ເສີມຂະຫຍາຍຄວາມໄດ້ປຽບຂອງກິດຈະກຳການຕ່າງປະເທດ
ຂອງສະພາແຫ່ງຊາດ, ປະກອບສ່ວນຍົກສູງປະສິດທິພາບ
ການຕ່າງປະເທດຂອງພັກ ແລະ ການທູດຂອງລັດ ໃນສະພາບການໃໝ່
ຂອງສະພາແຫ່ງຊາດ, ປະກອບສ່ວນຍົກສູງປະສິດທິພາບ
ການຕ່າງປະເທດຂອງພັກ ແລະ ການທູດຂອງລັດ ໃນສະພາບການໃໝ່
ການຕ່າງປະເທດຂອງສະພາແຫ່ງຊາດ -
ຈຸດສະຫວ່າງໃນການພົວພັນທາງການທູດຫວຽດນາມ
ການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດໃນເວລາທີ່ຜ່ານມາ ໄດ້ຮັບການຜັນຂະຫຍາຍຢ່າງເປັນເຈົ້າການ, ຕັ້ງໜ້າ ແລະ ຮອບດ້ານ ທັງຊ່ອງທາງສອງຝ່າຍ ແລະ ຫຼາຍຝ່າຍ; ປະກອບສ່ວນສຳຄັນ ເຂົ້າໃນຜົນສຳເລັດດ້ານນະໂຍບາຍການຕ່າງປະເທດໂດຍລວມຂອງປະເທດ; ນຳການພົວພັນຮ່ວມມືລະຫວ່າງຫວຽດນາມ ແລະ ບັນດາປະເທດທີ່ພັດທະນາແລ້ວ ໄປສູ່ລວງເລິກ, ຮອບດ້ານ ແລະ ມີເນື້ອໃນ; ໄດ້ຮັບການຖືວ່າເປັນ “ຈຸດສະຫວ່າງໃນການພົວພັນສອງຝ່າຍ” ໃນການພົວພັນຮ່ວມມືໂດຍລວມກັບຫຼາຍປະເທດ.
ສະພາແຫ່ງຊາດດ້ວຍພາລະໜ້າທີ່ນິຕິບັນຍັດ ແລະ ຕິດຕາມກວດກາສູງສຸດ ຕໍ່ການເຄື່ອນໄຫວຂອງລັດ ແລະ ການຕັດສິນຕົກລົງບັນຫາສຳຄັນຂອງປະເທດ ໄດ້ຢືນຢັນບົດບາດທີ່ຕັ້ງໜ້າ ແລະ ນຳໜ້າໃນການກຳນົດກົດໝາຍ ແລະ ຫັນສັນຍາສາກົນເປັນນິຕິກຳ ໃນລະບົບກົດໝາຍຂອງປະເທດ; ສ້າງແລະປັບປຸງແລວທາງດ້ານກົດໝາຍທີ່ເອື້ອອຳນວຍ ເພື່ອຊຸກຍູ້ການຮ່ວມມືດ້ານເສດຖະກິດ, ການຄ້າ ແລະ ການລົງທຶນກັບບັນດາຄູ່ຮ່ວມມືທີ່ສຳຄັນ.
ການເຄື່ອນໄຫວແລກປ່ຽນຄະນະຜູ້ແທນສອງຜ່າຍ ລະຫວ່າງສະພາແຫ່ງຊາດຫວຽດນາມ ກັບສະພາແຫ່ງຊາດຂອງປະເທດອື່ນໆ ໃນປີ 2022 ໄດ້ຮັບການຜັນຂະຫຍາຍຢ່າງຊ່ອງລ່ອງ, ສະໝ່ຳສະເໝີ ແລະ ບັນລຸໝາກຜົນທີ່ດີແລະແທດຈິງຫຼາຍປະການ. ການເຄື່ອນໄຫວສົນທະນາແລະແລກປ່ຽນທາງອອນໄລນ໌ຈຳນວນໜຶ່ງ ໄດ້ຮັບການປະຕິບັດນັບແຕ່ຕົ້ນປີ ໃນສະພາບການແຜ່ລະບາດຂອງພະຍາດໂຄວິດ-19 ແລະ ກິດຈະກຳການຕ່າງປະເທດໂດຍກົງ ໄດ້ດຳເນີນໄປຢ່າງຟົດຟື້ນໃນທຸກຂັ້ນ, ໂດຍສະເພາະແມ່ນການຢ້ຽມຢາມຫຼາຍປະເທດຢ່າງເປັນທາງການ ຂອງທ່ານປະທານສະພາແຫ່ງຊາດ ແລະ ຮອງປະທານສະພາແຫ່ງຊາດ ເຊັ່ນການຢ້ຽມຢາມຢ່າງເປັນທາງການ ຂອງທ່ານປະທານສະພາແຫ່ງຊາດຫວຽດນາມ ເວືອງ ດິ່ງ ເຫວ້ ທີ່ປະເທດລາວ, ຮົງກາຣີ, ອັງກິດ, ກຳປູເຈຍ, ຟີລິບປິນ, ການເຂົ້າຮ່ວມກອງປະຊຸມສະພາລະຫວ່າງລັດຖະສະພາຂອງສະມາຄົມປະຊາຊາດແຫ່ງອາຊີຕາເວັນອອກສ່ຽງໃຕ້ ຄັ້ງທີ 43 (AIPA-43) ຢູ່ກຳປູເຈຍ; ການຕ້ອນຮັບຄະນະຜູ້ແທນລັດຖະສະພາ/ສະພາແຫ່ງຊາດ ອິນເດຍ, ສິງກະໂປ, ໂມຊຳບິກ, ກຳປູເຈຍ, ຝຣັ່ງ... ທີ່ມາຢ້ຽມຢາມຫວຽດນາມຢ່າງເປັນທາງການ. ການເຄື່ອນໄຫວແລະກິດຈະກຳເຫຼົ່ານີ້ ປະກອບສ່ວນຊຸກຍູ້ການພົວພັນສາມັກຄີແບບພິເສດ, ມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານແລະພ້ອມກັນ ຢ່າງເລິກເຊິ່ງ, ແທດຈິງ ກັບບັນດາປະເທດໃນພາກພື້ນ, ເພື່ອນມິດຕະພາຍແບບດັ້ງເດີມ ແລະ ຄູ່ຮ່ວມມືຍຸດທະສາດ. ໂດຍສະເພາະ, ໃນບັນດາການຢ້ຽມຢາມຢ່າງເປັນທາງການສອງຝ່າຍ ຂອງປະທານສະພາແຫ່ງຊາດ, ບັນດາເວທີການຮ່ວມມືດ້ານເສດຖະກິດ, ເວທີການຮ່ວມມືດ້ານການສຶກສາ ທີ່ໄດ້ຈັດຂຶ້ນໂດຍມີຂໍ້ຕົກລົງການຮ່ວມມືຫຼາຍສະບັບທີ່ໄດ້ລົງນາມ, ເປີດໂອກາດຊຸກຍູ້ການພົວພັນດ້ານການຄ້າ-ການລົງທຶນ ແລະ ການຝຶກອົບຮົມບຸກຄະລາກອນ ເພື່ອຮັບໃຊ້ການປະຕິບັດຍຸດທະສາດການພັດທະນາເສດຖະກິດ-ສັງຄົມ ທີ່ໄດ້ລະບຸໃນເອກະສານກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ ກໍ່ຄືໃນການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດທີ-19.
ນັບແຕ່ຕົ້ນວາລະສະພາແຫ່ງຊາດຊຸດທີ XV ເປັນຕົ້ນມາ, ຂົງເຂດການຕ່າງປະເທດຫຼາຍຝ່າຍຂອງສະພາແຫ່ງຊາດມີເຫດການສຳຄັນຫຼາຍຢ່າງ. ຕາມນັ້ນ, ຈຸດສຸມຂອງການເຄື່ອນໄຫວການຕ່າງປະເທດຫຼາຍຝ່າຍປີ 2022 ແມ່ນການເຂົ້າຮ່ວມຢ່າງມີປະສິດທິພາບ ຂອງສະພາແຫ່ງຊາດຫວຽດນາມ ໃນບັນດາອົງການລັດຖະສະພາລະດັບພາກພື້ນ ແລະລະດັບສາກົນ ເຊັ່ນ ສະພາລະຫວ່າງລັດຖະສະພາຂອງສະມາຄົມປະຊາຊາດແຫ່ງອາຊີຕາເວັນອອກສ່ຽງໃຕ້ (AIPA), ສະຫະພັນລັດຖະສະພາໂລກ (IPU), ເວທີປາໄສລັດຖະສະພາອາຊີ-ປາຊີຟິກ (APPF), ເວທີປາໄສປະຊາຊົນອາຊຽນ (APF) ແລະອື່ນໆ. ໃນກອງປະຊຸມ AIPA-43, ສະພາແຫ່ງຊາດຫວຽດນາມໄດ້ຢືນຢັນການປະກອບສ່ວນ ຜ່ານບົດປາໄສຂອງປະທານສະພາແຫ່ງຊາດ ເວືອງ ດິ່ງ ເຫວ້ ດ້ວຍຂໍ້ສະເໜີ 5 ປະການ, ປະກອບດ້ວຍການປັບປຸງບົດບາດ ຂອງສະມາຄົມປະຊາຊາດແຫ່ງອາຊີຕາເວັນອອກສ່ຽງໃຕ້ (ASEAN); ເສີມຂະຫຍາຍບົດບາດກວດກາຂອງສະພາແຫ່ງຊາດສະມາຊິກ ໃນການປະຕິບັດແຜນການໂດຍລວມຂອງອາຊຽນ; ການປ່ຽນແປງໃໝ່ໂຄງສ້າງການຈັດຕັ້ງ ແລະ ການເຄື່ອນໄຫວຂອງ AIPA; ຊຸກຍູ້ຄວາມສະເໝີພາບທາງເພດ ແລະການເຂົ້າຮ່ວມຂອງແມ່ຍິງ ແລະຊາວໜຸ່ມ ໃນຂະບວນການວາງແຜນປະຕິບັດນະໂຍບາຍ; ເພີ່ມທະວີການເຂົ້າຮ່ວມຂອງບັນດາສະມາຊິກໜຸ່ມຂອງລັດຖະສະພາ AIPA, ໄດ້ຮັບການສະໜັບສະໜູນ ແລະ ຕີລາຄາສູງ ຈາກລັດຖະສະພາຂອງປະເທດສະມາຊິກ. ຫວຽດນາມຍັງຮ່ວມສະໜັບສະໜູນປະເທດເຈົ້າພາບມະຕິ 4 ສະບັບ ກ່ຽວກັບບັນຫາຄວາມໝັ້ນຄົງທາງການເມືອງ, ເສດຖະກິດ, ວັດທະນະທກ-ສັງຄົມ, ຄວາມສະເໝີພາບທາງເພດ. ສິ່ງນີ້ສະແດງໃຫ້ເຫັນເຖິງຄວາມຮັບຜິດຊອບຂອງຫວຽດນາມ ຕໍ່ຄວາມພະຍາຍາມຮ່ວມກັນຂອງ AIPA ໃນການຮ່ວມກັນແກ້ໄຂຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ແລະປະຕິບັດເປົ້າໝາຍການກໍ່ສ້າງປະຊາຄົດມອາຊຽນ ໃຫ້ເຕີບໃຫຍ່ເຂັ້ມແຂງ. ພ້ອມກັນນັ້ນ, ສະພາແຫ່ງຊາດຫວຽດນາມ ໄດ້ເຂົ້າຮ່ວມຢ່າງເຕັມທີ່ ໃນການເຄື່ອນໄຫວອື່ນໆພາຍໃຕ້ກອບຂອງ AIPA, ຢືນຢັນບົດບາດ ແລະຄວາມຮັບຜິດຊອບຂອງຕົນ ໃນກົນໄກການຮ່ວມມືດ້ານລັດຖະສະພາທີ່ສຳຄັນນີ້. ໃນການປະຊຸມສະມັດຊາໃຫຍ່ຂອງ IPU, APPF, APF, ຫວຽດນາມໄດ້ເຂົ້າຮ່ວມຢ່າງແຂງຂັນ ແລະມີສ່ວນປະກອບທີ່ສຳຄັນ, ໄດ້ຮັບການຕີລາຄາສູງຈາກເພື່ອນສາກົນ. ພິເສດ, ໃນ APPF, ຜູ້ແທນຂອງສະພາແຫ່ງຊາດຫວຽດນາມໄດ້ຮັບເລືອກ ແລະ ມີຄວາມໂດດເດັ່ນໃນບົດບາດສະມາຊິກຂອງຄະນະກຳມະການບໍລິຫານ APPF; ໃນ APF, ສະພາແຫ່ງຊາດຫວຽດນາມດຳລົງຕຳແໜ່ງສະມາຊິກຂອງຄະນະກຳມະການບໍລິຫານ ເຊິ່ງຮັບຜິດຊອບພາກພື້ນອາຊີ-ປາຊີຟິກ.
ໃນເວລາດຽວກັນ, ການປະກອບສ່ວນໂດຍລວມ ຕໍ່ຄວາມສຳເລັດຂອງການທູດລັດຖະສະພາໃນປີ 2022 ຍັງລວມເຖິງການເຄື່ອນໄຫວທີ່ເປັນເຈົ້າການ ແລະຕັ້ງໜ້າທີ່ສຸດ ດ້ວຍຮູບແບບທີ່ຫຼາກຫຼາຍ ແລະອຸດົມສົມບູນ ຂອງກຸ່ມມິດຕະພາບລັດຖະສະພາຫວຽດນາມກັບບັນດາປະເທດເຊັ່ນ ຫວຽດນາມ-ຍີ່ປຸ່ນ, ຫວຽດນາມ-ກຳປູເຈຍ, ຫວຽດນາມ-ເກົາຫຼີ... ມີການປະກອບສ່ວນທີ່ຕັ້ງໜ້າ ໃນການພົວພັນລະຫວ່າງຫວຽດນາມ ແລະບັນດາປະເທດໃນໂລກ. ນອກຈາກນີ້, ກຸ່ມຜູ້ແທນສະພາແຫ່ງຊາດຍິງ, ກຸ່ມຜູ້ແທນສະພາແຫ່ງຊາດໝຸ່ມ ແມ່ນບັນດາກົນໄກການເຄື່ອນໄຫວທີ່ສ້າງສັນ ແລະມີປະສິດທິພາບທີ່ສຸດ.
ດ້ວຍການເຄື່ອນໄຫວການຕ່າງປະເທດທີ່ອຸດົມສົມບູນ ທີ່ຜັນຂະຫຍາຍກັບຄູ່ຮ່ວມມືແລະພັນທະມິດທີ່ຫຼາກຫຼາຍ, ບໍ່ພຽງແຕ່ໃນຊ່ອງທາງການທູດລັດຖະສະພາເທົ່ານັ້ນ, ແຕ່ຍັງລວມເຖິງຊ່ອງທາງຂອງພັກ, ລັດຖະບານ ແລະປະຊາຊົນອີກນຳ, ສາມາດເວົ້າໄດ້ວ່າ, ການທູດລັດຖະສະພາໄດ້ແລະກຳລັງປະກອບສ່ວນ ໃນການສ້າງສະພາບແວດລ້ອມທີສັນຕິພາບ, ສະຖຽນລະພາບໃນພາກພື້ນ, ເປີດການຮ່ວມມືສາກົນທີ່ກ້ວາງຂວາງ ລະຫວ່າງຫວຽດນາມກັບບັນດາປະເທດ, ບັນດາຄູ່ຮ່ວມມືສອງຝ່າຍ ແລະຫຼາຍຝ່າຍ ໃນສະພາບການໃໝ່; ປະກອບສ່ວນຍົກສູງຖານະບົດບາດຂອງສະພາແຫ່ງຊາດຫວຽດນາມ ໃນເວທີລັດຖະສະພາລະຫວ່າງປະເທດ ແລະພາກພື້ນ.
ເສີມຂະຫຍາຍຂໍ້ໄດ້ປຽບໃນການເຄື່ອນໄຫວພົວພັນຕ່າງປະເທດ
ຂອງສະພາແຫ່ງຊາດ ໃນສະພາບການໃໝ່
ປະຈຸບັນ, ສະພາບການໂລກ ແລະ ພາກພື້ນພວມຜັນແປໄປຢ່າງວ່ອງໄວ ແລະ ສັບສົນ ດ້ວຍຫຼາຍປັດໄຈທີ່ບໍ່ອາດຄາດຄິດ, ສົ່ງຜົນກະທົບຫຼາຍດ້ານ ຕໍ່ສະພາບແວດລ້ອມຄວາມໝັ້ນຄົງ, ການພັດທະນາ ແລະການປ່ຽນແປງໃໝ່ຂອງປະເທດທີ່ພວມສືບຕໍ່ຊຸກຍູ້. ຄຽງຂ້າງບັນດາຄວາມສະດວກແລະກາລະໂອກາດນັ້ນ, ຍັງມີຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ ທີ່ບໍ່ເຄີຍມີມາກ່ອນ, ຈຳເປັນຕ້ອງມີຈິດໃຈສ້າງສັນ ແລະ ຄວາມຕັດສິນໃຈປະດິດສ້າງ, ຍົກສູງຄຸນນະພາບ ແລະ ປະສິດທິຜົນການເຄື່ອນໄຫວ. ຕໍ່ໜ້າສະຖານະການນັ້ນ, ການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດຈະຕ້ອງສືບຕໍ່ຜັນຂະຫຍາຍບັນດາໜ້າທີ່, ທິດທາງທີ່ສຳຄັນ ຂອງວຽກງານການຕ່າງປະເທດ ທີ່ໄດ້ກຳນົດໄວ້ໃນມະຕິກອງປະຊຸມໃຫຍ່ຄັ້ງທີ XIII ຂອງພັກ, ມະຕິສະບັບເລກທີ 22-NQ/TW, ລົງວັນທີ 10 ເມສາ 2013, ຂອງກົມການເມືອງສູນກາງພັກ, “ວາດ້ວຍການເຊື່ອມໂຍງເຂົ້າກັບສາກົນ”, ກອງປະຊຸມການຕ່າງປະເທດທົ່ວປະເທດຄັ້ງທີໜຶ່ງ (ເດືອນທັນວາ 2021), ມະຕິສະບັບເລກທີ 34-NQ/TW, ລົງວັນທີ 9 ມັງກອນ 2023, ຂອງກົມການເມືອງສູນກາງພັກ, “ວ່າດ້ວຍບາງທິດທາງ, ແຜນນະໂຍບາຍທີ່ສຳຄັນ ເພື່ອຜັນຂະຫຍາຍແນວທາງການຕ່າງປະເທດຕາມກອງປະຊຸມໃຫຍ່ຄັ້ງທີ XIII ຂອງພັກ”, ເສີມຂະຫຍາຍບົດບາດນຳໜ້າຂອງການຕ່າງປະເທດຂອງສະພາແຫ່ງຊາດ ດ້ວຍຄຸນລັກສະນະ “ມີທັງລັກສະນະລັດແລະລັກສະນະປະຊາຊົນ”, ປະກອບສ່ວນສ້າງ ແລະຮັກສາສະພາບແວດລ້ອມສັນຕິພາບ, ສະຖຽນລະພາບ, ລະດົມແຫຼ່ງພະລັງພາຍນອກ ເພື່ອພັດທະນາປະເທດ, ຍົກສູງຖານະບົດບາດແລະກຽດສັກສີຂອງຫວຽດນາມໃນເວທີສາກົນ.
ຕາມນັ້ນ, ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດໄດ້ຮັບການຜັນຂະຫຍາຍຕົວຈິງ ຜ່ານການປະຕິບັດພາລະໜ້າທີ່ພື້ນຖານຂອງສະພາແຫ່ງຊາດ ແມ່ນການນິຕິບັນຍັດ, ການຕິດຕາມກວດກາສູງສຸດ ຕໍ່ການເຄື່ອນໄຫວຂອງລັດ ແລະ ການຕັດສິນຕົກລົງບັນດາບັນຫາສຳຄັນຂອງປະເທດ, ໃນນັ້ນ ມີການຕັດສິນຕົກລົງນະໂຍບາຍການຕ່າງປະເທດຂອງລັດ ແລະ ນະໂຍບາຍໃນບັນດາຂົງເຂດຄື: 1- ການສ້າງແລະປັບປຸງບູລະນະກອບກົດໝາຍກ່ຽວກັບວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນ; 2- ການຕິດຕາມກວດກາການປະຕິບັດນະໂຍບາຍແລະກົດໝາຍໃນຂົງເຂດການຕ່າງປະເທດ ແລະ ການເຊື່ອມໂຍງເຂົ້າກັບສາກົນ; 3- ການຈັດຕັ້ງການເຄື່ອນໄຫວພົວພັນການຕ່າງປະເທດ ຂອງສະພາແຫ່ງຊາດ ໃນກອບສອງຝ່າຍ, ສົ່ງເສີມກົນໄກການຮ່ວມມືລັດຖະສະພາຫຼາຍຝ່າຍ ແລະກົນໄກອື່ນໆ ຢ່າງມີປະສິດທິພາບ.
ສຸມໃສ່ຊຸກຍູ້ແລະຮັດແໜ້ນການພົວພັນຮ່ວມມືສອງຝ່າຍ ກັບລັດຖະສະພາພາຄີຕາມລຳດັບຄວາມສຳຄັນໃນການພົວພັນຄື: ການພົວພັນພິເສດ, ການພົວພັນກັບປະເທດເພື່ອນບ້ານ, ປະເທດອາຊຽນ, ການພົວພັນກັບຄູ່ຮ່ວມມືຍຸດທະສາດຮອບດ້ານ, ຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ ແລະ ຄູ່ຮ່ວມມືທີ່ສຳຄັນ ໃນກອບຂອງການເຄື່ອນໄຫວການຕ່າງປະເທດສອງຝ່າຍຂອງສະພາແຫ່ງຊາດ (ເອົາໃຈໃສ່ການແລກປ່ຽນຄະນະຜູ້ແທນທຸກລະດັບ, ປະຕິບັດຂໍ້ຕົກລົງສອງຝ່າຍທີ່ໄດ້ລົງນາມຢ່າງມີປະສິດທິພາຍ ແລະ ຊຸກຍູ້ການລົງນາມໃນຂໍ້ຕົກລົງກັບລັດຖະສະພາຂອງບັນດາປະເທດ ມຸ່ງໄປສູ່ການຮ່ວມມືຕົວຈິງ); ຍົກສູງປະສິດທິພາບການເຄື່ອນໄຫວຂອງກົນໄກສະມາຊິກລັດຖະສະພາທີ່ເປັນມິດ, ກຸ່ມຜູ້ແທນສະພາແຫ່ງຊາດຍິງ, ກຸ່ມຜູ້ແທນສະພາແຫ່ງຊາດໝຸ່ມ ແລະອື່ນໆ; ແລກປ່ຽນບົດຮຽນໃນການເຄື່ອນໄຫວລັດຖະສະພາກັບບັນດາລັດຖະສະພາຄູ່ຮ່ວມ ເພື່ອຍົກສູງປະສິດທິຜົນການເຄື່ອນໄຫວຂອງສະພາແຫ່ງຊາດ; ຄົ້ນຄ້ວາສ້າງຕັ້ງບັນດາກຸ່ມສະມາຊິກລັດຖະສະພາມິດຕະພາບ ກັບບັນດາຄູ່ຮ່ວມມືທີ່ບໍ່ທັນມີກຸ່ມສະມາຊິກສະພາມິດຕະພາບ.
ສຳລັບການເຄື່ອນໄຫວວຽກງານການຕ່າງປະເທດຫຼາຍຝ່າຍລະຫວ່າງລັດຖະສະພາ, ວຽກງານການຕ່າງປະເທດຂອງສະພາແຫ່ງຊາດ ຈະຕ້ອງເອົາໃຈໃສ່ເສີມຂະຫຍາຍສຸດຂີດບັນດາປັດໄຈທີ່ສະດວກຂອງປະເທດ ແລະ ບັນດາຊ່ອງທາງການທູດລັດຖະສະພາ ເພື່ອເປັນເຈົ້າການແລະຕັ້ງໜ້າ ເຂົ້າຮ່ວມປະກອບສ່ວນ, ກໍ່ສ້າງ ແລະ ກຳນົດກົນໄກຫຼາຍຝ່າຍ, ປະຕິບັດຄຳສັ່ງສະບັບເລກທີ 25-CT/TW, ລົງວັນທີ 8 ສິງຫາ 2018, ຂອງຄະນະເລຂາທິການສູນກາງພັກ, “ວ່າດ້ວຍການຍູ້ແຮງແລະຍົກລະດັບການຕ່າງປະເທດຫຼາຍຝ່າຍຮອດປີ 2030”; ສືບຕໍ່ເສີມຂະຫຍາຍຜົນສຳເລັດຂອງສະພາແຫ່ງຊາດຫວຽດນາມ ໃນບັນດາເວທີປາໄສທີ່ສຳຄັນ ໂດຍມີທິດທາງແລະມາດຕະການຕົວຈິງທີ່ເໝາະສົມ; ສືບຕໍ່ຢືນຢັນບົດບາດ “ເປັນເຈົ້າການໃນການປະກອບສ່ວນກໍ່ສ້າງ ແລະກຳນົດກົດຂອງເກມ”, ສະແດງໃຫ້ເຫັນເຖິງສະມາຊິກທີ່ຕັ້ງໜ້າ, ມີຄວາມຮັບຜິດຊອບ, ຊຸກຍູ້ການເຈລະຈາ ແລະ ການຮ່ວມມື, ພິເສດແມ່ນ ຜ່ານຊ່ອງທາງລັດຖະສະພາ, ປະກອບສ່ວນຮັກສາສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ.
ພ້ອມກັນນັ້ນ, ໃນສະພາບການສາກົນ ແລະຄວາມຮຽກຮ້ອງຕ້ອງການພັດທະນາປະເທດໃນປະຈຸບັນ, ບົນພື້ນຖານການປະຕິບັດຄຳສັ່ງສະບັບເລກທີ 15-CT/TW, ລົງວັນທີ 10 ສິງຫາ 2022, ຂອງຄະນະເລຂາທິການສູນກາງພັກ, “ວ່າດ້ວຍວຽກງານການທູດເສດຖະກິດຮັບໃຊ້ການພັດທະນາປະເທດຮອດປີ 2030”, ສຸມໃສ່ຊຸກຍູ້ການທູດເສດຖະກິດ, ຊຸກຍູ້ການສົ່ງອອກ, ຂະຫຍາຍຕະຫຼາດ ແລະໃຊ້ປະໂຫຍດຈາກສັນຍາການຄ້າເສລີລຸ້ນໃໝ່, ດຶງດູດການລົງທຶນທີ່ມີຄຸນນະພາບສູງຈາກຕ່າງປະເທດ; ຍາດແຍ່ງບັນດາທ່າອ່ຽງໃໝ່ໃນການເຊື່ອມໂຍງເສດຖະກິດສາກົນ ເພື່ອສ້າງຕັ້ງການພົວພັນກັບຄູ່ຮ່ວມມືຫຼັກ, ສ້າງການບຸກທະລຸໃນການຮ່ວມມືສາກົນ ໃນບາງຂົງເຂດທີ່ສຳຄັນ; ຊຸກຍູ້ການທູດຫຼາຍຝ່າຍໃນຂົງເຂດເສດຖະກິດ, ເປັນເຈົ້າການໃນການເຂົ້າຮ່ວມ, ໃຊ້ແລະສ້າງຄວາມສົມດຸນລະຫວ່າງຄວາມຄິດລິເລີ່ມຂອງປະເທດສຳຄັນ ໃນການລະດົມແຫຼ່ງພະລັງ ເພື່ອການພັດທະນາ ບົນພື້ນຖານການຮັບປະກັນຜົນປະໂຫຍດຂອງຫວຽດນາມ. ພ້ອມກັນນັ້ນ, ຮ່ວມມືຢ່າງຕັ້ງໜ້າກັບລັດຖະສະພາຂອງປະເທດອື່ນໆ ເພື່ອສະໜັບສະໜູນແລະສົ່ງເສີມການເຈລະຈາ, ການລົງນາມ, ການໃຫ້ສັດຕະຍະບັນ ແລະການປະຕິບັດສັນຍາການຄ້າເສລີຫຼາຍຝ່າຍ; ຄົ້ນຄວ້າຄວາມສາມາດເຂົ້າຮ່ວມຂໍ້ລິເລີ່ມຫຼາຍຝ່າຍໃນພາກພື້ນ ກ່ຽວກັບການເຊື່ອມຕໍ່ເສດຖະກິດແລະການພັດທະນາໂຄງສ້າງພື້ນຖານ; ດຳເນີນການເຈລະຈາສັນຍາການຄ້າເສລີສອງຝ່າຍກັບປະເທດອື່ນ, ໂດຍສະເພາະກັບຄູ່ຮ່ວມມືການຄ້າທີ່ສຳຄັນ; ບັນດາປະເທດ, ກຸ່ມປະເທດໃນພາກພື້ນອາເມລິການລາຕີນ, ຕາເວັນອອກກາງ ແລະ ອາບຟຮິກກາ.
ໃນຖານະອົງການຕິດຕາມກວດກາສູງສຸດສຳລັບການເຄື່ອນໄຫວຂອງລັດ, ສະພາແຫ່ງຊາດສືບຕໍ່ດຳເນີນບັນດາຫົວຂໍ້ຕິດຕາມກວດກາ ການປະຕິບັດນະໂຍບາຍຂອງລັດຕໍ່ຊາວຫວຽດນາມທີ່ອາໄສຢູ່ຕ່າງປະເທດ ແລະ ຊາວຕ່າງປະເທດຢູ່ຫວຽດນາມ; ປະສານງານກັບບັນດາອົງການຂອງລັດຖະບານ ໃນການປັບປຸງນະໂຍບາຍ ກົນໄກ ກົດໝາຍໃຫ້ສົມບູນແບບ ເພື່ອສ້າງເງື່ອນໄຂອຳນວຍຄວາມສະດວກໃຫ້ຊາວຫວຽດນາມຢູ່ຕ່າງປະເທດປະກອບສ່ວນ ທີ່ນັບມື້ນັບຕັ້ງໜ້າແລະເລິກເຊິ່ງ ເຂົ້າໃນພາລະກິດການສ້າງສາແລະປົກປັກຮັກສາປະເທດຊາດ; ພ້ອມກັນນັ້ນ, ຊ່ວຍເຫຼືອໃຫ້ຊາວຫວຽດນາມຢູ່ຕ່າງປະເທດມີຖານະທາງກົດໝາຍທີ່ໝັ້ນຄົງ ເພື່ອໃຫ້ພວກເຂົາສະຫງົບໃຈໃນການດຳລົງຊີວິດ, ທຳມາຫາກິນ, ຮ່ຳຮຽນ ແລະ ຮ່ວມຕົວໃນປະເທດເຈົ້າພາບ, ປົກປັກຮັກສາພາສາຫວຽດນາມ ແລະ ເຊີດຊູວັດທະນະທຳຂອງປະເທດຊາດ.
ຄະນະປະຈຳສະພາແຫ່ງຊາດ, ປະທານສະພາແຫ່ງຊາດ, ຄະນະກຳມະການການຕ່າງປະເທດຂອງສະພາແຫ່ງຊາດ ສືບຕໍ່ເພີ່ມທະວີການສົມທົບ ແລະ ຊຸກຍູ້ການຄົ້ນຄວ້າ, ຄາດຄະເນ, ໃຫ້ຄຳປຶກສາຍຸດທະສາດ ໃນຂົງເຂດການຕ່າງປະເທດ ເພື່ອຜັນຂະຫຍາຍບັນດາການເຄື່ອນໄຫວພົວພັນຕ່າງປະເທດ ຂອງສະພາແຫ່ງຊາດ ຢ່າງທັນການ ແລະມີປະສິດທິຜົນ; ຍົກສູງປະສິດທິຜົນຂອງກົນໄກການສົມທົບ ປະສານງານຢ່າງໃກ້ຊິດ ແລະ ການແບ່ງປັນຂໍ້ມູນຢ່າງສະໝ່ຳສະເໝີ ລະຫວ່າງອົງການຂອງສະພາແຫ່ງຊາດ ແລະບັນດາໜ່ວຍງານການຕ່າງປະເທດ ຂອງທັງສາມເສົາຫຼັກດ້ານການທູດຂອງພັກ, ການທູດຂອງລັດ ແລະການຕ່າງປະເທດປະຊາຊົນ; ເພີ່ນທະວີການການສື່ສານການຕ່າງປະເທດກ່ຽວກັບບັນດາບັນຫາ ເຫດການສາກົນ, ການເຄື່ອນໄຫວຂອງລັດຖະສະພາປະເທດຕ່າງໆ, ອົງການລັດຖະສະພາລະຫວ່າງປະເທດ ແລະລະດັບພາກພື້ນ ທີ່ກ່ຽວຂ້ອງກັບຫວຽດນາມ ໃຫ້ຜູ້ແທນສະພາແຫ່ງຊາດແລະປະຊາຊົນ ໃນແລະຕ່າງປະເທດ; ເອົາໃຈໃສ່ການກໍ່ສ້າງອົງການ, ກົງຈັກ ແລະ ການຝຶກອົບຮົມ ກໍ່ສ້າງຖັນແຖວພະນັກງານທີ່ເຮັດວຽກງານການຕ່າງປະເທດ.
ໃນຂະບວນການຜັນຂະຫຍາຍປະຕິບັດຕົວຈິງ, ການຕ່າງປະເທດຂອງສະພາແຫ່ງຊາດຈະສືບຕໍ່ປະສານງານຢ່າງໃກ້ຊິດ ກັບການຕ່າງປະເທດຂອງພັກ, ການທູດຂອງລັດ ແລະການຕ່າງປະເທດປະຊາຊົນ, ເສີມຂະຫຍາຍກຳລັງແຮງສັງລວມ ຂອງການຕ່າງປະເທດໃນທຸກຂົງເຂດການປ້ອງກັນປະເທດ, ການປ້ອງກັນຄວາມສະຫງົບ, ເສດຖະກິດ, ວັດທະນະທຳ-ສັງຄົມ, ສືບຕໍ່ຜັນຂະຫຍາຍໜ້າທີ່ການຕ່າງປະເທດຂອງຫວຽດນາມຢ່າງຄົບຊຸດ, ປະດິດສ້າງ ແລະມີປະສິດທິຜົນ, ປະຕິບັດບັນດາເປົ້າໝາຍທີ່ກອງປະຊຸມໃຫຍ່ຄັ້ງທີ XIII ຂອງພັກວາງອອກມາຢ່າງສຳເລັດມີໄຊ./.
-------------------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1014 (ເດືອນພຶດສະພາ 2023)