ເສີມຂະຫຍາຍບົດບາດຂອງການທູດຫວຽດນາມ
ໃນພາລະກິດສ້າງສາ ແລະ ປົກປັກຮັກສາປະເທດຊາດ
ໃນພາລະກິດສ້າງສາ ແລະ ປົກປັກຮັກສາປະເທດຊາດ
ວກ. - ນັບແຕ່ເມື່ອປະທານ ໂຮ່ຈີມິນ ອ່ານບົດປະກາດເອກະລາດ, ສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ, ສ້າງພື້ນຖານທຳອິດໃຫ້ແກ່ພື້ນຖານການທູດຂອງປະເທດຫວຽດນາມທີ່ທັນສະໄໝ, ການທູດຍາມໃດກໍແມ່ນພາກສ່ວນໜຶ່ງທີ່ບໍ່ສາມາດແຍກອອກຈາກການປະຕິວັດຂອງຫວຽດນາມ, ໄດ້ຮ່ວມເດີນທາງພ້ອມກັບຊາດ ເພື່ອຮັບໃຊ້ປະເທດຊາດ ແລະ ຮັບໃຊ້ປະຊາຊົນ. ສືບທອດຍອດຍິ່ງການທູດທີ່ເປັນມູນເຊື້ອຂອງບັນພະບູລຸດ ແລະ ພາຍໃຕ້ການນຳພາ, ຊີ້ນຳຂອງປະທານໂຮ່ຈີມິນ ຢ່າງໂດຍກົງ, ການທູດຫວຽດນາມໄດ້ມີການເຕີບໃຫຍ່ຢ່າງບໍ່ຢຸດຢັ້ງ, ຍາມໃດກໍຖືໃນຕົວຈິດໃຈຖືຜົນປະໂຫຍດຂອງປະເທດ-ປະຊາຊາດ ຂຶ້ນກ່ອນ, “ເອົາຫຼັກການເປັນພື້ນເພື່ອໝູນໃຊ່ຢ່າງໄຫວພິບ”, ໄດ້ປະກອບສ່ວນທີ່ສຳຄັນເຂົ້າໃນບັນດາໄຊຊະນະອັນສະຫງ່າລາສີ ໃນປະຫວັດສາດທີ່ສະຫງ່າອົງກາດຂອງຊາດ.
ພາຍຫຼັງເຊັນສົນທິສັນຍາຊົ່ວຄາວກັບລັດຖະບານ ຝຣັ່ງ ໃນວັນທີ 14 ກັນຍາ 1946, ທີ່ສຳນັກງານເທດສະບານນະຄອນຫຼວງ ປາຣີ, ປະທານໂຮ່ຈີມິນໄດ້ປະກາດການຕັດສິນໃຈຂອງຊາດຫວຽດນາມ ຈະບໍ່ຍອມເປັນຂ້າທາດອີກເທື່ອໜຶ່ງຢ່າງເດັດຂາດ _ແຫຼ່ງເອກະສານສຳເນົາກະຊວງການຕ່າງປະເທດ
ປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດຂອງ ຫວຽດນາມ ໃຫ້ເຫັນວ່າ ການເຄື່ອນໄຫວພົວພັນຕ່າງປະເທດຍາມໃດກໍມີບົດບາດສຳຄັນ ໃນການຮັບປະກັນຄວາມສະຫງົບຕາມເຂດຊາຍແດນ, ຮັກສາພື້ນຖານເອກະລາດ, ອຳນາດອະທິປະໄຕຂອງປະເທດຊາດ. ຖ້າວ່າ ສິລະປະການທະຫານໄດ້ຊ່ວຍໃຫ້ຄົນຫວຽດນາມຮຸ່ນກ່ອນຂັບໄລ່ສັດຕູຜູ້ຮຸກຮານ ເຊິ່ງການເຄື່ອນໄຫວພົວພັນຕ່າງປະເທດບົນພື້ນຖານແນວຄິດ “ພົວພັນກັນຢ່າງສັນຕິພາບ ແລະສະໜິດສະໜົມ” ໄດ້ນຳໜ້າໃນການສະກັດກັ້ນສົງຄາມ, ຮັກສາຄວາມສະຫງົບສຸກໃຫ້ແກ່ປະເທດຊາດ ແລະ ປົກປັກຮັກສາຊາຍແດນຫວຽດນາມຢ່າງໝັ້ນຄົງ.ແນວຄິດສຳຄັນດັ່ງກ່າວໄດ້ສະແດງອອກໃນ ປຶ້ມສິລະປະການທະຫານ ເຊິ່ງສົມເດັດພະມະຫາແມ່ທັບ ເຈິ່ນກວັກຕວັ້ນ ໄດ້ເນັ້ນວ່າ: “ຄວາມຮັກແພງສະໜິດສະໜົມແມ່ນເສັ້ນທາງທີ່ດີທີ່ສຸດ ໃນການປົກຄອງປະເທດແລະການເຄື່ອນທັບ. ຖ້າມີຄວາມຮັກແພງສະໜິດສະໜົມພາຍໃນປະເທດ ຈະບໍ່ຕ້ອງໃຊ້ການທະຫານຫຼາຍ, ມີຄວາມຮັກແພງສະໜິດສະໜົມຢູ່ນອກຊາຍແດນ ຈະບໍ່ຕ້ອງຢ້ານກົວສັດຕູ”(1).
ໂດຍສືບທອດມູນເຊື້ອປະຫວັດສາດດັ່ງກ່າວ, ໃນການຕໍ່ສູ້ປົດປ່ອຍຊາດແລະທ້ອນໂຮມປະເທດເປັນເອກະພາບ ໃນສະຕະວັດທີ 20 ກໍຄືໃນໄລຍະການເຊື່ອມໂຍງສາກົນຢ່າງກ້ວາງຂວາງແລະເລິກເຊິ່ງປະຈຸບັນ, ພ້ອມກັບບັນດາເຫຼົ່າຮົບພົວພັນຕ່າງປະເທດອື່ນໆ, ຂະແໜງການໆຕ່າງປະເທດ ພາຍໃຕ້ການນຳພາຂອງພັກ ແລະ ປະທານໂຮ່ຈີມິນ - ລັດຖະມົນຕີກະຊວງການຕ່າງປະເທດຜູ້ທຳອິດຂອງປະເທດສາທາລະນະລັດປະຊາທິປະໄຕຫວຽດນາມ - ໄດ້ມີບົດບາດສຳຄັນໃນການປະຕິບັດໜ້າທີ່ປົກປັກຮັກສາພື້ນຖານເອກະລາດແຫ່ງຊາດ, ປັບປຸງສະພາບແວດລ້ອມສັນຕິພາບໃຫ້ແກ່ປະເທດ, ຊອກຫາແລະຍາດແຍ່ງບັນດາແຫຼ່ງກຳລັງຈາກພາຍນອກ ເພື່ອຮັບໃຊ້ໃຫ້ແກ່ການພັດທະນາ ແລະ ຍົກສູງຖານະບົດບາດຂອງຫວຽດນາມ, ເສີມຂະຫຍາຍບົດບາດເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ.
ການທູດ - ກຳລັງຫຼັກແຫຼ່ງໃນການປະຕິບັດໜ້າທີ່ປົກປັກຮັກສາພື້ນຖານເອກະລາດແຫ່ງຊາດ, ປັບປຸງສະພາບແວດລ້ອມສັນຕິພາບໃຫ້ແກ່ປະເທດຊາດ.
ເມື່ອປະເທດສາທາລະນະລັດປະຊາທິປະໄຕຫວຽດນາມ ຫາກໍໄດ້ກຳເນີດ, ໃນສະພາບການທີ່ກຳລັງການປະຕິວັດຍັງອ່ອນນ້ອຍ, ພາຍໃຕ້ການນຳພາຂອງປະທານໂຮ່ຈີມິນ, ການທູດໄດ້ນຳໜ້າເປີດທາງ, ປົກປັກຮັກສາອຳນາດການປົກຄອງປະຕິວັດຕໍ່ສະຖານະພາບ “ຮ້ອຍຫາບທີ່ຫ້ອຍລົງມາຈາກເສັ້ນຜົມ”. ສັນຍາເບື້ອງຕັ້ງ (ວັນທີ 6 ມີນາ 1946), ສົນທິສັນຍາຊົ່ວຄາວ (ວັນທີ 14 ກັນຍາ 1946) ພ້ອມກັບບັນດາຄວາມພະຍາຍາມດ້ານການທູດ ໃນບັນດາກອງປະຊຸມທີ່ເມືອງ ດ່າລາດ ແລະ ກອງປະຊຸມ ຟອງເຕນໂບຼ ໄດ້ກາຍເປັນບົດຮຽນກຼາສິກກ່ຽວກັບສິລະປະການທູດ “ຖືເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, “ຮັກແພງປອງດອງກັນເພື່ອການກ້າວຂຶ້ນ”, ແບ່ງແຍກຖັນແຖວຝ່າຍກົງກັນຂ້າມ, ຫຼີກລ້ຽງບໍ່ໃຫ້ປະເຊີນກັບສັດຕູທີ່ມີອຳນາດຫຼາຍໃນເວລາດຽວກັນ. ຍ້ອນແນວນັ້ນ, ການທູດໄດ້ປະກອບສ່ວນເຂົ້າໃນການແກ່ຍາວໄລຍະເວລາສັນຕິພາບ ເຖິງແມ່ນວ່າ ໃນເວລາສັ້ນໆກໍຕາມ ແຕ່ມີຄວາມສຳຄັນເປັນຢ່າງຍິ່ງ ເພື່ອໃຫ້ອຳນາດການປົກຄອງປະຕິວັດມີເວລາເພີ່ມ ໃນການປັບປຸງກຳລັງກະກຽມໃຫ້ແກ່ການຕໍ່ຕ້ານອັນຍືດເຍື້ອຍາວນານຂອງຊາດຫວຽດນາມ.
ໃນລະຫວ່າງສົງຄາມຕໍ່ຕ້ານຕ້ານພວກລ່າເມືອງຂຶ້ນຝຣັ່ງແລະຈັກກະພັດ ອາເມລິກາສອງຄັ້ງ, ການທູດຫວຽດນາມມີບົດບາດຕັ້ງໜ້າ ໃນການສົມທົບກຳລັງແຮງຂອງຊາດແລະກຳລັງແຮງຂອງຍຸກສະໄໝ ເພື່ອສ້າງພະລັງແຮງສັງລວມໃຫ້ຫວຽດນາມໄດ້ຮັບໄຊຊະນະສຸດທ້າຍ. ການທູດໄດ້ກາຍເປັນແນວໂຮມສຳຄັນອັນໜຶ່ງ, ມີຄວາມໝາຍຍຸດທະສາດ ແລະ ເປັນພາກສ່ວນປະກອບອັນສຳຄັນ ໃນແນວທາງການປະຕິວັດ, ຍາມໃດກໍຄຽງບ່າຄຽງໄຫຼ່ ພ້ອມກັບແນວຮົບການທະຫານມີໜ້າໃນແຖວໜ້າຂອງການຕໍ່ສູ້ປະຕິວັດ. ການທູດໄດ້ຍົກສູງຄັນທຸງສັນຕິພາບ, ເອກະລາດແຫ່ງຊາດ ແລະ ຈິດໃຈເປັນຂົວຕໍ່ກັບປະຊາຊົນໃນໂລກ ຜູ້ທີ່ຮັກຫອມສັນຕິພາບດ້ວຍເຈດຕະນາດີ, ຈາກນັ້ນ, ເຕົ້າໂຮມແນວໂຮມສາກົນທີ່ສະໜັບສະໜູນການຕໍ່ສູ້ຂອງປະຊາຊົນຫວຽດນາມ ຢ່າງກ້ວາງຂວາງ. ຜູ້ຄົນທີ່ຮັກຫອມສັນຕິພາບຫຼາຍລ້ານຄົນທົ່ວໂລກທີ່ຢູ່ໃນກຸ່ມ “ຄົນຫວຽດນາມ” ຕັ້ງແຕ່ຜູ້ນຳ ນັກການເມືອງ ຈົນເຖິງພົນລະເມືອງ ນັກສຶກສາ, ນັບທັງຢູ່ບັນດາປະເທດກໍ່ສົງຄາມ ໄດ້ລົງສູ່ຖະໜົນເດີນຂະບວນປະທ້ວງ ຄັດຄ້ານສົງຄາມ, ສະໜັບສະໜູນການຕໍ່ສູ້ອັນຊອບທຳຂອງຫວຽດນາມ. ພ້ອມກັບບັນດາໄຊຊະນະດ້ານການທະຫານໃນສະໜາມຮົບ, ການທູດໃນໄລຍະນີ້ ໄດ້ເສີມຂະຫຍາຍພູມປັນຍາແລະຄວາມກ້າຫານ ເພື່ອເປັນເຄື່ອງໝາຍເຫດການສຳຄັນໃນປະຫວັດສາດຂອງປະເທດ ດ້ວຍສັນຍາເຊີແນວປີ 1954 ແລະສັນຍາປາຣີປີ 1973, ສ້າງເງື່ອນໄຂທີ່ເອື້ອອຳນວຍເພື່ອນຳພາຊາດຫວຽດນາມໄປສູ່ໄຊຊະນະຄັ້ງປະຫວັດສາດໃນລະດູບານໃໝ່ປີ 1975 ປົດປ່ອຍພາກໃຕ້ ແລະ ທ້ອນໂຮມປະເທດຊາດເປັນເອກະພາບ.
ໃນສະໄໝສັນຕິພາບ, ການທູດໄດ້ສະແດງເຖິງບົດບາດຫຼັກແຫຼ່ງປະກອບ ສ່ວນເຂົ້າໃນການຮັກສາສະພາບແວດລ້ອມສັນຕິພາບແລະຄວາມໝັ້ນຄົງ, ສ້າງເງື່ອນໄຂອຳນວຍຄວາມສະດວກໃຫ້ແກ່ການສ້າງສາ ແລະ ປົກປັກຮັກສາປະເທດຊາດ. ໃນນັ້ນ, ການທູດໄດ້ນຳໜ້າໃນການຕໍ່ສູ້ດ້ານການເມືອງ, ການເຈລະຈາ, ພ້ອມກັບວຽກງານປ້ອງກັນຊາດ, ປ້ອງກັນຄວາມສະຫງົບ ປະກອບສ່ວນເຂົ້າໃນການປົກປັກຮັກສາອຳນາດອະທິປະໄຕ, ຜືນແຜ່ນດິນອັນຄົບຖ້ວນ ຂອງປະເທດຊາດ ຢ່າງມີປະສິດທິຜົນ. ຫວຽດນາມໄດ້ວາງແຜນ, ແບ່ງເຂດ, ແບ່ງເຂດຊາຍແດນ ແລະປັກຫຼັກໝາຍຊາຍແດນທາງບົກ ກັບສາມປະເທດເຊັ່ນ: ລາວ, ຈີນ ແລະ ກຳປູເຈຍ, ຈາກນັ້ນ, ຫວຽດນາມໄດ້ສ້າງເສັ້ນຊາຍແດນສັນຕິພາບ, ໝັ້ນຄົງ, ມິດຕະພາບແລະຮ່ວມມືໃນການພັດທະນາ ກັບສາມປະເທດບ້ານໃກ້ເຮືອນຄຽງ. ກ່ຽວກັບຊາຍແດນທາງທະເລ, ຜ່ານກົນໄກສອງຝ່າຍແລະຫຼາຍຝ່າຍຈຳນວນຫຼາຍ, ການທູດໄດ້ແລະກຳລັງຍູ້ແຮງການແລກປ່ຽນ, ການເຈລະຈາ, ສ້າງຄວາມເຊື່ອໝັ້ນ, ສະກັດກັ້ນການປະທະກັນ, ຄວບຄຸມການແກ່ງແຍ້ງ ແລະ ມີການຮ່ວມມືທາງທະເລກັບປະເທດ ຈີນ, ມາເລເຊຍ, ຟີລິບປິນ, ບຣູໄນ, ອິນໂດເນເຊຍ ແລະ ໄທ. ພ້ອມດຽວກັນນັ້ນ, ການທູດໄດ້ຕໍ່ສູ້ຢ່າງເດັດດ່ຽວແລະຕໍ່ເນື່ອງດ້ວຍສັນຕິວິທີ ຕາມກົດໝາຍສາກົນ ເພື່ອຕໍ່ຕ້ານການກະທຳທີ່ລະເມີດອະທິປະໄຕ, ສິດທິອະທິປະໄຕແລະສິດຕັດສິນຂອງຫວຽດນາມ ໃນບັນດາເຂດທະເລຂອງຫວຽດນາມ. ຄຽງຄູ່ກັນນັ້ນ, ການທູດໄດ້ແກ້ໄຂບັນຫາຕ່າງໆ ທີ່ເກີດຂຶ້ນໃນການພົວພັນກັບບັນດາປະເທດ ກໍຄືບັນດາຄວາມສັບສົນໃນສາຍພົວພັນລະຫວ່າງບັນດາປະເທດໃຫຍ່ຢ່າງຄ່ອງແຄ້ວ, ສ້າງສະພາບແວດລ້ອມສາກົນທີ່ສະດວກດີໃຫ້ແກ່ຄວາມສະຫງົບ ແລະ ການພັດທະນາຂອງຫວຽດນາມ.
ການທູດໄດ້ບຸກບືນໃນການຊອກຫາ, ຍາດແຍ່ງແຫຼ່ງກຳລັງຕ່າງໆຈາກພາຍນອກ ເພື່ອຮັບໃຊ້ການພັດທະນາປະເທດ.
ໃນສະໄໝຕໍ່ຕ້ານ, ການທູດໄດ້ນຳໜ້າໃນການປຸກລະດົມການຊ່ວຍເຫຼືອ ຂອງເພື່ອນມິດສາກົນ, ປະກອບສ່ວນເຂົ້າໃນຂະບວນການຟື້ນຟູເສດຖະກິດ, ສ້າງພື້ນຖານໃຫ້ແກ່ຂະບວນການສ້າງສັງຄົມນິຍົມຢູ່ພາກເໜືອຫວຽດນາມ. ພ້ອມກັບ ຈິດໃຈເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງຂອງຊາດ, ການສະໜັບ ສະໜູນທາງດ້ານວັດຖຸແລະຈິດໃຈ ຂອງບັນດາປະເທດເພື່ອນມິດແລະປະຊາຊົນທີ່ກ້າວໜ້າໃນທົ່ວໂລກ ໄດ້ສ້າງແຫຼ່ງກຳລັງສັງລວມທີ່ຊ່ວຍຫວຽດນາມສ້າງສາພາກເໜືອໃຫ້ກາຍເປັນແນວຫຼັງທີ່ໝັ້ນແກ່ນໃຫ້ແກ່ພາກໃຕ້ ເຊິ່ງເປັນແນວໜ້າທີ່ໃຫຍ່ຕີເອົາໄຊຊະນະສັດຕູ.
ໃນຊຸມປີກ່ອນການປ່ຽນແປງໃໝ່, ສະພາບການທາງດ້ານເສດຖະກິດ - ສັງ ຄົມຂອງຫວຽດນາມ ມີຄວາມຫຍຸ້ງຍາກທີ່ສຸດ. ພາຍໃຕ້ການຊີ້ນຳໂດຍກົງຂອງບັນດາສະຫາຍການນຳພັກກອມມູນິດແລະລັດຫວຽດນາມ, ການທູດໄດ້ເສີມຂະຫຍາຍທ່າແຮງຂອງຕົນ, ຊອກຮູ້ບັນດາຄວາມຮູ້ກ່ຽວກັບເສດຖະກິດໂລກ, ການພົວພັນເສດຖະກິດສາກົນ, ເປີດກ້ວາງ ແລະ ຂຸດຄົ້ນສາຍພົວພັນກັບບັນດາຄູ່ ຮ່ວມມືພາຍນອກ, ສະເໜີບັນດາວິທີການແກ້ໄຂທີ່ເໝາະສົມ, ປະກອບສ່ວນເຂົ້າໃນການວາງແຜນກຳນົດແນວທາງປ່ຽນແປງໃໝ່ຂອງປະເທດ ແນໃສ່ນຳເອົາຫວຽດນາມຫຼຸດພົ້ນອອກຈາກວິກິດການເສດຖະກິດ - ສັງຄົມ.
ສິ່ງພິເສດທີ່ມີຄວາມໝາຍແມ່ນ ການທູດໄດ້ນຳໜ້າໃນການ “ຜ່າວົງປິດລ້ອມ”, ເປີດສາກສະຖານະພາບການພັດທະນາໃໝ່ໃຫ້ແກ່ປະເທດ. ການທູດໄດ້ເປັນເສນາທິການໃຫ້ແກ່ກົມການເມືອງ ຄະນະບໍລິຫານງານສູນກາງພັກກອມມູນິດ ຫວຽດນາມ ອອກມະຕິສະບັບເລກທີ 32 (ເດືອນກໍລະກົດ 1986) ຢັ້ງຢືນບາດກ້າວປ່ຽນແປງໃໝ່ທາງດ້ານຈິນຕະນາການທີ່ສຳຄັນ ກ່ຽວກັບການພົວພັນຕ່າງປະເທດ ແມ່ນສົມທົບກຳລັງແຮງຂອງຊາດກັບກຳລັງແຮງຍຸກສະໄໝ, ຍາດແຍ່ງບັນດາເງື່ອນໄຂສະດວກຂອງສາກົນ ເພື່ອສ້າງສາແລະປົກປັກຮັກສາປະເທດຊາດ ແລະ ມະຕິສະບັບເລກທີ 13 (ເດືອນພຶດສະພາ 1988) ໃນນັ້ນ, ໄດ້ເນັ້ນໜັກນະໂຍບາຍ “ເພີ່ມເພື່ອນມິດ, ຫຼຸດຜ່ອນສັດຕູ”, ຫັນເປັນການພົວພັນຫຼາຍຝ່າຍບົນພື້ນຖານການເຄົາລົບຄວາມເປັນເອກະລາດ, ອຳນາດອະທິປະໄຕ, ຕ່າງຝ່າຍຕ່າງມີຜົນປະໂຫຍດ(2). ໃນນັ້ນ, ຫວຽດນາມໄດ້ເຂົ້າຮ່ວມການແກ້ໄຂບັນຫາ ກຳປູເຈຍ (ປີ 1991), ຫັນເອົາການພົວພັນກັບປະເທດ ຈີນ (ປີ 1991), ອາເມລິກາ (ປີ 1995) ເຂົ້າເປັນປົກກະຕິ, ເຂົ້າຮ່ວມສະມາຄົມບັນດາປະເທດອາຊີຕາເວັນອອກສຽງໃຕ້ - ອາຊຽນ (ປີ 1995) ແລະ ບັນດາການຈັດຕັ້ງຂອງພາກພື້ນ ແລະ ໃນໂລກເທື່ອລະກ້າວ. ເຖິງປະຈຸບັນ, ຈາກປະເທດທີ່ຖືກປິດລ້ອມ ຂວ້ຳບາດ, ຫວຽດນາມໄດ້ສ້າງຕັ້ງການພົວພັນຕ່າງປະເທດເປີດກ້ວາງກັບ 189 ປະເທດໃນ 193 ປະເທດທີ່ເປັນສະມາຊິກຂອງສະຫະປະຊາຊາດ. ຫວຽດນາມໄດ້ສ້າງການພົວພັນຄູ່ຮ່ວມມືຍຸດທະສາດ ແລະ ຄູ່ຮ່ວມມືຮອບດ້ານກັບ 30 ປະເທດ(3), ໃນນັ້ນ, ມີທັງໝົດບັນດາປະເທດໃຫຍ່, 17 ໃນ 20 ປະເທດທີ່ຢູ່ໃນກຸ່ມບັນດາພື້ນຖານເສດຖະກິດໃຫຍ່ (G20), ບັນດາປະເທດອາຊຽນທັງໝົດ. ກອບການພົວພັນເຫຼົ່ານີ້ ໄດ້ສ້າງພື້ນຖານໝັ້ນແກ່ນໃຫ້ແກ່ຫວຽດນາມແລະປະເທດອື່ນໆ ເພື່ອຍົກສູງລະດັບການຮ່ວມມືເພື່ອຜົນປະໂຫຍດຂອງແຕ່ລະປະເທດ, ເພື່ອສັນຕິພາບ, ການຮ່ວມມື ແລະການພັດທະນາຢູ່ພາກພື້ນ ແລະ ໃນໂລກ.
ກອງກຽດຕິຍົດປະຕິບັດພິທີຊັກທຸງ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສະມາຄົມບັນດາປະເທດອາຊີຕາເວັນອອກສຽງໃຕ້ - ອາຊຽນ ຄົບຮອບ 53 ປີ (8 ສິງຫາ 1967 - 8 ສິງຫາ 2020) ແລະ ວັນຫວຽດນາມເປັນສະມາຊິກຂອງ ອາຊຽນ ຢ່າງເປັນທາງການ ຄົບຮອບ 25 ປີ (28 ກໍລະກົດ 1995 - 28 ກໍລະກົດ 2020) _ພາບ: TTXVN
ພ້ອມກັບບັນດາກະຊວງ, ຄະນະແລະຂະແໜງການທີ່ກ່ຽວຂ້ອງ, ການທູດໄດ້ເຂົ້າຮ່ວມການເຊື່ອມໂຍງສາກົນຢ່າງຕັ້ງໜ້າ, ບົນພື້ນຖານຈຸດສຸມ ແມ່ນເຊື່ອມໂຍງເສດຖະກິດສາກົນ ແນໃສ່ດຶງດູດແຫຼ່ງກຳລັງໃຫ້ແກ່ການພັດທະນາປະເທດ. ພາຍຫຼັງ 35 ປີແຫ່ງການປ່ຽນແປງໃໝ່ ແລະ ເຊື່ອມໂຍງສາກົນຢ່າງກວ້າງຂວາງ, ຈີດີພີ ຂອງຫວຽດນາມໄດ້ເພີ່ມຂຶ້ນ 10 ເທົ່າ, ວົງເງິນຂາອອກແລະຂາເຂົ້າເພີ່ມຂຶ້ນເກືອບ 176 ເທົ່າ. ນັບທັງເວລາທີ່ເສດຖະກິດຂອງໂລກປະສົບຄວາມຫຍຸ້ງຍາກ, ເສດຖະກິດຫວຽດນາມຍັງຮັກສາໄດ້ລະດັບການເຕີບໂຕສູງ ເມື່ອທຽບກັບບັນດາປະເທດໃນພາກພື້ນແລະໃນໂລກ. ພາຍໃຕ້ຜົນກະທົບຂອງໂລກລະບາດໂຄວິດ-19, ເສດຖະກິດຂອງຫຼາຍປະເທດຕົກໃສ່ສະພາບການຖົດຖອຍ(4) ແຕ່ເສດຖະກິດຂອງຫວຽດນາມ ຍັງມີການເຕີບໂຕເກືອບ 3% ໃນ 6 ເດືອນໃນປີ 2020. ຈາກພື້ນຖານເສດຖະກິດທີ່ປິດແລະໄດ້ຮັບການເກື້ອນກູນອຸດໜູນ, ມາເຖິງປະຈຸບັນ, ຫວຽດນາມໄດ້ກາຍເປັນຈຸດເຊື່ອມຕໍ່ທີ່ສຳຄັນ ໃນເຄືອຂ່າຍຄວາມເຊື່ອມໂຍງທາງເດສຖະກິດລະດັບຖາກຖື້ນ ທີ່ມີສັນຍາການຄ້າເສລີ 16 ສະບັບ. ໃນຂະບວນວິວັດດັ່ງກ່າວ, ການທູດໄດ້ໃຫ້ຄຳປຶກສາກ່ຽວກັບມາດຕະການແລະບາດກ້າວຍຸດທະສາດ ໃຫ້ແກ່ພັກກອມມູນິດແລະລັດຫວຽດນາມ ເພື່ອໃຫ້ຫວຽດນາມເຂົ້າຮ່ວມການຮ່ວມສຳພັນເສດຖະກິດຂອງພາກພື້ນ ແລະ ໃນໂລກຢ່າງຫຼວງຫຼາຍແລະເລິກເຊິ່ງ, ຈາກນັ້ນ, ສ້າງໄດ້ບັນດາກຳລັງແຮງຊຸກດັນອັນໃຫຍ່ຫຼວງ ໃຫ້ແກ່ພາລະກິດການພັດທະນາປະເທດ.
ຄຽງຄູ່ກັນນັ້ນ, ການທູດນັບມື້ນັບມີຄວາມສະໜິດຕິດພັນກັບປະຊາຊົນ, ກັບທ້ອງຖິ່ນແລະວິສາຫະກິດ ໃນຂະບວນການພັດທະນາຫຼາຍກ່ວາເກົ່າ. ການທູດດ້ານເສດຖະກິດໄດ້ມີຄວາມຕັ້ງໜ້າ, ເປັນເຈົ້າການໃນການເຂົ້າເຖິງ, ເປີດທາງຂະຫຍາຍການພົວພັນການຄ້າແລະການລົງທຶນ ກັບການຕະຫຼາດໃນ 230 ແຫ່ງຢູ່ທັງຫ້າທະວີບ, ເຂົ້າຮ່ວມສົນທິສັນຍາສອງຝ່າຍແລະຫຼາຍຝ່າຍຫຼາຍກ່ວາ 500 ສະບັບ, ຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມຂອງປະເທດຢ່າງສຸດຂີດ. ຂໍ້ມູນຂ່າວສານພົວພັນຕ່າງປະເທດ ແລະ ການທູດດ້ານວັດທະນະທຳ ໄດ້ແຜ່ຜາຍມໍລະດົກຂອງຊາດ ແລະວັດທະນະທຳທີ່ເປັນມູນເຊື້ອ ດ້ວຍຫຼາຍຮູບການທີ່ອຸດົມສົມບູນ, ຫຼາຍຮູບຫຼາຍແບບຢ່າງຕັ້ງໜ້າ; ພ້ອມດຽວກັນນັ້ນ, ໄດ້ມີການໂຄສະນາຂົນຂວາຍ ເພື່ອໃຫ້ມໍລະດົກຫວຽດນາມ 39 ແຫ່ງໄດ້ຮັບການຍອມຮັບຈາກຢູເນສໂກ ວ່າເປັນມໍລະດົກໂລກທາງວັດທະນະທຳ, ຈາກນັ້ນ, ທັງໄດ້ປະກອບສ່ວນໃຫ້ແກ່ການປົກປັກຮັກສາບັນດາຄຸນຄ່າຂອງມະນຸດຊາດ, ທັງສ້າງແຫຼ່ງກຳລັງໃຫ້ແກ່ການພັດທະນາໃນທ້ອງຖິ່ນຢ່າງຫຼວງຫຼາຍ. ການທູດໄດ້ຜັນຂະຫຍາຍວຽກງານຊາວຫວຽດນາມຢູ່ຕ່າງປະເທດຢ່າງຕັ້ງໜ້າ ແລະ ມີປະສິດທິຜົນ, ປະກອບສ່ວນເຂົ້າໃນການລະດົມສົ່ງເສີມນ້ຳໃຈຮັກຊາດ ແລະ ປັບປຸງກ້ອນກຳລັງມະຫາສາມັກຄີທົ່ວປວງຊົນ ແລະ ດຶງດູດບັນດາແຫຼ່ງກຳລັງ ເພື່ອສ້າງສາປະເທດຊາດ. ພ້ອມດຽວກັນນັ້ນ, ການທູດຍາມໃດກໍຢືນຢູ່ແຖວໜ້າໃນການປົກປ້ອງພົນລະເມືອງ, ປົກປ້ອງສິດແລະຜົນປະໂຫຍດທີ່ຖືກຕ້ອງຕາມກົດໝາຍ ຂອງຄົນ ຫວຽດນາມຢູ່ຕ່າງປະເທດ. ໂດຍສະເພາະກຳລັງພະນັກງານການທູດ ເປັນຕົ້ນແມ່ນບັນດາພະນັກງານໃນບັນດາອົງການຕາງໜ້າຂອງຫວຽດນາມຢູ່ຕ່າງປະເທດ ໄດ້ມີບົດບາດສຳຄັນ, ປະກອບສ່ວນເຮັດໃຫ້ວຽກງານປົກປ້ອງພົນລະເມືອງຫວຽດນາມ ປະສົບຜົນສຳເລັດ ໃນໄລຍະການລະບາດຂອງພະຍາດໂຄວິດ-19.
ການທູດໄດ້ເສີມຂະຫຍາຍບົດບາດສຳຄັນໃນການຍົກສູງຖານະບົດບາດຂອງປະເທດ, ສະແດງບົດບາດເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ.
ປະທານ ໂຮ່ຈີມິນ ໄດ້ຊີ້ແຈ້ງວ່າ: ການປະຕິວັດຫວຽດນາມເປັນພາກສ່ວນໜຶ່ງຂອງການປະຕິວັດໂລກ. ໂດຍປະຕິບັດຕາມຄຳສັ່ງສອນຂອງເພິ່ນ, ທະຫານ ແລະປະຊາຊົນຫວຽດນາມ ບໍ່ພຽງແຕ່ປົກປັກຮັກສາປະເທດຫວຽດນາມໄວ້ຢ່າງໝັ້ນຄົງເທົ່ານັ້ນ ແລະຍັງໄດ້ເຂົ້າຮ່ວມ, ປະກອບສ່ວນເຂົ້າໃນວຽກງານລວມ ຂອງປະຊາຄົມສາກົນຢ່າງຕັ້ງໜ້າອີກດ້ວຍ. ພິເສດແມ່ນ ນັບແຕ່ເວລາປ່ຽນແປງໃໝ່ຈົນເຖິງປະຈຸບັນນີ້, ຫວຽດນາມມີບົດບາດປະສານງານກ່ຽວກັບຜົນປະໂຫຍດໃນຖານະເປັນເຈົ້າພາບຈັດເຫດການສາກົນທີ່ສຳຄັນຢ່າງຫຼວງຫຼາຍ, ໃນນັ້ນ, ມີກອງປະຊຸມສຸດຍອດບັນດາປະເທດໃຊ້ພາສາຝຣັ່ງ ປີ 1997, ກອງປະຊຸມສຸດຍອດ ອາຊຽນ ປີ 1998, ປີ 2010, ກອງປະຊຸມຂັ້ນສູງ ASEM ປີ 2005, ກອງປະຊຸມຂັ້ນສູງ APEC ປີ 2006 ແລະ ປີ 2017… ຫວຽດນາມໄດ້ແລະກຳລັງຍູ້ແຮງ ແລະ ຍົກສູງລະດັບການພົວພັນຕ່າງປະເທດຫຼາຍຝ່າຍ ຕາມຈິດໃຈຄຳສັ່ງຂອງຄະນະເລຂາທິການສູນກາງພັກກອມມູນິດຫວຽດນາມ ສະບັບເລກທີ 25-CT/TW, ລົງວັນທີ 8 ສິງຫາ 2018, ກ່ຽວກັບການຍູ້ແຮງ ແລະ ຍົກລະດັບການພົວພັນຕ່າງປະເທດຫຼາຍຝ່າຍຮອດປີ 2030, ເປັນເຈົ້າການແລະປະກອບສ່ວນເຂົ້າໃນການສ້າງແລະກຳນົດບັນດາລະບຽບລະບອບຫຼາຍຝ່າຍຢ່າງຕັ້ງໜ້າ, ພ້ອມດຽວກັນນັ້ນ, ບືນຂຶ້ນມີບົດບາດໃນການແກ້ໄຂບັນດາບັນຫາພາກພື້ນແລະໃນໂລກຢ່າງຕັ້ງໜ້າ. ຫວຽດນາມໄດ້ມີການປະກອບສ່ວນຈັດສຳເລັດກອງປະຊຸມສຸດຍອດ ອາເມລິກາ - ເກົາຫຼີເໜືອ ຄັ້ງທີ 2 ທີ່ນະຄອນຫຼວງຮ່າໂນ້ຍ, ຈາກນັ້ນ, ໄດ້ຊຸກຍູ້ການສົນທະນາ, ໄກ່ເກ່ຍ ແລະ ສັນຕິພາບໃນແຫຼມເກົາຫຼີ, ໄດ້ຮັບການຕີລາຄາສູງຈາກບັນດາຄູ່ຮ່ວມມືແລະປະຊາຄົມສາກົນ; ການທີ່ຫວຽດນາມໄດ້ຮັບການເລືອກຕັ້ງດ້ວຍຄະແນນສຽງສູງສຸດໃນປະຫວັດສາດສະພາຄວາມໝັ້ນຄົງແຫ່ງສະຫະປະຊາຊາດ ໃຫ້ດຳລົງຕຳແໜ່ງສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ວາລະປີ 2020-2021 ທີ່ສຳຄັນທີ່ສຸດນັ້ນ ໄດ້ສະແດງໃຫ້ເຫັນເຖິງຄວາມເຊື່ອໝັ້ນແລະຄວາມຄາດຫວັງຂອງປະຊາຄົມສາກົນຕໍ່ຫວຽດນາມ. ພິເສດແມ່ນໃນປີ 2020, ເປັນຄັ້ງທຳອິດທີ່ຫວຽດນາມຮັບຜິດຊອບສາມໜ້າທີ່ສາກົນສຳຄັນໃນເວລາດຽວຄື: ປະທານອາຊຽນປີ 2020, ສະມາຊິກບໍ່ຖາວອນຂອງ ສະພາຄວາມໝັ້ນຄົງແຫ່ງສະຫະປະຊາຊາດ ວາລະປີ 2020-2021, ປະທານສະພາລະຫວ່າງລັດຖະສະພາອາຊຽນຄັ້ງທີ 41 (AIPA 41), ສະແດງເຖິງຄວາມຮັບຜິດຊອບທາງສາກົນຂອງຫວຽດນາມ ກໍຄືຄວາມສາມາດຂອງບັນດາເຫຼົ່າຮົບພົວພັນຕ່າງປະເທດ ພາຍໃຕ້ການຊີ້ນຳຂອງພັກກອມມູນິດ ແລະ ລັດ ຫວຽດນາມ.
ທ່ານຫງຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພກ ຫວຽດນາມ, ປະທານປະເທດແຫ່ງ ສສ ຫວຽດນາມ ມອບຂໍ້ຕົກລົງວ່າດ້ວຍການແຕ່ງຕັ້ງເອກອັກຄະລັດຖະທູດແຫ່ງ ສສ ຫວຽດນາມປະຈຳຢູ່ຕ່າງປະເທດ ອາຍຸການ 2020-2023 ຈໍານວນ 9 ທ່ານ ແລະ ຕ້ອນຮັບບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງ ສສ ຫວຽດນາມ ປະຈຳຢູ່ຕ່າງປະເທດ ກຽມເດີນທາງໄປຮັບໜ້າທີ່ໃໝ່, ທີ່ທຳນຽບປະທານປະເທດ (ຮ່າໂນ້ຍ, ຫວຽດນາມ), ວັນທີ 21 ຕຸລາ 2020 _ພາບ: TTXVN
ເພື່ອບັນລຸໄດ້ບັນດາຜົນງານທີ່ສຳຄັນໃນ 70 ກ່ວາປີຜ່ານມາ, ຂະແໜງ ການໆຕ່າງປະເທດໄດ້ມີການປະສານງານກັບເຫຼົ່າຮົບພົວພັນຕ່າງປະເທດຕ່າງໆໃນທັງສາມເສົາຄ້ຳຢ່າງແໜ້ນແຟ້ນ ແລະເຂົ້າແກັບເຂົ້າເກຍກັນດີ ເຊັ່ນ: ການພົວພັນຕ່າງປະເທດຂອງພັກ, ການຕ່າງປະເທດຂອງລັດ, ການທູດປະຊາຊົນ ເພື່ອຜັນຂະຫຍາຍວຽກງານພົວພັນຕ່າງປະເທດຢ່າງຄົບຊຸດ ແລະ ມີປະສິດທິຜົນ. ຖັນແຖວພະນັກງານທີ່ເຮັດວຽກງານພົວພັນຕ່າງປະເທດເວົ້າລວມ ແລະພະນັກງານການທູດເວົ້າສະເພາະ ນັບມື້ນັບມີການເຕີບໃຫຍ່. ກະຊວງການຕ່າງປະເທດຫວຽດນາມໃນຊຸມວັນຕົ້ນປີແຫ່ງການສ້າງຕັ້ງ ມີພະນັກງານພຽງ 20 ຄົນເທົ່ານັ້ນ, ມາຮອດປະຈຸບັນ, ມີພະນັກງານວິຊາຊີບນັບພັນຄົນທີ່ມີເຈດຈຳນົງທາງດ້ານການເມືອງແລະຄວາມຊຳນານດ້ານວິຊາຊີບ. ຈາກອົງການທາງການທູດຢູ່ຕ່າງປະເທດ 3 ແຫ່ງ, ປະຈຸບັນຫວຽດນາມມີອົງການຕາງໜ້າໃນທົ່ວໂລກຈຳນວນ 94 ແຫ່ງ. ຕໍ່ໜ້າສະຖານະການທີ່ປ່ຽນແປງຢ່າງບໍ່ຢຸດຢັ້ງ, ກອງປະຊຸມການຕ່າງປະເທດຄັ້ງທີ 30 (ເດືອນສິງຫາ 2018) ໄດ້ວາງໜ້າທີ່ສ້າງພື້ນຖານການຕ່າງປະເທດທີ່ທັນສະໄໝ ເພື່ອຕອບສະໜອງຄວາມຮຽກຮ້ອງຕ້ອງການແລະໜ້າທີ່ນັບມື້ນັບສູງກ່ວາເກົ່າໄດ້ເປັນຢ່າງດີ. ພິເສດແມ່ນທ່ານ ຫງວຽນຝູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ວາງຄວາມຮຽກຮ້ອງຕ້ອງການຕ້ອງ “ປ່ຽນແປງໃໝ່ຈິນຕະນາການໃນວຽກງານພົວພັນຕ່າງປະເທດ”(5) ເພື່ອໃຫ້ທັນກັບການພັດທະນາຂອງສະພາບການ. ໃນນັ້ນ, ຂະແໜງການໆຕ່າງປະເທດ ແລະພະນັກງານແຕ່ລະຄົນ ຕ້ອງສືບຕໍ່ປ່ຽນແປງໃໝ່, ມີຄວາມຂະຫຍັນຂັນເຂື່ອນ, ມີຫົວຄິດປະດິດສ້າງ, ກ້າຄິດ, ກ້າປະຕິບັດ, ບືນຂຶ້ນສູ່ລະດັບພາກພື້ນ ແລະ ສາກົນ.
***
ບັນດາບາດກ້າວອັນສະຫງ່າລາສີຂອງການທູດປະຕິວັດຫວຽດນາມ, ນຳ ໂດຍລຸງໂຮ່ແລະບັນດາຜູ້ນຳບັນພະບູລຸດຂອງພັກ ໄດ້ປະກອບສ່ວນເຂົ້າໃນການກຳ ນົດເອກະລັກຂອງການທູດຫວຽດນາມ. ເຊື່ອມຊຶມແນວຄິດການທູດໂຮ່ຈີມິນ ບົນພື້ນຖານທິດນຳຫຼັກຄື “ຖືເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, ການທູດ ຫວຽດນາມໄດ້ຖອດຖອນບົດຮຽນສຳຄັນຢ່າງຫຼວງຫຼາຍ ແລະ ໝູນໃຊ້ເຂົ້າໃນພຶດຕິກຳຕົວຈິງຂອງການປະຕິບັດໜ້າທີ່ວຽກງານຢ່າງມີຫົວຄິດປະດິດສ້າງ ແລະ ມີຄວາມໄຫວພິບ.
ທີໜຶ່ງ, ບົດຮຽນຍົກສູງຜົນປະໂຫຍດຂອງປະເທດ-ປະຊາຊາດໃນການແກ້ໄຂບັນດາບັນຫາພົວພັນຕ່າງປະເທດ. ການທູດຫວຽດນາມໄດ້ໝູນໃຊ້ທິດນຳທີ່ວ່າ “ຖືເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, ໃນນັ້ນ, ອັນ “ຫຼັກການ” ແມ່ນຜົນປະໂຫຍດຍຸດທະສາດຂອງປະເທດ, ປະຊາຊາດຫວຽດນາມ, ອັນທີ່ຕ້ອງ “ໝູນໃຊ້ຢ່າງໄຫວພິບ” ແມ່ນສະພາບການຂອງໂລກມີການປ່ຽນແປງຢ່າງບໍ່ຢຸດຢັ້ງ ແລະ ບັນດາຍຸດໂທບາຍລະອຽດຂອງຫວຽດນາມ. ໃນການຕໍ່ຕ້ານ, ເຖິງແມ່ນວ່າ ຍັງບໍ່ທັນບັນລຸໄດ້ຄວາມຮຽກຮ້ອງຕ້ອງການເອກະພາບແຕ່ຫົວທີກໍຕາມ ແຕ່ການທູດ ໄດ້ຕໍ່ສູ້ຢ່າງບໍ່ຢຸດຢັ້ງເພື່ອປະກອບເຂົ້າໃນສົນທິສັນຍາສາກົນທີ່ສຳຄັນເຊັ່ນ: ສັນຍາເຊີແນວປີ 1954 ແລ ສັນຍາປາຣີປີ 1973, ບັນດາຄຳໝັ້ນສັນຍາຂອງອີກຝ່າຍ ໜຶ່ງ ເພື່ອຮັບຮູ້ເອກະລາດ, ອະທິປະໄຕ, ເອກະພາບ, ການທ້ອນໂຮມປະເທດຊາດເປັນເອກະພາບ ແລະ ຜືນແຜ່ນດິນອັນຄົບຖ້ວນ ເຊິ່ງແມ່ນບັນດາຜົນປະໂຫຍດທີ່ລຸງໂຮ່ ແລະ ທົ່ວທັງຊາດຫວຽດນາມຍາມໃດກໍມຸ່ງໝັ້ນເດີນຕາມ. ໃນຂະບວນ ການປ່ຽນແປງໃໝ່, ຜົນປະໂຫຍດສູງສຸດຂອງປະເທດ-ປະຊາຊາດຫວຽດນາມ ແມ່ນຮັກສາສະພາບແວດລ້ອມສັນຕິພາບ, ຄວາມໝັ້ນຄົງ, ຍາດແຍ່ງບັນດາແຫຼ່ງກຳລັງ ໃຫ້ແກ່ການພັດທະນາປະເທດ, ພ້ອມກັນນັ້ນ, ຮັກສາອຳນາດອະທິປະໄຕ, ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ.
ທີສອງ, ຢຶດໝັ້ນແນວຄິດເອກະລາດ, ເປັນເຈົ້າການໃນແນວທາງພົວພັນ ຕ່າງປະເທດ, ຖືວ່ານັ້ນເປັນຫຼັກການບໍ່ປ່ຽນແປງຂອງການທູດ ເພື່ອປົກປ້ອງຜົນປະໂຫຍດຂອງປະເທດ-ປະຊາຊາດໄດ້ດີທີ່ສຸດ. ພ້ອມດຽວກັນນັ້ນ, ການທູດກໍໄດ້ສົມ ທົບລະຫວ່າງແຜນນະໂຍບາຍຫັນການພົວພັນຕ່າງປະເທດເປັນຫຼາຍຝ່າຍ ແລະ ຫຼາຍຮູບຫຼາຍແບບ, ເປັນເພື່ອນມິດ ຄູ່ຮ່ວມມືທີ່ໄວ້ວາງໃຈໄດ້ຂອງບັນດາປະເທດ, ພິເສດແມ່ນບັນດາຄູ່ຮ່ວມມືສຳຄັນຕໍ່ການພັດທະນາ ແລະ ຄວາມສະຫງົບຂອງປະເທດ. ນັບແຕ່ເວລານຳພາລັດແຫ່ງ ສສ ຫວຽດນາມ ຍາດເອົາເອກະລາດແຕ່ຫົວທີ, ປະທານໂຮ່ຈີມິນໄດ້ປະກາດວ່າ: “ລັດຖະບານແຫ່ງສາທາລະນະລັດປະຊາທິປະໄຕຫວຽດນາມ ພ້ອມທີ່ຈະສະຖາປະນາສາຍພົນພັນການທູດກັບລັດຖະບານຂອງປະເທດໃດໆກໍ່ຕາມທີ່ເຄົາລົບສິດສະເໝີພາບ, ອະທິປະໄຕໃນດິນແດນ ແລະອຳນາດອະທິປະໄຕຂອງປະເທດຫວຽດນາມ, ເພື່ອພ້ອມກັນປົກປັກຮັກສາສັນຕິພາບ ແລະເສີມສ້າງປະຊາທິປະໄຕໃນໂລກ”(6). ການທູດຫວຽດນາມຍາມໃດກໍໄດ້ໝູນໃຊ້ບົດຮຽນໃນແຕ່ລະສະໄໝ, ແຕ່ລະໄລຍະຢ່າງຄ່ອງແຄ່ວ ເພື່ອບັນລຸໄດ້ຈຸດໝາຍສຸດທ້າຍແມ່ນ ເອກະລາດແຫ່ງຊາດ, ຄວາມເປັນເຈົ້າຕົນເອງໃນການຕັດສິນຕົກລົງການພົວພັນຕ່າງປະເທດ ບົນຈິດໃຈສັນຕິພາບ, ສາມັກຄີສາກົນ.
ທີສາມ, ຍິ່ງມີກຳລັງແຮງເທົ່າໃດ ຖານະບົດບາດທາງການທູດຍິ່ງສູງຂຶ້ນ ແລະ ເສີມຂະຫຍາຍບົດບາດໃນການຊຸກຍູ້ຜົນປະໂຫຍດຂອງປະເທດ-ປະຊາຊາດໃຫ້ສູງກ່ວາເກົ່າ. ປະທານໂຮ່ຈີມິນເຄີຍເວົ້າວ່າ: “ກຳລັງແຮງຕົວຈິງເຂັ້ມແຂງ, ການທູດຈະໄດ້ຮັບໄຊຊະນະ, ກຳລັງຕົວຈິງແມ່ນຄ້ອງ ສ່ວນການທູດແມ່ນສຽງ. ຄ້ອງໃຫຍ່ສຽງຈຶ່ງດັງ”(7). ກຳລັງຕົວຈິງຂອງຫວຽດນາມໃນປະຈຸບັນນີ້ ແມ່ນກຳລັງແຮງສັງລວມ, ລວມທັງພະລັງແຂງແມ່ນຂະໜາດເສດຖະກິດ, ກຳລັງບົ່ມຊ້ອນດ້ານການປ້ອງກັນຊາດ ແລະພະລັງອ່ອນນວນນແມ່ນຈິດໃຈບໍ່ຍອມຈຳນົນ ອົງອາດກ້າແກ່ນ ແຕ່ຊາດຫວຽດນາມກໍມີຄວາມເປັນມິດ ຮັກຫອມສັນຕິພາບ, ມີປະສົບການໃນການປ່ຽນແປງໃໝ່ ແລະການເຊື່ອມໂຍງເຂົ້າກັບສາກົນທີ່ປະສົບຄວາມສຳເລັດ, ມູນເຊື້ອການທູດຫວຽດນາມພ້ອມກັບທີ່ຕັ້ງພູມສາດການເມືອງ-ເສດຖະກິດທີ່ສຳຄັນ ໃນພາກພື້ນອາຊີ-ປາຊີຟິກ ທີ່ມີການພັດທະນາຢ່າງຂະຫຍັນຂັນເຂື່ອນ, ມີຄວາມສຳຄັນຍິ່ງທາງດ້ານເສດຖະກິດ, ການເມືອງ ແລະ ຍຸດທະສາດ. ພ້ອມດຽວກັນນັ້ນ, ກຳລັງຕົວຈິງດັ່ງກ່າວໄດ້ຮັບການປັບປຸງ ແລະ ສ້າງຄວາມເຂັ້ມແຂງຂຶ້ນຫຼາຍເທົ່າ ດ້ວຍກ້ອນກຳລັງມະຫາສາມັກຄີທົ່ວປວງຊົນ ແລະ ການປະສານງານລະຫວ່າງການພົວພັນຕ່າງປະເທດຂອງພັກ, ການຕ່າງປະເທດຂອງລັດ, ການທູດປະຊາຊົນຢ່າງແໜ້ນແຟ້ນ ແລະເຂົ້າແກັບເຂົ້າເກຍກັນດີ, ສ້າງເປັນກຳລັງແຮງສັງລວມອັນໃຫຍ່ຫຼວງໃນທຸກແນວໂຮມພົວພັນຕ່າງປະເທດ.
ທີສີ່, ຕ້ອງສົມທົບກຳລັງແຮງຂອງຊາດກັບກຳລັງແຮງຍຸກສະໄໝ ແນໃສ່ສ້າງກຳລັງແຮງສັງລວມອັນຍິ່ງໃຫຍ່ ເພື່ອພາການປະຕິວັດຫວຽດນາມຍາດເອົາໄຊຊະນະຢ່າງຫຼວງຫຼາຍ. ເມື່ອຍັງມີຊີວິດຢູ່ ປະທານໂຮ່ຈີມິນຍາມໃດກໍຍົກເອົາປະເທດຫວຽດນາມຂຶ້ນຢູ່ໃນກະແສຂອງໂລກແລະໃຫ້ຄວາມສຳຄັນກັບບັນດາກະແສໃຫຍ່ ເຊັ່ນ: ທ່າອ່ຽງຂອງການປະຕິວັດໂລກ, ແງ່ຫວັງໃນການພົວພັນລະຫວ່າງບັນດາສູນອຳນາດ... ໃນປະຈຸບັນ, ກຳລັງແຮງຍຸກສະໄໝເປັນຄວາມມຸ່ງຫວັງລວມຂອງປະຊາຊົນໂລກ ເພື່ອສັນຕິພາບ, ການຮ່ວມມື ແລະ ການພັດທະນາ, ເປັນທ່າອ່ຽງພາວະວິໄສ ແລະຄວາມຕັ້ງໜ້າຂອງການຫັນເປັນໂລກາພິວັດ, ການເຊື່ອມໂຍງສາກົນ, ການປະຕິວັດອຸດສາຫະກຳຄັ້ງທີສີ່, ແມ່ນການສະໜັບສະໜູນແລະເຄົາລົບຄວາມຖືກຕ້ອງຊອບທຳ, ລັດທິຫຼາຍຝ່າຍ, ຄວາມສາມັກຄີສາກົນ ແລະກົດໝາຍ…
ທີຫ້າ, ສົ່ງເສີມຈິດໃຈສັນຕິພາບແລະມະນຸດສະທຳຂອງການທູດຫວຽດນາມ ອັນເນື່ອງມາຈາກທັດສະນະຂອງປະທານໂຮ່ຈີມິນໃນການຕໍ່ສູ້ປະຕິວັດມຸ່ງໄປສູ່ສັນຕິພາບ. ໃນຄຳຮຽກຮ້ອງທົ່ວປະເທດລຸກຮືຂຶ້ນຕໍ່ຕ້ານ, ປະທານໂຮ່ຈີມິນໄດ້ຢັ້ງຢືນ “ຫວຽດນາມຕ້ອງການສັນຕິພາບ”, ພ້ອມແລ້ວທີ່ຈະປະນີປະນອມເພື່ອມີສັນຕິພາບ, ບໍ່ໃຊ້ກຳລັງອາວຸດ, ຕໍ່ສູ້ຕ້ານສົງຄາມຈົນເຖິງທີ່ສຸດ, ຍົກເວັ້ນແຕ່ສັດຕູບັງຄັບໃຫ້ຊາດຫວຽດນາມຕ້ອງດຳເນີນການສົງຄາມເພື່ອປ້ອງກັນຕົນເອງ. ຕັ້ງແຕ່ການເລີ່ມຕົ້ນຂອງລັດຫວຽດນາມສະໄໝໃໝ່, ປະທານໂຮ່ຈີມິນໄດ້ປະກາດວ່າ “ຫວຽດນາມພ້ອມແລ້ວທີ່ຈະເປັນເພື່ອນກັບທຸກໆປະເທດປະຊາທິປະໄຕ ແລະ ຈະບໍ່ເປັນສັດຕູກັບໃຜ”(8). ໃນຕະຫຼອດ 70 ກ່ວາປີທີ່ຜ່ານມາ, ການທູດຂອງຫວຽດນາມຍາມໃດກໍສະແດງວ່າ ເປັນການທູດຂອງຊາດທີ່ຮັກຫອມສັນຕິພາບ,ເອກະລາດ, ເສລີພາບແລະຄວາມຍຸຕິທຳ. ດ້ວຍຈິດໃຈສັນຕິພາບ ແລະຄວາມເປັນທຳ, ຊາດຫວຽດນາມໄດ້ຮັບການສະໜັບສະໜູນຢ່າງກວ້າງຂວາງຈາກປະເທດອື່ນໆ, ຊ່ວຍຜ່ານຜ່າສິ່ງທ້າທາຍທາງປະຫວັດສາດຫຼາຍຢ່າງ ແລະ ສ້າງສາຍພົວພັນຮ່ວມມືກັບຫຼາຍປະເທດໃນທົ່ວໂລກ ລວມທັງອະດີດປະເທດສັດຕູ.
ທ່ານຫງວຽນຊວັນຝຸກ, ກໍາມະການກົມການເມືອງຄະນະບໍລິຫານງານສູນກາງ ພກ ຫວຽດນາມ, ນາຍົກລັດຖະມົນຕີແຫ່ງ ສສ ຫວຽດນາມ ຢ້ຽມຊົມຫ້ອງມູນເຊື້ອຂອງຂະແໜງການໆຕ່າງປະເທດ, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງຂະແໜງການໆຕ່າງປະເທດ ຫວຽດນາມ ຄົບຮອບ 75 ປີ (28 ສິງຫາ 1945 – 28 ສິງຫາ 2020) ແລະໃຫ້ກຽດເຂົ້າຮ່ວມກອງປະຊຸມໃຫຍ່ແຂ່ງຂັນຮັກຊາດໄລຍະປີ 2020 – 2025 _ ພາບ: TTXVN
***
ໃນເຈັດທົດສະວັດທີ່ຜ່ານມາ, ການທູດຫວຽດນາມໄດ້ຮ່ວມເດີນທາງພ້ອມກັບຊາດ, ຮັບໃຊ້ພັກກອມມູນິດ, ລັດ ແລະ ປະຊາຊົນຫວຽດນາມ, ຖືຈຸດໝາຍສູງສຸດແມ່ນຜົນປະໂຫຍດຂອງປະເທດ-ປະຊາຊາດ, ຖືລັດທິມາກ-ເລນິນ ແລະແນວຄິດໂຮ່ຈີມິນເປັນເຂັມຊີ້ທິດ, ສືບທອດມູນເຊື້ອການທູດຫວຽດນາມ, ເສີມຂະຫຍາຍຈິດໃຈປ່ຽນແປງໃໝ່ຢ່າງມີຫົວຄິດປະດິດສ້າງແລະໄຫວພິບ, ຄຽງບ່າຄຽງໄຫຼ່ກັບຊາດຫວຽດນາມໃນການຜ່ານຜ່າສິ່ງທ້າທາຍຂອງແຕ່ລະໄລຍະປະຫວັດສາດ ເພື່ອຢັ້ງຢືນບົດບາດສຳຄັນທີ່ສຸດແລະມີລັກສະນະຍຸດທະສາດ ຕໍ່ການປະຕິວັດ ແລະ ພາລະກິດການປ່ຽນແປງໃໝ່, ເຊື່ອມໂຍງສາກົນໃນປະຈຸບັນຢ່າງກວ້າງຂວາງ ແລະເລິກເຊິ່ງ.
ໂລກໄດ້ກ້າວເຂົ້າສູ່ທົດສະວັດທີສາມຂອງສະຕະວັດທີ 21 ກັບບັນດາການ ຜັນແປຢ່າງເລິກເຊິ່ງ, ວ່ອງໄວ ແລະ ຄາດຄະເນໄດ້ຍາກ. ສັນຕິພາບ, ການຮ່ວມມືແລະພັດທະນາ ຍັງເປັນຄວາມມຸ່ງຫວັງຂອງບັນດາປະຊາຊາດໃນໂລກ, ແຕ່ຍັງປະສົບກັບສິ່ງທ້າທາຍຢ່າງຫຼວງຫຼາຍ, ໂດຍສະເພາະແມ່ນສະພາບການເສດຖະກິດໂລກຖົດຖອຍ, ມີການແກ່ງແຍ້ງຍຸດທະສາດລະຫວ່າງປະເທດໃຫຍ່, ບັນດາສິ່ງທ້າທາຍກ່ຽວກັບຄວາມສະຫງົບແບບດັ້ງເດີມແລະບໍ່ເປັນແບບດັ້ງເດີມ ເຊັ່ນ: ພະຍາດລະບາດ, ສິ່ງແວດລ້ອມ, ການປ່ຽນແປງສະພາບອາກາດ, ຄວາມໝັ້ນຄົງດ້ານແຫຼ່ງນ້ຳ ທີ່ເພີ່ມຂຶ້ນ. ພາຍໃຕ້ຜົນກະທົບຂອງໂລກລະບາດໂຄວິດ-19, ບັນດາການຜັນແປໃນສະຖານະພາບສາກົນທີ່ຖືກຍູ້ແຮງໄວກ່ວາເກົ່າ, ໄດ້ສົ່ງຜົນກະທົບຕໍ່ສະພາບແວດລ້ອມຄວາມສະຫງົບ ແລະ ການພັດທະນາຂອງຫວຽດນາມ ຢ່າງໂດຍກົງ ແລະ ໃນຫຼາຍດ້ານ, ນຳມາເຊິ່ງໂອກາດແລະສິ່ງທ້າທາຍໃໝ່ທີ່ສະຫຼັບສັບຊ້ອນ.
ຫວຽດນາມ, ພາຍຫຼັງກວ່າ 35 ປີແຫ່ງການປ່ຽນແປງໃໝ່, ດ້ວຍທ່າແລະກຳລັງ, ກຳລັງແຮງສັງລວມແລະກຽດສັກສີສາກົນ ທີ່ນັບມື້ນັບໄດ້ຮັບການຍົກສູງ, ກຳລັງກ້າວຢ່າງໜັກແໜ້ນບົນເສັ້ນທາງແຫ່ງການປ່ຽນແປງໃໝ່ແລະເຊື່ອມໂຍງສາກົນຢ່າງກ້ວາງຂວາງເລິກເຊິ່ງ. ຂະແໜງການໆຕ່າງປະເທດຫວຽດນາມຢືນຢູ່ຕໍ່ໜ້າບັນດາໜ້າທີ່ສຳຄັນຍິ່ງ ແມ່ນຕ້ອງສືບຕໍ່ເສີມຂະຫຍາຍບົດບາດນຳໜ້າໃນການຮັກສາສະພາບແວດລ້ອມສັນຕິພາບ, ສະຖຽນລະພາບ, ຍາດແຍ່ງບັນດາແຫຼ່ງກຳລັງໃຫ້ແກ່ການພັດທະນາຢ່າງສຸດຂີດ, ຍົກສູງຖານະບົດບາດສາກົນຂອງປະເທດ. ໃນນັ້ນ, ຫວຽດນາມຕ້ອງສ້າງພື້ນຖານການທູດທີ່ທັນສະໄໝ ທັງດ້ານກຳລັງແລະແບບວິທີການເຄື່ອນໄຫວ ບົນພື້ນຖານສືບທອດມູນເຊື້ອການທູດ ຫວຽດນາມ ແລະ ແນວຄິດການທູດໂຮ່ຈີມິນ. ພ້ອມດຽວກັນນັ້ນ, ຂະແໜງການໆທູດຫວຽດນາມຈະເປັນເຈົ້າການ, ຊຸກຍູ້ຈິດໃຈປ່ຽນແປງໃໝ່ປະດິດສ້າງຢ່າງຕັ້ງ ໜ້າ, ມີຄວາມເປັນເຈົ້າການຕໍ່ບັນດາການຜັນແປທີ່ວ່ອງໄວຂອງສະພາບການ ເພື່ອປະຕິບັດພາລະກຳອັນຍິ່ງໃຫຍ່ຂອງຕົນໃນໄລຍະໃໝ່ຢ່າງສົມກຽດ.
ເສີມຂະຫຍາຍມູນເຊື້ອອັນສະຫງ່າລາສີຂອງບັນດາຄົນຮຸ່ນກ່ອນ ແລະ ບົດ ຮຽນອັນລ້ຳຄ່າຕ່າງໆທີ່ຖອດຖອນມາຈາກພຶດຕິກຳຕົວຈິງ ແລະ ແນວຄິດການທູດ ໂຮ່ຈີມິນ, ສືບຕໍ່ຈິດໃຈການທູດຮ່ວມເດີນທາງພ້ອມກັບປະເທດ, ເປັນຈິດໜຶ່ງໃຈ ດຽວຮັບໃຊ້ປະເທດຊາດ, ຮັບໃຊ້ປະຊາຊົນ, ພາຍໃຕ້ການນຳພາຂອງພັກກອມມູ ນິດ, ການທູດຫວຽດນາມຈະກ້າວຂຶ້ນຢ່າງໝັ້ນຄົງ, ສືບຕໍ່ບັນທຶກໃນປະຫວັດສາດອັນມີກຽດສະຫງ່າຂອງພື້ນຖານການທູດທີ່ທັນສະໄໝ, ປະກອບສ່ວນຢ່າງສົມກຽດເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ./.
--------------------------
(1) ສະຖາບັນການທູດ: ຟ້າມບິ່ງມິງ (ຫົວໜ້າບັນນາທິການ): ແນວທາງ, ນະໂຍບາຍພົວພັນຕ່າງປະເທດຫວຽດນາມ ໃນໄລຍະໃໝ່, ສພຈ. ການເມືອງແຫ່ງຊາດ, ຮ່າໂນ້ຍ, 2011, ໜ້າ 10, 11.
(2) ການທູດຫວຽດນາມ 1945 - 2000, ສພຈ. ການເມືອງແຫ່ງຊາດ, ຮ່າໂນ້ຍ, 2002, ໜ້າ 323, 324.
(3) ບັນດາຄູ່ຮ່ວມມືຍຸດທະສາດລວມມີ: ລັດເຊຍ, ອິນເດຍ, ຈີນ, ຍີ່ປຸນ, ສ.ເກົາຫຼີ, ແອັດສະປາຍ, ອັງກິດ, ເຢຍລະມັນ, ອີຕາລີ, ຝຣັ່ງ, ໄທ, ອິນໂດເນເຊຍ, ສິງກະໂປ, ມາເລເຊຍ, ຟີລິບປິນ, ອົດສະຕຣາລີ, ນິວຊີແລນ. ບັນດາຄູ່ຮ່ວມມືຮອບດ້ານລວມມີ: ອັບຟຣິກາໃຕ້, ຊິີເລ, ບຣາຊີນ, ເວເນຊູເອລາ, ອາກຊັງຕີນ, ອູແກຣນ, ອາເມລິກາ, ດານມາກ, ການາດາ, ມຽນມາ, ຮົງກາລີ, ບຣູໄນ, ໂຮນລັງ.
(4) ເສດຖະກິດຈີນມີການເຕີບໂຕລົບ 1,6% ໃນ 6 ເດືອນຕົ້ນປີ 2020, 7 ໃນ 10 ພື້ນຖານເສດຖະກິດອາຊຽນ ກໍມີການເຕີບໂຕລົບ.
(5) ການປະກອບຄຳເຫັນຂອງທ່ານ ຫງວຽນຝູຈ້ອງ, ເລຂາທິການໃຫຍ່ ຄະນະບໍລິຫານງານສູນກາງ ພກ ຫວຽດນາມ ໃນກອງປະຊຸມການຕ່າງປະເທດ ຫວຽດນາມ ຄັ້ງທີ 30 (ເດືອນສິງຫາ 2018).
(6) ບົດຖະແຫຼງການຂອງລັດຖະບານແຫ່ງ ສາທາລະນະລັດປະຊາທິປະໄຕຫວຽດນາມ ຕໍ່ບັນດາປະເທດໃນໂລກ ໃນວັນທີ 14 ມັງກອນ 1950.
(7) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 4, ໜ້າ 147.
(8) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 5, ໜ້າ 256.
- ບົດນີ້ໄດ້ລົງພິມໃນວາລະສານກອມມູນິດ ສະບັບເລກທີ 955 (ເດືອນທັນວາ 2020)
