ກ່ຽວກັບການພົວພັນປະຊາຊົນລະຫວ່າງຫວຽດນາມ - ອາເມລິກາ
ວກ. - ການພົວພັນຕ່າງປະເທດປະຊາຊົນ ແມ່ນໜຶ່ງໃນບັນດາເນື້ອໃນທີ່ສຳຄັນ ຂອງແນວຄິດການຕ່າງປະເທດໂຮ່ຈິມິນ ເຊິ່ງຍາມໃດກໍ່ໄດ້ພັກກອມມູນິດຫວຽດນາມ ແລະ ລັດຫວຽດນາມ ໝູນໃຊ້ຢ່າງສຳເລັດຜົນໃນພາກຕົວຈິງ, ໃນນັ້ນພົ້ນເດັ່ນແມ່ນການພົວພັນປະຊາຊົນລະຫວ່າງຫວຽດນາມ - ອາເມລິກາ.
ປະຫວັດຄວາມເປັນມາຂອງການພົວພັນ ລະຫວ່າງປະຊາຊົນຫວຽດນາມ ແລະປະຊາຊົນອາເມລິກາ
ເລີ່ມແຕ່ຊຸມປີ 40 ຂອງສະຕະວັດທີ XX, ແນວໂຮມຫວຽດມິນ ໄດ້ມີການພົວພັນກັບ ສຳນັກງານບໍລິການຍຸດທະສາດ (Office of Strategic Services - OSS) ຂອງອາເມລິກາ. ພາຍໃຕ້ການນຳພາຂອງພັກກອມມູນິດຫວຽດນາມ ແລະ ປະທານໂຮ່ຈິມິນ, ສະມາຄົມມິດຕະພາບຫວຽດນາມ - ເອເມລິກາ ໄດ້ຮັບການສ້າງຕັ້ງຂຶ້ນ ພາຍຫຼັງທີ່ປະເທດຫວຽດນາມໄດ້ຮັບເອກະລາດ ເມື່ອວັນທີ 17 ຕຸລາ 1945, ເຊິ່ງໄດ້ຖືວ່າແມ່ນສະມາຄົມມິດຕະພາບສອງຝ່າຍທຳອິດຂອງຫວຽດນາມ.
ໃນໄລຍະການຕໍ່ສູ້ກູ້ຊາດ ຕ້ານອາເມລິກາ, ຫວຽດນາມຍັງໄດ້ສືບຕໍ່ໝູນໃຊ້ທຸກໆໂອກາດເພື່ອຮັກສາສາຍພົວພັນກັບປະຊາຊົນອາເມລິກາ. ການພົບປະລະຫວ່າງປະຊາຊົນຫວຽດນາມ - ອາເມລິກາ ໃນເດືອນກັນຍາ 1967 ທີ່ບຣາຕີສະລາວາ (ປະເທດເຊັກໂກ) ແລະ ການສ້າງຕັ້ງຄະນະກຳມະການຫວຽດນາມສາມັກຄີກັບປະຊາຊົນອາເມລິກາ (ເອີ້ນຫຍໍ້ວ່າ ຄະນະກຳມະການຫວຽດນາມ - ອາເມລິກາ) ໃນເດືອນຕຸລາ 1968 ມີຄວາມໝາຍອັນຍິ່ງໃຫຍ່ຕໍ່ການພົວພັນຫວຽດນາມ - ອາເມລິກາ ແລະ ການພົວພັນລະຫວ່າງປະຊາຊົນສອງປະເທດ, ເພື່ອປະກອບສ່ວນເຂົ້າໃນການກຳນົດທິດທາງການພັດທະນາຂອງຂະບວນການສັນຕິພາບ ແລະ ຄັກຄ້ານສົງຄາມທີ່ຫວຽດນາມ ຢູ່ພາຍໃນປະເທດອາເມລິກາ, ສ້າງຄວາມສະດວກໃຫ້ແກ່ການເຊັນສັນຍາປາຣີ ວ່າດ້ວຍການຢຸດຕິສົງຄາມ, ສ້າງສັນຕິພາບຄືນໃໝ່ໃນຫວຽດນາມ ໃນປີ 1973, ກ້າວສູ່ການປົດປ່ອຍພາກໃຕ້ຢ່າງສົມບຸນ ແລະໂຮມປະເທດຊາດເຂົ້າເປັນເອກະພາບໃນປີ 1975.
ປີ 1992, ຄະນະກຳມະການຫວຽດນາມ - ອາເມລິກາ ໄດ້ປ່ຽນຊື່ມາເປັນ ສະມາຄົມຫວຽດນາມ - ອາເມລິກາ, ຮັບຜິດຊອບໂດຍສະເພາະກ່ຽວກັບການເຄື່ອນໄຫວພົວພັນຕ່າງປະເທດປະຊາຊົນລະຫວ່າງສອງປະເທດຫວຽດນາມ ແລະ ອາເມລິກາ. ສະມາຄົມ ຫວຽດນາມ - ອາເມລິກາ ໄດ້ພ້ອມກັນກັບບັນດາອົງການຈັດຕັ້ງປະຊາຊົນຫວຽດນາມ ເພີ່ມທະວີການເຄື່ອນໄຫວແລກປ່ຽນປະຊາຊົນທຸກຊັ້ນ ເພື່ອປະກອບສ່ວນເຂົ້າໃນການທຳລາຍທ່າປິດລ້ອມຂວ້ຳບາດ, ຊຸກຍູ້ການໄກ່ເກ່ຍ, ເພີ່ມທະວີຄວາມເຂົ້າໃຈເຊິ່ງກັນແລະກັນ. ພ້ອມກັບການແລກປ່ຽນລະຫວ່າງ ນັກຮົບເກົ່າແລະນັກຮຽນຮູ້ ຂອງສອງປະເທດ, ຫຼາຍອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ໄດ້ຊ່ວຍເຫຼືອຫວຽດນາມໃນການແກ້ໄຂຜົນຮ້າຍຂອງສົງຄາມ, ໂດຍສະເພາະແມ່ນ ຜົນຮ້າຍຂອງທາດພິດສີສົ້ມ / ດີໂອຊີນ ແລະ ລະເບີດຝັງດິນ ລະເບີດທີ່ຍັງບໍ່ທັນແຕກ, ບັນດາໂຄງການສັງຄົມກ່ຽວກັບການລົບລ້າງຄວາມອຶດຫິວ ແລະຫຼຸດຜ່ອນຄວາມທຸກຍາກ.
ການພັດທະນາທີ່ສຳຄັນໃນຄວາມສຳພັນລະຫວ່າງປະຊາຊົນຫວຽດນາມ - ອາເມລິກາ
ນັບແຕ່ເມື່ອສອງປະເທດສ້າງຕັ້ງການພົວພັນທາງການທູດໃນວັນທີ 12 ກໍລະກົດ 1995 ມາຮອດປະຈຸບັນ, ພິເສດແມ່ນແຕ່ເມື່ອສອງປະເທດສ້າງຕັ້ງການພົວພັນຄູ່ຮ່ວມມືຮອບດ້ານໃນເດືອນກໍລະກົດ 2013, ການພົວພັນລະຫວ່າງປະຊາຊົນຫວຽດນາມ - ອາເມລິກາ ມີບາດກ້າວພັດທະນາຢ່າງແຂງແຮງ ແລະ ບັນລຸໄດ້ບັນດາຜົນງານທີ່ສຳຄັນ, ໄດ້ປະກອບສ່ວນຢ່າງຕັ້ງໜ້າ ເຂົ້າໃນການຊຸກຍູ້ການພົວພັນລະຫວ່າງສອງປະເທດ ເຊິ່ງ ສະແດງອອກໃນບັນດາຈຸດດັ່ງຕໍ່ໄປນີ້:
ທີໜຶ່ງ, ການພົວພັນແລກປ່ຽນລະຫວ່າງປະຊາຊົນຫວຽດນາມ - ອາເມລິກາ ໄດ້ປະກອບສ່ວນເຂົ້າໃນການປະຕິບັດແຜນນະໂຍບາຍ “ອັດອະດີດໄວ້, ຫັນໄປສູ່ອະນາຄົດ”, ປ່ຽນ “ຈິດໃຈ” ໃຫ້ກາຍເປັນ “ການກະທຳທີ່ແທ້ຈິງ”, ເພີ່ມທະວີຄວາມເຂົ້າໃຈ ຄວາມເຊື່ອໝັ້ນເຊິ່ງກັນແລະກັນ ລະຫວ່າງປະຊາຊົນທັງສອງປະເທດ.
ດ້ວຍທິດນຳ “ເປັນເຈົ້າການ, ມີຄວາມໄຫວພິບ, ມີຫົວຄິດປະດິດສ້າງ, ມີປະສິດທິຜົນ”, ສະມາຄົມຫວຽດນາມ - ອາເມລິກາ, ສະມາຊິກທີ່ຕັ້ງໜ້າຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ, ໄດ້ພັດທະນາຢ່າງແຂງແຮງເຄືອຂ່າຍເພື່ອນມິດແລະຄູ່ຮ່ວມມື ເພື່ອເປັນພື້ນຖານໃຫ້ແກ່ການຮ່ວມມືແລກປ່ຽນມິດຕະພາບ, ເຂົ້າຮ່ວມໃນການເຈລະຈາ, ຂົນຂວາຍດ້ານດານເມືອງ, ຕໍ່ສູ້ທາງຫາງສຽງ, ສົນທະນາຕາມຊ່ອງທາງປະຊາຊົນ ກັບອາເມລິກາ ໃນບັນດາບັນຫາທີ່ມີຄວາມອ່ອນໄຫວ.
ສະມາຄົມຫວຽດນາມ - ອາເມລິກາ ໄດ້ເພີ່ມທະວີການພົວພັນກັບບັນດາອົງການຈັດຕັ້ງສັນຕິພາບ, ຝ່າຍຊ້າຍທີ່ກ້າວໜ້າຢູ່ອາເມລິກາ, ບັນດາກຸ່ມຄົນທີ່ສະໜັບສະໜູນ ແລະ ຮຽກຮ້ອງຄວາມຍຸດຕິທຳສຳລັບຜູ້ປະສົບເຄາະຮ້າຍຈາກທາດພິດສີສົ້ມ, ບາງອົງການຈັດຕັ້ງນັກຮົບເກົ່າຢູ່ອາເມລິກາ, ໃນນັ້ນມີອົງການໃຫຍ່ທີ່ມີຊື່ສຽງແລະອິດທິພົນ ຕໍ່ລັດຖະບານ ອາເມລິກາເຊັ່ນ “ນັກຮົບເກົ່າອາເມລິກາທີ່ເຂົ້າຮ່ວມສົງຄາມຢູ່ຫວຽດນາມ” (The Vietnam Veterans of America, Inc. - VVA), “ກອງທຶນອະນຸສອນນັກຮົບເກົ່າອາເມລິກາໃນຫວຽດນາມ” (The Vietnam Veterans Memmorial Fund - VVMF), ກອງທຶນນັກຮົບເກົ່າສົງຄາມຫວຽດນາມ” (The Vietnam Veterans of America Foundation - VVAF), “ນັກຮົບເກົ່າເພື່ອສັນຕິພາບ” (The Veterans For Peace - VFP), “ນັກຮົບເກົ່າຈາກສົງຄາມຕ່າງປະເທດຂອງສະຫະລັດອາເມລິກາ” (The Veterans of Foreign Wars of the United States - VFW), “ສະຫະພັນນັກຮົບເກົ່າອາເມລິກາ” (The American Legion)... ເປັນບັນດາອົງການຈັດຕັ້ງທີ່ນຳໜ້າໃນຂະບວນການຂົນຂວາຍໄກ່ເກ່ຍ, ຊຸກຍູ້ຄວາມເຂົ້າໃຈເຊິ່ງກັນແລະກັນ, ເປັນແບບປົກກະຕິ ແລະ ພັດທະນາການພົວພັນລະຫວ່າງຫວຽດນາມ - ອາເມລິກາ. ໂດຍຜ່ານການຮ່ວມມືກັບອົງການຈັດຕັ້ງ “ກຳລັງແຮງມິດຕະພາບສາກົນ” (The Friendship Force International - FFI), ສະມາຄົມໄດ້ສ້າງຄວາມສຳພັນກັບສະໂມສອນພະລັງມິດຕະພາບ (Friendship Force Club) ຫຼາຍກວ່າ 50 ແຫ່ງ ໃນສະຫະລັດອາເມລິກາ ແລະ ຫຼາຍສິບສະໂມສອນພະລັງມິດຕະພາບຢູ່ຫຼາຍປະເທດໃນໂລກ, ຕ້ອນຮັບຄະນະຜູ້ແທນຫຼາຍສິບຄະນະເຂົ້າມາຮຽນຮູ້ປະເທດຫວຽດນາມ, ຜັນຂະຫຍາຍປະຕິບັດວິທີການ “ພັກຢູ່ເຮືອນປະຊາຊົນ” (homestay) ສຳລັບກຸ່ມນັກຮຽນ ນັກສຶກສາອາເມລິກາຈຳນວນໜຶ່ງ ຢູ່ນະຄອນຫຼວງຮ່າໂນ້ຍແລະບາງທ້ອງຖິ່ນ ເຊິ່ງໄດ້ຮັບການຕີລາຄາສູງຈາກຝ່າຍອາເມລິກາ. ສະມາຄົມໄດ້ສົ່ງຄະນະ “ນັກການທູດມິດຕະພາບຫວຽດນາມ” (Friendship Force Ambassador) ຫຼາຍຄະນະໄປຢ້ຽມຢາມ, ຊອກຮູ້ ແລະແລກປ່ຽນກັບປະຊາຊົນອາເມລິກາ.
ໂຄງການແລກປ່ຽນຄະນະຜູ້ແທນລະຫວ່າງສະມາຄົມຫວຽດນາມ-ອາເມລິກາ ກັບ “ສະພາຜູ້ນຳທາງການເມືອງໜຸ່ມຂອງອາເມລິກາ” (The American Council of Young Political Leaders - ACYPL) ນັບແຕ່ປີ 1996, ສືບຕໍ່ໄດ້ຮັບການຜັນຂະຫຍາຍ, ມີຜົນສຳເລັດທາງບວກ, ຊ່ວຍສະມາຊິກອາຍຸຕ່ຳກວ່າ 40 ປີໃຫ້ເປັນຜູ້ນຳໜຸ່ມໃນບັນດາຂົງເຂດດ້ານເສດຖະກິດ, ການເມືອງ, ສັງຄົມ ເພື່ອມີຄວາມເຂົ້າໃຈເພີ່ມຕື່ມ ແລະແບ່ງປັນບົດຮຽນປະສົມການກ່ຽວກັບລະບົບການເມືອງ, ອຳນາດສາທາລະນະ ແລະຂະບວນການກຳນົດ ແຜນນະໂຍບາຍໃນແຕ່ລະປະເທດ.
ສະມາຄົມມີການພົວພັນກັບຫຼາຍມະຫາວິທະຍາໄລ, ສະຖາບັນຄົ້ນຄວ້າ, ໂຮງຮຽນມັດຖະຍົມຂອງອາເມລິກາ; ໄດ້ຕ້ອນຮັບຄະນະນັກຮຽນຮູ້, ສາດສະດາຈານ, ນັກສຶກສາຂອງອາເມລິກາຫຼາຍຄະນະ ເຂົ້າມາຮຽນຮູ້ປະຫວັດສາດ, ວັດທະນະທຳ, ປະເທດ, ຜູ້ຄົນຫວຽດນາມ, ຮຽນຮູ້ກ່ຽວກັບປະຫວັດສາດການພົວພັນລະຫວ່າງຫວຽດນາມ - ອາເມລິກາ, ໃນນັ້ນມີການພົວພັນລະຫວ່າປະຊາຊົນສອງປະເທດ, ສົມທົບວຽກງານອາສາສະໝັກ ແລະການສະໜັບສະໜູນໃນສະຖານທີ່ມະນຸດສະທຳ. ແຕ່ປີ 2015, ສະມາຄົມໄດ້ສ້າງຕັ້ງການພົວພັນກັບອົງການຈັດຕັ້ງ “ໂຄງການສອງຝ່າຍ” (2 Side Project - 2SP) ເຊິ່ງມີການເຄື່ອນໄຫວແລກປ່ຽນມິດຕະພາບ, ໄກ່ເກ່ຍຢ່າງເລິກເຊິ່ງ, ເຕັມໄປດ້ວຍຄວາມເມດຕາຈິດລະຫວ່າງລູກຫຼານຂອງທະຫານອາເມລິການທີ່ເສຍຊີວິດ ແລະ ລູກຫຼານຂອງນັກຮົບທີ່ເສຍຊີວິດເພື່ອຊາດຫວຽດນາມ.
ຊາວອາເມລິກາຫຼາຍຄົນ, ລວມທັງນັກຮົບເກົ່າ, ສະມາຊິກລັດຖະສະພາ... ພາຍຫຼັງທີ່ໄດ້ມາຢ້ຽມຢາມຫວຽດນາມ, ໄດ້ເຫັນກັບຕາຜົນຮ້າຍອັນໜັກໜ່ວງຂອງສົງຄາມ ເຊິ່ງ ພາຍຫຼັງເກືອບເຄິ່ງສະຕະວັດ ປະຊາຊົນຫວຽດນາມຍັງຕ້ອງທົນກັບຜົນກະທົບຂອງມັນ, ພວກເຂົນໄດ້ຮັບຮູ້ຢ່າງຈະແຈ້ງເຖິງລັກສະນະອະທຳຂອງສົງຄາມ ທີ່ອາເມລິກາເປັນຜູ້ດຳເນີນຢູ່ຫວຽດນາມ, ຈາກນັ້ນໄດ້ໄປເຖິງການຕັດສິນໃຈສ່ວນຕົວ ກ່ຽວກັບສິ່ງທີ່ຕ້ອງເຮັດ ເພື່ອປະກອບສ່ວນເຂົ້າໃນການແກ້ໄຂຜົນຮ້າຍຂອງສົງຄາມ ແລະ ການພັດທະນາຂອງ ຫວຽດນາມ ກໍ່ຄືການພົວພັນລະຫວ່າງສອງປະເທດ.
ນັກຮຽນຮູ້, ນັກຄົ້ນຄວ້າ, ນັກຂ່າວບາງຄົນມາທີ່ຫວຽດນາມ ເພື່ອເອົາເອກະສານສຳລັບຂຽນປື້ມ, ໜັງສືພິມ, ຜະລິດຮູບເງົາ ແລະ ຮູບພາບ ເຊິ່ງໄດ້ສະທ້ອນໃຫ້ເຫັນເຖິງສົງຄາມອາເມລິກາໃນຫວຽດນາມຢ່າງພາວະວິໄສ, ກົງໄປກົງມາ ແລະ ຜົນຮ້າຍຂອງສົງຄາມນັ້ນ, ກໍ່ຄືຜົນງານແລະຄວາມຫຍຸ້ງຍາກຂອງຫວຽດນາມ ໃນການພັດທະນາສ້າງສາປະເທດຊາດ.
ໂດຍຕື້ນຕັນໃຈຕໍ່ນ້ຳໃຈເຫັນແກ່ຄົນອື່ນ, ນ້ຳໃຈກວ້າງຂວາງເຜື່ອແຜ່ຂອງຊາວຫວຽດນາມ ໃນການຊ່ວຍເຫຼືອຊອກຫາອັດຖິຂອງທະຫານອາເມລິກາທີ່ຫາຍສາບສູນ ໃນຂະນະທີ່ຜູ້ເປັນແມ່, ເປັນເມຍແລະຄອບຄົວຂອງຊາວຫວຽດນາມຫຼາຍຮ້ອຍຄົນ ຍັງບໍ່ທັນພົບເຫັນຮ່ອງຮອຍຂອງຍາດພີ່ນ້ອງທີ່ເສຍຊີວິດໃນສົງຄາມ, ດັ່ງນັ້ນນັກຮົບເກົ່າອາເມລິກາແລະຄອບຄົວຂອງພວກເຂົານັບມື້ນັບຫຼາຍ ເດີນທາງມາຫວຽດນາມແລະນຳເອົາບັນທຶກສົງຄາມ, ເອກະສານແລະຂອງທີ່ລະນຶກໃນສະໜາມຮົບຫຼາຍຮ້ອຍລາຍການມາພ້ອມດ້ວຍ ເພື່ອມອບໃຫ້ອຳນາດການປົກຄອງ, ຄອບຄົວຂອງນັກຮົບຜູ້ເສຍຊີວິດເພື່ອຊາດ ຫຼືຫໍພິພິທະພັນຂອງ ຫວຽດນາມ, ເພື່ອຊ່ວຍຊອກຫາອັດຖິຂອງທະຫານຫວຽດນາມ ທີ່ໄດ້ເສຍຊີວິດຫຼືຫາຍສາບສູນຢູ່ໜາມຮົບໃນເມື່ອກ່ອນ.
ທີສອງ, ການສະໜັບສະໜູນແລະຊ່ວຍເຫຼືອຂອງບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ໃນການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ແກ້ໄຂຜົນຮ້າຍສົງຄາມ. ໃນປະຈຸບັນ, ຫວຽດນາມມີການພົວພັນກັນອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດຫຼາຍກວ່າ 1.000 ແຫ່ງ, ໜຶ່ງສ່ວນສາມແມ່ນຈາກສະຫະລັດອາເມລິກາ, ດ້ວຍມູນຄ່າການປ່ອຍເງິນປະມານ 300 ລ້ານໂດລາສະຫະລັດຕໍ່ປີ, ເຊິ່ງເຄື່ອນໄຫວຢ່າງກວ້າງຂວາງໃນເກືອບທຸກຂົງເຂດ. ຕາມສະຖິຕິ, ໃນປະຈຸບັນມີອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ທີ່ກຳລັງເຄື່ອນໄຫວເປັນປົກກະຕິຢູ່ຫວຽດນາມ ເປັນຈຳນວນ 159 ອົງການ, ສຸມໃສ່ຂົງເຂດຕ່າງໆເຊັ່ນ ສາທາລະນະສຸກ, ການສຶກສາ, ເສດທະກິດ, ການແກ້ໄຂຜົນຮ້າຍສົງຄາມ. ມູນຄ່າການຊ່ວຍເຫຼືອຂອງບັນດາອົງການທີ່ບໍ່ຂຶ້ນກັບລັດຖະບານອາເມລິກາ ກວມເອົາປະມານ 45% - 50% ຂອງມູນຄ່າການຊ່ວຍເຫຼືອທັງໝົດ ຂອງບັນດາອົງການຈັດຕັ້ງບໍ່ຂຶ້ນກັບລັດຖະບານຕ່າງປະເທດ ທີ່ກຳລັງເຄື່ອນໄຫວໃນຫວຽດນາມ ແລະເພີ່ມຂຶ້ນທຸກປີ (ສະເລັ່ຍຫຼາຍກວ່າ 100 ລ້ານໂດລາສະຫະລັດຕໍ່ປີ). ອາດຈະເວົ້າໄດ້ວ່າ, ບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ເປັນໜຶ່ງໃນບັນດາອົງການຈັດຕັ້ງອັບດັບໜຶ່ງ ໃນການຊ່ວຍເຫຼືອການກໍ່ສ້າງພື້ນຖານໂຄງລ່າງ ແລະເຕັກນິກ ໃຫ້ແກ່ຂະແໜງການສາທາລະນະສຸກຂອງຫວຽດນາມ.
ດ້ວຍຄຸນລັກສະນະການເຮັດວຽກທີ່ເປັນມືອາຊີບ, ຂະໜາດໃຫຍ່, ບັນລຸການປ່ອຍເງິນສູງ, ໃຫ້ຄຳໝັ້ນສັນຍາຍາວນານ, ການປະສານງານຢ່າງມີປະສິດທິຜົນ ກັບບັນດາຄູ່ຮ່ວມມືຫວຽດນາມ, ກຸ່ມບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ມີບົດບາດສຳຄັນໃນຫຼາຍປະເທດ ທີ່ຊ່ວຍເຫຼືອປະເທດຫວຽດນາມ. ໃນຂະບວນການຫັນການພົວພັນລະຫວ່າງຫວຽດນາມ - ອາເມລິກາເປັນແບບປົກກະຕິ, ມີອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາຈຳນວນຫຼາຍ ທີ່ໄດ້ມີບົດບາດຕັ້ງໜ້າ, ເປັນຜູ້ນຳໜ້າໃນການປະກອບສ່ວນເຂົ້າໃນການແກ້ໄຂ “ອຸປະສັກ” ໃນການພົວພັນລະຫວ່າງສອງປະເທດ, ເປີດຊ່ອງທາງແລກປ່ຽນປະຊາຊົນຢ່າງແທ້ຈິງ ແລະມີປະສິດທິຜົນ. ອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ໄດ້ມີການຊ່ວຍເຫຼືອຢ່າງມີປະສິດທິຜົນ ໃຫ້ຫວຽດນາມແກ້ໄຂຜົນຮ້າຍສົງຄາມ ໂດຍຜ່ານບັນດາໂຄງການຮອບດ້ານ ກ່ຽວກັບການແກ້ໄຂຜົນຮ້າຍຈາກລູກລະເບີດ, ຊ່ວຍເຫຼືອຜູ້ຖືກເຄາະຮ້າຍຈາກທາດພິດສີສົ້ມ, ຍົກສູງຄວາມຮັບຮູ້ຂອງສັງຄົມກ່ຽວກັບຄົນພິການ,... ນຳເອົາປະສິດທິຜົນອັນແທ້ຈິງມາໃຫ້ຫວຽດນາມ, ປະກອບສ່ວນເຂົ້າໃນການແກ້ໄຂບັນດາບັນຫາສັງຄົມ, ຊຸກຍູ້ການພັດທະນາປະຊາຄົມ ແລະ ເພີ່ມທະວີທັກສະການບໍລິຫານໃຫ້ແກ່ສຳນັກງານ ອົງການຈັດຕັ້ງຫຼາຍແຫ່ງຂອງຫວຽດນາມ.
ການເຄື່ອນໄຫວຂອງອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ໄດ້ກາຍເປັນຮູບການໆທູດປະຊາຊົນແບບພິເສດ. ໄປຄຽງຄູ່ກັບປະສິດທິຜົນທາງດ້ານເສດຖະກິດ - ສັງຄົມ, ບັນດາໂຄງການຂອງອົງການຈັດຕັ້ງທີ່ບໍ່ຂຶ້ນກັບລັດຖະບານອາເມລິກາ ໄດ້ມີການປະກອບສ່ວນເຂົ້າໃນການຍົກສູງຄວາມເຂົ້າໃຈ ແລະ ເປີດກວ້າງການພົວພັນລະຫວ່າງປະຊາຊົນສອງປະເທດຫຼາຍສົມຄວນ, ພ້ອມທັງຊຸກຍູ້ການຫັນເປັນແບບປົກກະຕິການພົວພັນສອງປະເທດ ບົນພື້ນຖານເຄົາລົບນັບຖືເອກະລາດ, ອຳນາດອະທິປະໄຕ, ບໍ່ແຊກແຊງວຽກງານພາຍໃນຂອງກັນແລະກັນ ແລະ ຮ່ວມມືແບບສະເໝີພາບກັນ ເພື່ອຜົນປະໂຫຍດຮ່ວມກັນ.
ທີສາມ, ມີການປະກອບສ່ວນເຂົ້າໃນການເພີ່ມທະວີການຮ່ວມມືໃນຫຼາຍຂົງເຂດເຊັ່ນ: ລະດົມຄວາມຊ່ວຍເຫຼືອທາງວິຊາການຈາກສະຫະລັດອາເມລິກາ ເພື່ອຊ່ວຍຫວຽດນາມເຂົ້າຮ່ວມອົງການການຄ້າໂລກ (WTO), ບໍ່ນຳໃຊ້ພາສີຕໍ່ຕ້ານການຂາຍທຸ່ມຕະຫຼາດກັບຜະລິດຕະພັນອາຫານທະເລບາງຊະນິດທີ່ສົ່ງອອກຈາກຫວຽດນາມໄປຍັງສະຫະລັດ; ເຊື່ອມຕໍ່ຊຸກຍູ້ການແລກປ່ຽນວັດທະນະທຳ, ສິລະປະ, ທັດສະນະສຶກສາ, ທ່ອງທ່ຽວຫວຽດນາມ, ກໍ່ຄືແລກປ່ຽນຂໍ້ມູນຂ່າວສານ, ຊອກຫາໂອກາດການຮ່ວມມືທຸລະກິດ ລະຫວ່າງບັນດາວິສາຫະກິດຂະໜາດນ້ອຍ ແລະ ຂະໜາດກາງຂອງສອງປະເທດ.
ທີສີ່, ຕັ້ງໜ້າຜັນຂະຫຍາຍຊ່ອງທາງການສົນທະນາຢ່າງບໍ່ເປັນທາງການກ່ຽວກັບສິດທິມະນຸດ, ສາສະໜາ ກັບອາເມລິກາ, ຊ່ວຍເພີ່ມທະວີຄວາມເຂົ້າໃຈເຊິ່ງກັນແລະກັນ, ຜ່ານຊ່ອງທາງຂົນຂວາຍປະຊາຊົນ ເພື່ອໃຫ້ຝ່າຍອາເມລິກາບໍ່ຜ່ານຮ່າງກົດໝາຍ ແລະມະຕິຕົກລົງທີ່ບໍ່ຖືກຕ້ອງກ່ຽວກັບຫວຽດນາມ. ຫວຽດນາມໄດ້ຕ້ອນຮັບຫຼາຍຄະນະຜູ້ແທນຂອງ ສະຖາບັນເພື່ອການມີສ່ວນຮ່ວມທົ່ວໂລກ (The Institute for Global Engagement - IGE), ເປັນອົງການຈັດຕັ້ງທາງສາສະໜາທີ່ບໍ່ຂຶ້ນກັບລັດຖະບານ ເຂົ້າມາຄົ້ນຄວ້າສະຖານະການເສລີພາບໃນການເຊື່ອຖືສາສະໜາຢູ່ຫວຽດນາມ; ປະສານສົມທົບເປີດຊຸດຝຶກອົບຮົມກ່ຽວກັບນະໂຍບາຍສາສະໜາ, ພົບປະແລກປ່ຽນ, ສຳມະນາສາກົນ ກ່ຽວກັບບັນຫາສາສະໜາ ແລະອຳນາດກົດໝາຍ, ດ້ວຍການເຂົ້າຮ່ວມຂອງນັກຮຽນຮູ້, ນັກຄົ້ນຄວ້າ, ບຸກຄົນສຳຄັນທາງສາສະໜາ ແລະ ນັກເຄື່ອນໄຫວທາງສັງຄົມ.
ທີຫ້າ, ດ້ວຍຫຼາຍຮູບການແບ່ງປັນ, ແລກປ່ຽນຂໍ້ມູນຂ່າວສານ, ຫວຽດນາມໄດ້ສື່ສານຢ່າງທັນການກັບບັນດາເພື່ອນມິດ ແລະຄູ່ຮ່ວມມືອາເມລິກາ ກ່ຽວກັບສະຖານະການທະເລຕາເວັນອອກ, ອຳນາດອະທິປະໄຕຂອງຫວຽດນາມໃນທະເລຕາເວັນອອກ ແລະ ຫຼັກໝັ້ນອັນຊອບທຳຂອງຫວຽດນາມ. ເພື່ອນມິດແລະຄູ່ຮ່ວມມືຫຼາຍຄົນຂອງສະມາຄົມຫວຽດນາມ - ອາເມລິກາ ໄດ້ອອກສຽງສະແດງຄວາມສະໜັບສະໜູນທັດສະນະຂອງຫວຽດນາມ.
ຄວາມສຳພັນລະຫວ່າງປະຊາຊົນຫວຽດນາມ - ອາເມລິກາໃນໄລຍະຈະມາເຖິງ
ໃນສະຖານະການສາກົນທີ່ກຳລັງຜັນແປຢ່າງສັບສົນແລະຄາດເດົາຍາກ, ຄວາມສະດວກແລະສິ່ງທ້າທາຍສະຫຼັບສັບຊ້ອນກັນ. ການແຂ່ງຂັນຍຸດທະສາດທີ່ເຄັ່ງຮ້ອນລະຫວ່າງບັນດາປະເທດໃຫຍ່ ນັບມື້ນັບເພີ່ມຂຶ້ນ, ພິເສດແມ່ນຢູ່ອາຊີ - ປາຊີຟິກ. ສະພາບການໃນທະເລຕາເວັນອອກມີການຜັນແປຢ່າງສັບສົນ, ເຊິ່ງນາບຂູ່ສັນຕິພາບ, ສະຖຽມລະພາບ, ຄວາມສະຫງົບປອດໄພຢູ່ໃນພາກພື້ນ ແລະ ອຳນາດອະທິປະໄຕ, ຜືນແຜ່ນດິນອັນຄົບຖ້ວນຂອງຂອງປະເທດຫວຽດນາມ.
ຫວຽດນາມກຳລັງຢູ່ໃນຂະບວນການພັດທະນາ, ຍູ້ແຮງການຫັນເປັນອຸດສາຫະກຳ ແລະ ທັນສະໄໝ, ຕ້ອງການມີສະພາບແວດລ້ອມສັນຕິພາບ, ສະຖຽມລະພາບ ເພື່ອລະດົມແຫຼ່ງພະລັງທາງດ້ານທຶນຮອນ, ເຕັກໂນໂລຊີ, ປັນຍາຄວາມຮູ້ ແລະ ການສະໜັບສະໜູນສາກົນ ເພື່ອກໍ່ສ້າງແລະປົກປັກຮັກສາປະເທດຊາດ.
ການພົວພັນລະຫວ່າງສອງປະເທດຫວຽດນາມ ແລະ ອາເມລິກາໃນຂອບ “ຄູ່ຮວມມືຮອບດ້ານ” ທີ່ກຳລັງພັດທະນາຢ່າງແຂງແຮງໃນທຸກໆຂົງເຂດ, ໃນ 10 ປີຕໍ່ໄປນີ້, ການພົວພັນລະຫວ່າງປະຊາຊົນຫວຽດນາມ - ອາເມລິກາ ຕ້ອງໄດ້ຍູ້ແຮງກວ່າອີກ, ເພື່ອສົມກັບຄວາມສາມາດບົ່ມຊ້ອນຂອງສອງປະເທດ, ດ້ວຍເປົ້າໝາຍລະດົມການສະໜັບສະໜູນຢ່າງກວ້າງຂວາງຂອງປະຊາຊົນອາເມລິກາ ຕໍ່ການພັດທະນາຢ່າງໝັ້ນຄົງ ແລະ ເຂັ້ມແຂງຂອງຫວຽດນາມ, ສະໜັບສະໜູນເພີ່ມທະວີການພົວພັນຫວຽດນາມ - ອາເມລິກາ, ສະໜັບສະໜູນບັນດາຄວາມມານະພະຍາຍາມ ເພື່ອຮັກສາສັນຕິພາບ, ສະຖຽມລະພາບ, ແກ້ໄຂຂໍ້ພິພາດດ້ວຍສັນຕິວິທີ ບົນພື້ນຖານກົດໝາຍສາກົນ.
ການພົວພັນປະຊາຊົນລະຫວ່າງຫວຽດນາມ - ອາເມລິກາ ທີ່ສອງປະເທດມຸ່ງໄປເຖິງຈະມີຈຸດພິເສດດັ່ງຕໍ່ໄປນີ້:
ການພົວພັນເປີດກວ້າງ, ຄຽງຄູ່ກັບການເພີ່ມທະວີການພົວພັນກັບບັນດາຄູ່ຮ່ວມມືທີ່ເປັນມູນເຊື້ອ ແລະ ບັນດາຄູ່ຮ່ວມມືທີ່ມີຢູ່, ຈະສ້າງຕັ້ງການພົວພັນແບບກວ້າງຂວາງກັບບັນດາອົງການຈັດຕັ້ງປະຊາຊົນ ທີ່ຕາງໜ້າໃຫ້ປະຊາຊົນອາເມລິກາທຸກຊັ້ນວັນນະ ທີ່ມີອິດທິພົນໃນສັງຄົມ ແລະ ໃນເວທີການເມືອງອາເມລິກາ, ບັນດາຊຸມຊົນທີ່ຢູ່ອາໄສ, ໂດຍສະເພາະແມ່ນຊຸມຊົນຊາວອາເມລິກາເຊື້ອສາຍຫວຽດນາມ ແລະ ຊາວໜຸ່ມ.
ການພົວພັນຮອບດ້ານ ໃນທຸກຂົງເຂດເສດຖະກິດ, ວັດທະນະທຳ, ວິທະຍາສາດ - ເຕັກນິກ.
ການພົວພັນເລິກເຊິ່ງ ແລະ ມີປະສິດທິຜົນແທ້ຈິງ ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນດ້ານເສດຖະກິດ, ການຄ້າ, ແກ້ໄຂ ແລະ ຂະຈັດບັນຫາແລະສິ່ງກີດຂວາງຕ່າງໆໃນການພົວພັນລະຫວ່າງສອງປະເທດ.
ການພົວພັນທີ່ຈິງໃຈ, ໄວ້ວາງໃຈ: ມີການໄກ່ເກ່ຍຢ່າງເລິກເຊິ່ງ, ເພີ່ມທະວີຄວາມເຂົ້າໃຈ ແລະ ຄວາມໄວ້ວາງໃຈລະຫວ່າງປະຊາຊົນສອງປະເທດ.
ເພື່ອໃຫ້ວິໄສທັດນີ້ກາຍເປັນຄວາມຈິງ, ຕ້ອງມີການປະສານສົມທົບຢ່າງແໜ້ນແຟ້ນລະຫວ່າງການທູດແຫ່ງລັດ, ການພົວພັນຕ່າງປະເທດຂອງພັກ ແລະ ການພົວພັນຕ່າງປະເທດປະຊາຊົນ, ເສີມຂະຫຍາຍບົດບາດແລະທ່າແຮງສະເພາະຂອງການພົວພັນຕ່າງປະເທດປະຊາຊົນ. ການພົວພັນຕ່າງປະເທດປະຊາຊົນມີພື້ນທີ່ກວ້າງຂວາງ, ສາມາດເປັນເຈົ້າການໃນການດຳເນີນບາດກ້າວທີ່ໄຫວພິບ, ເພີ່ມທະວີການພົບປະສົນທະນາເພື່ອກໍ່ສ້າງມິດຕະພາບອັນເລິກເຊິ່ງ ກັບປະຊາຊົນອາເມລິກາ, ແກ້ໄຂຄວາມບໍ່ລົງລອຍກັນເທື່ອລະກ້າວ, ໂດຍສະເພາະແມ່ນ ໃນບັນດາບັນຫາປະຊາທິປະໄຕ, ສິດທິມະນຸດ, ຊົນເຜົ່າ, ສາສະໜາ ແລະ ຄວາມກັງວົນບາງປະການຂອງຊຸມຊົນຊາວອາເມລິກາເຊື້ອສາຍຫວຽດນາມ.
ໃນເວລາຕໍ່ໄປນີ້, ຫວຽດນາມຕ້ອງເພີ່ມທະວີກຳລັງຂອງສະມາຄົມຫວຽດນາມ - ອາເມລິກາ ແລະ ບັນດາສະມາຊິກຢູ່ທ້ອງຖິ່ນຕ່າງໆ, ເພື່ອດຶງດູດການເຂົ້າຮ່ວມຂອງວົງການວິສາຫະກິດ, ນັກຮຽນຮູ້, ບັນດານັກຄົ້ນຄວ້າວິທະຍາສາດ, ປະຫວັດສາດ, ນັກສຶກສາ, ນັກຮຽນ, ເພື່ອສ້າງຕັ້ງເຄືອຂ່າຍການພົວພັນ, ເຊື່ອມຕໍ່ລະຫວ່າງບັນດາອົງການຈັດຕັ້ງປະຊາຊົນຢູ່ພາຍໃນປະເທດກັບບຸກຄົນ, ອົງການຈັດຕັ້ງປະຊາຊົນອາເມລິກາ ແລະ ຄົນຫວຽດນາມທີ່ອາໄສໃນອາເມລິກາ. ເພີ່ມທະວີການຮ່ວມມືກັບບັນດາອົງການຈັດຕັ້ງສັນຕິພາບ, ຝ່າຍຊ້າຍ, ບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານ ແລະອາສາສະໝັກຂອງອາເມລິກາທີ່ມີການເຄື່ອນໄຫວຢ່າງຕັ້ງໜ້າ.
ປະທານໂຮ່ຈີມິນເຄີຍເວົ້າວ່າ, ວິທີການໂຈມຕີເຂົ້າໄປໃນຫົວໃຈຂອງຄົນ, ເອົາຊະນະດ້ວຍສິນທຳ, ການຫັນປ່ຽນດ້ວຍຄວາມຮັກ, ຊັກຊວນໃຈຜູ້ຄົນໃຫ້ເພີ່ມພູນພະລັງແຫ່ງຄວາມຊອບທຳ. ເພີ່ມທະວີຄວາມເຂົ້າໃຈກ່ຽວກັບຄວາມຮຽກຮ້ອງຕ້ອງການແລະຜົນປະໂຫຍດຂອງກັນແລະກັນ, ແກ້ໄຂໂດຍພື້ນຖານບັນດາຜົນສະທ້ອນທີ່ຜ່ານມາແລະບັນຫາທີ່ຍັງຄົງຄ້າງ, ການເພີ່ມຄວາມໄວ້ເນື້ອເຊື່ອໃຈລະຫວ່າງປະຊາຊົນຂອງສອງປະເທດ ຈະເປັນພື້ນຖານໃຫ້ສາຍພົວພັນສອງປະເທດພັດທະນາໃນລະດັບສູງ, ຕອບສະໜອງຜົນປະໂຫຍດແລະຄວາມມຸ້ງຫວັງ ຂອງປະຊາຊົນສອງປະເທດຫວຽດນາມ - ອາເມລິກາ, ປະກອບສ່ວນປັບປຸງສັນຕິພາບ, ສະຖຽມລະພາບ ແລະ ການພັດທະນາຢູ່ພາກພື້ນ ແລະ ໃນໂລກ./.
_______________________
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 942 (ເດືອນພຶດສະພາ 2020)