ວຽກງານການຕ່າງປະເທດໃນສະໄໝກອງປະຊຸມໃຫຍ່ຄັ້ງທີ 12
ຂອງພັກກອມມູນິດຫວຽດນາມ ແລະທິດທາງແຜນນະໂຍບາຍ
ການຕ່າງປະເທດຂອງຫວຽດນາມໃນໄລຍະໃໝ່
ຂອງພັກກອມມູນິດຫວຽດນາມ ແລະທິດທາງແຜນນະໂຍບາຍ
ການຕ່າງປະເທດຂອງຫວຽດນາມໃນໄລຍະໃໝ່
ວກ. - ໃນສະໄໝກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ, ທົ່ວພັກ, ທົ່ວປວງຊົນ, ທົ່ວກອງທັບຫວຽດນາມໄດ້ຮ່ວມແຮງຮ່ວມໃຈກັນ ຜ່ານຜ່າຄວາມຫຍຸ້ງຍາກຫຼາຍຢ່າງ, ບັນລຸຜົນສຳເລັດທີ່ສຳຄັນໃນທຸກດ້ານ: ຂະໜາດແລະແຮງແຂ່ງຂັນຂອງພື້ນຖານເສດຖະກິດໄດ້ຮັບການຍົກຂຶ້ນ; ການເມືອງ - ສັງຄົມເປັນປົກກະຕິ; ການປ້ອງກັນປະເທດ, ປ້ອງກັນຄວາມໝັ້ນຄົມໄດ້ຮັບການຮັກສາແລະເພີ່ມທະວີ; ການພົວພັນຕ່າງປະເທດ ແລະເຊື່ອມໂຍງສາກົນນັບມື້ນັບກວ້າງຂວາງເລິກເຊິ່ງ. ປະກອບສ່ວນສຳຄັນໃນຜົນສຳເລັດທີ່ມີຄວາມໝາຍປະຫວັດສາດນັ້ນແມ່ນ ຄວາມພະຍາຍາມຢ່າງບໍ່ຢຸດຢັ້ງຂອງຂະແໜງການການຕ່າງປະເທດ, ດ້ວຍບັນດາເສົາຄ້ຳຄືການພົວພັນຕ່າງປະເທດຂອງພັກ, ການທູດຂອງລັດ, ການຕ່າງປະເທດປະຊາຊົນ, ໄດ້ຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມຢ່າງແຂງແຮງ, ຕໍ່ເນື່ອງ ແລະ ມີປະສິດທິຜົນ ເຊິ່ງໄດ້ຊຸກຍູ້ແລະສ້າງເງື່ອນໄຂທີ່ສະດວກດີທີ່ສຸດສຳລັບພາລະກິດການສ້າງສາແລະປົກປັກຮັກສາປະເທດຊາດຫວຽດນາມ.
ຫ້າປີກັບບັນດາເຄື່ອງໝາຍໂດດເດັ່ນ
ອາຍຸການ 5 ປີຂອງກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ(2016-2021) ແມ່ນໄລຍະທີ່ໂລກແລະພາກພື້ນເຫັນການປ່ຽນແປງຢ່າງໄວວາ, ສັບສົນ ແລະ ຄາດເດົາໄດ້ຍາກ, ດ້ວຍການສັ່ນສະເທືອນຢ່າງເປັນລະບົບ ເຊິ່ງບໍ່ເຄີຍເຫັນມາກ່ອນຕັ້ງແຕ່ສົງຄາມເຢັນ. ໂດຍສະເພາະ, ການລະບາດໃຫຍ່ຂອງໂຄວິດ-19 ໄດ້ຍູ້ແຮງບັນດາທ່າອຽງທີ່ເກີດຂຶ້ນໃນຊຸມປີທີ່ຜ່ານມາ, ໃນນັ້ນ, ໂລກາພິວັດແລະການເຊື່ອມໂຍງເສດຖະກິດຕ້ອງປະເຊີນກັບຄວາມຕ້ອງການທີ່ຈະປັບປ່ຽນໄປສູ່ຄວາມຍືນຍົງຫຼາຍຂຶ້ນ, ໂດຍສະເພາະໃນສະພາບການລັດທິຊາດນິຍົມ, ປະຊານິຍົມທີ່ເກີດຂຶ້ນຢູ່ໃນບາງສ່ວນຂອງໂລກ. ການແຂ່ງຂັນຍຸດທະສາດລະຫວ່າງບັນດາປະເທດໃຫຍ່ໄດ້ກາຍເປັນດ້ານທີ່ພົ້ນເດັ່ນໃນການພົວພັນສາກົນ. ການນຳໃຊ້ຜົນສຳເລັດຂອງການປະຕິວັດອຸດສາຫະກຳຄັ້ງທີສີ່ ແລະ ການປ່ຽນດິຈິຕອນໄດ້ຮັບການຊຸກຍູ້ຢ່າງແຂງແຮງ, ທັງສ້າງໄອກາດເພື່ອການພັດທະນາແບບກ້າວກະໂດດ, ທັງວາງຄວາມສ່ຽງຂອງຄວາມຊັກຊ້າທາງດິຈິຕອນ; ບັນດາສິ່ງທ້າທາຍດ້ານຄວາມປອດໄພທີ່ບໍ່ເປັນແບບດັ້ງເດີມເຊັ່ນ: ການປ່ຽນແປງສະພາບອາກາດ, ໄພທໍາມະຊາດ, ຄວາມໝັ້ນຄົງທາງດ້ານແຫຼ່ງນ້ຳ, ຄວາມໝັ້ນຄົງທາງໄຊເບີ, ໂລກລະບາດ... ສືບຕໍ່ເກີດຂຶ້ນຢ່າງຮ້າຍແຮງ. ສັນຕິພາບ, ການຮ່ວມມື ແລະ ການພັດທະນາຍັງຄົງເປັນທ່າອຽງໃຫຍ່, ແຕ່ກຳລັງປະເຊີນກັບສິ່ງທ້າທາຍຫຼາຍຢ່າງ.
ເຖິງຢ່າງໃດກໍ່ຕາມ, ຫວຽດນາມຍັງບັນລຸໄດ້ຜົນງານທີ່ໜ້າພາກພູມໃຈ: ການເຕີບໂຕ ຈີດີພີ ສະເລ່ຍໃນໄລຍະ 2016-2020 ບັນລຸປະມານ 5,9% ຕໍ່ປີ; ສະເພາະປີ 2020, ເຖິງວ່າຖືກຜົນກະທົບຢ່າງໜັກໜ່ວງຈາກການລະບາດຂອງໂຄວິດ-19 ກໍຕາມ ແຕ່ເສດຖະກິດຫວຽດນາມກໍ່ຍັງຮັກສາລະດັບການເຕີບໂຕບວກ 2,91%, ໃນກຸ່ມປະເທດທີ່ມີລະດັບການເຕີບໂຕສູງທີ່ສຸດໃນໂລກ. ມູນຄ່າການສົ່ງອອກແລະນຳເຂົ້າເພີ່ມຂຶ້ນ 1,7 ເທົ່າ, ຈາກ 327,8 ຕື້ໂດລາສະຫະລັດປີ 2015 ຂຶ້ນເປັນ 543,9 ຕື້ໂດລາສະຫະລັດປີ 2020. ຈຳນວນນັກທ່ອງທ່ຽວຕ່າງປະເທດເຂົ້າຫວຽດນາມໃນໄລຍະ 2015-2019 ເພີ່ມຂຶ້ນ 2,3 ເທົ່າ, ຈາກ 7,9 ລ້ານຄົນຂຶ້ນເປັນ 18 ລ້ານຄົນໂດຍມີອັດຕາການເຕີບໂຕ 22,7% ຕໍ່ປີ. ຊີວິດຂອງປະຊາຊົນໄດ້ຮັບການປັບປຸງດີຂຶ້ນຫຼາຍທັງທາງດ້ານຮ່າງກາຍແລະຈິດໃຈ. ກຽດສັກສີແລະຖານະບົດບາດສາກົນຂອງຫວຽດນາມນັບມື້ນັບເພີ່ມຂຶ້ນ.
ບົນຈິດໃຈເປັນເຈົ້າການແລະຕັ້ງໜ້າກຳໂອກາດແລະສ້າງໂອກາດ, ຕັ້ງໝັ້ນແລະໄຫວພິບໃນການຜ່ານຜ່າສິ່ງທ້າທາຍທັງພາຍໃນແລະພາຍນອກ, ວຽກງານການຕ່າງປະເທດໃນເວລາທີ່ຜ່ານມາໄດ້ບັນລຸຜົນສຳເລັດທີ່ໂດດເດັ່ນ, ປະກອບສ່ວນທີ່ຕັ້ງໜ້າເຂົ້າໃນການປັບປຸງສະພາບແວດລ້ອມສັນຕິພາບ, ສະຖຽນລະພາບ, ຮັກສາອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດ, ດຶງດູດຊັບພະຍາກອນການພັດທະນາ, ຍົກສູງຖານະບົດບາດແລະກຽດສັກສີຂອງຫວຽດນາມ. ລະອຽດຄື:
ການພົວພັນກັບປະເທດອື່ນ, ໂດຍສະເພາະບັນດາປະເທດເພື່ອນບ້ານໃກ້ຄຽງ, ບັນດາປະເທດໃນພາກພື້ນ, ບັນດາປະເທດໃຫຍ່, ບັນດາຄູ່ຮ່ວມມືທີ່ສຳຄັນພິເສດ ສືບຕໍ່ໄດ້ຮັບການປັບປຸງ ແລະ ເຂົ້າສູ່ລວງເລິກ, ມີເນື້ອແທ້, ສ້າງກອບການພົວພັນທີ່ໝັ້ນຄົງແລະຍືນຍົງ. ບັນດາກອບການພົວພັນຄູ່ຮ່ວມມືຍຸດທະສາດ ແລະຄູ່ຮ່ວມມືຮອບດ້ານ ໄດ້ຮັບການເປີດກວ້າງ, ດ້ວຍຈິດໃຈແຫ່ງການເລືອກຄູ່ຮ່ວມງານຫຼັກ ທີ່ສຳຄັນ. ໃນໄລຍະນີ້, ຫວຽດນາມໄດ້ສ້າງການພົວພັນຄູ່ຮ່ວມງານຮອບດ້ານກັບ 5 ປະເທດ, ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດກັບ 2 ປະເທດ (ອົດສະຕຣາລີ ໃນປີ 2018 ແລະ ນູແວນເຊລັງ ໃນປີ 2020), ຈາກຄູ່ຮ່ວມມືຍຸດທະສາດຂຶ້ນເປັນຄູ່ຮ່ວມມືຍຸດທະສາດຮອບດ້ານກັບປະເທດໜຶ່ງ (ອິນເດຍ ໃນປີ 2016), ຍົກຈຳນວນຄູ່ຮ່ວມມືຍຸດທະສາດ/ຄູ່ຮ່ວມມືຍຸດທະສາດຮອບດ້ານທັງໝົດຂຶ້ນເປັນ 30 ປະເທດ.
ຫວຽດນາມກຳລັງກາຍເປັນປັດໄຈທີ່ມີຄວາມສຳຄັນຍິ່ງຂຶ້ນໃນຍຸດທະສາດພາກພື້ນ ແລະ ທົ່ວໂລກຂອງບັນດາປະເທດໃຫຍ່. ການແລກປ່ຽນຄະນະຜູ້ແທນກັບບັນດາຄູ່ຮ່ວມມື ໄດ້ດຳເນີນຢ່າງເປັນປະຈຳ ສະໝ່ຳສະເໝີ, ນັບທັງໃນເວລາທີ່ການພົວພັນມີບັນຫາ, ສະແດງໃຫ້ເຫັນເຖິງຄວາມເລິກເຊິ່ງແລະເນື້ອໃນຂອງການພົວພັນຂອງຫວຽດນາມກັບຄູ່ຮ່ວມມື. ການທູດທະວິພາຄີໄດ້ປະກອບສ່ວນອັນແທດຈິງ ເຂົ້າໃນການຮັບໃຊ້ເປົ້າໝາຍການພັດທະນາເສດຖະກິດ-ສັງຄົມຂອງຫວຽດນາມ. ໄດ້ຈັດການແກ້ໄຂບັນຫາທີ່ມີຢູ່ແລະທີ່ເກີດຂຶ້ນໃນການພົວພັນກັບຄູ່ຮ່ວມມືທີ່ສຳຄັນໄດ້ດີ, ບໍ່ປະໃຫ້ມັນກະທົບຕໍ່ຜົນປະໂຫຍດດ້ານຄວາມໝັ້ນຄົງ, ການພັດທະນາ ກໍ່ຄືສະພາບການພົວພັນຕ່າງປະເທດຂອງຫວຽດນາມ. ເຖິງວ່າຢູ່ໃນສະພາບການການແຜ່ລະບາດຂອງໂຄວິດ-19, ແຕ່ວຽກງານການຕ່າງປະເທດຍັງຄົງປັບປ່ຽນໄດ້ຢ່າງຄ່ອງຕົວ, ສ້າງສັນ ແລະມີປະສິດທິຜົນ ດ້ວຍຮູບແບບການທູດທາງອອນໄລ, ພ້ອມກັນນັ້ນ ຫວຽດນາມໄດ້ສົ່ງເສີມການທູດດ້ານສຸຂະພາບ ແລະການຮ່ວມມືສາກົນໃນການປ້ອງກັນແລະຄວບຄຸມໂລກລະບາດ, ຜ່ານນັ້ນຍົກສູງພາບພົດຂອງຫວຽດນາມທີ່ມີຄວາມສາມາດປັບຕົວສູງ ແລະ ມີຄວາມທົນທານຕໍ່ກັບສິ່ງທ້າທາຍຈາກພາຍນອກ, ແລະເປັນສະມາຊິກທີ່ຕັ້ງໜ້າ, ເປັນເຈົ້າການ, ມີຄວາມຮັບຜິດຊອບຂອງຊຸມຊົນສາກົນ.
ການເຊື່ອມໂຍງເຂົ້າກັບສາກົນ ດ້ວຍຈຸດສຸມແມ່ນການເຊື່ອມໂຍງເສດຖະກິດສາກົນໄດ້ຮັບການຍູ້ແຮງ, ດຶງດູດຊັບພະຍາກອນຫຼາຍຂຶ້ນເພື່ອຮັບໃຊ້ການພັດທະນາປະເທດ. ໃນຫ້າປີທີ່ຜ່ານມາ, ການຕ່າງປະເທດຂອງຫວຽດນາມໄດ້ຊຸກຍູ້ການສ້າງກອບຕ່າງໆຫຼຼາຍຢ່າງທີ່ສະດວກດີສຳລັບການຮ່ວມມືສາກົນ, ໂດຍສະເພາະການທີ່ຫວຽດນາມເຂົ້າຮ່ວມ ແລະ ລົງນາມໃນສັນຍາການຄ້າເສລີຮຸ້ນໃໝ່ 2 ສະບັບຄື ສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປາຊີຟິກ (CPTPP) ແລະສັນຍາການຄ້າເສລີຫວຽດນາມ - ສະຫະພາບເອີຣົບ (EVFTA), ແລະ ສັນຍາການຄ້າເສລີຂະໜາດໃຫຍ່ທີ່ສຸດຂອງໂລກຄື ສັນຍາຄູ່ຮ່ວມມືເສດຖະກິດຮອບດ້ານລະດັບພາກພື້ນ (RCEP), ນຳເອົາໂອກາດອັນດີໃນດ້ານການຂະຫຍາຍຕະຫຼາດ, ເປີດຄວາມຫຼາກຫຼາຍຂອງຕະຫຼາດ ແລະ ການເຂົ້າຮ່ວມເລິກໃນຕ່ອງໂສ້ການສະໜອງຂອງພາກພື້ນແລະຂອງໂລກ. ການເຊື່ອມໂຍງທາງດ້ານການເມືອງ, ຄວາມໝັ້ນຄົງ, ການປ້ອງກັນປະເທດນັບມື້ເຂົ້າສູ່ລວງເລິກ, ດ້ວຍຄວາມປະທັບໃຈທີ່ສຳຄັນຄື ເປັນຄັ້ງທໍາອິດທີ່ຫວຽດນາມສົ່ງກອງກຳລັງເຂົ້າຮ່ວມກອງກໍາລັງຮັກສາສັນຕິພາບຂອງສະຫະປະຊາຊາດ. ການເຊື່ອມໂຍງທາງດ້ານວັດທະນະທຳ-ສັງຄົມ, ວິທະຍາສາດ-ເຕັກໂນໂລຊີ, ການສຶກສາ-ຝຶກອົບຮົມ ກໍ່ບັນລຸຄວາມຄືບໜ້າທີ່ສຳຄັນ.
ການທູດເສດຖະກິດຮັບໃຊ້ການພັດທະນາປະເທດ ກໍໄດ້ເພີ່ມທະວີ, ສ້າງສະພາບແວດລ້ອມເອື້ອອຳນວຍ ແລະ ສະໜັບສະໜູນໂດຍກົງ ຕໍ່ການພັດທະນາເສດຖະກິດ-ສັງຄົມ ຂອງບັນດາຂະແໜງການ, ບັນດາທ້ອງຖິ່ນ ແລະວິສາຫະກິດ. ວຽກງານທີ່ປຶກສາ, ຄົ້ນຄວ້າບັນດາບັນຫາເສດຖະກິດ, ຍຸດທະສາດການພັດທະນາໄດ້ຮັບການຍູ້ແຮງ, ດ້ວຍບົດລາຍງານທີ່ປຶກສາທີ່ມີຄຸນະພາບຫຼາຍສະບັບ ແລະຄຳແນະນຳນະໂຍບາຍຫຼາຍປະການທີ່ທັນເວລາແລະເປັນໄປໄດ້. ກິດຈະກຳການທູດທາງເສດຖະກິດໄດ້ປະສົມປະສານຢ່າງມີປະສິດທິຜົນໃນກິດຈະກຳການຕ່າງປະເທດລະດັບສູງ; ປະກອບສ່ວນຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ແຮງງານ, ການທ່ອງທ່ຽວ, ວິທະຍາສາດ-ເຕັກໂນໂລຊີ, ສະໜັບສະໜູນວິສາຫະກິດແລະທ້ອງຖິ່ນຢ່າງຕັ້ງໜ້າ, ຈັດການແກ້ໄຂບັນຫາເສດຖະກິດ-ການຄ້າຈຳນວນໜຶ່ງທີ່ເກີດຂຶ້ນໃນການພົວພັນຂອງຫວຽດນາມກັບປະເທດອື່ນໆ ໄດ້ຢ່າງໜ້າພໍໃຈ.
ປະສິດທິຜົນ ແລະ ບົດບາດຂອງການຕ່າງປະເທດຫຼາຍຝ່າຍນັບມື້ໄດ້ຮັບການຍົກລະດັບ, ປະກອບສ່ວນຢ່າງຕັ້ງໜ້າເຂົ້າໃນການສ້າງແລະກໍ່ຕັ້ງສະຖາບັນຫຼາຍຝ່າຍ; ເສີມຂະຫຍາຍບົດບາດຂອງການສ້າງຄວາມປອງດອງເທື່ອລະກ້າວ, ປະກອບສ່ວນເຂົ້າໃນສັນຕິພາບແລະສະຖຽນລະພາບໃນພາກພື້ນແລະໃນໂລກ. ໄດ້ຢືນຢັນບົດບາດທີ່ນັບມື້ນັບສຳຄັນຂອງກວຽດນາມໃນບັນດາເວທີປາໄສພາກພື້ນແລະສາກົນເຊັ່ນ: ສະມາຄົມບັນດາປະຊາຊາດອາຊີຕາເວັນອອກສຽງໃຕ້ (ASEAN), ເວທີການຮ່ວມມືອາຊີ - ເອີຣົບ (ASEM), ເວທີການຮ່ວມມືທາງເສດຖະກິດອາຊີ - ປາຊີຟິກ (APEC), ອົງການສະຫະປະຊາຊາດ, ກຸ່ມບັນດາພື້ນຖານເສດຖະກິດໃຫຍ່ (G-20), ເວທີເສດຖະກິດໂລກ (WEF) ແລະບັນດາກົນໄກອະນຸພາກພື້ນແມ່ນ້ຳຂອງ; ໄດ້ສ້າງຄວາມປະທັບໃຈທີ່ສຳຄັນຫຼາຍຢ່າງ ດ້ວຍການຈັດຕັ້ງທີ່ປະສົບຜົນສໍາເລັດຂອງປີ ເອເປກ ຫວຽດນາມ 2017, ກອງປະຊຸມເວທີເສດຖະກິດໂລກກ່ຽວກັບອາຊຽນປີ 2018. ໃນສະພາບການຂອງການແຜ່ລະບາດໃຫຍ່ຂອງໂຄວິດ-19, ຫວຽດນາມໄດ້ເປັນເຈົ້າການແລະໄຫວພິບ ໃນການເສີມຂະຫຍາຍບົດບາດຂອງປະທານ ອາຊຽນ 2020, ປະທານກອງປະຊຸມສະມັດຊາລັດຖະສະພາລະຫວ່າງຊາດອາຊຽນ 2020 ແລະ ສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດສຳລັບວາລະປີ 2020-2021, ທັງປະສົບຄວາມສຳເລັດໃນການຈັດກິດຈະກຳຕ່າງໆທີ່ໜ້າປະທັບໃຈ, ທັງສະເໜີຄວາມຄິດລິເລີ່ມທີ່ມີຄວາມໝາຍແລະທັນເວລາຫຼາຍຢ່າງ ເຊິ່ງຕອບສະໜອງຄວາມສົນໃຈຮ່ວມກັນ ແລະ ໄດ້ຮັບການຕີລາຄາສູງຈາກເພື່ອນຕ່າງຊາດ. ດ້ວຍຄວາມເປັນເຈົ້າການໃນການສົ່ງເສີມແລະຈັດກອງປະຊຸມສຸກຍອດຜູ້ນຳສະຫະລັດອາເມລິກາ - ເກົາຫຼີເໜືອຄັ້ງທີສອງ (ເດືອນກຸມພາ 2019) ໃນນະຄອນຮ່າໂນ້ຍ, ໄດ້ສົ່ງເສີມຢ່າງແຂງແຮງໃຫ້ເຫັນພາບລັກສະນະຂອງປະເທດຫວຽດນາມທີ່ຮັກຫອມສັນຕິພາບ, ປ່ຽນແປງໃໝ່ແລະພັດທະນາ, ສະແດງໃຫ້ເຫັນເຖິງຄວາມສາມາດໃນການປະກອບສ່ວນເຂົ້າໃນບັນຫາສັນຕິພາບແລະຄວາມໝັ້ນຄົງຂອງໂລກ. ການເຄື່ອນໄຫວຕ່າງປະເທດຫຼາຍຝ່າຍຍັງປະກອບສ່ວນຮັດແໜ້ນການພົວພັນຫວຽດນາມກັບບັນດາຄູ່ຮ່ວມມື, ພ້ອມກັນນັ້ນກໍ່ຍາດແຍ່ງໄດ້ການຊ່ວຍເຫຼືອຈາກພາຍນອກ, ເປີດກວ້າງພື້ນທີ່ການພັດທະນາ ແລະຍົກສູງຖານະບົດບາດຂອງຫວຽດນາມ.
ວຽກງານການຕ່າງປະເທດໄດ້ປະກອບສ່ວນສຳຄັນເຂົ້າໃນການຮັກສາອຳນາດອະທິປະໄຕເໜືອທະເລ ໝູ່ເກາະ ແລະ ຜືນແຜ່ນດິນອັນຄົຍຖ້ວນຂອງປະເທດໄວ້ຢ່າງໝັ້ນຄົງ, ປັບປຸງສະພາບແວດລ້ອມສັນຕິພາບແລະສະຖຽນລະພາບ.
ກ່ຽວກັບຊາຍແດນທາງບົກ, ຫວຽດນາມປະສານສົມທົບຢ່າງມິີປະສິດທິຜົນໃນການຈັດຕັ້ງປະຕິບັດການຄຸ້ມຄອງຊາຍແດນແລະດ່ານຊາຍແດນ ຕາມເອກະສານທາງກົດໝາຍ ແລະສັນຍາຊາຍແດນທີ່ລົງນາມກັບຈີນ, ລາວ ແລະ ກໍາປູເຈຍ. ໂດຍສະເພາະກັບກຳປູເຈຍ, ຫວຽດນາມໄດ້ລົງນາມແລະໃຫ້ສັດຕະຍາບັນເອກະສານສອງສະບັບທີ່ຮັບຮອງຜົນສຳເລັດຂອງການແບ່ງເຂດແລະການປັກຫຼັກໝາຍຊາຍແດນ (84%). ດັ່ງນັ້ນ, ເປັນຄັ້ງທຳອິດໃນປະຫວັດສາດຂອງລັດສະໄໝໃໝ່ຫວຽດນາມ, ຫວຽດນາມໄດ້ສ້າງຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະການພັດທະນາກັບປະເທດເພື່ອນບ້ານທັງໝົດ.
ກ່ຽວກັບຊາຍແດນທາງທະເລ, ເຖິງວ່າສະຖານະການທະເລຕາເວັນອອກໃນເວລາທີ່ຜ່ານມາສັບສົນທີ່ສຸດກໍຕາມ, ແຕ່ຫວຽດນາມຍັງເດັດດ່ຽວ, ໜຽວແໜ້ນໃນການຕໍ່ສູ້ ປົກປ້ອງອຳນາດອະທິປະໄຕ, ສິດອະທິປະໄຕ, ອຳນາດຕັດສິນຂອງຫວຽດນາມຢູ່ທະເລຕາເວັນອອກ ເຊິ່ງກໍ່ຕັ້ງຂຶ້ນຕາມອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS 1982); ພ້ອມກັນນັ້ນ, ຍັງຮັກສາການພົວພັນສອງຝ່າຍເປັນປົກກະຕິກັບກັບບັນດາຄູ່ຮ່ວມງານ. ຫວຽດນາມໄດ້ຕັ້ງໜ້າເຈລະຈາເພື່ອແກ້ໄຂຂໍ້ພິພາດ, ຄວາມແຕກຕ່າງທີ່ກ່ຽວຂ້ອງກັບເຂດເສດຖະກິດຈຳເພາະ (ກັບ ອິນໂດເນເຊຍ) ແລະຮ່ວມກັນລາຍງານເຂດແດນທີ່ຢູ່ເໜືອເຂດໄຫຼ່ທະວີບ (ກັບມາເລເຊຍ); ພ້ອມກັນກັບບັນດາປະເທດອາຊຽນຊຸກຍູ້ການເຈລະຈາກ່ຽວກັບ ປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ກັບຈີນ. ພ້ອມກັນນັ້ນ, ຫວຽດນາມໄດ້ຈັດການແກ້ໄຂຢ່າງມີປະສິດທິຜົນກັບບັນດາບັນຫາທີ່ເກີດຂຶ້ນ, ຕັ້ງໜ້າຜັນຂະຫຍາຍການຕໍ່ສູ້ທາງການເມືອງ, ກົດໝາຍ, ການທູດ ແລະ ຕໍ່ສູ້ກັບພື້ນທີ່ຢູ່ທະເລຕາເວັນອອກ.
ວຽກງານປົກປ້ອງພົນລະເມືອງ ແລະການຂົນຂວາຍຊຸມຊົນຊາວຫວຽດນາມຢູ່ຕ່າງປະເທດ ໄດ້ຜັນຂະຫຍາຍຢ່າງທັນການແລະມີປະສິດທິຜົນ, ສະແດງອອກຢ່າງຈະແຈ້ງເຖິງຄວາມເອົາໃຈໃສ່ຂອງພັກກອມມູນິດແລະລັດຫວຽດນາມ. ການຕ່າງປະເທດໄດ້ເສີມຂະຫຍາຍຈິດໃຈເປັນເຈົ້າການ, ທັນການ, ເປັນມືອາຊີບ ແລະ ມີປະສິດທິຜົນໃນການຜັນຂະຫຍາຍການປົກປ້ອງພົນລະເມືອງຫຼາຍກວ່າ 50.000 ຄົນ, ກວ່າ 600 ກໍລະນີ / ເຮືອ 1.000 ລຳ / ຊາວປະມົງເກືອບ 10.000 ຄົນ; ຈັດການແກ້ໄຂຢ່າງທັນການຕໍ່ບັນດາບັນຫາທີ່ເກີດຂຶ້ນທີ່ກ່ຽວຂ້ອງກັບພົນລະເມືອງຫວຽດນາມຢູ່ຕ່າງປະເທດໃນການລະບາດໃຫຍ່ຂອງໂຄວິດ-19.
ໄດ້ຜັນຂະຫຍາຍບັນດາມາດຕະການເພື່ອສ້າງເງື່ອນໄຂໃຫ້ຊາວຫວຽດນາມຢູ່ຕ່າງປະເທດເປັນປົກກະຕິໃນສະຖານະທາງກົດໝາຍ, ເຊື່ອມໂຍງເຂົ້າກັບສັງຄົມ ແລະທຳມາຫາກິນຢູ່ຫຼາຍປະເທດ, ແລະຊ່ວຍເຫຼືອພົນລະເມືອຫວຽດນາມທີ່ປະສົບຄວາມຫຍຸ້ງຍາກ. ວຽກງານການລະດົມຊັບພະຍາກອນຂອງຊາວຫວຽດນາມຢູ່ຕ່າງປະເທດໄດ້ຮັບການຈັດຕັ້ງປະຕິບັດຢ່າງມີວິທີການແລະສ້າງສັນຫຼາຍຂຶ້ນ, ຜ່ານນັ້ນສົ່ງເສີມຊຸມຊົນຊາວຫວຽດນາມຢູ່ຕ່າງປະເທດ ປະກອບສ່ວນທາງດ້ານເສດຖະກິດແລະສະຕິປັນຍາ ເຂົ້າໃນການພັດທະນາປະເທດ. ມີຫຼາຍກິດຈະກຳທີ່ອຸດົມສົມບູນແລະແທດຈິງສຳລັບຊາວຫວຽດນາມຢູ່ຕ່າງປະເທດໄດ້ຮັບການຈັດຕັ້ງ, ປະກອບສ່ວນຊຸກຍູ້ນ້ຳໃນຮັກຊາດ ແລະ ປັບປຸງກຸ່ມກ້ອນມະຫາສາມັກຄີປວງຊົນທັງຊາດ.
ເປັນເຈົ້າການແລະເດັດດ່ຽວຕໍ່ສູ້ໃນຂົງເຂດປະຊາທິປະໄຕ, ສິດທິມະນຸດ, ສາສະໜາ, ພ້ອມກັນນັ້ນກໍ່ຕິດຕໍ່ສື່ສານແລະປຶກສາຫາລືກັນເປັນປະຈໍາ ເພື່ອເພີ່ມຄວາມເຂົ້າໃຈຊຶ່ງກັນແລະກັນ ແລະ ຈຳກັດຄວາມແຕກຕ່າງໃຫ້ແຄບລົງ. ຫວຽດນາມໄດ້ຕໍ່ສູ້ຢ່ງເດັດດ່ຽວກັບການກະທຳສວຍໃຊ້ບັນຫາປະຊາທິປະໄຕ, ສິດທິມະນຸດ ແລະສາສະໜາ ເພື່ອປະຕິບັດກົນອຸບາຍຄັດຄ້ານຕ້ານແລະແຊກແຊງກິດຈະການພາຍໃນຂອງຫວຽດນາມ; ເສີມຂະຫຍາຍປະສິດທິຜົນຂອງກົນໄກສົນທະນາດ້ານສິດທິມະນຸດກັບບັນດາປະເທດຕາເວັນຕົກ ບົນຈິດໃຈສະເໝີພາບ, ບໍ່ຫຼົບຫຼີກ; ພ້ອມກັນນັ້ນ, ເປັນເຈົ້າການເຂົ້າຮ່ວມໃນຫຼາຍຂົງເຂດການຮ່ວມມືກ່ຽວກັບສິດທິມະນຸດ ທັງໃນກອບການຮ່ວມມືສອງຝ່າຍ, ຫຼາຍຝ່າຍ ແລະ ອົງການສິດທິມະນຸດສາກົນ. ຜ່ານການເຄື່ອນໄຫວເຫຼົ່ານັ້ນ, ຫວຽດນາມໄດ້ຮັກສາສະຖຽນລະພາບທາງດ້ານການເມືອງແລະສັງຄົມຢູ່ໃນປະເທດ, ທັງປະສົບຄວາມສຳເລັດໃນການບັນເທົາຄວາມກົດດັນຂອງປະເທດຕາເວັນຕົກຕໍ່ກັບບັນຫາຈໍານວນນຶ່ງ, ບໍ່ໃຫ້ມີຜົນກະທົບຕໍ່ການພົວພັນກັບຄູ່ຮ່ວມມືທີ່ສຳຄັນ.
ວຽກງານການທູດວັດທະນະທຳ ແລະ ການສື່ສານການຕ່າງປະເທດ ໄດ້ຮັບການປ່ຽນແປງໃໝ່ທາງດ້ານຮູບການແລະເນື້ອໃນ, ຍົກສູງປະສິດທິຜົນແລະ ປະສິດທິພາບຂອງການໂຄສະນາເຜີຍແຜ່ກ່ຽວກັບປະເທດ, ວັດທະນະທຳ, ຜູ້ຄົນ ແລະຮີດຄອງປະເພນີອັນດີງາມຂອງຫວຽດນາມ. ວຽກງານການທູດວັດທະນະທຳໄດ້ປະກອບສ່ວນເຊົ້າໃນການປັບປຸງ ແລະ ເພີ່ມທະວີຄວາມເຂົ້າໃຈຊຶ່ງກັນແລະກັນ, ມິດຕະພາບກັບປະຊາຊົນຂອງບັນດາປະເທດ, ໂຄສະນາພາບພົດ, ປະເທດ ແລະວັດທະນະທຳຫວຽດນາມອອກສູ່ໂລກ ຜ່ານການຜັນຂະຫຍາຍບັນດາໂຄງການແລະກອບການເຄື່ອນໄຫວທີ່ສຳຄັນເຊັ່ນ: ຍຸດທະສາດການທູດວັດທະນະທຳ, ໂຄງການເຊີດຊູປະທານໂຮ່ຈີມິນຢູ່ຕ່າງປະເທດ, ໂຄງການສັບປະດາ/ວັນຫວຽດນາມຢູ່ຕ່າງປະເທດ… ໃນໄລຍະປີ 2016-2020, ໄດ້ປະສົບຄວາມສຳເລັດໃນການຂົນຂວາຍໃຫ້ໄດ້ຮັບນາມມະຍົດເພີ່ມເຕີມຈາກອົງການການສຶກສາ, ວິທະຍາສາດ ແລະວັດທະນະທຳແຫ່ງສະຫະປະຊາຊາດ (UNESCO), ຍົກຈຳນວນແຫຼ່ງບໍລະດົກໂລກທັງໝົດຢູ່ຫວຽດນາມຂຶ້ນເປັນ 39 ແຫ່ງ, ຜ່ານນັ້ນ ປະກອບສ່ວນເຂົ້າໃນການປົກປ້ອງຄຸນຄ່າຂອງມະນຸດ, ທັງສ້າງແຫຼ່ງພະລັງໃໝ່ໃຫ້ແກ່ການພັດທະນາເສດຖະກິດ - ວັດທະນະທຳ - ສັງຄົມ ຢູ່ໃນຫຼາຍທ້ອງຖິ່ນ.
ກ່ຽວກັບວຽກງານສື່ສານການຕ່າງປະເທດ, ໄດ້ຕັ້ງໜ້າໃນການສື່ສານເຜີຍແຜ່ກ່ຽວກັບແນວທາງ, ແຜນນະໂຍບາຍ, ນະໂຍບາຍຂອງພັກກອມມູນິດ ແລະລັດຫວຽດນາມຕໍ່ປະຊາຄົມສາກົນ ແລະ ຊາວຫວຽດນາມຢູ່ຕ່າງປະເທດ, ສ້າງເງື່ອນໄຂທີ່ເອື້ອອຳນວຍໃຫ້ນັກຂ່າວຫຼາຍພັນຄົນແລະສຳນັກຂ່າວຕ່າງປະເທດ ເຂົ້າມາຫວຽດນາມເພື່ອລາຍງານ, ຂຽນບົດຄວາມ, ປະກອບສ່ວນເສີມສ້າງຄວາມເຂົ້າໃຈຂອງປະຊາຄົມໂລກກ່ຽວກັບຫວຽດນາມ, ພ້ອມກັນນັ້ນກໍ່ປະຕິເສດ, ກີດກັ້ນ ແລະ ລົບລ້າງຖ້ອຍທຳນອງໃສ່ຮ້າຍປ້າຍສີ, ບິດເບືອນກ່ຽວກັບພັກກອມມູນິດແລະລັດຫວຽດນາມ. ໄດ້ນຳໃຊ້ການປະຕິສຳພັນຮູບແບບໃໝຢ່າງມີປະສິດທິຜົນ, ໃຊ້ປະໂຫຍດຈາກເຄືອຂ່າຍສັງຄົມທາງການທູດດິຈິຕອນ ແລະ ຮູບແບບການແລກປ່ຽນອອນໄລນ, ໂດຍສະເພາະໃນໄລຍະການແຜ່ລະບາດຂອງໂຄວິດ-19. ດ້ວຍຜົນໄດ້ຮັບທີ່ດີໃນການປ້ອງກັນແລະຄວບຄຸມພະຍາດ, ພ້ອມທັງຜົນສໍາເລັດໃນການພັດທະນາເສດຖະກິດແລະການຕ່າງປະເທດ, ເຮັດໃຫ້ໂລກຮູ້ຈັກຫວຽດນາມຫຼາຍຂຶ້ນເລື້ອຍໆ ວ່າຫວຽດນາມບໍ່ພຽງແຕ່ເປັນປະເທດທີ່ສະຫງົບສຸກ, ໝັ້ັນຄົງ, ປອດໄພ ແລະ ອຸດົມສົມບູນໄປດ້ວຍທ່າແຮງເທົ່ານັ້ນ, ແຕ່ຍັງສາມາດປັບຕົວ ແລະ ຮັບມືກັບສິ່ງທ້າທາຍຢ່າງມີປະສິດທິຜົນ.
ພາຍໃຕ້ການຊີ້ນຳທີ່ເປັນເອກະພາບຂອງກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ, ການປະສານງານລະຫວ່າງເສົາຄໍ້າການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດຂອງປະຊາຊົນທີ່ນັບມື້ນັບແໜ້ນແຟ້ນ, ການປັບປຸງແລະຜັນຂະຫຍາຍຢ່າງມີປະສິດທິຜົນ ກົນໄກການປະສານງານລະຫວ່າງການປ້ອງກັນຊາດ - ປ້ອງກັນຄວາມສະຫງົບ - ການຕ່າງປະເທດ, ປະກອບສ່ວນຍົກສູງປະສິດທິຜົນແລະກຳລັງແຮງສັງລວມ ໃນແນວຮົບການຕ່າງປະເທດ. ການສົມທົບ, ແລກປ່ຽນລະຫວ່າງບັນດາອົງການ, ກະຊວງ, ຂະແໜງການທີ່ກ່ຽວຂ້ອງນັບມື້ນັບແໜ້ນແຟ້ນ, ຜ່ານນັ້ນປະກອບສ່ວນຍົກສູງປະສິດທິຜົນຂອງວຽກງານການຕ່າງປະເທດ ແລະເຊື່ອມໂຍງສາກົນ, ໂດຍສະເພາະແມ່ນ ໃນການແບ່ງປັນຂໍ້ມູນຂ່າວສານ, ການປະສານງານ ການຄົ້ນຄວ້າຮ່ວມກັນ, ການປຶກສາຫາລືຮ່ວມກັນ, ສ້າງຄວາມເຫັນດີເຫັນພ້ອມພາຍໃນ, ຈັດການແກ້ໄຂບັນຫາແລະຄວາມສັບສົນທີ່ເກີດຂຶ້ນ. ວຽກງານການຕ່າງປະເທດຂອງພັກສືບຕໍ່ໄດ້ຮັບການປ່ຽນແປງໃໝ່ຕາມຈິດໃຈຄຳສັ່ງເລກທີ 32-CT/TW, ວັນທີ 18 ກຸມພາ 2019, ຂອງກົມການເມືອງຄະນະບໍລິຫານສູນກາງພັກກອມມູນິດຫວຽດນາມ, “ກ່ຽວກັບການເພີ່ມທະວີແລະຍົກສູງປະສິດທິຜົນການພົວພັນຕ່າງປະເທດຂອງພັກໃນສະພາບການໃໝ່”; ສົ່ງເສີມການພົວພັນຂອງຫວຽດນາມກັບພັກການເມືອງຂອງປະເທດອື່ນໆ ໃຫ້ນັບມື້ນັບແທດຈິງ ແລະ ສອດຄ່ອງກັບສະພາບການໃໝ່.
ການພົວພັນການຕ່າງປະເທດຂອງສະພາແຫ່ງຊາດ ນັບມື້ນັບເຂົ້າສູ່ລວງເລິກ, ມີປະສິດທິຜົນແລະແທດຈິງ ກັບສະພາແຫ່ງຊາດຂອງປະເທດອື່ນ ແລະໃນເວທີປາໄສລັດຖະສະພາຫຼາຍຝ່າຍ, ປະກອບສ່ວນສຳຄັນເຂົ້າໃນການເຮັດໃຫ້ການພົວພັນລະຫວ່າງຫວຽດນາມກັບບັນດາປະເທດເລິກເຊິ່ງກວ່າອີກ ແລະ ຍົກສູງຖານະບົດບາດສາກົນຂອງຫວຽດນາມ. ການທູດດ້ານການປ້ອງກັນປະເທດ ແລະ ການທູດດ້ານຄວາມໝັ້ນຄົງ ໄດ້ຮັບການສົ່ງເສີມ, ປະກອບສ່ວນເພີ່ມຄວາມໄວ້ວາງໃຈ ແລະ ປັບປຸງການພົວພັນ, ພ້ອມກັນນັ້ນກໍ່ສ້າງບັນຍາກາດທີ່ດີໃນການຈັດການແກ້ໄຂຄວາມແຕກຕ່າງແລະຄວາມຂັດແຍ້ງກັບຄູ່ຮ່ວມມື. ການທູດປະຊາຊົນ ໄດ້ຖືກຈັດຕັ້ງປະຕິບັດຢ່າງເປັນເຈົ້າການ, ຕັ້ງໜ້າ, ແທດຈິງ ຢູ່ໃນເວທີປະຊາຊົນຫຼາຍຝ່າຍ ແລະ ໃນການພົວພັນລະຫວ່າງປະຊາຊົນກັບປະເທດອື່ນ, ປະກອບສ່ວນລະດົມແຫຼ່ງພະລັງ, ຍາດແຍ່ງຄວາມສາມັກຄີສະໜັບສະໜູນຈາກສາກົນ ແລະເພີ່ມທະວີການພົວພັນກັບຫວຽດນາມ.
ເບິ່ງຄືນໃນຫ້າປີທີ່ຜ່ານມາ, ຜົນສໍາເລັດເຫຼົ່ານີ້ມີຄວາມໝາຍຫຼາຍກວ່າທີ່ເຄີຍເປັນມາເມື່ອໂລກກໍາລັງຜ່ານການປ່ຽນແປງທີ່ສັບສົນ ແລະໃຫຍ່ຫຼວງທີ່ບໍ່ເຄີຍມີມາກ່ອນ. ວຽກງານການຕ່າງປະເທດຂອງຫວຽດນາມໄດ້ປະກອບສ່ວນສຳຄັນ, ກາຍເປັນຈຸດສະຫວ່າງໃນຜົນສຳເລັດລວມຂອງປະຊາຊາດ. ບໍ່ພຽງແຕ່ຮັກສາສະພາບແວດລ້ອມສັນຕິພາບແລະສະຖຽນລະພາບໄດ້ໃນສະພາບການໂລກທີ່ສັບສົນທີ່ສຸດເທົ່ານັ້ນ, ຫວຽດນາມຍັງໄດ້ສະແດງໃຫ່ເຫັນເຖິງຄວາມກ້າຫານ, ຈິດໃຈເປັນເຈົ້າການໃນການປັບຕົວ, ຄວາມສາມາດສ້າງແລະໃຊ້ປະໂຫຍດຈາກໂອກາດ ເພື່ອຍົກສູງທ່າ-ກຳລັງ ແລະ ກຽດສັກສີສາກົນຂອງປະເທດຢ່າງບໍ່ຢຸດຢັ້ງ. ໃນການຈັດອັນດັບດັດຊະນີພະລັງໃນອາຊີທີ່ເຜີຍແຜ່ໂດຍສະຖາບັນ Lowy (ອົດສະຕາລີ) ໃນວັນທີ 19 ຕຸລາ 2020, ຫວຽດນາມເພີ່ມຂຶ້ນຈາກອັນດັບທີ 13 ເປັນອັນດັບທີ 12. ໃນນັ້ນ, ກ່ຽວກັບອິດທິພົນທາງດ້ານການທູດ, ຫວຽດນາມເພີ່ມຂຶ້ນ 3 ອັນດັບ, ເປັນອັນດັບ 2 ຢູ່ອາຊີຕາເວັນອອກສ່ຽງໃຕ້. ກ່ຽວກັບເສດຖະກິດ, ຫວຽດນາມບືນຕົວຂຶ້ນເປັນພື້ນຖານເສດຖະກິດທີ່ໃຫຍ່ເປັນອັນດັບສີ່ໃນ ອາຊຽນ ດ້ວຍຈີດີພີ ຫຼາຍກວ່າ 340 ຕື້ໂດລາສະຫະລັດ. ບໍລິສັດປະເມີນມູນຄ່າຍີ່ຫໍ້ Brand Finance ຂອງອັງກິດໃຫ້ຮູ້ວ່າ: ມູນຄ່າຍີ່ຫໍ້ແຫ່ງຊາດຂອງຫວຽດນາມໄດ້ເພີ່ມຂຶ້ນ 29% ໃນປີ 2020, ປະຈຸບັນຢູ່ໃນອັນດັບທີ 33 ໃນ 100 ເຄື່ອງໝາຍລະດັບປະເທດທີ່ມີຄຸນຄ່າສູງທີ່ສຸດຢູ່ໃນໂລກ.
ສະພາບການໃໝ່ພ້ອມສິ່ງທ້າທາຍແລະໂອກາດໃໝ່
ຫວຽດນາມກຳລັງກ້າວເຂົ້າສູ່ໄລຍະຍຸດທະສາດໃໝ່ ດ້ວຍບັນດາເປົ້າໝາຍ, ໜ້າທີ່ສຳຄັນກ່ຽວກັບການພັດທະນາ, ສິ່ງທ້າທາຍຫຼາຍຢ່າງ ແລະ ໂອກາດກໍ່ບໍ່ໜ້ອຍ. ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມໄດ້ຕີລາຄາຢ່າງຮອບດ້ານ, ເລິກເຊິ່ງກ່ຽວກັບສະພາບການແລະທ່າອຽງໃຫຍ່. ວິທີພິຈາລະນາສັດຈະວິພາກທັງສອງດ້ານ ສິ່ງທ້າທາຍແລະໂອກາດ ຂອງສະຖານະການສາກົນທີ່ສະແດງອອກໃນຈຸດທີ່ສຳຄັນຈຳນວນໜຶ່ງດັ່ງນີ້:
ສະພາບການໂລກ ສືບຕໍ່ປ່ຽນແປງໃໝ່່ຕາມທິດຫັນເປັນຫຼາຍຂົ້ວ, ຫຼາຍສູນ; ການຮ່ວມມືແລະການຕໍ່ສູ້ດຳເນີນໄປຄຽງຄູ່ກັນ, ແຕ່ດ້ານການຕໍ່ສູ້ແລະຄວບຄຸມເຊິ່ງກັນແລະກັນນັບມື້ນັບຮຸນແຮງຂຶ້ນເລື້ອຍ. ໂລກາພິວັດແລະການເຊື່ອມໂຍງສາກົນສືບຕໍ່ມີຄວາມຄືບໜ້າ, ແຕ່ປະສົບກັບອຸປະສັກຫຼາຍຢ່າງ ລວມທັງການເພີ່ມຂຶ້ນຂອງລັດທິຊາດນິຍົມສຸດຂົ້ວ. ກົດໝາຍສາກົນແລະສະຖາບັນພະຫຸພາຄີລະດັບໂລກ ປະເຊີນກັບຄວາມທ້າທາຍຫຼາຍຢ່າງ, ແຕ່ຍັງແມ່ນກະແສຫຼັກທີ່ໄດ້ຮັບການປົກປ້ອງແລະສົ່ງເສີມໂດຍປະເທດສ່ວນໃຫຍ່. ເສດຖະກິດໂລກ ຢູ່ໃນວິກິດການ, ຊຸດໂຊມຮ້າຍແຮງ ແລະ ອາດຈະແກ່ຍາວໄປ ເນື່ອງຈາກຜົນກະທົບຈາກການລະບາດຂອງໂຄວິດ-19. ບັນດາປະເທດ, ໂດຍສະເພາະປະເທດໃຫຍ່, ໄດ້ດັດປັບຍຸດທະສາດການພັດທະນາ, ຫຼຸດການເອື່ອຍອີງໃສ່ພາຍນອກ. ຄວາມຂັດແຍ້ງທາງເສດຖະກິດ, ສົງຄາມການຄ້າ, ການແຂ່ງຂັນທາງເຕັກໂນໂລຊີແລະຊັບພະຍາກອນບຸກຄົນຄຸນນະພາບສູງ ລະຫວ່າງປະເທດຕ່າງໆ ທະວີຄວາມຮຸນແຮງຂຶ້ນເລື້ອຍໆ.
ໃນພາກພື້ນອາຊີ - ປາຊີຟິກ, ຄວາມສ່ຽງຂອງຄວາມບໍ່ໝັ້ນຄົງ, ການແຂ່ງຂັນກັນຢ່າງດຸເດືອດລະຫວ່າງບັນດາປະເທດມະຫາອຳນາດ ເກີດຂຶ້ນສະລັບສັບຊ້ອນຫຼາຍຂຶ້ນ. ການຂັດແຍ້ງກ່ຽວກັບອະທິປະໄຕດ້ານດິນແດນ, ອະທິປະໄຕທາງທະເລແລະໝູ່ເກາະ ນັບມື້ນັບຮຸນແຮງແລະດຸເດືອດ. ບັນດາບັນຫາທົ່ວໂລກ, ຄວາມປອດໄພຂອງມະນຸດ, ຄວາມໝັ້ນຄົງທາງສັງຄົມ ແລະຄວາມໝັ້ນຄົງທີ່ບໍ່ເປັນແບບດັ້ງເດີມ ເຮັດໃຫ້ເກີດຜົນກະທົບທາງລົບຫຼາຍຂຶ້ນຕໍ່ປະເທດຕ່າງໆ.
ໃນຂະນະນັ້ນ, ຫວຽດນາມກໍ່ກຳລັງຢືນຕໍ່ໜ້າສິ່ງທ້າທາຍພາຍໃນຫຼາຍຢ່າງ. ພື້ນຖານເສດຖະກິດພັດທະນາບໍ່ທັນໝັ້ນຄົງ, ຖືກຜົນກະທົບຈາກການລະບາດຂອງໂຄວິດ-19 ແລະ ການຊຸດໂຊມຂອງເສດຖະກິດໂລກ. ທ່າອຽງການສູງອາຍຸໄວຂອງປະຊາກອນ, ຂໍ້ເສຍຂອງການຫັນເປັນອຸດສາຫະກຳແລະການຂະຫຍາຍຕົວເມືອງ; ຄວາມສາມາດແຂ່ງຂັນຂອງພື້ນຖານເສດຖະກິດແລະຂອງວິສາຫະກິດ ບໍ່ສູງ; ຄວາມສ່ຽງຂອງການຕົກເຂົ້າໃນກັບດັກລາຍໄດ້ປານກາງ ຍັງມີຢູ່. ການປະຕິບັດການບຸກທະລຸຍຸດທະສາດສາມປະການ ກ່ຽວກັບໂຄງສ້າງພື້ນຖານ, ກຳລັງຄົນ ແລະ ສະຖາບັນ ຕ້ອງໄດ້ເຮັດຢ່າງຂຸ້ນຂ້ຽວກວ່າເກົ່າ. ວຽກງານການຄາດຄະເນຍຸດທະສາດບາງຄັ້ງບໍ່ເປັນເຈົ້າການແລະອ່ອນໄຫວ.
ຢ່າງໃດກໍຕາມ, ໃນຄວາມທ້າທາຍຍາມໃດກໍມີໂອກາດ ເຊິ່ງຫວຽດນາມຕ້ອງພິຈາລະນາຢ່າງສັດຈະວິພາກ, ສ່ອງໃສ ແລະ ປ່ຽນແປງໃໝ່ຈິນຕະນາການຢ່າງຕໍ່ເນື່ອງ. ສັນຕິພາບ, ການຮ່ວມມື ແລະ ການພັດທະນາຍັງຄົງແມ່ນທ່າອຽງຫຼັກ; ໂລກາພິວັດແລະການເຊື່ອມໂຍສາກົນສືບຕໍ່ມີຄວາມຄືບໜ້າ. ພິເສດ, ການປະຕິວັດອຸດສາຫະກຳຄັ້ງທີສີ່, ໂດຍສະເພາະເຕັກໂນໂລຊີດິຈິຕອນ ມີການພັດທະນາຢ່າງແຂງແຮງ, ສ້າງການບຸກທະລຸໃນຫຼາຍຂົງເຂດ, ສ້າງໂອກາດຍຸດທະສາດທີ່ຫາຍາກສຳລັບບັນດາປະເທດຂະໜາດກາງແລະນ້ອຍ, ໃນນັ້ນມີປະເທດຫວຽດນາມ ໃຫ້ມີການພັດທະນາແບບກ້າວກະໂດດ, ຜ່ານຂ້າມກັບດັກລາຍໄດ້ປານກາງ, ມຸ່ງສູ່ບັນດາເປົ້າໝາຍການພັດທະນາໃນໄລຍະຍຸດທະສາດໃໝ່ຮອດປີ 2030, ວິໄສທັດຮອດປີ 2045.
ສຳລັບຫວຽດນາມ, ພາລະກິດ ຖານະບົດບາດ ແລະ ກຽດສັກສີທີ່ສ້າງຂຶ້ນຈາກຂະບວນການປ່ຽນແປງໃໝ່ ເປັນຮາກຖານທີ່ດີເພື່ອໃຫ້ຫວຽດນາມປະຕິບັດຄວາມປາດຖະໜາພັດທະນາປະເທດໃຫ້ປະກົດປັນຈິງ. ເສດຖະກິດມີອັດຕາການເຕີບໂຕໄວແລະໝັ້ນຄົງ. ບົດຮຽນແລະຊັບພະຍາກອນພາຍໃນທີ່ສະສົມມາຈາກຂະບວນການເຊື່ອມໂຍງສາກົນໃນເວລາທີ່ຜ່ານມາ ຈະສືບຕໍ່ເສີມຂະຫຍາຍຄຸນຄ່າແລະສ້າງກຳລັງໜູນໃຫ້ຫວຽດນາມບົນເສັ້ນທາງແຫ່ງການພັດທະນາ. ນອກຈາກນີ້, ຫວຽດນາມຍັງມີທີ່ຕັ້ງພູມສາດ-ຍຸດທະສາດທີ່ສຳຄັນໃນພາກພື້ນອາຊີ-ປາຊີຟິກທີ່ຂະຫຍັນຂັນເຄື່ອນ, ແມ່ນປັດໄຈທີ່ນັບມື້ນັບສຳຄັນໃນນະໂຍບາຍຂອງບັນດາປະເທດຕໍ່ພາກພື້ນ. ການນຳພາຮອບດ້ານ, ໂດຍກົງຂອງພັກກອມມູນິດຫວຽດນາມນັບມື້ນັບເສີມຂະຫຍາຍປະສິດທິຜົນຢ່າງແຂງແຮງ ພ້ອມກັບບົດບາດ, ການລົງມືຂອງປະຊາຊົນ ແລະລະບົບການເມືອງທັງໝົດ. ຕໍ່ໜ້າສະພາບການດັ່ງກ່າວ, ໜ້າທີ່ຈຸດໜັກໃຈກາງຂອງວຽກງານການຕ່າງປະເທດໃນເວລາທີ່ຈະມາເຖິງແມ່ນ ຜັນຂະຫຍາຍປະຕິບັດແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ, ເສີມຂະຫຍາຍບົດບາດຂອງກອງປະຈັນບານໃນການສ້າງແລະຮັກສາສະພາບແວດລ້ອມທີ່ສັນຕິພາບແລະສະຖຽນລະພາບ, ລະດົມຫຼາຍສຸດ ບັນດາແຫຼ່ງພະລັງພາຍນອກ ເພື່ອຮັບໃຊ້ການພັດທະນາ, ເຊີດຊູຖານະບົດບາດແລະກຽດສັກສີຂອງຫວຽດນາມ. ບົນພື້ນຖານນັ້ນ ໃນໄລຍະຈະມາເຖິງ, ວຽກງານການຕ່າງປະເທດຂອງຫວຽດນາມ ຕ້ອງປະຕິບັດບັນດາ ໜ້າທີ່ຫຼັກດັງຕໍ່ໄປນີ້ຢ່າງມີປະສິດທິຜົນ:
ທີໜຶ່ງ, ປັບປຸງຄວາມໄວ້ວາງໃຈທາງການເມືອງ, ຍົກສູງແລະເຮັດໃຫ້ການພົວພັນຂອງຫວຽດນາມກັບບັນດາຄູ່ຮ່ວມມືເລິກເຊິ່ງກວ່າອີກ, ໂດຍສະເພາະກັບບັນດາປະເທດເພື່ອນບ້ານ, ປະເທດໃນພາກພື້ນ, ປະເທດໃຫຍ່ ແລະ ປະເທດເພື່ອນມິດດັ້ງເດີມ, ບົນຈິດໃຈສະເໝີພາບ, ຕ່າງຝ່າຍຕ່າງມີຜົນປະໂຫຍດ, ເຄົາລົບເຊິ່ງກັນແລະກັນ ແລະ ສອດຄ່ອງກັບກົດໝາຍສາກົນ. ຈໍາເປັນຕ້ອງໃຫ້ການພັດທະນາ ເປັນຈຸດໃຈກາງຂອງຄວາມສໍາພັນ, ຕາມນັ້ນ ຕ້ອງຕັ້ງໜ້າຊຸກຍູ້ບັນດາໂອກາດທາງດ້ານເສດຖະກິດ-ການຄ້າ, ການລົງທຶນ, ວິທະຍາສາດ-ເຕັກໂນໂລຊີ, ໂດຍສະເພາະແມ່ນເຕັກໂນໂລຊີດິຈິຕອນ, ບັນດາທ່າອຽງການພັດທະນາສີຂຽວ, ການພັດທະນາແບບຍືນຍົງ... ນອກຈາກນັ້ນ, ຕ້ອງເສີມຂະຫຍາຍການປະສົມປະສານຜົນປະໂຫຍດກັບເຄືອຂ່າຍຂອງ 30 ຄູ່ຮ່ວມມືຍຸດທະສາດແລະຮອບດ້ານ ເພື່ອຍົກສູງ “ຄຸນຄ່າຍຸດທະສາດ” ຂອງຫວຽດນາມຕື່ມອີກ; ຈັດການແກ້ໄຂບັນຫາທີ່ມີຢູ່ແລ້ວແລະເກີດຂຶ້ນໃໝ່ໃນການພົວພັນກັບຫຼາຍຄູ່ຮ່ວມມືຫຼັກໄດ້ຢ່າງເໝາະສົມທີລະຂັ້ນຕອນ.
ທີສອງ, ຍູ້ແຮງການເຊື່ອມໂຍງສາກົນຢ່າງຮອບດ້ານ ແລະ ເລິກເຊິ່ງ, ໂດຍສຸມໃສ່ການເຊື່ອມໂຍງເສດຖະກິດສາກົນ, ພ້ອມກັນນັ້ນຊຸກຍູ້ແລະຍົກສູງຄຸນນະພາບຂອງການເຊື່ອມໂຍງສາກົນໃນບັນດາຂົງເຂດສັງຄົມ, ສິ່ງແວດລ້ອມ, ວິທະຍາສາດ-ເຕັກໂນໂລຊີ, ການສຶກສາແລະຝຶກອົບຮົມ, ວັດທະນະທຳ, ການທ່ອງທ່ຽວ..., ຜ່ານນັ້ນ ດຶງດູດເອົາຊັບພະຍາກອນຫຼາຍຂຶ້ນ, ເຮັດໃຫ້ປະເທດພັດທະນາໄວແລະຍືນຍົງກວ່າເກົ່າ. ສະພາບການໃໝ່ກຳນົດຄວາມຕ້ອງການສູງຂຶ້ນສໍາລັບການເຊື່ອມໂຍງກັບສາກົນ, ເຊິ່ງແມ່ນ: ຈຳເປັນຕ້ອງສົ່ງເສີມທ່າແລະກຳລັງ, ແລະ ຄວາມສຳຄັນທາງພູມສາດ-ຍຸດທະສາດຂອງປະເທດ ໃຫ້ດີຂຶ້ນ ເພື່ອເປັນເຈົ້າການໃນການບືນຕົວຂຶ້ນ ແລະ ມີບົດບາດທີ່ຄູ່ຄວນ ໃນຂົງເຂດທີ່ຫວຽດນາມມີຜົນປະໂຫຍດແລະທ່າແຮງ; ສຸມໃສ່ການສະໜັບສະໜູນບັນດາຂະແໜງການ, ທ້ອງຖິ່ນແລະວິສາຫະກິດ ເພື່ອຂະຫຍາຍການຮ່ວມມືກັບຕ່າງປະເທດ, ຍາດແຍ່ງເອົາທຶນ, ເຕັກໂນໂລຊີແລະທັກສະການຄຸ້ມຄອງ..., ປະກອບສ່ວນປະຕິບັດແຜນນະໂຍບາຍປັບໂຄງສ້າງເສດຖະກິດ, ຕິດກັບການປ່ຽນແປງໃໝ່ຮູບແບບການເຕີບໂຕ.
ທີສາມ, ສືບຕໍ່ຍູ້ແຮງແລະຍົກລະດັບການຕ່າງປະເທດຫຼາຍຝ່າຍ ບົນຈິດໃຈຂອງຄຳສັ່ງເລກທີ 25-CT/TW, ວັນທີ 8 ສິງຫາ 2018, ຂອງຄະນະເລຂາທິການສູນກາງພັກກອມມູນິດຫວຽດນາມ, “ກ່ຽວກັບການຍູ້ແຮງແລະຍົກລະດັບການຕ່າງປະເທດຫຼາຍຝ່າຍຮອດປີ 2030”, ຈາກການເປັນເຈົ້າການແລະຕັ້ງໜ້າເຂົ້າຮ່ວມ ໄປເປັນການປະກອບສ່ວນເທື່ອລະກ້າວ ໃນການສ້າງແລະກໍ່ຕັ້ງສະຖາບັນຫຼາຍຝ່າຍ ແລະ ລະບຽບການເສດຖະກິດ-ການເມືອງສາກົນທີ່ໂປ່ງໃສ, ຍຸດຕິທໍາ, ມີປະຊາທິປະໄຕ ແລະ ຍືນຍົງ. ເປັນເຈົ້າການໃນການເຂົ້າຮ່ວມແລະເສີມຂະຫຍາຍບົດບາດໃນບັນດາກົນໄກຫຼາຍຝ່າຍ, ໂດຍສະເພາະແມ່ນ ອາຊຽນ, ສະຫະປະຊາຊາດ, ເອເປກ, ການຮ່ວມມືອະນຸພາກພື້ນແມ່ນ້ຳຂອງ; ຄ່ອຍໆຖືບົດບາດແກ່ນສານ, ນຳພາ ແລະໄກ່ເກ່ຍໃນພື້ນທີ່ ແລະເວທີທີ່ຫວຽດນາມມີຄວາມສາມາດແລະມີຜົນປະໂຫຍດ; ເປັນເຈົ້າການແລະຕັ້ງໜ້າເຂົ້າຮ່ວມບັນດາກົນໄກຫຼາຍຝ່າຍ ກ່ຽວກັບການປ້ອງກັນປະເທດແລະການຮັກສາຄວາມໝັ້ນຄົງ ຕາມຈິນຕະນາການໃໝ່ກ່ຽວກັບການປົກປັກຮັກສາປະເທດຊາດ. ໃນນັ້ນ, ຕ້ອງເອົາໃຈໃສ່ເຊື່ອມຕໍ່ແລະແຊກຊ້ອນຜົນປະໂຫຍດຂອງຊາດຫວຽດນາມ ກັບຜົນປະໂຫຍດຂອງພາກພື້ນແລະທົ່ວໂລກ ຢ່າງຄ່ອງແຄ່ວແລະກົມກຽວ, ທັງຮັບປະກັນການສະໜັບສະໜູນຂອງສາກົນຕໍ່ບັນດາບັນຫາຜົນປະໂຫຍດຂອງຫວຽດນາມ, ທັງຍົກສູງບົດບາດ ຄວາມຮັບຜິດຊອບ ແລະ ການປະກອບສ່ວນເຂົ້າໃນການຈັດການກັບຄວາມທ້າທາຍທົ່ວໂລກ ແລະ ປະຕິບັດບັນດາເປົ້າໝາຍການພັດທະນາຂອງສະຫະປະຊາຊາດໃຫ້ປະກົດເປັນຈິງ, ເຊັ່ນການປ່ຽນແປງສະພາບອາກາດ, ຄວາມໝັ້ນຄົງດ້ານແຫຼ່ງນ້ຳ, ຄວາມໝັ້ນຄົງດ້ານເຄືອຂ່າຍ, ການປົກປ້ອງສະພາບແວດລ້ອມ, ການຊຸກຍູ້ການພັດທະນາທີ່ຍືນຍົງ, ປົກຫຸ້ມ, ປະດິດສ້າງ...
ທີສີ່, ການຕ່າງປະເທດສືບຕໍ່ສົມທົບຢ່າງແໜ້ນແຟ້ນກັບການປ້ອງກັນປະເທດ ແລະ ການປ້ອງກັນຄວາມໝັ້ນຄົງ ເພື່ອສ້າງຂາຕັ້ງທີ່ໝັ້ນຄົງ, ຮັກສາອຳນາດອະທິປະໄຕແລະຜືນແຜ່ນດິນອັນຄົບຖ້ວນຂອງປະເທດຊາດ. ນີ້ແມ່ນໜ້າທີທີ່ສຳຄັນ ເປັນປະຈຳເຊິ່ງການຕ່າງປະເທດຕ້ອງສືບຕໍ່ເຮັດເປັນຢ່າງດີ ເພື່ອປະກອບສ່ວນຮັກສາສະພາບແວດລ້ອມສັນຕິພາບສຳລັບການພັດທະນາປະເທດ. ຢາກເຮັດໄດ້ຄືແນວນັ້ນ, ການຕ່າງປະເທດຕ້ອງເສີມຂະຫຍາຍທ່າແຮງ ເພື່ອແກ້ໄຂແລະຈັດການກັບໄພຄຸກຄາມຕໍ່ຄວາມໝັ້ນຄົງຂອງຊາດຕັ້ງແຕ່ຕົ້ນແລະຈາກໄລຍະໄກ, ໂດຍສະເພາະຜ່ານການຊຸກຍູ້ການສົນທະນາ, ສ້າງຄວາມໄວ້ວາງໃຈ, ການທູດປ້ອງກັນ, ນຳໃຊ້ມາດຕະການສັນຕິຢ່າງມີປະສິດທິຜົນບົນພື້ນຖານກົດໝາຍສາກົນ.
ທີຫ້າ, ຍົກສູງປະສິດທິຜົນ, ປ່ຽນແປງໃໝ່ເນື້ອໃນແລະວິທີການຂອງວຽກງານການທູດວັດທະນະທຳ, ການໂຄສະນາຕ່າງປະເທດ, ການປົກປ້ອງພົນລະເມືອງ, ຜັນຂະຫຍາຍວຽກງານຊາວຫວຽດນາມຢູ່ຕ່າງປະເທດຢ່າງຮອບດ້ານແລະແຂງແຮງກວ່າອີກ ເພື່ອສ້າງຄວາມສາມັກຄີກັນຢ່າງໃກ້ຊິດ, ເສີມຂະຫຍາຍກຳລັງແຮງສັງລວມໃນການພັດທະນາປະເທດ. ໃນຍຸກທີ່ເຕັກໂນໂລຊີດິຈິຕອນພັດທະນາຢ່າງໄວວານັ້ນ, ການທູດວັດທະນະທຳ ແລະການໂຄສະນາຕ່າງປະເທດຕ້ອງປ່ຽນແປງໃໝ່ແລະປະດິດສ້າງຢ່າງບໍ່ຢຸດຢັ້ງ ເພື່ອເຜີຍແຜ່ພາບພົດຂອງປະເທດຫວຽດນາມທີ່ຂະຫຍັນຂັນເຄື່ອນ, ເປີດອົກເປີດໃຈ, ເປັນມິດ, ດ້ວຍເຈດຈຳນົງແລະຄວາມປາດຖະໜາບືນຕົວຂຶ້ນຢ່າງແຂງແຮງ. ພ້ອມກັນນັ້ນ, ການຕ່າງປະເທດຈະມີບົດບາດທີ່ຕັ້ງໜ້າແລະປະດິດສ້າງຫຼາຍກວ່າອີກ ໃນການເຊື່ອມຕໍ່ແລະດຶງດູດແຫຼ່ງພະລັງເສດຖະກິດ, ສະຕິປັນຍາຂອງຊາວຫວຽດນາມຢູ່ຕ່າງປະເທດ ເພື່ອຕອບສະໜອງຄວາມຕ້ອງການພັດທະນາແລະເຊື່ອມໂຍງຂອງຫວຽດນາມໃນໄລຍະຍຸດທະສາດໃໝ່.
ທີຫົກ, ສ້າງລະບົບການທູດທີ່ຮອບດ້ານແລະທັນສະໄໝ. ລັກສະນະຮອບດ້ານຂອງລະບົບການທູດຫວຽດນາມອີງໃສ່ທັງສາມເສົາຄ້ຳຄື ກນຕ່າງປະເທດຂອງພັກ, ການທູດຂອງລັດ ແລະການຕ່າງປະເທດຂອງປະຊາຊົນ. ກ່ຽວກັບຂົງເຂດ, ນັ້ນແມ່ນການທູດການເມືອງ, ການທູດເສດຖະກິດ ແລະ ການທູດວັດທະນະທຳ, ວຽກງານກັບຊາວຫວຽດນາມຢູ່ຕ່າງປະເທດ ແລະ ການປົກປ້ອງພົນລະເມືອງ. ການຜັນຂະຫຍາຍການພົວພັນກັບພາຍນອກບໍ່ພຽງແຕ່ລະຫວ່າງລັດແລະລັດເທົ່ານັ້ນ, ແຕ່ຍັງລວມທັງລະຫວ່າງທ້ອງຖິ່ນ, ວິສາຫະກິດ, ປະຊາຊົນນຳກັນ. ດັ່ງນັ້ນ, ທ້ອງຖິ່ນ, ວິສາຫະກິດ, ປະຊາຊົນທັງເປັນເຈົ້າພາບໃນການຜັນຂະຫຍາຍວຽກງານການຕ່າງປະເທດ ແລະເຊື່ອມໂຍງສາກົນ, ທັງເປັນເປົ້າໝາຍແລະຈຸດປະສົງຂອງວຽກງານການຕ່າງປະເທດ.
ການທູດສະໄໝໃໝ່ສືບທອດມູນເຊື້ອການທູດຫວຽດນາມ, ແນວຄິດໂຮ່ຈີມິນ, ເພື່ອຜົນປະໂຫຍດຂອງປະເທດ-ປະຊາຊາດ, ບົນພື້ນຖານບັນດາຫຼັກການຂອງກົດໝາຍສາກົນ, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ. ລັກສະນະທັນສະໄໝຂອງການທູດສະແດງອອກໃນແບບວິທີການຜັນຂະຫຍາຍ, ຖັນແຖວພະນັກງານ, ການຈັດຕັ້ງກົງຈັກ, ພື້ນຖານໂຄງລ່າງທີ່ບັນລຸລະດັບພາກພື້ນ ແລະບືນຕົວຂຶ້ນລະດັບໂລກ, ຊ່ວຍຊຸກຍູ້ຜົນປະໂຫຍດຂອງປະເທດ-ປະຊາຊາດຢ່າງດີ, ພ້ອມກັນນັ້ນ ມີຄວາມສາມາດປັບຕົວເຂົ້າກັບສະພາບການປ່ຽນແປງແລະເຂົ້າກັບປັດໄຈໃໝ່ໄດ້ຢ່າງຄ່ອງຄ່ອງຕົວເຊັ່ນ ການນຳໃຊ້ເຕັກໂນໂລຊີຂໍ້ມູນຂ່າວສານ, ການທູດດິຈິຕອນ, ການທູດອອນໄລ, ການທູດສຸດຍອດ...
ທີເຈັດ, ເພີ່ມທະວີວຽກງານການຄົ້ນຄວ້າ, ຄາດຄະເນ, ທີ່ປຶກສາຍຸດທະສາດ ກ່ຽວກັບການຕ່າງປະເທດ, ຄວາມໝັ້ນຄົງ ແລະ ການພັດທະນາ, ເພື່ອບໍ່ຖືກຕົກໃນທ່າຮັບ ໃນໄພບັງເອີນ; ເປັນເຈົ້າການໃນການສະເໜີຍຸດທະສາດແລະວິທີແກ້. ໂດຍສະເພາະ, ດ້ວຍຈຸດສຸມຮັບໃຊ້ການພັດທະນາ, ເຄືອຂ່າຍສຳນັກງານຕົວແທນຫວຽດນາມ 94 ແຫ່ງຢູ່ຕ່າງປະເທດ ຈຳເປັນຕ້ອງເສີມຂະຫຍາຍຢ່າງດີຄວາມສາມາດໃນການເຂົ້າເຖິງແຫຼ່ງຂໍ້ມູນທາງການເມືອງ, ເສດຖະກິດໂລກ, ວິທະຍາສາດ-ເຕັກໂນໂລຊີ, ຕະຫຼາດ, ຜ່ານນັ້ນ ສະໜັບສະໜູນການຄຸ້ມຄອງເສດຖະກິດພາຍໃນປະເທດ ແລະ ໃຫ້ຄຳແນະນຳກ່ຽວກັບຮູບແບບການພັດທະນາໄດ້ຢ່າງມີປະສິດທິຜົນຫຼາຍຂຶ້ນ.
***
ຫວຽດນາມກຳລັງກ້າວເຂົ້າສູ່ໄລຍະຍຸດທະສາດທີ່ສຳຄັນ, ດ້ວຍບັນດາເປົ້າໝາຍ, ຄວາມປາດຖະໜາທີ່ຈະພັດທະນາແລະບືນຕົວຂຶ້ນຢ່າງແຂງແຮງ. ໂດຍສືບຖອດແລະເສີມຂະຫຍາຍມູນເຊື້ອການທູດຂອງຊາດ, ຕັ້ງໝັ້ນບົນພື້ນຖານແນວຄິດຂອງລັດທິມາກ-ເລນິນ, ແນວຄິດໂຮ່ຈີມິນ, ໂດຍສະເພາະແນວຄິດ ແບບແຜນ ແລະ ຄວາມກ້າຫານດ້ານການຕ່າງປະເທດ ຂອງປະທານໂຮ່ຈີມິນ, ຂະແໜງການຕ່າງປະເທດຫວຽດນາມໄດ້ປ່ຽນແປງໃໝ່ຈິນຕະນາການແລະວິທີການຢ່າງຕໍ່ເນື່ອງ, ປົກປັກຮັກສາຢ່າງໝັ້ນຄົງແລະຮັບໃຊ້ຜົນປະໂຫຍດຂອງປະເທດ-ປະຊາຊາດຢ່າງມີປະສິດທິຜົນ, ນັ້ນແມ່ນ: ຮັກສາສະພາບແວດລ້ອມສັນຕິພາບ ສະຖຽນລະພາບໄວ້ຢ່າງໝັ້ນຄົງ, ເຮັດໃຫ້ຫວຽດນາມຢູ່ໃນຕຳແໜ່ງທີ່ໄດ້ປຽບທີ່ສຸດ ຕໍ່ໜ້າການປ່ຽນແປງຂອງສະຖານະການ ແລະບັນດາທ່າອຽງຂອງຍຸກສະໄໝ, ປະກອບສ່ວນຢ່າງມີປະສິດທິຜົນເຂົ້າໃນການກໍ່ສ້າງແລະປົກປັກຮັກສາປະເທດຊາດຫວຽດນາມສັງຄົມນິຍົມ./.
------------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 959 (ເດືອນກຸມພາ 2021)