ການປະຕິບັດຫຼັກການລວມສູນປະຊາທິປະໄຕ
ໃນວຽກງານພະນັກງານຂອງພັກກອມມູນິດຫວຽດນາມ
ໃນວຽກງານພະນັກງານຂອງພັກກອມມູນິດຫວຽດນາມ
ວກ. - ການລວມສູນປະຊາທິປະໄຕ ແມ່ນຫຼັກການພື້ນຖານ ໃນການຈັດຕັ້ງແລະເຄື່ອນໄຫວ ຂອງພັກກອມມູນິດຫວຽດນາມ. ຫຼັກການລວມສູນປະຊາທິປະໄຕ ແມ່ນປັດໄຈຮັບປະກັນຄວາມເປັນເອກະພາບ ທາງດ້ານເຈດຈຳນົງ ແລະ ການກະທຳ, ທັງເສີມຂະຫຍາຍປະຊາທິປະໄຕ, ເຕົ້າໂຮມກຳລັງແຮງແລະສະຕິປັນຍາຂອງໝູ່ຄະນະໄດ້, ທັງຮັບປະກັນປະສິດທິພາບການນຳພາ ແລະ ກຳລັງແຮງສູ້ຮົບຂອງພັກ. ຕໍ່ໜ້າຄວາມຮຽກຮ້ອງຕ້ອງການສືບຕໍ່ “ຊາບຊຶມແລະປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ” ຕາມທີ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມໄດ້ກຳນົດ, ການປັບປຸງບູລະນະກົນໄກປະຕິບັດ ຫຼັກການລວມສູນປະຊາທິປະໄຕ ໃນວຽກງານພະນັກງານ ຕອບສະໜອງຄວາມຕ້ອງການຂອງສະພາບການໃໝ່ ໄດ້ຖືກກຳນົດວ່າເປັນວຽກງານທີ່ສຳຄັນ ແລະ ຮີບດ່ວນ.
ການລວມສູນປະຊາທິປະໄຕ ແມ່ນຫຼັກການພື້ນຖານ
ໃນການຈັດຕັ້ງແລະເຄື່ອນໄຫວຂອງພັກກອມມູນິດຫວຽດນາມ
ໃນເວລາຍັງມີຊີວິດຢູ່, ບັນດາຜູ້ກໍ່ຕັ້ງລັດທິສັງຄົມນິຍົມວິທະຍາສາດ ເຄີຍເນັ້ນໜັກເຖິງບົດບາດ ແລະ ຄວາມສໍາຄັນຂອງຫຼັກການລວມສູນປະຊາທິປະໄຕ. ນັ້ນແມ່ນການສະແດງອອກຂອງການນຳພາລວມໝູ່, ຮັບປະກັນໃຫ້ແຜນນະໂຍບາຍແລະແນວທາງຂອງພັກ ໄດ້ຮັບການສົນທະນາ, ປຶກສາຫາລື ແລະ ຕັດສິນຕົກລົງໂດຍສຽງສ່ວນໃຫຍ່; ພ້ອມກັນນັ້ນ, ລວບລວມບົດຮຽນປະສົບການ ແລະ ຄວາມຄິດເຫັນຂອງມະສາຊິກພັກ, ຈຳກັດການສະແດງອອກຂອງຄວາມຄິດອັດຕະວິໄສ, ເຈດຈຳນົງນິຍົມ. ການຍຶດໝັ້ນໃນຫຼັກການລວມສູນປະຊາທິປະໄຕ ຊ່ວຍສົ່ງເສີມຄວາມຕັ້ງໜ້າ ແລະ ການປະດິດສ້າງ ຂອງສະມາຊິກພັກ, ເພື່ອໃຫ້ມະຕິ ແລະ ຄວາມຕັດສິນໃຈຂອງພັກ ກາຍເປັນຜະລິດຕະພັນທາງປັນຍາ ແລະ ສະແດງເຈດຈຳນົງເປັນເອກະພາບຂອງທົ່ວພັກ. ວ.ອີ. ເລນິນ ເຄີຍຢືນຢັນວ່າ: “ບັນດາພັກທີ່ເຂົ້າຮ່ວມໃນສາກົນກອມມູນິດຕ້ອງໄດ້ກໍ່ສ້າງຕາມຫຼັກການລວມສູນ ປະຊາທິປະໄຕ..., ພັກກອມມູນິດຈະສາມາດປະຕິບັດພາລະກິດຂອງຕົນໄດ້ ຖ້າພັກໄດ້ຮັບການຈັດຕັ້ງຢ່າງລວມສູນທີ່ສຸດ, ຖ້າມີລະບຽບວິໄນເຫຼັກພາຍໃນພັກ, ເກືອບຄືກັບລະບຽບວິໄນຂອງທະຫານ, ແລະ ຖ້າສູນກາງພັກເປັນອົງການມີອຳນາດທີ່ເຂັ້ມແຂງ, ມີອຳນາດກວ້າງຂວາງ, ໄດ້ຮັບຄວາມໄວ້ວາງໃຈຈາກສະມາຊິກພັກທຸກຄົນ”(1). ວ.ອີ. ເລນິນ ໄດ້ເນັ້ນໜັກວ່າ, ການລວມສູນປະຊາທິປະໄຕແມ່ນຫຼັກການການຈັດຕັ້ງທີ່ຖືກຕ້ອງຂອງພັກກຳມາຊີບແບບໃໝ່, ແມ່ນຫຼັກການທີ່ຈຳແນກພັກການເມືອງປະຕິວັດທີ່ແທ້ຈິງຂອງຊົນຊັ້ນກຳມະກອນ ອອກຈາກພັກອື່ນໆ. ຕາມນັ້ນ, “ລະບອບລວມສູນປະຊາທິປະໄຕ, ດ້ານໜຶ່ງ, ແຕກຕ່າງຫ່າງໄກຈາກລະບອບລວມສູນອາດຍາສິດນິຍົມ, ແລະ, ອີກດ້ານໜຶ່ງ, ແຕກແຕ່ງຫ່າງໄກຈາກອະນາທິປະໄຕ”(2); “ບໍ່ມີຫຍັງທີ່ຜິດພາດຫຼາຍກ່ວາ ການຫຼົງປົນເປລະຫວ່າງລະບອບລວມສູນປະຊາທິປະໄຕ ກັບລັດທິອາດຍາສິດ ແລະ ກັບການເຮັດຕາມເບົ້າກົນຈັກ”(3).
ປະທານໂຮ່ຈີມິນກໍ່ໄດ້ເນັ້ນໜັກຫຼາຍເທື່ອເຖິງບົດບາດ ແລະ ຄວາມສຳຄັນຂອງຫຼັກການລວມສູນປະຊາທິປະໄຕ. ເພິ່ນຊີ້ແຈ້ງວ່າ: “ພັກຈັດຕັ້ງຕາມຫຼັກການ ລວມສູນປະຊາທິປະໄຕ. ໝາຍຄວາມວ່າ: ພັກມີໂຄງການທີ່ເປັນເອກະພາບ, ລະບຽບວິໄນທີ່ເປັນເອກະພາບ, ອົງການນຳພາທີ່ເປັນເອກະພາບ. ບຸກຄົນຕ້ອງປະຕິບັດຕາມໝູ່ຄະນະ, ຄົນສ່ວນນ້ອຍຕ້ອງເຊື່ອຟັງສ່ວຍຫຼາຍ, ຂັ້ນລຸ່ມຕ້ອງປະຕິບັດຕາມຂັ້ນເທິງ, ທ້ອງຖິ່ນຕ້ອງປະຕິບັດຕາມສູນກາງ”(4); “ປະຊາຊົນເລືອກຕັ້ງຜູ້ຕາງໜ້າເພື່ອດໍາເນີນການແທນເຂົາເຈົ້າ. ນັ້ນແມ່ນປະຊາທິປະໄຕ. ບັນດາອົງການອຳນາດການປົກຄອງເປັນເອກະພາບ, ແມ່ນການລວມສູນ. ຕັ້ງແຕ່ສະພາປະຊາຊົນ ແລະ ຄະນະກຳມະການຕໍ່ຕ້ານຕາແສງ ຈົນເຖິງສະພາແຫ່ງຊາດ ແລະ ລັດຖະບານສູນກາງ, ຈຳນວນສ່ວນນ້ອຍຕ້ອງປະຕິບັດຕາມສ່ວນຫຼາຍ, ຂັ້ນລຸ່ມຕ້ອງປະຕິບັດຕາມຂັ້ນເທິງ, ທ້ອງຖິ່ນຕ້ອງປະຕິບັດຕາມສູນກາງ. ຄືແນວນັ້ນແມ່ນມີທັງປະຊາທິປະໄຕແລະລວມສູນ”(5); “ຕັ້ງແຕ່ແຂວງ, ເມືອງ ຈົນເຖິງໜ່ວຍພັກ, ຕ້ອງປະຕິບັດຕາມຫຼັກການ ນຳພາລວມໝູ່, ບຸກຄົນຮັບຜິດຊອບ. ພາຍໃນຕ້ອງມີຄວາມສາມັກຄີ. ທຸກວຽກງານຕ້ອງໄດ້ສົນທະນາ ປຶກສາຫາລືຢ່າງເປັນປະຊາທິປະໄຕແລະລວມໝູ່ ”(6). ປະທານໂຮ່ຈີມິນໃຫ້ທັດສະນະວ່າ, “ການປະຕິບັດປະຊາທິປະໄຕແມ່ນກະແຈອະເນກປະສົງ ເພື່ອແກ້ໄຂຄວາມຫຍຸ້ງຍາກທັງໝົດ”; ຢ່າງໃດກໍ່ຕາມ, ປະຊາທິປະໄຕຕ້ອງຕິດແໜ້ນກັບການລວມສູນ, ປະຕິບັດການນຳພາລວມໝູ່, ບຸກຄົນຮັບຜິດຊອບ. ເພິ່ນເນັ້ນໜັກວ່າ: “ການນຳພາລວມໝູ່ ແລະ ບຸກຄົນຮັບຜິດຊອບຈຳເປັນຕ້ອງໄປຄຽງຄູ່ນຳກັນສະເໝີ... ການນຳພາລວມໝູ່ແມ່ນປະຊາທິປະໄຕ. ບຸກຄົນຮັບຜິດຊອບແມ່ນລວມສູນ. ການນຳພາລວມໝູ່, ບຸກຄົນຮັບຜິດຊອບ ແມ່ນໝາຍຄວາມວ່າ ລວມສູນປະຊາທີປະໄຕ”(7). ການຮັບຮູ້ຫຼັກການລວມສູນປະຊາທິປະໄຕຢ່າງຖືກຕ້ອງ ແລະ ການປະຕິບັດຫຼັກການນີ້ຢ່າງເຂັ້ມງວດ ຈະເຮັດໃຫ້ພັກຂອງເຮົານັບມື້ນັບໝັ້ນຄົງເຂັ້ມແຂງ, ເປັນເອກະພາບທາງດ້ານແນວຄິດແລະການກະທຳ, ເພື່ອໃຫ້ “ພັກຂອງພວກເຮົາມີຫຼາຍຄົນ, ແຕ່ໃນເມື່ອບຸກໂຈມຕີແມ່ນຄືກັນກັບຄົນຫນຶ່ງ”(8).
ໃນຂະບວນການນຳພາພາລະກິດການປະຕິວັດຕະຫຼອດ 93 ປີທີ່ຜ່ານມາ, ພັກກອມມູນິດຫວຽດນາມຍາມໃດກໍ່ຕັ້ງໝັ້ນໃນຫຼັກການລວມສູນປະຊາທິປະໄຕ ແລະ ຖືວ່ານີ້ແມ່ນຫຼັກການການຈັດຕັ້ງພື້ນຖານຂອງພັກ, ຊີ້ນຳການກໍ່ສ້າງອົງການຈັດຕັ້ງ ແລະ ການເຄື່ອນໄຫວທັງໝົດຂອງພັກ, ຮັບປະກັນການນຳພາລວມສູນ ເປັນເອກະພາບ, ພ້ອມທັງເສິມຂະຫຍາຍປະຊາທິປະໄຕໃນພັກ. ການຍຶດໝັ້ນປະຕິບັດຫຼັກການລວມສູນປະຊາທິປະໄຕ ເລີ່ມຈາກທາດແທ້ຂອງພັກ, ຈາກຄວາມຕ້ອງການແລະໜ້າທີ່ປະຕິວັດຂອງພັກ ແລະ ຈາກບົດຮຽນປະສົບການຂອງບັນດາພັກກອມມູນິດ ແລະ ກຳມະກອນສາກົນ. ພັກກອມມູນິດຫວຽດນາມໄດ້ຢືນຢັນຫຼາຍເທື່ອວ່າ: “ຄວາມແໜ້ນແຟ້ນທາງດ້ານຫຼັກການ ແມ່ນບັນຫາສຳຄັນຂອງພັກ ແລະ ເປັນຫຼັກປະກັນທີ່ສຳຄັນທີ່ສຸດ ສຳລັບຄວາມມີຊີວິດຊີວາ, ຄວາມບໍລິສຸດ ແລະ ຄວາມໝັ້ນຄົງເຂັ້ມແຂງຂອງພັກ”(9).
ກົດລະບຽບຂອງພັກໄດ້ກຳນົດ: “ພັກແມ່ນອົງການຈັດຕັ້ງທີ່ແໜ້ນແຟ້ນ, ເປັນເອກະພາບທາງດ້ານເຈດຈຳນົງ ແລະ ການກະທຳ, ຖືເອົາການລວມສູນປະຊາທິປະໄຕເປັນຫຼັກການການຈັດຕັ້ງພື້ນຖານ, ດຳເນີນການນຳພາລວມໝູ່, ບຸກຄົນຮັບຜິດຊອບ”(10). ຫຼັກການລວມສູນປະຊາທິປະໄຕລວມມີບັນດາເນື້ອໃນພື້ນຖານດັ່ງຕໍ່ໄປນີ້: 1- ບັນດາອົງການການນຳຂອງພັກທຸກຂັ້ນ ໄດ້ຮັບການຈັດຕັ້ງຂຶ້ນ ໂດຍການເລືອກຕັ້ງ ແລະ ດຳເນີນການນຳພາລວມໝູ່, ບຸກຄົນຮັບຜິດຊອບ; 2- ອົງການນຳພາສູງສຸດຂອງພັກແມ່ນກອງປະຊຸມໃຫຍ່ຜູ້ແທນທົ່ວປະເທດ; ອົງການນຳພາໃນແຕ່ລະຂັ້ນແມ່ນກອງປະຊຸມໃຫຍ່ຜູ້ແທນ ຫຼືກອງປະຊຸມໃຫຍ່ສະມາຊິກພັກ; ລະຫວ່າງສອງກອງປະຊຸມໃຫຍ່, ອົງການນຳພາຂອງພັກແມ່ນຄະນະບໍລິຫານງານສູນກາງ, ໃນແຕ່ລະຂັ້ນແມ່ນຄະນະບໍລິຫານງານຂອງຄະນະພັກ, ໜ່ວຍພັກ; 3- ບັນດາຄະນະພັກທຸກຂັ້ນ ລາຍງານແລະຮັບຜິດຊອບຕໍ່ການເຄື່ອນໄຫວຂອງຕົນ ຕໍ່ໜ້າກອງປະຊຸມໃຫຍ່ຂັ້ນດຽວກັນ ແລະ ຕໍ່ໜ້າຄະນະພັກຂັ້ນເທິງ ແລະ ຂັ້ນລຸ່ມ; ແຈ້ງສະພາບການເຄື່ອນໄຫວຂອງຕົນເປັນໄລຍະ ໃຫ້ອົງການພັກທີ່ກ່ຽວຂ້ອງ, ດຳເນີນການຕິຊົມຕົນເອງ ແລະ ຕິຊົມ; 4- ອົງການພັກແລະສະມາຊິກພັກຕ້ອງປະຕິບັດມະຕິຂອງພັກ; ຄົນສ່ວຍນ້ອຍປະຕິບັດຕາມສຽງສ່ວນຫຼາຍ, ຂັ້ນລຸ່ມປະຕິບັດຕາມຂັ້ນເທິງ, ບຸກຄົນປະຕິບັດຕາມອົງການຈັດຕັ້ງ, ບັນດາອົງການຈັດຕັ້ງທົ່ວພັກປະຕິບັດຕາມກອງປະຊຸມໃຫຍ່ຜູ້ແທນທົ່ວປະເທດ ແລະ ຄະນະບໍລິຫານງານສູນກາງ; 5- ມະຕິຂອງອົງການນຳພາຂອງພັກ ຈະມີຜົນບັງຄັບໃຊ້ໄດ້ກໍ່ຕໍ່ເມື່ອສະມາຊິກຫຼາຍກວ່າເຄິ່ງໜຶ່ງຂອງອັງການພັກນັ້ນເຫັນດີ; ກ່ອນລົງຄະແນນສຽງ, ສະມາຊິກແຕ່ລະຄົນສາມາດສະແດງຄວາມຄິດເຫັນຂອງຕົນ; ສະມາຊິກພັກທີ່ມີຄວາມເຫັນເປັນສຽງສ່ວນໜ້ອຍແມ່ນມີສິດສະຫງວນໄວ້ ແລະ ລາຍງານຕໍ່ຄະນະພັກຂັ້ນສູງ ຈົນຮອດກອງປະຊຸມໃຫຍ່ຜູ້ແທນທົ່ວປະເທດ, ແຕ່ຕ້ອງປະຕິບັດມະຕິຢ່າງເຂັ້ມງວດ, ບໍ່ເຜີຍແຜ່ຄວາມເຫັນທີ່ຂັດກັບມະຕິຂອງພັກ; ຄະນະພັກມີອຳນາດຄົ້ນຄວ້າ ແລະ ພິຈາລະນາຄວາມເຫັນດັ່ງກ່າວ; ບໍ່ຈຳແນກການປະພຶດຕໍ່ສະມາຊິກພັກທີ່ມີຄວາມເຫັນເປັນສຽງສ່ວນໜ້ອຍ; 6- ອົງການຈັດຕັ້ງພັກຕັດສິນໃຈກ່ຽວກັບບັນຫາຕ່າງໆ ພາຍໃນເຂດອຳນາດຂອງຕົນ, ແຕ່ຕ້ອງບໍ່ຂັດກັບຫຼັກການ, ແນວທາງ ແລະ ນະໂຍບາຍຂອງພັກ, ກົດໝາຍຂອງລັດ ແລະ ມະຕິຂອງຂັ້ນເທິງ(11).
ການຊາບຊຶມແລະການປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດແມ່ນຄວາມຮຽກຮ້ອງຕ້ອງການສຳຄັນເປັນພິເສດໃນການຈັດຕັ້ງ ແລະການເຄື່ອນໄຫວຂອງພັກ; ຮັບປະກັນໃຫ້ພັກເປັນເອກະພາບ, ສາມັກຄີ, ສະອາດ, ເຂັ້ມແຂງ, ມີກຳລັງແຮງສູ້ຮົບສູງ. ການເບິ່ງເບົາ, ການປະຕິບັດຫຼັກການລວມສູນປະຊາທິປະໄຕຢ່າງບໍ່ຖືກຕ້ອງ, ບໍ່ເຂັ້ມງວດ ຈະທຳລາຍກຽດສັກສີ ແລະ ຄວາມເຂັ້ມແຂງຂອງພັກ; ເປັນຕົ້ນເຫດທີ່ນຳໄປສູ່ພະຍາດອາດຍາສິດ, ອຳນາດຜູກຂາດ, ການດູຖູກໝູ່ຄະນະ ບໍ່ຄຳນຶງເຖິງສ່ວນລວມ ແລະ ປະກົດການກະແຈກກະຈາຍ, ພາກສ່ວນທ້ອງຖິ່ນ, ບໍ່ມີລະບຽບວິໄນ.
ການຮັບຮູ້ແລະການປະຕິບັດຫຼັກການລວມສູນປະຊາທິປະໄຕ
ໃນວຽກງານພະນັກງານ
ວຽກງານພະນັກງານແມ່ນການຊີ້ນຳນຳພາ, ການຈັດຕັ້ງ ແລະ ການປະຕິບັດ ຂອງຄະນະພັກ, ອົງການຈັດຕັ້ງພັກ, ອົງການໃນລະບົບການເມືອງ ຕາມແຜນນະໂຍບາຍ, ມະຕິ, ບົດສະຫຼຸບ, ຄຳສັ່ງ ແລະ ຂໍ້ບັງຄັບຂອງພັກ ກ່ຽວກັບບັນດາເນື້ອໃນດັ່ງນີ້: ການກໍ່ສ້າງຖັນແຖວພະນັກງານທຸກຂັ້ນ, ໂດຍສະເພາະແມ່ນຂັ້ນຍຸດທະສາດ ທີ່ມີຄຸນນະພາບ, ມີຄວາມສາມາດ ແລະ ມີກຽດສັກສີໃນທຸກຂັ້ນ, ທຽບເທົ່າກັບວຽກງານ, ກຳນົດມາດຖານພະນັກງານ, ຮັບສະໝັກຄັກເລືອກ, ປະເມີນ ແລະ ວາງແຜນພະນັກງານ; ການຝຶກອົບຮົມ ແລະ ການບຳລຸງສ້າງພະນັກງານ; ການແຕ່ງຕັ້ງ ແລະ ແນະນຳຜູ້ສະໝັກ; ການຜັດປ່ຽນ, ການຍົກຍ້າຍ, ການສັບຊ້ອນ, ການນຳໃຊ້, ການປົດອອກຈາກຕຳແໜ່ງ, ການໃຫ້ລາອອກຈາກຕຳແໜ່ງ ສຳລັບພະນັກງານ; ການປະຕິບັດນະໂຍບາຍ, ການຍ້ອງຍໍໃຫ້ລາງວັນ, ການປະຕິບັດວິໄນຕໍ່ພະນັກງານ; ກວດກາ, ຕິດຕາມກວດກາ, ຄວບຄຸມອຳນາດ ເພື່ອກໍ່ສ້າງຖັນແຖວພະນັກງານດ້ວຍຈໍານວນແລະໂຄງສ້າງທີ່ເໝາະສົມ, ຄຸນນະພາບໄດ້ຮັບການປັບປຸງຍົກສູງຢ່າງຕໍ່ເນື່ອງ, ຕອບສະໜອງຄວາມຕ້ອງການຂອງພາລະກິດການປະຕິວັດ. ໃນບັນດາໄລຍະປະຫວັດສາຂອງປະເທດ, ຍ້ອນຄວາມຮຽກຮ້ອງຕ້ອງການປະຫວັດສາດ ແລະ ໜ້າທີ່ການເມືອງຂອງພັກທີ່ແຕກຕ່າງກັນ, ດັ່ງນັ້ນ ວຽກງານພະນັກງານຈຶ່ງມີເນື້ອໃນ ແລະ ຈຸດພິເສດທີ່ແຕກຕ່າງກັນ.
ໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ສັງຄົມນິຍົມ (ສະບັບເພີ່ມເຕີມ ພັດທະນາປີ 2011) ຢືນຢັນວ່າ: ພັກເປັນເອກະພາບການນຳພາໃນວຽກງານພະນັກງານ ແລະ ຄຸ້ມຄອງຖັນແຖວພະນັກງານ, ແນະນຳສະມາຊິກພັກດີເດັ່ນ ທີ່ມີຄວາມສາມາດແລະມີຄຸນສົມບັດ ເຂົ້າຮ່ວມວຽກງານໃນອົງການນຳຂອງລະບົບການເມືອງ. ໃນວຽກງານພະນັກງານ, ຕ້ອງ “ຮັບປະກັນການປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ, ການຕັດສິນຕົກລົງໂດຍໝູ່ຄະນະ, ພ້ອມກັນນັ້ນ ເສີມຂະຫຍາຍຄວາມຮັບຜິດຊອບສ່ວນບຸກຄົນຢ່າງເຕັມທີ່, ກ່ອນອື່ນແມ່ນ ຄວາມຮັບຜິດຊອບຂອງຫົວໜ້າ ໃນວຽກງານພະນັກງານ ແລະ ການຄຸ້ມຄອງພະນັກງານ”(12). ການຊາບຊຶມແລະປະຕິບັດຫຼັກການນີ້ຢ່າງເຂັ້ມງວດ ແມ່ນປັດໄຈສຳຄັນທີ່ຮັບປະກັນບົດບາດນຳພາຂອງພັກ, ພ້ອມກັນນັ້ນ ເສີມຂະຫຍາຍຄວາມຮັບຜິດຊອບຂອງສະມາຊິກຄະນະນຳ ແລະ ຫົວໜ້າທຸກຂັ້ນ; ຮັບປະກັນໃຫ້ວຽກງານພະນັກງານດຳເນີນໄປຢ່າງເປັນປະຊາທິປະໄຕ, ພາວະວິໄສ, ຍຸຕິທຳ ແລະ ໂປ່ງໃສ, ຄັດເລືອກບຸກຄົນທີ່ຖືກຕ້ອງເໝາະສົມ, ມີຄຸນສົມບັດ, ຄວາມສາມາດ ແລະ ກຽດສັກສີ ຕາມມາດຖານແລະເງື່ອນໄຂທີ່ກຳນົດໄວ້.
ໃນສະໄໝແຫ່ງການປ່ຽນແປງໃໝ່, ຂະບວນການປັບປຸງລະບອບລະບຽບການໃຫ້ສົມບູນຢ່າງບໍ່ຢຸດຢັ້ງ ຕິດພັນກັບຜົນສຳເລັດຂອງການປ່ຽນແປງໃໝ່, ການເຊື່ອມໂຍງສາກົນຢ່າງເລິກເຊິ່ງ ແລະ ບັນດາຄວາມຕ້ອງການ, ໜ້າທີ່ຂອງໄລຍະໃໝ່ ໄດ້ສ້າງເງື່ອນໄຂອຳນວຍຄວາມສະດວກ ເພື່ອຜັນຂະຫຍາຍວຽກງານພະນັກງານ ແລະ ກໍ່ສ້າງຖັນແຖວພະນັກງານຢ່າງມີປະສິດທິຜົນ. ກຳແໜ້ນບັນດາຫຼັກການທີ່ກຳນົດໄວ້ ໃນໂຄງການການເມືອງ ແລະ ກົດລະບຽບຂອງພັກ ແລະ ເລີ່ມຈາກສະຖານະການຕົວຈິງ, ຄະນະບໍລິຫານງານສູນກາງ, ກົມການເມືອງສູນກາງ ແລະ ຄະນະເລຂາທິການສູນກາງ ໄດ້ສຸມໃສ່ຊີ້ນຳການຄົ້ນຄວ້າ ແລະ ປະກາດໃຊ້ມະຕິ ຂໍ້ກຳນົດ ກົດລະບຽບຫຼາຍສະບັບ ເພື່ອແນໃສ່ຜັນຂະຫຍາຍຫຼັກການລວມສູນປະຊາທິປະໄຕ ໃນວຽກງານພະນັກງານ. ອຳນາດ, ຄວາມຮັບຜິດຊອບ, ການພົວພັນໃນການເຮັດວຽກ ຂອງໝູ່ຄະນະ ແລະ ສະມາຊິກຊັ້ນນຳຂອງຄະນະພັກ, ອົງການຈັດຕັ້ງພັກທຸກຂັ້ນ ໃນວຽກງານພະນັກງານ ໄດ້ຖືກກຳນົດຢ່າງຈະແຈ້ງຫຼາຍຂຶ້ນ(13). ລະບົບເອກະສານກ່ຽວກັບວຽກງານພະນັກງານໄດ້ຮັບການພັດທະນາ, ກວດກາ, ເພີ່ມເຕີມ ແລະ ປັບປຸງເທື່ອລະກ້າວ(14), ຮັບປະກັນການນຳພາລວມສູນຂອງພັກ; ພ້ອມກັນນັ້ນ, ສືບຕໍ່ຍົກສູງຄວາມຮັບຜິດຊອບ, ເສີມຂະຫຍາຍປະຊາທິປະໄຕໃນວຽກງານພະນັກງານ.
ຍ້ອນການຊາບຊຶມ ແລະ ການປະຕິບັດມະຕິ ຂໍ້ກຳນົດ ແລະ ກົດລະບຽບຂອງພັກຢ່າງເຂັ້ມງວດ, ດັ່ງນັ້ນ ວຽກງານພະນັກງານໃນຊຸມປີທີ່ຜ່ານມາ ຈຶ່ງສືບຕໍ່ມີການປ່ຽນແປງໃໝ່ຫຼາຍຢ່າງ, ມີວິທະຍາສາດຫຼາຍຂຶ້ນ, ແໜ້ນແຟ້ນແລະເປັນລະບຽບຮຽບຮ້ອຍ. ຂັ້ນຕອນຂອງວຽກງານພະນັກງານ ໄດ້ຮັບການຜັນຂະຫຍາຍຢ່າງເຂັ້ມງວດ, ຖືກຕາມຂໍ້ກຳນົດ, ຮັບປະກັນໃຫ້ພັກນຳພາຢ່າງເປັນເອກະພາບ ຕໍ່ວຽກງານພະນັກງານ ແລະ ການຄຸ້ມຄອງພະນັກງານ ຕາມຫຼັກການລວມສູນປະຊາທິປະໄຕ; ພ້ອມກັນນັ້ນ, ເສີມຂະຫຍາຍບົດບາດ ແລະ ຄວາມຮັບຜິດຊອບຂອງຄະນະພັກ, ຄະນະນຳ ແລະ ຫົວໜ້າ. ກອງປະຊຸມໃຫຍ່ຄັ້ງທີ 13 ຂອງພັກໄດ້ຢືນຢັນວ່າ ວຽກງານກໍ່ສ້າງແລະປັບປຸງພັກແລະລະບົບການເມືອງ ໄດ້ຮັບການຊຸກຍູ້ຢ່າງຮອບດ້ານ, ຄົບຊຸດ, ຂຸ້ນຂ້ຽວ ແລະ ມີປະສິດທິຜົນຢ່າງຈະແຈ້ງ; ຄວາມຮັບຜິດຊອບຂອງຄະນະພັກ, ຄວາມເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນຫົວໜ້າຂັ້ນຕ່າງໆ, ໄດ້ຮັບການເຊີດຊູ; ເສີມຂະຫຍາຍປະຊາທິປະໄຕ, ເພີ່ມທະວີຄວາມສາມັກຄີ ເປັນເອກະພາບໃນພັກ; “ບັນດາຫຼັກການການຈັດຕັ້ງ ແລະ ເຄື່ອນໄຫວຂອງພັກທີ່ກຳນົດໄວ້ໃນກົດລະບຽບຂອງພັກນັ້ນ ໂດຍພື້ນຖານແມ່ນຮັບປະກັນຄວາມກວມລວມ, ຮອບດ້ານ, ຄົບຖ້ວນ ແລະ ເໝາະສົມ...; ບັນດາເນື້ອໃນພື້ນຖານຂອງຫຼັກການລວມສູນປະຊາທິປະໄຕ ໃນການຈັດຕັ້ງແລະເຄື່ອນໄຫວຂອງພັກ ທີ່ລະບຸໄວ້ໃນກົດລະບຽບພັກ ແລະ ໃນຂໍ້ກຳນົດ, ຂໍ້ແນະນຳຂອງສູນກາງ ໄດ້ຖືກຄະນະພັກ ແລະ ອົງການຈັດຕັ້ງພັກຂັ້ນຕ່າງໆ ປະຕິບັດຕາມ ແລະ ດຳເນີນການຢ່າງເຂັ້ມງວດ”(15).
ຍ້ອນຍຶດໝັ້ນໃນຫຼັກການລວມສູນປະຊາທິປະໄຕ ດັ່ງນັ້ນ ຂອດຕ່າງໆໃນວຽກງານພະນັກງານຈຶ່ງໄດ້ດຳເນີນການຢ່າງເຂັ້ມງວດ, ແໜ້ນແຟ້ນ, ເປີດເຜີຍ ແລະ ໂປ່ງໃສ; ທົດລອງການປ່ຽນແປງໃໝ່ວິທີຄັດເລືອກເອົາພະນັກງານນໍາພາແລະຄຸ້ມຄອງ ໂດຍຜ່ານການກວດສອບ, ຮັບປະກັນປະຊາທິປະໄຕ, ພາວະວິໄສ, ເປີດເຜີຍ, ໂປ່ງໃສ ແລະ ເຂັ້ມງວດ. ພະນັກງານທີ່ໄດ້ຮັບການເລືອກຕັ້ງ ແລະ ແຕ່ງຕັ້ງສ່ວນຫຼາຍແມ່ນໄດ້ຕາມມາດຕະຖານ ແລະ ເງື່ອນໄຂທີ່ກຳນົດ, ສະແດງຄວາມຮັບຜິດຊອບແລະໜ້າທີ່ທີ່ໄດ້ຮັບມອບໝາຍເປັນຢ່າງດີ ແລະ ໄດ້ຮັບຄວາມໄວ້ວາງໃຈຈາກພະນັກງານ, ສະມາຊິກພັກ ແລະ ປະຊາຊົນ. ການຄັດເລືອກ, ການຄຸ້ມຄອງ, ການປະເມີນ, ການວາງແຜນ, ການອົບຮົມສຶກສາ ຝຶກຝົນຫຼໍ່ຫຼອມ, ການຍົກຍ້າຍຜັດປ່ຽນ, ການຈັດວາງສັບຊ້ອນ, ການນຳໃຊ້ ແລະ ປະຕິບັດນະໂຍບາຍພະນັກງານ ໄດ້ຖືກຄະນະພັກແລະອົງການຈັດຕັ້ງພັກທຸກຂັ້ນ ປຶກສາສົມທະນາຢ່າງເປັນປະຊາທິປະໄຕ ແລະ ຕັດສິນຕົກລົງຕາມສຽງສ່ວຍຫຼາຍ. ການລົງຄະແນນສຽງໄວ້ວາງໃຈຕໍ່ພະນັກງານນຳພາ, ຄຸ້ມຄອງ ແມ່ນໄດ້ດຳເນີນການເປັນໄລຍະໆ, ຄ່ອຍໆເປັນລະບຽບ, ປະກອບສ່ວນສ້າງຖັນແຖວພະນັກງານທີ່ມີຄຸນນະພາບ, ມີຄວາມສາມາດ ແລະ ກຽດສັກສີ, ທຽບເທົ່າກັບລະດັບວຽກງານ ແລະ ຕອບສະໜອງຄວາມຮຽກຮ້ອງຕ້ອງການ ແລະ ໜ້າທີ່ໃນສະພາບການໃໝ່.
ຢ່າງໃດກໍຕາມ, ຄຽງຄູ່ກັບຜົນສຳເລັດທີ່ບັນລຸໄດ້ນັ້ນ, “ການປະຕິບັດບັນດາຫຼັກການການກໍ່ສ້າງພັກ, ໂດຍສະເພາະຫຼັກການລວມສູນປະຊາທິປະໄຕ ໃນບາງອົງການຈັດຕັ້ງພັກ ບໍ່ໄດ້ເຂັ້ມງວດ, ແມ່ນແຕ່ລະເມີດຫຼັກການ”(16); “ຫຼັກການນຳພາລວມໝູ່, ບຸກຄົນຮັບຜິດຊອບ ໃນການຈັດຕັ້ງແລະການເຄື່ອນໄຫວຂອງຄະນະພັກ, ອົງການຈັດຕັ້ງພັກ ຍັງມີເນື້ອໃນບໍ່ໄດ້ກຳນົດຢ່າງຈະແຈ້ງ ໃຫ້ສອດຄ່ອງກັບສະພາບການຕົວຈິງ, ໂດຍສະເພາະແມ່ນການພົວພັນ, ຄວາມຮັບຜິດຊອບລະຫວ່າງໝູ່ຄະນະ, ບຸກຄົນ ແລະ ຫົວໜ້າ, ດັ່ງນັ້ນ, ມັນເປັນການຍາກທີ່ຈະກໍານົດຄວາມຮັບຜິດຊອບຂອງບຸກຄົນເມື່ອເກີດການລະເມີດຂຶ້ນ”(17). ໃນຫຼາຍປີທີ່ຜ່ານມາ, ກົມການເມືອງສູນກາງ, ຄະນະເລຂາທິການສູນກາງ ແລະ ຄະນະພັກທຸກຂັ້ນ ໄດ້ກວດກາ ແລະ ປະຕິບັດວິໄນຕໍ່ພະນັກງານຫຼາຍຄົນ, ໃນນັ້ນມີໝູ່ຄະນະ ແລະ ພະນັກງານຫຼັກແຫຼ່ງຈຳນວນໜຶ່ງ ທີ່ລະເມີດຫຼັກການລວມສູນປະຊາທິປະໄຕ ແລະ ລະບຽບການເຮັດວຽກຂອງຄະນະພັກ.
ບັນດາຜູ້ແທນລົງຄະແນນສຽງຮັບຮອງເອົາມະຕິກອງປະຊຸມໃຫຍ່ ອົງຄະນະພັກເມືອງ ບິ່ງຢາ (ແຂວງລ້າງເຊີນ), ວາລະປີ 2020 - 2025 _ພາບ: TTXVN
ສືບຕໍ່ຜັນຂະຫຍາຍແລະປັບປຸງກົນໄກປະຕິບັດ ຫຼັກການລວມສູນປະຊາທິປະໄຕ
ໃນວຽກງານພະນັກງານຂອງພັກ, ຕອບສະໜອງຄວາມຕ້ອງການໃນປະຈຸບັນ
ກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດຫຼາຍໜ້າທີ່ ແລະ ວິທີແກ້ໄຂ ເພື່ອເພີ່ມທະວີການນຳພາລວມສູນ ເປັນເອກະພາບ, ຍົກສູງຄວາມຮັບຜິດຊອບຂອງຄະນະພັກ ແລະ ອົງການຈັດຕັ້ງພັກທຸກຂັ້ນ ໃນວຽກງານພະນັກງານ, ໃນການສຶກສາອົບຮົມແລະຄຸ້ມຄອງພະນັກງານ. ເພື່ອສືບຕໍ່ປັບປຸງບູລະນະກົນໄກປະຕິບັດ ຫຼັກການລວມສູນປະຊາທິປະໄຕ ໃນວຽກງານພະນັກງານຂອງພັກ ແລະ ຕອບສະໜອງຄວາມຕ້ອງການປະຈຸບັນ, ຈໍາເປັນຕ້ອງປະຕິບັດໜ້າທີ່ຕົ້ນຕໍ ແລະ ວິທີແກ້ບັນຫາບາງຢ່າງຕໍ່ໄປນີ້ໃຫ້ດີ:
ທີໜຶ່ງ, ສືບຕໍ່ຍົກສູງຄວາມຮັບຮູ້, ຊາບຊຶມ ແລະ ປະຕິບັດຫຼັກການລວມສູນປະຊາທິປະໄຕ ໃນວຽກງານພະນັກງານ ຢ່າງເຂັ້ມງວດ. ຊາບຊຶມຢ່າງເລິກເຊິ່ງທັດສະນະຊີ້ນຳ, ບັນດາຂໍ້ກຳນົດ ແລະ ຂໍ້ບັງຄັບຂອງພັກ ກ່ຽວກັບວຽກງານພະນັກງານ ໃນສະພາບການໃໝ່; ປະຕິບັດຢ່າງເຂັ້ມງວດແລະຕໍ່ເນື່ອງ ຫຼັກການພັກນຳພາວຽກງານພະນັກງານ ແລະ ການຄຸ້ມຄອງຖັນແຖວພະນັກງານ ໃນລະບົບການເມືອງ ຢ່າງເປັນເອກະພາບ, ໂດຍກົງ, ຮອບດ້ານ. ບັນດາບັນຫາກ່ຽວກັບແນວທາງ, ແຜນນະໂຍບາຍ, ນະໂຍບາຍ, ການປະເມີນພະນັກງານ, ການວາງແຜນ, ການສຶກສາອົບຮົມ, ການຝຶກຝົນຫຼໍ່ຫຼອມ, ການຈັດວາງສັບຊ້ອນ, ການນຳໃຊ້, ການແຕ່ງຕັ້ງ, ການປົດຈາກຕຳແໜ່ງ, ການໃຫ້ລາອອກຈາກຕຳແໜ່ງ, ການສັ່ງພັກລັດຖະການ, ການຍົກຍ້າຍ, ການຜັດປ່ຽນ, ການຍ້ອງຍໍໃຫ້ລາງວັນ, ການປະຕິບັດວິໄນຕໍ່ພະນັກງານ ຕ້ອງໃຫ້ຄະນະພັກ, ອົງການຈັດຕັ້ງພັກ ແລະ ຄະນະນຳທີ່ມີອຳນາດ ປຶກສາຫາລືແບບປະຊາທິປະໄຕ ແລະ ຕັດສິນຕົກລົງດ້ວຍສຽງສ່ວນຫຼາຍ. ຖ້າຫາກມີຄວາມແຕກຕ່າງກັນ ລະຫວ່າງຄວາມຄິດເຫັນຂອງຫົວໜ້າ ແລະ ຄວາມເຫັນຂອງຄະນະພັກ, ອົງການຈັດຕັ້ງພັກ ແລະ ການນຳຂອງອົງການ, ຫົວໜ່ວຍ, ຈະຕ້ອງລາຍງານໃຫ້ເຈົ້າໜ້າທີ່ມີອຳນາດ ເພື່ອພິຈາລະນາແລະຕັດສິນ. ຫົວໜ້າຄະນະພັກ, ອົງການຈັດຕັ້ງພັກ, ສຳນັກງານອົງການຕ່າງໆ ມີໜ້າທີ່ຮັບຜິດຊອບໃນການສະເໜີ ແລະ ຈັດຕັ້ງປະຕິບັດຄຳຕັດສິນໃຈຂອງໝູ່ຄະນະ ກ່ຽວກັບວຽກງານພະນັກງານ ພາຍໃນຂອບເຂດຄວາມຮັບຜິດຊອບທີ່ໄດ້ຮັບມອບໝາຍ. ພະນັກງານແລະສະມາຊິກພັກ ຕ້ອງປະຕິບັດມະຕິ ແລະ ຄຳຕັດສິນຕົກລົງ ຂອງຄະນະພັກແລະອົງການຈັດຕັ້ງພັກ; ຄະນະພັກຂັ້ນລຸ່ມ ຕ້ອງປະຕິບັດຕາມຄຳຕັດສິນຄົກລົງຂອງຄະນະພັກຂັ້ນສູງໃນວຽກງານພະນັກງານ.
ທີສອງ, ສືບຕໍ່ທົບທວນກວດຄືນ, ເພີ່ມເຕີມ, ປັບປຸງເອກະສານຂອງພັກ ກ່ຽວກັບວຽກງານພະນັກງານ ໃຫ້ສົມບູນ. ກໍ່ສ້າງລະບຽບການກ່ຽວກັບສິດອຳນາດ ແລະ ຄວາມຮັບຜິດຊອບຂອງຫົວໜ້າ ໃນວຽກງານພະນັກງານ ແລະ ການຄຸ້ມຄອງພະນັກງານ. ສືບຕໍ່ປັບປຸງລະບຽບການແລະຂໍ້ບັງຄັບກ່ຽວກັບມາດຕະຖານຕຳແໜ່ງ, ຫຼັກເກນແລະກົນໄກການປະເມີນພະນັກງານ; ການລົງຄະແນນສຽງໄວ້ວາງໃຈພະນັກງານເປັນໄລຍະ ຫຼືທັນທີທັນໃດ; ຫັນເປັນອັນລະອຽດກົນໄກໃຫ້ປະຊາຊົນເຂົ້າຮ່ວມການປະກອບຄວາມເຫັນກໍ່ສ້າງພັກ; ເພີ່ມເຕີມຂໍ້ກຳນົດທີ່ກ່ຽວຂ້ອງ, ຍົກສູງຈິດໃຈແຂ່ງຂັນ, ເປີດເຜີຍ, ໂປ່ງໃສໃນການຄັດເລືອກພະນັກງານ ແລະ ແຕ່ງຕັ້ງພະນັກງານ, ໂດຍສະເພາະ, ຜູ້ສະໝັກຈະຕ້ອງນໍາສະເໜີແຜນການປະຕິບັດງານ ແລະ ຄໍາໝັ້ນສັນຍາທີ່ຈະດຳເນີນການ ກ່ອນທີ່ຈະໄດ້ຮັບການແຕ່ງຕັ້ງ; ກວດກາຄືນ, ປັບປຸງ ແລະ ປ່ຽນແປງໃໝ່ວຽກງານເລືອກຕັ້ງຂອງພັກ, ດຳ ເນີນການເລືອກຕັ້ງດ້ວຍລາຍຊື່ຜູ້ສະໝັກທີ່ມີສ່ວນເກີນ; ຂະຫຍາຍການທົດລອງກວດສອບຄັດເລືອກພະນັກງານນຳພາແລະຄຸ້ມຄອງຂັ້ນກົມ, ພະແນກ ແລະ ຫ້ອງ. ປະຕິບັດແຜນນະໂຍບາຍການທົດລອງບາງຢ່າງ ເຊັ່ນ: ຫົວໜ້າເລືອກແລະແນະນຳພະນັກງານໃນແຜນແມ່ບົດ ເພື່ອດຳເນີນຂະບວນການເລືອກຕັ້ງ ແລະ ແຕ່ງຕັ້ງຜູ້ຮອງຂອງຕົນ; ເລຂາຄະນະພັກ ສະເໜີໃຫ້ເລືອກຕັ້ງກຳມະການຄະນະປະຈຳ ຕາມຂະບວນການສະເພາະໃດໜຶ່ງ, ຮັບປະກັນຫຼັກການລວມສູນປະຊາທິປະໄຕ ແລະ ຕ້ອງຮັບຜິດຊອບໃນການສະເໜີຊື່ຂອງຕົນ; ມອບອຳນາດໃຫ້ຫົວໜ້າແຕ່ງຕັ້ນພະນັກງານໃນແຜນແມ່ບົດ, ປົດຕຳແໜ່ງຫົວໜ້າຜູ້ໃຕ້ບັງຄັບບັນຊາໂດຍກົງ ແລະ ຮັບຜິດຊອບໃນການຕັດສິນໃຈຂອງຕົນ... ບົນພື້ນຖານບັນດາລະບຽບການແລະຂໍ້ບັງຄັບຂອງສູນກາງ, ບັນດາຄະນະພັກແລະອົງການຈັດຕັ້ງພັກທຸກຂັ້ນ ຕ້ອງຜັນຂະຫຍາຍແລະປະກາດໃຊ້ ບັນດາລະບຽບການແລະຂໍ້ກຳນົດກ່ຽວກັບວຽກງານພະນັກງານ, ຮັບປະກັນຄວາມຄົບຊຸດແລະເປັນເອກະພາບ, ເສີມຂະຫຍາຍປະຊາທິປະໄຕ, ເປີດເຜີຍ ແລະ ໂປ່ງໃສ ໃນວຽກງານພະນັກງານ.
ທີສາມ, ກວດຄືນແລະປັບປຸງລະບຽບການເຮັດວຽກຂອງຄະນະພັກແລະອົງການຈັດຕັ້ງພັກໃຫ້ສົມບູນ ແລະ ປະຕິບັດລະບຽບການດັ່ງກ່າວຢ່າງເຂັ້ມງວດ. ການສ້າງ, ປັບປຸງ ແລະ ປະຕິບັດລະບຽບການເຮັດວຽກຂອງຄະນະພັກເປັນຢ່າງດີ ມີຄວາມໝາຍສຳຄັນພິເສດ, ແນໃສ່ປະຕິບັດເປັນຢ່າງດີ ບົດບາດການນຳພາຂອງອົງການຈັດຕັ້ງພັກ, ເສີມຂະຫຍາຍຄວາມຮັບຜິດຊອບສ່ວນບຸກຄົນຂອງສະມາຊິກຄະນະພັກ, ໂດຍສະເພາະຂອງຫົວໜ້າ ແລະ ແກ້ໄຂບັນດາສາຍພົວພັນຂອງຄະນະພັກໃນວຽກງານພະນັກງານໄດ້ດີ. ອີງໃສ່ຂໍ້ກຳນົດ ກົດລະບຽບຂອງສູນກາງ, ຄະນະພັກແລະອົງການຈັດຕັ້ງພັກທຸກຂັ້ນ ຕ້ອງກວດຄືນ, ເພີ່ມເຕີມ ແລະ ປັບປຸງລະບຽບການເຮັດວຽດໃຫ້ສົມບູນ ເພື່ອໃຫ້ມັນສອດຄ່ອງກັບສະພາບການຕົວຈິງ; ກຳນົດຄວາມຮັບຜິດຊອບແລະເຂດອຳນາດຂອງໝູ່ຄະນະແລະບຸກຄົນສະມາຊິກຄະນະພັກຢ່າງຊັດເຈນ, ແລະ ບັນດາສາຍພົວພັນໃນການເຮັດວຽກລະຫວ່າງຄະນະພັກຮາກຖານ ກັບຜູ້ປະຈຳການ, ຄະນະປະຈຳຂອງຄະນະພັກ, ກັບບັນດາອົງການທີ່ປຶກສາ ແລະ ຊ່ວຍເຫຼືອຂອງຄະນະພັກຂັ້ນເທິງ; ກັບຫົວໜ້າອົງການ ແລະ ໜ່ວຍງານ. ການຈັດຕັ້ງປະຕິບັດລະບຽບການເຮັດວຽກຢ່າງເຂັ້ມງວດ ຈະປະກອບສ່ວນສ້າງຄວາມຮັບຮູ້ທີ່ຖືກຕ້ອງແລະຄົບຖ້ວນ ກ່ຽວກັບບັນດາຫຼັກການດຳເນີນຊີວິດພັກ, ໂດຍສະເພາະຫຼັກການລວມສູນປະຊາທິປະໄຕ, ນຳພາລວມໝູ່, ບຸກຄົນຮັບຜິດຊອບ ໃນວຽກງານພະນັກງານ. ເຊື່ອມຕິດການສຳຫຼວດກຸ່ມແລະບຸກຄົນກ່ຽວກັບບົດບາດ, ຄວາມຮັບຜິດຊອບໃນການນຳພາ ຊີ້ນຳການປະຕິບັດໜ້າທີ່ການເມືອງ ກັບວຽກງານກໍ່ສ້າງພັກ, ວຽກງານພະນັກງານ; ສຳຫຼວດຢ່າງເລິກເຊິ່ງການປະຕິບັດຕາມລະບຽບການເຮັດວຽກ, ຖອດຖອນບົດຮຽນປະສົບການໃນຂະບວນການປະຕິບັດລະບຽບການ, ຖືວ່າການສ້າງແລະປະຕິບັດລະບຽບການເປັນຢ່າງດີ ແມ່ນໜຶ່ງໃນບັນດາມາດຕະການເພື່ອຍົກສູງຄວາມສາມາດນຳພາແລະກຳລັງແຮງສູ້ຮົບ, ເພີ່ມທະວີຄວາມສາມັກຄີ ເປັນເອກະພາບຂອງອົງການຈັດຕັ້ງພັກ.
ທີສີ່, ເສີມຂະຫຍາຍບົດບາດ ແລະ ຄວາມຮັບຜິດຊອບຂອງຄະນະພັກ, ກຳມະການຄະນະນຳ ແລະ ເລຂາຄະນະພັກຢ່າງເຕັມທີ່ ໃນວຽກງານພະນັກງານ. ເພື່ອປະຕິບັດຫຼັກການລວມສູນປະຊາທິປະໄຕ ໃນວຽກງານພະນັກງານ ໄດ້ເປັນຢ່າງດີ, ຄະນະພັກ ອົງການຈັດຕັ້ງພັກ ເລຂາພັກ, ຄະນະນຳຂອງບັນດາທ້ອງຖິ່ນ ສຳນັກງານອົງການ ຕ້ອງສຸມໃສ່ນຳພາ ຊີ້ນຳການປະຕິບັດຫຼັກການ, ຂໍ້ກຳນົດ, ກົດລະບຽບ, ລະບຽບການ ກ່ຽວກັບວຽກງານພະນັກງານ ຢ່າງເຂັ້ມງວດແລະຄົບຖ້ວນ; ດຳເນີນການກວດກາຕົນເອງຢ່າງເປັນປະຈຳ, ແກ້ໄຂຂໍ້ຜິດພາດຢ່າງທັນການ ແລະ ຮັບຜິດຊອບກ່ຽວກັບຂໍ້ຈຳກັດ ຂໍ້ບົກພ້ອງໃນວຽກງານພະນັກງານ ພາຍໃນຂອບເຂດ, ສິດອຳນາດ ແລະ ຄວາມຮັບຜິດຊອບທີ່ໄດ້ຮັບມອບໝາຍ. ສະມາຊິກຂອງຄະນະນຳຕ້ອງປະຕິບັດສິດ ແລະ ຄວາມຮັບຜິດຊອບຂອງຕົນ ໃນວຽກງານພະນັກງານ ຢ່າງຖືກຕ້ອງ ແລະ ຄົບຖ້ວນ; ລາຍງານທັນທີ ຄົບຖ້ວນ ຖືກຕ້ອງ ແລະ ກົງໄປກົງມາ ຕໍ່ອົງການທີ່ມີອຳນາດ ກ່ຽວກັບເນື້ອໃນທີ່ກ່ຽວຂ້ອງກັບບຸກຄະລາກອນທີ່ບຸກຄົນນັ້ນໄດ້ຮັບມອບໝາຍໃຫ້ຕິດຕາມແລະຄຸ້ມຄອງ; ສະແດງຄວາມຄິດເຫັນຢ່າງຈະແຈ້ງ ແລະ ຮັບຜິດຊອບຕໍ່ຄວາມຄິດເຫັນຂອງຕົນ, ສະຫງວນຄວາມຄິດເຫັນ ແລະ ຮັບຜິດຊອບສ່ວນຕົວໃນການສະເໜີບຸກຄະລາກອນ ແລະ ໃນການສະແດງຄວາມຄິດເຫັນ, ການປະເມີນ, ການຢືນຢັນບົດບັນທຶກ, ປະຫວັດຫຍໍ້ ແລະ ເອກະສານທີ່ກ່ຽວຂ້ອງຂອງບຸກຄະລາກອນໃນສັງກັດ; ຮັບຜິດຊອບເມື່ອມີເຫດການໃນທາງລົບ ແລະ ຄວາມຜິດພາດໃນວຽກງານພະນັກງານ ຢູ່ທ້ອງຖິ່ນ, ອົງການ, ໜ່ວຍງານ ແລະ ຂົງເຂດທີ່ໄດ້ຮັບມອບໝາຍໃຫ້ຄຸ້ມຄອງ ແລະ ຮັບຜິດຊອບ. ເສີມຂະຫຍາຍບົດບາດແລະຄວາມຮັບຜິດຊອບຂອງເລຂາຄະນະພັກ ແລະ ຫົວໜ້າຢ່າງຄົບຖ້ວນ ໃນການຊີ້ນຳການປະຕິບັດຫຼັກການ, ຂໍ້ບັງຄັບ, ລະບຽບການ ແລະ ຂະບວນການກ່ຽວກັບວຽກງານພະນັກງານຢ່າງເຂັ້ມງວດ; ປະຕິບັດເນື້ອໃນວຽກງານພະນັກງານຕາມລະບຽບການ ຢ່າງເປີດເຜີຍ ແລະ ໂປ່ງໃສ; ຊີ້ນຳການກະກຽມເອກະສານບຸກຄະລາກອນຢ່າງຄົບຖ້ວນ ແລະ ສະໜອງໃຫ້ບັນດາສະມາຊິກທີ່ກ່ຽວຂ້ອງ ຕາມລະບຽບການເຮັວຽກຂອງຄະນະພັກ; ຊີ້ນຳການຈັດຕັ້ງປະຕິບັດຂະບວນການບຸກຄະລາກອນຢ່າງທັນການ; ໃຫ້ເວລາຢ່າງພຽງພໍສໍາລັບການສົນທະນາຮ່ວມກັນທີ່ເປັນປະຊາທິປະໄຕຢ່າງແທ້ຈິງ; ບໍ່ຂົນຂວາຍ ຄອບງຳ ຍັດຍຽດຄວາມຄິດເຫັນສ່ວນຕົວ, ກະທົບ, ກໍ່ຄວາມຕິດຂັດດ້ານຂໍ້ມູນ, ກົດດັນໃຫ້ຜູ້ອື່ນສະແດງຄວາມຄິດເຫັນ, ປະເມີນ, ລົງມະຕິ, ລົງຄະແນນສຽງ, ຕັດສິນໃຈກ່ຽວກັບບຸກຄະລາກອນ ຕາມຄວາມເຫັນຂອງຕົນ; ສະຫຼຸບເນື້ອໃນທີ່ໄດ້ປຶກສາຫາລືຢ່າງຄົບຖ້ວນ, ຖືກຕ້ອງ, ກົງໄປກົງມາ ແລະ ພາວະວິໄສ; ລາຍງານຄວາມຄິດເຫັນຂອງຄະນະນຳ ຢ່າງທັນການ, ຄົບຖ້ວນ, ຊື່ສັດ, ພາວະວິໄສ ແລະ ເປັນຈິງ ຕໍ່ອົງການທີ່ມີອຳນາດ, ໂດຍສະເພາະເລື່ອງທີ່ຍັງມີຄວາມຄິດເຫັນແຕກຕ່າງກັນ ກ່ຽວກັບວຽກງານພະນັກງານ.
ທີຫ້າ, ເພີ່ມທະວີການກວດກາ, ຕິດຕາມກວດກາວຽກງານພະນັກງານ. ຄະນະພັກ ແລະ ຄະນະກຳມະການກວດກາທຸກຂັ້ນ ຕ້ອງເອົາໃຈໃສ່ການສ້າງແລະປະຕິບັດໂຄງການ, ແຜນການກວດກາ, ຕິດຕາມກວດກາວຽກງານພະນັກງານ ແລະ ການປະຕິວັດຫຼັກການລວມສູນປະຊາທິປະໄຕ ໃນວຽກງານພະນັກງານ ໃຫ້ໄດ້ເປັນຢ່າງດີ. ຊຸກຍູ້ວຽກງານກວດກາ, ຕິດຕາມກວດກາ, ການກວດສອບເປັນໄລຍະ, ກະທັນຫນ; ຕາມຫົວຂໍ້, ສະເພາະຂະແໜງການ; ຂອງຂັ້ນເທິງຕໍ່ຂັ້ນລຸ່ມ; ຂັ້ນລຸ່ມຕິດຕາມກວດກາຂັ້ນເທິງ; ໃຫ້ຄວາມສຳຄັນທັງການກ່າວເຕື່ອນ, ການປ້ອງກັນ ແລະ ການຈັດການແກ້ໄຂຄວາມຜິດພາດ. ເອົາໃນໃສ່ກວດກາ, ຕິດຕາມກວດກາບັນດາລົງການທີ່ປຶກສາແລະຊ່ວຍເຫຼືອ, ບັນດາອົງການຂັ້ນລຸ່ມ ແລະ ພະນັກງານ ລັດຖະກອນພາຍໃຕ້ການຄຸ້ມຄອງ ໃນການປະຕິບັກໜ້າທີ່ທີ່ກ່ຽວຂ້ອງກັບວຽກງານພະນັກງານ. ດຳເນີນການກວດກາ, ຢືນຢັນ ແລະ ສະຫຼຸບບັນຫາໃໝ່ທີ່ເກີດຂຶ້ນໃນວຽກງານພະນັກງານ ໃນທຸກຂັ້ນແລະຂະແໜງການ ຢ່າງທັນການ. ຍົກເລີກແລະຖອນການຕັດສິນໃຈທີ່ບໍ່ຖືກຕ້ອງກ່ຽວກັບວຽກງານພະນັກງານ; ຈັດການລົງໂທດຢ່າງທັນການແລະເຂັ້ມງວດ ກັບກຸ່ມຄົນ ແລະ ບຸກຄົນທີ່ລະເມີດຫຼັກການລວມສູນປະຊາທິປະໄຕ, ລະບຽບວິໄນຂອງພັກ ແລະ ກົດໝາຍຂອງລັດ ເພື່ອຮັບປະກັນລະບຽບວິໄນໃນວຽກງານພະນັກງານ. ນຳມາດຕະຖານ, ຂະບວນການ, ຂັ້ນຕອນ ແລະ ບັນທຶກບຸກຄະລາກອນ ໄປໃຊ້ຢ່າງເປີດເຜີຍ ແລະ ໂປ່ງໃສ; ສະໜອງ, ແລກປ່ຽນຂໍ້ມູນ ແລະ ອະທິບາຍລາຍງານເມື່ອຕ້ອງການ. ເສີມຂະຫຍາຍບົດບາດຕິດຕາມກວດກາ ຂອງບັນດາອົງການໂດຍປະຊາຊົນເລືອກຕັ້ງ; ບົດບາດຕິດຕາມກວດກາ ແລະ ວິຈານສັງຄົມ ຂອງແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ - ສັງຄົມ ແລະ ປະຊາຊົນ ໃນການເຂົ້າຮ່ວມການກໍ່ສ້າງພັກ, ກໍ່ສ້າງຖັນແຖວພະນັກງານ. ເພີ່ມທະວີກົນໄກຊັກຖາມ ແລະ ອະທິບາຍລາຍງານ ໃນວຽກງານພະນັກງານ. ຄົ້ນຄວ້າຂະຫຍາຍຮູບແບບການເກັບກຳຂໍ້ຄິດເຫັນ ເພື່ອປະເມີນຄວາມພໍໃຈຂອງປະຊາຊົນ ທີ່ມີຕໍ່ພະນັກງານນຳພາ-ຄຸ້ມຄອງທີ່ເໝາະສົມ. ປັບປຸງກົນໄກຮັບແລະຈັດການແກ້ໄຂຄຳສະເໜີແນະ, ການສ່ອງແສງ, ການຮ້ອງຮຽນ ຮ້ອງທຸກ, ການປະນາມຂອງປະຊາຊົນທີ່ສົ່ງໄປໃຫ້ຄະນະພັກ, ອົງການຈັດຕັ້ງພັກ, ຫົວໜ້າທ້ອງຖິ່ນ ອົງການ ໜ່ວຍງານ ແລະ ຜ່ານສື່ມວນຊົນ ໃນຮູບແບບທີ່ເໝາະສົມ ແລະ ມີປະສິດທິຜົນ./.
---------------------------
(1) ວ.ອີ. ເລນິນ: ນິພົນຄົບຊຸດ, ສພຈ ການເມືອງແຫ່ງຊາດ, ຮ່າໂນ້ຍ, 2006, ເຫຼັ້ມ 41, ໜ້າ 253.
(2), (3) ວ.ອີ. ເລນິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 36, ໜ້າ 185, 186.
(4), (5) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 8, ໜ້າ 275, 263 – 264.
(6) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 12, ໜ້າ 438.
(7) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 620.
(8) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 6, ໜ້າ 17.
(9) ເອກະສານຄົບຊຸດຂອງພັກ, ສພຈ ການເມືອງແຫ່ງຊາດ, ຮ່າໂນ້ຍ, 2004, ເຫຼັ້ມ 37, ໜ້າ 830.
(10) ກົດລະບຽບຂອງພັກກອມມູນິດຫວຽດນາມ (ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ໄດ້ຮັບຮອງເອົາໃນວັນທີ 19 ມັງກອນ 2011), ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ໜ້າ 5.
(11) ເບິ່ງ: ກົດລະບຽບຂອງພັກກອມມູນິດຫວຽດນາມ (ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ໄດ້ຮັບຮອງເອົາໃນວັນທີ 19 ມັງກອນ 2011), ປຶ້ມທີ່ໄດ້ແນະນຳ, ໜ້າ 17 – 19.
(12) ກົດລະບຽບເລກທີ 80-QD/TW, ລົງວັນທີ 18 ສິງຫາ 2022, ຂອງກົມການເມືອງສູນກາງພັກ, “ກ່ຽວກັບການແບ່ງຂັ້ນຄຸ້ມຄອງພະນັກງານ, ແຕ່ງຕັ້ງພະນັກງານ ແລະ ແນະນຳຜູ້ສະໝັກ”.
(13) ເຊັ່ນ: ຂໍ້ຕົກລົງເລກທີ 218-QĐ/TW, ລົງວັນທີ 12 ທັນວາ 2013, ຂອງກົມການເມືອງສູນກາງພັກ “ປະກາດໃຊ້ຂໍ້ບັງຄັບກ່ຽວກັບແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ - ສັງຄົມ ແລະ ປະຊາຊົນ ເຂົ້າຮ່ວມການປະກອບຄວາມເຫັນກໍ່ສ້າງພັກ ແລະ ກໍ່ສ້າງອຳນາດການປົກຄອງ”; ກົດລະບຽບເລກທີ 42-QD/TW, ລົງວັນທີ 3 ຕຸລາ 2016, ຂອງຄະນະເລຂາທິການສູນກາງ “ກ່ຽວກັບໜ້າທີ່ ແລະ ການພົວພັນເຮັດວຽກຂອງຄະນະປະຈຳພັກແຂວງ, ຄະນະປະຈຳພັກນະຄອນ”; ກົດລະບຽບເລກທີ 04-QĐi/TW, ລົງວັນທີ 25 ກໍລະກົດ 2018, ຂອງຄະນະເລຂາທິການສູນກາງ, “ກ່ຽວກັບພາລະບົດບາດ, ໜ້າທີ່, ເຂດອຳນາດ, ການຈັດຕັ້ງກົງຈັກຂອງອົງການສະເພາະໃຫ້ຄຳແນະນຳ ແລະ ຊ່ວຍເຫຼືອຄະນະພັກແຂວງ, ນະຄອນ”; ຂໍ້ຕົກລົງເລກທີ 162-QĐ/TW, ລົງວັນທີ 5 ທັນວາ 2018, ຂອງຄະນະເລຂາທິການສູນກາງ, “ກ່ຽວກັບການປະກາດໃຊ້ລະບຽບການເຮັດວຽກຕົ້ນແບບຂອງຄະນະກຳມະການພັກ ແລະ ຄະນະກຳກັບວຽກງານພັກ ຂຶ້ນສັງກັດສູນກາງ”; ກົດລະບຽບເລກທີ 10-QĐi/TW, ລົງວັນທີ 12 ທັນວາ 2018, ຂອງກົມການເມືອງສູນກາງ, ກ່ຽວກັບ “ພາລະບົດບາດ, ໜ້າທີ່, ເຂດອຳນາດ ແລະ ການພັວພັນເຮັດວຽກ ຂອງຄະນະພັກ, ຄະນະປະຈຳພັກແຂວງ, ນະຄອນ ຂຶ້ນສັງກັດສູນກາງ”; ຂໍ້ຕົກລົງເລກທີ168-QĐ/TW, ລົງວັນທີ 28 ທັນວາ 2018, ຂອງຄະນະເລຂາທິການສູນກາງ, “ກ່ຽວກັບການປະກາດໃຊ້ລະບຽບການເຮັດວຽກຕົ້ນແບບຂອງຄະນະພັກແຂວງ, ນະຄອນ ຂຶ້ນສັງກັດສູນກາງ”; ກົດລະບຽບເລກທີ 202-QĐ/TW, ລົງວັນທີ 2 ສິງຫາ 2019, ຂອງຄະນະເລຂາທິການສູນກາງ, “ກ່ຽວກັບພາລະບົດບາດ, ໜ້າທີ່, ເຂດອຳນາດ ແລະ ການພົວພັນເຮັດວຽກຂອງະນະພັກ, ຄະນະປະຈຳ, ຜູ້ປະຈຳການ ຂອງຄະນະພັກເມືອງ”;...
(14) ຂໍ້ຕົກລົງເລກທີ 244-QĐ/TW, ລົງວັນທີ 9 ມິຖຸນາ 2014, ຂອງຄະນະບໍລິຫານງານສູນກາງ, “ກ່ຽວກັບການປະກາດໃຊ້ລະບຽບການເລືອກຕັ້ງໃນພັກ”; ກົດລະບຽບເລກທີ 89-QD/TW, ລົງວັນທີ 4 ສິງຫາ 2017 ຂອງກົມການເມືອງສູນກາງ, “ກ່ຽວກັບກອບມາດຕະຖານຕຳແໜ່ງ, ການວາງແນວກອບມາດຖານສຳລັບການປະເມີນພະນັກງານນຳພາ ແລະ ຄຸ້ມຄອງທຸກຂັ້ນ”; ບົດສະຫຼຸບສະບັບເລກທີ 24-KL/TW, ລົງວັນທີ 15 ທັນວາ 2017, ຂອງກົມການເມືອງສູນກາງ, “ກ່ຽວກັບຫຼັກການຍົກຍ້າຍ, ແບ່ງງານ, ຈັດງານ ສຳລັບພະນັກງານໝູນວຽນໂດຍສູນກາງ”; ກົດລະບຽບເລກທີ 132-QD/TW, ລົງວັນທີ 8 ມີນາ 2018, ຂອງກົມການເມືອງສູນກາງ, “ກ່ຽວກັບການສຳຫຼວດ, ຕີລາຄາ ແລະ ຈັດປະເພດຄຸນນະພາບຂອງໝູ່ຄະນະ ແລະ ບຸກຄົນໃນລະບົບການເມືອງປະຈຳປີ”; ມະຕິເລກທີ 26-NQ/TW, ລົງວັນທີ 19 ພຶດສະນາ 2018, ຂອງກອງປະຊຸມສູນກາງພັກຄັ້ງທີ 7 ສະໄໝທີ 12, “ກ່ຽວກັບການສຸມໃສ່ກໍ່ສ້າງຖັນແຖວພະນັກງານທຸກຂັ້ນ, ໂດຍສະເພາະຂັ້ນຍຸດທະສາດ ທີ່ມີຄຸນນະພາບ ຄວາມສາມາດ ແລະ ກຽດສັກສີພຽງພໍ, ທຽບເທົ່າກັບລະດັບໜ້າທີ່”; ກົດລະບຽບເລກທີ 179-QĐ/TW, ລົງວັນທີ 25 ກຸມພາ 2019, ຂອງກົມການເມືອງສູນກາງ, “ກ່ຽວກັບລະບອບການກວດກາ ແລະ ຕິດຕາມກວດກາວຽກງານພະນັກງານ”; ກົດລະບຽບເລກທີ 205-QĐ/TW, ລົງວັນທີ 23 ສິງຫາ 2019, ຂອງກົມການເມືອງສູນກາງ, “ກ່ຽວກັບການຄວບຄຸມອຳນາດໃນວຽກງານພະນັກງານ ແລະ ຕ້ານການວິ້ງເຕັ້ນຫາຕຳແໜ່ງ, ວິ້ງເຕັ້ນຫາອຳນາດ”; ກົດລະບຽບເລກທີ 214-QĐ/TW, ລົງວັນທີ 2 ມັງກອນ 2020, ຂອງກົມການເມືອງສູນກາງ, “ກ່ຽວກັບຂອບມາດຕະຖານຕຳແໜ່ງ ແລະ ມາດຖານການປະເມີນພະນັກງານ ພາຍໃຕ້ການຄຸ້ມຄອງຂອງຄະນະກຳມະການສູນກາງ, ກົມການເມືອງສູນກາງ, ຄະນະເລຂາທິການສູນກາງ”;...
(15) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 2, ໜ້າ 267 – 268.
(16) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 90.
(17) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 273.
- ບົດນີ້ໄກ້ລົງພິມໃນວາລະສານກອມມູນິດ ສະບັນທີ 1008 (ເດືອນກຸມພາ 2023)
