ຄວາມຮັບຮູ້ທິດສະດີບາງປະການກ່ຽວກັບການກໍ່ສ້າງ
ລັດແຫ່ງອຳນາດກົດໝາຍສັງຄົມນິຍົມ ຜ່ານບັນດາບົດຄວາມ
ຂອງສະຫາຍເລຂາທິການໃຫຍ່ ຫງວຽນ ຝູ ຈ້ອງ
ລັດແຫ່ງອຳນາດກົດໝາຍສັງຄົມນິຍົມ ຜ່ານບັນດາບົດຄວາມ
ຂອງສະຫາຍເລຂາທິການໃຫຍ່ ຫງວຽນ ຝູ ຈ້ອງ
ສະຫາຍເລຂາທິການໃຫຍ່ ຫງວຽນ ຝູ ຈ້ອງ ແລະບັນດາຜູ້ແທນ ເຂົ້າຮ່ວມກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດຊຸດທີ XV _ພາບ:TTXVN
ຍຶດໝັ້ນຫຼັກການທີ່ວ່າ ພັກກອມມູນິດຫວຽດນາມນຳພາການກໍ່ສ້າງ
ລັດແຫ່ງອຳນາດກົດໝາຍ ຕາມບົດບັນຍັດຂອງລັດຖະທຳມະນູນ
ການນຳພາຂອງພັກກອມມູນິດຫວຽດນາມແມ່ນປັດໄຈຕັດສິນຊີ້ຂາດຄວາມສຳເລັດຂອງການກໍ່ສ້າງ ລັດແຫ່ງອຳນາດກົດໝາຍສັງຄົມນິຍົມຢູ່ຫວຽດນາມ, ພ້ອມກັນນັ້ນ ມັນສ້າງຄວາມແຕກຕ່າງທີ່ໃຫຍ່ທີ່ສຸດ ລະຫວ່າງລັດແຫ່ງອຳນາດກົດໝາຍສັງຄົມນິຍົມຫວຽດນາມ ແລະ ລັດແຫ່ງອຳນາດກົດໝາຍຢູ່ບັນດາປະເທດທຶນນິຍົມຕາເວັນຕົກ.
ໃນຄຳປາໄສທີ່ພິທີສະເຫຼີມສະຫຼອງຄົບຮອບ 70 ປີວັນປະເພນີຂອງຂະແໜງການຕຸລາການ (ວັນທີ 24 ສິງຫາ 2015), ສະຫາຍເລຂາທິການໃຫຍ່ ຫງວຽນ ຝູ ຈ້ອງ ໄດ້ຢືນຢັນແລະເນັ້ນໜັກວ່າ: “…ບໍ່ວ່າສະຖານະການຈະເປັນແນວໃດ ເຮົາກໍຕ້ອງຍຶດໝັ້ນໃນຫຼັກໝັ້ນແນວຄິດ, ຍຶດໝັ້ນຈຸດໝາຍ ທັດສະນະ ແລະ ແນວທາງຂອງພັກເຮົາຢູ່ສະເໝີ ໃນການກໍ່ສ້າງ ແລະ ປັບປຸງບູລະນະ ລັດແຫ່ງອຳນາດກົດໝາຍສັງຄົມນິຍົມ ແລະ ລະບົບກົດໝາຍຂອງປະເທດເຮົາ… ພວກເຮົາກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ເຊິ່ງເປັນລັດທີ່ສ້າງກອບສະຖາບັນແລະກົດໝາຍ ເພື່ອການພັດທະນາຊາດແລະປະເທດຊາດ ຢ່າງແທ້ຈິງ. ແຕ່ພວກເຮົາຕ້ອງຈື່ໄວ້ສະເໝີວ່າ ລັດແຫ່ງອຳນາດກົດໝາຍທີ່ພວກເຮົາກຳລັງກໍ່ສ້າງນັ້ນ ແມ່ນລັດແຫ່ງອຳນາດກົດໝາຍສັງຄົມນິຍົມຫວຽດນາມ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ ພາຍໃຕ້ການນຳພາຂອງພັກ. ລະບົບກົດໝາຍຕ້ອງຮັບປະກັນໃຫ້ການດຳເນີນງານຂອງລັດຢ່າງສະດວກ, ທັງຮັບເອົາ ແລະ ພັດທະນາຄຸນຄ່າທີ່ຍືນຍົງ ຂອງອາລະຍະທຳມະນຸດ ແລະ ທັງຕ້ອງສອດຄ່ອງກັບຄຸນຄ່າອັນດີງາມ ຂອງຮີດຄອງປະເພນີຂອງຫວຽດນາມ ແລະ ສອດຄ່ອງກັບຄວາມຮຽກຮ້ອງຕ້ອງການຂອງລະບອບ ແລະ ປະເທດຂອງພວກເຮົາ ໃນໄລຍະການພັດທະນາໃໝ່. ນີ້ແມ່ນບັນຫາທີ່ມີລັກສະນະຫຼັກການ ແລະ ສຳຄັນທີ່ສຸດ”(1). ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ມີບົດບາດສຳຄັນທີ່ສຸດ ໃນການປົກປ້ອງ, ເສີມຂະຫຍາຍສິດທິມະນຸດ, ສິດພົນລະເມືອງ, ເພີ່ມທະວີບົດບາດນຳພາຂອງພັກ ໃນເງື່ອນໄຂໃໝ່. ພັກນຳພາຜ່ານລັດໄດ້ກາຍເປັນແບບວິທີທີ່ສຳຄັນອັນດັບໜຶ່ງ ໃນບັນດາແບບວິທີການນຳພາຂອງພັກ, ຢືນຢັນຖານະກຳອຳນາດຂອງພັກ ເມື່ອອຳນາດທາງການເມືອງ ມີຄວາມຊອບທຳ ໃນອຳນາດສາທາລະນະ; ແລະຍ້ອນແນວນັ້ນ, ແນວທາງຂອງພັກໄດ້ຫັນເປັນນິຕິກຳ, ແຫຼ່ງກຳລັງ ແລະ ກຳລັງແຮງຂອງລັດໄດ້ຮັບການນຳໃຊ້ຢ່າງມີປະສິດທິຜົນ ສຳລັບພາລະກິດການສ້າງສາ ແລະ ປົກປັກຮັກສາປະເທດຊາດສັງຄົມນິຍົມ.
“ພັກນຳພາລັດດ້ວຍໂຄງການການເມືອງ, ຍຸດທະສາດ, ແຜນນະໂຍບາຍ, ນະໂຍບາຍທີ່ສຳຄັນ, ດ້ວຍວຽກງານການຈັດຕັ້ງ ແລະ ພະນັກງານ, ດ້ວຍການກວດກາ ແລະ ຕິດຕາມກວດກາ; ນຳພາການຫັນທັດສະນະ ແນວທາງ ແຜນນະໂຍບາຍຂອງພັກເປັນນິຕິກຳ, ນະໂຍບາຍ, ກົດໝາຍ; ນຳພາການສ້າງກົງຈັກການຈັດຕັ້ງ ແລະ ຖັນແຖວພະນັກງານ, ລັດຖະກອນ, ລັດຖະກອນທີ່ມີຄຸນສົມບັດ ຄວາມສາມາດ ແລະ ສັກສີພຽງພໍເທົ່າກັບໜ້າທີ່; ນຳພາການຈັດຕັ້ງປະຕິບັດແຜນນະໂຍບາຍ, ນະໂຍບາຍ, ລັດຖະທຳມະນູນ ແລະ ກົດໝາຍຢ່າງມີປະສິດທິຜົນ; ສຸມໃສ່ນຳພາການປ່ຽນແປງໃໝ່, ປັບປຸງຄຸນນະພາບນິຕິບັນຍັດ, ການປະຕິຮູບດ້ານການບໍລິຫານ ແລະ ການປະຕິຮູບດ້ານຕຸລາການ”(3). ຄວາມຮັບຜິດຊອບຂອງລັດແມ່ນຕ້ອງຫັນແນວທາງ ແລະ ແຜນນະໂຍບາຍຂອງພັກເປັນນິຕິກຳ, ເປັນນະໂຍບາຍ, ກົດໝາຍ ແລະ ຈັດຕັ້ງປະຕິບັດນະໂຍບາຍ ແລະ ກົດໝາຍເຫຼົ່ານັ້ນຢ່າງທັນເວລາ ແລະ ຄົບຖ້ວນ. ການນຳພາການຫັນເປັນນິຕິກຳນີ້ ແມ່ນເນື້ອໃນທີ່ສຳຄັນໜຶ່ງ ໃນການກຳອຳນາດຂອງພັກດ້ວຍກົດໝາຍ, ຫຼືເວົ້າອີກຢ່າງໜຶ່ງ, ເຈດຈຳນົງຂອງພັກໄດ້ຮັບການປະຕິບັດດ້ວຍອຳນາດທັງໝົດຂອງກົດໝາຍ. ການນຳພານີ້ຮັບປະກັນໃຫ້ກົດໝາຍໄດ້ຮັບການປະຕິບັດຢ່າງຍຸດຕິທຳ ແລະ ຖືກຕ້ອງ, ສະທ້ອນເຖິງຄວາມມຸ່ງມາດປາດຖະໜາ, ສິດ ແລະ ຜົນປະໂຫຍດອັນຊອບທຳຂອງປະຊາຊົນ.
ພັກນຳພາລັດແຕ່ບໍ່ໄດ້ເຮັດແທນທີ່ໃຫ້ລັດ. ຢ່າງໃດກໍຕາມ, ການນຳພານີ້ແມ່ນການເມືອງສະເໝີ. ສິ່ງດັ່ງກ່າວໝາຍຄວາມວ່າ, ພັກກຳນົດຮູບແບບການຈັດຕັ້ງກົງຈັກຂອງລັດ ເພື່ອໃຫ້ລັດເປັນອົງການອຳນາດຂອງປະຊາຊົນຢ່າງແທ້ຈິງ, ສະແດງອອກຢ່າງລວມສູນແລະເຕັມທີ່ທີ່ສຸດເຖິງເຈດຈຳນົງ, ຄວາມປາຖະໜາ ແລະ ຜົນປະໂຫຍດຂອງປະຊາຊົນ; ກຳນົດແນວທາງຍຸດທະສາດກິດຈະການພາຍໃນ ແລະ ຕ່າງປະເທດ ເພື່ອໃຫ້ລັດສ້າງເປັນກົດໝາຍ ແລະ ຈັດຕັ້ງປະຕິບັດກົດໝາຍນັ້ນ; ຈັດຕັ້ງການອົບຮົມສຶກສາແລະຝຶກອົບຮົມພະນັກງານໃຫ້ລັດ, ແນະນຳສະມາຊິກພັກທີ່ດີເດັ່ນ ແລະ ບຸກຄົນນອກພັກ ທີ່ມີຄວາມສາມາດແລະຄຸນນະພາບພຽງພໍທີ່ຈະໄດ້ຮັບເລືອກເຂົ້າໃນອົງການໂດຍປະຊາຊົນເລືອກຕັ້ງ ຫຼືໃຫ້ອົງການລັດທີ່ມີອຳນາດພິຈາລະນາ ແລະ ຈັດໃຫ້ມີຕຳແໜ່ງສຳຄັນໃນກົງຈັກຂອງລັດ; ອົບຮົມສຶກສາທາງດ້ານການເມືອງ ແນວຄິດ ໃຫ້ແກ່ສະມາຊິກພັກ ແລະ ມະຫາຊົນ; ກວດກາ ແລະ ຕິດຕາມກວດກາການເຄື່ອນໄຫວຂອງກົງຈັດຂອງລັດ.
ຄຸນລັກສະນະສຳຄັນຂອງການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມ
ແມ່ນເພື່ອປົກປ້ອງ ແລະ ຮັບປະກັນສິດແລະຜົນປະໂຫຍດ
ຂອງປະຊາຊົນທຸກຊັ້ນວັນນະ ຕາມຂໍ້ກຳນົດຂອງກົດໝາຍ
ສະຫາຍເລຂາທິການໃຫຍ່ ຫງວຽນ ຝູ ຈ້ອງ ຢືນຢັນວ່າ, ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມແມ່ນ ເພື່ອຄຸ້ມຄອງບໍລິຫານປະເທດຢ່າງຮອບດ້ານຕາມກົດໝາຍໃນທຸກດ້ານ, ປົກປ້ອງ ແລະ ຮັບປະກັນສິດແລະຜົນປະໂຫຍດອັນຊອບທຳຂອງປະຊາຊົນ; ປະຊາຊົນມີສິດ ແລະ ປະຕິບັດພັນທະຕາມກົດໝາຍ, ເພື່ອເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ ຍຸຕິທຳ ແລະ ອາລະຍະທຳ”. ສະຫາຍເລຂາທິການໃຫຍ່ເນັ້ນວ່າ ລັດແຫ່ງອຳນາດກົດໝາຍສັງຄົມນິຍົມແມ່ນ “ລັດທີ່ເຄົາລົບ, ປົກປ້ອງ ແລະ ຮັບປະກັນໃຫ້ປະຊາຊົນທຸກຄົນອາດຈະເປັນເຈົ້າການແລະຕັ້ງໜ້າ ໃນການນຳໃຊ້ແລະປະຕິບັດສິດທິມະນຸດ, ສິດແລະພັນທະຂອງພົນລະເມືອງ ຢ່າງຖືກຕ້ອງແລະປອດໄພ ໃນການທຳມາຫາກິນ ໃນຊີວິດ, ປະກອບສ່ວນກຳລັງກາຍ ກຳລັງຊັບ ຄວາມສາມາດ ແລະ ສະຕິປັນຍາ ເພື່ອກໍ່ສ້າງ ແລະ ພັດທະນາປະເທດ, ດຳລົງຊີວິດ ແລະ ເຮັດວຽກຕາມລັດຖະທຳມະນູນ ແລະ ກົດໝາຍ”(4). ນີ້ຍັງໝາຍຄວາມວ່າ ລັດແຫ່ງອຳນາດກົດໝາຍສັງຄົມນິຍົມແມ່ນລັດຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ. ນັ້ນແມ່ນລັດທີ່ປະຊາຊົນເປັນເຈົ້າຂອງອຳນາດລັດ; ປະຊາຊົນມີສິດເຕັມສ່ວນ ໃນການຕັດສິນຕົກລົງກ່ຽວກັບລັກສະນະ, ໂຄງສ້າງການຈັດຕັ້ງ, ໜ້າທີ່, ເປົ້າໝາຍ, ທິດທາງການເຄື່ອນໄຫວ, ທ່າອ່ຽງການພັດທະນາຂອງກົງຈັກແຫ່ງລັດ, ການນຳໃຊ້ກົນໄກຂອງລັດເພື່ອໃຊ້ອຳນາດຂອງຕົນ ແລະ ກວດກາ ຕິດຕາມກວດກາການເຄື່ອນໄຫວຂອງກົງຈັກແຫ່ງລັດ. ບັນດາອົງການຂອງລັດ ຕັ້ງແຕ່ສູນກາງເຖິງທ້ອງຖິ່ນ ແມ່ນໄດ້ຮັບການສ້າງຕັ້ງຂຶ້ນໂດຍປະຊາຊົນ ຕາມທາງກົງຫຼືທາງອ້ອມ; ບັນດາບັນຫາສຳຄັນທີ່ກ່ຽວຂ້ອງເຖິງຜົນປະໂຫຍດລວມຂອງທົ່ວປະເທດແລະທ້ອງຖິ່ນ ລ້ວນແຕ່ໄດ້ຮັບການປຶກສາຫາລື, ການອະພິປາຍ, ການຕັດສິນຕົກລົງ ແລະ ປະຕິບັດໂດຍກົງຫຼືທາງອ້ອມ. ພ້ອມກັນນັ້ນ, ລັດແຫ່ງອຳນາດກົດໝາຍສັງຄົມນິຍົມ ຕ້ອງມີການຈັດຕັ້ງກົງຈັກທີ່ກະທັດລັດ ຮັດກຸມ, ເຄື່ອນໄຫວຢ່າງມີປະສິດທິພາບ ແລະ ປະສິດທິຜົນ, ອຳນວຍຄວາມສະດວກໃຫ້ປະຊາຊົນ ໃນການນໍາໃຊ້ອໍານາດຂອງຕົນ ແລະ ກວດກາ, ຕິດຕາມກວດກາການດໍາເນີນງານຂອງກົງຈັກດັ່ງກ່າວ; ມີຈຸດປະສົງໃນການດຳເນີນງານເພື່ອຜົນປະໂຫຍດຂອງປະຊາຊົນ; ແຜນນະໂຍບາຍ, ນະໂຍບາຍ ແລະ ກົດໝາຍທັງໝົດ ລ້ວນແຕ່ໄດ້ຮັບການພັດທະນາແລະປະຕິບັດ ໂດຍເລີ່ມຈາກຜົນປະໂຫຍດຂອງປະຊາຊົນ ແລະ ເພື່ອຜົນປະໂຫຍດຂອງປະຊາຊົນ; ບັນດາອົງການຂອງລັດ, ພະນັກງານ, ລັດຖະກອນ, ພາລະກອນ ຍາມໃດກໍ່ເຄົາລົບນັບຖືປະຊາຊົນ, ອຸທິດຕົນເພື່ອຮັບໃຊ້ປະຊາຊົນ, ເດັດດ່ຽວຕໍ່ສູ້ຕ້ານພະຍາດອາດຍາສິດ, ຄວາມຈອງຫອງ, ການສວຍໃຊ້ອຳນາດ, ການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ ແລະ ຄວາມຫຍໍ້ທໍ້ອື່ນໆ; ການປະຕິຮູບກົງຈັກແຫ່ງລັດໃນປະຈຸບັນຍັງແນໃສ່ຮັບໃຊ້ຜົນປະໂຫຍດຂອງປະຊາຊົນ.
ດ້ວຍການພັດທະນາຂອງເສດຖະກິດແລະສັງຄົມ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ຄວາມຮຽກຮ້ອງຕ້ອງການຂອງປະຊາຊົນກ່ຽວກັບປະຊາທິປະໄຕ, ລະບຽບກົດໝາຍ, ຍຸຕິທຳ, ຄວາມສະເໝີພາບ, ຄວາມໝັ້ນຄົງ ແລະ ການປົກປັກຮັກສາສິ່ງແວດລ້ອມນັ້ນ ນັບມື້ນັບເພີ່ມຂຶ້ນ.
ຕາມສະຫາຍເລຂາທິການໃຫຍ່ ຫງວຽນ ຝູ ຈ້ອງ, ຈຸດປະສົງຂອງການກໍ່ສ້າງລັດແຫ່ງອຳນາດກົດໝາຍແມ່ນ ເພື່ອຮັກສາແລະເສີມຂະຫຍາຍຄຸນລັກສະນະປະຊາຊົນ, ປະຊາທິປະໄຕ ແລະ ຄຸນລັກສະນະມະນຸດອາລະຍະທຳ ຂອງລັດສັງຄົມນິຍົມຫວຽດນາມຢ່າງແຂງແຮງກວ່າອີກ. ສະຫາຍເລຂາທິການໃຫຍ່ໄດ້ຊີ້ອອກຢ່າງຈະແຈ້ງເຖິງຈຸດໝາຍສູງສຸດໃນຂະບວນການພັດທະນາເສດຖະກິດສັງຄົມ ແລະ ກໍ່ສ້າງລະບົບການເມືອງຂອງປະເທດວ່າ: “ທິດທາງສັງຄົມນິຍົມຂອງລະບົບເສດຖະກິດ ໄດ້ຮັບການຈັດຕັ້ງຂຶ້ນແລະເພີ່ມທະວີເທື່ອລະກ້າວ ຜ່ານການນຳພາຂອງພັກ ແລະ ການຄຸ້ມຄອງຂອງລັດແຫ່ງອຳນາດກົດໝາຍສັງຄົມນິຍົມ ໂດຍມີປະຊາຊົນເປັນໃຈກາງ, ເພື່ອທຸກຄົນ ແລະ ໂດຍມະນຸດ; ເສີມຂະຫຍາຍບົດບາດເປັນເຈົ້າຂອງຂອງປະຊາຊົນຢ່າງຄົບຖ້ວນ, ປະຕິບັດຄວາມກ້າວໜ້າ ແລະ ຄວາມຍຸຕິທຳທາງສັງຄົມ ໃນແຕ່ລະບາດກ້າວ ແລະ ແຕ່ລະນະໂຍບາຍການພັດທະນາ”(5). ສະຫາຍເລຂາທິການໃຫຍ່ ຫງວຽນ ຝູ ຈ້ອງ ຊີ້ໃຫ້ເຫັນແຈ້ງວ່າ, ລັກສະນະປະຊາຊົນແມ່ນຄຸນລັກສະນະທີ່ສະແດງໃຫ້ເຫັນເຖິງຄວາມແຕກຕ່າງທາງດ້ານທາດແທ້ ລະຫວ່າງລັດແຫ່ງອຳນາດກົດໝາຍສັງຄົມນິຍົມຫວຽດນາມ ເມື່ອທຽບກັບລັດແຫ່ງອຳນາດກົດໝາຍອື່ນໆ: “ພວກເຮົາຮັບຮູ້ວ່າ, ລັດແຫ່ງອຳນາດກົດໝາຍສັງຄົມນິຍົມ ມີຄວາມແຕກຕ່າງທາງດ້ານທາດແທ້ກັບ ລັດແຫ່ງອຳນາດກົດໝາຍທຶນນິຍົມ ຢູ່ທີ່: ອຳນາດກົດໝາຍພາຍໃຕ້ລະບອບທຶນນິຍົມ ທາງດ້ານທາດແທ້ແມ່ນເຄື່ອງມືໃນການປົກປັກຮັກສາ ແລະ ຮັບໃຊ້ຜົນປະໂຫຍດຂອງຊົນຊັ້ນນາຍທຶນ, ໃນຂະນະທີ່ອຳນາດກົດໝາຍພາຍໃຕ້ລະບອບສັງຄົມນິຍົມແມ່ນເຄື່ອງມືໃນການສະແດງອອກ ແລະ ປະຕິບັດສິດເປັນເຈົ້າຂອງຂອງປະຊາຊົນ, ຮັບປະກັນ ແລະ ປົກປັກຮັກສາຜົນປະໂຫຍດຂອງປະຊາຊົນສ່ວນຫຼາຍ. ຜ່ານການບັງຄັບໃຊ້ກົດໝາຍ, ລັດຮັບປະກັນເງື່ອນໄຂຕ່າງໆ ເພື່ອໃຫ້ປະຊາຊົນເປັນເຈົ້າຂອງຂອງອຳນາດການເມືອງ ແລະ ປະຕິບັດລະບອບຜະເດັດການຕໍ່ການກະທຳທັງໝົດທີ່ທຳລາຍຜົນປະໂຫຍດຂອງປະເທດຊາດ ແລະ ປະຊາຊົນ”(6). ແມ່ນລັກສະນະປະຊາຊົນນີ້ເອງ ທີ່ໄດ້ເຮັດໃຫ້ລັດແຫ່ງອຳນາດກົດໝາຍສັງຄົມນິຍົມ ເປັນປະຊາທິປະໄຕຢ່າງແທ້ຈິງ ແລະ ມີມະນຸດສະທຳຢ່າງເລິກເຊິ່ງ.
ຕາມສະຫາຍເລຂາທິການໃຫຍ່ ຫງວຽນ ຝູ ຈ້ອງ, ການຮັກສາ ລັກສະນະປະຊາຊົນ ຂອງລັດ ແມ່ນການຮັກສາໃຫ້ລັດເປັນລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຕະຫຼອດການ; ແມ່ນຮູບພາບແຫ່ງມະຫາສາມັກຄີປວງຊົນທັງຊາດ ໃນພາລະກິດການສ້າງສາ ແລະ ປົກປັກຮັກສາປະເທດຊາດ. ການຮັກສາ ລັກສະນະປະຊາທິປະໄຕ ຂອງລັດແມ່ນຮັກສາໃຫ້ລັດເປັນລັດເຊິ່ງໃນການຈັດຕັ້ງແລະການເຄື່ອນໄຫວຂອງມັນ ມີການເຂົ້າຮ່ວມຢ່າງຕັ້ງໜ້າແລະຫຼວງຫຼາຍຂອງປະຊາຊົນ; ພົນລະເມືອງມີສິດແລະຜົນປະໂຫຍດຕາມກົດໝາຍ, ລັດມີຄວາມຮັບຜິດຊອບໃນການຮັບປະກັນ, ພ້ອມກັນນັ້ນ, ລັດກໍມີຄວາມຮັບຜິດຊອບໃນການຂະຫຍາຍສິດແລະຜົນປະໂຫຍດທີ່ຖືກກົດໝາຍ ແລະ ສອດຄ່ອງກັບການພັດທະນາຂອງສັງຄົມ. ການຮັກສາ ລັກສະນະມະນຸດອາລະຍະທຳ ຂອງລັດແມ່ນຮັກສາໃຫ້ລັດເປັນລັດເຊິ່ງແຜນນະໂຍບາຍ, ນະໂຍບາຍ ແລະ ກົດໝາຍທັງໝົດ ລ້ວນແຕ່ເລີ່ມຈາກຄວາມຕ້ອງການ ແລະ ຜົນປະໂຫຍດອັນພື້ນຖານແລະຊອບທຳຂອງມະນຸດ, ແລະ ມຸ່ງຫວັງທີ່ຈະຕອບສະໜອງຄວາມຕ້ອງການແລະຜົນປະໂຫຍດເຫຼົ່ານັ້ນ; ນອກຈາກແຜນນະໂຍບາຍ, ນະໂຍບາຍແລະກົດໝາຍທີ່ມີຄຸນຄ່າເທົ່າທຽມກັນສຳລັບທຸກຄົນແລ້ວ, ຍັງມີແຜນນະໂຍບາຍ, ນະໂຍບາຍ ແລະກົດໝາຍທີ່ສະຫງວນໄວ້ສຳລັບເປົ້າໝາຍພິເສດ ແລະ ຜູ້ດ້ອຍໂອກາດເຊັ່ນ: ບຸກຄົນແລະຄອບຄົວທີ່ມີຄຸນງາມຄວາມດີຕໍ່ການປະຕິວັດ, ເດັດນ້ອຍ, ຜູ້ສູງອາຍຸ, ຄົນພິການ, ຜູ້ປະສົບກັບຄວາມຫຍຸ້ງຍາກ, ຊາວເຜົ່າສ່ວນໜ້ອຍ, ປະຊາຊົນຢູ່ເຂດຫ່າງໄກສອກຫຼີກ ແລະອື່ນໆ.
ການແກ້ໄຂບັນດາບັນຫາທີ່ມີລັກສະນະຫຼັກການເຫຼົ່ານັ້ນ ຍັງໄດ້ຮັບການຢືນຢັນຈາກມະຕິສະບັບເລກທີ 27-NQ/TW, ລົງວັນທີ 9 ພະຈິກ 2022, ຂອງກອງປະຊຸມສູນກາງພັກຄັ້ງທີ 6 ສະໄໝທີ XIII ວ່າ ແມ່ນວຽກງານສຳຄັນທີ່ຕ້ອງປະຕິບັດຢ່າງເຂັ້ມງວດໃນການກໍ່ສ້າງ ລັດແຫ່ງອຳນາດກົດໝາຍສັງຄົມນິຍົມຫວຽດນາມ: “ຮັບປະກັນສິດອຳນາດຂອງປະຊາຊົນ, ເຄົາລົບນັບຖືລັດຖະທຳມະນູນ ແລະ ກົດໝາຍ, ຮັບປະກັນ ແລະ ປົກປ້ອງສິດທິມະນຸດ ແລະ ສິດທິພົນລະເມືອງ”(7), ດ້ວຍທັດສະນະໂດຍລວມວ່າ “ຖືປະຊາຊົນເປັນໃຈກາງ, ເປັນເປົ້າໝາຍ ເຈົ້າພາບ ແລະ ພະລັງຂັດເຄື່ອນການພັດທະນາປະເທດຊາດ; ລັດເຄົາລົບ, ຮັບປະກັນ, ປົກປ້ອງສິດທິມະນຸດ ແລະ ສິດທິພົນລະເມືອງ”(8). ຕາມນັ້ນ, ພັກກຳນົດວ່າ ຕ້ອງຜັນຂະຫຍາຍແລະປະຕິບັດກົນໄກປະຊາຊົນໃຊ້ອຳນາດລັດ ດ້ວຍປະຊາທິປະໄຕໂດຍກົງແລະປະຊາທິປະໄຕແບບຕົວແທນ ຢ່າງຄົບຖ້ວນ ແລະ ມີປະສິດທິຜົນ, ໂດຍສະເພາະ ປະຊາທິປະໄຕຢູ່ຮາກຖານ; ມີກົນໄກຮັບປະກັນການປະຕິບັດສິດຂອງປະຊາຊົນ ໃນການເຂົ້າຮ່ວມການປຶກສາຫາລື ແລະ ສະເໜີແນະໃຫ້ອົງການຂອງລັດ ກ່ຽວກັບບັນຫາໃນຮາກຖານ ທ້ອງຖິ່ນ ແລະ ລະດັບປະເທດ; ການປ່ຽນແປງໃໝ່ກົນໄກເລືອກຕັ້ງ ເພື່ອຄັດເລືອກຜູ້ສົມຄວນເປັນຕົວແທນຂອງປະຊາຊົນ; ການເສີມຂະຫຍາຍປະຊາທິປະໄຕ ໄປຄຽງຄູ່ກັບການເພີ່ມທະວີລະບຽບກົດໝາຍ, ເຊີດຊູຄຸນສົມບັດທາງສັງຄົມ ແລະ ຄວາມຮັບຜິດຊອບຂອງພົນລະເມືອງ, ຮັກສາລະບຽບວິໄນ; ພ້ອມກັນນັ້ນ, ກຳນົດຢ່າງຈະແຈ້ງເຖິງຄວາມຮັບຜິດຊອບຂອງອົງການລັດ ໃນການເຄົາລົບ, ຮັບປະກັນ ແລະ ປົກປ້ອງສິດທິມະນຸດ ແລະ ສິດຂອງພົນລະເມືອງ(9).
ລະບົບກົດໝາຍແມ່ນກະດູກສັນຫຼັງຂອງລະບົບການຄຸ້ມຄອງບໍລິການປະເທດ. ດັ່ງນັ້ນ, ເພື່ອກໍ່ສ້າງແລະປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມ, ສະຫາຍເລຂາທິການໃຫຍ່ ຫງວຽນ ຝູ ຈ້ອງ ເນັ້ນວ່າ: “ສຸມໃສ່ການກໍ່ສ້າງແລະປັບປຸງບູລະນະລະບົບກົດໝາຍໃຫ້ຄົບຊຸດ, ເປັນເອກະພາບ ແລະ ເປັນໄປໄດ້ ເພື່ອສືບຕໍ່ຫັນໂຄງການການເມືອງ, ບັນດາທັດສະນະ, ແນວທາງຂອງພັກ ເປັນນິຕິກຳ, ຫັນລັດຖະທຳມະນູນເປັນຮູບປະທຳ, ເສີມຂະຫຍາຍສິດເປັນເຈົ້າຂອງຂອງປະຊາຊົນ, ບົດບາດແລະປະສິດທິຜົນການຄຸ້ມຄອງຂອງລັດ, ຮັບປະກັນການຮັກສາສະຖຽນລະພາບທາງການເມືອງ, ພັດທະນາເສດຖະກິດແລະສັງຄົມ, ເພີ່ມທະວີການປ້ອງກັນປະເທດ ແລະ ປ້ອງກັນຄວາມໝັ້ນຄົງ, ຊຸກຍູ້ການເຊື່ອມໂຍງເຂົ້າກັບສາກົນ, ກໍ່ສ້າງລັດໃຫ້ນັບມື້ນັບສະອາດ ແລະ ໝັ້ນຄົງເຂັ້ມແຂງ. ຢາກໄດ້ຄືແນວນັ້ນ, ຈຳເປັນຕ້ອງຍຶດໝັ້ນ ແລະ ຊາບຊຶມແນວທາງ ແລະ ແຜນນະໂຍບາຍຂອງພັກ, ໄຈ້ແຍກ ແລະ ກຳແໜ້ນຄວາມຕ້ອງການພຶດຕິກຳຕົວຈິງຂອງຊີວິດ; ພ້ອມກັນນັ້ນ, ສືບຕໍ່ເສີມຂະຫຍາຍຄວາມສາມາດ ແລະ ຍົກສູງຄຸນນະພາບການເຄື່ອນໄຫວນິຕິບັນຍັດ, ການປ່ຽນແປງໃໝ່ຂະບວນການສ້າງກົດໝາຍ, ຮັບປະກັນປະຊາທິປະໄຕ, ລະບຽບກົດໝາຍ, ຄວາມເປີດເຜີຍ ແລະ ໂປ່ງໃສຂອງລະບົບກົດໝາຍ ແລະອື່ນໆ. ການຈັດຕັ້ງແລະການດຳເນີນງານຂອງບັນດາສະຖາບັນໃນລະບົບການເມືອງ ສອດຄ່ອງກັບຄວາມຕ້ອງການຂອງການກໍ່ສ້າງລັດແຫ່ງອຳນາດກົດໝາຍສັງຄົມນິຍົມ; ຮັບປະກັນສິດທິມະນຸດ ແລະ ສິດທິພົນລະເມືອງ”(10).
ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ຕິດພັນກັບການຮັກສາ
ສະຖຽນລະພາບທາງການເມືອງ, ການປ່ຽນແປງໃໝ່ລະບົບການເມືອງຢ່າງຮອບດ້ານ,
ການພັດທະນາເສດຖະກິດແລະສັງຄົມ ຂອງປະເທດ ຢ່າງຍືນຍົງ
ທີໜຶ່ງ, ຮັກສາສະຖຽນລະພາບທາງການເມືອງ
ສະຖຽນລະພາບທາງການເມືອງແມ່ນໜຶ່ງໃນບັນດາເງື່ອນໄຂສຳຄັນທີ່ສຸດ ເພື່ອກໍ່ສ້າງແລະພັດທະນາປະເທດ ແລະ ເຊື່ອມໂຍງເຂົ້າກັບສາກົນ. ດັ່ງນັ້ນ, ສະຫາຍເລຂາທິການໃຫຍ່ ຫງວຽນ ຝູ ຈ້ອງ ເນັ້ນເຖິງການກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ທີ່ຈະຕ້ອງດຳເນີນການບົນພື້ນຖານຂອງສະຖຽນລະພາບທາງການເມືອງວ່າ: “ຕ້ອງຮັກສາສະຖຽນລະພາບທາງການເມືອງ, ເປັນເຈົ້າການແລະຕັ້ງໜ້າໃນການເຊື່ອມໂຍງເຂົ້າກັບສາກົນ, ກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ”(11). ສະຖຽນລະພາບທາງການເມືອງຂຶ້ນຢູ່ກັບຄວາມໝັ້ນຄົງຂອງລັດ, ເພາະວ່າ ລັດເປັນເສົາຫຼັກຂອງລະບົບການເມືອງ, ເປັນບ່ອນເຕົ້າໂຮມ ແລະ ສະທ້ອນຢ່າງລວມສູນທີ່ສຸດເຖິງຊີວິດທາງການເມືອງທັງໝົດຂອງປະເດທ, ເປັນເຄື່ອງມືທີ່ສຳຄັນທີ່ສຸດ ແລະມີປະສິດທິພາບທີ່ສຸດ ໃນການກໍ່ສ້າງ, ປັບປຸງ, ປົກປ້ອງ ແລະ ເສີມຂະຫຍາຍລະບົບການເມືອງສັງຄົມນິຍົມ. ສາມາດເວົ້າໄດ້ວ່າ, ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມທີ່ແທ້ຈິງແມ່ນ “ການປະຕິວັດ” ໃນລັດ, ດັ່ງນັ້ນ, ຖ້າບໍ່ດຳເນີນການຕາມຫຼັກວິທະຍາສາດ ຈະເຮັດໃຫ້ສະຖຽນລະພາບຂອງພັກອ່ອນເພຍລົງ, ຈາກນັ້ນຈະທຳລາຍຄວາມໝັ້ນຄົງທາງການເມືອງຂອງທົ່ວປະເທດ.
ທີສອງ, ປ່ຽນແປງໃໝ່ລະບົບການເມືອງຢ່າງຮອບດ້ານ
ລັດແຫ່ງອຳນາດກົດໝາຍສັງຄົມນິຍົມແມ່ນພາກສ່ວນໜຶ່ງໃນລະບົບການເມືອງສັງຄົມນິຍົມ, ມີສາຍພົວພັນທີ່ແໜ້ນແຟ້ນ ແລະ ມີການກະທົບເຊິ່ງກັນແລະກັນ ກັບພັກຜູ້ກຳອຳນາດ ແລະ ບັນດາອົງການຈັດຕັ້ງການເມືອງ-ສັງຄົມອື່ນ. ຄວາມເຂັ້ມແຂງຂອງລັດແມ່ນມາຈາກການນໍາພາທີ່ຖືກຕ້ອງຂອງພັກກອມມູນິດຫວຽດນາມ, ການເຂົ້າຮ່ວມຢ່າງຕັ້ງໜ້າ ແລະການຊ່ວຍເຫຼືອອັນໃຫຍ່ຫຼວງ ຂອງບັນດາອົງການຈັດຕັ້ງການເມືອງ-ສັງຄົມອື່ນ; ກົງກັນຂ້າມ, ຄຸນນະພາບແລະປະສິດທິຜົນການນຳພາຂອງພັກຕໍ່ລັດ ກໍຄືລະດັບການສົ່ງເສີມບົດບາດຂອງອົງການຈັດຕັ້ງການເມືອງ-ສັງຄົມອື່ນໆໃນສັງຄົມນັ້ນ ຂຶ້ນຢູ່ກັບປະສິດທິພາບ ແລະ ປະສິດທິຜົນການຄຸ້ມຄອງບໍລິຫານຂອງລັດ. ດ້ວຍຄວາມຮັບຮູ້ຢ່າງເລິກເຊິ່ງເຖິງການພົວພັນອັນໃກ້ຊິດນີ້, ສະຫາຍເລຂາທິການໃຫຍ່ ຫງວຽນ ຝູ ຈ້ອງ ຍາມໃດກໍ່ກຳນົດໜ້າທີ່ກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມ ໃນສະພາບການຂອງການປ່ຽນແປງໃໝ່ວິທີການນຳພາຂອງພັກ, ການກໍ່ສ້າງພັກ ແລະ ລະບົບການເມືອງທີ່ສະອາດ ແລະ ໝັ້ນຄົງເຂັ້ມແຂງ. ສະຫາຍເລຂາທິການໃຫຍ່ຢືນຢັນເປົ້າໝາຍລວມແມ່ນ: “ກໍ່ສ້າງລະບົບການເມືອງທີ່ກະທັດລັດ, ເຄື່ອນໄຫວມີປະສິດທິພາບແລະປະສິດທິຜົນ ເຊິ່ງຈຸດໜັກແມ່ນ ກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ທີ່ຊື່ສັດທ່ຽງທຳແລະພັດທະນາ; ກໍ່ສ້າງພັກທີ່ສະອາດປອດໃສ ເຂັ້ມແຂງ ແລະ ຮອບຮູ້; ກໍ່ສ້າງສັງຄົມທີ່ປະຊາທິປະໄຕ ຍຸຕິທຳ ແລະ ມີອາລະຍະທຳ”(12). ອາດຈະເວົ້າໄດ້ວ່າ, ລັດແຫ່ງອຳນາດກົດໝາຍສັງຄົມນິຍົມ ແມ່ນຜົນສັງລວມ ຂອງຂະບວນການປ່ຽນແປງໃໝ່ລະບົບການເມືອງສັງຄົມນິຍົມທັງໝົດ. ສະຫາຍເລຂາທິການໃຫຍ່ລະບຸຊັດເຈນວ່າ ການເຄື່ອນໄຫວຂອງລັດຕ້ອງຮັບປະກັນຄວາມຮຽກຮ້ອງຕ້ອງການດັ່ງນີ້: “ສືບຕໍ່ກໍ່ສ້າງ ແລະ ປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມ, ປະຕິບັດປະຊາທິປະໄຕ, ປະຕິບັດຕາມຫຼັກການຂອງຫຼັກນິຕິທຳ ແລະ ຕ້ອງສ້າງການປ່ຽນແປງຢ່າງຕັ້ງໜ້າ, ມີປະສິດທິພາບ ແລະ ມີປະສິດທິຜົນ. ກໍ່ສ້າງລັດທັງດ້ານນິຕິບັນຍັດ, ບໍລິຫານ ແລະ ຕຸລາການ, ຕິດພັນກັບການປ່ຽນແປງໃໝ່ ແລະການປັບປຸງອຳນາດການປົກຄອງທ້ອງຖິ່ນ, ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ຕາມທິດທາງກະທັດລັດ, ມີປະສິດທິພາບແລະປະສິດທິຜົນ. ສຸມໃສ່ປັບປຸງບັນດາສະຖາບັນໃຫ້ສົມບູນແບບ ແລະ ຈັດຕັ້ງປະຕິບັດກົດໝາຍຢ່າງເຂັ້ມງວດ ຕາມຫຼັກການ ແລະ ຂໍ້ບັງຄັບຂອງລັດຖະທຳມະນູນປີ 2013”(13).
ທີສາມ, ພັດທະນາເສດຖະກິດ-ສັງຄົມຂອງປະເທດຢ່າງຍືນຍົງ
ສະຫາຍເລຂາທິການໃຫຍ່ ຫງວຽນ ຝູ ຈ້ອງ ຊີ້ແຈງວ່າ, ລັດແຫ່ງອຳນາດກົດໝາຍສັງຄົມນິຍົມສາມາດສ້າງໄດ້ພຽງແຕ່ບົນພື້ນຖານເສດຖະກິດທີ່ພັດທະນາ, ວັດທະນະທຳທີ່ກ້າວໜ້າ ອຸດົມໄປດ້ວຍເອກະລັກປະຈຳຊາດ ແລະ ສັງຄົມມີປະຊາທິປະໄຕ ຍຸຕິທຳ ແລະສະເໝີພາບ; ກົງກັນຂ້າມ, ຈະສາມາດສ້າງພື້ນຖານເສດຖະກິດທີ່ພັດທະນາ, ວັດທະນະທຳທີ່ກ້າວໜ້າ ອຸດົມໄປດ້ວຍເອກະລັກປະຈຳຊາດ ແລະ ສັງຄົມມີປະຊາທິປະໄຕ ຍຸດຕິທຳ ແລະ ສະເໝີພາບ ຂຶ້ນໄດ້ກໍຕໍ່ເມື່ອມີລັດແຫ່ງກົດໝາຍສັງຄົມນິຍົມຂອງປະຊາຊົນ ໂດຍປະຊາຊົນ ແລະເພື່ອປະຊາຊົນຢ່າງແທ້ຈິງ. ດັ່ງນັ້ນ, ຈຶ່ງຈຳເປັນຕ້ອງສ້າງລັດແຫ່ງອຳນາດກົດໝາຍທີ່ຄົບຊຸດ ແລະຮອບດ້ານ ໄປພ້ອມໆກັບດ້ານອື່ນໆຂອງຊີວິດດ້ານເສດຖະກິດ, ວັດທະນະທຳ ແລະ ສັງຄົມຂອງປະເທດ. ສະຫາຍເລຂາທິການໃຫຍ່ ຫງວຽນ ຝູ ຈ້ອງ ຊີ້ແຈງວ່າ: “ສືບຕໍ່ມີແຜນນະໂຍບາຍ ແລະ ວິທີແກ້ໄຂ ເພື່ອຊຸກຍູ້ການຫັນເປັນອຸດສາຫະກຳ ແລະ ທັນສະໄໝ, ປ່ຽນແປງໃໝ່ຮູບແບບການເຕີບໂຕ ແລະປັບໂຄງສ້າງເສດຖະກິດ; ປັບປຸງລະບຽບລະບອບ, ພັດທະນາເສດຖະກິດຕະຫຼາດຕາມທິດສັງຄົມນິຍົມ; ພັດທະນາວັດທະນະທຳ, ສ້າງຄົນໃໝ່; ປ່ຽນແປງການຄຸ້ມຄອງພັດທະນາສັງຄົມ, ປະຕິບັດຄວາມກ້າວໜ້າ ແລະ ຄວາມຄວາມຍຸຕິທຳທາງສັງຄົມ; ເພີ່ມທະວີການປ້ອງກັນປະເທດ ປ້ອງກັນຄວາມໝັ້ນຄົງ ແລະ ຮັກສາປະເທດຊາດສັງຄົມນິຍົມຫວຽດນາມຢ່າງໝັ້ນຄົງ; ເປັນເຈົ້າການແລະຕັ້ງໜ້າເຊື່ອມໂຍງເຂົ້າກັບສາກົນ, ເສີມຂະຫຍາຍປະຊາທິປະໄຕ, ປັບປຸງລັດແຫ່ງອຳນາດກົດໝາຍສັງຄົມນິຍົມໃຫ້ສົມບູນແບບ; ກໍ່ສ້າງພັກໃຫ້ນັບມື້ນັບສະອາດປອດໃສ ແລະໝັ້ນຄົງເຂັ້ມແຂງ”(14). ດ້ວຍຄວາມໝາຍນັ້ນ, ການເຄື່ອນໄຫວໃດໆ ຂອງລັດແລະສັງຄົມທີ່ກ່ຽວຂ້ອງເຖິງ ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ແລະ ການພັດທະນາເສດຖະກິດ ວັດທະນະທຳ ແລະ ສັງຄົມ ລ້ວນແຕ່ຕ້ອງເປັນໄປຕາມຄຳຂວັນຄື: ການພັດທະນາເສດຖະກິດ ວັດທະນະທຳ ແລະ ສັງຄົມ ແມ່ນເພື່ອຮັບໃຊ້ໃຫ້ແກ່ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຢ່າງສຳເລັດຜົນ ແລະ ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມທີ່ປະສົບຄວາມສຳເລັດ ແມ່ນເພື່ອຮັບໃຊ້ການພັດທະນາເສດຖະກິດ ວັດທະນະທຳ ແລະ ສັງຄົມ.
ມະຕິເລກທີ 27-NQ/TW, ລົງວັນທີ 9 ພິຈິກ 2022, ຂອງກອງປະຊຸມສູນກາງພັກຄັ້ງທີ 6 ສະໄໝທີ XIII ໄດ້ກຳນົດວ່າ ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມຕ້ອງໄດ້ “ຈັດຢູ່ໃນວຽກງານໂດຍລວມໃນການກໍ່ສ້າງ ປັບປຸງພັກ ແລະ ລະບົບການເມືອງໃຫ້ສະອາດປອດໃສ ແລະ ໝັ້ນຄົງເຂັ້ມແຂງ; ເສີມຂະຫຍາຍກຳລັງແຮງແຫ່ງມະຫາສາມັກຄີປວງຊົນທັງຊາດ, ລະດົມການເຂົ້າຮ່ວມຂອງລະບົບການເມືອງທັງໝົດ ດ້ວຍຄວາມຕັດສິນໃຈສູງ, ຄວາມມານະພະຍາຍາມອັນຍິ່ງໃຫຍ່, ການກະທຳທີ່ດຸເດືອດ ທົນທານໝັ້ນໜຽວ ແລະ ມີປະສິດທີຜົນ; ປະຕິບັດພາລະກິດການສ້າງສາ ແລະ ປົກປັກຮັກສາປະເທດຊາດຢ່າງສຳເລັດຜົນ, ເພື່ອເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ແລະ ອາລະຍະທຳ”(15).
ທັດສະນະຂອງສະຫາຍເລຂາທິການໃຫຍ່ ຫງວຽນ ຝູ ຈ້ອງ ກ່ຽວກັບການກໍ່ສ້າງລັດແຫ່ງອຳນາດກົດໝາຍສັງຄົມນິຍົມ ແມ່ນພາກສ່ວນທີ່ສຳຄັນໃນລະບົບທັດສະນະກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມຢູ່ຫວຽດນາມໃນປະຈຸບັນ ທີ່ມີລັກສະນະ “ແມ່ນພະລະກິດທີ່ຍາວນານ, ຫຍຸ້ງຍາກ ແລະ ສັບສົນທີ່ສຸດ, ເພາະວ່າ ມັນຕ້ອງສ້າງການປ່ຽນແປງດ້ານຄຸນນະພາບຢ່າງເລິກເຊິ່ງ ໃນທຸກຂົງເຂດຂອງຊີວິດສັງຄົມ”(16). ການກໍ່ສ້າງລັດແຫ່ງອຳນາດກົດໝາຍສັງຄົມນິຍົມແມ່ນພາກສ່ວນສຳຄັນຂອງເປົ້າໝາຍໂດຍລວມ ໃນການຄຸ້ມຄອງບໍລິຫານປະເທດດ້ວຍກົດໝາຍ, ແມ່ນປະຖົມປັດໄຈ ແລະ ຮາກຖານ ເພື່ອກໍ່ສ້າງລັດແຫ່ງອຳນາດກົດໝາຍສັງຄົມນິຍົມຫວຽດນາມ./.
-------------------------
(1) ຫງວຽນ ຝູ ຈ້ອງ: “ເຊື່ອໝັ້ນໃນການນຳພາຂອງພັກ, ຜ່ານຜ່າຄວາມຫຍຸ້ງຍາກທັງໝົດ”, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ໜ້າ 435-436.
(2) ເບິ່ງ: ຫວູ ຈ້ອງ ເລິມ: “ພັກກອມມູນິດຫວຽດນາມນຳພາລັດແລະສັງຄົມແມ່ນຄວາມຈຳເປັນພາວະວິໄສ”, ວາລະສານກອມມູນິດ, ສະບັບທີ 944, ເດືອນມິຖຸນາ 2020, ໜ້າ 39-48.
(3) ເອກະສານກອງປະຊຸມຄັ້ງທີ່ 6 ຂອງຄະນະບໍລິຫານງານສູນກາງພັກສະໄໝທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2022, ໜ້າ 38.
(4), (5) ຫງວຽນ ຝູ ຈ້ອງ: “ເຊື່ອໝັ້ນໃນການນຳພາຂອງພັກ, ຜ່ານຜ່າຄວາມຫຍຸ້ງຍາກທັງໝົດ”, ປຶ້ມທີ່ໄດ້ແນະນຳ, ໜ້າ 435-436, 242.
(6) ຫງວຽນ ຝູ ຈ້ອງ: “ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄັມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມຢູ່ຫວຽດນາມ”, ວາລະສານກອມມູນິດ, ສະບັບທີ 966, ເດືອນພຶດສະພາ 2021, ໜ້າ 9-10.
(7), (8), (9) ເອກະສານກອງປະຊຸມຄັ້ງທີ່ 6 ຂອງຄະນະບໍລິຫານງານສູນກາງພັກສະໄໝທີ XIII, ປຶ້ມທີ່ໄດ້ແນະນຳ, ໜ້າ 46, 39, 46-48.
(10), (11), (12), (13) ຫງວຽນ ຝູ ຈ້ອງ: “ເຊື່ອໝັ້ນໃນການນຳພາຂອງພັກ, ຜ່ານຜ່າຄວາມຫຍຸ້ງຍາກທັງໝົດ”, ປຶ້ມທີ່ໄດ້ແນະນຳ, ໜ້າ 424, 415, 291, 88.
(14) ຫງວຽນ ຝູ ຈ້ອງ: “ກ້າວຢ່າງໜັກແໜ້ນຂຶ້ນສູ່ເສັ້ນທາງແຫ່ງການປ່ຽນແປງໃໝ່”, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2017, ເຫຼັ້ມ 2, ໜ້າ 26
(15) ເອກະສານກອງປະຊຸມຄັ້ງທີ່ 6 ຂອງຄະນະບໍລິຫານງານສູນກາງພັກສະໄໝທີ XIII, ປຶ້ມທີ່ໄດ້ແນະນຳ, ໜ້າ 38.
(16) ຫງວຽນ ຝູ ຈ້ອງ: “ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄັມນິຍົມ ແລະ ເສັ້ນທາງຂຶ້ນສູ່ສັງຄົມນິຍົມຢູ່ຫວຽດນາມ”, ວາລະສານກອມມູນິດ, ສະບັບທີ 966, ເດືອນພຶດສະພາ 2021, ໜ້າ 7.
- ບົດນີ້ໄດ້ລົງພິມໃນວາລະສານກອມມູນິດ, ສະບັບທີ 1012 (ເດືອນເມສາ 2023)
