ການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ
ແລະການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ
ເພືອ່ປະກອບສ່ວນເຂົ້າໃນການປະຕິບັດພາລະກິດການສ້າງສາແລະ
ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງສຳເລັດຜົນ
ແລະການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ
ເພືອ່ປະກອບສ່ວນເຂົ້າໃນການປະຕິບັດພາລະກິດການສ້າງສາແລະ
ປົກປັກຮັກສາປະເທດຊາດຫວຽດນາມສັງຄົມນິຍົມຢ່າງສຳເລັດຜົນ
ປະຊາທິປະໄຕ ແລະ ການປະຕິບັດປະຊາທິປະໄຕໃນປະຫວັດສາດ
ປະຫວັດສາດການພັດທະນາສັງຄົມມະນຸດໄດ້ຜ່ານບັນດາຮູບແບບເສດຖະກິດ-ສັງຄົມທີ່ແຕກຕ່າງກັນ ເຊິ່ງສະແດງໃຫ້ເຫັນເຖິງຄວາມກ້າວໜ້າຂອງປະຊາທິປະໄຕ: ປະຊາທິປະໄຕດັ້ງເດີມ (ໃນລະບອບກອມມູນິດປະຖົມບູຮານ); ປະຊາທິປະໄຕແບບເຈົ້າທາດ (ໃນລະບອບກຳມະສິດຂ້າທາດ); ປະຊາທິປະໄຕນາຍທຶນ (ໃນລະບອບທຶນນິຍົມ); ແລະໃນປະຈຸບັນແມ່ນປະຊາທິປະໄຕສັງຄົມນິຍົມ (ໃນລະບອບສັງຄົມນິຍົມ); ສະເພາະລະບອບສັກດິນາທີ່ບໍ່ຖືວ່າເປັນປະຊາທິປະໄຕ ເນື່ອງຈາກວ່າ ການຄອບງຳຂອງຊົນຊັ້ນສັກດິນາຖືກປົກຄຸມດ້ວຍເສື້ອຄຸມເລິກລັບຂອງພະລັງເໜືອທຳມະຊາດ, ຄວາມຮູ້ສຶກຂອງປະຊາຊົນກ່ຽວກັບປະຊາທິປະໄຕ ແລະການຕໍ່ສູ້ເພື່ອຊາທິປະໄຕຂອງປະຊາຊົນບໍ່ມີຄວາມຄືບໜ້າພໍເທົ່າໃດ ເມື່ອທຽບກັບລະບອບກຳມະສິດຂ້າທາດ.
ກ່ອນທີ່ລະບອບປະຊາທິປະໄຕສັງຄົມນິຍົມຈະເກີດຂຶ້ນ, ລະບອບປະຊາທິປະໄຕນາຍທຶນໃນຖານະສະຖາບັນຂອງລັດຖືກຳເນີດຂຶ້ນ ໂດຍຕິດພັນກັບໄຊຊະນະຂອງການປະຕິວັດນາຍທຶນທີ່ຕໍ່ຕ້ານລະບົບສັກດິນາໃນເອີຣົບຕາເວັນຕົກ (ຍາວນານຕັ້ງແຕ່ສະຕະວັດທີ່ XV ເຖິງສະຕະວັດທີ XVIII). ການຕໍ່ສູ້ໃນຂົງເຂດແນວຄິດ, ຕໍ່ຕ້ານເທວາທິປະໄຕ, ຮຽກຮ້ອງເສລີພາບ, ຄວາມສະເໝີພາບ, ສິດທິທີ່ເທົ່າທຽມກັນ ແລະ ການປົກປ້ອງຄວາມຈິງທາງວິທະຍາສາດ ໂດຍມີແກນກາງຂອງນັກຄິດທີ່ເປັນຕົວແທນຂອງຊົນຊັ້ນນາຍທຶນ (ຕົວແທນທີ່ໂດດເດັ່ນຄື ໂຄເປີນິຄັສ, ບຣູໂນ, ເຊັກສະເປຍ, ເຊີບັນເຕສ, ລີໂອນາ ເດ ວານຊີ, ໄມເຄິນແອງເຈໂລ, ເດກາຣ໌ຕ, ວອນແຕຣ໌, ຣຸສໂຊ...) ໄດ້ຟາດບາດຄ້ອນໂຈມຕີຢ່າງເດັດຂາດທີ່ນຳໄປສູ່ການສິ້ນສຸດຂອງລະບອບສັກດິນາ. ໃນສະໄໝນັ້ນ, ປະຊາທິປະໄຕໄດ້ກໍ່ຕົວຂຶ້ນຂ້ອນຂ້າງສົມບູນໃນລະຫວ່າງຂະບວນການຕໍ່ສູ້ປະຕິວັດນາຍທຶນ ເຊິ່ງເປັນກ້າວສຳຄັນໃນຄວາມກ້າວໜ້າທາງປະຫວັດສາດຂອງມະນຸດ. ການປະກົດຕົວຂອງປະຊາທິປະໄຕນາຍທຶນນັ້ນ ຕິດພັນກັບການເປັນຮູບເປັນຮ່າງຂອງແບບວິທີການຜະລິດທຶນນິຍົມ, ກັບຂະບວນການຕໍ່ສູ້ທາງຊົນຊັ້ນຢ່າງດຸເດືອດຂອງຊົນຊັ້ນນາຍທຶນ ເພື່ອລົບລ້າງແບບວິທີການຜະລິດສັກດິນາ ແລະ ໂຄ່ນລົ້ມການປົກຄອງຂອງຊົນຊັ້ນສັກດິນີ. ການກຳເນີດຂອງລະບອບປະຊາທິປະໄຕທຶນນິຍົມຖືເປັນກ້າວສຳຄັນຂອງມະນຸດຊາດ ໂດຍມີຄຸນຄ່າໂດດເດັ່ນດ້ານສິດເສລີພາບ ແລະຄວາມສະເໝີພາບ. ຢ່າງໃດກໍຕາມ, ເນື່ອງຈາກປະຊາທິປະໄຕນາຍທຶນຖືກສ້າງຂຶ້ນບົນຮາກຖານທາງເສດຖະກິດ ຂອງລະບອບກຳມະສິດເອກະຊົນກ່ຽວກັບພາຫະນະການຜະລິດ ດັ່ງນັ້ນປະຊາທິປະໄຕນາຍທຶນຈຶງຍັງຄົງເປັນປະຊາທິປະໄຕຂອງຊົນກຸ່ມນ້ອຍທີ່ເປັນເຈົ້າຂອງປັດໄຈການຜະລິດ. ປະຊາທິປະໄຕນາຍທຶນ ແລະ ທັດສະນະແລະແນວຄິດປະຊາທິປະໄຕນາຍທຶນສະແດງໃຫ້ເຫັນເຖິງທາດແທ້ ວັດຖຸປະສົງ ແລະ ຜົນປະໂຫຍດຂອງຊົນຊັ້ນນາຍທຶນຢ່າງເລິກເຊິ່ງ. ປະຊາທິປະໄຕາຍທຶນແມ່ນເຄື່ອງມື, ແບບວິທີ ແລະ ກົນອຸບາຍ ໃນການປົກປ້ອງລະບອບກຳມະສິດເອກະຊົນກ່ຽວກັບພາຫະນະການຜະລິດ, ຮັກສາຜົນປະໂຫຍດທາງເສດຖະກິດ ແລະອຳນາດຄອບຄອງຂອງຊົນຊັ້ນນາຍທອນ ແລະລະບອບທຶນນິຍົມ ທີ່ສະແດງອອກຢ່າງຊັດເຈນທີ່ສຸດໃນລະບອບລະບຽບ, ສະຖາບັນ ແລະກົນໄກທາງການເມືອງໃນສັງຄົມ. ດັ່ງນັ້ນ, ປະຊາທິປະໄຕນາຍທຶນຈຶງຖືກຳເນີດແລະພັດທະນາເປັນເວລາຫຼາຍຮ້ອຍປີໃນປະເທດທີ່ພັດທະນແລ້ວສ່ວນຫຼາຍ, ເຖິງຈະປອມຕົວແລະມີການປັບປ່ຽນ, ມາເຖິງປະຈຸບັນ ເຖິງວ່າມີຄວາມຄືບໜ້າຫຼາຍກໍ່ຕາມ ແຕ່ກໍຍັງເປັນຮູບແບບອຳນາດລວມສູນຂອງຊົນຊັ້ນນາຍທຶນຢ່າງຈະແຈ້ງ, ເປັນເຄື່ອງມືຂອງລະບອບຜະເດັດການທຶນນະຍົມ ທີ່ຖືກຈຳກັດໂດຍທາດແທ້ຂອງລັດທິທຶນນິຍົມ.
ໄຊຊະນະຂອງການປະຕິວັດເດືອນຕຸລາຂອງລັດເຊຍໃນປີ 1917 ໄດ້ເປີດສັກກະລາດໃໝ່ - ສັກກະລາດແຫ່ງການຫັນປ່ຽນຈາກທຶນນິຍົມໄປສູ່ສັງຄົມນິຍົມ, ປະຊາຊົນຜູ້ອອກແຮງງານໃນຫຼາຍປະເທດທົ່ວໂລກ ໄດ້ຮັບສິດໃນການເປັນເຈົ້າຂອງລັດ, ເປັນເຈົ້າສັງຄົມ, ສະຖາປະນາລັດສັງຄົມນິຍົມ ແລະລະບອບປະຊາທິປະໄຕສັງຄົມນິຍົມ (ປະຊາທິປະໄຕກຳມາຊີບ) ປະຕິບັດອຳນາດຂອງປະຊາຊົນສ່ວນຫຼາຍ, ສ້າງລັດປະຊາທິປະໄຕຢ່າງແທ້ຈິງ, ປະຊາຊົນເປັນເຈົ້າຂອງລັດແລະສັງຄົມ, ປົກປັກຮັກສາສິດຂອງປະຊາຊົນສ່ວນຫຼາຍ. ການກຳເນີດຂອງລະບອບປະຊາທິປະໄຕສັງຄົມນິຍົມຂີດໝາຍບາດກ້າວການພັດທະນາໃໝ່ທາງດ້ານຄຸນນະພາບ ເຊິ່ງມີຂະບວນການພັດທະນາຈາກຕ່ຳໄປສູ່ສູງ, ຈາກຄວາມບໍ່ສົມບູນໄປສູ່ຄວາມສົມບູນແບບ, ໃນນັ້ນ ມີການຄັດເລືອກສືບທອດຄຸນຄ່າຂອງລະບອບປະຊທິປະໄຕກ່ອນໜ້ານີ້, ພ້ອມກັນນັ້ນ ກໍ່ເສີມສ້າງ ແລະ ເພີ່ມຄຸນຄ່າຂອງລະບອບປະຊາທິປະໄຕໃໝ່. ປະຊາທິປະໄຕສັງຄົມນິຍົມແມ່ນປະຊາທິປະໄຕທີ່ມີຄຸນນະພາບສູງກວ່າປະຊາທິປະໄຕໃນປະຫວັດສາດຂອງມະນຸດ, ແມ່ນປະຊາທິປະໄຕທີ່ອຳນາດທັງໝົດເປັນຂອງປະຊາຊົນ, ປະຊາຊົນເປັນນາຍ ແລະ ປະຊາຊົນເປັນເຈົ້າຂອງ; ປະຊາທິປະໄຕແລະກົດໝາຍເປັນເອກະພາບແບບສັດຈະວິພາກ, ໄດ້ຮັບການປະຕິບັດໂດຍລັດແຫ່ງອຳນາດກົດໝາຍສັງຄົມນິຍົມ, ພາຍໃຕ້ການນຳພາຂອງພັກກອມມູນິດ. ຫຼັກການພື້ນຖານຂອງປະຊາທິປະໄຕສັງຄົມນິຍົມແມ່ນການຂະຫຍາຍລະອບບປະຊາທິປະໄຕຢ່າງຕໍ່ເນື່ອງ, ຍົກລະດັບການປົດປ່ອຍຄົນງານ ແລະດຶງດູດໃຫ້ພວກເຂົາເຂົ້າຮ່ວມໂດຍສະໝັກໃຈໃນວຽກງານການຄຸ້ມຄອງຂອງລັດ, ການຄຸ້ມຄອງສັງຄົມ, ຂະບວນການນັ້ນເຮັດໃຫ້ປະຊາທິປະໄຕກາຍເປັນນິໄສ, ເປັນປະເພນີໃນການດຳລົງຊີວິດທາງສັງຄົມ.
ທັດສະນະຂອງພັກກອມມູນິດຫວຽດນາມກ່ຽວກັບປະຊາທິປະໄຕ,
ການປະຕິບັດປະຊາທິປະໄຕ ແລະ ການເພີ່ມທະວີອຳນາດກົດໝາຍສັງຄົມນິຍົມ
ໃນຊີວິດຂອງຕົນ, ປະທານໂຮ່ຈິມິນຢືນຢັນວ່າ: “ປະເທດຂອງເຮົາແມ່ນປະເທດປະຊາທິປະໄຕ. ຜົນປະໂຫຍດທັງໝົດແມ່ນເພື່ອປະຊາຊົນ. ອຳນາດທັງໝົດເປັນຂອງປະຊາຊົນ. ກິດຈະການປ່ຽນແປງໃໝ່ແລະກໍ່ສ້າງປະເທດແມ່ນຄວາມຮັບຜິດຊອບຂອງປະຊາຊົນ. ພາລະກິດການຕໍ່ຕ້ານແລະການສ້າງຊາດແມ່ນວຽກງານຂອງປະຊາຊົນ. ອຳນາດການປົກຄອງຕັ້ງແຕ່ຕາແສງຈົນເຖິງລັດຖະບານກາງໄດ້ຮັບເລືອກຕັ້ງໂດຍປະຊາຊົນ. ບັນດາອົງການຈັດຕັ້ງແຕ່ສູນກາງຈົນເຖິງຂັ້ນຕາແສງໂດຍປະຊາຊົນຈັດຕັ້ງຂຶ້ນ. ສະຫຼຸບໄດ້ວ່າ, ອໍານາດແລະກໍາລັງລ້ວນແຕ່ຢູ່ກັບປະຊາຊົນ”(1).
ໃນກອງປະຊຸມໃຫຍ່ຫຼາຍຄັ້ງ ພັກກອມມູນິດຫວຽດນາມໄດ້ໃຫ້ຄວາມເອົາໃຈໃສ່ທີ່ສຸດເຖິງການກຳນົດແນວທາງແລະແຜນນະໂຍບາຍ ບົນພື້ນຖານຂອງການເສີມຂະຫຍາຍປະຊາທິປະໄຕລວມໝູ່, ສະຕິປັນຍາ ແລະກຳລັງແຮງຂອງປະຊາຊົນທັງໝົດ ໃນການສ້າງສາແລະປົກປັກຮັກສາປະເທດຊາດ. ກອງປະຊຸມໃຫຍ່ຄັ້ງທີ VI ຂອງພັກກອມມູນິດຫວຽດນາມ (ປີ 1986) ໄດ້ວາງກຳນົດແນວທາງການປ່ຽນແປງໃໝ່ປະເທດຢ່າງຮອບດ້ານ ເຊິ່ງເນັ້ນການເສີມຂະຫຍາຍປະຊາທິປະໄຕເພື່ອສ້າງພະລັງຂັບເຄື່ອນທີ່ແຂງແຮງໃນການພັດທະນາປະເທດ. ພາຍຫຼັງເກືອບ 40 ປີແຫ່ງການປ່ຽນແປງໃໝ່, ຄວາມຮັບຮູ້ກ່ຽວກັບປະຊາທິປະໄຕສັງຄົມນິຍົມຢູ່ຫວຽດນາມນັບມື້ນັບໄດ້ຮັບການປ່ຽນແປງໃໝ່ ພັດທະນາ ແລະ ປັບປຸງບູລະນະຢ່າງຖືກຕ້ອງ, ເໝາະສົມກັບເງື່ອນໄຂສະເພາະຂອງປະເທດເຮົາ. ພັກກອມມູນິດຫວຽດນາມຢືນຢັນວ່າ ຄຸນລັດສະນະໜຶ່ງຂອງລັດທິສັງຄົມນິຍົມຢູ່ຫວຽດນາມແມ່ນ ການທີ່ປະຊາຊົນເປັນເຈົ້າຂອງ. ປະຊາທິປະໄຕລວມຢູ່ໃນເປົ້າໝາຍທົ່ວໄປຂອງການປະຕິວັດຫວຽດນາມ ເພື່ອໃຫ້ທົ່ວພັກ ແລະ ທົ່ວປວງຊົນຮ່ວມກັນປະຕິບັດ ຄື: ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ອາລະຍະທຳ. ພ້ອມກັນນັ້ນ, ພັກກອມມູນິດຫວຽດນາມກໍ່ໄດ້ຢືນຢັນວ່າ: “ປະຊາທິປະໄຕສັງຄົມນິຍົມ ແມ່ນທາດແທ້ຂອງລະບອບຂອງພວກເຮົາ, ທັງເປັນເປົ້າໝາຍ ແລະ ເປັນພະລັງຂັບເຄື່ອນການພັດທະນາປະເທດຊາດ”(2). ປະຊາທິປະໄຕແມ່ນເປົ້າໝາຍຂອງການພັດທະນາປະເທດ ໂດຍມຸ່ງຫວັງທີ່ຈະສ້າງລະບອບສັງຄົມທີ່ດີ, ປາດສະຈາກການກົດຂີ່ຂູດຮີດແລະ ຄວາມບໍ່ຍຸດຕິທຳ; ຮັບປະກັນແລະເສິມຂະຫຍາຍສຸດຂີດ ສິດເປັນເຈົ້າຂອງຂອງປະຊາຊົນໃນທຸກຂົງເຂດ (ເສດຖະກິດ, ການເມືອງ, ວັດທະນະທຳ, ສັງຄົມ). ປະຊາທິປະໄຕແມ່ນພະລັງຂັບເຄື່ອນການພັດທະນາປະເທດ ເຊິ່ງສະແດງອອກເມື່ອປະຊາຊົນຜູ້ອອກແຮງງານເປັນເຈົ້າຂອງ ພວກເຂົາຈະເສີມຂະຫຍາຍສຸດຊີດ ຄວາມຕັ້ງໜ້າແລະຄວາມຕື່ນຕົວ ໃນພາລະກິດການສ້າງສາ ແລະປົກປັກຮັກສາປະເທດຊາດ, ປົດປ່ອຍກຳລັງແຮງງານ, ພັດທະນາກກຳລັງການຜະລິດ, ເສີມຂະຫຍາຍຄວາມສາມາດບົ່ມຊ້ອນຂອງປະເທດ, ສ້າງກຳລັງແຮງສັງລວມອັນຍິ່ງໃຫຍ່ໃຫ້ແກ່ການພັດທະນາຂອງປະເທດ. ດັ່ງນັ້ນ, ສາມາດຢືນຢັນໄດ້ວ່າ ທາດແທ້ຂອງລະບອບສັງຄົມຢູ່ຫວຽດນາມແມ່ນປະຊາທິປະໄຕ, ຮັບປະກັນໃຫ້ທຸກຄົນສາມາດປະຕິບັດປະຊາທິປະໄຕ, ພ້ອມກັນນັ້ນກໍຮັກສາຄວາມສະຫງົບຮຽບຮ້ອຍ, ລະບຽບວິໄນ, ເຄົາລົບກົດໝາຍ ແລະ ລົງໂທດຢ່າງເຂັ້ມງວດຕໍ່ທຸກການກະທຳທີ່ລະເມີດສິດທິໃນການເປັນເຈົ້າຂອງຂອງປະຊາຊົນ.
ຍ້ອນວ່າ ປະຊາທິປະໄຕມີບົດບາດອັນໃຫຍ່ຫຼວງໃນພາລະກິດການສ້າງສາ ແລະ ປົກປັກຮັກສາປະເທດຊາດ, ພັກກອມມູນິດຫວຽດນາມຈຶງໄດ້ເອົາໃຈໃສ່ນຳການປະຕິບັດປະຊາທິປະໄຕໄປຄຽງຄູ່ກັບການເພີ່ມທະວີກົດໝາຍສັງຄົມນິຍົມ. ປະຊາທິປະໄຕໄດ້ຮັບການຈັດຕັ້ງຂຶ້ນໂດຍກົດໝາຍ ແລະຮັບປະກັນດ້ວຍກົດໝາຍ ບົນພື້ນຖານຂອງກົນໄກ, ນະໂຍບາຍ, ກົດລະບຽບ, ຫຼັກການ ແລະ ມາດຕະການທີ່ມີປະສິດທິຜົນ ເພື່ອຮັບປະກັນໃຫ້ປະຊາຊົນທຸກຄົນສາມາດໃຊ້ສິດປະຊາທິປະໄຕໄດ້. ການປະຕິບັດປະຊາທິປະໄຕ ແລະ ການເພີ່ມທະວິລະບຽບກົດໝາຍແມ່ນສອງດ້ານຂອງຄວາມເປັນເອກະພາບກັນ, ມີການພົວພັນກັນແບບສັດຈະວິພາກ, ບໍ່ຕໍ່ຕ້ານເຊິ່ງກັນແລະກັນ, ເປັນບັນຫາທີ່ມີລັກສະນະກົດເກນໃນການຄຸ້ມຄອງສັງຄົມ. ການພົວພັນແບບສັດຈະວິພາກສະແດງອອກຢູ່ທີ່ວ່າ ເມື່ອລະບອບກົດໝາຍໄດ້ຮັບການເພີ່ມທະວີ ມີຄວາມເຂັ້ມແຂງ, ສິດປະຊາທິປະໄຕຂອງປະຊາຊົນກໍ່ຈະໄດ້ຮັບການຮັບປະກັນ ແລະ ໄດ້ຮັບການປົກປ້ອງຕາມກົດໝາຍ. ເມື່ອກົດໝາຍໄດ້ຮັບການປະຕິບັດຕາມດ້ວຍຄວາມເຄົາລົບນັບຖືຈາກທຸກໆຄົນ, ປະຊາທິປະໄຕກໍ່ດຳເນີນໄປຢ່າງເປັນທຳມະຊາດ ແລະແທ້ຈິງ. ຖ້າຫາກປະຊາທິປະໄຕບໍ່ມີລະບຽບວິໄນແລະບໍ່ອີງໃສ່ກົດໝາຍ ກໍ່ຈະພາໃຫ້ເກີດຄວາມວຸ່ນວາຍ ແລະຄວາມບໍ່ເປັນລະບຽບຮຽບຮ້ອຍ, ເຮັດໃຫ້ສັງຄົມພັດທະນາຢ່າງເທົ່າທຽມກັນບໍ່ໄດ້, ແລະ ອາດຈະນຳໄປສູ່ປະຊາທິປະໄຕທີ່ບໍ່ເປັນລະບຽບ ນັບທັງການສວຍໂອກາດທີ່ກໍ່ໃຫ້ເກີດການກະທຳທີ່ຝ່າຝືນກົດໝາຍ, ທຳລາຍຜົນປະໂຫຍດຂອງບຸກຄົນແລະສັງຄົມ, ທຳລາຍຜົນປະໂຫຍດຂອງຊາດ-ປະເທດຊາດ, ກາຍເປັນການຕໍ່ຕ້ານປະຊາທິປະໄຕ. ດັ່ງນັ້ນ, ຄຽງຄູ່ກັບປະຊາທິປະໄຕ, ການເພີ່ມທະວິລະບຽບກົດໝາຍຕິດພັນກັບການຄຸ້ມຄອງການເຄື່ອນໄຫວທາງສັງຄົມທັງໝົດຕາມກົດໝາຍ, ບໍ່ປ່ອຍໃຫ້ຂົງເຂດໃດຂອງສັງຄົມຂາດການຄວບຄຸມຂອງກົດໝາຍ ຫຼືບໍ່ຖືກຄວບຄຸມໂດຍກົດໝາຍ. ຜ່ານນັ້ນ, ປະກອບສ່ວນຮັບປະກັນລະບຽບວິໄນສັງຄົມ, ຮັບຮອງວ່າ ກົດລະບຽບທາງກົດໝາຍໄດ້ຮັກສາຢ່າງເປັນລະບຽບທາງສັງຄົມ, ຈາກນັ້ນ ປະກອບສ່ວນປະຕິບັດພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມຢ່າງສຳເລັດມີໄຊ.
ໂຄງການການເມືອງກໍ່ສ້າງປະເທດໃນສະໄໝຂ້າມຜ່ານສູ່ລັດທິສັງຄົມນິຍົມ (ສະບັບເພີ່ມເຕີມ, ພັດທະນາປີ 2011) ຂອງພັກກອມມູນິດຫວຽດນາມໄດ້ກຳນົດຢ່າງຈະແຈ້ງວ່າ: “ປະຊາທິປະໄຕຕິດພັນກັບລະບຽບວິໄນ ແລະ ຕ້ອງໄດ້ຮັບການຫັນເປັນນິຕິກຳໃນກົດໝາຍ ແລະ ຮັບປະກັນໂດຍກົດໝາຍ... ລັດປະກາດໃຊ້ກົດໝາຍ; ຈັດຕັ້ງແລະຄຸ້ມຄອງສັງຄົມດ້ວຍກົດໝາຍ ແລະ ເພີ່ມທະວີລະບຽບກົດໝາຍສັງຄົມນິຍົມຢ່າງບໍ່ຢຸດຢັ້ງ”(3). ລາຍງານການເມືອງໃນກອງປະຊຸມໃຫຍ່ຄັ້ງທີ XII ຂອງພັກຢືນຢັນວ່າ: “ການເສີມຂະຫຍາຍປະຊາທິປະໄຕຈະຕ້ອງຄວບຄູ່ໄປກັບການເພີ່ມທະວີລະບຽບກົດໝາຍ, ເຊີດຊູຄວາມຮັບຜິດຊອບຂອງພົນລະເມືອງ, ຮັກສາລະບຽບວິໄນ ແລະ ສົ່ງເສີມຄຸນສົມບັດສິນທຳທາງສັງຄົມ”(4). ເຖິງກອງປະຊຸມໃຫຍ່ຄັ້ງທີ XIII, ພັກກອມມູນິດຫວຽດນາມສືບຕໍ່ຢືນຢັນວ່າ ສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍແລະຮັບປະກັນວິໄນທາງສັງຄົມ ແມ່ນໜຶ່ງໃນສາຍພົວພັນສຳຄັນທີ່ຕ້ອງໄດ້ຮັບການກຳແໜ້ນ ແລະ ຈັດການແກ້ໄຂຢ່າງດີ ໃນໄລຍະຕໍ່ໆໄປ(5). ຍ້ອນວ່ານີ້ແມ່ນສາຍພົວພັນສຳຄັນທີ່ສຸດ ໃນບັນດາການພົວພັນຫຼັກ, ມັນສະທ້ອນໃຫ້ເຫັນເຖິງທາດແທ້ຂອງລະບອບການເມືອງຢູ່ຫວຽດນາມ ແລະແມ່ນຄຸນລັກສະນະຕາມທຳມະຊາດຂອງ ລັດແຫ່ງອຳນາດກົດໝາຍສັງຄົມນິຍົມ. ລະບຽບກົດໝາຍສັງຄົມນິຍົມເມື່ອຈັດຕັ້ງຂຶ້ນຈະມີອຳນາດໃນການສ້າງລະບຽບແລະວິໄນ, ສົ່ງເສີມແລະປົກປ້ອງລະບອບປະຊາທິປະໄຕສັງຄົມນິຍົມ, ຕໍ່ສູ້ກັບການກະທຳທັງໝົດທີ່ທຳລາຍສິດເປັນເຈົ້າຂອງຂອງປະຊາຊົນ, ດ້ວຍເຫດນີ້ຈຶ່ງສົ່ງເສີມການພັດທະນາສັງຄົມ. ດັ່ງນັ້ນ, ການເພີ່ມທະວີລະບຽບກົດໝາຍຈຶງໝາຍເຖິງການເພີ່ມທະວີການສ້າງກົດໝາຍ, ການປະຕິບັດກົດໝາຍ, ການຄຸ້ມຄອງແລະບໍລິຫານຈັດການສັງຄົມຕາມກົດໝາຍ ເພື່ອຮັບປະກັນວ່າ ທຸກຂົງເຂດແລະປະຊາຊົນທຸກຄົນສາມາດໃຊ້ສິດປະຊາທິປະໄຕຂອງຕົນໄດ້ຕາມກົດໝາຍ.
ພະນັກງານແລະຕຳຫຼວດປະຊາຊົນ ເຮັດບັດປະຈຳຕົວປະຊາຊົນໃຫ້ແກ່ພີ່ນ້ອງຮ່ວມຊາດ (ຜູ້ຂຽນ: ບຸ່ຍຫວຽດດຶກ) _ທີ່ມາ: nhiepanhdoisong.vn
ການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ
ໃນການສ້າງສາແລະປົກປັກຮັກສາປະເທດຊາດ
ພັກກອມມູນິດຫວຽດນາມຢືນຢັນວ່າ ການສ້າງສາແລະປົກປັກຮັກສາປະເທດຊາດຫວຽດນາມສັງຄົມນິຍົມແມ່ນພາລະກິດຂອງທົ່ວປວງຊົນ, ຂອງລະບົບການເມືອງທັງໝົດ. ພາລະກິດດັ່ງກ່າວຈະສາມາດບັນລຸເປົ້າໝາຍໄດ້ກໍ່ຕໍ່ເມື່ອປະຊາຊົນຮັບຮູ້ເຖິງສິດປະໂຫຍດ, ຄວາມຮັບຜິດຊອບ ແລະ ພັນທະຂອງຕົນ ດ້ວຍຈິດໃຈແຫ່ງປະຊາທິປະໄຕ ແລະ ການເຄົາລົບກົດໝາຍ. ດັ່ງນັ້ນ, ການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນລະບຽບວິໄນສັງຄົມຢ່າງດີ ຈະປະກອບສ່ວນອັນຕັ້ງໜ້າເຂົ້າໃນພາລະກິດການສ້າງສາ ແລະປົກປັກຮັກສາປະເທດຊາດ. ໃນຂະບວນການນຳພາການສ້າງສາ ແລະປົກປັກຮັກສາປະເທດຊາດ, ພັກກອມມູນິດຫວຽດນາມໄດ້ກຳນົດ ແລະ ແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນລະບຽບວິໄນສັງຄົມຢ່າງດີ. ບັນຫານີ້ນັບມື້ນັບສະແດງອອກຢ່າງຈະແຈ້ງໃນດ້ານຄວາມຄິດ ແລະ ການກະທຳ. ໃນຂົງເຂດການສ້າງສະຖາບັນແລະນະໂຍບາຍ, ເອກະສານທາງກົດໝາຍກ່ຽວກັບການປະຕິບັດປະຊາທິປະໄຕ ແລະ ເພີ່ມທະວີລະບຽບກົດໝາຍແລະຮັບປະກັນລະບຽບວິໄນທາງສັງຄົມຫຼາຍສະບັບ ໄດ້ຮັບການປະກາດໃຊ້ ເຊິ່ງສະແດງອອກໃນລັດຖະທຳມະນູນ ແລະ ເອກະສານທາງກົດໝາຍທີ່ສຳຄັນອື່ນໆອີກຫຼາຍສະບັບ(6). ພາຍໃຕ້ການນຳພາຂອງພັກ, ການຄຸ້ມຄອງຂອງລັດ, ຄວາມຕັດສິນໃຈແລະຄວາມພະຍາຍາມຂອງລະບົບການເມືອງທັງໝົດ, ບັນດາລະບຽບກົດໝາຍຂອງລັດຫວຽດນາມນັບມື້ນັບຄົບຖ້ວນ ແລະ ສົມບູນແບບ, ສ້າງເງື່ອນໄຂສູງສຸດໃຫ້ແກ່ການປະຕິບັດປະຊາທິປະໄຕ. ປະຊາຊົນນັບມື້ນັບເຂົ້າຮ່ວມໂດຍກົງ ໃນຂະບວນການສ້າງສາ ແລະ ປົກປັກຮັກສາປະເທດຊາດ; ພ້ອມກັນນັ້ນ, ປະຊາຊົນຍັງໄດ້ຮັບການຮັບຮອງສິດທິແລະຜົນປະໂຫຍດອັນຊອບທຳຕາມກົດໝາຍສັງຄົມນິຍົມ; ເມື່ອມີການລະເມີດສິດທິແລະຜົນປະໂຫຍດຈະໄດ້ຮັບການຄຸ້ມຄອງຕາມກົດໝາຍ.
ການປະຕິບັດປະຊາທິປະໄຕຂອງລະບົບການເມືອງມີການປ່ຽນແປງໃໝ່ຫຼາຍຢ່າງ ທັງໃນດ້ານເນື້ອໃນແລະຮູບແບບ. ບັນດາຄະນະພັກແລະອຳນາດການປົກຄອງທຸກຂັ້ນ ໄດ້ຮັບຟັງຢ່າງຕັ້ງໃຈ ແລະ ເພີ່ມທະວີການສົນທະນາກັບປະຊາຊົນທຸກຊັ້ນວັນນະ. ປະຊາທິປະໄຕໃນພັກ ລັດ ອົງການຈັດຕັ້ງແລະສັງຄົມ ສືບຕໍ່ໄດ້ຮັບການເປີດກວ້າງແລະສົ່ງເສີມ; ສິດເປັນເຈົ້າຂອງຂອງປະຊາຊົນໄດ້ຮັບການເສີມຂະຫຍາຍຢ່າງດີ. ກຸ່ມມະຫາສາມັກຄີປວງຂົນທັງຊາດ ບົນພື້ນຖານພັນທະມິດຂອງຊົນຊັ້ນກຳມະກອນ ກັບຊົນຊັ້ນຊາວນາ ແລະຖັນແຖວປັນຍາຊົນ ພາຍໃຕ້ການນຳພາຂອງພັກນັ້ນ ສືບຕໍ່ໄດ້ຮັບການເພີ່ມທະວີບົນພື້ນຖານຄວາມເປັນເອກະພາບໃນເປົ້າໝາຍ ປະຊາຊົນຮັ່ງມີ ປະເທດຊາດເຂັ້ມແຂງ ມີປະຊາທິປະໄຕ ຄວາມຍຸດຕິທຳ ແລະ ອາລະຍະທຳ. ແນວໂຮມປະເທດຊາດ ແລະບັນດາອົງການປະຊາຊົນ ໄດ້ເສີມຂະຫຍາຍບົດບາດເຕົ້າໂຮມແລະກໍ່ສ້າງກຸ່ມມະຫາສາມັກຄີປວງຊົນທັງຊາດຢ່າງດີ; ປັບປຸງ, ຂະຫຍາຍການຈັດຕັ້ງ ແລະພັດທະນາສະມາຊິກສະຫະພາບ ແລະສະມາຊິກອົງການ, ຈັດຕັ້ງຂະບວນການແຂ່ງຂັນ ແລະການຂົນຂວາຍຈຳນວນຫຼາຍທີ່ມີປະສິດທິຜົນຕົວຈິງ...; ພ້ອມກັບລັດ ເບິ່ງແຍງແລະປົກປັກຮັກສາສິດ ແລະ ຜົນປະໂຫຍດອັນຊອບທຳ ຖືກກົດໝາຍຂອງປະຊາຊົນ, ເຂົ້າຮ່ວມການຄຸ້ມຄອງລັດ ແລະ ການຄຸ້ມຄອງສັງຄົມ, ປະກອບສ່ວນຢ່າງຕັ້ງໜ້າ ເຂົ້າໃນບັນດາຜົນງານຂອງປະເທດ. ການເພີ່ມທະວີລະບຽບກົດໝາຍສັງຄົມນິຍົມໄດ້ຮັບການຊຸກຍູ້; ປະສິດທິພາບແລະປະສິດທິຜົນຂອງການເຄື່ອນໄຫວປະຕິບັດກົດໝາຍເພີ່ມຂຶ້ນ. ການຕິດຕາມກວດກາຂອງປະຊາຊົນຕໍ່ການເຄື່ອນໄຫວຂອງອົງການຈັດຕັ້ງພັກ, ອົງການຂອງລັດ, ພະນັກງານແລະສະມາຊິກພັກ ໄດ້ຮັບຄວາມເອົາໃຈໃສ່ ໂດຍສຸມໃສ່ບັນດາບັນຫາທີ່ສຳຄັນທີ່ສຸດຂອງປະເທດ, ປະກອບສ່ວນຮັບປະກັນວິໄນສັງຄົມ. ພິເສດ, ພັກ ລັດ ແລະ ກອງກຳລັງຕຳຫຼວດ ໄດ້ເອົາໃຈໃສ່ເຖິງການສ້າງ ແລະຮັກສາສັງຄົມທີ່ມີລະບຽບວິໄນ ປອດໄພ ແລະ ສົດໃສ ເພື່ອໃຫ້ປະຊາຊົນມີເງື່ອນໄຂໃນການທຳມາຫາກິນ ແລະ ພັດທະນາເສດຖະກິດສັງຄົມ; ຄ່ອຍໆສ້າງແລະປັບປຸງກົນໄກ ນະໂຍບາຍ ລະບົບກົດໝາຍ ແລະ ເງື່ອນໄຂທີ່ເອື້ອອຳນວຍ ໃຫ້ປະຊາຊົນເຂົ້າຮ່ວມໂດຍກົງຫຼືທາງອ້ອມ ໃນໜ້າທີ່ປົດປ້ອງຄວາມໝັ້ນຄົງ ແລະຄວາມສະຫງົບຮຽບຮ້ອຍ; ພ້ອມກັນນັ້ນ, ປົກປ້ອງສິດທິແລະຜົນປະໂຫຍດຂອງປະຊາຊົນໃຫ້ດີທີ່ສຸດເມື່ອຖືກລະເມີດ.
ຄຽງຄູ່ກັບບັນດາຜົນສໍາເລັດແລະຂໍ້ດີທີ່ໄດ້ຮັບ, ຄວາມເປັນຈິງແຫ່ງການສ້າງສາແລະປົກປັກຮັກສາປະເທດຊາດໃນເວລາທີ່ຜ່ານມາສະແດງໃຫ້ເຫັນວ່າ ການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ ປະກອບສ່ວນເຂົ້າໃນພາລະກິດການສ້າງສາແລະປົກປັກຮັກສາປະເທດຊາດນັ້ນ ກຳລັງປະເຊີນກັບຄວາມຫຍຸ້ງຍາກ ຄວາມທ້າທາຍ ແລະ ຂໍ້ຈຳກັດຈຳນວນໜຶ່ງ. ລະບົບກົດໝາຍຍັງຫຍຸ້ງຍາກ, ບໍ່ໝັ້ນຄົງ ແລະມີຫຼາຍຊັ້ນ; ຄຸນນະພາບຂອງເອກະສານທາງກົດໝາຍບາງປະເພດບໍ່ສູງ ແລະບໍ່ສອດຄ່ອງກັບຄວາມເປັນຈິງ. ບັນຫາການບັງຄັບໃຊ້ກົດໝາຍຍັງມີຂໍ້ຈຳກັດຫຼາຍປະການ, ກົນໄກຮັບປະກັນການປະຕິບັດກົດໝາຍມີປະສິດທິຜົນ ຍັງບໍ່ທັນໄດ້ຮັບການພັດທະນາຢ່າງຄົບຖ້ວນ. ລະບຽບວິໄນໃນການປະຕິບັດໜ້າທີ່ສາທາລະບະ ແລະໃນຊີວິດສັງຄົມ ຍັງລະຫຼວມບໍ່ເຂັ້ມງວດ, ນຳໄປສູ່ການເບິ່ງເບົາວິໄນ ລະເລີຍກົດໝາຍ. ສະຕິເຄົາລົບກົດໝາຍຍັງບໍ່ທັນກາຍເປັນນິໄສຖາວອນຂອງອົງການ ແລະ ບຸກຄົນໃນສັງຄົມ. ນອກຈາກນັ້ນ, ໃນພາກປະຕິບັດຍັງມີການກະທຳຫຼາຍຢ່າງທີ່ເປັນການລະເມີດ, ກີດຂວາງ ຫຼື ຈຳກັດສິດທິໃນການເປັນເຈົ້າຂອງຂອງປະຊາຊົນ; ຜົນປະໂຫຍດອັນຊອບທຳຂອງປະຊາຊົນມັກບໍ່ໄດ້ຮັບການຮັບປະກັນ ແລະ ປົກປ້ອງຢ່າງເຕັມທີ່. ໃນຂະນະນັ້ນ, ກອງກໍາລັງທີ່ເປັນສັດຕູ, ພວກສວຍໂອກາດທາງການເມືອງ ແລະ ຜູ້ທີ່ບໍ່ດີ ຍັງສືບຕໍ່ທຳລາຍການປະຕິບັດປະຊາທິປະໄຕ, ລະບຽບກົດໝາຍ ແລະວິໄນທາງສັງຄົມ, ສວຍໃຊ້ກໍລະນີ ຄະດີທີ່ສັບສົນ ເພື່ອປຸກປັ່ນໃຫ້ເກີດຂະບວນການ “ບໍ່ເຊື່ອຟັງທາງແພ່ງ” ທີ່ຫວັງຈະຫັນປ່ຽນຄວາມຂັດແຍ່ງ, ການປະທະກັນທາງແພ່ງທຳມະດາ ໃຫ້ກາຍເປັນການກໍ່ການຮ້າຍແລະການປະເຊີນໜ້າກັບລັດຖະບານ. ນີ້ແມ່ນກົນອຸບາຍອັນຊົ່ວຮ້າຍ ທີ່ຫວັງຈະສົ່ງເສີມທັດສະນະຄະຕິ ແລະ ພຶດຕິກຳທີ່ບໍ່ເຄົາລົບກົດໝາຍແລະລະບຽບວິໄນ ເພື່ອທຳລາຍຄວາມສັກສິດຂອງລະບຽບກົດໝາຍສັງຄົມນິຍົມຢູ່ຫວຽດນາມ ໂດຍມີຈຸດປະສົງເພື່ອໂຄ່ນລົ້ມອຳນາດການປົກຄອງປະຊາຊົນ ແລະ ນາບຂູ່ພາລະກິດການສ້າງສາ ແລະປົກປັກຮັກປະເທດຊາດຫວຽດນາມສັງຄົມນິຍົມຫວຽດນາມໂດຍກົງ.
ສາເຫດທີ່ພາໃຫ້ເກີດຄວາມຫຍຸ້ງຍາກແລະຄວາມບໍ່ພຽງພໍທີ່ກ່າວມາຂ້າງເທິງນີ້, ກ່ອນອື່ນໝົດແມ່ນຍ້ອນການຂາດຄວາມຮັບຮູ້ຢ່າງຄົບຖ້ວນ ແລະ ຂາດປະສົບການໃນການສ້າງກົດໝາຍສັງຄົມນິຍົມໃນເງື່ອນໄຂຂອງເສດຖະກິດຕະຫຼາດ ແລະ ການເຊື່ອມໂຍງສາກົນ. ລະບົບກົດໝາຍຖືກສ້າງຂຶ້ນແລະປັບປຸງໃຫ້ສົມບູນແບບໃນເງື່ອນໄຂຂອງການຫັນປ່ຽນ, ທັງດຳເນີນການເຮັດແລະຖອກຖອນບົດຮຽນປະສົບການ, ດັ່ງນັ້ນ ຈຶງເປັນການຍາກທີ່ຈະຫຼີກເວັ້ນຂໍ້ຈໍາກັດແລະຄວາມບໍ່ພຽງພໍ. ຈຳເປັນຕ້ອງມີການທົບທວນ ແກ້ໄຂ ແລະ ເພີ່ມເຕີມເອກະສານທາງກົດໝາຍຢ່າງສະໝ່ຳສະເໝີ, ແຕ່ຍັງເຮັດໃຫ້ລະບົບກົດໝາຍບໍ່ໝັ້ນຄົງ ແລະ ບໍ່ສອດຄ່ອງກັນໃນໄລຍະເວລາໜຶ່ງ. ກົນໄກໃໝ່ຈໍານວນຫຼາຍກໍາລັງດໍາເນີນການຢູ່, ດັ່ງນັ້ນຈຶງເປັນເລື່ອງຍາກທີ່ຈະຄາດຄະເນປັດໄຈຜົນກະທົບໄດ້ຢ່າງເຕັມທີ່ ສົ່ງຜົນໃຫ້ກົດລະບຽບບາງປະການໃນເອກະສານທາງກົດໝາຍເປັນເລື່ອງທົ່ວໄປ ຫຼືຍັງບໍ່ທັນມີປະສິດທິຜົນໃນທາງປະຕິບັດ. ປະຊາຊົນສ່ວນໜຶ່ງຍັງບໍ່ທັນຮັບຮູ້ເຕັມທີ ແລະ ບໍ່ໄດ້ປັບປຸງຄວາມສາມາດໃນການປະຕິບັດຕາມລະບອບປະຊາທິປະໄຕ, ໃນຂະນະທີ່ຄວາມສາມາດໃນການບັງຄັບໃຊ້ກົດໝາຍຂອງເຈົ້າໜ້າທີ່ບາງຄົນຍັງບໍ່ສູງ. ກົນໄກເພື່ອຮັບປະກັນການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນວິໄນສັງຄັມ ບໍ່ໄດ້ກຳນົດຄວາມຮັບຜິດຊອບແລະອຳນາດຂອງບັນດາອັດຕະພາບໄວ້ຢ່າງຊັດເຈນ.
ວິທີແກ້ໄຂບາງຢ່າງໃນການປະຕິບັດສາຍພົວພັນລະຫວ່າງການປະຕິບັດປະຊາທິປະໄຕ
ແລະການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມໃນສະພາບການໃໝ່ຢ່າງດີ
ເພື່ອປະກອບສ່ວນປະຕິບັດພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມຫວຽດນາມໃຫ້ປະສົບຄວາມສຳເລັດ ຕາມແຜນນະໂຍບາຍແລະທິດທາງທີ່ກຳນົດໄວ້ໃນກອງປະຊຸມໃຫຍ່ຄັ້ງທີ XIII ຂອງພັກ, ໃນໄລຍະຈະມາເຖິງ, ວິທີແກ້ບັນຫາພື້ນຖານບາງປະການທີ່ຕ້ອງໃຫ້ຄວາມສຳຄັນຄື:
ທີໜຶ່ງ, ສືບຕໍ່ຍົກສູງຄວາມຮັບຮູ້ຂອງສັງຄົມທັງໝົດ, ກ່ອນອື່ນໝົດແມ່ນໃນບັນດາອົງການຈັດຕັ້ງການເມືອງ-ສັງຄົມ ກ່ຽວກັບຄວາມໝາຍ, ຄວາມສຳຄັນ ແລະ ບົດບາດຂອງສາຍພົວພັນລະຫວ່າງການປະຕິບັດປະຊາທິປະໄຕ ແລະການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ. ຈຳເປັນຕ້ອງເປັນເອກະພາບທາງດ້ານຄວາມຮັບຮູ້ ແລະ ໂຄສະນາເຜີຍແຜ່ ເພື່ອໃຫ້ປະຊາຊົນທຸກຄົນເຂົ້າໃຈວ່າ ປະຊາທິປະໄຕສັງຄົມນິຍົມ ແມ່ນທາດແທ້ຂອງລະບອບການເມືອງຫວຽດນາມ ທີ່ນຳໂດຍພັກກອມມູນິດຫວຽດນາມ ໂດຍມີບັນດາເນື້ອໃນສຳຄັນທີ່ສຸດ ທີ່ໄດ້ຮັບການຢືນຢັນຢ່າງຕໍ່ເນື່ອງໃນມະຕິຂອງພັກວ່າ ອຳນາດລັດທັງໝົດເປັນຂອງປະຊາຊົນ; ປະຊາຊົນແມ່ນອັດຕະພາບທີ່ປະຕິບັດອໍານາດລວມຂອງສັງຄົມ. ປະຊາຊົນທຸກຄົນມີສິດປະຕິບັດປະຊາທິປະໄຈຕາມກົດໝາຍ, ເຄົາລົບກົດໝາຍ, ພາຍໃນກອບຂອງກົດໝາຍ, ບໍ່ມີຜູ້ໃດມີສິດຢູ່ເໜືອກົດໝາຍ ຫຼືນອກກົດໝາຍ.
ພ້ອມກັນກັບການຍົກສູງຄວາມຮັບຮູ້ຂອງທົ່ວສັງຄົມ, ຕ້ອງສືບຕໍ່ສົ່ງເສີມຄວາມເປັນແບບຢ່າງໃນການປະຕິບັດຕາມລະບຽບວິໄນ ແລະ ກົດໝາຍ, ກ່ອນອື່ນໝົດແມ່ນການປະຕິບັດຕາມກົດໝາຍ ແລະ ການປະຕິບັດປະຊາທິປະໄຕສັງຄົມນິຍົມຂອງຄະນະພັກ, ອົງການຈັດຕັ້ງພັກ, ອຳນາດການປົກຄອງ, ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມທຸກຂັ້ນ, ພະນັກງານ, ສະມາຊິກພັກ. ຕ້ອງສືບຕໍ່ຮັບປະກັນໃຫ້ບັນດາແຜນນະໂຍບາຍແລະແນວທາງຂອງພັກ, ນະໂຍບາຍແລະກົດໝາຍຂອງລັດ ແມ່ນມາຈາກຄວາມມຸ່ງມາດປາຖະໜາ ແລະ ສິດຜົນປະໂຫຍດອັນຊອບທຳຂອງປະຊາຊົນ, ປະຊາຊົນເຂົ້າຮ່ວມການປະກອບຄຳເຫັນ, ຮັບປະກັນໃຫ້ປະຊາຊົນເຂົ້າຮ່ວມໃນທຸກຂັ້ນຕອນ ຕັ້ງແຕ່ການສະເໜີຄວາມຄິດລິເລີ່ມ, ເຂົ້າຮ່ວມໃນການວິຈານແລະການອະພິປາຍ ຈົນເຖິງການຕິດຕາມກວດກາຂະບວນການປະຕິບັດ, ບົນພື້ນຖານນັ້ນ ຈະຕັດສິນຕົກລົງບັນຫາທີ່ກ່ຽວຂ້ອງກັບຜົນປະໂຫຍດຂອງປະຊາຊົນ.
ທີສອງ, ສືບຕໍ່ປະຕິຮູບດ້ານຕຸລາການຕິດພັນກັບການປັບປຸງຍົກສູງຄວາມສາມາດປະຕິບັດກົດໝາຍ, ກໍ່ສ້າງລະບົບຕຸລາການທີ່ເປັນມືອາຊີບ, ທັນສະໄໝ, ຍຸດຕິທຳ, ອາລະຍະທຳ, ຊື່ສັດທ່ຽງທຳ, ຮັບໃຊ້ປະເທດຊາດ ແລະ ປະຊາຊົນ. ມະຕິໝາຍເລກ 08-NQ/TW ລົງວັນທີ 2 ມັງກອນ 2002 ຂອງກົມການເມືອງສູນກາງ ວ່າດ້ວຍ “ໜ້າທີ່ສຳຄັນບາງປະການຂອງວຽກງານຕຸລາການໃນເວລາທີ່ຈະມາເຖິງ” ລະບຸເຖິງຄວາມຈຳເປັນໃນການ: ກໍ່ສ້າງອົງການຕຸລາການທີ່ສະອາດ, ເຂັ້ມແຂງ ແລະ ຄ່ອຍໆ ທັນສະໄໝ, ປະກອບສ່ວນກໍ່ສ້າງ ແລະ ປົກປັກຮັກສາພັກ ແລະ ລັດ. ມະຕິໝາຍເລກ 49-NQ/TW ລົງວັນທີ 2 ມິຖຸນາ 2005 ຂອງກົມການເມືອງສູນກາງ ວ່າດ້ວຍ “ຍຸດທະສາການປະຕິຮູບດ້ານຕຸລາການເຖິງປີ 2020” ລະບຸເປົ້າໝາຍສຳຄັນຂອງການປະຕິຮູບດ້ານຕຸລາການ ດັ່ງນີ້: ການກໍ່ສ້າງລະບົບຕຸລາການທີ່ສະອາດ, ເຂັ້ມແຂງ, ປະຊາທິປະໄຕ, ເຂັ້ມງວດ, ປົກປ້ອງຄວາມຍຸຕິທຳ, ທັນສະໄໝເທື່ອລະຂັ້ນຕອນ, ຮັບໃຊ້ປະຊາຊົນ, ຮັບໃຊ້ປະເທດຊາດຫວຽດນາມສັງຄົມນິຍົມ. ກອງກຳລັງປະກອບອາວຸດປະຊາຊົນມີບົດບາດສຳຄັນໃນການປະຕິຮູບດ້ານຕຸລາການ, ດັ່ງນັ້ນ, ພວກເຂົາຍາມໃດກໍ່ຕ້ອງຈົງຮັກພັກດີຕໍ່ປະເທດຊາດ, ຕໍ່ປະຊາຊົນ, ຕໍ່ພັກແລະລັດ; ເຂົ້າຮ່ວມຢ່າງຕັ້ງໜ້າໃນຂະບວນການການປະຕິຮູບດ້ານຕຸລາການ; ກິດຈະກຳຕຸລາການທັງໝົດຈະຕ້ອງບັນລຸເປົ້າໝາຍໃນການປົກປ້ອງຄວາມຍຸຕິທຳ, ປົກປ້ອງສິດທິມະນຸດ ສິດທິພົນລະເມືອງ, ປົກປ້ອງລະບອບສັງຄົມນິຍົມ, ປົກປ້ອງຜົນປະໂຫຍດຂອງລັດ, ສິດແລະຜົນປະໂຫຍດອັນຊອບທຳຂອງອົງການແລະບຸກຄົນໃນສັງຄົມ. ປະຕິບັດກົດລະບຽບປະຊາທິປະໄຕຢູ່ຮາກຖານຢ່າງດີ, ຮັບປະກັນວ່າ ການກະທຳທັງໝົດທີ່ລະເມີດສິດທິໃນການປະຕິບັດປະຊາທິປະໄຕ ແລະ ຜົນປະໂຫຍດອັນຊອບທຳຂອງປະຊາຊົນ ຈະຕ້ອງໄດ້ຮັບການລົງໂທດຢ່າງເຂັ້ມງວດ. ການເຮັດສິ່ງນີ້ຢ່າງດີ ຍັງປະກອບສ່ວນຕໍ່ສູ້ແລະປະຕິເສດຢ່າງມີປະສິດທິຜົນທີ່ສຸດ ຕໍ່ກົນອຸບາຍຂອງກອງກຳລັງສັດຕູແລະປະຕິກິລິຍາ ທີ່ສວຍໃຊ້ບັນຫາປະຊາທິປະໄຕ ເພື່ອທຳລາຍການປະຕິວັດຫວຽດນາມ.
ທີສາມ, ສືບຕໍ່ເສີມຂະຫຍາຍບົດບາດຫຼັກແຫຼ່ງຂອງກອງກຳລັງຕຳຫຼວດປະຊາຊົນໃນການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ, ປະກອບສ່ວນປະຕິບັດພາລະກິດການສ້າງສາ ແລະ ປົກປັກຮັກສາປະເທດຊາດຢ່າງສຳເລັດຜົນ; ຕັ້ງໜ້າປ້ອງກັນ ແລະ ກຳຈັດກົນອຸບາຍແລະການເຄື່ອນໄຫວ ຂອງບັນດາອິດທິກຳລັງສັດຕູ ທີ່ຕໍ່ຕ້ານພາລະກິດການປົກປັກຮັກສາປະເທດຊາດ, ພວກເຂົາຮຽກຮ້ອງໃຫ້ກອງກຳລັງຕຳຫຼວດປະຊາຊົນ “ຫ່າງເຫີນຈາກການເມືອງ, ຫັນເປັນພົນລະເຮືອນ”. ກ່ອນອື່ນໝົດແລະສຳຄັນທີ່ສຸດແມ່ນ ເຮົາຕ້ອງກໍ່ສ້າງກອງກຳລັງຕຳຫຼວດປະຊາຊົນທີ່ມີຄວາມຈົງຮັກພັກດີຕໍ່ພັກ, ປະເທດຊາດ ແລະ ປະເທດຊາດຢ່າງເດັດຖານ, ຢຶດໝັ້ນຄວາມຮັບຜິດຊອບໃນວຽກງານກໍ່ສ້າງ, ປົກປັກຮັກສາປະເທດຊາດ ແລະ ປະຕິບັດໜ້າທີ່ທາງການເມືອງທີ່ໄດ້ຮັບການມອບໝາຍຈາກພັກ ລັດ ແລະ ປະຊາຊົນໃຫ້ປະສົບຜົນສຳເລັດ; ປະຕິບັດໜ້າທີ່ຈຸດໜັກຢ່າງມີປະສິດທິຜົນ ໃນການກໍ່ສ້າງກອງກຳລັງຕຳຫຼວດປະຊາຊົນທີ່ປະຕິວັດ, ເປັນລະບຽບຫຼວງ, ຊຳນານການຮົບ, ທັນສະໄໝທີ່ລະຂັ້ນຕອນ, ກອງກຳລັງຈຳນວນໜຶ່ງກ້າວໂດຍກົງສູ່ຄວາມທັນສະໄໝ, ສ້າງພື້ນຖານທີ່ໝັ້ນຄົງເພື່ອສູ້ຊົນຮອດປີ 2030 ກໍ່ສ້າງກອງຕຳຫຼວດປະຊາຊົນທີ່ປະຕິວັດ, ເປັນລະບຽບຫຼວງ, ຊຳນານການຮົບ ແລະ ທັນສະໄໝ ຕາມຈິດໃຈມະຕິກອງປະຊຸມໃຫຍ່ຄັ້ງທີ XIII ຂອງພັກ ແລະມະຕິໝາຍເລກ 22-NQ/TW ລົງວັນທີ 15 ມີນາ 2018 ຂອງກົມການເມືອງສູນກາງ ວ່າດ້ວຍ “ສືບຕໍ່ປ່ຽນແປງໃໝ່ ແລະ ປັບປຸງການຈັດຕັ້ງອົງການກະຊວງປ້ອງກັນຄວາມສະຫງົບໃຫ້ກະທັດລັດຮັດກຸມ, ມີປະສິດທິພາບ ແລະ ປະສິດທິຜົນ”. ສືບຕໍ່ປ່ຽນແປງໃໝ່ວຽກງານການຂົນຂວາຍປະຊາຊົນ, ປຸກລະດົມ ແລະ ເສີມຂະຫຍາຍຄວາມຮັບຜິດຊອບຂອງປະຊາຊົນ ໃຫ້ເຂົ້າຮ່ວມນັບມື້ນັບຫຼວງຫຼາຍແລະດີກ່ວາອີກ ໃນຂະບວນການທົ່ວປວງຊົນປົກປັກຮັກສາຄວາມໝັ້ນຄົງຂອງຊາດ ຕັ້ງແຕ່ຮາກຖານແລະໃນຮາກຖານ. ພ້ອມກັນນັ້ນ, ກອງກຳລັງຕຳຫຼວດປະຊາຊົນຕ້ອງເປັນບ່ອນອີງທີ່ເຊື່ອຖືໄດ້ຂອງບັນດາຄະນະພັກ, ອຳນາດການປົກຄອງ ແລະ ປະຊາຊົນຢ່າງແທ້ຈິງ; ເປັນແບບຢ່າງໃນການປະຕິບັດກົດໝາຍ, ປົກປ້ອງຄວາມເຂັ້ມງວດຂອງກົດໝາຍ, ຄົ້ນເຜີຍການກະທຳທີ່ເປັນອັນຕະລາຍຕໍ່ຜົນປະໂຫຍດຂອງປະຊາຊົນໂດຍທັນທີ, ລົງໂທດຢ່າງຮຸນແຮງຕໍ່ຜູ້ທີ່ສວຍໃຊ້ປະຊາທິປະໄຕເພື່ອທຳລາຍພາລະກິດການສ້າງສາ ແລະປົກປັກຮັກສາປະເທດຊາດ.
ທີສີ່, ສືບຕໍ່ກວດຄືນ, ເພີ່ມເຕີມ, ກໍ່ສ້າງ ແລະ ປັບປຸງລະບົບກົດໝາຍໃຫ້ສົມບູນຄົບຖ້ວນ, ໃນນັ້ນມີກົດໝາຍວ່າດ້ວຍຄວາມໝັ້ນຄົງ ແລະ ການປ້ອງກັນປະເທດ; ສ້າງກົນໄກແລະນະໂຍບາຍ ເພື່ອແນໃສ່ເສີມຂະຫຍາຍສິດເປັນເຈົ້າຂອງຂອງປະຊາຊົນຢ່າງແຂງແຮງ ຄວບຄູ່ໄປກັບການເພີ່ມທະວີລະບຽບກົດໝາຍ ແລະຮັບປະກັນວິໄນສັງຄົມ. ພ້ອມກັນນັ້ນ, ເພີ່ມທະວີວຽກງານການຄົ້ນຄວ້າທິດສະດີ ແລະ ສະຫຼຸບສັງລວມພຶດຕິກຳ ກ່ຽວກັບການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ ຕິດພັນກັບພາລະກິດການສ້າງສາແລະປົກປັກຮັກສາປະເທດຊາດ, ເຊິ່ງເປັນບັນຫາທົ່ວໄປຂອງປະຊາທິປະໄຕ ແລະ ລະບຽບກົດໝາຍໃນປະຫວັດສາດແລະປະຈຸບັນ; ຄົ້ນຄວ້າຂະບວນການພັດທະນາຄວາມຮັບຮູ້ ແລະ ສະຖານະປະຈຸບັນຂອງສາຍພົວພັນລະຫວ່າງການປະຕິບັດປະຊາທິປະໄຕ ແລະ ການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ ໃນຂະບວນການສ້າງສາແລະພັດທະນາປະເທດຕາມແນວທາງສັງຄົມນິຍົມ, ຊີ້ໃຫ້ເຫັນຢ່າງຈະແຈ້ງເຖິງຂໍ້ດີ, ຂໍ້ຈຳກັດ, ສາເຫດ ແລະ ບົດຮຽນປະສົບການ; ອະທິບາຍພື້ນຖານທິດສະດີ ແລະພຶດຕິກຳ ເພື່ອສະເໜີທັດສະນະ, ວິທີແກ້ບັນຫາຕາມຫຼັກວິທະຍາສາດ ແລະ ເປັນໄປໄດ້ ເພື່ອຍົກສູງປະສິດທິຜົນຂອງການແກ້ໄຂສາຍພົວພັນລະຫວ່າງການປະຕິບັດປະຊາທິປະໄຕ ແລະການເພີ່ມທະວີລະບຽບກົດໝາຍ, ຮັບປະກັນວິໄນສັງຄົມ ປະກອບສ່ວນເຂົ້າໃນພາລະກິດການສ້າງສາ ແລະປົກປັກຮັກສາປະເທດຊາດຫວຽດນາມສັງຄົມນິຍົມ ຢ່າງສຳເລັດມີໄຊ./.
-----------------------
(1) ໂຮ່ຈີມິນ: ນິພົນຄົບຸດ, ສພຈ. ການເມືອງແຫ່ງຊາດ, ຮ່າໂນ້ຍ, 2011, ເຫຼັ້ມ 6, ໜ້າ 232.
(2) ໂຄງການການເມືອງກໍ່ສ້າງປະເທດໃນສະໄໝຂ້າມຜ່ານໄປສູ່ລັດທິສັງຄົມນິຍົມ (ສະບັບປັບປຸງແລະພັດທະນາປີ 2011), ສພຈ. ການເມືອງແຫ່ງຊາດ, ຮ່າໂນ້ຍ, 2011, ໜ້າ 28.
(3) ໂຄງການການເມືອງກໍ່ສ້າງປະເທດໃນສະໄໝຂ້າມຜ່ານໄປສູ່ລັດທິສັງຄົມນິຍົມ (ສະບັບປັບປຸງແລະພັດທະນາປີ 2011), ປຶ້ມທີ່ໄດ້ແນະນຳ, ເຫຼັ້ມ 28-29
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII, ຫ້ອງການສູນກາງພັກ, ຮ່າໂນ້ຍ, 2016, ເຫຼັ້ມ 170.
(5) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 119
(6) ລັດຖະທຳມະນູນປີ 1980 (ມາດຕາ 12); ລັດຖະທຳມະນູນປີ 1992 (ມາດຕາ 12); ກົດດຳລັດໝາຍເລກ 34/2007/PL-UBTVQH11 ລົງວັນທີ 20 ເມສາ 2007 ຂອງຄະນະກຳມະການປະຈຳສະພາແຫ່ງຊາດ ວ່າດ້ວຍ “ການປະຕິບັດປະຊາທິປະໄຕຢູ່ຕາແສງ, ຄຸ້ມເມືອງ, ຕົວເມືອງນ້ອຍ”; ດຳລັດໝາຍເລກ 71/1998/NĐ-CP ລົງວັນທີ 8 ກັນຍາ 1998 ຂອງລັດຖະບານ ວ່າດ້ວຍ “ກົດລະບຽບກ່ຽວກັບການຈັດຕັ້ງປະຕິບັດປະຊາທິປະໄຕໃນການດໍາເນີນງານຂອງອົງການ”; ມະຕິຮ່ວມໝາຍເລກ 09/2008/NQLT-CP-UBTƯMTTQVN ລົງວັນທີ 14 ກໍລະກົດ 2008 ຂອງລັດຖະບານ ແລະ ຄະນະກຳມະການກາງແນວໂຮມປະເທດຊາດຫວຽດນາມ ວ່າດ້ວຍ “ຄຳແນະນຳການຈັດຕັ້ງປະຕິບັດມາດຕາ 11, 14, 16, 22 ແລະ 26 ຂອງກົດດຳລັດວ່າດ້ວຍການປະຕິບັດປະຊາທິປະໄຕໃນຕາແສງ, ຄຸ້ມເມືອງ, ຕົວເມືອງນ້ອຍ”; ກົດໝາຍວ່າດ້ວຍການປະຕິບັດປະຊາທິປະໄຕຢູ່ຮາກຖານທີ່ສະພາແຫ່ງຊາດສະໄໝທີ XV ປະກາດໃຊ້ໃນວັນທີ 10 ພະຈິກ 2022.
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1036 (ເດືອນເມສາ 2024)
