ກອງ​ທັບ​ປະ​ຊາ​ຊົນ​ຫວຽດ​ນາມເສີມຂະຫຍາຍ​ຄຸນສົມບັດ​ຂອງ
“ທະ​ຫານ​ລຸງ​ໂຮ່” ໃນ​ການ​ກໍ່​ສ້າງແລະປົກ​ປັກ​ຮັກ​ສາ​ປະ​ເທດ​ຊາດ

ໂດຍ ປອ. ຟານວັນຢາງ
ພົນເອກ, ກຳມະການກົມການເມືອງ, ຮອງເລຂາທິການຄະນະພັກການທະຫານສູນກາງ, ລັດຖະມັນຕີກະຊວງປ້ອງກັນປະເທດ
01:36, 13-06-2024

ວກ - ຄຸນສົມບັດ​ຂອງ “ທະ​ຫານ​ລຸງ​ໂຮ່” ແມ່ນຄຸນຄ່າວັດທະນະທຳທາງການທະຫານທີ່ດີເດັ່ນ ເຊິ່ງໄດ້ຮັບການເພີ່ມພູນຄູນສ້າງຂຶ້ນຈາກມູນເຊື້ອຄວາມຮັກຊາດຂອງຊາດເຮົາ, ຈາກການອົບຮົມສຶກສາ ຝຶກຝົນຫຼໍ່ຫຼອມ ຂອງພັກກອມມູນິດຫວຽດນາມ ແລະປະທານໂຮ່ຈີມິນ, ຈາກຄວາມໄວ້ວາງໃຈ ແລະຄວາມຊ່ວຍເຫຼືອຂອງປະຊາຊົນ ແລະ ຈາກການອຸທິດຕົນ ແລະຄວາມເສຍສະຫຼະ ຂອງນາຍທະຫານແລະທະຫານລຸ້ນຕໍ່ລຸ້ນ. ຄຸນຄ່ານັ້ນໄດ້ຮັບການອະນຸລັກ ສືບທອດ ແລະພັດທະນາ ຜ່ານການຕໍ່ສູ້ປະຕິວັດ, ໃນພາລະກິດການສ້າງສາ ແລະປົກປັກຮັກສາປະເທດຊາດ. ການເສີມຂະຫຍາຍຄຸນສົມບັດຂອງ “ທະຫານລຸງໂຮ່” ໃນການສ້າງສາ ແລະປົກປັກຮັກສາປະເທດຊາດ ແມ່ນຄວາມຮຽກຮ້ອງຕ້ອງການພາວະວິໄສ ທັງແມ່ນຄວາມຮັກແລະຄວາມຮັບຜິດຊອບ ຂອງພະນັກງານ ນາຍທະຫານ ແລະທະຫານທຸກຄົນ.

 

ໃນເກືອບ 80 ປີທີ່ຜ່ານມາ, ພາຍໃຕ້ການນຳພາເດັດຂາດ ໂດຍກົງໃນທຸກດ້ານ ຂອງ ພັກກອມມູນິດຫວຽດນາມ, ການນຳພາລວມສູນ ເປັນເອກະພາບຂອງລັດ, ການປະສານງານຢ່າງແໜ້ນແຟ້ນ ມີປະສິດທິພາບ ຂອງບັນດາຄະນະ ຂະແໜງການ ຢູ່ສູນກາງແລະທ້ອງຖິ່ນ, ຄວາມຮັກແພງແລະການຊ່ວຍເຫຼືອຂອງປະຊາຊົນ, ກອງທັບປະຊາຊົນຫວຽດນາມຍາມໃດກໍ່ຮັກສາທາດແທ້ປະຕິວັດ ແລະເຕີບໃຫຍ່ເຂັ້ມແຂງຢ່າງຕໍ່ເນື່ອງ, ທັງຕໍ່ສູ້ສູ້ຮົບ ທັງເຕີບໂຕຂຶ້ນ ແລະ ໄດ້ຮັບໄຊຊະນະຢ່າງສະຫງ່າງາມ. ພາຍໃຕ້ເງື່ອນໄຂ ແລະສະຖານະການໃດໆ, ເຖິງວ່າຈະຕ້ອງທົນກັບຄວາມຫຍຸ້ງຍາກລຳບາກ ແລະ ການເສຍສະຫຼະຫຼາຍຢ່າງ, ຕ້ອງປະເຊີນກັບແຜນການ ແລະ ກົນອຸບາຍ ທີ່ເລິກແລບແນບນຽນຂອງສັດຕູກໍ່ຕາມ ແຕ່ກອງທັບ​ປະຊາຊົນ​ຫວຽດນາມຍັງຄົງຈົງຮັກພັກດີ ແລະ​ເຊື່ອ​ໝັ້ນ​ຕໍ່ການ​ນໍາ​ພາ​ຂອງ​ພັກ​, ເສີມຂະຫຍາຍມູນເຊື້ອຮັກຊາດ, ລັດທິວິລະຊົນປະຕິວັດ, ມີລະບຽບວິໄນທີ່ເຂັ້ມງວດ, ຍາມໃດກໍ່ເປັນເຈົ້າການ ປະດິດສ້າງ ສະຫຼາດ ກ້າຫານ, ຕັດສິນໃຈຕໍ່ສູ້ສູ້ຮົບ ຍາດເອົາໄຊຊະນະ, ພົວພັນໃກ້ຊິດສະໜິດແໜ້ນກັບປະຊາຊົນ. ພະນັກງານ ນັກຮົບຫຼາຍລຸ້ນໄດ້ຮັບໄຊຊະນະອັນສະຫງ່າລາສີ, ສະແດງໃຫ້ເຫັນປະຫວັດສາດແຫ່ງການສ້າງສາ ແລະປົກປັກຮັກສາປະເທດຊາດ, ສ້າງຮີດຄອງປະເພນີອັນສະຫງ່າລາສີ, ສົມຄວນໄດ້ຮັບການຍົກຍ້ອງຈາກປະທານ ໂຮ່ຈີມິນ ວ່າ: “ກອງທັບຂອງພວກເຮົາມີຄວາມຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ພ້ອມ​ແລ້ວ​ທີ່​ຈະ​ຕໍ່ສູ້ ​ແລະ ​ເສຍສະຫຼະ​ເພື່ອ​ເອກະລາດ ແລະ​ ເສລີພາບ​ຂອງ​ປະ​ເທດ​ຊາດ​ເພື່ອ​ສັງຄົມ​ນິຍົມ. ໜ້າທີ່​ວຽກ​ງານໃດໆກໍ່ເຮັດສຳເລັດ, ​ຄວາມ​ຫຍຸ້ງ​ຍາກໃດໆກໍ່​ຜ່ານ​ຜ່າແກ້ໄຂໄດ້ ແລະ ເອົາຊະນະສັດ​ຕູ​ທຸກໂຕ​”(1); ສົມຄວນ​ໄດ້​ຮັບ​ນາມມະຍົດອັນສູງສົ່ງ “​ທະຫານ​ລຸງ​ໂຮ່” ທີ່​ປະຊາຊົນ​​ຍ້ອງຍໍ​ຊົມ​ເຊີຍ, ສົມຄວນເປັນ​ກອງທັບ​ວິລະ​ຊົນ​ແຫ່ງ​ຊາດຫວຽດນາມຜູ້ກ້າຫານ.

ເພື່ອເສີມຂະຫຍາຍຄຸນສົມບັດຂອງ “ທະຫານລຸງໂຮ່” ໃນການກໍ່ສ້າງແລະປົກປັກຮັກສາປະເທດຊາດຫວຽດນາມສັງຄົມນິຍົມ, ກອງທັບສືບຕໍ່ປະຕິບັດໜ້າທີ່ຂອງຕົນເປັນຢ່າງດີຄື: “ກອງທັບສູ້ຮົບ, ກອງທັບເຮັດວຽກ, ກອງທັບອອກແຮງງານທຳການຜະລິດ” ເຊິ່ງເປັນກຳລັງຫຼັກແຫຼ່ງທີ່ຮ່ວມກັບທົ່ວປວງຊົນໃນການ ຮັກສາເອກະລາດ ອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນ; ປົກ​ປັກ​ຮັກ​ສາ​ພັກ, ລັດ, ປະ​ຊາ​ຊົນ, ບັນ​ດາ​ຜົນ​ງານ​ການ​ປະ​ຕິ​ວັດ ແລະ ລະບອບ​ສັງ​ຄົມ​ນິ​ຍົມ, ຮັກ​ສາ​ສະ​ພາບ​ແວດ​ລ້ອມທີ່ສະຫງົບສຸກແລະໝັ້ນຄົງ​ເພື່ອການ​ພັດ​ທະ​ນາ​ປະ​ເທດ​. ກອງທັບ​ຍາມ​ໃດ​ກໍ່​ເຊີດ​ຊູ​ສະຕິລະວັງຕົວປະຕິວັດ ແລະຕໍ່ສູ້ຢ່າງແຂງຂັນ ເພື່ອ​ເອົາ​ຊະນະ​ກົນອຸບາຍ ​ແລະ ການ​ກະທຳ​ກໍ່​ການ​ຮ້າຍ​ ຂອງອິດທິ​ກຳລັງ​ສັດຕູ. ປະຕິບັດ​ບັນດາ​ໂຄງການ​ພັດທະນາ​ເສດຖະກິດ-ສັງຄົມ​ ຢ່າງ​ມີ​ຫົວຄິດ​ປະດິດ​ສ້າງ, ສ້າງ​ເຂດ​ເສດຖະກິດ-ການປ້ອງ​ກັນຊາ​ດ ​ແລະ ບັນດາ​ໂຄງການ​ທີ່​ມີ​ຄວາມ​ໝາຍ​ຍຸດ​ທະ​ສາດ​ຂອງ​ປະ​ເທດ. ການເຂົ້າຮ່ວມຢ່າງຕັ້ງໜ້າ ໃນຂະບວນການຕອບແທນບຸນຄູນ ຄວາມກະຕັນຍູ, ການລົບລ້າງຄວາມອຶດຫີວ ແລະຫຼຸດຜ່ອນຄວາມທຸກຍາກ, ການສ້າງຊົນນະບົດໃໝ່, ການສ້າງພື້ນທີ່ປອດໄພ, ການສ້າງລະບົບການເມືອງ ແລະຊີວິດທາງວັດທະນະທຳຢູ່ຮາກຖານ, ໂດຍສະເພາະໃນພື້ນທີ່ທີ່ສຳຄັນ ໃນເຂດຫ່າງໄກສອກຫຼີກ, ໃນເຂດຊົນເຜົ່າສ່ວນໜ້ອຍ ເຂດຊາຍແດນ ແລະໝູ່ເກາະ. ຜ່ານນັ້ນ, ປະກອບສ່ວນສຳຄັນ ເຂົ້າໃນພາລະກິດການປັບປຸງ ແລະເພີ່ມທະວີກຸ່ມກ້ອນມະຫາສາມັກຄີປວງຊົນທັງຊາດ, ເພີ່ມທະວີ “ທ່າສະໜາມຮົບໃນໃຈປະຊາຊົນ”, ສ້າງກຳລັງແຮງບົ່ມຊ້ອນ ແລະທ່າສະໜາມປ້ອງກັນປະເທດທົ່ວປວງຊົນ. ກອງທັບຍາມໃດກໍ່ແມ່ນກຳລັງຫຼັກແຫຼ່ງ, ເປັນກອງປະຈັນບານໃນການປ້ອງກັນ ແລະ ຄວບຄຸມໄພພິບັດທຳມະຊາດ, ການຄົ້ນຫາແລະກູ້ໄພກູ້ຊີບ, ການຈັດການກັບຜົນທີ່ຕາມມາຂອງສົງຄາມ ແລະ ປະຕິບັດນະໂຍບາຍແນວຫຼັງທາງທະຫານຢ່າງດີ; ພ້ອມ​ກັນ​ນັ້ນ, ປະຕິບັດ​ວຽກ​ງານ​ເຊື່ອມ​ໂຍງ​ເຂົ້າ​ກັບ​ສາກົນ ​ແລະ ການ​ທູດດ້ານການ​ປ້ອງ​ກັນ​ປະ​ເທດຢ່າງດີ, ຕັ້ງໜ້າ​ເຂົ້າ​ຮ່ວມກອງ​ກຳລັງ​ຮັກສາ​ສັນຕິພາບ​ຂອງ​ສະຫະ​ປະຊາ​ຊາດ, ປະກອບສ່ວນ​ຍົກ​ສູງ​ທີ່​ຕັ້ງ ​ແລະ ກຽດ​ສັກ​ສີ​ຂອງ​ຫວຽດນາມ ​ໃນ​ເວທີ​ສາກົນ.

ໃນປີຕໍ່ໄປ, ຄາດການວ່າສະຖານະການໂລກແລະພາກພື້ນຈະຍັງມີຄວາມຜັນຜວນ ແລະປ່ຽນແປງທີ່ໄວວາ ສັບສົນ ແລະບໍ່ອາດຈະຄາດການໄດ້. ສັນຕິພາບ ການຮ່ວມມື ແລະ ການພັດທະນາຍັງແມ່ນທ່າອ່ຽງທີ່ສຳຄັນ, ແຕ່ກໍ່ປະເຊີນກັບອຸປະສັກ ແລະຄວາມຫຍຸ້ງຍາກຫຼາຍປະການ. ທັດສະນີຍະພາບໂລກຫຼາຍຂົ້ວ ແລະຫຼາຍສູນກາງ ມີຄວາມຊັດເຈນຫຼາຍຂຶ້ນ, ການແຂ່ງຂັນທາງຍຸດທະສາດ ລະຫວ່າງບັນດາປະເທດໃຫຍ່ ນັບມື້ນັບຮຸນແຮງຂຶ້ນ, ແມ້ກະທັ້ງນຳໄປສູ່ການປະທະກັນ. ບັນດາປະເທດໃຫຍ່ເພີ່ມທະວີການປັບປ່ຽນຍຸດທະສາດ, ແກ່ດຶງແລະເຕົ້າໂຮມກຳລັງ, ທັງການຮ່ວມມື ປະນີປະນອມ, ທັງຕໍ່ສູ້ ຄຸມກັນເຊິ່ງກັນແລະກັນ, ການແຊກແຊງວຽກງານພາຍໃນຂອງປະເທດອື່ນ, ກໍ່ໃຫ້ເກີດຄວາມທ້າທາຍທີ່ຍິ່ງໃຫຍ່ ສຳລັບປະເທດກຳລັງພັດທະນາ, ໂດຍສະເພາະ ປະເທດຂະໜາດກາງແລະຂະໜາດນ້ອຍ. ບັນດາຈຸດ “ຮ້ອນ” ດ້ານຄວາມໝັ້ນຄົງມີທ່າອ່ຽງພີ່ມຂຶ້ນ ແລະຄວາມສ່ຽງກໍ່ແຜ່ກະຈາຍ; ຮູບ​ແບບສົງຄາມ​ໃໝ່, ປະ​ເພດ​ການ​ສູ້​ຮົບ, ພື້ນທີ່​ຍຸດ​ທະ​ສາດ ແລະ​ ວິ​ທີ​ການເຮັດສົງຄາມໃໝ່ ​ປະກົດ​ຂຶ້ນ. ບັນດາບັນຫາລະດັບໂລກເຊັ່ນ ການປົກປ້ອງສັນຕິພາບ, ຄວາມໝັ້ນຄົງຂອງມະນຸດ, ໄພພິບັດທາງທຳມະຊາດ, ພະຍາດລະບາດ, ຄວາມໝັ້ນຄົງທາງສັງຄົມ ແລະ ຄວາມໝັ້ນຄົງທີ່ບໍ່ເປັນແບບດັ້ງເດີມ ໂດຍສະເພາະ ຄວາມໝັ້ນຄົງທາງໄຊເບີຮ໌, ການປ່ຽນແປງສະພາບພູມອາກາດ, ມົນລະພິດສິ່ງແວດລ້ອມ,... ຍັງຄົງຜັນປ່ຽນຢ່າງສັບສົນ. ຂໍ້ພິພາດກ່ຽວກັບອະທິປະໄຕໃນດິນແດນ, ອະທິປະໄຕທາງທະເລແລະເກາະ ກຳລັງທະວີຄວາມເຄັ່ງຕຶງ ສັບສົນ ແລະຮຸນແຮງຫຼາຍຂຶ້ນ ໂດຍມີຄວາມສ່ຽງຫຼາຍປະການທີ່ຈະເກີດຄວາມຂັດແຍ້ງ ເຊິ່ງສົ່ງຜົນກະທົບຕໍ່ຄວາມໝັ້ນຄົງ ແລະຄວາມປອດໄພທາງທະເລແລະກາບິນ.

ໃນປະເທດ, ພາລະກິດການປ່ຽນແປງໃໝ່ ການກໍ່ສ້າງແລະປົກປັກຮັກສາປະເທດຊາດ, ຄຽງຄູ່ກັບບັນດາຜົນສຳເລັດສຳຄັນທີ່ບັນລຸໄດ້ນັ້ນ, ຍັງມີຂໍ້ຈຳກັດແລະຈຸດອ່ອນຫຼວງຫຼາຍ ແລະ ບັນຫາທີ່ສັບສົນໃໝ່ໆ ກໍ່ປາກົດຂຶ້ນ. ຄວາມສ່ຽງສີ່ປະການທີ່ພັກຊີ້ໃຫ້ເຫັນນັ້ນ ຍັງຄົງມີຢູ່ ແລະ ກຳລັງສັບສົນແລະຮຸນແຮງຫຼາຍຂຶ້ນ. ໃນທະເລຕາເວັນອອກ, ທະເລຕາເວັນຕົກສຽງໃຕ້, ພື້ນທີ່ຍຸດທະສາດແລະພື້ນທີ່ສຳຄັນບາງແຫ່ງ ຍັງຄົງມີປັດໄຈທີ່ອາດຈະກໍ່ໃຫ້ເກີດຄວາມບໍ່ໝັ້ນຄົງ; ຂໍ້ພິພາດອະທິປະໄຕໃນທະເລແລະເກາະ, ສົງຄາມຂໍ້ມູນ ແລະ ສົງຄາມໄຊເບີຮ໌ ກຳລັງເພີ່ມສູງຂຶ້ນ; ການຈັດການຄວາມສຳພັນລະຫວ່າງປະເທດ ໂດຍສະເພາະ ການພົວພັນກັບປະເທດໃຫຍ່ໆ ຕ້ອງປະເຊີນກັບຄວາມຫຍຸ້ງຍາກແລະສິ່ງທ້າທາຍຫຼາຍຢ່າງ. ບັນດາອິດທິກຳລັງສັດຕູ ປະຕິການ ສວຍໂອກາດທາງການເມືອງ ທັງໃນແລະຕ່າງປະເທດ ກຳລັງຄົບຄິດກັນ ເພື່ອເພີ່ມການ​ກໍ່​ການ​ຮ້າຍ ການທຳລາຍມ້າງເພ​ໂດຍ​ກົງ​ແລະເປີດເຜີຍ ດ້ວຍແຜນການແລະກົນອຸບາຍທີ່ສັບສົນ. ໜ້າທີ່ການສ້າງກອງທັບ, ການປັບປຸງການປ້ອງກັນປະເທດ ແລະປົກປັກຮັກສາປະເທດຊາດ ມີການເພີ່ມເຕີມ ພັດທະນາ ແລະ ຫຍຸ້ງຍາກສັບສົນຫຼາຍກວ່າເກົ່າ; ອັດ​ຕາ​ສ່ວນ​ພະນັກງານທະຫານ​ທີ່​ໄດ້​ຮັບ​ການ​ຝຶກ​ອົບ​ຮົມ​ຜ່ານ​ການ​​ຮົບກຳລັງ​ຫຼຸດ​ລົງ.

ໃນສະພາບການນັ້ນ, ພາລະກິດການກໍ່ສ້າງ ແລະປົກປັກຮັກສາປະເທດຊາດຂອງທົ່ວພັກ, ທົ່ວປວງຊົນ ແລະ ກອງທັບທັງໝົດ ມີການພັດທະນາ ແລະສ້າງຄວາມຕ້ອງການໃໝ່ທີ່ສູງຫຼາຍ ໂດຍມີການແຊກຊ້ອນກັນລະຫວ່າງໂອກາດ, ຄວາມສະດວກ ແລະ ຄວາມຫຍຸ້ງຍາກສິ່ງທ້າທາຍ. ກອງທັບຍາມໃດກໍ່ຮັບຮູ້ຢ່າງເລິກເຊິ່ງ ກ່ຽວກັບບົດບາດຫຼັກແຫຼ່ງ ຂອງຕົນໃນການປະຕິບັດວຽກງານປ້ອງກັນຊາດ - ປ້ອງກັນຄວາມສະຫງົບ ແລະ ຖືເປັນວຽກງານ “ສຳຄັນ ແລະ ເປັນປະຈຳ”; ພ້ອມ​ກັນ​ນັ້ນ, ໄດ້​ຮັບ​ຮູ້​ຢ່າງ​ຈະ​ແຈ້ງເຖິງ​ຄວາມ​ຮັບຜິດຊອບ​ທາງການ​ເມືອງ ແລະໜ້າທີ່ທີ່ໄດ້ຮັບມອບໝາຍຈາກ​ພັກ, ລັດ ​ແລະ ປະຊາຊົນ. ບົນພື້ນຖານການຊາບຊຶມ ແລະຄວາມເຂົ້າໃຈແຈ້ງ ມະຕິກອງປະຊຸມສູນກາງພັກຄັ້ງທີ 8 ສະໄໝທີ XIII ກ່ຽວກັບ “ຍຸດທະສາດການປົກປັກຮັກສາປະເທດຊາດໃນສະພາບການໃໝ່”, ​ເພື່ອ​ສຳ​ເລັດ​ໜ້າ​ທີ່​ໃນ​ພາລະກິດ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ, ທົ່ວ​ກອງທັບ​ຕ້ອງ​ມານະ​ພະຍາຍາມ ​ແລະ ສືບ​ຕໍ່​ຍົກ​ສູງ​ຄຸນ​ສົມບັດຂອງ “​ທະຫານ​ລຸງ​ໂຮ່” ​ໂດຍ​ສຸມ​ໃສ່​ປະຕິບັດບັນດາ​ເນື້ອໃນພື້ນຖານໃຫ້ດີ​ຄື:

ທີໜຶ່ງ, ສືບ​ຕໍ່​ປະຕິບັດ​ໜ້າ​ທີ່​ເປັນ​ຢ່າງ​ດີ​ ໃນ​ການ​ຄົ້ນຄວ້າ ​ແລະໃຫ້ຄຳປຶກສາແກ່​ພັກ ​ແລະລັດ​ ກ່ຽວ​ກັບ​ການ​ທະຫານ, ການປ້ອງ​ກັນ​ປະ​ເທດ ແລະການປົກ​ປັກ​ຮັກສາ​ປະ​ເທດ​ຊາດ​ສັງຄົມ​ນິຍົມຢ່າງ​ໝັ້ນຄົງ, ສ້າງ​ສະພາບ​ແວດ​ລ້ອມ​​ສັນຕິພາບ ​ແລະ ສະຖຽນ​ລະ​ພາບ ສຳລັບການກໍ່ສ້າງ ​ແລະ ພັດທະນາປະເທດ.

ນີ້ແມ່ນໜ້າທີ່ສຳຄັນອັນດັບໜຶ່ງຂອງກອງທັບ ເຊິ່ງເລີ່ມຈາກແລະຍຶດຖືຕາມທັດສະນະແລະຫຼັກການຊີ້ນຳຂອງພັກ ກ່ຽວກັບການປົກປັກຮັກສາປະເທດ “ຕັ້ງແຕ່ຕົ້ນ, ຈາກໄລຍະໄກ”, “ຮັກສາປະເທດກ່ອນທີ່ຈະຕົກຢູ່ໃນອັນຕະລາຍ”. ເພື່ອປະຕິບັດໜ້າທີ່ໃຫ້ດີ, ໃນເວລາຈະມາເຖິງນີ້, ກອງທັບຕ້ອງເປັນເຈົ້າການໃນການປະເມີນ ແລະຄາດການສະຖານະການໂລກ, ພາກພື້ນ ແລະ ພາຍໃນປະເທດຢ່າງແມ່ນຢຳ ແລະໃຫ້ຄຳແນະນຳແກ່ພັກແລະລັດໂດຍທັນທີ ໃນການກຳນົດນະໂຍບາຍ ແລະຂັ້ນຕອນປະຕິບັດ ເພື່ອຈັດການກັບສະຖານະການຢ່າງປະສົບຄວາມສຳເລັດ, ບໍ່​ໃຫ້ຕົກໃນທ່າຮັບ ຖືກເຫດບັງເອີນ​, ບໍ່ປ່ອຍໃຫ້ຄວາມຂັດແຍ້ງແລະຂໍ້ພິພາດພັດທະນາໄປສູ່ການປະທະກັນດ້ວຍອາວຸດ ຫຼືສົງຄາມ. ເອົາໃຈໃສ່ການຄົ້ນຄວ້າ, ສະເໜີ ແລະ ຈັດຕັ້ງປະຕິບັດຢ່າງມີປະສິດທິພາບ ຕາມແຜນນະໂຍບາຍ ແລະວິທີແກ້ໄຂທີ່ກວມລວມ ພື້ນຖານ ແລະຍາວນານ ເພື່ອ​ປ້ອງ​ກັນ​ຄວາມ​ສ່ຽງ​ຂອງ​ສົງຄາມ ແລະການ​ປະ​ທະ​ກັນ “ຕັ້ງແຕ່ຕົ້ນ, ຈາກໄລຍະ​ໄກ”, “ຮັກສາປະເທດກ່ອນທີ່ຈະຕົກຢູ່ໃນອັນຕະລາຍ”; ປະຕິບັດ​ນະ​ໂຍບາຍການຕ່າງປະເທດ​ຢ່າງສະເໝີຕົ້ນສະເໝີປາຍ ຄື: ບໍ່​ເຂົ້າ​ຮ່ວມ​ພັນທະ​ມິດ​​ທາງ​ທະຫານ, ບໍ່ຮ່ວມມືກັບ​ປະ​ເທດ​ໜຶ່ງ​ເພື່ອ​ຕໍ່ສູ້​​ກັບ​ປະ​ເທດ​ອື່ນ, ບໍ່ອະນຸຍາດ​ໃຫ້​ຕ່າງປະ​ເທດ​ຕັ້ງ​ຖານ​ທັບ ​ຫຼືໃຊ້​ດິນ​ແດນ​ຫວຽດນາມ ຕໍ່​ສູ້​ກັບ​ປະ​ເທດ​ອື່ນ, ບໍ່​ໃຊ້ກຳລັງ ຫຼືຂູ່ວ່າຈະໃຊ້ກຳລັງ ໃນການພົວພັນສາກົນ(2); ຕໍ່ສູ້ຢ່າງເດັດດ່ຽວແລະຕໍ່ເນື່ອງ ເພື່ອແກ້ໄຂຂໍ້ພິພາດ ແລະຂໍ້ຂັດແຍ້ງທັງໝົດ ດ້ວຍສັນຕິວິທີ ບົນພື້ນຖານຂອງກົດໝາຍ ແລະແນວປະຕິບັດສາກົນ.

ພ້ອມກັນນັ້ນ, ກອງທັບຍັງຈຳເປັນຕ້ອງຕັ້ງໜ້າ ແລະເປັນເຈົ້າການ ໃນການພັດທະນາແຜນແລະແຜນການຕໍ່ສູ້, ປັບປຸງຍົກສູງລະດັບແລະຄວາມພ້ອມຮົບ, “ປົກປ້ອງເອກະລາດ ອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ, ປົກ​ປັກ​ຮັກສາ​ພັກ, ລັດ, ປະຊາຊົນ, ລະບອບ​ສັງຄົມ​ນິຍົມ, ວັດທະນະທຳ ​ແລະ ຜົນ​ປະ​ໂຫຍ​ດຂອງ​ຊາດ-ປະເທດຊາດ”(3). ປັບປຸງຍົກສູງຄວາມສາມາດໃນການຮົບໃນສົງຄາມໄຊເບີຮ໌ ແລະສົງຄາມຂໍ້ມູນ; ປະສານງານການແກ້ໄຂໂດຍລວມ ເພື່ອຮັບປະກັນຄວາມໝັ້ນຄົງ ແລະຄວາມປອດໄພຂອງຂໍ້ມູນ. ເອົາໃຈໃສ່ເປັນພິເສດເຖິງການເພີ່ມເຕີມ ແລະ ປັບປຸງບູລະນະກົນໄກ ແລະຂໍ້ກຳນົດກົດລະບຽບ, ໂດຍສະເພາະ ການປະສານງານຢ່າງໃກ້ຊິດ ລະຫວ່າງກະຊວງປ້ອງກັນປະເທດ ກັບກະຊວງປ້ອງກັນຄວາມສະຫງົບ, ກັບບັນດາຄະນະ ຂະແໜງການ ອົງການຈັດຕັ້ງ ຢູ່ສູນກາງແລະທ້ອງຖິ່ນ ໃນການຈັດການ​ຄຸ້ມ​ຄອງ​ສະ​ຖາ​ນະ​ການ​ປົກ​ປັກ​ຮັກ​ສາ​ປະ​ເທດຊາດ​. ພ້ອມທີ່ຈະຕອບສະໜອງຢ່າງມີປະສິດທິພາບ ຕໍ່ຄວາມທ້າທາຍດ້ານຄວາມປອດໄພແບບດັ້ງເດີມ ແລະບໍ່ເປັນແບບດັ້ງເດີມ; ປ້ອງກັນ ຕໍ່ສູ້ ແລະ ແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ ແລະພະຍາດລະບາດ ແລະ ເຮັດວຽກງານກູ້ໄພກູ້ຊີບ ໃຫ້ໄດ້ເປັນຢ່າງດີ. ​ປົກ​ປັກ​ຮັກສາ​ຄວາມສະຫງົບ ​ແລະ ຄວາມ​ປອດ​ໄພ​ຂອງ​ບັນດາ​ເປົ້າ​ໝາຍ​ສຳຄັນ, ​ໂຄງການ, ການ​ເຄື່ອນ​ໄຫວ​ຂອງ​ການ​ນຳ​ພັກ ​ແລະ ລັດ, ບັນດາ​ເຫດການ​ການ​ເມືອງ, ວັດທະນະທຳ ​ແລະ ການ​ຕ່າງປະ​ເທດ​ຂອງ​ປະ​ເທດ. ປົກປ້ອງຄວາມໝັ້ນຄົງ ແລະຄວາມປອດໄພຂອງເປົ້າໝາຍ ໂຄງການ ກິດຈະການທີ່ສຳຄັນ, ປົກປ້ອງກິດຈະກຳຂອງພັກແລະລັດ, ກິດຈະກຳທາງການເມືອງ ວັດທະນະທຳ ແລະການຕ່າງປະເທດທີ່ສຳຄັນ ຂອງປະເທດ. ຍູ້ແຮງວຽກງານຄົ້ນຄວ້າ, ສະຫຼຸບສັງລວມພຶດຕິກຳ, ເພີ່ມເຕີມ ແລະ ພັດທະນາລະບົບທິດສະດີການປ້ອງກັນປະເທດ, ສິລະປະສົງຄາມປະຊາຊົນ ແລະສິລະປະການທະຫານຫວຽດນາມ ໃນເງື່ອນໄຂໃໝ່ ຂອງພາລະກິດການສ້າງສາ ແລະປົກປັກຮັກສາປະເທດຊາດ.

ຄວາມຮັກແພງກອງທັບແລະປະຊາຊົນ (ຜູ້ຂຽນ: ເຈືອງແມ້ງຮຸ່ງ) _ແຫຼ່ງທີ່ມາ: nhiepanhdoisong.vn

ທີສອງ, ເສີມຂະຫຍາຍເປັນຢ່າງດີ ບົດບາດຫຼັກໃນການສ້າງການປ້ອງກັນປະເທດທົ່ວປວງຊົນ, ທ່າສະໜາມຮົບປ້ອງກັນປະເທດທົ່ວປວງຊົນ ຕິດພັນກັບການກໍ່ສ້າງທ່າສະໜາມຮົບປ້ອງກັນຄວາມສະຫງົບປະຊາຊົນ, ຕອບສະໜອງຄວາມຕ້ອງການແລະໜ້າທີ່ ການສ້າງສາ ແລະປົກປັກຮັກສາປະເທດຊາດ ໃນສະພາບການໃໝ່.

ການສ້າງສາແລະປົກປັກຮັກສາປະເທດຊາດແມ່ນພາລະກິດຂອງທົ່ວພັກ, ທົ່ວປວງຊົນ ແລະ ກອງທັບທັງໝົດ, ໃນນັ້ນ ກອງທັບປະຊາຊົນ ແລະກອງປ້ອງກັນຄວາມສະຫງົບປະຊາຊົນ ມີບົດບາດຫຼັກ. ​ເພື່ອ​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ຂອງ​ວຽກ​ງານ​ກໍ່ສ້າງ​ແລະ ປົກ​ປັກ​ຮັກສາ​ປະ​ເທດ​ຊາດ​ ໃນ​ສະພາບ​ການ​ໃໝ່, ຈຳເປັນຕ້ອງ​ສ້າງການ​ປ້ອງ​ກັນ​ປະ​ເທດທີ່ເຂັ້ມ​ແຂງຂອງປະຊາຊົນທົ່ວປະເທດ. ນັ້ນແມ່ນພື້ນຖາການປ້ອງກັນປະເທດທີ່ມີຄວາມສາມາດບົ່ມຊ້ອນ ແລະກຳລັງແຮງສັງລວມ ເຊິ່ງສ້າງຂຶ້ນບົນພື້ນຖານຂອງຊັບພະຍາກອນຂອງຊາດ ແລະ ລະຫວ່າງປະຊາຊົນ ຈາກປະຊາຊົນ ໂດຍມີທາດແທ້ສັນຕິພາບແລະປ້ອງກັນຕົນເອງ, ບໍ່​ມີ​ເຈດຕະນາ​ທີ່​ຈະ​ຂົ່ມ​ຂູ່​ປະ​ເທດ​ໃດ​ໆ​. ພ້ອມກັນນັ້ນ ກໍ່ແມ່ນການປ້ອງກັນປະເທດທົ່ວປວງຊົນ ທີ່ຮອບດ້ານ ເປັນເອກະລາດ ເປັນເຈົ້າຕົນເອງ, ອີງໃສ່ຕົນເອງສ້າງຄວາມເຂັ້ມແຂງດ້ວຍຕົນເອງ, ນັບມື້ນັບທັນສະໄໝ, ສ້າງຂຶ້ນໂດຍປະຊາຊົນທັງໝົດ, ພາຍໃຕ້ການນຳພາໂດຍກົງ ເດັດຂາດ ໃນທຸກດ້ານຂອງພັກ, ການຄຸ້ມຄອງເປັນເອກະພາບ ລວມສູນຂອງລັດ ຕັ້ງແຕ່ສູນກາງຈົນເຖິງທ້ອງຖິ່ນ ຮາກຖານ.

ເພື່ອສ້າງພື້ນຖານການປ້ອງກັນປະເທດທົ່ວປວງຊົນທີ່ເຂັ້ມແຂງຮອບດ້ານ, ກອງທັບສືບຕໍ່ສົມທົບຢ່າງແໜ້ນແຟ້ນກັບບັນດາຄະນະ, ຂະແໜງການ, ອົງການຈັດຕັ້ງຢູ່ສູນກາງແລະທ້ອງຖິ່ນ ໃນການຜັນຂະຫຍາຍວິທີແກ້ໄຂທີ່ເໝາະສົມກັບຄວາມເປັນຈິງ ແລະ ຄຸນລັກສະນະແລະຈຸດແຂງ ຂອງແຕ່ລະສະຖານທີ່ ແລະພາກພື້ນ, ໂດຍສະເພາະແມ່ນ ບັນດາພື້ນທີ່ຍຸດທະສາດຄື ເຂດພູພຽງພາກກາງ, ເຂດຕາເວັນຕົກສຽງເໜືອ, ເຂດຕາເວັນຕົກສຽງໃຕ້ພາກໃຕ້ ແລະ ເຂດຊາຍແດນ ທະເລ ແລະໝູ່ເກາະຂອງປະເທດ. ໃນນັ້ນ, ຈຸດສຸມແມ່ນການສ້າງທ່າສະໜາມຮົບການປ້ອງກັນປະເທດທົ່ວປວງຊົນ ຕິດພັນກັບການກໍ່ສ້າງທ່າສະໜາມຮົບການປ້ອງກັນຄວາມໝັ້ນຄົງປະຊາຊົນ, ພິເສດແມ່ນ ຕິດພັນກັບການກໍ່ສ້າງ “ທ່າສະໜາມຮົບໃນໃຈປະຊາຊົນ” ທີ່ເຂັ້ມແຂງຕັ້ງແຕ່ຮາກຖານ. ເອົາໃຈໃສ່ເຖິງການກໍ່ສ້າງພື້ນທີ່ປ້ອງກັນທີ່ເຂັ້ມແຂງໃນທຸກລະດັບ, ສ້າງ​ການ​ຈັດ​ຕັ້ງ​ການ​ປ້ອງ​ກັນ​ປະ​ເທດທີ່ເຂັ້ມ​ແຂງແລະຕໍ່​ເນື່ອງ​ໃນແຕ່​ລະ​ເຂດ ແລະໃນ​ທົ່ວ​ປະ​ເທດ, ຮັບປະກັນ​ໃຫ້​ບັນດາ​ທ້ອງ​ຖິ່ນ​ສາມາດຮັບ​ມື​ໄດ້ເປັນຢ່າງດີ ກັບ​ສະຖານະ​ການ​ປ້ອງ​ກັນ​ປະ​ເທດ ​ແລະ ຄວາມ​ໝັ້ນຄົງ ທັງ​ໃນ​ຍາມສະຫງົບ​ແລະຍາມສົງຄາມ. ເຕົ້າໂຮມຊັບພະຍາກອນການລົງທຶນກໍ່ສ້າງສິ່ງອໍານວຍຄວາມສະດວກ, ພາຫະນະ, ອຸປະກອນປ້ອງກັນຊາດ, ກິດຈະການປ້ອງກັນຊາດ, ກິດຈະການຕໍ່ສູ້ ແລະ ກໍ່ສ້າງລະບົບປ້ອງກັນພົນລະເຮືອນທີ່ຄົບຊຸດແລະເປັນເອກະພາບ; ໃນນັ້ນ ໃຫ້​ບຸລິມະສິດແກ່​ເສັ້ນ​ຊາຍ​ແດນ, ທະ​ເລ, ໝູ່​ເກາະ, ບັນດາພື້ນທີ່ຍຸດ​ທະ​ສາດ, ​ເຂດ​ສຳຄັນ ແລະອື່ນໆ.

ຕັ້ງໜ້າໃນການປ່ຽນແປງໃໝ່ ແລະ ປັບປຸງຍົກສູງຄຸນນະພາບແລະປະສິດທິຜົນ ຂອງວຽກງານການສຶກສາ ແລະການຝຶດອົບຮົມຄວາມຮູ້ດ້ານການປ້ອງກັນປະເທດ ການປ້ອງກັນຄວາມສະຫງົບ, ຮັບປະກັນຄວາມສອດຄ່ອງກັບແຕ່ລະເປົ້າໝາຍ ເພື່ອສ້າງການປ່ຽນແປງທີ່ແຂງແຮງໃນດ້ານຄວາມຮັບຮູ້ ແລະຄວາມຮັບຜິດຊອບ ຂອງພະນັກງານ ສະມາຊິກພັກ ແລະປະຊາຊົນ ໃນໜ້າທີ່ການກໍ່ສ້າງພື້ນຖານການປ້ອງກັນປະເທດທົ່ວປວງຊົນ ເພື່ອປົກປັກຮັກສາປະເທດຊາດ. ໃຫ້ຄວາມສຳຄັນກັບການອົບຮົມສຶກສາ, ເປັນເອກະພາບແລະຍົກສູງຄວາມຮັບຮູ້ກ່ຽວກັບຄູ່ຮ່ວມມື ແລະ ເປົ້າໝາຍ; ກຳແໜ້ນແນວທາງ, ທັດສະນະ, ຄວາມຕ້ອງການ ແລະ ໜ້າທີ່ປົກປັກຮັກສາປະເທດຊາດໃນສະພາບການໃໝ່. ສືບຕໍ່ເສີມຂະຫຍາຍບົດບາດ ແລະປະສິດທິຜົນຂອງໜ່ວຍເສດຖະກິດ-ປ້ອງກັນປະເທດ ແລະ ວິ​ສາ​ຫະ​ກິດ​ການ​ທະ​ຫານ ເພື່ອປະສົມປະສານການພັດທະນາທາງເສດຖະກິດ ວັດທະນະທຳ ສັງຄົມ ການຕ່າງປະເທດ ເຂົ້າກັບການປັບປຸງແລະເພີ່ມທະວີການປ້ອງກັນປະເທດ, ໂດຍສະເພາະ ໃນພື້ນທີ່ຍຸດທະສາດ, ໃນເຂດທີ່ຫຍຸ້ງຍາກພິເສດ, ເຂດຊາຍແດນ, ໝູ່ເກາະ ແລະ ເຂດເສດຖະກິດທີ່ສຳຄັນ.

ທີສາມ, ສ້າງກອງທັບທີ່ເຂັ້ມແຂງທາງດ້ານການເມືອງ ເພື່ອເປັນພື້ນຖານໃນການປັບປຸງຍົກສູງຄຸນນະພາບສັງລວມ ແລະ ກຳລັງແຮງສູ້ຮົບ ຂອງກອງທັບທັງໝົດ.

ສຸມໃສ່ກໍ່ສ້າງກອງທັບທີ່ເຂັ້ມແຂງທາງດ້ານການເມືອງ ເພື່ອເປັນພື້ນຖານໃນການປັບປຸງຍົກສູງຄຸນນະພາບສັງລວມ ແລະ ກຳລັງແຮງສູ້ຮົບ ຂອງກອງທັບທັງໝົດ. ສືບຕໍ່ຜັນຂະຫຍາຍປະຕິບັດ ໂຄງການປ່ຽນແປງໃໝ່ ການອົບຮົມສຶກສາການເມືອງ ໃນກົມກອງ ແລະໜ່ວຍງານ ໃນໄລຍະໃໝ່. ໃຫ້ຄວາມສົນໃຈກັບການຍົກສູງຄຸນນະພາບການອົບຮົມສຶກສາລັດທິມາກ-ເລນິນ, ແນວຄິດໂຮ່ຈີມິນ, ທາດແທ້ປະຕິວັດ ມູນເຊື້ອ ໜ້າທີ່ຂອງກັງທັບ ແລະ ກົມກອງ ຫົວໜ່ວຍ; ໃຫ້ຄວາມເຂົ້າໃຈກ່ຽວກັບຄູ່ຮ່ວມມື, ເປົ້າໝາຍ; ແຜນການ ແລະກົນອຸບາຍຂອງອິດທິກຳລັງສັດຕູ. ແກ້ໄຂຜ່ານຜ່ານຄວາມຮັບຮູ້ ແລະ ແນວຄິດທີ່ຜິດພາດຢ່າງທັນທ່ວງທີ, ເປັນເຈົ້າການໃນການຕໍ່ສູ້ເພື່ອປ້ອງກັນແລະຕ້ານປະກົດການຂອງ “ການຫັນປ່ຽນຕົນເອງ”, “ການປ່ຽນແປງຕົນເອງ” ຢູ່ພາຍໃນ. ສຸມໃສ່ການຝຶກອົບຮົມໃຫ້ພະນັກງານ ນັກຮົບມີຄວາມກ້າຫານທາງການເມືອງທີ່ເຂັ້ມແຂງແລະແນ່ວແນ່, ມີຄວາມ​ຈົງ​ຮັກ​ພັກດີ​ຕໍ່​ປະ​ເທດ​ຊາດ, ພັກ, ລັດ ​ແລະ ປະຊາຊົນ; ມີເຈດຈຳນົງແລະຄວາມຕັດສິນໃຈໃນການຕໍ່ສູ້, ພ້ອມ​ທີ່​ຈະ​ຮັບ​ເອົາ ​ແລະ​ສໍາ​ເລັດ​ທຸກ​ວຽກ​ງານ​ທີ່​ໄດ້​ຮັບ​ມອບໝາຍ.

ຍູ້​ແຮງ​ການ​ຜັນ​ຂະຫຍາຍ​ການ​ເຄື່ອນ​ໄຫວ “​ເຊີດ​ຊູ​ຮີດຄອງ​ປະ​ເພນີ, ອຸທິດ​ຄວາມເກັ່ງກ້າສາມາດ, ​ສົມຄວນໄດ້ຮັບນາມມະຍົດ “ທະຫານລຸງໂຮ່” ໃນຍຸກໃໝ່. ປະສານສົມທົບຢ່າງໃກ້ຊິດ ​ການຈັດ​ຕັ້ງ​ປະຕິບັດ​ຂະ​ບວນການດັ່ງກ່າວຢ່າງດີ ກັບ​ການ​ຮ່ຳຮຽນ​ແລະປະຕິບັດຕາມແນວຄິດ ຄຸນສົມບັດສິນທຳ ​ແບບແຜນຂອງປະທານໂຮ່ຈີມິນ ​ແລະ ບັນດາຂະບວນການແຂ່ງຂັນ, ການລະດົມຂົນຂວາຍ​ຂອງ​ກອງທັບ ໃນທົ່ວ​ປະ​ເທດ ດ້ວຍ​ຫຼາຍ​ຮູບ​ແບບ ​ແລະວິທີການທີ່​ປະດິດ​ສ້າງ, ເໝາະ​ສົມ ​ແລະ ມີ​ປະສິດທິ​ຜົນ. ຜ່ານນັ້ນ, ເສີມຂະຫຍາຍມູນເຊື້ອຂອງກອງທັບ​ປະຊາຊົນ​ຫວຽດນາມ ​ທີ່ມີ​ຄວາມ​ຈົງ​ຮັກ​ພັກດີ​ຕໍ່​ພັກ, ກະຕັນຍູ​ຕໍ່​ປະຊາຊົນ, ພ້ອມທີ່ຈະຕໍ່ສູ້ ​ແລະ ​ເສຍສະຫຼະ​ເພື່ອ​ເອກະລາດ, ​ເສລີພາບ​ຂອງ​ປະ​ເທດ​ຊາດ, ​ເພື່ອ​ສັງຄົມ​ນິຍົມ, ​ເຮັດ​ສຳ​ເລັດ​ທຸກ​ວຽກ​ງານ, ຜ່ານຜ່າຄວາມທຸກ​ຍາກ​ລຳບາກທຸກຢ່າງ, ເອົາຊະນະສັດຕູ​ທຸກ​ໂຕ. ຜັນຂະຫຍາຍປະຕິບັດ​ເປັນຢ່າງດີ ບັນດາ​ນະ​ໂຍບາຍຕໍ່​ກອງທັບ ​ແລະ ນະໂຍບາຍແນວຫຼັງຂອງກອງທັບ​; ປ່ຽນແປງໃໝ່ເນື້ອໃນແລະວິທີການ, ປັບປຸງຍົກສູງຄຸນນະພາບ ແລະປະສິດທິຜົນ ຂອງວຽກງານພັກ, ວຽກງານການເມືອງໃນໜ້າທີ່ຕ່າງໆ, ຮັບປະກັນຄວາມສອດຄ່ອງກັບແຜນນະໂຍບາຍ ແລະແນວທາງຂອງພັກ, ກັບການປະຕິບັດງານຂອງທະຫານ ແລະ ຄວາມຕ້ອງການ, ໜ້າທີ່ທາງການທະຫານ ແລະການປ້ອງກັນປະເທດ. ເບິ່ງແຍງດູແລການກໍ່ສ້າງອົງການຊາວໜຸ່ມ, ອົງການແມ່ຍິງ, ອົງການກຳມະບານ ແລະ ສະພາທະຫານທີ່ເຂັ້ມແຂງ, ປະກອບສ່ວນກໍ່ສ້າງອົງການຈັດຕັ້ງພັກທີ່ສະອາດ ແລະເຂັ້ມແຂງ, ສ້າງອົງການ ໜ່ວຍງານ ແລະກົມກອງທີ່ເຂັ້ມແຂງຮອບດ້ານ ແລະ ບັນລຸຜົນສຳເລັດທຸກໜ້າທີ່ທີ່ໄດ້ຮັບມອບໝາຍ.

ທີ່ສີ່, ຍູ້ແຮງການກໍ່ສ້າງກອງທັບທີ່ປະຕິວັດ ເປັນແບບຫຼວງ ຊຳນານການຮົບ ແລະທັນສະໄໝເທື່ອລະກ້າວ, ຮັບປະກັນຄຸນນະພາບສັງລວມ ແລະ ກຳລັງແຮງສູ້ຮົບສູງ, ເປັນແກນກາງຂອງປະຊາຊົນທັງໝົດ ໃນພາລະກິດການປ້ອງກັນປະເທດ, ປົກປັກຮັກສາປະເທດຊາດ.

ນີ້ແມ່ນເນື້ອໃນທີ່ມີຄວາມໝາຍຊີ້ຂາດ, ຮັບປະກັນໃຫ້ກອງທັບມີກຳລັງແຮງພຽງພໍ ແລະ ບັນລຸຄວາມສຳເລັດໃນບົດບາດຂອງກອງກຳລັງຫຼັກແຫຼ່ງ ໃນພາລະກິດປັບປຸງການປ້ອງກັນປະເທດ, ປົກປັກຮັກສາປະເທດຊາດຫວຽດນາມສັງຄົມນິຍົມ. ຊາບຊຶມຢ່າງເລິກ​ເຊິ່ງທັດສະນະ​ແລະ​ແນວທາງ​ການ​ປ້ອງ​ກັນ​ປະ​ເທດ ແລະ ການ​ທະຫານຂອງ​ພັກ ເຊິ່ງໂດຍ​ກົງແມ່ນ ​ແນວທາງ​ການ​ກໍ່ສ້າງ​ກຳລັງ​ປະກອບ​ອາວຸດ​ປະ​ຊາ​ຊົນ ກໍ່ຄືຄວາມຕ້ອງການ ໜ້າທີ່ການກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຊາດ​ໃນ​ສະຖານະການໃໝ່, ໃນຊຸມປີທີ່ຜ່ານມາ, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ສຸມໃສ່ນຳພາ ຊີ້ນຳການຜັນຂະຫຍາຍປະຕິບັດວິທີການຕ່າງໆ ເພື່ອສ້າງກອງທັບທີ່ “ກະທັດລັດ ຮັດກຸມ ແລະ ເຂັ້ມແຂງ”, ​ໃນ​ເບື້ອງ​ຕົ້ນ​ບັນລຸ​ໄດ້​ບັນດາ​ໝາກຜົນ​ສຳຄັນ, ຮັບປະກັນ​ຄວາມ​ດຸ່ນດ່ຽງ ​ແລະ ຄວາມຄົບຊຸດພໍຄວນ ລະຫວ່າງ​ບັນດາ​ເຫຼົ່າທະຫານ ເຫຼົ່າທັບ, ລະຫວ່າງ​ບັນດາ​ສຳນັກງານ ອົງການ ໜ່ວຍງານ, ລະຫວ່າງ​ກອງ​ກຳລັງ​ປະຈຳ​ການ ​ແລະ ກອງກຳລັງສຳຮອງທີ່ລະດົມກຳລັງ.

ທີຫ້າ, ການສ້າງແລະພັດທະນາອຸດສາຫະກຳການປ້ອງກັນປະເທດທີ່ເປັນເຈົ້າການ, ເພິ່ງພາຕົນເອງ, ສ້າງຄວາມເຂັ້ມແຂງດ້ວຍຕົນເອງ, ໃຊ້ສອງທາງ, ທັນສະໄໝ, ຕອບສະໜອງຕາມຄວາມຕ້ອງການຂອງການຫັນກອງທັບເປັນທັນສະໄໝ.

ກອງທັບທັງໝົດສຸມໃສ່ການຊາບຊຶມ ແລະຜັນຂະຫຍາຍປະຕິບັດຢ່າງເຂັ້ມງວດ ຕາມທັດສະນະ ເປົ້າໝາຍ ໜ້າທີ່ ແລະ ວິທີແກ້ໄຂທີ່ລະບຸໄວ້ໃນມະຕິໝາຍເລກ 08-NQ/TW ລົງວັນທີ 26 ມັງກອນ 2022 ຂອງກົມການເມືອງສູນກາງພັກ ວ່າດ້ວຍ “ການຍູ້ແຮງການພັດທະນາອຸດສາຫະກຳປ້ອງກັນປະເທດເຖິງປີ 2030 ແລະ ປີຕໍ່ໆໄປ”. ບົນ​ພື້ນຖານ​ຄວາມ​ສາມາດ​ບົ່ມ​ຊ້ອນ, ​ເງື່ອນ​ໄຂ​ເສດຖະກິດຂອງປະເທດ ​ແລະ ຄວາມ​ຮຽກຮ້ອງ​ຕ້ອງການ ​ແລະໜ້າທີ່​ການປົກ​ປັກ​ຮັກສາ​ປະ​ເທດ​ຊາດ, ສູ້​ຊົນທີ່ຈະບັນລຸບັນດາ​ເປົ້າ​ໝາຍການ​ພັດທະນາ​ອຸດສາຫະກຳ​ປ້ອງ​ກັນ​ປະ​ເທດ​ທີ່​ໄດ້​ກຳນົດ​ໄວ້​ໃນ​ແຜນ​ງານເຖິງ​ປີ 2030 ​ແລະ ຊຸມ​ປີ​ຕໍ່ໆໄປ. ຕາມນັ້ນ, ສຳລັບບັນດາຂົງເຂດອຸດສາຫະກຳປ້ອງກັນປະເທດທີ່ມີທ່າແຮງ ແລະໄດ້ເປັນເຈົ້າທາງດ້ານເຕັກໂນໂລຊີ, ຈຳເປັນຕ້ອງສຸມໃສ່ການພັດທະນາຄວາມສາມາດໃນການຄົ້ນຄວ້າ, ອອກແບບ, ຜະລິດ ແລະ ຜະລິດອາວຸດແລະອຸບປະກອນທາງເຕັກນິກທີ່ທັນສະໄໝ, ໂດຍເນັ້ນອາວຸດຍຸດທະສາດທີ່ມີພະລັງໃນການໂຈມຕີ, ເພີ່ມທະວີຄວາມສາມາດດ້ານການປ້ອງກັນ, ປົກປັກຮັກສາປະເທດ ແລະ ການສູ້ຮົບໃນສົງຄາມໄຊເບີຮ໌.

ທີຫົກ, ສືບ​ຕໍ່​ຜັນ​ຂະຫຍາຍ​ບັນດາ​ມາດ​ຕະການ​ແກ້​ໄຂ​ ເພື່ອ​ຊຸກຍູ້​ວຽກ​ງານ​ການ​ຕ່າງປະ​ເທດ​ດ້ານ​ປ້ອງ​ກັນຊາ​ດຕາມ​ຄຳ​ຂວັນ ຕັ້ງໜ້າ, ເປັນເຈົ້າການ, ໜັກ​ແໜ້ນ, ໄຫວພິບ, ມີ​ປະສິດທິ​ຜົນ”, ປະກອບສ່ວນ​ປົກ​ປັກ​ຮັກສາ​ປະ​ເທດ​ຊາດ ຕັ້ງແຕ່ຕົ້ນ, ຈາກໄລຍະໄກ”, ​ເສີມ​ຂະຫຍາຍອິດທິພົນແລະບົດບາດ​ທີ່​ຕັ້ງ ​ຂອງ​ກອງທັບ​ແລະປະ​ເທດຫວຽດນາມ​ ໃນເວທີສາກົນ.

ຕາມນັ້ນ, ເປັນເຈົ້າການໃນການປົກປັກຮັກສາປະເທດຊາດ, ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານຫຼັກການພື້ນຖານ ຂອງກົດບັດສະຫະປະຊາຊາດ ແລະກົດໝາຍສາກົນ, ຄວາມສະເໝີພາບ, ການຮ່ວມມື ແລະ ມີຜົນປະໂຫຍດຮ່ວມກັນ. ຄົ້ນພົບ ປ້ອງກັນ ແລະຂັບໄລ່ຄວາມສ່ຽງຂອງ​ການ​ປະ​ທະ​ກັນ​ແລະ​ສົງ​ຄາມ ຢ່າງທັນທ່ວງທີ, ປົກ​ປັກ​ຮັກ​ສາ​ປະ​ເທດຊາດ “ຕັ້ງແຕ່ຕົ້ນ, ຈາກໄລຍະໄກ”. ໃຊ້ຊັບພະຍາກອນພາຍນອກໃຫ້ເກີດປະໂຫຍດສູງສຸດ ເພື່ອເພີ່ມຄວາມສາມາດໃນການປ້ອງກັນປະເທດ ແລະປົກປັກຮັກສາປະເທດຊາດ; ສົ່ງເສີມຄວາມຫຼາກຫຼາຍຂອງຄູ່ຮ່ວມມືດ້ານເຕັກນິກການທະຫານ ແລະ ການຄ້າທາງການທະຫານ. ຕັ້ງໜ້າ​ເຂົ້າ​ຮ່ວມ​ຢ່າງ​ມີ​ປະສິດທິ​ຜົນ​ໃນ​ບັນດາ​ການ​ເຄື່ອນ​ໄຫວ​ຮັກສາ​ສັນຕິພາບ​ຂອງ​ສະຫະ​ປະຊາ​ຊາດ, ການ​ຊ່ວຍ​ເຫຼືອ​ດ້ານ​ມະນຸດສະທຳ, ການ​ບັນເທົາ​ໄພພິບັດ, ການ​​ຄົ້ນ​ຫາ​ແລະກູ້​ໄພກູ້ຊີບ, ​ການແກ້​ໄຂ​ຜົນ​ຮ້າຍ​ຢ້ອນ​ຫຼັງ​ຈາກ​ສົງຄາມ. ຊຸກຍູ້​ການ​ຮ່ວມ​ມື​ສາກົນ​ເພື່ອ​ຮັບມືກັບ​ສິ່ງ​ທ້າ​ທາຍ​ດ້ານ​ຄວາມ​ໝັ້ນຄົງ​ແບບ​ດັ້ງ​ເດີມ ​ແລະ ບໍ່​ເປັນ​ແບບ​ດັ້ງ​ເດີມ.

ທີເຈັດ, ປັບປຸງຍົກສູງຄວມສາມາດນຳພາ ແລະ ກຳລັງແຮງສູ້ຮົບ, ກໍ່ສ້າງອົງຄະນະພັກກອງທັບທີ່ສະອາດປອດໃສ, ໝັ້ນຄົງເຂັ້ມແຂງ, ເປັນແບບຢ່າງ, ເປັນຕົວແທນ, ນຳພາກອງທັບທັງໝົດສຳເລັດໜ້າທີ່ທີ່ໄດ້ຮັບມອບໝາຍຈາກພັກ ລັດ ແລະປະຊາຊົນ ເປັນຢ່າງດີ

ຊາບຊຶມທັດສະນະຊີ້ນຳ “ການກໍ່ສ້າງພັກເປັນກຸນແຈສຳຄັນ”, ມະຕິກອງປະຊຸມໃຫຍ່ຜູ້ແທນຄະນະພັກກອງທັບຄັ້ງທີ XI ລະບຸຢ່າງຊັດເຈນວ່າ: ຍົກສູງຄວາມສາມາດນຳພາ, ກຳລັງແຮງສູ້ຮົບ, ກໍ່ສ້າງອົງຄະນະພັກກອງທັບທີ່ສະອາດປອດໃສ ໝັ້ນຄົງເຂັ້ມແຂງ ເປັນແບບຢ່າງ ເປັນຕົວແທນ. ໃນເວລາທີ່ຜ່ານມາ, ກອງທັບທັງໝົດສືບຕໍ່ຊາບຊຶມ ແລະກຳແໜ້ນບັນດາມະຕິ, ຄຳສັ່ງຂອງຄະນະບໍລິຫານງານສູງກາງ, ກົມການເມືອງສູນກາງ, ຄະນະເລຂາທິການສູນກາງ, ມະຕິກອງປະຊຸມໃຫຍ່ຄັ້ງທີ XIII ຂອງພັກ ແລະ ມະຕິກອງປະຊຸມໃຫຍ່ຜູ້ແທນຄະນະພັກກອງທັບຄັ້ງທີ XI. ຜັນຂະຫຍາຍປະຕິບັດຢ່າງຄົບຊຸດແລະມີປະສິດທິຜົນບັນດາກຸ່ມມາດຕະການ ເພື່ອປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI, XII ແລະ XIII ກ່ຽວກັບການກໍ່ສ້າງແລະປັບປຸງພັກ ຕິດພັນກັບການປະຕິບັດບົດສະຫຼຸບໝາຍເລກ 01-KL/TW ລົງວັນທີ 18 ພຶດສະພາ 2021 ຂອງກົມການເມືອງສູນກາງພັກ “ກ່ຽວກັບການສືບຕໍ່ປະຕິບັດຄຳສັ່ງໝາຍເລກ 05-CT/TW ຂອງກົມການເມືອງສູນກາງພັກ “ກ່ຽວກັບການຍູ້ແຮງການຮ່ຳຮຽນ ແລະປະຕິບັດຕາມແນວຄິດ ຄຸນສົມບັດສິນທຳ ແລະ ແບບແຜນໂຮ່ຈີມິນ”” ແລະ ຄຳສັ່ງໝາຍເລກ 87-CT/QUTW ລົງວັນທີ 8 ກໍລະກົດ 2016 ຂອງຄະນະປະຈຳຄະນະພັກການທະຫານສູນກາງ ວ່າດ້ວຍ “ຍູ້ແຮງການຮ່ຳຮຽນ ແລະປະຕິບັດຕາມແນວຄິດ ຄຸນສົມບັດສິນທຳ ແລະ ແບບແຜນໂຮ່ຈີມິນ ໃນຄະນະພັກການທະຫານ ແລະກອງທັບທັງໝົດ”. ຮັກສາແລະເພີ່ມທະວີການນຳພາທີ່ເດັດຂາດ ແລະໂດຍກົງໃນທຸກດ້ານຂອງພັກ ຕໍ່ກອງທັບ; ສຸມໃສ່ການສ້າງອົງຄະນະພັກກອງທັບທີ່ສະອາດປອດໃສ ໝັ້ນຄົງເຂັ້ມແຂງ ເປັນແບບຢ່າງ ປັນຕົວແທນ, ນັບມື້ນັບເຂັ້ມແຂງໃນດ້ານການເມືອງ ແນວຄິດ ຄຸນສົມບັດສິນທຳ ການຈັດຕັ້ງ ແລະພະນັກງານ; ປັບປຸງຍົກສູງຄວາມສາມາດນຳພາຮອບດ້ານ ແລະກຳລັງແຮງສູ້ຮົບຂອງຄະນະພັກ, ອົງການຈັດຕັ້ງພັກ. ເສີມຂະຫຍາຍບົດບາດນຳໜ້າ ແລະເປັນແບບຢ່າງ ຂອງພະນັກງານ ສະມາຊິກພັກ ແລະ ສ້າງການແຜ່ກະຈາຍໃນທົ່ວກອງທັບແລະສັງຄົມ; ສ້າງຖັນແຖວພະນັກງານ ສະມາຊິກພັກທີ່ມີຄຸນທຳ ມີຄວາມສາມາດ ມີຊື່ສຽງສູງ ແລະເປັນແບບຢ່າງ, “ກ້າຄິດ, ກ້າເວົ້າ, ກ້າເຮັດ, ກ້າຮັບຜິດຊອບ, ກ້າປ່ຽນແປງໃໝ່ປະດິດສ້າງ, ກ້າຮັບມືກັບຄວາມຫຍຸ້ງຍາກລຳບາກ ແລະສິ່ງທ້າທາຍ, ກ້າກະທຳເພື່ອປະໂຫຍດສ່ວນລວມ”, ຕອບສະໜອງຄວາມຕ້ອງການແລະໜ້າທີ່ການກໍ່ສ້າງ ແລະ ປົກປັກຮັກສາປະເທດຊາດ ໃນສະພາບການໃໝ່./.

------------------------

(1) ໂຮ່ຈີມິນ: ນິພັນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 14, ໜ້າ 435.

(2) ເບິ່ງ: ກະຊວງປ້ອງກັນປະເທດ ແຫ່ງສາທາລະນະລັດ ສັງຄົມນິຍົມຫວຽດນາມ: ການປ້ອງກັນປະເທດຫວຽດນາມປີ 2019, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2019, ໜ້າ 25.

(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 156.

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1028 (ເດືອນທັນວາ 2023)