ໝູນໃຊ້ ແລະ ພັດທະນາແນວຄິດໂຮ່ຈີມິນ ກ່ຽວກັບ
“ການເມືອງສຳຄັນກວ່າການທະຫານ” ຢ່າງປະດິດສ້າງ
ໃນການກໍ່ສ້າງກອງທັບປະຊາຊົນຫວຽດນາມທີ່ຊຳນານທາງການເມືອງ
“ການເມືອງສຳຄັນກວ່າການທະຫານ” ຢ່າງປະດິດສ້າງ
ໃນການກໍ່ສ້າງກອງທັບປະຊາຊົນຫວຽດນາມທີ່ຊຳນານທາງການເມືອງ
ແນວຄິດໂຮ່ຈີມິນກ່ຽວກັບ “ການເມືອງສຳຄັນກວ່າການທະຫານ”
ທິດສະດີ ມາກ-ເລນິນ ກ່ຽວກັບສົງຄາມແລະກອງທັບ ຊີ້ໃຫ້ເຫັນແຈ້ງເຖິງຄວາມຈຳເປັນພາວະວິໄສ ທີ່ຈະຕ້ອງກໍ່ສ້າງກອງທັບແບບໃໝ່ ຂອງຊົນຊັ້ນກຳມາຊີບ, ສະເໜີທັດສະນະແລະຫຼັກການໃນການກໍ່ສ້າງກອງທັບ ແລະ ບັນດາບັນຫາພື້ນຖານ ຂອງການກໍ່ສ້າງກອງທັບທາງດ້ານການເມືອງ. ຕາມ ວ.ອີ.ເລນິນ, ການກໍ່ສ້າງກອງທັບແບບໃໝ່ຕ້ອງແມ່ນການກໍ່ສ້າງກອງທັບທີ່ບໍ່ແຍກຕົວອອກຈາກປະຊາຊົນ, ຕ້ອງຕິດພັນແໜ້ນແຟ້ນກັບປະຊາຊົນ; ແມ່ນ “ຮູບແບບການຈັດຕັ້ງໜຶ່ງ ຂອງກອງກຳລັງນຳໜ້າ, ໝາຍຄວາມວ່າຂອງພາກສ່ວນທີ່ຕື່ນຕົວທີ່ສຸດ, ເດັດດ່ຽວທີ່ສຸດ, ກ້າວໜ້າທີ່ສຸດຂອງຊົນຊັ້ນທີ່ຖືກກົດຂີ່”(1). ພ້ອມກັນນັ້ນ, ວ.ອີ.ເລນິນ ໄດ້ຊີ້ໃຫ້ເຫັນເຖິງບົດບາດສຳຄັນພິເສດ ຂອງການເມືອງໃນກອງທັບກຳມາຊີບ, ຍ້ອນວ່າ: “ໃນທຸກສົງຄາມ, ໃນທີ່ສຸດໄຊຊະນະກໍ່ຂຶ້ນກັບຈິດໃຈຂອງມວນຊົນທີ່ເສຍເລືອດເນື້ອໃນສະໜາມຮົບ”(2). ເພື່ອກໍ່ສ້າງກອງທັບທີ່ເຂັ້ມແຂງທາງການເມືອງ, ວ.ອີ.ເລນິນ ຮຽກຮ້ອງໃຫ້ກອງທັບຕ້ອງຢູ່ພາຍໃຕ້ການນຳພາຂອງພັກກອມມູນິດ, ຕ້ອງສ້າງຄະນະຜູ້ບັງຄັບການທາງການເມືອງ, ເພາະວ່າ "ຖ້າບໍ່ມີຜູ້ບັງຄັບການການເມືອງ, ພວກເຮົາຈະບໍ່ມີກອງທັບແດງ”(3)... ວ.ອີ.ເລນິນ ຊີ້ແຈງວ່າ ສາຍພົວພັນລະຫວ່າງການເມືອງແລະການທະການໃນການກໍ່ສ້າງກອງທັບກຳມາຊີບ ແມ່ນສາຍພົວພັນສັດຈະວິພາບ ແລະເປັນເອກະພາບກັນ; ຖ້າການເມືອງເຂັ້ມແຂງ ອຸດົມການກໍ່ຈະຊັດເຈນ, ຄວາມຕັດສິນໃຈຈະສູງ, ສະຕິປັນຍາຈະສົດໃສ, ຄວາມສາມາດຜ່ານຜ່າຄວາມຫຍຸ້ງຍາກລຳບາກຈະເພີ່ມຂຶ້ນຫຼາຍ, ວິໄນຈະເຂັ້ມງວດ ແລະຈະສ້າງກອງກຳລັງທະຫານເພື່ອເອົາຊະນະສັດຕູ.
ປະທານໂຮ່ຈີມິນມີຄວາມຮັບຮູ້ຢ່າງເລິກເຊິ່ງ ບັນດາບັນຫາພື້ນຖານກ່ຽວກັບການປະຕິວັດສັງຄົມນິຍົມ ແລະ ແນວຄິດຄວາມຮຸນແຮງປະຕິວັດຂອງລັດທິມາກ-ເລນິນ, ບົນພື້ນຖານນັ້ນ, ແນວຄິດຄວາມຮຸນແຮງປະຕິວັດໄດ້ກໍ່ຕົວຂຶ້ນໃນປະເທດອານານິຄົມ ແລະເຄິ່ງສັກດິນາຄືຫວຽດນາມ. ຈາກນັ້ນ, ມີການກໍ່ຕົວຂອງແນວຄິດກ່ຽວກັບກອງທັບປະຕິວັດໃນຖານະກອງກຳລັງທາງການເມືອງ, ເຊິ່ງເປັນເຄື່ອງມືຄວາມຮຸນແຮງຕົ້ນຕໍ ໃນການຕໍ່ສູ້ທາງຊົນຊັ້ນ ແລະ ການຕໍ່ສູ້ທາງຊົນຊາດ ຂອງຊົນຊັ້ນກຳມະກອນ ແລະ ປະຊາຊົນຜູ້ອອກແຮງງານຫວຽດນາມ. ແນວຄິດ “ການເມືອງສຳຄັນກວ່າການທະຫານ” ແມ່ນການພັດທະນາທີ່ຫຼີກລ່ຽງບໍ່ໄດ້ ເຊິ່ງມີພື້ນຖານໂດຍກົງຈາກແນວຄິດຄວາມຮຸນແຮງປະຕິວັດ, ອຸດົມການຂອງທົ່ວປວງຊົນປະກອບອາວຸດ, ການປະຕິວັດແມ່ນຫຼັກໝັ້ນຂອງມະຫາຊົນ, ແນວຄິດການປະກອບອາວຸດໃຫ້ທົ່ວປວງຊົນ ແລະ ການປະຕິວັດແມ່ນພາລະກິດຂອງປວງປະຊາຊົນ, ແນວຄິດການກໍ່ສ້າງກອງທັບໂດຍທົ່ວໄປ ແລະ ການກໍ່ສ້າງກອງທັບທາງດ້ານການເມືອງໂດຍສະເພາະ ຂອງປະທານໂຮ່ຈີມິນ.
ແນວຄິດ “ການເມືອງສຳຄັນກວ່າການທະຫານ” ຖືກຳເນີດໃນສະຖານະການທາງປະຫວັດສາດພິເສດຫຼາຍ. ກອງປະຊຸມຄະນະປະຈຳສູນກາງພັກຈັດຂຶ້ນໃນເດືອນກຸມພາ 1943 ກຳນົດທິດທາງການກໍ່ສ້າງກຳລັງ ເພື່ອກະກຽມການລຸກຮືຂຶ້ນທົ່ວປະເທດ ເຊິ່ງເນັ້ນໜັກການກໍ່ສ້າງກຳລັງປະຕິວັດຢູ່ໃນຕົວເມືອງ ແລະ ຂົນຂວາຍກຳມະກອນ, ເພາະຫາກຂາດກຳລັງນີ້ໄປ ກໍ່ຈະເປັນການຍາກທີ່ການລຸກຮືຂຶ້ນຈະລະເບີດຂຶ້ນໃນສະຖານທີ່ສຳຄັນຂອງສັດຕູ ແລະ ດັ່ງນັ້ນ ສັດຕູຈຶ່ງບໍ່ເປັນອໍາມະພາດ. ຕາມຈິດໃຈນັ້ນ, ໃນສອງປີ 1943-1944, ຂະບວນການປະຕິວັດໃນປະເທດເຖິງຈຸດສູງສຸດ. ວັນທີ 7 ພຶດສະພາ 1944, ກອງບັນຊາການໃຫຍ່ຫວຽດມິນ ອອກຄຳສັ່ງເພື່ອກຽມການລຸກຮືຂຶ້ນ. ຕໍ່ມາໃນວັນທີ 10 ສິງຫາ 1944, ສູນກາງພັກໄດ້ອອກປະກາດຮຽກຮ້ອງໃຫ້ “ຊື້ອາວຸດເພື່ອໄລ່ລ່າສັດຕູລວມ”.
ຢ່າງໃດກໍ່ຕາມ, ເວລານີ້ຍັງແມ່ນໄລຍະສ້າງກຳລັງ ກະກຽມການລຸກຮື້ຂຶ້ນ, ສະພາບການແລະໂອກາດການປະຕິວັດຍັງບໍ່ທັນສຸກງອມ. ເດືອນກໍລະກົດ 1944, ຄະນະກຳມະການພັກຮ່ວມແຂວງ ກາວ-ບັ້ກ-ລ້າງ ໃຫ້ຄວາມເຫັນວ່າ, ບັນດາເງື່ອນໄຂເພື່ອປຸກລະດົມການຕໍ່ສູ້ດ້ວຍອາວຸດໄດ້ສຸກງອມແລ້ວ ແລະ ຕັ້ງໃຈທີ່ຈະຈັດກອງປະຊຸມສຸດທ້າຍເພື່ອກຳນົດວັນແລະເວລາດໍາເນີນການ. ແຕ່, ດ້ວຍວິໄສທັດທາງການເມືອງທີ່ເຫັນກ່ອນ, ຜູ້ນຳ ຫງວຽນອ໋າຍກວັກ - ໂຮ່ຈີມິນ ໄດ້ຢຸດການລຸກຮື້ຂຶ້ນທັນທີ ໂດຍຫຼີກລ່ຽງຄວາມສູນເສຍຄັ້ງໃຫຍ່ສຳລັບຂະບວນການກາວ-ບັ້ກ-ລ້າງ. ໂດຍອ້າງອີງຕາມຄຳພິນິດໄສອັນສະຫຼາດສ່ອງໃສຂອງປະທານໂຮ່ຈີມິນ, ພົນເອກ ຫວໍ ງວຽນ ຢ໊າບ ຊີ້ໃຫ້ເຫັນວ່າ: “ຂະນະນີ້ ຍຸກແຫ່ງການພັດທະນາການປະຕິວັດຢ່າງສັນຕິໄດ້ຜ່ານໄປແລ້ວ, ແຕ່ຍຸກແຫ່ງການລຸກຮືຂຶ້ນຂອງທົ່ວປວງຊົນຍັງບໍ່ທັນມາເຖິງ. ຖ້າປະຈຸບັນພວກເຮົາດຳເນີນການເຄື່ອນໄຫວທາງການເມືອງພຽງຢ່າງດຽວ ກໍ່ຈະບໍ່ພໍທີ່ຈະຊຸກຍູ້ການເຄື່ອນໄຫວໄປຂ້າງໜ້າໄດ້. ແຕ່ຖ້າຫາກປຸກລະດົມການລຸກຮືຂຶ້ນດ້ວຍອາວຸດທັນທີ ສັດຕູກໍ່ຈະສຸມໃສ່ການຮັບມືກັບມັນ. ການຕໍ່ສູ້ໃນປະຈຸບັນຕ້ອງຫັນຈາກຮູບແບບທາງການເມືອງໄປສູ່ຮູບແບບການທະຫານ. ແຕ່ປະຈຸບັນການເມືອງມີຄວາມສຳຄັນກວ່າການທະຫານ”(4).
ເດືອນທັນວາ 1944, ບົນພື້ນຖານກຳລັງການເມືອງປະຕິວັດພັດທະນາຢ່າງແຂງແຮງ ແລະ ກອງກຳລັງປະກອບອາວຸດໄດ້ຮັບການກໍ່ຕັ້ງຂຶ້ນ, ຜູ້ນຳ ຫງວຽນອ໋າຍກວັກ - ໂຮ່ຈີມິນ ໄດ້ອອກຄຳສັ່ງໃຫ້ສ້າງຕັ້ງກອງກຳລັງໂຄສະນາປົດປ່ອຍຫວຽດນາມ. ໃນຄຳສັ່ງດັ່ງກ່າວ, ທ່ານລະບຸໄວ້ຢ່າງຈະແຈ້ງວ່າ: “ຊື່ກອງກຳລັງໂຄສະນາປົດປ່ອຍຫວຽດນາມ ໝາຍຄວາມວ່າການເມືອງມີຄວາມສຳຄັນກວ່າການທະຫານ. ມັນເປັນກອງກຳລັງໂຄສະນາ”(5); ກອງກຳລັງມີໜ້າທີ່ບອກສອນຊັກນຳພະນັກງານທີ່ປະກອບອາວຸດທ້ອງຖິ່ນ, ຊ່ວຍຝຶກອົບຮົມແລະຊ່ວຍເລືອອາວຸດຖ້າເປັນໄປໄດ້ ແລະ ຊ່ວຍໃຫ້ທີມງານເຫຼົ່ານີ້ເຕີບໃຫຍ່. ສອດຄ່ອງກັບແນວຄວາມຄິດດັ່ງກ່າວ, ເຖິງເດືອນເມສາ 1952, ໃນລາຍງານຕໍ່ກອງປະຊຸມສູນກາງພັກຄັ້ງທີ 3 ສະໄໝທີ II, ປະທານໂຮ່ຈີມິນເນັ້ນວ່າ: “ໃນການອົບຮົມດັດແປງທະຫານຈະຕ້ອງອາໄສການເມືອງເປັນພື້ນຖານ”(6).
ປະທານໂຮ່ຈີມິນ ພ້ອມເຫຼົ່າວິລະຊົນ ແລະ ຜູ້ກ້າຫານ ຈາກພາກໃຕ້ມາຢ້ຽມຢາມພາກເໜືອ, ວັນທີ 28 ກຸມພາ 1969 _ພາບ: TTXVN
ຕາມປະທານໂຮ່ຈີມິນ, ບັນຫາສຳຄັນອັນດັບໜຶ່ງສຳລັບພາລະກິດການປະຕິວັດເວົ້າລວມ, ການກໍ່ສ້າງກຳລັງປະກອບອາວຸດປະຕິວັດເວົ້າສະເພາະ ແມ່ນຕ້ອງມີ “ເສັ້ມທາງການເມືອງທີ່ຖືກຕ້ອງ”. ເພາະສະນັ້ນ, ໃນຕອນຕົ້ນ, ໃນພາກ “ວິທີການຕີແບບກອງຫຼອນ” ໃນນິພົນ ຍຸດທະວິທີກອງຫຼອນ ຂຽນໃນເດືອນພຶດສະພາ 1944, ເພິ່ນຢືນຢັນວ່າ: ຢາກໄດ້ຮັບໄຊຊະນະໃນການຕີແບບກອງຫຼອນ ຈຳເປັນຕ້ອງມີສີ່ຢ່າງຄື: 1. ຕ້ອງມີເສັ້ນທາງການເມືອງທີ່ຖືກຕ້ອງ. 2. ຕ້ອງອີງໃສ່ມະຫາຊົນ. 3. ຕ້ອງມີການຈັດຕັ້ງທີ່ເຂັ້ມແຂງແລະເຂັ້ມງວດ. 4. ຕ້ອງມີວິທີການຕໍ່ສູ້ທີ່ເກ່ງກ້າສາມາດຫຼາຍ(7).
ມາເຖິງນິພົນລັດທິເອກະຊົນນິຍົມ ທີ່ລົງພິມໃນໜັງສືພິມຄວາມຈິງ ສະບັບເລກທີ 101, ວັນທີ 15 ຕຸລາ 1948 ໂດຍໃຊ້ນາມປາກກາ “X.Y.Z”, ປະທານໂຮ່ຈີມິນ ໄດ້ສືບຕໍ່ເອົາ “ການເມືອງ” ກ່ອນ “ການທະຫານ” ວ່າ: “ການຕໍ່ຕ້ານຈະຊະນະຢ່າງແນ່ນອນ. ປະທານໂຮ່ຈີມິນເວົ້າຄືແນວນັ້ນ. ກອງທັບແລະປະຊາຊົນເຮົາເຊື່ອໝັ້ນຄືແນວນັ້ນ. ຍ້ອນຫຍັງການຕໍ່ຕ້ານຈຶ່ງຊະນະຢ່າງແນ່ນອນ? ເນື່ອງຈາກເງື່ອນໄຂ 4 ປະການຄື:
1. ສາມັກຄີຢ່າງແໜ້ນແຟ້ນ, ກອງທັບແລະປະຊາຊົນເປັນເອກະສັນກັນ.
2. ມີເສັ້ນທາງການເມືອງທີ່ຖືກຕ້ອງ.
3. ມີເສັ້ນທາງການທະຫານທີ່ຖືກຕ້ອງ.
4. ການບັງຄັບບັນຊາທີ່ສະຫຼາດແລະວ່ອງໄວ, ທັງທາງການເມືອງແລະການທະຫານ”(8).
ດັ່ງນັ້ນ, ໃນແງ່ຂອງການປຽບທຽບ, ຕາມທີ່ປະທານໂຮ່ຈີມິນກ່າວໄວ້ “ການເມືອງສຳຄັນກວ່າການທະຫານ” ແມ່ນວິທີການປຽບທຽບ ແລະ ຢືນຢັນທີ່ຕັ້ງ, ຄວາມສຳຄັນ ແລະ ບຸລິມະສິດອັນດັບໜຶ່ງຂອງ “ການເມືອງ” ທີ່ກ່ຽວຂ້ອງກັບ “ການທະຫານ”. ພ້ອມກັນນັ້ນ, ແນວຄິດ “ການເມືອງສຳຄັນກວ່າການທະຫານ” ມີການພົວພັນໂດຍກົງ ແລະຕິດພັນແໜ້ນແຟ້ນກັບການກໍ່ສ້າງກອງທັບທີ່ “ຕ້ອງຖືການເມືອງເປັນກົກຮາກ”, ການເມືອງ “ສະແດງອອກໃນເວລາຕີຕ້ານສັດຕູ” ໃນແນວຄິດທົ່ວໄປກ່ຽວກັບກອງທັບປະຊາຊົນຂອງປະທານໂຮ່ຈີມິນ; ສະແດງໃຫ້ເຫັນເຖິງຈິນຕະນາການສັດຈະວິພາກ, ທັດສະນະປະຫວັດສາດ - ສະເພາະ ແລະ ທັດສະນະການພັດທະນາ ໃນແນວຄິດການທະຫານຂອງເພິ່ນ; ສະແດງໃຫ້ເຫັນເຖິງສາຍພົວພັນເປັນເອກະພາບ, ສັດຈະວິພາກ ລະຫວ່າງການເມືອງ ແລະ ການທະຫານ ໃນການຈັດຕັ້ງ, ການກໍ່ສ້າງ ແລະ ການສູ້ຮົບ ຂອງກອງທັບປະຊາຊົນຫວຽດນາມ. ນີ້ແມ່ນຂໍ້ຄິດວິທະຍາທີ່ເປັນພື້ນຖານທີ່ສຸດ ເຊິ່ງສະແດງໃຫ້ເຫັນລັກສະນະສະເພາະຂອງແນວຄິດໂຮ່ຈີມິນ ກ່ຽວກັບກອງທັບປະຊາຊົນ, ຊີ້ໃຫ້ເຫັນຢ່າງຊັດເຈນເຖິງຄວາມສຳຄັນຂອງການເມືອງ, ການສະແດງອອກທາງການເມືອງຂອງກອງທັບ ແລະ ກຳນົດທິດທາງຂອງຂະບວນການກໍ່ສ້າງກອງທັບປະຊາຊົນຫວຽດນາມທາງດ້ານການເມືອງ. ຂໍ້ຄິດວິທະຍາທີ່ສຳຄັນນີ້ສະແດງອອກໃນບັນຫາພື້ນຖານຕໍ່ໄປນີ້:
ທີໜຶ່ງ, ຂະບວນການຈັດຕັ້ງແລະກໍ່ສ້າງກອງທັບ, ກຳລັງປະກອບອາວຸດຂອງພັກ, ຂອງການປະຕິວັດຫວຽດນາມ, ຕາມແນວຄິດໂຮ່ຈີມິນນັ້ນ ບໍ່ໄດ້ກ່ຽວກັບການກໍ່ສ້າງອົງການປະຕິບັດໜ້າທີ່ການທະຫານພຽງຢ່າງດຽວ ແຕ່ເປັນອົງການປະກອບອາວຸດປະຕິບັດໜ້າທີ່ການເມືອງ ຕາມຄວາມຕ້ອງການຂອງການປະຕິວັດຫວຽດນາມ. “ມັນແມ່ນກອງກຳລັງໂຄສະນາ” ມີໜ້າທີ່: “ຊີ້ນຳ”, “ຊ່ວຍເຫຼືອ”, “ຝຶກອົບຮົມ” ພະນັກງານຕິດອາວຸດໃນທ້ອງຖິ່ນເພື່ອພັດທະນາ, ເປັນແກນຫຼັກໃນການຕໍ່ສູ້ຂອງທົ່ວປວງຊົນ ຕ້ານການຮຸກຮານຢ່າງຮອບດ້ານ; ຕ້ອງ “ໂຄສະນາ” ແລະ “ລະດົມ” ມະຫາຊົນປະຕິບັດແນວທາງ ແລະນະໂຍບາຍຂອງພັກ, ລັດ, ປະຕິບັດວຽກງານການປະຕິວັດ. ໃນຄວາມໝາຍນັ້ນ, ການເຄື່ອນໄຫວຂອງອົງການທະຫານນີ້ແມ່ນ “ການເມືອງສຳຄັນກວ່າການທະຫານ”.
ທີສອງ, ທັດສະນະ, ເປົ້າໝາຍ, ແນວທາງການເມືອງຂອງຊົນຊັ້ນກຳມະກອນ ແລະ ກອງນຳໜ້າຂອງມັນຄື ພັກກອມມູນິດຫວຽດນາມ ກຳນົດທິດທາງການເຄື່ອນໄຫວທາງທະຫານທັງໝົດຂອງກອງທັບ, ໜ້າທີ່ການທະຫານຕ້ອງປະຕິບັດຕາມໜ້າທີ່ການເມືອງ; ການຈັດຕັ້ງແລະການເຄື່ອນໄຫວຂອງກອງທັບຕ້ອງອີງໃສ່ຫຼັກການການກໍ່ສ້າງກອງທັບແບບໃໝ່, ປະຕິບັດຕາມແນວທາງການເມືອງຂອງ ພັກກອມມູນິດຫວຽດນາມ ຢ່າງເຂັ້ມງວດ. ການເຄື່ອນໄຫວທາງການທະຫານທັງໝົດຂອງກອງທັບແມ່ນເພື່ອເປົ້າໝາຍການເມືອງ ແລະ ໜ້າທີ່ການປະຕິວັດ, ເພື່ອເປົ້າໝາຍແລະອຸດົມຄະຕິຂອງພັກຄື ເອກະລາດແຫ່ງຊາດແລະລັດທິສັງຄົມນິຍົມ, ຍາດເອົາເອກະລາດແລະເສລີພາບມາໃຫ້ປະເທດຊາດ, ຄວາມສຸກໃຫ້ແກ່ປະຊາຊົນ; ຕ້ອງຕິດພັນສະໜິດແໜ້ນກັບປະຊາຊົນ, ຮັບໃຊ້ໄຊຊະນະຂອງການຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາສັງຄົມໃໝ່ ພາຍໃຕ້ການນຳພາຂອງພັກ. “ຮາກ” ທາງການເມືອງຂອງກອງທັບປະຊາຊົນຫວຽດນາມ, ຕາມແນວຄິດຂອງປະທານໂຮ່ຈິມິນ ແມ່ນຢູ່ທີ່ນັ້ນ. ເພາະຕາມທີ່ເພິ່ນວ່າ "ເຂົ້າໃຈວ່າການເມືອງແມ່ນຈິດວິນຍານຂອງວຽກງານທັງໝົດ”(9).
ທີສາມ, ຢືນຢັນ “ການເມືອງສຳຄັນກວ່າການທະຫານ”, ແຕ່ຕາມຄວາມເຫັນຂອງປະທານໂຮ່ຈີມິນ, ມັນບໍ່ແມ່ນການເມືອງທີ່ບໍລິສຸດ, ການເມືອງຂອງກອງທັບປະຊາຊົນຫວຽດນາມຖືກກຳນົດໂດຍການເມືອງຂອງພັກກອມມູນິດຫວຽດນາມ; ເປົ້າໝາຍແລະອຸດົມຄະຕິແຫ່ງການສູ້ຮົບຂອງກອງທັບ ແມ່ນເປົ້າໝາຍແລະອຸດົມຄະຕິແຫ່ງການຕໍ່ສູ້ຂອງພັກ, ນັ້ນແມ່ນເອກະລາດແຫ່ງຊາດ ແລະລັດທິສັງຄົມນິຍົມ. ສໍາລັບກອງທັບ ການເມືອງບໍ່ພຽງແຕ່ຢູ່ໃນຈິດສຳນຶກເທົ່ານັ້ນ, ແຕ່ຫຼາຍກວ່ານັ້ນ, ສຳລັບພະນັກງານ ນັກຮົບແຕ່ລະຄົນ ແລະ ກອງທັບທັງໝົດ ມັນຈະຕ້ອງສະແດງອອກຜ່ານການເຄື່ອນໄຫວປະຕິວັດຢ່າງແທ້ຈິງ. ດັ່ງນັ້ນ, ເພິ່ນໄດ້ເນັ້ນໜັກວ່າ: “ໃນສ່ວນພວກເຈົ້ານັ້ນ, ການເມືອງປາກົດອອກໃນຂະນະທີ່ຕໍ່ສູ້ກັບສັດຕູ. ເມື່ອເຈົ້າຮຽນຮູ້ໂຄງການການເມືອງແລະນະໂຍບາຍແລ້ວ ເຈົ້າຕ້ອງນຳໄປປະຕິບັດ. ຖ້າເຈົ້າຮຽນທ່ອງຂຶ້ນໃຈ ແຕ່ບໍ່ຮູ້ວ່າຈະຕໍ່ສູ້ກັບສັດຕູຄືແນວໃດ ກໍ່ບໍ່ມີປະໂຫຍດຫຍັງເລີຍ”(10). ນີ້ແມ່ນວິທີທີ່ເປັນເອກະລັກສະເພາະ, ມີທັກສະແລະເປັນວິທະຍາສາດ ໃນການວາງຕົວບັນຫາຂອງປະທານໂຮ່ຈີມິນ ກ່ຽວກັບການພົວພັນລະຫວ່າງການເມືອງ ແລະ ການທະຫານໃນການກໍ່ສ້າງກອງທັບປະຊາຊົນຫວຽດນາມ. ການຕໍ່ສູ້ກັບສັດຕູແລະໄຊຊະນະແມ່ນພາລະກິດສູງສຸດຂອງກອງທັບ. ກອງທັບຈະ “ບໍ່ມີປະໂຫຍດ” ຖ້າບໍ່ສາມາດເຮັດພາລະກິດນັ້ນໃຫ້ສໍາເລັດໄດ້. ກອງທັບສູ້ຮົບແລະຕໍ່ສູ້ຕ້ານສັດຕູແມ່ນປະຕິບັດໜ້າທີ່ການທະຫານຂອງພັກກອມມູນິດຫວຽດນາມ, ບົນພື້ນຖານທັດສະນະ ແລະແນວທາງຂອງພັກ, ພາຍໃຕ້ການນຳພາຂອງພັກ, ເພື່ອເປົ້າໝາຍການເມືອງຂອງພັກ. ການຫ່າງເຫີນຈາກສິ່ງເຫຼົ່ານັ້ນ ຈະເຮັດໃຫ້ການສູ້ຮົບຂອງກອງທັບແລະການຕໍ່ສູ້ຕ້ານສັດຕູສູນເສຍທິດທາງການເມືອງ ແລະປະຕິບັດການທາງທະຫານຂອງກອງທັບຈະບໍ່ພຽງແຕ່ “ບໍ່ມີປະໂຫຍດ” ເທົ່ານັ້ນ ແຕ່ຍັງ “ເປັນອັນຕະລາຍ”. ດັ່ງນັ້ນ, ປະທານໂຮ່ຈີມິນ ຮຽກຮ້ອງວ່າ: “ຕ້ອງຮ່ຳຮຽນການເມືອງ: ການທະຫານບໍ່ມີການເມືອງຄືກັບຕົ້ນໄມ້ທີ່ບໍ່ມີຮາກ, ບໍ່ມີປະໂຫຍດ ແຕ່ເປັນອັນຕະລາຍ. ກອງທັບຂອງພວກເຮົາແມ່ນກອງທັບປະຊາຊົນ. ປະຊາຊົນມີພັກນຳພາ, ພັກມີໂຄງການການເມືອງ ແລະນະໂຍບາຍ. ເມື່ອເປັນກອງທັບປະຊາຊົນແມ່ນຕ້ອງຮຽນຮູ້ນະໂຍບາຍຂອງພັກ”(11).
ທີສີ່, ຮັບຮູ້ສາຍພົວພັນລະຫວ່າງການເມືອງແລະການທະຫານຢ່າງຖືກຕ້ອງ ແລະແກ້ໄຂສາຍພົວພັນນັ້ນຢ່າງດີ ແມ່ນຄວາມຮຽກຮ້ອງຕ້ອງການພື້ນຖານໃນການກໍ່ສ້າງກອງທັບ. ກ່ຽວກັບບັນຫານີ້, ປະທານໂຕ່ຈີມິນຢືນຢັນວ່າ: “ຖ້າອ້າຍນ້ອງມີແນວຄິດທີ່ເຂັ້ມແຂງ, ການເມືອງທີ່ໝັ້ນຄົງ, ເຕັກໂນໂລຢີທີ່ດີ ແລະ ຮ່າງກາຍທີ່ແຂງແຮງ ພວກອ້າຍນ້ອງຈະຊະນະຢ່າງແນ່ນອນ. ໃນທາງກົງກັນຂ້າມ, ຖ້າອ້າຍນ້ອງເກັ່ງທາງການເມືອງ ແຕ່ອ່ອນແອທາງການທະຫານ, ຫຼືເກັ່ງທາງການເມືອງແລະການທະຫານ ແຕ່ອ່ອນແອທາງຮ່າງກາຍ ອ້າຍນ້ອງຈະບໍ່ສາມາດຊະນະໄດ້”(12). ຄວາມເຂັ້ມແຂງຂອງກອງທັບແມ່ນຜົນລວມຂອງວຽກງານທຸກດ້ານທັງດ້ານການກໍ່ສ້າງ, ການສຶກສາ, ການຝຶກອົບຮົມ ແລະ ວຽກງານອື່ນໆ. ນັ້ນແມ່ນທິດນຳຂອງການກໍ່ສ້າງ “ກອງທັບທີ່ແທ້ຈິງ” ຂອງພັກ ແລະ ປະທານໂຮ່ຈີມິນ: “ໃນວຽກງານກໍ່ສ້າງແລະພັດທະນາກອງທັບ, ພວກເຮົາຕ້ອງອອກແຮງຊຸກຍູ້ການກໍ່ສ້າງ ແລະປັບປຸງວຽກງານການເມືອງ ແລະການທະຫານ ໃນກອງທະຫານຂອງພວກເຮົາ. ຕ້ອງປັບປຸງຍົກສູງຄວາມຕື່ນຕົວດ້ານການເມືອງ, ຍົກສູງຍຸດທະວິທີແລະເຕັກນິກ, ປັບປຸງຍົກສູງວິໄນຕື່ນຕົວ ຂອງທະຫານຂອງເຮົາ. ພວກເຮົາສ້າງກອງທັບຂອງພວກເຮົາໃຫ້ກາຍເປັນກອງທັບທີ່ແທ້ຈິງຂອງປະຊາຊົນ (13).
ປະທານໂຮ່ຈີມິນບໍ່ໄດ້ຖືດ້ານການເມືອງເປັນເດັດຖານ, ແຕ່ເພິ່ນມັກເນັ້ນໜັກວ່າ ວຽກງານການເມືອງກຳນົດຄວາມເຂັ້ມແຂງທາງການເມືອງຂອງກອງທັບໂດຍກົງ; ຄວາມຕັດສິນຊີ້ຂາດນັ້ນສະທ້ອນໃຫ້ເຫັນໃນວຽກງານການທະຫານ ເຕັກນິກ ແລະ ວຽກງານຂົນສົ່ງ ແລະເປັນທິດທາງໃນການປັບປຸງປະສິດທິພາບ ແລະຄຸນນະພາບຂອງວຽກງານດ້ານອື່ນໆທັງໝົດ. ເພິ່ນຢືນຢັນວ່າ: “ຖ້າເຮົາຕ້ອງການໃຫ້ກອງທັບຂອງເຮົາຕັດສິນໃຈສູ້ຮົບ, ຕັດສິນໃຈຍາດເອົາຊະນະຫຼາຍກວ່າອີກ ເຮົາຕ້ອງເບິ່ງແຍງດູແລຊີວິດວັດຖຸຂອງພວກເຂົາ, ປັບປຸງຍົກສູງລະດັບຍຸດໂທບາຍແລະເຕັກນິກຂອງພວກເຂົາ, ໂດຍສະເພາະແມ່ນການອົບຮົມສຶກສາທາງການເມືອງ, ເຮັດໃຫ້ພວກເຂົາມີ ຫຼັກໝັ້ນທີ່ໝັ້ນຄົງ, ຫຼັກໝັ້ນກອງທັບຂອງປະຊາຊົນ ທີ່ນຳໂດຍຊົນຊັ້ນກຳມະກອນ”(14). ກຳລັງແຮງສູ້ຮົບຂອງກອງທັບແມ່ນຜົນລວມຂອງວຽກງານທຸກດ້ານ, ໃນນັ້ນວຽກງານການເມືອງມີບົດບາດສຳຄັນເປັນພິເສດ, ເພາະຕາມຄວາມເຫັນຂອງເພິ່ນວ່າ “ການເມືອງແມ່ນຈິດວິນຍານ, ຜູ້ບັນຊາການ”(15).
ແນວຄິດໂຮ່ຈີມິນກ່ຽວກັບ “ການເມືອງສຳຄັນກວ່າການທະຫານ” ມີຄຸນຄ່າທາງປະຫວັດສາດ ແລະຍຸກສະໄໝຕໍ່ການປະຕິວັດຫວຽດນາມເວົ້າລວມ, ຕໍ່ພາລະກິດການກໍ່ສ້າງ, ສູ້ຮົບ ແລະ ເຕີບໃຫຍ່ເຂັ້ມແຂງ ຂອງກອງທັບປະຊາຊົນຫວຽດນາມເວົ້າສະເພາະ. ໃນປະຫວັດສາດການປະຕິວັດ ໂດຍສະເພາະການປະຕິວັດເດືອນສິງຫາປີ 1945, ພັກກອມມູນິດຫວຽດນາມ ແລະ ປະທານໂຮ່ຈີມິນ ໄດ້ກໍ່ສ້າງກຳລັງການເມືອງທີ່ເຂັ້ມແຂງແຮງກ້າ, ສົມທົບຢ່າງແໜ້ນແຟ້ນລະຫວ່າງກຳລັງການເມືອງ ກັບກຳລັງປະກອບອາວຸດ; ສົມທົບການລຸກຮືຂຶ້ນຂອງມະຫາຊົນ ກັບການບຸກໂຈມຕີຂອງກຳລັງປະກອບອາວຸດປະຕິວັດ ຢູ່ຊົນນະບົດ ແລະໃນຕົວເມືອງ, ໃນນັ້ນ ການລຸກຮືຂຶ້ນຂະໜາດໃຫຍ່ຢູ່ນະຄອນຮ່າໂນ້ຍ ເຫວ້ ໄຊ່ງ່ອນ ມີບົດບາດຕັດສິນຊີ້ຂາດ. ໄຊຊະນະໃນການປະຕິວັດເດືອນສິງຫາປີ 1945 ແມ່ນຜົນຂອງການປະສານສົມທົບບັນດາຮູບການຕໍ່ສູ້ທັງໝົດທາງດ້ານເສດຖະກິດ ການເມືອງ ວັດທະນະທຳ ການທູດ ແລະ ການທະຫານ ເຊິ່ງການຕໍ່ສູ້ທາງການເມືອງແມ່ນປັດໄຈສຳຄັນທີ່ສຸດ, ເພາະວ່າ “ການເມືອງສຳຄັນກວ່າການທະຫານ” ດັ່ງທີ່ປະທານໂຮ່ຈີມິນໄດ້ຢືນຢັນ. ໃນເກືອບ 80 ປີທີ່ຜ່ານມາ, ຍ້ອນໄດ້ຊາບຊຶມແລະໝູນໃຊ້ແນວຄິດ “ການເມືອງສຳຄັນກວ່າການທະຫານ” ຂອງປະທານໂຮ່ຈີມິນ, ກອງທັບປະຊາຊົນຫວຽດນາມ ໄດ້ສຳເລັດພາລະກິດເປັນແກນນຳໃນການຕໍ່ຕ້ານ, ປົດປ່ອຍຊາດ, ປົກປັກຮັກສາ ແລະ ກໍ່ສ້າງປະເທດຊາດ; ຮັກສາແລະເສີມຂະຫຍາຍທາດແທ້ຂອງຊົນຊັ້ນກຳມະກອນ, ລັກສະນະປະຊາຊົນ ແລະ ລັກສະນະຊາດຢ່າງເລິກເຊິ່ງ; ເປັນເຄື່ອງມືຄວາມຮຸນແຮງທີ່ແຫຼມຄົມຢ່າງແທ້ຈິງ, ເປັນກຳລັງການເມືອງທີ່ຈົງຮັກພັກດີ ແລະ ໄວ້ວາງໃຈໄດ້ຢ່າງແທ້ຈິງ ຂອງພັກ, ລັດ ແລະ ປະຊາຊົນ. ກອງທັບຍາມໃດກໍ່ຜູກພັນສະໜິດແໜ້ນກັບປະຊາຊົນ, ຊ່ວຍເຫຼືອປະຊາຊົນໃນການປ້ອງກັນແລະຕ້ານໄພທຳມະຊາດ, ພະຍາດລະບາດ, ກູ້ໄພກູ້ຊີບ, ປະຕິບັດພັນທະສາກົນຢ່າງດີ..., ເພີ່ມຄວາມສະຫວ່າງສະໄຫວໃຫ້ກັບປະເພນີ ແລະຄຸນສົມບັດອັນດີງາມຂອງ “ທະຫານຂອງລຸງໂຮ່”, ສົມຄວນໄດ້ຮັບຄຳຍ້ອງຍໍສັນລະເສີນຂອງປະທານໂຮ່ຈີມິນ ທີ່ວ່າ: “ກອງທັບຂອງພວກເຮົາຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ພ້ອມແລ້ວທີ່ຈະຕໍ່ສູ້ ແລະ ເສຍສະຫຼະເພື່ອເອກະລາດແລະເສລີພາບຂອງປະເທດຊາດ, ເພື່ອສັງຄົມນິຍົມ. ເຮັດສຳເລັດທຸກໆພາລະກິດ, ຜ່ານຜ່ານຄວາມຫຍຸ້ງຍາກລຳບາກທຸກຢ່າງ ແລະ ເອົາຊະນະສັດຕູທຸກຕົວ”(16).
ສືບຕໍ່ໝູນໃຊ້ແລະພັດທະນາແນວຄິດຂອງປະທານໂຮ່ຈີມິນກ່ຽວກັບ “ການເມືອງສຳຄັນກວ່າການທະຫານ”
ຢ່າງປະດິດສ້າງ ໃນການກໍ່ສ້າງກອງທັບປະຊາຊົນຫວຽດນາມທີ່ຊຳນານທາງການເມືອງ ໃນສະພາບການໃໝ່
ໃນຂະບວນການນຳພາກອງທັບ ໂດຍສະເພາະ ໃນໄລຍະປ່ຽນແປງໃໝ່, ແນວຄິດທີ່ຈະກໍ່ສ້າງກອງທັບໃຫ້ມີຄວາມຊຳນານ ແລະໝັ້ນຄົງ ທາງການເມືອງຂອງພັກກອມມູນິດຫວຽດນາມ ໄດ້ເປັນຮູບເປັນຮ່າງເທື່ອລະກ້າວ ໂດຍຕິດກັນທິດທາງການກໍ່ສ້າງກອງທັບທີ່ “ປະຕິວັດ, ເປັນແບບຫຼວງ, ຊຳນານການຮົບ ແລະທັນສະໄໝ”. ຄວາມຊຳນານທາງການເມືອງຂອງກອງທັບແມ່ນຄວາມຍຶດໝັ້ນ, ໜັກແໜ້ນ, ສ້ຽມແຫຼມ ແລະສຳຜັດໄວທາງການເມືອງຂອງກອງທັບໃນລະດັບສູງ, ຮັບປະກັນໃຫ້ກອງທັບປະສົບຜົນສຳເລັດທຸກໜ້າທີ່ໃນທຸກສະພາບການ; ເປັນກຳລັງການເມືອງ, ກຳລັງສູ້ຮົບທີ່ບໍລິສຸດ, ຈົງຮັກພັກດີ, ໄວ້ເນື້ອເຊື່ອໃຈໄດ້, ເປັນ “ບ່ອງອີງ” ທີ່ໝັ້ນຄົງຂອງພັກ, ລັດ ແລະ ປະຊາຊົນ. ນັ້ນແມ່ນຄວາມຕ້ອງການສູງກ່ຽວກັບການຍຶດໝັ້ນໃນລັດທິມາກ-ເລນິນ, ແນວຄິດໂຮ່ຈີມິນ ໃນການກໍ່ສ້າງແລະຈັດຕັ້ງປະຕິບັດພາລະບົດບາດ ແລະໜ້າທີ່ຂອງກອງທັບ; ການຍຶດໝັ້ນໃນທາດແທ້ຂອງຊົນຊັ້ນກຳມະກອນ, ລັກສະນະປະຊາຊົນ ແລະລັກສະນະຊາດຂອງກອງທັບ; ຄວາມຈົງຮັກພັກດີຂອງກອງທັບຕໍ່ປະເທດຊາດຫວຽດນາມສັງຄົມນິຍົມ, ຕໍ່ພັກກອມມູນິດຫວຽດນາມ, ລັດແຫ່ງສາທາລະນະລັດສັງຄົມນິຍົມຫວຽດນາມ ແລະ ປະຊາຊົນຫວຽດນາມໃນທຸກສະຖານະການ. ຄວາມຊຳນາມທາງການເມືອງຕ້ອງໄດ້ຮັບການກໍ່ສ້າງບົນພື້ນຖານ ແລະ ຍົກລະດັບຂຶ້ນສູ່ລະດັບສູງໃໝ່ ດ້ວຍການກໍ່ສ້າງກອງທັບທີ່ເຂັ້ມແຂງທາງດ້ານການເມືອງ.
ພາລະກິດການກໍ່ສ້າງກອງທັບໃນປະຈຸບັນ ແລະໃນເວລາຕໍ່ໜ້າເກີດຂຶ້ນໃນສະພາບການສາກົນແລະໃນປະເທດ ທີ່ມີທັງໂອກາດແລະຄວາມທ້າທາຍທີ່ກ່ຽວພັນກັນ. ສະຖານະການໂລກແລະພາກພື້ນ ຈະສືບຕໍ່ມີການພັດທະນາທີ່ສັບສົນ ແລະບໍ່ສາມາດຄາດເດົາໄດ້. ການແກ່ງແຍ້ງຍຸດທະສາດລະຫວ່າງບັນດາປະເທດໃຫຍ່, ການປະທະກັນດ້ວຍອາວຸດ, ສົງຄາມກາງເມືອງຢູ່ບາງພາກພື້ນຂອງໂລກ ພວມເກີດຂຶ້ນຢ່າງຮ້າຍແຮງ ໃນຫຼາຍຮູບຫຼາຍແບບ, ຫຼາຍຂັ້ນ, ສົ່ງຜົນກະທົບເຖິງສະພາບການເມືອງ, ຈິດໃຈ ແລະ ຈິດຕະສາດຂອງພະນັກງານ, ນັກຮົບໃນກອງທັບ. ການຂັດແຍ້ງກ່ຽວກັບອະທິປະໄຕດ້ານອານາເຂດ ທະເລ ໝູ່ເກາະ, ພິເສດແມ່ນຢູ່ພາກພື້ນອາຊີປາຊີຟິກ ສືບຕໍ່ກໍ່ໃຫ້ເກີດຄວາມສ່ຽງຫຼາຍຢ່າງ; ໄພພິບັດທາງທຳມະຊາດ, ໂລກລະບາດ ແລະ ບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ ກໍ່ໃຫ້ເກີດຄວາມທ້າທາຍທີ່ສຳຄັນຕໍ່ກອງທັບໂດຍສະເພາະ ແລະ ຕໍ່ປະເທດໂດຍລວມຫຼາຍຂຶ້ນເລື້ອຍໆ.
ໃນປະເທດ, ພາຍຫຼັງເກືອບ 40 ປີແຫ່ງການປ່ຽນແປງໃໝ່, ຄຽງຂ້າງບັນດາຜົນງານອັນໃຫຍ່ຫຼວງ ແລະ ສຳຄັນທາງປະຫວັດສາດ, ປະເທດຍັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ. ຄວາມສ່ຽງສີ່ປະການທີ່ພັກຊີ້ໃຫ້ເຫັນຍັງຄົງມີຢູ່ ແລະຮຸນແຮງກວ່ານັ້ນອີກ. ການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ພະຍາດອາດຍາສິດ, ຄວາມເສື່ອມໂຊມທາງແນວຄິດການເມືອງ, ຄຸນສົມບັດສິນທຳ, ວິຖີຊີວິດ, “ການປ່ຽນແປງຕົນເອງ”, “ການຫັນປ່ຽນຕົນເອງ” ພາຍໃນມີຜົນກະທົບສຳຄັນຕໍ່ສະພາວະແນວຄິດການເມືອງຂອງພະນັກງານແລະນັກຮົບໃນກອງທັບ. ບັນດາອິດທິກຳລັງສັດຕູສືບຕໍ່ຍູ້ແຮງການເຄື່ອນໄຫວທຳລາຍການປະຕິວັດຫວຽດນາມ. ສໍາລັບກອງທັບ, ພວກເຂົາເອົາໃຈໃສ່ທຳລາຍຮາກຖານແນວຄິດຂອງພັກ, ຊຸກຍູ້ການ “ແຍກການເມືອງຈາກກອງທັບ”..., ເຮັດໃຫ້ພະນັກງານ ແລະ ນັກຮົບສ່ວນໜຶ່ງຕົກຢູ່ໃນ “ການປ່ຽນແປງຕົນເອງ”, “ການຫັນປ່ຽນຕົນເອງ” ໄດ້ງ່າຍ ຖ້າບໍ່ໄດ້ຮັບການຝຶກຝົນຫຼໍ່ຫຼອມ ບຳລຸງສ້າງຢ່າງເປັນປະຈຳ.
ໜ້າທີ່ກໍ່ສ້າງກອງທັບ, ປັບປຸງການປ້ອງກັນປະເທດ ແລະປົກປັກຮັກສາປະເທດຊາດໃນສະພາບການໃໝ່ ກຳນົດຄວາມຕ້ອງການໃໝ່ທີ່ສູງກວ່າ ສຳລັບວຽກງານການຈັດຕັ້ງກຳລັງ, ພິເສດແມ່ນ ຄວາມຕ້ອງການໃນການດັດປັບການຈັດຕັ້ງກຳລັງ, ການກໍ່ສ້າງກອງທັບທີ່ປອດໃສ, ກະທັດລັດ ແລະ ເຂັ້ມແຂງ, ເພື່ອໃຫ້ບັນລຸເປົ້າໝາຍ “ສູ້ຊົນພາຍໃນປີ 2030 ສ້າງກອງທັບປະຊາຊົນ ແລະ ຕຳຫຼວດະຊາຊົນທີ່ປະຕິວັດ, ເປັນແບບຫຼວງ, ຊຳນານການຮົບ ແລະທັນສະໄໝ”(17).
ໃນສະພາບການໃໝ່, ບັນຫາການກໍ່ສ້າງກອງທັບທີ່ຊຳນານດ້ານການເມືອງພວມກາຍເປັນເລື່ອງຮີບດ່ວນ ເພື່ອປັບປຸງຄວາມໝັ້ນຄົງແລະຄວາມສ້ຽມແຫຼມທາງການເມືອງຂອງກອງທັບ, ເປັນພື້ນຖານເພື່ອປັບປຸງຍົກສູງກຳລັງແຮງສັງລວມ ແລະກຳລັງແຮງສູ້ຮົບ, ຮັບປະກັນໃຫ້ກອງທັບເປັນເຄື່ອງມືຄວາມຮຸນແຮງອັນແຫຼມຄົມສະເໝີ, ແມ່ນກຳລັງການເມືອງທີ່ເຊື່ອຖືໄດ້ຂອງພັກແລະລັດ, ພ້ອມແລ້ວທີ່ຈະຮັບ ແລະ ປະຕິບັດສຳເລັດທຸກວຽກງານທີ່ພັກ, ລັດ ແລະ ປະຊາຊົນມອບໝາຍໃຫ້. ເພື່ອໝູນໃຊ້ແລະພັດທະນາແນວຄິດໂຮ່ຈີມິນກ່ຽວກັບ “ການເມືອງສຳຄັນກວ່າການທະຫານ” ຢ່າງປະດິດສ້າງ ໃນການກໍ່ສ້າງກອງທັບທີ່ຊຳນານທາງການເມືອງໃນໄລຍະໃໝ່, ຈຳເປັນຕ້ອງສຸມໃສ່ປະຕິບັດບັນດາເນື້ອໃນ ແລະວິທີແກ້ໄຂຕໍ່ໄປນີ້ ໃຫ້ໄດ້ເປັນຢ່າງດີ:
ທີໜຶ່ງ, ເພີ່ມທະວີການນຳພາຢ່າງເດັດຂາດ ໂດຍກົງ ໃນທຸກດ້ານຂອງພັກ ຕໍ່ກອງທັບ, ຮັບປະກັນໃຫ້ກອງທັບມີຄວາມຈົງຮັກພັກດີຕໍ່ປະເທດຊາດ, ພັກ, ລັດ ແລະ ປະຊາຊົນຢ່າງເດັດຂາດ.
ການຮັກສາແລະເພີ່ມທະວີການນຳພາຂອງພັກຕໍ່ກອງທັບໃນສະພາບການໃໝ່ ຮຽກຮ້ອງໃຫ້ຄະນະພັກ ແລະຜູ້ບັນຊາການທຸກຂັ້ນໃນກອງທັບ ຕ້ອງກຳແໜ້ນ ແລະ ຊາບຊຶມຢ່າງເລິກເຊິ່ງ ທັດສະນະ ແນວທາງຂອງພັກ, ຄຳສັ່ງ ມະຕິ ຂໍ້ສະຫຼຸບຂອງກົມການເມືອງສູນການ, ຄະນະເລຂາທິການສູນກາງ; ຄຳສັ່ງແລະຂໍ້ບັງຄັບຂອງກະຊວງປ້ອງກັນປະເທດ, ຂອງກົມໃຫຍ່ການເມືອງ ກ່ຽວກັບວຽກງານການທະຫານ, ການປ້ອງກັນປະເທດ, ການກໍ່ສ້າງກອງທັບໃຫ້ໝັ້ນຄົງເຂັ້ມແຂງທາງການເມືອງ ແລະ ການຈັດຕັ້ງກອງທັບໃຫ້ສົດໃສ ກະທັດລັດ ແລະເຂັ້ມແຂງ...; ເປັນເຈົ້າການໃນການປະສານງານກັບບັນດາຂັ້ນ ຂະແໜງການ ທ້ອງຖິ່ນ ເພື່ອຜັນຂະຫຍາຍປະຕິບັດຢ່າງເຂັ້ມງວດແລະມີປະສິດທິພາບ. ເອົາໃຈໃສ່ກໍ່ສ້າງຄະນະພັກກອງທັບໃຫ້ເຂັ້ມແຂງຢ່າງແທ້ຈິງໃນດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ; ມີຄວາມສາມາດນຳພາ ແລະ ກຳລັງແຮງສູ້ຮົບສູງ, ນຳພາບັນດາອົງການ, ຫົວໜ່ວຍປະຕິບັດສຳເລັດທຸກໜ້າທີ່ໃນສະພາບການໃໝ່. ຄະນະພັກແລະອົງການຈັດຕັ້ງພັກທຸກຂັ້ນ ຕ້ອງສືບຕໍ່ປະຕິບັດຢ່າງເຂັ້ມງວດ ມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ແລະ XII ແລະ ບົດສະຫຼຸບເລກທີ 21-KL/TW ລົງວັນທີ 25 ຕຸລາ 2021 ຂອງກອງປະຊຸມສູນກາງພັກຄັ້ງທີ 4 ສະໄໝທີ XIII, ກ່ຽວກັບການຍູ້ແຮງການກໍ່ສ້າງແລະປັບປຸງພັກແລະລະບົບການເມືອງ; ສູ້ຊົນປະຕິບັດເປົ້າໝາຍສູງສຸດຄື ໃນຄະນະພັກການທະຫານຈະບໍ່ມີພະນັກງານ, ສະມາຊິກພັກທີ່ເສື່ອມໂຊມດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ, ບໍ່ມີປາກົດການຂອງ “ການປ່ຽນແປງຕົນເອງ”, “ການຫັນປ່ຽນຕົນເອງ”, ລະເມີດກົດຂໍ້ບັງຄັບກ່ຽວກັບສິ່ງທີ່ສະມາຊິກພັກບໍ່ໄດ້ຮັບອນຸຍາດໃຫ້ເຮັດ.
ທີສອງ, ສືບຕໍ່ປ່ຽນແປງໃໝ່, ຍົກສູງຄຸນນະພາບການອົບຮົມສຶກສາການເມືອງ, ຮັກສາຮາກຖານແນວຄິດຂອງພັກໃນກອງທັບ.
ຄະນະພັກ, ຜູ້ບັນຊາການບັນດາອົງການ, ຫົວໜ່ວຍທົ່ວກອງທັບ ຕ້ອງເພີ່ມທະວີການນຳພາ ຊີ້ນຳວຽກງານອົບຮົມສຶກສາການເມືອງ ແນວຄິດ. ສຸມໃສ່ປ່ຽນແປງໃໝ່ເນື້ອໃນ ແລະວິທີການ ເພື່ອຍົກສູງຄຸນນະພາບການອົບຮົມສຶກສາການເມືອງ ແລະກຳນົດທິດທາງແນວຄິດຕາມຄຳສັ່ງເລກທີ 2423-CT/QUTW ລົງວັນທີ 9 ພຶດສະພາ 2023 ຂອງຄະນະປະຈຳຄະນະພັກການທະຫານສູນກາງ “ວ່າດ້ວຍການປ່ຽນແປງໃໝ່, ຍົກສູງຄຸນນະພາບຂອງວຽກງານອົບຮົມສຶກສາການເມືອງໃນໄລຍະໃໝ່”. ອົບຮົມສຶກສາເປັນປະຈຳໃຫ້ພະນັກງານ ສະທາຊິກພັກກຳແໜ້ນບັນດາບັນຫາພື້ນຖານກ່ຽວກັບລັດທິມາກ-ເລນິນ, ແນວຄິດໂຮ່ຈີມິນ, ແຜນນະໂຍບາຍແລະແນວທາງຂອງພັກ, ນະໂຍບາຍແລະກົດໝາຍຂອງລັດ, ໜ້າທີ່ຂອງການປະຕິວັດ, ຂອງກອງທັບແລະກົມກອງ. ໃຫ້ຄວາມສຳຄັນກັບການຍົກສູງລະດັບຄວາມຕື່ນຕົວປະຕິວັດ, ຄວາມກ້າຫານທາງການເມືອງ, ຄວາມຍຶດໝັ້ນໃນເປົ້າໝາຍເອກະລາດແຫ່ງຊາດ ແລະລັດທິສັງຄົມນິຍົມ, ຈົງຮັກພັກດີຢ່າງເດັດຂາດຕໍ່ພັກ ປະເທດຊາດ ແລະປະຊາຊົນ; ຝຶກຝົນຫຼໍ່ຫຼອມຄຸນສົມບັດສິນທໍາ ແລະວິຖີຊີວິດ, ຮັກສາແລະເສີມຂະຫຍາຍມູນເຊື້ອ “ທະຫານຂອງລຸງໂຮ່”; ສ້າງການປ່ຽນແປງຢ່າງແຂງແຮງ ໃນການກໍ່ສ້າງແບບຫຼວງ, ຈິດສຳນຶກປະຕິບັດວິໄນຂອງກອງທັບ ແລະ ກົດໝາຍຂອງລັດ ໃຫ້ແກ່ພະນັກງານ, ນັກຮົບທຸກຄົນ. ດຳເນີນການໂຄສະນາແລະສຶກສາຢ່າງເປັນປະຈຳ ໃຫ້ທະຫານມີຄວາມຮັບຮູ້ຢ່າງເລິກເຊິ່ງ ກ່ຽວກັບທາດແທ້, ແຜນງານ, ກົນອຸບາຍຂອງບັນດາອິດທິກຳລັງສັດຕູ ທີ່ຕ້ານຢັນທຳລາຍພັກ ລັດ ແລະກອງທັບເຮົາ; ເຂົ້າໃຈທັດສະນະຂອງພັກກ່ຽວກັບຄູ່ຮ່ວມມື ແລະເປົ້າໝາຍຂອງການປະຕິວັດຫວຽດນາມຢ່າງຈະແຈ້ງ; ຍົກສູງຈິດໃຈລະວັງຕົວປະຕິວັດ, ຍຶດໝັ້ນໃນເປົ້າໝາຍເອກະລາດແຫ່ງຊາດ ແລະ ລັດທິສັງຄົມນິຍົມສະເໝີ.
ທີສາມ, ເພີ່ມທະວີທາດແທ້ຊົນຊັ້ນກຳມະກອນ, ລັກສະນະປະຊາຊົນ ແລະລັກສະນະຊາດຂອງກອງທັບໃນສະພາບການໃໝ່.
ການຮັກສາທາດແທ້ປະຕິວັດ, ປັບປຸງຄວາມເປັນເອກະພາບລະຫວ່າງທາດແທ້ຊົນຊັ້ນກຳມະກອນ, ລັກສະນະປະຊາຊົນ ແລະລັກສະນະຊາດຂອງກອງທັບ ແມ່ນເງື່ອນໄຂທີ່ຮັບປະກັນໃຫ້ ກອງທັບປະຊາຊົນຫວຽດນາມເປັນກອງກຳລັງການເມືອງ, ກອງກຳລັງສູ້ຮົບທີ່ຈົງຮັກພັກດີແລະໄວ້ວາງໃຈໄດ້ ຂອງພັກ ລັດ ແລະປະຊາຊົນຕະຫຼອດໄປ. ໃນສະພາບການໃໝ່, ຕ້ອງເພີ່ມທະວີການອົບຮົມສຶກສາລັດທິມາກ-ເລນິນ, ແນວຄິດໂຮ່ຈີມິນ ແລະລັດທິຮັກຊາດທີ່ແທ້ຈິງ, ເຮັດໃຫ້ພະນັກງານແລະນັກຮົບທຸກຄົນ ມີຄວາມຮັບຮູ້ຢ່າງຈະແຈ້ງວ່າ ກອງທັບຂອງເຮົາແມ່ນກອງທັບແບບໃໝ່ຂອງຊົນຊັ້ນກຳມະກອນ ທີ່ມາຈາກປະຊາຊົນ ແລະ ຕໍ່ສູ້ເພື່ອປະຊາຊົນ; ຊາບຊຶມຢ່າງເລິກເຊິ່ງເປົ້າໝາຍ ແລະ ອຸດົມຄະຕິແຫ່ງການຕໍ່ສູ້ເພື່ອເອກະລາດແຫ່ງຊາດ ແລະລັດທິສັງຄົມນິຍົມ. ສູ້ຊົນໃນທຸກສະພາບການ, ລັດທິມາກ-ເລນິນ, ແນວຄິດໂຮ່ຈີມິນ ຍາມໃດກໍ່ຖືບົດບາດນຳພາໃນຊີວິດການເມືອງແລະຈິດໃຈຂອງກອງທັບ; ກອງທັບທັງໝົດມີຄວາມເປັນເອກະພາບສູງທາງການເມືອງ ແລະແນວຄິດຢູ່ສະເໝີ; ຍາມໃດກໍ່ຍຶດໝັ້ນກັບຮາກຖານແນວຄິດຂອງພັກ, ຕໍ່ສູ້ຕ້ານຄວາມເສື່ອມໂຊມດ້ານແນວຄິດການເມືອງ. ເພີ່ມທະວີສາຍພົວພັນອັນສະໜິດສະໜົມລະຫວ່າງກອງທັບ ແລະ ປະຊາຊົນ ຕາມຊື່ທີ່ລຸງໂຮ່ຕັ້ງໃຫ້ ຄື ກອງທັບປະຊາຊົນ ເຊິ່ງມີຄວາມໝາຍເລິກເຊິ່ງວ່າ ກອງທັບມາຈາກປະຊາຊົນ, ເຮັດໜ້າທີ່ເພື່ອຮັບໃຊ້ປະຊາຊົນ.
ທີສີ່, ເພີ່ມທະວີການສ້າງຄວາມສາມັກຄີພາຍໃນ, ຄວາມສາມັກຄີລະຫວ່າງທະຫານແລະປະຊາຊົນ ແລະ ຄວາມສາມັກຄີສາກົນ ໃນການກໍ່ສ້າງກອງທັບທີ່ຊຳນານທາງການເມືອງ.
ຄະນະພັກ, ຜູ້ບັນຊາການການເມືອງ, ກຳມະການການເມືອງ, ຜູ້ບັງຄັບບັນຊາທຸກຂັ້ນ ຕ້ອງເຊີດຊູຄວາມຮັບຜິດຊອບຢ່າງແທ້ຈິງໃນການນຳພາ, ການຈັດຕັ້ງກໍ່ສ້າງຈິດໃຈສາມັກຄີພາຍໃນ ແລະ ຄວາມສາມັກຄີລະຫວ່າງທະຫານແລະປະຊາຊົນ; ດຳເນີນງານຢ່າງຈິງຈັງເພື່ອປະຕິບັດແຜນງານປະຕິບັດມະຕິເລກທີ 25-NQ/TW ລົງວັນທີ 3 ມິຖຸນາ 2013, ຂອງກອງປະຊຸມຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ XI ວ່າດ້ວຍ “ການເພີ່ມທະວີ ແລະປ່ຽນແປງໃໝ່ການນຳພາຂອງພັກ ຕໍ່ວຽກງານຂົນຂວາຍປະຊາຊົນໃນສະພາບການໃໝ່” ຂອງຄະນະພັກການທະຫານສູນກາງ ແລະຂັ້ນຂອງຕົນ ດ້ວຍວຽກງານທີ່ແທດຈິງ, ສອດຄ່ອງກັບພາລະບົດບາດ, ໜ້າທີ່ ແລະພື້ນທີ່ຕັ້ງທັບ. ເອົາໃຈໃສ່ເຮັດໃຫ້ພະນັກງານ, ນັກຮົບທຸກຄົນ ເຂົ້າໃຈຢ່າງຈະແຈ້ງກ່ຽວກັບຈຸດປະສົງ, ຄວາມໝາຍ, ຄວາມສຳຄັນ ຂອງວຽກງານຂົນຂວາຍມະຫາຊົນ ແລະ ພະຍາຍາມສູ້ຊົນ ເສີມຂະຫຍາຍທາດແທ້ ແລະມູນເຊື້ອອັນດີງາມຂອງ “ທະຫານຂອງລຸງໂຮ່” ໃນຈິດໃຈຂອງປະຊາຊົນ. ໃນທຸກສະພາບການ, ຕ້ອງເອົາໃຈໃສ່ ເບິ່ງແຍງດູແລຢ່າງເປັນປະຈຳ ເຖິງການກໍ່ສ້າງແລະປັບປຸງສາຍພົວພັນລະຫວ່າງທະຫານແລະປະຊາຊົນ ບົນພື້ນຖານແຜນນະໂຍບາຍແລະແນວທາງຂອງພັກ, ນະໂຍບາຍແລະກົດໝາຍຂອງລັດ; ສຸມໃສ່ເສີມຂະຫຍາຍບັນດາເງື່ອນໄຂທີ່ດີ ເພື່ອຮັບປະກັນການພົວພັນລະຫວ່າງທະຫານແລະປະຊາຊົນນັບມື້ນັບແໜ້ນແຟ້ນ; ພະຍາຍາມຫຼຸດການລະເມີດວິໄນຂອງທະຫານໃນການພົວພັນກັບປະຊາຊົນ, ຮັກສາແລະເສີມຂະຫຍາຍພາບລັກສະນະອັນສູງສົ່ງຂອງ “ທະຫານຂອງລຸງໂຮ່” ຢູ່ໃນໃຈປະຊາຊົນ.
ທີ່ຫ້າ, ເບິ່ງແຍງດູແລການກໍ່ສ້າງອົງການ, ກຳລັງ ແລະ ກໍ່ສ້າງຖັນແຖວພະນັກງານທະຫານທີ່ຊຳນານທາງການເມືອງຢ່າງແທ້ຈິງ.
ສຸມໃສ່ກໍ່ສ້າງລະບົບອົງການພັກ, ອົງການບັງຄັບບັນຊາ, ອົງການຈັດຕັ້ງມະຫາຊົນ ແລະ ໜ່ວຍງານໃນກອງທັບ ໃຫ້ເຂັ້ມແຂງຮອບດ້ານ, “ເປັນແບບຢ່າງ, ແບບສະບັບ”, ຕອບສະໜອງຄວາມຮຽກຮ້ອງຕ້ອງການຂອງການກໍ່ສ້າງກອງທັບທີ່ຊຳນານດ້ານການເມືອງ. ເອົາໃຈໃສ່ກໍ່ສ້າງຖັນແຖວພະນັກງານທະຫານທີ່ເປັນແບບຢ່າງ ແລະ ຊຳນານດ້ານການເມືອງຢ່າງແທ້ຈິງ. ຄະນະພັກ ແລະອົງການຈັດຕັ້ງພັກທຸກຂັ້ນ ປະຕິບັດຕາມຂະບວນການເຮັດວຽກງານພະນັກງານ, ຮັບປະກັນປະຊາທິປະໄຕ, ພາວະວິໄສ, ເໝາະສົມກັບຄົນ, ເໝາະສົມກັບວຽກງານໃນທຸກຂັ້ນຕອນ: ການຄົ້ນພົບ, ການວາງແຜນ, ການສ້າງແຫຼ່ງ, ການຝຶກອົບຮົມ, ການບຳລຸງສ້າງ, ການຈັດວາງ ແລະການນໍາໃຊ້ພະນັກງານ. ປັບປຸງຍົກສູງຄຸນນະພາບການອົບຮົມສຶກສາແລະຝຶກຝົນພະນັກງານໃນໂຮງຮຽນ ກໍ່ຄືການຝຶກອົບຮົມກັບທີ່ ທັງທາງດ້ານແນວຄິດການເມືອງ, ຄຸນສົມບັດສິນທຳ, ວິຖີຊີວິດ ແລະ ວິຊາສະເພາະການທະຫານ. ເອົາໃຈໃສ່ກໍ່ສ້າງຄວາມກ້າຫານທາງການເມືອງ, ວິທີການ ແລະ ແບບແຜນການເຮັດວຽກ ຂອງຖັນແຖວພະນັກງານ. ປະຕິບັດເປັນຢ່າງດີ ການໝູນວຽນພະນັກງານລະຫວ່າງອົງການ, ຫົວໜ່ວຍ ແລະ ໂຮງຮຽນ ເພື່ອຝຶກອົບຮົມ ແລະ ທົດສອບພະນັກງານ, ຜ່ານນັ້ນ ສ້າງແຫຼ່ງພະນັກງານ. ເຮັດວຽກງານຄຸ້ມຄອງ, ສະແດງຄວາມຄິດເຫັນ ແລະ ຕີລາຄາພະນັກງານຢ່າງດີ, ຮັບປະກັນຄວາມເຂັ້ມງວດແລະແທ້ຈິງ, ເປັນພື້ນຖານໃຫ້ແກ່ການວາງແຜນ, ອົບຮົມສຶກສາ, ຝຶກຝົນຫຼໍ່ຫຼອມ, ຈັດວາງແລະນຳໃຊ້ພະນັກງານທີ່ເໝາະສົມ. ໃຫ້ຄວາມສຳຄັນກັບການກໍ່ສ້າງຖັນແຖວພະນັກງານຂັ້ນຍຸດທະສາດ ທີ່ປອດໃສແລະໄວ້ວາງໃຈໄດ້ຢ່າງແທ້ຈິງ, ມີຄວາມກ້າຫານທາງການເມືອງທີ່ໜັກແໜ້ນ, ມີຄວາມຄິດຍຸດທະສາດທີ່ສ້ຽມແຫຼມເປັນພິເສດ ແລະມີຄວາມສາມາດໃນການປະຕິບັດໜ້າທີ່ແລະວຽກງານຢ່າງດີເດັ່ນເປັນພິເສດ; ສຸດອົກສຸດໃຈແລະຈົງຮັກພັກດີທີ່ສຸດຕໍ່ພັກ, ປະເທດຊາດ ແລະ ປະຊາຊົນ. ໃນສະເພາະໜ້າ, ອົງຄະນະພັກກອງທັບຈະຕ້ອງເຮັດເປັນຢ່າງດີ ວຽກງານກະກຽມໃຫ້ກອງປະຊຸມໃຫຍ່ຂອງພັກທຸກຂັ້ນ ກ້າວໄປສູ່ກອງປະຊຸມໃຫຍ່ອົງຄະນະພັກກອງທັບພັກຄັ້ງທີ XII ແລະກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກ, ພິເສດແມ່ນ ການກະກຽມບຸກຄະລາກອນ ຕາມການຊີ້ນຳຂອງທ່ານເລຂາທິການໃຫຍ່ ຫງວຽນຝູຈ້ອງ ທີ່ກອງປະຊຸມຄັ້ງທຳອິດຂອງຄະນະອະນຸກຳມະການບຸກຄະລາກອນຂອງກອງປະຊຸມໃຫຍ່ຄັ້ງທີ XIV ຂອງພັກ (ວັນທີ 13 ມີນາ 2024), ປະກອບສ່ວນພ້ອມກັບທົ່ວພັກກໍ່ສ້າງ “ຄະນະບໍລິຫານງານສູນກາງພັກທີ່ເຂັ້ມແຂງ, ກົມການເມືອງສູນກາງທີ່ເຂັ້ມແຂງ, ຄະນະເລຂາທິການສູນກາງທີ່ເຂັ້ມແຂງ, ມີຄວາມສາມັກຄີຢ່າງແທ້ຈິງ ແລະ ເປັນເອກະພາບສູງ ອ້ອມຂ້າງການນຳຂອງພັກ ເພື່ອໃຫ້ສາມາດແບກຮັບຄວາມຮັບຜິດຊອບທີ່ສຳຄັນແລະມີກຽດຂອງພັກໄດ້ ນັ້ນແມ່ນນຳພາແລະເຮັດສຳເລັດພາລະກິດປະຫວັດສາດ ແລະໜ້າທີ່ການເມືອງຂອງຕົນ ແມ່ນຈັດຕັ້ງທົ່ວພັກ, ທົ່ວກອງທັບ ແລະ ທົ່ວປວງຊົນ ເພື່ອຕໍ່ສູ້ແລະຜ່ານຜ່າຄວາມຫຍຸ້ງຍາກລຳບາກທັງໝົດ, ກໍ່ສ້າງພັກເຮົາໃຫ້ບໍລິສຸດແລະໝັ້ນຄົງເຂັ້ມແຂງ; ປະເທດຂອງພວກເຮົານັບມື້ນັບພັດທະນາ; ປະຊາຊົນເຮົານັບມື້ນັບຮັ່ງມີເຂັ້ມແຂງ, ມີຄວາມຜາສຸກ, ສົມກັບຄວາມໄວ້ເນື້ອເຊື່ອໃຈ, ຄວາມຮັກແພງ ແລະ ຄວາມມຸ່ງຫວັງຂອງທົ່ວພັກ ແລະ ປະຊາຊົນ”(18).
ທີຫົກ, ເປັນເຈົ້າການໃນການຕໍ່ສູ້ປະຕິເສດທັດສະນະທີ່ຜິດພາດ, ເສກສັນປັ້ນແຕ່ງ ບິດເບືອນແນວຄິດ “ການເມືອງສຳຄັນກວ່າການທະຫານ” ໃນການກໍ່ສ້າງກອງທັບທີ່ຊຳນານດ້ານການເມືອງ.
ຄວາມຊຳນານທາງດ້ານການເມືອງຂອງກອງທັບໄດ້ວັດແທກດ້ວຍປະສິດທິຜົນທີ່ແທ້ຈິງ ໃນການປະຕິບັດວຽກງານ, ລວມທັງວຽກງານຕໍ່ສູ້ຕ້ານກັບທັດສະນະທີ່ບໍ່ຖືກຕ້ອງແລະເປັນສັດຕູ. ຄະນະພັກ, ພະນັກງານຫຼັກແຫຼ່ງ, ອົງການການເມືອງທຸກຂັ້ນ ຈຳເປັນຕ້ອງນຳພາຊີ້ນຳຢ່າງແໜ້ນແຟ້ນຢ່າງສະໝ່ຳສະເໝີ ໃນການປະສານງານກໍ່ສ້າງອົງການ, ໜ່ວຍງານການເມືອງທີ່ເຂັ້ມແຂງ ດ້ວຍການຕໍ່ສູ້ຢ່າງຕັ້ງໜ້າເພື່ອເອົາຊະນະແຜນການ ແລະ ກົນອຸບາຍຂອງບັນດາອິດທິກຳລັງສັດຕູທີ່ເຮັດ “ການຫັນປ່ຽນໂດຍສັນຕິພາບ” ແລະ “ການແຍກການເມືອງ” ອອກຈາກກອງທັບ. ຕັ້ງໜ້າແລະເປັນເຈົ້າການໃນການປະຕິບັດເປັນຢ່າງດີ ມະຕິໝາຍເລກ 35-NQ/TW ລັງວັນທີ 22 ຕຸລາ 2018 ຂອງກົມການເມືອງສູນກາງ “ກ່ຽວກັບການເພີ່ມທະວີການປົກປ້ອງຮາກຖານແນວຄິດຂອງພັກ, ຕໍ່ສູ້ປະຕິເສດບັນດາທັດສະນະທີ່ຜິດພາດ, ເປັນສັດຕູໃນສະພາບການໃໝ່”. ການປ່ຽນແປງໃໝ່ເນື້ອໃນ, ຮູບການ ແລະ ວິທີການຕໍ່ສູ້ຢ່າງເປັນປະຈຳ, ພ້ອມກັບການປັບປຸງຍົກສູງລະດັບຄວາມຮັບຮູ້, ປັບປຸງຄວາມເຊື່ອຖືຂອງພະນັກງານ, ນັກຮົບໃນການນຳພາຂອງພັກ, ການຄຸ້ມຄອງ ບໍລິຫານເປັນເອກະພາບຂອງລັດ; ເພີ່ມທະວີຄວາມສາມາດ “ຄຸ້ມກັນພະຍາດດ້ວຍຕົນເອງ” ແລະ “ແຮງຕ້ານທານ” ຂອງພະນັກງານ, ນັກຮົບ ຕໍ່ໜ້າການຕ້ານທານທຳລາຍຂອງບັນດາອິດທິກຳລັງສັດຕູ. ສູ້ຊົນປະຕິບັດເປົ້າໝາຍ: ກອງທັບນຳໜ້າໃນການຕໍ່ສູ້ເພື່ອເອົາຊະນະແຜນການແລະກົນອຸບາຍ “ການຫັນປ່ຽນໂດຍສັນຕິ” ຂອງບັນດາອິດທິກຳລັງສັດຕູ, ປົກປັກຮັກສາຮາກຖານແນວຄິດຂອງພັກຢ່າງໝັ້ນຄົງ ໃນສະພາບການໃໝ່. ສາມາດຢືນຢັນໄດ້ວ່າ, ມາຮອດປະຈຸບັນ, ແນວຄິດ “ການເມືອງສຳຄັນກວ່າການທະຫານ” ຂອງປະທານໂຮ່ຈີມິນ ຍັງມີຄຸນຄ່າດ້ານປະຫວັດສາດ ແລະ ຍຸກສະໄໝ. ສືບຕໍ່ໝູນໃຊ້ ແລະ ພັດທະນາແນວຄິດໂຮ່ຈີມິນກ່ຽກັບ “ການເມືອງສຳຄັນກວ່າການທະຫານ” ຢ່າງປະດິດສ້າງ ໃນການກໍ່ສ້າງກອງທັບປະຊາຊົນຫວຽດນາມທີ່ຊຳນານທາງດ້ານການເມືອງໃນໄລຍະໃໝ່ ແມ່ນທັງນ້ຳໃຈ, ຄວາມຮູ້ບຸນຄຸນ, ຄວາມຮັບຜິດຊອບຂອງທົ່ວພັກ, ທົ່ວກອງທັບທີ່ມີຕໍ່ປະທານໂຮ່ຈີມິນ; ພ້ອມທັງເປັນວິທີການທີ່ດີທີ່ສຸດ ເພື່ອກໍ່ສ້າງກອງທັບປະຊາຊົນຫວຽດນາມທີ່ເຂັ້ມແຂງແຮງກ້າ ເພື່ອຕອບສະໜອງຄວາມຮຽກຮ້ອງຕ້ອງການ ແລະ ໜ້າທີ່ກໍ່ສ້າງ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ ໃນສະພາບການໃໝ່./.
---------------------------------------------
(1) ວ.ອີ.ເລນິນ: ນິພົນຄົບຊຸດ, ສພຈ. ການເມືອງແຫ່ງຊາດ, ຮ່າໂນ້ຍ, 2006, ເຫຼັ້ມ 34, ໜ້າ 401
(2), (3) ວ.ອີ.ເລນິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 41, ໜ້າ 147, 179
(4) ອ້າງອີງຕາມ ພົນເອກ ຫວໍ ງວຽນ ຢ໊າບ: ລວບລວມຄວາມຊົງຈໍາທັງໝົດ, ສພຈ. ກອງທັບປະຊາຊົນ, ຮ່າໂນ້ຍ, 2011, ໜ້າ 83
(5) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 3, ໜ້າ 539
(6) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 398
(7) ເບິ່ງ: ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 3, ໜ້າ 499-500
(8) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 625
(9) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 11, ໜ້າ 429
(10), (11), (12), (13) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 218, 217, 219, 37
(14) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 397-398
(15) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 11, ໜ້າ 481
(16) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 14, ໜ້າ 435
(17) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 158
(18) “ເລຂາທີການໃຫຍ່ ຫງວຽນຝູຈ້ອງ: ບາງບັນຫາທີ່ຕ້ອງເອົາໃຈໃສ່ເປັນພິເສດໃນວຽກງານການກະກຽມບຸກຄະລາກອນຂອງກອງປະຊຸມໃຫຍ່ຄັ້ງທີ XIV ຂອງພັກ”, Báo Quân đội nhân dân điện tử, https://www.qdnd.vn/chinh-tri/tin-tuc/tongbi-thu-nguyen-phu-trong-mot-so-van-de-can-duoc-dacbiet-quan-tam-trong-cong-tac-chuan-bi-nhan-su-daihoi-xiv-cua-dang-768445
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1038 (ເດືອນພຶດສະພາ 2024)
