ໂລກກໍາລັງປະເຊີນກັບຈຸດປ່ຽນ ແລະການປ່ຽນແປງໃໝ່

ປີ 2023, ໂລກຍັງສືບຕໍ່ມີການປ່ຽນແປງຫຼາຍຢ່າງ, ມີຈຸດປ່ຽນທີ່ກ້າວໄປສູ່ສະຖານະການໃໝ່, ຫຼາຍຂົ້ວ, ຫຼາຍສູນກາງ ແລະຫຼາຍລະດັບ. ໃນຂະບວນການນັ້ນ, ຄວາມບໍ່ໝັ້ນຄົງແລະບໍ່ແນ່ນອນກຳລັງເພີ່ມຂຶ້ນ. ສັນຕິພາບ ການຮ່ວມມື ແລະການພັດທະນາແບບຍືນຍົງ ຍັງຄົງເປັນຄວາມປາດຖະໜາ ແລະເປົ້າໝາຍຮ່ວມກັນ ທີ່ປະເທດແລະປະຊາຊົນສ່ວຍຫຼາຍຕັ້ງເປົ້າໄວ້, ແຕ່ຕ້ອງປະເຊີນກັບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງ.

ການແຂ່ງຂັນທາງຍຸດທະສາດລະຫວ່າງບັນດາປະເທດໃຫຍ່ທະວີຄວາມຮຸນແຮງແລະສັບສົນຫຼາຍຂຶ້ນ, ການເມືອງອຳນາດບາດໃຫຍ່ ແລະການ​ນຳ​ໃຊ້​ກຳລັງ​ໃນ​ການ​ພົວພັນ​ສາກົນ​ນັບ​ມື້​ນັບ​ເພີ່ມ​ຂຶ້ນ. ນອກຈາກການ​ປະ​ທະ​ກັນລະຫວ່າງລັດດ​ເຊຍ-ຢູ​ແກຼນ​ ທີ່​ກຳລັງເກີດຂຶ້ນຢ່າງຕໍ່ເນື່ອງແລ້ວ, ຈຸດ​ຮ້ອນ​ຂອງ​ການ​ປະ​ທະ​ກັນ​ຫຼາຍ​ແຫ່ງ​ໄດ້​ເກີດ​ຂຶ້ນ​ຢູ່​ພາກ​ຕາ​ເວັນ​ອອກ​ກາງ​ແລະ​ອາ​ຟ​ຣິ​ກກາ. ການຮ່ວມມືແລະການຕໍ່ສູ້ໃນເວທີພະຫຸພາຄີ ແລະ ກຸ່ມກອງກຳລັງລະຫວ່າງປະເທດທີ່ເຊື່ອມໂຍງກັນ ມີຄວາມສັບສົນຫຼາຍຂຶ້ນ. ຄວາມທ້າທາຍດ້ານຄວາມໝັ້ນຄົງໃນຮູບແບບໃໝ່, ໂດຍສະເພາະການປ່ຽນແປງສະພາບພູມອາກາດ, ຄວາມໝັ້ນຄົງຂອງມະນຸດ, ຄວາມໝັ້ນຄົງດ້ານແຫຼ່ງນ້ຳ, ຄວາມໝັ້ນຄົງດ້ານພະລັງງານ ແລະຄວາມໝັ້ນຄົງທາງໄຊເບີຣ໌ ກຳລັງເກີດຂຶ້ນຢ່າງດຸເດືອດຫຼາຍຂຶ້ນເລື້ອຍໆ.

ເສດຖະກິດໂລກສືບຕໍ່ຟື້ນຕົວ, ແຕ່ຍັງຄົງປະເຊີນອຸປະສັກແລະຄວາມບໍ່ແນ່ນອນຫຼວງຫຼາຍ. ບັນດາການເຊື່ອມໂຍງທາງເສດຖະກິດ, ໂດຍສະເພາະ ການເຊື່ອມໂຍງໃນລະດັບພາກພື້ນແລະອະນຸພາກພື້ນ, ພ້ອມດ້ວຍຂະບວນການປັບໂຄງສ້າງຕ່ອງໂສ້ການສະໜອງ ແລະເຄືອຂ່າຍການຜະລິດທົ່ວໂລກ, ການກຳນົດມາດຕະຖານທາງເສດຖະກິດແລະເຕັກໂນໂລຊີໃໝ່ທີ່ໄດ້ຮັບການສົ່ງເສີມໃຫ້ແຂງແຮງຂຶ້ນ. ທ່າອ່ຽງຂອງຄວາມເປັນເຈົ້າການທາງຍຸດທະສາດ, ການປ່ຽນແປງທາງດິຈິຕອນ ແລະການເຕີບໂຕສີຂຽວ ຍັງເກີດຂຶ້ນຢ່າງຕໍ່ເນື່ອງ, ສ້າງໂອກາດແລະແຮງຜັກດັນໃນການປ່ຽນແປງໃໝ່ຮູບແບບ ແລະວິທີການພັດທະນາ ໃນຫຼາຍປະເທດ ແລະວິສາຫະກິດ.

ໃນສະພາບການສາກົນທີ່ສັບສົນນັ້ນ, ຄວາມຮຽກຮ້ອງຕ້ອງການທີ່ວາງອອກມາສຳລັບການຕ່າງປະເທດແມ່ນ ການໃຊ້ປະໂຫຍດຈາກໂອກາດ ແລະປັດໄຈສາກົນທີ່ເອື້ອອຳນວຍຢ່າງເຕັມທີ່, ແກ້ໄຂຄວາມທ້າທາຍແລະຄວາມຫຍຸ້ງຍາກ, ປັບປຸງສະຖານະການການຕ່າງປະເທດທີ່​ເຂັ້ມ​ແຂງ​ກວ່າ​ເກົ່າ ​ເຊິ່ງ​ອຳນວຍ​ຄວາມ​ສະດວກ​ໃຫ້​ແກ່​ພາລະກິດການປ່ຽນແປງໃໝ່, ການພັດທະນາປະເທດ ແລະ ການປົກປັກຮັກສາປະເທດຊາດ, ປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກຢ່າງສຳລັດມີໄຊ.

ຜົນສຳເລັດດ້ານນະໂຍບາຍການຕ່າງປະເທດມີຄວາມໝາຍປະຫວັດສາດ

ຕໍ່ໜ້າ​ການ​ຜັນ​ແປ​ທີ່​ສັບສົນ​ໃນ​ສະຖານະ​ການ​ສາກົນ, ແນວທາງການຕ່າງປະເທດທີ່ລະບຸໄວ້ໃນກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ ສືບຕໍ່ໄດ້ຮັບການຊາບຊຶມຢ່າງເລິກເຊິ່ງ ແລະໄດ້ຮັບການຈັດຕັ້ງປະຕິບັດຢ່າງມີວິທະຍາສາດ ປະສິດທິຜົນ ແລະ ໄດ້ຮັບການຜັນຂະຫຍາຍເປັນຮູບປະທຳ ໃນບັນດາໂຄງການ ໜ້າທີ່ ແລະ ວິທີແກ້ທີ່ຮອບດ້ານແລະຍາວນານ ໃນແຕ່ລະຂົງເຂດ ແລະຄູ່ຮ່ວມມືທັງໝົດ ເພື່ອຕອບສະໜອງຄວາມຕ້ອງການຂອງປະເທດ. ປີ 2023, ສູນກາງພັກ, ກົມການເມືອງສູນກາງ ແລະ ຄະນະເລຂາທິການສູນກາງ ໄດ້ອອກມະຕິແລະຂໍ້ສະຫຼຸບຫຼາຍສະບັບ ແລະ ອະນຸມັດໂຄງການການຕ່າງປະເທດທີ່ສຳຄັນຫຼາຍໂຄງການ, ໂດຍສະເພາະ ມະຕິໝາຍເລກ 28-NQ/TW ລົງວັນທີ 25 ທັນວາ 2013 ຂອງກອງປະຊຸມສູນກາງພັກຄັ້ງທີ 8 ສະໄໝທີ XI “ວ່າດ້ວຍຍຸດທະສາດການປົກປັກຮັກສາປະເທດຊາດໃນສະພາບການໃໝ່”, ມະຕິໝາຍເລກ 34/NQ-TW ລົງວັນທີ 9 ມັງກອນ 2023 ຂອງກົມການເມືອງສູນກາງພັກ “ກ່ຽວກັບທິດທາງແລະແຜນນະໂຍບາຍສຳຄັນບາງປະການ ໃນການຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ XIII ຂອງພັກ”, ຄຽງຄູ່ນັ້ນ ຍັງມີບັນດາຂໍ້ສະຫຼຸບກ່ຽວກັບການພັດທະນາການພົວພັນກັບຄູ່ຮ່ວມມືທີ່ສຳຄັນຫຼາຍປະເທດ, ການພົວພັນກັບປະເທດໃນສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ), ການຮ່ວມມືອະນຸພາກພື້ນລຸ່ມນ້ຳຂອງ, ແຜນນະໂຍບາຍໃນການຈັດການກັບຂໍ້ລິເລີ່ມການເຊື່ອມໂຍງສາກົນຂອງບັນດາປະເທດທີ່ສຳຄັນ,… ນີ້​ກໍ່​ແມ່ນ​ພື້ນຖານ​ເພື່ອ​ໃຫ້​ທຸກ​ຂັ້ນ ແລະທຸກຂະ​ແໜງ​ການ ໃນການຜັນຂະຫຍາຍ​ເປັນໂຄງການ ​ແຜນການ ​ແລະ ວິທີ​ແກ້​ໄຂສະເພາະ, ສ້າງ​ຄວາມເຫັນດີເຫັນພ້ອມ ແລະຄວາມ​ເປັນ​ເອກະ​ພາບທາງດ້ານການຮັບ​ຮູ້ ແລະ​ການ​ກະທຳ ​ໃນ​ການຜັນຂະຫຍາຍ​ປະຕິບັດ​ນະ​ໂຍບາຍ​ການ​ຕ່າງປະ​ເທດ.

ຕິດຕາມແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ XIII ຂອງພັກ, ບັນດາມະຕິ ຂໍ້ສະຫຼຸບ ແລະຄຳສັ່ງການຕ່າງປະເທດຂອງສູນກາງ ກົມການເມືອງສູນກາງ ຄະນະເລຂາທິການສູນກາງພັກ ແລະ ການຊີ້ນຳຂອງບັນດາຜູ້ນຳພັກແລະລັດ, ການ​ເຄື່ອນ​ໄຫວ​ວຽກ​ງານ​ການ​ຕ່າງປະ​ເທດ​ໃນ​ປີ 2023, ພິ​ເສດ​ແມ່ນ​ ວຽກ​ງານ​ການ​ຕ່າງປະ​ເທດ​ຂັ້ນ​ສູງ, ​ໄດ້​ດຳ​ເນີນ​ໄປ​ຢ່າງ​ຟົດ​ຟື້ນ​ໃນ​ທົ່ວທຸກ​ທະວີບ ​ແລະ ໃນ​ເວທີ​ປາ​ໄສ​ແລະກົນ​ໄກ​ພະຫຸພາຄີ​ທີ່​ສຳຄັນ. ໃນປີ 2023, ຫວຽດນາມປະສົບຄວາມສຳເລັດໃນການ​​ຈັດ​ຕັ້ງ​ການ​ຢ້ຽມຢາມ​ຂອງ​ບັນດາ​ການ​ນຳ​ສຳຄັນ​ ໃນປະເທດ​ເພື່ອນບ້ານ, ປະເທດຄູ່​ຮ່ວມ​ສຳຄັນ ແລະ ​ເພື່ອນ​ມິດ​ທີ່​ເປັນ​ມູນ​ເຊື້ອ ຈຳນວນ 22 ຄັ້ງ, ​ແລະ ຕ້ອນຮັບການ​ຢ້ຽມຢາມ​ຫວຽດນາມຂອງຜູ້​ນຳ​ຂັ້ນ​ສູງ​ຂອງປະ​ເທດຕ່າງໆ ຈຳນວນ 28 ຄັ້ງ ພ້ອມດ້ວຍ​ການ​ພົບ​ປະ​ຂັ້ນ​ສູງ​ນັບ​ຮ້ອຍຄັ້ງ​ ຢູ່​ບັນດາ​ເວທີ​ປາ​ໄສ ​ແລະກອງ​ປະຊຸມ​ຫຼາຍ​ຝ່າຍ. ໃນນັ້ນ, ມີການຢ້ຽມຢາມທີ່ມີຄວາມສຳຄັນທາງປະຫວັດສາດ ເຊັ່ນ ການຢ້ຽມຢາມຫວຽດນາມຂອງ ເລຂາທິການໃຫຍ່ ແລະປະທານປະເທດຈີນ ສີ ຈິ້ນຜິງ, ປະທານາທິບໍດີ ໂຈ ໄບເດັນ ແຫ່ງສະຫະລັດອາເມລິກາ, ການພົບປະລະດັບສູງລະຫວ່າງສາມພັກ ຫວຽດນາມ - ກຳປູເຈຍ - ລາວ,...

ພ້ອມກັນນັ້ນ, ການພົວພັນກັບປະເທດເພື່ອນບ້ານ ປະເທດຄູ່ຮ່ວມສຳຄັນ ແລະ ປະເທດມິດສະຫາຍດັ້ງເດີມ ກໍ່ເລິກເຊິ່ງຍິ່ງຂຶ້ນ, ຄວາມໄວ້ວາງໃຈທາງການເມືອງກັບຫຼາຍປະເທດ ໄດ້ຮັບການປັບປຸງຢ່າງໝັ້ນຄົງ, ການຮ່ວມມືໄດ້ຮັບການເປີດກວ້າງ ມີເນື້ອແທ້ ແລະ ມີປະສິດທິຜົນ. ພິເສດແມ່ນ ການພົວພັນກັບຄູ່ຮ່ວມມືທີ່ສຳຄັນ​ ໄດ້​ຮັບ​ການ​ຍົກລະດັບ​ຂຶ້ນສູ່ລະດັບ​ໃໝ່; ໂດຍສະເພາະຢ່າງຍິ່ງ, ຫວຽດນາມແລະຈີນຕົກລົງທີ່ຈະຮ່ວມກັນສ້າງ “ປະຊາຄົມແຫ່ງອະນາຄົດຮ່ວມກັນມີຄວາມສໍາຄັນຍຸດທະສາດ”, ການພົວພັນກັບສະຫະລັດອາເມລິການ ແລະ ຍີ່ປຸ່ນ ໄດ້ຮັບການຍົກລະດັບເປັນຄູ່ຮ່ວມມືຍຸດທະສາດຮອບດ້ານ. ພ້ອມກັນນັ້ນ, ຫວຽດນາມໄດ້ສະຖາປະນາການພົວພັນທາງການທູດກັບ 3 ປະເທດຄື ບາຮາມາດ, ຕຣີນິດາດແລະໂຕເບໂກ ແລະ ຕອງກາ, ສົ່ງຜົນໃຫ້ຈຳນວນ​ປະ​ເທດ​ທີ່​ຫວຽດນາມສະຖາປະນາການ​ພົວພັນ​ທາງ​ການ​ທູດ​ເຖິງ 193 ປະ​ເທດ. ອາດຈະເວົ້າໄດ້ວ່າ, ບັນດາ​ການ​ເຄື່ອນ​ໄຫວ​ວຽກ​ງານ​ການ​ຕ່າງປະ​ເທດ​ທີ່​ຟົດຟື້ນ​ໃນ​ປີ 2023 ​ໄດ້​ສ້າງ​ການ​ພັດທະນາ​ຄຸນ​ນະພາ​ບ​ໃໝ່​ ດ້ານ​ການ​ຕ່າງປະ​ເທດ ​ແລະ ການ​ເຊື່ອມ​ໂຍງ​ເຂົ້າ​ກັບ​ສາກົນ, ນັ້ນແມ່ນຄັ້ງທຳອິດທີ່ຫວຽດນາມໄດ້ສ້າງການພົວພັນຄູ່ຮ່ວມມືຍຸດທະສາດ ແລະ ຄູ່ຮ່ວມມືຍຸດທະສາດຮອບດ້ານ ກັບທັງ​ໝົດ 5 ປະ​ເທດສະມາຊິກ​ຖາວອນ​ ຂອງ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ, 6 ​ໃນ 7 ປະ​ເທດ​ໃນ​ກຸ່ມ​ປະ​ເທດ​ທີ່​ມີ​ການ​ພັດທະນາ​ອຸດສາຫະກຳ​ອັນ​ດັບ​ໜຶ່ງ​ຂອງ​ໂລກ (G-7),...

​ໃນ​ສະພາບ​ການ​ນະ​ໂຍບາຍ​ການ​ຕ່າງປະ​ເທດ​ລວມນັ້ນ, ທີ່​ຕັ້ງ ກຽດ​ສັກ​ສີ ​ແລະ ສຽງ​ຂອງ​ຫວຽດນາມ ສືບ​ຕໍ່​ໄດ້​ຮັບ​ການ​ຢືນຢັນ​ໃນ​ຫຼາຍ​ເວທີ​ປາ​ໄສ ​ແລະ ກົນ​ໄກ​ພະຫຸພາຄີ​ທີ່​ສຳຄັນ ​ເຊັ່ນ ອາຊຽນ, ສະຫະປະຊາຊາດ, ອະນຸພາກພື້ນລຸ່ມນ້ຳຂອງ, ເວທີປາໄສການຮ່ວມມືທາງເສດຖະກິດອາຊີ-ປາຊີຟິກ (APEC), ສະພາລະຫວ່າງລັດຖະສະພາອາຊຽນ (AIPA), ສະຫະພັນລັດຖະສະພາລະຫວ່າງປະເທດ (IPU), ກອງ​ປະ​ຊຸມພາຄີກອບອະນຸ​ສັນ​ຍາ​ສະ​ຫະ​ປະ​ຊາ​ຊາດ ວ່າດ້ວຍ​ການ​ປ່ຽນ​ແປງ​ສະພາບ​ດິນ​ຟ້າ​ອາ​ກາດ​ (UNFCCC) ​ຄັ້ງ​ທີ 28 (ກອງປະຊຸມ COP-28), ເວທີປາໄສລະດັບສູງແລວທາງແລະເສັ້ນທາງ… ນອກຈາກນັ້ນ, ຫວຽດນາມປະສົບຄວາມສຳເລັດໃນການດຳລົງຕຳແໜ່ງຮອງປະທານສະມັດຊາໃຫຍ່ແຫ່ງສະຫະປະຊາຊາດ​ຄັ້ງ​ທີ 77, ປະຕິບັດ​ໜ້າທີ່ຢ່າງດີ ໃນຖານະສະມາຊິກຂອງສະພາ​ສິດທິ​ມະນຸດ​ແຫ່ງສະຫະ​ປະຊາ​ຊາດ​ໄລຍະປີ 2023-2025 ​ແລະ ຄະນະ​ກຳມະການ​ກົດໝາຍ​ສາກົນ; ພ້ອມກັນນັ້ນ, ຫວຽດນາມຍັງໄດ້ຮັບຄວາມໄວ້ວາງໃຈຈາກປະຊາຄົມສາກົນແລະໄດ້ຮັບເລືອກໃຫ້ດຳລົງຕຳແໜ່ງສຳຄັນຫຼາຍຕຳແໜ່ງ ໃນອົງການສາກົນ; ປະສົບຄວາມສຳເລັດໃນການຈັດຕັ້ງກອງປະຊຸມສາກົນທີ່ສຳຄັນ ເຊັ່ນ ກອງ​ປະ​ຊຸມ​ສະ​ມາ​ຊິກ​ລັດຖະສະພາເຍົາວະຊົນ​ໂລກ​ຄັ້ງ​ທີ 9, ກອງປະຊຸມ IPU ກ່ຽວກັບຄວາມໝັ້ນຄົງດ້ານແຫຼ່ງນ້ຳ,... ບົນ​ຈິດ​ໃຈ​ສະ​ເໝີ​ພາບ, ການປະສານຜົນປະໂຫຍດ, ການ​ແບ່ງປັນ​ຄວາມ​ຫຍຸ້ງຍາກ ແລະການສະໜັບສະໜູນ​ເຊິ່ງກັນ​ແລະກັນ, ຫວຽດນາມ​ໄດ້​ສະເໜີຫຼາຍຂໍ້ຄິດ​ລິ​ເລີ່​ມ ​ແລະວິທີ​ແກ້​ໄຂ ​​ເພື່ອ​ຊຸກຍູ້​ການ​ຮ່ວມ​ມື ​ແລະ ປະກອບສ່ວນ​ຢ່າງ​ມີ​ຄວາມ​ຮັບຜິດຊອບ​ຕໍ່​ບັນດາ​ບັນຫາ​ທົ່ວ​ໂລກ ​ເຊັ່ນ: ການ​ປ້ອງ​ກັນແລະຄວບຄຸມ​ພະຍາດ, ​ໄພ​ທຳ​ມະ​ຊາດ, ການ​ປ່ຽນ​ແປງ​ຂອງ​ດິນ​ຟ້າ​ອາກາດ, ຄວາມໝັ້ນຄົງທາງອາຫານ, ຄວາມໝັ້ນຄົງດ້ານແຫຼ່ງນ້ຳ, ການຮັກສາສັນຕິພາບໃນອາຟຮິກກາ, ການສົ່ງກອງກຳລັງເພື່ອຊ່ວຍແກ້ໄຂຜົນທີ່ຕາມມາຂອງແຜ່ນດິນໄຫວໃນຕວກກີ... ສາມາດເວົ້າໄດ້ວ່າ ຖານະບົດບາດ ກຽດສັກສີ ແລະ ພາບພົດຂອງຫວຽດນາມໃນຖານະປະເທດທີ່ເປັນເອກະລາດ, ເປັນເຈົ້າຕົນເອງ, ພັດທະນາຢ່າງຂະຫຍັນຂັນເຄື່ອນ, ເປັນ​ເພື່ອນ​ທີ່ຊື່ສັດແລະຈິງ​ໃຈ, ​ເປັນ​ຄູ່​ຮ່ວມ​ມື​ທີ່​​ເຊື່ອຖືໄດ້, ​ເປັນ​ສະມາຊິກ​ທີ່​ຕັ້ງໜ້າ ​ແລະມີ​ຄວາມ​ຮັບຜິດຊອບ​ ຂອງ​ປະຊາ​ຄົມ​ໂລກ ໄດ້ໂດດເດັ່ນ​ໃນ​ເວທີ​ສາກົນ​ໃນ​ປະຈຸ​ບັນ.

ເມື່ອປະເຊີນກັບຄວາມຜັນຜວນທີ່ສັບສົນໃນສະພາບການສາກົນ, ຫວຽດນາມໄດ້ຈັດການຄວາມສຳພັນກັບປະເທດຄູ່ຮ່ວມຢ່າງເໝາະສົມ ບົນພື້ນຖານຂອງການຍຶດໝັ້ນໃນຫຼັກການ, ຍຸດໂທບາຍທີ່ຍືດຫຍຸ່ນ, ປົກປັກຮັກສາເອກະລາດ ອຳນາດອະທິປະໄຕ ແລະຜືນແຜ່ນດິນອັນຄົບຖ້ວນຢ່າງເດັດດ່ຽວແລະໜຽວແໜ້ນ, ພ້ອມກັນນັ້ນ ກໍ່ຮັກສາສະພາບແວດລ້ອມສັນ​ຕິ​ພາບ ​ແລະ​ຄວາມໝັ້ນ​ຄົງ​. ການເຈລະຈາເພື່ອແກ້ໄຂບັນຫາຊາຍແດນທາງບົກ ແລະທາງທະເລ ກໍ່ມີຄວາມກ້າວໜ້າທີ່ສຳຄັນ. ຍ້ອນ​ເຫດ​ນັ້ນ, ປະກອບສ່ວນປັບປຸງ​ເສັ້ນ​ຊາຍແດນແຫ່ງ​ສັນຕິພາບ ແລະມິດຕະພາບ ​ກັບ​ບັນດາ​ປະ​ເທດ​ບ້ານ​ໃກ້​ເຮືອນ​ຄຽງ ​ໃຫ້​ແໜ້ນ​ແຟ້ນກ່ວາ​ອີກ, ສ້າງ​ເງື່ອນ​ໄຂ​ສະດວກ​ໃຫ້​ແກ່​ການ​ແລກປ່ຽນ ​ແລະການຮ່ວມ​ມື​ເພື່ອການພັດທະນາ.

ການທູດທາງເສດຖະກິດສືບຕໍ່ໄດ້ຮັບການສົ່ງເສີມບົນພື້ນຖານຂອງຄຳສັ່ງໝາຍເລກ 15-CT/TW ລົງວັນທີ່ 10 ສິງຫາ 2022 ຂອງຄະນະເລຂາທິການສູນກາງ “ກ່ຽວກັບການທູດທາງເສດຖະກິດເພື່ອຮັບໃຊ້ການພັດທະນາປະເທດເຖິງປີ 2030” ໂດຍຖືເອົາທ້ອງຖິ່ນ ວິສາຫະກິດ ແລະປະຊາຊົນ ເປັນສູນກາງຂອງການຮັບໃຊ້. ການຮ່ວມມືທາງເສດຖະກິດ ການຂະຫຍາຍຕະຫຼາດ ແລະ ການດຶງດູດເງິນລົງທຶນທີ່ມີຄຸນນະພາບ ຖືເປັນເນື້ອໃນຫຼັກໃນກິດຈະກຳການຕ່າງປະເທດ, ໂດຍສະເພາະ ການຕ່າງປະເທດລະດັບສູງ. ຄຽງຄູ່ກັບການໃຊ້ປະໂຫຍດຈາກເຄືອຂ່າຍສັນຍາການຄ້າເສລີ (FTA) 16 ສະບັບທີ່ໄດ້ລົງນາມແລ້ວ, ຫວຽດນາມສືບຕໍ່ເປັນເຈົ້າການແລະຕັ້ງໜ້າ ໃນການເຊື່ອມໂຍງທາງເສດຖະກິດໃໝ່ ແລະຊຸກຍູ້ການຮ່ວມມືກັບຫຼາຍ​ຄູ່​ຮ່ວມ​ມື​ທີ່​ມີ​ທ່າ​ແຮງ. ໃນປີ 2023, ມີການລົງນາມເອກະສານການຮ່ວມມືຂອງກະຊວງ, ຂະແໜງການຫຼາຍກວ່າ 70 ສະບັບ, ເອກະສານຂອງທ້ອງຖິ່ນປະມານ 150 ສະບັບ ແລະເອກະສານການຮ່ວມມືຂອງວິສາຫະກິດຫຼາຍຮ້ອຍສະບັບ ໃນໂອກາດການຢ້ຽມຢາມລະດັບສູງ ແລະການເຄື່ອນໄຫວການຕ່າງປະເທດທີ່ສຳຄັນ. ຜົນທີ່ໄດ້ຮັບຄື, ການທູດທາງເສດຖະກິດໄດ້ປະກອບສ່ວນຫຼຸດຜ່ອນຜົນກະທົບດ້ານລົບຈາກການປ່ຽນແປງໃນໂລກ, ສວຍໃຊ້ກາລະໂອກາດເພື່ອປະກອບສ່ວນສຳຄັນເຂົ້າໃນການຊຸກຍູ້ການເຕີບໂຕເສດຖະກິດ, ສູ້​ຊົນ​ນຳມູນຄ່າ​ການ​ສົ່ງ​ອອກ​ແລະນຳ​ເຂົ້າ​ໃນ​ປີ 2023 ບັນລຸ​ກວ່າ 680 ຕື້ໂດລາສະຫະລັດ, ດຶງ​ດູດ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດໃຫ້ບັນລຸ 36,6 ຕື້ໂດລາສະຫະລັດ (​ເພີ່ມ​ຂຶ້ນ 32,8%), ​ບໍລິສັດ​ເຕັກ​ໂນ​ໂລ​ຊີ​ຊັ້ນນຳ​ຂອງ​ໂລກຫຼາຍບໍລິສັດໄດ້​ໃຫ້​ຄຳ​ໝັ້ນ​ສັນຍາທີ່ຈະ​ລົງທຶນ​ຍາວ​ນານ​ໃນຫວຽດນາມ...

ບັນດາ​ຂົງ​ເຂດ​ຖະ​ແຫຼ​ງຂ່າວການ​ຕ່າງປະ​ເທດ, ການ​ທູດ​ທາງວັດທະນະທຳ, ວຽກ​ງານ​ຊາວ​ຫວຽດນາມ​ຢູ່​ຕ່າງປະ​ເທດ ​ແລະ ການຄຸ້ມຄອງ​ພົນລະ​ເມືອງ​ ກໍ່​ບັນລຸ​ຜົນສຳເລັດທີ່ສຳຄັນຫຼາຍຢ່າງ. ໃນປີ 2023, ອ່າວຮ້າລອງ-ໝູ່ເກາະກ້າດບ່າ ໄດ້ຮັບການຍອມຮັບຈາກອົງການການສຶກສາ ວິທະຍາສາດ ແລະວັດທະນະທຳແຫ່ງສະຫະປະຊາຊາດ (UNESCO) ໃຫ້ເປັນມໍລະດົກທາງທຳມະຊາດຂອງໂລກ, ​ໂດຍ​ມີເມືອງເພີ່ມເຕີມ​ອີກ 2 ເມືອງ​ຄື ດາ​ລ້າດ ​ແລະ ໂຮ້ຍອັນ ​ໄດ້​ຮັບ​ການ​ຮັບຮອງ​ວ່າ​ເປັນການ​ສ້າງສັນຂອງ UNESCO. ນັບເປັນຄັ້ງທຳອິດທີ່ຫວຽດນາມໄດ້ຮັບເລືອກໃຫ້ດຳລົງຕຳແໜ່ງສຳຄັນໃນອົງການ UNESCO ເຊັ່ນ ຮອງປະທານສະມັດຊາໃຫຍ່ຂອງ UNESCO, ຮອງປະທານຄະນະກຳມະການລະຫວ່າງລັດຖະບານສຳລັບອະນຸສັນຍາວ່າດ້ວຍການຄຸ້ມຄອງມໍລະດົກທາງວັດທະນະທຳທີ່ບໍ່ມີຕົວຕົນ, ສະມາຊິກຂອງຄະນະກໍາມະການມໍລະດົກໂລກ,... ຄຽງ​ຄູ່​ກັບ​ວຽກ​ງານ​ການ​ທູດ​ທາງວັດທະນະທຳ, ວຽກ​ງານ​ຖະ​ແຫຼ​ງຂ່າວ​ການ​ຕ່າງປະ​ເທດມີການປ່ຽນແປງໃໝ່ທີ່ດີ ຕັ້ງໜ້າ ​ແລະ ມີ​ປະສິດທິ​ຜົນ, ສືບ​ຕໍ່​ໂຄສະນາ​ຢ່າງ​ກວ້າງຂວາງ​ກ່ຽວ​ກັບ​ແຜນນະໂຍບາຍ, ແນວທາງ ແລະນະ​ໂຍບາຍຂອງພັກແລະລັດ, ເຜີຍແຜ່ຄວາມສຳເລັດໃນການພັດທະນາ​ປະ​ເທດ, ເອກະລັກທາງວັດທະນະທຳ​ຂອງ​ຊາດ ​ແລະຄຸນ​ນະພາ​ບທີ່​ດີງາມ​ຂອງ​ຄົນຫວຽດນາມ ສູ່​ເພື່ອນ​ມິດ​ໃນ​ທົ່ວ​ໂລກ. ຊາວປະມົງຫວຽດນາມຫຼາຍຮ້ອຍຄົນໄດ້ຮັບການຄຸ້ມຄອງທັນທີ, ຊາວຫວຽດນາມຫຼາຍ​ພັນ​ຄົນ​ທີ່​ອາ​ໄສ​ຢູ່​ໃນພື້ນທີ່ທີ່ກຳລັງ​ປະສົບ​ກັບ​ຄວາມ​ຂັດ​ແຍ້ງ ​ແລະ​ໄພ​ພິບັດທາງທຳ​ມະ​ຊາດ ໄດ້ຮັບການນຳກັບບ້ານ​ຢ່າງ​ປອດ​ໄພ ​ເຊັ່ນຈາກ​ມຽນມາ, ອິດສະຣາ​ແອນ... ສະຖານະທາງກົດໝາຍຂອງເພື່ອນຮ່ວມຊາດຫວຽດນາມໃນຕ່າງປະເທດ ໄດ້ຮັບການປະກັນ, ມີສະຖຽນລະພາບຫຼາຍຂຶ້ນ, ມີການບູລະນາການແລະພັດທະນາ, ປະກອບສ່ວນອັນຕັ້ງໜ້າເຂົ້າໃນການພັດທະນາຂອງປະເທດເຈົ້າບ້ານ ແລະມີການເຄື່ອນໄຫວທີ່ຫຼາກຫຼາຍເຊິ່ງມີສ່ວນຊ່ວຍໃນການສ້າງສາ ພັດທະນາ ແລະ ປົກປັກຮັກສາປະເທດຊາດຫວຽດນາມ.

ວັນທີ 19 ທັນວາ 2023, ໃນກອງປະຊຸມທາງການທູດຄັ້ງທີ 32 ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ປະເມີນໂດຍລວມກ່ຽວກັບວຽກງານການຕ່າງປະເທດ ແລະການທູດ ຕັ້ງແຕ່ກອງປະຊຸມໃຫຍ່ຄັ້ງທີ XIII ຂອງພັກ ຈົນເຖິງປະຈຸບັນ, ໃນນັ້ນປີ 2023 ມີຄວາມໂດດເດັ່ນຫຼາຍ ເຊິ່ງໄດ້ “ບັນລຸຄວາມສຳເລັດແລະຜົນງານທີ່ສຳຄັນ ແລະມີຄວາມໝາຍປະຫວັດສາດຫຼາຍຢ່າງ, ກາຍເປັນຈຸດສະຫວ່າງທີ່ໜ້າປະທັບໃຈໃນບັນດາຄວາມສຳເລັດ ແລະຜົນງານໂດຍລວມ ຂອງປະເທດ”. ຄວາມສຳເລັດອັນຍິ່ງໃຫຍ່ເຫຼົ່ານີ້ ​ແມ່ນ​ຫຼັກ​ຖານ​ຊັດເຈນທີ່ຢືນຢັນ ແນວທາງການປ່ຽນແປງໃໝ່ ແລະນະໂຍບາຍການຕ່າງປະເທດທີ່ຖືກຕ້ອງ​ຂອງ​ພັກ, ຕິດ​ພັນ​ກັບ​ການ​ນຳພາ ​ແລະ ທິດ​ທາງ​ຢ່າງ​ໃກ້ຊິດ. ຕິດ​ພັນ​ກັບ​ການ​ຊີ້​ນຳ​ນຳພາ​ຢ່າງ​ໃກ້ຊິດ ​ແລະ ການ​ຕັດສິນ​ໃຈ​ທີ່ສະຫຼາດ​ແລະທັນ​ການ ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ກົມ​ການ​ເມືອງສູນກາງ ຄະນະເລຂາທິການສູນກາງ ນຳໂດຍ​ທ່ານເລຂາທິການ​ໃຫຍ່ ຫງວຽນຝູຈ້ອງ ​ແລະ ບັນດາ​​ຜູ້​ນໍາຂອງພັກແລະລັດ​. ພ້ອມ​ກັນ​ນັ້ນ, ຢືນຢັນ​ວ່າ ​ການ​ຕ່າງປະ​ເທດ​ແລະການ​ທູດ​ທີ່​ອຸດົມໄປດ້ວຍ​ເອກະລັກ​ຂອງ “ໄມ້​ໄຜ່​ຫວຽດນາມ” ນັ້ນເໝາະສົມຢ່າງສົມບູນກັບເງື່ອນໄຫວ ແລະສະພາບການຂອງຫວຽດນາມ ເຊິ່ງຕອບສະໜອງຄວາມຕ້ອງການຂອງການພັດທະນາປະເທດ ແລະປົກປັກຮັກສາປະເທດຊາດໃນໄລຍະໃໝ່. ຜົນສຳເລັດດ້ານການຕ່າງປະເທດພ້ອມກັບຜົນສຳເລັດໃນການພັດທະນາເສດຖະກິດ-ສັງຄົມ ໄດ້ກະຕຸ້ນຄວາມພາກພູມໃຈໃນໂຊກລາບ, ທ່າແຮງ ແລະ ຖານະໃໝ່ຂອງປະເທດ, ທັງເປັນການປະກອບສ່ວນເສີມສ້າງຄວາມເຊື່ອໝັ້ນຂອງປວງຊົນຕໍ່ພາລະກິດການປ່ຽນແປງໃໝ່ປະເທດຊາດ ພາຍໃຕ້ການນຳພາທີ່ຖືກຕ້ອງຂອງພັກກອມມູນິດຫວຽດນາມ.

ບັນດາການເຄື່ອນໄຫວການຕ່າງປະເທດໃນປີ 2023 ສືບຕໍ່ເຮັດໃຫ້ບັນດາບົດຮຽນອັນລ້ຳຄ່າກ່ຽວກັບການຕ່າງປະເທດມີຄວາມອຸດົທສົມບູນແລະເລິກເຊິ່ງຍິ່ງຂຶ້ນ. ນັ້ນຄື: 1- ຕິດຕາມມະຕິ​ແລະ​ແນວທາງ​ການ​ຕ່າງປະ​ເທດ​ຂອງ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ​ຢ່າງ​ໃກ້ຊິດ, ຕັ້ງໝັ້ນ ກ້າຫານ ​ແລະ ສ່ອງໃສທຸ່ນທ່ຽງ ເມື່ອ​ປະ​ເຊີນ​​ກັບ​ສະພາບ​ການ​ທີ່​ສັບສົນ ​ແລະການຜັນປ່ຽນໃນ​ສະຖານະ​ການ​ສາກົນ, “ຮູ້ຈັກຕົນເອງ, ຮູ້ຈັຜູ້ຄົນ, “ຮູ້ການເວລາ, ຮູ້ສະຖານະການ”, ການລະບຸຕົວຕົນທີ່ຖືກຕ້ອງ ຄວບຄູ່ກັບການໃຊ້ປະໂຫຍດຈາກໂອກາດໄດ້ດີ; 2- ເສີມຂະຫຍາຍສຸດຂີດທ່າແລະກຳລັງໃໝ່ຂອງປະເທດ ແລະການທູດທີ່ເຕັມໄປດ້ວຍເອກະລັກຂອງ “ໄມ້ໄຜ່ຫວຽດນາມ”; ຍຶດໝັ້ນໃນເອກະລາດ ຄວາມເປັນເຈົ້າຕົນເອງ, ກາພົວພັນຫຼາຍກ້ຳຫຼາຍຝ່າຍ ແລະຄວາມຫຼາກຫຼາຍ ເພື່ອຜົນປະໂຫຍດຂອງຊາດ-ປະເທດຊາດ, ພ້ອມກັນນັ້ນ ກໍ່ຕ້ອງມີຄວາມຄິດປະດິດສ້າງ ຍືດຫຍຸ່ນ ຄ່ອງຕົວໃນຍຸດໂທບາຍ, ໄຫວພິບໃນພຶດຕິກຳ ດ້ວຍຄະຕິປະຈຳໃຈທີ່ວ່າ “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”;  3- ປະສານງານແລະປະສົມປະສານຢ່າງແໜ້ນແຟ້ນແລະກົມກຽວ ລະຫວ່າງການຕ່າງປະເທດຂອງພັກ ການທູດຂອງລັດ ແລະ ການຕ່າງປະເທດປະຊາຊົນ; ລະຫວ່າງການຕ່າງປະເທດ ການທູດ ກັບການປ້ອງກັນປະເທດ ຄວາມໝັ້ນຄົງ ເສດຖະກິດ ວັດທະນະທຳ-ສັງຄົມ; ລະຫວ່າງການຕ່າງປະເທດແລະວຽກງານພາຍໃນປະເທດ; ລະຫວ່າງການທູດທາງການເມືອງ ການທູດທາງເສດຖະກິດ ການທູດວັດທະນະທຳ ແລະ ບັນດາກອງກຳລັງການຕ່າງປະເທດ; ລະຫວ່າງທະວິພາຄີແລະພະຫຸພາຄີ ເພື່ອເສີມຂະຫຍາຍກຳລັງແຮງສັງລວມ ຂອງພື້ນຖານການທູກຫວຽດນາມ; 4- ປ່ຽນແປງໃໝ່ ແລະປະດິດສ້າງຢ່າງບໍ່ຢຸດຢັ້ງ, ປັບຕົວເຂົ້າກັບສະຖານະການໃໝ່, ກ້າທີ່ຈະກ້າວຂ້າມຄວາມຄິດແລະວິທີການດັ້ງເດີມ ເພື່ອຄົ້ນຫາວິທີການໃໝ່ ທິດທາງໃໝ່ ຂົງເຂດໃໝ່ ແລະ ຄູ່ຮ່ວມມືໃໝ່ ທີ່ມີປະສິດທິຜົນຫຼາຍກວ່າ ໂດຍຍຶດຖືແລະກຳແໜ້ນສະພາບການສາກົນ, ຄວາມເປັນຈິງແລະຄວາມຕ້ອງການໃນການພັດທະນາຂອງປະເທດ; 5- ໃຫ້ຄວາມສົນໃຈເປັນພິເສດຕໍ່ວຽກງານການສ້າງແລະປັບປຸງພັກຢ່າງຮອບດ້ານ ທັງການເມືອງ ແນວຄິດ ຄຸນສົມບັດສິນທຳ ການຈັດຕັ້ງ ແລະພະນັກງານໃນຂະແໜງການທູດ; ຜັນຂະຫຍາຍຢ່າງຄົບຊຸດ ບັນດາໜ້າທີ່ການຕ່າງປະເທດ ແລະການສ້າງແລະພັດທະນາພື້ນຖານການທູດທີ່ຮອບດ້ານແລະທັນສະໄໝ.

ສືບ​ຕໍ່​ປະຕິບັດ​ນະ​ໂຍບາຍ​ການ​ຕ່າງປະ​ເທດຂອງກອງປະຊຸມໃຫຍ່​ຄັ້ງ​ທີ XIII ຂອງ​ພັກ​ຢ່າງ​ສຳ​ເລັດ​ຜົນ

ປີ 2024 ມີຄວາມໝາຍສຳຄັນທີ່ສຸດ ໃນການປະຕິບັດມະຕິກອງປະຊຸມໃຫຍ່ຄັ້ງທີ່ XIII ຂອງພັກ ແລະ ແຜນການພັດທະນາເສດຖະກິດ-ສັງຄົມໃນໄລຍະປີ 2021-2025 ໃຫ້ສຳເລັດຜົນ. ໃນຂະນະນັ້ນ, ຄວາມ​ບໍ່​ໝັ້ນຄົງ​ແລະ​ຄວາມ​ບໍ່​ແນ່ນອນ​ຂອງ​ສະຖານະ​ການ​ສາກົນ ​ຈະຍັງຄົງ​ດຳ​ເນີນ​ຕໍ່​ໄປ ​ແລະ ​ບັນດາປັດ​ໄຈ​ທີ່​ສັບສົນ​​ ກໍ່ອາດ​ຈະ​ປະກົດ​ຂຶ້ນ. ໂອກາດໂຊກລາບ, ທ່າ​ແຮງ, ທີ່​ຕັ້ງ, ຊື່ສຽງສາກົນຂອງປະເທດ, ​ຜົນງານດ້ານ​ການ​ຕ່າງປະ​ເທດ​ທີ່ບັນລຸ​ໄດ້​ໃນ​ຊຸມ​ປີທີ່ຜ່ານມາ ພ້ອມດ້ວຍເອກະລັກສະເພາະ ແລະມູນເຊື້ອອັນສະຫງ່າງາມຂອງການທູດປະຕິວັດຂອງຫວຽດນາມ ເປັນພື້ນຖານ ຮາກຖານທີ່ໝັ້ນຄົງ ໃຫ້ຂະແໜງການການຕ່າງປະເທດແລະການທູດຫວຽດນາມ ສືບຕໍ່ເກັບກ່ຽວຄວາມສຳເລັດໃໝ່, ປະກອບສ່ວນເຂົ້າໃນການປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກຢ່າງສຳເລັດມີໄຊ.

ບົນພື້ນຖານຂອງການຈັດຕັ້ງປະຕິບັດເປັນຢ່າງດີ ແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ XIII ຂອງພັກ, ບັນດາມະຕິ ຂໍ້ສະຫຼຸບ ແລະຄຳສັ່ງກ່ຽວກັບການຕ່າງປະເທດທີ່ຄະນະບໍລິຫານງານສູນກາງ, ກົມການເມືອງສູນກາງ ແລະ ຄະນະເລຂາທິການສູນກາງ ໄດ້ອອກຕັ້ງແຕ່ຕົ້ນວາລະຈົນເຖິງປະຈຸບັນ ແລະ ໃນແຜນປະຕິບັດການ ຂອງກອງປະຊຸມທາງການທູດຄັ້ງທີ 32, ຂະແໜງການການທູດຈະສຸມໃສ່ບັນຫາຈຳນວນໜຶ່ງຕໍ່ໄປນີ້:

ທີໜຶ່ງ, ສືບຕໍ່ຊຸກຍູ້ການປ່ຽນແປງໃໝ່ແນວຄວາມຄິດກ່ຽວກັບການຕ່າງປະເທດ. ດ້ວຍທ່າແຮງແລະກຳລັງແຮງໃໝ່ຂອງປະເທດເຮົາ, ເຮົາຕ້ອງກ້າກ້າວຂ້າມແນວຄວາມຄິດເດີມ ແລະຄົ້ນຫາວິທີການໃໝ່ໆ ເພື່ອຜົນປະໂຫຍດຂອງຊາດ-ປະເທດຊາດ. ຢາກໄດ້ຄືແນວນັ້ນ, ຈຳເປັນຕ້ອງ​ຍູ້​ແຮງ​ການຈັດຕັ້ງ​ຜັນ​ຂະຫຍາຍ​ການ​ຄົ້ນ​ຄ້ວາ, ການປຶກສາໃຫ້ຄຳແນະນຳ ​ແລະ ການຄາດ​ຄະ​ເນ​ຍຸດ​ທະ​ສາດ ​ກ່ຽວ​ກັບ​ການ​ຕ່າງປະ​ເທດຢ່າງຄົບຊຸດ; ມີຄວາມສຳພັດໄວໃນການຄົ້ນພົບ​ບັນ​ຫາ​ໃໝ່ແລະທ່າ​ອ່ຽງ​ໃໝ່, ລະບຸ​ໂອ​ກາດ​ຢ່າງ​ຖືກ​ຕ້ອງ, ວາງຕຳແໜ່ງ​ຍຸດ​ທະ​ສາດ​ຂອງ​ປະ​ເທດ​ຢ່າງ​ຖືກ​ຕ້ອງ ແລະໃຊ້ປະໂຫຍດຈາກທ່າອ່ຽງສາກົນໄດ້ເປັນຢ່າງດີ ເພື່ອກຳນົດແຜນນະໂຍບາຍ, ການຕັດສິນໃຈ ແລະຂັ້ນຕອນນະໂຍບາຍການຕ່າງປະເທດທີ່ເໝາະສົມ. ຂະແໜງການທູດພ້ອມກັບບັນດາຂະແໜງການ ແລະຂັ້ນຕ່າງໆ ເສີມຂະຫຍາຍສະຕິປັນຍາ ເພື່ອປະກອບສ່ວນເຂົ້າໃນໜ້າທີ່ສະຫຼຸບສັງລວມ 40 ປີແຫ່ງການປະຕິບັດແນວທາງການຕ່າງປະເທດໃນສະໄໝແຫ່ງການປ່ຽນແປງໃໝ່ ແລະ ກະກຽມໃຫ້ແກ່ກອງປະຊຸມໃຫຍ່ຄັ້ງທີ XIV ຂອງພັກ.

ທີສອງ, ເສີມ​ຂະຫຍາຍ​ບົດບາດ​ບຸກ​ເບີກຂອງ​ການ​ຕ່າງປະ​ເທດ, ປະສານງານຢ່າງໃກ້ຊິດກັບການຕ່າງປະເທດຂອງພັກ, ການຕ່າງປະເທດຂອງປະຊາຊົນ ພ້ອມກັນກັນບັນດາຂະແໜງການແລະຂັ້ນຕ່າງໆ ​ເພື່ອ​ແນ​ໃສ່​ຮັດ​ແໜ້ນ​ສະພາບ​ການ​ການ​ຕ່າງປະ​ເທດ​ທີ່​ສະດວກ ​ເພື່ອ​ຮັກສາ​ສະພາບ​ແວດ​ລ້ອມ​ສັນຕິພາບ ແລະສະຖຽນ​ລະ​ພາບ, ປົກ​ປັກ​ຮັກສາ​ປະ​ເທດ​ຊາດຕັ້ງແຕ່ຕົ້ນ​ ຈາກ​ໄລຍະ​ໄກ, ລະດົມ​ແຫຼ່ງກຳລັງ​ໃໝ່​ຈາກ​ພາຍ​ນອກ​ໃຫ້​ແກ່​ການ​ພັດທະນາ​ເສດຖະກິດ-ສັງຄົມ ແລະປັບປຸງຍົກສູງຖານະຕຳແໜ່ງ ແລະກຽດສັກສີຂອງປະເທດ. ຈຸດສຸມແມ່ນສືບຕໍ່ພັດທະນາການພົວພັນມິດຕະພາບຢ່າງຮອບດ້ານກັບບັນດາປະເທດເພື່ອນບ້ານ; ເສີມຂະຫຍາຍ​ຂອບ​ການ​ພົວພັນ​ທີ່​ຫາ​ກໍ່​ໄດ້​ຮັບ​ການ​ປັບປຸງ​ໃນ​ປີ 2023, ປະຕິບັດ​ບັນດາ​ສັນຍາ​ຮ່ວມ​ມື​ທີ່​​ໄດ້ລົງນາມ​ຢ່າງ​ດີ, ພ້ອມກັນນັ້ນ ສືບ​ຕໍ່​ລົງ​ເລິກ​ແລະ​ເພີ່ມ​ທະວີ​ການ​ພົວພັນ​ຮ່ວມ​ມື​ກັບ​ບັນດາ​ຄູ່​ຮ່ວມ​ມືອື່ນໆ ​ເພື່ອ​ຂະຫຍາຍ​ຕະຫຼາດ, ດຶງ​ດູດ​ການ​ລົງທຶນ​ຄຸນ​ນະພາ​ບສູງ, ຖ່າຍທອດ​ເຕັກ​ໂນ​ໂລ​ຊີ​ໃໝ່, ສ້າງ​ພື້ນທີ່​ການພັດທະນາ​ໃໝ່ໃຫ້ກັບປະເທດ, ທ້ອງຖິ່ນ, ວິສາຫະກິດ ແລະປະຊາຊົນ. ຄຽງຄູ່ນັ້ນ, ເສີມຂະຫຍາຍຢ່າງແຂງແຮງຖານະບົດບາດ ແລະຕຳແໜ່ງໃໝ່ ຂອງຫວຽດນາມ ໃນບັນດາເວທີປາໄສ ແລະກົນໄກພະຫຸພາຄີທີ່ມີຄວາມສຳຄັນທາງຍຸດທະສາດ; ປະຕິບັດ​ຄວາມ​ຮັບຜິດຊອບລະດັບສາກົນ​ຢ່າງ​ດີ, ສືບ​ຕໍ່​ປະກອບສ່ວນ​ຢ່າງ​ຕັ້ງໜ້າ ​ແລະ ມີ​ຄວາມ​ຮັບຜິດຊອບ ຕໍ່​ສະຫະ​ປະຊາ​ຊາດ, ອາ​ຊຽນ, ເອເປກ ​ແລະ ອະນຸ​ພາກ​ພື້ນ​ລຸ່ມ​ນ້ຳຂອງ...; ສະ​ແດງ​ໃຫ້​ເຫັນເຖິງຫຼັກໝັ້ນການ​ຕ່າງປະ​ເທດ​ທີ່​ຕັ້ງໜ້າ ​ແລະ​ສຽງ​ທີ່​ແຂງ​ແຮງ​ກວ່າ, ສອດຄ່ອງ​ກັບ​ທ່າ​ແລະກຳລັງ​ແຮງ​ໃໝ່​ຂອງ​ປະ​ເທດ, ພິເສດແມ່ນ​ ໃນ​ບັນດາ​ບັນຫາ​​ຜົນ​ປະ​ໂຫຍ​ຫຼັກ ​ແລະ ຍຸດ​ທະ​ສາດ​ຂອງ​ຫວຽດນາມ.

ທີສາມ, ຜັນຂະຫຍາຍຢ່າງຮອບດ້ານ ແລະ ເຊື່ອມໂຍງບັນດາເສົາຫຼັກແລະສາຂາທາງການທູດຢ່າງແໜ້ນແຟ້ນ, ສົ່ງຜົນໃຫ້ການຕ່າງປະເທດແລະການທູດກາຍເປັນພະລັງຂັບເຄື່ອນທີ່ແຂງແຮງໃນຂະບວນການພັດທະນາຢ່າງໄວແລະຍືນຍົງຂອງປະເທດ. ຈັດຕັ້ງຜັນຂະຫຍາຍປະຕິບັດຢ່າງມີປະສິດທິພາບ ຄຳສັ່ງໝາຍເລກ 15-CT/TW ລົງວັນທີ 10 ສິງຫາ 2022 ຂອງຄະນະເລຂາທິການສູນກາງ ກ່ຽວກັບວຽກງານການທູດດ້ານເສດຖະກິດເພື່ອຮັບໃຊ້ການພັດທະນາປະເທດເຖິງປີ 2030. ຈຸດສຸມແມ່ນ ການສົ່ງເສີມການຂະຫຍາຍຕະຫຼາດ ແລະປັບປຸງຍົກສູງຄຸນນະພາບການສົ່ງອອກຕໍ່ໄປ, ການດຶງດູດແຫຼ່ງເງິນທຶນທີ່ກ່ຽວຂ້ອງກັບເຕັກໂນໂລຊີຂັ້ນສູງ ແລະປະສົມປະສານກັບຊັບພະຍາກອນພາຍໃນປະເທດຢ່າງມີປະສິດທິພາບ. ໃຊ້ປະໂຫຍດຈາກບັນດາສັນຍາ ແລະ FTA ທີ່ມີຜົນບັງຄັບໃຊ້; ເປັນເຈົ້າການໃນການເຂົ້າຮ່ວມການເຊື່ອມໂຍງທາງເສດຖະກິດ ແລະ ຄວາມຄິດລິເລີ່ມການເຊື່ອມໂຍງທີ່ເໝາະສົມກັບຜົນປະໂຫຍດ ແລະເງື່ອນໄຂຂອງຫວຽດນາມ. ສືບ​ຕໍ່​ຜັນຂະຫຍາຍການທູດທາງ​ວັດທະນະທຳ, ຂໍ້​ມູນ​ຂ່າວ​ສານ​ການ​ຕ່າງ​ປະ​ເທດ​, ວຽກ​ງານສຳລັບຊາວ​ຫວຽດນາມ​ຢູ່​ຕ່າງປະ​ເທດ, ການຄຸ້ມຄອງພົນລະເມືອງ ແລະ ການປົກປ້ອງ​ສິດ ແລະຜົນ​ປະ​ໂຫຍ​ດອັນ​ຊອບ​ທຳ ຖືກກົດໝາຍ ຂອງ​ບັນດາ​ອົງການ​ແລະບຸກຄົນຊາວຫວຽດນາມ ​ໃນ​ການ​ເຊື່ອມ​ໂຍງ​ເຂົ້າ​ກັບ​ສາກົນ ຢ່າງຮອບດ້ານແລະເຂັ້ມແຂງຍິ່ງຂຶ້ນ.

ທີສີ່, ສຸມໃສ່ສ້າງຄວາມກ້າວໜ້າໃໝ່ ໃນການສ້າງແລະພັດທະນາຂະແໜງການການທູດທີ່ເຂັ້ມແຂງ ຮອບດ້ານ ແລະທັນສະໄໝ. ນີ້ກໍ່ແມ່ນໜຶ່ງໃນບັນດາໜ້າທີ່ທີ່ສຳຄັນທີ່ສຸດ; ໃນນັ້ນ, ຈຸດສຸມແມ່ນການຈັດຕັ້ງປະຕິບັດບັນດາໂຄງການແລະແຜນການກ່ຽວກັບການປ່ຽນແປງໃໝ່ການຝຶກອົບຮົມ ການບຳລຸງສ້າງ ການວາງແຜນ ແລະການຈັດວາງພະນັກງານຢ່າງເໝາະສົມ; ຄ່ອຍໆປັບປຸງພື້ນຖານວັດຖຸ ກົນໄກ ແລະ ນະໂຍບາຍສະລັບວຽກງານການຕ່າງປະເທດ; ສືບຕໍ່ປ່ຽນແປງໃໝ່ແນວ​ຄິດ, ວິ​ທີ​ການ​ບໍ​ລິ​ຫານ ແລະ ແບບແຜນ​ການ​ເຮັດ​ວຽກ ​ຢ່າງ​ເປັນ​ມື​ອາ​ຊີບ, ມີປະ​ສິດ​ທິ​ຜົນ ແລະ ທັນ​ສະ​ໄໝ,... ຕະຫຼອດພາລະກິດເຫຼົ່ານັ້ນແມ່ນ ການກໍ່ສ້າງແລະພັດທະນາຖັນແຖວພະນັກງານການທູດ ທີ່​ມີ​ຄວາມ​ຈົງ​ຮັກ​ພັກດີ, ອຸທິດ​ຕົນ​ເພື່ອ​ຮັບ​ໃຊ້​ພັກ ປະ​ເທດ​ຊາດ ​ແລະ ປະຊາຊົນ, ມີ​​ຄຸນ​ນະພາ​ບທີ່ໜ້າເຊື່ອຖື, ອ່ອນ​ໄຫວຕໍ່​ຍຸກ​ສະ​ໄໝ, ​ເລິກ​ເຊິ່ງໃນຍຸດທະສາດ, ມີ​ຫົວຄິດ​ປະດິດ​ສ້າງ​ໃນຍຸດໂທບາຍ, ມີຄວາມຊ່ຽວຊານດ້ານວິຊາຊີບ ວິຊາສະເພາະ ພາສາ​ຕ່າງປະ​ເທດ ​ແລະ ຮູບແບບຄວາມເປັນມືອາຊີບ ​ເພື່ອ​ຕອບ​ສະໜອງ​ຄວາມ​​ຕ້ອງການ ​ແລະໜ້າທີ່​ການ​ຕ່າງປະ​ເທດ​ໃນ​ໄລຍະການ​ພັດທະນາ​ໃໝ່ ​ຂອງ​ຂະ​ແໜງ​ການ​ການ​ທູດ​ໂດຍ​ສະ​ເພາະ ​ແລະ​ປະ​ເທດໂດຍລວມ./.

--------------------------------------------

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1031 (ເດືອນກຸມພາ 2024)