ຊົນຊັ້ນຊາວນາຫວຽດນາມ ປະກອບສ່ວນໃນການບັນລຸເປົ້າໝາຍ
“ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທຳ
ແລະອາລະຍະທຳ” ຜ່ານເກືອບ 40 ປີແຫ່ງການປ່ຽນແປງໃໝ່
“ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທຳ
ແລະອາລະຍະທຳ” ຜ່ານເກືອບ 40 ປີແຫ່ງການປ່ຽນແປງໃໝ່
ວກ. - ໃນພາລະກິດສ້າງສາ ແລະ ພັດທະນາປະເທດ, ຊົນຊັ້ນຊາວກະສິກອນຫວຽດນາມ ແມ່ນກຳລັງໃຫຍ່ທີ່ສຸດ ແລະ ພວມເພີ່ມທະວີບົດບາດເປັນອັດຕະພາບ ແລະ ໃຈກາງໃນການພັດທະນາກະສິກຳ, ເສດຖະກິດຊົນນະບົດ ແລະ ກໍ່ສ້າງຊົນນະບົດໃໝ່; ເຂົ້າຮ່ວມການຮັບປະກັນການປ້ອງກັນປະເທດ ປ້ອງກັນຄວາມສະຫງົບ, ປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທຳພື້ນເມືອງຢູ່ຊົນນະບົດ. ບົດບາດ ແລະ ກຳລັງແຮງຂອງຊາວກະສິກອນນັບມື້ນັບໄດ້ຮັບຄວາມເອົາໃຈໃສ່ ແລະເສີມຂະຫຍາຍ, ປະກອບສ່ວນປະຕິບັດເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທຳ ແລະ ອາລະຍະທຳ”.
ກຳມະການກົມການເມືອງ, ນາຍົກລັດຖະມົນຕີ ຟ້າມ ມິງ ຈິ໊ງ ຢ້ຽມຢາມເຂດຜະລິດກະສິກຳ ຢູ່ຕາແສງ ຮາດລ້ອດ, ເມືອງ ມາຍເຊີນ, ແຂວງ ເຊີນລາ _ພາບ: TTXVN
ກ່ຽວກັບເປົ້າໝາຍ "ປະຊາຊົນຮັ່ງມີ":
ດ້ວຍນະໂຍບາຍປ່ຽນແປງໃໝ່ຂອງພັກແລະລັດ ແລະ ດ້ວຍຄຸນສົມບັດດຸໝັ່ນ ແລະທົນທານໜຽວແໜ້ນ, ຊາວກະສິກອນໄດ້ຄ່ອຍໆຜ່ານຜ່າຕົນເອງ, ຕັ້ງໜ້າເຂົ້າຮ່ວມການຜະລິດ, ພັດທະນາເສດຖະກິດຄອບຄົວ, ເຮັດໃຫ້ຊີວິດທາງດ້ານວັດຖຸ ແລະ ຈິດໃຈຂອງຊາວກະສິກອນນັບມື້ນັບດີຂຶ້ນ. ຈຳນວນຊາວກະສິກອນທີ່ເກັ່ງດ້ານການຜະລິດ, ດຳເນີນທຸລະກິດ ແລະ ມີລາຍໄດ້ສູງແມ່ນເພີ່ມຂຶ້ນ, ມີປະມານ 3,6 ລ້ານຄອບຄົວ/ປີ ໃນໄລຍະປີ 2017–2022, ໃນນັ້ນ ຄອບຄົວມີລາຍໄດ້ 500 ລ້ານດົ່ງຕໍ່ປີ ເພີ່ມຂຶ້ນ 3 ເທົ່າ, ຈຳນວນຄອບຄົວທີ່ມີລາຍໄດ້ກວ່າ 1 ຕື້ດົ່ງຕໍ່ປີ ເພີ່ມຂຶ້ນ 2 ເທົ່າ ເມື່ອທຽບໃສ່ໄລຍະປີ 2012–2017(1); ພາກສ່ວນຊາວກະສິກອນທີ່ມີເງື່ອນໄຂສະດວກ ກໍ່ໄດ້ມີບາດກ້າວບຸກທະລຸ ແລະ ຮັ່ງມີຢ່າງວ່ອງໄວ ດ້ວຍລາຍໄດ້ປີລະກວ່າ 100 ຕື້ດົ່ງ. ບໍ່ພຽງແຕ່ສ້າງຮັ່ງຄູນມີໃຫ້ຕົວເອງເທົ່ານັ້ນ, ຄອບຄົວເຫຼົ່ານີ້ຍັງຕັ້ງໜ້າເຂົ້າຮ່ວມການຊ່ວຍເຫຼືອ ແລະ ສະໜັບສະໜູນບັນດາຄອບຄົວທີ່ທຸກຍາກເຮັດກະສິກຳ ໃຫ້ຫຼຸດພົ້ນຈາກຄວາມທຸກຍາກ. ໃນໄລຍະປີ 2017–2022 ມີຫຼາຍກວ່າ 815.000 ເທື່ອຄອບຄົວທຸກຍາກ ແລະ ຄອບຄົວປະສົບກັບຄວາມຫຍຸ້ງຍາກໄດ້ຮັບການຊ່ວຍເຫຼືອດ້ວຍພືດ, ເມັດພືດ, ວັດຖຸອຸປະກອນກະເສດ ລວມມູນຄ່າກວ່າ 6.720 ຕື້ດົ່ງ; ນັບແຕ່ນັ້ນມາ, ຄອບຄົວຊາວກະສິກອນຫຼາຍກວ່າ 108.000 ຄອບຄົວໄດ້ຫຼຸດພົ້ນຈາກຄວາມທຸກຍາກ ແລະກາຍເປັນຮັ່ງມີ; ເຮືອນການກຸສົນ, ເຮືອນແຫ່ງຄວາມຮັກ, ເຮືອນຮົ່ມເຢັນຊາວນາ ນັບພັນຫຼັງໄດ້ຮັບການສ້າງຂຶ້ນ ແລະ ຊ່ວຍໃຫ້ 1,2 ລ້ານຄອບຄົວທຸກຍາກມີແຫຼ່ງກຳລັງ ເພື່ອພັດທະນາການຜະລິດ; ເງິນຫຼາຍຮ້ອຍຕື້ດົ່ງໄດ້ປະກອບສ່ວນເຂົ້າໃນກອງທຶນທ້ອງຖິ່ນ(2).
ຄວາມມານະພະຍາຍາມຂອງຊາວກະສິກອນໄດ້ປະກອບສ່ວນເພີ່ມລາຍໄດ້ຕໍ່ຫົວຄົນຂອງຫວຽດນາມ ຈາກ 498,58 ໂດລາສະຫະລັດໃນປີ 2000, ຂຶ້ນເປັນ 3.718 ໂດລາສະຫະລັດ ໃນປີ 2021 ແລະ ເພີ່ມຂຶ້ນເປັນ 4.162,94 USD ໃນປີ 2022; ຜ່ານນັ້ນ, ນຳຫວຽດນາມຈາກອັນດັບ 173/200 ໃນໂລກໃນປີ 2000, ຂຶ້ນເປັນ 124/200 ໃນປີ 2021 ແລະ 117/200 ໃນປີ 2022(3).
ກ່ຽວກັບເປົ້າໝາຍ “ປະເທດຊາດເຂັ້ມແຂງ”: ເມື່ອກ້າວເຂົ້າສູ່ໄລຍະການປ່ຽນແປງໃໝ່, ດ້ວຍນະໂຍບາຍມອບເໝົາງານກະສິກຳ, ຊາວກະສິກອນໄດ້ຊຸກຍູ້ຈິດໃຈເປັນເອກະລາດໃນການຜະລິດ, ເຮັດໃຫ້ຫວຽດນາມຫຼຸດພົ້ນອອກຈາກສະພາບຂາດແຄນສະບຽງອາຫານ (ແຕ່ລະປີຕ້ອງໄດ້ນຳເຂົ້າສະບຽງອາຫານແຕ່ 500.000 ໂຕນ ຫາ 1 ລ້ານໂຕນ), ເພື່ອຕອບສະໜອງຄວາມຕ້ອງການພາຍໃນ, ມີຄັງສຳຮອງ ແລະ ສົ່ງອອກ. ມະຕິເລກທີ 26/TW, ລົງວັນທີ 5 ສິງຫາ 2008, ກອງປະຊຸມສູນກາງຄັ້ງທີ 7 ຊຸດທີ X “ກ່ຽວກັບກະສິກຳ, ຊາວກະສິກອນ, ຊົນນະບົດ” ໄດ້ເປີດໄລຍະການພັດທະນາໃໝ່; ຊາວກະສິກອນໄດ້ເສີມຂະຫຍາຍບົດບາດເປັນເຈົ້າຂອງ, ເຂົ້າຮ່ວມການຮ່ວມມື, ການເຊື່ອມໂຍງ ແລະຫັນປ່ຽນໂຄງປະກອບການຜະລິດ, ເຮັດໃຫ້ກະສິກຳພັດທະນາຮອບດ້ານ, ກາຍເປັນເສົາຄ້ຳຂອງເສດຖະກິດ, ຮັບປະກັນຄວາມໝັ້ນຄົງດ້ານສະບຽງອາຫານແຫ່ງຊາດ, ເຮັດໃຫ້ຫວຽດນາມກາຍເປັນໜຶ່ງໃນບັນດາປະເທດສົ່ງອອກເຂົ້າສານ, ອາຫານທະເລ ແລະ ຜະລິດຕະພັນກະເສດອື່ນອີກຈຳນວນໜຶ່ງ ເຊິ່ງມີສິນຄ້າກະເສດຢູ່ 196 ປະເທດແລະອານາເຂດ. ໃນປີ 2023, ການເຕີບໂຕ GDP ຂອງຂະແໜງກະສິກຳທັງໝົດຄາດວ່າຈະບັນລຸ 3,83%, ເຊິ່ງສູງສຸດໃນຊຸມປີທີ່ຜ່ານມາ. ກະສິກຳສືບຕໍ່ຢືນຢັນທີ່ຕັ້ງອັນສຳຄັນຂອງຕົນ ແມ່ນເສົາຄ້ຳຂອງເສດຖະກິດ, ຮັບປະກັນຄວາມໝັ້ນຄົງດ້ານສະບຽງອາຫານ, ຄວາມດຸ່ນດ່ຽງທີ່ສຳຄັນຂອງເສດຖະກິດ, ປະກອບສ່ວນຮັບປະກັນສະຖຽນລະພາບຂອງເສດຖະກິດມະຫາພາກ (ຜົນຜະລິດເຂົ້າເປືອກບັນລຸ 43,4 ລ້ານໂຕນ, ເພີ່ມຂຶ້ນ 1,7% ເມື່ອທຽບໃສ່ປີ 2022, ຜົນຜະລິດຊີ້ນສັດທັງໝົດບັນລຸ 7,6 ລ້ານໂຕນ, ເພີ່ມຂຶ້ນ 3,5%, ຜົນຜະລິດອາຫານທະເລ 9,3 ລ້ານໂຕນ, ເພີ່ມຂຶ້ນ 2,9%). ມູນຄ່າສົ່ງອອກກະສິກຳ, ປ່າໄມ້ ແລະ ການປະມົງບັນລຸໄດ້ກວ່າ 53 ຕື້ໂດລາສະຫະລັດ, ມູນຄ່າການຄ້າອຸດສາຫະກຳບັນລຸກວ່າ 11 ຕື້ ໂດລາສະຫະລັດ (ລະດັບສູງສຸດໃນຊຸມປີມໍ່ໆມານີ້ ແລະ ກວມເອົາກວ່າ 42,5% ຍອດມູນຄ່າການຄ້າຂອງປະເທດ). ສິນຄ້າສົ່ງອອກບາງປະເພດເພີ່ມຂຶ້ນເປັນສະຖິຕິສູງເຊັ່ນ: ຜັກ ແລະ ໝາກໄມ້ ເພີ່ມຂຶ້ນກວ່າ 70% ແລະ ເຂົ້າສານເພີ່ມຂຶ້ນກວ່າ 36%, ເຂົ້າສານ ST25 ໄດ້ຮັບລາງວັນຊະນະເລີດເປັນຄັ້ງທີ 2, ດີທີ່ສຸດໃນໂລກ(4). ຊາວກະສິກອນສົ່ງເສີມການຜະລິດເປັນສິນຄ້າກະສິກຳ, ສ້າງເປັນສິນຄ້າທີ່ມີມູນຄ່າເພີ່ມສູງ(5) ບໍ່ພຽງແຕ່ພັດທະນາເສດຖະກິດກະສິກຳເທົ່ານັ້ນ, ຫາກຍັງຊຸກຍູ້ການພັດທະນາອຸດສາຫະກຳປຸງແຕ່ງ ແລະ ການບໍລິການ, ສ້າງວຽກເຮັດງານທຳ ແລະ ລາຍຮັບໃຫ້ແກ່ປະຊາຊົນເຂດຊົນນະບົດ, ປະກອບສ່ວນຍົກສູງລາຍໄດ້ສະເລ່ຍຂອງສັງຄົມທັງຫມົດ. ຊາວກະສິກອນຫຼາຍຄົນໄດ້ຫັນປ່ຽນຂະແໜງການອາຊີບ, ພັດທະນາການເຄື່ອນໄຫວດ້ານການຄ້າ ແລະ ການບໍລິການ ເພື່ອໜູນຊ່ວຍການຜະລິດ ແລະ ຮັບໃຊ້ຊີວິດການເປັນຢູ່ຂອງປະຊາຊົນ, ຊ່ວຍໃຫ້ເສດຖະກິດຊົນນະບົດສືບຕໍ່ພັດທະນາ ແລະ ຫັນໂຄງປະກອບຢ່າງຕັ້ງໜ້າ.
ຄຽງຄູ່ກັບການພັດທະນາເສດຖະກິດ, ຊາວກະສິກອນທັງເປັນຜູ້ກໍ່ສ້າງແລະປະດິດຂໍ້ກຳນົດ, ກົດລະບຽບໝູ່ບ້ານ ທັງເປັນຜູ້ນຳເອົາຂໍ້ກຳນົດ, ກົດລະບຽບໝູ່ບ້ານເຂົ້າສູ່ຊີວິດການເປັນຢູ່, ສ້າງຄຸນຄ່າວັດທະນະດັ້ງເດີມຢູ່ຊົນນະບົດ, ເຮັດໃຫ້ເອກະລັກທາງດ້ານວັດທະນະທຳໄດ້ຮັບການສ້າງຕັ້ງ, ສະສົມ, ຖ່າຍທອດ. ບັນດາການເຄື່ອນໄຫວຜະລິດ ແລະ ປະກອບອາຊີບພື້ນເມືອງຂອງຊາວກະສິກອນໄດ້ປະກອບສ່ວນຮັກສາເອກະລັກວັດທະນະທຳຂອງໝູ່ບ້ານ. ບັນດາຜະລິດຕະພັນ OCOP ຂອງຊາວກະສິກອນໄດ້ຫັນເອກະລັກວັດທະນະທຳກະສິກຳ “ເປັນວັດຖຸ”. ບັນດາສະຖາບັນວັດທະນະທໍາພື້ນເມືອງເປັນທັງບ່ອນອີງທາງຈິດວິນຍານໃນຊີວິດສັງຄົມຊົນນະບົດ ແລະເປັນຈິດວິນຍານທີ່ສ້າງພື້ນຖານສຳລັບແກ່ການອະນຸລັກຄຸນຄ່າວັດທະນະທໍາພື້ນເມືອງ ດ້ວຍວັດຖຸບູຮານປະຫວັດສາດ ແລະຜົນງານທາງວັດທະນະທໍານັບພັນອັນທີ່ມີຄວາມໝາຍສໍາຄັນໃນຊີວິດຂອງຊຸມຊົນ.
ໃນຂະບວນການປ່ຽນແປງໃໝ່ປະເທດ, ຊາວກະສິກອນຍາມໃດກໍ່ແມ່ນກຳລັງສຳຄັນທີ່ເຂົ້າຮ່ວມການຮັບປະກັນການປ້ອງກັນປະເທດ, ປ້ອງກັນຄວາມສະຫງົບ, ກໍ່ສ້າງ ແລະປັບປຸງທ່າສະໜາມຮົບການປ້ອງກັນປະເທດທົ່ວປວງຊົນ ຕິດພັນກັບທ່າສະໜາມຮົບປ້ອງກັນຄວາມໝັ້ນຄົງປະຊາຊົນ. ໃນບັນດາທ້ອງຖິ່ນ, ຊາວກະສິກອນເຂົ້າຮ່ວມການເຄື່ອນໄຫວ “ທົ່ວປວງຊົນເຂົ້າຮ່ວມການປົກປັກຮັກສາອະທິປະໄຕ ຜືນແຜ່ນດິນ ແລະ ຄວາມໝັ້ນຄົງຊາຍແດນແຫ່ງຊາດ”, “ປະຊາຊົນທຸກຄົນປົກປັກຮັກສາຄວາມໝັ້ນຄົງແຫ່ງຊາດ”, “ຊາວກະສິກອນເຂົ້າຮ່ວມຮັບປະກັນການປ້ອງກັນປະເທດ, ປ້ອງກັນຄວາມໝັ້ນຄົງ” ພ້ອມທັງຕອບສະໜອງວັນບຸນ “ທົ່ວປວງປະຊາຊົນປົກປັກຮັກສາຄວາມໝັ້ນຄົງແຫ່ງຊາດ”, ວັນບຸນ “ທົ່ວປວງຊົນປ້ອງກັນປະເທດ”, ວັນບຸນ “ປວງປະຊາຊົນປ້ອງກັນຊາຍແດນ”; ເຂົ້າຮ່ວມການຜັນຂະຫຍາຍບັນດາໂຄງການ ແລະແຜນການພັດທະນາເສດຖະກິດ - ສັງຄົມ ທີ່ຕິດພັນກັບວຽກງານປ້ອງກັນປະເທດ, ປ້ອງກັນຄວາມໝັ້ນຄົງ; ປະກອບສ່ວນປົກປັກຮັກສາປະເທດຊາດຢ່າງໝັ້ນຄົງ, ປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ. ຢູ່ເຂດຊາຍແດນ, ຊາວກະສິກອນເຂົ້າຮ່ວມການປະສານສົມທົບກັບທະຫານປ້ອງກັນຊາຍແດນເພື່ອລາດຕະເວນ ແລະ ປ້ອງກັນຊາຍແດນແລະຫຼັກໝາຍຊາຍແດນ; ໃຫ້ຂໍ້ມູນຂ່າວສານແລະລາຍງານອາຊະຍາກໍາຕໍ່ເຈົ້າໜ້າທີ່(6), ທັງເຂົ້າຮ່ວມການປົກປັກຮັກສາອະທິປະໄຕຜືນແຜ່ນດິນ ແລະ ຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມຢູ່ເຂດຊາຍແດນ. ຢູ່ທະເລ, ຊາວປະມົງບໍ່ພຽງແຕ່ປະກອບສ່ວນຢ່າງໃຫຍ່ຫຼວງ ເຂົ້າໃນການພັດທະນາເສດຖະກີດ ໃນຂົງເຂດການຫາປາ ແລະ ຂຸດຄົ້ນອາຫານທະເລເທົ່ານັ້ນ, ແຕ່ຍັງເປັນ “ຂີດໝາຍອັນມີຊີວິດຊີວາ” ຢັ້ງຢືນອະທິປະໄຕຂອງຊາດ, ປະກອບສ່ວນຮັກສາເອກະລາດ, ອະທິປະໄຕທະເລ, ໝູ່ເກາະ. ຢູ່ເຂດຊົນນະບົດ, ຊາວກະສິກອນຫຼາຍຄົນເຂົ້າຮ່ວມໂດຍກົງໃນຄະນະຄຸ້ມຄອງຄວາມປອດໄພ, ຄວາມເປັນລະບຽບຮຽບຮ້ອຍ, ໜ່ວຍງານປອງດອງຊາດ, ເປັນແບບຢ່າງ, ແລະ ບັນດາສະໂມສອນຕ້ານອາດຊະຍາກຳຢູ່ຂັ້ນຮາກຖານ, ເຊັ່ນ “ສາມປອດໄພ”, “ບ້ານ 4 ບໍ່”, “ຄຸ້ມຄອງຄວາມປອດໄພແລະຄວາມເປັນລະບຽບຮຽບຮ້ອຍດ້ວຍຕົນເອງ”, “ຊຸມຊົນຄຣິດສະຕຽນສະຫງົບສຸກ”, “ສຽງຄ້ອງປ້ອງກັນອາດຊະຍາກຳ”, “ກຸ່ມຊາວກະສິກອນຄຸ້ມຄອງຕົນເອງ ແລະປ້ອງກັນຕົນເອງ” ປະກອບສ່ວນຮັບປະກັນຄວາມເປັນລະບຽບຮຽບຮ້ອຍ ແລະຄວາມປອດໄພທາງສັງຄົມໃນຊົນນະບົດ(7). ການປະກອບສ່ວນຂອງຊາວກະສິກອນຜ່ານການປ່ຽນແປງໃໝ່ປະເທດໃນເກືອບ 40 ປີ ໄດ້ສ້າງການພັດທະນາທັງລວງກວ້າງ ແລະ ລວງເລິກ ໃຫ້ກັບພື້ນຖານການປ້ອງກັນປະເທດທົ່ວປວງຊົນ ຕິດພັນກັບທ່າສະໜາມຮົບຮັກສາຄວາມໝັ້ນຄົງປະຊາຊົນ, ຜ່ານນັ້ນ ສະແດງໃຫ້ເຫັນເຖິງພື້ນຖານ “ກົກຮາກ” ທີ່ຕັດສິນການສ້າງກຳລັງແຮງສັງລວມຂອງຊາດ ໃນການສ້າງສາແລະປົກປັກຮັກສາປະເທດຊາດ ດ້ວຍ "ທ່າສະໜາມຮົບໃນໃຈຂອງປະຊາຊົນ" ທີ່ໝັ້ນຄົງ ເຊິ່ງໃນນັ້ນ ສ່ວນຫຼາຍແມ່ນກໍາລັງຊາວກະສິກອນ.
ກຳມະການກົມການເມືອງ, ຮອງປະທານປະຈຳສະພາແຫ່ງຊາດ ເຈີ່ນ ແທງ ເມິ້ນ ແລະ ການນຳສູນກາງສະຫະພັນຊາວກະສິກອນຫວຽດນາມ ໃຫ້ກຽດມອບນາມມະຍົດຊາວກະສິກອນດີເດັ່ນຫວຽດນາມ ປີ 2023 ໃຫ້ແກ່ຊາວກະສິກອນ 100 ຄົນ _ພາບ: TTXVN.
ກ່ຽວກັບເປົ້າໝາຍ “ປະຊາທິປະໄຕ”: ຊາວກະສິກອນໄດ້ປະຕິບັດສິດຂອງຜູ້ມີສິດເລືອກຕັ້ງ ໃນການເລືອກຕັ້ງສະພາແຫ່ງຊາດ ແລະ ສະພາປະຊາຊົນທຸກຂັ້ນ; ຍູ້ແຮງການປະຕິບັດປະຊາທິປະໄຕຢູ່ຮາກຖານ, ຕັ້ງໜ້າເຂົ້າຮ່ວມການກໍ່ສ້າງລະບົບການເມືອງຢູ່ຮາກຖານ ແລະ ບັນດາອົງການຈັດຕັ້ງສັງຄົມຢູ່ຊົນນະບົດ. ຜ່ານແນວໂຮມປະເທດຊາດ ຫວຽດນາມ ແລະ ສະມາຄົມຊາວກະສິກອນທຸກຂັ້ນ, ຊາວກະສິກອນໄດ້ປະກອບຄຳເຫັນຢ່າງກະຕືລືລົ້ນ, ກົງໄປກົງມາ, ມີຄວາມຮັບຜິດຊອບສູງ ຕໍ່ພັກ, ລັດຖະບານ, ພິເສດແມ່ນໃນກອງປະຊຸມປຶກສາຫາລືກ່ຽວກັບບັນດາມະຕິກອງປະຊຸມໃຫຍ່ຂອງພັກ ແລະ ກອງປະຊຸມໃຫຍ່ອົງຄະນະພັກທຸກຂັ້ນ; ສ່ອງແສງໂດຍກົງ ແລະ ແນະນຳໃຫ້ບັນດາຜູ້ແທນສະພາແຫ່ງຊາດ ແລະ ສະພາປະຊາຊົນທຸກຂັ້ນ ໃນການພົບປະຜູ້ມີສິດເລືອກຕັ້ງ, ປະກອບສ່ວນປັບປຸງກົນໄກ, ນະໂຍບາຍ, ກົດໝາຍ. ຊາວກະສິກອນໄດ້ຍົກສູງຄວາມຮັບຜິດຊອບໃນການປະກອບຄຳເຫັນໃຫ້ແກ່ພະນັກງານ, ສະມາຊິກພັກ, ຕັ້ງໜ້າເຂົ້າຮ່ວມການປ້ອງກັນ ແລະ ຕ້ານການສໍ້ລາດບັງຫຼວງ, ຄວາມຫຍໍ້ທໍ້ ແລະການສິ້ນເປືອງ; ສະເໜີ ແລະ ລາຍງານຕໍ່ຄະນະພັກ ແລະ ອຳນາດການປົກຄອງໂດຍໄວ ກ່ຽວກັບຄວາມຫຍຸ້ງຍາກ, ຄວາມຮ້ອນເຄືອງ, ຄວາມມຸ່ງມາດປາດຖະໜາທີ່ຖືກຕ້ອງແລະຊອບທຳຂອງປະຊາຊົນ, ພິເສດແມ່ນໃນການພົບປະສົນທະນາຫວ່າງທ່ານນາຍົກລັດຖະມົນຕີ, ລະຫວ່າງຄະນະພັກແລະອຳນາດການປົກຄອງທຸກຂັ້ນ ກັບຊາວກະສິກອນທີ່ໄດ້ຈັດຕັ້ງໃນຊຸມປີຜ່ານມາ; ຜ່ານນັ້ນ, ສ້າງຄວາມຜູກພັນສະໜິດແໜ້ນລະຫວ່າງພັກ, ອຳນາດການປົກຄອງ ກັບ ຊາວກະສິກອນ, ປັບປຸງແລະຍົກສູງຄວາມໄວ້ວາງໃຈຂອງຊາວກະສິກອນທີ່ມີຕໍ່ພັກ ແລະ ລັດ, ປະກອບສ່ວນກໍ່ສ້າງພັກ ແລະອຳນາດການປົກຄອງທີ່ປອດໃສແລະໝັ້ນຄົງເຂັ້ມແຂງ.
ຊາວກະສິກອນໄດ້ຜັນຂະຫຍາຍການເຄື່ອນໄຫວຢູ່ຊົນນະບົດເທື່ອລະກ້າວ ດ້ວຍທິດນຳທີ່ວ່າ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ປະຊາຊົນຕິດຕາມກວດກາ, ປະຊາຊົນຊົມໃຊ້”. ຜົນສຳເລັດຂອງໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ແມ່ນຕົວຢ່າງຂອງບົດບາດ ແລະ ການເຂົ້າຮ່ວມຂອງຊາວກະສິກອນໃນການຊຸກຍູ້ປະຊາທິປະໄຕຢູ່ຮາກຖານ. ຊາວກະສິກອນບໍ່ພຽງແຕ່ເຂົ້າຮ່ວມການສົນທະນາ, ປຶກສາຫາລື ແລະ ປະກອບສ່ວນເຂົ້າໃນບັນດາໂຄງການພັດທະນາເສດຖະກິດ, ສັງຄົມ ແລະ ພື້ນຖານໂຄງລ່າງຢູ່ເຂດຊົນນະບົດເທົ່ານັ້ນ, ຫາກຍັງປະກອບສ່ວນຢ່າງຕັ້ງໜ້າ, ເງິນທຶນ, ປະກອບທຶນສົມທົບກັນກໍ່ສ້າງຊົນນະບົດໃໝ່. ສະເພາະແຕ່ປີ 2011–2020, ຊາວກະສິກອນໄດ້ປະກອບເງິນຫຼາຍກວ່າ 100 ຕື້ດົ່ງ, ປະກອບແຮງງານໄດ້ 47 ລ້ານກວ່າວັນງານ, ມອບດິນ 424 ລ້ານແມັດກ້ອນ, ສ້ອມແປງແລະຍົກລະດັບລຳຄອງຮ່ອງເໝືອງ 293 ພັນກວ່າກິໂລແມັດ, ສ້າງທາງຊົນນະບົດ 542 ພັນກິໂລແມັດ, ລົບລ້າງເຮືອນຊົ່ວຄາວ 29.411 ຫຼັງ(8), ປະກອບສ່ວນເຮັດໃຫ້ພື້ນຖານໂຄງລ່າງເສດຖະກິດ, ສັງຄົມ ແລະ ສິ່ງແວດລ້ອມຊົນນະບົດພັດທະນາທັງດ້ານປະລິມານ ແລະ ຄຸນນະພາບ, ລັກສະນະຊົນນະບົດນັບມື້ນັບກວ້າງຂວາງ. ຢູ່ຫຼາຍທ້ອງຖິ່ນ, ການສ້າງແລະສ້ອມແປງຫໍວັດທະນະທຳ, ກໍ່ສ້າງເຮືອນວັດທະນະທຳ, ສະໜາມກິລາ ດ້ວຍການລົງທຶນ ແລະ ປຶກສາຫາລືຂອງປະຊາຊົນບັນດາບ້ານ, ໝູ່ບ້ານ.
ກ່ຽວກັບເປົ້າໝາຍ “ຄວາມຍຸຕິທຳ”: ຊາວກະສິກອນໄດ້ລົງທຶນ, ຮ່ວມມືຢ່າງກ້າຫານ, ເຊື່ອມໂຍງການຜະລິດ ແລະ ດຳເນີນທຸລະກິດ, ຫັນເປັນອຸດສາຫະກຳ ແລະ ອາຊີບ, ມີວຽກເຮັດງານທຳທີ່ຫຼາກຫຼາຍ, ປັບປຸງລາຍຮັບ ແລະ ຄຸນນະພາບຊີວິດທັງທາງກາຍ ແລະ ຈິດໃຈ, ປະກອບສ່ວນຮັດແຄບຊ່ອງຫວ່າງ ລະຫວ່າງຄົນຮັ່ງມີ ແລະ ຄົນທຸກ ແລະ ຊ່ອງຫວ່າງທາງລາຍໄດ້ ລະຫວ່າງຊົນນະບົດ ແລະ ຕົວເມືອງ ຈາກ 2,26 ເທົ່າໃນປີ 2022 ເປັນ 1,89 ເທົ່າໃນປີ 2010, ຫຼຸດລົງເປັນ 1,6 ເທົ່າໃນປີ 2020 ແລະ ໃນປີ 2022 ໃຫ້ເປັນ 1,55 ເທົ່າ(9), ຫຼຸດຊ່ອງຫວ່າງການພັດທະນາ ລະຫວ່າງຊົນນະບົດແລະຕົວເມືອງ(10). ຊາວກະສິກອນຫຼາຍຄົນທີ່ເກັ່ງດ້ານການຜະລິດ ແລະ ດຳເນີນທຸລະກິດ, ຊາວກະສິກອນດີເດັ່ນໄດ້ສ້າງຕັ້ງທຸລະກິດ ແລະ ສະຫະກອນທີ່ເຄື່ອນໄຫວຢ່າງມີປະສິດທິຜົນ, ບໍ່ພຽງແຕ່ສ້າງວຽກເຮັດງານທຳ ແລະ ເພີ່ມລາຍຮັບໃຫ້ແກ່ຊາວກະສິກອນອື່ນເທົ່ານັ້ນ, ແຕ່ຍັງມີສ່ວນຮ່ວມຢ່າງຫ້າວຫັນໃນການສິດສອນ, ຊີ້ນໍາ, ສະຫນັບສະຫນູນຄົວເຮືອນກະສິກໍາອື່ນໆ ເພື່ອພັດທະນາ, ປະກອບສ່ວນເຂົ້າໃນການປະຕິບັດໂຄງການປະກັນສັງຄົມໃນທ້ອງຖິ່ນ. ຊາວກະສິກອນໄດ້ຂຶ້ນທະບຽນຢ່າງຕັ້ງໜ້າເພື່ອເຂົ້າຮ່ວມການຝຶກອົບຮົມວິຊາຊີບ, ມີວຽກເຮັດງານທຳເພື່ອຫຼຸດພົ້ນອອກຈາກຄວາມທຸກຍາກ, ຫຼາຍຄອບຄົວມີລາຍໄດ້ເພີ່ມຂຶ້ນຫຼາຍພໍຄວນ (11), ປະກອບສ່ວນເພີ່ມສະມັດຕະພາບດ້ານກະສິກຳ, ປ່າໄມ້, ການປະມົງ 3 ເທົ່າໃນປີ 2020 ເພີ່ມຂຶ້ນ 17 ເທົ່າເມື່ອທຽບໃສ່ປີ 2010 (ຈາກ 17,63 ລ້ານດົ່ງ ເປັນ 55,9 ລ້ານດົ່ງ) ແລະ ບັນລຸ 81,1 ລ້ານດົ່ງຕໍ່ຜູ້ອອກແຮງງານໃນປີ 2022(12).
ບັນດາໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຫຼຸດຜ່ອນຄວາມທຸກຍາກແບບຍືນຍົງ, ພັດທະນາເສດຖະກິດ-ສັງຄົມຂອງຊາວເຜົ່າສ່ວນໜ້ອຍ ແລະ ເຂດພູດອຍ ແມ່ນໄດ້ຮັບການຕອບສະໜອງ ແລະ ເຂົ້າຮ່ວມຢ່າງຕັ້ງໜ້າ ຈາກຊາວກະສິກອນ, ເພາະວ່າ ພວກເຂົາເຈົ້າແມ່ນຜູ້ໄດ້ຮັບຜົນປະໂຫຍດຈາກໂຄງການ, ປະກອບສ່ວນເຮັດໃຫ້ອັດຕາຄອບຄົວທຸກຍາກຢູ່ຊົນນະບົດຫຼຸດລົງຢ່າງວ່ອງໄວ, ສະເລ່ຍ 1,21% ຕໍ່ປີ ໃນໄລຍະປີ 2008-2020(13), ໃນປີ 2021 ຫຼຸດລົງ 0,52% ເມື່ອທຽບໃສ່ປີ 2020, ໃນປີ 2022 ຫຼຸດລົງ 1,17% ເມື່ອທຽບໃສ່ປີ 2021; ອັດຕາການຫຼຸດຜ່ອນຄວາມທຸກຍາກຂອງຊົນເຜົ່າສ່ວນໜ້ອຍບັນລຸກວ່າ 3%(14); ອັດຕາສ່ວນປະຊາຊົນຊົນນະບົດຊົມໃຊ້ນ້ຳສະອາດຖືກອະນາໄມໃນປີ 2020 ບັນລຸ 90,5%, ເພີ່ມຂຶ້ນ 14,5% ເມື່ອທຽບໃສ່ປີ 2008; ຈຳນວນຄົວເຮືອນຊົນນະບົດທີ່ໄດ້ຮັບສະໜອງ ແລະນຳໃຊ້ໄຟຟ້າບັນລຸ 99,45%(15). ຄຽງຄູ່ກັບນະໂຍບາຍຂອງລັດ, ຄວາມມານະພະຍາຍາມຂອງຊາວກະສິກອນໄດ້ຊ່ວຍແກ້ໄຂບັນຫາທີ່ເກີດຂຶ້ນຈາກການແບ່ງຂັ້ນສັງຄົມຢ່າງຈະແຈ້ງ, ແລະ ຄວາມແຕກຕ່າງການໃຊ້ຈ່າຍລະຫວ່າງກຸ່ມຄົນຮັ່ງມີ ແລະ ທຸກຍາກກວ່າ 7 ເທົ່າໃນປີ 2020 ຫລຸດລົງເປັນ 3,2 ເທົ່າໃນປີ 2022; ອັດຕາເຂົ້າຮຽນໃນເກນອາຍຸຂອງສະມາຊິກຄອບຄົວກະສິກຳເພີ່ມຂຶ້ນ, ເພີ່ມອັດຕາການເຂົ້າຮຽນໃນລະດັບປະຖົມສຶກສາ, ມັດທະຍົມສຶກສາຕອນຕົ້ນ ແລະ ມັດທະຍົມສຶກສາຕອນປາຍເປັນ 95,8%, 90,5%, ແລະ 77,2% ຕາມລຳດັບ (ເພີ່ມຂຶ້ນ 17,8% ເມື່ອທຽບໃສ່ປີ 2012)(16); ອັດຕາຊາວກະສິກອນເຂົ້າຮ່ວມປະກັນສຸຂະພາບເພີ່ມຂຶ້ນຈາກ 48,7% ໃນປີ 2010 ຂຶ້ນເປັນ 92,2% ໃນປີ 2020(17)...
ກ່ຽວກັບເປົ້າໝາຍ “ອາລະຍະທຳ”: ຂະບວນການປ່ຽນແປງໃໝ່ຄວາມຄິດກ່ຽວກັບວັດທະນະທຳ, ສັງຄົມ ແລະການສ້າງຜູ້ຄົນໃໝ່ ຂອງຊາວກະສິກອນໄດ້ພັດທະນາໄປຄຽງຄູ່ກັບການປ່ຽນແປງໃໝ່ຂອງປະເທດ. ຮີດຄອງປະເພນີທີ່ບໍ່ດີຖືກລົບລ້າງເທື່ອລະກ້າວ; ແທນທີ່ນັ້ນ, ຊາວກະສິກອນໄດ້ເຂົ້າຮ່ວມຢ່າງຕັ້ງໜ້າໃນການປະຕິບັດບັນດາການເຄື່ອນໄຫວ “ທົ່ວປວງຊົນສາມັກຄີກັນສ້າງຊີວິດວັດທະນະທຳ”, “ທົ່ວປວງຊົນສາມັກຄີກັນກໍ່ສ້າງຊົນນະບົດໃໝ່ ແລະເມືອງອາລະຍະທຳ”. ບັນດາຕົວແບບ “ບ້ານສະອາດ, ທົ່ງນາທີ່ສວຍງາມ”, “ບ້ານສະຫວ່າງ”, “ຊາວນາເຂົ້າຮ່ວມການປົກປັກຮັກສາສິ່ງແວດລ້ອມ”, “ຖັງຂີ້ເຫຍື້ອທີ່ເປັນມິດກັບສິ່ງແວດລ້ອມ”, “ຫ້າມບໍ່ໃຫ້ໃຊ້ຖົງຢາງແລະຂີ້ເຫຍື້ອຢາງປຼາສະຕິກ”... ນັບມື້ນັບໄດ້ຮັບຄວາມນິຍົມຊົມຊອບ, ຂະຫຍາຍກວ້າງໃນຫຼາຍທ້ອງຖິ່ນ. ພິເສດແມ່ນ ການເຄື່ອນໄຫວກໍ່ສ້າງຄອບຄົວວັດທະນະທຳ, ບ້ານ, ໝູ່ບ້ານ, ເຮືອນຢູ່; ບັນດາແບບຢ່າງຂອງປະຊາຄົມຊົນນະບົດໃນການຄຸ້ມຄອງຕົນເອງ ໃນການສ້າງຊີວິດວັດທະນະທຳທີ່ກ້າວໜ້າ, ກໍ່ສ້າງວິຖີຊີວິດວັດທະນະທຳຊົນນະບົດໃໝ່, ເຊັ່ນ: ຮູບແບບ “ປະຊາຄົມກະສິກຳກ້າວໜ້າ”, “ຄອບຄົວຊາວກະສິກອນທີ່ສະເໝີພາບ ແລະ ມີຄວາມຜາສຸກ”... ໄດ້ດຶງດູດຊາວນາເປັນຈຳນວນຫຼວງຫຼາຍຕອບສະໜອງ ແລະ ເຂົ້າຮ່ວມ, ສ້າງຄວາມສາມັກຄີ, ຊ່ວຍເຫຼືອເຊິ່ງກັນແລະກັນ ແລະຮັກແພງເຊິ່ງກັນແລະກັນໃນຊຸມຊົນທີ່ຢູ່ອາໄສ, ສ້າງການປ່ຽນແປງໃນແງ່ດີ ໃນຊີວິດວັດທະນະທຳ ແລະ ສັງຄົມຢູ່ເຂດຊົນນະບົດ.
ຄຽງຄູ່ກັບການພັດທະນາດ້ານວິທະຍາສາດ, ເຕັກໂນໂລຊີ, ຄວາມກ້າວໜ້າ ແລະອາລະຍະທຳໃນໂລກ, ຊາວກະສິກອນຄ່ອຍໆເຂົ້າໃກ້ ແລະ ໄດ້ຮັບຄວາມຮູ້, ວັດທະນະທຳ, ອາລະຍະທຳໃນການຊົມໃຊ້, ການດຳລົງຊີວິດ, ການປະພຶດ, ການສື່ສານ, ການສ້າງບຸກຄະລິກກະພາບ, ວິຖີຊີວິດທີ່ມີວັດທະນະທຳ ແລະ ອາລະຍະທຳ; ຮູ້ວິທີການນໍາໃຊ້ເຕັກໂນໂລຊີໃນທາງບວກເ ພື່ອຮັບໃຊ້ການຜະລິດ, ທຸລະກິດ ແລະປັບປຸງຊີວິດວັດທະນະທໍາ ແລະຈິດວິນຍານ, ໂດຍບໍ່ມີການຖືກເອົາປຽບ, ກະຕຸ້ນ, ຫຼືລໍ້ລວງໂດຍດ້ານມືດຂອງໂລກໄຊເບີຣ໌. ຊາວກະສິກອນຫຼາຍຄົນໄດ້ໄຫວພິບໃນການຮັບເອົາ ແລະ ປະກອບຄວາມຮູ້ ກ່ຽວກັບວິທະຍາສາດ-ເຕັກໂນໂລຊີ, ເສດຖະກິດ, ຕະຫຼາດ, ກົດໝາຍ, ການຫັນປ່ຽນດິຈິຕອນ, ເສດຖະກິດດິຈິຕອນ, ທັກສະການຜະລິດ, ການຕະຫຼາດ, ການຂາຍ, ນຳໃຊ້ເຕັກໂນໂລຊີຂໍ້ມູນຂ່າວສານ ເພື່ອຍົກສູງຄຸນນະພາບ ແລະ ຄວາມສາມາດເຂົ້າຮ່ວມຕະຫຼາດ ແລະ ເຊື່ອມໂຍງເຂົ້າກັບສາກົນ./.
------------------------
(1) ເບິ່ງ: ສູນກາງສະຫະພັນຊາວກະສິກອນຫວຽດນາມ: “ບົດລາຍງານເລກທີ 634-BC/HNDTW”, ປີ 2022
(2) ເບິ່ງ: ສູນກາງສະຫະພັນຊາວກະສິກອນຫວຽດນາມ: “ລາຍງານການເມືອງຂອງຄະນະບໍລິຫານງານສູນກາງສະຫະພັນຊາວກະສິກອນຫວຽດນາມ ຊຸດທີ VII ຕໍ່ກອງປະຊຸມໃຫຍ່ຄັ້ງທີ VIII”, ປີ 2023
(3) ເບິ່ງ: “GDP ສະເລ່ຍຂອງຫວຽດນາມປີ 2000 ຕິດອັນດັບທີ 173/200 ຂອງໂລກ, ປີ 2022 ຈະມີການປ່ຽນແປງແນວໃດ?”, ຫນ້າຂໍ້ມູນຂ່າວສານເອເລັກໂຕຣນິກຂອງຄະນະກໍາມະການເສດຖະກິດສູນກາງ, ອອກວັນທີ 4 ເມສາ2023, https://kinhtetrunguong.vn/kinh-te/kinh-tet-vi-mo/gdp-binh-quan-viet-nam-nam-2000-xep-thu-173-200-the-gioi-nam-2022-thay-doi-the-nao-.html
(4) ເບິ່ງ: N.Y: “ການສົ່ງອອກກະສິກຳ, ປ່າໄມ້ ແລະ ການປະມົງໃນປີ 2023 ບັນລຸກວ່າ 53 ຕື້ໂດລາສະຫະລັດ”, ໜັງສືພິມເອເລັກໂຕນິກຂອງພັກກອມມູນິດຫວຽດນາມ, ອອກວັນທີ 30 ທັນວາ 2023. https://dangcongsan.vn/kinh-te-va-hoi-nhap/xuat-khau-nong-lam-thuy-san-nam-2023-dat-tren-53-ty-usd-656879.html
(5) ຮອດວັນທີ 30 ມິຖຸນາ 2023, ທົ່ວປະເທດມີ 9.852 ຜະລິດຕະພັນ OCOP ບັນລຸ 3 ດາວຫຼືສູງກວ່າ; ໃນນັ້ນ, ຜະລິດຕະພັນ 3 ດາວກວມ 66,9%, ຜະລິດຕະພັນ 4 ດາວກວມ 32,2%, ສິນຄ້າທີ່ມີທ່າແຮງ 5 ດາວ 0,6% ແລະ ຜະລິດຕະພັນ 5 ດາວ 42 ຜະລິດຕະພັນ ທີ່ໄດ້ຮັບການຮັບຮອງຈາກກະຊວງກະສິກຳ ແລະ ພັດທະນາຊົນນະບົດ.
(6) ແຕ່ປີ 2018 ມາຮອດປະຈຸບັນ, ຊາວກະສິກອນ ຜ່ານບັນດາສະມາຄົມທ້ອງຖິ່ນໄດ້ສົມທົບກັບກອງບັນຊາການທະຫານຊາຍແດນ ຈັດຕັ້ງການລາດຕະເວນຊາຍແດນ 25.124 ຄັ້ງ; ສ້າງກຸ່ມຊາວກະສິກອນຄຸ້ມຄອງຊາຍແດນ ແລະຫຼັກໝາຍຊາຍແດນ ດ້ວນຕົນເອງ 1.587 ກຸ່ມ; ສະໜອງແຫຼ່ງຂໍ້ມູນອັນລ້ຳຄ່າ 34.050 ຂໍ້ ໃຫ້ບັນດາສະຖານີປ້ອງກັນຊາຍແດນ, ກ່າວປະນາມອາດຊະຍາກຳ 3.937 ຄົນ.
(7) ຊາວກະສິກອນໄດ້ເຂົ້າຮ່ວມການສືບຄົ້ນ ແລະປະນາມການລະເມີດກົດໝາຍ 25.350 ກໍລະນີ; ສະໜອງຂໍ້ມູນທີ່ມີຄ່າໃຫ້ບັນດາອົງການຕຳຫຼວດ ແລະ ອຳນາດການປົກຄອງທ້ອງຖິ່ນ 390.750 ຂໍ້.
(8) ເບິ່ງ: ສູນກາງສະຫະພັນຊາວກະສິກອນຫວຽດນາມ: “ລາຍງານສະຫຼຸບຜົນການປະຕິບັດມະຕິເລກທີ 26-NQ/TW ຂອງຄະນະບໍລິຫານງານສູນກາງພັກຊຸດທີ X, “ກ່ຽວກັບການກະເສເ, ຊາວກະສິກອນ, ຊົນນະບົດ””, ປີ 2021
(9) ເບິ່ງ: ສະຖາບັນນະໂຍບາຍ ແລະຍຸດທະສາດການພັດທະນາກະສິກຳ ແລະ ຊົນນະບົດ: “ບົດລາຍງານການດຳລົງຊີວິດຂອງຊາວກະສິກອນໃນໄລຍະຊຸກຍູ້ການຫັນເປັນອຸດສາຫະກຳ, ທັນສະໃໝ ແລະ ເຊື່ອມໂຍງເຂົ້າກັບສາກົນ”, ຮ່າໂນ້ຍ, 2022
(10) ຕາມການລາຍງານຂອງກົມໃຫຍ່ສະຖິຕິ, ໃນປີ 2020, ອັດຕາສ່ວນຄອບຄົວທີ່ໃຊ້ແຫຼ່ງນ້ຳສະອາດໃນຕົວເມືອງແມ່ນ 99,6%, ຢູ່ຊົນນະບົດ 96,3%; ອັດຕາສ່ວນຄອບຄົວທີ່ນຳໃຊ້ພາຫະນະສ່ວນຕົວຢູ່ເຂດດັ່ງກ່າວແມ່ນ 91,8% ແລະ 85,9% ຕາມລຳດັບ; ອັດຕາການຫວ່າງງານໃນພາກພື້ນແມ່ນ 2,93% ແລະ 1.64% ຕາມລໍາດັບ.
(11) ອີງຕາມ "ບົດລາຍງານສະຫຼຸບໂຄງການ 1956 "ການຝຶກອົບຮົມວິຊາຊີບໃຫ້ຄົນງານຊົນນະບົດຮອດປີ 2020”” ຂອງກະຊວງແຮງງານ, ທະຫານເສຍອົງຄະແລະສັງຄົມ ປີ 2020, ໃນໄລຍະປີ 2011-2020, ສະເລ່ຍແຕ່ລະປີ, ມີ 12.259 ຄອບຄົວທຸກຍາກເຂົ້າຮ່ວມການຝຶກອົບຮົມວິຊາຊີບ, ມີວຽກເຮັດງານທຳ ແລະ ຫຼຸດພົ້ນອອກຈາກຄວາມທຸກຍາກ; 23.760 ຄອບຄົວທີ່ມີຄົນເຂົ້າຮ່ວມການຝຶກອົບຮົມວິຊາຊີບ ເພື່ອເປັນຄອບຄົວທີ່ຮັ່ງມີ.
(12) ເບິ່ງ: ກົມໃຫຍ່ສະຖິຕິ: "ປື້ມສະຖິຕິປະຈຳປີ", ປີ 2020, 2022
(13) ເບິ່ງ: ຄະນະຊີ້ນຳການສະຫຼຸບມະຕິສູນກາງພັກຄັ້ງທີ 7 ສະໄໝທີ X: “ບົດລາຍງານສະບັບເລກທີ 103-BC/BCĐ ປີ 2022”
(14) ຫງວຽນເລິມແທ່ງ: “ໝາກຜົນການຕິດຕາມກວດກາການປະຕິບັດມະຕິຂອງສະພາແຫ່ງຊາດກ່ຽວກັບ 3 ໂຄງການຈຸດໝາຍແຫ່ງຊາດ”, ເວັບໄຊຂໍ້ມູນຂ່າວສານເອເລັກໂຕຣນິກຂອງສະພາແຫ່ງຊາດ, ອອກວັນທີ 17 ພະຈິກ 2023,https://quochoi.vn/tintuc/Pages/tin-hoat-dong-cua-quoc-hoi.aspx?ItemID=82244
(15) ເບິ່ງ: ຄະນະຊີ້ນຳການສະຫຼຸບມະຕິສູນກາງພັກຄັ້ງທີ 7 ສະໄໝທີ X: “ບົດລາຍງານສະບັບເລກທີ 103-BC/BCĐ ປີ 2022”
(16) ເບິ່ງ: ກົມໃຫຍ່ສະຖິຕິ: “ຖະແຫຼງຂ່າວຜົນການສໍາຫຼວດມາດຕະຖານການຄອງຊີບທີ່ຢູ່ອາໄສ”, ປີ 2022
(17) ເບິ່ງ: ສະຖາບັນນະໂຍບາຍ ແລະຍຸດທະສາດການພັດທະນາກະສິກຳ ແລະ ຊົນນະບົດ: “ບົດລາຍງານການດຳລົງຊີວິດຂອງຊາວກະສິກອນໃນໄລຍະຊຸກຍູ້ການຫັນເປັນອຸດສາຫະກຳ, ທັນສະໃໝ ແລະ ເຊື່ອມໂຍງເຂົ້າກັບສາກົນ”, ປີ 2022
