ຍົກສູງປະສິດທິຜົນຂອງວຽກງານການທູດເສດຖະກິດ ເພື່ອຮັບໃຊ້ໃຫ້ແກ່ການພັດທະນາປະເທດ
ວກ. - ໃນຊຸມປີທີ່ຜ່ານມາ, ການທູດເສດຖະກິດໄດ້ເຮັດເປັນຢ່າງດີ ພາລະບົດບາດຊ່ວຍເຫຼືອແລະຮ່ວມກັນບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດ ໃນການຜັນຂະຫຍາຍການເຄື່ອນໄຫວເສດຖະກິດຕ່າງປະເທດ ແລະຍູ້ແຮງການເຊື່ອມໂຍງເສດຖະກິດສາກົນ. ໃນສະຖານະການເສດຖະກິດໂລກ ທີ່ກຳລັງປະເຊີນກັບຄວາມຫຍຸ້ງຍາກ ແລະສິ່ງທ້າທາຍຫຼາຍປະການ, ການທູດເສດຖະກິດສືບຕໍ່ເສີມຂະຫຍາຍພາລະບົດບາດ, ປະກອບສ່ວນເພີ່ມທະວີ ການພົວພັນລະຫວ່າງຫວຽດນາມ ກັບຄູ່ຮ່ວມມືຕ່າງໆ, ສືບຕໍ່ເຮັດໃຫ້ການພົວພັນດ້ານເສດຖະກິດເວົ້າສະເພາະ ແລະການພົວພັນສອງຝ່າຍເວົ້າລວມ ຂະຫຍາຍເຂົ້າສູ່ລວງເລິກ, ໝັ້ນຄົງແລະຍືນຍົງ.
ທ່ານ ຫງຽນຊວັນຝຸກ, ກຳມະການກົມການເມືອງ, ນາຍົກລັດຖະມົນຕີຫວຽດນາມ ຕ້ອນຮັບທ່ານ ສະເຕຟານ-ຣາດູ ໂອປຣີ ລັດຖະມົນຕີກະຊວງສິ່ງແວດລ້ອມການທຸລະກິດ, ການຄ້າແລະວິສາຫະກິດ ຣູມານີ, ຜູ້ຕາງໜ້າສະພາແຫ່ງສະຫະພາບເອີຣົບ ແລະ ທ່ານນາງ ຊີເຊຍລີ ມານສຕຣອມ ຂ້າຫຼວງໃຫຍ່ການຄ້າສະຫະພາບເອີຣົບ, ທີ່ສຳນັກງານໃຫຍ່ລັດຖະບານ, ວັນທີ 30 ມີຖຸນາ 2019 _ພາບ: VGP
ຜັນຂະຫຍາຍວຽກງານການທູດເສດຖະກິດຢ່າງຕັ້ງໜ້າ
ປີ 1972, ເພື່ອກະກຽມໃຫ້ແກ່ການຟື້ນຟູພາຍຫຼັງສົງຄາມ, ກະຊວງການຕ່າງປະເທດຫວຽດນາມ ໄດ້ສ້າງຕັ້ງໜ່ວຍງານເສດຖະກິດ ທີ່ຂຶ້ນກັບຫ້ອງການກະຊວງ. ໃນວັນທີ 27 ກຸມພາ 1974, ສະພາລັດຖະບານໄດ້ປະກາດໃຊ້ ຂໍ້ຕົກລົງສະບັບເລກທີ 30/QĐ-CP ວ່າດ້ວຍການສ້າງຕັ້ງກົມເສດຖະກິດ ທີ່ຂຶ້ນກັບກະຊວງການຕ່າງປະເທດ. ວຽກງານການພົວພັນຕ່າງປະເທດດ້ານເສດຖະກິດ ໄດ້ກາຍເປັນໜ້າທີ່ຂອງຂະແໜງການຕ່າງປະເທດຢ່າງເປັນທາງການ. ເນື້ອໃນເສດຖະກິດໃນການເຄື່ອນໄຫວພົວພັນຕ່າງປະເທດ ໄດ້ຕິດແໜ້ນກັບວຽກງານການເມືອງ.
ໃນຊຸມປີ 80 ຂອງສະຕະວັດ XX, ບັນດາການເຄື່ອນໄຫວການທູດ ສຸມໃສ່ການຍາດແຍ່ງການຊ່ວຍເຫຼືອຂອງບັນດາປະເທດສັງຄົມນິຍົມ, ແກ້ໄຂຜົນສະທ້ອນຈາກການປິດລ້ອມ ຂວ້ຳບາດຂອງບັນດາປະເທດຕາເວັນຕົກຕໍ່ຫວຽດນາມ. ກະຊວງການຕ່າງປະເທດໄດ້ຕັ້ງໜ້າປະກອບສ່ວນເຂົ້າໃນການວາງກຳນົດຍຸດທະສາດການພັດທະນາ, ກໍ່ສ້າງບັນດາແຜນນະໂຍບາຍ, ນະໂຍບາຍເສດຖະກິດ, ພາໃຫ້ປະເທດຜົ້ນອອກຈາກວິກິດການ. ປີ 1985, ການທູດຮັບໃຊ້ເສດຖະກິດຖືກກຳນົດວ່າເປັນໜ້າທີ່ຕົ້ນຕໍ່ຂອງຂະແໜງການ. ກ້າວເຂົ້າສູ່ສະໄໝແຫ່ງການປ່ຽນແປງໃໝ່, ກະຊວງການຕ່າງປະເທດໄດ້ເອົາໃຈໃສ່ ແລະໃຊ້ແຫຼ່ງພະລັງຫຼາຍກວ່າ ໃຫ້ແກ່ບັນດາເຄື່ອນໄຫວເສດຖະກິດ ແນໃສ່ສ້າງສະພາບແວດລ້ອມ ອຳນວຍຄວາມສະດວກ ໃຫ້ແກ່ການເຄື່ອນໄຫວການຄ້າແລະການລົງທຶນ. ວຽກງານການທູດເສດຖະກິດ ໄດ້ມີບາດກ້າວພັດທະນາທີ່ສຳຄັນ, ປະກອບສ່ວນຢ່າງຕັ້ງໜ້າ ເຂົ້າໃນການຮັກສາສະພາບແວດລ້ອມສັນຕິພາບ, ສະຖຽມລະພາບ, ທຳລາຍມ້າງການປິດລ້ອມຂວ້ຳບາດຂອງສັດຕູ; ແກ້ໄຂຂະຈັດບັນຫາທາງຕັນລະຫວ່າງຫວຽດນາມ ແລະບັນດາຄູ່ຮ່ວມມືທີ່ສຳຄັນ, ບັນດາອົງການຈັດຕັ້ງສາກົນຄື ທະນາຄານໂລກ (WB), ກອງທຶນການເງິນສາກົນ (IMF), ຜັນຂະຫຍາຍນະໂຍບາຍເຊື່ອມໂຍງເສດຖະກິດສາກົນຢ່າງຕັ້ງໜ້າ.
ນັບແຕ່ກາງທົດສະວັດ 90 ຂອງສະຕະວັດ XX ຮອດປີ 2006, ການທູດເສດຖະກິດໄດ້ຮັບການຈັດຕັ້ງປະຕະບັດດ້ວຍ 3 ຈຸດສຸມ: ສືບຕໍ່ເປີດກວ້າງການພົວພັນລະຫວ່າງຫວຽດນາມ ກັບປະເທດຕ່າງໆ; ຊຸກຍູ້ການເຊື່ອມໂຍງເສດຖະກິດສາກົນ ໂດຍຜ່ານການເຂົ້າຮ່ວມເວທີປາໄສການຮ່ວມມືສດຖະກິດ ອາຊີ - ປາຊີຟິກ (APEC), ເຈລະຈາການເຂົ້າຮ່ວມອົງການການຄ້າໂລກ (WTO), ຕັ້ງໜ້າເຂົ້າຮ່ວມບັນດາເວທີປາໄສພາກພື້ນ ແລະ ກົນໄກການຮ່ວມມື ຂອງສະຫະປະຊາຊາດ; ເປີດກວ້າງການຊ່ວຍເຫຼືອບັນດາກະຊວງ, ຂະແໜງການ, ທ້ອງຖິ່ນແລະວິສາຫະກິດ ໃນການເຄື່ອນໄຫວສົ່ງເສີມເສດຖະກິດການທູດເຊັ່ນ ການດຶງດູດການລົງທຶນໂດຍກົງຈາກຕ່າງປະເທດ (FDI), ການຊ່ວຍເຫຼືອທາງການເພື່ອການພັດທະນາ (ODA); ຍູ້ແຮງການສົ່ງອອກສິນຄ້າ, ສົ່ງອອກແຮງງານ ແລະ ສົ່ງເສີມການທ່ອງທ່ຽວ.
ໃນໄລຍະເວລານີ້, ຄວາມຮັບຮູ້ກ່ຽວກັບການທູດເສດທະກິດໄດ້ຮັບການຍົກສູງຂຶ້ນ. ການເຄື່ອນໄຫວການທູດເສດທະກິດ ໄດ້ຮັບການຜັນຂະຫຍາຍຢ່າງຄົບຊຸດ, ຮອບດ້ານ, ມີຈຸດສຸມໃຈກາງ, ຈຸດສຳຄັນພິເສດ. ການທູດເສດຖະກິດໄດ້ປະສານສົມທົບຢ່າງກົມກຽວ ກັບການທູດການເມືອງ ແລະ ການທູດວັດທະນະທຳ. ຜ່ານບັນດາການຢ້ຽມຢາມຂອງຄະນະຜູ້ແທນຂັ້ນສູງ, ມີຂໍ້ຕົກລົງກ່ຽວກັບການຮ່ວມມືເສດຖະກິດຂະໝາດໃຫຍ່ຈຳນວນຫຼາຍ ທີ່ໄດ້ຮັບການຜັນຂະຫຍາຍ; ການເຄື່ອນໄຫວສົ່ງເສີມເສດຖະກິດການທູດ ໄດ້ຮັບການຈັດຕັ້ງຢ່າງສຳເລັດຜົນ ແລະ ບັນລຸປະສິດທິຜົນທີ່ດີ. ຫຼາຍອົງການຕົວແທນໄດ້ແນະນຳໂອກາດ, ຄູ່ຮ່ວມມື, ການຂຸດຄົ້ນຕະຫຼາດທີ່ມີທ່ານແຮງ, ພ້ອມທັງປະສານງານ ແລະ ສະໜັບສະໜູນບັນດາອົງການແລະວິສາຫະກິດພາຍໃນປະເທດ ເພື່ອຈັດການແກ້ໄຂຂໍ້ຂັດແຍ້ງທາງເສດຖະກິດສາກົນໂດຍໄວ.
ການທູດເສດຖະກິດໄດ້ເພີ່ມທະວີຂໍ້ມູນຂ່າວສານ ແລະ ການຄົ້ນຄວ້າຢ່າງສະໝ່ຳສະເໝີ ເພື່ອໃຫ້ຄຳແນະນຳລັດຖະບານກ່ຽວກັບທິດທາງ, ການບໍລິຫານເສດຖະກິດມະຫາພາກ, ວາງມາດຕະການເພື່ອແກ້ໄຂຄວາມທ້າທາຍ ແລະຄວາມຫຍຸ້ງຍາກລຳບາກ. ນອກຈາກນັ້ນ, ການທູດເສດຖະກິດຍັງສະໜັບສະໜູນ ຄວາມຮຽກຮ້ອງຕ້ອງການສະເພາະ ຂອງບັນດາກະຊວງ, ຂະແໜງການ, ທ້ອງຖິ່ນແລະວິສາຫະກິດ, ເຂົ້າຮ່ວມໃນການແກ້ໄຂຂໍ້ຂັດແຍ່ງທາງການຄ້າ,...; ຊ່ວຍເຫຼືອທ້ອງຖິ່ນຕ່າງໆ ໃນການເປີດກວ້າງການພົວພັນເສດຖະກິດຕ່າງປະເທດເຊັ່ນ ແນະນຳບັນດາອົງການສົ່ງເສີມການລົງທຶນ ມາຄົ້ນຄວ້າຮຽນຮູ້ຢູ່ທ້ອງຖິ່ນຕ່າງໆຂອງຫວຽດນາມ, ຈັດຕັ້ງກອງປະຊຸມສົ່ງເສີມການລົງທຶນຂອງທ້ອງຖິ່ນຕ່າງໆໃນປະເທດ.
ການທູດເສດຖະກິດຍັງເອົາໃຈໃສ່ເຖິງການຂົນຂວາຍຊາວຫວຽດນາມຢູ່ຕ່າງປະເທດອີກດ້ວຍ. ເດືອນກໍລະກົດ 2006, ເປັນເທື່ອທຳອິດທີ່ຫວຽດນາມຈັດຕັ້ງກອງປະຊຸມບັນດາວິສາຫະກິດຂອງຊາວຫວຽດນາມຢູ່ຕ່າງປະເທດ ທີ່ນະຄອນດ່ານັ້ງຢ່າງສຳເລັດຜົນ, ສ້າງຕັ້ງສະຫະພັນບັນດາວິສາຫະກິດຂອງຊາວຫວຽດນາມຢູ່ຕ່າງປະເທດ. ມີອົງການຕົວແທນຢູ່ຫຼາຍປະເທດ, ພິເສດແມ່ນຢູ່ ລັດເຊຍ, ຈີນ - ເອຣົບຕາເວັນອອກ, ເຊິ່ງໄດ້ມີການຂົນຂວາຍບັນດາວິສາຫະກິດຂອງຊາວຫວຽດນາມຢູ່ຕ່າງປະເທດ ໃຫ້ເຊື່ອມຕໍ່ແລະນຳເອົາສິນຄ້າຂອງຫວຽດນາມ ເຂົ້າສູ່ພາກພື້ນນີ້. ແຕ່, ຍ້ອນວ່ານີ້ແມ່ນໄລຍະຂອງ “ການຫັນປ່ຽນ” ແລະ “ການຊອກຫາທາງ” ດັ່ງນັ້ນ ການເຄື່ອນໄຫວການທູດເສດຖະກິດ ຈຶ່ງບໍ່ສາມາດຫຼີກລ່ຽງຄວາມສັບສົນແລະຄວາມງົງງວຍເບື້ອງຕົ້ນໄດ້. ວິທີການປະຕິບັດ ແລະການຈັດຕັ້ງກົງຈັກ ກໍ່ບໍ່ທ່ວງທັນກັບຄວາມຕ້ອງການຕົວຈິງ. ເນື້ອໃນຂອງການທູດເສດຖະກິດກໍ່ຍັງຕ້ອງໄດ້ຮັບການປັບປ່ຽນ ແລະເຮັດໃຫ້ສົມບູນແບບຕໍ່ໄປ.
ໄລຍະແຕ່ປີ 2007 ຮອດປະຈຸບັນ, ພາລະບົດບາດຂອງການທູດເສດຖະກິດໄດ້ຮັບການກຳນົດຢ່າງຈະແຈ້ງກວ່າເກົ່າ, ນັ້ນແມ່ນ: ພາລະບົດບາດເປີດທາງ, ເສີມຂະຫຍຫາຍກຳລັງແຮງຂອງການທູດເສດຖະກິດ ພ້ອມກັນກັບການທູດການເມືອງ, ການທູດວັດທະນະທຳ ເພື່ອເປີດຊ່ອງທາງ, ເປີດກວ້າງ ແລະ ເຮັດໃຫ້ການພົວພັນຮ່ວມມືຂອງຫວຽດນາມ ກັບບັນດາຄູ່ຮ່ວມມືໄປສູ່ລວງເລິກ, ເປັນຜູ້ນຳໜ້າໃນການເປີດຕະຫຼາດ ແລະຂົງເຂດການຮ່ວມມືສາກົນໃໝ່. ພາລະບົດບາດໃຫ້ຄຳປຶກສາ ແກ່ພັກ, ລັດ, ກະຊວງ, ຂະແໜງການ ແລະ ທ້ອງຖິ່ນຕ່າງໆ ໃນການວາງກຳນົດນະໂຍບາຍມະຫາພາກ, ຍຸດທະສາດການພັດທະນາ, ບັນດາບັນຫາເສດຖະກິດ - ການເມືອງສາກົນ, ການພົວພັນເສດຖະກິດສາກົນ. ພາລະບົດບາດສະໜັບສະໜູນ ຮ່ວມກັນກັບບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດ ໃນການເຄື່ອນໄຫວເສດຖະກິດການທູດ ບົນຈິດໃຈບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດເປັນຕົ້ນຕໍ່, ການທູດເສດຖະກິດສະໜັບສະໜູນ ຊ່ວຍເຫຼືອ, ແກ້ໄຂບັນດາບັນຫາທີ່ຍັງຄົງຄ້າງ ໃນການຜັນຂະຫຍາຍບັນດາແຜນການ, ໂຄງການຮ່ວມມືກັບຕ່າງປະເທດ. ພາລະບົດບາດຊຸກຍູ້, ກວດກາ ການຜັນຂະຫຍາຍການປະຕິບັດບັນດາໜ້າທີ່, ບັນດາຄຳໝັ້ນສັນຍາສາກົນ ກ່ຽວກັບເສດຖະກິດການທູດ.
ມາຮອດປະຈຸບັນ, ວຽກງານການທູດເສດຖະກິດໄດ້ຮັບການຜັນຂະຫຍາຍໃນຫຼາຍຂົງເຂດ ແລະ ບັນລຸຜົນສຳເລັດທີ່ສຳຄັນຈຳນວນໜຶ່ງ:
ທີໜຶ່ງ, ເປັນເຈົ້າການສະເໜີ, ເພີ່ມເຕີມເນື້ອໃນເສດຖະກິດ ໃນບັນດາການຢ້ຽມຢາມຂອງການນຳຂັ້ນສູງ, ຍົກສູງປະສິດທິຜົນຂອງກົນໄກບໍລິຫານ ແລະ ປະສານສົມທົບຂອງການທູດເສດຖະກິດ. ບັນດາການຢ້ຽມຢາມເວລານີ້ ຕ່າງກັນກັບກ່ອນໜ້ານີ້ ແມ່ນທັງເພີ່ມທະວີການພົວພັນດ້ານການເມືອງ ແລະທັງເພີ່ມທະວີການພົວພັນດ້ານເສດຖະກິດ. ປີ 2018, ການທູດເສດຖະກິດໄດ້ນຳໜ້າໃນການສົ່ງເສີມ ການສ້າງຕັ້ງຊ່ອງທາງການຮ່ວມມືໃໝ່ ທີ່ເປັນໄປໄດ້, ຍາວນານ, ໂດຍສະເພາະແມ່ນ ບັນດາຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ພ້ອມທັງແກ້ໄຂຂໍ້ຄົງຄ້າງຕ່າງໆ ໃນການພົວພັນເສດຖະກິດສອງຝ່າຍ. ກ່ຽວກັບການຮ່ວມມືຫຼາຍຝ່າຍ, ກະຊວງການຕ່າງປະເທດພ້ອມກັບບັນດາກະຊວງ, ຂະແໜງການ ໄດ້ມີການຂົນຂວາຍບັນດາປະເທດ, ຊຸກຍູ້ການເຈລະຈາ, ລົງນາມ ແລະ ອະນຸມັດຜ່ານ ບັນດາສັນຍາການຄ້າເສລີ (FTA), ພິເສດແມ່ນ ສັນຍາການຄ້າເສລີລຸ້ນໃໝ່, ຮັບປະກັນຜົນປະໂຫຍດຕົ້ນຕໍ່, ຖານະບົດບາດການທູດ ແລະ ການພົວພັນຂອງຫວຽດນາມ ກັບບັນດາຄູ່ຮ່ວມມືທີ່ສຳຄັນ. ປະກອບສ່ວນຢ່າງມີປະສິດທິຜົນ ເຂົ້າໃນການຂົນຂວາຍປະເທດຕ່າງໆ ຮັບຮອງເອົາຫວຽດນາມເປັນປະເທດທີ່ມີພື້ນຖານເສດຖະກິດຕະຫຼາດ. ມາຮອດປະຈຸບັນ ມີ 71 ປະເທດໄດ້ຮັບຮອງເອົາປະເທດຫວຽດນາມ ເປັນປະເທດທີ່ມີພື້ນຖານເສດຖະກິດຕະຫຼາດ(1).
ທີສອງ, ຊຸກຍູ້ແລະສ້າງບາດກ້າວບຸກທະລຸ ໃນການພົວພັນຂອງຫວຽດນາມ ກັບປະເທດຕ່າງໆ, ແນໃສ່ສ້າງສະພາບແວດລ້ອມອຳນວຍຄວາມສະດວກໃຫ້ແກ່ການເຊື່ອມໂຍງສາກົນ. ປີ 2018 ຫວຽດນາມໄດ້ມີຄວາມພະຍາຍາມ ໃນການຊຸກຍູ້ບັນດາຜົນປະໂຫຍດເສດຖະກິດທີ່ແທ້ຈິງ, ຍົກສູງພາບພົດ ແລະ ທີ່ຕັ້ງທາງການທູດຂອງຫວຽດນາມ ຢູ່ບັນດາເວທີປາໄສຫຼາຍຝ່າຍ ເຊັ່ນ: ສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ), ເອເປກ (APEC), ເວທີປາໄສການຮ່ວມມືອາຊີ - ເອຣົບ (ASEM), ບັນດາກົນໄກຮ່ວມມືອະນຸພາກພື້ນເຊັ່ນ ອະນຸພາກພື້ນແມ່ນ້ຳຂອງເປີດກວ້າງ (GMS), ອົງການຍຸດທະສາດການຮ່ວມມືທາງເສດຖະກິດ ແມ່ນ້ຳຂອງ - ອິຣະສະດີ - ເຈົ້າພຣະຢາ,... ພິເສດແມ່ນ, ກອງປະຊຸມເວທີປາໄສເສດຖະກິດໂລກກ່ຽວກັບ ອາຊຽນ (WEF ASEAN) ທີ່ໄດ້ຈັດຕັ້ງຢູ່ຫວຽດນາມ ໃນປີ 2018 ເຊິ່ງໄດ້ສ້າງຂີດໝາຍອັນເລິກເຊິ່ງຫຼາຍຢ່າງ. ກອງປະຊຸມເວທີປາໄສເສດຖະກິດໂລກກ່ຽວກັບອາຊຽນປີ 2018 ໄດ້ນຳເອົາແນວຄວາມຄິດທີ່ເປັນປະໂຫຍດຫຼາຍຢ່າງ ມາໃຫ້ຫວຽດນາມ ໃນການກໍ່ສ້າງ ແລະ ຜັນຂະຫຍາຍຍຸດທະສາດ, ແຜນການພັດທະນາເສດຖະກິດ-ສັງຄົມ ກໍ່ຄືການກຽມຄວາມພ້ອມເຂົ້າຮັບຕຳແໜ່ງເປັນປະທານອາຊຽນປີ 2020.
ທີສາມ, ດ້ວຍທ່າແຮງເປັນພິເສດ ໃນການຄຸ້ມຄອງເຄືອຂ່າຍອົງການຜູ້ຕາງໜ້າຢູ່ຕ່າງປະເທດ ແລະໄດ້ເຂົ້າເຖິງບັນດາກົນໄກທີ່ປຶກສານະໂຍບາຍສາກົນ, ການທູດເສດຖະກິດສາມາດດຳເນີນການລາຍງານການປະເມີນ ແລະ ການຄາດເດົາສະຖານະການເສດຖະກິດໂລກ ໃນທັນທີ, ສະໜອງປະສົບການສາກົນກ່ຽວກັບການແກ້ໄຂບັນຫາເສດຖະກິດ, ໃຫ້ຄຳແນະນຳແກ່ລັດຖະບານໃນການບໍລິຫານເສດຖະກິດມະຫາພາກ ແລະການຮັບມືກັບວິກິດການ.
ສຳລັບວິສາຫະກິດ, ບັນດາອົງການຜູ້ຕາງໜ້າແລະໜ່ວຍງານຂອງກະຊວງການຕ່າງປະເທດ ໄດ້ໃຫ້ການຊ່ວຍເຫຼືອໃນການຮຽນຮູ້ແນວທາງການດຳເນີນທຸລະກິດ, ຊອກຫາໂອກາດການລົງທຶນ, ແຊກຊຶມເຂົ້າໃນຕະຫຼາດຕ່າງປະເທດ, ປົກປ້ອງຜົນປະໂຫຍດ ແລະ ຊ່ວຍເຫຼືອວິສາຫະກິດແກ້ໄຂຄວາມຫຍຸ້ງຍາກ ໃນການຂັດແຍ້ງທາງການຄ້າ. ເສີມຂະຫຍາຍບົດບາດເປັນຂົວຕໍ່, ບັນດາອົງການຜູ້ຕາງໜ້າ ສະໜອງຂໍ້ມູນກ່ຽວກັບສະພາບແວດລ້ອມການລົງທຶນທຸລະກິດ, ຕອບຄຳຖາມກ່ຽວກັບລະບຽບການດຳເນີນທຸລະກິດຂອງຫວຽດນາມ, ຊ່ວຍເຫຼືອບໍລິສັດຕ່າງປະເທດໃນການເປີດກວ້າງ ເພີ່ມທະວີການລົງທຶນທຸລະກິດຢູ່ຫວຽດນາມ. ກະຊວງການຕ່າງປະເທດໄດ້ເປັນປະທານ, ສົມທົບກັບບັນດາກະຊວງ, ຂະແໜງການ ປະຕິບັດບັນດາການເຄື່ອນໄຫວສົ່ງເສີມເສດຖະກິດຕ່າງປະເທດທີ່ພົ້ນເດັ່ນ ຢູ່ໃນຕະຫຼາດທີ່ສຳຄັນຈຳນວນໜຶ່ງ.
ທີສີ່, ປ່ຽນແປງໃໝ່ພາລະບົດບາດຂອງການທູດເສດຖະກິດ ໃນການປະກອບສ່ວນກໍ່ສ້າງບັນດາເງື່ອນໄຂທີ່ຕ້ອງການ ສຳລັບການຫັນປ່ຽນເສດຖະກິດຫວຽດນາມ ໃນໄລຍະການພັດທະນາໃໝ່. ກະຊວງການຕ່າງປະເທດໄດ້ນຳໃຊ້ຫຼາຍຊ່ອງທາງ, ຫຼາຍແຫຼ່ງຂໍ້ມູນ ເພື່ອຍາດແຍ່ງເອົາການຮ່ວມມືຫຼາຍທີ່ສຸດ ຈາກບັນດາຄູ່ຮ່ວມມືຕ່າງປະເທດ. ເຮັດໃຫ້ມີຄວາມຫຼາກຫຼາຍຂອງຜະລິດຕະພັນຂໍ້ມູນຂ່າວສານທາງເສດຖະກິດ ເຊັ່ນການທູດເສດຖະກິດອອນໄລ, ຂ່າວດ່ວນ ແນໃສ່ສະໜອງຂໍ້ມູນໃໝ່ສຸດກ່ຽວກັບສະພາບການ ແລະ ນະໂຍບາຍເສດຖະກິດ ຂອງບັນດາປະເທດໃຫຍ່, ຂອງພາກພື້ນ, ເອກະສານຄົ້ນຄວ້າກ່ຽວກັບປະເດັນ “ຮ້ອນ”, ບັນຫາທີ່ເກີດຂຶ້ນໃໝ່.
ການເຄື່ອນໄຫວສະໜັບສະໜູນຊ່ວຍເຫຼືອທ້ອງຖິ່ນ ໄດ້ຮັບຄວາມເອົາໃຈໃສ່ເປັນສຳຄັນ ແລະ ຜັນຂະຫຍາຍພາຍໃຕ້ຫຼາຍຮູບການຄື ຊ່ວຍເຫຼືອການຈັດຕັ້ງກອງປະຊຸມສົ່ງເສີມການລົງທຶນກັບທີ່, ຊ່ວຍເຫຼືອເຊື່ອມຕໍ່ການຮ່ວມມືລະຫວ່າງທ້ອງຖິ່ນຂອງຫວຽດນາມ ກັບທ້ອງຖິ່ນຕ່າງປະເທດ, ຈັດຕັ້ງຄະນະຜູ້ແທນສົ່ງເສີມການຄ້າຂອງທ້ອງຖິ່ນຢູ່ຕ່າງປະເທດ ດ້ວຍຈຸດສຸມຈຸດໜັກໃຈກາງ. ໃນປີ 2018, ເນື່ອງໃນໂອກາດກອງປະຊຸມການທູດຄັ້ງທີ 30, ກະຊວງການຕ່າງປະເທດຈັດຕັ້ງການສົນທະນາຄັ້ງທຳອິດ ລະຫວ່າງບັນດາອົງການຜູ້ຕາງໜ້າຂອງຫວຽດນາມຢູ່ 90 ກວ່າປະເທດ ແລະການເຂົ້າຮ່ວມຂອງຜູ້ແທນວິສາຫະກິດ 400 ທ່ານ ເພື່ອແລກປ່ຽນກ່ຽວກັບຄວາມຕ້ອງການການສະໜັບສະໜູນທາງທຸລະກິດ ແລະ ກົນໄກສະໜັບສະໜູນໃນຊຸມປີຕໍ່ໄປ.
ທີຫ້າ, ການທູດເສດຖະກິດໄດ້ປະກອບສ່ວນປັບປຸງກຸ່ມກ້ອນມະຫາສາມັກຄີປວງຊົນທັງຊາດ. ການລະດົມປະຊາຄົມ ແລະ ວິສາຫະກິດຄົນຫວຽດນາມຢູ່ຕ່າງປະເທດ ໃຫ້ປະກອບສ່ວນສະຕິປັນຍາ, ທຶນຮອນ, ຊັບສິນ ແລະ ຄວາມສາມາດດ້ານວິທະຍາສາດ-ເຕັກໂນໂລຊີ ຕໍ່ການພັດທະນາຂອງປະເທດຊາດ ແມ່ນໄດ້ຮັບຄວາມເອົາໃຈໃສ່ຢ່າງເໝາະສົມ. ກະຊວງການຕ່າງປະເທດໄດ້ຈັດຕັ້ງການເຄື່ອນໄຫວແທດຈິງຫຼາຍຢ່າງ ເພື່ອຍາດແຍ່ງເອົາຊັບສິນທາງປັນຍາ ແລະການເງິນ ຂອງຊາວຫວຽດນາມຢູ່ຕ່າງປະເທດ ເພື່ອນຳໄປສູ່ການພັກທະນາປະເທດ, ເສີມຂະຫຍາຍພາລະບົດບາດຂອງຊຸມຊົນ ແລະວິສາຫະກິດ ຂອງຊາວຫວຽດນາມຢູ່ຕ່າງປະເທດ ເພື່ອຂະຫຍາຍຕະຫຼາດສິນຄ້າແລະບໍລິການ ຂອງຫວຽດນາມໃນພື້ນທີ່.
ສືບຕໍ່ຍູ້ແຮງການທູດເສດຖະກິດ
ໃນສະຖານະການໂລກແລະພາກພື້ນມີການປ່ຽນແປງຢ່າງໄວວາ ແລະບໍ່ສາມາດຄາດເດົາໄດ້, ປະເທດຫວຽດນາມກຳລັງກ້າວເຂົ້າສູ່ໄລຍະຍູ້ແຮງການເຊື່ອມໂຍງເສດຖະກິດສາກົນຢ່າງເລິກເຊິ່ງກວ້າງຂວາງ, ວຽກງານການທູດເສດຖະກິດ ຕ້ອງໄດ້ເອົາຊະນະຂໍ້ບົກຜ່ອງຕ່າງໆ ຢ່າງວ່ອງໄວ, ເຊິ່ງແມ່ນ:
ໃນໄລຍະທີ່ຜ່ານມາ, ເຖິງວ່າຄວາມຮັບຮູ້ກ່ຽວກັບວຽກງານການທູດເສດຖະກິດໄດ້ມີການຫັນປ່ຽນຢ່າງຕັ້ງໜ້າ ແຕ່ມີບາງຄັ້ງບາງຄາວແລະບາງກະຊວງ, ຂະແໜງການ ຍັງມີວີທີເຂົ້າໃຈທີ່ບໍ່ຖືກຕ້ອງ ກ່ຽວກັບການທູດເສດຖະກິດ, ບໍ່ມີຄວາມຕັ້ງໜ້າແລະເປັນເຈົ້າການ ໃນການຮ່ວມມືກັບກະຊວງການຕ່າງປະເທດ ແລະ ບັນດາອົງການຜູ້ຕາງໜ້າຂອງຫວຽດນາມຢູ່ຕ່າງປະເທດ. ການປະສານສົມທົບລະຫວ່າງກະຊວງການຕ່າງປະເທດ ແລະ ກະຊວງ, ຂະແໜງການຕ່າງໆ ຫຼາຍເທື່ອບໍ່ບັນລຸໄດ້ປະສິດທິຜົນຕາມຄວາມມຸ້ງຫວັງ. ການປະສານສົມທົບລະຫວ່າງອົງການຜູ້ຕາງໜ້າ ແລະອົງການການຄ້າໃນຫຼາຍພື້ນທີ່ ຍັງບໍ່ບັນລຸໝາກຜົນຕົວຈິງ.
ປະສິດທິຜົນຂອງການເຊື່ອມຕໍ່ລະຫວ່າງການເມືອງແລະເສດຖະກິດ ຍັງບໍ່ທັນສູງ. ໃນເວລາທີ່ຜ່ານມາ, ກະຊວງການຕ່າງປະເທດ ໄດ້ເປັນເຈົ້າການແລະຕັ້ງໜ້າ ໃນການເຊື່ອມຕໍ່ສອງເນື້ອໃນດັ່ງກ່າວ, ໂດຍສະເພາະແມ່ນ ໃນລະຫວ່າງການຢ້ຽມຢາມລະດັບສູງຢູ່ຕ່າງປະເທດ. ແຕ່ວ່າ, ບາງກະຊວງ, ຂະແໜງການກໍ່ຍັງບໍ່ທັນເອົາໃຈໃສ່ຢ່າງແທ້ຈິງ ເຖິງການນຳໃຊ້ທ່າແຮງການເມືອງ ເພື່ອຍູ້ແຮງການເຄື່ອນໄຫວເສດຖະກິດ ເຊິ່ງພຽງແຕ່ຢຸດຢູ່ໃນຂອບເຂດວິຊາສະເພາະແຄບ. ການປະສານສົມທົບລະຫວ່າງບັນດາອົງການຜູ້ຕາງໜ້າ ກັບບັນດາວິສາຫະກິດ ຍັງບໍ່ທັນແໜ້ນແຟ້ນແລະບໍ່ເປັນປົກກະຕິ, ການເຄື່ອນໄຫວບາງຢ່າງຍັງເປັນແບບຮູບນອກ.
ກົນໄກປະຕິບັດວຽກງານການທູດເສດຖະກິດຍັງບໍ່ທັນສົມບຸນແບບ. ກົນໄກການປະສານງານທາງການທູດເສດຖະກິດ ສ່ວນຫຼາຍແມ່ນນຳໃຊ້ເຂົ້າໃນກອບຂອງໜ່ວຍງານທີ່ຂຶ້ນກັບກະຊວງການຕ່າງປະເທດ. ບັນດາກະຊວງ, ຂະແໜງການ, ທ້ອງຖິ່ນ ພຽງແຕ່ໄດ້ຜັນຂະຫຍາຍການເຄື່ອນໄຫວການທູດເສດຖະກິດ ໃນຂົງເຂດທີ່ຮັບຜິດຊອບເທົ່ານັ້ນ, ຍັງບໍ່ທັນເອົາໃຈໃສ່ຢ່າງພຽງພໍ ເຖິງການປະສານສົມທົບກັບບັນດາອົງການ, ວິສາຫະກິດທີ່ກ່ຽວຂ້ອງ.
ຖັນແຖວບຸກຄະລາກອນຍັງຂາດເຂີນທາງດ້ານຈຳນວນ. ທັກສະຂອງພະນັກງານການທູດເສດຖະກິດເວົ້າລວມ, ໂດຍສະເພາະແມ່ນພາສາຕ່າງປະເທດ, ຄວາມຮູ້ກ່ຽວກັບກົດໝາຍເສດຖະກິດສາກົນ, ທັກສະໃນການເຈລະຈາ... ບໍ່ຕອບສະໜອງຄວາມຕ້ອງການທົ່ວໄປໄດ້. ງົບປະມານໃຫ້ແກ່ວຽກງານການທູດເສດຖະກິດກໍ່ຍັງຄັບແຄບຢູ່.
ເພື່ອປະກອບສ່ວນເຂົ້າໃນການປະຕິບັດເປັນຢ່າງດີ ແຜນນະໂຍບາຍກ່ຽວກັບ “ການຜັນຂະຫຍາຍປະຕິບັດວຽກງານການຕ່າງປະເທດຢ່ງຮອບດ້ານແລະຄົບຊຸດ, ເຊື່ອມໂຍງເຂົ້າກັບສາກົນຢ່າງເປັນເຈົ້າການແລະຕັ້ງໜ້າ” ເຊິ່ງກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມວາງອອກ, ໃນຊຸມປີຕໍ່ໄປນີ້, ວຽກງານການທູດເສດຖະກິດຕ້ອງໄດ້ຮັບການຍູ້ແຮງຢ່າງຮອບດ້ານ ແລະ ສຸມໃສ່ບັນດາທິດທາງຕົ້ນຕໍ່ດັ່ງລຸ່ມນີ້:
ທີໜຶ່ງ, ກຳແໜ້ນແຜນນະໂຍບາຍ, ນະໂຍບາຍກ່ຽວກັບເສດຖະກິດຂອງພັກແລະລັດໃນໄລຍະປະຈຸບັນ, ພິເສດແມ່ນ ຕ້ອງເອົາໃຈໃສ່ວຽກງານພົວພັນຕ່າງປະເທດແບບຫຼາຍຝ່າຍ ໃນຂົງເຂດເສດຖະກິດທີ່ໄດ້ກຳນົກເປັນຈຸດສຸມບຸລິມະສິດ ເພື່ອເພີ່ມກຳລັງແຮງສັງລວມຂອງຊາດ, ຮັບໃຊ້ພາລະກິດແຫ່ງການຫັນປະເທດເປັນອຸດສາຫະກຳ ແລະ ທັນສະໄໝ. ກຳແໜ້ນຄຳສັ່ງເລກທີ 25-CT/TW, ສະບັບລົງວັນທີ 8 ສິງຫາ 2018, ຂອງຄະນະເລຂາທິການສູນກາງ, ກ່ຽວກັບ ການຍູ້ແຮງ ແລະຍົກລະດັບການພົວພັນຕ່າງປະເທດແບບຫຼາຍຝ່າຍເຖິງປີ 2030 ເພື່ອຍູ້ແຮງການເຊື່ອມໂຍງເສດຖະກິດສາກົນ, ເຂົ້າຮ່ວມບັນດາເວທີປາໃສເສດຖະກິດພາກພື້ນ, ບັນດາເວທີປາໄສກ່ຽວກັບການຄຸ້ມຄອງເສດຖະກິດທົ່ວໂລກ, ກະກຽມປະຖົມປັດໄຈທີ່ດີ ໃຫ້ແກ່ປີປະທານອາຊຽນ 2020.
ທີສອງ, ຕ້ອງເປັນເອກະພາບໃນຄວາມຮັບຮູ້ກ່ຽວກັບບົດບາດແລະຄວາມສຳຄັນ ຂອງການທູດເສດຖະກິດ. ຈາກນັ້ນ, ອອກແບບ, ກໍ່ສ້າງບັນດາໂຄງການ, ແຜນການສັງລວມແລະແຜນການສະເພາະ ດ້ວຍວິໄສທັດທີ່ເໝາະສົມກັບຂົງເຂດ, ຖິ່ນຖານ, ຄູ່ຮວມມື ໄລຍະກາງ ແລະໄລຍະຍາວ. ວິທີການຜັນຂະຫຍາຍວຽກງານການທູດເສດຖະກິດ ຕ້ອງການປະຕິບັດຕາມທິດນັບມື້ນັບມີແບບແຜນ, ມີຄວາມຫຼາກຫຼາຍ ແລະ ແທດຈິງກວ່າອີກ; ບັນດາປັດໄຈກ່ຽວກັບເສດຖະກິດ, ການຄ້າແລະການເມືອງ ຕ້ອງຕິດພັນກັນຢ່າງແໜ້ນແຟ້ນ, ໝູນໃຊ້ຢ່າງມີຄວາມຄ່ອງຕົວ, ເໝາະສົມກັບ “ທ່າ” ແລະ “ກຳລັງແຮງ” ໃໝ່ຂອງປະເທດຫວຽດນາມ. ວຽກງານປະສານສົມທົບ, ການແລກປ່ຽນຂໍ້ມູນຂ່າວສານ ລະຫວ່າງພາຍໃນແລະຕ່າງປະເທດ ກໍ່ຄືລະຫວ່າງບັນດາກະຊວງ, ຂະແໜງການ, ທ້ອງຖິ່ນ ຕ້ອງໄດ້ຮັບການຍູ້ແຮງ. ການເຄື່ອນໄຫວສະໜັບສະໜູນ ຊ່ວຍເຫຼືອທ້ອງຖິ່ນ, ວິສາຫະກິດ ສືບຕໍ່ດຳເນີນໄປໃນທິດທາງສະເພາະແລະແທດຈິງ, ຕິດແທດກັບຄວາມຮຽກຮ້ອງຕ້ອງການຂອງທ້ອງຖິ່ນແລະວິສາຫະກິດ ໂດຍໃຊ້ມາດຕະການສະໜັບສະໜູນຢ່າງແຮງເພື່ອໃຫ້ເກີດຜົນຕົວຈິງທີ່ດີສຸດ.
ທີສາມ, ສືບຕໍ່ເຊື່ອມຕໍ່ສາມເສົາຄ້ຳ ການທູດການເມືອງ, ການທູດເສດຖະກິດ ແລະ ການທູດວັດທະນະທຳ ຢ່າງນິ້ມນວນ. ໃນສະພາບການທີ່ບົດບາດແລະພາບພົດຂອງຫວຽດນາມໄດ້ຮັບການຍົກສູງຂຶ້ນ, ພວກເຮົາຕ້ອງສ້າງ “ຍຸດທະສາດການທູດລະດັບສູງ” ເພື່ອ “ເຊື່ອມຕໍ່ຢ່າງໃກ້ຊິດລະຫວ່າງເສດຖະກິດ ແລະ ການເມືອງ” ເປັນພື້ນຖານ “ເຈລະຈາ” ກັບປະເທດຕ່າງໆ. ນີ້ແມ່ນສິ່ງທ້າທາຍບໍ່ນ້ອຍ ຕໍ່ການທູດເສດຖະກິດ ເຊິ່ງຮຽກຮ້ອງບັນດາກະຊວງ, ຂະແໜງການ, ວິສາຫະກິດ, ທ້ອງຖິ່ນ ຕ້ອງເປັນເອກະພາບກ່ຽວກັບຄວາມຮັບຮູ້ ກໍ່ຄືການຜັນຂະຫຍາຍປະຕິບັດຢ່າງສະເໝີຕົ້ນສະເໝີປາຍ ເພື່ອຈະສາມາດປະສານງານກັນຢ່າງໃກ້ຊິດ.
ທີສີ່, ເພີ່ມທະວີພາລະບົດບາດແລະຄວາມຮັບຜິດຊອບ ຂອງບັນດາອົງການຜູ້ຕາງໜ້າ, ພິເສດແມ່ນໃນຂົງເຂດເສດຖະກິດການທູດ, ຊອກຫາຄູ່ຮ່ວມມື, ເປີດກວ້າງຕະຫຼາດ ເພື່ອຮັບໃຊ້ ແລະຊ່ວຍເຫຼືອບັນດາວິສາຫະກິດ, ໂດຍສະເພາະວິສາຫະກິດທີ່ເຮັດທຸລະກິດກັບຕ່າງປະເທດ. ໝາກຜົນການທູດເສດຖະກິດ ຄວນຖືວ່າເປັນໜຶ່ງໃນບັນດາມາດຖານສຳຄັນທີ່ສຸດ ໃນການປະເມີນຜົນການປະຕິບັດພາລະກິດຂອງອົງການຜູ້ຕາງໜ້າ.
ທີຫ້າ, ເພີ່ມທະວີການປະສານສົມທົບລະຫວ່າງ ກະຊວງການຕ່າງປະເທດ ກັບບັນດາກະຊວງ, ຂະແໜງການ, ໃນນັ້ນ ໃຫ້ຄວາມສຳຄັນຕໍ່ການເພີ່ມທະວີການຮ່ວມມືລະຫວ່າງ ໜ່ວຍ ງານມືກາງຂອງພາກສ່ວນຕ່າງໆ. ສ້າງກົນໄກສະໜອງຂໍ້ມູນຂ່າວສານສອງສົ້ນ, ກົນໄກປະສານງານແລະດຳເນີນການເຄື່ອນໄຫວ ສົ່ງເສີມເສດຖະກິດການທູດ, ຊ່ວຍເຫຼືອວິສາຫະກິດ ແລະທ້ອງຖິ່ນ.
ທີຫົກ, ກໍ່ສ້າງກົງຈັກທີ່ເໝາະສົມ ເພື່ອຊີ້ນຳວຽກງານການທູດເສດຖະກິດ ຢ່າງເປັນເອກະພາບແລະມີປະສິດທິຜົນ. ປັບປຸງບູລະນະໂຄງປະກອບການຈັດຕັ້ງວຽກງານການທູດເສດຖະກິດຢູ່ອົງການຜູ້ຕາງໜ້າ. ຈັດຕັ້ງກົງຈັກຕາມທິດທາງແທດຈິງແລະປະສິດທິຜົນ ໂດຍອີງໃສ່ຜົນຂອງການເຮັດວຽກຫຼາຍກວ່າທີ່ຈະອີງຕາມມາດຖານຂອງລະບອບການແລະນະໂຍບາຍ.
ທີເຈັດ, ເພີ່ມທະວີການເຄື່ອນໄຫວໂຄສະນາ, ສົ່ງເສີມການລົງທຶນ, ການຄ້າ, ຍົກສູງພາບພົດຂອງຊາດດ້ວຍຫຼາຍຮູບຫຼາຍແບບ. ຍູ້ແຮງວຽກງານຊອກຫາໂຄງການ, ຂົງເຂດ, ວິທີການຮ່ວມມືໃໝ່ ເພື່ອເພີ່ມການປະສົມປະສານຜົນປະໂຫຍດກັບບັນດາຄູ່ຮ່ວມມືຍຸດທະສາດ ແລະຄູ່ຮ່ວມມືຮອບດ້ານ; ໃຊ້ປະໂຫຍດຈາກບັນດາສັນຍາການຄ້າເສລີ (CPTPP, EVFTA...) ເພື່ອປັບປຸງຕະຫຼາດທີ່ເປັນມູນເຊື້ອ ແລະ ສືບຕໍ່ເປີດກວ້າງຕະຫຼາດ.
ທີແປດ, ສະໜັບສະໜູນການສ້າງເຄືອຂ່າຍທີ່ເຂັ້ມແຂງຂອງຊາວຫວຽດນາມຢູ່ຕ່າງປະເທດ, ເພື່ອປະກອບສ່ວນເພີ່ມທະວີການພົວພັນສອງຝ່າຍ, ສ້າງແຫຼ່ງພະລັງຂົນຂວາຍອຳນາດການປົກຄອງທ້ອງຖິ່ນ. ນຳໃຊ້ແຫຼ່ງກຳລັງທາງດ້ານສະຕິປັນຍາແລະການເງິນ, ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມຢູ່ຕ່າງປະເທດ ປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງປະເທດ./.
-------
(1) ຍົກສູງປະສິດທິຜົນວຽກງານການທູດເສດຖະກິດ, https://baodautu.vn/nang-cao-hieu-qua-cong-tac-ngoai-giao-kinh-te-d86312.html, ngày 15-8-2018
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 939 (ເດືອນເມສາ 2020)
