ຍົກສູງຄວາມສາມາດໃນການຄາດຄະເນແລະວິໄສທັດຍຸດທະສາດ
ຂອງຖັນແຖວພະນັກງານ ເພື່ອຕອບສະໜອງຄວາມຕ້ອງການ
ແລະ ໜ້າທີ່ໃນໄລຍະປະຈຸບັນ
ຂອງຖັນແຖວພະນັກງານ ເພື່ອຕອບສະໜອງຄວາມຕ້ອງການ
ແລະ ໜ້າທີ່ໃນໄລຍະປະຈຸບັນ
ກຳມະການກົມການເມືອງ, ປະທານສະພາແຫ່ງຊາດ ເວືອງ ດິ່ງ ເຫ້ວ ກວດກາການກໍ່ສ້າງຊຸດປະມູນໂຄງການທາງດ່ວນແຫ່ງຊາດ ເບ໋ນລຶກ - ລອງແທັ່ງ _ພາບ: TTXVN
ບົດບາດສຳຄັນຂອງວຽກງານການຄາດຄະເນຍຸດທະສາດ ແລະ
ຄວາມຮຽກຮ້ອງຕ້ອງການໃໝ່ ສຳລັບຖັນແຖວພະນັກງານ ໃນໄລຍະປະຈຸບັນ
ພັກກອມມູນິດຫວຽດນາມເອົາໃຈໃສ່ທີ່ສຸດເຖິງວຽກງານການຄາດຄະເນຍຸດທະສາດ. ພາລະກິດປະຕິວັດຂອງຊາດຫວຽດນາມພາຍໃຕ້ການນຳພາຂອງພັກໄດ້ພິສູດຢ່າງຈະແຈ້ງວ່າ, ບັນດາຜົນສຳເລັດໃນການນຳພາ ແລະ ຊີ້ນຳການປະຕິວັດ ນຳໄປສູ່ໄຊຊະນະອັນຍິ່ງໃຫຍ່ ໃນການປົດປ່ອຍປະເທດຊາດ, ປົກປັກຮັກສາໝາກຜົນຂອງການປະຕິວັດ ແລະ ການສ້າງສາປະເທດ, ໂດຍສະເພາະໃນໄລຍະການປ່ຽນແປງໃໝ່ນັ້ນ, ມີສ່ວນປະກອບທີ່ສຳຄັນຂອງວຽກງານການຄາດຄະເນຍຸດທະສາດ.
ວຽກງານການຄາດຄະເນຍຸດທະສາດແມ່ນໜຶ່ງໃນບັນດາໜ້າທີ່ພິເສດ ຂອງວຽກງານການກໍ່ສ້າງພັກ. ຜົນຂອງວຽກງານການຄາດຄະເນຍຸດທະສາດສະແດງເຖິງຄວາມສາມາດ, ຈິນຕະນາການຄາດຄະເນ ແລະ ວິໄສທັດຍຸດທະສາດຂອງພັກ. ຈຸດປະສົງຂອງວຽກງານນີ້ແມ່ນຄົ້ນຄວ້າ, ປະເມີນ ແລະ ພະຍາກອນ ການປ່ຽນແປງ ແລະ ຄວາມຕ້ອງການພັດທະນາ ຂອງພຶດຕິກຳແຕ່ຕົ້ນ ຈາກໄລຍະໄກ; ຈາກນັ້ນ, ການເປັນເຈົ້າການໃນການປ້ອງກັນ, ຕໍ່ສູ້, ຍູ້ຖອຍ ແລະ ກຳຈັດຄວາມສ່ຽງ, ເພີ່ມບັນດາປັດໄຈທີ່ເປັນປະໂຫຍດ. ຜົນການຄາດຄະເນເປັນຮາກຖານ, ພື້ນຖານວິທະຍາສາດ ແລະ ທິດສະດີ, ສະໜອງລະບົບຂໍ້ຄິດທີ່ສຳຄັນ ເພື່ອໃຫ້ພັກວາງກຳນົດແນວທາງ, ແຜນນະໂຍບາຍ ໃນການນຳພາກໍ່ສ້າງ ແລະ ພັດທະນາປະເທດ ຕາມທິດທາງທີ່ຖືກຕ້ອງ, ບັນລຸປະສິດທິຜົນ ແລະ ຄາດໝາຍທີ່ໄດ້ວາງອອກໃນແຕ່ລະໄລຍະກອງປະຊຸມໃຫຍ່.
ກຸນແຈແຫ່ງຄວາມສຳເລັດຂອງການປະຕິວັດແມ່ນການກໍ່ສ້າງຖັນແຖວພະນັກງານ, ໂດຍສະເພາະແມ່ນພະນັກງານລະດັບຍຸດທະສາດ ທີ່ມີຄວາມສາມາດ, ມີຄຸນວຸດທິ, ສາມາດວິເຄາະ ແລະ ຄາດຄະເນບັນຫາທີ່ເກີດຂຶ້ນ, ບັນດາປັດໄຈທີ່ເປັນຜົນກະທົບ, ເຂົ້າໃຈກຳໄດ້ເປົ້າໝາຍຂອງແນວທາງ, ແຜນນະໂຍບາຍ ແລະ ທິດທາງນະໂຍບາຍ ເພື່ອຕອບສະໜອງຄວາມຕ້ອງການທີ່ເພີ່ມຂຶ້ນເລື້ອຍໆ ຂອງພາລະກິດການປະຕິວັດ. ຄວາມສາມາດຂອງພະນັກງານໃນການຄາດຄະເນຢ່າງຖືກຕ້ອງແລະຊັດເຈນ ຈະປະກອບສ່ວນຊ່ວຍໃຫ້ພັກຕັດສິນໃຈຖືກຕ້ອງ ແລະ ເໝາະສົມ; ໃນທາງກົງກັນຂ້າມ, ຖ້າການຄາດຄະເນຜິດພາດທາງດ້ານຍຸດທະສາດ, ຜົນສະທ້ອນຈະຮ້າຍແຮງຫຼາຍ.
ຜ່ານ 35 ປີແຫ່ງການປະຕິບັດແນວທາງປ່ຽນແປງໃໝ່, ຫວຽດນາມໄດ້ບັນລຸຜົນສຳເລັດອັນໃຫຍ່ຫຼວງ ທີ່ມີຄວາມໝາຍປະຫວັດສາດ ດ້ວຍທ່າແຮງ, ຖານະທີ່ຕັ້ງ ແລະ ກຽດສັກສີສາກົນນັບມື້ນັບເພີ່ມຂຶ້ນ. ນີ້ແມ່ນຮາກຖານ ແລະ ແຮງຜັກດັນທີ່ສຳຄັນ ເພື່ອໃຫ້ປະເທດຜ່ານຜ່າຄວາມຫຍຸ້ງຍາກ ສິ່ງທ້າທາຍ ແລະ ພັດທະນາຢ່າງວ່ອງໄວ ແລະ ໝັ້ນຄົງໃນຊຸມປີຕໍ່ໄປ.
ລາຍງານການເມືອງຢູ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມໄດ້ຕີປະເມີນ ແລະ ຢືນຢັນວ່າ: “ຄວາມສາມາດໃນການຄາດຄະເນ, ການກຳນົດແນວທາງ ແຜນນະໂຍບາຍຂອງພັກ ໄດ້ຮັບການຍົກສູງຂຶ້ນຢ່າງຈະແຈ້ງ... ກົມການເມືອງ, ຄະນະເລຂາທິການສູນກາງພັກໄດ້ປະກາດໃຊ້ ເອກະສານກ່ຽວກັບວຽກງານການກໍ່ສ້າງພັກ ແລະ ລະບົບການເມືອງ ຫຼາຍສະບັບ, ໃນນັ້ນມີບັນດາແຜນນະໂຍບາຍ, ມະຕິ ເພື່ອນຳພາປະຕິບັດບັນດາໜ້າທີ່ໃໝ່ທີ່ສຳຄັນ. ການປະກາດໃຊ້ລະບົບເອກະສານໂດຍຄະນະບໍລິຫານງານສູນກາງຢ່າງທັນການ ແລະ ຄົບຊຸດໃນທຸກຂົງເຂດ ໄດ້ສ້າງພື້ນຖານການເມືອງທີ່ສຳຄັນ ເພື່ອຊຸກຍູ້ວຽກງານການກໍ່ສ້າງ ແລະ ປັບປຸງພັກ; ປະກອບສ່ວນຊຸກຍູ້ການພັດທະນາເສດຖະກິດ-ສັງຄົມ; ເພີ່ມທະວີຄວາມສາມາດບົ່ມຊ້ອນດ້ານປ້ອງກັນປະເທດ ແລະ ຄວາມໝັ້ນຄົງ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບໂລກໃນສະພາບການໃໝ່”(1).
ຢ່າງໃດກໍຕາມ, ການພັດທະນາເສດຖະກິດ-ສັງຄົມຍັງບໍ່ທັນສົມກັບຄວາມສາມາດບົ່ມຊ້ອນ ແລະ ຄວາມໄດ້ປຽບຂອງປະເທດ. ເສດຖະກິດຍັງບໍ່ທັນພັດທະນາແບບຍືນຍົງ, ຍັງມີຂໍ້ຈຳກັດ ແລະ ຈຸດອ່ອນຫຼາຍຢ່າງ. ການຫັນແຜນນະໂຍບາຍແລະມະຕິຂອງພັກຈຳນວນໜຶ່ງ ເປັນນິຕິກຳ ເປັນຮຸບປະທຳ ໃນກົດໝາຍຂອງລັດນັ້ນ ຍັງບໍ່ພຽງພໍແລະທັນການ. ການປະກາດໃຊ້ມະຕິຂອງຄະນະພັກ ແລະ ອົງການຈັດຕັ້ງພັກຈຳນວນໜຶ່ງ ບໍ່ໃກ້ກັບຄວາມເປັນຈິງ, ຂາດຄວາມເປັນໄປໄດ້; ວຽກງານການນຳພາ, ຊີ້ນຳ, ຈັດຕັ້ງປະຕິບັດມະຕິຈຳນວນໜຶ່ງບໍ່ເຂັ້ມງວດ, ປະສິດທິຜົນຕ່ຳ, ບໍ່ເປັນໄປຕາມຄວາມຕ້ອງການທີ່ວາງໄວ້. ວຽກງານສະຫຼຸບສັງລວມພຶດຕິກຳ ແລະ ການຄົ້ນຄວ້າທິດສະດີ ບໍ່ໄດ້ຮັບຄວາມເອົາໃຈໃສ່, ຂາດຄວາມຄົບຊຸດ, ບໍ່ໄດ້ຕາມຄວາມຄາດໝາຍ. ວຽກງານການກຳສະພາບການ, ຄາດຄະເນຍຸດທະສາດ ກ່ຽວກັບການປ້ອງກັນປະເທດ ແລະ ຄວາມໝັ້ນຄົງ ບາງຄັ້ງກໍ່ບໍ່ເປັນເຈົ້າການ. ເພາະສະນັ້ນ, ບົດຮຽນອັນເລິກເຊິ່ງທີ່ໄດ້ຮັບຈາກກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກແມ່ນ, ຕ້ອງເປັນເຈົ້າການໃນການຄົ້ນຄວ້າ, ເກັບກຳສະພາບການ, ຄາດຄະເນສະພາບການຢ່າງຖືກຕ້ອງ, ບໍ່ຖືກຕົກໃນທ່າຮັບ, ຖືກບັງເອີນ.
ຄວາມເປັນຈິງໃຫ້ເຫັນວ່າ, ກຳລັງຄວາມສາມາດຄາດຄະເນຂອງພະນັກງານຈຳນວນໜຶ່ງໃນທຸກຂັ້ນ ຍັງຈຳກັດດ້ານຄຸນສົມບັດ, ຄັບແຄບດ້ານວິໄສທັດ, ອະນຸລັກນິຍົມ, ຄຳພີຕາຍຕົວ, ໜັກໃນປະສົບການນິຍົມ; ຂາດຄວາມຄິດສ້າງສັນ, ຂາດຄວາມອ່ອນໄຫວຕໍ່ຍຸກສະໄໝແລະຕໍ່ສິ່ງໃໝ່ໆ, ພິເສດແມ່ນ ຍັງໜັກໃນຄວາມຄິດສັ້ນພຽງໄລຍະ, ບໍ່ເຂົ້າໃຈກົດເກນພາວະວິໄສ, ນໍາໄປສູ່ການໃຫ້ຄໍາແນະນໍາໃນການປະກາດໃຊ້ແຜນນະໂຍບາຍແລະມະຕິ ເມື່ອຍັງບໍ່ທັນຕີລາຄາປັດໄຈພາວະວິໄສ ແລະ ອັດຕະວິໄສຢ່າງຄົບຖ້ວນ; ດັງນັ້ນ, ຈຶງບໍ່ໃກ້ຊິດແທດເໝາະ, ຂາດຄວາມເປັນໄປໄດ້, ບໍ່ຕອບສະໜອງໄດ້ກັບຄວາມຕ້ອງການຂອງຄວາມເປັນຈິງທີ່ອຸດົມສົມບູນ ແລະ ມີຊີວິດຊີວາ.
ຂໍ້ຈຳກັດເຫຼົ່ານີ້ມີຫຼາຍສາເຫດ, ທັງສາເຫດພາວະວິໄສແລະອັດຕະວິໄສ. ດ້ານໜຶ່ງ, ກິດຈະການກໍ່ສ້າງປະເທດຕາມເສັ້ນທາງສັງຄົມນິຍົມແມ່ນພາລະກິດປະຕິວັດທີ່ຍາວນານ ແລະ ຫຍຸ້ງຍາກ. ກິດຈະການປ່ຽນແປງໃໝ່ຍິ່ງເຂົ້າສູ່ລວງເລິກ ກໍ່ຈະມີບັນຫາໃໝ່ເກີດຂຶ້ນຫຼາຍ ທັງທາງທິດສະດີແລະທາງພຶດຕິກຳ, ເຊິ່ງບໍ່ສາມາດແກ້ໄຂໄດ້ໃນ “ມື້ໜຶ່ງ ຍາມດຽວ”. ໃນຂະນະນັ້ນ, ຖັນແຖວພະນັກງານຂອງປະເທດເຮົາສ່ວນໃຫຍ່ໄດ້ຮັບອິດທິພົນຈາກປະເທດຜະລິດກະສິກໍາ, ຖືກຜົນກະທົບຢ່າງໜັກຈາກຜົນຮ້າຍຂອງສົງຄາມ, ໂດຍຈິນຕະນາເສດຖະກິດແບບລວມສູນ, ອາດຍາສິດ, ເກື້ອກູນ...; ອີກດ້ານໜຶ່ງ, ພະນັກງານສ່ວນໜຶ່ງບໍ່ມີຄວາມຮູ້ກ່ຽວກັບຈິນຕະນາຍຸດທະສາດທີ່ແທ້ຈິງ; ການປັບປຸງຄວາມຮູ້ທາງດ້ານວິທະຍາສາດ-ເຕັກໂນໂລຊີ ແລະ ເຕັກນິກ, ການຍົກສູງລະດັບວິຊາສະເພາະ ວິຊາຊີບຂອງພະນັກງານ ບໍ່ໄດ້ທັນ ແລະ ບໍ່ຕອບສະໜອງໄດ້ກັບການພັດທະນາຢ່າງວ່ອງໄວຂອງທ່າອ່ຽງຂອງຍຸກສະໄໝ. ພ້ອມກັນນັ້ນ, ວຽກງານສະຫຼຸບສັງລວມພຶດຕິກຳ ແລະ ການຄົ້ນຄວ້າທິດສະດີ ຍັງມີຂໍ້ບົກພ່ອງຫຼາຍປະການ.
ເພື່ອຕອບສະໜອງຄວາມຕ້ອງການ ແລະ ໜ້າທີ່ການປະຕິວັດທີ່ນັບມື້ນັບສູງຂຶ້ນ ແລະ ສັບສົນກວ່າອີກໃນສະພາບການໃໝ່, ບັນຫາຮີບດ່ວນທີ່ວາງອອກມາໃນປະຈຸບັນແມ່ນ ຕ້ອງສ້າງຖັນແຖວພະນັກງານທຸກລະດັບທີ່ມີຄຸນສົມບັດ, ຄວາມສາມາດ ແລະ ມີຊື່ສຽງ, ໂດຍສະເພາະແມ່ນພະນັກງານລະດັບຍຸດທະສາດ, ຖັນແຖວຜູ້ເຮັດວຽກສະຫຼຸບສັງລວມພຶດຕິກຳ, ຄົ້ນຄວ້າທິດສະດີ, ວຽກງານສະຖິຕິ ແລະ ການວິເຄາະ. ຖັນແຖວພະນັກງານນີ້ ຕ້ອງມີຄວາມສາມາດຄາດຄະເນ, ພະຍາກອນຢ່າງຖືກຕ້ອງ ແລະ ຮັບມືຢ່າງອ່ອນໄຫວຕໍ່ສິ່ງທ້າທາຍ, ຕໍ່ການຜັນປ່ຽນທີ່ໄວແລະຄາດເດົາຍາກ ຂອງສະສານະການໂລກ. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກຮຽກຮ້ອງໃຫ້: “ຍົກສູງຄວາມກ້າຫານແລະຄວາມສາມາດ ໃນການຄາດຄະເນ ແລະ ຄຸນນະພາບຂອງວຽກງານວາງກຳນົດແນວທາງ ແລະ ນະໂຍບາຍ ໃຫ້ສອດຄ່ອງກັບຄວາມເປັນຈິງ ຂອງຫວຽດນາມ ແລະ ທ່າອຽງການພັດທະນາໃນຍຸກສະໄໝ”(2). ການຍົກສູງຄວາມສາມາດໃນການຄາດຄະເນຍຸດທະສາດ ຈະເພີ່ມທະວີຄວາມສາມາດນຳພາຂອງພັກ, ປະກອບສ່ວນເຮັດໃຫ້ປະເທດຮັກສາຄວາມເປັນເຈົ້າການຍຸດທະສາດ, ບໍ່ຖືກຕົກໃນທ່າຮັບ, ຖືກບັງເອີນໃນທຸກສະຖານະການ.
ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກໄດ້ຢືນຢັນອີດເທື່ອໜຶ່ງວ່າ: “ພັກນຳພາລັດດ້ວຍໂຄງການການເມືອງ, ຍຸດທະສາດ, ບັນດາແຜນນະໂຍບາຍ, ນະໂຍບາຍທີ່ສຳຄັນ, ດ້ວຍວຽກງານການຈັດຕັ້ງ ພະນັກງານ, ດ້ວຍການກວດກາ, ຕິດຕາມກວດກາ; ນຳພາດ້ວຍການຫັນບັນດາທັດສະນະ ແນວທາງ ແຜນນະໂຍບາຍຂອງພັກ ເປັນນິຕິກຳ ເປັນນະໂຍບາຍ ກົດໝາຍ; ນຳພາການກໍ່ສ້າງອົງການຈັດຕັ້ງກົງຈັກ, ຖັນແຖວພະນັກງານ ລັດຖະກອນ ທີ່ມີຄຸນສົມບັດ ຄວາມສາມາດ ແລະ ກຽດຊື່ສຽງຢ່າງພຽງພໍ, ທຽບເທົ່າລະດັບຂອງການງານ; ນຳພາການຈັດຕັ້ງປະຕິບັດບັນດາແຜນນະໂຍບາຍ ນະໂຍບາຍ ລັດຖະທຳມະນູນ ແລະ ກົດໝາຍ ຢ່າງມີປະສິດທິຜົນ; ໃຫ້ຄວາມສຳຄັນເຖິງການນຳພາການປ່ຽນແປງໃໝ່, ຍົກສູງຄຸນນະພາບຂອງການສ້າງກົດໝາຍ, ການປະຕິຮູບດ້ານບໍລິຫານ ແລະ ການປະຕິຮູບດ້ານຕຸລາການ”(3).
ຕາມນັ້ນ, ເພື່ອຍົກສູງຄວາມສາມາດນຳພາແລະກຳອຳນາດຂອງພັກ ຕ້ອງໃຫ້ຄວາມສຳຄັນເຖິງການສືບຕໍ່ “ປ່ຽນແປງໃໝ່ແລະຍົກສູງຄຸນນະພາບ ຂອງວຽກງານວາງກຳນົດແນວທາງ ແຜນນະໂຍບາຍຂອງພັກ ເພື່ອຕອບສະໜອງຄວາມຕ້ອງການພັດທະນາປະເທດ ໃນສະຖານະການໃໝ່. ເອົາໃຈໃສ່ເປັນສຳຄັນ ເຖິງການຍົກສູງຄວາມສາມາດຄາດຄະເນ ແລະ ຮັບມືກັບບັນດາສິ່ງທ້າທາຍ ແລະ ການຜັນປ່ຽນຢ່າງໄວແລະຄາດເດົາຍາກ ຂອງສະຖານະການ. ເມື່ອວາງກຳນົດແນວທາງ, ແຜນນະໂຍບາຍ, ວິທີການແກ້ໄຂນັ້ນ ຕ້ອງໃກ້ຊິດແລະເລີ່ມຈາກສະພາບຄວາມເປັນຈິງ, ປະເມີນຜົນກະທົບ, ປັບການສົມດຸນ, ຈັດວາງຊັບພະຍາກອນ ແລະ ຈັດຕັ້ງການປະຕິບັດ ຢ່າງມີປະສິດທິຜົນ. ຍົກສູງຄວາມສາມາດໃນການຫັນເປັນນິຕິກຳ, ຫັນເປັນຮູບປະທຳ ແລະ ຈັດຕັ້ງປະຕິບັດບັນດາແຜນນະໂຍບາຍ ແລະ ມະຕິຂອງພັກ”(4).
ການຍົກສູງຄຸນນະພາບວຽກງານຄາດຄະເນ ແລະ ວິໄສທັດຍຸດທະສາດ ຕ້ອງຮັບປະກັນສອງປັດໄຈ: 1- ລັກສະນະພາວະວິໄສ ແລະ ຄວາມຖືກຕ້ອງ ບົນພື້ນຖານຂອງວິທີການວິທະຍາສາດແລະເຊື່ອຖືໄດ້; ຄາດຄະເນຢ່າງເຕັມສ່ວນທັງສອງດ້ານ ພ້ອມແລະທວນ, ຂໍ້ດີແລະຂໍ້ເສຍ, ຄວາມສະດວກແລະຄວາມສ່ຽງ, ກາລະໂອກາດ, ໂອກາດແລະໄພຂົ່ມຂູ່, ສິ່ງທ້າທາຍ. ການຄາດຄະເນຍິ່ງໃກ້ແລະຊັດເຈນ, ມູນຄ່າຂອງການຄາດຄະເນຍິ່ງສູງ; 2- ຕ້ອງຕິດຕາມໃຫ້ທັນຄວາມເປັນຈິງ, ການເວລາ, ຄວາມຮຽກຮ້ອງຕ້ອງການແລະໜ້າທີ່ ການປະຕິວັດ; ຜົນການຄາດຄະເນຕ້ອງມີວິໄສທັດກວ້າງໄກ ແລະໄລຍະຍາວ, ມີຜົນກະທົບທາງບວກຕໍ່ບັນດາບັນຫາພື້ນຖານ ຂອງການປະຕິວັດ, ຮັບປະກັນຜົນປະໂຫຍດຂອງຊາດ-ປະເທດຊາດ ແລະ ຕ້ອງມີທິດທາງເປົ້າໝາຍທີ່ຊັດເຈນ.
ບົນພື້ນຖານຄວາມຕ້ອງການຂອງພຶດຕິກຳຕົວຈິງ, ກອງປະຊຸມຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ 12 ໄດ້ອອກມະຕິສະບັບເລທີ 26-NQ/TW, ລົງວັນທີ 19 ພຶດສະພາ 2018, “ວ່າດ້ວຍການສຸມໃສ່ກໍ່ສ້າງຖັນແຖວພະນັກງານທຸກລະດັບ, ໂດຍສະເພາະພະນັກງານລະດັບຍຸດທະສາດ, ທີ່ມີຄຸນນະພາບ ຄວາມສາມາດ ແລະ ສັກສີພຽງພໍກັບໜ້າທີ່”. ມະຕິກຳນົດວ່າ: ພະນັກງານແມ່ນປັດໄຈຕັດສິນຄວາມສໍາເລັດຫຼືຄວາມລົ້ມເຫຼວຂອງການປະຕິວັດ; ວຽກງານພະນັກງານແມ່ນຂັ້ນຕອນ “ກະແຈ” ຂອງວຽກງານການກໍ່ສ້າງພັກ ແລະ ລະບົບການເມືອງ. ການກໍ່ສ້າງຖັນແຖວພະນັກງານ, ໂດຍສະເພາະພະນັກງານລະດັບຍຸດທະສາດ ແມ່ນໜ້າທີ່ສຳຄັນອັນດັບໜຶ່ງ, ແມ່ນວຽກງານສຳຄັນທີ່ສຸດຂອງພັກ.
ພັກກຳນົດເປົ້າໝາຍ: ກໍ່ສ້າງຖັນແຖວພະນັກງານ, ໂດຍສະເພາະພະນັກງານລະດັບຍຸດທະສາດ ທີ່ມີຄຸນນະພາບ ຄວາມສາມາດ ກຽດສັກສີ, ທຽບເທົ່າກັບໜ້າທີ່; ພຽງພໍທາງດ້ານປະລິມານ, ມີຄຸນນະພາບ ແລະ ໂຄງສ້າງທີ່ເໝາະສົມກັບຍຸດທະສາດການພັດທະນາເສດຖະກິດ-ສັງຄົມ ແລະ ການປົກປັກຮັກສາປະເທດຊາດ; ຮັບປະກັນການປ່ຽນຜ່ານຢ່າງຕໍ່ເນື່ອງ ແລະ ໝັ້ນຄົງລະຫວ່າງລຸ້ນ, ນຳພາຢ່າງພຽງພໍເພື່ອຫັນປະເທດເຮົາໃຫ້ກາຍເປັນປະເທດທີ່ພັດທະນາແບບສັງຄົມນິຍົມ, ມີກຳລັງນຳພາພຽງພໍເພື່ອຈະເຮັດໃຫ້ປະເທດເຮົາກາຍເປັນປະເທດພັດທະນາຕາມທິດສັງຄົມນິຍົມ, ປະຕິບັດເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ ຍຸຕິທຳ ແລະ ອາລະຍະທຳ”, ປະເທດນັບມື້ນັບຈະເລີນຮຸ່ງເຮືອງ, ປະຊາຊົນຢູ່ເຢັນເປັນສຸກ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກສືບຕໍ່ເນັ້ນໜັກ, ວຽກງານພະນັກງານຕ້ອງເປັນ “ກຸນແຈຂອງກຸນແຈ” ຢ່າງແທ້ຈິງ; ຕາມນັ້ນ, ຕ້ອງສຸມໃສ່ກໍ່ສ້າງ “ຖັນແຖວພະນັກງານທຸກລະດັບ, ໂດຍສະເພາະພະນັກງານລະດັບຍຸດທະສາດ ແລະ ຫົວໜ້າ ທີ່ມີຄຸນນະພາບ ຄວາມສາມາດ ແລະ ກຽດສັກສີ, ທຽບເທົ່າກັບໜ້າທີ່”(5).
ດັ່ງນັ້ນ, ເພື່ອຍົກສູງຄວາມສາມາດຄາດຄະເນ ແລະ ວິໄສທັດຍຸດທະສາດໃນການວາງກຳນົດແນວທາງ, ແຜນນະໂຍບາຍ, ທິດທາງຂອງພັກກອມມູນິດຫວຽດນາມ ໃນສະໄໝກອງປະຊຸມໃຫຍ່ຄັ້ງທີ 13 ແລະ ຊຸມປີຕໍ່ໄປ, ມີຄວາມຮຽກຮ້ອງຕ້ອງການທີ່ວາງອອກມານັບມື້ນັບຫຼາຍ ສຳລັບຖັນແຖວພະນັກງານເຮັດວຽກງານຄົ້ນຄວ້າ ແລະ ຄາດຄະເນ, ໂດຍສະເພາະພະນັກງານລະດັບຍຸດທະສາດ, ດັ່ງນີ້:
ທາງດ້ານແນວຄິດການເມືອງ: ຍົກສູງຫຼັກໝັ້ນ ຄວາມກ້າຫານທາງການເມືອງ, ປັນຍະຄວາມຮູ້ ແລະ ລັກສະນະສູ້ຮົບຢ່າງບໍ່ຢູຸດຢັ້ງ; ຍາມໃດກໍນຳໜ້າ ແລະ ເປັນແບບຢ່າງ; ມີຄວາມມຸ່ງມາດປາຖະໜາ, ປະກອບສ່ວນພ້ອມກັບແຕ່ລະຂະແໜງການ ແຕ່ລະທ້ອງຖິ່ນ ແລະ ທົ່ວປະເທດ ຜ່ານຜ່າຄວາມຫຍຸ້ງຍາກ ສິ່ງທ້າທາຍທຸກປະການ, ພາປະເທດກ້າວຂຶ້ນເປັນປະເທດພັດທະນາ, ມີລາຍໄດ້ສູງໃນປີ 2045; ມີເຈດຈຳນົງ ແລະ ຄວາມສາມາດໂດດເດັ່ນ, ກ້າຄິດ, ກ້າເວົ້າ, ກ້າເຮັດ, ກ້າຮັບຜິດຊອບ, ກ້າປ່ຽນແປງໃໝ່ປະດິດສ້າງ, ກ້າປະເຊີນໜ້າກັບຄວາມຫຍຸ້ງຍາກ ສິ່ງທ້າທາຍ, ກ້າປະຕິບັດເພື່ອຜົນປະໂຫຍດຮ່ວມກັນ; ເດັດດ່ຽວກີດກັ້ນ ແລະ ຍູ້ຖອຍສະພາບການເສື່ອມໂຊມທາງດ້ານແນວຄິດການເມືອງ ຄຸນສົມບັດ ວິຖີຊີວິດ, ບັນດາປະກົດການ “ຫັນປ່ຽນຕົນເອງ”, “ປ່ຽນແປງຕົນເອງ”.
ທາງດ້ານຄຸນສົມບັດ, ວິຖີຊີວິດ: ຕ້ອງເຫັນແຈ້ງໜ້າທີ່ແລະຄວາມຮັບຜິດຊອບຂອງຕົນ; ຕັ້ງໝັ້ນບໍ່ທໍ້ຖອຍໃຈເມື່ອປະສົບຄວາມຫຍຸ້ງຍາກ ສິ່ງທ້າທາຍທັງໝົດ ແລະ ບໍ່ໄດ້ຖືກລໍ້ລວງໂດຍວັດສະດຸ ເງິນທອງ ຊື່ສຽງ; ປ້ອງກັນຫຼີກລ້ຽງດ້ວຍຕົນເອງ ແລະ ຕໍ່ສູ້ຢ່າງມີປະສິດທິພາບ ກັບການສະແດງອອກທັງໝົດ ຂອງລັດທິອັດຕະບຸກຄົນ, ພະຍາດອາດຍາສິດ, ສວຍໂອກາດ, ພາກສ່ວນນິຍົມ, ພັກພວກນິຍົມ, ການແຕກຄວາມສາມັກຄີພາຍໃນ; ເຊີດຊູຈິດສຳນຶກໃນການຝຶກຝົນ ຫຼໍ່ຫຼອມຄຸນສົມບັດສິນທໍາຕະຫຼອດຊີວິດ; ຕື່ນຕົວສະໝັກໃຈຝຶກຝົນ ຫຼໍ່ຫຼອມ, ປັບພຶດຕິກຳຂອງຕົວເອງ ໃນການເຮັດວຽກປະຈໍາວັນ; ເຮັດການ “ທົບທວນຕົນເອງ, “ແກ້ໄຂຕົນເອງ” ເປັນປະຈຳ ແລະ ຮັກສາກຽດສັກສີແລະຄວາມນັບຖືຕົນເອງຂອງຜູ້ນໍາ. ພິເສດ, ພະນັກງານລະດັບຍຸດທະສາດຍິ່ງຕ້ອງເຊີບຊູຈິດໃຈສູ້ຊົນເພື່ອຮັບໃຊ້ປະຊາຊົນ; ປະຕິບັດເປັນຢ່າງດີ ກົດລະບຽບກ່ຽວກັບຄວາມຮັບຜິດຊອບໃນການເປັນແບບຢ່າງ ຂອງພະນັກງານແລະສະມາຊິກພັກ ຕາມທິດນຳ “ພະນັກງານມີຕຳແໜ່ງສູງຍິ່ງຕ້ອງປະພຶດຕົວເປັນແບບຢ່າງ”; ປະຕິບັດການຕິຊົມຕົນເອງ ແລະ ຕິຊົມ; ເຂັ້ມງວດໃນການຮັບເອົາຄວາມເຫັນຂອງອົງການໂດຍປະຊາຊົນເລືອກຕັ້ງ, ຂອງແນວໂຮມປະເທດຊາດຫວຽດນາມ, ຂອງບັນດາອົງການຈັດຕັ້ງການເມືອງ-ສັງຄົມ ແລະ ປະຊາຊົນ ຕໍ່ການຝຶກຝົນ ຫຼໍ່ຫຼອມຄຸນສົມບັດສິນທຳ, ວິຖີຊີວິດຂອງຕົນເອງ.
ກ່ຽວກັບຄວາມສາມາດແລະຊື່ສຽງ: ຕ້ອງມີຄວາມສາມາດໂດດເດັ່ນໃນການວາງກຳນົດແນວທາງ, ແຜນນະໂຍບາຍຂອງພັກ, ຕອບສະໜອງຄວາມຕ້ອງການພັດທະນາປະເທດໃນສະພາບການໃໝ່, ປະກອບສ່ວນຍົກສູງຄວາມສາມາດນຳພາ ແລະ ກຳອຳນາດຂອງພັກ; ມີຄວາມສາມາດຄາດຄະເນ ແລະ ຮັບມືກັບສິ່ງທ້າທາຍ, ການຫັນປ່ຽນທີ່ໄວວາແລະຄາດເດົາຍາກຂອງສະຖານະການໂລກ; ມີຄວາມສາມາດໃນການຫັນເປັນນິຕິກຳ, ຫັນເປັນຮູບປະທຳ ແລະ ຈັດຕັ້ງປະຕິບັດບັນດາມະຕິ, ແຜນນະໂຍບາຍຂອງພັກຢ່າງມີປະສິດທິຜົນ; ເດັດດ່ຽວໃນການແກ້ໄຂຜ່ານຜ່າຈຸດອ່ອນແລະຄວາມຊັກຊ້າ, ບໍ່ຫຼົບຫຼີກຄວາມຮັບຜິດຊອບໃນການນໍາພາ, ການບໍລິຫານ ແລະ ການຈັດຕັ້ງປະຕິບັດ. ປະຕິບັດເປັນຢ່າງດີ ທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້”, “ນັບຖືປະຊາຊົນ, ໃກ້ຊິດກັບປະຊາຊົນ, ເຊື່ອຖືປະຊາຊົນ, ເຂົ້າໃຈປະຊາຊົນ, ຮຽນຮູ້ຈາກປະຊາຊົນ, ອີງໃສ່ປະຊາຊົນ ແລະ ມີຄວາມຮັບຜິດຊອບຕໍ່ປະຊາຊົນ”, ເກັບກຳແລະແກ້ໄຂຄວາມຄິດຈິດໃຈ, ຄວາມປາຖະໜາທີ່ຊອບທຳ ຖືກກົດໝາຍ ຂອງປະຊາຊົນທຸກຊັ້ນຄົນ ຢ່າງດີແລະທັນເວລາ.
ຍົກສູງຄວາມສາມາດຄາດຄະເນ ແລະ ວິໄສທັດຍຸດທະສາດ
ຂອງຖັນແຖວພະນັກງານໃນເງື່ອນໄຂໃໝ່ - ໜ້າທີ່ແລະວິທີແກ້ໄຂຕົ້ນຕໍຈຳນວນໜຶ່ງ
ຕໍ່ໜ້າການຜັນປ່ຽນຢ່າງໄວວາແລະສັບສົນຂອງສະພາບການການເມືອງໂລກ, ບັນດາປະເທດທີ່ມີແນວຄວາມຄິດການເມືອງສະຫຼາດສ່ອງໃສ ຈຶ່ງມີຄວາມສາມາດໃຊ້ປະໂຫຍດຈາກໂອກາດ, ແກ້ໄຂຜ່ານຜ່າສິ່ງທ້າທາຍ ແລະ ກໍານົດເສັ້ນທາງພັດທະນາທີ່ຖືກຕ້ອງ. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມໄດ້ຊີ້ແຈ້ງ: “ໃນຊຸມປີທີ່ຈະມາເຖິງ, ສະຖານະການໂລກຈະມີການປ່ຽນແປງຢ່າງໄວວາ, ສັບສົນ, ຄາດເດົາຍາກ. ພາຍຫຼັງ 35 ປີແຫ່ງການປ່ຽນແປງໃໝ່, ປະເທດຂອງພວກເຮົາໄດ້ບັນລຸຜົນສໍາເລັດທີ່ຍິ່ງໃຫຍ່ ແລະ ມີຄວາມໝາຍປະຫວັດສາດ, ຖານະຕຳແໜ່ງ, ກຳລັງແຮງສັງລວມ ແລະ ກຽດສັກສີຂອງປະເທດໃນເວທີສາກົນໄດ້ຮັບການຍົກສູງ. ຢ່າງໃດກໍຕາມ, ພາລະກິດການປະຕິວັດ ຂອງພັກແລະປະຊາຊົນເຮົາ ຍັງປະເຊີນກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ: ຄວາມສ່ຽງທັງສີ່ທີ່ພັກໄດ້ຊີ້ໃຫ້ເຫັນນັ້ນຍັງຄົງມີຢູ່, ມີອັນຮ້າຍແຮງກວ່າ; ບັນດາໄພຂົ່ມຂູ່ຕໍ່ຄວາມເປັນເອກະລາດ, ອະທິປະໄຕ ແລະ ຜົນປະໂຫຍດທາງຍຸດທະສາດຂອງປະເທດ, ໂດຍສະເພາະໃນທະເລຕາເວັນອອກ; ບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ, ການປ່ຽນແປງສະພາບອາກາດ, ມົນລະພິດສິ່ງແວດລ້ອມ, ໂລກລະບາດ, ຊັບພະຍາກອນທຳມະຊາດຖືກບົກແຫ້ງ, ທ່າອ່ຽງປະຊາກອນສູງອາຍຸ; ສະພາບການເສື່ອມໂຊມ, ປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ຢູ່ພາຍໃນ; ການຕໍ່ສູ້ ຕ້ານຢັນ ທຳລາຍຢ່າງຮຸນແຮງ ຂອງອິດທິກຳລັງສັດຕູ ແລະ ອົງການຈັດຕັ້ງປະຕິການ”(6).
ການປະຕິວັດອຸດສາຫະກຳຄັ້ງທີສີ່ຊຸກຍູ້ຄວາມກ້າວໜ້າທາງເຕັກໂນໂລຍີ, ເຊັ່ນ: ປັນຍາປະດິດ, ອິນເຕີເນັດຄວາມໄວສູງ, ວັດສະດຸໃໝ່, ແຫຼ່ງກັກເກັບພະລັງງານ ແລະ ຄອມພິວເຕີຄວອນຕັມ... ລຶບເລືອນຂີດຂັ້ນລະຫວ່າງຫຼາຍຂົງເຂດ, ໂດຍສະເພາະໃນຂົງເຂດຟີຊິກ, ດິຈິຕອນ ແລະ ຊີວະວິທະຍາ, ສົ່ງຜົນກະທົບຢ່າງແຮງຕໍ່ຄວາມໄວ ແລະ ຂອບເຂດຂອງລະບົບເສດຖະກິດອຸດສາຫະກຳທົ່ວໂລກ. ສະພາບການດັງກ່າວສົ່ງຜົນກະທົບຢ່າງແຮງ, ຫຼາຍດ້ານເຖິງຊີວິດເສດຖະກິດ-ສັງຄົມຂອງປະເທດ, ຮຽກຮ້ອງໃຫ້ພະນັກງານທຸກຂັ້ນຕ້ອງຍົກສູງລະດັບຄວາມຮູ້ ແລະ ຄວາມກ້າຫານທາງການເມືອງຢ່າງບໍ່ຢຸດຢັ້ງ; ມີສະຕິຝຶກຝົນຫຼໍ່ຫຼອມຕົນເອງ ທາງດ້ານຄຸນສົມບັດສິນທຳ, ມີຈິນຕະນາການປ່ຽນແປງໃໝ່, ຈິນຕະນາການຍຸດທະສາດ ຈຶງຈະຕອບສະໜອງໄດ້ ກັບຄວາມຕ້ອງການຍົກສູງຄວາມສາມາດຄາດຄະເນ ແລະ ວິໄສທັດຍຸດທະສາດ ໃນການວາງກຳນົດແນວທາງ, ແຜນນະໂຍບາຍ, ຮັບໃຊ້ພາລະກິດສ້າງສາ ແລະ ພັດທະນາປະເທດ ຢ່າງໄວວາແລະຍືນຍົງ ໃນຊຸມປີຕໍ່ໄປ.
ທັດສະນະຊີ້ນຳຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ ໄດ້ຊີ້ແຈ້ງວ່າ: “ປ່ຽນແປງໃໝ່ແບບວິທີການນຳພາຂອງພັກຢ່າງແຂງແຮງຕາມທິດທາງຍົກສູງຄວາມສາມາດຄາດຄະເນ ແລະ ວິໄສທັດຍຸດທະສາດ ໃນການວາງກຳນົດແນວທາງ, ແຜນນະໂຍບາຍ; ປ່ຽນແປງໃໝ່ການສ້າງ, ປະກາດໃຊ້ມະຕິຂອງພັກ ແລະ ຍົກສູງຄຸນນະພາບມະຕິຂອງພັກ; ແກ້ໄຂຜ່ານຜ່າສະພາບການປະກາດໃຊ້ມະຕິທີ່ບໍ່ໃກ້ກັບຄວາມເປັນຈິງ, ຂາດຄວາມເປັນໄປໄດ້. ພ້ອມກັນນັ້ນ, ຍົກສູງຄວາມສາມາດໃນການຫັນແນວທາງແລະແຜນນະໂຍບາຍຂອງພັກ ເປັນນິນິຕິກຳ ເປັນຮູບປະທຳ ແລະ ນຳພາ ຊີ້ນຳ ຈັດຕັ້ງປະຕິບັດແນວທາງ ແຜນນະໂຍບາຍນັ້ນ ຢ່າງມີປະສິດທິຜົນ.
ການນຳຂອງສະພາແຫ່ງຊາດແລະລັດຖະບານ ໄດ້ຈັດຕັ້ງການຫັນເປັນນິຕິກຳ ແລະ ປະຕິບັດໂຄງການການເມືອງ, ແນວທາງ, ແຜນນະໂຍບາຍຂອງພັກຢ່າງມີປະສິດທິຜົນ, ເອົາໃຈໃສ່ເປັນສຳຄັນ ເຖິງການນຳພາການປ່ຽນແປງໃໝ່, ຍົກສູງຄຸນນະພາບຂອງການສ້າງກົດໝາຍ, ການປະຕິຮູບດ້ານບໍລິຫານ ແລະ ການປະຕິຮູບດ້ານຕຸລາການ”(7).
ດ້ວຍຄວາມຮັບຮູ້ດີກ່ຽວກັບສະສານະການ ແລະ ເງື່ອນໄຂໃໝ່, ພັກກອມມູນິດຫວຽດນາມໄດ້ກຳນົດວ່າ: ຕ້ອງເອົາໃຈໃສ່ເຖິງການຍົກສູງຄວາມກ້າຫານ, ຄວາມສາມາດຄາດຄະເນ ແລະ ຄຸນນະພາບຂອງວຽກງານວາງກຳນົດແນວທາງ, ແຜນນະໂຍບາຍ ໃຫ້ສອດຄ່ອງກັບພຶດຕິກຳຕົວຈິງຂອງຫວຽດນາມ ແລະ ທ່າອ່ຽງການພັດທະນາຂອງຍຸກສະໄໝ; ຫັນແນວທາງແຜນນະໂຍບາຍຂອງພັກເປັນນິຕິກຳ ຫັນເປັນຮູບປະທຳທັນທີ, ຜັນຂະຫຍາຍປະຕິບັດແນວທາງແຜນນະໂຍບາຍຂອງພັກ, ນະໂບບາຍແລະກົດໝາຍຂອງລັດ ຢ່າງຖືກຕ້ອງແລະມີປະສິດທິຜົນ, ແກ້ໄຂຈຸດອ່ອນໃນການນຳພາ ຊີ້ນໍາ ການຈັດຕັ້ງປະຕິບັດ; ປະຕິບັດຢ່າງມີປະສິດທິຜົນກົນໄກ “ພັກນຳພາ, ລັດຄຸ້ມຄອງ, ປະຊາຊົນເປັນເຈົ້າຂອງ” ແລະ ທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້”.
ບົນຈິດໃຈດັງກ່າວ, ຕ້ອງສຸມໃສ່ຄົ້ນຄວ້າ ແລະ ປະຕິບັດບັນດາໜ້າທີ່ ແລະ ວິທີແກ້ໄຂຕົ້ນຕໍຕໍ່ໄປນີ້ໃຫ້ດີ:
ທີໜຶ່ງ, ຍົກສູງຄວາມຮັບຮູ້ຂອງພະນັກງານທຸກລະດັບ ກ່ຽວກັບບົດບາດ, ຄວາມສຳຄັນພິເສດ ຂອງວຽກງານຄາດຄະເນຍຸດທະສາດ, ວິໄສທັດຍຸດທະສາດ ໃນການວາງກຳນົດແນວທາງ ແລະ ແຜນນະໂຍບາຍຂອງພັກ; ຊາບຊຶມບັນດາຄວາມຮຽກຮ້ອງຕ້ອງການໃໝ່ຂອງວຽກງານນີ້ ໃຫ້ຖັນແຖວພະນັກງານ, ໂດຍສະເພາະພະນັກງານລະດັບຍຸດທະສາດ. ຖືວ່ານີ້ແມ່ນໜຶ່ງໃນມາດຖານທີ່ສໍາຄັນ ໃນການຝຶກອົບຮົມ, ການບຳລຸງສ້າງ, ການແຕ່ງຕັ້ງ ແລະ ການນໍາໃຊ້ພະນັກງານນຳພາ, ຄຸ້ມຄອງ.
ທີສອງ, ປ່ຽນແປງໃໝ່ແລະຍົກສູງຄຸນນະພາບການຝຶກອົບຮົມ ແລະ ບຳລຸງສ້າງພະນັກງານ ຕາມທິດໃຫ້ຄວາມສຳຄັນກັບຈິນຕະນາການຍຸດທະສາດ. ສ້າງຄວາມຫຼາກຫຼາຍດ້ານເນື້ອໃນ ແລະ ວິທີການຝຶກອົບຮົມ ແລະ ບຳລຸງສ້າງພະນັກງານ ໂດຍຜ່ານໂຄງການຝຶກອົບຮົມໄລຍະສັ້ນ ແລະ ໄລຍະຍາວ, ຜ່ານການແລກປ່ຽນຮຽນຮູ້ຢູ່ພາຍໃນ ແລະ ຕ່າງປະເທດ. ສ້າງກາລະໂອກາດໃຫ້ພະນັກງານມີເງື່ອນໄຂເຂົ້າຮ່ວມການສະຫຼຸບສັງລວມພຶດຕິກຳ, ຄົ້ນຄວ້າທິດສະດີ, ຝຶກອົບຮົມຄວາມສາມາດດ້ານຈິນຕະນາການສັດຈະວິພາກ, ວິທີການວິທະຍາສາດ, ແກ້ໄຂຜ່ານຜ່າການຈິນຕະນາແບບປະສົບການ ແລະ ຄຳພີຕາຍຕົວ.
ທີສາມ, ຍູ້ແຮງການຮ່ຳຮຽນແລະປະຕິບັດຕາມແນວຄິດ ຄຸນສົມບັດສິນທຳ ແບບແຜນໂຮ່ຈີມິນ, ໂດຍສະເພາະຈິນຕະນາການວັດຖຸນິຍົມສັດຈະວິພາກ, ຄວາມສາມາດໃນການເກັບກຳ, ພິນິດໄສ, ຮັບຮູ້, ເຂົ້າໃຈ, ຄາດການ ແລະ ທຳນາຍ. ຄວາມຮຽກຮ້ອງຕ້ອງການທີ່ວາງອອກມາແມ່ນ, ຖັນແຖວພະນັກງານ ສະມາຊິດພັກຕ້ອງປະສານສົມທົບຢ່າງກົມກຽວ ລະຫວ່າງລັກສະນະປະຕິວັດ ແລະ ລັກສະນະວິທະຍາສາດ, ລະຫວ່າງຫຼັກໝັ້ນ ທັດສະນະ ຄວາມຮັບຮູ້ ແລະ ວິທີການກະທຳ, ບົນພື້ນຖານຍຶດໝັ້ນເອົາຮາກຖານອຸດົມຄະຕິຂອງພັກ ແມ່ນລັດທິມາກ-ເລນິນ, ແນວຄິດຂອງໂຮ່ຈີມິນ, ປະສານສົມທົບ ບັນດາບັນຫາຊາດແລະຍຸສະໄໝ ຢ່າງກົມກຽວ, ຄາດຄະເນທ່າອ່ຽງການພັດທະນາ, ບັນຫາຍຸດທະສາດ ແລະ ບັນຫາຂອງພາກພື້ນ ແລະ ຂອງໂລກໄດ້ ຢ່າງຖືກຕ້ອງແລະຊັດເຈນ, ຊ່ວຍພັກວາງແນວທາງຍຸດທະສາດຢ່າງຖືກຕ້ອງ ແລະ ມີປະສິດທິຜົນ ໃນການກໍ່ສ້າງແລະປົກປັກຮັກສາປະເທດຊາດ. ພ້ອມກັນນັ້ນ, ເອົາໃຈໃສ່ປະຕິບັດ ແລະ ຮັບປະກັນໃຫ້ພະນັກງານ ສະມາຊິກພັກ ໄດ້ບຳລູງຄູນສ້າງຄຸນສົມບັດປະຕິວັດ ຢ່າງສະໝ່ຳສະເໝີ, ມີຄວາມຮັບຜິດຊອບ, ເຂົ້າໃຈແລະປະຕິບັດຕາມມາດຕະຖານແລະຄ່ານິຍົມ ຂອງຈັນຍາບັນການບໍລິການສາທາລະນະ ແລະ ວັດທະນະທຳການເມືອງ ຢ່າງຖືກຕ້ອງ; ພັດທະນາລະດັບແລະທັກສະທາງວິຊາຊີບ ວິຊາສະເພາະ, ທິດສະດີ ແລະ ການເມືອງຂອງຕົນ ຢ່າງບໍ່ຢຸດຢັ້ງ ເພື່ອຕອບສະໜອງຄວາມຕ້ອງການ ແລະ ໜ້າທີ່ວຽກງານ.
ທີສີ່, ຍູ້ແຮງວຽກງານການສະຫຼຸບສັງລວມພຶດຕິກຳ ແລະ ຄົ້ນຄວ້າທິດສະດີ, ຍົກລະດັບຈິນຕະນາການທິດສະດີຂອງພັກ, ປັບປຸງບູລະນະລະບົບທິດສະດີກ່ຽວກັບແນວທາງການປ່ຽນແປງໃໝ່, ກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມຂອງຫວຽດນາມ. ຕິດແໜ້ນການສະຫຼຸບສັງລວມພຶດຕິກຳແລະການຄົ້ນຄວ້າທິດສະດີ ກັບການວາງກຳນົດແຜນນະໂຍບາຍແລະແນວທາງ ຕາມທິດຮອບດ້ານ, ມີຈຸດໜັກໃຈກາງ, ມີລັກສະນະບຸກທະລຸ ກັບບັນຫາຫຼັກຂອງຍຸດທະສາດທີ່ຈະວາງກຳນົດ, ໂດຍສະເພາະການລະບຸຢ່າງທັນການ ກ່ຽວກັບຄວາມສ່ຽງ ແລະ ຄວາມທ້າທາຍທີ່ສຳຄັນ ທີ່ມີຜົນກະທົບຕໍ່ການເມືອງ, ເສດຖະກິດ-ສັງຄົມ, ການປ້ອງກັນປະເທດ, ຄວາມໝັ້ນຄົງ... ຂອງປະເທດ; ຊ່ວຍໃຫ້ພັກມີຄວາມສາມາດໃນການກຳນົດຍຸດທະສາດ ຕາມທິດເປັນເຈົ້າການ, ຕັ້ງໜ້າ, “ເປັນເຈົ້າການໃນການປ້ອງກັນກີດກັ້ນຄວາມສ່ຽງ” ຕັ້ງແຕ່ຕົ້ນແລະຈາກໄລຍະໄກ.
ທີຫ້າ, ສືບຕໍ່ປ່ຽນແປງໃໝ່ຮູບແບບການຈັດຕັ້ງພະນັກງານ, ຍົກສູງຄຸນນະພາບ ປະສິດທິຜົນການເຄື່ອນໄຫວ, ການສົມທົບລະຫວ່າງບັນດາອົງການຄົ້ນຄວ້າວິທະຍາສາດ. ເສີມຂະຫຍາຍບົດບາດ ແລະ ຄວາມຮັບຜິດຊອບ ຂອງບັນດາອົງການຫຼັກ ໃນການຄາດຄະເນ ແລະ ການວາງແຜນຍຸດທະສາດ; ນຳໃຊ້ຜົນສຳເລັດທາງວິທະຍາສາດ ແລະ ເຕັກໂນໂລຊີທັນສະໄໝຢ່າງຕັ້ງໜ້າ ເຂົ້າໃນການພະຍາກອນ. ເສີມຂະຫຍາຍປະສິດທິພາບແລະປະສິດທິຜົນສູງສຸດ ໃນການຈັດຕັ້ງລະດົມສະຕິປັນຍາລວມໝູ່ ຂອງບັນດາອົງການວິຊາສະເພາະແລະຜູ້ຊ່ຽວຊານທີ່ສົມທົບກັນຢ່າງແໜ້ນແຟ້ນ ເພື່ອໃຫ້ສາມາດຄາດຄະເນຍຸດທະສາດໄດ້ຢ່າງຖືກຕ້ອງ, ສົມບູນຄົບຖ້ວນ ແລະ ມີຄຸນນະພາບສູງ, ສະໜອງພື້ນຖານວິທະຍາສາດທີ່ໜັກແໜ້ນຢ່າງທັນການ ໃຫ້ແກ່ການວາງກຳນົດແນວທາງ ແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ. ລົງທຶນກໍ່ສ້າງ ແລະ ພັດທະນາຖັນແຖວພະນັກງານເຮັດວຽກງານທິດສະດີ ເພື່ອຕອບສະໜອງຄວາມຕ້ອງການຂອງພາລະກິດການປະຕິວັດ ໃນສະຖານະການແລະເງື່ອນໄຂໃໝ່; ມີກົນໄກແລະນະໂຍບາຍດຶງດູດ, ນຳໃຊ້, ໃຫ້ຄ່າຕອບແທນຢ່າງເໝາະສົມ ສຳລັບຜູ້ຊ່ຽວຊານຊັ້ນນໍາຂອງຂະແໜງການ.
ພິເສດແມ່ນ, ຕ້ອງຄາດຄະເນຢ່າງໃກ້ຊິດ, ເພີ່ມທະວີຄວາມເປັນເຈົ້າການໃນການກຳສະຖານະການອຸດົມການຂອງພະນັກງານ ສະມາຊິກພັກ ແລະ ປະຊາຊົນ, ປະມວນຜົນຂໍ້ມູນຢ່າງທັນການ, ເຮັດວຽກງານຊີ້ນຳຄວາມຄິດເຫັນສາທາລະນະໃຫ້ດີ, ຮັບປະກັນຄວາມເປັນເອກະພາບທາງແນວຄິດອຸດົມການພາຍໃນພັກ ແລະ ຄວາມເຫັນດີເຫັນພ້ອມໃນສັງຄົມ ເພື່ອສ້າງກຳລັງແຮງສັງລວມ, ປະຕິບັດວຽກງານການເມືອງໃນໄລຍະໃໝ່ໃຫ້ສຳເລັດຜົນ./.
-----------------------
(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 2, ໜ້າ 165 – 167.
(2) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 180.
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 196 – 197.
(4), (5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 232, 230.
(6), (7) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 227 - 228, 253 – 254.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 999 (ເດືອນຕຸລາ 2022)
