ້ນ ໃນແນວຮົບດ້ານແນວຄິດ, ສ້າງກຳລັງແຮງສັງລວມ, ຕອບສະໜອງຄວາມຕ້ອງການແລະໜ້າທີ່ໃນສະພາບການໃໝ່.
ການນຳພາຂອງພັກແມ່ນປັດໄຈຕັດສິນທີ່ສຸດ ເຖິງການເພີ່ມທະວີລັກສະນະສູ້ຮົບ, ລັກສະນະຊັກຈູງ ແລະ ປະສິດທິຜົນ ຂອງວຽກງານແນວຄິດໃນໄລຍະໃໝ່. ເພື່ອຍົກສູງລັກສະນະສູ້ຮົບ, ລັກສະນະຊັກຈູງ ແລະ ປະສິດທິຜົນຂອງວຽກງານແນວຄິດໃຫ້ສູງກວ່າອີກ, ບັນດາຄະນະພັກ, ອົງການຈັດຕັ້ງພັກຕ້ອງຊາບຊຶມຢ່າງເລິດເຊິ່ງ, ກຳແໜ້ນ ແລະ ຜັນຂະຫຍາຍແຜນການ ເພື່ອຫັນບັນດາມະຕິຂອງພັກກ່ຽວກັບວຽກງານແນວຄິດເປັນອັນລະອຽດ, ໂດຍສະເພາະ ມະຕິກອງປະຊຸມສູນກາງພັກຄັ້ງທີ 5 ສະໄໝທີ 10, “ວ່າດ້ວຍວຽກງານແນວຄິດ ທິດສະດີ ແລະ ສື່ສິ່ງພິມ ຕໍ່ໜ້າຄວາມຕ້ອງການໃໝ່” ແລະ ບັນດາທັດສະນະໃໝ່ກ່ຽວກັບວຽກງານແນວຄິດທີ່ກອງປະຊຸມໃຫຍ່ຄັ້ງທີ 13 ຂອງພັກໄດ້ວາງອອກມາ.
ພິເສດ, ຕ້ອງການເພີ່ມທະວີການໂຄສະນາ, ອົບຮົມສຶກສາລັດທິມາກ-ເລນິນ, ແນວຄິດໂຮ່ຈີມິນ, ປະເພນີວັດທະນະທຳອັນດີງານຂອງຊາດ ແລະ ປະຫວັດສາດການປະຕິວັດອັນສະຫງ່າງາມຂອງພັກ, ຄວາມສາມັກຄີ ເປັນເອກະພາບຂອງປະຊາຊົນທັງຊາດ; ຍົກສູງລະດັບທິດສະດີການເມືອງໃຫ້ພະນັກງານ ສະມາຊິກພັກຢ່າງບໍ່ຢຸດຢັ້ງ. ດຳເນີນການປ່ຽນແປງໃໝ່ໂຄງການ ຫຼັກສູດ, ເນື້ອໃນ, ວິທີການອົບຮົມສຶກສາທິດສະດີການເມືອງ ຕາມທິດນຳ “ວິທະຍາສາດ, ພຶດຕິກຳຕົວຈິງ, ປະດິດສ້າງ ແລະ ທັນສະໄໝ”. ຍູ້ແຮງການໂຄສະນາເຜີຍແຜ່ແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ຢ່າງກວ້າງຂວາງ ໂດຍຕິດກັບການປຸກລະດົມຂະບວນການແຂ່ງຂັນຮັກຊາດ, ເພື່ອສ້າງການຫັນປ່ຽນຢ່າງແຂງແຮງ, ສ້າງຄວາມເຫັນດີເຫັນພ້ອມໃນຄວາມຮັບຮູ້ ແລະ ຄວາມເປັນເອກະພາບໃນການກະທຳ ຢູ່ໃນພັກ ແລະ ໃນປະຊາຊົນ.
ທີສອງ, ສຸມໃສ່ການສະຫຼຸບສັງລວມພຶດຕິກຳຕົວຈິງ, ເຊື່ອມຕໍ່ການສະຫຼຸບສັງລວມພຶດຕິກຳ ກັບການພັດທະນາທິດສະດີ, ຍົກສູງລະດັບທິດສະດີຂອງພັກກ່ຽວກັບແນວທາງປ່ຽນແປງໃໝ່, ກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມ ຢູ່ຫວຽດນາມ ແລະ ຕອບບັນຫາໃໝ່ແລະຍາກທີ່ເກີດຈາກພຶດຕິກຳ.
ບັນດາ “ຊ່ອງຫວ່າງທາງທິດສະດີ” ຖ້າບໍ່ໄດ້ຮັບການແກ້ໄຂຢ່າງຖີ່ຖ້ວນ ຈະສ້າງ “ຊ່ອງທາງ” ໃຫ້ແກ່ກຳລັງສັດຕູແລະພວກປະຕິການບຸກໂຈມຕີຖານທິດສະດີຂອງພັກ. ສໍາລັບບັນຫາທິດສະດີທີ່ຫຍຸ້ງຍາກ ແລະ ສັບສົນ ເຊິ່ງຍັງມີຄວາມຄິດເຫັນແຕກຕ່າງກັນຢູ່ນັ້ນ, ຈໍາເປັນຕ້ອງມີການສົນທະນາຢ່າງເປັນປະຊາທິປະໄຕໃນວົງກວ້າງ, ສົນທະນາໃຫ້ເຖິງທີ່ສຸດ ແລະ ຄ່ອຍໆ ຈຳກັດຄວາມແຕກຕ່າງໃຫ້ແຄບລົງ ກ່ອນການຕັດສິນຕົກລົງ, ຫຼີກລ່ຽງການສົນທະນາແບບຮູບການ ຜິວເຜີນໂດຍເດັດຂາດ. ການຄົ້ນຄວ້າ ໝູນໃຊ້ ແລະ ພັດທະນາລັດທິມາກ-ເລນິນ, ແນວຄິດໂຮ່ຈີມິນ ຢ່າງປະດິດສ້າງ ຕ້ອງຕິດແໜ້ນກັບການຕໍ່ສູ້ປົກປ້ອງພື້ນຖານແນວຄິດຂອງພັກ, ຍົກສູງລັກສະນະສູ້ຮົບໃນແນວຮົບດ້ານແນວຄິດ ທິດສະດີ; ຍ້ອນວ່າ ມັນແມ່ນສອງດ້ານຂອງວຽກງານທິດສະດີ ທີ່ມີຄວາມພົວພັນສະໜິດແໜ້ນນຳກັນ, ບໍ່ແຍກອອກຈາກກັນ; ຕ້ອງກາຍເປັນໜ້າທີ່ອັນດັບໜຶ່ງ ແລະ ເປັນປະຈຳ ໃນວຽກງານການເມືອງ ແນວຄິດ ທິດສະດີຂອງພັກ.
ທີສາມ, ເຂົ້າໃຈສະພາບການແນວຄິດພາຍໃນພັກ ແລະ ໃນໝູ່ປະຊາຊົນຢ່າງເປັນປະຈຳ, ຄາດຄະເນຄວາມເຫັນຂອງປະຊາຊົນຢ່າງຖືກຕ້ອງແລະໃກ້ຊິດ ໂດຍຕິດພັນກັບການປ່ຽນໃໝ່ການຮ່ຳຮຽນ, ການຊາບຊຶມ ແລະ ການໂຄສະນາເຜີຍແຜ່ມະຕິຂອງພັກ.
ເພື່ອຍົກສູງລັກສະນະຊັກຊວນ ແລະ ປະສິດທິຜົນຂອງວຽກງານແນວຄິດ, ຕ້ອງກຳສະພາບການແນວຄິດໃນພັກແລະໃນສັງຄົມ, ຄາດຄະເນ ກຳນົດທິດທາງຢ່າງຖືກຕ້ອງ, ຈັດການແກ້ໄຂບັນດາບັນຫາແນວຄິດໃນພັກແລະສັງຄົມຢ່າງຖືກຕ້ອງ ທັນການ; ເອົາໃຈໃສ່ການກຳ ແລະ ນຳນົດທິດທາງຄວາມຄິດເຫັນສັງຄົມ; ຈາກນັ້ນ, ຈະມີການວາງທິດທາງທີ່ຖືກຕ້ອງແລະເໝາະສົມ, ຮັບປະກັນຄວາມເປັນເອກະພາບທາງດ້ານແນວຄິດພາຍໃນພັກ ແລະ ຄວາມເຫັນດີເຫັນພ້ອມໃນສັງຄົມ. ໃນການຊາບຊຶມ ແລະ ໂຄສະນາເຜີຍແຜ່ມະຕິຂອງພັກນັ້ນ, ຕ້ອງເອົາໃຈໃສ່ຊາບຊຶມແລະໂຄສະນາເຜີຍແຜ່ບັນດາເນື້ອໃນພື້ນຖານຫຼັກແຫຼ່ງ, ບັນດາຈຸດໃໝ່ໃນມະຕິ; ຕິດຕາມໃກ້ຊິດກັບຂົງເຂດ, ພື້ນທີ່, ເປົ້າໝາຍ, ກັບຜົນປະໂຫຍດທີ່ແທດຈິງ, ເອົາໃຈໃສ່ບັນຫາທີ່ຮ້ອນເຄືອງ ແລະ ຄວາມຂັດແຍ່ງທີ່ເກີດຂຶ້ນໃນລະຫວ່າງການພັດທະນາຂອງພຶດຕິກຳຕົວຈິງ. ຜັນຂະຫຍາຍບັນດາວິທີການຮ່ຳຮຽນ, ຊາບຊຶມ, ໂຄສະນາເຜີຍແຜ່ມະຕິຂອງພັກ, ເຊັ່ນ ສົມທົບການເຮັດໂດຍກົງກັບອອນໄລນ໌ ເພື່ອເພີ່ມການຊັກຊວນ, ດຶງດູດໃຈ ແລະ ປະສິດທິຜົນ.
ທີສີ່, ວຽກງານແນວຄິດຕ້ອງເພີ່ມທະວີການປົກປ້ອງພື້ນຖານແນວຄິດຂອງພັກ, ຕໍ່ສູ້ຢ່າງເດັດດ່ຽວແລະເປັນປະຈຳ ເພື່ອບອກປັດບັນດາທັດສະນະທີ່ຜິດພາດ ທີ່ເປັນປະຕິປັກ, ໂດຍສະເພາະໃນໂລກໄຊເບີຮ໌; ເປັນເຈົ້າການໃນການສະໜອງຂໍ້ມູນຢ່າງທັນການ ຖືກຕ້ອງ ພາວະວິໄສ ແລະ ຖືກທິດທາງ ເພື່ອປ້ອງກັນແລະຕໍ່ສູ້ກັບ “ການຫັນປ່ຽນໂດຍສັນຕິ”, ກັບຂໍ້ມູນຂ່າວສານທີ່ບໍ່ດີ ແລະ ເປັນພິດ ໃນອິນເຕີເນັດ, ເຄືອຂ່າຍສັງຄົມ.
ຢາກເຮັດໄດຄືແນວນັ້ນ, ຈໍາເປັນຕ້ອງລະບຸຢ່າງຈະແຈ້ງກ່ຽວກັບຖ້ອຍທຳນອງທີ່ບິດເບືອນຂອງກໍາລັງສັດຕູແລະປະຕິການ, ບັນດາຂໍ້ມູນຂ່າວສານທີ່ບໍດີແລະເປັນພິດ ໃນອິນເຕີເນັດ, ເຄືອຂ່າຍສັງຄົມ; ພ້ອມກັນນັ້ນ, ດຳເນີນການຄົ້ນຄວ້າພື້ນຖານແນວຄິດຂອງພັກ ຢ່າງມີວິທີແບບສະບັບ ພື້ນຖານ. ສຸມໃສ່ການກໍ່ສ້າງຖັນແຖວພະນັກງານທີ່ເຮັດວຽກງານທິດສະດີສະເພາະທາງ, ມີຄວາມຮູ້ຢ່າງເລິກເຊິ່ງ ແລະ ມີລະດັບຄວາມສາມາດໃນການຕໍ່ສູ້ຢ່າງມີປະສິດທິຜົນໃນແນວຮົບດ້ານແນວຄິດ ທິດສະດີ. ພຽງແຕ່ເຮັດຄືແນວນີ້ ພວກເຮົາຈຶ່ງສາມາດເພີ່ມທະວີລັກສະນະສູ້ຮົບ ແລະ ປົກປັກຮັກສາພື້ນຖານແນວຄິດຂອງພັກຢ່າງມີປະສິດທິຜົນ, ເພີ່ມທະວີຄວາມໄວ້ເນື້ອເຊື່ອໃຈຂອງປະຊາຊົນ ແລະ ຄວາມເຫັນດີເຫັນພ້ອມຂອງສັງຄົມ; ພ້ອມກັນນັ້ນ, ບໍ່ອະນຸຍາດໃຫ້ການເຄື່ອນໄຫວໃດໆທີ່ສວຍໃຊ້ “ເສລີພາບທານຄວາມຄິດ”, “ເສລີພາບທາງວິຊາການ” ເພື່ອເຜີຍແຜ່ທັດສະນະທີ່ຜິດພາດ, ເປັນປະຕິປັກ, ຄັດຄ້ານພັກ, ລັດ, ລະບອບການປົກຄອງ, ແບ່ງແຍກກ້ອນມະຫາສາມັກຄີປວງຊົນທັງຊາດ, ກໍ່ໃຫ້ເກີດຄວາມບໍ່ໝັ້ນຄົງທາງສັງຄົມ, ກີດຂວາງການພັດທະນາຂອງປະເທດ. ດຳເນີນການຕໍ່ສູ້ເພື່ອປົກປ້ອງພື້ນຖານແນວຄິດຂອງພັກ ບໍ່ພຽງແຕ່ດ້ວຍການໂຕ້ຖຽງທາງວິທະຍາສາດແລະຕັກກະເທົ່ານັ້ນ ແຕ່ຍັງດ້ວຍຂໍ້ມູນຄວາມຈິງ, ຜ່ານບັນດາຮູບແບບສະເພາະ, ດ້ວຍແບບຢ່າງຂອງວຽກດີ ຄົນເດັ່ນ; ນຳໃຊ້ຮູບແບບການສື່ສານທີ່ທັນສະໄໝ, ການສື່ສານດ້ວຍມັນຕິມີເດຍ, ປະສົມປະສານການປະຍຸກໃຊ້ຜົນສຳເລັດດ້ານວິທະຍາສາດ-ເຕັກໂນໂລຊີ ຂອງການປະຕິວັດອຸດສາຫະກຳຄັ້ງທີສີ່... ຄວາມເປັນຈິງຂອງການຕໍ່ສູ້ໃນຂົງເຂດທີ່ຫຍຸ້ງຍາກແລະທ້າທາຍນີ້ ກຳລັງກໍ່ໃຫ້ເກີດຄວາມຈຳເປັນຮີບດ່ວນ ໃນການເພີ່ມທະວີລັກສະນະສູ້ຮົບ ແລະລັກສະນະຊັກຊວນ ຂອງຫຼັກຖານການໂຕ້ຖຽງ; ຜ່ານນັ້ນ, ຈຶ່ງພຽງພໍທີ່ຈະທຳລາຍຮາກເຫງົ້າ ແລະ ບອກປັດຢ່າງເດັດຂາດ ຕໍ່ທັດສະນະທີ່ຜິດພາດແລະເປັນປະຕິປັກຂອງສັດຕູ ທີ່ຫວັງປະຕິເສດບົດບາດນຳພາຂອງພັກ ແລະ ບັນດາຜົນງານອັນຍິ່ງໃຫຍ່ແລະມີຄວາມໝາຍປະຫວັດສາດ ທີ່ພັກແລະປະຊາຊົນບັນລຸໄດ້.
ທີຫ້າ, ເສີມຂະຫຍາຍບົດບາດຂອງສື່ສິ່ງພິມ, ສິລະປະ ວັນນະຄະດີຍິ່ງກວ່າອີກ ໃນແນວຮົບດ້ານແນວຄິດ ແລະ ໃນການແນະນຳຄວາມຄິດເຫັນສັງຄົມ.
ສື່ສິ່ງພິມຕ້ອງເພີ່ມທະວີລັກສະນະສູ້ຮົບ, ລັກສະນະຊັກຊວນ ແລະ ປະສິດທິຜົນຍິ່ງກວ່າອີກ; ເປັນເຈົ້າການຕອບສະໜອງຢ່າງທັນການຕໍ່ເຫດການວິກິດດ້ານການສື່ສານ; ປະກອບສ່ວນສ້າງຄວາມຄິດເຫັນສັງຄົມທີ່ດີ, ຍ້ອງຍໍຊົມເຊີຍບັນດາແບບຢ່າງຂອງວຽກດີ ຄົນເດັ່ນ, ເພີ່ມທະວີຄວາມເຫັນດີເຫັນພ້ອມສັງຄົມ ແລະ ປັບປຸງ ຍົກສູງຄວາມເຊື່ອໝັ້ນຂອງປະຊາຊົນໃນການນຳພາຂອງພັກ. ກອງປະຊຸມໃຫຍ່ຄັ້ງທີ 13 ຂອງພັກໄດ້ເນັ້ນໜັກວ່າ: “ເພີ່ມທະວີການຄຸ້ມຄອງ ແລະ ແນະນຳການເຄື່ອນໄຫວຂອງບັນດາອົງການຂ່າວ; ສຸມໃສ່ການອົບຮົມສຶກສາ ແລະກໍ່ສ້າງຖັນແຖວພະນັກງານຄຸ້ມຄອງສື່ສິ່ງພິມ, ນັກໜັງສືພິມ, ຜູ້ບັນນະທິການ ໃຫ້ມີຄວາມກ້າຫານທາງການເມືອງ, ມີຄຸນສົມບັດສິນທຳທີ່ຜ່ອງໃສ ແລະ ມີຄວາມຊ່ຽວຊານດ້ານວິຊາຊີບ ເພື່ອຍົກສູງຄຸນນະພາບຂອງວຽກງານໂຄສະນາອົບຮົມ;ຈັດກການຢ່າງເຂັ້ມງວດຕາມຂໍ້ກຳນົດຂອງພັກ ແລະ ກົດໝາຍຂອງລັດ ຕໍ່ບັນດາອົງການຂ່າວ, ນັກຂ່າວທີ່ເຜີຍແຜ່ຂໍ້ມູນທີ່ຍັງບໍ່ໄດ້ຮັບການຢັ້ງຢືນ ກວດສອບ, ບໍ່ມີພື້ນຖານຄວາມຈິງຫຼືເຫດຜົນ, ກໍ່ໃຫ້ເກີດອິດທິພົນທາງລົບ ໃນຄວາມເຫັນຂອງປະຊາຊົນ; ເສີມຂະຫຍາຍກວ່າອີກ ບົດບາດຂອງສິລະປະ ວັນນະຄະດີ ໃນແນວຮົບດ້ານແນວຄິດ; ຍູ້ແຮງການປະຍຸກໃຊ້ຜົນສຳເລັດຂອງວິທະຍາສາດ-ເຕັກໂນໂລຊີ ໃນການຮັບໃຊ້ວຽກງານໂຄສະນາອົບຮົມ, ຮັບປະກັນຄວາມໝັ້ນຄົງດ້ານແນວຄິດ ໃນສະພາບແວດລ້ອມໄຊເບີຮ໌ສະເປດ”(8).
ທີຫົກ, ວຽກງານແນວຄິດຕ້ອງສົ່ງເສີມແລະເພີ່ມທະວີຄວາມຮັບຜິດຊອບເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນ ພະນັກງານຂັ້ນຍຸດທະສາດ, ຫົວໜ້າສຳນັກງານ ອົງການ ທ້ອງຖິ່ນ ໜ່ວຍງານ; ຕິດແໜ້ນກັບການປ້ອງກັນແລະຕ້ານການເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ”, ປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ 11, 12, 13 ຢ່າງເຂັ້ມງວດ ເດັດດ່ຽວ ແລະ ເຖິງຖອງ.
ວຽກງານແນວຄິດຕ້ອງເພີ່ມພູຄວາມຮູ້ຄວາມເຂົ້າໃຈໃຫ້ເລິກເຊິ່ງຍິ່ງຂຶ້ນ, ມີພະລັງທີ່ຈະຂັບເຄື່ອນຫົວໃຈຂອງທຸກຄົນ, ພິເສດແມ່ນຖັນແຖວພະນັກງານ ສະມາຊິກພັກ, ກ່ຽວກັບກຽດສັກສີແລະຄຸນຄ່າໃນຊີວິດຂອງແຕ່ລະຄົນ; ຕ້ອງມີສະຕິ, ມີຄວາມຮັບຜິດຊອບສູງ, ມີຄວາມນັບຖືຕົນເອງ ແລະ ບຸກຄະລິກກະພາບຂອງມະນຸດ. ພະນັກງານ ສະມາຊິກພັກແຕ່ລະຄົນ ຕ້ອງຮັບຮູ້ສະເໝີວ່າ ຕົນເອງມີຊີວິດຢູ່ທ່າມກາງປະຊາຊົນ, ເພື່ອປະຊາຊົນ, ເຂົ້າໃຈແລະພະຍາຍາມຕອບສະໜອງຕາມຄຳຮຽກຮ້ອງ ແລະ ຄວາມປາຖະໜາອັນຊອບທຳຂອງປະຊາຊົນ ເພື່ອໃຫ້ປະຊາຊົນເຊື່ອໝັ້ນໃນພັກ, ຮັກແພງພັກ, ໄປຕາມພັກ, ປະຕິບັດແຜນນະໂຍບາຍ ແນວທາງ ມະຕິຂອງພັກ, ນະໂຍບາຍ ກົດໝາຍຂອງລັດ ຢ່າງຕັ້ງໜ້າ ປະດິດສ້າງ.
ທີເຈັດ, ມີແຜນການ, ຍຸດທະສາດພັດທະນາຖັນແຖວພະນັກງານເຮັດວຽກງານແນວຄິດຢ່າງເປັນແບບສະບັບ ພື້ນຖານ, ໂດຍສະເພາະແມ່ນ ຖັນແຖວຜູ້ຊ່ຽວຊານນຳໜ້າຂະແໜງການ, ໄປຄຽງຄູ່ກັບການກຳນົດນະໂຍບາຍດຶງດູດ ໃຫ້ຄ່າຕອບແທນໃຫ້ພະນັກງານຢ່າງເໝາະສົມ ແລະ ທັນການ.
ໃນສະພາບທີ່ຖັນແຖວພະນັກງານແລະຜູ້ຊ່ຽວຊານທີ່ເຮັດວຽກງານແນວຄິດຍັງອ່ອນນ້ອຍນັ້ນ ຈຳເປັນຢ່າງຍິ່ງທີ່ຈະຕ້ອງມີຍຸດທະສາດ ແລະ ວິທີແກ້ບັນຫານີ້ຢ່າງວ່ອງໄວ. ຄວາມເປັນຈິງໃຫ້ເຫັນວ່າ ຈະບໍ່ສາມາດຍົກສູງລັກສະນະສູ້ຮົບ ລັກສະນະຊັກຊວນ ແລະ ປະສິດທິຜົນຂອງວຽກງານແນວຄິດໄດ້ ຖ້າຫາກບໍ່ສຸມໃສ່ຍຸດທະສາດພັດທະນາຖັນແຖວພະນັກງານເຮັດວຽກງານແນວຄິດ. ຕ້ອງການກໍ່ສ້າງແລະພັດທະນາຖັນແຖວພະນັກງານ, ຄັດເລືອກຜູ້ຊ່ຽວຊານຕາມຈິດໃຈເຄົາລົບໃຊ້ຄົນເກັ່ງ, ມີນະໂຍບາຍທີ່ສົມເຫດສົມຜົນເພື່ອສົ່ງເສີມໃຫ້ພະນັກງານກ້າຄິດ, ກ້າເຮັດ, ກ້າສະເໜີຂໍ້ສະເໜີແນະ ແລະວິທີແກ້ບັນຫາທີ່ກ້າວລ້ຳ ເພື່ອແກ້ໄຂບັນດາບັນຫາແນວຄິດທີ່ສຳຄັນ ຮີບດ່ວນ ທີ່ພຶດຕິກຳແຫ່ງການພັດທະນາວາງອອກມາ. ເພີ່ມທະວີການຝຶກອົບຮົມຢ່າງເຂັ້ມຂົ້ນ ແລະສະໝ່ຳສະເໝີ ໃຫ້ຖັນແຖວພະນັກງານເຮັດວຽກງານແນວຄິດ; ສ້າງແຫຼ່ງພື້ນຖານແລະຍາວນານ ສຳລັບການພັດທະນາຖັນແຖວພະນັກງານນີ້. ປັບປຸງລະບອບ ນະໂຍບາຍບຸລິມະສິດພິເສດ ໃຫ້ຜູ້ເຮັດວຽກງານແນວຄິດ ທິດສະກີດ; ມີຮູບແບບການຍົກຍ່ອງໃຫ້ກຽດ ແລະ ໃຫ້ລາງວັນທີ່ສູງສົ່ງ ແກ່ບຸກຄົນທີ່ມີຜົນງານດີເດັ່ນຫຼາຍຢ່າງ, ໄປຄຽງຄູ່ກັບການປຸກກະຕູ້ນຄວາມພາກພູມໃຈ, ປັບປຸງຄວາມຮັບຜິດຊອບ ແລະ ຈັນຍາບັນວິຊາຊີບ ຂອງພະນັກງານເຮັດວຽກງານແນວຄິດ.
ທີແປດ, ວຽກງານແນວຄິດໃນປະຈຸບັນຕ້ອງປະກອບສ່ວນເສີມຂະຫຍາຍສຸດຂີດ ເຈດຈຳນົງອີງໃສ່ຕົນເອງສ້າງຄວາມເຂັ້ມແຂງດ້ວຍຕົນເອງ, ປຸກຕື່ນຈິດໃຈປະດິດສ້າງ ແລະ ຄວາມມຸ່ງມາດປາຖະໜາໃນການພັດທະນາປະເທດໃຫ້ຈະເລີນຮຸ່ງເຮືອງ ມີຄວາມສຸກ, ປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກໃຫ້ສຳເລັດມີໄຊ.
ສຸມໃສ່ການຍົກສູງຄວາມຮັບຮູ້, ຊາບຊຶມຢ່າງເລິກເຊິ່ງ ເປັນປະຈຳ ແລະ ຕໍ່ເນື່ອງໃຫ້ພະນັກງານ ສະມາຊິກພັກກຳແໜ້ນ ບັນດາເນື້ອໃນຂອງແນວຄິດຫຼັກທີ່ສະແດງອອກໃນຫົວຂໍ້ຂອງກອງປະຊຸມໃຫຍ່ຄັ້ງທີ 13 ຄື: ເພີ່ມທະວີການກໍ່ສ້າງແລະປັບປຸງພັກ ແລະ ລະບົບການເມືອງ ໃຫ້ສະອາດປອດໃສ ແລະ ໝັ້ນຄົງເຂັ້ມແຂງ; ປຸກຕື່ນຄວາມມຸ່ງມາດປາຖະໜາໃນການພັດທະນາປະເທດ, ເສີມຂະຫຍາຍເຈດຈຳນົງ, ກຳລັງແຮງແຫ່ງມະຫາສາມັກຄີປວງຊົນທັງຊາດ ສົມທົບກັບກຳລັງແຮງຂອງຍຸກສະໄໝ; ສືບຕໍ່ຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ ຄົບຊຸດ; ກໍ່ສ້າງແລະປົກປັກຮັກສາປະເທດຊາດໃຫ້ໝັ້ນຄົງ, ຮັກສາສະພາບແວດລ້ອມສັນຕິພາບ ແລະສະຖຽນລະພາບ; ສູ້ຊົນເພື່ອເຖິງກາງສະຕະວັດທີ 21 ຫວຽດນາມກາຍເປັນປະເທດທີ່ພັດທະນາແລ້ວ ຕາມທິດທາງສັງຄົມນິຍົມ./.
-------------------
(1) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 8, ໜ້າ 554 – 555.
(2) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 14, ໜ້າ 159.
(3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 284.
(5) ມະຕິສະບັບເລກທີ 05-NQ/TW, ລົງວັນທີ 28 ພຶດສະພາ 1987, ຂອງກົມການເມືອງສູນກາງພັກສະໄໝທີ 6, “ວ່າດ້ວຍການປ່ຽນແປງໃໝ່ ແລະ ຍົກສູງລະດັບການນຳພາ ຄຸ້ມຄອງ ສິລະປະ ວັນນະຄະດີ ແລະ ວັດທະນະທຳ, ເສີມຂະຫຍາຍຄວາມສາມາດໃນການປະດິດຄິດແຕ່ງ, ນຳເອົາສິລະປະ ວັນນະຄະດີ ແລະ ວັດທະນະທຳຂຶ້ນສູ່ລະດັບການພັດທະນາໃໝ່”; ມະຕິສະບັບເລກທີ 07-NQ/TW, ລົງວັນທີ 24 ສິງຫາ 1989, ຂອງກອງປະຊຸມສູນກາງພັກຄັ້ງທີ 7 ສະໄໝທີ 6, ວ່າດ້ວຍ “ບາງບັນຫາຮີບດ່ວນກ່ຽວກັບວຽກງານແນວຄິດ ໃນສະພາບການພາຍໃນປະເທດແລະສາກົນປະຈຸບັນ”; ມະຕິສະບັບເລກທີ 16-NQ/TW, ລົງວັນທີ 18 ມີນາ 2002, ຂອງກອງປະຊຸມສູນກາງພັກຄັ້ງທີ 5 ສະໄໝທີ 9, “ວ່າດ້ວຍໜ້າທີ່ຕົ້ນຕໍຂອງວຽກງານແນວຄິດ ທິດສະດິ ໃນສະພາບການໃໝ່”; ມະຕິສະບັບເລກທີ 16-NQ/TW, ລົງວັນທີ 1 ສິງຫາ 2007, ຂອງກອງປະຊຸມສູນກາງພັກຄັ້ງທີ 5 ສະໄໝທີ 10, “ວ່າດ້ວຍວຽກງານແນວຄິດ ທິດສະດີ ແລະ ສື່ສິ່ງພິມ ຕໍ່ໜ້າຄວາມຮຽກຮ້ອງຕ້ອງການໃໝ່”; ມະຕິສະບັບເລກທີ 35-NQ/TW, ລົງວັນທີ 25 ຕຸລາ 2018, ຂອງກົມການເມືອງສູນກາງພັກສະໄໝທີ 12, ວ່າດ້ວຍ “ເພີ່ມທະວີການປົກປ້ອງຮາກຖານແນວຄິດຂອງພັກ, ຕໍ່ສູ້ບອກປັດບັນດາທັດສະນະທີ່ຜິດພາດ ເປັນປະຕິປັກ ໃນສະພາບການໃໝ່”; ບົດສະຫຼຸບເລກທີ 01-KL/TW, ອອກວັນທີ 18 ພຶດສະພາ 2021, ຂອງກົມການເມືອງສູນກາງພັກສະໄໝທີ 13, “ວ່າດ້ວຍການສືບຕໍ່ປະຕິບັດຄຳສົ່ງເລກທີ 05-CT/TW ຂອງກົມການເມືອງສູນກາງພັກ “ວ່າດ້ວຍການຍູ້ແຮງການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດສິນທຳ ແລະ ແບບແຜນ ໂຮ່ຈີມິນ””...
(5), (6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 33, 181.
(7) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 172 – 173.
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 234.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 995 (ເດືອນສິງຫາ 2022)
