ວກ. - ໃນວັນທີ 28 ກໍລະກົດ 1995, ຫວຽດນາມເຂົ້າຮ່ວມສະມາຄົມບັນດາປະເທດແຫ່ງອາຊີຕາເວັນອອກສຽງໃຕ້ (ອາຊຽນ) ຢ່າງເປັນທາງການ. ຜ່ານ 25 ປີທີ່ເຂົ້າເປັນສະມາຊິກອາຊຽນ, ຈາກສະມາຊິກໃໝ່, ຫວຽດນາມໄດ້ກາຍເປັນສະມາຊິກທີ່ຫ້າວຫັນ, ຕັ້ງໜ້າ ແລະ ມີຄວາມຮັບຜິດຊອບ ໃນການເຄື່ອນໄຫວຮ່ວມກັນ ໂດຍມີການປະກອບສ່ວນທີ່ສຳຄັນແລະແທດຈິງຫຼາຍຂຶ້ນ ເຂົ້າໃນການເຕີບໃຫຍ່ ແລະຂະຫຍາຍຕົວ ຂອງສະມາຄົມອີກດ້ວຍ. ໃນເວລາຕໍ່ໄປນີ້, ອາຊຽນສືບຕໍ່ເປັນປັດໄຈທີ່ສຳຄັນໃນການແກ້ໄຂບັນຫາຄວາມໝັ້ນຄົງແລະການພັດທະນາຂອງພາກພື້ນ. ອາຊຽນຍັງເປັນຈຸດສຸມໃຈກາງທີ່ບຸລິມະສິດ ໃນການຍົກລະດັບນະໂຍບາຍການຕ່າງປະເທດແບບຫຼາຍຝ່າຍຂອງຫວຽດນາມ, ໃນນັ້ນເນັ້ນເຖິງການປະກອບສ່ວນເຂົ້າໃນການສ້າງ ແລະ ກຳນົດສະຖາບັນພະຫຸພາຄີ, ເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບ ຮ່ວມກັບບັນດາປະເທດອາຊຽນ ເພື່ອກໍ່ສ້າງສະມາຄົມອາຊຽນທີ່ເຂັ້ມແຂງ.
ການເຂົ້າຮ່ວມອາຊຽນ: ຜົນຂອງຂະບວນການປ່ຽນແປງໃໝ່ຈິນຕະນາການ
ແລະ ນະໂຍບາຍການຕ່າງປະເທດ ຂອງພັກກອມມູນິດຫວຽດນາມ
ການຕັດສິນໃຈຂອງຫວຽດນາມໃນການເຂົ້າຮ່ວມອາຊຽນ ແມ່ນຜົນສຳເລັດຂອງການປ່ຽນແປງໃໝ່ຈິນຕະນາການການຕ່າງປະເທດຂອງພັກກອມມູນິດຫວຽດນາມ, ໃນນັ້ນມີການປ່ຽນແປງໃໝ່ຄວາມຮັບຮູ້ກ່ຽວກັບສະຖານະການແລະການພົວພັນສາກົນໃນ ອາຊີຕາເວັນອອກສຽງໃຕ້. ກອງປະຊຸມໃຫຍ່ຄັ້ງທີ 6 ຂອງພັກກອມມູນິດຫວຽດນາມ (ປີ 1986) ໄດ້ວາງແຜນນະໂຍບາຍ “ເປີດກວ້າງການພົວພັນກັບທຸກໆປະເທດບົນພື້ນຖານຫຼັກການການຢູ່ຮ່ວມກັນຢ່າງສັນຕິ”(1), ເປັນຂີດໝາຍບາດກ້າວທຳອິດຂອງການຫັນທິດຈິນຕະນາການກ່ຽວກັບການຕ່າງປະເທດໃນສະໄໝປ່ຽນແປງໃໝ່. ໃນພາກພື້ນ, ຫວຽດນາມ “ປາດຖະໜາແລະພ້ອມແລ້ວທີ່ຈະຮ່ວມມືກັບບັນດາປະເທດໃນພາກພື້ນ ເພື່ອເຈລະຈາແກ້ໄຂບັນດາບັນຫາຢູ່ອາຊີຕາເວັນອອກສ່ຽງໃຕ້, ສ້າງຕັ້ງການພົວພັນຂອງການຢູ່ຮ່ວມກັນຢ່າງສັນຕິ, ສ້າງອາຊີຕາເວັນອອກສຽງໃຕ້ໃຫ້ເປັນພາກພື້ນແຫ່ງສັນຕິພາບ, ສະຖຽມລະພາບ ແລະການຮ່ວມມື”(2). ມະຕິເລກທີ 13/NQ-TW, ວັນທີ 20 ພຶດສະພາ 1988, ຂອງກົມການເມືອງຄະນະບໍລິຫານງານສູນກາງພັກກອມມູນິດຫວຽດນາມ ສະໄໝທີ 6, ກ່ຽວກັບ “ໜ້າທີ່ແລະນະໂຍບາຍການຕ່າງປະເທດໃນສະພາບການໃໝ່” ໄດ້ເນັ້ນວ່າ ສັນຕິພາບແລະການພັດທະນາເສດຖະກິດ ແມ່ນຜົນປະໂຫຍດສູງສຸດ, ຕາມນັ້ນ ແມ່ນນະໂຍບາຍປ່ຽນແປງການຕໍ່ສູ້ ຈາກການປະເຊີນໜ້າ ມາເປັນການຕໍ່ສູ້ແລະການຢູ່ຮ່ວມກັນຢ່າງສັນຕິ(3). ທັດສະນະນີ້ສືບຕໍ່ໄດ້ຮັບການຮັກສາໄວ້ໃນບົດລາຍງານຂອງກອງປະຊຸມສູນກາງພັກຄັ້ງທີ 6 ສະໄໝທີ 6 (ເດືອນມີນາ 1989) ແລະ ໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ສັງຄົມນິຍົມ (ປີ 1991) ຂອງພັກກອມມູນິດຫວຽດນາມ.
ຄວາມໝາຍຂອງນະໂຍບາຍຂ້າງເທິງນີ້ແມ່ນ ຫວຽດນາມໄດ້ກຳນົດຢ່າງຖືກຕ້ອງ ເຖິງຄວາມສຳຄັນຂອງຄວາມໝັ້ນຄົງໃນອາຊີຕາເວັນອອກສ່ຽງໃຕ້, ເຊື່ອມຕິດສັນຕິພາບແລະສະຖຽມລະພາບຂອງພາກພື້ນ ກັບຄວາມໝັ້ນຄົງແລະການພັດທະນາຂອງຫວຽດນາມ. ຫວຽດນາມໄດ້ເລືອກເອົາບັນດາປະເທດອາຊຽນເພື່ອເປີດການເຈລະຈາ ເພື່ອແກ້ໄຂບັນຫາກຳປູເຈຍ. ດ້ວຍຄວາມພະຍາຍາມຂົນຂວາຍຂອງອິນໂດເນເຊຍ, ອາຊຽນໄດ້ຈັດຕັ້ງບັນດາກອງປະຊຸມບໍ່ເປັນທາງການ ຈາກາກຕາ (Jarkarta Informal Meeting - JIM) ດ້ວຍການເຂົ້າຮ່ວມຂອງອາຊຽນ, ຫວຽດນາມ, ລາວ ແລະ 4 ຝ່າຍໃນກຳປູເຈຍ ຢູ່ນະຄອນຫຼວງຈາກາຕາ (ອິນໂດເນເຊຍ), ລວມມີ JIM-1 (ເດືອນກໍລະກົດ 1988), JIM-2 (ເດືອນກຸມພາ 1989) ແລະ JIM-3 (ເດືອນກຸມພາ 1990) ເພື່ອຊອກຫາມາດຕະການການເມືອງໃຫ້ແກ່ບັນຫາກຳປູເຈຍ(4). ເຖິງວ່າຈະມີຂໍ້ຈຳກັດໃນຜົນໄດ້ຮັບທີ່ສຳຄັນ, ແຕ່ກອງປະຊຸມບໍ່ເປັນທາງການເຫຼົ່ານີ້ ກໍ່ໄດ້ສະແດງໃຫ້ເຫັນເຖິງບົດບາດຂອງອາຊຽນ ໃນການແກ້ໄຂຂໍ້ຂັດແຍ້ງໃນພາກພື້ນ, ແລະເປັນຄັ້ງທຳອິດທີ່ຜູ້ຕາງໜ້າຂອງປະເທດໃນອາຊີຕາເວັນອອກສຽງໃຕ້ສ່ວນໃຫຍ່ສາມາດປຶກສາເຈລະຈາ ກ່ຽວກັບບັນຫາກຳປູເຈຍໂດຍກົງ. ຫຼັງຈາກນັ້ນ ບັນດາປະເທດໃນອາຊຽນກໍ່ເອົາຊະນະການປິດລ້ອມຂວ້ຳບາດຂອງອາເມລິກາ ແລະບັນດາປະເທດຕາເວັນຕົກເທື່ອລະກ້າວ ເພື່ອປັບປຸງການພົວພັນກັບຫວຽດນາມ ເຖິງວ່າບັນຫາກຳປູເຈຍຍັງບໍ່ໄດ້ຮັບການແກ້ໄຂກໍ່ຕາມ(5).
ກອງປະຊຸມໃຫຍ່ຄັ້ງທີ່ 7 ຂອງພັກອມມູນິດຫວຽດນາມ (ປີ 1991) ໄດ້ເຊີດຊູຈິດໃຈ “ຫວຽດນາມຫວັງວ່າຈະເປັນເພື່ອນກັບທຸກໆປະເທດໃນປະຊາຄົມໂລກ, ສູ້ຊົນເພື່ອສັນຕິພາບ, ເອກະລາດ ແລະ ການພັດທະນາ”, ແລະວາງແຜນນະໂຍບາຍກ່ຽວກັບ “ການພັດທະນາການພົວພັນມິດຕະພາບ ກັບບັນດາປະເທດອາຊີຕາເວັນອອກສ່ຽງໃຕ້ ແລະອາຊີ - ປາຊີຟິກ, ສູ້ຊົນເພື່ອໃຫ້ອາຊີຕາເວນອອກສ່ຽງໃຕ້ມີສັນຕິພາບ, ມິດຕະພາບ ແລະການຮ່ວມມື”(6). ນີ້ເປັນການຢືນຢັນຈິນຕະນາການກ່ຽວກັບການຕ່າງປະເທດໃໝ່ຂອງຫວຽດນາມ ກຽມຄວາມພ້ອມເພື່ອພັດທະນາການພົວພັນມິດຕະພາບກັບບັນດາປະເທດອາຊຽນ ບົນພື້ນຖານຜົນປະໂຫຍດແຫ່ງຊາດ. ສິ່ງເຫຼົ່ານີ້ຍັງສະແດງເຖິງຄວາມສາມາກຳທ່າອຽງເພີ່ມທະວີການຮ່ວມມື, ເຊື່ອມໂຍງໃນພາກພື້ນ ແລະ ຕີລາຄາຢ່າງຖືກຕ້ອງການດັດປັບນະໂຍບາຍຂອງບັນດາປະເທດອາຊຽນ ຈາກການປະເຊີນໜ້າ ມາເປັນການຮ່ວມມືກັບຫວຽດນາມ. ຄຳຖະແຫຼງຂອງນາຍົກລັດຖະມົນຕີປະເທດໄທ ທ່ານ ຊາດຊາຍ ຈູນຫາວັນ, ປີ 1989: “ປ່ຽນອິນໂດຈີນຈາກສະໜາມຮົບເປັນຕະຫຼາດ” ໄດ້ປະກອບສ່ວນເຮັດໃຫ້ຄວາມແຕກແຍກທາງພູມສາດ - ການເມືອງໃນອາຊີຕາເວັນອອກສຽງໃຕ້ຈາງຫາຍໄປ, ເປີດໂອກາດເພື່ອເຮັດໃຫ້ອາຊຽນແລະຫວຽດນາມ ຫຍັບເຂົ້າໃກ້ກັນກວ່າອີກ(7). ກອງປະຊຸມສູນກາງພັກຄັ້ງທີ 3 ສະໄໝທີ 7 (ປີ 1992) ໄດ້ວາງແຜນນະໂຍບາຍກ່ຽວກັບການເຂົ້າຮ່ວມເວທີປາໄສສົນທະນາກັບອາຊຽນ ແລະ ຄົ້ນຄວ້າກ່ຽວກັບການເຂົ້າຮ່ວມອາຊຽນໃນອະນາຄົດ(8).
ເພື່ອຜັນຂະຫຍາຍແຜນນະໂຍບາຍ ແລະ ນະໂຍບາຍໃໝ່, ຫວຽດນາມໄດ້ຍູ້ແຮງຂະບວນການເຂົ້າຮ່ວມອາຊຽນ. ໃນປີ 1992, ທີ່ກອງປະຊຸມສຸດຍອດອາຊຽນງຄັ້ງທີສີ່, ຫວຽດນາມໄດ້ລົງນາມໃນເອກະສານກ່ຽວກັບການເຂົ້າຮ່ວມ ສົນທິສັນຍາມິດຕະພາບ ແລະການຮ່ວມມືໃນອາຊີຕາເວັນອອກສ່ຽງໃຕ້ (TAC), ກາຍເປັນຜູ້ສັງເກດການຂອງ ອາຊຽນ, ເຂົ້າຮ່ວມບັນດາກອງປະຊຸມຂັ້ນລັດຖະມົນຕີການຕ່າງປະເທດອາຊຽນປະຈຳປີ ແລະ ເຂົ້າຮ່ວມໃນກິດຈະກຳການຮ່ວມມືສະເພາະໃນ 5 ຂົງເຂດ, ລວມທັງວິທະຍາສາດ - ເຕັກໂນໂລຊີ, ສິ່ງແວດລ້ອມ, ສາທາລະນະສຸກ, ວັດທະນະທຳຖະແຫຼງຂ່າວ ແລະ ພັດທະນາສັງຄົມ. ປີ 1993, ເມື່ອງໃນໂອກາດການຢ້ຽມຢາມປະເທດໄທ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໂດ໋ເມື່ອຍ ໄດ້ປະກາດນະໂຍບາຍ 4 ຈຸດຮ່ວມກັບອາຊຽນ, ສະແດງຄວາມປາດຖະໜາຢາກ “ເຂົ້າຮ່ວມອາຊຽນໃນເວລາທີ່ເໝາະສົມ”(9). ໃນການຢ້ຽມຢາມປະເທດອິນໂດເນເຊຍຢ່າງເປັນທາງການ ໃນເດືອນພຶດສະພາ 1994, ປະທານປະເທດ ສສ ຫວຽດນາມ ເລດຶກແອງ ໄດ້ປະກາດວ່າ “ຫວຽດນາມພວມຊຸກຍູ້ວຽກງານທີ່ຈຳເປັນ ເພື່ອກາຍເປັນສະມາຊິກສົມບູນຂອງອາຊຽນໃນໄວໆນີ້”(10). ໃນວັນທີ 17 ຕຸລາ 1994, ທ່ານຫງວຽນແມ້ງເກິ່ມ ລັດຖະມົນຕີກະຊວງການຕ່າງປະເທດຫວຽດນາມ ໄດ້ສົ່ງຈົດໝາຍເຖິງປະທານຄະນະກຳມະການປະຈຳອາຊຽນ ໄດ້ຍົກບັນຫາການເຂົ້າເປັນສະມາຊິກອາຊຽນຢ່າງເປັນທາງການ. ພິທີຮັບຫວຽດນາມເຂົ້າເປັນສະມາຊິກລຳດັບທີ 7 ຂອງອາຊຽນ ໄດ້ຈັດຂຶ້ນເມື່ອວັນທີ 28 ກໍລະກົດ 1995 ໃນກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 28 ຢູ່ປະເທດ ບຣູໄນ.
ການຕັດສິນໃຈເຂົ້າເປັນສະມາຊິກອາຊຽນ ແມ່ນໝາກຜົນທີ່ຊັດເຈນ ແລະເປັນຂໍ້ພິສູດເຖິງນະໂຍບາຍການຕ່າງປະເທດທີ່ສັນຕິພາບ, ເອກະລາດ, ເປັນເຈົ້າຕົນເອງ, ການຂະຫຍາຍການພົວພັນສາກົນເປັນຫຼາຍກ້ຳຫຼາຍຝ່າຍ, ເປັນເຈົ້າການເຊື່ອມໂຍງພາກພື້ນ ແລະ ສາກົນຂອງຫວຽດນາມ ໃນໄລຍະຫຼັງສົງຄາມເຢັນ. ການເປີດການພົວພັນກັບອາຊຽນ ເຊິ່ງທັງເລີ່ມຕົ້ນຈາກຄວາມຕ້ອງການອັນຮີບດ່ວນ ໃນການທຳລາຍການປິດລ້ອມທາງເສດຖະກິດແລະການໂດດດ່ຽວທາງດ້ານການເມືອງ ໃນທ້າຍທົດສະວັດທີ 80 ແລະຕົ້ນທົດສະວັດທີ 90 ຂອງສະຕະວັດທີ 20, ແລະທັງເພື່ອຮັບໃຊ້ຜົນປະໂຫຍດຍຸດທະສາດອັນຍາວນານຂອງຫວຽດນາມ.
ການກາຍເປັນສະມາຊິກອາຊຽນ ໄດ້ຊ່ວຍໃຫ້ຫວຽດນາມມີເງື່ອນໄຂສ້າງແລະຮັກສາສິ່ງແວດລ້ອມສັນຕິພາບ, ສະຖຽມລະພາບ, ແລະອຳນວຍຄວາມສະດວກໃຫ້ຫວຽດນາມພັດທະນາເສດຖະກິດ, ຊຸກຍູ້ການຫັນປະເທດເປັນອຸດສາຫະກຳ ທັນສະໄໝ ໃນສະພາບການທີ່ທ່າອຽງເຊື່ອມໂຍງພາກພື້ນ ແລະໂລກາພິບັດພວມເກີດຂຶ້ນບັບມື້ນັບໄວແລະເຂັ້ມແຂງໃນຫຼາຍຂົງເຂດ. ໂດຍຜ່ານການເຂົ້າຮ່ວມຢ່າງຕັ້ງໜ້າ ໃນການກຳນົດທິດທາງພັດທະນາ ແລະນະໂຍບາຍໃຫຍ່ຂອງອາຊຽນ, ຫວຽດນາມມີເງື່ອນໄຂໃນການຊຸກຍູ້ລະດັບບຸລິມະສິດ ແລະຜົນປະໂຫຍດຂອງຊາດຢ່າງມີປະສິດທິຜົນ ໂດຍສອດຄ່ອງກັບຜົນປະໂຫຍດສ່ວນລວມຂອງພາກພື້ນ, ຍົກສູງຄວາມສາມາດແກ້ໄຂສິ່ງທ້າທາຍທາງດ້ານຄວາມປອດໄພແບບດັ້ງເດີມ ແລະຄວາມປອດໄພທີ່ເປັນແບບດັ້ງເດີມ, ເພີ່ມທະວີຖານະຕຳແໜ່ງ ແລະພາລະບົດບາດໃນບັນດາບັນຫາພາກພື້ນແລະສາກົນ ໂດຍອີງໃສ່ການປະສານສົມທົບຫຼັກໝັ້ນ ແລະການກະທຳລະຫວ່າງປະເທດສະມາຊິກ. ພິເສດ, ຫວຽດນາມ ແລະບັນດາປະເທດສະມາຊິກອາຊຽນອື່ນໆ ໄດ້ຢຶດຖືຫຼັກການການແກ້ໄຂຂໍ້ຂັດແຍ່ງໂດຍສັນຕິວິທີ, ປະກອບສ່ວນສຳຄັນເຂົ້າໃນການເພີ່ມທະວີສັນຕິພາບ, ສະຖຽມລະພາບ ແລະການຮ່ວມມື ໃນອາຊີຕາເວັນອອກສ່ຽງໃຕ້. ຫຼັກໝັ້ນຮ່ວມກັນ ແລະບົດບາດເປັນໃຈກາງຂອງອາຊຽນ ໄດ້ສ້າງເງື່ອນໄຂໃຫ້ຫວຽດນາມໝູນໃຊ້ບັນດາຫຼັກການ ແລະກົນໄກພາກພື້ນ ເພື່ອປັບປຸງຫຼັກໝັ້ນ ແລະຖານະຕຳແໜ່ງ ໃນການປົກປັກຮັກສາອຳນາດອະທິປະໄຕ, ສິດອະທິປະໄຕ ແລະຜົນປະໂຫຍດຢູ່ໃນທະເລຕາເວັນອອກ.
ເຂົ້າຮ່ວມອາຊຽນ, ຫວຽດນາມຍັງຍາດແຍ່ງເອົາການຮ່ວມມື, ການຊ່ວຍເຫຼືອ ແລະ ແຫຼ່ງພະລັງຈາກອາຊຽນແລະບັນດາຄູ່ຮ່ວມມື ເພື່ອຮັບໃຊ້ເປົ້າໝາຍພັດທະນາເສດຖະກິດ - ສັງຄົມ, ໂດຍສະເພາະແມ່ນ ກ່ຽວກັບການລົບລ້າງ ແລະຫຼຸດຜ່ອນຄວາມທຸກຍາກ, ພັດທະນາແຫຼ່ງບຸກຄະລາກອນ, ປັບປຸງສະມັດຕະພາບການອອກແຮງງານ ແລະຄວາມສາມາດແຂ່ງຂັນລະດັບຊາດ, ປະກອບສ່ວນເຂົ້າໃນການປົວແປງຊີວິດຂອງປະຊາຊົນ ໂດຍຜ່ານການຍົກສູງສະວັດດີການ ແລະຄວາມປອດໄພທາງສັງຄົມ, ປະສົມກົມກຽວມາດຕະຖານ ເພື່ອການຍອມຮັບຄຸນສົມບັດດ້ານການສຶກສາ ແລະທັກສະວິຊສຊີບໃນກຸ່ມປະເທດອາຊຽນ. ແຮງງານທີ່ມີສີມືຂອງຫວຽດນາມ ມີສິດເສລີພາບໃນການເຄື່ອນໄຫວ ແລະມີໂອກາດໃນການເຮັດວຽກໃນພາກພື້ນ. ພື້ນຖານມາດຕະຖານຫວຽດນາມກ່ຽວກັບຄຸນນະພາບສິນຄ້າ, ບໍລິການ, ຊັບພະຍາກອນມະນຸດ, ການປົກປ້ອງສິດຂອງຄົນງານ ແລະການເບິ່ງແຍງດູແລສຸຂະພາບຂອງປະຊາຊົນ ກໍ່ໄດ້ຮັບການຍົກສູງ. ບົດຮຽນໃນການຄຸ້ມຄອງ ແລະຄວາມສາມາດແກ້ໄຂບັນດາບັນຫາຂ້າມຊາດໄດ້ຮັບການເພີ່ມທະວີເຊັ່ນ ສິ່ງແວດລ້ອມ, ໄພພິບັດ, ການປ່ຽນແປງສະພາບດິນຟ້າອາກາດ ແລະໂລກລະບາດ.
ການເຊື່ອມໂຍງເຂົ້າກັບອາຊຽນ ກໍ່ໄດ້ສ້າງກຳລັງໜູນໃຫ້ຫວຽດນາມເປີດກວ້າງການເຊື່ອມໂຍງເສດຖະກິດສາກົນ. ອາຊຽນແມ່ນຕະຫຼາດນຳເຂົ້າແລະສົ່ງອອກທີ່ສຳຄັນ ແລະເປັນແຫຼ່ງທີ່ມາຂອງການລົງທຶນໂດຍກົງຈາກຕ່າງປະເທດທີ່ສຳຄັນ ໃນໄລຍະທີ່ຫວຽດນາມເລີ່ມເປີດກວ້າງເສດຖະກິດ. ການຮ່ວມມືເສດຖະກິດໃນອາຊຽນສ້າງເງື່ອນໄຂໃຫ້ຫວຽດນາມສົ່ງເສີມການລົງທຶນ ແລະ ເປີດກວ້າງຕະຫຼາດໃຫ້ສິນຄ້າແລະບໍລິການຂອງຫວຽດນາມໄປຍັງປະເທດອາຊຽນແລະບັນດາປະເທດຄູ່ຮ່ວມມືຂອງອາຊຽນ. ລວມຍອດມູນຄ່າການນຳເຂົ້າແລະສົ່ງອອກຂອງຫວຽດນາມກັບອາຊຽນ ນັບມື້ນັບເພີ່ມຂຶ້ນ,ໃນປີ 2019 ບັນລຸໄດ້ 23,4 ຕື້ໂດລາສະຫະລັດ(11). ປະຈຸບັນ ອາຊຽນແມ່ນຕະຫຼາດສົ່ງອອກໃຫຍ່ທີ 4 ຂອງຫວຽດນາມ ຫຼັງຈາກສະຫະລັດອາເມລິກາ, ສະຫະພາບເອີຣົບ (EU) ແລະ ຈີນ. ອາຊຽນກໍ່ໄດ້ຊ່ວຍເຫຼືອໃຫ້ຫວຽດນາມຫຼຸດຜ່ອນຊ່ອງຫວ່າງທາງດ້ານການພັດທະນາ ແລະ ເຊື່ອມຕໍ່ໄດ້ເປັນຢ່າງດີ ກັບບັນດາພື້ນຖານເສດຖະກິດຢູ່ໃນ ແລະ ນອກພາກພື້ນ. ການເຂົ້າຮ່ວມການເຊື່ອມໂຍງເສດຖະກິດອາຊຽນ ສ້າງແຮງຂັບເຄື່ອນໃຫ້ຫວຽດນາມປັບປຸງເສດຖະກິດການຕະຫຼາດໃຫ້ດີຂຶ້ນ, ປັບປຸງສະພາບແວດລ້ອມການທຸລະກິດ, ສ້າງໂຄງປະກອບເສດຖະກິດຄືນໃໝ່, ຍາດແຍ່ງການຊ່ວຍເຫຼືອຈາກບັນດາໂຄງການຮ່ວມມືອາຊຽນ ກ່ຽວກັບການຮັດແຄບຊ່ອງຫວ່າງການພັດທະນາ ແລະການຮ່ວມມືໃນອະນຸພາກພື້ນແມ່ນໍ້າຂອງ, ສ້າງພື້ນຖານໃຫ້ຫວຽດນາມເຂົ້າຮ່ວມບັນດາສັນຍາການຄ້າເສລີຮຸ່ນໃໝ່ເຊັ່ນ ສັນຍາກ່ຽວກັບຄູ່ຮ່ວມມືຮອບດ້ານແລະກ້າວໜ້າຂ້າມປາຊິຟິກ (CPTPP), ສັນຍາການຄ້າເສລີຫວຽດນາມ - ອີຢູ (EVFTA) ແລະ ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP).
ອາຊຽນເປັນ “ບ່ອນສະແດງຄວາມສາມາດ” ທີ່ຊ່ວຍໃຫ້ຫວຽດນາມເກັບກຳໄດ້ບົດຮຽນກ່ຽວກັບການເຊື່ອມໂຍງສາກົນ ແລະ ມີທີ່ຕັ້ງດີກວ່າ ເພື່ອເຂົ້າຮ່ວມແລະມີພາລະບົດບາດອັນຕັ້ງໜ້າ ໃນບັນດາອົງການຈັດຕັ້ງຮ່ວມມືຫຼາຍຝ່າຍທີ່ກວ້າງໃຫຍ່ກວ່າເຊັ່ນ: ເວທີປາໄສຮ່ວມມືອາຊີ - ປາຊີຟິກ (APEC), ເວທີປາໄສອາຊີ - ເອີຣົບ (ASEM), ອົງການການຄ້າໂລກ (WTO) ແລະອົງການສະຫະປະຊາຊາດ. ການເຂົ້າຮ່ວມການຮ່ວມມືແລະການເຊື່ອມໂຍງໃນອາຊຽນ ແມ່ນໂອກາດທີ່ຈະຊ່ວຍໃຫ້ຫວຽດນາມຝຶກອົບຮົມພະນັກງານທີ່ເຮັດວຽກໃນສະພາບແວດລ້ອມຫຼາຍຝ່າຍ, ເຊື່ອມໂຍງພາກພື້ນແລະສາກົນ, ປັບປຸງປະສິດທິຜົນການດຳເນີນງານຂອງການຈັດຕັ້ງກົນຈັກ ແລະແບບແຜນເຮັດວຽກ, ສ້າງຄວາມຫັນປ່ຽນທີ່ຕັ້ງໜ້າໃນການກໍ່ສ້າງ ແລະປົວແປງບູລະນະນະໂຍບາຍ, ກົດໝາຍແລະລະບຽບການພາຍໃນປະເທດ ໃຫ້ເໝາະສົມກັບຄວາມຮຽກຮ້ອງຕ້ອງການໃນການເຊື່ອມໂຍງສາກົນທີ່ນັບມື້ນັບເລິກເຊິ່ງກວ້າງຂວາງ. ສິ່ງທີ່ສຳຄັນບໍ່ໜ້ອຍແມ່ນ, ອາຊຽນໄດ້ຊ່ວຍເພີ່ມມູນຄ່າພູມສາດ - ຍຸດທະສາດຂອງຫວຽດນາມ. ໃນຖານະເປັນສະມາຊິກອາຊຽນ, ຫວຽດນາມມີເງື່ອນໄຂທີ່ສະດວກ ເພື່ອເພີ່ມທະວີແລະເປີດກວ້າງການພົວພັນກັບບັນດາປະເທດໃຫຍ່ ແລະສູນກາງອຳນາດຂອງໂລກເຊັ່ນ ອາເມລິກາ, ຈີນ, ຍີ່ປຸ່ນ, ອີຢູ. ສະຫຼຸບລວມແລ້ວ, 25 ປີທີ່ຜ່ານມາໄດ້ຢືນຢັນວ່າ ນະໂຍບາຍເຂົ້າຮ່ວມອາຊຽນແມ່ນການຕັດສິນໃຈທີ່ຖືກຕ້ອງ, ທັນເວລາ, ມີປະຫວັດສາດແລະຍຸດທະສາດ ທີ່ສຳຄັນຂອງຫວຽດນາມ.
ການປະກອບສ່ວນຂອງຫວຽດນາມໃນອາຊຽນ
ທັນທີພາຍຫຼັງເຂົ້າເປັນສະມາຊິກອາຊຽນ, ການທີ່ຫວຽດນາມສົ່ງເສີມຢ່າງຕັ້ງໜ້າໃຫ້ລາວ, ມຽນມາ ແລະ ກຳປູເຈຍ ເຂົ້າເປັນສະມາຊິກອາຊຽນ ໄດ້ປະກອບສ່ວນເຂົ້າໃນການປະຕິບັດຄວາມໄຝ່ຝັນກ່ຽວກັບ “ຄອບຄົວໃຫຍ່” ອາຊຽນທີ່ປະກອບດ້ວຍ 10 ປະເທດໃນອາຊີຕາເວັນອອກສ່ຽງໃຕ້. ອາຊຽນ-10 ແມ່ນການເລີ່ມຕົ້ນໄລຍະການພັດທະນາຄຸນນະພາບຂອງອາຊຽນ, ຈາກອົງການລະດັບອະນຸພາກພື້ນ ກາຍເປັນອົງການຈັດຕັ້ງໃນພາກພື້ນອາຊີຕາເວັນອອກສ່ຽງໃຕ້, ວາງດິນຈີກ້ອນທຳອິດສຳລັບຂະບວນການສ້າງປະຊາຄົມອາຊຽນ (AC)(12). ການປະກອບສ່ວນສະເພາະຂອງຫວຽດນາມໃນອາຊຽນ ສະແດງໃຫ້ເຫັນເປັນລຳດັບໂດຍຜ່ານບັນດາຂີດໝາຍ ໃນການດຳລົງຕຳແໜ່ງໜ້າທີ່ໝູນວຽນທີ່ປະສົບຄວາມສຳເລັດ ລວມມີການເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີຫົກ (ປີ 1998); ປະທານຄະນະກຳມະການປະຈຳອາຊຽນປີ 2020-2021; ປະທານອາຊຽນປະຈຳປີ 2010; ຜູ້ປະສານການພົວພັນລະຫວ່າງອາຊຽນກັບບັນດາຄູ່ຮ່ວມມືສຳຄັນເຊັ່ນ: ອາເມລິກາ, ລັດເຊຍ, ອີຢູ, ອິນເດຍ, ຍີ່ປຸ່ນ; ແລະ ປະທານອາຊຽນປະຈຳປີ 2020.
ໃນວິວັດການສ້າງປະຊາຄົມອາຊຽນ, ຫວຽດນາມຍາມໃດກໍ່ມີບົດບາດສຳຄັນໃນການກຳນົດເປົ້າໝາຍ, ທິດທາງການພັດທະນາ ແລະ ການຕັດສິນໃຈທີ່ສຳຄັນຂອງອາຊຽນເຊັ່ນ ວິໄສທັດອາຊຽນ 2020 (ປີ 1997) ແລະບັນດາແຜນການຜັນຂະຫຍາຍວິໄສທັດ (ໂຄງການປະຕິບັດງານຮ່າໂນ້ຍ 1998 ແລະແຜນການປະຕິບັດງານວຽງຈັນ 2004), ກົດບັດອາຊຽນ (ປີ 2007), ແຜນງານການກໍ່ສ້າງປະຊາຄົມອາຊຽນ (2009 - 2015), ວິໄສທັດຂອງປະຊາຄົມອາຊຽນ 2025 ພ້ອມກັບບັນດາແຜນການຜັນຂະຫຍາຍໃນແຕ່ລະເສົາຄ້ຳ (ປີ 2015) ແລະຂໍ້ຕົກລົງສຳຄັນອື່ນໆຫຼາຍສະບັບ, ໃນນັ້ນມີແຜນແມ່ບົດກ່ຽວກັບການເຊື່ອມໂຍງອາຊຽນ (MPAC).
ທີ່ກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 34 ທີ່ຈັດຂຶ້ນຢູ່ນະຄອນຫຼວງ ຮ່າໂນ້ຍ (ປີ 2001), ໃນນາມປະທານຄະນະກຳມະການປະຈຳອາຊຽນ, ຫວຽດນາມໄດ້ເປັນເຈົ້າການໃນການສະເໜີ ແລະໄດ້ຮັບຄວາມຮັບຮອງຈາກບັນດາປະເທດສະມາຊິກ ຕໍ່ຖະແຫຼງການຮ່າໂນ້ຍ ກ່ຽວກັບການຮັດແຄບຊ່ອງຫວ່າງການພັດທະນາ ໄປສູ່ການເຊື່ອມໂຍງອາຊຽນທີ່ແໜ້ນແຟ້ນກວ່າອີກ. ຖະແຫຼງການທີ່ຈະສະຫຼຸບ ແລະຈັດຕັ້ງປະຕິບັດຄວາມຄິດລິເລີ່ມເພື່ອການເຊື່ອມໂຍງອາຊຽນ (IAI) ໄດ້ຮັບການອະນຸມັດໂດຍຜູ້ ນຳລະດັບສູງຂອງສະມາຄົມໃນປີ 2000. ຫຼັງຈາກນັ້ນ, ໃນຖານະປະທານກຸ່ມສະເພາະກິດກ່ຽວກັບ IAI, ຫວຽດນາມໄດ້ຊຸກຍູ້ໃຫ້ບັນດາປະເທດໃນອາຊຽນ ບັນລຸເປົ້າໝາຍໃນ IAI. ເປົ້າໝາຍເຫຼົ່ານີ້ເປັນເນື້ອໃນສຳຄັນ ກ່ຽວກັບການຜັນຂະຫຍາຍປະຕິບັດປະຊາຄົມອາຊຽນໂດຍລວມ ແລະ ປະຊາຄົມການເມືອງແລະຄວາມໝັ້ນຄົງອາຊຽນໂດຍສະເພາະ, ສ້າງຂອບແລະພື້ນຖານ ໃຫ້ແກ່ການກໍ່ສ້າງ ແລະປັບປຸງປະຊາຄົມອາຊຽນໃນໄລຍະຕໍ່ໄປ. ອາດຈະເວົ້າໄດ້ວ່າ, ຫວຽດນາມໄດ້ເຂົ້າຮ່ວມຂະບວນວິວັດການກໍ່ສ້າງປະຊາຄົມອາຊຽນຢ່າງຄົບຖ້ວນ ຕັ້ງແຕ່ການສ້າງຄວາມຄິດ, ການວາງແຜນນະໂຍບາຍຈົນເຖິງການຜັນຂະຫຍາຍບັນດາເອກະສານພື້ນຖານ ຈາກນັ້ນຢັ້ງຢືນຄວາມສາມາດຂອງຕົນ ແລະປັບປຸງທີ່ຕັ້ງຂອງຕົນໃນອາຊຽນເທື່ອລະກ້າວ.
ຫວຽດນາມມີບົດບາດສຳຄັນໃນການປັບປຸງເພີ່ມທະວີຄວາມສາມັກຄີ ແລະຄວາມເປັນເອກະພາບພາຍໃນຂອງອາຊຽນ. ຫວຽດນາມພ້ອມກັບສະມາຊິກອື່ນໆ ໂດຍສະເພາະສະມາຊິກຜູ້ກໍ່ຕັ້ງ, ໄດ້ຈັດການແກ້ໄຂຄວາມແຕກຕ່າງທີ່ເກີດຂຶ້ນ ລະຫວ່າງປະເທດສະມາຊິກຢ່າງຄ່ອງແຄ່ວ ໂດຍຊຸກຍູ້ຫຼັກໝັ້ນແລະສຽງຮ່ວມກັນ ໃນບັນດາບັນຫາພາກພື້ນ. ຫວຽດນາມມີການປະກອບສ່ວນທີ່ສຳຄັນຫຼາຍຢ່າງ ເຂົ້າໃນການເປີດກວ້າງການພົວພັນ ແລະຍູ້ແຮງການຮ່ວມມືລະຫວ່າງອາຊຽນ ກັບຄູ່ຮ່ວມມືຕ່າງໆ, ເພື່ອຍົກສູງຖານະບົດບາດສາກົນຂອງອາຊຽນ, ເປັນຕົ້ນແມ່ນບົດບາດເປັນໃຈກາງແລະຕົ້ນຕໍ່ ໃນບັນດາເວທີປາໃສພາກພື້ນເຊັ່ນ: ກອງປະຊຸມສຸດຍອດອາຊີຕາເວັນອອກ (EAS), ເວທີປາໄສການຮ່ວມມືພາກພື້ນອາຊຽນ (ARF) ແລະກອງປະຊຸມລັດຖະມົນຕີກະຊວງປ້ອງກັນປະເທດອາຊຽນເປີດກວ້າງ (ADMM+). ໂດຍສະເພາະຢ່າງຍິ່ງ ຫວຽດນາມໄດ້ສ້າງຄວາມປະທັບໃຈຫຼວງຫຼາຍ ດ້ວຍການປະກອບສ່ວນເຂົ້າໃນການຍົກສູງຄຸມຄ່າ ແລະປະສິດທິຜົນການເຄື່ອນໄຫວຂອງເວທີປາໄສເຫຼົ່ານີ້ ເຊິ່ງຈຸດເດັ່ນຄືການສົ່ງເສີມການຂະຫຍາຍ ກອງປະຊຸມສຸດຍອດອາຊີຕາເວັນອອກທີ່ປະສົບຄວາມສຳເລັດ ໃຫ້ລັດເຊຍແລະອາເມລິກາເຂົ້າຮ່ວມ, ປະສົບຄວາມສຳເລັດໃນການຂົນຂວາຍຈັດຕັ້ງກອງປະຊຸມແລະເປັນປະທານກອງປະຊຸມ ລັດຖະມົນຕີກະຊວງປ້ອງກັນປະເທດອາຊຽນເປີດກວ້າງຄັ້ງທຳອິດ ໃນນະຄອນຫຼວງຮ່າໂນ້ຍ, ສ້າງແຜນປະຕິບັດງານຮ່າໂນ້ຍ ເພື່ອດຳເນີນການຕາມຄຳຖະແຫຼງວິໄສທັດຂອງເວທີປາໄສການຮ່ວມມືພາກພື້ນອາຊຽນປີ 2010. ການປະກອບສ່ວນຂອງຫວຽດນາມຍັງສະແດງອອກຜ່ານບົດບາດສຳຄັນ ໃນຂະບວນການສ້າງແຜນການປະຕິບັດງານ ກ່ຽວກັບການຮັກສາແລະເພີ່ມທະວີບົດບາດເປັນໃຈກາງຂອງອາຊຽນ (ປີ 2009) ແລະແຜນການເຮັດວຽກໃໝ່ ກ່ຽວກັບບົດບາດເປັນໃຈກາງຂອງອາຊຽນ (ປີ 2015), ປະກອບສ່ວນໃນການສົ່ງເສີມການກຳນົດໂຄງສ້າງພາກພື້ນ ບົນພື້ນຖານຂອງຂະບວນການທີ່ນຳໂດຍອາຊຽນ.
ປີ 2020, ໃນຖານະປະທານອາຊຽນດ, ຫວຽດນາມຮັບຜິດຊອບໃນການປະສານງານກິດຈະກຳຕ່າງໆຂອງອາຊຽນໃນປີ 2020, ຊີ້ນຳໂຄງການແລະແຜນປະຕິບັດງານ, ຂໍ້ບຸລິມະສິດແລະຂໍ້ລິເລີ່ມ ເພື່ອຜັນຂະຫຍາຍປະຊາຄົມອາຊຽນ ແລະ ການພົວພັນລະຫວ່າງອາຊຽນກັບປະເທດສະມາຊິກ ແລະບັນດາປະເທດຄູ່ຮ່ວມງານພາຍນອກ. ກຳນົດທິດທາງບັນດາໂຄງການ ແລະແຜນການປະຕິບັດ, ບັນດາຄວາມບຸລິມະສິດ ແລະ ຄວາມຄິດລິເລີ່ມ ເພື່ອເຄື່ອນໄຫວໃນການກໍ່ສ້າງປະຊາຄົມອາຊຽນ ແລະການພົວພັນລະຫວ່າງອາຊຽນກັບບັນດາປະເທດສະມາຊິກ ແລະ ບັນດາຄູ່ຮ່ວມມືຢູ່ພາຍນອກ. ຫົວຂໍ້ “ການເຊື່ອມໂຍງແລະເປັນເຈົ້າການໃນການປັບຕົວ” ທີ່ຫວຽດນາມເລືອກແລະໄດ້ຮັບການສະໜັບສະໜູນຈາກປະເທດສະມາຊິກອື່ນໆ ສະທ້ອນໃຫ້ເຫັນເຖິງຄວາມປາດຖະໜາຮ່ວມກັນກ່ຽວກັບອາຊຽນທີ່ມີຄວາມຍືດຫຍຸ່ນ ຕໍ່ຜົນກະທົບຂອງສະຖານະການໂລກແລະພາກພື້ນທີ່ປ່ຽນແປງແລະຜັນແປຢ່າງສັບສົນ, ໃນຂະນະດຽວກັນກໍ່ສະແດງໃຫ້ເຫັນເຖິງຄວາມເຕັມໃຈຂອງຫວຽດນາມ ໃນການປະກອບສ່ວນຢ່າງຕັ້ງໜ້າ ເຂົ້າໃນຄວາມເຂັ້ມແຂງຂອງປະຊາຄົມ. ການແຜ່ລະບາດຂອງພະຍາດໂຄວິດ-19 ໄດ້ສ້າງຜົນເສຍຫຼາຍຢ່າງ ເຊິ່ງເປັນບົດທົດສອບທີ່ໃຫຍ່ ຕໍ່ການເຊື່ອມຕໍ່ແລະຄວາມສາມາດໃນການປັບຕົວຂອງອາຊຽນ ກໍ່ຄືຄວາມສາມາດນຳພາຂອງຫວຽດນາມ ໃນຖານະເປັນປະທານອາຊຽນ. ປີ 2020, ຫວຽດນາມປະສົບຄວາມສຳເລັດໃນການຂົນຂວາຍແລະຈັດຕັ້ງກອງປະຊຸມພາຍໃຕ້ກອບຂອງອາຊຽນແລະລະຫວ່າງອາຊຽນກັບບັນດາຄູ່ຮ່ວມມື ໃນຮູບແບບອອນໄລ ເຊິ່ງເປັນແບບຢ່າງທີ່ບໍ່ເຄີຍປາກົດມາກ່ອນ ໃນປະຫວັດສາດການພັດທະນາຂອງອາຊຽນ. ຜົນຂອງກອງປະຊຸມເຫຼົ່ານີ້ ໄດ້ປະກອບສ່ວນເຂົ້າໃນການຮັກສາຂະບວນການກໍ່ສ້າງປະຊາຄົມອາຊຽນ, ປັບປຸງບົດບາດຂອງອາຊຽນໃນການສົ່ງເສີມການຮ່ວມມື ເພື່ອຕອບສະໜອງຕໍ່ບັນຫາທີ່ເກີດຈາກການແຜ່ລະບາດຂອງພະຍາດໂຄວິດ-19 ກໍ່ຄືບັນຫາສຳຄັນອື່ນໆ, ພ້ອມກັນນັ້ນກໍ່ສະແດງໃຫ້ເຫັນຄວາມສາມາດ ແລະຖານະຂອງຫວຽດນາມໃນພາກພື້ນ.
ຫວຽດນາມໃນປະຊາຄົມອາຊຽນ ໃນໄລຍະຈະມາເຖິງ
ພາຍຫຼັງ 25 ປີທີ່ເຂົ້າຮ່ວມອາຊຽນ, ຫວຽດນາມໄດ້ຢືນຢັນຖານະຕຳແໜ່ງເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບ ແລະມີບົດບາດສຳຄັນໃນອາຊຽນ, ສະສົມບົດຮຽນອັນມີຄ່າຫຼາຍຢ່າງໃນການເຊື່ອມໂຍງພາກພື້ນ, ປັບປຸງກົນໄກການປະຕິບັດງານໃນປະເທດ ແລະຝຶກອົບຮົມຖັນແຖວພະນັກງານ ທີ່ຕອບສະໜອງໄດ້ໂດຍພື້ນຖານກັບຄວາມຕ້ອງການຂອງການເຊື່ອມໂຍງສາກົນຢ່າງເລິກເຊິ່ງກວ້າງຂວາງ. ໃນຂະນະນັ້ນ, ອາຊຽນໄດ້ກາຍເປັນໜ່ວຍງານທີ່ໜຽວແໜ້ນຂຶ້ນເລື່ອຍໆ ໃນການມຸ່ງສູ່ເປົ້າໝາຍຂອງວິໄສທັດປະຊາຄົມ 2025. ປະເທດສະມາຊິກອື່ນໆແລະຫວຽດນາມລ້ວນມີຜົນປະໂຫຍດພື້ນຖານແລະຍາວນານ ໃນການຮັກສາສະພາບແວດລ້ອມທີ່ສະຫງົບແລະໝັ້ນຄົງ, ຍູ້ແຮງການເຊື່ອມຕໍ່ອາຊຽນ ແລະເພີ່ມທະວີບົດບາດຂອງປະຊາຄົມອາຊຽນ ເພື່ອເປົ້າໝາຍຄວາມປອດໄພແລະການພັດທະນາ. ນີ້ແມ່ນປັດໄຈອຳນວຍຄວາມສະດວກພື້ນຖານທີ່ສຸດ ສຳລັບການເຂົ້າຮ່ວມປະຊາຄົມອາຊຽນຂອງຫວຽດນາມ ຕາມແຜນນະໂຍບາຍການມີສ່ວນຮ່ວມຢ່າງຕັ້ງໜ້າ ໃນການສ້າງສະຖາບັນພະຫຸພາຄີ, ການຕັ້ງໜ້າ ເປັນເຈົ້າການ ແລະມີຄວາມຮັບຜິດຊອບຮ່ວມກັບບັນດາປະເທດອາຊຽນ ເພື່ອສ້າງປະຊາຄົມອາຊຽນ ໃຫ້ໝັ້ນຄົງເຂັ້ມແຂງ.
ຢ່າງໃດກໍ່ຕາມ, ຄວາມທ້າທາຍຂ້າງໜ້າກໍ່ຍັງມີຢູ່ບໍ່ໝ້ອຍ. ທາງດ້ານເສດຖະກິດ, ນັ້ນແມ່ນຄວາມແຕກໂຕນກັນທາງດ້ານລະດັບການພັດທະນາເສດຖະກິດແລະໂຄງສ້າງພື້ນຖານ. ການແຂ່ງຂັນຂອງບັນດາປະເທດສະມາຊິກອື່ນ, ໂດຍສະເພາະໃນຂົງເຂດການສົ່ງອອກ ແລະການດຶງດູດການລົງທຶນຈາກຕ່າງປະເທດ ທີ່ມີທ່າອຽງເພີ່ມຂຶ້ນ. ໃນຂະນະນັ້ນ, ຄວາມສາມາດໃນການແຂ່ງຂັນຂອງເສດຖະກິດຫວຽດນາມບໍ່ທັນສູງ, ໂຄງສ້າງພື້ນຖານທັງແຂງແລະອ່ອນທີ່ຈຳກັດ, ລະດັບການຜະລິດຍັງຕ່ຳ, ການສົ່ງອອກສ່ວນໃຫຍ່ແມ່ນວັດຖຸດິບ, ສິນຄ້າປຸງແຕ່ງແລະປຸງແຕ່ງເບື້ອງຕົ້ນ, ແລະມີທ່າອຽງທີ່ຈະເພີ່ມການເພິ່ງພາອາໄສໃນການລົງທຶນໂດຍກົງຈາກຕ່າງປະເທດ, ອັດຕາສ່ວນຂອງແຮງງານທີ່ມີສີມືກັບແຮງງານທັງໝົດ ແມ່ນຍັງຕໍ່າ(14).
ທາງດດ້ານການເມືອງ - ຄວາມສະຫງົບ, ການແຂ່ງຂັນຍຸດທະສາດລະຫວ່າງບັນດາປະເທດໃຫຍ່, ໂດຍສະເພາະແມ່ນສະຫະລັດອາເມລິກາແລະຈີນ, ມີທ່າອຽງທີ່ຈະຮຸນແຮງຂຶ້ນເລື້ອຍ ເຊິ່ງນຳໄປສູ່ຄວາມສົງໃສ, ການແບ່ງແຍກ ແບ່ງຂົ້ວ, ຫຼຸດຜ່ອນບົດບາດແລະເຮັດໃຫ້ສະຖາບັນພະຫຸພາຄີປະສົບກັບຄວາມຍາກລຳບາກຫຼາຍຢ່າງ. ໃນສະຖານະການດັ່ງກ່າວ, ການຮັກສາຄວາມສາມັກຄີ, ຄວາມເປັນເອກະພາບ ແລະ ບົດບາດຜູ້ນຳຂອງອາຊຽນໃນພາກພື້ນ ຕ້ອງປະສົບກັບຄວາມທ້າທາຍຫຼາຍຢ່າງ, ຍ້ອນຄວາມແຕກຕ່າງລະຫວ່າງບັນດາປະເທດສະມາຊິກ ໃນດ້ານທັດສະນະ, ຜົນປະໂຫຍດ ແລະຄວາມຄິດໄລ່ຍຸດທະສາດ, ເປັນຕົ້ນແມ່ນ ການພົວພັນກັບບັນດາປະເທດໃຫຍ່, ເຮັດໃຫ້ການບັນລຸເຖິງຄວາມເປັນເອກະສັນກັນນັ້ນ ມັນຫຍຸ້ງຍາກແລະຍາວກວ່າ. ດັ່ງນັ້ນ ການທີ່ຫວຽດນາມເສີມຂະຫຍາຍບົດບາດສຳຄັນໃນອາຊຽນ ຈຶ່ງອາດຈະຕ້ອງປະສົບກັບອຸປະສັກຫຼາຍກວ່າອີກ.
ຄຽງຄູ່ກັນນັ້ນ, ບັນດາບັນຫາກ່ຽວກັບຄວາມປອດໄພທີ່ບໍ່ເປັນແບບດັ້ງເດີມເຊັ່ນ ການປ່ຽນແປງສະພາບດິນຟ້າອາກາດ, ສິ່ງແວດລ້ອມແລະໂລກລະບາດ, ໂດຍສະເພາະການແຜ່ລະບາດຂອງພະຍາດໂຄວິດ-19, ທີ່ກຳລັງແລະຈະສ້າງບັນຫາຕ່າງໆຫຼາຍຢ່າງ ໃນແຕ່ລະປະເທດ ກໍ່ຄືໃນການພົວພັນລະຫວ່າງປະເທດຕ່າງໆ, ບັງຄັບໃຫ້ລັດຖະບານຕ້ອງສຸມໃສ່ແຫຼ່ງພະລັງ ແລະ ປັບນະໂຍບາຍ ເພື່ອແກ້ໄຂໃຫ້ມີຄວາມສອດຄ່ອງເໝາະສົມ. ລະດັບຄວາມເອົາໃຈໃສ່ແລະການລົງທຶນຊັບພະຍາກອນ ສຳລັບການເຊື່ອມໂຍງພາກພື້ນຈຶງອາດຈະຖືກຫຼຸດລົງ.
ສະຫຼຸບແລ້ວ, ການພັດທະນາຂອງອາຊຽນຫຼັງຈາກການກໍ່ຕັ້ງສະມາຄົນໃນກວ່າເຄິ່ງສະຕະວັດ, 5 ປີຂອງການຈັດຕັ້ງປະຊາຄົມອາຊຽນ ແລະ ຖານະບົດບາດຂອງ ຫວຽດນາມໃນອາຊຽນພາຍຫຼັງ 25 ປີທີ່ເຂົ້າເປັນສະມາຊິກ ເຊິ່ງໄດ້ວາງຄວາມຮຽກຮ້ອງຕ້ອງການໃໝ່ ກ່ຽວກັບການເຂົ້າຮ່ວມຂອງຫວຽດນາມໃນປະຊາຄົມອາຊຽນ. ໃນຊຸມປີຕໍ່ໄປນີ້, ອາຊຽນສືບຕໍ່ມີທີ່ຕັ້ງແລະບົດບາດສຳຄັນທີ່ສຸດ ໃນນະໂຍບາຍການຕ່າງປະເທດຂອງຫວຽດນາມ, ເປັນສູນກາງກຳນົດທິດຍຸດທະສາດ ຍົກລະດັບການຕ່າງປະເທດຫຼາຍຝ່າຍ ແລະການເຊື່ອມໂຍງສາກົນຢ່າງຮອບດ້ານ, ເລິກເຊິ່ງກວ້າງຂວາງ ຂອງຫວຽດນາມ(15). ການຍົກສູງລັກສະນະເປັນເຈົ້າການແລະປະສິດທິຜົນ ໃນການເຂົ້າຮ່ວມອາຊຽນຂອງຫວຽດນາມ ມີຄວາມໝາຍຍຸດທະສາດ ໃນສະຖານະການໂລກແລະພາກພື້ນສືບຕໍ່ຜັນແປຢ່າງໄວວາ ສັບສົນແລະຄາດເດົາຍາກ, ນະໂຍບາຍແລະການເຂົ້າຮ່ວມອາຊຽນຂອງປະເທດສະມາຊິກອື່ນໆ ອາດຈະປ່ຽນແປງແຕກຕ່າງຈາກແຕ່ກອນ.
ເພື່ອກຳແໜ້ນໂອກາດແລະແກ້ໄຂຄວາມທ້າທາຍທີ່ເກີດຈາກການກ້າວໄປສູ່ບົດບາດເປັນເຈົ້າການ ແລະຕັ້ງໜ້າກວ່າອີກໃນອາຊຽນ, ຈິນຕະນາການແລະການປະຕິບັດຂອງຫວຽດນາມຕ້ອງສືບຕໍ່ປ່ຽນແປງໃໝ່ ເພື່ອໄປພ້ອມກັນກັບການປ່ຽນແປງຂອງສະພາບການ. ພິເສດແມ່ນການຮັບຮູ້ທີ່ຖືກຕ້ອງກ່ຽວກັບທີ່ຕັ້ງ, ບົດບາດແລະຄວາມສາມາດຂອງອາຊຽນ ໃນການພົວພັນສາກົນໃນພາກພື້ນອາຊີ - ປາຊີຟິກ, ອີນໂດ - ປາຊີຟິກເວົ້າລວມ ແລະ ໃນພາລະກິດການຕ່າງປະເທດຂອງຫວຽດນາມເວົ້າສະເພາະ ຕ້ອງໄດ້ຮັບການປັບປຸງຢ່າງຕໍ່ເນື່ອງ, ໂດຍສະເພາະໃນເວລາທີ່ພາກພື້ນກຳລັງມີການປ່ຽນແປງຢ່າງເລິກເຊິ່ງກວ້າງຂວາງ, ວີທີການຮັບຮູ້ແລະຕິດຕາມຜົນປະໂຫຍດຂອງຫວຽດນາມ ໃນດ້ານຄວາມໝັ້ນຄົງ ການພັດທະນາ ແລະບົດບາດກໍ່ແຕກຕ່າງຈາກໄລຍະກ່ອນ. ຍົກສູງຄວາມຮັບຮູ້ທີ່ຖືກຕ້ອງກ່ຽວກັບຮູບແບບການຮ່ວມມືຂອງອາຊຽນ ແລະຄວາມສຳຄັນຍຸດທະສາດຂອງອາຊຽນຕໍ່ຫວຽດນາມ ແມ່ນພື້ນຖານເພື່ອກຳນົດລະດັບຄວາມເອົາໃຈໃສ່ ແລະການລົງທຶນທີ່ເໝາະສົມກັບການເຂົ້າຮ່ວມການຮ່ວມມືອາຊຽນ.
ເອກະສານກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ (ປີ 2016) ໄດ້ລະບຸວ່າ “ເປັນເຈົ້າການ, ຕັ້ງໜ້າ ແລະມີຄວາມຮັບຜິດຊອບ ຮ່ວມກັບບັນດາປະເທດອາຊຽນ ເພື່ອສ້າງປະຊາຄົມອາຊຽນທີ່ເຂັ້ມແຂງ” ແມ່ນບຸລິມະສິດໜຶ່ງໃນທິດທາງແລະໜ້າທີ່ການຕ່າງປະເທດ(16). ການນຳຂອງພັກກອມມູນິດແລະລັດຫວຽດນາມ ຍາມໃດກໍ່ຢືນຢັນວ່າ ອາຊຽນເປັນເສົາຄ້ຳທີ່ສຳຄັນ ໃນນະໂຍບາຍການຕ່າງປະເທດຂອງ ຫວຽດນາມ(17). ໃນເວລາຕໍ່ໄປນີ້, ອາຊຽນຄວນສືບຕໍ່ໄດ້ຮັບການຍອມຮັບແລະຢືນຢັນວ່າເປັນເສົາຄ້ຳແລະບຸລິມະສິດສູງສຸດໃນນະໂຍບາຍ ແລະການພົວພັນຕ່າງປະເທດຂອງຫວຽດນາມ.
ບົນພື້ນຖານຄວາມຮັບຮູ້ດັ່ງກ່າວ, ບັນດາໜ້າທີ່ການຕ່າງປະເທດອັນລະອຽດຂອງ ຫວຽດນາມທີ່ພົວພັນເຖິງອາຊຽນ ຕ້ອງໄດ້ຮັບການຜັນຂະຫຍາຍຢ່າງແຂງແຮງໃນຊຸມປີຕໍ່ໄປນີ້, ລວມມີ: ທີໜຶ່ງ, ພ້ອມກັນພະຍາຍາມກໍ່ສ້າງປະຊາຄົມອາຊຽນໃຫ້ໝັ້ນຄົງເຂັ້ມແຂງ ແລະມີປະສິດທິຜົນ, ໃຫ້ຄວາມສຳຄັນກັບການຮັກສາຄວາມສາມັກຄີ, ເອກະພາບ ແລະຫຼັກການພື້ນຖານຂອງອາຊຽນ, ຮັບປະກັນແລະຍົກສູງຄຸນນະພາບຂອງກິດຈະກຳອາຊຽນພາຍໃຕ້ທິດນຳ “ເປັນເອກະພາບໃນຄວາມຫຼາກຫຼາຍ”; ທີສອງ, ພ້ອມກັນກັບສະມາຊິກອື່ນໆ ເພື່ອປັບປຸງບົດບາດເປັນສູນກາງຂອງອາຊຽນ ໃນດ້ານຄວາມໝັ້ນຄົງແລະກົນໄກເສດຖະກິດໃນພາກພື້ນອິນໂດ-ປາຊີຟິກ ທີ່ກຳລັງພັດທະນາ; ທີສາມ, ເປັນເຈົ້າການເຂົ້າຮ່ວມແລະເສີມຂະຫຍາຍບົດບາດ ໃນບັນດາກົນໄກຫຼາຍຝ່າຍຂອງອາຊຽນ, ບັນດາກົນໄກອາຊຽນບວກ ແລະ ກົນໄກອະນຸພາກພື້ນພາຍໃນອາຊຽນ; ທີສີ່, ເຮັດວຽກຢ່າງບໍ່ຢຸດຢັ້ງກັບບັນດາປະເທດອາຊຽນອື່ນ ເພື່ອຊຸກຍູ້ການປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກຢ່າງເຕັມທີ່ (DOC) ແລະ ກ້າວສູ່ການສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກ (COC).
ເພື່ອຜັນຂະຫຍາຍປະຕິບັດໜ້າທີ່ດັ່ງກ່າວ, ຍົກສູງປະສິດທິຜົນ, ກຳນົດຈຸດສຸມໃຈກາງ, ຈຸດສຳຄັນພິເສດ ແລະ ຂໍ້ບຸລິມະສິດໃນແຕ່ລະຂົງເຂດ ບັນຫາ ເວລາສະເພາະ, ແລະປະສານສົມທົບຢ່າງແໜ້ນແຟ້ນ ຄົບຊຸດ ລະຫວ່າງຊ່ອງທາງການພົວພັນສອງຝ່າຍແລະຫຼາຍຝ່າຍ, ການທູດຂອງລັດ ການທູດປະຊາຊົນ ແລະຊ່ອງທາງການຕ່າງປະເທດອື່ນ, ປຸກລະດົມການເຂົ້າຮ່ວມແລະການມີສ່ວນຮ່ວມ ຂອງລະບົບການເມືອງ ວິສາຫະກິດ ແລະ ປະຊາຊົນທຸກຊັ້ນຄົນ ໃນບັນດາການເຄື່ອນໄຫວຮ່ວມມືແລະເຊື່ອມຕໍ່ອາຊຽນ ແມ່ນບັນດາປັດໄຈຕົ້ນຕໍ່ ເພື່ອໃຫ້ຫວຽດນາມສືບຕໍ່ເສີມຂະຫຍາຍບົດບາດຂອງຕົນໃນປະຊາຄົມໃນໄລຍະຕໍ່ໜ້າ./.
------------------------
(1), (2) ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 6, ສພຈ ສື້ເຖິດ, ຮ່າໂນ້ຍ, 1987, ໜ້າ 225, ໜ້າ 108.
(3) ເລວ້ຽດຢວຽນ: ຂະບວນວິວັດການປ່ຽນແປງໃໝ່ນະໂຍບາຍການຕ່າງປະເທດ ຂອງຫວຽດນາມກັບອາຊຽນ ໄລຍະ 1986 - 2018, ສພຈ ສື້ເຖິດ, ຮ່າໂນ້ຍ, 2017, ໜ້າ 91 - 82.
(4) Narayanan Ganesan: Conjunctures and Continuities in Southeast Asian Politics, Institute of Southeast Asian Studies, ສິງກະໂປ, 2013, ໜ້າ. 110.
(5) ຫງວຽນເຟືອງບິ່ນ (ຫົວໜ້າບັນນາທິການ): ການທູດປ້ອງກັນແລະສະກັດກັ້ນຢູ່ອາຊີຕາເວັນອອກສ່ຽງໃຕ້, ສພຈ ມະຫາວິທະຍາໄລຮ່າໂນ້ຍ, 2003, ໜ້າ. 79
(6) ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 7, ສພຈ ສື້ເຖິດ, ຮ່າໂນ້ຍ, 1992, ໜ້າ 147.
(7) Le Hong Hiep: “ASEAN at 50: The View from Vietnam”, The Aspistrategist, August 11, 2017
(8) ເລວ້ຽດຢວຽນ: ຂະບວນວິວັດການປ່ຽນແປງໃໝ່ນະໂຍບາຍການຕ່າງປະເທດ ຂອງຫວຽດນາມກັບອາຊຽນ ໄລຍະ 1986 - 2018, ປື້ມທີ່ໄດ້ແນະນຳ, ໜ້າ 89.
(9) ໂດ້ເມື່ອຍ: “ຫຼັກໝັ້ນ 4 ຂໍ້ກ່ຽວກັບອາຊຽນ”, ໜັງສືພິມກອງທັບປະຊາຊົນ, ສະບັບລົງພິມວັນທີ 17 ຕຸລາ 1993.
(10) ຟ້າມກວາງມິນ: ນະໂຍບາຍການຕ່າງປະເທດທີ່ປ່ຽນແປງໃໝ່ຂອງຫວຽດນາມ (1986 - 2010), ສພຈ ສື້ເຖິດ, ຮ່າໂນ້ຍ, 2012, ໜ້າ 83.
(11) “ລວມຍອດມູນຄ່ານຳເຂົ້າ-ສົ່ງອອກ ປີ 2019 ຈະເກີນລະດັບ 500 ຕື້ໂດລາສະຫະລັດ”, ໜັງສືພິມລັດຖະບານເອເລັກໂຕຣນິກ, ສະບັບລົງພິມວັນທີ 12 ທັນວາ 2019
(12) ຟ້າມບິ່ນມິນ: “ປະຊາຄົມອາຊຽນ 2015 ເປັນຮູບເປັນຮ່າງ ແລະຂີດໝາຍການປະກອບສ່ວນຂອງຫວຽດນາມ”, ວາລະສານ ຄົ້ນຄວ້າສາກົນ, ສະບັບເລກທີ 2 (105), ເດືອນມິຖຸນາ 2016, ໜ້າ 15.
(13) ດັ້ງເກິ໋ມຕູ໋: “ປະຊາຄົມການເມືອງແລະຄວາມໝັ້ນຄົງອາຊຽນ ພາຍຫຼັງປີ 2015 ແລະການເຂົ້າຮ່ວມຂອງຫວຽດນາມ”, ວາລະສານ ຄົ້ນຄວ້າສາກົນ, ສະບັບເລກທີ 3 (88), 2016, ໜ້າ 176 – 177.
(14) “ຍົກສູງຜະລິດຕະພາບການອອກແຮງງານຂອງຫວຽດນາມ ໃນສະຖານະການປະຕິວັດອຸດສາຫະກຳ 4.0”, ວາລະສານວິທະຍາສາດເຕັກໂນໂລຊີຫວຽດນາມເອເລັກໂຕຣນິກ, ສະບັບລົງພິມວັນທີ 17 ມັງກອນ 2020.
(15) ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12, ຫ້ອງວ່າການສູນກາງພັກ, ຮ່າໂນ້ຍ, 2016, ໜ້າ 35; ຄຳສັ່ງເລກທີ 25-CT/TW, ສະບັບລົງວັນທີ 8 ສິງຫາ 2018, ຂອງຄະນະເລຂາທິການ, ກ່ຽວກັບ “ຍູ້ແຮງແລະຍົກລະດັບການຕ່າງປະເທດຫຼາຍຝ່າຍເຖິງປີ 2030”.
(15) ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12, ຫ້ອງວ່າການສູນກາງພັກ, ຮ່າໂນ້ຍ, 2016, ໜ້າ 154.
(17) “ນາຍົກລັດຖະມົນຕີ ຫງວຽນຊວັນຟຸກ: ອາຊຽນແມ່ນເສົາຄ້ຳຕົ້ນຕໍ່ໃນນະໂຍບາຍການຕ່າງປະເທດຂອງຫວຽດນາມ”, ໜັງສືພິມ ໄວໜຸ່ມເອເລັກໂຕຣນິກ, ສະບັບລົງພິມວັນທີ 8 ສິງຫາ 2020; ເບິ່ງເຕີ່ມ ຟ້າມບິ່ນມິນ: “ມຸ່ງສູ່ປະຊາຄົມອາຊຽນທີ່ສາມັກຄີ, ໝັ້ນຄົງເຂັ້ມແຂງແລະເປີດກວ້າງ”, ວາລະສານ ຄົ້ນຄວ້າສາກົນ, ສະບັບເລກທີ 3 (90), 2012
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 951 (ເດືອນຕຸລາ 2020)