ປະຕິເສດຖ້ອຍທຳນອງທີ່ບິດເບືອນ ແລະ ຜິດພາດກ່ຽວກັບ
ສາຍພົວພັນແບບພິເສດລະຫວ່າງຫວຽດນາມ-ລາວ, ລາວ-ຫວຽດນາມ
ສາຍພົວພັນແບບພິເສດລະຫວ່າງຫວຽດນາມ-ລາວ, ລາວ-ຫວຽດນາມ
ບັນດາຖ້ອຍທຳນອງບິດເບືອນ ທຳລາຍ ຂອງບັນດາກອງກຳລັງສັດຕູແລະປະຕິກິລິຍາ
ກ່ຽວກັບສາຍພົວພັນແບບພິເສດຫວຽດນາມ-ລາວ, ລາວ-ຫວຽດນາມ
ສອງປະເທດຫວຽດນາມແລະລາວ ມີເສັ້ນຊາຍແດນຮ່ວມກັນຍາວກວ່າ 2.340 ກິໂລແມັດ, ພ້ອມກັນອີງໃສ່ສາຍພູຫຼວງທີ່ຍິ່ງໃຫຍ່ ແລະດື່ມນ້ຳແຫຼ່ງດຽວກັນຈາກແມ່ນ້ຳຂອງ. ປະຫວັດສາດການຕໍ່ສູ້ ແລະ ການພັດທະນາຂອງປະຊາຊົນສອງປະເທດ ໄດ້ເຮັດໃຫ້ທັງສອງຊົນຊາດຫວຽດນາມແລະລາວມີຄວາມໃກ້ຊິດສະໜິດສະໜົມ ແລະຜູກພັນກັນມາແຕ່ດົນນານ. ສາຍພົວພັນທີ່ສະໜິດສະໜົມນັ້ນ ໄດ້ຮັບການພັດທະນາ ແລະ ເລິກເຊິ່ງຍິ່ງຂຶ້ນຕະຫຼອດ 8 ທົດສະວັດທີ່ຜ່ານມາ, ເມື່ອປະຊາຊົນສອງປະເທດຮ່ວມກັນດຳເນີນການປະຕິວັດເພື່ອຕໍ່ຕ້ານສັດຕູຮ່ວມກັນ, ຍາດເອົາເອກະລາດ, ເສລີພາບ, ກໍ່ສ້າງ ແລະ ປົກປັກຮັກສາປະເທດຊາດຂອງແຕ່ລະປະເທດ.
ຢ່າງໃດກໍຕາມ, ພ້ອມກັບການພັດທະນາແລະການປ່ຽນແປງທີ່ສັບສົນແລະຄາດເດົາບໍ່ໄດ້ໃນສະຖານະການໂລກແລະພາກພື້ນປະຈຸບັນ, ບັນດາກອງກຳລັງສັດຕູ ແລະ ປະຕິກິລິຍາ ສືບຕໍ່ປະຕິບັດຍຸດທະສາດ “ຫັນປ່ຽນໂດຍສັນຕິພາບ” ເພື່ອແນໃສ່ລົບລ້າງບົດບາດນຳພາຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ; ເຮັດໃຫ້ກອງທັບຂອງສອງປະເທດ “ບໍ່ກ່ຽວຂ້ອງກັບການເມືອງ”, ແຍກການນຳພາຂອງພັກອອກຈາກກອງທັບ..., ຜ່ານນັ້ນ ພວກເຂົາທຳລາຍສາຍພົວພັນລະຫວ່າງກອງທັບແລະປະຊາຊົນ, ທຳລາຍແລະແບ່ງແຍກຄວາມສາມັກຄີແລະມິດຕະພາບແບບພິເສດ ຫວຽດນາມ-ລາວ. ບັນດາກອງກຳລັງສັດຕູມັກບິດເບືອນປະຫວັດສາດ ແລະ ປະຕິເສດຜົນສຳເລັດຂອງການປະຕິວັດ; ປະຕິເສດຄວາມໝາຍອັນສຳຄັນ ແລະ ພັນທະສາກົນອັນສູງສົ່ງ ຂອງກອງທັບຫວຽດນາມ ຕໍ່ການປະຕິວັດລາວ (?!)
ຄຽງຂ້າງນັ້ນ, ບັນດາກອງກຳລັງສັດຕູແລະປະຕິກິລິຍາຍັງໃຊ້ກົນອຸບາຍ “ການປະຕິວັດສີ” ເຊັ່ນ: ສວຍໃຊ້ບັນຫາປະຊາທິປະໄຕ, ສິດທິມະນຸດ, ການຊ່ວຍເຫຼືອດ້ານເສດຖະກິດ, ຊົນເຜົ່າ, ສາສະໜາ, ສົງຄາມຈິດຕະສາດ... ເພື່ອແຊກແຊງເຂົ້າວຽກງານພາຍໃນຂອງສອງປະເທດ ເພື່ອທຳລາຍລະບອບການເມືອງ ແລະ ສາຍພົວພັນມິດຕະພາບທີ່ເປັນມູນເຊື້ອ ແລະ ຄວາມສາມັກຄີແບບພິເສດ ຫວຽດນາມ-ລາວ, ລາວ-ຫວຽດນາມ, ໂດຍວາງແຜນທີ່ຈະນໍາທັງສອງປະເທດໄປຕາມວິຖີທຶນນິຍົມ. ສວຍໃຊ້ການປະເທດຫວຽດນາມແລະລາວເຂົ້າຮ່ວມການເຊື່ອມໂຍງສາກົນ, ບັນດາກອງກຳລັງສັດຕູແລະປະຕິກິລິຍາ ໄດ້ກ່າວຫາຢ່າງເສກສັນປັ້ນແຕ່ງ ແລະບິດເບືອນນະໂຍບາຍຂອງສອງປະເທດ ແລະປະຕິເສດຜົນສຳເລັດຂອງການເຊື່ອມໂຍງເສດຖະກິດສາກົນຂອງສອງປະເທດ… ພວກເຂົາພະຍາຍາມຊັກຊວນ, ຍຸຍົງ, ປຸກລະດົມປະຊາຊົນ, ໂດຍສະເພາະ ຄົນຊົນເຜົ່າສ່ວນໜ້ອຍຢູ່ເຂດຊາຍແດນ ໃຫ້ອົບພະຍົບຢ່າງເສລີ, ຂ້າມຊາຍແດນຢ່າງຜິດກົດໝາຍ, ກະທຳການທີ່ຜິດກົດໝາຍ, ສົ່ງເສີມ “ການຫັນປ່ຽນຕົນເອງ”, “ການປ່ຽນແປງຕົນເອງ” ເພື່ອສ້າງແນວຄິດແບ່ງແຍກດິນແດນ, ແບ່ງແຍກຜູ້ເຊື່ອຖືແລະບໍ່ເຊື່ອຖືສາສະໜາ, ສາສະໜາ ແລະ ຊົນເຜົ່າ ໃນເຂດຊາຍແດນຂອງສອງປະເທດ…, ເຮັດໃຫ້ເກີດຄວາມບໍ່ເປັນລະບຽບຮຽບຮ້ອຍ, ທຳລາຍຄວາມໝັ້ນຄົງທາງດ້ານການເມືອງ-ສັງຄົມຂອງສອງປະເທດ.
ພິເສດ, ບັນດາກອງກຳລັງສັດຕູແລະປະຕິກິລິຍາ ໄດ້ແລະກຳລັງສຸມໃສ່ຂຸດຄົ້ນຄວາມທ້າທາຍຈາກຍຸດທະສາດການແຂ່ງຂັນເພື່ອແຍ່ງຊີງອິດທິພົນຂອງປະເທດສຳຄັນໆໃນບັນຫາລະດັບພາກພື້ນ, ຜົນກະທົບຂອງບັນຫາຄວາມໝັ້ນຄົງທີ່ບໍ່ເປັນແບບດັ້ງເດີມ ແລະບາງຈຸດທີ່ບໍ່ “ສອດຄ່ອງກັນ” ກັບຜົນປະໂຫຍດຂອງຊາດ-ປະເທດຊາດ, ເພື່ອເຮັດໃຫ້ເກີດຄວາມສັບສົນຂໍ້ມູນຂ່າວສານ, ສ້າງຄວາມສົງໄສເຊິ່ງກັນແລະກັນ, ສ້າງຄວາມສັບສົນໃຫ້ກັບຄວາມຄິດເຫັນຂອງປະຊາຊົນ, ແບ່ງແຍກພາຍໃນ ແລະ ທຳລາຍຄວາມສາມັກຄີພິເສດທີ່ຊື່ສັດ, ບໍລິສຸດ ແລະ ຫາຍາກ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມແລະລາວ.
ບັນດາປັດໄຈທີ່ສ້າງຄຸນຄ່າຂອງສາຍພົວພັນສາມັກຄີ ມິດຕະພາບແບບພິເສດ
ລະຫວ່າງຫວຽດນາມ-ລາວ, ລາວ-ຫວຽດນາມ
ສືບຕໍ່ມູນເຊື້ອຂອງການຮ່ວມສຳພັນສູ້ຮັບຫວຽດນາມ-ລາວ - ສັນຍາລັກແຫ່ງສາຍພົວພັນທີ່ຍິ່ງໃຫຍ່, ຄວາມສາມັກຄີແບບພິເສດລະຫວ່າງສອງປະເທດໃນໄລຍະແຫ່ງການຕໍ່ສູ້ຕ້ານການປົກຄອງແລະການຮຸກຮານຈັກກະພັດ ລ່າເມືອງຂຶ້ນ, ສາຍພົວພັນແບບພິເສດລະຫວ່າງຫວຽດນາມ-ລາວ ສືບຕໍ່ໄດ້ຮັບການສ້າງແລະພັດທະນາ ບົນພື້ນຖານຂອງອຸດົມການຮ່ວມກັນ ກໍ່ຄືເປົ້າໝາຍໃນການສ້າງ ແລະ ພັດທະນາປະເທດຕາມເສັ້ນທາງສັງຄົມນິຍົມ. ກິດຈະການກໍ່ສ້າງແລະພັດທະນາປະເທດທັງໃນຫວຽດນາມແລະລາວຢູ່ພາຍໃຕ້ການນຳພາຂອງພັກມາກຊິດ-ເລນິນນິສ ເຊິ່ງມີຕົ້ນກຳເນີດຮ່ວມກັນ ຄືພັກກອມມູນິດອິນດູຈີນ. ສອງພັກ, ສອງລັດ ຫວຽດນາມ ແລະ ລາວ ຍາມໃດກໍ່ຮັກສາສາຍພົວພັນມິດຕະພາບທີ່ເປັນມູນເຊື້ອ, ສະໜັບສະໜູນແລະຊ່ວຍເຫຼືອເຊິ່ງກັນແລະກັນຢ່າງສູດອົກສຸດໃຈ ໃນພາລະກິດການສ້າງສາ ແລະພັດທະນາປະເທດ ເຖິງວ່າສະພາບການຂອງແຕ່ລະປະເທດ ຫຼືສະພາບການສາກົນແລະພາກພື້ນ, ກໍ່ຄືການພົວພັນສາກົນຂອງແຕ່ລະຝ່າຍ ຈະມີການປ່ຽນແປງຫຼາຍຢ່າງ.
ປະຫວັດສາດໄດ້ພິສູດໃຫ້ເຫັນວ່າ ຫວຽດນາມແລະລາວ ມີສະພາບການທີ່ຄ້າຍຄືກັນ, ມີຄວາມໃກ້ຊິດທາງພູມສາດ ແລະສະພາບທຳມະຊາດ, ມີເປົ້າໝາຍດຽວກັນໃນການສູ້ຊົນເພື່ອເອກະລາດແຫ່ງຊາດ ແລະລັດທິສັງຄົມນິຍົມ. ຖ້າຫາກບໍ່ມີຄວາມເຫັນດີເຫັນພ້ອມດ້ານທັດສະນະ, ແນວຄິດ ແລະ ແນວທາງຍຸດທະສາດ, ແມ່ນຍາກທີ່ສອງປະເທດຈະສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ຊື່ສັດ ແໜ້ນແຟ້ນ ຫາຍາກຄືປະຈຸບັນ. ສອງປະເທດມີເປົ້າໝາຍແລະອຸດົມຄະຕິດຽວກັນຕາມແນວທາງກໍ່ສ້າງລັດທິສັງຄົທນິຍົມ; ມີລະບອບການເມືອງແລະລັດທີ່ຄ້າຍຄືກັນ, ກຳລັງດຳເນີນການປ່ຽນແປງໃໝ່ປະເທດ ແລະ ພັດທະນາເສດຖະກິດຕະຫຼາດຕາມທິດສັງຄົມນິຍົມ. ໃນແຕ່ລະປີ, ຫວຽດນາມມອບທຶນສຶກສາໄລຍະສັ້ນແລະໄລຍະຍາວໃຫ້ລາວ 600 ເຖິງ 700 ທຶນ. ປະຈຸບັນ, ມີນັກສຶກສາລາວຫຼາຍກວ່າ 14.000 ຄົນກຳລັງຮ່ຳຮຽນຢູ່ບັນດາສະຖາບັນການສຶກສາຂອງຫວຽດນາມ, ນັກສຶກສາຫວຽດນາມ 250 ຄົນກຳລັງຮ່ຳຮຽນຢູ່ໃນລາວ. ສິ່ງເຫຼົ່ານີ້ເປັນປັດໄຈສຳຄັນທີ່ປະກອບສ່ວນເຂົ້າໃນການພັດທະນາຂອງແຕ່ລະປະເທດ ແລະເປັນຂົວຕໍ່ທີ່ຂາດບໍ່ໄດ້ ໃນການຮັກສາ ແລະ ເພີ່ມທະວີສາຍພົວພັນອັນດີງາມທີ່ມີຢູ່ລະຫວ່າງສອງພັກ ແລະປະຊາຊົນຂອງທັງສອງປະເທດ. ຄຽງຄູ່ກັບການຝຶກອົບຮົມແລະການພັດທະນາຊັບພະຍາກອນມະນຸດນັ້ນ ຫວຽດນາມຍັງຊ່ວຍລາວລົງທຶນກໍ່ສ້າງສິ່ງອຳນວຍຄວາມສະດວກ ແລະລະບົບໂຮງຮຽນ ດ້ວຍການລົງທຶນລວມສູງເຖິງຫຼາຍຮ້ອຍຕື້ດົງ ໂດຍໃຊ້ເງິນຊ່ວຍເຫຼືອຈາກລັດຖະບານຫວຽດນາມ.
ການພົບປະແລກປ່ຽນວັດທະນະທຳລະຫວ່າງນັກສຶກສາສອງປະເທດຫວຽດນາມ-ລາວ _ແຫຼ່ງ: thanhdoan.hochiminhcity.gov.vn
ນັບແຕ່ສອງປະເທດດຳເນີນການປ່ຽນແປງໃໝ່ (ປີ 1986), ເປົ້າໝາຍອັນດັບໜຶ່ງຂອງທັງສອງປະເທດແມ່ນ ການຫັນເປັນອຸດສາຫະກຳ ແລະ ທັນສະໄໝຂອງປະເທດ ບົນພື້ນຖານການປ່ຽນແປງໃໝ່ກົນໄກຄຸ້ມຄອງເສດຖະກິດ, ຫັນຈາກພື້ນຖານເສດຖະກິດຕາມແຜນການລວມສູນ ໄປເປັນເສດຖະກິດຕະຫຼາດຕາມທິດສັງຄົມນິຍົມ ແລະ ຊຸກຍູ້ການເຊື່ອມໂຍງເຂົ້າກັບສາກົນ. ສອງປະເທດສ້າງຮູບແບບລັດແຫ່ງອຳນາດກົດໝາຍສັງຄົມນິຍົມ “ຂອງປະຊາຊົນ, ໂດຍປະຊາຊົນ, ເພື່ອປະຊາຊົນ” ພາຍໃຕ້ການນຳພາຂອງພັກການເມືອງດຽວ. ຄວາມຄ້າຍຄືກັນລະຫວ່າງທັງສອງພັກ, ສອງກົງຈັກແຫ່ງລັດ ແລະ ອຸດົມຄະຕິສັງຄົມນິຍົມຮ່ວມກັນ ເປັນເງື່ອນໄຂສຳຄັນໃນການສ້າງສາຍພົວພັນແບບພິເສດລະຫວ່າງຫວຽດນາມແລະລາວໃນສະພາບການໃໝ່.
ໃນໄລຍະສົງຄາມຕໍ່ຕ້ານລັດທິລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາໃນສະຕະວັດທີ XX ຂອງປະຊາຊົນສອງປະເທດຫວຽດນາມ-ລາວ, ຄວາມເຫັນດີເຫັນພ້ອມດ້ານທັດສະນະ, ແນວຄິດ ແລະ ແນວທາງຍຸດທະສາດ ໄດ້ຊ່ວຍໃຫ້ສອງປະເທດສ້າງການຮ່ວມສຳພັນສູ້ຮົບຫວຽດນາມ-ລາວ. ຍຸດທະສາດການປະສານງານການສູ້ຮົບທີ່ມີປະສິດທິຜົນ ສາມາດເກີດຂຶ້ນໄດ້ຈາກແນວທາງການເມືອງທີ່ມີຄວາມເປັນເອກະສັນກັນສູງ ກ່ຽວກັບທັດສະນະແລະຜົນປະໂຫຍດທີ່ແທ້ຈິງ. “ທາງດ້ານແນວທາງ, ການພົວພັນທີ່ມີສາຍເລືອດການເມືອງດຽວກັນຖືເປັນຊັບສິນທີ່ມີຄ່າທີ່ສຸດຂອງສອງພັກ, ສອງລັດ ແລະ ປະຊາຊົນສອງປະເທດ, ແມ່ນປັດໄຈສຳຄັນທີ່ກຳນົດໄຊຊະນະຂອງການປະຕິວັດຂອງສອງປະເທດ ໃນຂະບວນການຕໍ່ສູ້ອັນຍາວນານ ແລະຫຍຸ້ງຍາກລຳບາກ”(1). ດັ່ງນັ້ນ, ຄວາມຄ້າຍຄືກັນທາງດ້ານອຸດົມການ ແລະ ເປົ້າໝາຍການພັດທະນາປະເທດຂອງແຕ່ລະຝ່າຍ ແມ່ນບັນດາປັດໄຈພື້ນຖານທີ່ສົ່ງຜົນສະທ້ອນເຖິງສາຍພົວພັນແບບພິເສດຫວຽດນາມ-ລາວ.
ຫຼັງຈາກສົງຄາມເຢັນສິ້ນສຸດລົງ, ຫວຽດນາມແລະລາວຕ່າງກໍ່ປະເຊີນກັບໂອກາດແລະຄວາມທ້າທາຍທີ່ໃຫຍ່ໂຕ. ການພັງທະລາຍລົງຂອງລະບອບສັງຄົມນິຍົມໃນສະຫະພາບໂຊວຽດ ແລະເອີຣົບຕາເວັນອອກ ບໍ່ພຽງສົ່ງຜົນກະທົບຕໍ່ການພົວພັນການຕ່າງປະເທດຂອງຫວຽດນາມແລະລາວເທົ່ານັ້ນ, ແຕ່ຍັງສົ່ງຜົນກະທົບບາງປະການໃນດ້ານຄວາມໝັ້ນຄົງທາງການເມືອງ ແລະແນວຄິດຂອງແຕ່ລະປະເທດອີກນຳ. ນອກຈາກການສາມັກຄີກັນ ແລະຄຽງບ່າຄຽງໄຫຼ່ກັນຮ່ວມມືສ້າງສາ ແລະ ພັດທະນາປະເທດຕາມທິດສັງຄົມນິຍົມ ແລະດຳເນີນການປ່ຽນແປງໃໝ່ປະເທດແລ້ວ, ສອງປະເທດຍັງປະສານງານແລະສະໜັບສະໜູນເຊິ່ງກັນແລະກັນ ໃນການຮ່ວມມືຫຼາຍຝ່າຍ ໂດຍສະເພາະແມ່ນ ການຮ່ວມມືກັນເພື່ອແກ້ໄຂບັນຫາ ແລະກໍ່ສ້າງແຫຼມອິນດູຈີນແຫ່ງມິດຕະພາຍ, ຄວາມສາມັກຄີ ແລະການພັດທະນາ; ປະສານງານຢ່າງໃກ້ຊິດໃນບັນດາເວທີການຮ່ວມມືລະດັບພາກພື້ນ ເຊັ່ນ: ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ), ອະນຸພາກພື້ນລຸ່ມແມ່ນ້ຳຂອງເປີດກວ້າງ, ເຂດສາມຫຼ່ຽມພັດທະນາກຳປູເຈຍ-ລາວ-ຫວຽດນາມ. ສອງປະເທດສະໜັບສະໜູນຫຼັກໝັ້ນຂອງກັນແລະກັນໃນບັນຫາຕ່າງໆ ທີ່ມີການຫາລືກັນໃນເວທີພາກພື້ນ ແລະສາກົນ; ສະໜັບສະໜູນເຊິ່ງກັນແລະກັນຢ່າງແຂງຂັນໃນການຈັດຕັ້ງກອງປະຊຸມທາງການເມືອງ, ຄວາມໝັ້ນຄົງ ແລະ ການປ້ອງກັນປະເທດໃຫ້ປະສົບຄວາມສຳເລັດ ໃນລະຫວ່າງປີທີ່ລາວ ຫຼືຫວຽດນາມ ດຳລົງຕຳແໜ່ງປະທານອາຊຽນ, ຮ່ວມກັບບັນດາປະເທດອາຊຽນສ້າງປະຊາຄົມອາຊຽນ ເພື່ອສົ່ງເສີມການພັດທະນາຮ່ວມກັນຂອງພາກພື້ນ; ພະຍາຍາມຮ່ວມກັບປະເທດອື່ນໆ ໃນການແກ້ໄຂຂໍ້ພິພາດ, ສົ່ງເສີມການປະຕິບັດຕາມ ແລະ ການປະຕິບັດບັນດາຫຼັກການພື້ນຖານທີ່ສອດຄ່ອງກັບກົດໝາຍສາກົນ.
ໂດຍຮັບຮູ້ວ່າ ຄວາມໝັ້ນຄົງຂອງແຕ່ລະປະເທດບໍ່ໄດ້ດຳລົງຢູ່ຢ່າງເປັນອິດສະຫຼະ,ແຕ່ເພິ່ງພາເຊິ່ງກັນແລະກັນ, ທັງສອງປະເທດຈຶງເອົາໃຈໃສ່ ແລະເພີ່ມທະວີການຮ່ວມມືຢ່າງໃກ້ຊິດ ໃນດ້ານການປ້ອງກັນປະເທດແລະຄວາມໝັ້ນຄົງ, ເພາະການຮ່ວມມືດ້ານການປ້ອງກັນປະເທດແລະຄວາມໝັ້ນຄົງ ລະຫວ່າງຫວຽດນາມ-ລາວ ໄດ້ຮັບການກໍ່ສ້າງບົນພື້ນຖານມູນເຊື້ອການຕໍ່ສູ້ຕ້ານການຮຸກຮານຈາກຕ່າງປະເທດ ຂອງສອງປະເທດມີມານານນັບພັນປີແລະ ເຄົາລົບເອກະລາດແລະອະທິປະໄຕຂອງກັນແລະກັນ, ເສີມຂະຫຍາຍກຳລັງແຮງ ແລະ ຄວາມສາມາດຂອງແຕ່ລະປະເທດ ບົນຫຼັກການຄວາມສະເໝີພາບ ແລະຜົນປະໂຫຍດຮ່ວມກັນ. ປະຫວັດສາດໄດ້ພິສູດໃຫ້ເຫັນວ່າ ປະຊາຊົນສອງປະເທດຫວຽດນາມ ແລະ ລາວ ມີຄວາມຜູກພັນກັນຕາມກົດເກນທຳມະຊາດ ແລະ ຄວາມຜູກພັນນັ້ນ ມີຄວາມໝາຍສຳຄັນທີ່ສຸດ ຕໍ່ຄວາມໝັ້ນຄົງທາງດ້ານການເມືອງ ແລະ ການພັດທະນາຂອງແຕ່ລະປະເທດ. ການຮ່ວມມືດ້ານການປ້ອງກັນປະເທດແລະຄວາມໝັ້ນຄົງ ລະຫວ່າງສອງປະເທດທີ່ມີປະສິດທິພາບ ຈະຊ່ວຍຮັບປະກັນຄວາມໝັ້ນຄົງ ແລະສະຖຽນລະພາບທາງການເມືອງຂອງທັງສອງປະເທດ, ດັ່ງນັ້ນ, ຈຳເປັນຕ້ອງມີການຮ່ວມມືຢ່າງໃກ້ຊິດ, ຈິງໃຈ ແລະ ເຊື່ອຖືຈາກທັງສອງປະເທດ.
ການຮ່ວມມືທາງເສດຖະກິດລະຫວ່າງສອງປະເທດກໍ່ໄດ້ຮັບຄວາມສົນໃຈເປັນພິເສດ ດ້ວຍເນື້ອໃນແລະຮູບການຂອງການຮ່ວມມືທີ່ມີການຂະຫຍາຍຕົວ, ມີຄວາມຫຼາກຫຼາຍ ແລະ ອຸດົມສົມບູນຫຼາຍຂຶ້ນເລື້ອຍໆ. ຫວ່າງມໍ່ໆມານີ້, ໃນໂອກາດການຢ້ຽມຢາມລາວຢ່າງເປັນທາງການ (ເດືອນມັງກອນ 2023) ຂອງທ່ານນາຍົກລັດຖະມົນຕີຫວຽດນາມ ຟ້າມມິງຈິ໋ງ, ສອງຝ່າຍໄດ້ຢືນຢັນຄວາມຕັດສິນໃຈຍົກສູງລະດັບການຮ່ວມມືດ້ານເສດຖະກິດ ໃຫ້ເໝາະສົມກັບສະພາບການພົວພັນແບບພິເສດລະຫວ່າງສອງປະເທດ, ໃນນັ້ນ ຈຸດສຸມແມ່ນສືບຕໍ່ສະໜັບສະໜູນການຟື້ນຟູເສດຖະກິດຂອງກັນແລະກັນ ພາຍຫຼັງການລະບາດຂອງໂຄວິດ-19, ກໍ່ສ້າງພື້ນຖານເສດຖະກິດທີ່ເປັນເອກະລາດ ແລະ ເປັນເຈົ້າຕົນເອງ ຕິດພັນກັບການເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ມີປະສິດທິຜົນ; ສອງຝ່າຍໄດ້ເຫັນດີເພີ່ມທະວີການພົວພັນລະຫວ່າງສອງປະເທດ, ທັງໃນດ້ານຂອງໂຄງສ້າງພື້ນຖານແຂງແລະອ່ອນ ເພື່ອຂະຫຍາຍພື້ນທີ່ສຳລັບການຮ່ວມມື ແລະການພັດທະນາ.
ຄຽງຄູ່ກັນນັ້ນ, ດ້ວຍທີ່ຕັ້ງພູມສາດທີ່ບໍ່ມີທາງອອກສູ່ທະເລ, ລາວຕ້ອງການ “ປະຕູ” ເພື່ອການຄ້າກັບໂລກຢ່າງຮີບດ່ວນ. ດ້ວຍລະບົບຖະໜົນຫົນທາງ ແລະ ລະບົບທ່າເຮືອທາງທະເລທີ່ສະດວກ, ພິເສດແມ່ນລັດຖະບານຫວຽດນາມ ແລະ ລັດຖະບານລາວ ໄດ້ລົງທຶນ ແລະໃຊ້ປະໂຫຍດຈາກທ່າເຮືອຫວຸງອ໋າງ, ຫວຽດນາມ ຖືເປັນ “ຂົວ” ທີ່ສຳຄັນສຳລັບລາວ ໃນການຂະຫຍາຍການຜະລິດ, ດຶງດູດການລົງທຶນໂດຍກົງຈາກຕ່າງປະເທດ, ການໝູນວຽນສິນຄ້າ... ກັບບັນດາປະເທດໃນພາກພື້ນແລະໃນທົ່ວໂລກ. ນີ້ກໍແມ່ນເຫດຜົນທີ່ເຮັດໃຫ້ຄວາມຈຳເປັນໃນການໃຊ້ປະໂຫຍດຈາກທີ່ຕັ້ງພູມສາດ-ຍຸດທະສາດຂອງຫວຽດນາມທີ່ມີຕໍ່ລາວ ຈຶງມີຄວາມຈຳເປັນຫຼາຍຂຶ້ນ. ໃນທາງກົງກັນຂ້າມ, ໃນສະພາບການຫວຽດນາມຍູ້ແຮງການປ່ຽນແປງໃໝ່ ແລະ ເຊື່ອມໂຍງເຂົ້າກັບສາກົນຢ່າງເລິກເຊິ່ງ, ລາວຖືເປັນ “ຂົວຕໍ່” ສຳລັບສິນຄ້າຫວຽດນາມທີ່ຈະໄຫຼໄປຍັງປະເທດອາຊຽນອື່ນໆ ໄດຍຜ່ານແລວທາງເສດຖະກິດຕາເວັນອອກ-ຕາເວັນຕົກ (EWEC) ເຊື່ອມຕໍ່ຫວຽດນາມ ຜ່ານລາວ, ໄທ ໄປຍັງມຽນມາ...
ສຳລັບຫວຽດນາມ, ທີ່ຕັ້ງທາງພູມສາດ-ການເມືອງຂອງລາວມີຄວາມໝາຍສຳຄັນທີ່ສຸດ ໃນການປົກປ້ອງເຂດຊາຍແດນ, ປ້ອງກັນຜົນກະທົບດ້ານລົບໂດຍກົງຈາກຕາເວັນຕົກສູ່ຫວຽດນາມ. ໃນຄວາມເປັນຈິງ, ໃນບັນດາທົດສະວັດສຸດທ້າຍຂອງສະຕະວັດທີ XX, ບັນດາກອງກຳລັງສັດຕູແລະປະຕິກິລິຍາພາຍນອກ ໄດ້ສວຍໃຊ້ເຂດພູດອຍລະຫວ່າງສອງປະເທດເປັນພື້ນຖານປະຕິບັດການ ເພື່ອແຊກຊຶມ ແລະ ທຳລາຍຫວຽດນາມ. ດັ່ງນັ້ນ, ສະຖຽນລະພາບໃນສັນຕິພາບ ແລະ ການພັດທະນາຂອງລາວ, ກໍ່ຄືການເສີມສ້າງສາຍພົວພັນແບບພິເສດລະຫວ່າງຫວຽດນາມແລະລາວ ຈຶງກາຍເປັນປັດໄຈໜຶ່ງທີ່ສ້າງຜົນປະໂຫຍດທີ່ໃກ້ຊິດ ແລະ ຖືກຕ້ອງຕາມກົດໝາຍຂອງຫວຽດນາມ. ຄວາມໝັ້ນຄົງແລະສະຖຽນລະພາບຂອງລາວມີຜົນກະທົບໂດຍກົງຕໍ່ຄວາມໝັ້ນຄົງ ສະຖຽນລະພາບ ແລະ ການພັດທະນາຂອງຫວຽດນາມ. ສະຖຽນລະພາບ ຄວາມໝັ້ນຄົງຂອງລາວເປັນເງື່ອນໄຂສຳຄັນໃນການຮັບປະກັນຄວາມໝັ້ນຄົງຂອງຫວຽດນາມ ແລະ ກົງກັນຂ້າມ. ດັ່ງນັ້ນ, ການເພີ່ມທະວີການຮ່ວມມືຢ່າງໃກ້ຊິດ ຈຶງເປັນບັນຫາຂອງການຢູ່ລອດຂອງສອງປະເທດຫວຽດນາມ ແລະ ລາວ.
ສາມາດເຫັນໄດ້ວ່າ, ການເພີ່ມທະວີການພັດທະນາສາຍພົວພັນແບບພິເສດລະຫວ່າງສອງປະເທດຊ່ວຍໃຫ້ຫວຽດນາມ ແລະ ລາວປົກປັກຮັກສາຜົນປະໂຫຍດແຫ່ງຊາດຂອງແຕ່ລະປະເທດ. ສະນັ້ນ, ສາມາດຢັ້ງຢືນໄດ້ວ່າ ຄວາມຄ້າຍຄືກັນ ແລະ ຜົນປະໂຫຍດແຫ່ງຊາດຂອງແຕ່ລະປະເທດ ສົ່ງຜົນກະທົບຢ່າງຕັ້ງໜ້າຕໍ່ການພົວພັນແບບພິເສດລະຫວ່າງຫວຽດນາມ-ລາວ. ການກໍ່ສ້າງ, ການປົກປ້ອງ, ການຮັກສາ ແລະ ການເສີມຂະຫຍາຍຄຸນຄ່າຂອງສາຍພົວພັນມິດຕະພາບທີ່ເປັນມູນເຊື້ອ ແລະຄວາມສາມັກຄີແບບພິເສດລະຫວ່າງຫວຽດນາມ-ລາວ, ລາວ-ຫວຽດນາມມາຈາກຄວາມປາດຖະໜາອັດຕະວິໄສ (ລະບົບແນວຄິດ ແລະ ແນວທາງຂອງພັກຜູ້ກຳອຳນາດ) ທັງຈາກຄວາມເປັນຈິງພາວະວິໄສ ທີ່ກຳນົດໂດຍການຢູ່ລອດແລະການພັດທະນາຂອງແຕ່ລະປະເທດ. ດັ່ງທີ່ ສະຫາຍ ໄກສອນ ພົມວິຫານ ເລຂາທິການໃຫຍ່ ພັກປະຊາຊົນປະຕິວັດລາວ ເຄີຍຢືນຢັນວ່າ: “ສາຍພົວພັນລາວ-ຫວຽດນາມໄດ້ກາຍເປັນສາຍພົວພັນແບບພິເສດທີ່ບໍລິສຸດ, ເປັນແບບຢ່າງ ແລະ ຫາຍາກ”, “ການປັບປຸງແລະເພີ່ມທະວີສາຍພົວພັນພິເສດນັ້ນ, ການປົກປັກຮັກສາຄວາມສາມັກຄີລາວ-ຫວຽດນາມແມ່ນການປົກປ້ອງແກ້ວຕາຂອງຕົນ”(2).
ສືບຕໍ່ເຮັດໃຫ້ສາຍພົວພັນລະຫວ່າງຫວຽດນາມ-ລາວ, ລາວ-ຫວຽດນາມ ນັບມື້ນັບແທດຈິງ
ແລະມີປະສິດທິຜົນ, ທັບມ້າງຖ້ອຍທຳນອງທີ່ແບ່ງແຍກແລະຕ້ານຢັນຂອງບັນດາກອງກຳລັງສັດຕູ
ກ່ອນອື່ນໝົດ, ດ້ວຍຄວາມຕັດສິນໃຈຍົກສູງສາຍພົວພັນ “ມິດຕະພາບອັນຍິ່ງໃຫຍ່” ລະຫວ່າງຫວຽດນາມ-ລາວ, ລາວ-ຫວຽດນາມ, ສອງຝ່າຍຈຳເປັນຕ້ອງສືບຕໍ່ກຳນົດວ່າ ການກໍ່ສ້າງການພົວພັນດ້ານການເມືອງແມ່ນພື້ນຖານ, ການພົວພັນດ້ານເສດຖະກິດແມ່ນສຳຄັນຕົ້ນຕໍ; ປັບປຸງແລະເພີ່ມພູນຄູນສ້າງຄວາມຮັບຮູ້ຮ່ວມກັນກ່ຽວກັບຄວາມສຳຄັນທາງຍຸດທະສາດ ຂອງສາຍພົວພັນລະຫວ່າງສອງປະເທດ, ຖືວ່ານີ້ແມ່ນບັນຫາຍຸດທະສາດທີ່ສຳຄັນສຳລັບພາລະກິດການປະຕິວັດຂອງແຕ່ລະປະເທດ. ລັກສະນະພິເສດຂອງສາຍພົວພັນຫວຽດນາມ-ລາວ ສະແດງໃຫ້ເຫັນຢູ່ໃນຄວາມແຕກຕ່າງພື້ນຖານຈາກການພົວພັນຮ່ວມມືປົກກະຕິອື່ນໆ ໂດຍເປັນການພົວພັນຮ່ວມມືຮອບດ້ານ ລວມທັງການເມືອງ, ຄວາມໝັ້ນຄົງ, ເສດຖະກິດ, ວັດທະນະທຳ ແລະ ການບຸລິມະສິດແລະໃຫ້ຄວາມສຳຄັນເຊິ່ງກັນແລະກັນຫຼາຍກວ່າການພົວພັນສອງຝ່າຍ. ຈຳເປັນຕ້ອງສ້າງຄວາມຮັບຮູ້ເປັນເອກະພາບໃນໝູ່ພະນັກງານ ແລະປະຊາຊົນຂອງທັງສອງປະເທດ ກ່ຽວກັບລັກສະນະພິເສດຂອງສາຍພົວພັນ, ໂດຍອີງໃສ່ວິໄສທັດທີ່ກວ້າງໄກ ຮອບດ້ານ ແລະໄລຍະຍາວ. ຕັ້ງໜ້າຊຸກຍູ້ການຮ່ວມມືລະຫວ່າງສອງປະເທດຢ່າງແຂງແຮງ; ເປັນເຈົ້າການໃນການເລືອກລາຍການທີ່ມີຄວາມຕ້ອງການດ້ານການລົງທຶນ ແລະ ການພັດທະນາທີ່ຕອບສະໜອງຄວາມຕ້ອງການຂອງການກໍ່ສ້າງປະເທດຈາກທັດສະນະລວມ ເພື່ອຜົນປະໂຫຍດໃນການພົວພັນຮ່ວມມືແບບພິເສດ.
ທີສອງ, ລະດົມຊັບພະຍາກອນແລະລະບົບການເມືອງຂອງທັງສອງປະເທດໃຫ້ເກີດປະໂຫຍດສູງສຸດ, ສຸມໃສ່ປັບປຸງແລະຍົກລະດັບການຮ່ວມມືທາງດ້ານເສດຖະກິດ ວັດທະນະທຳ ວິທະຍາສາດ-ເຕັກນິກ ໃຫ້ສອດຄ່ອງກັບການພົວພັນທາງການເມືອງຫວຽດນາມ-ລາວ. ເພີ່ມທະວີແລະເຮັດໃຫ້ກົນໄກການຮ່ວມມືສົມບູນແບບ, ກ່ອນອື່ນໝົດແມ່ນ ເພີ່ມປະສິດທິພາບຂອງກົນໄກຄະນະກຳມະການລະຫວ່າງລັດຖະບານກ່ຽວກັບການຮ່ວມມືທາງດ້ານເສດຖະກິດ ວັດທະນະທຳ ວິທະຍາສາດ-ເຕັກນິກ. ສົມທົບທ່າແຮງຂອງແຕ່ລະປະເທດເພື່ອສ້າງທ່າແຮງຮ່ວມກັນ ບົນພື້ນຖານຂອງການໃຊ້ປະໂຫຍດຈາກບັນດາປັດໄຈສາກົນທີ່ເອື້ອອຳນວຍໃນດ້ານທຶນ ເຕັກນິກ ແລະ ຕະຫຼາດ. ສຸມໃສ່ກວດກາຄືນບັນດາກົນໄກ, ນະໂຍບາຍ, ແຜນງານ ແລະ ອົງການຈັດຕັ້ງປະຕິບັດໂດຍລວມ ເພື່ອເພີ່ມເຕີມ ແລະ ປັບປ່ຽນໃຫ້ເໝາະສົມກັບຄວາມເປັນຈິງ ແລະ ຄວາມຮຽກຮ້ອງຕ້ອງການໃໝ່ໃນການພົວພັນຮ່ວມມືຮອບດ້ານລະຫວ່າງສອງປະເທດ; ພິເສດແມ່ນ ໃນສະພາບການເຊື່ອມໂຍງເສດຖະກິດສາກົນ ແລະ ພາກພື້ນໃນປະຈຸບັນ ແລະໃນປີຕໍ່ໆໄປ ເພື່ອແນໃສ່ປະຕິບັດບັນດາເປົ້າໝາຍການຮ່ວມມືຍຸດທະສາດທີ່ຕັ້ງໄວ້ຢ່າງມີປະສິດທິຜົນ.
ທີສາມ, ເພີ່ມທະວີການຮ່ວມມືຢ່າງຮອບດ້ານຕາມທິດທາງສອງປະເທດປະສານງານຢ່າງແໜ້ນແຟ້ນແລະມີປະສິດທິພາບຫຼາຍຂຶ້ນ ໃນບັນດາໂຄງການ ແລະແຜນງານການຮ່ວມມືລະຫວ່າງສອງປະເທດກັບປະເທດອື່ນໃນພາກພື້ນ ແລະການຮ່ວມມືຫຼາຍຝ່າຍອື່ນໆ ບົນພື້ນຖານການເຄົາລົບແນວທາງການຕ່າງປະເທດທີ່ເປັນເອກະພາບ, ເປັນເຈົ້າຕົນເອງ ແລະ ແຜນນະໂຍບາຍການຫັນເປັນຫຼາຍຝ່າຍ ແລະຄວາມຫຼາກຫຼາຍຂອງການພົວພັນຕ່າງປະເທດຂອງກັນແລະກັນ ແນໃສ່ໃຊ້ປະໂຫຍດຈາກການພົວພັນເຫຼົ່ານີ້ ເພື່ອຮັກສາຜົນປະໂຫຍດຂອງທັງສອງຝ່າຍ, ປົກປັກຮັກສາຜົນປະໂຫຍດແຫ່ງຊາດຂອງແຕ່ລະປະເທດ ແລະສອງປະເທດຢ່າງສູງສຸດ, ພິເສດແມ່ນ ໃນກົນໄກການຮ່ວມມືທີ່ສອງປະເທດເຂົ້າຮ່ວມ ເຊັ່ນ ສະຫະປະຊາຊາດ, ອາຊຽນ, ບັນດາກົນໄກການຮ່ວມມືອະນຸພາກພື້ນ; ບັນຫາດ້ານຄວາມໝັ້ນຄົງທີ່ບໍ່ເປັນແບບດັ້ງເດີມ ເຊິ່ງທັງສອງຈະຕ້ອງປະເຊີນ. ເປັນເຈົ້າການໃນການປຶກສາຫາລື ແລະສະໜັບສະໜູນເຊິ່ງກັນແລະກັນ ໃນການແກ້ໄຂບັນຫາສຳຄັນໃນປະເທດແລະຕ່າງປະເທດ ຫຼືປຶກສາຫາລືກັນ ກ່ຽວກັບຫຼັກໝັ້ນ, ທັດສະນະໃນເວທີສາກົນທີ່ທັງສອງປະເທດເຂົ້າຮ່ວມ. ດ້ວຍເຫດນີ້, ຊ່ວຍໃຫ້ສອງຝ່າຍມີຄວາມສາມາດຕອບສະໜອງການປ່ຽນແປງຂອງສະຖານະການສາກົນ ແລະ ພາກພື້ນ, ຜ່ານນັ້ນ ຊ່ວຍໃຫ້ສອງປະເທດປົກປັກຮັກສາຜົນປະໂຫຍດແຫ່ງຊາດຂອງແຕ່ລະປະເທດ ແລະ ຜົນປະໂຫຍດລວມຂອງສອງປະເທດໄດ້ຢ່າງມີປະສິດທິພາບ.
ທີສີ່, ໃຫ້ຄວາມສຳຄັນກັບຄວາມສົມດຸນລະຫວ່າງບັນດາຜົນປະໂຫຍດທີ່ສຳຄັນຕົ້ນຕໍທາງດ້ານການເມືອງ ຄວາມໝັ້ນຄົມ ແລະ ເສດຖະກິດ ຂອງແຕ່ລະປະເທດແລະຂອງສອງປະເທດ ພາຍໃຕ້ອິດທິພົນຂອງປັດໄຈພາຍໃນແລະພາຍນອກ. ຕະຫຼອດປະຫວັດສາດ, ການພົວພັນລະຫວ່າງຫວຽດນາມ ແລະ ລາວນັບມື້ນັບສະໜິດແໜ້ນ, ກ່ອນອື່ນໝົດແມ່ນຍ້ອນຜົນປະໂຫຍດທີ່ໃກ້ຊິດຂອງສອງປະເທດ. ປະຈຸບັນ, ສະພາບການພາກພື້ນ ແລະ ໂລກມີການປ່ຽນແປງໄປຢ່າງສິ້ນເຊີງ; ດັ່ງນັ້ນ, ບັນດາປະເທດທັງໃຫຍ່ແລະນ້ອຍຕ່າງກໍ່ມີຜົນປະໂຫຍດຂອງຕົນເອງ ໃນການສານຕໍ່ການພົວພັນສາກົນ. ໃນບັນດາຜົນປະໂຫຍດສ່ວນຕົວເຫຼົ່ານັ້ນ, ມີຜົນປະໂຫຍດສຳຄັນຕົ້ນຕໍ່ທີ່ຍາກສຳລັບປະເທດຕ່າງໆ ທີ່ຈະຍອມແພ້ ເມື່ອປະເຊີນກັບແຮງກົດດັນຈາກພາຍນອກ. ດັ່ງນັ້ນ, ສອງປະເທດຕ້ອງກຳນົດຢ່າງຈະແຈ້ງກ່ຽວກັບບັນຫາທີ່ສອງຝ່າຍມີຜົນປະໂຫຍດທີ່ “ບໍ່ຖືກເໝາະກັນ” ຫລື “ບໍ່ຖືກເໝາະກັນທັງໝົດ” ເພື່ອໃຫ້ມີ “ຫຼັກຈັນຍາບັນ” ທີ່ເໝາະສົມຕາມທິດທາງເຄົາລົບຜົນປະໂຫຍດຂອງກັນແລະກັນ, ເຄົາລົບກົດໝາຍແລະປະເພນີສາກົນ; ສືບຕໍ່ໃຊ້ປະໂຫຍດແລະເສີມຂະຫຍາຍປະສິດທິຜົນຂອງບັນດາກົນໄກ, ບັນດາຊ່ອງສາຍການຮ່ວມມື ແລະ ຄຳຂວັນການຮ່ວມມື “ການຊ່ວຍເຫຼືອເພື່ອນ ແມ່ນການຊ່ວຍເຫຼືອຕົວເອງ” ຂອງສອງປະເທດ.
ຕະຫຼອດ 60 ປີທີ່ຜ່ານມາ, ເຖິງວ່າສະພາບການໂລກແລະພາກພື້ນຈະມີການປ່ຽນແປງຢ່າງສັບສົນຫຼາຍຢ່າງ ໂດຍມີທັງຂໍ້ດີແລະຄວາມທ້າທາຍປະປົນກັນ, ແຕ່ກໍ່ສາມາດຢັ້ງຢືນໄດ້ວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ໄດ້ພັດທະນາຢ່າງບໍ່ຢຸດຢັ້ງ, ນັບມື້ນັບເລິກເຊິ່ງ, ແທດຈິງ ແລະ ມີປະສິດທິພາບ. ບັນດາບົດຮຽນປະຫວັດສາດຂອງການພົວພັນທີ່ເປັນແບບຢ່າງລະຫວ່າງຫວຽດນາມ-ລາວ, ລາວ-ຫວຽດນາມ; ແນວຄວາມຄິດຊີ້ນຳ ແລະ ເນື້ອໃນຂອງການຮ່ວມມືທີ່ລະບຸໄວ້ໃນສົນທິສັນຍາມິດຕະພາບແລະການຮ່ວມມື ຍັງຄົງຮັກສາຄຸນຄ່າເດີມຢູ່ ແລະເປັນ “ເສັ້ນດ້າຍສີແດງ” ສອດຫ້ອຍຕະຫຼອດຂະບວນການພັດທະນາການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງປະເທດ. ສຳລັບປະຊາຊົນສອງປະເທດ, ການພົວພັນແບບພິເສດຫວຽດນາມ-ລາວ, ລາວ-ຫວຽດນາມ ຖືວ່າແມ່ນວິຖີຊີວິດ, ຄວາມຮັກແພງທີ່ເປັນມູນເຊື້ອຕະຫຼອດໄປ, ເຖິງວ່າຈະຫຍຸ້ງຍາກຫຼືລຳບາກປານໃດກໍບໍ່ສາມາດຕັດແຍກອອກຈາກກັນໄດ້. ສາຍພົວພັນພິເສດແລະຫາຍາກລະຫວ່າງຫວຽດນາມ-ລາວສືບຕໍ່ໄດ້ຮັບການເພີ່ມພູນຄູນສ້າງ ບົນພື້ນຖານຂອງຜົນປະໂຫຍດແລະເປົ້າໝາຍຮ່ວມກັນຂອງສອງປະເທດ, ດ້ວຍຈິດໃຈສາກົນທີ່ບໍລິສຸດ, ຊ່ວຍໃຫ້ການປະຕິວັດຂອງສອງປະເທດຜ່ານຜ່າຄວາມຫຍຸ້ງຍາກແລະສິ່ງທ້າທາຍໄປສູ່ໄຊຊະນະເທື່ອລະກ້າວ ແລະ ເປັນເຄື່ອງເດີນທາງອັນລ້ຳຄ່າ, ເປັນຮາກຖານທີ່ໝັ້ນຄົງ ເພື່ອໃຫ້ຄົນລຸ້ນປະຈຸບັນແລະອະນາຄົດຂອງສອງປະເທດ ສືບຕໍ່ເສິມຂະຫຍາຍຄວາມສາມັກຄີ ແລະສ້າງສາຍພົວພັນທີ່ສະເໝີພາບ, ເປັນເຈົ້າຕົນເອງ, ມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ “ຂຽວສົດງົດງາມ ແລະໝັ້ນຄົງຂະໜົງແກ່ນຕະຫຼອດການ”
------------------------------
(1) ສະຖາບັນວິທະຍາສາດສັງຄົມຫວຽດນາມ - ສະຖາບັນວິທະຍາສາດສັງຄົມແຫ່ງຊາດລາວ: ກອງປະຊຸມສຳມະນາວິທະຍາສາດສາກົນກ່ຽວກັບສາຍພົວພັນຫວຽດນາມແລະລາວ, ສພຈ. ວິທະຍາສາດສັງຄົມ, ຮ່າໂນ້ຍ, 2007, ໜ້າ 244.
(2) ພັກປະຊາຊົນປະຕິວັດລາວ - ພັກກອມມູນິດຫວຽດນາມ: ປະຫວັດສາດສາຍພົວພັນພິເສດລາວ-ຫວຽດນາມ, ຫວຽດນາມ-ລາວ (1930 - 2007), ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2012, ເຫຼັ້ມ IV, ໜ້າ 133, 135-136
- ແຫຼ່ງ: ວາລະສານກອມມູນິດເອເລັກໂຕຣນິກ, ອອກວັນທີ 15 ເມສາ 2024. https://tapchicongsan.org.vn/web/guest/dau-tranh-phan-bac-cac-luan-dieu-sai-trai-thu-dich/chi-tiet/-/asset_publisher/YqSB2JpnYto9/content/phan-bac-nhung-quan-diem-sai-trai-thu-dich-xuyen-tac-moi-quan-he-dac-biet-viet-nam-lao-lao-viet-nam
