ໃນລະບົບທັດສະນະຊີ້ນຳການກໍ່ສ້າງແລະປົກປັກຮັກສາປະເທດຊາດຫວຽດນາມສັງຄົມນິຍົມຢ່າງໝັ້ນຄົງນັ້ນ, ພ້ອມກັນກັບການສືບຕໍ່ຢືນຢັນ ການຍຶດໝັ້ນແລະການໝູນໃຊ້ ພັດທະນາ ລັດທິມາກ-ເລນິນ, ແນວຄິດໂຮ່ຈີມິນ ຢ່າງປະດິດສ້າງ; ການຍຶດໝັ້ນເປົ້າໝາຍເອກະລາດແຫ່ງຊາດ ແລະລັດທິສັງຄົມນິຍົມ; ການຍຶດໝັ້ນແນວທາງການປ່ຽນແປງໃໝ່ຂອງພັກ, ກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມເນັ້ນໜັກວ່າ ຕ້ອງ “ຍຶດໝັ້ນບັນດາຫຼັກກການກໍ່ສ້າງພັກ”⁽¹⁾.

ຕາມທິດສະດີ, ຫຼັກການແມ່ນບັນຫາສໍາຄັນສໍາລັບອົງການຈັດຕັ້ງ, ການປະຕິບັດຕາມຫຼັກການຈະເຮັດໃຫ້ອົງການຈັດຕັ້ງເຂັ້ມແຂງ, ການລະຖິ້ມ ຫຼືບໍ່ປະຕິບັດຕາມຫຼັກການຢ່າງຈິງຈັງ ຈະນຳໄປສູ່ຄວາມຊຸດໂຊມ, ສູນເສຍຄວາມເຂັ້ມແຂງ, ແລະອາດຈະປະເຊີນກັບຄວາມສ່ຽງໃນການລົ້ມສະຫຼາຍຂອງອົງການຈັດຕັ້ງ. ຈົນເຖິງກ່ອນກອງປະຊຸມໃຫຍ່ຄັ້ງທີ VII ຂອງພັກ (ປີ 1991), ພັກກອມມູນິດຫວຽດນາມຢືນຢັນວ່າ ໃນພັກມີສາມຫຼັກການຄື: ຫຼັກການລວມສູນປະຊາທິປະໄຕ, ຫຼັກການຕິຊົມຕົນເອງແລະຕິຊົມ, ຫຼັກການສາມັກຄີເປັນເອກະພາບ. ກອງປະຊຸມໃຫຍ່ຄັ້ງທີ VII ຂອງພັກໄດ້ເພີ່ມເຕີມສອງຫຼັກການອີກຄື: ພັກ​ຕິດ​ພັນ​ກັບ​ປະ​ຊາ​ຊົນ​ຢ່າງ​ສະ​ໜິດ​ແໜ້ນ ແລະ ພັກ​ດຳ​ເນີນ​ງານພາຍໃຕ້​ຂອບ​ລັດ​ຖະ​ທຳ​ມະ​ນູນ ແລະ ກົດ​ໝາຍ. ກົດລະບຽບຂອງພັກທີ່ຜ່ານໂດຍກອງ​ປະຊຸມ​ໃຫຍ່​ຄັ້ງ​ທີ XI ຢືນຢັນວ່າ: “ເອົາການລວມສູນປະຊາທິປະໄຕເປັນ​ຫຼັກການ​ພື້ນຖານໃນ​ການຈັດ​ຕັ້ງ, ປະຕິບັດ​ການນຳພາໂດຍໝູ່ຄະນະ ແລະ ບຸກຄົນຮັບຜິດຊອບ, ​ມີຄວາມຮັກ​ແພງ​ສະຫາຍ, ມີ​ວິ​ໄນທີ່​ເຂັ້ມ​ງວດ, ພ້ອມ​ກັນ​ນັ້ນກໍ່​ປະຕິບັດ​ຫຼັກການ: ຕິ​ຊົມ​ຕົນ​ເອງ ​ແລະ ຕິ​ຊົມ, ​ຄວາມສາມັກຄີ​ບົນ​ພື້ນຖານຂອງໂຄງການການເມືອງ ​ແລະ ກົດລະບຽບ​ຂອງ​ພັກ, ຕິດ​ພັນ​ກັບ​ປະ​ຊາ​ຊົນ​ຢ່າງ​ສະ​ໜິດ​ແໜ້ນ, ພັກ​ດຳ​ເນີນ​ງານ​ພາຍໃຕ້​ຂອບຂອງ​ລັດ​ຖະ​ທຳ​ມະ​ນູນ ແລະ ກົດ​ໝາຍ”⁽²⁾.

ໃນຂະບວນການປ່ຽນແປງໃໝ່ປະເທດໃນເກືອບ 40 ປີທີ່ຜ່ານມາ, ເພື່ອຮັບປະກັນຄວາມຕ້ອງການກໍ່ສ້າງ​ພັກທີ່ສະອາດ​ປອດໃສ ແລະ ໝັ້ນຄົງ​ເຂັ້ມ​ແຂງ, ປັບປຸງຍົກສູງ​ຄວາມ​ສາມາດໃນການນຳພາ ​ແລະ ກຳລັງ​ແຮງຕໍ່ສູ້​ຂອງ​ພັກ, ພັກ​ກອມ​ມູນິດ​ຫວຽດນາມ ຍາມ​ໃດ​ກໍ່​ຍຶດໝັ້ນ​ໃນ​ຫຼັກການ​ກໍ່ສ້າງ​ພັກ ​ແລະ ບັນລຸ​ໄດ້​ບັນດາ​ຜົນງານ​ທີ່​ສຳຄັນ. ທີໜຶ່ງ, ຍຶດໝັ້ນ​ຫຼັກ​ການ​ກໍ່ສ້າງ​ພັກ​ຕັ້ງແຕ່​ເລີ່​ມຕົ້ນຂະບວນການປ່ຽນແປງໃໝ່. ທີສອງ, ຢືນຢັນ​ຄວາມ​ຖືກຕ້ອງ​ ແລະ ​ຄວາມຕັດສິນໃຈຍຶດໝັ້ນ​ຫຼັກການ​ກໍ່ສ້າງ​ພັກ​ໃນໄລຍະ​ເວລາ​ພິ​ເສດ: ການ​ພັງ​ທະລາ​ຍຂອງລັດທິ​ສັງຄົມ​ນິຍົມ​ຕົວ​ຈິງ​ໃນ​ສະຫະພາບ​ໂຊ​ວຽດ ​ແລະ​ບັນດາ​ປະ​ເທດ​ເອີຣົບ​ຕາ​ເວັນ​ອອກ, ພັກ​ກອມ​ມູນິດ​ແລະພັກ​ກຳມະກອນ​ໃນ​ປະ​ເທດເຫຼົ່ານີ້ ສູນ​ເສຍຕຳແໜ່ງການປົກຄອງ. ທີສາມ, ບໍ່​ພຽງ​ແຕ່​ຍຶດໝັ້ນ​ຫຼັກການ​ກໍ່ສ້າງ​ພັກທີ່ໄດ້ຢືນຢັນ​ເທົ່າ​ນັ້ນ, ແຕ່​ຍັງ​ເພີ່ມ​ຫຼັກການ​ໃໝ່​ທີ່​ຈຳ​ເປັນອີກນຳ; ພ້ອມ​ກັນ​ນັ້ນ, ​ໄດ້​ສະ​ຫຼຸບ​ສັງລວມພຶດຕິກຳ ​ແລະ ປັບປຸງຫຼັກການ​ກໍ່ສ້າງ​ພັກ​ໃຫ້​ສົມບູນ​ແບບຢ່າງຕໍ່ເນື່ອງ ​ເພື່ອ​ຕອບ​ສະໜອງ​ຄວາມຕ້ອງການ​ຂອງ​ສະພາບ​ການ​ໃໝ່. ທີ່ສີ່, ທັງຍຶດໝັ້ນ, ທັງຫັນເປັນຮູບປະທຳ ແລະ ປັບປຸງເນື້ອໃນຂອງແຕ່ລະຫຼັກການໃຫ້ສົມບູນແບບຢ່າງບໍ່ຢຸດຢັ້ງ. ທີຫ້າ, ປົກປ້ອງຫຼັກການຢ່າງເດັດດ່ຽວ ແລະ ຕໍ່ສູ້ກັບແຜນການແລະກົນອຸບາຍຂອງກອງກຳລັງສັດຕູທີ່ທຳລາຍຫຼັກການກໍ່ສ້າງພັກໂດຍທັນທີ່.

ປະສົບ​ການ​ທີ່ຖອດຖອມມາຈາກພຶດຕິກຳຕົວຈິງແຫ່ງການຍຶດໝັ້ນ​ໃນ​ຫຼັກການ​ກໍ່ສ້າງ​ພັກ

ທີໜຶ່ງ, ເຊື່ອມໂຍງການຍຶດໝັ້ນ​ໃນ​ຫຼັກການ​ກໍ່ສ້າງ​ພັກ​ ເຂົ້າກັບການຍຶດໝັ້ນໃນ​ລັດທິ​ມາກ-​ເລ​ນິນ ​ແລະ​ແນວ​ຄິດ​ຂອງ​ໂຮ່ຈິ​ມິນ, ການຍຶດໝັ້ນໃນເປົ້າໝາຍເອກະລາດແຫ່ງຊາດ ແລະລັດທິສັງຄົມນິຍົມ ແລະ ການຍຶດໝັ້ນໃນແນວທາງການປ່ຽນແປງໃໝ່.

​ໂດຍ​ທາດ​ແທ້​ແລ້ວ, ຫຼັກການ​ກໍ່ສ້າງ​ພັກ​ຂອງ​ພັກ​ກອມ​ມູນິດ​ຫວຽດນາມ ​ແມ່ນ​ອີງບົນພື້ນຖານ​ທັດສະນະ​ຂອງ​ລັດທິມາກ-​ເລ​ນິນ ແລະ ແນວຄິດ​ໂຮ່ຈິ​ມິນ ກ່ຽວ​ກັບ​ພັກ​ກອມ​ມູນິດ​​ແລະ ວຽກ​ງານ​ກໍ່ສ້າງ​ພັກ. ດັ່ງນັ້ນ, ການຍຶດໝັ້ນໃນຫຼັກການກໍ່ສ້າງພັກຈຶ່ງຕິດແໜ້ນກັບການຍຶດໝັ້ນໃນລັດທິມາກ-ເລນິນ ແລະແນວຄິດໂຮ່ຈີມິນໂດຍທຳມະຊາດ, ໂດຍຖືວ່າ ມັນ​ເປັນ​ສ່ວນ​ໜຶ່ງ​ຂອງການຍຶດໝັ້ນໃນ​ລັດທິມາກ-​ເລ​ນິນ ແລະແນວຄິດໂຮ່ຈີມິນ. ການຍຶດໝັ້ນໃນຫຼັກການກໍ່ສ້າງພັກ ດ້ວຍການເສີມແລະພັດທະນານັ້ນ ຍັງເປັນການປະຕິບັດຕາມ ແລະ ສອດຄ່ອງກັບທັດສະນະຂອງ ລັດທິມາກ-ເລນິນ ກ່ຽວກັບການຫຼີກລ່ຽງຄຳພີຕາຍຕົວ ແລະການຮຽນແບບຫຼັກຄຳສອນຂອງລັດທິມາກ-ເລນິນຢ່າງແຂງກະດ້າງ.

ການກໍ່ສ້າງ​ພັກ​ໃຫ້​ສະອາດປອດ​ໃສແລະໝັ້ນຄົງ​ເຂັ້ມ​ແຂງ ບົນ​ພື້ນຖານຂອງການຍຶດໝັ້ນ ​ແລະການປະຕິບັດ​ຕາມຫຼັກການ​ກໍ່ສ້າງ​ພັກ​ຢ່າງ​ເຂັ້ມ​ງວດ ​ແມ່ນ​ສິ່ງ​ຈຳ​ເປັນ​ເພື່ອ​ໃຫ້​ພັກ​ປະຕິບັດ​ພາລະກິດ​ນຳພາ​ການ​ປະຕິວັດ​ປົດ​ປ່ອຍ​ຊາດກ່ອນໜ້າທີ່ ​ແລະ ນຳພາ​ປະຊາຊົນຮັກສາເອກະລາດແຫ່ງຊາດ ແລະປະຕິບັດແນວທາງການປ່ຽນແປງໃໝ່ທີ່ປະສົບຄວາມສຳເລັດ, ສືບ​ຕໍ່​ພັດ​ທະ​ນາ ​ແລະ ​ປະ​ສົບ​ຜົນ​ສໍາ​ເລັດ​ໃນ​ການ​ສ້າງ​ສັງ​ຄົມ​ນິ​ຍົມ​ໃນ​ປັດ​ຈຸ​ບັນ. ດັ່ງນັ້ນ, ການຍຶດໝັ້ນຫຼັກການກໍ່ສ້າງພັກ ຈະຕ້ອງເຊື່ອມໂຍງຢ່າງແໜ້ນແຟ້ນກັບການຍຶດໝັ້ນເປົ້າໝາຍເອກະລາດແຫ່ງຊາດ ແລະ ລັດທິສົງຄົມນິຍົມ, ແລະຍຶດໝັ້ານໃນແນວທາງການປ່ຽນແປງໃໝ່. ມັນຈະຫວ່າງເປົ່າ, ບໍ່ມີຊີວິດ ແລະ ຂາດທິດທາງ, ຖ້າຫາກການຮັກສາຫຼັກການກໍ່ສ້າງພັກ ບໍ່ຊ່ວຍແກ້ໄຂບັນຫາທີ່ຍົກຂຶ້ນພາຍໃນພັກ ແລະ ໃນການເຄື່ອນໄຫວນຳພາຂອງພັກໃນແຕ່ລະໄລຍະການປະຕິວັດ; ບໍ່ຕັ້ງຢູ່ໃນການປະຕິບັດເປົ້າໝາຍປົດປ່ອຍຊາດ ຍາດເອົາເອກະລາດແຫ່ງຊາດ ແລະ ການຍຶດອຳນາດການປົກຄອງກ່ອນໜ້ານີ້ ແລະ ການສ້າງສາສັງຄົມນິຍົມແລະການປົກປ້ອງເທດຊາດສັງຄົມນິຍົມຢ່າງໝັ້ນຄົງ ໃນປະຈຸບັນ. ຢູ່ທີ່ນີ້, ການເຊື່ອມຕໍ່ການຍຶດໝັ້ນຫຼັກການກໍ່ສ້າງພັກ ກັບການຍຶດໝັ້ນແນວທາງການປ່ຽນແປງໃໝ່ນັ້ນ ​ລວມ​ເຖິງການຍຶດ​ໝັ້ນ​ບັນດາ​ຫຼັກການ​ໃນການປ່ຽນແປງໃໝ່​ປະ​ເທດ​ຊາດ​ທີ່​ພັກ​ເຮົາ​ກຳນົດໄວ້; ການຍຶດໝັ້ນແນວທາງການ​ພັດທະນາ​ເສດຖະກິດແລະສັງຄົມແມ່ນຈຸດໜັກໃຈກາງ; ການກໍ່ສ້າງພັກແມ່ນກຸນແຈ; ການພັດທະນາວັດທະນະທໍາແມ່ນພື້ນຖານທາງຈິດວິນຍານ; ການຮັບປະກັນ​ການ​ປ້ອງ​ກັນ​ປະ​ເທດແລະຄວາມ​ໝັ້ນຄົງ​ແຫ່ງ​ຊາດ​ ແມ່ນສິ່ງ​ສຳຄັນ​ແລະຕໍ່ເນື່ອງ.

ທີສອງ, ການຍຶດໝັ້ນຫຼັກການກໍ່ສ້າງພັກດ້ວຍການຜັນຂະຫຍາຍບັນດາຫຼັກການໃນກົດລະບຽບຂອງພັກ, ບັນດາມະຕິ ຂໍ້ສະຫຼຸບ ຂໍ້ບັງຄັບ ລະບຽບການ ແລະ ຄຳແນະນຳຂອງພັກ.

ບັນດາຫຼັກການກໍ່ສ້າງພັກ​ລ້ວນ​ແຕ່​ແມ່ນ​ຂໍ້ຄວາມທີ່​ສັ້ນ, ມີ​ລັກສະນະ​ທົ່ວ​ໄປ​ສູງ, ໃນຂະນະທີ່ລະບົບການຈັດຕັ້ງຂອງພັກ, ວຽກງານການກໍ່ສ້າງພັກ ແລະ ການເຄື່ອນໄຫວຂອງພັກນັ້ນ ມີຄວາມຫຼາກຫຼາຍແລະອຸດົມສົມບູນທີ່ສຸດ. ໃນຄວາມເປັນຈິງ, ບໍ່ແມ່ນພະນັກງານ ແລະ ສະມາຊິກພັກທັງໝົດສາມາດເຂົ້າໃຈຫຼັກການໄດ້ຢ່າງຖືກຕ້ອງ; ຍົກເວັ້ນກໍລະນີການໃຊ້ໃນທາງທີ່ຜິດໂດຍເຈດຕະນາ ຫຼືການລະເມີດຫຼັກການ ເພື່ອຈຸດປະສົງສ່ວນຕົວ “ຜົນປະໂຫຍດກຸ່ມ”. ຍັງມີຫຼາຍກໍລະນີທີ່ບໍ່ເຂົ້າໃຈຫຼັກການຢ່າງຖືກຕ້ອງ ຫຼືມີການຕີຄວາມທີ່ແຕກຕ່າງກັນ. ນອກຈາກນີ້ ຍັງມີສະຖານະການຕົວຈິງຫຼາຍປະການທີ່ລະບຽບການ​ຂອງ​ພັກ​ບໍ່​ຄົບ​ຖ້ວນ, ບໍ່​ທັນ​ສະ​ເພາະເຈາະຈົງ, ຫຼື​ລ້າ​ສະ​ໄໝ... ດັ່ງນັ້ນ, ເພື່ອຍຶດໝັ້ນຫຼັກການໄດ້ຢ່າງໝັ້ນຄົງ, ການຜັນຂະຫຍາຍຫຼັກການໃນກົດລະບຽບຂອງພັກ, ບັນດາມະຕິ ຂໍ້ສະຫຼຸບ ຂໍ້ບັງຄັບ ລະບຽບການ ແລະ ຄຳແນະນຳຂອງພັກເປັນອັນລະອຽດສະເພາະ ແມ່ນໜ້າທີ່ຈຳເປັນທີ່ສຸດ; ໃນນັ້ນ, ການພັດທະນາ, ປະກາດໃຊ້, ຈັດຕັ້ງປະຕິບັດ ແລະ ກວດກາ ຕິດຕາມກວດກາ ການປະຕິບັດຕາມລະບຽບການເຮັດວຽກຂອງອົງການນຳພາພັກທຸກຂັ້ນ, ລະບຽບການພົວພັນການເຮັດວຽກລະຫວ່າງຄະນະບໍລິຫານງານພັກ ແລະ ອົງການຈັດຕັ້ງພັກທຸກຂັ້ນ ມີບົດບາດສຳຄັນ.

ທີສາມ, ຕິດຕາມການຈັດຕັ້ງ ແລະ ການເຄື່ອນໄຫວຕົວຈິງຂອງພັກຢ່າງແໜ້ນແຟ້ນ ເພື່ອເພີ່ມເຕີມ ແລະ ປັບປຸງເນື້ອໃນຂອງຫຼັກການກໍ່ສ້າງພັກໃຫ້ສົມບູນໂດຍທັນທີ.

ບັນດາຫຼັກການກໍ່ສ້າງພັກມີບົດບາດສຳຄັນພິເສດ, ການເພີ່ມຫຼືການຫຼຸດຫຼັກການ, ການປັບເນື້ອໃນຂອງແຕ່ລະຫຼັກການ ຈະຕ້ອງໄດ້ຮັບການພິຈາລະນາຢ່າງຮອບຄອບ ແລະ ລະມັດລະວັງທີ່ສຸດ. ການເຮັດໃຫ້ຫຼັກການເປັນຮູບປະທຳ, ໂດຍສະເພາະ ການເພີ່ມເຕີມແລະປັບປຸງຫຼັກການຈະຕ້ອງຄົ້ນຄວ້າຢ່າງ​ຈິງ​ຈັງ, ລະອຽດ, ​ຊັດເຈນ ແລະ ສ້າງ​ຄວາມ​ເຫັນ​ດີ​ເຫັນ​ພ້ອມ​ສູງ​ ບົນ​ພື້ນຖານ​ທິດ​ສະ​ດີ ​ແລະ ພາກ​ປະຕິບັດ. ມີ​​ບັນຫາ​ທີ່ຕ້ອງ​ກວດສອບດ້ວຍມູນຫຼັກຂອງ​ລັດທິ​ມາກ-​ເລ​ນິນ ​ແລະ ແນວຄິດ​ໂຮ່ຈີມິນ ກ່ຽວກັບພັກກອມມູນິດ ​ເພື່ອ​ຢືນຢັນ​ພື້ນຖານ​ທິດ​ສະ​ດີ​ຢ່າງ​ແໜ້ນ​ແຟ້ນ, ພ້ອມ​ກັນ​ນັ້ນ ​ກໍ່​ເອົາໃຈໃສ່ເຖິງການ​ຕິດຕາມ​ກວດກາ​ຢ່າງ​ໃກ້ຊິດ ແລະ ສະຫຼຸບ​ສັງ​ລວມສະພາບການຈັດຕັ້ງ​ ແລະການເຄື່ອນໄຫວຂອງພັກ​. ຜ່ານການສະຫຼຸບສັງລວມພຶດຕິກຳ, ເນື້ອໃນໃດທີ່ຊັດເຈນ, ໄດ້ຮັບການຢືນຢັນຈາກພາກປະຕິບັດວ່າຖືກຕ້ອງ, ໄດ້ຮັບຄວາມເຫັນດີເຫັນພ້ອມຈາກສຽງສ່ວນຫຼາຍ ກໍ່ໃຫ້ລວມຢູ່ໃນກົດລະບຽບແລະຂໍ້ບັງຄັບ; ສຳລັບບັນຫາທີ່ຕ້ອງແກ້ໄຂ, ແຕ່ຄວາມຄິດເຫັນຍັງມີຄວາມແຕກຕ່າງກັນຫຼາຍ, ໃຫ້ເຮັດທົດລອງ ຫຼັງຈາກນັ້ນດຳເນີນການສະຫຼຸບສັງລວມ ແລະ ສະຫຼຸບຜົນ; ສໍາລັບບັນຫາທີ່ໃໝ່ເກີນໄປ ແລະ ບໍ່ຊັດເຈນທາງດ້ານທິດສະດີແລະພຶດຕິກຳ, ໃຫ້ອົງການດຳເນີນການຄົ້ນຄວ້າຕໍ່ໄປ ແລະ ບໍ່ລວມເຂົ້າໃນກົດລະບຽບແລະຂໍ້ບັງຄັບ. ຂະບວນການແກ້ໄຂກົດລະບຽບຂອງພັກ, ການເພີ່ມເຕີມແລະປັບປຸງຂໍ້ກຳນົດ ກົດລະບຽບຕ່າງໆ ຈະຕ້ອງໄດ້ຮັບການຈັດຕັ້ງປະຕິບັດຢ່າງເປັນປະຊາທິປະໄຕແລະພາວະວິໄສ ໂດຍໄດ້ຮັບການປະກອບສ່ວນຈາກອົງການຈັດຕັ້ງພັກ, ພະນັກງານ ສະມາຊິກພັກ, ອົງການວິທະຍາສາດ, ລວມທັງພະນັກງານບໍານານທີ່ມີປະສົບການຫຼວງຫຼາຍໃນວຽກງານກໍ່ສ້າງພັກ. ນອກຈາກນີ້, ຍັງຕ້ອງເອົາໃຈໃສ່ເຖິງການຄົ້ນຄວ້າພຶດຕິກຳ ແລະປະສົບການຂອງພັກກອມມູນິດທີ່ກຳອຳນາດຢູ່ ເພື່ອຄັດເລືອກບັນຫາທີ່ແທດຈິງໃນຂະບວນການປັບກົດລະບຽບທີ່ກ່ຽວຂ້ອງກັບຫຼັກການໃນການຈັດຕັ້ງ ແລະການເຄື່ອນໄຫວຂອງພັກ.

ທີສີ່, ​ເຮັດ​ວຽກ​ງານແນວຄິດ​ທີ່​ດີ​ເປັນ​ປະຈຳ, ສ້າງ​ຄວາມ​ເປັນເອກະສັນ​ສູງໃນທົ່ວພັກກ່ຽວກັບ​ຫຼັກການ​ກໍ່ສ້າງ​ພັກ.

ບັນດາຫຼັກການກໍ່ສ້າງພັກແມ່ນບັນຫາສຳຄັນສຳລັບພັກ, ຮັບປະກັນ​ໃຫ້​ພັກ​ວາງກຳນົດໂຄງການການເມືອງ ​ແລະ ​ແນວທາງ​ທີ່​ຖືກຕ້ອງ; ມີຄວາມສາມັກຄີແລະຄວາມເປັນເອກະພາບທັງດ້ານການເມືອງ ແນວຄິດ ການຈັດຕັ້ງ ເຈດຈຳນົງ ແລະ ການກະທຳ; ຍາມໃດກໍ່ສະອາດປອດໃສ ໝັ້ນຄົງ​ເຂັ້ມ​ແຂງ ໃກ້ຊິດ​ສະໜິດສະໜົມ​ກັບ​ປະຊາຊົນ ​ແລະ ​ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ​ຈາກ​ປະຊາຊົນ​ຢ່າງເດັດຂາດ.

ທີຫ້າ, ບັນດາຫຼັກການກໍ່ສ້າງພັກກຳນົດໃຫ້ອົງການພັກ ແລະສະມາຊິກພັກທັງໝົດປະຕິບັດຕາມ, ລວມ​ເຖິງ​ຫຼາຍ​ລະບຽບ​ການ​ເພື່ອ​ປ້ອງ​ກັນ ​ແລະ ສະກັດ​ກັ້ນ​ເສລີ​ພາບຕາມລຳພັງໃຈຂອງ​ກຸ່ມ​ ແລະສະມາຊິກ​ພັກແຕ່ລະຄົນ ທີ່​ຢາກສວຍໃຊ້ຊື່​ຂອງ​ພັກ ເພື່ອ​ສະແຫວງຫາຜົນ​ປະ​ໂຫຍ​ດຂອງ​ຕົນເອງ; ໃນອີກດ້ານໜຶ່ງ, ການຮັບຮູ້ທີ່ຖືກຕ້ອງແລະຄົບຖ້ວນ, ການຄິດທີ່ຊັດເຈນຂອງພະນັກງານແລະສະມາຊິກພັກກ່ຽວກັບຫຼັກການ ແມ່ນປະຖົມປັດໄຈສຳລັບການປະຕິບັດຫຼັກການຢ່າງເຂັ້ມງວດແລະປະດິດສ້າງ. ດັ່ງນັ້ນ, ວຽກງານແນວຄິດຂອງພັກຈະຕ້ອງເຮັດໃຫ້ພະນັກງານ ແລະສະມາຊິກພັກທຸກຄົນ ຮັບຮູ້ຢ່າງຖືກຕ້ອງກ່ຽວກັບບົດບາດ ແລະຄວາມສຳຄັນຂອງຫຼັກການກໍ່ສ້າງພັກ, ເນື້ອໃນຂອງແຕ່ລະຫຼັກການ ແລະ ສາຍພົວພັນໃກ້ຊິດລະຫວ່າງຫຼັກການແລະຫຼັກການ; ກຳນົດຄວາມຮັບຜິດຊອບຂອງອົງການຈັດຕັ້ງພັກແລະບຸກຄົນຢ່າງຖືກຕ້ອງ ໃນການປະຕິບັດຕາມຫຼັກການຢ່າງເຄັ່ງຄັດ; ຕຳໜິວິຈານຄວາມຮັບຮູ້ທີ່ຜິດພາດທັນທີ່ ແລະ ຕໍ່ສູ້ແລະບັງຄັບໃຊ້ວິໄນ ຕໍ່ອົງການຈັດຕັ້ງ, ພະນັກງານ ແລະສະມາຊິກພັກທີ່ລະເມີດຫຼັກການ.

ທີຫ້າ, ຈັກການແກ້ໄຂສາຍພົວພັນຢ່າງເໝາະສົມ ລະຫວ່າງການປະຕິບັດຫຼັກການການຈັດຕັ້ງ ແລະການເຄື່ອນໄຫວຂອງພັກ ກັບບັນດາຫຼັກການການຈັດຕັ້ງແລະການເຄື່ອນໄຫວຂອງລັດ, ແນວໂຮມປະເທດຊາດຫວຽດນາມ ແລະບັນດາອົງການຈັດຕັ້ງການເມືອງ-ສັງຄົມ.

ໃນເງື່ອນໄຂທີ່ພັກກອມມູນິດຫວຽດນາມແມ່ນພັກກຳອຳນາດພຽງພັກດຽວນັ້ນ, ໃນທຸກອົງການຂອງລັດ ຕັ້ງແຕ່ສູນກາງຈົນເຖິງທ້ອງຖິ່ນ, ແນວໂຮມປະເທດຊາດຫວຽດນາມ, ອົງການຈັດຕັ້ງການເມືອງ-ສັງຄົມ, ກອງທັບແລະຕຳຫຼວດ, ໜ່ວຍງານບໍລິການສາທາລະນະ, ລັດວິສາຫະກິດ ແລະ ວິສາຫະກິດທີ່ມີທຶນກໍ່ຕັ້ງໂດຍລັດ ລ້ວນມີອົງການຈັດຕັ້ງພັກ; ພ້ອມກັນນັ້ນ, ຕໍາແໜ່ງການນໍາທີ່ສໍາຄັນໃນອົງການຈັດຕັ້ງ ແລະໜ່ວຍງານເຫຼົ່ານັ້ນ ​ຖື​ໂດຍ​ສະ​ມາ​ຊິກ​ພັກ.

ໂດຍຫຼັກການແລ້ວ, ພັກນຳພາເປັນເອກະພາບ ໂດຍກົງ ແລະຮອບດ້ານ ຕໍ່ວຽກງານການຈັດຕັ້ງ, ວຽກງານພະນັກງານ ແລະ ຄຸ້ມຄອງຖັນແຖວພະນັກງານ ໃນລະບົບການເມືອງທັງໝົດ. ໃນການຈັດຕັ້ງແລະການເຄື່ອນໄຫວຂອງບັນດາອົງການຂອງລັດ, ແນວໂຮມປະເທດຊາດຫວຽດນາມ ແລະ ອົງການຈັດຕັ້ງການເມືອງ-ສັງຄົມນັ້ນ ຈະຕ້ອງຮັກສາບົດບາດການນຳພາຂອງພັກຢ່າງແຂງແຮງ ແລະ ອົງການຈັດຕັ້ງພັກໃນໜ່ວຍງານແລະອົງການນັ້ນ ໃຫ້ປະຕິບັດຕາມຫຼັກການຂອງພັກຢ່າງເຂັ້ມງວດ, ທັງຕ້ອງເສີມຂະຫຍາຍບົດບາດຂອງອົງການໃນລະບົບການເມືອງ, ປະຕິບັດຕາມກົດໝາຍ, ເຄົາລົບກົດລະບຽບ ແລະຄຸນລັກສະນະດ້ານການຈັດຕັ້ງແລະການເຄື່ອນໄຫວ ຂອງແນວໂຮມປະເທດຊາດຫວຽດນາມ ແລະ ອົງການຈັດຕັ້ງການເມືອງ-ສັງຄົມແຕ່ລະອົງການ.

ທີຫົກ, ແກ້​ໄຂ​ຄວາມ​ຮັບ​ຮູ້​ທີ່​ຜິດ​ພາດ​ທັນ​ທີ​​​, ​ຈັດການແກ້​ໄຂ​ການ​ກະທຳ​ລະ​ເມີດ​ຫຼັກການ​ກໍ່ສ້າງ​ພັກຢ່າງເຂັ້ມງວດ; ​​ຕໍ່ສູ້ຢ່າງເດັດດ່ຽວກັບຖ້ອຍທຳນອງ​ຂອງ​ບັນດາອິດທິ​ກຳລັງ​ສັດຕູ​ທີ່​ບິດ​ເບືອນ, ເສກສັນປັ້ນແຕ່ງ, ປະຕິ​ເສດ​ບັນດາ​ຫຼັກການ​ກໍ່ສ້າງ​ພັກ.

ບັນດາ​ບັນຫາທີ່ເກີດຂຶ້ນ​ ໃນ​ການ​ປະຕິບັດການຍຶດໝັ້ນ​ຫຼັກການ​ກໍ່ສ້າງ​ພັກ​ຢ່າງ​ຕໍ່ເນື່ອງ  

ທີໜຶ່ງ, ເປັນເອກະພາບໃນຄວາມຄິດກ່ຽວກັບຫຼັກການກໍ່ສ້າງພັກ.

ກ່ອນກອງປະຊຸມໃຫຍ່ຄັ້ງທີ VII ຂອງພັກ, ບັນດາເອກະສານຂອງພັກໄດ້ນຳໃຊ້ແນວຄວາມຄິດ “ຫຼັກການການຈັດຕັ້ງ ແລະ ການດຳເນີນຊີວິດພັກ”, ຍ້ອນວ່າ ສາມຫຼັກການຄື ລວມສູນປະຊາທິປະໄຕ, ຕິຊົມຕົນເອງແລະຕິຊົມ, ສາມັກຄີເປັນເອກະພາບ ເປັນສິ່ງດັດປັບບັນດາການ​ພົວພັນ​ພາຍ​ໃນ​ຂອງ​ພັກ. ນັບຕັ້ງແຕ່ກອງປະຊຸມໃຫຍ່ຄັ້ງທີ VII ຂອງພັກ, ​ໃນ​ເອກະສານ​ຂອງ​ພັກ, ຄຳ​ວ່າ “ຫຼັກການ​ການຈັດ​ຕັ້ງ ​ແລະ ການເຄື່ອນໄຫວ​ຂອງ​ພັກ” ​ໄດ້​ຖືກ​ນຳ​ໃຊ້​ທົ່ວ​ໄປ, ຍ້ອນມີການເພີ່ມເຕີມສອງຫຼັກການອີກຄື: ພັກ​ພົວ​ພັນຢ່າງໃກ້ຊິດສະໜິດແໜ້ນກັບປະຊາຊົນ; ພັກ​ເຄື່ອນໄຫວພາຍໃຕ້​ຂອບ​ຂອງ​ລັດຖະທຳ​ມະນູນ​ແລະກົດໝາຍ - ບັນດາຫຼັກການຄວບຄຸມ​ກັບ​ປະຊາຊົນ, ກັບ​ລັດ ພາຍໃຕ້ການຄວບຄຸມຂອງ​ກົດໝາຍ. ການສະແດງອອກດັ່ງກ່າວຖືກຕ້ອງທັງທາງທິດສະດີແລະພຶດຕິກຳ. ໃນເງື່ອນໄຂທີ່ພັກກອມມູນິດຫວຽດນາມນຳພາແລະກຳອຳນາດ, ພັກບໍ່ພຽງແຕ່ສ້າງໂຄງສ້າງພາຍໃນທີ່ສະອາດປອດໃສແລະໝັ້ນຄົງເຂັ້ມແຂງເທົ່ານັ້ນ, ແຕ່ສິ່ງສຳຄັນແມ່ນ​ປະຕິບັດ​ບົດບາດ​ນຳພາ ​ແລະບົດບາດການປົກຄອງ​ລັດ ​ແລະ ສັງຄົມ​ໃຫ້​ດີ. ໃນການເຄື່ອນໄຫວນຳພາຂອງພັກຈະຕ້ອງມີຫຼັກການທີ່ຄວບຄຸມການເຄື່ອນໄຫວຂອງພັກ ເຊິ່ງຄວນຈະເອີ້ນໂດຍສົມບູນວ່າ “ຫຼັກການການຈັດຕັ້ງແລະການເຄື່ອນໄຫວຂອງພັກ”. ການໃຊ້ແນວຄວາມຄິດ “ຫຼັກການການກໍ່ສ້າງພັກ” ເປັນຕົວຫຍໍ້ຂອງແນວຄວາມຄິດ “ຫຼັກການການຈັດຕັ້ງ ແລະການເຄື່ອນໄຫວຂອງພັກ” ຈຳເປັນຕ້ອງມີຄຳອະທິບາຍເພື່ອສ້າງຄວາມເປັນເອກະພາບທາງດ້ານຄວາມຮັບຮູ້.

ທີສອງ, ດຳເນີນການຄົ້ນຄວ້າເພື່ອແກ້ໄຂກົດລະບຽບຂອງພັກ.

ກົດລະບຽບຂອງພັກສະບັບປະຈຸບັນ ​ໄດ້​ຮັບ​ການ​ຮັບຮອງ​ເອົາ​ຈາກ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ (ປີ 2011), ບັນດາກອງປະຊຸມໃຫຍ່ຄັ້ງທີ XII ແລະ XIII ຂອງພັກ ບໍ່ໄດ້ແກ້ໄຂກົດລະບຽບຂອງພັກ. ຄວາມເປັນຈິງແຫ່ງການກໍ່ສ້າງພັກ ແລະການເຄື່ອນໄຫວຂອງພັກໃນເວລາ 10 ປີທີ່ຜ່ານມາໄດ້ພາໃຫ້ເກີດບັນຫາໃໝ່ຫຼາຍຢ່າງ​ທີ່​ຈຳ​ເປັນ​ຕ້ອງ​ກຳນົດໄວ້​ໃນ​ກົດ​ລະບຽບ​ຂອງ​ພັກ. ໃນຊຸມປີທີ່ຜ່ານມາ, ໃນບັນດາມະຕິຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກ, ຄະນະບໍລິຫານງານສູນກາງ ແລະ ກົມການເມືອງສູນກາງຂອງຊຸດຕ່າງໆຂອງພັກ ໄດ້ມີການອອກຂໍ້ກຳນົດໃໝ່ ເຊິ່ງໄດ້ຮັບການຍອມຮັບໃນທາງປະຕິບັດວ່າ ມີຄວາມຈຳເປັນແລະຖືກຕ້ອງ, ແຕ່​ຕ້ອງ​ໄດ້​ຮັບ​ການ​ດັດ​ແກ້​ໂດຍ​ເອ​ກະ​ສານ​ສູງ​ສຸດຄື ກົດລະບຽບຂອງ​ພັກ.

ທີສາມ, ​ແກ້​ໄຂ​ການ​ແບ່ງຂັ້ນ​ແລະການມອບສິດ​ອຳນາດ​ຢ່າງ​ສົມ​ເຫດ​ສົມ​ຜົນ ພ້ອມ​ທັງ​ຮັກສາ​ຄວາມ​ເປັນເອກະພາບ​ໃນ​ການ​ປະຕິບັດ​ບັນດາຫຼັກການ​ກໍ່ສ້າງ​ພັກ.

ຫຼັກການ​ຂອງ​ພັກ​ມີ​ຜົນ​ສັກສິດໃນການນຳ​ໃຊ້​ທົ່ວໄປໃນ​ທົ່ວ​ພັກ, ແຕ່ຍ້ອນລະບົບການຈັດຕັ້ງຂອງພັກມີຫຼາຍຂັ້ນ ແລະ ຫຼາຍປະເພດ, ດັ່ງນັ້ນ ຈຶ່ງຈຳເປັນຕ້ອງປະຕິບັດການແບ່ງຂັ້ນແລະມອບສິດອຳນາດ ເພື່ອເສີມຂະຫຍາຍບົດບາດ, ຄວາມຮັບຜິດຊອບ, ຄວາມເປັນເຈົ້າການ ແລະ ຄວາມຄິດສ້າງສັນ ຂອງແຕ່ລະຂັ້ນ ສອດຄ່ອງກັບລັກສະນະຂອງແຕ່ລະຂັ້ນ, ແຕ່ລະທ້ອງຖິ່ນ, ແຕ່ລະອົງການ ແລະໜ່ວຍງານ. ບັນດາຫຼັກການກໍ່ສ້າງພັກກໍ່ໄດ້ຮັບການໝູນໃຊ້ຢ່າງເໝາະສົມກັບຄະນະພັກ ແລະການຈັດຕັ້ງພັກໃນແຕ່ລະຂັ້ນ, ແຕ່ລະທ້ອງຖິ່ນ, ແຕ່ລະອົງການແລະໜ່ວຍງານ, ໃນນັ້ນ ມີການແບ່ງຂັ້ນ ແລະການມອບສິດອຳນາດທີ່ແນ່ນອນ. ຢ່າງໃດກໍ່ຕາມ, ໃນເມື່ອແບ່ງຂັ້ນແລະມອດສິດອຳນາດນັ້ນ ​ອາດ​ຈະ​ມີສອງທ່າອ່ຽງທີ່ເກີດ​ຂຶ້ນຄື: ການແບ່ງຂັ້ນແລະມອບສິດອຳນາດແຄບເກີນໄປ ເຮັດ​ໃຫ້​ຜູ້ໃຕ້ບັງຄັບ​ບັນຊາຕົກໃນທ່າຮັບ ແລະເພິ່ງ​ພາ​ຜູ້ບັງຄັບ​ບັນຊາຢູ່ສະເໝີ, ຕ້ອງ​ຂໍ​ຄວາມ​ຄິດ​ເຫັນ​ຈາກ​ຜູ້​ບັງຄັບບັນຊາ, ​ເຮັດ​ໃຫ້​ຜູ້ບັງຄັບ​ບັນຊາ​ຕ້ອງ​ອຸ້ມວຽກເຮັດຕາງ...; ຫຼື ການແບ່ງຂັ້ນແລະມອບສິດອຳນາດກວ້າງເກີນໄປ ເຮັດ​ໃຫ້​ຜູ້ໃຕ້ບັງຄັບ​ບັນຊາລ່ວງອຳນາດ, ໃຊ້ອຳນາດໃນທາງທີ່ຜິດ, ຂັ້ນເທິງບໍ່ສາມາດຄວບຄຸມໄດ້. ດັ່ງນັ້ນ, ໃນບັນດາກົດລະບຽບແລະຂໍ້ບັງຄັບທີ່ໃຊ້ຫຼັກການການກໍ່ສ້າງພັກ ຈຶ່ງຄວນໃຫ້ຄວາມສົນໃຈເປັນພິເສດ ໃນການຈັດການການແບ່ງຂັ້ນແລະມອບສິດອຳນາດ ຢ່າງເໝາະສົມໃຫ້ເຂັ້ມງວດກວ່າອີກ, ພ້ອມກັນນັ້ນ ຮັກສາ​ຄວາມເປັນເອກະພາບ​ໃນ​ການ​ປະຕິບັດ​ຕາມຫຼັກການ​ຂອງ​ພັກ.

ທີສີ່, ປັບປຸງກົນໄກການກວດກາ ແລະຕິດຕາມກວດກາການປະຕິບັດຫຼັກການກໍ່ສ້າງພັກໃຫ້ສົມບູນແບບ.

ອຳນາດ​ພາຍ​ໃນ​ພັກ​ຕ້ອງ​ໄດ້​ຮັບ​ການ​ຄວບ​ຄຸມ ​ເພື່ອ​ຫຼີກ​ລ່ຽງບໍ່​ໃຫ້​ມີ​ທ່າ​ອ່ຽງລ່ວງອຳນາດ ​ໃຊ້​ອຳນາດໃນທາງທີ່ຜິດ ​ແລະ ທ່າ​ອຽງ​ທີ່​ຈະ​ບໍ່​ໃຊ້​ອຳນາດ​ທີ່​ໄດ້​ຮັບ​ມອບ​ໝາຍ​ຢ່າງ​ຄົບ​ຖ້ວນ. ຕາມນັ້ນ, ການປະຕິບັດບັນດາຫຼັກການກໍ່ສ້າງພັກຈຶງຕ້ອງໄດ້ຮັບການກວດກາ, ຕິດຕາມກວດກາ, ກວດສອບຢ່າງແໜ້ນແຟ້ນ, ສະໝ່ຳສະເໝີ ແລະມີປະສິດທິພາບ. ບັນດາຂໍ້ບັງຄັບຂອງຄະນະບໍລິຫານງານສູນກາງພັກແຕ່ລະວາລະ ວ່າດ້ວຍວຽກງານກວດກາ, ຕິດຕາມກວດກາ ແລະ ວິໄນຂອງພັກ⁽⁸⁾ ມີຂໍ້ບັງຄັບແລະການລົງໂທດຫຼາຍຂໍ້ທີ່ກ່ຽວຂ້ອງກັບການຄວບຄຸມອຳນາດພາຍໃນພັກ. ຢ່າງໃດກໍ່ຕາມ, ຄວາມເປັນຈິງສະແດງໃຫ້ເຫັນວ່າ, ອົງການຈັດຕັ້ງພັກແລະພະນັກງານສ່ວນຫຼາຍຖືກລົງໂທດທາງວິໄນໃນຮູບແບບຕ່າງໆ ໃນເວລາທີ່ຜ່ານມານັ້ນ ແມ່ນຍ້ອນລະເມີດຫຼັການລວມສູນປະຊາທິປະໄຕ ແລະລະບຽບການເຮັດວຽກ; ໃນຫຼາຍແຫ່ງ, ຍັງມີສະຖານະການທີ່ບໍ່ປະຕິບັດການຕິຊົມຕົນເອງ ແລະຕິຊົມຢ່າງເຂັ້ມງວດ, ຍັງມີການຈົ່ງຈ່ຽມ ການຫຼີກລ່ຽງ ແລະ ສາມັກຄີດ້ານດຽວ; ການພົວພັນລະຫວ່າງຄະນະພັກ ພະນັກງານ ສະມາຊິກພັກ ກັບປະຊາຊົນ ຍັງບໍ່ທັນແໜ້ນແຟ້ນ; ຄະນະພັກ, ຫົວໜ້າຄະນະພັກ ແລະອົງການຈັດຕັ້ງພັກບາງແຫ່ງ ແຊກແຊງໂດຍບໍ່ຖືກຕ້ອງຕາມສິດອໍານາດເຂົ້າໃນການເຮັດວຽກຂອງອົງການຂອງລັດ... ສິ່ງດັ່ງກ່າວຮຽກຮ້ອງໃຫ້​ເພີ່ມ​ທະວີ​ການ​ຄວບ​ຄຸມ​ອຳນາດ​ພາຍ​ໃນ​ພັກ​ໂດຍ​ທົ່ວ​ໄປ, ຄວບ​ຄຸມ​ການ​ປະຕິບັດ​ຫຼັກການ​ກໍ່ສ້າງ​ພັກ​ໂດຍ​ສະ​ເພາະ, ກ່ອນ​ອື່ນ​ໝົດ​ແມ່ນ ​ສຳລັບ​​ອົງການ​ການ​ນຳ​ຂອງ​ພັກ, ຫົວໜ້າ​ຄະນະ​ພັກ ແລະ ອົງການ​ຈັດ​ຕັ້ງ​ພັກ​ທຸກ​ຂັ້ນ. ການຄວບຄຸມອຳນາດນີ້ຕ້ອງໄດ້ຮັບການກຳນົດເປັນ ກົດລະບຽບແລະຂໍ້ບັງຄົບ ທີ່ເຂັ້ມງວດ ແລະລະອຽດສະເພາະ, ໂດຍມີມາດຕະການລົງໂທດເພື່ອຈັດການກັບການລະເມີດ (ຖ້າມີ) ຕາມຈິດໃຈແຫ່ງ “ການຂັງອຳນາດໄວ້ໃນກົງແຫ່ງກົນໄກ”, ໂດຍສະເພາະ ໃນຂົງເຂດແລະບັນຫາທີ່ອາດຈະເກີດການລະເມີດ./.  

-------------------------

(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 109.  

(2) ກົດລະບຽບຂອງພັກກອມມູນິດຫວຽດນາມ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ໜ້າ 5.

(3) ເອກະສານກອງປະຊຸມຄັ້ງທີ 4 ຂອງຄະນະບໍລິຫານງານສູນກາງຊຸດທີ XI, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2012, ໜ້າ 22-23

(4) ເອກະສານກອງປະຊຸມຄັ້ງທີ 4 ຂອງຄະນະບໍລິຫານງານສູນກາງຊຸດທີ XII, ຫ້ອງການສູນກາງພັກ, ຮ່າໂນ້ຍ, 2016, ໜ້າ 22

(5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 225.

(6) ເອກະສານກອງປະຊຸມຄັ້ງທີ 4 ຂອງຄະນະບໍລິຫານງານສູນກາງຊຸດທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ໜ້າ 90.

(7) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 5, ໜ້າ 621.

(8) ຕາມກົດລະບຽບໝາຍເລກ 86-QĐ/TW ລົງວັນທີ 01 ມິຖຸນາ 2017 ຂອງກົມການເມືອງສູນກາງ ວ່າດ້ວຍ “ການຕິດຕາມກວດກາພາຍໃນພັກ”; ກົດລະບຽບໝາຍເລກ 69-QĐ/TW ລົງວັນທີ 6 ກໍລະກົດ 2022 ຂອງກົມການເມືອງສູນກາງ “ວ່າດ້ວຍການປະຕິບັດວິໄນຕໍ່ອົງການຈັດຕັ້ງພັກ ແລະ ສະມາຊິກພັກທີ່ລະເມີດ”; ກົດລະບຽບໝາຍເລກ 114-QĐ/TW ລົງວັນທີ 11 ກໍລະກົດ 2023, ຂອງກົມການເມືອງສູນກາງ “ວ່າດ້ວຍການຄວບຄຸມອຳນາດ ແລະ ການປ້ອງກັນແລະຕ້ານການສໍ້ລາດບັງຫຼວງ ແລະຄວາມຫຍໍ້ທໍ້ໃນວຽກງານພະນັກງານ”...

* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1036 (ເດືອນເມສາ 2024)