“ປີອາຊຽນ - ຫວຽດນາມ” ຄວາມຫວັງກ່ຽວກັບ
ສິ່ງປະທັບໃຈຈາກຫວຽດນາມ
ສິ່ງປະທັບໃຈຈາກຫວຽດນາມ
ວກ. - ໃນຂະບວນວິວັດການພັດທະນາຂອງ ສະມາຄົມບັນດາປະເທດ ອາຊີຕາເວັນອອກສ່ຽງໃຕ້ (ອາຊຽນ), ປີ 2020 - ປີທີ່ຫວຽດນາມເປັນປະທານອາຊຽນ - ບັນດາປະເທດໃນພາກພື້ນແລະໃນໂລກຫວັງວ່າ ໃນ “ປີອາຊຽນ - ຫວຽດນາມ” ນີ້ ຫວຽດນາມຈະສ້າງສິ່ງປະທັບໃຈ ເພື່ອສົ່ງເສີມການພັດທະນາຂອງອົງການໃນປີປະຫວັດສາດທີ 53 ເປັນປີທີ່ມີຄວາມໝາຍສຳຄັນ, ເປັນການທົບທວນໄລຍະກາງ ຂອງການຈັດຕັ້ງປະຕິບັດແຜນແມ່ບົດສ້າງປະຊາຄົມອາຊຽນ ໃນ 5 ປີຕໍ່ໜ້າ. ສຳລັບຫວຽດນາມ, ນີ້ແມ່ນຂີດໝາຍປີທີ 25 ທີ່ຫວຽດນາມຢູ່ຮ່ວມກັບອາຊຽນ ແລະ ມີພາລະກິດສາກົນທີ່ສຳຄັນອີກປະການໜຶ່ງຄື: ຮັບບົດບາດເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໃນໄລຍະປີ 2020 - 2021.
ສະພາບການໃໝ່ໃນປີຫວຽດນາມເປັນປະທານອາຊຽນ
ຫວຽດນາມດຳລົງຕຳແໜ່ງປະທານອາຊຽນເປັນເທື່ອທີສອງ ໃນສະພາບການຂອງພືກພື້ນອາຊີ - ປາຊີຟິກ ເຊິ່ງໃນປະຈຸບັນໄດ້ເປີດກວ້າງພື້ນທີ່ເປັນ ອິນໂດ - ປາຊີຟິກ, ສືບຕໍ່ນຳໜ້າໃນແງ່ຂອງການເຕີບໂຕແລະການເຊື່ອມໂຍງ, ແຕ່ຄວາມບໍ່ແນ່ນອນກໍນັບມື້ນັບຫຼາຍຂຶ້ນ. ເມື່ອທຽບກັບສະພາບການໂລກ, ສະຖານະການໃນພາກພື້ນ ອິນໂດ - ປາຊີຟິກ ກຳລັງຜັນປ່ຽນຢ່າງໄວຍ້ອນບັນດາປັດໄຈດັ່ງນີ້: 1- ນີ້ແມ່ນພາກພື້ນທີ່ມີການພັດທະນາຢ່າງຂະຫຍັນຂັນເຄື່ອນກວ່າໝູ່ໃນໂລກ, ດ້ວຍຄວາມຄາດຫວັງທີ່ຈະກາຍເປັນສູນກາງອຳນາດໃໝ່ຂອງໂລກໃນກາງສະຕະວັດທີ XXI ໂດຍການມີໜ້າຂອງບັນດາປະເທດມະຫາອຳນາດທີ່ສຸດໃນໂລກ ທີ່ກຳລັງແຂ່ງຂັນຍຸດທະສາດຢ່າງຮຸນແຮງເຊິ່ງກັນແລະກັນ; 2- ນີ້ແມ່ນໜຶ່ງໃນພື້ນທີ່ທີ່ມີ “ຈຸດຮ້ອນ” ຫຼາຍແຫ່ງ ທີ່ກ່ຽວຂ້ອງໂດຍກົງກັບການແຂ່ງຂັນຍຸດທະສາດລະຫວ່າງປະເທດໃຫຍ່ ກໍຄືບັນດາສິ່ງທ້າທາຍດ້ານຄວາມໝັ້ນຄົງທີ່ບໍ່ເປັນແບບດັ້ງເດີມຢູ່ໃນໂລກ; 3- ເມື່ອທຽບກັບພາກພື້ນອື່ນໆ ເຊັ່ນ ເອີຣົບແລະອາເມລິກາ, ສະຖາບັນຫຼາຍຝ່າຍໃນອິນໂດ - ປາຊີຟິກຍັງບໍ່ທັນໄດ້ຮັບການພັດທະນາພໍທີ່ຈະຮັບມືກັບສິ່ງທ້າທາຍດ້ານຄວາມໝັ້ນຄົງໃນພາກພື້ນ. ຢູ່ນີ້, ຍັງບໍ່ໄດ້ສ້າງລະບົບປ້ອງກັນຄວາມປອດໄພລວມໝູ່ຄືກັບບາງພາກພື້ນອື່ນໃນໂລກ.
ໃນສະພາບການດັ່ງກ່າວ, ປະຊາຄົມອາຊຽນໄດ້ກ້າວເຂົ້າສູ່ປີທີຫ້າແຫ່ງການສ້າງຕັ້ງ ດ້ວຍບາດກ້າວທີ່ໝັ້ນຄົງ. ດ້ວຍປະຊາກອນ 654,3 ລ້ານຄົນ ແລະ ລວມຍອດຜະລິດຕະພັນພາຍໃນ (GDP) ຫຼາຍກວ່າ 3.100 ຕື້ໂດລາສະຫະລັດ (ໃນປີ 2019, ຢູ່ໃນອັນດັບທີ 6 ຂອງໂລກ ແລະ ຄາດວ່າຈະເປັນພື້ນຖານເສດຖະກິດໃຫຍ່ທີ 4 ຂອງໂລກໃນປີ 2030, ຫຼັງຈາກສະຫະລັດ, ຈິນ ແລະ ອິນເດຍ), ອາຊຽນກາຍເປັນສູນກາງການພັດທະນາ ດ້ວຍຄວາມເຕີບໂຕສະເລ່ຍ 5% ຕໍ່ປີໃນຫຼາຍປີທີ່ຜ່ານມາ, ເປັນຄູ່ຮ່ວມມືເສດຖະກິດທີ່ສຳຄັນຢູ່ໃນໂລກ ແລະ ເປັນເຂດບຸລິມະສິດຂອງນັກລົງທຶນ (ກວມເອົາປະມານ 7% ຂອງການລົງທຶນໂດຍກົງຈາກຕ່າງປະເທດຢູ່ໃນໂລກ). ໃນເວລາມໍ່ໆມານີ້, ພາກພື້ນອາຊຽນກໍເປັນຈຸດໃຈກາງໃນການຍົກຍ້າຍການຜະລິດ ຍ້ອນຜົນກະທົບຈາກສົງຄາມການຄ້າລະຫວ່າງສະຫະລັດແລະຈິນ, ການລະບາດຂອງພະຍາດໂຄວິດ-19 ແລະ ພັດທະນາການໃໝ່ໃນກະແສການລົງທຶນສາກົນ. ບົດບາດຂອງອາຊຽນໄດ້ຮັບການຕີລາຄາສູງຈາກບັນດາປະເທດແລະຄູ່ຮ່ວມມືທີ່ສຳຄັນ. ເຖິງຢ່າງໃດກໍຕາມ, ອາຊຽນຍັງບໍ່ທັນກາຍເປັນຫົວໜ່ວຍທີ່ເປັນເອກະພາບ ທີ່ມີພາລະບົດບາດໃຫຍ່ກວ່າແຕ່ກ່ອນ, ຊ້ຳບໍ່ໜຳ “ບົດບາດໃຈກາງ” ຂອງອາຊຽນກໍປະເຊີນກັບຄວາມສ່ຽງທີ່ຈະຫຼຸດລົງ ຍ້ອນສິ່ງທ້າທາຍພາຍໃນ ແລະການດັດປັບນະໂຍບາຍຂອງບັນດາປະເທດໃຫຍ່. ປະຊາຄົມອາຊຽນໄດ້ຜ່ານ 5 ປີແຫ່ງການພັດທະນາ, ແຕ່ລະດັບການຮ່ວມມືແທ້ຈິງຍັງຕ່ຳ. ໂດຍພື້ນຖານແລ້ວ ອາຊຽນຍັງເປັນອົງການລະຫວ່າງລັດຖະບານ, ບໍ່ແມ່ນປະຊາຄົມທີ່ມີນະໂຍບາຍຮ່ວມກັນ ແລະ ການເຊື່ອມໂຍງທີ່ໃກ້ຊິດແລະສົມບຸນ ບົນສາມເສົາຄ້ຳທີ່ໄດ້ກຳນົດໄວ້. ລະດັບການເຊື່ອມໂຍງເສດຖະກິດພາຍໃນພາກພື້ນແມ່ນຂ້ອນຂ້າງຕ່ຳ: ການຄ້າລະຫວ່າງບັນດາປະເທດອາຊຽນກວມພຽງປະມານ 24% ຂອງການຄ້າທັງໝົດຂອງອາຊຽນ, ໃນຂະນະທີ່ອັດຕາສ່ວນນີ້ຂອງອີຢູແມ່ນປະມານ 60%. ອາຊຽນກຳລັງປະເຊີນໜ້າກັບສິ່ງທະທາຍທັງພາຍໃນ ແລະ ພາຍນອກ. ການເກີດຂຶ້ນ, ແຜ່ລະບາດ ແລະ ການຜັນແປຂອງພະຍາດໂຄວິດ-19 ໃນຕົ້ນປີ 2020 ທີ່ກຳລັງເຮັດໃຫ້ທົ່ວໂລກເວົ້າລວມ, ພາກພື້ນອາຊຽນ ແລະ ກົນໄກເຄື່ອນໄຫວໃນປີທີ່ຫວຽດນາມເປັນປະທານອາຊຽນເວົ້າສະເພາະ ຕ້ອງປະເຊີນກັບສິ່ງທ້າທາຍໃໝ່ທີ່ຫຍຸ້ງຍາກທີ່ສຸດ. ຍິ່ງກວ່າເວລາໃດໝົດ, ບັນດາປະເທດຢູ່ພາຍໃນພາກພື້ນຮັບຮູ້ໄດ້ຄວາມຈຳເປັນຂອງການຮ່ວມມືສາກົນ, ພາກພື້ນ; ການປ່ຽນແປງໃຫຍ່ໃນວິທີການຮ່ວມມືພາກພື້ນ ເພື່ອຜ່ານຜ່າວິກິດການໃໝ່ນີ້, ໃນນັ້ນພາລະບົດບາດຂອງປະເທດເປັນປະທານອາຊຽນຂອງຫວຽດນາມໃນປີ 2020 ແມ່ນມີຄວາມໝາຍສຳຄັນ.
ຫວຽດນາມໃນປີເປັນປະທານອາຊຽນ
ພາຍຫຼັງ 25 ປີທີ່ເຂົ້າເປັນສະມາຊິກອາຊຽນ, ຫວຽດນາມໄດ້ເຂົ້າຮ່ວມຢ່າງເລິກເຊິ່ງໃນທຸກຂົງເຂດຂອງການຮ່ວມມືອາຊຽນ ແລະ ມີການປະກອບສ່ວນທີ່ສຳຄັນຫຼາຍຢ່າງ. ພ້ອມກັນກັບ ອິນໂດເນເຊຍ ແລະ ສິງກະໂປ, ໃນປະຈຸບັນ ຫວຽດນາມ ຖືກຖືເປັນໜຶ່ງໃນສາມປະເທດທີ່ມີຄວາມສາມາດ “ພາທາງ” ອາຊຽນ (ຫຼືເປັນກຸ່ມປະເທດຫຼັກແຫຼ່ງຂອງພາກພື້ນ).
ໃນອາຊຽນ, ເຖິງວ່າເຂົ້າຮ່ວມພາຍຫຼັງ ແຕ່ຫວຽດນາມພວມນຳໜ້າໃນຫຼາຍຂົງເຂດເຊື່ອມໂຍງທີ່ສຳຄັນ. ປະຈຸບບັນ, ຫວຽດນາມແລະສິງກະໂປເປັນສອງປະເທດນຳໜ້າອາຊຽນ ໃນອັດຕາການດຳເນີນມາດຕະການເພື່ອສ້າງປະຊາຄົມເສດຖະກິດອາຊຽນ, ບັນລຸ94,5% ທຽບກັບລະດັບສະເລ່ຍຂອງອາຊຽນແມ່ນ 90,5%. ພິເສດແມ່ນ, ພາຍຫຼັງໄລຍະເວລາທີ່ມູນຄ່າການຄ້າລະຫວ່າງຫວຽດນາມແລະອາຊຽນຫຼຸດລົງ, ການສົ່ງອອກຂອງຫວຽມນາມໄປຍັງບັນດາປະເທດອາຊຽນ ແຕ່ປີ 2017 ເຖິງປະຈຸບັນ ໄດ້ເລີ່ມເພີ່ມຂຶ້ນຢ່າງໄວວາ ຫຼາຍກວ່າ 20% ຕໍ່ປີ, ສ້າງເງື່ອນໄຂອຳນວຍຄວາມສະດວກໃຫ້ຫວຽດນາມສວຍໂອກາດຈາກການເຊື່ອມໂຍງເຂົ້າກັບພາກພື້ນ ແລະເພີ່ມຜົນປະໂຫຍດລະຫວ່າງປະເທດສະມາຊິກຫຼັງຈາກ 5 ປີແຫ່ງການສ້າງຕັ້ງປະຊາຄົມອາຊຽນ.
ກ່ຽວກັບຄວາມໝາຍຍຸດທະສາດ, ອາຊຽນໄດ້ກາຍເປັນບ່ອນອີງ ແລະ ເປັນເວທີປາໄສສຳຄັນທີ່ສຸດສຳລັບຫວຽດນາມ ເພື່ອເພີ່ມທະວີການປັບປຸງຄວາມສາມັກຄີພາຍໃນ, ໂດຍສະເພາະໃນບັນຫາທະເລຕາເວັນອອກ ເຊິ່ງເປັນບັນຫາທີ່ຂາດບໍ່ໄດ້ໃນການແລກປ່ຽນ ແລະວາລະກອງປະຊຸມຂອງອາຊຽນ. ຕັ້ງແຕ່ເລື່ອງ DOC ປີ 2002 (ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ) ຈົນເຖິງຂັ້ນຕອນການພັດທະນາ COC ໃນປະຈຸບັນ (ປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາວັນອອກ), ອາຊຽນມີບົດບາດສຳຄັນຫຼາຍ. ການເຈລະຈາກ່ຽວກັບ COC ຢ່າງເປັນທາງການຮອບທຳອິດ ໄດ້ເລີ່ມຕົ້ນໃນເດືອນມີນາ 2018 ຢູ່ຍາຈາງ (ຫວຽດນາມ), ແລະຮອດເດືອນສິງຫາ 2018 ອາຊຽນແລະຈີນໄດ້ອອກເອກະສານສະບັບດຽວ (single text) ທີ່ເປັນພື້ນຖານໃຫ້ແກ່ການເຈລະຈາ COC. ໃນບົດປາໄສທີ່ກອງປະຊຸມຂັ້ນສູງ ຈີນ - ອາຊຽນ (ທີ່ກຸງເທດ, ປະເທດໄທ) ໃນວັນທີ 3 ພະຈິກ 2019, ນາຍົກລັດຖະມົນຕີແຫ່ງ ສປປ ຈີນ ຫຼີ່ເຄີ້ສຽງ ໄດ້ກ່າວວ່າ ມີຄວາມປາດຖະໜາຈະສຳເລັດການເຈລະຈາກ່ຽວກັບ COC ໃນ 3 ປີຂ້າງໜ້າ. ແຕ່ດ້ວຍການພັດທະນາທີ່ຜ່ານມາມໍ່ນີ້ ຂອງການເຄື່ອນໄຫວຂອງຈີນໃນທະເລຕາເວັນອອກສະແດງໃຫ້ເຫັນວ່າ, ການບັນລຸ COC ທີ່ມີປະສິດທິຜົນ, ມີຜົນຜູກພັນທາງກົດໝາຍ ແລະ ຕອບສະໜອງຄວາມຮຽກຮ້ອງຕ້ອງການຂອງບັນດາປະເທດໃນພາກພື້ນ, ມັນຈະເປັນຂະບວນການທີ່ຫຍຸ້ງຍາກແລະສັບສົນຫຼາຍ. ສິ່ງດັ່ງກ່າວ ສ່ວນຫຼາຍແມ່ນຂຶ້ນກັບທັດສະນະແລະທ່າທີ່ທີ່ແທ້ຈິງຂອງຈີນ. ໃນຖານະທີ່ເປັນປະທານອາຊຽນໃນປີ 2020, ຫວຽດນາມຈະຕັ້ງໜ້າແລະຮັກສາຊ່ອງທາງການພົວພັນ ອາຊຽນ - ຈີນ ກ່ຽວກັບທະເລຕາເວັນອອກ.
ຕໍ່ໜ້າກາລະໂອກາດແລະສິ່ງທ້າທາຍທີ່ເກີດຂຶ້ນໃນປີ 2020 ເຊິ່ງການລະບາດຂອງພະຍາດໂຄວິດ-19 ອາດຈະແກ່ຍາວ, ຄວາມສຳເລັດໃນການດຳລົງຕຳແໜ່ງປະທານອາຊຽນຂອງຫວຽດນາມ ຈະປະກອບສ່ວນເພີ່ມທະວີຄວາມເປັນປຶກແຜ່ນແລະຄວາມສາມັກຄີ ອາຊຽນ, ຍົກສູງກຳລັງແຮງພາຍໃນພາກພື້ນ, ຍູ້ແຮງວິວັດການກໍ່ສ້າງປະຊາຄົນອາຊຽນໃຫ້ມີການເຊື່ອມຕໍ່ຢ່າງແໜ້ນແຟ້ນແລະໝັ້ນຄົງ, ສ້າງປະຖົມປັດໄຈໃຫ້ການພັດທະນາໃນໄລຍະຕໍ່ໄປຂອງປະຊາຄົມ, ກໍຄື ຍົກສູງຖານະບົດບາດແລະສ່ວນປະກອບຂອງອາຊຽນ ໃນປະຊາຄົມສາກົນ.
ບົນຈິດໃຈດັ່ງກ່າວ, ຫວຽດນາມໄດ້ກຳນົດຫົວຂໍ້ຂອງປີປະທານອາຊຽນ 2020 ວ່າ: “ການເຊື່ອມຕໍ່ ແລະ ເປັນເຈົ້າການໃນການປັບຕົວ”. ແນວຄິດ “ການເຊື່ອມຕໍ່” ເປັນການສະແດງອອກເຖິງແນວຄິດປັບປຸງຄວາມສາມັກຄີເປັນປຶກແຜ່ນ, ເປັນເອກະພາບ, ຍົກສູງຄວາມສາມາດພາຍໃນ ແລະ ສົ່ງເສີມປະຊາຄົມອາຊຽນໃຫ້ພັດທະນາຢ່າງເຂັ້ມແຂງ, ເພີ່ມທະວີການເຊື່ອມໂຍງພາກພື້ນ, ເຊື່ອມຕໍ່ດ້ານເສດຖະກິດ, ເຊີດຊູຈິດສຳນຶກປະຊາຄົມ ແລະ ເອກະລັກຂອງອາຊຽນ, ຕິດພັນກັບປະຊາຊົນ ແລະ ຖືເອົາປະຊາຊົນເປັນໃຈກາງ. ແນວຄິດ “ການເຊື່ອມຕໍ່” ທີ່ໄດ້ລະບຸໄວ້ໃນເອກະສານພື້ນຖານຂອງອາຊຽນ ມີຄວາມໝາຍຫຼາຍປະການຄື: ການເຊື່ອມຕໍ່ທາງການເມືອງ, ການເຊື່ອມຕໍ່ທາງເສດຖະກິດ, ການເຊື່ອມຕໍ່ລະຫວ່າງສັງຄົມຕ່າງໆ. ໃນສະຖານະການປະຈຸບັນ, ພິເສດແມ່ນໃນການຕໍ່ສູ້ກັບການລະບາດຂອງພະຍາດໂຄວິດ-19 ໃນທົ່ວໂລກ, ເນື້ອໃນການເຊື່ອມຕໍ່ຍິ່ງມີຄວາມສຳຄັນຕໍ່ປະຊາຄົມອາຊຽນ.
“ເປັນເຈົ້າການໃນການປັບຕົວ” ແມ່ນຍົກສູງຄວາມສາມາດຄ່ອງຕົວກັບການຫັນປ່ຽນຢ່າງໄວວາຂອງສະພາບການໂລກ ແລະສິ່ງທ້າທາຍທີ່ກຳລັງເກີດຂຶ້ນຄື: ການແຂ່ງຂັນຍຸດທະສາດລະຫວ່າງບັນດາປະເທດໃຫຍ່, ບັນດາບັນຫາລະດັບໂລກເຊັ່ນ ການປ່ຽນແປງສະພາບດິນຟ້າອາກາດ, ຄວາມປອດໄພຂອງເຄືອຂ່າຍອິນເຕີເນັດ, ການກໍ່ການຮ້າຍ, ອາດຊະຍາກຳຂ້າມຊາດ, ການລະບາດຂອງພະຍາດໂຄວິດ-19..., ພ້ອມກັນນັ້ນກໍຍົກສູງຄວາມສາມາດໃຊ້ປະໂຫຍດຈາກກາລະໂອກາດ ແລະ ຈຳກັດສິ່ງທ້າທາຍຈາກຜົນກະທົບຂອງການປະຕິວັດອຸດສາຫະກຳຄັ້ງທີສີ່, ການຄວບຄຸມແລະມີກົນໄກໃນການຄວບຄຸມ ຫຼຸດຜ່ອນອັນຕະລາຍໃນທຸກດ້ານ, ໂດຍສະເພາະແມ່ນການເອົາຊະນະຜົນກະທົບທາງເສດຖະກິດຈາກການລະບາດຂອງພະຍາດໂຄວິດ-19. “ເປັນເຈົ້າການໃນການປັບຕົວ” ແມ່ນໜຶ່ງໃນບັນດາເນື້ອໃນຂອງວິໄສທັດປະຊາຄົມອາຊຽນ 2025 ເຊິ່ງລວມໄວ້ເປັນຄັ້ງທຳອິດໃນຫົວຂໍ້ຂອງປີອາຊຽນ ເພື່ອສະທ້ອນເຖິງຄວາມຕ້ອງການໃນການສົ່ງເສີມຄວາມເປັນເຈົ້າການ, ຄວາມປະດິດສ້າງ, ການປ່ຽນແປງ ແລະຄວາມສາມາດຂອງອາຊຽນທີ່ຈະລຸກຂຶ້ນຢ່າງແຂງແຮງແລະກ້າວໄປຂ້າງໜ້າ.
ດ້ວຍທິດນຳ “ການເຊື່ອມຕໍ່” ແລະ “ການປັບຕົວ”, ຫວຽດນາມປາດຖະໜາທີ່ຈະສ້າງສອງອົງປະກອບທີ່ສອດປະສານກັນແລະຊ່ວຍຊູກັນຢ່າງແໜ້ນແຟ້ນ. ປະຊາຄົມອາຊຽນທີ່ເຊື່ອມຕໍ່ແລະພັດທະນາ ຈຳເປັນຕ້ອງເພີ່ມຄວາມເປັນເຈົ້າໃນການປັບຕົວໃຫ້ເຂົ້າກັບບັນດາປັດໄຈຈາກພາຍນອກ ແລະ ກົງກັນຂ້າມ, ຄວາມສາມາດເປັນເຈົ້າການໃນການປັບຕົວຈະເກີດຂຶ້ນໄດ້ກໍຕໍ່ເມື່ອອາຊຽນເຊື່ອມຕໍ່ກັນເປັນປຶກແຜ່ນຢ່າງແໜ້ນແຟ້ນ.
ເພື່ອປະຕິບັດເປົ້າໝາຍດັ່ງກ່າວ, ແນໃສ່ສ້າງຂີດໝາຍພິເສດໃນປີຫວຽດນາມເປັນປະທານອາຊຽນ, ຫວຽດນາມໄດ້ສະເໜີ 5 ບຸລິມະສິດໃນການຊຸກຍູ້ການເຄື່ອນໄຫວຂອງອາຊຽນໃນປີ 2020, ໃນນັ້ນມີ:
ທີໜຶ່ງ, ເສີມຂະຫຍາຍບົດບາດແລະການປະກອບສ່ວນຢ່າງຕັ້ງໜ້າຂອງອາຊຽນ ເຂົ້າໃນພາລະກິດການຮັກສາສະພາບແວດລ້ອມທີ່ສະຫງົບ, ປອດໄພແລະໝັ້ນຄົງຢູ່ພາກພື້ນ ບົນພື້ນຖານເພີ່ມທະວີຄວາມສາມັກຄີ ເປັນເອກະພາບໃນອາຊຽນ; ສົ່ງເສີມຈິດໃຈຂອງຄວາມຜູກພັນ, ສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນ ລະຫວ່າງບັນດາປະເທດສະມາຊິກ; ຍົກສູງຄວາມສາມາດໃນການປະສານສົມທົບຫຼັກໝັ້ນຮ່ວມກັນຂອງອາຊຽນ ໃນການແກ້ໄຂບັນດາບັນຫາພາກພື້ນແລະສາກົນ; ຊຸກຍູ້ການສ້າງຕັ້ງແລະປະຕິບັດຕາມກົດລະບຽບແລະມາດຕະຖານການປະພຶດໃນການພົວພັນລະຫວ່າງບັນດາປະເທດ; ຮັບມືຢ່າງທັນການແລະມີປະສິດທິຜົນຕໍ່ສິ່ງທ້າທາຍທີ່ນາບຂູ່ສັນຕິພາບ, ຄວາມໝັ້ນຄົງ ແລະສະຖຽມລະພາບໃນພາກພື້ນ.
ທີສອງ, ຊຸກຍູ້ການເຊື່ອມໂຍງແລະເຊື່ອມຕໍ່ໃນພາກພື້ນ, ຍົກສູງຄວາມສາມາດປັບຕົວແລະຄວາມສາມາດໃຊ້ປະໂຫຍດຈາກໂອກາດຂອງການປະຕິວັດອຸດສາຫະກຳຄັ້ງທີສີ່. ຕາມນັ້ນ, ເຊື່ອມໂຍງເສດຖະກິດຢ່າງເລິກເຊິ່ງ ແລະ ເຊື່ອມຕໍ່ຢ່າງຮອບດ້ານ; ຊຸກຍູ້ການເຕີບໂຕແບບຍືນຍົງແລະປົກຄຸມທາງດ້ານເສດຖະກິດ, ການເງິນແລະສັງຄົມ ບົນພື້ນຖານການປ່ຽນແປງໃໝ່ຢ່າງມີຄວາມຄິດປະດິດສ້າງ ແລະ ໝູນໃຊ້ເຕັກໂນໂລຊີດິຈິຕອນ ແລະເຕັກໂນໂລຊີໃໝ່; ສືບຕໍ່ຄວາມພະຍາຍາມໃນການຮັດແຄບຊ່ອງຫວ່າງການພັດທະນາ; ກໍ່ສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ; ເພີ່ມທະວີການບໍລິການສັງຄົມເພື່ອຮັບໃຊ້ປະຊາຊົນແລະກຸ່ມຄົນທີ່ດ້ອຍໂອກາດ; ຫັນການບໍລິຫານລັດໃຫ້ເປັນທັນສະໄໝ; ສ້າງສະພາບແວດລ້ອມສີຂຽວ...
ທີສາມ, ສົ່ງເສີມຈິດສຳນຶກປະຊາຄົມ ແລະເອກະລັກອາຊຽນ. ສ້າງຄ່ານິຍົມລວມຂອງອາຊຽນແລະເຜີຍແຜ່ຢ່າງກວ້າງຂວາງໃຫ້ປະຊາຊົນ, ສົ່ງເສີມການຮັບຮູ້ແລະການຍອມຮັບປະຊາຄົມອາຊຽນເປັນເອກະພາບ, ເສີມຂະຫຍາຍພາບພົດຂອງປະຊາຄົມອາຊຽນໃນພາກພື້ນ ແລະ ໃນໂລກ.
ທີສີ່, ສົ່ງເສີມການຮ່ວມມືເພື່ອສັນຕິພາບແລະການພັດທະນາແບບຍືນຍົງກັບບັນດາປະເທດທົ່ວໂລກ, ເສີມຂະຫຍາຍຖານະບົດບາດແລະການປະກອບສ່ວນຂອງອາຊຽນ ໃນປະຊາຄົມສາກົນ; ເປີດກວ້າງແລະຍົກລະດັບການພົວພັນກັບບັນດາຄູ່ຮ່ວມມືໃນທົ່ວໂລກ, ເພື່ອປະກອບສ່ວນເຂົ້າໃນການກຳນົດໂຄງປະກອບ ແລະ ວາງເກນກຳນົດໃໝ່ ຂອງພາກພື້ນແລະໂລກ.
ທີຫ້າ, ຍົກສູງຄວາມສາມາດໃນການປັບຕົວແລະປະສິດທິຜົນການດຳເນີນງານຂອງກົງຈັກອາຊຽນ. ປະຕິຮູບສະຖາບັນແລະເພີ່ມທະວີປະສິດທິຜົນການເຄື່ອນໄຫວຂອງກົງຈັກອາຊຽນ; ດັດປັບ, ປັບປຸງບູລະນະ, ຍົກລະດັບຂະບວນການແລະມາດຕະຖານໃນອາຊຽນ.
ເສີມຂະຫຍາຍຈິດໃຈເປັນເຈົ້າການແລະຕັ້ງໜ້າ ໃນຖານະເປັນປະທານອາຊຽນປີ 2020
ໃນວັນທີ 6 ກໍລະກົດ 2020, ພາຍໃຕ້ການເປັນປະທານຂອງທ່ານນາຍົກລັກຖະມົນຕີ ຫງວຽນຊວັນຝຸກ, ຫວຽດນາມໄດ້ຈັດຕັ້ງ “ພິທີເປີດການເປັນປະທານອາຊຽນປີ 2020”, ເປີດສາກໃຫ້ມີກອງປະຊຸມຫຼາຍຊຸດພາຍໃຕ້ຂອບອາຊຽນ ກໍຄືອາຊຽນກັບບັນດາຄູ່ຮ່ວມມື ເຊິ່ງຈະໄດ້ຈັດຂຶ້ນຕະຫຼອດປີ 2020 ໃນຫຼາຍລະດັບແຕກຕ່າງກັນ ແລະຢູ່ຫຼາຍແຂວງ, ນະຄອນໃນທົ່ວປະເທດ.
ແຕ່ວັນທີ 9 ຫາ 10 ມັງກອນ 2020, ກອງປະຊຸມຂອງຄະນະກຳມະການທີ່ປຶກສາດ້ານຄວາມສະດວກການຄ້າອາຊຽນຄັ້ງທີ 16 (ATF-JCC 16) ໄດ້ຈັດຂຶ້ນທີ່ນະຄອນຮ່າໂນ້ຍ. ນີ້ແມ່ນກອງປະຊຸມທຳອິດໃນປີ 2020 ພາຍໃຕ້ຊ່ອງທາງເສດຖະກິດ, ໂດຍກະຊວງອຸດສາຫະກຳແລະການຄ້າເປັນຜູ້ຮັບຜິດຊອບ. ນີ້ກໍແມ່ນຄັ້ງທຳອິດທີ່ ຫວຽດນາມເປັນເຈົ້າພາບຈັດກອງປະຊຸມ ATF-JCC 16 ດ້ວຍບົດບາດເປັນປະທານກອງປະຊຸມ. ຫວຽດນາມໄດ້ສະແດງຈິດໃຈເປັນເຈົ້າການແລະຍືດຫຍຸ່ນໃນການປະສານງານກອງປະຊຸມ, ຕັ້ງໜ້າປຶກສາຫາລືກ່ຽວກັບທັດສະນະຂອງບັນດາປະເທດອາຊຽນ, ກອງເລຂາອາຊຽນ ກໍຄືບັນດາຄູ່ຮ່ວມມືແລະຜູ້ຕາງໜ້າບັນດາອົງການຂອງອາຊຽນ; ຜ່ານວາລະກອງປະຊຸມ; ທ້ອນໂຮມກະແສຄວາມຄິດເຫັນເພື່ອອອກຂໍ້ຕົກລົງຂອງກອງປະຊຸມ. ກອງປະຊຸມ ATF-JCC 16 ໄດ້ສົນທະນາບັນດາຄວາມຄິດລິເລີ່ມແລະຂໍ້ສະເໜີສະເພາະ ເພື່ອຊຸກຍູ້ການຮ່ວມມືຂອງບັນດາປະເທດອາຊຽນ ໃນຂົງເຂດອຳນວຍຄວາມສະດວກດ້ານການຄ້າ, ກະກຽມສຳລັບການທົບທວນກາງວາລະອາຊຽນກ່ຽວກັບເນື້ອໃນນີ້ໃນປີ 2021.
ຕໍ່ຈາກນັ້ນ, ກອງປະຊຸມເຈົ້າໜ້າທີ່ອາວຸໂສເສດຖະກິດອາຊຽນຄັ້ງທຳອິດໃນປີ 2020 (SEOM 1/51) ທີ່ໄດ້ຈັດຂຶ້ນແຕ່ວັນທີ 12 ຫາ 14 ມັງກອນ 2020 ຢູ່ນະຄອນຮ່າໂນ້ຍ. ບົນພື້ນຖານຫົວຂໍ້ລວມຂອງປີອາຊຽນ 2020 ແມ່ນ “ການເຊື່ອມຕໍ່ແລະເປັນເຈົ້າການໃນການປັບຕົວ”, ຫວຽດນາມໄດ້ສະເໜີ 3 ທິດທາງບຸລິມະສິດພາຍໃຕ້ເສົາຄ້ຳເສດຖະກິດອາຊຽນໃນປີ 2020, ລວມມີ: 1- ຊຸກຍູ້ການເຊື່ອມໂຍງແລະເຊື່ອມຕໍ່ເສດຖະກິດພາຍໃນອາຊຽນ; 2- ສົ່ງເສີມການພົວພັນຄູ່ຮ່ວມມືເພື່ອສັນຕິພາບແລະການພັດທະນາແບບຍືນຍົງ; 3- ຍົກສູງຄວາມສາມາດປັບຕົວແລະປະສິດທິຜົນການເຄື່ອນໄຫວຂອງອາຊຽນ. ເພື່ອຜັນຂະຫຍາຍປະຕິບັດຫົວຂໍ້ແລະບຸລິມະສິດຂອງປີອາຊຽນ 2020, ຫວຽດນາມໄດ້ພັດທະນາຄວາມຄິດລິເລີ່ມ, ຂໍ້ບຸລິມະສິດ ແລະ ແຜນການຮ່ວມມືສະເພາະ 14 ປະການ ເພື່ອສົນທະນາ, ປຶກສາຫານລື ແລະ ເປັນເອກະພາບກັບບັນດາປະເທດອາຊຽນ ທີ່ກອງປະຊຸມ SEOM 1/51. ບັນດາຂໍ້ລິເລີ່ມຂອງຫວຽດນາມເພື່ອຮັບປະກັນວ່າ ໃນປີ 2020 ແລະ ຊຸມປີຕໍ່ໄປ ອາຊຽນຈະສືບຕໍ່ຮ່ວມມືໃນການຊຸກຍູ້ຂະບວນສ້າງປະຊາຄົມເສດຖະກິດອາຊຽນ ໃຫ້ສອດຄ່ອງກັບກຳນົດເວລາທີ່ຜູ້ນຳອາຊຽນໄດ້ກຳນົດໄວ້, ປັບປຸງທີ່ຕັ້ງໃຈກາງຂອງອາຊຽນໃນບັນດາຂອບການຮ່ວມມືພາກພື້ນແລະທົ່ວໂລກ. ບັນດາປະເທດອາຊຽນໄດ້ຕີລາຄາສູງຕໍ່ຫວຽດນາມ ໃນການສົ່ງເສີມຄວາມຄິດລິເລີ່ມຕ່າງໆ ໃນປີອາຊຽນ 2020 ແລະ ມີການປະກອບຄຳເຫັນແລະຂໍ້ສະເໜີແນະຫຼາຍຢ່າງ ເພື່ອໃຫ້ຫວຽດນາມ ສືບຕໍ່ປັບປຸງບູລະນະຄວາມຄິດລິເລີ່ມນີ້ ກ່ອນທີ່ຈະຍື່ນສະເໜີຕໍ່ຂັ້ນລັດຖະມົນຕີ ເພື່ອປຶກສາຫາລື ແລະ ຮັບຮອງເອົາຢ່າງເປັນທາງການ.
ທ່າມກາງການແຜ່ລະບາດຂອງພະຍາດໂຄວິດ-19, ຫຼັງຈາກການປືກສາຫາລືກັບຜູ້ນຳອາຊຽນແລ້ວ, ນາຍົກລັດຖະມົນຕີ ຫງວຽນຊວັນຝຸກ ໄດ້ອອກຖະແຫຼງການປະທານ ອາຊຽນ ໃນວັນທີ 14 ກຸມພາ 2020, ຢືນຢັນກ່ຽວກັບຄວາມຕັດສິນໃຈ ແລະ ຄຳໝັ້ນສັນຍາການເມືອງລະດັບສູງຂອງອາຊຽນ ເພື່ອຄວບຄຸມແລະປ້ອງກັນພະຍາດ. ສະພາປະສານງານອາຊຽນ, ລວມມີບັນດາລັດຖະມົນຕີການຕ່າງປະເທດອາຊຽນ, ພາຍໃຕ້ການເປັນປະທານຂອງຮອງນາຍົກລັດຖະມົນຕີ ຟ້າມບິ່ງມິງ ໄດ້ຈັດຕັ້ງກອງປະຊຸມໃນວັນທີ 20 ກຸມພາ 2020 ເພື່ອແລກປ່ຽນມາດຕະການປະສານງານແລະຮ່ວມມືພາຍໃນອາຊຽນ ແລະ ຄູ່ຮ່ວມມື ເພື່ອຮັບມືກັບການລະບາດຂອງພະຍາດໂຄວິດ-19.
ຄວາມເປັນເຈົ້າການແລະຄວາມຍືດຫຍຸ່ນໃນບົດບາດຂອງປະທານອາຊຽນຂອງຫວຽດນາມ ໄດ້ສະແດງອອກຢ່າງຈະແຈ້ງ ໃນການຈັດກອງປະຊຸມອອນໄລ ໃນສະພາບການທີ່ມີການແຜ່ລະບາດຂອງພະຍາດໂຄວິດ-19. ກອງປະຊຸມສຸດຍອດພິເສດອາຊຽນ ແລະ ກອງປະຊຸມສຸດຍອດພິເສດອາຊຽນ + 3 (ຈີນ, ຍີ່ປຸ່ນ, ສ.ເກົາຫຼີ) ກ່ຽວກັບການຮັບມືກັບການແຜ່ລະບາດຂອງພະຍາດໂຄວິດ-19 ດ້ວຍຮູບການປະຊຸມອອນໄລໃນວັນທີ 14 ເມສາ 2020 ແມ່ນການສະແດງໃຫ້ເຫັນເຖິງພາລະບົດບາດອັນຕັ້ງໜ້າ ແລະເປັນເຈົ້າການຂອງຫວຽດນາມ ໃນຖານະເປັນປະທານອາຊຽນປີ 2020, ຍົກສູງຈິດໃຈເຊື່ອມຕໍ່ແລະເປັນເຈົ້າການໃນການປັບຕົວ, ຊຸກຍູ້ຄວາມສາມັກຄີເປັນເອກະພາບຂອງອາຊຽນ, ສົ່ງເສີມວິທີການເຂົ້າເຖິງສັງລວມແລະຄົບຊຸດ ລະຫວ່າງຂະແໜງການ, ລະຫວ່າງເສົາຄ້ຳຂອງປະຊາຄົມອາຊຽນທັງໝົດ ກໍຄືການຮ່ວມມືກັບບັນດາຄູ່ຮ່ວມມືໃນການຄວບຄຸມ, ປ້ອງກັນ ແລະ ຫຼຸດຜ່ອນຜົນກະທົບດ້ານເສດຖະກິດ - ສັງຄົມ ຂອງການແຜ່ລະບາດຂອງພະຍາດ. ອາຊຽນສືບຕໍ່ຮັກສາທ່ວງທ່າການຮ່ວມມືແລະເຊື່ອມຕໍ່, ພາໃຫ້ອາຊຽນຜ່ານຜ່າໄລຍະທີ່ຫຍຸ້ງຍາກແລະທ້າທາຍ. ກອງປະຊຸມໄດ້ຢືນຢັນວ່າ, ທັນທີທີ່ມີການແຜ່ລະບາດຂອງພະຍາດໂຄວິດ-19, ໃນຖານະປະທານອາຊຽນປີ 2020, ຫວຽດນາມໄດ້ເປັນເຈົ້າການແລະຕັ້ງໜ້າຊຸກຍູ້ຄວາມສາມັກຄີ, ຄວາມເປັນເອກະພາຍ ແລະ ປະສານຄວາມພະຍາຍາມຮ່ວມກັນຂອງອາຊຽນ ໃນການຮັບມືກັບໂລກລະບາດ. ບັນດາກອງປະຊຸມອອນໄລແມ່ນມາດຕະການທີ່ຈຳເປັນ ໂດຍຖືເປັນໂອກາດເພື່ອໃຫ້ອາຊຽນສະແດງຄວາມພະຍາຍາມພົ້ນອອກຈາກການລະບາດຂອງພະຍາດໂຄວິດ-19. ຜ່ານນັ້ນ, ອາຊຽນຢືນຢັນຄຳໝັ້ນສັນຍາ ແລະ ການຕັດສິນໃຈຢ່າງແຂງແຮງຂອງອາຊຽນ ແລະ ບັນດາປະເທດອາຊຽນ + 3 ໃນການປ້ອງກັນແລະຂະຈັດໄພອັນຕະລາຍຂອງການແຜ່ລະບາດຂອງພະຍາດຕໍ່ຊີວິດຂອງປະຊາຊົນ, ເຮັດໃຫ້ສະຖານະການທາງເສດຖະກິດສັງຄົມ ຂອງບັນດາປະເທດສະມາຊິກມີສະຖຽນລະພາບ.
ໃນຖານະປະທານອາຊຽນປີ 2020, ຫວຽດນາມໄດ້ຈັດກອງປະຊຸມອອນໄລພິເສດຂອງລັດຖະມົນຕີການຕ່າງປະເທດອາຊຽນ - ສະຫະລັດ ກ່ຽວກັບພະຍາດໂຄວິດ-19 ໃນວັນທີ 23 ເມສາ 2020. ເມື່ອສົນທະນາສະຖານະການການແຜ່ລະບາດຂອງພະຍາດດັ່ງກ່າວ, ບັນດາລັດຖະມົນຕີການຕ່າງປະເທດ ໄດ້ສະແດງຄວາມກັງວົນ ກ່ຽວກັບການແຜ່ກະຈາຍຢ່າງສັບສົນແລະໄວວາ ຂອງພະຍາດໂຄວິດ-19; ພ້ອມກັນນັ້ນ ກໍແລກປ່ຽນບົດຮຽນກ່ຽວກັບການຮັບມືກັບພະຍາດຂອງບັນດາປະເທດແລະພາກພື້ນ. ບົນພື້ນຖານນັ້ນ, ບັນດາປະເທດກໍໄດ້ແລກປ່ຽນ ແລະ ເປັນເອກະພາບກັນ ກ່ຽວກັບທິດທາງແລະມາດຕະການຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ຢືນຢັນວ່າຈະກຽມຄວາມພ້ອມທີ່ຈະຮ່ວມມືກັນຢ່າງແໜ້ນແຟ້ນ ແລະ ຊ່ວຍເຫຼືອເຊິ່ງກັນແລະກັນ ໃນຫຼາຍບັນຫາຂອງພາກພື້ນແລະສາກົນ. ບັນດາລັດຖະມົນຕີໄດ້ເຫັນດີຊຸກຍູ້ການແລກປ່ຽນຂໍ້ມູນຂ່າວສານ, ປະສົບການ ແລະການປະສານງານດ້ານນະໂຍບາຍ ແລະ ຍົກສູງຄວາມສາມາດໃນການຮັບມືກັບເຫດການສຸກເສີນດ້ານການແພດໃນອະນາຄົດ; ໃຫ້ຄຳໝັ້ນສັນຍາວ່າຈະຊ່ວຍເຫຼືອພົນລະເມືອງທີ່ໄດ້ຮັບຜົນກະທົບຈາກພະຍາດໂຄວິດ-19 ແລະ ປະສານການດຳເນີນງານເພື່ອຫຼຸດຜ່ອນຜົນກະທົບທາງເສດຖະກິດ-ສັງຄົມທີ່ເກີດຈາກພະຍາດໂຄວິດ-19; ຢືນຢັນທີ່ຈະຍູ້ແຮງຄວາມພະຍາຍາມໃນການຫຼຸດຜ່ອນຜົນກະທົບທາງເສດຖະກິດ-ສັງຄົມຈາກການແຜ່ລະບາດຂອງພະຍາດ, ຮັບປະກັນຄວາມໝັ້ນຄົງດ້ານລາຄາ ແລະຮັກສາລະບົບຕ່ອງໂສ້ການສະໜອງໃນພາກພື້ນ ແລະທົ່ວໂລກ, ໂດຍສະເພາະແມ່ນ ສິນຄ້າທີ່ຈຳເປັນ ແລະ ແລກປ່ຽນມາດຕະການຟື້ນຟູເສດຖະກິດໄລຍະຍາວ... ກອງປະຊຸມໄດ້ເນັ້ນໜັກວ່າ, ໃນສະພາບການບັນດາປະເທດກຳລັງສຸມໃສ່ຄວາມມານະພະຍາຍາມແລະແຫຼ່ງກຳລັງຂອງຕົນເຂົ້າໃນການຕ້ານພະຍາດ, ຈຳເປັນຕ້ອງຮັກສາຄວາມເປັນລະບຽບຮຽບຮ້ອຍໃນພາກພື້ນ ໂດຍອີງໃສ່ກົດລະບຽບ, ຮັບປະກັນຄວາມສະຫງົບ, ສະຖຽມລະພາບ, ຄວາມໝັ້ນຄົງ ແລະ ເຄົາລົບນັບຖືກົດໝາຍໃນພາກພື້ນ. ຍິ່ງກວ່າເວລາໃດໝົດ, ຈຳເປັນຕ້ອງເພີ່ມທະວີຄວາມໄວ້ວາງໃຈ ແລະຄວາມໂປ່ງໃສລະຫວ່າງບັນດາປະເທດໃນພາກພື້ນ, ຫຼີກລ່ຽງທຸກໆການກະທຳທີ່ເຮັດໃຫ້ສະຖານະການສັບສົນຂຶ້ນຕື່ມ.
ຕໍ່ຈາກນັ້ນ, ກອງປະຊຸມອອນໄລຂອງຄະນະເຮັດວຽກເຈົ້າໜ້າທີ່ອາວຸໂສດ້ານການປ້ອງກັນປະເທດອາຊຽນ (ADSOM WG) ໄດ້ຈັດຂຶ້ນທີ່ນະຄອນຮ່າໂນ້ຍ ໃນວັນທີ 12 ພຶດສະພາ 2020. ທີ່ກອງປະຊຸມ, ລັດຖະມົນຕີກະຊວງປ້ອງກັນປະເທດຂອງບັນດາປະເທດອາຊຽນ ໄດ້ເຫັນດີວ່າ, ເຖິງວ່າການລະບາດຂອງພະຍາດໂຄວິດ-19 ຈະຜັນແປຢ່າງໃດກໍ່ຕາມ, ແຕ່ການຮ່ວມມືອາຊຽນເວົ້າລວມ ແລະ ການຮ່ວມມືທາງດ້ານການປ້ອງກັນປະເທດອາຊຽນເວົ້າສະເພາະ ກໍຍັງຈະໄດ້ສືບຕໍ່. ບັນດາໂຄງການ, ແຜນການຂອງກອງປະຊຸມການທະຫານ, ການປ້ອງກັນປະເທດອາຊຽນ ໂດຍຫວຽດນາມເປັນປະທານຈັດຕັ້ງໃນປີ 2020 ກໍຈະສືບຕໍ່ໄດ້ຈັດຕັ້ງ.
ໃນສະພາບການທີ່ຂ້ອນຂ້າງພິເສດ ເມື່ອການລະບາດຂອງພະຍາດໂຄວິດ-19 ແຜ່ກະຈາຍໄປທົ່ວໂລກ, ສົ່ງຜົນກະທົບທາງລົບຕໍ່ທຸກໆດ້ານເສດຖະກິດ, ສັງຄົມ, ຊີວິດການເປັນຢູ່ຂອງທຸກປະເທດແລະປະຊາຊົນ, ໃນນັ້ນມີບັນດາປະເທດອາຊຽນເວົ້າລວມ ແລະການເປັນປະທານອາຊຽນປີ 2020 ຂອງຫວຽດນາມເວົ້າສະເພາະ. ເຖິງຢ່າງໃດກໍຕາມ, ບັນດາສິ່ງທ້າທາຍດັ່ງກ່າວແມ່ນກາລະໂອກາດເພື່ອໃຫ້ຫວຽດນາມສືບຕໍ່ເສີມຂະຫຍາຍບົດບາດເປັນປະທານອາຊຽນປີ 2020, ເຊິ່ງສະແດງອອກຜ່ານຄວາມຈິງທີ່ວ່າ ພວກເຮົາໄດ້ຈັດບັນດາກອງປະຊຸມອອນໄລຢ່າງເປັນເຈົ້າການແລະທັນເວລາໃນອາຊຽນ ແລະ ກັບຄູ່ຮ່ວມງານ ກ່ຽວກັບການປ້ອງກັນແລະຕ້ານພະຍາດໂຄວິດ-19, ສະເໜີຂໍ້ລິເລີ່ມທີ່ມີຄຸນຄ່າຫຼາຍຢ່າງ, ຄືກັນກັບຫົວຂໍ້ຂອງປີ 2020 “ການເຊື່ອມຕໍ່ແລະເປັນເຈົ້າການໃນການປັບຕົວ”. ຄຽງຄູ່ກັນນັ້ນ, ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນຄັ້ງທີ 36 ທີ່ຈະຈັດຂຶ້ນໃນທ້າຍເດືອນມິຖຸນາ 2020, ຫວຽດນາມໄດ້ຜັນຂະຫຍາຍ, ດັດແປງ, ປັບປຸງ ການເຄື່ອນໄຫວແລະຄວາມຄິດລິເລີ່ມ ໃນຂອບຂອງການເປັນປະທານອາຊຽນປີ 2020 ພາຍໃຕ້ຜົນກະທົບຂອງການລະບາດຂອງພະຍາດໂຄວິດ-19. ມາຮອດປະຈຸບັນ ບັນດາກະຊວງ, ຂະແໜງການທີ່ກ່ຽວຂ້ອງ ໄດ້ຍູ້ແຮງຄວາມຄືບໜ້າແລະສຳເລັດໂດຍພື້ນຖານ ບັນດາເອກະສານແລະມາດຕະການຜັນຂະຫຍາຍ ເພື່ອໃຫ້ບັນດາປະເທດອາຊຽນປະກອບຄຳເຫັນ, ຫຼັງຈາກນັ້ນ ຍື່ນສະເໜີຕໍ່ສະພາປະສານງານອາຊຽນ (ACC). ໃນແຜນການຈັດກອງປະຊຸມສຸດຍອດທີ່ຈະມາເຖິງ, ຫວຽດນາມຈະສະເໜີແນະມາດຕະການຕ່າງໆ ເພື່ອປັບແຜນການເຮັດວຽກໃນຂົງເຂດທີ່ຮັບຜິດຊອບໃຫ້ເໝາະສົມກັບສະຖານະການໃໝ່, ເປັນຕົ້ນແມ່ນ ແຜນງານສະເພາະໃນການຈັດຕັ້ງປະຕິບັດເນື້ອໃນຕ່າງໆ ເພື່ອຮັບປະກັນການຈັດຕັ້ງປະຕິບັດຂໍ້ລິເລີ່ມຂອງການເປັນປະທານອາຊຽນປີ 2020 ແລະເສັ້ນທາງພັດທະນາອາຊຽນໃນວິໄສທັດ 2025 ແລະ ຍຸດທະສາດໄລຍະຍາວ.
ການເປັນປະທານອາຊຽນໃນປີ 2020 ມີສິ່ງທ້າທາຍໃໝ່ຫຼາຍຢ່າງ, ແຕ່ກໍເປັນໂອກາດທທີ່ດີສຳລັບການພົວພັນຕ່າງປະເທດຫຼາຍຝ່າຍຂອງຫວຽດນາມ. ດ້ວຍຄວາມຕັດສິນໃຈແລະການກະກຽມຢ່າງລະອຽດຖີ່ຖ້ວນ, ຫວຽດນາມເຊື່ອໝັ້ນວ່າ ຈະສຳເລັດຢ່າງດີເດັ່ນໜ້າທີ່ພົວພັນຕ່າງປະເທດປີ 2020. ໃນນັ້ນ, ປີ 2020 ຈະສ້າງສິ່ງປະທັບໃຈຂອງຫວຽດນາມ ໃນຄວາມພະຍາຍາມກໍ່ສ້າງອາຊຽນທີ່ສາມັກຄີເປັນປຶກແຜ່ນ, ເປັນເອກະພາບ, ສັນຕິພາບ ແລະ ວັດທະນາຖາວອນ./.
----------------------------
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 944 (ເດືອນມິຖຸນາ 2020)