ການລະດົມ ຈັດແບ່ງ ນຳໃຊ້ ແລະຄຸ້ມຄອງຊັບພະຍາກອນຢ່າງມີປະສິດທິຜົນ
ເພື່ອລົງທຶນພັດທະນາ, ສ້າງການປ່ຽນແປງທາງເສດຖະກິດ ສັງຄົມ ແລະ
ວັດທະນະທຳຢ່າງພື້ນຖານ ຢູ່ເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ
ເພື່ອລົງທຶນພັດທະນາ, ສ້າງການປ່ຽນແປງທາງເສດຖະກິດ ສັງຄົມ ແລະ
ວັດທະນະທຳຢ່າງພື້ນຖານ ຢູ່ເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ
ກຳມະການກົມການເມືອງ, ປະທານປະເທດຫວຽດນາມ ຫວໍວັນເຖືອງ ຊົມເຊີຍພີ່ນ້ອງຮ່ວມຊາດໃນງານບຸນມະຫາສາມັກຄີປວງຊົນທັງຊາດ ຢູ່ຕາແສງ ສວຍຈາຍ, ເມືອງ ເຊີນຮ່ວາ, ແຂວງ ຝູອຽນ _ແຫຼ່ງ: vov.vn
ແຜນນະໂຍບາຍ, ນະໂຍບາຍຂອງພັກແລະລັດຫວຽດນາມ ກ່ຽວກັບການລະດົມ
ຈັດແບ່ງ ແລະ ຄຸ້ມຄອງຊັບພະຍາກອນ ເພື່ອການພັດທະນາເຂດທີ່ມີຊາວຊົນເຜົ່າສ່ວນໜ້ອຍຈຳນຫຼາຍ
ໃນໄລຍະປະຈຸບັນ, ເປົ້າໝາຍການພັດທະນາເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ ໄດ້ລະບຸໃນເປົ້າໝາຍການພັດທະນາໂດຍລວມຂອງປະເທດ. ນີ້ແມ່ນບັນຫາສຳຄັນໃນແນວທາງແຜນນະໂຍບາຍຂອງພັກ ແລະ ນະໂຍບາຍກົດໝາຍຂອງລັດ ເພື່ອແນໃສ່ “ຮັບປະກັນໃຫ້ບັນດາເຜົ່າມີຄວາມສະເໝີພາບ ຄວາມເຄົາລົບ ແລະ ຄວາມສາມັກຄີກັນ, ແກ້ໄຂການພົວພັນລະຫວ່າງບັນດາເຜົ່າຢ່າງກົມກຽວ, ຊ່ວຍເຫຼືອກັນພັດທະນາ, ສ້າງການປ່ຽນແປງຢ່າງຈະແຈ້ງ ໃນການພັດທະນາເສດຖະກິດ ວັດທະນະທຳແລະສັງຄົມ ຢູ່ບັນດາເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ, ໂດຍສະເພາະ ເຂດຕາເວັນຕົກສຽງເໜືອ, ເຂດພູພຽງພາກກາງ, ເຂດຕາເວັນຕົກສຽງໃຕ້ພາກໃຕ້ ແລະ ເຂດຊາຍຝັ່ງທະເລພາກກາງ”(1). ເພື່ອຮັບປະກັນແຫຼ່ງຊັບພະຍາກອນສຳລັບການພັດທະນາເຂດຊົນເຜົ່າສ່ວນໜ້ອຍ, ບົດສະຫຼຸບເລກທີ 65-KL/TW ຂອງກົມການເມືອງສູນກາງພັກ ໄດ້ຊີ້ແຈງວ່າ: “ເສີມຂະຫຍາຍຊັບພະຍາກອນທັງໝົດ, ຂຸດຄົ້ນຄວາມສາມາດບົ່ມຊ້ອນແລະຂໍ້ໄດ້ປຽບ ເພື່ອການພັດທະນາເຂດຊົນເຜົ່າສ່ວນໜ້ອຍ ແລະເຂດພູດອຍ ຢ່າງຍືນຍົງ; ຮັບປະກັນການປ້ອງກັນປະເທດ ແລະຄວາມໝັ້ນຄົງ; ຮັກສາ ແລະເສີມຂະຫຍາຍເອກະລັກວັດທະນະທຳທີ່ດີງາມຂອງບັນດາເຜົ່າ”(2). ການຮັບປະກັນແຫຼ່ງຊັບພະຍາກອນ ເພື່ອການພັດທະນາເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ ໄດ້ຮັບການຢືນຢັນຕື່ມອີກ ໃນເອກະສານຂອງກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ ນັ້ນຄື: “ການລະດົມ ຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນຢ່າງມີປະສິດທິຜົນ ເພື່ອລົງທຶນໃນການພັດທະນາ, ສ້າງການປ່ຽນແປງຂັ້ນພື້ນຖານ ດ້ານເສດຖະກິດ ວັດທະນະທຳ ແລະ ສັງຄົມ ໃນເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ”(3).
ດ້ວຍຄວາມເຂົ້າໃຈທັດສະນະຂອງພັກກອມມູນິດຫວຽດນາມຢ່າງຖີ່ຖ້ວນ, ບັນດາອົງການຂອງລັດທີ່ມີອຳນາດ ໄດ້ປະກາດໃຊ້ນະໂຍບາຍຫຼາຍສະບັບ ກ່ຽວກັບການລະດົມຊັບພະຍາກອນ ເພື່ອການພັກທະນາເຂດຊົນເຜົ່າສ່ວນໜ້ອຍ ເຊັ່ນ ມະຕິເລກທີ 88/2019/QH14 ຂອງສະພາແຫ່ງຊາດ ວ່າດ້ວຍ “ການອະນຸມັດໂຄງການໂດຍລວມເພື່ອການພັດທະນາເສດຖະກິດ ແລະສັງຄົມ ໃນເຂດຊົນເຜົ່າສ່ວນໜ້ອຍ ແລະເຂດພູດອຍ ໃນໄລຍະປີ 2021-2030”, ມະຕິເລກທີ 120/2020/QH14 ຂອງສະພາແຫ່ງຊາດ ວ່າດ້ວຍ “ການອະນຸມັດແຜນນະໂຍບາຍການລົງທຶນ ໂຄງການເປົ້າໝາຍແຫ່ງຊາດ ເພື່ອການພັດທະນາເສດຖະກິດແລະສັງຄົມ ໃນເຂດຊົນເຜົ່າສ່ວນໜ້ອຍ ແລະເຂດພູດອຍ ໃນໄລຍະປີ 2021-2030”. ຂໍ້ຕັດສິນຕົກລົງເລກທີ 1719/QĐ-TTg ລົງວັນທີ 14 ຕຸລາ 2021 ຂອງນາຍົກລັດຖະມົນຕີ ວ່າດ້ວຍ “ການອະນຸມັດໂຄງການເປົ້າໝາຍແຫ່ງຊາດ ເພື່ອການພັດທະນາເສດຖະກິດແລະສັງຄົມ ໃນເຂດຊົນເຜົ່າສ່ວນໜ້ອຍ ແລະເຂດພູດອຍ ໃນໄລຍະປີ 2021-2030, ໄລຍະທີ 1: ຕັ້ງແຕ່ປີ 2021 ເຖິງປີ 2025” ເມື່ອເວົ້າເຖິງການລະດົມ ຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນ ໄດ້ລະບຸໄວ້ຢ່າງຈະແຈ້ງວ່າ: “ດຳເນີນການລະດົມແຫຼ່ງເງິນທຶນທີ່ຫຼາກຫຼາຍ ເພື່ອປະຕິບັດໂຄງການ, ໃນນັ້ນ ງົບປະມານຂອງລັດມີບົດບາດສຳຄັນ ແລະມີຄວາມໝາຍຕັດສິນ; ມີມາດຕະການແກ້ໄຂທີ່ເໝາະສົມ ເພື່ອລະດົມແຫຼ່ງທຶນ ODA; ເພີ່ມທະວີການລະດົມແຫຼ່ງເງິນບໍລິຈາກທີ່ຖືກກົດໝາຍ ຈາກອົງການ, ວິສາຫະກິດ ແລະ ນັກທຸລະກິດ ທັງໃນປະເທດແລະຕ່າງປະເທດ. ຮັບປະກັນຄວາມດຸ່ນດ່ຽງ, ການຈັດສັນ, ການລະດົມທຶນຢ່າງຄົບຖ້ວນ ແລະ ທັນການ ຕາມໂຄງປະກອບທຶນທີ່ໄດ້ຕັດສິນຕົກລົງ; ຮັບປະກັນອັດຕາສ່ວນທຶນສົມທົບຂອງທ້ອງຖິ່ນ ແລະ ຄວາມຮັບຜິດຊອບ ໃນການເຂົ້າຮ່ວມການປະຕິບັດໂຄງການ ຂອງປະຊາຊົນ ແລະ ຜູ້ຮັບຜົນປະໂຫຍດ”.
ສະຖານະການປະຈຸບັນຂອງການລະດົມ ຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນ
ເພື່ອກການລົງທຶນພັດທະນາເສດຖະກິດສັງຄົມ ແລະວັດທະນະທຳ ຢູ່ເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ
ໃນຊຸມປີທີ່ຜ່ານມາ, ພັກແລະລັດຍາມໃດກໍ່ເອົາໃຈໃສ່ຊີ້ນຳການລະດົມຊັບພະຍາກອນ ເພື່ອບຸລິມະສິດການລົງທຶນຢູ່ໃນເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ ເພື່ອແນໃສ່ສ້າງການປ່ຽນແປງຂັ້ນພື້ນຖານ ທາງດ້ານເສດຖະກິດ ສັງຄົມ ແລະ ວັດທະນະທຳ ຢູ່ໃນເຂດເຫຼົ່ານີ້. ໃນໄລຍະປີ 2011-2021, ງົບປະມານແຫ່ງລັດໄດ້ຈັດສັນເງິນ 246.654,5 ຕື້ດົ່ງ ເພື່ອລົງທຶນເຂົ້າບັນດາໂຄງການພັດທະນາເສດຖະກິດ ສັງຄົມ ແລະ ວັດທະນະທຳຢູ່ເຂດຊົນເຜົ່ານສ່ວນໜ້ອຍ(4). ຄຽງຄູ່ກັບແຫຼ່ງກຳລັງຂອງລັດແລະທ້ອງຖິ່ນ, ການລະດົມ ຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນ ເພື່ອການລົງທຶນໃນການພັດທະນາເສດຖະກິດ ສັງຄົມ ແລະ ວັດທະນະທຳຢູ່ເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ ໄດ້ດຶງດູດຊັບພະຍາກອນສັງຄົມ ເຊັ່ນ “ການຊ່ວຍເຫຼືອເພື່ອການພັດທະນາຢ່າງເປັນທາງການ (ODA), ທຶນຂອງອົງການພັດທະນາເອກະຊົນ (NGO), ໂຄງການນະໂຍບາຍການພັດທະນາ (DPO) ຂອງທະນາຄານໂລກ (WB), ແຜນການສະໜັບສະໜູນດ້ານຊັບພະຍາກອນຂອງທະນາຄານພັດທະນາອາຊີ (ADB), ບັນດາໂຄງການຂອງອົງການຮ່ວມມືສາກົນຍີ່ປຸ່ນ (JICA), ສະຖານທູດໄອແລນ, ຂອງມູນນິທິໃຈບຸນ - Vingroup ແລະ ຜູ້ບໍລິຈາກອື່ນໆ, ...”(5). ລວມທັງແຫຼ່ງທຶນຊ່ວຍເຫຼືອທີ່ບໍ່ຕ້ອງຄືນ ແລະ ເງິນກູ້ບຸລິມະສິດຈາກບັນດາປະເທດ, ອົງການຈັດຕັ້ງສາກົນ ແລະ ບັນດາອົງການພັດທະນາເອກະຊົນ ທີ່ຊ່ວຍໃຫ້ຫວຽດນາມ. ຊັບພະຍາກອນເຫຼົ່ານີ້ໄດ້ປະກອບສ່ວນສຳຄັນຕໍ່ການລົງທຶນໃນການພັດທະນາເສດຖະກິດ ແລະສັງຄົມ ໃນເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ. ດັ່ງນັ້ນ, “ໃນໄລຍະປີ 2011-2021, ທຶນ ODA ໄດ້ສະໜອງເງິນທຶນ 2,6 ຕື້ໂດລາສະຫະລັດ, ທຶນຂອງອົງການພັດທະນາເອກະຊົນ (NGO) ໄດ້ປະມານ 5,5 ລ້ານໂດລາສະຫະລັດ, ລັດຖະບານໄອແລນໃຫ້ການຊ່ວຍເຫຼືອໂດຍບໍ່ຕ້ອງຄືນເງິນຈຳນວນ 10 ລ້ານເອີໂຮ,...”(6). ດັ່ງນັ້ນ, ໂຄງການຫຼຸດຜ່ອນຄວາມທຸກຍາກ ແລະປະກັນຄວາມປອດໄພທາງສັງຄົມເກືອບ 200 ໂຄງການ, ໂຄງການດ້ານການສຶກສາ ການຝຶກອົບຮົມ ການອົບຮົມວິຊາຊີບ ແລະການສ້າງວຽກເຮັດງານທຳປະມານ 250 ໂຄງການ ໄດ້ຖືກນຳໃຊ້ໃນເຂດທີ່ມີຊາວຊົນເຜົ່າສ່ວນໜ້ຍຈຳນວນຫຼາຍ. ເຖິງວ່າຍັງບໍ່ທັນຕອບສະໜອງໄດ້ຄວາມຕ້ອງການຕົວຈິງກໍ່ຕາມ, ແຕ່ເມື່ອທຽບໃສ່ໄລຍະຜ່ານມາ, ປະສິດທິຜົນການລະດົມທຶນສະໜັບສະໜູນການລົງທຶນຈາກຕ່າງປະເທດເຫຼົ່ານີ້ ໄດ້ປະກອບສ່ວນຫຼຸດຜ່ອນຄວາມທຸກຍາກຢ່າງວ່ອງໄວແລະຍືນຍົງ ແລະ ພັດທະນາແຫຼ່ງຊັບພະຍາກອນມະນຸດ ໃນເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ, ຮັດແຄບຊ່ອງຫວ່າງການພັດທະນາລະຫວ່າງບັນດາເຜົ່າ.
ຊັບພະຍາກອນເຫຼົ່ານີ້ໄດ້ຮັບການຈັດແບ່ງ ນຳໃຊ້ ແລະຄຸ້ມຄອງ ເພື່ອການລົງທຶນໃນຂົງເຂດຕ່າງໆ ເຊັ່ນ ການພັດທະນາໂຄງສ້າງພື້ນຖານ, ໂດຍສະເພາະການພັດທະນາລະບົບຄົມມະນາຄົມຂົນສົ່ງ ເຊິ່ງກວມປະມານ 50%; ການພັດທະນາກະສິກຳ ແລະຊົນນະບົດ, ລວມທັງທາງຄົມມະນາຄົມ ແລະເຄືອຂ່າຍໄຟຟ້າໃນຊົນນະບົດ, ການຊົນລະປະທານ ແລະນ້ຳໃນຊີວິດປະຈຳວັນ ແລະການພັດທະນາການຜະລິດ ເຊັ່ນ ການປູກຝັງ ແລະ ປຸງແຕ່ງຜະລິດຕະພັນກະສິກຳແລະປ່າໄມ້ ປະມານ 13%; ການລົງທຶນໃນຂົງເຂດການສຶກສາແລະຝຶກອົບຮົມ, ສາທາລະນະສຸກ, ການຮັກສາສິ່ງແວດລ້ອມ ແລະ ວິທະຍາສາດ-ເຕັກໂນໂລຊີ... ປະມານ 12%. ດ້ວນການນຳໃຊ້ຊັບພະຍາກອນເຫຼົ່ານີ້, ຮູບລັກສະນະຂອງເຂດທີ່ມີຊົນເຜົ່າສ່ວນໜ້ອຍຈຳນວນຫຼາຍ ຈຶ່ງນັບມື້ນັບມີການປ່ຽນແປງແລະສົດໃສ, ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນນັບມື້ນັບດີຂຶ້ນ, ອັດຕາຄວາມທຸກຍາກຫຼຸດລົງເມື່ອທຽບກັບເມື່ອກ່ອນ.
ການລະດົມແລະນຳໃຊ້ແຫຼ່ງພະລັງດ້ານວິທະຍາສາດແລະເຕັກໂນໂລຊີ ໄດ້ຮັບຄວາມເອົາໃຈໃສ່ ຜ່ານໂຄງການແລະນະໂຍບາຍການພັດທະນາວິທະຍາສາດແລະເຕັກໂນໂລຊີ, ສ້າງເງື່ອນໄຂອຳນວຍຄວາມສະດວກເພື່ອສະໜັບສະໜູນການຖ່າຍທອດແລະການປະຍຸກໃຊ້ວິທະຍາສາດແລະເຕັກໂນໂລຊີ ເຂົ້າໃນການຜະລິດ, ປັບປຸງຍົກສູງສະມັດຕະພາບແລະຄຸນນະພາບຂອງຜະລິດຕະພັນ, ຕອບສະໜອງຄວາມຕ້ອງການຕົວຈິງໃນປະຈຸບັນ. ໃນໄລຍະປີ 2011-2020, ລັດຖະບານໄດ້ປະກາດໃຊ້ໂຄງການວິທະຍາສາດແລະເຕັກໂນໂລຊີ 11 ໂຄງການທີ່ກ່ຽວຂ້ອງກັບເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ, ດຶງດູດອົງການຈັດຕັ້ງ, ບຸກຄົນ, ວິສາຫະກິດໃນປະເທດແລະຕ່າງປະເທດ ໃຫ້ລົງທຶນເຂົ້າໃນຂົງເຂດຕ່າງໆ ເຊັ່ນ ການຟື້ນຟູແລະພັດທະນາໝູ່ບ້ານອາຊີບຫັດຖະກຳພື້ນເມືອງ ຂອງຊົນເຜົ່າສ່ວນໜ້ອຍ, ການຝຶກອົບຮົມວີຊາຊີບ, ການຝຶກອົບຮົມຊັບພະຍາກອນມະນຸດຊົນເຜົ່າສ່ວນໜ້ອຍ, ການສ້າງຮູບແບບການຄຸ້ມຄອງຄຸນນະພາບຜະລິດຕະພັນກະສິກຳຕາມມາດຕະຖານສາກົນ, ຮູບແບບການຄຸ້ມຄອງນ້ຳສະອາດ, ການພັດທະນາແລະປະຍຸກໃຊ້ເຕັກໂນໂລຊີທີ່ໃຊ້ພະລັງງານແສງຕາເວັນ ເພື່ອຜະລິດໄຟຟ້າ ແລະນ້ຳຮ້ອນ ສໍາລັບຄອບຄົວຊົນເຜົ່າສ່ວນໜ້ອຍ... ຜົນທີ່ໄດ້ຮັບຄື ໄດ້ຖ່າຍທອດເຕັກໂນໂລຊີໃໝ່ 1.106 ລາຍການ, ຝຶກອົບຮົມແລະປັບປຸງຍົກສູງຄວາມສາມາດໃນການຄຸ້ມຄອງແລະຈັດຕັ້ງຜັນຂະຫຍາຍໂຄງການ, ການປະຍຸກໃຊ້ແລະການຖ່າຍທອດເຕັກໂນໂລຊີ ໃຫ້ພະນັກງານຄຸ້ມຄອງວິທະຍາສາດແລະເຕັກໂນໂລຊີຫຼາຍກວ່າ 1.500 ຄົນ, ຊ່າງເຕັກນິກ 4.153 ຄົນ ແລະ ຊາວກະສິກອນປະມານ 92.000 ຄົນ(8).
ຍ້ອນການລະດົມ ຈັດແບ່ງ ນຳໃຊ້ ແລະ ຄຸ້ມຄອງແຫຼ່ງຊັບພະຍາກອນເຫຼົ່ານີ້ເພື່ອການລົງທຶນຢ່າງມີປະສິດທິພາບ ຈຶ່ງໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ແລະ ວັດທະນະທຳຢູ່ບັນດາເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ. ໃນໄລຍະປີ 2011-2020, ອັດຕະການເຕີບໂຕທາງເສດຖະກິດໃນເຂດຊົນເຜົ່າສ່ວນໜ້ອຍບັນລຸປະມານ 8% ຕໍ່ປີ ເຊິ່ງສູງກວ່າຄ່າສະເລ່ຍຂອງປະເທດ. ພ້ອມກັນກັບການເຕີບໂຕ, ໂຄງປະກອບເສດຖະກິດໃນເຂດຊົນເຜົ່າສ່ວນໜ້ອຍແລະເຂດພູດອຍຍັງມີການປ່ຽນແປງຫຼາຍດ້ານ ໃນທິດທາງຂອງການເພີ່ມອັດຕາສ່ວນອຸດສາຫະກໍາແລະບໍລິການຂຶ້ນເທື່ອລະກ້າວ; ກະສິກຳກໍ່ຄ່ອຍໆຫັນປ່ຽນໄປສູ່ການຜະລິດເປັນສິນຄ້າ. ໃນນັ້ນ, ຫຼາຍທ້ອງຖິ່ນໄດ້ນຳໃຊ້ບັນດາຜົນສຳເລັດດ້ານວິທະຍາສາດ ແລະ ເຕັກໂນໂລຢີ ແລະ ເສີມຂະຫຍາຍຄວາມສາມາດບົ່ມຊ້ອນແລະທ່າແຮງ ສຸມໃສ່ການຜະລິດສິນຄ້າທີ່ສອດຄ່ອງກັບກົນໄກຕະຫຼາດ. ຄຽງຄູ່ກັນນັ້ນ, ອັດຕາການຫຼຸດຜ່ອນຄວາມທຸກຍາກແມ່ນປະມານ 2%-3% ຕໍ່ປີ, ໂດຍສະເພາະໃນບັນດາຕາແສງທີ່ຫຍຸ້ງຍາກໄດ້ຫຼຸດລົງ 3%-4% ຕໍ່ປີ(9).
ໂຄງສ້າງພື້ນຖານໄດ້ຮັບການປັບປຸງໃຫ້ສົມບູນເທື່ອລະກ້າວ ໂດຍຕິດກັບການພັດທະນາເສດຖະກິດແລະສັງຄົມຂອງເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ. ດັ່ງນັ້ນ, ເຖິງດຽວນີ້, 100% ຂອງເມືອງມີທາງປູຢາງ ຫຼືຄອນກຣີດໄປສູ່ໃຈກາງເມືອງ; 98,4% ຂອງຕາແສງມີທາງລົດໂອໂຕໄປເຖິງໃຈກາງຕາແສງ. ພ້ອມກັນນັ້ນ, ການປະຕິບັດໂຄງການກໍ່ສ້າງຂົວທາງໃຫ້ແກ່ຊີວິດປະຊາຊົນ ເພື່ອຮັບປະກັນຄວາມປອດໄພໃນການສັນຈອນຢູ່ເຂດຊົນເຜົ່າສ່ວນໜ້ອຍ, ແຕ່ປີ 2015 ມາຮອດປັດຈຸບັນ ໄດ້ກໍ່ສ້າງຂົວສຳເລັດແລ້ວ 2.330 ແຫ່ງ, ແກ້ໄຂບັນຫາການເດີນທາງຂອງປະຊາຊົນ ໂດຍສະເພາະໃນລະດູຝົນແລະນໍ້າຖ້ວມ. ນອກຈາກນີ້, ມາຮອດປະຈຸບັນ 100% ຂອງຕາແສງ ແລະ 97,2% ຂອງບ້ານ, ໝູ່ບ້ານ ມີໄຟຟ້າຈາກເຄືອຂ່າຍໄຟຟ້າແຫ່ງຊາດ, ອັດຕາຄອບຄົວທີ່ໃຊ້ໄຟຟ້າສູງເຖິງ 93,9%; 100% ຂອງຕາແສງມີໂຮງຮຽນປະຖົມສຶກສາ ແລະມັດທະຍົມສຶກສາຕອນຕົ້ນ; 99,7% ຂອງຕາແສງມີໂຮງຮຽນອະນຸບານ; 99,3% ຂອງຕາແສງມີສະຖານີການແພດ; 65,5% ຂອງຕາແສງ ແລະ 76,7% ຂອງບ້ານ ໝູ່ບ້ານມີເຮືອນວັດທະນະທໍາ ຫຼືເຮືອນກິດຈະກໍາຊຸມຊົນ.
ໃນຂົງເຂດການສຶກສາ ການຝຶກອົບຮົມ ແລະ ພັດທະນາຊັບພະຍາກອນມະນຸດ ມີຄວາມກ້າວໜ້າ, ຄຸນນະພາບແລະປະສິດທິຜົນນັບມື້ນັບດີຂຶ້ນ. ດ້ວຍເຫດນັ້ນ, ຂະໜາດຂອງຕາໜ່າງໂຮງຮຽນຢູ່ບັນດາເຂດທີ່ມີຊາວຊົນເຜົ່າສ່ວນໜ້ອຍຈຳນວຍຫຼາຍ ໄດ້ຮັບການປັບປຸງ ແລະ ພັດທະນາ ຕັ້ງແຕ່ຊັ້ນອະນຸບານ, ປະຖົມ-ມັດຖະຍົມສຶກສາ ຈົນເຖິງລະດັບວິທະຍາໄລ ແລະ ມະຫາວິທະຍາໄລ. ບັນດານະໂຍບາຍສະໜັບສະໜູນການສຶກສາ ແລະການຝຶກອົບຮົມ, ໂດຍສະເພາະນະໂຍບາຍທີ່ສະໜັບສະໜູນນັກຮຽນຊົນເຜົ່າສ່ວນໜ້ອຍ ຢູ່ເຂດປະສົບກັບຄວາມຫຍຸ້ງຍາກ ແມ່ນສືບຕໍ່ໄດ້ຮັບການເພີ່ມເຕີມ, ປັບປຸງ ແລະ ປະຕິບັດຢ່າງໝັ້ນຄົງແລະທັນການ ເຊິ່ງສົ່ງຜົນກະທົບທາງບວກ, ສ້າງຄວາມສະເໝີພາບດ້ານການສຶກສາ, ຕອບສະໜອງຄວາມມຸ່ງມາດປາດຖະໜາຂອງຊົນເຜົ່າສ່ວນໜ້ອຍ. ໃນໄລຍະປີ 2016-2020 ມີຊາວເຜົ່າສ່ວນໜ້ອຍຫຼາຍກວ່າ 8.000.000 ຄົນ ໄດ້ຮັບການຊ່ວຍເຫຼືອດ້ານການຝຶກອາຊີບ, ໃນນັ້ນມີ 412.000 ຄົນຢູ່ຊົນນະບົດ; ຄົນງານໃນບັນດາເມືອງທຸກຍາກຫຼາຍກວ່າ 4.620 ຄົນ ໄດ້ຮັບການສະໜັບສະໜູນໃຫ້ໄປເຮັດວຽກຢູ່ຕ່າງປະເທດ.
ວຽກງານອະນຸລັກ ແລະ ເສີມຂະຫຍາຍຄຸນຄ່າວັດທະນະທຳພື້ນເມືອງ ຂອງຊາວເຜົ່າສ່ວນໜ້ອຍ ໄດ້ຮັບຜົນດີທີ່ແນ່ນອນ, ຊີວິດທາງວັດທະນະທຳຂອງປະຊາຊົນໄດ້ຮັບການພັດທະນາ ແລະປັບປຸງຢ່າງເຫັນໄດ້ຊັດ; ສະຖາບັນທາງວັດທະນະທຳໄດ້ຮັບການເພີ່ມທະວີ; ການເຄື່ອນໄຫວທາງວັດທະນະທຳ ແລະກິດຈະກຳທາງວັດທະນະທຳ ໄດ້ຮັບການຈັດຕັ້ງທຸກປີ. ໂຄງການວິທະຍຸແລະໂທລະພາບ ແລະ ໂຄງການນໍາເອົາຂໍ້ມູນໄປສູ່ຮາກຖານ ໄດ້ຮັບຄວາມເອົາໃຈໃສ່ປະຕິບັດ. ປະຈຸບັນ, ມີ 67 ສະຖານີວິທະຍຸແລະໂທລະພາບ ຕັ້ງແຕ່ລະດັບສູນກາງຮອດທ້ອງຖິ່ນ ກວມເອົາພື້ນທີ່ທີ່ມີຊາວຊົນເຜົ່າສ່ວນໜ້ອຍຈຳນວນຫຼວງຫຼາຍ, ໄດ້ອອກອາກາດ 22 ພາສາຂອງຊົນເຜົ່າສ່ວນໜ້ອຍ. ນອກຈາກນີ້, ຍັງມີໜັງສືພິມຫຼາຍກວ່າ 100 ສະບັບ ທີ່ແຈກຢາຍຜ່ານຫ້ອງການໄປສະນີວັດທະນະທໍາຕາແສງ 16.000 ກວ່າແຫ່ງ ແລະ ໜ້າຂໍ້ມູນເອເລັກໂຕຣນິກຫຼາຍກວ່າ 200 ໜ້າ ທີ່ເຜີຍແຜ່ແລະໂຄສະນາກ່ຽວກັບແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ໄປສູ່ພື້ນທີ່ທີ່ມີຊາວຊົນເຜົ່າສ່ວນໜ້ອຍຈໍານວນຫຼາຍ.
ດ້ານສາທາລະນະສຸກແລະການເບິ່ງແຍງດູແລສຸຂະພາບຂອງປະຊາຊົນ ກໍ່ໄດ້ຮັບຄວາມເອົາໃຈໃສ່ລົງທຶນ ດັ່ງນັ້ນ ເຄືອຂ່າຍທາງການແພດຈຶ່ງສົມບູບແບບຫຼາຍຂຶ້ນ. ເຖິງດຽວນີ້ 98,4% ຂອງຕາແສງ ມີສະຖານີການແພດ, ໃນນັ້ນ, 90% ຂອງຕາແສງ ມີທ່ານໝໍ; 76% ຂອງຕາແສງ ບັນລຸມາດຕະຖານສຸຂະພາບແຫ່ງຊາດ; 96% ຂອງບ້ານ ໝູ່ບ້ານ ມີພະນັກງານທາງການແພດ. ເຖິງປີ 2018, ມີຜູ້ໄດ້ຮັບບັດປະກັນສຸຂະພາບ 6,6 ລ້ານຄົນ, ບັນລຸ 93,51%. ໂດຍພື້ນຖານແລ້ວ, ປະຊາຊົນຊົນເຜົ່າສ່ວນໜ້ອຍສາມາດເຂົ້າເຖິງບໍລິການດ້ານສາທາລະນະສຸກໃນທຸກລະດັບ.
ວຽກງານການສ້າງລະບົບການເມືອງຢູ່ຮາກຖານໃນເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ ໄດ້ຮັບຄວາມເອົາໃຈໃສ່ເປັນປະຈຳ, ຖັນແຖວພະນັກງານຊົນເຜົ່າສ່ວນໜ້ອຍມີປະລິມານແລະຄຸນນະພາບເພີ່ມຂຶ້ນທຸກວັນ. ມາເຖິງປະຈຸບັນ, ມີພະນັກງານຊົນເຜົ່າສ່ວນໜ້ອຍ 68.781 ຄົນ, ກວມເອົາ 11,68% ຂອງຈຳນວນພະນັກງານທັງໝົດໃນທົ່ວປະເທດ. ຢູ່ບັນດາແຂວງແລະນະຄອນຂຶ້ນກັບສູນກາງ ມີພະນັກງານ ລັດຖະກອນ ພາລະກອນທີ່ເປັນຄົນຊົນເຜົ່າສ່ວນໜ້ອຍຈຳນວນ 162.120 ຄົນ, ກວມເອົາ 14,53%, (ແມ່ຍິງກວມເອົາ 49,2%). ໃນຈຳນວນນີ້, ມີຜູ້ດຳລົງຕຳແໜ່ງຜູ້ນຳ, ຜູ້ຄຸ້ມຄອງ 10.398 ຄົນ, ກວມເອົາ 17,2%. ຄຽງຄູ່ກັບປະລິດມານ, ຄຸນນະພາບຂອງຖັນແຖວພະນັກງານຊົນເຜົ່າສ່ວນໜ້ອຍກໍ່ໄດ້ຮັບການປັບປຸງຍົກສູງ, ມີພະນັກງານຫຼາຍໝື່ນຄົນຍັງໄດ້ຮັບການຝຶກອົບຮົມ ແລະ ບຳລຸງສ້າງທາງດ້ານອາຊີບ, ວິຊາສະເພາະ, ຄວາມຮູ້ກ່ຽວກັບການຄຸ້ມຄອງບໍລິຫານລັດ ແລະ ກ່ຽວກັບເຕັກໂນໂລຊີຂໍ້ມູນຂ່າວສານ. ຖັນແຖວພະນັກງານຊົນເຜົ່າສ່ວນໜ້ອຍນັບມື້ນັບໜຸ່ມແໜ້ນ, ມີຄຸນວຸດທິວິຊາຊີບ, ມີຄວາມຫຼາກຫຼາຍໃນດ້ານອົງປະກອບຊົນເຜົ່າ.
ຢ່າງໃດກໍ່ຕາມ, ຄຽງຂ້າງບັນດາໝາກຜົນທີ່ບັນລຸໄດ້, ການລະດົມ ຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນເພື່ອການລົງທຶນພັດທະນາເສດຖະກິດ-ສັງຄົມ ແລະວັດທະນະທຳ ຢູ່ບັນດາເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ ຍັງປະສົບກັບຄວາມຫຍຸ້ງຍາກຫຼາຍຢ່າງ ແລະ ມີຂໍ້ຈຳກັດບາງຢ່າງເຊັ່ນ: ລະບົບນະໂຍບາຍດ້ານຊົນເຜົ່າມີຈຳນວນຫຼາຍ ແຕ່ຍັງຢັ່ງຢາຍ, ກະແຈກກະຈາຍ, ຂາດຄວາມຄົບຊຸດ. ໃນນັ້ນ, ບາງນະໂຍບາຍມີເປົ້າໝາຍໃຫຍ່, ແຕ່ເວລາດຳເນີນການນັ້ນສັ້ນ ແລະ ມັກເຊື່ອມໂຍງກັບວາລະການດຳລົງຕຳແໜ່ງ ດັ່ງນັ້ນຈຶ່ງເຮັດໃຫ້ເກີດຄວາມຫຍຸ້ງຍາກໃນການລະດົມ, ການຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນ. ຄຽງຂ້າງນັ້ນ, ດ້ວຍວັດຖຸກຳແລະພື້ນທີ່ດຽວກັນ ແຕ່ຫຼາຍນະໂຍບາຍມີເນື້ອໃນຊ້ອນກັນ ເຊັ່ນ: ການລົງທຶນກໍ່ສ້າງເສັ້ນທາງ ຫຼືນະໂຍບາຍເພື່ອສະໜັບສະໜູນການພັດທະນາການຜະລິດ, ສ້າງວຽກເຮັດງານທຳ, ສະໜັບສະໜູນທີ່ດິນການຜະລິດ, ທີ່ຢູ່ອາໄສ, ນ້ຳປະປາ... ນອກຈາກນັ້ນ, ເນື້ອໃນນະໂຍບາຍບາງປະການບໍ່ແທດເໝາະກັບລັກສະນະສະເພາະຂອງພາກພື້ນແລະວັດທະນະທຳ, ດັ່ງນັ້ນ ຈຶ່ງບໍ່ໄດ້ສົ່ງເສີມກຳລັງແຮງພາຍໃນຂອງທ້ອງຖິ່ນ ແລະ ປະຊາຊົນ. ບັນດາໂຄງການ ແຜນງານ ນະໂຍບາຍດ້ານຊົນເຜົ່າ ແລະ ນະໂຍບາຍການຫຼຸດຜ່ອນຄວາມທຸກຍາກ ມັກມີຂະໜາດນ້ອຍ ແລະມີປະມານບໍ່ຫຼາຍ, ແຕ່ຂັ້ນຕອນການບໍລິຫານດ້ານການລົງທຶນ ແລະ ການຊໍາລະຍັງສັບສົນ.ບາງນະໂຍບາຍມີທັງເນື້ອໃນການລົງທຶນດ້ານໂຄງສ້າງພື້ນຖານ ແລະ ເນື້ອໃນກ່ຽວກັບຊີວິດການເປັນຢູ່ ແລະຄວາມປອດໄພທາງສັງຄົມ, ແຕ່ຂາດກົນໄກການຈັດສັນຊັບພະຍາກອນ ເພື່ອດຳເນີນການລົງທຶນຈາກລັດ ແລະ ບັນດາແຫຼ່ງເງິນທຶນທີ່ລະດົມພ້ອມກັນ. ສະພາບການໂລກໃນຊຸມປີທີ່ຜ່ານມາມີຄວາມຜັນຜວນ ສັບສົນ ແລະຄາດເດົາບໍ່ໄດ້, ນອກຈາກນັ້ນ ການແຜ່ລະບາດໃຫຍ່ຂອງພະຍາດໂຄວິດ-19 ກໍ່ໄດ້ສົ່ງຜົນສະທົບເຖິງການລະດົມແຫຼ່ງເງິນທຶນ. ດັ່ງນັ້ນ, ການລະດົມ ຈັດແບ່ງ ນຳໃຊ້ ແລະຄຸ້ມຄອງຊັບພະຍາກອນ ເພື່ອການລົງທຶນໃນເຂດທີ່ມີຊາວຊົນເຜົ່າສ່ວນໜ້ອຍຈຳນວນຫຼາຍ, ໂດຍສະເພາະ “ເຂດຕາເວັນຕົກສຽງເໜືອ, ເຂດພູພຽງພາກກາງ, ເຂດຕາເວັນຕົກພາກໃຕ້, ເຂດຕາເວັນຕົກຊາຍຝັ່ງພາກກາງ ທີ່ຍັງບໍ່ທັນໄດ້ຕາມຄວາມປະສົງ. ເມື່ອທຽບກັບລະດັບທົ່ວໄປຂອງທັງປະເທດແລ້ວ ຊີວິດຂອງຊາວເຜົ່າສ່ວນໜ້ອຍຍັງຢູ່ໃນລະດັບທີ່ຍາກທີ່ສຸດ”(10).
ບັນດາຄວາມຫຍຸ້ງຍາກແລະຂໍ້ຈຳກັດຂ້າງເທິງເກີດຈາກຫຼາຍສາເຫດ, ລວມທັງສາເຫດພາວະວິໄສ ແລະ ອັດຕະວິໄສ:
ທີໜຶ່ງ, ເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ ມີພູມປະເທດກັນດານແລະກະຈັດກະຈາຍ ເຮັດໃຫ້ການຄົມມະນາຄົມມີຄວາມຫຍຸ້ງຍາກທີ່ສຸດ. ນອກຈາກນີ້, ສະພາບອາກາດຍັງຮຸນແຮງ; ໄພທຳມະຊາດ, ໄພນ້ຳຖ້ວມ, ນ້ຳຖ້ວມກະທັນຫັນ, ນ້ຳເຄັມລ່ວງລ້ຳ...ເກີດຂຶ້ນເລື້ອຍໆ.
ທີສອງ, ຈຸດເລິ່ມຕົ້ນຂອງເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ ຍັງຢູ່ໃນລະດັບຕ່ຳ. ອັດຕາຄອບຄົວທີ່ທຸກຍາກ, ໃກ້ຈະທຸກຍາກ, ທຸກຍາກອີກຄັ້ງ ຍັງສູງແລະມີທ່າອ່ຽງສູງຂຶ້ນຢ່າງຈະແຈ້ງ, “ອັດຕາຄອບຄົວທີ່ທຸກຍາກໃນບັນດາກຸ່ມຊົນເຜົ່າກໍ່ມີຄວາມແຕກຕ່າງກັນຫຼາຍ, ຍັງມີຫຼາຍຊົນເຜົ່າທີ່ມີອັດຕາຄົວເຮືອນທຸກຍາກສູງກວ່າ 40% ເຊິ່ງສູງກວ່າຄ່າສະເລ່ຍຂອງປະເທດເຖິງ 8 ເທົ່າ”(11). ຕາມມະຕິຂອງນາຍົກລັດຖະມົນຕີໝາຍເລກ 353/QĐ-TTg ລົງວັນທີ 15 ມີນາ 2022 ກ່ຽວກັບ “ການອະນຸມັດລາຍຊື່ເມືອງທີ່ທຸກຍາກ ແລະ ຕາແສງທີ່ທຸກຍາກພິເສດ ໃນເຂດຊາຍຝັ່ງທະເລແລະເກາະ ໃນໄລຍະປີ 2021-2025”, ປະຈຸບັນ, ໃນເຂດຊົນເຜົ່າສ່ວນໜ້ອຍຍັງມີ 74 ເມືອງທຸກຍາກ.
ທີສາມ, ຄະນະພັກ ແລະ ອຳນາດການປົກຄອງທ້ອງຖິ່ນຈຳນວນໜຶ່ງ ຍັງບໍ່ມີຄວາມເຂົ້າໃຈກ່ຽວກັບວຽກງານຊົນເຜົ່າຢ່າງຄົບຖ້ວນ, ດັ່ງນັ້ນ, ໃນຂະບວນການນຳພາ, ຊີ້ນຳການລະດົມຊັບພະຍາກອນການລົງທຶນເພື່ອພັດທະນາເສດຖະກິດ ສັງຄົມ ແລະ ວັດທະນະທຳ ຈຶ່ງຍັງບໍ່ທັນມີການດຳເນີນຢ່າງຂັນແຂງ; ການປະສານງານລະຫວ່າງຂັ້ນ ແລະ ຂະແໜງການຍັງຊັກຊ້າ, ບໍ່ແໜ້ນແຟ້ນ ແລະ ເປັນເອກະພາບ.
ທີສີ່, ຄຸນນະພາບຂອງຊັບພະຍາກອນມະນຸດຍັງຕໍ່າ; ຖັນແຖວພະນັກງານທີ່ເຮັດວຽກງານຊົນເຜົ່າ ໂດຍສະເພາະຂັ້ນຮາກຖານ ຍັງບໍ່ໄດ້ຮັບການຝຶກອົບຮົມ ແລະ ບໍາລຸງສ້າງຢ່າງຄົບຖ້ວນ, ຍັງອ່ອນແອທາງດ້ານວິຊາສະເພາະ, ຄຸນສົມບັດ ແລະ ປະສົບການໃນການຄຸ້ມຄອງໂຄງການ ແລະ ນະໂຍບາຍຊົນເຜົ່າ.
ທີຫ້າ, ບໍ່ເອົາໃຈໃສ່ຢ່າງພຽງພໍເຖິງການເຊີດຊູຄວາມສາມາດບົ່ມຊ້ອນ, ທ່າໄດ້ປຽບ, ວັດທະນະທຳຂອງແຕ່ລະພາກພື້ນ ແລະ ແຕ່ລະຊົນເຜົ່າ; ການເຊື່ອມຕໍ່ລະຫວ່າງຊົນເຜົ່າສ່ວນໜ້ອຍ ແລະ ເຂດພູດອຍ ກັບເຂດພັດທະນາ ຍັງບໍ່ທັນໄດ້ຮັບການຊຸກຍູ້; ບາງນະໂຍບາຍບໍ່ໄດ້ສ້າງແຮງຈູງໃຈໃຫ້ຊົນເຜົ່າສ່ວນໜ້ອຍບືນຕົວຂຶ້ນ ແລະເປັນເຈົ້າຕົນເອງໃນຊີວິດ.
ວິທີແກ້ໄຂກ່ຽວກັບການລະດົມ ຈັດແບ່ງ ນຳໃຊ້ ແລະ ຄຸ້ມຄອງຊັບພະຍາກອນຢ່າງມີປະສິດທິຜົນ
ເພື່ອລົງທຶນພັດທະນາເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ
ເພື່ອເສີມຂະຫຍາຍຄວາມສຳເລັດ, ປະຕິບັດຕາມແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ກ່ຽວກັບວຽກງານຊົນເຜົ່າ, ພ້ອມກັນນັ້ນກໍແກ້ໄຂຜ່ານຜ່າຄວາມຫຍຸ້ງຍາກແລະສິ່ງທ້າທາຍ, ສ້າງຄວາມກ້າວໜ້າໃນການລະດົມ ຈັດແບ່ງ ນຳໃຊ້ ແລະຄຸ້ມຄອງຊັບພະຍາກອນ ເພື່ອລົງທຶນພັດທະນາ ໃນເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ ໃນໄລຍະຈະມາເຖິງ ຈຳເປັນຕ້ອງປະຕິບັດໜ້າທີ່ ແລະວິທີແກ້ໄຂຕໍ່ໄປນີ້ໃຫ້ດີແລະພ້ອມກັນ:
ທີໜຶ່ງ, ປະຕິບັດແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ກ່ຽວກັບການນຳໃຊ້ ແລະຄຸ້ມຄອງຊັບພະຍາກອນ ເພື່ອການພັດທະນາເຂດຊົນເຜົ່າສ່ວນໜ້ອຍຢ່າງມີປະສິດທິພາບ. ສ້າງຄວາມສົມດຸນແລະຈັດສັນຊັບພະຍາກອນໃຫ້ພຽງພໍ ເພື່ອປະຕິບັດນະໂຍບາຍການລົງທຶນພັດທະນາເສດຖະກິດ-ສັງຄົມ ຢູ່ບັນດາເຂດຊົນເຜົ່າສ່ນໜ້ອຍ, ຮັບປະກັນຈຸດໝາຍ ແລະ ຈຸດສຳຄັນ. ຍູ້ແຮງ “ການສ້າງຄວາມຫຼາກຫຼາຍຂອງຊັບພະຍາກອນ, ໃນນັ້ນງົບປະມານຂອງລັດມີຄວາມສຳຄັນແລະເດັດຂາດ, ໃຫ້ບຸລິມະສິດການຈັດແບ່ງທຶນຊ່ວຍເຫຼືອການພັດທະນາຢ່າງເປັນທາງການ (ODA) ໃນການປະຕິບັດໂຄງການ; ລະດົມແລະສົ່ງເສີມການເຂົ້າຮ່ວມ ແລະການປະກອບສ່ວນຂອງວິສາຫະກິດ, ອົງການຈັດຕັ້ງ ແລະ ບຸກຄົນ”(12).
ທີສອງ, ບຸລິມະສິດຊັບພະຍາກອນໃນການລົງທຶນເພື່ອສ້າງໂຄງສ້າງພື້ນຖານທີ່ແຂງແກ່ນ. ຍູ້ແຮງການກໍ່ສ້າງໂຄງສ້າງພື້ນນຖານທີ່ຄົບຊຸດ, ໂດຍສະເພາະ ໂຄງສ້າງພື້ນຖານດ້ານການຄົມມະນາຄົມ ເພື່ອສ້າງການເຊື່ອມຕໍ່ພາກພື້ນ ເພື່ອດຶງດູດການລົງທຶນພັດທະນາເຂດຊົນເຜົ່າສ່ວນໜ້ອຍ. ເພື່ອໃຫ້ບັນຫານີ້ສຳເລັດ, ນອກຈາກເສັ້ນທາງດ່ວນ ແລະເສັ້ນທາງຄົມມະນາຄົມສຳຄັນທີ່ເຊື່ອມຕໍ່ບັນດາເຂດທີ່ລັດລົງທຶນແລ້ວ, ບັນດາແຂວງທີ່ມີຊາວເຜົ່າສ່ວນໜ້ອຍຈຳນວນຫຼາຍ ຈຳເປັນຕ້ອງສຸມໃສ່ກໍ່ສ້າງລະບົບຄົມມະນາຄົມພາຍໃນ, ໂດຍສະເພາະ ເສັ້ນທາງລະຫວ່າງເມືອງ ແລະລະຫວ່າງຕາແສງ. ໃນນັ້ນ, ຕ້ອງບຸລິມະສິດຊັບພະຍາກອນໃນການລົງທຶນກໍ່ສ້າງໂຄງສ້າງພື້ນຖານທີ່ແຂງແກ່ນ ເພື່ອຮັບປະກັນເຖິງປີ 2025 ຕາແສງ 100% ຈະມີທາງປູຢາງຫຼືຄອນກຣີດ ເຂົ້າສູ່ສູນກາງຕາແສງ; 70% ຂອງໝູ່ບ້ານມີເສັ້ນທາງທີ່ແຂງແກ່ນໄປເຖິງໃຈກາງ...; ຮອດປີ 2030, ກວ່າ 85% ຂອງຕາແສງ, ໝູ່ບ້ານທີ່ມີຊາວເຜົ່າສ່ວນໜ້ອຍຈຳນວນຫຼາຍ ຈະມີໂຄງສ້າງພື້ນຖານພຽງພໍທີ່ຈະຕອບສະໜອງຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ຂອງປະຊາຊົນ. ການລົງທຶນກໍ່ສ້າງໂຄງສ້າງພື້ນຖານດ້ານຄົມມະນາຄົມທີ່ຄົບຊຸດ ເຊິ່ງບໍ່ພຽງດຶງດູດຊັບພະຍາກອນການລົງທຶນເພື່ອການພັດທະນາເສດຖະກິດ ສັງຄົມ ແລະວັດທະນະທຳເທົ່ານັ້ນ ແຕ່ຍັງປະກອບສ່ວນປັບປຸງຍົກສູງຄວາມສາມາດໃນການປັບຕົວຕໍ່ການປ່ຽນແປງສະພາບດິນຟ້າອາກາດ ແລະ ການປ້ອງກັນແລະຕໍ່ສູ້ກັບໄພທຳມະຊາດ ເຊັ່ນ: ໄພນ້ຳຖ້ວມ ໄພນ້ຳຖ້ວມກະທັນຫັນ ໄພແຫ້ງແລ້ງ ແລະ ລະດັບນ້ຳທະເລສູງຂຶ້ນ,...
ທີສາມ, ໃຊ້ອັດຕາສ່ວນເງິນລົງທຶນຕາມງົບປະມານທີ່ເໝາະສົມ ສຳລັບການຝຶກອົບຮົມອາຊີບ, ການຝຶກອົບຮົມຄວາມຮູ້ດ້ານວິທະຍາສາດການຄຸ້ມຄອງບໍລິຫານຕາມໂຄງການແລະແຜນງານທີ່ເໝາະສົມກັບເຂດເສດຖະກິດ-ສັງຄົມ. ປ່ຽນແປງໃໝ່ວຽກງານການຈັດຕັ້ງ ແລະ ກາປັບປຸງຍົກສູງຄຸນນະພາບຂອງຖັນແຖວພະນັກງານທີ່ເຮັດວຽກງານຊົນເຜົ່າຢ່າງແຂງແຮງ ຕັ້ງແຕ່ສູນກາງຈົນເຖິງຮາກຖານ, ໃນນັ້ນ, ຕ້ອງຍູ້ແຮງວຽກງານຝຶກອົບຮົມ ຝຶກອົບຮົມໃໝ່ ແລະ ຝຶກອົບຮົມຄືນໃໝ່. ເພື່ອດຳເນີນການແກ້ໄຂບັນຫານີ້ໄດ້ດີ ວຽກງານທີ່ຮີບດ່ວນແມ່ນ ລົງທຶນກໍ່ສ້າງພື້ນຖານວັດຖຸ ແລະ ປັບປຸງຍົກສູງຄວາມສາມາດການຝຶກອົບຮົມໃນລະບົບໂຮງຮຽນກິນນອນຊົນເຜົ່າ, ບັນດາໂຮງຮຽນກຽມມະຫາວິທະຍາໄລຊົນເຜົ່າພິເສດ ແລະ ມະຫາວິທະຍາໄລບາງແຫ່ງເຊັ່ນ: ສະຖາບັນຊົນເຜົ່າ, ມະຫາວິທະຍາໄລເຂດພູແລະເນີນສູງພາກເໜືອ, ມະຫາວິທະຍາໄລເຂດເນີນສູງພາກກາງ, ມະຫາວິທະຍາໄລເຂດຕາເວັນຕົກຊາຍຝັ່ງພາກກາງ, ມະຫາວິທະຍາໄລເຂດຕາເວັນຕົກພາກໃຕ້. ໃຊ້ເງິນລົງທຶນຈາກງົບປະມານໃນອັດຕາສ່ວນທີ່ເໝາະສົມ ເພື່ອການຝຶກອົບຮົມວິຊາຊີບ ປັບປຸງຄວາມຮູ້ ແລະ ປະສົບການທາງທຸລະກິດໃນພາກກະສິກຳອຸດສາຫະກຳ ແລະບໍລິການ. ໃຫ້ບຸລິມະສິດໃນການຝຶກອົບຮົມເພື່ອປັບປຸງຄຸນສົມບັດທາງປັນຍາ ແລະ ວິຊາຊີບໃຫ້ແກ່ຊາວເຜົ່າສ່ວນໜ້ອຍໃນໄວເຮັດວຽກ.
ທີສີ່, ເສີມຂະຫຍາຍຊັບພະຍາກອນການລົງທຶນເພື່ອການພັດທະນາໃນດ້ານການສຶກສາແລະວັດທະນະທຳຢ່າງມີປະສິດທິພາບ, ລວມທັງການໃຊ້ຈ່າຍງົບປະມານຂອງລັດໃນດ້ານວັດທະນະທຳ; ຍູ້ແຮງການຮ່ວມມືລະຫວ່າງພາກລັດແລະເອກະຊົນ, ການສ້າງກົນໄກພິເສດ, ການຍົກເວັ້ນ ຫຼຸດຜ່ອນພາສີແລະຄ່າທຳນຽມ ທີ່ສອດຄ່ອງກັບຄວາມເປັນຈິງ ເພື່ອດຶງດູດຊັບພະຍາກອນ. ນອກຈາກນີ້, ຈຳເປັນຕ້ອງ “ເສີມຂະຫຍາຍຂໍ້ໄດ້ປຽບຂອງຊັບພະຍາກອນປ່າໄມ້, ແຮ່ທາດ, ດ່ານຊາຍແດນ, ວັດທະນະທຳຊົນເຜົ່າທີ່ມີເອກະລັກ ຫຼາກຫຼາຍ ແລະ ທ່າແຮງພັດທະນາການທ່ອງທ່ຽວ ແລະ ການບໍລິການ...”(13). ພ້ອມກັນນັ້ນ, ການພັດທະນາຊັບພະຍາກອນມະນຸດ, ການຮັກສາສະຖຽນລະພາບຂອງປະຊາກອນ, ໃຫ້ບຸລິມະສິດການອະນຸລັກແລະຟື້ນຟູຄຸນຄ່າທາງວັດທະນະທຳດັ້ງເດີມ ແລະເອກະລັກຂອງບັນດາເຜົ່າ. ໃຫ້ບຸລິມະສິດບັນດາໂຄງການ, ແຜນງານເພື່ອການພັດທະນາເສດຖະກິດ-ສັງຄົມ ຢູ່ບັນດາເຂດທີ່ມີຊາວເຜົ່າສ່ວນໜ້ອຍຈຳນວນຫຼາຍ ເຊິ່ງມີເງື່ອນໄຂທີ່ຫຍຸ້ງຍາກພິເສດ. ເອົາໃຈໃສ່ການລົງທຶນແລະໃຊ້ປະໂຫຍດຈາກຄຸນຄ່າທາງວັດທະນະທຳດັ້ງເດີມຂອງບັນດາຊົນເຜົ່າສ່ວນໜ້ອຍ ຕິດພັນກັບການພັດທະນາການທ່ອງທ່ຽວ ແລະບໍລິການ ເພື່ອສ້າງວຽກເຮັດງານທຳ ແລະເພີ່ມລາຍໄດ້ໃຫ້ກັບຊາວເຜົ່າສ່ວນໜ້ອຍ.
ທີຫ້າ, ຍູ້ແຮງການປະຕິຮູບການບໍລິຫານ, ສ້າງສະພາບແວດລ້ອມທີ່ເອື້ອອຳນວຍເພື່ອດຶງດູດຊັບພະຍາກອນການລົງທຶນ. ເສີມຂະຫຍາຍບົດບາດຂອງການຕິດຕາມກວດກາປະຊາທິປະໄຕຢູ່ຮາກຖານຢ່າງມີປະສິດທິພາບ ຜ່ານຄວາມຄິດເຫັນຂອງປະຊາຊົນຕາມທິດນຳ “ປະຊາຊົນຮູ້ ປະຊາຊົນປຶກສາຫາລື ປະຊາຊົນເຮັດ ປະຊາຊົນກວດກາ ປະຊາຊົນຕິດຕາມກວດກາ ແລະ ປະຊາຊົນຊົມໃຊ້” ຜ່ານການເຄື່ອນໄຫວຂອງແນວໂຮມປະເທດຊາດຫວຽດນາມ ແລະ ບັນດາອົງຄະນະມະຫາຊົນ.
ທີຫົກ, ເພີ່ມທະວີແລະຂະຫຍາຍການພົວພັນຮ່ວມມືກັບບັນດາປະເທດ, ອົງການຂອງລັດ ແລະ ອົງການພັດທະນາເອກະຊົນ ຜ່ານຊ່ອງທາງການທູດຂອງພັກ, ລັດ ແລະການຕ່າງປະເທດປະຊາຊົນ ເພື່ອດຶງດູດຊັບພະຍາກອນການລົງທຶນ; ການຖ່າຍທອດວິທະຍາສາດແລະເຕັກໂນໂລຊີ ເພື່ອໂຄງການແລະແຜນງານການພັດທະນາເສດຖະກິດແລະສັງຄົມໃນເຂດທີ່ມີຊາວເຜົ່າສ່ວນໜ້ອຍຈຳນວນຫຼາ. ໃນນັ້ນ, ຈຳເປັນຕ້ອງສືບຕໍ່ປະຕິບັດບັນດາໜ້າທີ່ກ່ຽວກັບການປະຕິບັດກົນໄກ ນະໂຍບາຍ ແລະ ວິທີແກ້ບັນຫາທີ່ລະບຸໄວ້ໃນມະຕິຕົກລົງຂອງນາຍົກລັດຖະມົນຕີໝາຍເລກ 2152/QĐ-TTg ລົງວັນທີ 18 ທັນວາ 2020 ວ່າດ້ວຍ “ການອະນຸມັດໂຄງການຂະຫຍາຍເວລາດຳເນີນການ ຂອງມະຕິຕົກລົງຂອງນາຍົກລັດຖະມົນຕີໝາຍເລກ 2214/QĐ-TTg ລົງວັນທີ 14 ພະຈິກ 2013 ກ່ຽວກັບການອະນຸມັດໂຄງການ “ເພີ່ມທະວີການຮ່ວມມືສາກົນເພື່ອສະໜັບສະໜູນການພັດທະນາເສດຖະກິດ ແລະສັງຄົມ ໃນເຂດຊົນເຜົ່າສ່ວນໜ້ອຍ” ເຖິງປີ 2025”./.
--------------------------
(1) ຫ້ອງການສູນກາງພັກ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII, ຮ່າໂນ້ຍ, 2016, ໜ້າ 164
(2) ບົດສະຫຼຸບຂອງກົມການເມືອງສູນກາງພັກໝາຍເລກ 65-KL/TW ລົງວັນທີ 30 ຕຸລາ 2019 “ວ່າດ້ວຍການສືບຕໍ່ປະຕິບັດມະຕິເລກທີ 24-NQ/TW ຂອງຄະນະບໍລິຫານງານສູນກາງພັກສະໄໝທີ IX ກ່ຽວກັບວຽກງານຊົນເຜົ່າໃນສະພາບການໃໝ່”.
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 170.
(4), (5), (6) ເບິ່ງ: ລາຍງານຂອງຄະນະກຳມະການຊົນເຜົ່າສະບັບເລກທີ 855/BC-UBDT ລົງວັນທີ 3 ມິຖຸນາ 2022: ສະຫຼຸບສັງລວມ 10 ປີແຫ່ງການປະຕິບັດດຳລັດສະບັບເລກທີ 05/2011/NĐ-CP ຂອງລັດຖະບານກ່ຽວກັບວຽກງານຊົນເຜົ່າ.
(7) ເບິ່ງ: ລາຍງານຂອງຄະນະກຳມະການຊົນເຜົ່າສະບັບເລກທີ 732/BC-UBDT ລົງວັນທີ 10 ມິຖຸນາ 2021: ສະຫຼຸບສັງລວມຍຸດທະສາດວຽກງານຊົນເຜົ່າເຖິງປີ 2020.
(8), (9) ເບິ່ງ: ລາຍງານຂອງຄະນະກຳມະການຊົນເຜົ່າສະບັບເລກທີ 855/BC-UBDT ລົງວັນທີ 3 ມິຖຸນາ 2022: ສະຫຼຸບສັງລວມ 10 ປີແຫ່ງການປະຕິບັດດຳລັດສະບັບເລກທີ 05/2011/NĐ-CP ຂອງລັດຖະບານກ່ຽວກັບວຽກງານຊົນເຜົ່າ.
(10) ບົດສະຫຼຸບຂອງກົມການເມືອງສູນກາງພັກໝາຍເລກ 65-KL/TW ລົງວັນທີ 30 ຕຸລາ 2019 “ວ່າດ້ວຍການສືບຕໍ່ປະຕິບັດມະຕິເລກທີ 24-NQ/TW ຂອງຄະນະບໍລິຫານງານສູນກາງພັກສະໄໝທີ IX ກ່ຽວກັບວຽກງານຊົນເຜົ່າໃນສະພາບການໃໝ່”.
(11) ເບິ່ງ: ລາຍງານຂອງຄະນະກຳມະການຊົນເຜົ່າສະບັບເລກທີ 732/BC-UBDT, ລົງວັນທີ 10 ມິຖຸນາ 2021: ສະຫຼຸບສັງລວມຍຸດທະສາດວຽກງານຊົນເຜົ່າເຖິງປີ 2020.
(12) ມະຕິສະບັບທີ 120/2020/QH14 ລົງວັນທີ 19 ມິຖຸນາ 2020, ຂອງສະພາແຫ່ງຊາດຊຸດທີ XIV, ວ່າດ້ວຍ “ການອະນຸມັດແຜນນະໂຍບາຍການລົງທຶນໂຄງການເປົ້າໝາຍແຫ່ງຊາດ ເພື່ອການພັດທະນາເສດຖະກິດແລະສັງຄົມ ໃນເຂດຊົນເຜົ່າສ່ວນໜ້ອຍແລະພູດອຍ ໃນໄລຍະປີ 2021-2030
(13) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 253
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1026 (ເດືອນພະຈິກ 2023)