ການໂຄສະນາເຜີຍແຜ່ແລະສົ່ງເສີມພາບພົດຂອງປະເທດ
ສູ່ເພື່ອນມິດສາກົນ: ສະພາບການ ແລະທິດທາງໃນປະຈຸບັນ
ສູ່ເພື່ອນມິດສາກົນ: ສະພາບການ ແລະທິດທາງໃນປະຈຸບັນ
ວກ. - ໃນໂລທີ່ມີການຜັນຜວນຫຼວງຫຼາຍ ດ້ວຍຄວາມສະດວກ ໂອກາດ ຄວາມຫຍຸ້ງຍາກ ແລະຄວາມທ້າທາຍທີ່ສະຫຼັບສັບຊ້ອນກັນ, ລວມທັງປັດໄຈທີ່ບໍ່ແນ່ນອນຫຼາຍປະການ ສຳລັບການພັດທະນາ, ແຕ່ຫວຽດນາມຍັງມີການປ່ຽນແປງອັນຕັ້ງໜ້າທາງເສດຖະກິດ ການເມືອງ ສັງຄົມ... ພ້ອມດ້ວຍພາບພົດ ຕຳແໜ່ງ ແລະ ສັກສີຂອງປະເທດທີ່ໄດ້ຮັບການຢືນຢັນ ແລະຍົກລະດັບຂຶ້ນ ໃນເວທີສາກົນ, ຄວາມເຊື່ອໝັ້ນຂອງປະຊາຄົມສາກົນຕໍ່ສະຖາບັນທາງການເມືອງ ແລະຄວາມສາມາດໃນການຄຸ້ມຄອງບໍລິຫານລະດັບຊາດຂອງຫວຽດນາມ ກໍ່ນັບມື້ນັບເຂັ້ມແຂງ. ໃນສະພາບການດັ່ງກ່າວ, ການແຈ້ງແລະສົ່ງເສີມພາບພົດຂອງຫວຽດນາມໃຫ້ກັບເພື່ອນມິດສາກົນມີຄວາມສຳຄັນຫຼາຍ.
1- ໃນດ້ານຄວາມສຳນຶກ, ພາບພົດຂອງຊາດສາມາດເຂົ້າໃຈໄດ້ວ່າ ເປັນພາບໂດຍລວມ ຂອງຄວາມປະທັບໃຈກ່ຽວກັບປະເທດທີ່ເກີດຈາກອົງປະກອບຕ່າງໆທີ່ລັກສະນະສະເພາະ, ເຊັ່ນ: ຜະລິດຕະພັນ, ການພັດທະນາເສດຖະກິດ-ສັງຄົມ, ການພົວພັນແລະເຫດການປະຫວັດສາດ, ປະເພນີ, ເອກະລັກທາງວັດທະນະທໍາ, ຜູ້ຄົນ, ທໍາມະຊາດ... ຜູ້ຊ່ຽວຊານຊາວອາເມລິກາດ້ານການຄົ້ນຄວ້າພາບພົດປະຈຳຊາດ ຟີລິບ ຄອດເລີຣ໌ (Philip Kotler) ໃຫ້ທັດສະນະວ່າ “ພາບພົດປະຈຳຊາດແມ່ນການສັງເຄາະຄວາມເຊື່ອແລະຄວາມປະທັບໃຈທີ່ຜູ້ຄົນມີຕໍ່ສະຖານທີ່ ຫຼືປະເທດ. ພາບນີ້ລວບລວມຂໍ້ມູນທັງໝົດກ່ຽວກັບປະເທດ... ນີ້ແມ່ນຜົນຜະລິດຂອງຂະບວນການໃນການເລືອກຂໍ້ມູນທີ່ຈຳເປັນ ແລະມີລັກສານະສະເພາະ ຈາກຂໍ້ມູນທີ່ແຕກຕ່າງກັນຫຼາຍພັນລາຍການ ທີ່ກ່ຽວກັບປະເທດນັ້ນ”(1). ທ່ານ ຢິງຟານ ອະດີດສາດສະດາຈານແຫ່ງມະຫາວິທະຍາໄລ ຄວີນ ເມຣີ ( ອັງກິດ) ເນັ້ນໜັກວ່າ ພາບພົດຂອງປະເທດແມ່ນຖືກກຳນົດໂດຍຜູ້ຄົນທີ່ຢູ່ນອກປະເທດນັ້ນ ແລະການຮັບຮູ້ຂອງພວກເຂົາໄດ້ຮັບອິດທິພົນຈາກທັດສະນະຄະຕິແບບເໝົາລວມ, ການສື່ສານ ແລະປະສົບການສ່ວນຕົວ.
ຄວາມເປັນຈິງສະແດງໃຫ້ເຫັນວ່າ ບັນດາປະເທດໃຫ້ຄວາມສົນໃຈຫຼາຍຂຶ້ນໃນການສົ່ງເສີມແລະເຜີຍແຜ່ພາບພົດຂອງປະເທດຂອງຕົນ ແລະຖືວ່າສິ່ງນີ້ແມ່ນບຸລິມະສິດໃນຍຸດທະສາດການສ້າງແລະປະຕິບັດນະໂຍບາຍການຕ່າງປະເທດຂອງປະເທດ. ການສ້າງແລະສົ່ງເສີມພາບພົດຂອງຊາດບໍ່ພຽງແຕ່ໄດ້ຮັບການຕີລາຄາສູງຈາກບັນດາປະເທດທີ່ພັດທະນາແລ້ວແລະປະເທດໃຫຍ່ເທົ່ານັ້ນ ແຕ່ກໍ່ໄດ້ຮັບຄວາມເອົາໃຈໃສ່ຂອງບັນດາປະເທດຂະໜາດນ້ອຍແລະຂະໜາດກາງ, ເພາະວ່າ ຜ່ານນັ້ນສາມາດຊ່ວຍດຶງດູດການຄ້າ ການລົງທຶນ ແລະການທ່ອງທ່ຽວ, ຍົກສູງບົດບາດແລະທີ່ຕັ້ງຂອງປະເທດ. ຍ້ອນບົດບາດສຳຄັນຂອງການໂຄສະນາເຜີຍແຜ່ແລະການສົ່ງເສີມພາບພົດຂອງປະເທດຂອງປະຊາຄົມສາກົນ ເຊິ່ງໃນຊຸມປີທີ່ຜ່ານມາ ບັນດາປະເທດໃນໂລກຈຶງພະຍາຍາມສ້າງພາບພົດຂອງຊາດໃນຮູບແບບຕ່າງໆ. ຕົວຢ່າງເຊັ່ນ, ຍຸດທະສາດສົ່ງເສີມຍີ່ຫໍ້ “ປະເທດອັງກິດທີ່ເຢັນສະບາຍ” (Cool Britanica) ຕັ້ງແຕ່ຕົ້ນຊຸມປີ 1990 ຂອງສະຕະວັດທີ XX ມີຈຸດປະສົງເພື່ອເສີມສ້າງຄວາມພາກພູມໃຈຂອງປະຊາຊົນອັງກິດ ແລະຄວາມເຫັນອົກເຫັນໃຈຂອງຊາວຕ່າງປະເທດຕໍ່ອັງກິດ ໂດຍຜ່ານຜົນສໍາເລັດທາງດົນຕີ, ວັດທະນະທໍາ ແລະສິລະປະ. ນິວຊີແລນ ພົ້ນເດັ່ນຂຶ້ນດ້ວຍຍຸດທະສາດ “ນິວຊີແລນບໍລິສຸດ 100%” (“100% Pure New Zealand”) ໄດ້ປ່ຽນຂໍ້ເສຍປຽບທາງພູມສາດໃຫ້ກາຍເປັນສະຖານທີ່ທ່ອງທ່ຽວທີ່ມີເອກະລັກສະເພາະຂອງນິວຊີແລນ ໃນຖານະສະຖານທີ່ທ່ອງທ່ຽວໃນອຸດົມຄະຕິສຳລັບນັກທ່ອງທ່ຽວທີ່ຮັກການສຳຫຼວດທຳມະຊາດອັນບໍລິສຸດແລະພູມສັນຖານທີ່ສວຍງາມ. ຫຼາຍຂະບວນການໂຄສະນາເຜີຍແຜ່ພາບພົດຂອງປະເທດ, ປະຊາຊົນ ແລະ ວັດທະນະທຳອິນເດຍ ໄດ້ດຳເນີນ, ເຊັ່ນ: ຂະບວນການທ່ອງທ່ຽວອິນເດຍອັນເຫຼືອເຊື່ອ (ປີ 2002), ຂະບວນການດຶງດູດການລົງທຶນໂດຍກົງຈາກຕ່າງປະເທດ ແລະບັນດາວິສາຫະກິດ “ຜະລິດຢູ່ອິນເດຍ” (ປີ 2004) ໄດ້ສ້າງຊື່ສຽງແລະຕໍາແໜ່ງຂອງອິນເດຍໃນລະດັບສາກົນ. “ປະເທດໄທມະຫັດສະຈັນ” ເພື່ອພັດທະນາການທ່ອງທ່ຽວ ແລະ “ປະເທດໄທ 4.0” ເພື່ອສ້າງພາບພົດຂອງປະເທດໄທທີ່ມີເສດຖະກິດທີ່ພັດທະນາຢ່າງຍືນຍົງບົນພື້ຖານເຕັກໂນໂລຊີແລະນະວັດຕະກຳ. “ກະແສເກົາຫຼີໃຕ້ - Hallyu” ຖືເປັນກະແສວັດທະນະທຳອາຊີທີ່ຂະຫຍັນຂັນເຄື່ອນທີ່ສຸດ ໂດຍແຜ່ກະຈາຍຢ່າງແຂງແຮງ ເຊິ່ງພິສູດໃຫ້ເຫັນເຖິງຕຳແໜ່ງທີ່ສູງທົ່ວໂລກຜ່ານຟີມຮູບເງົາ ດົນຕີ ແລະສຸນທະລີຍະພາບ ປະວັດສາດ ແລະກິດຈະກຳການແລກປ່ຽນວັດທະນະທຳລວງເລິກ.
ສາມາດເຫັນໄດ້ວ່າ, ແຕ່ລະປະເທດມີລັກສະນະສະເພາະທີ່ສາມາດສ້າງພາບພົດທີ່ເປັນຕົວແທນໄດ້ເປັນເອກະລັກ ເພື່ອສ້າງຍຸດທະສາດການໂຄສະນາເຜີຍແຜ່ພາບພົດຂອງປະເທດໃຫ້ບັນລຸເປົ້າໝາຍສູງສຸດ ໃນການຮັບໃຊ້ຜົນປະໂຫຍດຂອງຊາດ-ປະເທດຊາດ.
ທ່ານ ອັນໂຕນີ ກູເຕີເຣດ ເລຂາທີການສະຫະປະຊາຊາດ ຢ້ຽມຊົມວິຫານວັດທະນະທຳ - ກວັກຕື໋ຢ໊າມ ເຊິ່ງເປັນກິດຈະການທີ່ມີຄວາມໝາຍສັນຍາລັກສຳລັບຂະບວນການພັດທະນາວັດທະນະທຳຂອງຫວຽດນາມ _ ແຫຼ່ງ: dantri.com.vn
2- ຄືກັນກັບປະເທດອື່ນໆໃນໂລກ ຫວຽດນາມຕ້ອງການສ້າງແລະຮັກສາພາບພົດທີ່ສວຍງາມແລະຄວາມປະທັບໃຈອັບເລິກເຊິ່ງໄວ້ໃນໃຈຂອງເພື່ອນມິດ ແລະຄູ່ຮ່ວມມືຕ່າງປະເທດ ຜ່ານການເຜີຍແຜ່ຄຸນຄ່າວັດທະນະທຳແລະແນວຄິດ, ຄວາມສວຍງານຂອງປະເທດ ຜູ້ຄົນ ແລະຊາດຫວຽດນາມ. ຖ້າຫາກໃນອະດິດ ພາບພົດຂອງຫວຽດນາມໃນສາຍຕາປະຊາຄົມສາກົນແມ່ນປະເທດທີ່ມີປະສົບການສົງຄາມຍາວນານຫຼາຍສິບປີ, ມີຄວາມປາດຖະໜາຢ່າງແຮງກ້າຕໍ່ເອກະລາດແລະສັນຕິພາບຂອງຊາດ ແລະເປັນຄັນທຸງຕໍ່ສູ້ຂອງຂະບວນການປົດປ່ອຍຊາດ, ທຸກວັນນີ້ ຫວຽດນາມຖືເປັນໜຶ່ງໃນປະເທດທີ່ມີຄວາມກ້າວໜ້າຢ່າງແຂງແຮງ ໃນການປ່ຽນແປງໃໝ່ແລະການພັດທະນາ ສັນຕິພາບ ຄວາມກ້າວໜ້າ ຄວາມຈະເລີນຮຸ່ງເຮືອງ ແລະຄວາມປະຈັນບານນຳໜ້າໃນຫຼາຍຂົງເຂດ ເຊັ່ນການລົບລ້າງຄວາມອຶດຫີວ, ການຫຼຸດຜ່ອນຄວາມທຸກຍາກ. ຕັ້ງແຕ່ຊຸມປີຕົ້ນຂອງອຳນາດການປົກຄອງປະຕິວັດ ຈົນເຖິງສົງຄາມສອງຄັ້ງຕ້ານການຮຸກຮານຂອງພວກລ່າເມືອງຂຶ້ນຝຣັ່ງແລະຈັກກະພັດອາເມລິກາ ພາຍໃຕ້ການນຳພາຂອງພັກກອມມູນິດຫວຽດນາມ, ພາບພົດຂອງຫວຽດນາມ “ຊູທຸງເອກະລາດແຫ່ງຊາດແລະສັງຄົມນິຍົມຢ່າງສະໝ່ຳສະເໝີ” ແລະ “ເຊີດຊູຈິດໃຈແຫ່ງຊົນຊັ້ນກຳມາຊີບສາກົນ” ໄດ້ຍາດແຍ້ງຄວາມເຫັນດີເຫັນພ້ອມ ແລະສະໜັບສະໜູນ ຂອງປະຊາຊົນຜູ້ຮັກຫອມສັນຕິພາບໃນທົ່ວໂລກ, ປະກອບສ່ວນຊ່ວຍໃຫ້ການປະຕິວັດຂອງປະເທດບັນລຸຜົນສຳເລັດໂດຍສົມບູນ”. ບັນດາຂະບວນການປະທ້ວງຕໍ່ຕ້ານສົງຄາມຮຸກຮານໃນຫວຽດນາມ ໄດ້ເກີດຂຶ້ນຢູ່ໃນສະຫະລັດອາເມລິກາ ແລະຫຼາຍປະເທດໃນເອີຣົບ ໃນຊຸມປີ 1960 ຕົ້ນຊຸມປີ 1970 ຂອງສະຕະວັດ XX ແມ່ນຫຼັກຖານທີ່ຊັດເຈນວ່າ ຫວຽດນາມໄດ້ຖ່າຍທອດຂໍ້ຄວາມອັນແຂງກ້າວ່າ “ບໍ່ມີສິ່ງໃດທີ່ມີຄ່າຫຼາຍກວ່າເອກະລາດແລະເສລີພາບ” ສູ່ບັນດາກອງກໍາລັງກ້າວໜ້າທີ່ຮັກສັນຕິພາບ ແລະຄວາມຍຸຕິທໍາໃນໂລກ ສະໜັບສະໜູນການຢຸດຕິສົງຄາມ.
ໃນພາລະກິດການພັດທະນາປະເທດ, ການສ້າງແລະໂຄສະນາເຜີຍແຜ່ພາບພົດຂອງຊາດຍັງຄົງໄດ້ຮັບການກຳນົດໂດຍພັກກອມມູນິດຫວຽດນາມ ແລະລັດຫວຽດນາມວ່າເປັນໜ້າທີ່ສຳຄັນໃນສະພາບການຂອງການເຊື່ອມໂຍງສາກົນຢ່າງກວ້າງຂວາງແລະເລິກເຊິ່ງຂອງປະເທດ. ກອງປະຊຸມໃຫຍ່ຄັ້ງທີ XIII ຂອງພັກ (ເດືອນມັງກອນ 2021) ປະເມີນວ່າ ວຽກງານຂໍ້ມູນຂ່າວສານຕ່າງປະເທດເພື່ອໂຄສະນາເຜີຍແຜ່ພາບພົດຂອງປະເທດ ປະຊາຊົນ ແລະວັດທະນະທຳຫວຽດນາມ ສູ່ສາຍຕາຊາວໂລກ ໄດ້ຮັບການຈັດຕັ້ງເປັນຢ່າງດີ(2), ອີງໃສ່ສາມເສົາຫຼັກຄື: ການຕ່າງປະເທດຂອງພັກ, ການທູດຂອງລັດ ແລະການຕ່າງປະເທດປະຊາຊົນ, ຜ່ານນັ້ນປູກຝັງພາບພົດຫວຽດນາມທີ່ສັນຕິພາບ ສະຖຽນລະພາບ ແລະເຕັມໄປດ້ວຍທ່າແຮງໃນການພັດທະນາ ແລະປະກອບສ່ວນກັບໂລກໃນການສ້າງສັນຕິພາບຮ່ວມກັນ.
ພິຈາລະນາໃນແງ່ຂອງ “ການສ້າງພາບພົດ”, ໂດຍຄືກັນກັບປະເທດອື່ນໆໃນໂລກ, ພາບພົດຂອງຊາດສ່ວນໃຫຍ່ແມ່ນໄດ້ຮັບການສ້າງຕັ້ງຂຶ້ນບົນພື້ນຖານວັດທະນະທໍາຂອງຊາດແລະຜົນສໍາເລັດໃນການພັດທະນາປະເທດ. ຕໍ່ໜ້າຄວາມຕ້ອງການພຶດຕິກຳນັ້ນ, ໃນທິດທາງການພັດທະນາປະເທດໃນໄລຍະປີ 2021-2030, ມະຕິກອງປະຊຸມໃຫຍ່ຄັ້ງທີ XIII ຂອງພັກເນັ້ນໜັກວ່າ “ສ້າງພື້ນຖານວັດທະນະທຳຫວຽດນາມທີ່ກ້າວໜ້າ ແລະອຸດົມໄປດ້ວຍເອກະລັກປະຈຳຊາດ ເພື່ອໃຫ້ວັດທະນະທຳແລະຄົນຫວຽດນາມ ກາຍເປັນກຳລັງແຮງພາຍໃນ ແລະເປັນແຮງຜັກດັນຢ່າງແທ້ຈິງ ເພື່ອການພັດທະນາປະເທດ ແລະປົກປັກຮັກສາປະເທດຊາດ”(3). ບົນພື້ນຖານນັ້ນ, ວັນທີ 30 ພະຈິກ 2021, ລັດຖະບານໄດ້ອອກຍຸດທະສາດການທູດທາງວັດທະນະທຳເຖິງປີ 2030 ໂດຍມີເປົ້າໝາຍໃນການກຳນົດຂໍ້ຄວາມລະດັບຊາດ ທີ່ສະແດງພາບພົດຂອງຫວຽດນາມ ໃນຖານະປະເທດທີ່ມີອາລະຍະທຳ ປອດໄພ ສວຍງາມ; ມີວັດທະນະທຳອັນເປັນເອກະລັກ ແລະອຸດົມດ້ວຍມູນເຊື້ອທີ່ດີງາມ; ການພັດທະນາຢ່າງຂະຫຍັນຂັນແຂງ; ຜູ້ຄົນທີ່ເປັນມິດແລະມີອັດທະຍາໄສໄມຕີ; ຈຸດໝາຍປາຍທາງທີ່ເຊື່ອຖືໄດ້ ສຳລັບການຢູ່ອາໄສ ສຶກສາ ທ່ອງທ່ຽວ ແລະການລົງທຶນ. ການເພີ່ມທະສີການໂຄສະນາເຜີຍແຜ່ພາບພົດຂອງປະເທດສູ່ຕ່າງປະເທດ ໄດ້ດຳເນີນໃນຫຼາຍຮູບແບບເພື່ອໃຫ້ເພື່ອນມິດສາກົນ, ໂດຍສະເພາະປະເທດທີ່ມີຂໍ້ມູນຫວຽດນາມໜ້ອຍ ສາມາດເຂົ້າໃຈຫວຽດນາມໄດ້ຢ່າງຊັດເຈນແລະຖືກຕ້ອງ, ເຊື່ອໝັ້ນຕໍ່ແນວທາງການປ່ຽນແປງໃໝ່ ແລະການເຊື່ອມໂຍງສາກົນຂອງຫວຽດນາມ, ປະເມີນຢ່າງຖືກຕ້ອງກ່ຽວກັບຂໍ້ດີ ທ່າແຮງ ແລະສ່ວນປະກອບຂອງຫວຽດນາມ ໃນຂະບວນການພັດທະນາຮ່ວມກັນຂອງພາກພື້ນແລະໂລກ.
ໃນເວລາທີ່ຜ່ານມາ, ຂໍ້ມູນກ່ຽວກັບຄວາມສຳເລັດໃນການປ່ຽນແປງໃໝ່ປະເທດ, ປະຫວັດສາດ, ມູນເຊື້ອຂອງຊາດ, ພາບພົດຂອງຫວຽດນາມທີ່ສັນຕິພາບ ການຮ່ວມມື ແລະການພັດທະນາ, ມີການພົວພັນຕ່າງປະເທດແບບເປີດໄດ້ເຂົ້າເຖິງຜູ້ຄົນຈຳນວນຫຼາຍ ແລະກຸ່ມສາທາລະນະລະດັບສາກົນຫຼາຍຂຶ້ນ, ດ້ວຍເນື້ອໃນແລະຮູບແບບການສະແດງອອກທີ່ຫຼາກຫຼາຍແລະໜ້າເຊື່ອຖື ເພື່ອໃຫ້ເພື່ອນຕ່າງຊາດແລະປະຊາຊົນທົ່ວໄປ “ຈາກການຮູ້ຈັກຫວຽດນາມ, ເຂົ້າໃຈຫວຽດນາມ ເຖິງການຮັກສາຫວຽດນາມ”. ລັດຖະບານຫວຽດນາມຍັງກຳນົດວ່າ ວຽກງານດ້ານຂໍ້ມູນ ການໂຄສະນາເຜີຍແຜ່ພາບພົດຂອງປະເທດແມ່ນ “ເພື່ອຖ່າຍທອດລັກສະນະສະເພາະຂອງທຳມະຊາດ ປະຫວັດສາດ ວັດທະນະທຳ ຜູ້ຄົນ ແລະຄວາມສຳເລັດຂອງຂະບວນການປ່ຽນແປງໃໝ່, ທ່າແຮງ ແລະປະສິດທິຜົນໃນການຮ່ວມມືສາກົນລະຫວ່າງຫວຽດນາມກັບບັນດາປະເທດຄຸ່ຮ່ວມມື”(4).
3- ວຽກງານການສ້າງແລະໂຄສະນາເຜີຍແຜ່ພາບພົດຂອງປະເທດຫວຽດນາມເຖິງເພື່ອນມິດສາກົນ ບັນລຸຜົນສຳເລັດທີ່ພົ້ນເດັ່ນ, ໂດຍສະເພາະຜົນສຳເລັດຕົ້ນຕໍ 5 ປະການດັ່ງຕໍ່ໄປນີ້:
ທີໜຶ່ງ, ໃນດ້ານການຕ່າງປະເທດຂອງພັກແລະລັດ ຜ່ານການເຄື່ອນໄຫວທັງໃນລະດັບທະວິພາຕີ ແລະພະຫຸພາຄີ ໂດຍສະເພາະການມີສ່ວນຮ່ວມຂອງການນຳສູງສຸດຂອງພັກຄືສະຫາຍເລຂາທິການໃຫຍ່ ແລະບັນດາສະຫາຍການນຳສຳຄັນ (ປະທານປະເທດ, ນາຍົກລັດຖະມົນຕີ, ປະທານລັດຖະສະພາ), ບັນດາສະຫາຍກຳມະການກົມການເມືອງ, ເລຂາທິການສູນກາງພັກ, ກຳມະການສູນກາງພັກ..., ຄວາມສຳເລັດຂອງການປ່ຽນແປງໃໝ່ໃນເດືອບ 40 ປີ, ແຜນນະໂຍບາຍ ນະໂຍບາຍທີ່ສຳຄັນຂອງພັກແລະລັດ, ສະຖານະການໃນທຸກດ້ານຂອງປະເທດ,... ໄດ້ຮັບການຖ່າຍທອດຢ່າງແຂງຂັນໄປໃຫ້ພັກການເມືອງ ປະເທດຄູ່ຮ່ວມ ແລະປະຊາຊົນທົ່ວໂລກ. ໃນເວລາທີ່ຜ່ານມາມໍ່ນີ້, ການຢ້ຽມຢາມຈີນຢ່າງເປັນທາງການຂອງສະຫາຍເລຂາທິການໃຫຍ່ ຫງວຽນຝູຈ້ອງ ໃນເດືອນ ພະຈິກ 2022 ຖືເປັນເຫດການສຳຄັນທີ່ສຸດສຳລັບສອງປະເທດ ເຊິ່ງໄດ້ຮັບຄວາມສົນໃຈທີ່ສຸດຈາກສາທາລະນະຊົນຈາກສາກົນ. ຜ່ານການຢ້ຽມຢາມຄັ້ງນີ້, ພາບພົດຂອງຫວຽດນາມດ້ວຍນະໂຍບາຍການຕ່າງປະເທດທີ່ເປັນເອກະລາດ ເປັນເຈົ້າຕົນເອງ ຫຼາຍຝ່າຍ ຄວາມຫຼາກຫຼາຍ ຄວາມເປັນເຈົ້າຕົນເອງ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ເປັນເພື່ອນ ເປັນຄູ່ຮ່ວມມືທີ່ເຊື່ອຖືໄດ້ ແລະສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ, ໄດ້ຮັບການຍົກຍ່ອງຢ່າງສູງ.
ທີສອງ, ຫວຽດນາມພະຍາຍາມເຊື່ອມໂຍງສາກົນ ເພື່ອເພີ່ມການສະແດງຕົນໃນເວທີພະຫຸພາຄີສາກົນ. ການທີ່ຫວຽດນາມໄດ້ຮັບເລືອກຕັ້ງເປັນສະມາຊິກຂອງສະພາສິດທິມະນຸດແຫ່ງສະຫະປະຊາຊາດສຳລັບວາລະປີ 2023-2025 ແລະການຮັບບົດບາດເປັນສະມາຊິກຂອງ 3 ກົນໄກສຳຄັນຂອງອົງການການສຶກສາ, ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ ໄປພ້ອມໆກັນ... ນີ້ແມ່ນໂອກາດສຳຄັນໜຶ່ງເພື່ອໃຫ້ຫວຽດນາມຢືນຢັນບົດບາດເປັນເຈົ້າການແລະຕັ້ງໜ້າຂອງຕົນ ໃນພາກພື້ນແລະໂລກ, ພ້ອມທັງເພີ່ມ “ຕົວລະບຸຮູບພາບປະເທດ” ໃນຂອບເຂດທົ່ວໂລກ. ບັນດາຜົນງານທີ່ຫວຽດນາມບັນລຸໄດ້ໃນຂົງເຂດຕ່າງໆ ໄດ້ເຮັດໃຫ້ຫາງສຽງສາກົນຕີລາຄາຫວຽດນາມຢ່າງຕັ້ງໜ້າ.
ທີ່ສາມ, ຄວາມຮັບຮູ້ຂອງບັນດາຂັ້ນ ຂະແໜງການ ທ້ອງຖິ່ນໄດ້ຮັບການຍົກສູງຂຶ້ນ ແມ່ນປັດໄຈສຳຄັນທີ່ປະກອບສ່ວນປັບປຸງປະສິດທິຜົນ ແລະຄວາມເປັນມືອາຊີບໃນການດຳເນີນກິດຈະກຳໂຄສະນາເຜີຍແຜ່ພາບພົດຂອງປະເທດ. ຜ່ານການເຄື່ອນໄຫວ ເອກະສານ ແລະສິ່ງພິມທີ່ສົ່ງເສີມພາບພົດຂອງປະເທດແລະຜູ້ຄົນຫວຽດນາມ ດ້ວຍຄຸນຄ່າທາງວັດທະນະທຳທີ່ເປັນເອກະລັກ ໄດ້ກາຍເປັນໃກ້ຊິດກັບປະຊາຊົນຂອງປະເທດເຈົ້າບ້ານຫຼາຍຂຶ້ນ. ຄວາມສົນໃຈໃນການຮຽນຮູ້ກ່ຽວກັບຫວຽດນາມຈາກປະເທດຕ່າງໆທົ່ວໂລກ ມີເພີ່ມຫຼາຍຂຶ້ນແລະເລິກເຊິ່ງກວ່າອີກ. ເນື້ອໃນຂໍ້ມູນແລະວິທີການຜັນຂະຫຍາຍກໍ່ຄ່ອຍໆກາຍເປັນມືອາຊີບແລະຫຼາກຫຼາຍ ໂດຍມີເປົ້າໝາຍເພື່ອ “ນຳຫວຽດນາມເຂົ້າໃກ້ໂລກຫຼາຍຂຶ້ນ” ແລະ “ນຳໂລກເຂົ້າໃກ້ຫວຽດນາມຫຼາຍຂຶ້ນ”.
ຄຽງຄູ່ກັນນັ້ນ, ຫວຽດນາມຍັງໄດ້ໃຊ້ປະໂຫຍດຈາກຈຸດແຂງຂອງພາຫະນະສື່ໃໝ່ເພື່ອແນໃສ່ເຮັດໃຫ້ກຸ່ມເປົ້າໝາຍມີຄວາມຫຼາກຫຼາຍ, ເພີ່ມການກະຈາຍຂໍ້ມູນຂ່າວສານ, ດຶງດູດການມີສ່ວນຮ່ວມໃນວຽກງານຂໍ້ມູນຂ່າວສານການຕ່າງປະເທດຂອງພາກສ່ວນ, ກອງກຳລັງ ແລະອົງການຈັດຕັ້ງໃນປະເທດແລະຕ່າງປະເທດ, ໂດຍສະເພາະມວນຊົນແລະຊຸມຊົນຊາວຫວຽດນາມໃນຕ່າງປະເທດ... ໃນກອງປະຊຸມໃຫຍ່ຄັ້ງທີ XIII ຂອງພັກ ມີການຈັດຕັ້ງ “ສູນຂ່າວອອນໄລ” ເພື່ອເຜີຍແຜ່ຂໍ້ມູນແລະຮູບພາບທັງໝົດກອງປະຊຸມໃຫຍ່ ສູ່ປະຊາຄົມສາກົນ, ດຶງດູດຄວາມສົນໃຈຂອງນັກຂ່າວຈາກທຸກທະວີບ. ໂຄງການ “ວັນຫວຽດນາມໃນສະວິດ ປີ 2021” ຄັ້ງທຳອິດທີ່ຈັດຂຶ້ນທາງອອນໄລ ແລະອອກອາກາດໃນແພຼດຟອມສັງຄົມ ສາມາດດຶງດູດຜູ້ຊົມ 32.000 ຄົນໃນຊ່ອງ Youtube ແລະ 56.000 ຄົນໃນຊ່ອງ TikTok ເຮັດໃຫ້ເກີດສຽງສະທ້ອນທີ່ດີໃນຊຸມຊົນເຈົ້າບ້ານ.
ພ້ອມກັນກັບຄວາມສຳເລັດໃນວຽກງານການໂຄສະນາເຜີຍແຜ່ພາບພົດຂອງປະເທດສູ່ປະຊາຄົມສາກົນ, ຫວຽດນາມກໍ່ໄດ້ແລະກຳລົງເຮັດໄດ້ດີ ໃນການຕໍ່ສູ້ດ້ວຍຄຳຂວັນວ່າ ເປັນເຈົ້າການ, “ຕັ້ງແຕ່ຕົ້ນ, ຈາກໄລຍະໄກ” ເພື່ອປັດປະຕິເສດຢ່າງທັນການ ຕໍ່ຖ້ອຍທຳນອງກ່າວຫາທີ່ບໍ່ຖືກຕ້ອງຂອງອິດທິກຳລັງສັດຕູ, ປະຕິກິລິຍາ ແລະພວກສວຍໂອກາດທາງການເມືອງ ທີ່ໃສ່ຮ້າຍປ້າຍສີພາບພົດຊອງປະເທດ ແລະປະຊາຊົນຫວຽດນາມ. ດ້ວຍການປະສານງານແລະການເຂົ້າຮ່ວມຂອງລະບົບການເມືອງທັງໝົດ, ອາດຈະເວົ້າໄດ້ວ່າ ຫວຽດນາມໄດ້ສົມທົບຢ່າງແໜ້ນແຟ້ນ ລະຫວ່າງການໂຄສະນາເຜີຍແຜ່ແນວທາງ, ແຜນນະໂຍບາຍ, ນະໂຍບາຍຂອງພັກແລະລັດ, ໝາກຜົນແຫ່ງການພັດທະນາ ແລະຄຸນຄ່າຮີດຄອງປະເພນີອັນດີງາມຂອງປະເທດ ກັບການເຜີຍແບທາດແທ້ ແຜນການແລະກົນອຸບາຍຂອງອິດທິກຳລັງສັດຕູແລະປະຕິກິລິຍາ ເພື່ອຕໍ່ສູ້ປັດປະຕິເສດຖ້ອຍທຳນອງບິດເບືອນ ກ່າວຫາທີ່ບໍ່ຖືກຕ້ອງ, ໂດຍສະເພາະແມ່ນ ບັນດາບັນຫາລະອຽດອ່ອນຄື: ເຂດຊາຍແດນ, ດິນແດນ, ອະທິປະໄຕໃນທະເລແລະໝູ່ເກາະ, ປະຊາທິປະໄຕ, ສິດທິມະນຸດ, ແລະການປົກປ້ອງພົນລະເມືອງ ເຊິ່ງເປັນບັນຫາທີ່ບັັນດາອິດທິກຳບັງສັດຕູແລະປະຕິກິລິຍາມັກຈະສວຍໃຊ້ເພື່ອປຸກປັ່ນ ກໍ່ຄວາມວຸ່ນວາຍ ຕ້ານຫວຽດນາມ. ພິເສດ, ໃນເວລາທີ່ຜ່ານມາ, ຫວຽດນາມໄດ້ໃຫ້ຄວາມຮ່ວມມືຢ່າງມີປະສິດທິຜົນ ໃນການແນະນຳປຶຶ້ມ “ບາງບັນຫາທິດສະດີແລະພຶດຕິກຳກ່ຽວກັບລັດທິສັງຄົມນິຍົມ ແລະເສັ້ນທາງສູ່ສັງຄົມນິຍົມຢູ່ຫວຽດນາມ” ຂອງເລຂາທິການໃຫຍ່ ຫງວຽນຝູຈ້ອງ ໃຫ້ແກ່ຜູ້ອ່ານໃນປະເທດແລະຕ່າງປະເທດ, ປະກອບສ່ວນເຜີຍແຜ່ທັດສະນະ ແຜນນະໂຍບາຍ ແລະແນວທາງຂອງພັກແລະລັດຫວຽດນາມ ກ່ຽວກັບລັດທິສັງຄົມນິຍົມ ແລະເສັ້ນທາງສູ່ສັງຄົມນິຍົມ; ຊ່ວຍໃຫ້ຜູ້ອ່ານ, ຊຸມຊົນຊາວຫວຽດນາມໃນຕ່າງປະເທດ ແລະເພື່ອນຕ່າງຊາດເຂົ້າໃຈແນວທາງຂອງພັກ, ເຂົ້າໃຈກ່ຽວກັບລະບອບສັງຄົມນິຍົມທີ່ຫວຽດນາມກຳລັງສ້າງ, ກ່ຽວກັບປະເທດ, ປະຊາຊົນ, ພາລະກິດການປ່ຽນແປງໃໝ່ແລະການພັດທະນາຂອງຫວຽດນາມໄດ້ດີຂຶ້ນ.
ຄຽງຂ້າງບັນດາໝາກຜົນທີ່ບັນລຸໄດ້, ວຽກງານການໂຄສະນາເຜີຍແຜ່ ແລະສົ່ງເສີມພາບພົດຂອງຫວຽດນາມ ສູ່ປະຊາຄົມໂລກກໍ່ປະເຊີນກັບຄວາມຫຍຸ້ງຍາກ ແລະ ຂໍ້ຈຳກັດຫຼາຍຢ່າງດັ່ງຕໍ່ໄປນີ້:
ທີໜຶ່ງ, ສະຖານະການໂລກແລະພາກພື້ນມີການປ່ຽນແປງຢ່າງໄວວາ ແລະຄາດເດົາບໍ່ໄດ້, ກໍ່ໃຫ້ເກີດຄວາມຫຍຸ້ງຍາກແລະສິ່ງທ້າທາຍຫຼາຍຢ່າງໃນການໂຄສະນາເຜີຍແຜ່ແລະສົ່ງເສີມພາບພົດຂອງປະເທດ; ການພັດທະນາຢ່າງແຂງແຮງຂອງການປະຕິວັດອຸດສາຫະກຳຄັ້ງທີສີ່ພາໃຫ້ເກີດການລະເບີດໃນສະພາບແວດລ້ອມດ້ານຂໍ້ມູນ ແລະເກີດການແຂ່ງຂັນດ້ານຂໍ້ມູນລະຫວ່າງປະເທດຕ່າງໆ. ໃນສະພາບການນັ້ນ, ວຽກງານການໂຄສະນາເຜີຍແຜ່ແລະສົ່ງເສີມພາບພົດຂອງປະເທດສູ່ເພື່ອນຕ່າງຊາດ ຈຳເປັນຕ້ອງສ້າງແຮງດຶງດູດ, ເອກະລັກ ແລະ ຄຸນລັກສະນະທີ່ໂດດເດັ່ນໃຫ້ຫຼາຍຂຶ້ນ.
ທີສອງ, ການນຳໃຊ້ຮູບແບບການເຄື່ອນໄຫວໂຄສະນາຕາມຄວາມມັກ ແລະ ຄວາມຕ້ອງການສາກົນຂອງຫວຽດນາມນັ້ນ ຍັງບໍ່ທັນຍືດຫຍຸ່ນແທ້ໆ. ບັນດາສິ່ງພິມໂຄສະນາເຜີຍແຜ່ກ່ຽວກັັບຫວຽດນາມ ເຖິງວ່າໄດ້ມີການປ່ຽນແປງຢ່າງຕັ້ງໜ້າຫຼາຍຢ່າງກໍ່ຕາມ, ແຕ່ກໍ່ຍັງບໍ່ທັນບັນລຸມາດຖານ “ໄວ, ຖືກເປົ້າ, ຖືກຕ້ອງ, ດີ”. ຫວຽດນາມກໍ່ບໍ່ໄດ້ໃຊ້ປະໂຫຍດຈາກສື່ໃໝ່ແລະສື່ທັນສະໄໝຢ່າງເຕັມທີ, ໂດຍສະເພາະເຄືອຂ່ານສັງຄົມ.
ທີສາມ, ການຈັດຕັ້ງການໂຄສະນາເຜີຍແຜ່ວັດທະນະທຳຫວຽດນາມຢູ່ຕ່າງປະເທດພຽງສຸມໃສ່ພື້ນທີ່ໃຫຍ່ບາງແຫ່ງເທົ່ານັ້ນ ໂດຍບໍ່ມີການເຊື່ອມໂຍງ ຫຼື ແຜ່ລາມໄປຍັງບັນດາທ້ອງຖິ່ນ ແລະພື້ນທີ່ໃກ້ຄຽງ ເພື່ອໃຊ້ປະໂຫຍດສູງສຸດຈາກກິດຈະກຳຂອງຫວຽດນາມຢູ່ຕ່າງປະເທດ.
ທີສີ່, ບັນດາກຳລັງຝ່າຍກົງຂ້າມແລະຝ່າຍຄ້ານພວມມີທ່າອ່ຽງ “ຈັບມື” ກັນເພື່ອຜົນປະໂຫຍດລວມ, ເຮັດໃຫ້ເກີດການຜັນຂະຫຍາຍ ແລະເພີ່ມທະວີການຮ່ວມມື ແລະການແຂ່ງຂັນລະຫວ່າງບັນດາກະແສແນວຄິດໃນໂລກ, ເຮັດໃຫ້ຊີວິດແຫ່ງແນວຄິດຂອງໂລກໂດຍທົ່ວໄປ ແລະແນວຄິດຂອງສັງຄົມຫວຽດນາມ ນັບມື້ນັບສັບສົນ. ບັນດາກຳລັງສັດຕູ ແລະປະຕິກິລິຍານັບມື້ນັບມີວິທີໃໝ່ ແລະກົນອຸບາຍໃໝ່ທີ່ຊັບຊ້ອນ ເລິກແລບແນບນຽນ ເພື່ອທຳລາຍພັກ, ລັດ ແລະ ລະບອບສັງຄົມນິຍົມ ທີ່ປະຊາຊົນຫວຽດນາມພວມສ້າງຂຶ້ນ. ພວກເຂົາໃຊ້ກົນອຸບາຍຫຼາຍຢ່າງທີ່ກ່ຽວຂ້ອງກັບຂົງເຂດຊົນເຜົ່າ, ສາສະໜາ, ປະຊາທິປະໄຕ ແລະສິດທິມະນຸດ ເພື່ອທຳລາຍພາລະກິດການປະຕິວັດ ແລະການປ່ຽນແປງໃໝ່ຂອງປະເທດເຮົາໂດຍກົງ.
4- ໃນເວລາຈະມາເຖິງ, ໂລກແລະພາກພື້ນຈະສືບຕໍ່ປະສົບກັບການປ່ຽນແປງຫຼາຍຢ່າງທີ່ໄວ ແລະ ບໍ່ອາດຄາດຄິດໄດ້, ໂດຍສະເພາະ ການປະຕິວັດອຸດສາຫະກຳຄັ້ງທີ 4 ຈະສ້າງຜົນກະທົບຢ່າງແຮງ, ຫຼາຍດ້ານ. ໃນສະພາບການດັ່ງກ່າວ, ບັນດາປະເທດບໍ່ວ່າໃຫຍ່ຫຼືນ້ອຍ ລ້ວນແຕ່ເພີ່ມທະວີການໂຄສະນາເຜີຍແຜ່ ແລະສົ່ງເສີມພາບພົດຂອງປະເທດ ເພື່ອສ້າງຄວາມໄວ້ເນື້ອເຊື່ອໃຈ, ຮັດແໜ້ນອິດທິພົນ ແລະເພີ່ມທະວີ “ພະລັງອ່ອນ” ຂອງຊາດຕົນເອງ. ສືບຕໍ່ເສີມຂະຫຍາຍບັນດາຜົນງານທີ່ບັນລຸໄດ້, ເພື່ອເຜີຍແຜ່ພາບພົດທີ່ສວຍງາມຂອງປະເທດຊາດ ແລະປະຊາຊົນຫວຽດນາມໄປທົ່ວໂລກ, ຫວຽດນາມຈຳເປັນຕ້ອງຍູ້ແຮງບັນດາມາດຕະການແກ້ໄຂສະເພາະຄື:
ທີໜຶ່ງ, ຊາບຊຶມແລະຜັນຂະຫຍາຍແຜນນະໂຍບາຍ ນະໂຍບາຍຂອງພັກແລະລັດຢ່າງຖື່ຖ້ວນ, ໂດຍສະເພາະການຫັນເປັນຮູບປະທຳ ບັນດາໜ້າທີ່ທີ່ກຳນົດໂດຍກອງປະຊຸມໃຫຍ່ຄັ້ງທີ XIII ຂອງພັກ ເພື່ອ “ໂຄສະນາເຜີຍແຜ່ພາບພົດຂອງຊາດຢ່າງແຂງແຮງ ແລະເພີ່ມທະວີກຳລັງແຮງສັງລວມຂອງປະເທດ”(5). “ສືບຕໍ່ຊາບຊຶມ, ຫັນເປັນຮູບປະທຳ ແລະຈັດຕັ້ງປະຕິບັດແຜນນະໂຍບາຍຂອງພັກ ກ່ຽວກັບວຽກງານຂໍ້ມູນຂ່າວສານການຕ່າງປະເທດ ຢ່າງມີປະສິດທິຜົນ. ປັບປຸງຍົກສູງຄວາມຮັບຮູ້ ແລະຄວາມຮັບຜິດຊອບຂອງຄະນະພັກ, ການຈັດຕັ້ງພັກ, ອຳນາດການປົກຄອງທຸກຂັ້ນ, ຜູ້ນຳ ພະນັກງານ ສະມາຊິກພັກ ແລະປະຊາຊົນ, ໂດຍສະເພາະອົງການ, ການຈັດຕັ້ງທີ່ໄດ້ຮັບມອບໝາຍໃຫ້ເຮັດວຽກງານດ້ານຂໍ້ມູນຂ່າວສານການຕ່າງປະເທດ; ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ, ສອດຄ່ອງກັບການພົວພັນລະຫວ່າງຫວຽດນາມກັບບັນດາປະເທດ, ກົດບັດສະຫະປະຊາຊາດ ແລະກົດໝາຍສາກົນ”(6).
ທີສອງ, ສ້າງຍຸດທະສາດຮອບດ້ານເພື່ອໂຄສະນາເຜີຍແຜ່ພາບພົດຂອງປະເທດ, ລະດົມການຮ່ວມມືທັງລະບົບການເມືອງ ທັງໃນປະເທດແລະຕ່າງປະເທດ. ປະຈຸບັນໃນໂລກນີ້, ຫຼາຍປະເທດໄດ້ສ້າງຍຸດທະສາດການສື່ສານ ແລະໂຄສະນາເຜີຍແຜ່ພາບພົດ ຍີ່ຫໍ້ແຫ່ງຊາດແຕ່ຕົ້ນ, ຜັນຂະຫຍາຍໃນວົງກວ້າງ ແລະປະສົບຄວາມສຳເລັດ; ກົນໄກແລະນະໂຍບາຍໄດ້ຮັບການປັບປຸງ ເພີ່ມເຕີມຢ່າງສະໝ່ຳສະເໝີ ໃຫ້ສອດຄ່ອງກັບຄວາມເປັນຈິງແຫ່ງການພັດທະນາຂອງປະເທດ. ສ້າງຍຸດທະສາດໂດຍລວມ, ເຊື່ອມໂຍງການເຄື່ອນໄຫວການທູດວັດທະນະທຳ ເຂົ້າໃນການຜັນຂະຫຍາຍຍຸດທະສາດພັດທະນາເສດຖະກິດ-ສັງຄົມ ແລະ ຍຸດທະສາດພັດທະນາວັດທະນະທຳ,... ເພື່ອສ້າງຄວາມປະສົມປະສານໃນເປົ້າໝາຍພັດທະນາເສດຖະກິດ-ສັງຄົມຂອງທ້ອງຖິ່ນແລະທັງປະເທດ ຈະເປັນພື້ນຖານເພື່ອຜັນຂະຫຍາຍຢ່າງເປັນລະບຽບວິທີ ແລະມີປະສິດທິຜົນ ໃນການໂຄສະນາເຜີຍແຜ່ພາບພົດຫວຽດນາມໄປທົ່ວໂລກ.
ທີສາມ, ສືບຕໍ່ໂຄສະນາເຜີຍແຜ່ຄຸນຄ່າວັດທະນະທຳ, ພາບພົດຂອງປະເທດ ແລະປະຊາຊົນຫວຽດນາມ, ໃນນັ້ນໃຫ້ຄວາມສຳຄັນກັບການເຜີຍແຜ່ຄຸນຄ່າແລະແນວຄິດທີ່ສູງສົ່ງຂອງຊາດຫວຽດນາມ, ຮູບພາບແລະຄຸນຄ່າແນວຄິດຂອງປະທານໂຮ່ຈີມິນ ແລະບຸກຄົນມີຊື່ສຽງທີ່ໄດ້ຮັບກຽດຈາກຢູເນສະໂກ. ເຊື່ອມໂຍງການເຄື່ອນໄຫວສົ່ງເສີມວັດທະນະທຳ ກັບໂຄງການສົ່ງເສີມການຄ້າ, ສ້າງເຄື່ອງໝາຍຂອງຊາດແລະທ້ອງຖິ່ນ... ເພື່ອໃຫ້ວັດທະນະທຳກາຍເປັນກຳລັງແຮງພາຍໃນຢ່າງແທ້ຈິງ, ດຶງດູດຊັບພະຍາກອນພາຍນອກ, ໂດຍສະເພາະ ຄວາມຮູ້ ເຕັກໂນໂລຊີ ແລະການລົງທຶນ ເພື່ອພັດທະນາເສດຖະກິດ-ສັງຄົມ. ນອກຈາກນີ້, ຍັງຈຳເປັນຕ້ອງເພີ່ມທະວີການສົມທົບລະຫວ່າງ “ພະລັງອ່ອນ” ຂອງວັດທະນະທຳ ເຂົ້າກັບຍຸດທະສາດການສື່ສານເພື່ອເພີ່ມກຳລັງແຮງສັງລວມຂອງຊາດ.
ທີສີ່, ລະບຸເຄື່ອງມືແລະວິທີການຖ່າຍທອດແລະເຂົ້າເຖິງບຸກຄົນພາຍນອກ ເຊັ່ນ ສື່ໜັງສືພິມ ວັດທະນະທຳ ການສຶກສາ ການທ່ອງທ່ຽວ ກິລາ,...
ທີຫ້າ, ຊຸກຍູ້ການໃຊ້ເຄື່ອງມືສື່ສານໃໝ່, ການສື່ສານທັນສະໄໝ ໃນການໂຄສະນາເຜີຍແຜ່ພາບພົດຂອງປະເທດສູ່ສາທາລະນະ ແລະປະຊາຄົມສາກົນ ໃນສະພາບການທີ່ເຕັກໂນໂລຊີດິຈິຕອນ ເຕັກນິກດິຈິຕອນກຳລັງພັດທະນາຢ່າງແຂງແຮງ; ເອົາໃຈໃສ່ນໍາໃຊ້ເຕັກໂນໂລຢີ “ການຮັບຟັງສັງຄົມ” ເພື່ອເກັບກໍາຂໍ້ມູນ ແລະສ້າງເນື້ອໃນໂຄສະນາເຜີຍແຜ່ພາບພົດທີ່ເໝາະສົມ; ສ້າງຂໍ້ຄວາມນະໂຍບາຍທີ່ສັ້ນແລະລວບລັດ, “ເລື່ອງສື່ມວນຊົນ” ກ່ຽວກັບປະເທດແລະປະຊາຊົນຫວຽດນາມ, “ສ້າງກະແສ”, “ຈັບກະແສ” ໃນເຄືອຂ່າຍສັງຄົມ; ປັບປຸງຄລິບ ຮູບພາບ ແລະຕາຕະລາງໃນຮູບແບບດິຈິຕອນທີ່ສົດໃສແລະເຂົ້າໃຈງ່າຍ.
ທີຫົກ, ເພີ່ມການລົງທຶນໃນຊັບພະຍາກອນທີ່ເໝາະສົມ ເພື່ອການໂຄສະນາເຜີຍແຜ່ແລະສົ່ງເສີມພາບພົດຂອງປະເທດ. ໃນດ້ານຊັບພະຍາກອນບຸກຄົນ, ເອົາໃຈໃສ່ການຝຶກອົບຮົມ, “ການສ້າງຖັນແຖວພະນັກງານສະເພາະທາງທີ່ເຮັດວຽກງານຂໍ້ມູນຂ່າວສານການຕ່າງປະເທດທີ່ມີເຈດຈຳນົງທາງການເມືອງທີ່ເຂັ້ມແຂງ, ມີຄຸນນະພາບ ຄວາມສາມາດ ແລະຄຸນສົມບັດພຽງພໍ ຕາມທິດທາງທີ່ເປັນມືອາຊີບແລະທັນສະໄໝ.
ປັບປຸງຍົກສູງຄຸນນະພາບຂອງການຝຶກອົບຮົມ ແລະບຳລຸງສ້າງດ້ານຂໍ້ມູນຂ່າວສານການຕ່າງປະເທດໃນສະຖານທີ່ຝຶກອົບຮົມ. ຂະຫຍາຍການຮ່ວມມືສາກົນດ້ານການຝຶກອົບຮົມ ແລະບຳລຸງສ້າງພະນັກງານໃນຂົງເຂດທີ່ກ່ຽວຂ້ອງກັບຂໍ້ມູນຂ່າວສານການຕ່າງປະເທດ”(7). ທາງດ້ານພື້ນຖານວັດຖຸ, ເອົາໃຈໃສ່ການລົງທຶນແລະປັບປຸງພື້ນຖານວັດຖຸເຕັກນິກໃຫ້ທັນສະໄໝ ເພື່ອຮັບໃຊ້ການເຄື່ອນໄຫວໂຄສະນາເຜີຍແຜ່ພາບພົດຂອງປະເທດ, ໂດຍສະເພາະ ຮັບໃຊ້ວຽກງານປ່ຽນແປງດິຈິຕອນ, ການໃຊ້ເຄືອຂ່າຍສັງຄົມ...
ທີເຈັດ, ຍົກສູງຄວາມສາມາດໃນການວິເຄາະແລະຄາດຄະເນ, ໂດຍສະເພາະແນວໂນ້ມແລະທ່າອ່ຽງການພັດທະນາຂອງການພົວພັນສາກົນ, ເປັນເຈົ້າການໃນການວາງແຜນການສື່ສານ ເພື່ອຕອບສະໜອງຄວາມຕ້ອງການແລະທ່າອ່ຽງຂໍ້ມູນຂ່າວສານ, ເພີ່ມທະວີການຊັກຊວນໃນວຽກງານຖະແຫຼງຂ່າວ ແລະໂຄສະນາເຜີຍແຜ່, ກໍ່ຄືໃນການປົກປັກຮັກສາພື້ນຖານແນວຄິດຂອງພັກ. ໂດຍສະເພາະແມ່ນ “ຍູ້ແຮງການຕໍ່ສູ້ຕ້ານຂໍ້ມູນຂ່າວສານທີ່ບໍ່ຈິງ ແລະທາງລົບ ທີ່ເປັນອັນຕະລາຍຕໍ່ຜົນປະໂຫຍດຂອງຊາດ-ປະເທດຊາດ, ຂະບວນການພັດທະນາຂອງປະເທດ ແລະ ບົດບາດນຳພາຂອງພັກ. ເດັດດ່ຽວແກ້ໄຂສະພາບການສະໜອງຂໍ້ມູນຂ່າວສານທີ່ບໍ່ຊັດເຈນ, ບໍ່ຖືກຕ້ອງ ແລະບໍ່ໄດ້ຮັບການຢືນຢັນ, ຂໍ້ມູນຂ່າວສານທີ່ບໍ່ສອດຄ່ອງກັບຮີດຄອງປະເພນີ ແລະ ວັດທະນະທຳຫວຽດນາມ. ເປັນເຈົ້າການໃນການສະໜອງຂໍ້ມູນຢ່າງທັນການ ແລະຊີ້ແຈງຂໍ້ມູນທີ່ບໍ່ຖືກຕ້ອງ, ບໍ່ສົມບູນ ຫຼືບໍ່ເປັນຈິງ; ຕໍ່ສູ້ປະຕິເສດຂໍ້ມູນຂ່າວສານ ແລະຂໍ້ກ່າວຫາທີ່ບໍ່ຈິງ, ບິດເບືອນ, ຍຸຍົງ ແລະຂັດກັບແນວທາງແລະທັດສະນະຂອງພັກ”(8). ຮັບປະກັນຄວາມເປັນເຈົ້າການໃນການສື່ສານ ແລະຕອບສະໜອງຕໍ່ສະຖານະການ ກໍລະນີແລະເລື່ອງຕ່າງໆ ຢ່າງມີປະສິດທິພາບ, ໂດຍສະເພາະ ກໍລະນີແລະເລື່ອງທີ່ລະອຽດອ່ອນແລະບໍ່ຄາດຄິດທີ່ເກີດຂຶ້ນ. “ສ້າງກົນໄກຖະແຫຼງຂ່າວທີ່ເໝາະສົມ, ມີປະສິດທິພາບ ແລະທັນເວລາ ເພື່ອສະໜອງຂໍ້ມູນທີ່ຈໍາເປັນ, ໂດຍສະເພາະແມ່ນຂໍ້ມູນສໍາລັບບັນຫາທີ່ລະອຽດອ່ອນແລະສັບສົນ”(9)./.
-----------------------
(1) Philip Kotler - David Gertner: Country as brand, product and beyond: A place marketing and brand management perspective (ແປໂດຍຫຍໍ້: ປະເທດໃນແບບຍີ່ຫໍ້, ຜະລິດຕະພັນ ແລະອື່ນໆ: ທັດສະນະດ້ານການຕະຫຼາດ ແລະການຄຸ້ມຄອງຍີ່ຫໍ້), Routledge, 2004, ໜ້າ 17
(2) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 2, ໜ້າ 49
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 115-116
(4) ຂໍ້ຕັດສິນຕົກລົງເລກທີ 2434/QĐ-TTg ລົງວັນທີ 13 ທັນວາ 2016 ຂອງນາຍົກລັດຖະມົນຕີ, ອະນຸມັດການວາງແຜນລະບົບສື່ການຕ່າງປະເທດຮອດປີ 2020, ມີວິໄສທັດຮອດປີ 2030.
(5) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 155
(6) ບົດສະຫຼຸບເລກທີ 57-KL/TW ລົງວັນທີ 15 ມິຖຸນາ 2023 ຂອງກົມການເມືອງສູນກາງພັກ “ວ່າດ້ວຍການສືບຕໍ່ຍົກສູງຄຸນນະພາບ ແລະປະສິດທິຜົນ ຂອງວຽກງານຂໍ້ມູນຂ່າວສານການຕ່າງປະເທດໃນສະພາບການໃໝ່”
(7), (8), (9) ບົດສະຫຼຸບເລກທີ 57-KL/TW ລົງວັນທີ 15 ມິຖຸນາ 2023 ຂອງກົມການເມືອງສູນກາງພັກ, ເອກະສານທີ່ໄດ້ແນະນຳ
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1020 (ເດືອນສິງຫາ 2023)
