ໝູນໃຊ້ແນວຄິດໂຮ່ຈີມິນ ເຂົ້າໃນການກໍ່ສ້າງ
ກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ
ກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ
ທ່ານພົນເອກ ຟານວັນຢາງ, ກຳມະການກົມການເມືອງ, ລັດຖະມົນຕີກະຊວງປ້ອງກັນປະເທດ ໂອ້ລົມແລະໃຫ້ກຳລັງໃຈ ພະນັກງານ ນັກຮົບ ແລະ ທະຫານລາດຍິງ ທີ່ເຂົ້າຮ່ວມຂະບວນສວນສະໜາມ ເນື່ອງໃນໂອກາດຄົບຮອບ 70 ປີ ໄຊຊະນະດ້ຽນບຽນຝູ _ແຫຼ່ງ: tienphong.vn
ໂດຍສືດທອດແນວຄິດ “ປະຊາຊົນເປັນຮາກເຫງົ້າ” ໃນປະຫວັດສາດຂອງຊາດ ແລະ ການໝູນໃຊ້ລັດທະມາກ-ເລນິນກ່ຽວກັບບົດບາດຂອງມະຫາປະຊາຊົນໃນປະຫວັດສາດຢ່າງປະດິດສ້າງ, ເລີ່ມຈາກພຶດຕະກຳການປະຕິວັດ ເຊິ່ງໂດຍກົງແມ່ນພຶດຕິກຳການກໍ່ສ້າງກຳລັງປະກອບອາວຸດປະຊາຊົນເປັນແກ່ນສານໃຫ້ແກ່ພາລະກິດການຕໍ່ສູ້ປົດປ່ອຍຊາດ, ດັ່ງນັ້ນຕັ້ງແຕ່ຕົ້ນ, ປະທານໂຮ່ຈີມິນໄດ້ສ້າງແນວຄິດ ແລະ ເບິ່ງແຍງດູແລໂດຍກົງໃນການສ້າງກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ. ນີ້ແມ່ນການສະແດງຄວາມສູງທາງສະຕິປັນຍາຂອງໂຮ່ຈີມິນ, ແນໃສ່ກໍ່ສ້າງກອງທັບປະຊາຊົນຫວຽດນາມໃຫ້ເປັນກອງທັບປະຕິວັດແບບໃໝ່, ມີທາດແທ້ຂອງຊົນຊັ້ນກຳມະກອນ ແລະ ມີລັກສະນະປະຊາຊົນ, ລັກສະນະຊາດທີ່ເລິກເຊິ່ງ. ເພິ່ນຢືນຢັນວ່າ: “ກອງທັບຂອງເຮົາແມ່ນກອງທັບປະຊາຊົນ, ເກີດຈາກປະຊາຊົນ, ຕໍ່ສູ້ເພື່ອປະຊາຊົນ, ຮັກຊາດ, ຮັກປະຊາຊົນ”(1). ພ້ອມກັນນັ້ນ, ເພິ່ນຍາມໃດກໍເອົາໃຈໃສ່ສັ່ງສອນພະນັກງານ ແລະທະຫານ ໃຫ້ຝຶກຝົນ ຫຼໍ່ຫຼອມຢ່າງບໍ່ຢຸດຢັ້ງ ເພື່ອສ້າງຄຸນສົມບັດ ສິນທຳຂອງທະຫານປະຕິວັດໃນດ້ານຄວາມສຳພັນ ແລະການສື່ສານກັບປະຊາຊົນ. ນັບແຕ່ເດືອນມີນາ 1947, ເພິ່ນຊີ້ໃຫ້ເຫັນເຖິງສິ່ງທີ່ຈຳເປັນຕ້ອງເຜີຍແຜ່ຢ່າງທັນການ ແລະ ເປັນປະຈຳໃຫ້ແກ່ທະຫານ: “3. ຢ່າແຕະຕ້ອງເຂັມຫຼືເສັ້ນດ້າຍຂອງປະຊາຊົນ. 4. ເມື່ອມາຕັ້ງຄ້າຍ ແລະ ເມື່ອຖອນທະຫານອອກໄປ, ຕ້ອງຮັກສາຄວາມສະອາດເຮືອນຊານ ແລະຮົ້ວສວນຂອງປະຊາຊົນ. 5. ຕ້ອງສຸພາບໃນການປາກເວົ້າແລະການເຄື່ອນໄຫວ, ນັບຖືຜູ້ເຖົ້າແກ່ ແລະ ຮັກເດັກ. 6. ການຊື້-ຂາຍຕ້ອງມີຄວາມເປັນທຳ. 7. ຖ້າຢືມສິ່ງໃດສິ່ງໜຶ່ງ ຕ້ອງສົ່ງຄືນດ້ວຍຄວາມກະລຸນາ. 8. ຖ້າເຮັດສິ່ງໃດເສຍຫາຍ ຕ້ອງຊົດໃຊ້. 9. ຕ້ອງຊ່ວຍເຫຼືອປະຊາຊົນເລື່ອງໃຫຍ່ຫຼືເລື່ອງນ້ອຍ...”(2). ນີ້ແມ່ນບັນດາເນື້ອໃນຕົ້ນຕໍເພື່ອສ້າງຄຸນສົມບັດແລະສິນທຳຂອງທະຫານປະຕິວັດ, ສ້າງຄຸນສົມບັດຂອງ “ທະຫານຂອງລຸງໂຮ່” ແລະ ໃຫ້ກອງທັບປະຊາຊົນຫວຽດນາມແມ່ນກອງທັບຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ.
ໃນປະຈຸບັນ, ພາລະກິດການສ້າງສາ ແລະ ປົກປັກຮັກສາປະເທດຊາດກຳລັງປະເຊີນກັບໂອກາດ ແລະ ສິ່ງທ້າທາຍຫຼາຍຢ່າງທີ່ແຊກຊ້ອນກັນ. ສະພາບການໂລກ ແລະພາກພື້ນສືບຕໍ່ຜັນປ່ຽນຢ່າງວ່ອງໄວ ສັບສົນ ແລະ ຄາດເດົາໄດ້ຍາກ. ບັນດາອິດທິກຳລັງສັດຕູກຳລັງເພີ່ມທະວີການຕ້ານທານທຳລາຍ ພັກກອມມູນິດຫວຽດນາມ, ລັດ ແລະ ກອງທັບຫວຽດນາມ ດ້ວຍກົນອຸບາຍອັນຊົ່ວຮ້າຍ ເພື່ອບິດເບືອນ ແລະປະຕິເສດທາດແທ້ ແລະມູນເຊື້ອຂອງ “ທະຫານຂອງລຸງໂຮ່”, ກະຕຸ້ນໃຫ້ເກີດການແບ່ງແຍກຄວາມສາມັກຄີ ແລະການພົວພັນທີ່ໃກ້ຊິດສະໜິດແໜ້ນລະຫວ່າງກອງທັບແລະປະຊາຊົນ. ໜ້າທີ່ປົກປັກຮັກສາອະທິປະໄຕຜືນແຜ່ນດິນແຫ່ງຊາດ, ອະທິປະໄຕທາງທະເລ ແລະ ໝູ່ເກາະ ພວມວາງຄວາມຕ້ອງການໃໝ່ອອກມາ. ຕໍ່ໜ້າສະພາບການດັ່ງກ່າວ, ກອງທັບຕ້ອງສະແດງໃຫ້ເຫັນຢ່າງຈະແຈ້ງເຖິງບົດບາດແກນກາງ ໃນການປົກປັກຮັກສາປະເທດຊາດ, ປົກປັກຮັກສາພັກ, ລັດ, ປະຊາຊົນ ແລະ ປົກປັກຮັກສາບັນດາໝາກຜົນແຫ່ງການປະຕິວັດ.
ເພື່ອເຮັດສຳເລັດໜ້າທີ່ຮັບຜິດຊອບອັນສະຫງ່າລາສີ ແລະພາລະກິດອັນສັກສິດນັ້ນ, ຕ້ອງໝູນໃຊ້ແນວຄິດໂຮ່ຈິມິນຢ່າງປະດິດສ້າງ ເພື່ອສືບຕໍ່ກໍ່ສ້າງກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ. ຕາມນັ້ນ, ຕ້ອງສຸມໃສ່ຜັນຂະຫຍາຍປະຕິບັດມາດຕະການແກ້ໄຂຈຳນວນໜຶ່ງດັ່ງນີ້:
ທີໜຶ່ງ, ຮັກສາ ແລະ ເພີ່ມທະວີການນຳພາຂອງພັກໃນຂະບວນການກໍ່ສ້າງກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ.
ແນວຄິດກ່ຽວກັບກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ ແມ່ນການສະແດງຄວາມສູງທາງສະຕິປັນຍາຂອງໂຮ່ຈີມິນ; ແມ່ນທິດທາງເພື່ອໃຫ້ ພັກກອມມູນິດຫວຽດນາມໝູນໃຊ້ເຂົ້າໃນການນຳພາ, ຊີ້ນຳການກໍ່ສ້າງກອງທັບໃຫ້ເຕີບໃຫຍ່ເຂັ້ມແຂງ, ຕອບສະໜອງຄວາມຕ້ອງການແລະໜ້າທີ່ໃນທຸກໄລຍະຂອງການປະຕິວັດ. ປະທານໂຮ່ຈີມິນກ່າວວ່າ, “ເຄົາລົບປະຊາຊົນ” ບໍ່ພຽງແຕ່ແມ່ນການເຄົາລົບປະຊາຊົນເທົ່ານັ້ນ ແຕ່ຕ້ອງເຄົາລົບການນຳພາຂອງພັກ ແລະການຄຸ້ມຄອງຂອງລັດ, ເຄົາລົບແລະຊ່ວຍເຫຼືອຄະນະພັກ ແລະອຳນາດການປົກຄອງທ້ອງຖິ່ນ. ໃນກອງປະຊຸມພະນັກງານຊັ້ນສູງທົ່ວກອງທັບ (ວັນທີ 20 ມີນາ 1958), ເພິ່ນເນັ້ນໜັກວ່າ: “ຕ້ອງສາມັກຄີກອງທັບ, ລັດຖະບານ, ພັກ. ກອງທັບຕ້ອງເຄົາລົບການນຳພາຂອງພັກ ແລະລັດຖະບານ, ຕ້ອງຊ່ວຍເຫຼືອຄະນະພັກ ແລະ ອຳນາດການປົກຄອງທ້ອງຖິ່ນ”(3).
ໝູນໃຊ້ແນວຄິດໂຮ່ຈີມິນກ່ຽວກັບບັນຫານີ້, ບໍ່ວ່າໃນສະຖານະການໃດ ເງື່ອນໄຂໃດ ກໍຕ້ອງ “ຮັກສາແລະເພີ່ມທະວີການນຳພາເດັດຂາດ, ໂດຍກົງໃນທຸກດ້ານຂອງພັກ”(4). ນີ້ແມ່ນຄວາມຮຽກຮ້ອງຕ້ອງການພື້ນຖານ ມີຄວາມໝາຍສຳຄັນທີ່ສຸດ, ຕັດສິນຊີ້ຂາດທາດແທ້ປະຕິວັດ ທິດທາງ ເປົ້າໝາຍການສູ້ຮົບຂອງກອງທັບ, ຮັບປະກັນໃຫ້ກອງທັບຈົງຮັກພັກດີຢ່າງເດັດຂາດຕໍ່ປະເທດຊາດ ຕໍ່ພັກ ລັດ ແລະ ປະຊາຊົນ, ເປັນກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນທີ່ແທ້ຈິງ. ໃນນັ້ນ, ບັນຫາກຸນແຈ ມີຄວາມໝາຍຕັດສິນທີ່ສຸດແມ່ນຕ້ອງເອົາໃຈໃສ່ເປັນປະຈຳເຖິງການ “ກໍ່ສ້າງຄະນະພັກ, ອົງການຈັດຕັ້ງພັກ ແລະ ຖັນແຖວພະນັກງານ ສະມາຊິກພັກໃນກອງທັບ... ໃຫ້ມີຄວາມຈົງຮັກພັກດີຢ່າງເດັດຂາດຕໍ່ປະເທດຊາດ ຕໍ່ພັກ ລັດ ແລະ ປະຊາຊົນ, ຍຶດໝັ້ນໃນເປົ້າໝາຍ ແລະອຸດົມຄະຕິປະຕິວັດຂອງພັກ”(5); ປະຕິບັນຫຼັກການໝູ່ຄະນະນຳພາ, ບຸກຄົນຮັບຜິດຊອບ ຢ່າງເຂັ້ມງວດ.
ໃນສະພາບການປະຈຸບັນ, ເພື່ອຮັກສາແລະເພີ່ມທະວີການນຳພາຂອງພັກກອມມູນິດຫວຽດນາມໃນຂະບວນການກໍ່ສ້າງກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ, ຈຳເປັນຕ້ອງສຸມໃສ່ກໍ່ສ້າງອົງຄະນະພັກກອງທັບໃຫ້ “ເຂັ້ມແຂງທາງດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ”(6); ເປັນແບບຢ່າງໃນການປະຕິບັດມະຕິກອງປະຊຸມຄັ້ງທີ່ 4 ຂອງຄະນະບໍລິຫານງານສູນກາງພັກຊຸດທີ່ XI, XII ແລະ ຂໍ້ສະຫຼຸບຂອງກອງປະຊຸມຄັ້ງທີ່ 4 ຂອງຄະນະບໍລິຫານງານສູນກາງພັກຊຸດທີ່ XIII ກ່ຽວກັບການກໍ່ສ້າງແລະປັບປຸງພັກ; ສົມທົບຢ່າງແໜ້ນແຟ້ນລະຫວ່າງການກໍ່ສ້າງພັກກັບການປົກປ້ອງພັກ, ບໍ່ໃຫ້ເກີດ “ການປ່ຽນແປງຕົນເອງ”, “ການຫັນປ່ຽນຕົນເອງ” ຢູ່ພາຍໃນ, ເປັນເຈົ້າການໃນການຕໍ່ສູ້ເພື່ອເອົາຊະນະກົນອຸບາຍຂອງບັນດາອິດທິກຳລັງສັດຕູທີ່ຈະ “ປົດການເມືອງ” ຈາກກອງທັບ. ຄະນະພັກ, ອົງການຈັດຕັ້ງພັກທຸກຂັ້ນ ຕ້ອງປ່ຽນແປງໃໝ່ແບບວິທີການນຳພາຢ່າງແຂງແຮງ, ຍົກສູງຄຸນນະພາບການດຳເນີນຊີວິດພັກ; ເພີ່ມທະວີວຽກງານກວດກາ, ຕິດຕາມກວດກາ, ຮັກສາວິໄນຂອງພັກຢ່າງເຂັ້ມງວດ. ໃນສະເພາະໜ້າ, ຕ້ອງຕັ້ງໜ້າປະຕິບັດຕາມຄຳຊີ້ນຳຂອງສະຫາຍເລຂາທິການໃຫຍ່ ຫງວຽນຝູຈ້ອງ: “ອົງຄະນະພັກກອງທັບຕ້ອງເປັນແບບຢ່າງ, ເປັນຕົວຢ່າງໃນທຸກດ້ານໃນທົ່ວກອງທັບ. ພະນັກງານ ສະມາຊິກພັກແຕ່ລະຄົນ, ໂດຍສະເພາະພະນັກງານການນຳ ແລະຜູ້ບັນຊາການທຸກຂັ້ນ, ຕ້ອງ “ທົບທວນຕົນເອງ, ແກ້ໄຂຕົນເອງ” ຢ່າງເປັນປະຈຳ ເພື່ອໃຫ້ບໍ່ວ່າໃນສະພາບການໃດກໍຕາມ, ບໍ່ວ່າຈະຫຍຸ້ງຍາກຫຼືສັບສົນປານໃດກໍຕາມ, ກໍຍັງຄົງຮັກສາຄຸນນະພາບຂອງ “ທະຫານຂອງລຸງໂຮ່” ໄດ້; ຕ້ອງຄວບຄຸມຕົນເອງ ແລະຝຶກຝົນຫຼໍ່ຫຼອມຕົນຢ່າງເປັນປົກກະຕິ; ສູ້ຊົນຢ່າງມີປະສິດທິຜົນໃນວຽກງານປ້ອງກັນ ແລະ ຕ້ານການສໍ້ລາດບັງຫຼວງ ແລະ ຄວາມຫຍໍ້ທໍ້, ເຮັດໃຫ້ກອງທັບຂອງພວກເຮົາເຂັ້ມແຂງຂຶ້ນ, ເຕີບໃຫຍ່ຂຶ້ນ, ສົມຄວນທີ່ຈະເປັນ “ທະຫານຂອງລຸງໂຮ່”, ສົມຄວນໄດ້ຮັບຄວາມໄວ້ວາງໃຈ ແລະຄວາມຮັກແພງຂອງພັກ, ລັດ ແລະ ປະຊາຊົນ”(7).
ທີສອງ, ສຶກສາອົບຮົມຍົກສູງຄວາມຮັບຮູ້, ຄວາມຮັບຜິດຊອບຂອງພະນັກງານ ນັກຮົບ ກ່ຽວກັບການຮັກສາ ແລະເພີ່ມທະວີການພົວພັນໃກ້ຊິດ ລະຫວ່າງກອງທັບກັບປະຊາຊົນ.
ຕາມປະທານໂຮ່ຈີມິນ, ກອງທັບປະຊາຊົນຫວຽດນາມແມ່ນກອງທັບຂອງປະຊາຊົນ, ເກີດມາຈາກປະຊາຊົນ, ຮັບໃຊ້ ແລະຕໍ່ສູ້ເພື່ອປະຊາຊົນ. ນີ້ແມ່ນທັດສະນະທີ່ຊີ້ໃຫ້ເຫັນຢ່າງຈະແຈ້ງເຖິງທາດແທ້ ແລະ ແຫຼ່ງກຳລັງຂອງກອງທັບປະຊາຊົນຫວຽດນາມ. ກອງທັບປະຊາຊົນຫວຽດນາມແມ່ນກອງທັບປະຕິວັດ, ແມ່ນກາງທັບຂອງປະຊາຊົນ; ພະນັກງານ ນັກຮົບທຸກຄົນແມ່ນລູກຫຼານຂອງປະຊາຊົນ. ການເກີດ ການເຕີບໂຕ ແລະຄວາມເຂັ້ມແຂງຂອງກອງທັບລ້ວນມາຈາກປະຊາຊົນ; ໄດ້ຮັບການລ້ຽງດູ ປົກປ້ອງ ແລະ ຊ່ວຍເຫຼືອຈາກປະຊາຊົນ; ແລະ ກອງທັບຕໍ່ສູ້ເພື່ອເປົ້າໝາຍນຳເສລີພາບ ແລະຄວາມສຸກມາໃຫ້ປະຊາຊົນ. ເພາະສະນັ້ນ, ໃນສະພາບການໃໝ່ປະຈຸບັນ, ຕ້ອງອົບຮົມສຶກສາ ຍົກສູງຄວາມຮັບຮູ້ ແລະຄວາມຮັບຜິດຊອບໃຫ້ພະນັກງານ ນັກຮົບໃນທົ່ວກອງທັບເຫັນແຈ້ງວ່າ ປະຊາຊົນແມ່ນພື້ນຖານ, ແມ່ນຮາກເຫງົ້າຂອງກອງທັບ. ຖ້າກອງທັບຢາກໝັ້ນຄົງເຂັ້ມແຂງກໍຕ້ອງຮູ້ຈັກອີງໃສ່ພື້ນຖານ ຮາກເຫງົ້ານັ້ນ ດັ່ງທີ່ປະທານໂຮ່ຈີມິນໄດ້ກ່າວໄວ້ວ່າ: “ຖ້າຮາກແຂງແຮງ ຕົ້ນໄມ້ກໍຄົງທົນ, ສ້າງໄຊຊະນະບົນພື້ນຖານປະຊາຊົນ”(8). “ພິເສດ, ຕ້ອງອົບຮົມສຶກສາເພື່ອໃຫ້ພະນັກງານ ນັກຮົບທຸກຄົນໃນກອງທັບ ຊາບຊຶມຄຳຕັກເຕືອນຂອງເພິ່ນ ວ່າ: “ປະຊາຊົນເປັນຄືນ້ຳ, ກອງທັບຄືປາ. ພວກເຮົາຕ້ອງເຮັດໃຫ້ປະຊາຊົນຊ່ວຍເຫຼືອເຮົາຢ່າງສຸດໃຈຈຶ່ງຈະເອົາຊະນະສັດຕູໄດ້”(9).
ພະນັກງານ ນັກຮົບໃນກອງທັບຕ້ອງຮັບຮູ້ຢ່າງຖືກຕ້ອງ ແລະປະຕິບັດຢ່າງດີ ແນວຄິດທີ່ປະທານໂຮ່ຈີມິນຊີ້ໃຫ້ເຫັນ: ກອງທັບຕ້ອງ “ກະຕັນຍູຕໍ່ປະຊາຊົນ”. ແລະຕ້ອງຊາບຊຶມຄຳຕັກເຕືອນຂອງເພິ່ນ ວ່າ: “ເຮົາຕີສັດຕູກໍເພື່ອປະຊາຊົນ. ແຕ່ເຮົາບໍ່ແມ່ນ “ຜູ້ກູ້ຊີວິດ” ຂອງປະຊາຊົນ, ແຕ່ເຮົາມີຄວາມຮັບຜິດຊອບຮັບໃຊ້ປະຊາຊົນ”(10). ພ້ອມກັນນັ້ນ, ພະນັກງານ ນັກຮົບ ຍາມໃດກໍ່ເຄົາລົບນັບຖືປະຊາຊົນ, ດັ່ງທີ່ປະທານໂຮ່ຈີມິນຮຽກຮ້ອງ: “ພະນັກງານ, ນັກຮົບທຸກຄົນຕ້ອງ:... ຮັກປະຊາຊົນ, ເຄົາລົບປະຊາຊົນ ແລະເຮັດດີຕໍ່ປະຊາຊົນ”(11). ເພິ່ນຊີ້ແຈ້ງວ່າ: “ເຮົາຕ້ອງເຄົາລົບປະຊາຊົນ. ການເຄົາລົບມີຫຼາຍວິທີ, ບໍ່ພຽງແຕ່ທັກທາຍຢ່າງສຸພາບ ແລະດ້ວຍຄວາມເຄົາລົບເທົ່ານັ້ນ. ເຮົາຕ້ອງບໍ່ສິ້ນເປືອງຊັບພະຍາກອນ ແລະວັດຖຸຂອງປະຊາຊົນ. ໃນການລະດົມກໍ່ຄວນຢູ່ໃນລະດັບປານກາງ, ບໍ່ຄວນຫຼາຍເກີນໄປ ແລະສິ້ນເປືອງໂດຍບໍ່ຈໍາ. ເຮົາຕ້ອງຫຼີກລ່ຽງສິ່ງທີ່ເປັນອັນຕະລາຍຕໍ່ຊີວິດຂອງປະຊາຊົນຢ່າງສະຫຼາດ. ການຮູ້ວິທີຊ່ວຍເຫຼືອປະຊາຊົນຍັງໝາຍເຖິງການຮູ້ວິທີເຄົາລົບປະຊາຊົນ”(12). ດັ່ງນັ້ນ ຕາມທີ່ປະທານໂຮ່ຈີມິນກ່າວນັ້ນ, ຖ້າພະນັກງານ ນັກຮົບຂອງກອງທັບເຄົາລົບປະຊາຊົນຢ່າງແທ້ຈິງ ປະຊາຊົນກໍຈະຜູກພັນຢ່າງໃກ້ຊິດສະໜິດສະໜົມກັບກອງທັບ ເມື່ອນັ້ນກອງທັບຈຶ່ງເຮັດຫຼ້ອນພາລະໜ້າທີ່ເປັນກອງທັບສູ້ຮົບ, ກອງທັບເຮັດວຽກ, ກອງທັບອອກແຮງງານ ຜະລິດ, ແລະ ເປັນກຳລັງການເມືອງທີ່ເຊື່ອຖືໄດ້ຂອງພັກ ລັດ ແລະ ປະຊາຊົນໃນສະຖານະການປະຈຸບັນຢ່າງແທ້ຈິງ.
ເພື່ອໃຫ້ກອງທັບປະຊາຊົນຫວຽດນາມ ໄດ້ຮັບຄວາມໄວ້ເນື້ອເຊື່ອໃຈ ຄວາມນັບຖື ແລະ ຄວາມຮັກແພງຂອງປະຊາຊົນ, ພະນັກງານ ນັກຮົບ ຍາມໃດກໍ່ຕ້ອງມີສະຕິແລະຄວາມຮັບຜິດຊອບ ໃນການຊ່ວຍເຫຼືອປະຊາຊົນ, ດັ່ງທີ່ປະທານໂຮ່ຈີມິນເຄີຍຕັກເຕືອນວ່າ: ເຮົາຕ້ອງຊ່ວຍເຫຼືອປະຊາຊົນ ວຽກໃຫຍ່ຫຼືນ້ອຍ ຕັ້ງແຕ່ເກັບກ່ຽວ, ເກັບຟືນ, ເກັບນ້ຳ, ຕັດຫຍິບ, ເຮັດຄວາມສະອາດສັ້ນທາງບ້ານ ແລະຖະໜົນຫົນທາງ, ຈົນເຖິງວຽກງານທີ່ໃຫຍ່ກວ່າ ເຊັ່ນ: ການເພີ່ມພູນຜະລິດຜົນ, ການສອນພາສາປະຈຳຊາດ ແລະ ການປະຕິບັດອະນາໄມທົ່ວໄປ... ພິເສດແມ່ນ, ໃນການພົວພັນໂດຍກົງກັບປະຊາຊົນ, ເຮົາຄວນເຮັດແນວໃດເພື່ອວ່າເມື່ອເຮົາຍັງມາບໍ່ຮອດ ມີຄົນຄອຍຖ້າ ແລະເມື່ອເຮົາໄປບ່ອນອື່ນ ມີຄົນຄິດຮອດ.
ໃນສະພາບການປະຈຸບັນ, ພະນັກງານ ນັກຮົບຂອງກອງທັບຍັງຕ້ອງຕັ້ງໜ້າໃນການເຂົ້າຮ່ວມການປົກປ້ອງແລະຮັກສາຄວາມເປັນລະບຽບຮຽບຮ້ອຍ, ຄວາມປອດໄພ, ຮັກສາຊີວິດການເປັນຢູ່ຂອງປະຊາຊົນຢ່າງສະຫງົບສຸກ; ຊ່ວຍເຫຼືອປະຊາຊົນລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ພັດທະນາເສດຖະກິດ, ສອນ “ໜັງສື”, ນຳເອົາວິທະຍາສາດແລະເຕັກນິກມາສູ່ປະຊາຊົນໃນເຂດຫ່າງໄກສອກຫຼີກ, ຊາຍແດນ, ເກາະທະເລ; ຊ່ວຍເຫຼືອປະຊາຊົນປ້ອງກັນແລະຕ້ານໄພທຳມະຊາດ, ໂດຍສະເພາະ ການປ້ອງກັນແລະຕ້ານພາຍຸລົງແດງ, ອຸທົກກະໄພ... ຖ້າພະນັກງານແລະນັກຮົບທຸກຄົນເຂົ້າໃຈ ແລະ ປະຕິບັດສິ່ງດັ່ງກ່າວເປັນຢ່າງດີ ໃນສະພາບການປະຈຸບັນ, ແນ່ນອນວ່າພວກເຂົາຈະໄດ້ຮັບຄວາມໄວ້ເນື້ອເຊື່ອໃຈ, ຄວາມນັບຖື ແລະ ຄວາມຮັກແພງຂອງປະຊາຊົນ ແລະ ເປັນກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນຢ່າງແທ້ຈິງ.
ເພື່ອປະກອບສ່ວນກໍ່ສ້າງກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນໃນສະພາບການປະຈຸບັນ, ວຽກງານຂົນວາຍປະຊາຊົນຂອງກອງທັບຕ້ອງສຸມໃສ່ປະຕິບັດໜ້າທີ່ສຳຄັນຄື: ຕັ້ງໜ້າເຂົ້າຮ່ວມໃນການກໍ່ສ້າງລະບົບການເມືອງຢູ່ຮາກຖານໃຫ້ໝັ້ນຄົງເຂັ້ມແຂງ, ພ້ອມກັນນັ້ນ ກໍເຂົ້າຮ່ວມການພັດທະນາເສດຖະກິດ ວັດທະນະທຳ ສັງຄົມຢູ່ທ້ອງຖິ່ນ; ຮັກສາແລະເພີ່ມທະວີສະພົວພັນສາມັກຄີທະຫານແລະປະຊາຊົນ, ເສີມຂະຫຍາຍທາດແທ້ ແລະມູນເຊື້ອຂອງ “ທະຫານຂອງລຸງໂຮ່” ໃນໄລຍະໃໝ່, ຍົກສູງຈິດສຳນຶກ “ຮັບໃຊ້ເພື່ອປະຊາຊົນ” ໃຫ້ພະນັກງານ ນັກຮົບ. ເພື່ອປະຕິບັດໜ້າທີ່ນີ້ຢ່າງມີຄຸນນະພາບ ແລະປະສິດທິຜົນ, ວຽກງານຂົນວາຍປະຊາຊົນຂອງກອງທັບຕ້ອງຫັນລົງຮາກຖານຢ່າງແຂງແຮງ, ເອົາໃຈໃສ່ແກ້ໄຂບັນດາບັນຫາແທດຈິງໃນຊີວິດຂອງປະຊາຊົນ; ຜ່ານນັ້ນ, ປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ, ລັດ ແລະ ກອງທັບ. ພ້ອມກັນນັ້ນ, ໂຄສະນາແລະຂົນຂວາຍປະຊາຊົນປະຕິບັດແນວທາງ ແຜນນະໄຍບາຍຂອງພັກ, ນະໂຍບາຍແລະກົດໝາຍຂອງລັດຢ່າງດີ; ຕັ້ງໜ້າເຂົ້າຮ່ວມບັນດາຂະບວນການແຂ່ງຂັນກັນຮັກຊາດ ເພື່ອກໍ່ສ້າງບ້ານເກີດເມືອງນອນ ໃຫ້ປະເທດຊາດຈະເລີນຮຸ່ງເຮືອງ.
ບັນດາໜ່ວຍທະຫານປະຈຳການ ແລະ ປະຕິບັດໜ້າທີ່ຢູ່ພື້ນທີ່ຕ່າງໆ ຕ້ອງຕັ້ງໜ້າໃນການຊ່ວຍເຫຼືອອຳນາດການປົກຄອງ ແລະປະຊາຊົນທ້ອງຖິ່ນ ໃນການຮັກສາຄວາມໝັ້ນຄົງທາງການເມືອງ, ຄວາມເປັນລະບຽບຮຽບຮ້ອຍ ແລະຄວາມປອດໄພທາງສັງຄົມ; “ພະນັກງານແລະນັກຮົບລ້ວນແຕ່ຕ້ອງ:... ຮັກປະຊາຊົນ, ເຄົາລົບປະຊາຊົນ ແລະເຮັດດີຕໍ່ປະຊາຊົນ”(13), ຍາມໃດກໍເປັນກອງກຳລັງນຳໜ້າໃນສະຖານທີ່ທີ່ຫຍຸ້ງຍາກລຳບາກທີ່ສຸດ; ຄຽງບ່າຄຽງໄຫຼ່ກັບປະຊາຊົນໃນການປ້ອງກັນແລະຕ້ານພາຍຸ, ອຸທົກກະໄພ, ໄພທຳມະຊາດ, ເຂົ້າຮ່ວມການກູ້ໄພກູ້ຊີບ, ລົບລ້າງຄວາມອຶດຫີວ ຫຼຸດຜ່ອນຄວາມທຸກບາກ, ກໍ່ສ້າງແລະພັດທະນາເສດຖະກິດ. ສືດຕໍ່ສົມທົບປະຕິບັດບັນດາການຂົນຂວາຍໃຫຍ່ເປັນຢ່າງດີ ເຊັ່ນ “ທົ່ວປວງຊົນສາມັກຄີກໍ່ສ້າງຊີວິດວັດທະນະທຳຢູ່ເຂດທີ່ຢູ່ອາໄສ”, “ວັນເພື່ອຜູ້ທຸກຍາກ”, “ຮ່ວມແຮງກັນກໍ່ສ້າງຊົນນະບົດໃໝ່, ຕົວເມືອງອາລະຍະທຳ”, ປະກອບສ່ວນຮັກສາສະຖຽນລະພາບດ້ານວັດຖຸ ແລະ ຈິດໃຈຂອງປະຊາຊົນ.
ທີ່ສີ່, ເສີມຂະຫຍາຍບົດບາດຫຼັກແຫຼ່ງຂອງກອງທັບໃນການກໍ່ສ້າງ “ທ່າສະໜາມຮົບໃນໃຈປະຊາຊົນ”, ພື້ນຖານການປ້ອງກັນປະເທດທົ່ວປວງຊົນ ຕິດພັນກັບພື້ນຖານການປ້ອງກັນຄວາມໝັ້ນຄົງປະຊາຊົນ.
ການກໍ່ສ້າງແລະເສີມຂະຫຍາຍກຳລັງແຮງຂອງ “ທ່າສະໜາມຮົບໃນໃຈປະຊາຊົນ” ແລະ ການກໍ່ສ້າງພື້ນຖານການປ້ອງກັນປະເທດທົ່ວປວງຊົນ ຕິດກັບພື້ນຖານການປ້ອງກັນຄວາມໝັ້ນຄົງປະຊາຊົນ ໃຫ້ໝັ້ນຄົງເຂັ້ມແຂງຮອບດ້ານ ແລະນັບມື້ນັບທັນສະໄໝ ແມ່ນແຜນນະໂຍບາຍຍຸດທະສາດທີ່ສຳຄັນຂອງພັກແລະລັດ. ນີ້ແມ່ນຄວາມຮັບຜິດຊອບຂອງທົ່ວພັກ, ທົ່ວປວງຊົນ ແລະ ຂອງລະບົບການເມືອງທັງໝົດ, ໃນນັ້ນ ກອງທັບປະຊາຊົນມີບົດບາດຫຼັກແຫຼ່ງ. ດັ່ງນັ້ນ, ຕ້ອງອົບຮົມສຶກສາໃຫ້ພະນັກງານ ນັກຮົບມີຄວາມຮັບຮູ້ຢ່າງຈະແຈ້ງກ່ຽວກັບບົດບາດຂອງ “ທ່າສະໜາມຮົບໃນໃຈປະຊາຊົນ” ດັ່ງທີ່ປະທານໂຮ່ຈີມິນຊີ້ວ່າ: “ໃນສັງຄົມ, ເພື່ອໃຫ້ປະສົບຜົນສຳເລັດ ຕ້ອງມີເງື່ອນໄຂ 3 ປະການຄື: ສະພາບອາກາດທີ່ເອື້ອອຳນວຍ, ພູມສັນຖານສະດວກ ແລະ ຄວາມສາມັກຄີຂອງປະຊາຊົນ. ເງື່ອນໄຂທັງສາມນີ້ມີຄວາມສໍາຄັນທັງຫມົດ. ແຕ່ສະພາບອາກາດບໍ່ສໍາຄັນເທົ່າກັບພູມສັນຖານສະດວກ, ແລະພູມສັນຖານສະດວກບໍ່ສໍາຄັນເທົ່າກັບຄວາມສາມັກຄີຂອງປະຊາຊົນ”(14). “ຄວາມສາມັກຄີຂອງປະຊາຊົນ” ໝາຍຄວາມວ່າທຸກຄົນເປັນເອກະພາບ, ແມ່ນຄວາມເຫັນດີເຫັນພ້ອມຂອງປະຊາຊົນທັງໝົດ. ອາໄສສິ່ງດັ່ງກ່າວ “ທ່າສະໜາມຮົບໃນໃຈປະຊາຊົນ” ໄດ້ “ຫຼໍ່ກຳແພງທອງແດງອ້ອມຮອບປະເທດຊາດ”(15), ແລະ “ບໍ່ມີກອງທັບ ຫຼືອາວຸດໃດສາມາດເອົາຊະນະຈິດໃຈແຫ່ງຄວາມເສຍສະຫຼະຂອງຄົນທັງຊາດໄດ້”(16). ບົນພື້ນຖານຂອງຄວາມຮັບຮູ້ນັ້ນ, ການເສີມຂະຫຍາຍສຸດຂີດບົດບາດຫຼັກແຫຼ່ງຂອງກອງທັບໃນການກໍ່ສ້າງ “ທ່າສະໜາມຮົບໃນໃຈປະຊາຊົນ” ແລະການກໍ່ສ້າງພື້ນຖານການປ້ອງກັນປະເທດທົ່ວປວງຊົນ ຕິດກັບພື້ນຖານການປ້ອງກັນຄວາມໝັ້ນຄົງປະຊາຊົນ, ຮັບປະກັນໃຫ້ກອງທັບເປັນກອງທັບຂອງປະຊາຊົນ ໂດຍປະຊາຊົນ ເພື່ອປະຊາຊົນ./.
--------------------------
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 6, ໜ້າ 264
(2) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 135
(3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 11, ໜ້າ 367
(4), (5), (6) ເອກະສານກອງປະຊຸມໃຫຍ່ຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 160, 158, 158
(7) “ເລຂາທິການໃຫຍ່ ຫງວຽນຝູຈ້ອງ ເຂົ້າຮ່ວມກອງປະຊຸມການເມືອງ-ການທະຫານທົ່ວກອງທັບປີ 2022: ອົງຄະນະພັກກອງທັບຕ້ອງເປັນແບບຢ່ງ, ເປັນຕົວຢ່າງໃນທຸກດ້ານໃນທົ່ວພັກ”, ໜັງສືພິມປະຊາຊົນ, ສະບັບເລກທີ 24522, ອອກວັນທີ 21 ທັນວາ 2022, ໜ້າ 2
(8) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 502
(9), (10) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 76
(11) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 501
(12) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 6, ໜ້າ 458
(13) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 7, ໜ້າ 501
(14), (15) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 594, 151
(16) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 4, ໜ້າ 89
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1039 (ເດືອນມິຖຸນາ 2024)
