ຍົກສູງປະສິດທິຜົນການເຄື່ອນໄຫວຂອງວຽກງານ
ການຕ່າງປະເທດປະຊາຊົນ ໃນສະພາບການໃໝ່
ການຕ່າງປະເທດປະຊາຊົນ ໃນສະພາບການໃໝ່
ແນວຄິດໂຮ່ຈີມິນ ແລະ ທັດສະນະຂອງພັກກອມມູນິດຫວຽດນາມ
ກ່ຽວກັບການຕ່າງປະເທດປະຊາຊົນ
ວັນທີ 5 ມິຖຸນາປີ 1911, ຈາກທ່າກຳປັ່ນ ຍ່າຣົ່ງ ເມືອງໄຊ່ງ່ອນ (ປະຈຸບັນແມ່ນນະຄອນໂຮ່ຈີມິນ) ຫງວຽນ ເຕິກ ແທ່ງ - ໂຮ່ຈີມິນ ໄດ້ອອກເດີນທາງໄປຝຣັ່ງ ເພື່ອຊອກຮູ້ສິ່ງຍອດຍິ່ງແລະຄວາມກ້າວໜ້າຈາກບັນດາປະເທດໃນທົ່ວໂລກ ເພື່ອປະຕິບັດພາລະກິດປົດປ່ອຍຫວຽດນາມ ໃຫ້ພົ້ນຈາກການເປັນອານານິຄົມຂອງພວກລ່າເມືອງຂຶ້ນຝຣັ່ງ. ອາດເວົ້າໄດ້ວ່າ ການເດີນທາງຄັ້ງທຳອິດຂອງເພິ່ນ ໃນເສັ້ນທາງແຫ່ງການກູ້ຊາດ ແມ່ນການເດີນທາງຂອງຜູ້ຮັກຊາດ ແລະ ໝູ່ເພື່ອນຄົນທຳອິດຂອງເພິ່ນແມ່ນຜູ້ອອກແຮງງານ. ນັ້ນແມ່ນເຫດຜົນແລະເປັນພື້ນຖານ ໃຫ້ເພິ່ນຄ່ອຍໆສ້າງ ແລະ ພັດທະນາທັດສະນະ, ຫຼັກການ, ເນື້ອໃນ ແລະວິທີການພົວພັນຕ່າງປະເທດ, ໃນນັ້ນ ມີການຕ່າງປະເທດປະຊາຊົນ.
ແຕ່ຊຸມປີທີ 20 ຂອງສະຕະວັດທີ XX, ເພິ່ນໄດ້ກຳນົດ ແລະ ຈັດຕັ້ງໂດຍກົງໃນການດຳເນີນການຕາມທັດສະນະພື້ນຖານສອງປະການ ກ່ຽວກັບການຕ່າງປະເທດ, ນັ້ນແມ່ນ ຄວາມສາມັກຄີກັບຊົນຊັ້ນກຳມະກອນ ແລະ ປະຊາຊົນທີ່ຖືກກົດຂີ່ຂົ່ມເຫັງໃນໂລກ ແລະການເຊື່ອມໂຍງການປະຕິວັດໃນອານານິຄົມ ກັບການປະຕິວັດຂອງປະຊາຊົນຜູ້ກ້າວໜ້າໃນໂລກ, ລວມທັງປະຊາຊົນຜູ້ອອກແຮງງານຝຣັ່ງ. ການເຄື່ອນໄຫວໂຄສະນາຫາສຽງສາກົນຂອງເພິ່ນໃນເວລານັ້ນ ແມ່ນການເຄື່ອນໄຫວວຽກງານການຕ່າງປະເທດປະຊາຊົນ. ໃນໄລຍະນີ້, ເພິ່ນຂຽນຂ່າວ ໜັງສືພິມ ແລະປາຖະກະຖາ ກ່ຽວກັບສະຖານະການປະເທດຂອງພວກເຮົາຖືກກົດຂີ່ຂົ່ມເຫັງພາຍໃຕ້ການປົກຄອງຂອງຝຣັ່ງ, ຈັດຕັ້ງເພື່ອປຸກລະດົມປະຊາຊົນຝຣັ່ງ ແລະ ຫຼາຍປະເທດໃນເອີຣົບ, ອາຊີ, ອາຟຣິກາ ເຫັນດີເຫັນພ້ອມແລະຊ່ວຍເຫຼືອປະຊາຊົນຫວຽດນາມ ຕໍ່ສູ້ປົດປ່ອຍຊາດ.
ນັບຕັ້ງແຕ່ຜົນສຳເລັດຂອງການປະຕິວັດເດືອນສິງຫາປີ 1945, ສາທາລະນະລັດປະຊາທິປະໄຕຫວຽດນາມໄດ້ກຳເນີດ, ການທູດສະໄໝໃໝ່ຂອງຫວຽດນາມ ໄດ້ຮັບການສ້າງຕັ້ງຢ່າງສົມບູນ, ລວມທັງວຽກງານການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ. ໂດຍໄວ, ປະທານ ໂຮ່ຈີມິນ ໄດ້ຊີ້ນຳການສ້າງຕັ້ງອົງການພົວພັນຕ່າງປະເທດຂອງປະຊາຊົນຫວຽດນາມທຳອິດ, ສະມາຄົມມິດຕະພາບ ຫວຽດນາມ - ອາເມລິກາ (ປີ 1945), ສະມາຄົມມິດຕະພາບທີ່ດີຫວຽດນາມ - ຈີນ (ປີ 1950), ໄດ້ສົ່ງຄະນະຜູ້ແທນຫວຽດນາມໄປຮ່ວມກອງປະຊຸມໃຫຍ່ປະຊາຊົນໂລກ ເພື່ອປົກປັກຮັກສາສັນຕິພາບຢູ່ ປຣາກ (ເຊັກໂກ) ແລະ ປາຣີ (ຝຣັ່ງ) ປີ 1949, ໄດ້ສ້າງຕັ້ງຄະນະກຳມະການປົກປັກຮັກສາສັນຕິພາບໂລກ (ປີ 1950). ສິ່ງດັ່ງກ່າວສະແດງໃຫ້ເຫັນວ່າ ພັກກອມມູນິດຫວຽດນາມ ແລະ ປະທານໂຮ່ຈິີມິນ ຖືເປັນສຳຄັນ ແລະ ກຳນົດທິດທາງການທູດລະຫວ່າງປະຊາຊົນກັບປະຊາຊົນ ເປັນພາກສ່ວນໜຶ່ງທີ່ສຳຄັນ ໃນວຽກງານການຕ່າງປະເທດໂດຍລວມ, ສະໜັບສະໜູນ ແລະ ສົມທົບກັນຢ່າງແໜ້ນແຟ້ນ ກັບວຽກງານການຕ່າງປະເທດຂອງພັກ ແລະ ການທູດຂອງລັດ ໃນການປະຕິບັດໜ້າທີ່, ທິດທາງ ແລະ ນະໂຍບາຍການຕ່າງປະເທດຂອງພັກ.
ສືບທອດອຸດົມການຂອງປະທານໂຮ່ຈີມິນ, ນັບແຕ່ຊຸມວັນສ້າງຕັ້ງພັກ, ບັນດາກອງປະຊຸມໃຫຍ່ຂອງພັກກອມມູນິດຫວຽດນາມ ໄດ້ເນັ້ນໜັກເຖິງບົດບາດສຳຄັນ ຂອງການຕ່າງປະເທດປະຊາຊົນໃນການປະຕິວັດຫວຽດນາມ, ໃນນັ້ນ, ໃນກອງປະຊຸມໃຫຍ່ຄັ້ງທີ II ຂອງພັກ (ປີ 1951), ໂຄງການການເມືອງຂອງພັກແຮງງານຫວຽດນາມ (ປະຈຸບັນແມ່ນພັກກອມມູນິດຫວຽດນາມ) ໄດ້ຢືນຢັນວ່າ: “ຂະຫຍາຍກວ້າງການທູດປະຊາຊົນ...ປະສານສົມທົບການຕໍ່ຕ້ານຂອງພວກເຮົາ ກັບການຕໍ່ສູ້ຂອງປະຊາຊົນໃນໂລກ, ໂດຍສະເພາະ ປະຊາຊົນຂອງສະຫະພາບໂຊວຽດ, ຈີນແລະປະເທດປະຊາທິປະໄຕປະຊາຊົນອື່ນໆ, ຂອງປະຊາຊົນທີ່ຖືກກົດຂີ່ຂົ່ມເຫັງ ແລະຂອງປະຊາຊົນຝຣັ່ງ”(1), ກອງປະຊຸມໃຫຍ່ຄັ້ງທີ VI ຂອງພັກ (ປີ 1986) ໄດ້ວາງເປົ້າໝາຍນະໂຍບາຍການຕ່າງປະເທດ “ຮັກສາສັນຕິພາບ, ເປີດກວ້າງການພົວພັນມິດຕະພາບ ແລະ ການຮ່ວມມື, ສ້າງເງື່ອນໄຂສະດວກສາກົນໃຫ້ແກ່ການສ້າງສາສັງຄົມນິຍົມ ແລະປົກປັກຮັກສາປະເທດຊາດ, ປະກອບສ່ວນຢ່າງຕັ້ງໜ້າ ເຂົ້າໃນການປະກອບສ່ວນຂອງປະຊາຄົມໂລກເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ”(2). ກອງປະຊຸມໃຫຍ່ຄັ້ງທີ VIII ຂອງພັກ (ປີ 1996) ໄດ້ກ່າວຢ່າງຈະແຈ້ງ, “ເປີດກວ້າງການພົວພັນຕ່າງປະເທດຂອງປະຊາຊົນ, ການພົວພັນກັບບັນດາອົງການບໍ່ຂຶ້ນກັບລັດຖະບານ, ຍາດແຍ່ງເອົາຄວາມເຫັນອົກເຫັນໃຈ ແລະ ການສະໜັບສະໜູນຂອງປະຊາຊົນບັນດາປະເທດ, ປະກອບສ່ວນຊຸກຍູ້ທ່າອ່ຽງສັນຕິພາບ, ການຮ່ວມມື ແລະ ການພັດທະນາ”(3).
ຮອດກອງປະຊຸມໃຫຍ່ຄັ້ງທີ XIII (ປີ 2021), ພັກກອມມູນິດຫວຽດນາມ ເນັ້ນໜັກວ່າ: “ກໍ່ສ້າງການທູດຮອບດ້ານ ແລະ ທັນສະໄໝ ດ້ວຍ 3 ເສົາຄ້ຳ: ການຕ່າງປະເທດຂອງພັກ, ການທູດແຫ່ງລັດ ແລະ ການຕ່າງປະເທດປະຊາຊົນ”(4). ນີ້ບໍ່ພຽງແຕ່ແມ່ນການສືບທອດແຜນນະໂຍບາຍ, ທິດທາງ ແລະ ທັດສະນະຂອງພັກກອມມູນິດຫວຽດນາມ ແລະ ປະທານໂຮ່ຈີມິນ ເທົ່ານັ້ນ, ຫາກຍັງແມ່ນບາດກ້າວພັດທະນາສຳຄັນໃນບົດບາດ ແລະ ທີ່ຕັ້ງການຕ່າງປະເທດປະຊາຊົນຫວຽດນາມ ໃນສະພາບການໃໝ່.
ການຕ່າງປະເທດປະຊາຊົນໄດ້ປະກອບສ່ວນອັນໃຫຍ່ຫຼວງ ເຂົ້າໃນພາລະກິດປະຕິວັດຂອງປະເທດຊາດ ໃນຫຼາຍໄລຍະເວລາ. ການຕ່າງປະເທດປະຊາຊົນໄດ້ຮັບການນຳໃຊ້ ແລະ ຍົກສູງປະສິດທິຜົນໃນແຕ່ລະໄລຍະການປະຕິວັດ. ກ່ອນທີ່ປະເທດສາທາລະນະລັດປະຊາທິປະໄຕຫວຽດນາມ (ປະຈຸບັນແມ່ນສາທາລະນະລັດສັງຄົມນິຍົມຫວຽດນາມ) ໄດ້ຮັບການກໍ່ຕັ້ງຂຶ້ນ ໃນປີ 1945, ປະທານໂຮ່ຈິມິນ ໄດ້ຕັ້ງໜ້າຜັນຂະຫຍາຍບັນດາການເຄື່ອນໄຫວວຽກງານການຕ່າງປະເທດປະຊາຊົນ ເພື່ອຮັບໃຊ້ເປົ້າໝາຍທີ່ສູງສຸດ ໃນເວລາປົດປ່ອຍຊາດ. ເພິ່ນເປັນຜູ້ບຸກເບີກປູທາງ ແລະ ປະຕິບັດໂດຍກົງ, ເຮັດໃຫ້ການຕ່າງປະເທດປະຊາຊົນເປັນຊ່ອງທາງນະໂຍບາຍການຕ່າງປະເທດທີ່ສໍາຄັນ ໃນປະຫວັດສາດການປະຕິວັດຫວຽດນາມ ກ່ອນທີ່ປະເທດຂອງພວກເຮົາຈະມີຊ່ອງທາງການສື່ສານຢ່າງເປັນທາງການກັບປະເທດອື່ນໆ. ນີ້ແມ່ນພື້ນຖານສຳຄັນເພື່ອໃຫ້ຫວຽດນາມ ສ້າງພື້ນຖານການພົວພັນມິດຕະພາບທີ່ເປັນມູນເຊື້ອກັບປະຊາຊົນໃນທົ່ວໂລກ.ໃນໄລຍະຕໍ່ສູ້ຕ້ານອາເມລິກາເພື່ອກູ້ຊາດ, ວຽກງານການຕ່າງປະເທດຂອງປະຊາຊົນໄດ້ພັດທະນາຢ່າງຕັ້ງໜ້າ ດ້ວຍຮູບແບບທີ່ສ້າງສັນແລະມີເອກະລັກສະເພາະຫຼວງຫຼາຍ, ນຳເອົາສຽງຂອງປະຊາຊົນຫວຽດນາມ ໄປສູ່ປະຊາຊົນໃນປະເທດອານານິຄົມ ແລະ ປະເທດກ້າວໜ້າທົ່ວໂລກ, ສ້າງແນວໂຮມສາມັກຄີປະຊາຊົນທີ່ກວ້າງຂວາງ ເພື່ອສະໜັບສະໜູນຫວຽດນາມ. ແນວໂຮມນັ້ນລວມມີປະຊາຊົນທຸກຊັ້ນຄົນ ໃນບັນດາປະເທດທີ່ມີລະບອບການເມືອງ-ສັງຄົມທີ່ແຕກຕ່າງກັນໃນທົ່ວຫ້າທະວີບ, ຕັ້ງແຕ່ຜູ້ອອກແຮງງານທຳມະດາ ຈົນເຖິງນັກເຄື່ອນໄຫວການເມືອງ, ສະມາຊິກສະພາ, ປັນຍາຊົນ, ນັກການເມືອງ, ນັກຂ່າວ,...; ລວມທັງຈາກອົງການຈັດຕັ້ງມະຫາຊົນ, ສັງຄົມ, ພັກການເມືອງ ແລະລັດຖະບານໃນຫຼາຍປະເທດ, ນັບທັງປະເທດທຶນນິຍົມ (ເຊັ່ນ: ອີຕາລີ, ສວີເດນ, ເດນມາກ, ອັງກິດ, ຍີ່ປຸ່ນ...) ຈົນເຖິງບັນດາອົງການຈັດຕັ້ງສາກົນ ເຊັ່ນ ສະພາສັນຕິພາບໂລກ, ອົງການສາມັກຄີປະຊາຊົນອາຊີ-ອາຟຣິກາ, ອົງການແມ່ຍິງ, ອົງການຊາວໜຸ່ມ, ອົງການຈັດຕັ້ງນັກສຶກສາ, ສະຫະພັນປະຊາທິປະໄຕສາກົນ...
ພາຍຫຼັງທີ່ປະເທດເປັນເອກະພາບໃນປີ 1975, ຄຽງຄູ່ກັບຄວາມສະດວກຂໍ້ໄດ້ປຽບ, ຫວຽດນາມຍັງປະສົບກັບຄວາມຫຍຸ້ງຍາກ ແລະ ຄວາມທ້າທາຍ ຍ້ອນຜົນສະທ້ອນຈາກສົງຄາມ, ການປິດລ້ອມ ແລະການຂວ້ຳບາດໂດຍອາເມລິກາ ແລະປະເທດຕາເວັນຕົກ ແລະ ການໂຈມຕີຂອງອິດທິກຳລັງສັດຕູແລະປະຕິການ. ໃນສະພາບການນັ້ນ, ການຕ່າງປະເທດປະຊາຊົນ ພ້ອມກັບການຕ່າງປະເທດຂອງພັກ ແລະ ການທູດຂອງລັດ ໄດ້ປະຕິບັດໜ້າທີ່ຢ່າງຕັ້ງໜ້າ “ນຳໜ້າພາທາງ, ທັບມ້າງການປິດລ້ອມ ຂວ້ຳບາດຂອງສັດຕູ”, ສືບຕໍ່ປັບປຸງການພົວພັນກັບປະຊາຊົນແຫ່ງສະຫະພາບໂຊວຽດ, ບັນດາປະເທດສັງຄົມນິຍົມເອີຣົບຕາເວັນອອກ ແລະ ບັນດາປະເທດເອກະລາດຈຳນວນໜຶ່ງ, ພ້ອມກັບບັນດາອົງການຈັດຕັ້ງສາກົນ ເຊັ່ນ ສະພາສັນຕິພາບໂລກ, ອົງການສາມັກຄີປະຊາຊົນອາຊີ-ອາຟຣິກາ ແລະ ອົງການປະຊາທິປະໄຕສາກົນ (ຊາວໜຸ່ມ, ແມ່ຍິງ, ກຳມະບານ, ນັກກົດໝາຍ ແລະອື່ນໆ), ການໃຊ້ປະໂຫຍດຈາກເງື່ອນໄຂສາກົນທີ່ເອື້ອອຳນວຍ ເພື່ອຜ່ານຜ່າຜົນຮ້າຍຂອງສົງຄາມ ແລະ ວິກິດການເສດຖະກິດ-ສັງຄົມ, ປັບປຸງການປ້ອງກັນປະເທດ, ປະກອບສ່ວນເຂົ້າໃນການຕໍ່ສູ້ຮ່ວມກັນຂອງປະຊາຊົນໂລກ ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ.
ກອງປະຊຸມໃຫຍ່ຄັ້ງທີ VI ຂອງພັກເປັນຂີດໝາຍສຳຄັນໃນການປ່ຽນແປງໃໝ່ປະເທດຢ່າງຮອບດ້ານ, ການເຄື່ອນໄຫວການຕ່າງປະເທດໄດ້ເລີ່ມດຳເນີນໄປຕາມທິດເປີດກວ້າງ. ການຕ່າງປະເທດປະຊາຊົນປະກອບສ່ວນຢ່າງຕັ້ງໜ້າ ເຂົ້າໃນການເຮັດໃຫ້ການພົວພັນກັບຈີນ, ອາເມລິກາເປັນປົກກະຕິ; ເພີ່ມທະວີສາຍພົວພັນສາມັກຄີແບບພິເສດກັບລາວ, ຮັກສາການພົວພັນມິດຕະພາບກັບກຳປູເຈຍ, ຮັກສາການພົວພັນກັບສະຫະພາບໂຊວຽດ ແລະບັນດາປະເທດສັງຄົມນິຍົມເອີຣົບຕາເວັນອອກ ໃນຂະນະທີ່ປະເທດເຫຼົ່ານີ້ຕົກຢູ່ໃນພາວະວິກິດ, ຂະຫຍາຍການພົວພັນກັບຫຼາຍປະເທດໃນອາຊີ, ອາຟຣິກາ, ເອີຣົບເໜືອ, ເອີຣົບຕາເວັນຕົກ, ຍີ່ປຸ່ນ. ວຽກງານການຕ່າງປະເທດຂອງປະຊາຊົນຍັງປະກອບສ່ວນຮັກສາການເຄື່ອນໄຫວຂອງອົງການປະຊາທິປະໄຕສາກົນ ໃນສະພາບທີ່ຫຍຸ້ງຍາກ ພາຍຫຼັງລະບອບສັງຄົມນິຍົມຢູ່ສະຫະພາບໂຊວຽດ ແລະເອີຣົບຕາເວັນອອກພັງທະລາຍ.
ໃນໄລຍະເຊື່ອມໂຍງເຂົ້າກັບສາກົນຢ່າງເລິກເຊິ່ງ, ບັນດາອົງການຈັດຕັ້ງມະຫາຊົນ ແລະ ບັນດາອົງການປະຊາຊົນຂອງຫວຽດນາມ ໄດ້ເຄື່ອນໄຫວຢ່າງຕັ້ງໜ້າ, ໄດ້ຜັນຂະຫຍາຍ ແລະຮັດແໜ້ນການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືກັບປະຊາຊົນໃນທົ່ວໂລກ ແລະ ປະກອບສ່ວນສຳຄັນເຂົ້າໃນພາລະກິດສ້າງສາ ແລະ ພັດທະນາປະເທດຊາດ. ມາຮອດປະຈຸບັນ, ບັນດາອົງການການເມືອງ-ສັງຄົມ, ບັນດາອົງການຈັດຕັ້ງປະຊາຊົນຫວຽດນາມ ໄດ້ສ້າງຕັ້ງການພົວພັນມິດຕະພາບ ແລະ ການຮ່ວມມືກັບບັນດາອົງການຄູ່ຮ່ວມມື ແລະ ບຸກຄົນນັບພັນໃນທົ່ວໂລກ. ວຽກງານການຕ່າງປະເທດຂອງປະຊາຊົນໄດ້ປະກອບສ່ວນຢ່າງຕັ້ງໜ້າ ເຂົ້າໃນການເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ ແລະ ບັນດາປະເທດ. ກັບປະເທດບ້ານໃກ້ເຮືອນຄຽງ (ຈີນ, ລາວ, ກໍາປູເຈຍ) ແລະສະມາຄົມບັນດາປະເທດອາຊີຕາເວັນອອກສ່ຽງໃຕ້, ບັນດາອົງການຂອງປະຊາຊົນຫວຽດນາມໄດ້ຕັ້ງໜ້າຜັນຂະຫຍາຍບັນດາການເຄື່ອນໄຫວມິດຕະພາບ ແລະ ການຮ່ວມມືທີ່ມີຄວາມໝາຍແທດຈິງໃນຫຼາຍຮູບຫຼາຍແບບ ແລະ ອຸດົມສົມບູນ(5); ລົງນາມ ແລະ ປະຕິບັດຂໍ້ຕົກລົງຮ່ວມມືໃນຫຼາຍຂົງເຂດ; ເອົາໃຈໃສ່ເຖິງການເຄື່ອນໄຫວ “ເຖິງໃຈ” ຜ່ານການຈັດຕັ້ງການພົບປະມິດຕະພາບລະຫວ່າງປະຊາຊົນກັບປະຊາຊົນ, ບັນດາເວທີປາໄສການຮ່ວມມືປະຊາຊົນ, ການເຄື່ອນໄຫວໂຄສະນາເຜີຍແຜ່, ການແຂ່ງຂັນຊອກຮູ້ຮີດຄອງປະເພນີຂອງການພົວພັນລະຫວ່າງຫວຽດນາມ ແລະ ບັນດາປະເທດ ໃນທຸກຂັ້ນ ນັບແຕ່ສູນກາງຮອດທ້ອງຖິ່ນ..., ດຶງດູດການເຂົ້າຮ່ວມຢ່າງກວ້າງຂວາງຂອງຜູ້ຄົນຈຳນວນຫຼາຍ ຈາກຫຼາຍຮູບຫຼາຍແບບ, ບໍ່ພຽງແຕ່ປະກອບສ່ວນເພີ່ມທະວີການພົວພັນມິດຕະພາບ, ຄວາມສາມັກຄີທີ່ເປັນມູນເຊື້ອ, ຄວາມໄວ້ເນື້ອເຊື່ອໃຈເຊິ່ງກັນແລະກັນ, ເພີ່ມທະວີການແລກປ່ຽນ ແລະ ການຮ່ວມມື ລະຫວ່າງປະຊາຊົນກັບປະຊາຊົນ, ການສຶກສາມູນເຊື້ອໃຫ້ປະຊາຊົນທຸກຊັ້ນວັນນະ, ໂດຍສະເພາະແມ່ນລຸ້ນໃໝ່ ແຕ່ຍັງສ້າງກົນໄກການແລກປ່ຽນທີ່ສຳຄັນໃຫ້ນັກວິຊາການ ນັກຄົ້ນຄວ້າ ແລະ ຜູ້ຊ່ຽວຊານ ໄດ້ພົບປະ ແລະແລກຢ່າງເປີດເຜີຍ ແລະ ກົງໄປກົງມາ ບົນຈິດໃຈສ້າງສັນໃນບັນດາບັນຫາທີ່ແຕກຕ່າງກັນ.
ກັບບັນດາປະເທດໃຫຍ່ຄືອາເມລິກາ, ພ້ອມກັນກັບການເຮັດໃຫ້ການພົວພັນກັບຄູ່ຮ່ວມມືແບບດັ້ງເດີມເຊັ່ນ ອົງການຝ່າຍຊ້າຍ, ອົງການກ້າວໜ້າ, ອົງການນັກຮົບເກົ່າ, ອົງການສັນຕິພາບແລະມິດຕະພາບ ໃຫ້ເລິກເຊິ່ງຂຶ້ນຕື່ມນັ້ນ, ບັນດາອົງການປະຊາຊົນຫວຽດນາມ ໄດ້ຂະຍາຍການພົວພັນກັບບັນດາອົງການສັງຄົມ, ມະຫາວິທະຍາໄລ, ໂຮງຮຽນມັດທະຍົມ, ສູນແລະສະຖາບັນຄົ້ນຄວ້າ, ອົງການຂອງລູກຫຼານທະຫານອາເມລິກາ ທີ່ສູນຫາຍໄປໃນສົງຄາມຫວຽດນາມ; ຕັ້ງໜ້າຂົນຂວາຍບັນດາອົງການແລະບຸກຄົນ ປະກອບສ່ວນຊຸກຍູ້ການປອງດອງ, ເພີ່ມທະວີຄວາມເຂົ້າໃຈເຊິ່ງກັນແລະກັນ, ແກ້ໄຂຜ່ານຜ່າຜົນຮ້າຍຈາກສົງຄາມ ແລະ ເຂົ້າຮ່ວມການຄົ້ນຫາ ແລະ ລວບລວມສົບຂອງນັກຮົບທີ່ເສຍສະຫຼະຊີວິດເພື່ອຊາດຫວຽດນາມ ແລະ ທະຫານອາເມລິກາທີ່ຫາຍສາບສູນ (MIA).
ຄຽງຂ້າງນັ້ນ, ບັນດາການເຄື່ອນໄຫວມິດຕະພາບ ແລະ ການຮ່ວມມືກັບປະຊາຊົນບັນດາປະເທດເພື່ອນມິດດັ້ງເດີມ ແລະ ບັນດາຄູ່ຮ່ວມມືທີ່ສຳຄັນ (ກູບາ, ລັດເຊຍ ແລະ ບັນດາປະເທດໃນສະຫະພາບໂຊວຽດກ່ອນໜ້ານີ້, ອິນເດຍ, ຍີ່ປຸ່ນ, ເກົາຫຼີໃຕ້, ບັນດາຄູ່ຮ່ວມມືໃນເອີຣົບຕາເວັນອອກແລະຕາເວັນຕົກ, ສະຫະລັດອາເມລິກາ ແລະ ປະເທດອາເມລິກາລາຕິນ, ຫຼາຍປະເທດໃນພາກພື້ນອາຊີ-ປາຊີຟິກ, ຕາເວັນອອກກາງ, ອາຟຣິກາ,...) ກໍ່ໄດ້ຮັບການສົ່ງເສີມຕໍ່ໄປ. ວຽກງານການຕ່າງປະເທດປະຊາຊົນບໍ່ພຽງແຕ່ຊ່ວຍເພີ່ມທະວີການພົວພັນມິດຕະພາບ, ຄວາມສາມັກຄີແບບດັ້ງເດີມ, ຄວາມໄວ້ເນື້ອເຊື່ອໃຈເຊິ່ງກັນແລະກັນເທົ່ານັ້ນ, ແຕ່ຍັງສ້າງຊ່ອງທາງການແລກປ່ຽນທີ່ສໍາຄັນ ໃນການແລກປ່ຽນຂໍ້ມູນແລະປະສົບການ ຕະຫຼອດຈົນເຖິງການສື່ສານທີ່ເປີດເຜີຍແລະກົງໄປກົງມາ ກັບຄູ່ຮ່ວມງານ ໃນທຸກບັນຫາ.
ໃນຊ່ອງທາງພະຫຸພາຄີ, ບັນດາອົງການຂອງປະຊາຊົນຫວຽດນາມ ໄດ້ເຂົ້າຮ່ວມຢ່າງຕັ້ງໜ້າແລະມີຄວາມຮັບຜິດຊອບ ໃນກົນໄກການຮ່ວມມືແບບດັ້ງເດີມຂອງປະຊາຊົນຄື: ສະພາສັນຕິພາບໂລກ, ອົງການສາມັກຄີປະຊາຊົນອາຊີ-ອາຟຣິກາ, ອົງການພາສາເອສເປຣັນໂຕ ສາກັນ, ອົງການປະຊາທິປະໄຕ (ຊາວໜຸ່ມ, ແມ່ຍິງ, ກຳມະບານ, ນັກກົດໝາຍ...), ກອງປະຊຸມໂລກເພື່ອຕ້ານລະເບີດປະລໍາມະນູແລະລະເບີດໄຮໂດຣເຈນ, ແຕ່ຍັງເສີມຂະຫຍາຍບົດບາດແລະສະແດງສຽງໃນເວທີປາໄສ ແລະກົນໄກຂອງສະຫະປະຊາຊາດ (ສະພາເສດຖະກິດແລະສັງຄົມ(6), ກົນໄກສິດທິມະນຸດ), ອາຊຽນ (ເວທີປາໄສປະຊາຊົນອາຊຽນ, ຄະນະກຳມະການລະຫວ່າງລັດຖະບານອາຊຽນ ກ່ຽວກັບສິດທິມະນຸດ ແລະ ກົນໄກການຮ່ວມມືແມ່ນ້ຳຂອງ), ເວທີປາໄສປະຊາຊົນອາຊີ-ເອີຣົບ... ອົງການຈັດຕັ້ງປະຊາຊົນຫວຽດນາມ ໄດ້ເປັນເຈົ້າພາບຈັດຕັ້ງການເຄື່ອນໄຫວປະຊາຊົນຫຼາຍຝ່າຍທີ່ສຳຄັນໃນຫວຽດນາມ, ໃນນັ້ນມີ ກອງປະຊຸມໃຫຍ່ສະພາສັນຕິພາບຄັ້ງທີ 22 ຢູ່ຫວຽດນາມ (ປີ 2022), ເວທີປາໄສປະຊາຊົນ ອາຊຽນ (ປີ 2010 ແລະປີ 2020), ເວທີປາໄສປະຊາຊົນອາຊີ-ເອີຣົບ (ປີ 2004), ກອງປະຊຸມໃຫຍ່ເອສເປຣັນໂຕທົ່ວໂລກ (ປີ 2012) ແລະກອງປະຊຸມໃຫຍ່ເອສເປຣັນໂຕ ໃນອາຊີ-ໂອເຊອາເນຍ (ປີ 2019)..., ພວກເຮົາຍັງໄດ້ປະກອບສ່ວນຫຼາຍຢ່າງເຂົ້າໃນການແກ້ໄຂບັນຫາສາກົນ ແລະ ພາກພື້ນ, ໂດຍສະເພາະ ການຕໍ່ສູ້ຕ້ານອາວຸດນິວເຄຼຍ(7), ຊຸກຍູ້ການປະຕິບັດເປົ້າໝາຍການພັດທະນາແບບຍືນຍົງ ຂອງສະຫະປະຊາຊາດ (SDG), ຕອບສະໜອງການປ່ຽນແປງຂອງດິນຟ້າອາກາດ,... ສະແດງໃຫ້ເຫັນເຖິງຄວາມຮັບຜິດຊອບຂອງຫວຽດນາມໂດຍລວມ ແລະ ບັນດາອົງການຂອງປະຊາຊົນຫວຽດນາມໂດຍສະເພາະ ຕໍ່ປະຊາຄົມໂລກ, ປະກອບສ່ວນຍົກສູງຊື່ສຽງຂອງບັນດາອົງການຂອງປະຊາຊົນຫວຽດນາມ.
ຍ້ອນເຄືອຂ່າຍຄູ່ຮ່ວມມືຂະໜາດໃຫຍ່, ພ້ອມທັງບົດບາດທີ່ເພີ່ມຂຶ້ນໃນເວທີປາໄສ ແລະກົນໄກຫຼາຍຝ່າຍ, ການຕ່າງປະເທດປະຊາຊົນໄດ້ປະກອບສ່ວນຫຼາຍຢ່າງ ໃນການປົກປ້ອງຜົນປະໂຫຍດຂອງຊາດ. ບັນດາອົງການປະຊາຊົນຫວຽດນາມ ໄດ້ເປັນເຈົ້າການໃນການເຂົ້າຮ່ວມ ແລະ ປະກອບສ່ວນເຂົ້າໃນການຕໍ່ສູ້ປະກອບຄຳເຫັນຂອງປະຊາຊົນ ກ່ຽວກັບຫຼາຍບັນຫາທີ່ສັບສົນ, ພິເສດແມ່ນ ໃນບັນຫາປະຊາທິປະໄຕ, ສິດທິມະນຸດ, ຊົນເຜົ່າ, ສາສະໜາ, ເຂດທະເລຕາເວັນອອກ(8), ແຫຼ່ງນ້ຳໃນແມ່ນ້ຳຂອງ, ບັນດາບັນຫາທີ່ກ່ຽວຂ້ອງເຖິງການປ່ຽນແປງຂອງດິນຟ້າອາກາດ... ແລະ ເຂົ້າຮ່ວມ ແລະ ປະສານສົມທົບຢ່າງແໜ້ນແຟ້ນກັບບັນດາກະຊວງ, ຂະແໜງການ ໃນການແກ້ໄຂບັນຫາການພົວພັນສອງຝ່າຍທີ່ເຫຼືອຢູ່ ລະຫວ່າງຫວຽດນາມກັບປະເທດອື່ນ.
ຈຸດເດັ່ນອັນໜຶ່ງຂອງການຕ່າງປະເທດປະຊາຊົນທີ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແມ່ນວຽກງານການຂົນຂວາຍຕ່າງປະເທດທີ່ບໍ່ແມ່ນພາກລັດ. ໃນໄລຍະ 2011-2020, ໂດຍທົ່ວໄປ, ອົງການຈັດຕັ້ງປະຊາຊົນຫວຽດນາມ ແລະ ສະຫະພັນບັນດາອົງການມິດຕະພາບຫວຽດນາມເວົ້າສະເພາະ ມີການພົວພັນກັບ 1.200 ກວ່າອົງການ, ຍອດມູນຄ່າການຊ່ວຍເຫຼືອໃຫ້ລ້າຈາກຕ່າງປະເທດບັນລຸ 2,85 ຕື້ໂດລາສະຫະລັດ. ການຊ່ວຍເຫຼືອຈາກຕ່າງປະເທດແມ່ນສຸມໃສ່ບັນດາຂົງເຂດຄື: ສາທາລະນະສຸກ (ກວມ 33,2%), ພັດທະນາເສດຖະກິດ-ສັງຄົມ (18,5%), ແລະ ການແກ້ໄຂບັນຫາສັງຄົມ (19,5%), ການສຶກສາ - ຝຶກອົບລົມ (10,6%), ການປົກປ້ອງສິ່ງແວດລ້ອມ ແລະ ຊັບພະຍາກອນທຳມະຊາດ (10,1%), ການບັນເທົາທຸກສຸກເສີນ ແລະ ເສີມສ້າງຄວາມສາມາດໃນການເຊື່ອມໂຍງສາກົນ.
ອາດເວົ້າໄດ້ວ່າ, ຕະຫຼອດໄລຍະປະຫວັດສາດການປະຕິວັດຫວຽດນາມ, ການຕ່າງປະເທດປະຊາຊົນໄດ້ເປັນຂົວຕໍ່, ເພີ່ມທະວີຄວາມເຂົ້າໃຈເຊິ່ງກັນແລະກັນ, ຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືລະຫວ່າງປະຊາຊົນຫວຽດນາມ ແລະ ປະຊາຊົນບັນດາປະເທດໃນໂລກ ໃນຫຼາຍຂົງເຂດຄື: ເສດຖະກິດ, ການສຶກສາ, ວັດທະນະທຳ, ການທ່ອງທ່ຽວ... ການຕ່າງປະເທດປະຊາຊົນສົມທົບກັບການຕ່າງປະເທດຂອງພັກ ແລະ ການທູດແຫ່ງລັດ ກໍ່ສ້າງພື້ນຖານສາກົນທີ່ເອື້ອອຳນວຍໃຫ້ແກ່ວຽກງານກໍ່ສ້າງ, ປົກປັກຮັກສາ ແລະ ພັດທະນາປະເທດ, ຊ່ວຍໃຫ້ປະຊາຊົນໂລກເຂົ້າໃຈຫວຽດນາມຢ່າງຈະແຈ້ງແລະຖືກຕ້ອງ, ສະໜັບສະໜູນບັນດາບັນຫາທີ່ກ່ຽວຂ້ອງເຖິງຜົນປະໂຫຍດອັນຊອບທຳຂອງຫວຽດນາມ, ພ້ອມທັງປະກອບສ່ວນເຂົ້າໃນການເຄື່ອນໄຫວຮ່ວມຂອງປະຊາຊົນໂລກ ເພື່ອສັນຕິພາບ ແລະ ຄວາມກ້າວໜ້າທາງສັງຄົມ.
ບັນດາຜົນງານທີ່ບັນລຸໄດ້ນັ້ນ ແມ່ນບົດຮຽນອັນເລິກເຊິ່ງ ແລະ ເປັນພື້ນຖານອັນໜັກແໜ້ນໃຫ້ແກ່ພະນັກງານການຕ່າງປະເທດຂອງປະຊາຊົນລຸ້ນຕໍ່ໍໍລຸ້ນ ເພື່ອນຳແນວຄິດການທູດຂອງໂຮ່ຈີມິນ ມາປະຍຸກໃຊ້ໃນເງື່ອນໄຂໃໝ່ຂອງປະເທດ.
ສະພາບແວດລ້ອມໃໝ່, ສະຖານະການໃໝ່, ວຽກງານໃໝ່
ໃນຊຸມປີທີ່ຜ່ານມາມໍ່ນີ້, ໂລກມີການປ່ຽນແປງຢ່າງວ່ອງໄວ, ສະລັບສັບຊ້ອນ, ຄາດເດົາບໍ່ໄດ້ ແລະບໍ່ເຄີຍເກີດຂຶ້ນມາກ່ອນ. ການແກ່ງແຍ້ງກັນລະຫວ່າງປະເທດໃຫຍ່ນັບມື້ນັບເພີ່ມຂຶ້ນໃນລະດັບ, ຂະຫຍາຍຂອບເຂດແລະຂົງເຂດ, ສົ່ງຜົນກະທົບບໍ່ພຽງແຕ່ຕໍ່ຄວາມໝັ້ນຄົງ-ການເມືອງ, ສັນຕິພາບ-ສະຖຽນລະພາບເທົ່ານັ້ນ, ແຕ່ຍັງລວມທັງເສດຖະກິດ-ສັງຄົມ ແລະ ໂຄງສ້າງການພົວພັນສາກົນອີກນຳ. ໂດຍສະເພາະ, ໃນໄລຍະ 2 ປີຜ່ານມາ, ການແຜ່ລະບາດຂອງພະຍາດໂຄວິດ-19 ພ້ອມກັບການປະທະກັນລະຫວ່າງລັດເຊຍ ແລະ ຢູແຄຣນ ໄດ້ກໍ່ໃຫ້ເກີດວິກິດການດ້ານເສດຖະກິດ, ສັງຄົມ ແລະ ພະລັງງານຫຼາຍຢ່າງ. ນອກນີ້, ຍັງມີສິ່ງທ້າທາຍດ້ານຄວາມໝັ້ນຄົງທີ່ບໍ່ເປັນແບບດັ້ງເດີມ ເຊິ່ງຂ້າມຊາຍແດນປະເທດ ແລະກາຍເປັນຄວາມກັງວົນລະດັບໂລກ.
ພາກພື້ນອິນໂດ-ປາຊີຟິກມີທີ່ຕັ້ງພູມສາດ-ຍຸດທະສາດ ດ້ານເສດຖະກິດ, ການເມືອງ, ການປ້ອງກັນປະເທດ ປ້ອງກັນຄວາມໝັ້ນຄົງ, ໂດຍມີປະຊາກອນກວ່າເຄິ່ງໜຶ່ງຂອງໂລກ ແລະກວມເອົາ 60% ຂອງລວມຍອດຜະລິດຕະພັນພາຍໃນ (ຈີດີພີ) ທົ່ວໂລກ, ດ້ວຍຫຼາຍເສັ້ນທາງທະເລທີ່ສຳຄັນ, ສືບຕໍ່ເປັນເຂດຈຸດສຸມໃນການປະຕິບັດຍຸດທະສາດຂອງບັນດາປະເທດໃຫຍ່ ແລະ ບັນດາປະເທດຂະໜາດກາງອື່ນໆ. ການແກ່ງແຍ້ງຍຸດທະສາດນັບມື້ນັບເພີ່ມຂຶ້ນ ແລະບັນດາປະເທດໃຫຍ່ພວມເພີ່ມຄວາມພະຍາຍາມໃນການດຶງດູດບັນດາປະເທດໃນພາກພື້ນຜ່ານບັນດາກົນໄກ ແລະ ຄວາມລິເລີ່ມໃໝ່. ນີ້ແມ່ນໜຶ່ງໃນພື້ນທີ່ທີ່ມີ “ຈຸດຮ້ອນ” ຈໍານວນຫຼາຍ ທີ່ບໍ່ສາມາດແກ້ໄຂໄດ້. ຄວາມເຄັ່ງຕຶງຢູ່ຊ່ອງແຄບໄຕ້ຫວັນ (ຈີນ), ທະເລຕາເວັນອອກ, ແຫຼມເກົາຫຼີ ແລະ ການແຂ່ງຂັນກັນປະກອບອາວຸດ ແມ່ນບັນຫາສຳຄັນ ແລະມີຄວາມສ່ຽງທີ່ຈະກາຍເປັນສົງຄາມທີ່ຮ້ອນແຮງ.
ສະຖານະການໂລກແລະພາກພື້ນ ໄດ້ແລະພວມສົ່ງຜົນກະທົບຢ່າງເລິກເຊິ່ງ ແລະ ຫຼາຍດ້ານ ຕໍ່ການເຄື່ອນໄຫວຂອງປະຊາຊົນໃນໂລກ ແລະ ພາກພື້ນ. ວິກິດການທີ່ເກີດຂຶ້ນທົ່ວໂລກສົ່ງຜົນກະທົບຕໍ່ຊີວິດຂອງປະຊາຊົນ, ພ້ອມກັບກະແສຄວາມເປັນປະຊາທິປະໄຕຂອງຊີວິດສາກົນ ແລະ ການພັດທະນາຢ່າງແຂງແຮງ ຂອງເຕັກໂນໂລຊີຂໍ້ມູນຂ່າວສານ ໄດ້ພາໃຫ້ເກີດຂະບວນການສັງຄົມຕໍ່ຕ້ານລັດທິຜະເດັດການ, ຄວາມບໍ່ຍຸຕິທຳ ເພື່ອຊີວິດການເປັນຢູ່ຂອງປະຊາຊົນ, ປະຊາທິປະໄຕ ແລະ ຄວາມຍຸຕິທຳທາງສັງຄົມໃນໂລກ. ບັນດາຮູບແບບການເຕົ້າໂຮມກຳລັງປະຊາຊົນນັບມື້ນັບຫຼາກຫຼາຍແລະຍືດຫຍຸ່ນ, ບັນດາເວທີປາໄສປະຊາຊົນທົ່ວໂລກ, ລະຫວ່າງພາກພື້ນ ແລະ ລະດັບພາກພື້ນ ຈົນເຖິງເຄືອຂ່າຍສະເພາະເລື່ອງ, ການເຕົ້າໂຮມກໍາລັງຂອງປະຊາຊົນ ບົນພື້ນຖານເຄືອຂ່າຍສັງຄົມຕ່າງໆ ພວມໄດ້ຮັບຄວາມນິຍົມ ແລະສະລັບສັບຊ້ອນ. ບັນດາປະເທດ, ໂດຍສະເພາະ ປະເທດມະຫາອຳນາດ, ສືບຕໍ່ເພີ່ມການໃຊ້ຂະບວນການປະຊາຊົນ, ການຈັດຕັ້ງປະຊາຊົນ, “ສັງຄົມພົນລະເຮືອນ” ເປັນຮູບແບບໃໝ່ຂອງການເຕົ້າໂຮມກຳລັງ, ສ້າງອິດທິພົນ, ທັງເປັນການຄອບງຳ, ສົ່ງຜົນກະທົບ, ແຊກແຊງເຂົ້າໃນວຽກງານພາຍໃນຂອງປະເທດອື່ນໆ.
ໃນສະພາບການນັ້ນ, ການຕ່າງປະເທດປະຊາຊົນຫວຽດນາມ ພວມປະສົບກັບກາລະໂອກາດອັນໃຫຍ່ຫຼວງ ແຕ່ກໍ່ເຕັມໄປດ້ວຍສິ່ງທ້າທາຍ, ໂດຍສະເພາະແມ່ນໃນວຽກງານລະດົມແນວໂຮມສາມັກຄີສາກົນ ເພື່ອໜູນຊ່ວຍຫວຽດນາມ, ສ້າງພື້ນຖານສະພາບແວດລ້ອມສາກົນທີ່ຕັ້ງໜ້າ ແລະ ເອື້ອອຳນວຍ, ປະກອບສ່ວນເພີ່ມທະວີຄວາມໝັ້ນຄົງ ແລະ ພັດທະນາຂອງປະເທດ.
ກອງປະຊຸມໃຫຍ່ຄັ້ງທີ XIII ຂອງພັກໄດ້ກຳນົດໜ້າທີ່ການຕ່າງປະເທດວ່າ: “ສືບຕໍ່ເສີມຂະຫຍາຍບົດບາດປະຈັນບານໃນການສ້າງສາ ແລະ ຮັກສາສະພາບແວດລ້ອມສັນຕິພາບ, ສະຖຽນລະພາບ, ລະດົມແຫຼ່ງກຳລັງຈາກພາຍນອກ ເພື່ອພັດທະນາປະເທດ, ຍົກສູງທີ່ຕັ້ງ ແລະ ກຽດສັກສີຂອງປະເທດ”(9), ໃນນັ້ນ, ການຕ່າງປະເທດປະຊາຊົນຖືເປັນໜຶ່ງໃນສາມເສົາຄໍ້າ, ພ້ອມກັບການຕ່າງປະເທດຂອງພັກ ແລະ ການທູດຂອງລັດ, “ການຕ່າງປະເທດປະຊາຊົນແມ່ນໜ້າທີ່ຂອງລະບົບການເມືອງທັງໝົດ, ຂອງສະມາຊິກພັກແຕ່ລະຄົນ ແລະ ປະຊາຊົນ”.
ເພື່ອຍົກສູງປະສິດທິຜົນຂອງວຽກງານການຕ່າງປະເທດປະຊາຊົນຢ່າງບໍ່ຢຸດຢັ້ງ ແລະ ປະກອບສ່ວນຢ່າງຕັ້ງໜ້າໃຫ້ແກ່ປະເທດ, ບັນດາກຳລັງທີ່ເຮັດວຽກງານການຕ່າງປະເທດປະຊາຊົນຕ້ອງໄດ້ສຸມໃສ່ບັນດາເນື້ອໃນຕໍ່ໄປນີ້:
ທີໜຶ່ງ, ສືບຕໍ່ຊາບຊຶມແນວທາງຂອງພັກຢ່າງເລິກເຊິ່ງ ແລະ ຕັ້ງໜ້າຜັນຂະຫຍາຍແນວທາງຂອງພັກກ່ຽວກັບການຕ່າງປະເທດ ແລະ ການຕ່າງປະເທດປະຊາຊົນ, ປະຕິບັດນະໂຍບາຍການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ຫັນການພົວພັນສາກົນເປັນຫຼາຍຮູບຫຼາຍແບບ ຫຼາຍກ້ຳຫຼາຍຝ່າຍ; ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານກົດໝາຍສາກົນ; ເສີມຂະຫຍາຍພະລັງພາຍໃນຢ່າງສຸດຂີດ, ໃຊ້ປະໂຫຍດຈາກພະລັງຕ່າງປະເທດ; ຖືການຕ່າງປະເທດປະຊາຊົນເປັນໜ້າທີ່ຂອງລະບົບການເມືອງທັງໝົດ, ຂອງພະນັກງານ ສະມາຊິກພັກແຕ່ລະຄົນ ແລະ ປະຊາຊົນ. ການຕ່າງປະເທດປະຊາຊົນຕ້ອງສືບຕໍ່ໄດ້ຮັບການຈັດຕັ້ງຢູ່ພາຍໃຕ້ການຊີ້ນຳນຳພາເປັນເອກະພາບ ແລະ ຮອບດ້ານຂອງພັກ ແລະ ການຄຸ້ມຄອງລວມສູນ ແລະ ມີປະສິດທິຜົນຂອງລັດ.
ທີສອງ, ເອົາໃຈໃສ່ເປັນຢ່າງດີຕໍ່ວຽກງານກໍ່ສ້າງກຳລັງ, ເສີມສ້າງແລະປັບປຸງການຈັດຕັ້ງກົງຈັກ ແລະ ພະນັກງານທີ່ເຮັດວຽກງານການຕ່າງປະເທດປະຊາຊົນ ໃຫ້ມີຄວາມຄ່ອງແຄ້ວ, ມີປະສິດທິຜົນ, ເປັນມືອາຊີບແຕ່ສູນກາງລົງຮອດທ້ອງຖິ່ນ. ມີກົງຈັກທີ່ເຂັ້ມແຂງ ແລະພະນັກງານທີ່ມີຄວາມຮູ້ຄວາມສາມາດ, ທຸກສິ່ງທຸກຢ່າງຈະດໍາເນີນງານຢ່າງສະດວກ. ພະນັກງານການຕ່າງປະເທດປະຊາຊົນຕ້ອງຝຶກຝົນຫຼໍ່ຫຼອມຕົນເອງຢ່າງບໍ່ຢຸດຢັ້ງ, ກຳແໜ້ນ ແລະ ໝູນໃຊ້ແນວທາງການຕ່າງປະເທດຂອງພັກຢ່າງຊຳນິຊຳນານ, ມີລະດັບວິຊາຊີບແລະພາສາຕ່າງປະເທດທີ່ດີ ເພື່ອປະກອບສ່ວນຢ່າງຕັ້ງໜ້າເຂົ້າໃນການພົວພັນທາງການທູດທີ່ “ຮອບດ້ານ ແລະ ທັນສະໄໝ” ຂອງປະເທດ.
ທີສາມ, ປັບປຸງແລະເສີມສ້າງເຄືອຂ່າຍຄູ່ຮ່ວມມືດ້ານການຕ່າງປະເທດປະຊາຊົນຢ່າງບໍ່ຢຸດຢັ້ງ ຕາມທິດຫັນເປັນຫຼາກຫຼາຍ ແລະຫຼາຍກ້ຳຫຼາຍຝ່າຍ. ຄູ່ຮ່ວມມືທາງການຕ່າງປະເທດປະຊາຊົນບໍ່ຄວນຈຳກັດຢູ່ພຽງອົງການຝ່າຍຊ້າຍ, ອົງການປະຊາຊົນ, ຄູ່ຮ່ວມມືໃນບັນດາປະເທດເພື່ອນມິດແບບດັ້ງເດີມເທົ່ານັ້ນ, ແຕ່ຄວນຂະຫຍາຍການພົວພັນກັບອົງການ ແລະ ບຸກຄົນຈຳນວນຫຼາຍຢ່າງບໍ່ຢຸດຢັ້ງ, ຈາກອົງການເອກະຊົນ, ອົງການສັງຄົມ, ສະຖາບັນຄົ້ນຄ້ວາ, ພັກຝ່າຍຕ່າງໆ ຈົນເຖິງນັກວິຊາການ, ນັກການເມືອງ ແລະ ບຸກຄົນທີ່ປາດຖະໜາຢາກພົວພັນມິດຕະພາບ ແລະ ຮ່ວມມືກັບຫວຽດນາມ.
ທີສີ່, ປ່ຽນແປງໃໝ່ຢ່າງບໍ່ຢຸດຢັ້ງ, ສືບຕໍ່ປ່ຽນແປງໃໝ່ ແລະ ປ່ຽນແປງໃໝ່ຢ່າງແຂງແຮງ. ໃນສະພາບການໂລກທີ່ມີການປ່ຽນແປງຢ່າງວ່ອງໄວ ໃນທຸກວັນທຸກຊົ່ວໂມງ ດ້ານວິທະຍາສາດ-ເຕັກໂນໂລຊີ, ດ້ານການພົວພັນສາກົນ, ເພື່ອບໍ່ໃຫ້ຕົກຢູ່ເບື້ອງຫຼັງ, ບໍ່ໃຫ້ “ຖືກປະໄວ້ເບື້ອງຫຼັງ”, ສືບຕໍ່ປະຕິບັດບົດບາດ “ການນຳໜ້າປະຈັນບານ, ປູທາງ”, ປະຕິບັດບົດບາດເປັນ “ເສົາຄ້ຳ” ຂອງ “ການທູດຮອບດ້ານ ແລະ ທັນສະໄໝ”, ບັນດາກຳລັງທີ່ເຮັດວຽກງານການຕ່າງປະເທດປະຊາຊົນ ຕ້ອງປ່ຽນແປງຢ່າງແທ້ຈິງ ກ່ຽວກັບຄວາມຮັບຮູ້ ວິທີຈິນຕະນາການທີ່ທັນສະໄໝ, ກ່ຽວກັບເນື້ອໃນ ແລະ ແບບວິທີການເຄື່ອນໄຫວ.
ທີຫ້າ, ເພີ່ມທະວີການປະສານສົມທົບກັບການຕ່າງປະເທດຂອງພັກ ແລະ ການທູດຂອງລັດ. ການຕ່າງປະເທດປະຊາຊົນ ຕ້ອງກາຍເປັນແຂນຂະຫຍາຍຢ່າງແທ້ຈິງ ຂອງການຕ່າງປະເທດຂອງພັກ ແລະ ການທູດຂອງລັດ, ຈາກນັ້ນສ້າງກຳລັງແຮງສັງລວມຂອງວຽກງານການຕ່າງປະເທດຂອງຫວຽດນາມ./.
------------------------------
(1) ໂຄງການການເມືອງຂອງພັກແຮງງານຫວຽດນາມ, ໜັງສືພິມເອເລັກໂຕຣນິກຂອງ ພັກກອມມູນິດຫວຽດນາມ, ອອກວັນທີ 19 ເມສາ 2018, https://tulieuvankien.dangcongsan.vn/ban-chap-hanh-trung-uong-dang/dai-hoi-dang/lan-thu-ii/chinh-cuong-dang-lao-dong-viet-nam-1448
(2), (3) ເອກະສານກອງປະຊຸມໃຫຍ່ຂອງພັກໃນສະໄໝແຫ່ງການປ່ຽນແປງໃໝ່, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2019, ເຫຼັ້ມ 1, ໜ້າ 334, 656.
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 162.
(5) ງານມະໂຫລານມິດຕະພາບຫວຽດນາມ - ລາວ ຄັ້ງທີ 3 (ປີ 2012) ແລະຄັ້ງທີ 4 (ປີ 2017) ໄດ້ດຳເນີນຢູ່ຫວຽດນາມ ແລະ ລາວ ຕາມລຳດັບ, ເນື່ອງໃນໂອກາດສະເຫຼີມສະຫຼອງຄົບຮອບ 50 ປີແຫ່ງວັນສ້າງຕັ້ງການພົວພັນທາງການທູດ ແລະ ຄົບຮອບ 35 ປີ ແລະ 40 ປີ ແຫ່ງວັນເຊັນສົນທິສັນຍາມິດຕະພາບແລະການຮ່ວມມື ຫວຽດນາມ-ລາວ; ການພົບປະມິດຕະພາບ ແລະ ການຮ່ວມມືລະຫວ່າງປະຊາຊົນຫວຽດນາມ ແລະ ກຳປູເຈຍ ຄັ້ງທີ 3 (ປີ 2012) ແລະ ຄັ້ງທີ 4 (ປີ 2017) ດຳເນີນຢູ່ຫວຽດນາມ ແລະ ກຳປູເຈຍ ຕາມລຳດັບ ເພື່ອສະເຫຼີມສະຫຼອງປີມິດຕະພາບ ຫວຽດນາມ-ກຳປູເຈຍ ແລະ ສະເຫຼີມສະຫຼອງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ ຄົບຮອບ 45 ປີ ແລະ 50 ປີ; ຈັດຕັ້ງໃຫ້ຄະນະນັກຊ່ຽວຊານຫວຽດນາມຢູ່ລາວ ມາຢ້ຽມຢາມລາວ (ເລີ່ມແຕ່ປີ 2010 ແລະບັນດາປີ 2011, 2013, 2018, 2019), ຄະນະຜູ້ແທນນັກຮົບເກົ່າ ແລະ ພົນລະເມືອງລາວ ທີ່ເຄີຍຄຽງບ່າຄຽງໄຫຼ່ ປົກປ້ອງແລະຊ່ວຍເຫຼືອທະຫານອາສາສະໝັກຫວຽດນາມ ໄປຢ້ຽມຢາມຫວຽດນາມ (ປີ 2012 ແລະປີ 2017); ໂຄງການ “ບຳລຸງສ້າງມິດຕະພາບ” ໃຫ້ບັນດານັກສຶກສາ ກຳປູເຈຍ ທີ່ພວມຮ່ຳຮຽນຢູ່ຫວຽດນາມ (ເລີ່ມແຕ່ປີ 2012); ລະດົມກຳລັງ ແລະ ບໍລິຈາກດ້ວຍຄວາມສະໝັກໃຈທັນທີ ເພື່ອຊ່ວຍເຫຼືອປະຊາຊົນລາວໃນການແກ້ໄຂເຫດການເຂື່ອນແຕກ ຢູ່ແຂວງອັດຕະປື (ປີ 2018); ຊ່ວຍເຫຼືອ, ບໍລິຈາກ, ສະໜັບສະໜູນວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 (ປີ 2020)
(6) ປະຈຸບັນ, ມີອົງການປະຊາຊົນຫວຽດນາມ 4 ອົງການ ທີ່ມີສະຖານະເປັນທີ່ປຶກສາເອກະຊົນຢູ່ທີ່ສະພາເສດຖະກິດ ແລະ ສັງຄົມແຫ່ງສະຫະປະຊາຊາດ, ໃນນັ້ນມີ ກອງທຶນສັນຕິພາບ ແລະ ການພັດທະນາຂອງຫວຽດນາມ ຂຶ້ນກັບສະຫະພັນບັນດາອົງການມິດຕະພາບຫວຽດນາມ, ສູນແມ່ຍິງ ແລະ ການພັດທະນາ ຂຶ້ນກັບສະຫະພັນແມ່ຍິງສູນກາງ, ສະມາຄົມວາງແຜນຄອບຄົວຫວຽດນາມ, ສູນພັດທະນາຊົນນະບົດແບບຍືນຍົງ ຂຶ້ນກັບສະມາຄົມວິທະຍາສາດເຕັກໂນໂລຊີຫວຽດນາມ.
(7) ໃນລະຫວ່າງການໂຄສະນາການເກັບລາຍເຊັນ ຮຽກຮ້ອງຫຼ້າສຸດໃຫ້ຫຼຸດອາວຸດນິວເຄຣຍ ໂດຍຂະບວນການຊາວຍີ່ປຸ່ນແລະທົ່ວໂລກ, ອົງການສັນຕິພາບຫວຽດນາມ - ສະມາຊິກຂອງສະຫະພັນບັນດາອົງການມິດຕະພາບຫວຽດນາມ - ເຮັດໜ້າທີ່ເປັນສູນກາງໃນການປະສານງານກັບອົງການທ້ອງຖິ່ນ ແລະປະຊາຊົນຫວຽດນາມ ເພື່ອລວບລວມລາຍເຊັນຈຳນວນຫຼາຍທີ່ສຸດໃນທົ່ວໂລກ (ໃນປີ 2016 ມີລາຍເຊັນ 1,5 ລ້ານ / 6 ລ້ານລາຍເຊັນທົ່ວໂລກ ແລະໃນປີ 2020 ມີລາຍເຊັນເກືອບ 1 ລ້ານລາຍເຊັນ)
(8) ປະສານສົມທົບກັບຄະນະກຳມະການຊາຍແດນແຫ່ງຊາດ ແລະ ສຳນັກພິມຈຳໜ່າຍສຶກສາທິການ ແລະ ສຳນັກພິມຈຳໜ່າຍໂລກ ເພື່ອລວບລວມ, ຈັດພິມ ແລະ ພິມຈຳໜ່າຍຄືນໃໝ່ປຶ້ມ “ຫວຽດນາມ ແລະ ທະເລຕາເວັນອອກ” ເປັນພາສາຫວຽດນາມ (ເຜີຍແຜ່ໃນປີ 2011, ພິມຈຳໜ່າຍໃໝ່ໃນປີ 2014 ແລະ 2017) ແລະພາສາອັງກິດ (ເຜີຍແຜ່ໃນປີ 2012, ພິມຈຳໜ່າຍໃໝ່ໃນປີ 2014 ແລະ 2017)
(9) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 162
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1016 (ເດືອນມິຖຸນາ 2023)